مكنتش عارف مصدر الصرخه دي جايه منين؟... ولقيت جدي بيشدني وبيقولي ملكش دعوه.. وانا كنت باصص ورايا وعايز اعرف في ايه؟
لكن فجأة بيت الست بدأ يولع.. النار مسكت فيه من كل حته
المنظر كان صعب.. فضلت اقول لجدي سيبني خليني اساعدها سيبني يمكن اعرف اخرجها من البيت
بس جدي كان رافض ومكلبش في ايدي وبيشدني ناحيه البيت عشان نرجع تاني
لكن هو بيشدني وقع على الارض.. جريت عليه وقومته ورجعته على البيت وبمجرد ما دخلنا البيت.. اتكلم وقال
_ سيف لم هدومك وارجع على بيتكم.. انت سالت علينا واحنا كويسين ارجع على بيتكم احسن
= انا مش هرجع يا جدي غير لما افهم اللي بيحصل بالضبط.. مين الست دي وازاي بيتها اتحرق؟ وايه علاقتها بموت مريم؟
_ يا ابني متتعبنيش معاك.. انا مش هقول حاجه انا مش عاوز مشاكل
= مشاكل اي يا جدي؟.. ومع مين؟... انا شوفت الاستاذ مرقص ومراته مشنوقين في البيت عند الست دي.. وكان في اوضه..
_ اسكت.. اسكت يا سيف متتكلمش انا مش عايز اعرف حاجه.. ادخل نام دلوقتي والصبح تاخد هدومك وتمشي انا مش عاوز مشاكل قولتلك
= حاضر يا جدي انا هريحك وادخل انام والصبح همشي
...
دخلت اوضتي بعد النقاش مع جدي.. وعرفت ان مفيش فايده، جدي مش هيتكلم ومش هيحكي حاجه
فتحت الشباك وبصيت منه، المطره كانت بدأت تهدى الجو بدا يتعدل
بصيت في الساعه كانت 3 الفجر.. ازاي عدى الوقت ده كله؟
قررت اني انام، دخلت السرير واتغطيت ونمت.. فتحت عينيا لقيت نفسي في المقابر.. انا ايه اللي جابني هنا؟
وشوفتها واحده ست.. هي هي الست صاحبه البيت كانت ماسكه في ايدها قط اسود وبتدبحه بمنتهى الوحشيه، كانت حاجه صعبه
ونزلت بالقط لقبر مفتوح.. وسمعت كلام غريب وهمس وبعدها خرجت الست دي وفي ايديها الشوال وفضلت ماشيه
ووقفت قدام قبر .. وخرجت من الشوال عضمة مكتوب عليها بالدم حروف متفرقه ودفنتها جنب التربه
وبعدها رفعت الشوال ومشيت
...
صحيت على صوت رنه تليفوني، كان اللي بيتصل ادهم وبيقولى
_ ايه يا عم كل ده نوم الساعه 12 الضهر
= مش عارف انا نمت كل ده ازاي يا ادهم؟... المهم جدك كويس؟
_ اه الحمد لله اطمنت عليه.. نقدر نرجع النهارده ان شاء الله
= لا يا ادهم.. ارجع انت انا قاعد شويه هنا مع جدي عشان في موضوع بس معايا
_ تمام ماشي مفيش مشكله.. بس اديني العربيه عشان انت عارف ان المواصلات هنا زي الزفت
= مفيش مشكله خدها.. وانا ابقى اتصرف لما اجي ارجع
_ انت كويس يا سيف.. حاسس ان صوتك غريب وانك مخبي حاجه عليا؟
= لا مفيش.. هخبي عليك ايه؟... انا بس لسه صاحي ومش عارف انا نمت ده كله ازاي؟
_ طيب خلي بالك من نفسك.. سلام
...
بعد ما قفل معايا ادهم.. قومت ودخلت الحمام وفطرت.. ولقيت جدي قاعد قدام البيت سرحان
صبحت عليه وقولتله
انا حاسس ان انا تعبان النهارده يا جدي وجسمي مكسر، هقعد النهارده وهروح بكره
رد عليا وقالى
على راحتك يا ابني.. خلي بالك من نفسك وملكش دعوه بحاجه متخصكش
...
سكت ومردتش عليه.. لكني رجعت وقولتله
انا هروح ادي لادهم العربيه عشان هو راجع القاهره النهارده، وانا همشي بكره ان شاء الله
مردش عليا وانا اخدت العربيه ومشيت.. وروحت لادهم وقولتله
اركب يا ادهم هتيجي معايا مشوار
= مشوار ايه ده يا سيف؟... هو في حاجه حصلت ولا ايه؟
_ اركب بس وهفهمك في الطريق
...
ركب ادهم واتحركنا على المقابر.. لما وصلنا ادهم بصلي باستغراب وكان عاوز يسال في ايه؟
لكني قولتله
هفهمك كل حاجه بعدين
نزلت من العربيه انا وادهم واتمشينا جوه المقابر.. وفضلت ماشي لحد ما وصلت القبر اللي شوفته في الحلم.. نزلت على ركبي وفضلت احفر
ادهم بصلي وقالي انت مجنون؟.. انت بتعمل ايه هتودينا في داهيه الله يخرببيتك؟
مردتش عليه وفضلت مكمل.. لحد ما سمعت صوت واحد بيقول
_ بتعمل ايه عندك يا افندى منك ليه؟.. يا نهار ابوكم اسود كده في عز النهار عايز تسرق جثث كده عيني عينك
= اسرق اي يا عم انت؟.. انت مش فاهم حاجه
_ ومش عايز افهم.. انت حرامي وانا مش هسيبك وهلم عليك اهل البلد كلها انت واللي معاك ده
= يا عم انت افهم... في حاجه مدفونه هنا قدام القبر ده واللي دفنتها الست اللي ساكنه في البيت المبني من الطوب الابيض اللي في شرق البلد
_ انت تقصد الست نبوية؟!.. ربنا يجحمها مطرح ماراحت دى وليه
كا.. فره لعنت البلد كلها وجابتلها الفقر
= لا على مهلك بقى وفهمني، ايه اللي حصل وهي راحت فين؟
_ وماله افهمك... بس لو طلعت صادق في الاول انا هسيبك تكمل حفر قدامي، لو طلعت حاجه زي ما بتقول.. انا هحكيلك او هقول لك تعمل ايه؟
= طيب تمام.. وسعلي كده
...
ورجعت تاني احفر.. لحد ما خرجت بالعضمة اللي شوفتها في الحلم
الراجل اول ما شافها شهق، وفضل يقول اعوذ بالله.. اعوذ بالله من الشيطان الرجيم
بصتله وقولتله
= ها.. ممكن بقى تحكيلى او تقولى اعمل ايه؟
_ انت تاخد اللي انت لقيته ده.. وتروح على بيت الاستاذ مرقص وهناك هما هيفهموك كل حاجه.. بس نصيحه مني بلاش الموضوع مش سهل
ومش هيسيبوك.. صدقني لو خايف على نفسك ابعد عن الموضوع ده كله ورجع الحاجه دي مكانها، اصل خلاص البت ماتت
= يعني انا فاهم صح.. الموضوع ده ليه علاقه بمريم بنت الاستاذ مرقص.. طيب مين الست دي وعلاقتها ايه بيها؟
_ بص يا استاذ انا معرفش حاجه.. انت تاخد بعضك انت والافندي اللي معاك وتمشوا من هنا.. عاوز تاخد الحاجه دي معاك خدها وروح بيها للاستاذ مرقص ويمكن هو يفهمك.. ولو عاوز تكبر دماغك ادفن الحاجه دي زي ما كانت واتكل على الله
= طيب معلش طلب اخير.. شوفلي كيس ولا حتى اي حاجه ادس فيها البلوه دي
_ حاضر.. هجيبلك حاجه تداري فيها البلوه دي
...
الراجل اتحرك ورجع وفي ايده قماشه وقالى لفها في دي.. شكرته ومشيت
اخدت العربيه وروحت على بيت الاستاذ مرقص.. وصلت وخبطت على الباب مره واتنين.. لحد ما الاستاذ مرقص فتح الباب
كان على وشه ملامح الحزن والتعب.. طلبت منه اني اتكلم معاه
ورغم اللي هو فيه قالى اتفضل
دخلت وقعدت في الصاله وبدات احكيله كل حاجه شوفتها في الحلم، مراته كانت حاضره القاعده والغريب انهم كانوا مش مستغربين من الكلام وباين عليهم انهم عارفين كل حاجه
لحد ما فكيت القماشه وخرجت العضمة
...
لقيت مراته قامت وبرقت وصرخت.. ووقعت على الارض وبدأ جسمها يتنفض وبوقها نزل منه رغاوي بيضة.. الراجل جري على مراته وكان بيحاول يفوقها.. وانا كنت واقف ومش عارف اعمل ايه؟
لكن فجأة الست زقت جوزها وقامت ومسكتني من رقبتي كانت بتخنق فيا وبتقول
رجع العضمة مكانها... رجع العضمة مكانها
...
جوزها رجع جري عليها وكتفها.. وفي الوقت ده سمعنا اهل البلد بره بيصرخوا فتحت الشباك وبصيت.. كان كل اهل البلد بيجروا ناحية المقابر
نزلت بسرعه من بيت الاستاذ مرقص وكان ورايا ادهم.. ووصلنا المقابر وهنا شوفت اخر حاجه كان ممكن اتوقع انها تحصل... يتبع الجزء الثالث والاخير
...
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!