في قبر كانت النار ماسكه فيه والناس كانت بتحاول تطفي النار، لما قربت عرفت انه قبر الست نبوية، لكن الغريبه ان احنا كنا سامعين صرخات خارجه من جوه القبر
الناس كانت خايفه تقرب اكتر من كده.. ولقيت واحد من الناس بيقول
هو اللي اسمه عطيه ده فين؟
عرفت ان ده التربي اللي قالنا نروح بيت الاستاذ مرقص.. الناس بدأت تسأل بعضها هو فين؟
لكن مكنش ليه أثر.. وعلى الاساس ده كل الناس اتحركت ناحيه الاوضه بتاعته خبطنا مره واتنين ولما محدش رد كسرنا الباب
المنظر جوه كان مفزع.. عطيه التربي مضروب ب 10 طعنات ومدبوح كمان.. بس مين الشخص اللي ممكن يكون قتل حد بالوحشيه دي؟
...
وقتها جهل اهل البلد وصلهم انهم يقولوا.. اكيد روح نبويه هي اللي عملت فيه كده.. اكيد اتكلم عن الماضي وحكى حاجه وعشان كده مات
بصراحه ورغم الموقف اللي احنا واقفين فيه كنت عاوز اضحك
روح ايه اللي تقتل بسكينه وتدبح لا لا اللي حصل ده في حد وراه
الناس كلها اتفقت وقتها انها هتبلغ الشرطه عشان تخلى مسؤوليتها من اي مشاكل
وفعلا بلغوا الشرطه.. لكن قبل ما الشرطه توصل كنت بفحص المكان بعينيا.. لكني شوفت ايد عطيه مقفوله على حاجه، خوفت المسها عشان البصمات.. بصيت حواليا كانت الناس كلها خرجت بره الاوضه وبتتكلم واستغلت الموقف ومسكت عصايه وحركت ايد عطيه التربي.. ووقع منها مفتاح.. المفتاح ده شكله مش غريب عليا لكن مش فاكر انا شوفته فين؟
رجعت خرجت من الاوضه ومفيش 10 دقائق والشرطه وصلت، الظابط طلب من الناس تروح عشان يشوفوا شغلهم
اما انا فكنت عاوز افهم؟.. ايه حكايه مريم والست نبويه؟
وعشان كده روحت على بيت الاستاذ مرقص من تاني.. خبطت على الباب ولما فتحلي بصلى وقالي اؤمر عاوز ايه تاني؟
= انا جاي عاوزك تفهمني.. ايه اللي حصل بالظبط ومال بنتك مريم بالست نبويه وايه اللي حصل؟
_ عاوز تعرف ليه؟.. طبعا عشان تكتب عن الموضوع وتخلي سيرتنا على كل لسان مش كده؟!
= لا حضرتك انا عايز افهم عشان عندي فضول.. انا بشوف حاجات غريبه ومش عارف ليه انا بشوفها، رغم ان الموضوع زي ما قلت حضرتك ميخصنيش.. ويمكن اكون عايز افهم عشان ارتاح في رابط في الموضوع ده مخليني عاوز افهم
_ طيب اتفضل ادخل وانا هحكيلك كل حاجه
...
دخلت وقعدت وطلب الاستاذ مرقص من مراته انها تسيبنا لوحدنا.. ولقيته راح ناحيه درج في الصاله وخرج منه صوره وقال
دي مريم واللي معاها في الصوره دي نادين.. كانوا اصدقاء من هما صغيرين.. نادين تبقى بنت الست نبويه.. وحرفيا نادين كانت على طول عندنا بتيجي تقعد مع بنتي.. مكنش في اي مشاكل
وانا وامها كنا فرحانين جدا انه في حد بيزورها وبيحبها وبيخاف عليها ومريم كانت بتعتبر نادين اختها
بس تعمل ايه في الحقد والغل اللي احنا كنا سبب فيه.. في مرحله الثانويه العامه نادين جابت اكتر من مريم ودخلت كليه الطب اما بنتي فحصلت بالعافيه كليه علوم.. بس حلم بنت مريم انها كانت تكون دكتوره ومش اي دكتوره لا دكتوره تشريح
ومع فشلها في تحقيق حلمها، كنا احنا بنكمل عليها بكلام اثر في نفسيتها من نوعيه هي احسن منك على الاقل رفعت راس اهلها.. هي كانت بتذاكر وتيجي تشغلك عشان تنجح.. انتي فاشله انتي مش نافعه
البنت كانت بتتاثر بالكلام ده جداً.. بس مكناش نعرف انها هتوصل لكده
في يوم كنا قاعدين ومريم ونادين خرجوا مع بعض.. وبعدها سمعنا صوت صراخ في الشارع لما بصينا لقينا نادين واقعه غرقانه في دمها والناس كلها بتقول مريم هي اللي زقتها قدام العربيه
لكن مريم كانت بتحاول تدافع عن نفسها وبتقول انا كنت بحاول ابعدها انا مكنش قصدي اموتها.. لكن النظره اللي كانت في عيون بنتي اللي محدش فاهمها غيري، بتقول عكس كده.. بتقول ان انا اللي قتلتها ومش ندمانه... الست نبويه يومها رفضت تتهم مريم بقتل بنتها
بصراحه محدش كان فاهمها.. لكن بعد مرور اسبوع واحد بنتي بدات تتعب تعب رهيب.. بطلت تاكل جسمها بدا يخس كانت تقوم من النوم بالليل تصرخ وتقول انها بتشوف ناس شكلها وحش
محدش كان فاهم في ايه؟
لحد ما بنتي تعبت خالص ومقدرتش تستحمل التعب وماتت
الكل قال اخدت نصيبها وفي ناس كانت شمتانه في موتها.. لحد ما في يوم الناس صحيت على بيت الست نبويه بيولع ومحدش كان عارف السبب ايه؟
لكن الشرطه لما جت بعد انتهاء الحريق.. لقيت جوه عضم متفحم عضم بني ادمين.. واتعرف ان نبويه عملت لبنتي عمل ومش لبنتي بس ليا انا ومراتي كمان.. لكن واضح انها عملت حاجه غلط وهي دي اللي اتسببت في موتها.. بس ده كل اللي اعرفه
= طيب وعطيه التربي ايه علاقته بالموضوع؟
_ معرفش.. صدقني معرفش
...
سبت الاستاذ مرقص ومشيت.. قد ايه الحقد والغل قدر يدمر اي حد، يدمر اي علاقه.. اللي بتزرعه في ابنك او في بنتك بيكبر يوم بعد يوم وبيتحول لكره وممكن يوصل للقتل
رجعت على بيت جدي.. واول ما دخلت لقيت جدتي قاعده وبتلطم وجنبها جثه جدي.. وايدها كانت بتترعش شويه وهي بتديني جواب
فتحت الجواب وانا مش فاهم حاجه.. وكان مكتوب( سيف لما تقرى الكلام ده انا هكون مش موجود هكون خلاص مت.. انا بطلب منك تسامحني.. الصوره اللي انت راسمها لجدك في خيالك مش صحيحه انا كنت انسان سيء.. لما حصل موضوع موت بنت الست نبويه.. البلد كلها كانت مقلوبه والست نبويه كان قلبها محروق على موت بنتها.. وعشان كده لجأت لشخص كان معروف زمان انه بيمارس السحر وبيعرف يأذي لكنه بطل.. الشخص ده يبقى انا.. طلبت مني انها عايزه تعمل سحر لعيله الاستاذ مرقص كلها.. في البدايه رفضت لكن مع الالحاح وانا شايف ام اتحرمت من بنتها بسبب الغل والحقد والكره وافقت.. اديتها طلاسم وقولتلها هتتصرف ازاي وهتعمل ايه
وحق بنتها هو اللي كان بيحركها انها تعمل كل الخطوات صح.. وساعدها على ده عطيه التربي اللي للاسف بغبائها حكيتله انها واخده الطلاسم دي مني.. وبعد ما المهمه تمت كانت عايزه تتوب بس اللي بيدخل السكه دي ويحاول يخرج منها لازم يأمن نفسه ويحصن نفسه لكن هي مكنتش تعرف كده.. وعشان كده ماتت محروقه في بيتها.. وخلاص انا قولت الموضوع خلص.. لكن عطيه ظهر وهددني وقالى انه هيفضح كل حاجه بسبب ان انت بتدور ورا الحقيقه.. كان عايز يحكيلك اللي حصل كله وعشان كده قتلته ايوه انا اللي قتلته ولما جيت هنا حسيت اني بموت فكتبت ليك الجواب ده وبطلب منك تتصرف وتفتح قبر مريم.. هتلاقيه كله اعمال وبلا ازرق خد معك شيخ وخليه يطهر القبر ده من البلاوي اللي فيه قبل ما الاذيه تطول مرقص ومراته.. سامحني يا سيف ارجوك)
قفلت الجواب وانا دموعي ومش مصدق اللي قريته.. ومش عارف اذا كنت هقدر اسامحه ولا لا.. بلغت اهل البلد بموته
وادفن جدى وانا قررت احفظ السر للابد.. وطلبت من شيخ البلد بعد استأذان الاستاذ مرقص ومراته انهم يفتحوا قبر مريم ضروري ولما اتفتح خرج منه بلاوي ومشيت مشيت من البلد ورجعت تاني القاهره بعد ما عشت حكايه صعبه ومقدرتش احكي اي حاجه لادهم
رجعت الجريده كل الناس كانت بتعزيني وانا سرحان في اللي مريت بيه
لكن وانا قاعد جالي شخص كبير في السن شويه كان لابس بالطو اسود وعلى دماغه وطاقيه صوف وقال
_ حضرتك الاستاذ سيف نبيل؟
= ايوه مين حضرتك؟
_ انا جاي عشان تنقذني، انا واقع في مصيبه ومحدش هيعرف ينقذني غيرك
= مصيبه ايه وهنقذك ازاي؟
_ انا بحلم بالشيطان.. بحلم بيه كل يوم وبيطلب مني اقتل مراتي وعيالي.. انا كنت بعارضه بس المره دي مقدرتش
...
وخرج من البالطو سكينه غرقانه دم وقال المره دي مقدرتش
انتهت احداث الرواية نتمني أن تكون نالت اعجابكم وبانتظار آراءكم في التعليقات
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!