رواية قضبان الجنوب ( فصلية ) الفصل العاشر 10 - بقلم Hend_AlBoor

و خـطَّ قـلـم الـقـدر ...
لـقـائـي بـك ِ .. كـ اسـطـورة ..!
مـحـت اسـطـورة درب الـتـبـانـة

شبييي وووووكف هيييييج يااااالله

لفت خطف و بسرعه ... ضربت السيارة حيل .. بالي كله يم ابني ..

داااانياااااااال ..

دانيال : نايم فجاءة انضرب راسي بالجامه حيل .. بحيث نكسرت براسي

كبيت من النوم ابوية صاح .. و يحاول يسيطر ع السيارة ..

ابو حياة : من لفت خطف و اني احاول مادعم السيارة .. خفت ع ابني لان مرتخي من نايم ..

شكد حاولت مادعم السيارة بس جانت حيل قريبة مني .. بحيث خلفية سيارتي دعمتهم .. انتبهت عليها نكلبت مرتين

ستررررك ررررربي

دانيال : صحيت بس فايت الاوان لان نص الكزاز بلعته من نكسرت براسي .. و من ندعمنا طرت و نضربت بالامامية ..

ابو حياة : وكفتها .. و نزلت اركض ع السيارة حتى مانتبهت لابني اتاذى لو لا ..

ساعدوني عالم وكفوا سيارتهم .. طلعنا البيها من الجامة .. ركضنا بيهم بسيارة خير ..

التهيت اسعف الشباب و العالم ساعفه ابني وراية ..

الطريق جان اقرب لبعقوبة من بغداد .. لهذا اسعفناهم لمستشفى بعقوبة لان ينزفون و فاقدين اثنينهم

بقيت كاعد يم ابني بالطوارئ و ادعي الله تعدي ع خير ..

واحد منهم حولوا لغرفة العمليات ..

دانيال : خوما مات احد يابة

ابو حياة : لا ابني .. بس نزف هواي ..

دانيال : حال ابوية متوتر .. كاعد ع اعصابه ..

حولني الدكتور مفراس خاف لا اكو ضرر بالجمجمة .. بس الحمدلله جانت الضربة مو حيل قوية ماسببت فطر او شي ..

بس جتفي نخلع من نضربت بالجامة الامامية .. متت من طكولياه و رجعوا بمكانه .. انطوني مسكن و نمت مادري بعد ..

ابو حياة : ضمدوا ايدي من جروح الحادث .. بقيت انتظر اهل الـ دعمتهم يجون .. ماكدر اخذ ابني و اطلع و اعوفهم ..

الممرض انطاني اجهزة الشباب بلكي احد يتصل حتى ابلغهم اكيد اهليهم قلقوا ..

جهاد : دكيت ع ابو نمر ميرد .. دكيت ع خالد ماكوووو .. قلقت كلش .. بقيت ادك لحد ما رد

📲 الووووو خاااالد

ابو حياة 📲: السلام عليكم ابني

جهاد 📲: ياهو انت ..؟ وين خالد .. هاذ جهااازه .. منوو ااانت ..؟؟

ابو حياة 📲: ابني اهدا .. بس اهدا حتى اعرف افهمك

زينة : جهاد يتصل بالحوش و يصيح ..

خايبة زلمتج جاي يتصل لو يتعارك شماله هيج حسه عالي

تين : هههه احسن حتى اعرف بكل اتصالاته

زينة : هو السلف كله عرف مو بس انتي

جهاد 📲: ياهووو انت .. شجاي تسوي بجهاز اخوووي ..؟

ابو حياة 📲: الشباب اتعرضوا لحادث سير و حاليا بمستشفى بعقوبة

جهاد : ياااا مشفى .. خاااالد شبيييي .. وووووين هااذ اااااالمشفى ..؟

ابو حياة 📲: مابيهم شي اهدا ابني .. المستشفى بديالى ..

زينة : يمةةةة اخووووووي ...

تين : طفرنا انا و زينة ع صياح جهاد مشفى و خالد ..!!!!

الجد : بوووية ابنيييي .. جهااااد شصااااير ...؟

جهاد : سديت خط ..

بوووية خالد و ابو نمر مسوين حادث و هسة بمشفى بعگوبة ..

الجد : لييييش وااااكف امممممش ودننني عليهمممم

جهاد : ركضت للسيارة .. اخذت جدي و طلعنا بوجهنا لديالى .. وصلنا بعقوبة سئلنا سيطرة عن المشفى .. دلونا بيها

وصلنا نص الليل .. جدي اول مطبينا المشفى كلب الامة .. دكيت ع الجهاز جاي اوصل للزلمة .. وصلناله و جدي لزم الزلمة يهد و يصد ..

بووية اكعد بس اكعد خلني افتهم .. هدددي لا ياخذونة الامن هاذ مشفى

ابو حياة : رغم الـ شفته اول ما طب ابوهم .. ما يبشر بخير .. بس مترددت .. كدام الله ابري ذمتي .. و الله يستر

حجي الولد مابيهم شي ان شاء الله

الجد : جااااي اكلللك ااااابني وووين

ابو حياة : دخلوهم لغرف العمليات ..

جهاد : انا واكف ع اعصابي .. ارد افتهم

عمي فهمني شلون الحادث ..؟ احد دعمهم ...؟؟ نكلبت سيارتهم من الله

الجد : ذبحوووهم .. ذبحووا الشيخ .. و ااااانت وووواكف

جهاد : بوووووية خلنيييي افتهمممم

ابو حياة : عمي الحادث مو متقصد محد ذبحهم كول يالله .. سيارتهم صارت بطريقي اني حاولت اتفادى الحادث بس ربك شاء و قدر

جهاد : انا حسبالي حادث سير عرضي ما احد داعمهم من حجى هيج اعصابي فارت ..

ياهووووو الـ سياااارته بطريقك جااااا داعمهمممم و واااااكف كبااااالنا

ابو حياة : ابني اهدا داكولك مو متقصد اني ماعرفهم حتى .. ليش داشرد و ما اوكف كبالك ما سويت جريمة

جهاد : جاي اتصايح وية الزلمة طبوا ولد عمام ابوي و خوالي الدنيا نكلبت ..

ابو كرار ( ابن اخو الجد) : طبينا شفنا جهاد يتعارك و يصيح

جهااااد .. ما هيج كالوهااا .. خلك بالاصووول

الممرض : اذا ممكن اصواتكم ترا هاي مسشتفى ... تفضلوا خارج البناية حلو المشاكل ..

ابو حياة : طلعنا من البناية بالشارع الـ بداخل المستشفى .. حسيت جايتني مشاكل لا الها اول و لا تالي .. بس لا حول و لا قوة الا بالله ..

دانيال : كعدت من النوم ماكو ابوية طلعت ادور عليه .. بقيت قلقان من ورا الحادث .. من بعيد شفت ولد يصيح و عالم كلها معگلة و دشاديش كلهم حول ابوية ..

اني امشي و اعرج اريد اوصللهم .. انوب مشوا طلعوا برا .. بقيت وراهم .. و ادعي الله يعبرها ع خير .. دك الجهاز

📲الو .. ها يوم

ام حياة 📲: يمة وينك و ابوك .. صار نص الليل و ماكو ..

دانيال : يمة بالمستشفى ماكو شي

ام حياة : يمةةةة شصااااير ..؟؟ ابوووك شبيييي ...؟

حياة : كاعده اتابع كارتون وون بيس ع تطبيق كارتون بلاس

سمعت امي صاحت .. نزلت ركض

شبي ابوووية يووم ..؟

دانيال : مابي .. مابي يوم اهدي .. بس حادث بسيط

ام حياة : بيااا مستشفى وووين انتوو يمة

دانيال : هنا يمكم بعقوبة العام

ام حياة : قفلت خط .. امشيي يمةة بسرررعة بدلي .. ابوج و اخوج مسوين حادث

حياة : دقايق يمةة بس اغير هدومي

صعدت ركض ع السريع لبست اي شي صار گدامي و نزلت

طلعنا تقريبا بالـ 1 بالليل .. رحنا مشي لان مو بعيده المستشفى .. او بالوصف الصحيح ركضنا .. لان امي تركض و تدعي الله و اني ممفتهما شي كمت ادعي وياها

جهاد : عمييي ذابح اخووووتي و تحجيلي بالاصووول .. اهجمممم الدنيااااا ع راااااسه .. دم اخووووي و انااااا وياااااي

ابو كرار : مايضيع حگ و لا دم الشيوخ بس الوادم وراهم عشاير لا توكع دم جهااااد

يگعد الجد بالگاع

شماااالك عمييي ..

الجد : بوية .. بوية .. مختنك بعدوا رايد هوا ..

جهاد : كوووم .. بووية كوووم ع الدكتور خلهم يعاينوك

الجد : لا لا .. خلني اخذ هوا ربك .. ماريد الدكاترة ..

جهاد : بالعباااااس اذا صار شي بجدي ااااخذ رووووحك

ابو حياة : بقيت واكف و صافن ع البلاوي الوكعت ع راسي و كلهم ملتمين .. مثل القابضين ع مجرم .. هجم علية يصيح و يهدد

دانيال : وصلت يمهم هجم الولد ع ابوية .. و يصيح بوجه ابوية

صووتك ع ابوية .. شبييك انت

ابو حياة : دانياااال

جهاد : هاااذ ابنك ..!!

يجره من ياخته

هااااذ الاخذذذ روووحه عوووض

ابو حياة : عمي عووفه كوول يالله ترا ماتنحل بالدم اخووتك جوا رحمة الله ادعي ابدال ما تتعارك

ابو كرار : جهااااد .. هد الزلمة ماتشوةةفه متصاوووب

دانيال : سحبني حيل من ياختي ردت اصيح من الالم لان جتفي مخلوع .. كام يصيح لزمت ايده عصرتها حيل و نزلتها عني

شبييك هي تايهة .. شنو ماكو قانون تذبح و تدفن ع كيفك

جهاد : خليييت القانووون الك .. ما يحكم دمنا قانووون

دانيال : عفته و رحت ع ابوية .. حجيت بهدوء

شنو الموضوع يابة .. شلون صاروا الولد ..؟

ابو حياة : والله يا ابني مادري اذا هو اخوهم لاهي عنهم و حاير بالصياح و المشاكل

دانيال : شكو واكف يمهم امشي ارتاح ..

ابو حياة : شارتاح ابني متشوف الحال .. انت ليش طلعت مو زين عليك

دانيال : مابية شي .. قلقت عليك بس

ام حياة : يمةةة .. ابننننني .. راااائددد هااااي شصاااااير ..؟

حياة : وصلنا للمستشفى اول ما طبينا شفناهم بالشارع الداخلي .. رحنا ركض گلبي وجعني من شفت داني ملفوف راسه و جتفه .. بقت امي تبوس بي

شصاير يابه ..؟

ابو حياة : مصاير شي .. اهدئن

جهاد : ياااا ما صااااير .. جااا ياهووو الـ بين الموت و الحياة جوااا

حياة : كبيت من صاح الولد .. صوته حيل ثخين و خشن .. لهجته مبين جنوبي ..

ام حياة : رائد .. خوما مات احد ..

ابو حياة : لا الله لا يكولها .. ان شاء الله يطلعون ع خير

حياة : اباوع ع الرياجيل كلهم عبي و معگلين .. عبالك شيوخ .. و عطر المسك گاب بالجو ..

متجمعين حول شايب كاعد .. و هذا الولد ينبص من يمه و يصيح كل الشر بوجهه

ابو حياة : ( بهدوء ) اخذي البنية و ارجعي مريم

ام حياة : ماروح .. ماتحرك منا الا وياكم

ابو حياة : السالفة مو هينة عيوني مانطلع هسه .. بالزايد اذا اتنازلوا الجماعه القانون يتخذ اجراء

دانيال : منو يتنازل هذولا .. يابة ع كلامه هذا واحد مايتفاهم الجهل و التقاليد حاكمه حياته

ابو حياة : دانيااال .. اكرمني بالسكوت و لا تتبالش وياهم ما ناقصين مصايب اكثر

ام حياة : ماكلين لو لا يمة .. التعب هالككم سودة علية

ابو حياة : لا منو له نفس ياكل ياعيوني

حياة : بابة انتو طبوا جوا اكعدوا .. اني هسه اروح للكافتيرا اجيب شي تاكلوا

ام حياة : امشوا .. امشوا .. يلله يمةة .. يلله ابو حياة ..

جهاد : التهينا بجدي لان تعب .. ماحسيت الا عليهم جاي يطبون جوا

وووين ..؟

ابو حياة : عمي مانشرد .. كاعدين جوا لو انريد نشرد جان عفت خوانك و ما سعفتهم ..

حياة : رحت لكافتيرا المستشفى يم البوابة الرئيسية .. اخذت لفات و ببسي لابوية و داني .. و رجعت لكيتهم كاعدين بمقاعد الممر الرئيسي

ليش مترجع تنام ع السدية .. انت متاذي ..

ام حياة : صارلي ساعه اتوسل بي .. احجي وياه مديقبل

دانيال : دمي محترك ع ابوية و ع الديصير .. اشوف القلق و الالم الـ بوجهه و دافهم بشنو يفكر .. بس هي مو تايهة حتى يذبحوني ..! اكو قانون و دولة

مابية شي يمة .. مابية

ابو كرار : عمي هاي السالفه بعدين نشوف شنسوي بيها .. المهم هسه الشيخ و ابو نمر شفتوهم شلونهم وينهم

الجد : لا انا عگلي طار .. و ان طلعوا سالمين انا اذبح لوجه الله

جهاد : انا اطب اشوفهم بوية

الجد : خذني وياك ماكعد بعد هان

جهاد يدخل يسأل عن اخوته يتوقف يم غرفة يسأل الممرض

الممرض : لا عيني مرة داخل الغرفة ..

جهاد : جا خوية وينه .. وين وديتوا ..؟

الممرض : ماعرف اخي دورهم بغرف الانعاش لو بالطوارئ

يستمر بالبحث بالغرف يشوف اخو نايم راسه مضمد و صدره

خووويةةة ..

ابو نمر : خااالد .. خاالد وين جهاد ..

جهاد : انااا جيت انشد عنه ..

الجد : بوووية الغااالي .. شماالك لييش هيج شنييي اليووجعك

ابو نمر : اخوية يوجعني جددي .. خاالد وين .. دورو خالد

ــــ يـوم الـحـادث ـــ

خالد 📲: ليش ما رجعتي وية النسوان سوووسن .. جا شدزلج بعد .. ماتعگلين و تردين بيتج .. بنتج جاي تموت بجي عليج ما بيج رحمةة شنيييي

سوسن 📲: ماردن و طلكني .. خل مروو تفيدك شييخ

خالد 📲: لاي اله الا الله .. ولج بابةةةة فكيني من هالافكاااار .. لو اريد اتزوج ماخذ رايج .. ردددي لبنيتج لااا تعانددديييين

سوسن 📲: ماتكووول اردن الك يعني متزوووج علييي خاااالد .. ما محتاجنيييي .. انا ارفع عليك دعوة و اسحب البنية اشووووفن شلون ما تطلك

خالد : سديت الخط بوجهها ..

نسوووان ما براسجن عگووول ..

ابو نمر : طلعت من الغرفة اتفقت وية خالد اودي اليوم علمود الفحص الدكتور كال اريد احدد عمليته ..

مو زين عليك الصياح خوية .. الدكتور شكال ..؟

خالد : تعبت .. انا يطبني ستين مرض .. البنية المن تبقى فهمني

ابو نمر : شداتحجي .. عمرك طويل .. انت ابوها الها

خالد : خلنييي ساااكت و امششي

رحنا انا و ابو نمر للدكتور ابغداد .. عندي مرض القلب .. و كلما جاي اكبر كلما يتازم وضعي الصحي .. لكن اكابر ع المرض

الدكتور كالي العملية نسبتها ضعيفه كونن عضله القلب تالفة .. و يوم عن يوم جاي يقرب موتي .. مابقى الهواي ..

رجعنا المغرب ..

ابو نمر : كلام الدكتور .. ضربات السيف بظهري جانت ارحم من كل حرف حجاه ..

خالد : انا جاي اموت يوم ورا يوم .. ابو نمر ..

ابو نمر : سويها .. الله رحيم خالد

خالد : يكلك اذا سويتها و نجحت اطلع و اذا منجحت ميت .. خلني عايش هالـ كم يوم لبنتي لحد ما الله ياخذ الامانه ..

ابو نمر : خااالد ..

خالد : خلك بالواقع .. اخوك جاي يموت .. لا تحجي لاهلي .. خلها سر ..

انا حاس بروحي ماتكمل السنة ..

ابو نمر : عمرك طويل ..

خالد : ابو نمر .. الموت يرهب .. مايعرف رجولة .. العاف وراه اعزاز و الماعاف يهابه .. كلها تحيد منه ..

ابو نمر : هو يحجي و اني احاول الزم دموعي .. حسيته ما رايد الموت هسه .. اني ماتحمل فكرة فقدانه ..

خالد : يلله ههه كلنا نموت .. شمالي انا كمت ماعرف احجي ..

جاي تمشي بينا السيارة .. مخليت ابو نمر يسوق .. ردت انا حتى اشغل تفكيري بالسياقه و الطريق .. فجاءة طك التاير

ابو نمر : الله .. بنجر .. لا تووكف خالد ننكلب ..

خالد : اعرف .. اعرف

الحمدلله عدت ع خير

ابو نمر : انتبهت .. السيارة وكفت بتقاطع شارعين .. وكفت بطريق سيارة ع خط سريع .. حاول صاحبها يتفادانا .. وراها محسيت بشي

خااااااالد ...

ــــ رجــــوع ــــ

ابو نمر : خاالد .. خااالد بووية .. ووينه

جهاد : هسة ادوره لا تحجي ارتاح

يطلع يدور يشوف الدكتور

دكتوور اخوي وين ..؟

الدكتور : منو اخوك ..؟

جهاد : مسوين حادث .. اثنين .. اثنين قبل نص ساعه جانو بالعمليات

الدكتور : واحد بغرفة الانعاش و واحد بالطب العدلي .. الله يرحمه و يصبركم

جهاد : خاااااالد .. خااااالد .. بوووووية خااااالد

يركض بالممر مثل المخبل

حياة : انتبهنا ع الولد طلع يركض .. رجع يصيح و يبجي منهار ..

بابا

ابو حياة : اخذي ابنج .. كووومي اخذي ابنج و بنتج

ام حياة : ووين .. راااائد ماروووح

ابو حياة : اخذييييييهم و اطلعيييي

داينال : يابةةة ماااااطلع

ابو حياة : دانياااااال .. اااااخذ اااامك و اااااختك ..

حياة : سحبني و سحب داني من ايدينا و كام يركض .. و امي تركض وراه

اني انهاريت كمت ابجي بدون ماعرف شكو .. بس حال ابوية وجع گلبي ..

طلعنا من المستشفى و رجع و داني و امي يركضون وراه

دانيال : يابةةة .. داكووولك مااروح

ابو حياة : رجعت ع ابني لزمته من وجهه بايديه اثنينهن .. عصرت وجهه

افهمم .. دانيااال افهممم هااي مابيها اب و مرجلة .. رووح مناااا

دانيال : مااايصييير شييي ليييش تشردنااا اكوو قانوون

ابو حياة : اني مايصير بية شي .. ارجع ااااانت .. الشرع يكوووله السن بالسن افهمممم

ام حيااة اخذيهم فدوووة اخذيهم

حياة : اعصاب ابوية ترجف سحبتنا امي و طلعت بقيت وراهم امشي .. بالليل نمشي مثل المخابيل بالشارع

دانيال : يمةة ابويةةة .. عووفيني ..

ام حياة : امشششي يوووم شتريد تسوووي انت .. اذا مااات ابنهم هدفهم مو ابوووك .. هدفهم ااانت

ابو حياة : رجعت .. اني ما كتلت و لا دعمت بقصد حتى اهرب .. ابنهم وكف بطريقي .. و اذا ما تنازلوا خلي دمي فصل لدم ابنهم ..

جهاد : ارد استلم اخوي .. طلعولياه

خاااالد .. خووووية .. حزززاااام ظهرررري .. خاااالد اااااكعد .. يا بووووويةةة

الجد : اااابني ... انذبحححح ااااابني اااااكعد بوووية .. بوووية جتاااالة

جهاد : اااالبجي مووو للزلممم بوووية .. ووووين كتاااااال اخوووي ..

هديت الزلم و ركضت عمامي وراي .. رحت ع الزلمة

ووووين ااااابنك .. ووووين هزمتةةةة

ابو حياة : رجعت كعدت بنفس المكان .. ادعي الله يمر هالاختبار ع خير ..

اتصلت ع اخوتي و عمامي .. و كلت الهم بكل الصار ..

ورا دقايق .. اجة ابنهم و جنت انتظر اي ردة فعل منه .. كام يصيح .. مارديت له بحرف لان منهار .. و الزلم لازمته

ابو كرار : جهااد ما تنحل هيييج

جهاد : هددددنييي عممممي هددددد

عمامي و خوالي لازميني و انا متملخ لدرجه اذا هدوني اموته جوا ايدي

ابو حياة : عمي الحادث لا بيدي و لا بيد اخوك ..

اجوي امن المستشفى طلعوهم .. بقيت كاعد جوا

اجوي اخوتي اثنين و عمامي اربعه ..

ابو براء (عم ابو حياة) : هاي شنوو ابو دانيال .. شصاير ..؟ اابنك وين ..؟؟

ابو حياة : رجعته للبيت .. عمي العالم هايجة اعصابهم فد مرة .. خفت ع اهلي منهم .. رايحلهم رجال

ابو براء : قدر و صار .. ما تستوجب كل هالقلق .. اذا ماكو قانون اكو عشاير .. وينهم ..؟

الجد : جهااااد اعصااابك .. لااا تضيع حگ اخووك بهااذ التهوور ..

جهاد : بوووية ..

ابو كرار : عمي حجى عين العگل .. خلنا ناخذ الحگ بالاصول حتى القانون مايتدخل و يعتبرك مجرم

جهاد : عفتهم و كعدت بالكاع ..

حلوهااا انتممم .. بس اذااا ما وكعتوا دم زلمه اااانا ماااا ااااسكت

الجد : ما خليتنا نستلم جثة اخووك .. ما نطيتنا مجااال اااانت .. اااااسكت

ابو حياة : طلعنا برا .. ناس تصيح ع ناس .. فاقدين اعصابهم .. منظرهم ما يبشرني بخير .. ربي وين جانت لي هاي

ابو براء : الله بالخير

الكل : الله بالخير

ابو براء : عمي الله يرحم و يصبر عباده .. احنا اهل هالخيير .. ما تنحل بالصياح المشاكل

الجد : و انت الصادگ .. و لا تنحل هان .. ننطيكم عطوة ثلاث تيام

ابو براء : يالخيير بيوتنا من هالساعه جاهزة ع التطلبوا .. بس لا يكون الدم حل .. اكرموا دفن فقيدكم و اتفضلوا بيوتنا مفتوحه ..

الجد : زاد فضلكم .. انا كلامي و مطاليبي بحضرت شيخ قبيلتكم ..

ابو حياة : مافهم و لا عمري اتدخل بامور المشايخ .. حسب الفهمته منهم اتفقوا بعد تلاث ايام ينصبون خيمة الفصل .. بحضور الشيوخ

رجعت للبيت وية اخوتي ..

حياة : بقينا كاعدين ع اعصابنا و امي كل اشوي تدك ع ابوية ميرد .. لحد ما اجانا الفجر وية عمامي يلله ارتاحت نفوسنا .. بوسناهم رحت وية امي للمطبخ نضيفهم

يمة لتبجين .. الحمدلله رجع سالم .. الناس بعدها بخير

ام حياة : هاي وين جانت له .. وين جانت لنا .. سترك ربي ستررك و عفوووك

تين : وية وجه الصبح اجانا خبر موت الشيخ .. السلف كله نگلب گلاب .. خبر موته جان صدمه للكل ..

ايام العزا كلها شلتها ع راسي اني و خالاتي .. لان عماته و زينة و سوسن فقدن من اللطم .. الحال هنا يكسر خاطر عدونا مو بس الصديق ..

جهاد ماشفته من هذيج الليلة .. كل فكري و بالي يمه .. بيا حال صار و هو يموت ع خالد .. ابو نمر شصار بي و بيا حال عرف لو لا بموت اخو ..

من جادر العزا لجادر الفصول .. جاية ايام دم و كتل .. گلبي ع جهاد

دانيال : رحت وية ابوية لديوان الشيوخ .. كعدت بس مستمع .. قلق ابوية و توتره حيل قلقني ..

ابو محمد ( شيخ عشيرة حياة) : هذا ابنا .. و هالاودام كلها حاضرة من العشيرة .. مطالبكم اتم ان شاء الله و عساها ماتتعدا حدود الخالق

الجد : راحلنا زلمة .. و الله يكول السن بالسن ..

ابو محمد : تذبح الرجال و هو صاحب عائلة ..؟ ما مقبولة منك شيخ .. نكولك حاضرين الا الكتل ..

الجد : و انا ماريدن اوكع دم .. لان الراح شيخ ما يعوض دم الا عشر ارجال

ابو محمد : كول يالله ابو سالم .. و صلي ع النبي ..

الجد : اللهم صل ع النبي و اله .. هاذ الحجي العندي ..

ابو محمد : العوض عن دم الرجال شنو ..؟

ابو حياة : عمي .. اني مستعد من الدينار للمية مليون .. شتطلبون حاضر ..

الجد : مانريد فلوس .. خيرنا يسد و يغرگ ..

ابو حياة : الدم .. ركبتي سداده .. دمي مهدور لدم المرحوم اذا هذا يرضيكم و يحل المشكلة

الجد : اكلك الراح شيخ .. دمك و دم تسع وراك يلله يبردون گلبي

ابو حياة : ياعمي مايصير .. بس اني و هذا ابني حتى الله مايرضى بحكمك تذبح البقية من العشيرة .. مالهم ذنب

ابو محمد : ابو سالم الدم ماحلو .. ولو اني اعرف زلمتنا ذابح زلمتكم عمدا .. اني اسلمه بيدي الكم و فوكاه تسع ارجال

الجد : كفوو ابو محمد .. و انا مارد هالطيب بالسخط ..

ابو محمد : هذا الكلام الطيب .. الجاي من اصل طيب .. مطاليبك و احنا جاهزين ..؟

الجد : اخذ مرة من قبيلتكم ..

ابو حياة : وكفت ع حجي شيخهم .. كل الزلم وكفت من العشيرتين ..

لا ياا عمي .. كول يالله .. بناتنا شدخلهم بمشاكلنا .. نحلها بعيد عنهم و طاريهن

الجد : ولو ان بنتكم ماهي عوض لكن انا احترگ گلبي ع الراح .. و اعرف گلب الاب يحترگ ع ولده و بنته ..

و خلص كلامي ... و لكم عطوة ع الطلب ..

دانيال : كاموا يتصايحون هم و واكفين .. خله هيج و طلع و وراه جماعته .. اباوع ع ابوية لونه مخطوف ..

ابو حياة : شيخ .. دبرني .. ادفع كل فلوس الامة و لا طلبه هذا

ابو محمد : تنحل ابو دانيال .. نحاول وياهم للصلح مرة لخ و الله كريم

تين : حبوبة اخذي الدوا ميصير هيج .. مو زين عليج ..

الجدة : ماريد ماريد .. اريدن الحگه .. خذاه ابووه خذااا الغالي خذااه

تين : هففف ياربي .. شلون حال .. نفسيتي تكئبت ..

سووسن .. سوووسن

سوسن : شكوو .. انا بيا حال و تنشدين

تين : ميصير هيج ساعدوني .. من راحوا خالاتي و اني البيت كله ع راسي ..

سوسن : هاذ لو جهاد الرايح تحجين هيييج

تين : وي اسم الله ع جهاد .. فال الله و لا فالج .. عوذا روحي ماريد شي

جاي احجي وياها .. طبوا جهاد و جدي و عمامهم ..

جهااد .. شصار بشرني

جهاد : شني ابشرج هو وينه الخير فهميني .. غدري جاي و صبي ع العدد و صيحيني .. زززين

تين : صاار .. اوووف الله يستر بس

الجد : جاي اكللكم ماريدن الدم

جهاد : بوووية مرررة .. تطلب مرررة هاااذ خااالد

الجد : مااااريدن الدددم .. اذا ذبحت منهم زلم ما يسكتون و انا ماريد اهدر دم اي زلمة من العشيرة .. و ماااينتهي الفصل .. اخصمهااا بـ مرررة و تاخذهاا

جهاد : اناا ما اخذهااا .. بووووية اذا خليتها بااااسمي ماخلي صبح يطلع عليها .. ادفنها بارضها زززززين

تين : التمينا اني و زينة و سوسن يم الباب .. كمت اخرمش بوجهي ..

جهاد مناوي ع خير .. شيريد دم .. خاب اسكتتتت و اسمع لجدددك

الجد : و لاااا واحد رااااضي .. شمااااالكم .. انززززل راسييي بيكممم

معاااذ .. تعقد عليها و راسك فوك رجليك

معاذ : و ليش اناا جدي انا لا ابن عم الشيخ و لا اخو .. عندك ولد اثنين شسااالفة

ام معاذ : معاااذ .. اسمع لجدك و اسكتتت

الجد : ولدي مايسمعووون الكلام هذاااك ما راضي و هاااذ مثله

معاذ : يمةةة شساااالفة انااا ما ابتلش بوحده فصلية .. شمااالج اااانتي

الجد : اجيبها و تعقد عليهااا و اااانت ساااكت

معاذ :

جدددي .. هذااااك صفوووووان اشمرهااا براسةةةة .. اااانا شكووو ...؟؟