رواية قضبان الجنوب ( فصلية ) الفصل السادس 6 - بقلم Hend_AlBoor

صفوان : مشيت سريع عليه .. من وصلت له انتبه لي .. اول ما رفع راسه و شافني .. ضربته بوكسي بكل حيلي ..

لككككك نذذذذذذذذل ...

حياة : عطت و خليت ايدي ع حلكي و رجعت ليورا .. سحبه من ياخته و يصيح

صفوان : معاااااااااااذ ...

الطلاب : هااا .. هاا .. استااذ صفوووان اهدااا

صفوان : ماحسيت الا الطلاب يسحبون بية  ..

و اني اصلا ماكو اي حساس بداخلي ناوي ع خير .. كل الشر بية .. حتى مكمت اعرف نفسي .. اجتني حالة ادفنه كدامها ..

سحبوني اثنين من الامن المدني للكلية .. و طلعوني من القسم

امن مدني : استاذ صفوان ..؟؟ اهدا ..

صفوان : لازم وجهي و كعدت ع الدرج .. اباوع ع ايدي ترجف مثل المجلوط بدماغه من يفقد السيطرة ع جسمه ..

فقدت السيطرة ع روحي و ع جسمي .. اريد استوعب الحال ..

- اكو شي نساعدك بي استاذ ..

صفوان : لا مشكور ..

عفتهم و كمت .. طلعت من الجامعه .. لان احس راح انفجر .. و اضرب ع گلبي لان موتني ..

كاااااافي .. اوووووگف و موووووت .. لا تدددددگ و تعذبنييييي .. بسك عاااد

الناس تباوع .. ناس عبالها مخبل .. و ناس وعت انو اني عاقل و متاذي .. و ماهمني .. اصلا ما داشوف بشر ..

كمت احس وحدي بهالكون ..

ريمان تطلع من القاعة  : حياة

اعتقد بس اني و حياة افتهمنا ليش هيج صفوان هجم .. خطية معاذ اطرش بزفة انوب اكله كتله ع الماكو

معاذ : ريمان اخذيها و اطلعن

حياة : اني ابجي و ارجف من الخوف .. ماتوقعت صفوان راح يهجم عليه لان رفضته و قبلت بمعاذ ..

مارووح .. معاذ .. ابقى وياك

معاذ : حياااة رووحي

ريمان : امشي حياة .. الطلاب كلها دتباوع

تسحبها من ايدها

حياة : ريمان حلكه دينزف .. عوفيني ..

ريمان : امششي مابي شي  ..

حياة : اشلوون .. اشلوون عادي .. خااايفه والله .. ليش هيج ضربه .. بسببي موو .. اني السبب ..؟

ريمان : اگعدي و اهدئي كافي .. انتي شنو ذنبج قابل

حياة : لا اشلوون .. هجم عليه ريمان .. اذاه والله ضربه حيل .. كام ينزف

ريمان : هسة قابل نزف بطل دم اري  شفت .. عادي اكيد بشر يحبج و متحمل خسارتج .. ردة فعل طبيعية انو يضرب معاذ .. انتي شعليج بعد

حياة : ليش .. ليش .. هو عاقل .. صفوان هادئ

ريمان : الحب ميخلي واحد عاقل .. كلمن عاشه انجن حياة

حياة : شاكوله اذا صفوان كاله سبب هجومه عليه ..؟

ريمان : شنو شاكوله ..؟ قابل عندج علاقه بصفوان .. انتي ليش هيج خوافه ..

حياة : لا ..

ريمان : حياة معليج هم زلم بيناتهم انتي عوفي .. من معاذ يسئلج عود كوليله كذا و كذا .. و خلاص .. ماكو اي غلط منج

حياة : اي .. صح .. معلية اني والله حتى مامباوعه ع صفوان و النبي ريمان

ريمان : اعرف گلبي .. هو بعد بشر حب و تهور ..

حياة : رجعت للبيت مالكيت معاذ بالكلية كالولي طلع مباشرة ورا الصار .. بقيت ادك عليه ميرد .. حيل قلقت

صفوان : كعدت بحدايق خريسان ابعقوبة .. لليل و ماحسيت بروحي .. ماحس جنت بوعيي طول الوكت ..

وعيت ع الشباب كدامي بالگازينوا .. صوت ضحكهم و سوالفهم ..

لك هاي گلبي معاذ

احس داخلي ديحترك

زينة : تين فدوة لربج احجي وية جهاد

تين : ع شنو ..؟

زينة : هذا تهوره هسه يضيعنا .. لا يضل ع اقل شي يعارك الوادم و يسب و يغلط

تين : هذا طبعه زينة .. و انتي تعرفين انا ماكدر امشي حرف ع جهاد

زينة : جا اروح انا فصلية يلله يرتاح و يسكن ..

تين : لا لا تكولين هيج .. الله يستر عليج ..

زينة : مايصير تين هو يعرف كلش زين عواقب هالمشاكل

تين : اكيد يعرف و خال حدود خوفا عليج

زينة : بربج .. و الله و لا خال حدود بايعني بجيس عدس

تين : ههه اذا سمعج تقوم قيامتج استري ع روحج

زينة : انتي شكو عليج اضحكي انا الـ اكل وحل تاليها

تين : و منو يفصل بنت الشيوخ فدوة

زينة : خايبه طيري .. هنا حتى حبوبتي يفصلوها اذا ما بقت نسوان بالعشيرة شجاي تحجين انتي

تين : اششش انوب حبوبه .. لا تندكين بالاعلام

خالد : حالي تبهذل بدون سوسن .. كمت ماندل جواريبي وين .. صدك بدون المرة ماسوى ...

سوسن فاگده عگلها .. جا بنية حبيتها من جان عمري 16 جاية هسة تحاسبيني .. هاده زوجج وبيتج .. شمالها هاي ..؟ والله النسوان ..

الجد : خالد .. خااالد

خالد : جاي بوية جاي ..

نزلت ع جدي ..

الجد : ما رحت لمريتك .. جا تبقى هيج شني ..؟

خالد : بوية سوسن ان ما عگلت مالها رجوع للبيت

الجد : جا بس سوسن بالسلف ان ما عگلت اخذلك عشرة عليها

خالد : حتى يطير عگلي جدي .. يصيرن اثنين .. بووويةة و يحجن من الفجر للفجر .. انا اسلم الامانه لملك الموت

الجد : اسم الله عليك .. و انا اخبرك شيخ ..!

خالد : بوية شيخ انا و كفو .. لكن النسوان انا ما متفرغ للسانهن و دوختهن

الجد : و انت الصادك .. المشيخه وية اكثر من مرية .. جحيم

خالد : حجيك ذهب .. يلله انا اروح افض سالفه حازم الگصاب

الجد : هاذ بعده يتبالش وية الوادم

خالد : بعده جدي بعده ..

طلعت و دك جهازي .. طلعته من جيبي

هذا عمي ..

الو ..

ابو سوسن : هلا شيخ عسا ما زعجتك

خالد : لا عمي .. ءامر ..؟

ابو سوسن : بوية زوجتك تجي تاخذها لو اخوها يجيبها ..؟

خالد : عگلت ..؟

ابو سوسن : مرت الشيخ و غصب تعگل

خالد : كفو عمي .. خلها انا جاي اخذها ..

ابو سوسن : تجينا البركه ..

تين : طبت سوسن خشمها للسما ..

خير ان شاء الله ..! الخانم حتى مسلمت ..؟

زينة : اندري ..؟

تين : الحمدلله و الشكر ..

سوسن : رجعت غصب و ضغط من امي و ابوي .. صح يمكن خالد نساها لكن من تطلكت اكيد رجع يحن ..

و يفضلها ع غيرها و خصوصا جدي يريد يزوجه علمود يجي ولد .. انا تخبلت و مو طايقة البيت هاذ ..

نزلت ادور ع سكينة .. فرفح گلبي عليها

سكينة ..؟؟

تين : نزلت تصيح ع بنتها ..

سكينة يم حبوبة ..؟

سوسن : و ليش كله يم حبوبة .. لازم بهاي الفترة من انا رحت محد بيجن اهتمت ابنتي ..؟

زينة : انا اهتميت بيها .. و اذا مو راضية عليش عفتيها و انتي امها ..

سوسن : ابوها ما نطاها .. ماعفتها غصب عن الكلام الزايد

زينة : هااا و ما عاجبج الحال .. حبيبتي لو انج مرة زود و كفو ما تهدين زلمتج و ضناج .. و جاية تحاسبين

تين : زينة .. سوسن اذكرن الله شسالفه

سوسن : زينو لا تدخلين بين المتزوجين و انتي الخ اسكتي .. الغربة ماتتدخل بشغلات ما تخصها

تين : خلف الله عليج .. هاذ جزاتي رايده الخير ..

سوسن تطلع مي من الثلاجة و تشرب : كفي خيرج الج حبيبتي

زينة بهمس : شمالج تأشرين ساكته .. ساكته

سوسن : شجاي تتبشبشن ..؟

تين : ماكو ..

سوسن بابتسامة :  صدك نسيت اكللجن ..
جا مو معاذ خطب ..

زينة : شنو

سوسن : اي و بنية من كليته .. يكلج اية بالجمال .. بنت مدينة بعد .. امي كايمة كاعده تسولف عنها

تطلع زينة من المطبخ و تصعد فوك

تين : الله يهديج سوسن ليش هيج سويتي ..؟

سوسن : و شكلت انا .. قابل جذب معاذ خطب و رح يتزوج ..

تين : مجاي اكول جاذبة بس تعرفين زينة تحبه و تنتظره

سوسن : عيني خلي تصحى و بعدين اول و تالي تعرف قابل رح يتزوج بالسر والله شني خوفا ع مشاعر زينو

تين : استغفر الله ..

سوسن : لا تحجن لجدي و انتي لا تحجين لجهاد زين

تين : و ليش ...؟

سوسن : هيج امي كالت ..

تين : خايبة جان سكتي و ضميتي ع زينة لمن امج رايده السالفه تنضم

سوسن : اريدها تصحى و تتزوج لا تبقى عايشة عمرها ع جذبه

تين : اووف منج .. اكوم اشوف البنية خطية كسرتي خاطرها

تصعد لغرفتها تدك بابها

زينة .. شمالج افتحي

حياة : ورا الصار ما سئل معاذ .. استغربت ..! يمكن عرفت انو صفوان رادني و اني رفضته لهذا السبب ما فتح الموضوع ..

يمكن لان جانت ايام احتفالات بالتخرج .. و جنا ملتهين و مخبوصين بالحفلة ..

اجمل شي اني عشته ويا معاذ .. الحفلة سوا و الصور سوا .. ايام جمالهن و الفرح البيهن ماكدر اوصفه ..

و خصوصا معاذ انسان مثل متخيلته .. هادئ و كولش يحبني .. ميعوفني دقيقه .. يكفي اني عشت الفرح و عمري مراح انساها هاي الايام

و مرت الايام باستقرار الحمدلله .. و قربت الامتحانات .. و صارت النهاية

صفوان : مرت الايام و اشوف الموت من اشوفهم سوا .. كمت اطب للبناية و اني مثل البايگ بوگه .. اتختل حتى متشوفني ..

من بعيد اشوفها وياه .. ماتوقع بيوم حبتني و لا اجيت ع بالها .. حبها لمعاذ واضح حيل عليها ..

سعادتهم .. اباوع عليهم و هم يحتفلون و ياخذون صور سوا .. تلث سنين و اني اخطط لهيج ايام انو احتفل وياها و اخرجها بيدي ..

احلام تلث سنين هدمها معاذ .. مرات اتعجب من القوة الاني بيها .. شلون بعدني واكف ع حيلي ..

كل هذا كبالي .. و مداقتنع .. غير اقتنع مو الي و انساها ..!!!

جانت فترة امتحانات الهم .. كعدت اقرا بالحديقه ع جانب قسمهم صايرة .. اني هم وراية امتحانات نهائية

خلصت .. هي بس سنة الخ مناقشه و اهاجر ديالى .. تحرم علية گاعها للموت

احتاج كلاص جاي .. حتى راسي يكعد وزن

اخذت كتبي و كمت صارت بوجهي ريمان ..

ريمان : عزا دقيقه ميعوفها
صدك لو كالوا عُربي و لزم موبايل .. كام يدك ع راسه ..! اتخبل ع امة محمد

السلام عليكم

صفوان : و عليكم السلام ..

ريمان : اشلونك استاذ ..؟

صفوان : دنگت راسي ..

الباطن لو الظاهر ..؟

ريمان : والله ماعرف شاگولك

صفوان : ردت الاسباب ..؟

ريمان : مو ذنبها .. اذا گلبها اختار .. مو قصدها اذيتك .. و انت تعرف الگلب اذا حب

صفوان : اعرف ..

تحبه ..؟

ريمان : من زمان .. و صبرت و انتظرت

صفوان : الله يسعدها

صفوان : تحبه ..؟ اي .. صبرت و انتظرت

امشي و الكلمات يدون براسي و الهن صوت يوجع الدماغ .. اريد اعيط حتى ارتاح من همي .. بس اصرخ باعلى صوت

حياة : طلعت من الامتحان رحت ع ريمان گبل ..

ها گلبي

ريمان : جنت انتظرج .. شلونج جاوبتي لو لا

حياة : الحمدلله ع گد النجاح

ريمان : كلنا هيج .. شعجب مو وية معاذ

حياة : مادري بي طلع او لا ..

ريمان : بعد احسن ..

تصدكين خلصت السنة ..؟

حياة : مرات ماصدك .. انو هايهة تخرجنا

ريمان : الحمدلله .. و انتي نلتي صبرج و حبج النظيف ..

تتذكرين من اعاركج و اكولج عوفي و كافي ترفضين الـ يتقدمون من ورا وهم

حياة : هههه اي ..

ريمان : سبحان الله .. الوهم صار واقع

حياة : مرات جنت اكول لروحي انتي عايشه بوهم منو يكول يحبج .. بس الحمدلله مخاب ظني

ريمان : لان حبيتي صدوك .. الله انطاج وفيتي لله متجاوزتي حدوده اكيد الله ميخيب ظنج و لو بي شر الله يبعده عنج لان انتي ع نياتج و طيبة

حياة : والله كمت ماعرف شنو اسوي حتى اشكر الله ع كل هذا .. كمت احس انو السجود مديكفي لان رحمته غركتني ريمان

ريمان : الله يديم الرحمة و يديم سعادتج ..

حياة : آمين يارب ..

دك فوني .. داطلعه من الجنطة

ريمان : ايييه اكيد معاذو .. هو يعوفج اشوي ..

حياة : هههه اي هو

ريمان : اكو غيره اصلا .. متروحين زين كوليله يم ريمان

حياة : الو

معاذ : ها حبيبي طلعتي ..؟

حياة : اي عمري انت وين ..؟

معاذ : طلعت قبلج جنت انتظرج .. انتي الوين ..؟

حياة : يم ريمان .. اليوم الها

معاذ : بلا ريمان بلا بطيخ .. كلج الي شنو الها .. جايج

ريمان : هاا شراد الافندي

حياة : يكول جايج ههه

ريمان : خرب يومج و يومه زين ..

حياة : لتزعلين ريومة مممح

ريمان : لا گلبي عادي تبقين صديقتي و بنت خالتي غصب ع خشمه

معاذ : هاا .. كاعدات

ريمان : ( بسخرية) لا واكفات هه

معاذ : بدت ست ريمان

حياة : اشلونك بالامتحان ..؟

معاذ : جفصت الله وكيلج

ريمان تنزل راسها بابتسامة
( بهمس) حيل .. اشوفك دور ثاني

معاذ : انتن شلونجن ..؟

حياة : الحمدلله ..

ريمان : يلله اني اروح للبيت ..

حياة : وين بعدج ..؟

ريمان : حمودي دكلي دينتظرني بالباب

حياة : تمام عمري ..

ريمان : بوستها و رحت ..

معاذ : اوصلج اني حيوتة

حياة : لا انتظر داني

معاذ : شنو هاي گلبي .. ترة كاطعين مهر سيد .. لا تقبلين الزمج و لا اوصلج شسالفه

حياة : لتزعل عمري .. اول و تالي نتزوج

معاذ : اعرف حبيبتي بس حلاتها هاي الشغلات هسه بالخطوبة

حياة : ابدا .. معاذ لتعيد السالفه كل مرة و اعيدلك الكلام

معاذ : خوش هاي بس لان ماريد ازعلج .. كومي نفتر عاد

حياة : ههه فديتك .. تمام يلله ..

صفوان : ما يمر علية ليل هادي .. ما تمر راحة .. انسى و ورا فترة اعيد الشريط و اتحسف .. ندم ..

ليش ماتحركت .. ليش ماخطيت خطوة من اولها .. اني خسرتها مني كل الصوج

ربي احبها .. ردتها منك اني .. والله ردتها بحلالك .. اعشگها فدواتك .. هواي علية اذا قسمتها الي .. هواي

شكاتبلي يمك ماريد .. امسحه عيوني ماريد .. اريدها .. ماعيش وية غيرها

ماحب صدكني اذا هي مو الي ماحب بعد .. امسح ربي فدواتك امسح

ابجي و ماحس بروحي من ابجي .. اريد بس افضي الهم المكبوت بداخلي

هسة خسرتها اقتنعت فدواتك ربي اريد انسى .. والله من ملامة النفس دامووت ربي

طلعني من هالظلمة انتهيت .. مابقت بية طاقة و حيل ..

ينزل عباس بالليل يتفقد صاحبه
كاعد بالگاع و مستند ع الحايط و لازمة وجهه باثنين ادينه و يبجي بصوت ، يگعد يمه

صفوان .. ليش هيج خوية ..

صفوان : تعباان عباس حيييل تعبااان .. احس بعد مابية اكمل ..

عباس : بنية ..؟

صفوان : روحي مو بنية .. اسميها روحي .. ما حاسبها ع البنات عباس

عباس : حاجيها

صفوان : راحت مني .. لغيري صارت .. لا تهيج المواجع بكد ما هي هايجة ..

عباس : اذا باعتك تروحلك فدوة ما تستاهل كل هذا الجاي تسوي بروحك

صفوان : لا تحجي عليها .. فدوة لا تحجي .. لا تظلمها و تذمها .. مو من الـ ابالك عباس اني اتاخرت .. اني جمدت

عباس : اوووف .. و الله ياخوية ماعرف شلون اواسيك .. بس مايصير الجاي تسوي بروحك

احجي وياه و اني ما مقتنع بكلامي .. الهدمان مايعرف يصير و مايصير و الحزن قوي

گام يمسح بدموعه و وجهه

صفوان : مو بيدي الداسوي .. كولشي صار خارج ارادتي ..

عباس : الله يعينك

صفوان : روحي مخنوكة .. احتاج ازور

عباس : حجيت الـ ابالي خوية .. اتوكل ع الله عسى يفرج الضيگ

صفوان : مانمت بهذاك الليل .. رحت ثاني يوم للكلية .. حان عندي اخر امتحان .. امتحنت و طلعت بوجهي لبغداد

طلعت العصر بتكسي .. وصلت قريب المغرب .. عطلت السيارة اعتذر مني السايق .. عاد نزلت امشي ..

نزلت بالاعظمية .. ماندل بيها هواي .. بنيتي اروح للامام الكاظم ع  .. كلما اختنك ارتاح بحضرته

امشي مالكيت روحي الا يم ابو حنيفه .. سامع هواي عنه بس ما زايرة بحياتي ..

توجهت لحضرته .. اجاني احساس غريب .. و اني امشيلة كمت ابجي ..

يكولون كل امام له كراماته و تاثيره بقلب زواره .. و اعرف هو امام مبجل للسنة

طبيت صليت و كعدت بحضرته .. امسح بدموعي و يجرن ..

ردتها سيدي .. و اني جدي رسول الله
ردت بنتكم .. وما رادتني .. ما نطيتوها الي ...!

سكتت لان  العبرة بحنجرتي ذبحتني و اني احاول انطق اسمها و اشكيها هنا لاهلها

بقت روحي تفضفضله بدموع .. بس بالمراقد الرجال من يبجي ماعليه عيب .. و اني بجيت كل روحي البقت ع حياة ..

ماحسيت الا ع يمي كاعد شايب .. وجهه ورع راسه .. لحيته .. حواجبه .. شواربه .. كله ابيض بابيض .. مظهره شدني ..

ابو فاروق : لا تمسح .. و هن رحمة

صفوان : ابتسمت و دنگت راسي .. خله ايده ع جتفي ..

ابو فاروق : تبجيها و اني اشوف اسمها ع گصتك

صفوان : رفعت راسي عليه .. استغربت حيل من كلامه .. و شمدري ..؟؟؟

و هو مبتسم من يحجي ..! شال ايده و قدم اصبع السبابه و خلاه بين حواجبي ..؟؟

ابو فاروق : هنا ...