رواية قضبان الجنوب ( فصلية ) الفصل السادس عشر 16 - بقلم Hend_AlBoor

صـامتـة و لـكـن ..
الـروح تـعـانـي انـكـسارا عـظـيمـا

حياة : اني مدنگه و اكنس .. بقيت مدنكه مرفعت راسي .. جهاد .. بدت رحمه الله

استعدلت لان لا وخر و لا هجم ..

شهگت من الصدمة .. كمت اتلفت وراية هيج و هيج .. اخاف احد شافه

ااانت شتسووي هنااا ..؟؟

صفوان : طبيت بالليل داگلب بالجهاز شفت حياة مدنگه و تكنس .. وكفت كبالها ..

جمدت و انوب استعدلت .. من شافتني تخبلت .. كامت تدور حولها و تحجي بخوف ..

هاي شبيها ...؟؟ جا غير بيتنا

حياة : ساكت و صافن بوجهي اني تخبلت اذا احد شافه يدفنوني و همة منا نار علية ..

لزمته بايديني من ايدينه .. و ادفع بي وصلته للباب .. طلعته و سديت الباب

و جعلنا من بين ايديهم سدا و من خلفهم سدا فاغشيناهم فهم لا يبصرون ..

كمت اردد بهاي الاية ..

صفوان : لزمتني و دارت اتجاهي و بقت تدفع بية و تتوسل .. احس بحيلها يرجف و هي تمشي بية للباب .. طلعتني برا و قفلت الباب ..

وكفت برا .. لزمتني ضحكه بس بالگوة لازم روحي و ساكت .. اخاف اضحكهه و اطلع السلف كلهم .. كمت امسح بوجهي ..

و جان انطرد ..!

حياة : كولشي بية يرجف .. كمت اشوف دوائر بيض بالجو ..

ليش ديلاحگني .. ليش ميجوز مني .. اني ما سويت شي حتى يجي وراية بكل مكان

يالله فدواتك اذا رايد تاخذ روحي اخذها بستر لا بفضيحه ..

حتى دموعي من الخوف متريد تنزل .. اريد الزم السعفه ايدي مابيها حيل .. لزمتها بيديني اثنينهن .. كملت الكنس ع السريع حتى بدون ماشوف ..

عطشت .. رحت للمطبخ همين اريد مي و همين اريد اجس نبض خوما شافنه البنات .. طبيت بس تين بالمطبخ تخدر جاي ..

تين : راحت زينة تفرش السفرة بالصالة .. انا جاي املي القوري مي .. شفت حياة طلعت ابو نمر ..

هاا .. شمالها تدفع بي ..؟  تخبلت شنو ..؟؟

ورا اشوي طبت تشرب مي .. انا اباوع اكول ما علية بس ما اكدر وكفتلي هنا بزردومي السالفه اذا ما اسئل اموت

شمالج طلعتي الزلمة هيج ..؟

حياة : كلاص المي بيدي ميثتب بس ارجف .. داشرب جان تسئلني .. دمي كله نشف .. يعني شافت .. الاهي رحمتك .. فدووة

تين : هاا .. جا ماتحجين شمالج ..

حياة : لازم اسيطر ع اعصابي .. سويت نفسي ماسمعت كمت اشرب مي .. سئلتني انوب ..

يا رجال ..؟

تين : ابو نمر ..

حياة : المي كله طلع خشمي و حلگي .. غصيت بي

تين : اسممم الله .. اسممم الله .. ياا حجاية ردي لمكاانج ..

حياة : منوووو ...؟

تين : لاا تحجين و انتي مخنوكه حسج بالموت طالع .. المي حتى من عيونج طلع شبيييج ..؟

حياة : المي مطلع من عيوني .. القهر طلع منهن ..

منوو هذاا ..؟

تين : الشيخ .. زلمتج

حياة : اااانتي تخبلتيييي

تين : هااا .. لا و علي .. شكووو كمزتي ..

حياة : الشايب رجلي موو هذاا .. هذاا منوو ...؟

تين : هههههه .. لااا خايبه الشايب جده شبيج هااذ زلمتج ابو نمر ..

حياة : طلعت اركض ..

تين : شبيها .. صارت حمرة دم .. فجاءة كامت تبجي و طلعت ركض ..

شسالفه انا ليش كلما احجي احس جاي اگلب الامة و الوص الوضع ..؟ والله كلام عادي شمالها ..؟؟

صفوان : بقيت واكف اشوي و رجعت طبيت .. لشوكت اتهرب منها .. اعرف شي مينعقل اني بالموت استوعبته .. هي شلون ..؟

رجعت امشي اجتي من بعيد متشوف بس تمسح بعيونها ..

شبيها .. ياهو وياها ..؟

صوت بجيها شگ گلبي .. لزمتني العبرة من وراها

حياة : امشي و ابجي بصوت .. لا اكدر اوكف عيوني و لا اسكت آلمي .. اريد بس اموت ..

صار بوجهي بطريقي .. عيوني ماكدر اوكفهن .. بس صار بوجهي وكفن ..

اتزوجتي معاذ ..؟؟؟

شنو من بشر انت .. تعرف بية مسبية الك و توكف بكل دم بارد تسئل ..؟

صفوان : كامت تحجي بصوت هادئ ..

حياة ..

حياة : اتسليت .. لو عجبك الالم الـ بين بوجهي بساعتها ..

صفوان : فهمتني غلط .. و ماعرف شارد .. دتروح لزمتها من ايدها ..

اوكفي ..

حياة : عووووووف  .. ااانت واحد نذل

جهاد : كاعد بالديوان لحالي سمعت صياحها طلعت ركض .. جريتها من ايدها

حياة : دفعته حيل .. محسيت الا واحد جرني حيل من ايدي

جهاد : انتي شنيييي محددد مربييييج لووو حسباااالج نااااسين جررريمة ابوووج

صفوان : نزلت ايده عنها و صحت بي

جهااااااد ..

حياة : محد مجرم غيركم ..

جهاد : لااااا تررررردين .. من تحجيي اااالزم .. الحرررريم تنججججب

حياة : باوعت عليه و هو يصيح .. من القهر الـ بية اي كلام يطلع منهم ماتحمله

مداااشوف ززززلم كدااامي .. مداشوووف

صفوان : بعربنا الحرمة ماترد .. من حجت هيج اتوقعت ردة فعل جهاد .. لان اعرف اعصابه ليا مرحله ممكن توصل .. شال ايده سحبتها حيل من كدامه ..

جهاد : هااااااا يااااااالله .. صفوووووووان

صفوان : اعصااابك .. لا ترفع ايدك ع مرة

جهاد : هااااي .. هييي هاااي الـ جننننت نااااوي تردهاااا .. و ماتريدهاااا فصل .. احررررك الاااااامةةة صفووووان

تين : زلمتي كام يشيل بروحه و يطگها بالگاع ..

عزا بعيني .. عزا عزا بعين امي .. سترك ربي

حياة : راد يضربني .. من الخوف يمكن الدم بجسمي تحول نمل .. سحبني صفوان بايد وحده و شمرني وراه .. تخلل توازني لزمت دشداشته و استندت رجعت توازني ..

صفوان : صار احمر من الاعصاب .. غلطت وياه بردها .. انوب شهرني ابن امي و ابوي .. شهرني كدامه ..

خااب اسكت شهرتنا شمالك تصيح

حياة : اني من القهر .. و الـ اني بي وصلت لمرحله اتخبلت .. كمت ماحس باي شي بالدنيا .. عسما يموتني .. يكسب اجر ..

عفتهم و مشيت ..

جهاد : تعااااالي لجججج ..

صفوان : جهااد .. خلك منهاا

حياة : عباله يخوفني بصياحه .. مو من حقه يتدخل .. مكافي الـ بية

جهاد : سمعتهااا .. سمعت لوووو لااا

صفوان : حرمة .. و ماتنرد الحرمة

جهاد : اتمنيتها ع ذمتي .. و علييي لوما اااانت واكف بعيني .. لا ادفنهاااا بمكانها .. كسر ظهري ع ذمتك

الجد : جهاااد ..

صفوان : باوعت ع جدي ابتسم و طب .. بقيت لحالي واكف بالحوش .. ابتسم وية روحي و اني اتذكر شلون طلعتني و ترجف ..  ايقنت انو الحاكم هنا گلبي .. انتصر ع كل الضروف ..

ميهم اي ثورة منج .. انا بدعوة خذيتج من اهلج قبل سنتين .. خذيتج من ابو حنيفه ..

حياة : طبيت للغرفة كعدت من البجي عيوني كامت متشوف

مو فصليته ربي .. هذا منو .. منو هذا ..؟
ليش يطلعلي بهجمان حياتي .. ليش حتى بعذابي موجود .. منو هذا ربي

يمةة فدوة يمة اريدج .. اريدج يوم ..
مكدرت انام الليل كله .. رغم عذاب و وجع الاسبوع الراح نمت بي مثل الطفل .. ما احس بشي عدا الم جسمي

اليوم كل الم بروحي صاح .. من ابجي اسمع صوت الم صدري وية الدموع .. بين الـ ممصدكه بالصار و بين الـ صدكت بس استوعب الواقع بالم مو طبيعي

بالحالتين اني داموت ع البطيء .. ماكو انسان يذبحني و يرحمني .. اعتبرها انسانية هاي ..

غفيت الفجر ساعه و كعدت احس جسمي كله متكسر ..

تين : ها حيوته جاهزة

حياة : اويلي بعدني بغفوتي و اجتي تين .. شلون راح اطلع اليوم .. نسيت وراهم طلعة .

اي دقايق و اجهز ..

تين : خوش انا لما اطلع الغراض انتي تعالي

حياة : ان شاء الله ..

طلعت اريد اغسل وجهي من البوري الـ بالحديقه ..

تين : جاي اطلع غراض الريوك .. طبن عماتهم

هلا .. هلا ..

حليمة : هلا بيج يمة .. ها جاهزين

تين : اي كملنا كلشي .. بس ينزل جهاد

حليمة : يمه هاي منو ..؟

تين : الـ فصلوها

حليمة : سودة علية شبابها ..

تين : اي والله عمه كاسرة گلبي ..

ربيعه : اسودت عيشتها و تكسرت ضلوعها .. ينكسر گلبج ع بنت جتال الشيخ .. بنت سميرة اركدي

تين : هاا .. شسالفه

حياة : كمت دا اروح انضربت حيل ع ظهري .. التفتت داشوف منو جرتني من شعري

ربيعه :
من يااا مزبلة جيتي .. ياهو الـ شمر بلاويه علينا و ناخذت روح الغالي

حياة : من الالم راسي مورم من الكتلة هذيج شلعن شعري .. هسه بس لزمته من الالم عطت و لزمت ايدها اريد يخف ضغطها ع شعري .. ماتحمل تهلسه مورم

كامت تضرب بية و تغلط .. بايد كافشتني و بايد تضرب .. ايدها حيل قوية .. وين ما اكو ورم بجسمي ضربتني عليه .. كمت ابجي من الالم

ربيعه : جا مابجيتي من باعووج .. ابجي .. جيتي تركضين حسبالج الـ دفناه رخيص .. ولج الشيخ هاذ .. الشيخ .. الشيخ .. بنت التايهة الضايعة ..

حليمة : هدي البنية حرام عليج شذنبها

ربيعه : شذنبها شذنبها .. اسكتي .. ابوها ذبح الوادم

حليمة : كااافي هددددي ماتت بيدج خايبة هدي حتى اذا ابوها شذنبها هي

حياة : اني فقدت بالبجي .. ع وجع جسمي و ع حضن امي اشتاقيتله .. و اني بحضنها و تكتل بية .. حسيت حضن امي الجنة بحالها .. مو كل حضن حضن و لا كل ريحه ريحه ..

سحبتني تين و حضنتني اني ابجي اريد اسيطر ع روحي و اوكف دموعي ماكدرت ..

تين : سحبتها كامت تشهك بالبجي .. انا من يمي عيوني غرگن ..

حليمة : خافي ربج بيها .. ما كافي مسبي شبابها .. و هاذ انتي علوية جا شخليتي للعوام

ربيعه : المات شني ..؟ ماهو سيد و جده رسول الله ..؟

حليمة : كلنا نموت .. محد دايم كلمن و يومه .. فارگي و لا تضيگين الخلك من مصباح الله خير

تين : اكعدي و ارتاحي ..

حياة : ودتني للغرفة خليت وجهي بين ايديني و ع المخده .. اريد اسيطر ع روحي مداكدر .. وجه امي بين عيوني .. كمت اشهك بالنفس

بقيت دقايق وحدي .. سكنت روحي ..

رجعت تين تمسح بظهري

تين : حياة .. اذكري الله

حياة : الحمدلله

تين : ما يهم .. خلج قوية يعني ردة فعل و تعرفين ..

حياة : ما اتواسه تين اتركي

ما اتواسه لان ميفهمون شنو الالم الـ بداخلي .. اني فاقده اهل مفاقده راحه

كمت لبست العباية مثلها ربطتها ع خصري و لفيت الشيله تلثمت .. مو علمود الستر و الناس .. حتى استر الالم الـ فاضحه وجهي ..
شنو داعي جيتهم لمزارعهم قابل طقوس

تين : السنة خير ماشاء الله يلله تعالي تريكي

حياة : ماريد بس اريد ارتاح جسمي يوجعني

تين : شسالفة ماتتريكين انتي ..؟

حياة : لا ..

عفتها و مثل الطير الـ يفتحوله باب القفص .. مشيت سريع باتجاه اني ماعرفه .. اريد اوصل لمكان مابي احد

امشي و ابجي .. ابتعدت هواي كدامي بس مساحات خضرة .. كمت اعيط بالبجي .. اكو هم بصدري اريد ارتاح منه .. بعد ما اكدر اكتم .. ديتراكم
احس گلبي تلف .. من كثر الاوجاع تلف ماعرف اشيل وجع يا سالفه منهن .. 

اني بشر ربي والله بشر اطلبها منك ، منك الراحه ،  زين اخذها اذا ما كاتب راحه الها اخذهاا ماتحمل صحت حتى ثقل صدري يخف

ماااااا ااااااتحمل .. ااااااخذهااااا عاااااد

صفوان : كعدنا نتريك هي طارت .. ما سئلت لان انا الـ افهمها .. ماتوقع احد بالدنيا يفهمها بكدي .. حتى ابوها

انتظرت تختفي عن النظر .. هديت الريوگ و گمت

جهاد : هاي وين .. ما تاكل

صفوان : اريد افتر اشوي تكسر جسمي

جهاد : جا لا تتاخر .. و اذا لاگيت ام لسانين جيبها ماعدنا وكت لنزهاتكم

صفوان : هاا .. ما تسكت انت

جهاد : فارگ بوية فارگ

صفوان : كمت اركض خفيف .. گلبي اكلني عليها .. بقيت اركض ع مسافه شفتها من بعيد .. وصلت قريب منها سمعتها تعيط و تبجي .. وكفت ..

خلوة انا اختليتها قبل فترة .. نفس الالم لكن بشكل ثاني .. بقيت واكف

لكن ما تحملت و انا اسمع بجيها و اسكن بمكاني .. رحت عليها

حياة : فدوووة موو هووو .. ما لگيت غيرررر هذاااا تسبيني له ماكوووو خلصت العااااالم .. خلصت .. اااالدنيااا خلصت

صفوان : ماكو عالم .. بس انا بيها

حياة : هلكد ما اخذت الفرصه افضي همي .. كمت احس حنجرتي و زردومي و عيوني و كولشي بية يشتعل نار ..

خلي اشتعل بس وراها ارتاح و استقبل اي اذية منهم بحيل و ما اضعف .. بهاي اللحضات فقدت السيطرة ع روحي  وصلت لمرحله فقدان العقل ..

من سمعت صوته .. كمت عليه ضرب ع صدره .. بدون ما ادري .. بس حسيت جسمي يريد يهدم شي .. اريد اهدم شي حتى ارتاح

صفوان : قوة ضرباتها مو قوة بنية .. مجانت هي تضرب بية .. احس وجعها ديضرب بهاي القووة

حياة : ااانت .. ااانت لييييش تطلعلي بحياااااتي لييييش ليييش ..

صفوان : بقيت ثابت بمكاني .. حيل اذت صدري .. بيدها .. و گلبي بعياطها ..

نفس السؤال اسالج ..

حياة : ليييييش الگيك بهجماااان حياااتي .. ليييش حتى بعذاااابي موووجود ..

صفوان : بلحظة ضعفتني دموعها اخذت حيلي و هي تبجي بصوت عالي و تشهك بالنفس .. حيلي نهد رجعت خطوات من ضربها .. بجيها اخذ حيلي

درت ضهري عليها .. مو ضعف .. لكن ما ردتها تشوف دموعي .. صديت ظهري الها و خليت ايدي ع وجهي و هي تضرب بظهري ما وكفت

حياة : اااابتعد عني اااااابتعد .. رووووح .. اكرررررهك .. اكرررهك

صفوان : مووووو رررررحت .. ررررحت .. هدددديتج و رررررحت ..

حياة : كام يصيح .. وكفت ايدي تذب نار من الحرارة .. اباوع عليهن حمر ..

ابجي بصوت حنجرتي ذبحتني و من اسكت تذبحني اكثر .. احس وكفت روحي بيها .. نزعت الشيله رجعت كم خطوة و كعدت .. اهدأ بروحي ..

صفوان : فجاءة سكنت .. التفتت عليها شمرت شيلتها .. شعرها و الشيله نفس السواد كل لولة مابي .. مسحت دموعي ..

حياة : ايدي ترجف كمت امسح بوجهي  و راسي اريد اهدا .. هم و نزاح .. انتبهت عليه واكف .. مجنت بوعيي من سويت كل هذا ..
بلحظة خجلت .. خجلت من الـ سويته

روح .. روح فاقده السيطرة لا اذييك

صفوان : تحجي و صوتها يرجف ..

انا اتشبعت بيها منج .. لتهتمين من هذا ..

حياة : كمت اريد اروح داكوم جان اوكع كعدت .. رديت كمت .. توتر عصبي حتى ع جسمي يصير انحلال ماكدر اتحكم بي
عفته و مشيت ..

صفوان : لهسه متريدني بحياتها .. لهسه ما اقتنعت بوجودي حولها .. رفضها هذاك القديم لحد هسه بيها بعده ..

حياة : رجعنا احس بية طاقة فقدتها باخر فترة ..

اريد اسبح ..

تين : عمري اي حمام استخدمي عادي

شفت جهاد و جدي طلعوا ..

وين حبيبي ..

جهاد : جدي عنده واجب وية ناس انا رايح اوصله ..

تين : خوش تروحون و ترجعون بالسلامة

جهاد : تسلمين رويحتي ..

حياة : هم يعرف يتغزل .. سبعه و عشرين ساعه لازم خياله و يعاركه .. طبيت للحمام الجوا .. سبحت .. كملت بقيت كاعده جوا الدوش اباوع ع جسمي اثار زراگ ..

كتلج يمة ما اموت .. يكفيني ابوية ديتنفس نفس الهوا الـ داخذه بهاي اللحظه ..

كمت لبست هدومي تراك عادي .. لفيت شعري كباية .. و طلعت

صفوان : نزلت اريد اطلع لان حيل مختنك .. وجهها ميفارگ بالي ..

تين .. تيـ ..

نزلت من الدرج .. طلعت من الحمام صارت كبالي .. استحيت لان ماخذه راحتها .. اريد ارجع .. درت ليورا ..

جا وين الدرج ..؟؟؟!!

تين : طلعت من المطبخ ..

ابو نمر .. جهاد طلع وية جدي وين طالع انت و هادنا الحريم لحالنا

صفوان : هاا ..

درت ع تين لاني داير ع حياة ، شتعلوا كلهم .. هاي وين راحت تين .. انا شنزلني .

تين : هياتني شمالك .. انا هان ..

صفوان : ادري .. ادري  .. ما طالع ..

مشيت سريع للديوان

تين : خخخخخ ضيع طوايفه الشيخ

حياة : يباوع علية و يحجي وية تين .. و تين ع جهته الخ .. اني بس اريد اطلع للغرفة .. لان بردت سبلتات البيت مشتغله ..

تين : تراه يستحي حيل و يبين بي .. وجهه فاضحه ..

حياة : بالعافية عليه اني شعلية ..؟

تين : خية زلوفج السود النازلات عليهن .. خايبة فارگي .. الشيج طب للديوان حسباله غرفته

زينة : طلعت العروس .. شمالج ساعتين جوا .. مواعين الغدا ينتظرن ..

حياة : ما رديت .. داخلي بي راحه مستعده اسمعلها لسنة .. همي كله فضيته ..

رحت فرغت باقي جنطتي داشوف ..

ياا .. حتى الابتوب خالته .. فووون .. اني كسرت فوني بيوم الحادث ..

جزداني .. جزداني  .. يارب مناسيته ريمان .. فدووة لتنسي .. هيااانه ..

اني ضامه شريحتي و رامي بالجزدان .. ايدي ترجف و اني اخلي الشريحه بالفون .. اول رقم دكيت عليه امي

ام حياة : من يوم الـ راحت .. بيتي صار گبر .. ابجيها كلما يطلعون اهلها .. لحد ما يرجعون اسكن .. فوك همهم ماريد ازيدها عليهم .. ابوها نحل و اخوها ماسمع صوته ..

ليلي مو ليل كمت اشوفها كل يوم بالحلم .. دك جهازي مابية اروحله .. اكيد وحده من خواتي تريد تتطمن علية ..

بقى يدك .. رحت عليه ..

حياااةة ...

📲 : يمةةةةة حيااااة صغيررررتي

حياة 📲: اول مسعت صوتها اليرجف و كتمها لبجيها من حجت .. انفجرت بالبجي .. اريد احجي ماكدر

ام حياة 📲: اسمعها تبجي .. دتبجي روحي .. روحي شهگت عليها

يمةةة تبجين .. اذووج يمةة اذووج سووودة علية اذووج

حياة 📲: يووم اريدج .. داشتاقلج يمة .. فدووة اشتاقلج

ام حياة 📲: الله لا ينطيني يوم طلعتج الهم .. يمةة گليبي اجيج اجيج اخذج منهم و خل يموتوني .. عساها انكسرت الايد الانمدت عليج روحي

حياة 📲: لاا يوم محد اذاني .. محد

ام حياة 📲: لتجذبين ع امج .. جذبي ع الدنيا كلها .. الا گلب امج لتجذبين عليه ..

حياة 📲: لا محد اذاني هياني احجي وياج مابية شي محد مد ايده علية .. يمة بس معزولة و اشتاقيتلج .. ماكو شي صدكيني

ام حياة 📲: گلبي ميصدك حياة مدايصدك .. گلبي نفطر عليج .. يمةة الله لا ينطيهم العافية اخذوج مني

حياة 📲: مسحت دموعي .. ماتصلت حتى اقلقها ..

يمة .. لو اذوني ما اتصل بيج .. هذا .. هذا فون انتي مشتريته الي مو .. شوفي لكيته بجنطتي .. يمة محد عليه بية

ام حياة 📲: اشتريته بيوم الـ رحت .. اويلي عليج روحي ابالي ابوج ياخذه الج .. مادري بالشؤوم الجاينة

حياة 📲: ابوية اشلونه و داني ..

ام حياة 📲: اشلونهم يمة .. اشلونهم ما بقى لون بيهم بعد ما نسبيتي

حياة 📲: يمة ما رحت حتى تتاذون .. اني رحت حتى تعيشون .. فدوة طمنيهم و اني كل يوم اتصل عليج .. اعتبريني اتزوجت .. يمة حتى محد اتقربلي و ضايقني .. بس شغل .. طلعت الفصلية بس شغل .. شغل عادي ما اتعب منه

لو اشكد احجي .. اعرف امي مقتنعت .. بس الحياة دتستمر و لازم امي تكفي حياتها بدوني .. طمنتها كلت الها كل يوم اتصل .. هيج تتعود و تقتنع لحد ما الله يجمعنا بميعاد .. و الله ميظلم عباده

قفلت خط بجيت اشوي .. كمت ارتب بالغراض .. ريمان هواي شغلات حاطتلي حتى السانتي مناسيتهن .. فدوة للتفكر بوضعي و اني مسبية ..

تين : صرعني زينة بالحجي .. وينها ما وينها .. يبوووو .. رحت عليها

حياة .. كملتي

حياة : اي جاية كملت بس رتبت غراضي ..

كمت ع السريع .. لفيت راسي بالشيال عقدته ورا راسي و نزلت الباقي منا و منا .. سديت الباب و رحت للمطبخ ..

مو هواي مواعين لان عددهم قليل .. اكملهن ع السريع و اكنس  طبت اخته تدردم

زينة : شلابسة ابوية ..؟

حياة : التفتت عليها .. ملابسة شي اني اعرف هم عرب ميقبلون بس هو تراك و طويل تشيرته ع الجامه يعني مستور ..
باوعت ع روحي .. و باوعت عليها

مستور ..؟

زينة : اعرف لكن يبقى بجامه .. و هاذ ما مقبول لحريمنا

حياة : اعتقد اني مو من حريمكم

زينة : و لا تطولين .. احنا علويات و انتم عامه ..

حياة : سكتت .. ماريد اخذ و انطي و توصل لعركه ..

تين : شمالج وياها ماكو زلمة بالبيت .. خليها ع راحتها

زينة : و ابو نمر جا ما حسبتيه هذاك متمدد بالديوان

تين : خخخخ خايبة ابو نمر شاف و شبع و فقد الذاكره حاليا .. تطبين عليه يكلج ها جدي كول تم ع امرك

زينة : شماله جنه ذيب

تين : الذيب راح يجيب خضرة انا وصيته هسه .. يلله العشا الدنيا مغرب اشوي و يجون يلفون الاكل لفات و يقضون عليه

حياة : كملت المواعين ..

تين اني راح انظف البيت و اروح ارتاح اذا اكو شي كوليلي حتى اكلمهن سوا

تين : لا عمري البيت نظيف .. نظفتي البارحه .. ما دام بيج طول انطيني دبة الملح من فوك .. اريد املي المملحه

حياة  : ان شاء الله ..

معاذ : مريت انا و امي ودينا سكينه لبيت ابوها .. ردت امر اشوف زينة .. ما كدامي غيرها بعد .. و هم بنتنا اعرف اصلها و فصلها ..

تلگتنا بالبيت زينة .. كعدت امي بالهول ..و التهت بسكينه .. انا حاسبيني حسبة ولدهم عادي اطب و اطلع رحت للمطبخ لان جوعان اكيد تين هسه جاي تسوي الاكل ..

تين .. جوعان

حياة : مديت طولي دانزل الملح ..

وية الصوت ..

گلبي لزمني .. و روحي ذبلت حيل