رواية قضبان الجنوب ( فصلية ) الفصل الثامن 8 - بقلم Hend_AlBoor

ثـم مـاذا ..؟

ثـم طـاف حـولـي طـيـفـكِ
و جـال فـي مخـيلـتـي سـرقـتـكِ
فـ حـكـمت محـكمـة القـدر عـلى قـلـبـي
شـنقـا بالغـيـاب حـتـى الـموت ..!

صفوان : رفعت راسي عليه .. استغربت حيل من كلامه .. و شمدري ..؟؟؟

و هو مبتسم من يحجي ..! شال ايده و قدم اصبع السبابه و خلاه بين حواجبي ..؟؟

ابو فاروق : هنا ... هنا ابني

يندرج كل رزق للانسان .. حتى الموت

صفوان : لا شيخ .. صعبه

ابو فاروق : مثل صعوبة حمل سارة بـ بالنبي اسحاق ..؟؟؟

صفوان : و نعم بالله

ابو فاروق : لكل مؤمن له كرامات ع كد طهارته و ايمانه و درجته عند الباري ..

و ع گد طهارتك و ايمانك .. يجرالك الخير

اني خدمت الكعبة 20 سنة .. نص عمري كضيته بمكه خادم ..

و عشر سنوات ادور ع المراقد المقدسة بالعراق .. عشت كل عمري ناذره لله

شفت ناس اجناس مختلفه .. اجناس ما يمرون ع البال و لا ع الخاطر

كمت افهم البشر من وجهه .. و صدفت اشوفك اليوم و اني بزياره هنا .. فترة و ارجع لمكه

تعتقد هذا ما مقدر ..؟ ما مكتوب بلوحك يم الله ...؟

صفوان : كلامه الهمني هواي .. قنعني

مكتوب شيخ .. و هي ما مكتوبة لي

ابو فاروق : شمدريك ..؟

صفوان : ههه راحت لغيري

ابو فاروق : يمكن الك .. ماكو انسان يمر بحياتك عبث .. و خصوصا هذولا الـ يمسون ارواحنا مباشرة .. الا ما يغير القدر و يرسم

المروا بحياتها اختبار .. مثل الـ ديمرون بحياتك

صفوان : يمكن .. و اني ما اريد اذيتها .. يكفي هي فرحانة ..

ابو فاروق : ع كد نيتها .. اذا هي شر يدوم لها الانسان البي شر .. و اذا هي خير تجيك .. لان انت انسان نقي

صفوان : والله ياحجي مادري شاكول .. ما بقالي امل ..

ابو فاروق : و منو بينا أمن انو المستحيل يصير .. قبل لا يصير

صفوان : محد

ابو فاروق : خل ايمانك قوي .. و بان الامور ممكن باخر لحظات تتغير ..

مثل ما نويت تزور امام .. و كعدت بحضرة امام ثاني ..!

صفوان : كلما يزيد بكلامه وياي كلما يقنعني .. و تكبر حيرتي و استغرابي .. شمدري بكل هذا ..؟

خلة ايده ع گلبي .. جسمي كله قشعر ..

ابو فاروق : هذا .. ع هذا الله ينطيك ..

اذا قابلت ناس خبيثة فهذا اختبار من الله
و اذا قابلت ناس طاهرة فهذا احسان من الله

صفوان : صح حجي و كل انسان و طاقته

ابو فاروق : انت مؤمن .. و الله يهب لك الراح ع كد نيتك .. بس لتقنط

صفوان : بقيت اسولف وياه .. ارتاحيت حيل .. كلامه حكم و فاهم الحياة .. مار بهواي تجارب .. حسيت هو رجال مو عادي .. و اغلب الكرامات نلكيها بخدام الله ..

حتى همي نسيته لان التهيت .. نمت هناك و اول ليله انام مرتاح .. انسان هلكته الضروف .. مادري هلكته نفسه ..

كعدت الفجر .. ماكو الحجي .. كمت صليت الفجر .. مجدت الله .. بقيت كاعد و الحجي ميروح من بالي .. شغلني

شفت واحد من الينظفون بالحضرة ..

السلام عليكم

عبدالله : و عليكم السلام و رحمة الله و بركاته

صفوان : اسئلك ع حجي هيج وجهه ورع .. مشيب .. و لابـ

عبدالله : الشيخ عمر

صفوان : ماعرف اسمه بس البارحه جان يمي

عبدالله : شفتكم ..

صفوان : تعرفه ..؟

عبدالله : هذا صاحب طريقة .. و مايوكع جوا ايده ممسوس الا ما يشفي باذن الله

صفوان : وين الكي ..؟

عبدالله : اعتقد بالامام الكاظم عليه السلام ..

صفوان : طلعت كبل اتوجهت للامام الكاظم عليه السلام .. و فعلا لكيته هناك يصلي الضحى .. صليت الضحى .. كعدت هو بقى يمجد ..

ابو فاروق : السلام عليكم و رحمة الله و بركاته

صفوان : التفت علية و هو مبتسم ..

و عليكم السلام .. اجيت اشكرك ع البارحة

ابو فاروق : الشكرلله .. ما سويت شي .. المهم انت تكون بخير و تطلع من قوقعتك هاي .. هالك عيونك صايرات حمر

صفوان : الحمدلله

لزمت عيوني و فركتهن .. صدك يحركني حيل و يوجعني .. جفاف بالمدامع لهذا السبب ماكو ترطيب الهن ..

كام يطبطب ع جتفي خفيف .. و الابتسامة مالية وجهه ..

حياة : ورا اسبوع و خلصت الامتحانات .. اتخرجت .. فرحت لان خلصت رسالتي و كفيت .. و انقهرت لان مراح اشوف معاذ كل يوم ..

بقيت ع تواصل وياه و يزورنا للبيت .. اني وياه نسهر للصبح نسولف ع الفايبر ..
اليوم استلام النتائج داني راح اخذ نتيجتي و نتيجته و الحمدلله ناجحين ..

ريمان 💬 : ها گلبي بشري اخذتي نتيجتج

حياة 💬 : اي داني جابلياها ويا نتيجته .. الحمدلله ناجحه و انتي ..؟

ريمان 💬 : مبروك حبي اني همين الحمدلله نجحت و خلصت ..

حياة 💬 : الف مبروك عمري

ريمان 💬 : و معاذو ..؟

حياة 💬 : مادري هسه اتصل عليه

ريمان 💬 : راسب اكيد بدون متسئلين 😂

حياة 💬 : يااا ولج لتصيرين مكروهة ان شاء الله ينجح

ريمان 💬 : منو ينجح ولج لوما 4 سنين ويانا و كل سنة ينشمر دور ثاني ذكريني بسنة معاذ نجح دور اول

حياة 💬 : بلكي ع حظي السنة ينجح

ريمان 💬 : ذيل الجلب

حياة 💬 : هههه لو بس اعرف عداوتج وياه

ريمان 💬 : ههههه ربانية من الله

حياة : اويلي منج .. دخلي ادك عليه

ريمان 💬 : عود بشريني برسوبه

حياة 💬 : انقلعي

دكيت عليه ..

📲الو عمري

معاذ 📲: ها حب

حياة 📲: اخذت النتيجة لو لا

معاذ 📲: اي واكع بتلاثة و مناك عندي مواد محملهن يعني مليوصه علية حياة

حياة 📲: يااا .. الله يسهل الك عمري

معاذ 📲 : تسلمين حبي ..

حياة 📲 : يلله عمري اروح اساعد امي .. من افضى نتراسل

معاذ 📲 : انتظرج حب

حياة 📲 : باي

معاذ 📲 : باي عيوني

حياة : مرت الايام و يوم عن يوم تعلقي بي و حبي له يزيد .. كمت اشوف الدنيا بي .. حبيته لدرجه اني كمت اتعجب منها ..

ام معاذ : انا ما ضل متبهذله شلون اشوف جهالك و انا بديرة و انت بديرة

معاذ : يمة كلتلج تدبر شبيج وياي ..؟

ابو معاذ : انت فاتحت البنية بالموضوع ..؟

معاذ : بوية انت تدري احنا نطينا كلام زلم من اخذناها من ابوها

ابو معاذ : صح و انا ما مستعد اتراجع عن كلامي .. الناس شتكول عني.؟

ام معاذ : يعني شنو ..؟ انا لو ادري شرطها تسكن بديرتها ما اروح و لا اتعنى لاهلها

معاذ : و انا جاي اكلج اقنع البنية و نتزوج هنا .. هم ارضيج و هم ما نزل كلمة ابوي

ام معاذ : جاي يكلك شرطوا ع الزلم

معاذ : حياة تموت بية .. شاكللها تكول صار .. اجيبها يمج بس ارتاحي

ام معاذ : اففف اففف هاذ اليروح ع بنات الولايات .. شمالهن بنات السلف .. جنها ورد زينة شمالها عورة

معاذ : و اخذ من بنات السلف جا الشرع حلل اربع

ام معاذ : اويلي ع المشاكل الراح تجيني من جوا راسك

ابو معاذ : خفي ع الولد مجاي يعرف شلون يرضيج

معاذ : خلها تدلل يبة .. كلهن اهليهن يخدمنها

ام معاذ : اييه لا قبضنا .. و شوكت تعرس و انت كاعد .. لا و سقطت بالدراسه

معاذ : خلي اتخرج السنة اشد حيلي و انجح لان انا طكت مرارتي من الدراسه

ابو معاذ : خلي الولد ع راحته 

ام معاذ : الگيها منه لو من اخته طايحة الحظ .. حتى ولد ماعرفت تجيب .. اففف يا ربي اففف

معاذ : ماعرف شلون ارضي امي .. اعرف حياة ما تردني بس اذا جبتها هنا تكبر المشاكل ..

انا ودي اتزوج هناك .. و راسي بارد .. لكن اهلي شلون ..؟

حياة : رسب معاذ و عاد السنة .. عاد قررنا لحد ما يشتغل و يعتمد ع نفسه بمورد مستقر يلله نتزوج .. و بما انو هو طالب فـ الامور صعبت ..

بس من ناحيتي انتظره لو عمري كله .. ماعندي مشكله

كاعده امشط شعري و دك جهازي ..

اكيد معاذ صارله فترة ممتصل .. هاي ريمو .. البارحه جانو يمنة بسلا صاير شي ..

📲 الوو ريمو

ريمان 📲: الو گلبي .. شلونج

حياة 📲: الحمدلله. خوما اكو لا سمح الله. ؟

ريمان 📲: لا شكو اسم الله .. هيج اتصلت ادردش وياج عمى

حياة 📲: ولج كبيت داكول البارحه يمي هي شصاير و اتصلت

ريمان 📲: مصاير بومة .. بعده معاذ افندي مشغول عنج

حياة 📲: اي خطية غير دراسه

ريمان 📲: يا عيوووني اديسون خطية ملخ الكتب تملخ

حياة 📲: ههه شبيج غير دوام

ريمان 📲: و معاذ كوجه مرحبة وية الدراسه ولج هو اكبر مسختجي ..

حياة 📲: ليش تظلمي ريمو عابت

ريمان 📲: عابت انتي .. اشكد ع نياتج ولج تلكي يطربك هنا و هنا وية جماعته و ملتهي عنج

حياة 📲: صدووك

ريمان 📲: يبو ع هالبنية .. دداهمي للكلية و شوفي اذا ما يطلع ضارب محاضرات و كاضيها بالنادي الـ انيشتاين مالتج

حياة 📲: والله فكرة .. فد يوم اسويها شكو وراية

ريمان 📲: اي و عود تعاي كولي شفته بغرفة الاساتذه معلك روحه بسترهم من الحرص

حياة 📲: ههههه عابتلج والله .. يلله گلبي امي دتصيحلي

ريمان 📲: ماشي .. سلميلي ع خالتو و بوسيلياها 😘

حياة 📲: ولي البارحه جنتي يمها ..باي

ريمان 📲: لا يا مضغوطة .. سبع حجارات

ام حياة : حياااة .. حيووتة

حياة : بلي يمةةة

ام حياة : انزلي خطيبج اجة يشوفج

حياة : معاااذ ..

جنت لابسه تراك لان الجو بدا يبرد ..

دقايق و نازله يمةة ..

ام حياة : ع راحتج صغيرتي

حياة : ليش ما بلغني .. هو صارله فترة مشغول و اني ماضغط عليه لان دراسه .. لبست قميص حياكه طويل فوك البيجامة و خليت كلاو حياكه براسي .. نزلت عليه

ها عمري .. شلونك

معاذ : هلو گلبي مفاجئة مو ..

حياة : اي مادري تجي اشو مكلتلي ..

معاذ : هيج اشتاقيت و اجيت بسرعه كلت افاجئها .. مدبدبه ع الكعده بالبيت

حياة : يااا وين اكو والله نفس وزني

معاذ : هههه اشاقيج بس صايرة تجننين

حياة : اها

معاذ : يمة فدوة للغمازة شطير عقلي غيرهن

حياة : دنگت راسي .. شكد احجي وياه بس من يتغزل مادري ماكدر ارفع عيني بعينه

معاذ : فدوة للخجلان .. گلبج من شنو

حياة : طين ..

معاذ : و انا حديد

حياة : ليش ..؟

معاذ : انا رجال و گلب الرجال حديد

حياة : ههه هسه تمطر و يورد گلبي

معاذ : و يزنجر گليبي هههه

حياة : اروح اجيبلك شي تشربه

معاذ : تعالي وين ..؟

حياة : خوما تبقى هيج

معاذ : يكفيني انتي .. اكعدي اشبع منج اريد

حياة : همم ..

معاذ : اكولج حبيبي ..

حياة : عيوني

معاذ : اذا كتلج نتزوج و نسكن بالبصرة شتكولين

حياة : اني عبرت مرحله البعد و انو الا ابعقوبة .. وياه بعد باي مكان اروح لان ماتحمل بعده ..

معاذ : فجاءة سكتت ..

يعني فرضا .. شبيج سكتي

حياة : لو ورا الشمس ماكول لا

معاذ : فدوة لعمرج .. اموت عليج تدرين

حياة : اسم الله

معاذ : اسف هالايام مشغول عنج من ورا الدوام و الدراسه تعرفين

حياة : عادي عاذرتك ..

معاذ : و اذا حبيبتي ما عارضت ع عيشتها وياي بالبصرة انا رح افاتح اهلي علمود العرس

حياة : مو كلت لما تشتغل .. لتضغط ع حالك معاذ

معاذ : هههه ها خفتي شنو نرايده نعرس

حياة : لاا .. بلي .. بس غير علمودك

معاذ : اطمني بالبصرة خير زايد .. انا من كلتلج اشتغل يلله استقر لان ابالي هنا نتزوج ..

تعرفين هنا ما مستقر انا .. بس هناك الامور تختلف

حياة : الله كريم ..

رن فونه .. طلعه و مارد انطه رفض ..

جان رديت عادي ..

معاذ : لا گلبي هاي امي بعد اشوي انا اتصل عليها

حياة : ع راحتك عيوني ..

ردت اكوله اريد اجيك للكلية بس لزمت روحي .. يعني ماعرف الا احجيله كولشي .. هففف مني

مرن ايام و شجعتني ريمو ع شغلة المفاجئة .. ابالي افاجئة مثل ما فاجئني ما اجتني افكار ريمو انو اشوفه يطربك و يسخت .. عادي هو شاب و اذا سخت

ام حياة : ها گلبي رايحة للكلية

حياة : اي يمة اريد اسويله مفاجئة

ام حياة : هههه الله يسعدكم يمة

حياة : تسلميلي گلبي .. بستها و طلعت

دانيال : يلله حيوت موو اتاخرت

حياة : يلله اجيت .. اجيت يمة منك

دانيال : يمة منج انتي .. مبتلي اني بيج و بـ معاذج

حياة : شعندي غيرك اخو حبيبي انت

وصلت للجامعه متاخرة .. جانت المرحلة الرابعه محاضرة .. طلعت افتر بالحدايق مالت الكلية .. اتذكر الايام

اشلون اول مرة من رفعت عيني و شفته يباوع .. و مهتميت .. و وراها بدا يتقرب اكثر و اكثر لحد ما حبيته و ضميت بداخلي ..

كمت اتمشى و ابتسم ع احلى ايام ويا ريمو و وياه .. رحت ع المكان الـ دائما نكعد بي اني وياه

معاذ ..؟؟؟ شفته من بعيد كاعد وحده .. ليش مداخل محاضرة ..؟ صدك كالت ريمان يسخت

مشيت ع كيف بحيث اني من جهة صفحته اليمنى مو من كباله اجيت .. مشافني اريد افاجئة

فجاءة اجتي يمه بنية و كعدت .. وكفت يم شجرة قريبة مني ..

جمانة : خوما اتاخرت گلبي

معاذ : لا فدوة الج هن دقيقتين

جمانة : اي كمل وين وصلنا

معاذ : وصلنا للموت بيج ..

سحبت ايدها و بستها ..

اوووف ليش هيج ناعمه .. شتاكلين ..؟

جمانة : معااذ منااا الطلاب

معاذ : محد اكو .. خايبة كلها ملتهية بالحب هنا منو بحال يباوع

جمانة : ههه فديتك حبيبي

حياة : يمكن اني بين الموت و الحياة .. ليش احس بگلبي هيج .. ما حاسة بهيج الم بحياتي ..

حاولت اتماسك .. و اني اشوفهم و اسمعهم .. يمكن سيطرت ع اعصابي و ردة فعلي ..

بس گلبي مداكدر .. يدوك سريع و بالم مو طبيعي .. لزمته اريد يهدا .. اباوع ع ايدي ترجف .. و نفسي فقدت السيطرة ع النفس .. احس داموت

كمت احس بعيوني نار .. و مي حار حيل ينزل .. مدابجي .. ماريد ابجي .. لاا ما ابجي .. احاول اوكفهن ماكو .. ايدي مالي طاقه بيها ترجف حيل ..

كاافي الله يخليج كااافي .. الله يخليجن كاافي .. اريد افتهم كااافي

جمانة : شبيك تفرك بعيونك ..؟

معاذ : نعساان حبيبي ميت نعاس

جمانة : اي لان مدتنام هههه

معاذ : غير من وراج .. ماشبع منج سوالف للفجر و احنا بالكلية و مادشبع شسالفه ..

جمانة : اي استاهل متنام حبيبي مو

معاذ : لج تستاهلين روحي شنو النوم ..

حياة : جانت كل كلمة اسمعها تكتل كل شي حلو بية .. الروح اجزاء و كل جزء كام يموت بروحي ..

و اني اباوع ع الطلاب رايحة جاية .. حيل استخطيت روحي .. و كرهتها .. حاولت اضبط روحي و اوكف عن البجي لان حسيت ع روحي بالجامعه مو وحدي

سكنت عن البجي غصب .. بس ما سكن الالم بية
اباوع ع ايدي مهدئت .. حيل ترجف .. الاعصاب مو بارادتي .. و انهارت اعصابي .. كمت انزع بالحلقة .. مدتجي بيدي ..

كمت ابجي لان اني بيدي دانزعها .. دانزع حلقة انسان بكل سجده دعيت يكون الي .. كولشي بداخلي ميريد انزعها ..
نزعتها و قبضتها بجفي حيل .. مو تمسك بيها .. بس حتى اخفي رجفة ايدي و الضعف البية .. و اني متوجهه الهم ..

ماحس بروحي من مشيت و شراح احجي و شنو راح اسوي .. الا و اني كبالهم ..

معاذ : شابكين ايدينه و اتغزل بيها .. ما حسيت الا ع حياة .. فزيت من مكاني .. جسمي كله انحل من الصدمة

حياااة .....!!!!؟

اباوع ع وجهه كحلها سايل و ماسحته

حياة :  احاول اسيطر ع النفس مالتي .. و احافظ ع هدوئي .. باوعت ع ايده الحلقة ماكو ..

جمانة : حبيبي منو هاي ..؟

حياة : باوعت بوجه معاذ .. لونه راح
سحبت ايده الما بيها حلقه .. و فتحت قبضة ايدي و خليت الحلقه بيها ..

معاذ : خلت حلقتها بيدي و مشت ..

خرررب ..

جمانة تلزمه من ايده : معااذ .. فهمني ..

معاذ : عوووفي .. بعدييين

حيااة .. حيااة

حياة : و هو يركض وراية .. ما عرتله انتباه .. لان روحي دتحترك .. ماعندي شي اكوله .. اجتي حالة سكون و خرس لا ارادية لزمني من ايدي

معاذ : حياة بس افتهمي ..

حياة : سحبت ايدي حيل

عووف لا افضحك هنا ..

طلعت من الكلية امشي .. اريد بس اوصل للبيت .. اختنكت من الدنيا كلها .. عبرت الشارع

امشي و دايخة ماعندي سيطرة .. و الكيات توكفلي و يأشرون السواق ..

بهاي اللحظات .. كل شي وكعت عيني عليه و لمحته كرهته .. الوان السيارات ..
الشارع .. الكلية .. النهر .. النخل .. البساتين .. كولشي شفته بعد وجه معاذ كرهته ..

وكفت و صعدت سيارة راح اوكع من طولي ..

كعدت يم الجامة .. اباوع ع الطريق و ماشوف اي شي .. وصلت لشارع المستشفى .. دانزل

السايق : العفو اختي الكروة

حياة : انتبهت عليه ..

ها ..

السايق : الكروه

حياة : اي .. اسفة نسيت والله اعذرني .. شكد ..؟

السايق : خليها اذا ماعندج اختي

حياة : لا .. لا اعذرني مادري نسيت .. ممتعودة ع العبريات

السايق : الف ..

حياة : انطيته الالف و نزلت امشي عقلي و جسمي مداحس بشي و اني احاول استوعب شصار .. كمت امشي و ابجي لان اكثر من هذا مابية اكتم احس راح اموت  ..
وصلت للبيت طبيت ركض صعدت لغرفتي ..

ام حياة : صغيرتي ...!

يمة بنتي شبيها ..

حياة : گمت اشهك بالبجي .. لان كولشي بية يوجعني .. احس العبرة ذبحت حنجرتي .. اريد اشلع حنجرتي من الالم لزمت رگبتي

اريد الالم يسكن .. اريد الشي الديوجعني يهدا .. مداعرف شنو ديوجعني كولشي بية .. موتني .. طبت امي للغرفة

ام حياة : حيااة حيااة شبيج يووم  شبيج گلبي
اهدي عيوني اهدي روحي  گلبي ليش .. سوودة علية

حياة : اول مرة بحياتي ابجي روحي مو دموع مابجيت دموع  صح تعبت و ماحس براسي بس ارتاحت روحي ع البجي  حتى النفس استقر بس بالكوة اخذه ردت الالم البية يهود ..

يرن الجرس
ام حياة : يمة هسة اجيج ..

تنزل تفتح الباب

معاذ ... اتفضل يمة ..

معاذ : خالة .. وينها ..؟

ام حياة : شصاير معاذ .. بنتي شبيها .. فهمني ..

معاذ : وينها بس اريد اشوفها ..

ام حياة : بغرفتها موتت حالها .. هسه اصيحها ..

معاذ : لا .. لا .. اني اصعد .. عادي ...؟

ام حياة : اي يمة البنية كاعده بهدومها .. بس خليها تهدا .. متت عليها فدوة معاذ

معاذ : صعدت ركض .. فتحت الباب .. ساكنه .. بس تشهك بالنفس .. حيل كرهت روحي ..

حياة ..