رواية قضبان الجنوب ( فصلية ) الفصل الثاني 2 - بقلم Hend_AlBoor

و اذا استوطن الهدوء حياتك ...

فأستعد لعاصفة .. اما ان تهدمك كليا

او ان تبني كيانك من جديد

انا حياة و امنت بان المؤمن مبتلى

فقد ابتليت بغما فوق غم ..

بعد ان قُتل كل شيء جميل فيّ

أُعدمت برائتي و تَخلت عني الاحلام

فاقدمتُ ع الموت البارد بقدميي ..

انتحرت .. انتحاراً مباركا و ليس محرما

اودى بي الى جحيم الدنيا ..

هاجرت جسدا بعد ان سُلبت منه الروح ..

دخــــــول ...

الاجواء قاعه مليئة بالطلاب في جامعة ديالى كلية الهندسة المدنية ..

حياة : هاي ليش اتاخرت هيج .. والله متت جوع ..؟ هو اتصال .. خلي اكوم اشوفها وين صارت

اخذت بس جنطتي و كمت من استولي .. طلعت صار كبالي معاذ ..

من الخجل الـ بية اريد اشرد من كدامه .. بس من شوقي لعيونه ماريد ابعد نظري عن نظره ..

مريت من يمه بكل خطوة تمتلكني احاسيس مختلفه .. بس كلها حلوة .. احاسيس محبين بصدق

طلعت شفت ريمان دتتصل بالحديقه .. رحت عليها .. ضربتها ع جتفها

ووولج ..

ريمان بنت خالة حياة و صديقتها
: اي .. لا لا يمةة مو هيح كلت لعمتي ..

تكمز من الجفلة

حياااة .. ولج جلطتيني

حياة : سنة ..! سنةةة تتصلين .. متت جوع

ريمان : دقيقه ..

ها يمة .. اي ..! ماشي عود من ارجع ..

الله وياج

حياة : خوما اكو مشكله ..؟

ريمان : لا بس بيبتي وصلت كلام لامي و امي دتفتهم مني ..

حياة : اها .. يلله يلله امشي راح تبدي المحاضرة يادوب نلحك ناكل

ريمان : يلله امشي ..

حياة : اخذنا لفاتنا و طلعنا كعدنا ع مدرجات ناكل .. لان النادي هوسة و خنكة

ريمان : انتي سنة رابعه خوما تكضيها هيج ضامه حبج له بداخلج ولج انطي مجال و ارتبطوا

حياة : اذا نرتبط ندخل بعلاقه و دتسمعين هلايام مصايب العلاقات

ريمان : اشلون لعد .. تبقين هيج تطردين اليجون بس علموده و يمكن هو مو داري بحبج له

حياه : ( ابتسامه خجولة ) لا اكيد هو همين يحبني

ريمان : و شمدريج قابل تدرين شكو بگلبه .. اشو انتي حتى محاجية وياه و لا هو واكف وياج

حياة : مبين بعيونه .. نظراته .. مبين هو همين يحب

ريمان : اويلي ع العيون ميجي لعد .. خلي يتحرك خطوة تجاهج .. حيوته اني مثل اختج اعرفج نظيفه و ماعندج سوالف دغش اتمنالج الخير .. لهذا السبب داحجي هيج

حياة : اعرف ريمو بس اني همين اتمنى ارتبط بي بشكل رسمي يعني خطوبة

ريمان : حياة و انتي شتعرفين عنه عدا اسمه ..؟

حياة : يكفيني طبعه اعرف هدوئة ليش مو صار اربع سنين كدامي .. ميهم ابن منو و منين ..

ريمان : الله يكتبلج الخير و يتحرك الصنم معاذ

حياة : هههه فديتج

معاذ من البصرة ساكن يم بيت عمه بالتحرير بديالى

: رجعت انا و ربعي للقاعه صارت كبالي حياة .. حياة بنية هادئة و حيل حبابه .. اجتماعيتها بالناس قليله ..

صار سنة من انتبهت الها .. من حجى بيها ابن خالي صفوان .. راقبت تصرفاتها .. كلش بسيطة .. بقيت اراقبها و وين متروح اتواجد .. مانتبهت لوجودي و نظراتي الا بعد فترة

عرفت هواي بنات .. و حجيت وياهن و اكضي وكت .. بس حياة غير عنهن هي الانسانه الراح تصون بيتي

اعتقد حبي الها وصللها .. مو يكولون من تحب شخص و تفرط بحبك له بدون ماتحجي هو يحس .. حياة اكيد حست انا عاشكها ..

صارت بيناتنا نظرات .. و يوم عن يوم يزيد حبي الها ..

انا مو سيء و لا بكتها من صفوان .. انا بس سبقته الها .. كبريائه و صبره هن سبب بخسرانه لحياة

ــــــــ قبل عام من الان ـــــــ

معاذ : صايرين مانشوفك .. اي عمي ماجستير و كذا ..

صفوان : شنسوي الشهادة احسن من الكعده ..

معاذ : انت مو لكيت شغل بالناصرية

صفوان : اي هسة لكيت .. كلت الهم حاليا مرتبط بالدراسه بس اكمل اشتغل

معاذ : لا لا يابن الخال السالفه مو شهاده و دراسه .. ههه عبرهن ع غيري

صفوان : هههه هن كلهن التمن خويي

معاذ : لازم بعدها طالبة ..؟

صفوان : اي

معاذ : صارحها شمنتظر ..؟

صفوان : هلكد ما احبها ماريد اخسرها معاذ .. اصارها و ترفض و اني كبريائي مايسمح و گلبي ميتحمل فكره خسارتها

معاذ : يابوية لهاي الدرجة عاشكها ..؟

صفوان : و اكثر معاذ .. و اكثر

حياة بنية مستحيل من تنعشك اني ضعت بيها .. من جانت مرحله ثانية و اني اراقبها .. اراقبها حبا بيها ..

اعرف تعابير الحزن و الفرح بوجهها .. حافظها .. لا اني ربيتها بعيوني صار تلث سنين

معاذ : حياة ..؟؟ البنية الـ وياي بالقاعه

صفوان : اي .. اتقدملها ع نهاية السنة حتى ماخسرها ..

معاذ : هي تحبك؟

صفوان : مادري يا معاذ شلون اعرف؟

معاذ : يعني تباوعلك تنطيك نظرات هيج شي

صفوان : شدتحجي معاذ هو اني استحي اشيل عيني عليها بس من بعيد اباوع .. ماشايفها تباوعلي

معاذ : الله يكتبلكم الخير ..

ـــــــ رجوع ــــــ

حياة - عندي اخ واحد اسمه دانيال و هو روحي بالدنيا و ابوية و امي اكيد هذولا شموع حياتي .. عائلة كولش بسيطة ..

احب معاذ .. طالب وياية بنفس المرحلة .. صارلي سنتين احبه بس بداخلي هالحب ..

و احس هو همين يحبني من نظراته بس ماعرف ليش مديتحرك او يجي يحجي وياية ..

صح اني مو هواي اجتماعية وية الولد .. بس هذا ميمنع انو يجي يبادر بكلمة .. و يريح گلبي

قبله مجنت انتبه لوجود ولد .. يعني مجان الحب من اولوياتي و لا ابفكري ..

بس سبحان الله من يجي الحب بدون اشعار او مقدمات .. حتى الحجر يحركه من مكانه .. شعور عظيم اذا جان طاهر و نظيف

و معاذ اول انسان احبه .. و ماريد الوث حبي له بعلاقه .. و ابقى انتظره يتقدم ..

(بالبيت ساعه 6:30 مساءا .. حياة و امها يجهزون العشا )

ام حياة : يمة طفي النار طبخت اللوبية

حياة : صار يمة .. خلص يمة بس بقى الجاي خليت القوري ع النار .. ها اجهز السفرة

ام حياة : لا يمة و ابوج و داني

حياة : ليش بعدهم مراجعين من المسجد؟؟؟

ام حياة : اي لو يمكن طلعوا ورا الفرض و التهوا بالسوالف ويا الناس

حياة : راح ابجي .. متت جوع .. والله يا بابا هاي سالفه تسويها

ام حياة : ههه يلله لتصيرين طفلة اتحملي ماكو هسة دقايق و تشوفيهن بالباب

حياة : لعد اني اصعد ارتاح اشوي تعبت واكفه ع رجليني

ام حياة : ع راحتج يوم .. من يجون اصيحج

حياة : فدوة لامي اني .. بستها و صعدت .. اخذت دوش سريع حتى اتنشط احس روحي تعبانه اتمددت ع الجرباية ..

شلت الفون و فتحت الصور .. ريمو دزتلي صور معاذ .. اني ماخذ صور و ية الولد استحي مادري ليش .. فهي كلما ياخذون صور تدزليهن

بقيت اباوع عليه .. كلما اشوف صورته اشتاقله اكثر .. احس اريد اشوفه كل لحظه كل ساعه كل يوم .. ماريد ابتعد عنه ..

مرات اخاف من هذا الحب البداخلي لمعاذ ..اخاف لا اتمرد ع روحي

ام حياة : حيوته يلله انزلي اجا ابوج

حياة : سرحت بصورته .. وجهي مبتسم و گلبي و روحي همين .. فوقني صوت امي

يلله يمة جاية

نزلت .. جهزنا السفرة اني و امي و ساعدنا داني .. كعدنا ناكل

وين صرتوا بابا .. تدري متت جوع

ابو حياة : يابة كملنا صلاة و اخذتنا سوالف ويا الجماعه

حياة : سوالفيش هاي الـ تنسيك بنتك .. ماا زعلت اني

ابو حياة : هههه ميهون عليه زعل بنتي المدلله

داني : يكولج صايرة بالسلاح بالناصرية بين عشيرتين

ام حياة : يمة الله يستر ليش ..؟

داني : يمة فصول عشائرية

حياة : صح اسمع هواي ع الفصول من بنات ويانة من الجنوب ..

ام حياة : يمة متسوا توصل للدم .. خطية الناس يا يمة

حياة : ماما هم ناس متحفظين و العشاير تحكمهم و العادات مو مثلنا هنا .. خو بابة حتى ميعترف بالعشاير

ابو حياة : هاأها رجعت ع ابوها المسكين

الكل : ههههههه

ريمان : صباحوو حيوته

حياة : صباحو گلبي اشو متاخره

ريمان : لا حبيبتي انتي الجاية من وكت مثل الديج

حياة : هههه لا والله قبل خمس دقايق وصلت

ريمان : داني وصلج

حياة : اي

ريمان : بعد اشكد ع المحاضرة ..؟

حياة : دقايق

ريمان : هممم منلحك نروح للنادي

حياة : اي

ريمان : شوفيني شوفيني دفترج

حياة : هاج

ريمان : اخذت الدفتر منها و طلعت محاضرة الخرسانه البارحه ملحكت اكتب شي

حياة : شقريتي لامتحان الاسس

ريمان : بس الجلد

حياة : هههه عابت لا والله

ريمان : والله شبيج اني افتح الملزمة و اغفى .. عبالك منوم

حياة : انتي حتى و واكفه تنامين شنو الجديد

ريمان : مكروهه ..

معاذ : السلام عليكم

حياة : رفعت راسي ع معاذ من سلم صارت عيوني بعونه احس وجهي من الحراره صار احمر .. بسرعه دنكت راسي

ريمان : و عليكم السلام .. اشلونك معاذ

معاذ : بخير الحمدلله .. شلونج انتي؟

ريمان : الحمدلله ..

معاذ : اشلونج حياة ..؟

حياة : اني هيج عقلي كام بس يسمع حتى ريمان مابية احجي وياها انوب هو حجى ويايا .. نسيت شنو ينكال و شنو ارد ..؟؟

ريمان تضربها بعكس ايدها خفيف و تهمس

- حيااة ..!!

حياة : هاا .. الحمدلله بخير تسلم

معاذ : الله يسلمج

داحجي وياها جان يجي استاذ التصميم .. اففف شلون بخت .. رحت كعدت باستولي ..

ريمان بهمس : شبيج خرسة.؟؟

حياة : مادري حالي اتلخبط هو شكو ديسال ع حالي ..

ريمان : يااا انتي ثولة لعد شلون ميسال ..؟

حياة : ميصير فاجأني ..

ريمان : (بهمس👂) اها يعني لازم يكولج ست حياة اتجهزي راح اسالج ع احوالج 😒

حياة :  لاا .. اووي اشمدريني صار و خلاص

ريمان : هههه فدوة للخجلان ولج صرتي حمرة

حياة : اشش كافي الاستاذ ديشرح

ريمان : سكتنا

حياة : بقيت المحاضرة كلها مثل الغايب عنه وعييه .. مادري هيج الحب يسوي بس بمجرد سلم و نطق اسمي نسيت كولشي حتى عقلي غاب عني .. مثل المخدر من يبقى تاثيره فترة ..! كل يوم بصلاتي كمت ادعي يصير حلالي و ماريد يدخل الحرام بحبي له ..

وصلت لمرحلة مستعده افدي معاذ بروحي ...

ريمان : الحمدلله خلصت المحاضرة تكسرت

يلله حيوته ركض للنادي ترا ممتريكه و طاكه جوع

حياة : تمام

طلعنا دنمشي وصلنا لبوابة البناية صار بوجهي ولد اني دنكت راسي .. اجي هيج يجي هيج اروح هيج يروح ويايا ربكني و ارتبك هو همين .. رفعت راسي عليه .. جانت عيونه حيل تلمع .. طيرت عيوني عنه .. بقى واكف .. اني تحركت و فتت من جانبه الايمن ..

انتي اشلوون تعبرين و تخليني وراج

ريمان : متشوفين الازدحام قابل الزمج من ايدج .. هسه قابل شصار شبيج هيج محمرة مداشوف معاذ حولنا ...؟

حياة : ابدي اغلط .. ولج فشلت من هذا الولد .. واحد سد طريق الخ انوب هو جامد عبالك صنم

ريمان : يوو هذا صفوان .. متعرفي ؟؟

حياة : لا ..؟

ريمان : جان بالسنة القبلنا شايفته .. فد انسان مؤدب تكه ماكو .. ولج هو اصلا خجول مو صنم ..

حياة : ميهم المهم الموقف فشلني قابل اني كلت مو محترم

ريمان : ديلله انتي اكعدي هنا انتظريني اجيب اللفات و اجي .. ادري بيج تضوجين من النادي

حياة : فديت الفاهمني

كعدت ع مقعد خشبية بالحديقه .. كمت اكلب بفوني ..

معاذ : خلصت المحاضرة التهيت اسولف ويا صاحبي .. رجعت للقاعه ماكو حياة .. طلعت ادور عليها .. شفت صفوان بالممر

هااا كبد

صفوان : هلا بمعاذ ..

معاذ : اشو هنا ..؟

صفوان : هيج دافتر .. حنيت لايام الكلية

معاذ : هاا .. اخاف مشتاق لحياة

صفوان : ههه اثنينهن ..

معاذ : ممم .. وين وصلت ..؟

صفوان : والله مستعد .. ناوي افاتحها لان مابقى شي .. و انت ابن عمتي مو غريب احتاج تساعدني ..

معاذ : احجي وياها انت .. اني ماكدر لان تعرف هي مو اجتماعية وية الولد ماعتقد تتقبل مني هيج موضوع

صفوان : هم صدوك .. الله كريم مشكور ضلع

معاذ : تدلل و اسف

صفوان : و لا ايهمك ..

معاذ : طلعت من البناية دمي محترك .. فكرة انو شخص يحب الابنية الـ انا عاشكها تخبلني هالفكرة ..

شفتها كاعده وحدها .. بدون ماحس رجليني ودتني الها ..

صفوان : مرات اقنع روحي اني احب الدراسه لهذا ادرس الماستر .. بس الحقيقه كله هذا علمود المحها .. ارجف كلني من اصير كبالها .. احس فقدت الوعي من صرت وياها وجه بوجه ..

رحت كعدت بعد مابية اكمل مشي .. امشي بالممرات و غايب عقلي .. اشوف وجهه بكل الوجوه .. تلث سنين انتظرها .. حان الوقت ..

شلون راح اصارحها وجه بوجه؟؟ مستحيل اكدر .. حيلي ميساعدني .. حيل اعشكها

معاذ : حياة ..

حياة : كاعده اكلب بفوني ماحسيت ع معاذ الا من كال اسمي .. رفعت راسي لكيته واكف فوك راسي .. نزلت عيني عنه .. ارتبكت ..

نعم ..

معاذ : اريدج بموضوع اذا ممكن ..

حياة : ضميت ايدي جوا جنطتي .. حتى لينتبه ع انو اني دارجف .. حيلي كله يرجف منه ..

تفضل ..

معاذ : اني .... رايدج بالحلال ..!

حياة : دنكت راسي .. ماعرف شاجاوب مادري مصدومة مادري فرحانة .. حسيت روحي اسعد انسانه .. اي .. لا .. ما استغربت هاي جزاة صبري و ثقتي بالله

حبيته بالحلال اكيد يجيني بالحلال .. اكيد .. الله استجاب لدعائي ..

معاذ : احس و اني احجي .. مو بوعيي .. ماريد تروح لغيري ماتحمل الفكرة ..

ساكته ..!!

حياة : ها ..

معاذ : لترديلي هسه فكري .. انتظر منج جواب ..!

عفتها و مشيت .. حسيت حجزتها .. ارتاح گلبي ..

حياة : عبالك اخذ روحي وياه من راح .. هي اصلا يمه من زمان .. احس راح ابجي من الفرح ..

ريمان : خير ان شاء الله شفت معاذو هنا

حياة ..

حياة : ....

ريمان : حيوووته .. الووو

حياة : التفتت ع ريمان كاعده يمي .. ماشوفها عيوني متروسة دموع و ابتسامتي وجعت خدودي

ريمان : ياا .. شبيج ..

حياة : اريد بس اسجد لله هنا ريمو .. لوما مكان عام والله اسجد .. بس حتى اشكره ..

ريمان : شصاير حياة .. شبي معاذ .. شكالج ..؟

حياة : خليت ايدي ع حلگي من الفرح دموعي نزلت
معاذ .. معاذ

ريمان : هسة غير افتهم .. احجي ..؟

حياة : معاذ اتقدملي ريمان .. تصدكين ..؟؟؟

ريمان : صدك  بالخيرررر عمررري تستاااهلين

حياة : اني ممصدكة انتي صدكتي  مداستوعب

ريمان : و ليش متصدكين حبي .. انتي حبابة و نظيفه ماعندج شي و حلوة يعني وين يلكي مثلج معاذ و فوكاها تحبي بعد شيريد اكثر

حياة : الحمدلله .. الحمد الك ربي .. والله اني ماريد شي عداه .. ريمان كولشي ماريد بعد ..

ريمان : فدووة الله يديم سعادتج هاي و يتمملج ع خير

حياة : رجعت للبيت و احسب دقيقه دقيقه حتى اكول لاهلي .. الفرح ممخليني احس بمكان و لا زمان و لا .. و لا اي شي

طبيت للبيت ركض حضنت امي ..

ام حياة : هلا .. هلا .. هلا بروحي .. يمة السعاده بعيونج الله يديمها .. شصاير ..؟ شبيج اليوم و هيج طايرة ..

حياة : مااامااا .. ااامييي .. يوووم .. ههههه

ام حياة : هههه يبو يبو بنتي طار عقلها ..

حياة : حبيبتي .. اليوم اتقدملي واحد

ام حياة : يمة و هذا الـ امطيرج من الفرح هيج؟؟ يروحي وين الجديد اتقدمولج قبل همين ما فرحتي و بعدين انتي شايله الزواج من بالج ..؟

حياة بخجل :  موو

ام حياة : مو شنو ..؟

حياة بهمس و نبره صوت خجوله :

احبه ..

ام حياة : هاا صغيرتي كامت تحب و اني مادري هههه ..

حياة : لا والله يمه مو من حب هالوكت .. شتعرفين بنتج ؟؟

ام حياة : هههه اشاقيج .. اعرف بنوتي عاقله و واعية .. و اذا حبت تحب بعقل

حياة : اي والله يمة ..

ام حياة : الله يسعدج يمة امنيتي اشوفج عروس و افرح بيج

حياة : يمة من انام كولي لابوية ..

ام حياة : ليش يمة ..؟

حياة : استحي .. اكيد يصيحني و يسالني عنه ..

ام حياة : هههه صاار تدللين .. اني افهم ابوج .. بس سولفيلي منو و وين بيتهم ..؟

حياة : سولفت لامي عنه .. و الفرح كله مبين بصوتي و عيوني و اني اسولف بي .. اعرف اسمه و اسم ابو و وين ساكن بس ماعرف عنه شي بعد ..

امي كالت ابوج يسال عليهم اهم شي اسمه و اسم ابو و منطقته حتى يسال

مر عليه الليل ماردت اغمض عيوني و انام .. من الفرح ماردت هذا اليوم يمر يخلص ... و يصير ماضي .. بقيت جوا اللحاف احجي بي ويا روحي و اضحك و اكمز اني و متمددة ..

يلله السعاده بالايام التجي .. اكيد اكبر لازم اعيشها لحظه لحظه و ماضيعها ..