قضية لم الشمل الفصل الرابع وخمسون 54 - بقلم نهى

#الكاتبة_نهى_الحسون
#قضية_الشمل

مساء الانوار والسرور عليكم 🌹🌹🌹

مهيمن

كاعد بالكوفي وعناد اتصل علية
كال يريدني بموضوع انا وجلال
وبعدها وصل وصرنا نسولف بيناتنا بمواضيع عادية
شكل عناد منتظر جلال يوصل ما يريد يفتح الموضوع الا بوجوده وانا خليته براحته

سألني .. شنو گلك جلال يتأخر لو يجي من وكت
.. لا كال انتظروني انا جاي بالطريق

تصدك عناد اذا اكلك بديت اخاف من جلال وتصرفاته
يا اخي
بعد ما اتخلصت من ابو طبرة وتركه

الكاه يوم ثاني مرافقلي جماعة اتعس من ابو طبرة شكولهم مگلبة
غريبة عجيبة ما اعرف وين يلگاهم ويلتم عليهم

باوع علية وكال .. لاتخاف مهيمن انا كلفت واحد يسمونه رادار
هو راح يجيبلي معلومات موثوقة عن ابو ذياب والبقية

وداعتك مثلما زحلگت ابو طبرة قبلهم بأذن الله هذولي هم راح
ازحلگهم عن طريقه بس اصبر علية.

وخلينا هاي المرة ما نلفت انتباهه ونشتغل عالصامت
ومحد عنده علم بالموضوع غير بس انا وانت

جاوبته بحرص.. هذا هو اعتبر سرك ببير
ابتسم عناد وكال .. اها مادام صار سري ببير
معناها اشتهرنا لان البير ياهو اليجي يشرب من مايه

ابتسمت على كلامه وجاوبته
.. وداعتك انا البير عندي مهجور وعطلان حتى ما بي قطرة

جلال

وصلت للكوفي الي كال عنه مهيمن ودخلت وجان اشوف مهيمن وعناد كاعدين سوية ومنطلقين بالسوالف والضحك
هاي شنو شكاعد يصير

ضيقت عيوني بحذر واتجهت على مكانهم امشي بهدوء بعدهم مامنتبهين لوجودي

اشم ريحة مؤامرة من يازمان صاروا توم وجيري اصدقاء معقولة الدنيا تريد تنكلب لو شنو الموضوع

وصلت يمهم والقيت السلام وهم سلموا
باوعت لمهيمن وسألته
.. شنو ابو الهمة هاي من شوكت حلتلك رفقة عناد
شغيرك من تالي صرت تحب گعدته

مهيمن خزرني وجاوبني .. شكو جلال المن هذا الحجي وشنو الداعي خير
ترة انا وعناد ما بينا عداوة. ولا متعاركين قبل
شنو الي يخليك مستغرب رفقتي وياه

على فكرة ترة عناد خوش عناد واتشرف بصحبته

جاوبه عناد وكال .. والنعم منك ابو الهمة هذا من طيب اصلك

رفع راسه وباوع علية وكمل كلامه
.. عذره لأخوك شكله ما يعرف يثمن كلامه ولا يعرف
يميز بين الصديق من العدو
هو شعرفه بالصحبة الزينة
من ابو طبرة وامثاله وشيل ايدك بعد شتترجى منه

كعدت كدامه وانا ابتسم بأستهزاء
جنت متعمد استفزه اريد عناد يطلع عن طوره
اريد الكالي حجة حتى اقطع جميع الجسور بيني وبينه وابعده عني وعن حياتي ويبطل يورط روحه بحشريته وتصرفاته الرعنة

رديت على كلامه .. خليت الزينين الك حجي عناد

مهيمن غير الموضوع وهو يباوع علية بتأنيب
.. بالله شو غيروا الموضوع
دار علية وكال .. وانت جلال انتبه لروحك وبطل سوالف المراهقين

رفعت ايدية بأستسلام وكلت .. لاتزعل ابو الهمة هاي لخاطرك راح اسكت

جنت كوة لازم روحي ما انزل على عناد بالحجي واخرب الاول والتالي وياه لان اعرف مهيمن ما راح يخليني اتعدى حدودي واكيد راح يوكف بوجهي. ومو بعيد حتى يتعارك وياية بسببه

رجعت للخلف بالكرسي اتكأت عليه وبسطت ايدية كدامي على الميز
وسألتهم .. ممكن اعرف. على شنو جايبنا هنا استاذ عناد
وشنو الموضوع المهم الي رايدنا بي

جنت احجي وعيوني تراقب معالم وجه عناد
اباوع عليه كان ضايج من طريقة كلامي وياه. وهو المطلوب

مهيمن كمل على كلامي .. والله من وراك نسينا حتى السالفة
التفت على عناد وكال .. كول عناد شنو الموضوع هذا جلال هنا

اباوع عليه عدل كعدته وجلى صوته عبالك واحد راح يلقي خطبة
مهمة
وكال .. بالحقيقة انا جبتكم لهنا حتى احجي وياكم بموضوع مهم واخذ منكم كلمة او بالاحرى اخذ رأيكم قبل ما اخطي اي خطوة
وحتى قبل لا ابلغ اهلي ردت اعرف ردكم قبل كل شي حتى ما تصير احراجات بينا

سكت وسحب نفس عميق ومهيمن حثه حتى يكمل كلامه
مهيمن .. كول عناد بشنو نكدر نساعدك

.. ابو الهمة كلك خير وبركة بس انا جاي وطالب منكم القرب
بأختكم نور

كلام عناد اجة مثل الصفعة على وجهي فاجئني او بالاحرى فاجئنا
لان الظاهر مهيمن هم مثل حالي.مصدوم

جانت نظرات عناد المترقبة تتنقل بيني وبين مهيمن
من شاف ماكو رد كمل كلامه .. انا اعرف انتوا متحسسين من هذا الموضوع لان الماضي ما يشفعلي بس هسة انتوا تعرفون منو عناد
وانا جايكم شاري. على حب الله

اوووووف هنا حسيت بالراحة انطاني السبب حتى اهجم عليه

عيد وجابه العباس النا ما انطيته فرصة ينهي كلامه
كبل نهضت من مكاني بغضب وعطت بي
.. عناااااااد لهنا وحدك. شنو هالصلافة البيك
من كل عقلك انا ازوج اختي لواحد حشري وارعن مثلك.
الا انا اتخبلت فقدت عقلي

نهض عناد منتفض ولحكه مهيمن
عناد .. جلال حاسب على كلامك وثمنه قبل لا تكعد تجفص
جاوبته .. انا ما جاي اجفص اختي وانا حر بيها ازوجها للي يعجبني

مهيمن زمخ بية وقاطع كلامي وكال
.. جلال خير سالمين اشو كعدت من يمك تگمز
ترة هالشي ما راجع الك مو انت الي تقرر عنها
والقرار راجع لصاحبة الشأن هي الي توافق او ترفض

جاوبته بتحدي اريد الهي مهيمن شوية عن المناقشة
.. ما تكول لروحك هذا الحجي من كعدت تطرد خواطيب بنت عمك. وتقرر عنها بكيفك شو ماكلت لروحك هي صاحبة الشأن والقرار

خليت مهيمن شوية يتراجع والتفت بسرعة لعناد وكلتله بتحذير

.. شوف ولك عناد لو تبقى اخر رجال بالعالم ما ازوجك اختي

مهيمن دفعني وكال .. جلال صدك مصختها ترة والله وصل حدي وياك انتبه لروحك

عناد كله .. لا مهيمن عوفه خلي اشوفه وين يريد يوصل بهذا كلامه
جاوبته .. ما يحتاج تنتظر وتشوف ترة كلامي واضح
ما الك مرة يمنا للزواج

مهيمن رجع دفعني يريد يهد علية.. جلال اكل تبن وسد حلگگ
لا والله العظيم اخليك تتفل سنون

جاوبته وانا اتنحى عن طريقه وكلت .. انا ارفض ازوج اختي لواحد ثقيل على المعدة وحاشر روحه بكل شي
هو انا من غير كل شي ما جاي اطيقك مو فوكاها جايني تطلب ايد اختي شنو هالثقة الزايدة العندك

عاد هنا وبهذا كلامي كدرت اطلع عناد عن طوره
ما حسيت الا عناد زانگني من ياخة قميصي وقرب وجهه على وجهي الا شوية يرفعني من الكاع

كال بصوت يهدر .. شوف ولك عار انا كوة لازم روحي عنك
حتى ما اسحلك مو لخاطر احد لخاطر مهيمن انا عايفك لوحدك تمسلت

بس اسمعني زين حجاية گلتها
قبل وراح ارجع اكولها وما خايف منك
اي انا طالب ايد اختك بالحلال وراح ارجع اطلبها
منكم مرة ومرتين وثلاثة لحد ما تملون وانتوا بيدكم تزوجوني اختكم.

نترت ايده ودفعته عني وكلت .. هذا عشم بليس بالجنة
صير رجال وخلي عندك شوية كرامة وكافي لا تلح
شنو انت ما عندك احساس

ما حسيت الا ومهيمن انطاني لطمة على وجهي اختل توازني
واتعثرت للخلف باوعت عليه

مهيمن .. صار لازم واحد يحطلك حد لان كلش اتجاوزت حدودك
راد يرجع يكمل ضربه الي

لكن عناد اتدخل ورده
حجة بصوت هاديء بي برود العالم كله
وكال .. لا مهيمن عوفه. لا تتعب نفسك وياه جلال ظهر على حقيقته

باوع علية وكمل كلامه .. هاي هي جلال يجرالك الي تريده
اوعدك ووعد الحر دين
بعد ما تشوف رگعة وجهي للموت ولا اقترب منك ولا احشر روحي يحياتك
واوعدك بعد ما تسمع مني كلمة قرب منكم ومن اختكم
هاي هي النفس طابت منك ولكل شي اله حد ونهاية وانا هذا حدي وياكم

بعدها دار وجهه وطلع زعلان وهالمرة زعل عناد
ثكيل يختلف عن كل مرة هالمرة
الدم كان يرعد بعروگ عناد وهو يتوعد يبتعد عني
وهو المطلوب هاي كانت غايتي من هذا كله

خلي اتحمل جهنم فراگه ولا لوعة موته على ايد داعش

نور

اباوع لام مهيمن شلون تحجي وية مرت اخوها حسن بالنقال
وتسولفلها على حفلة الحنة مال رغد

ام مهيمن .. ياخية لو تشوفين بناتهم شلون محتارات بنفسهن
ما مبقيات شي ما حاطينه بوجهن واللبس تكولين عندهن سباق
بالشخلع

.. تصدكين اذا اكلج هناك ما تميزين المتزوجة عن البنية
كلهن على فرد حفافة ومكياج

كنت استمع لكلامها وابتسم وبنفس الوكت عقلي كل شوية يغافلني
ويكعد يعيد ويصقل بكل الي صار بحنة رغد
اكيد هسة عناد فهم هروبي منه رفض
ويمكن راح يطلب من امه تخطبله اوووف هسة اني شبية

دك الجرس وراحت حور تفتح الباب هنااااك وجان اسمع اصوات
مهيمن وجلال

دخلوا مثل الزوبعة اثنينهم ينافخون سلموا علينا ومهيمن كمل كلامه وية جلال
.. انت صاير واحد ارعن ما تعرف تتصرف

جلال جاوبه وهو ضايج .. انا هذا الي عندي
..على فكرة ارجع واكلك مو انت ولا انا الي نقرر بهيج موضوع
هي صاحبت الشأن تقرر ولو بعد ما يفيد الحجي بعد طيرته للرجال

جلال رفع حاجبه وكال ..وشنو يعني الي خلقه خلق غيره
اختي مو بحاجته مو انت نفسك الي رفضته بالمرة الاولى لان شفته ما يصلحلها

مهيمن زمخ بي وهد عليه وام مهيمن صاحت بيهم

اجوي البنات على صوت صياحهم
ريم سألتني .. شنو الموضوع مهيمن وجلال شبيهم ليش صوتهم عالي

جاوبتها واني اباوع عليهم شلون يتحاجون كل واحد عبالك نار تطلع من عيونه
.. والله ما اعرف شبيهم علمي من علمج اشو اول ما دخلوا للبيت وهم على هالحال واحد يصيح بالثاني

ام مهيمن .. ولكم يمة شجاكم كل يومية صوتكم طالع للجوارين
فهمونا شصاير

جلال باوع عليه ومسح وجهه وكال .. خالة ما صاير شي بس هو مهيمن يسوي من الحبة گبة لازم يكبر الامور

مهيمن عاط بي وقطع كلامه .. ولك غبي كل هذا السويته وتكول ما صاير شي انت تعرف شنو سويت

.. ما سويت شي
.. ولك انت خسرت صديق ذهب
عناد ما يتعوض لو تدري بمعزتك بگلبه شكبرها جان ما اتجرأت وفتحت حلكك وياه وسمعته هالحجي المسموم وخشنت خاطره

.. لا تخاف عليه هذا جلده خشن يومين وتلكاه مزروع
يمنا وكاعد يحشر روحه بشي ما يخصه هي هاي هوايته

مهيمن بعصبية .. لا جلال هالمرة ما اظن عناد راح يرجعلك
هالمرة انت اتعديت حدودك وياه ودست بمصارينه وانا لو بمكانه
لو يصيغونك ذهب ما ارجعلك. لو تصير على كطع رگبتي

ام مهيمن نترت بيهم .. ولكم شنو الصاير هسة غير يفهمونا
خلصوها علينا صياح

مهيمن دار وجهه عليها وكال .. يمة هذا التيس الواگف كدامج
اتعارك وية عناد لان طلب ايد نور من عدنا ورفضه من يمه
حتى ما سوى احترام الي او لرأي اخته

گلبي ارتعدت من سمعت بعناد خاطبني من اخواني

جلال قطع كلام مهيمن وكال .. مهيمن كلشي بالقسمة والنصيب وعناد ماله نصيب يمنا.
حاول تتقبل الموضوع ولو انت متعود مو جديدة عليك تطرد خواطيب فأعتبر عناد واحد من الي غلست عليهم ورفضتهم

مهيمن زنگه من قميصه وكله.. انتبه لكلامك انا مو مثلك ارعن
وارفض الناس بدون سبب انا عندي حجة عليهم وارفضهم
بس انت ماعندك اي سبب يخليك ترفض عناد
گلي شنو عيبه

.. عيبه ارعن ويدخل نفسه بأمور ما تخصه وحاشر نفسه بخصوصيات غيره
بأختصار بكل عزة لاطم
هاي من غير ثلثين مشاكلي بسببه .. هاي وهو بس صديقي هيج يسوي
زين من يصير نسيبي شيصخم يمكن الكاه
حتى يزوجني بكيفه ومو بعيد الكاه واكفلي ورة الباب بليلة عرسي
من زود الحشرية مالته

بعد كل الي صار جلال طلع من الهول وترك مهيمن يرعد
بغيضه

ام مهيمن باوعت علية وكالت بحسرة
.. مكرودة يانويرة ما تكليلي حظج وين نايم. بيا خرابة

جانت ام مهيمن تحجي وانا گلبي صار يشتعل بناره وينطفي من الكلام الي سمعته.

مهيمن جاوبها وكال .. والله يمة جلال حرجني كدام عناد
وخلاني بموقف لعدوي ما اتمناه. اتهجم على الولد وزعله

ام مهيمن .. زين يمة ما عرفت جلال شبي ناشب وية عناد شمسويله حتى هيج يعاديه ويتهجم عليه

مهيمن.. يمة غير انا ما احجي خليها سكتة. الا اكلج اخوي
واحد مرعبل وارعن وصاير ما ينطاق وسوالفه كلها غمة
ومن واحد يراويه خطأه يگوم يعاديه وينشب وياه وهذا حال عناد وية جلال لان ينصحه صار مكروه

ريم كالت معترضة.. جلال مو من حقه يرفضه والله لان متعارك وياه. وعلى اي اساس يقرر عن نور
من يمه ليش هي وين راحت
طبعاً انت السبب برفض جلال كله من جوة ايدك
ولوما انت جان جلال ما اتجرأ يتجاسر ويتعدة حدوده

مهيمن عاط بيها وكال .. خير سالمين اشو كمتي علينا
وانا شكو علگتي برگبتي غلط جلال

.. اي لان اخوك لو ما يشوفك كدامه شلون تغلس عالخطابة وترفضهم وتطردهم وتقرر من يمك جان ما اتجرأ وسوى هيج. بس انت الي سبقته وعلمته بعدم احترام رأي البنية.

عاط بيها وكال .. ولج غضب شجاب الراشدي عالجلاق
اشو كمتي تخوطين بصف الاستكان.
ولج ريم تبعدين من كدامي لا اطلع جناني عليج واطفي حركة گلبي بيج. انا ما ناقص وحدة تكعد تنگ على راسي. كافي علية مصايب جلال.

جايتني البطرانة تتهم مو على اساس الخواطيب الي اجولج جان براسهم خير وانا رفضتهم اشو واحدهم من اول نفخة يطير بعد عليمن كاعدة تتحسرين عليهم وتلمحين.

.. اني ما جاي اتحسر عليهم انا جاي اكلك شوف نتيجة افعالك وين وصلتك

.. ولج بابا عناد غير يختلف عن الكل عناد مشتري وطالب القرب واكثر من مرة اجانا وخطب

واتعرض للرفض ورغم كل هذا هم رجع يطلب ايدها وهذا يدل على
طيب اصله ومعدنه الصافي بس تعال
ياهو هسه يقنع الاثول جلال الي خرب الاول والتالي حتى
ماخلى خط رجعة او منفذ علمود اتلافى بي الموقف واصلح الامور
سد الباب بوجهنا

برطمت شفايفها ورفعت راسها وكالت .. اليجي من ايده عسى الله يزيده

راحت وعافتنا وطلعت ومهيمن بقى يباوع وراها ويهز بيده وكال
.. والله احلف عليها هاي البنية شاخطة وكل كارثة بالعالم كون تلوفها وتربطها بحظي الاغبر

ام مهيمن بتفكير . . اكلك يمة. بالله بلكي بيها مجال تروح تحجي وياه. هو صاحبك وانت تمون عليه وفهمه بالسالفة بهداوة بلكي يرجع ويطيب خاطره

.. يعني شنو ترديني
اروح للولد واكله تعال ارجع اخطب اختي ما عليك باخوي مخبل

يمة صحيح هو صاحبي وامون عليه بس اكو امور حساسة اذا اتعديتها يروح ماي وجهي وكلامي وية عناد علمود يرجع يخطب اختي ومايدير بال لاخوية وحدة من الامور الي يروح بيها ماي الوجه

ما كدرت اتحمل اكثر نهضت من مكاني وطلعت ورحت للغرفة

صرت الوب واتلوى من القهر كوة لازمة روحي لا انفجر وابجي

ما اعرف اعتب عليمن
اعتب على حظي لو اعتب على جلال الي طلعلي بالجديد
ما ادري ليش وشنو السبب رفض عناد والمشكلة مو بس رفضه لا واتعارك وياه
حتى ما ترك خط رجعة

ريم كانت تباوع علية وكالت .. ادري بيج مقهورة لان جلال رفض عناد وهسة اكيد گلبج مشتعل نار

جاوبتها بدون خجل وكلت.. احس بروحي عطبت من كد القهر
كليلي شسوي هذا اخوي. وذاك الي حبه گلبي

.. ماكو حيرة انتي مو تحبينه خلاص سهلة
اتصلي عليه وكليله اني موافقة وخلي يجي يطلبج من مهيمن
شكله هو موافق هاي المرة على عليه عكس جلال

جانت حور هم مقهورة على حالي

وكالت .. رحمة على اهلج ست كناري احتفظي بأفكارج الجهنمية لنفسج خلي القنابل بس لأخوي مهيمن المكرود وعوفي نور

.. شنو ليش يعني عاجبج وضعها لاهي طايلة سما ولا طايلة ارض

.. خايبة كناري عيب ما يصير تروح تتصل عليه من ورة اخوانها
وين كاعدين هذا الشي عيب

جاوبتهم .. مستحيل اسوي هيج شي لو على كص رگبتي

باوعتلي ريم وكالت .. زين تردين انا اتصل عليه ترة عادي احنا
ما مسوين شي غلط. انتي تردينه وهو يريدج وبالحلال
بس تحتاجون احد يسعى

حور .. وانتي تالي وياج ناوية تصيرين دلالة من تالي وكت وتجمعين راسين بالحلال عمي كعدي وسكتي

ريم جاوبتها معترضة .. انتي شنو سالفتج اليوم واكفتلي مثل العظم بالبلعوم جنج جلال كله تمشون بالاتجاه المعاكس

حور .. لا بالعكس انا هم مثلكم مقهورة على نور واريدها تصير لعناد بس الحلول الي انتي جاي تقترحيها ما يشيلها العقل
لازم كل شي يمشي ويتم حسب الاصول.

وهذا جلال حسابي وياه بعدين اريد اراويه شلون تكون لوعة المحبوب من يبعدونه عن حبيبه.

.. شنو راح تسوين
.. انتظري وشوفي بعيونج شراح اسوي

جانوا البنات يحجون وانا عقلي كاعد يتخبط بظلامه
حجيت وية البنات حتى اسكتهم لان كلامهم يزيد بشد اعصابي وكلتلهم .. عفية بنات كافي سدوا الموضوع وكل شي لا تسوون
بعد ما يفيد الحجي شكله عناد راح وبعد ما يرجع
وما مقسوملي اصير من نصيبه هذا حظي وانا راضية بي
الحمدلله على كل حال ما عندي اعتراض على حكمه

مهيمن

ملتهي بالشغل وية العمال والمشترية
دك نقالي وكان المتصل الحجي ابو حيدر غمضت عيوني
والله حتى مالي عين احجي وياهم لا هو ولا حيدر
رديت واجاني صوت الحجي بنبرت عتاب

.. هَـا بوية مهيمن الكلب العضك كتلناه شبيك عمي
ليش ما تشيل نقالك وتكول خلي اتصل على عمي ابو حيدر
صارلك اسبوع لو انا الي اتصل لوماكو شنو سامع شي احد مزعلك

خجلني اكثر بكلامه شكول عليك يا جلال
.. عمي ماعاش الي يزعلك ويكطع وياك الوصل
بس وداعتك ملتهي بالشغل صاير هاي الايام ضغط علية وجلال مثلما تعرف عاف المعمل وبلش بمشروعه الجديدة وعايفني لوحدي

جاوبني الحجي .. اي انتهبت كلي حيدر. ونوب حتى عناد التيس هذا الثاني مطنكر ما يرضى يروح للمعمل خلة حيدر يروح بمكانه
وهو اخذ مكان حيدر بالعلوى وذاك حيدر بعده جديد على شغل المعمل فتشوف كل شوية ومتصل على عناد علمود يفهمه
على شغلة

طبعاً عناد من الصار بعد ما شفناه ولا وصل للمعمل وحيدر اخذ مكانه وهالشي حيل شان بخاطري بس حقه
جلال ماخلى شي ماكاله بحق عناد

جاوبت الحجي .. اي والله انا هم جاي اروح للمعمل وية حيدر كلما افرغ ويصير عندي وكت

.. شوف مهيمن طبعاً انا ما اتصلت عليك علمود المعمل والشغل
بالحقيقة اتصالي وياك علمود اريد اعرف ابني عناد شبي
هاي الايام الزلمة مو على بعضه معتكف بالبيت

حرت اسأل منو عليه واتذكرتك انت وجلال اقرب اثنين عليه
كلت اسألكم بلكي تعرفون شنو علته لصاحبكم

كلام الحجي زاد بتأنيب ضميري وحرجني بالزايد
احتاريت شجاوبه .. والله حجي ما اعرف شنو اكلك.
.. شكو صاير شي بينكم

.. قبل اسبوع عناد اتعارك وية جلال بخصوص موضوع ومن يومها جلال وعناد ما شفتهم
حتى انا ابتعدوا عني بالرغم انا مالي ذنب بالصار بينهم

الحجي كال يطمني .. لا تضوج يابعد عمك هذولي دومهم يتعاركون
هسة تشوفهم بعد كم يوم تلكاهم راحعين متصافين سوية
خليهم براحتهم هم لوحدهم يرجعون

جلال

دخلت للبيت ميت تعب منا بناء البيت ومنا مشروع الورشة كلفت
واحد يشوفلي مكان زين بالصناعية
وفوك هذا كله ابو ذياب وابو جراس الي كل فترة يحومون فوك راسي يردوني اسافر وياهم

وانا لحد الان منتظر اتصال الضابط علي حتى يأذنلي بالسفر ومباشرة تنفيذ الخطة.

دخلت للمطبخ لكيت نور وام مهيمن موجودات سلمت عليهم
وردوا السلام بس بصوت ثكيل لاحظت صارلهم فترة احس بيهم متغيرين علية نا اعرف ليش

مرت من يمي حور وهاي الثانية هم خزرتني ورفعت خشمها ودارت وجهها عني شكو خير شصاير اشو حتى غزال البصرة صرنا ما نكدر نشوفه. ولا يقبل يحاجينا

نور سإلتني .. اصبلك غدا
جاوبتها بتعب .. لا ما اريد كل شي ما اشتهي اكل نفسي مسدودة
جاوبتني .. براحتك

بقيت صافن عليها كل مرة من اكوللها ما اكل تضل تلح علية
وتفتر وراي علمود اكل اشو هسة عايفتني براحتي ما مهتمة
عقدت حواجبي مستغرب نور شبيها شنو صاير اشو البيت كلهم كالبين علية

تركتها ورحت دخلت للغرفة حتى اروح اسبح
ورة ربع ساعة طلعت من الحمام ولكيتهم كلهم كاعدين بالهول
جاي يشربون جاي حتى مهيمن كاعد وياهم.

رحت دخلت سلمت على مهيمن رد علية السلام من ورة خشمه
ورجع يكمل شرب جايه رحت كعدت گدامه

ما ادري ليش احس بيهم صايرين كلهم علية حزب
بالله مهيمن مطنگر علية من يوم عركتي وية عناد

زين هذولي البقية منو دايس على ذيلهم
صرت اتنقل بنظراتي على وجوهم

نور صافنة بغير وادي وحور صدت عيونها بزعل عني وام مهيمن
تدردم بينها وبين نفسها وتباوع علية وتكولي
.. الله يهديك ويكملك بعقلك

جاوبتها مستغرب.. اي والله خالة ادعيلي بلكي يكمل عقلي وابطل البس دشداشة كصيرة والزم وعصى واركض ورى الجهال بالشارع

جاوبتني وهي كوة لازمة روحها ما تريد تضحك
.. اي هو انت هذا الي فالح بي بس تكعد تتمضحك
جاوبها مهيمن .. يمة عوفي لا تعبين نفسج وياه هذا احلف عليه بي انفصام بالشخصية. وايراته طابگة

ما جاوبته وكلت لام مهيمن .. عفية خالة استكان جاي من ايدج الطيبة
صبتلي وكالت .. وين جان هذا السانك الحلو من اتعاركت وية صويحبك

غمضت عيوني وسحبت نفس عميق واخذت الجاي منها
.. ساعة شيطان الواحد كلشي يحجي

درت وجهي عنها اتهرب منها وجان توكع عيني على باربي
ابتسمت بوجهي وحركت بعيونها منا ومنا يعني داروا عليك

واخيراً لگيت حليف وياي بالله هاي شلون احجي وياها اذا كلها يمنا

انتبهت لكيت نقال باربي يمها

لزمت نقالي وراسلتها عالواتساب كتبتلها
.. اكول باربي شنو القضية شبيها نور وام مهيمن وغزال البصرة كايمين علية. صاير شي وانا ما ادري

رسلت الرسالة
وسمعت صوت تبيه الرسائل وفتحت النقال وقرت الرسالة ورفعت راسها تضحك
وكعدت تكتبلي صرنا نسولف بينا عن طريق الرسايل

احس بروحي كاعد بمهمة سرية
جاوبتني .. شفت استاذ جلال محد الك غيري حتى مرة ثانية ما تفرط بية وتزعلني. وتكعد تحجي علية وتشحن جعفوري علية

.. يابة حقج علينا وتوبة بعد ما ازعلج بس كليلي شنو الموضوع ترة طگت روحي

رفعت راسها وابتسمتلي وهزته بغرور ورجعت تكتب
ضحكت على خبالاتها
جاوبتني .. اول شي خالة ام مهيمن زعلانة لان طيرت من ايدها عريس لگوة وهي ما تعول تلكة عريس لاختك

اما نور فعادية ما بيها شي بس تلكاها ضايجة علمود خالتها مريضة ومتعاركة وية رجل خالتها صابر

.. تٌـٌـمـام زين وغزال البصرة ليش غايب عنه صارله كم يوم ما اشوفه

.. والله يا اخي انت تعرف بخالة زهرة مسوية على غزالتك حضر تجوال من يوم الي صادتكم سوية

.. زين ليش كلما تشوفني تدور وجهة زعلانة صاير شي

جاوبتني .. بالحقيقة حور ضاجت منك لان وكفت قسمة اختك
وهي نور مسكينة. مكابلة البيت وكاعدة. وحالها حال اي بنية بهيج عمر تحب تتزوج وتكون عائلة وبيت خاص بيها

.. اهوووو هاي كلها الدنيا مگلوبة علمود رفضنا استاذ عناد وانا صفيت قطاع الارزاق الشرير بينكم

.. بالحقيقة كلنا مصدومين من ردة فعلك وية عناد
الولد حباب وماكو سبب يخليك ترفضه

غمضت عيوني بصبر وجاوبتها .. باربي مرات يحطنا القدر
امام خيارين واحد امر وادهى من الثاني ولازم نختار بينهم وطبعاً
بالخيارين انا الخسران بس خسارة عن خسارة تفرق

جاوبتني .. اكول استاذ جلال كل شي ما افتهمت من كلامك
شنو هذا خاطرة لو بيت شعر صارلك ساعة تحجيلي بالالغاز

ابسمت ورفعت راسي ولگيت حور تباوع علية وعيونها تتطاير شرار منها. لان كاعد اتراسل بالنقال واوزع ابتسامات

دنكت عالنقال وكتبت
.. ولج باربي خرب يومج غزال البصرة راح تگوم علية وتسحلني
شوفيها شلون تباوع علية

.. حل تستاهل انت واخوك مال حرگ

.. اكول عفية باربي دبرينا اريد اشوف حور واحجي وياها
حتى افهمها موقفي خو ما تظل زعلانة هيج تاكل بروحها

رفعت راسها وجرت حسرة وباوعت لمهيمن ورجعت باوعت علية وكعدت تكتب .. اكول بالله ما تاخذ اخوك التيس وتدخله دورة
تقوية لكيفية معاملة الانثى والتودد اليها

قريت الرسالة وطكيتها ضحكة
.. الله ياخذج باربي دشوفي التيس شلون يباوع عليج
وعيونه تريد تطلع من مكانها الفضول يقرة عنده الف يريد يعرف ويامن تحجين وتتمضحكين

رفعت راسها بسرعة وباوعت لمهيمن وابتسمت بأنتصار
.. اي احسن خلي يحترك بناره
خلي استغل وجودك

.. اكلج باربي لا تضيعين السالفة كلنالج نريد تدبرينا حتى نشوف حور ونحجي وياها

جاوبتني.. مستحيل طلبك صعب تحقيقه ام مهيمن ونظراتها الخارقة
مثل الحارس الشخصي على حور حسرة عليها تتحرك اذا ما سألتها
وين مولية

كعدت افكر شلون حلها هاي
وبعدها ابتسمت وكتبت لريم .. لج باربي لگيتها انا اعرف شلون راح التقي بحور واكعد وياها واحجي بعد
.. شلون بالله تكدر وام مهيمن منا فوك راسكم

.. عفو عليج انا جلال قربان ضابط استخبارات اكدر على ام مهيمن وعلى عشرة مثلها

طكتها ضحكة وكتبت .. شكلك حميت والنقال راح ينطفي من حرارة حماوتك

.. ما عليج بس اريدج تكولين لحور باجر جلال راح يمر عليج بالكلية وكليلها لا تتغدى انا راح اجيب وياي لفات وبيبسي

ابتسمت ما حسينا الا على مهيمن انفجر بينا وصاح
وهو يطفي النقطة مالت الراوتر

باوع على ريم وكال .. انتي شنو سالفتج كاعدة تتمضحكين
ودار علية وانت الثاني شبيك تريد تدخل بالنقال فاتح حلكك
الاعوج صدك مصختوها.

كامت علينا باربي بس لا تلوص السالفة
جاوبته .. شنو مهيمن شبيك كنت اتراسل وية جلال بالواتساب
كان عدنا كلام خاص بينا ما يحتاج كل هالعصبية والصوت العالي

لا بالحمزة خربت باربي انفجرت وانا الضحية
دار علية وهدر بية
.. ولك انت شنو يعني حتى الاصول لازم اكعد اعلمها الك

ريم راحت وكفت كدامه وكالت بتحدي .. على شنو كبرت الموضوع شنو دخل الاصول بَـهذا جلال ابن عمي وصديقي ومن حقي احجي وياه

.. يا خاتونة الاصول تكول من تكونون كاعدين بين طراطير
المفروض تحترمون وتعوفون نقالاتكم
بس وين انا جاي اححي وية منو شلون اثنين
جلال وبنت عمه واحد اضرب من الثاني اثنينكم مال حرك

انهى كلامه طلع من البيت بكبره
اسمع امه صاحت وراه تسأله وين رايح جاوبها
.. رايح شوية يم بيت خالي حسن

دك نقالي وكان المتصل ابو ذياب معناها عندي شغل يطول
باوعت لنور وكلتلها اليوم احتمال اتأخر لا تنتظريني

مهيمن

الي حسن سألني سبب غيبتي وجاوبته
.. والله خالي حقك علية انا هواي مقصر وياك بس اكيد تعرف من الوالدة انا حتى البيت ما جاي ارجعله من وكت كله بالشغل

بعدها صرنا نسولف انا وخوالي واولادهم عن الوضع بالعراق والموصل وخالي كال
.. تدرون سمعت من صاحبي يكول اذا ظلت الموصل
هشكل احتمال المرجعية تعلن الجهاد

جاوبه خالي منذر وكال.. والله ياريت وانا وولدي اول من يروح لهناك شنهي قابل هي الموصل تايهتلهم خلي يعرفون الموصل وراها زلم مو لوحدها

وانتبهت طول ما انا كاعد عيون سجاد تنظرلي بستهزاء ويحجي
وية الي بصفه ويتبسم

سألته بصوت مسموع كدام الكل .. خير سجاد اشو كاعد توزع
ابتسامات جنك ضبع متنكر كول شعندك احجي

جاوبني .. ماعندي شي انا رجال علم كلها تعرفني ماعندي شي استحي منه واضمه
بدال ما جاي تسألني بالله روح اسأل اخوك الحوك
الي سويته براسنا سبع السباع تالي طلع بوخة

.. سجاد ثمن كلامك واحترم نفسك لا تخلي اكوم اعلمك شلون تحجي وية تاج راسك

خالي حسن اشرلي حتى اسكت وباوع لسجاد وسأله
.. شبيك ولك سويجد احجي عدل لا تكعد تمسلت واحترم خطاري

جاوبه سجاد .. والله عمي انا محترم نفسي بس انا حازة بخاطري
تصرف مهيمن ويانا بيوم اتعارك وياي وخرب وية خواله علمود
اخوه جلال وهم ياريت يستاهل
يتعارك علموده

زمخت بي ردت اكوم اهد عليه وخالي لزمني من زندي
كلتله .. جلال يشرفك ويشرف اكبر واحد على الاقل زلمة
ما طلعت منه العيبة. مثل بعض الناس

جاوبني سجاد بكل ثقة وكال.. انا لو منك ما احجي هذا الكلام

روح شوف اخوك الحوك مرافگله وين ما واحد زايعته الگاع
وسمعتهم على كل لسان ناس تكول هذولي ارهابيين وناس تكول هذولي حرامية واخوك وصحبته وياهم للعظم

هز ايده وكال
.. ما يسوى خربت وية خالك وابنه علموده حرامات طلع ما يستاهل

ما اتحملت ابقى كاعد وهديت عليه
رغم انا اعرف بكلام سجاد صحيح ما كذب بس صعبة يجي واحد مثل سجاد ويعيرني بأخوي

انطيته ضربة على راسه وكومته بالگاع
وخوالي واولادهم التموا علينا ما انطيتهم مجال يحجون گبل طلعت
من الديوان راجع للبيت اجر وراي اذيال الخيبة

من ورة اخوي وينه هو كون الزمه بالقران انسيه اسم امه
انا تاليتي اتعير ومن منو من اتفه الناس
صرت علج بحلگ اليسوى والمايسوى

جلال
كعدت يوم ثاني الصبح لكيت روحي نايم بشقة ابو طبرة البارحة كلش اتأخر الوقت وما كدرت ارجع

لان الضابط علي اتصل علية وكال جهز نفسك وخلص امورك وانطي خبر للجماعة بعد يومين تسافر للموصل
وتباشر المهمة

ومن بعد اتصاله اتواصلت مع ابو ذياب حتى ابلغه واكله انا جاهز خلصت اموري
وهو جاوبني بنصر وكال هاي هي لعد حضر نفسك عگب باجر
نسافر

هو جان يحجي وانا بدأ الدم يهدر بعروگي وصارت صدك ياجلال
وراح تروح برجليك لداعش للي سلبوا ارواح بيت خالك
للي طفوا شمعة عرس اسراء وبتروا ورود رنين ورند
وبعد جلال شنو سلبو منك
سلبوني الصديق الوفي الي عشت وياه بالحلوى والمرة
وما كفاهم الي اخذوه تالي اخذوا ارضي و يدمروها

غمضت عيوني واتوجهت لكلية حور اتصلت عليها
كنت مواعدها ولازم احجيلها عن الصار وابلغها بسفري للموصل
حور الشخص الوحيد الي اكدر اامنه واحجيله كل اوجاعي

دخلت للكلية وشافتني كانت تنتظرني بنفس المكان
بالبداية كانت تبيع الثگل وتباوعلي من جوة لجوة

بس اول ما شافت بنيتين اقتربوا مني يسألوني
عن اسمي واذا كنت طالب جديد هنا

جاوبتهم وكلتلهم وانا اباوع لحور .. لا انا ضابط اجيت هنا بمهمة
خاصة

ما اشوف الا وحور قطعت الحديث ووكفت كدامي وانطتني ظهرها ووجهة عالبنات

وحجت وياهم بكل رقة .. اتفضلي حبيبتي محتاجة شي اذا عندج
سؤال اني اجاوبج عنه ميحتاج تحرجون الرجال

جاوبت من وراها .. لا بالعكس ماكو اي احراج ما احس الا ورجلي
انداست وكتمت صرخة الوجع حشى مو رجل جاكوج
بنت الذين

جاوبتها البنية من بغيض وكالت .. تسلمين حبيبتي كلج ذوق
واتوقع الولد عنده لسان ويكدر يجاوب

رفعت ايدية بأستسلام واشرت على حور الي كانت واكفة تباوع عليهن بتحدي

اشرت على رگبتي بحركة الذبح وهن ابتسمن وابتعدن
من يمنا اسمعهن يكولن .. يمة الله يساعده عليها جنها عريف شكله المكرود متورط على عمره وياها

حور شهكت والتفتت وفاتحة عيونها على وسعهن
.. هذني عليمن جاي يحجن لايكون علية وانا ما ادري

.. لا لا لا حشاج مو عليج هذني تلكيهن من حركت گلبهم يحجن هيج يغارون من غزال البصرة شلون گدرت
تحصل على گلب جلال قربان وتخلي اعمى ما يشوف غيرها

گلبت عيونها بزعل وراحت گعت على مصطبة
.. ما تقسمرني بهاي سوالفك انا زعلانة عليك

.. اي غير اعرف انا شيويت حتى تزعلين علية
.. لا تسوي نفسك ما تعرف مو ريم كلتلك على سبب زعلي

.. قصدج على سالفة رفضي لعناد

.. اريد اعرف ليش رفضت عناد وكسرت بقسمة اختك مو خطية
وهي لاحول ولا قوة لا طالعة ولا ماشية وساكنة هالبيت كلية ومخلصة وعمرها جاي يمشي وانت البطران كاعد تطرد
العرسان مو عيب عليك

جنت اباوع عليها وانتظرها تخلص كلامها وكلت
.. هسة خلصتي كلامج
.. اي
.. لعد سمعيني للاخير وخليني افهمج شنو سبب رفضي لان انا
هم مليت من صدج الي ما اتحمل ارجع للبيت وما اشوف لهفة عيونج تتلكاني حتى لو من بعيد
يرتاح گلبي

باوعتلي بحنان وكالت.. احجي اسمعك
.. ماعندي غيرج يسمعني
حور انتي تعرفين بشغلي شلون معقد
صرت احجي لحور عن ابو ذياب ومواقف عناد ومهيمن
وتدخلاتهم
وكلمت كلامي
.. حور ما تعرفين شصار بية من سمعتهم يحجون بأسم عناد
اجيت اموت وهم داعش معروفين ما عندهم رحمة كبل ايدهم والذبح

كنت لازم ابعده عني حتى لو هالشي يأذيني ويأذيه
ميخالف اهم شي عندي اامن على حياته
اما على صداقتنا فعادي تتعوض
ماكو شي ما يتعوض الا فقد الاحباب ما يعوضه شي
لو بكنوز الدنيا

فما كان گدامي غير خيارين اما اخذل اختي واكسر فرحتها
او اخسر صاحبي وافقده للابد وهالشي اذا صار فراح يكون بسببي
بساعتها اعتبريني انا انتهيت

حور جرت حسرة وكالت
.. حرااام عليك ياجلال انت مجرد الدواعش ذكروا اسم صاحبك على لسانهم انت انخبصت وخربت الاول والتالي وما اتحملت تفكر مجرد تفكير يصير عليه شي

زين ما فكرت بية اني شلون بحالي من يروح حبيب الگلب بكبره بين ايدين الدواعش

غمضت عيوني وكلتلها اااااخ ولج حور لو روحتي لداعش تخليج تكولين كلمة حبيبي مثل هالمرة
لعد كل يوم اروح اسير عليهم حتى اسمعها منج

ابتسمت والدموع تلالي بعيونها
كلتلها .. عيدي خلي اسمع
..عفية جلال لا تستغل زلة الساني صير حباب والزم حدودك

.. اووووف حور تدرين انا اليوم اجيت حتى ابلغج
انا عگب باجر اسافر للموصل والتحق بين صفوف داعش

شهكت ضربت صدرها وكالت .. لاااااا عفية جلال لا تكولها

طلعت من الكلية وانا گلبي صاير مثل الجمر على حال حور عفتها تبجي وراي مثل الطفلة
خايف عليها لا تضعف

صعدت سيارتي و رحت لمهيمن بالمحل
حتى اسلمه دفتر البنگ ونتفق على سالفة بناء البيت شلون يكون سحب المبلغ

لگيت اكو رجال جبير كاعد يمه عالمكتب وجاي يسولف وياه
سلمت عليهم وكعدت يمهم انتظر الرجال يخلص كلامه حتى اسلم مهيمن الغراض

الرجال كال .. شوف بعد عمك انا طالبك وكول تم
مهيمن جاوبه وهو محرج وكله .. عمي ابو چاسب انت تأمرني امر ما تطلب

.. تسلم ابن اجاويد بس انا عندي عتب وياك ابن اخوي قبل فترة طلب ايد كريمتك وانت رديته وهالشي شان يخاطري منك

يتبع

اتمنى لكم قراءة ممتعة
اختكم نهى الحسون