قضية لم الشمل الفصل الثالث وخمسون 53 - بقلم نهى

#الكاتبة_نهى_الحسون
#قضية_الشمل

مساء الانوار والسرور عليكم احبتي المتابعين 🌹🌹🌹

وهم ابقى احبكم )

🌹🌹🌹🌹🌹🌹🌹

نور
كلت لمهيمن عن سالفة الجهاز ومن شفت ردة فعله
حبست بقية الكلام واتوقفت مكدرت اكول لمهيمن بخصوص اتصالات جلال و كلامه المريب

خفت لا يتعاركون بينهم ما اتحمل اشوفهم يتعادون بينهم
مجرد تخيل منظرهم وهمة يتعاركون يرتعد گلبي

مهيمن .. نور انتي متأكدة من كلامج يعني شفتي الجهاز بعينج
.. اي والله مهيمن شفته قبل فترة كان فوك السطح مغلف بغطى
هو نفسه الجهاز الي كان يشتغل عليه جلال وكال عنه
راح يشترونه منه شركة سيارات بالخارج ماكو غيره

اباوع لمهيمن سحب نقاله واتصل على جلال وسأله عن مكانه
وطلب منه يرجع للبيت بسرعة

انهى الاتصال ولزم راسه مثل الي راح ينفجر

وكال .. استغفر الله هذا جلال ما اعرف شيحس
كل يوم طالعلي بسالفة جديدة بالله هسة هاي شنو سالفة الجهاز

جان يحجي وسمعنا صوت الجرس
هذا اكيد جلال وفعلاً لحظات ولكينة جلال واكف يم الباب سلم علينا
ونظرات الشك والحذر تتنقل بيني وبين مهيمن

انتبهت لمهيمن كام من مكانه
وراح وكف كدام جلال وسأله مباشرةً بدون لف ودوران
.. جلال ممكن تفهمني شنو سالفة الجهاز
الي سويته وكلت راح اسافر علمود اتعاقد وية شركة سيارات
شيسوي هنا بالبيت

اباوع لمعاني وجه جلال بقت هادئة وما بين عليه اي ردة فعل
او ارتباك بخصوص كذبه بسالفة الجهاز

باوع علية ورجع باوع لمهيمن و كال
.. طبعاً انا حاولت ان ابقي موضوع الجهاز بطي الكتمان وبعيد عنكم ما حبيت اخبركم
بس بما ان انتوا عرفتوا فصار لازم احجيلكم الصار وياي

بالحقيقة انا ما اتعاقدت وية شركة السيارات بخصوص الجهاز
صحيح انا سافرت للخارج والتقيت بيهم لكن اتفاجئت بشروطهم
كانوا يطلبون مني اوقع على تنازل الهم بحقوقي بالجهاز
يعني بين قوسين رادوا يشترونه مني. بمبلغ مادي ويصدر الجهاز
باسم الشركة حتى بدون ذكر اسمي على الاختراع
وبالتالي هالانجاز ينسب الهم وانا رفضت. هالشي

جاوبه مهيمن وهو منفعل .. زين سويت خلي يولون هذا تعبك
حرامات يستغلونه
بس ما كلتلي اذا كان مشروع الجهاز اصلاً ما اتنفذ
زين ليش اتأخرت كل هاي المدة بالخارج

.. حاولت استغل مكان تواجدي بهيج دولة وصرت اجمع معلومات
وامكانيات عن الاجهزة وتطويرها لحد ما كدرت اجمع لي كم
قطعة مهمة من الاليات الي احتاجها وعلى اساسهم
قررت افتحلي مشروع خاص بية متشوفني اول ما رجعت صرت ادور على محل او ورشة بالصناعية.

.. اي اتذكر انت تريد تفتحلك مشروع خاص بيك
جانوا جلال ومهيمن يحجون
واني لكيت نفسي تلقائياً اشاركهم بالكلام وسألت جلال

.. زين ليش ما كلتلنا من الاول ان المشروع ماصار. وانت رفضت
يعني الموضوع بسيط ميحتاج تضمه عنا

باوع علية وكال .. كنت خجلان من فشلي واستحيت احجيلكم
وبالوقت الي كان مهيمن يفتخر بية وبموضوع الجهاز كدام الناس
شفتها صعبة ولا حلوة بحقي اخذله واسلب منه فرحته بأنجازي

مثلما تعرفون الفشل مو موضوع حلو الواحد يحب يحجي بي كدام الناس

جاوبه مهيمن .. اي بس احنا مو اي ناس احنا اخوانك
لا تتوقع نتشمت بفشلك وراح تبقى اخونا سواء نجحت او فشلت ما راح يقدم او يأخر عدنا شي

جلال باوع علينا ونظرات الاسف والاعتذار بانت بعيونه وكال
.. اسف هالشي مو بيدي غصب عني كبريائي ما سمحلي احجيلكم
عن فشل المشروع مرات تحصل امور وظروف اقوى من عدنا
تجبرنا نخفي على بعضنا

ما اعرف ليش للحظة حسيت بجلال
مكان يقصد الجهاز باعتذاره
عبالك ديعتذر عن خطاء ارتكبه بحقنا وهالشي زاد بحيرتي

مهيمن .. تعرف شنو عيبك جلال
كل تصرفاتك متناقضة تخليني واكف محتار من باب
انت شخص مكافح ودؤب. ومن باب انت مرافقلي ابو طبرة وسمعته الزفت على كل السان
متكلي شنو سالفتك معقولة يكون عندك انفصام بالشخصية وانا ما عندي علم

ابتسم جلال وكله ..الحمدلله بعدني محافظ على تماسك عقلي
بس تعال كلي على طاري ابو طبرة
تصدك انا مصدوم بيكم
ما اتوقعت يوصل بيكم الامر انت وذاك عناد التيس تقدمون على هيج خطوة
وترحون تخطفون الرجال

مهيمن جاوبه بكل ثقة .. هاي شنو الظاهر الخروف رايح مشتكيلك علينا

.. ترة تصرفكم اجرامي
لا ونوب مو بس خاطفين الزلمة وحابسينه بمزرعة
جمالة كاعدين يعذبون بي عايشين الدور بس خلي يصبرلي ذاك عناد حسابي وياه بعدين
زين ما خفتوا يروح يشتكي عليكم للشرطة ويشمروكم بالسجن على هالسواية

.. يعني افتهم من كلامك ان ابو طبره بعده ما صارلته عبرة وبعده يرافقك شكله محتاج اعيد كرصة اذنه

جلال بسرعة جاوبه وكال .. اوكف لحظة ترة انا الي رحت لأبو طبرة وسألته بعدما شفته كام يتهرب مني ويبتعد عني كلما يشوفني عبالك شايف جني لزمته وسألته عن سبب صده الي ورفضة الكلام وياي

وصدمني من كلي عمي روح عني وخليني بحالي انا ما ناقص مشاكل هذا اخوك وصاحبك زوعوني العافية. بعد لا تجيني ولا اجيك ولا اعرفك ولا تعرفني

جاوبه مهيمن .. وهو المطلوب
جلال حجة بنترة .. لا مهيمن لهنا وحدك
انا رجال وحر بتصرفاتي
احجي ويامن ارافق منو هالشي راجعلي. اترجاك بطل حشرية
لا تحطني بموقف وتحشرني بزاوية وتجبرني اتعداك
انا ما ارضى على هالشي

مهيمن جاوبه .. وعنك لا رضيت شوكت ما تمشي عدل مثل الاوادم
انا راح ابطل احشر نفسي بحياتك الخاصة واحمد ربك وشكره
الامور عدت على خير وكانت بس خطف المرة الجاية اتوقع كلشي مني

جلال باوع لمهيمن بقلة صبر وكال .. ما راح اجاوبك
خليك اتصرف براحتك مثلما تحب. تريد تسحل ابو طبرة. تعلك دوحي بالبنكة
هالشي ما راح يأثر علية بس انا خايف عليكم تورطون نفسكم
بمشاكل انتوا مو حملها

تركنا وطلع وهو معصب وانقلبت الادوار من مهيمن المعصب الى جلال المعطب. هسة شسوي

مهيمن بقى يباوع خلف جلال ورجع التفت علية وفتح ايديه بتعب
وكال .. خو شفتي هذا كدامج شلون يحجي وكلامه يدق
والله العظيم تعبت واحتاريت
شتصرف وياه خايف لا يجي اليوم وصبري ينفذ وينهدم كل الي بنيته

كلبي انقبض من كلام مهيمن حجيت .. لا عفية مهيمن لتكول هيج
اني املي بيك عرفتك قوي ما راح تترك اخوك
لان اذا جلال طلع من حياتنا انا اضيع

صرت مثل شجرة تحاول تجمع اغصانها بهبة ريح ما تريد تفرط
بواحد بيهم لان اغصانها هي سبب قوتها
اي انا هذا حالي وياهم وية مهيمن وجلال وريم

مهيمن باوع علية واستغفر وكال .. نور لاتخافين مستحيل اعوفه وراح ابقى وراه اريد اشوفه وين يريد يوصل

كنا نحجي وفجاءة انفتح باب الغرفة على وسعة ودخلت علينا ريم
وهي وشعرها المهوس القصير وخشمها وخدودها حمر

مهيمن شافها وحجة بصوت ناصي
.. ياستار اليوم شكله ما ناوي يعدي على خير كل ساعة واحد زاكط بيهم اشو اتخلص من جلال تطلعلنا بنت عمج مبينة من شكلها جايتنا هدادة

ابتسمت على كلام مهيمن وباوعت لريم الي كانت عمية من الغضب
باوع لريم وسألها .. خيرج يا ريم البلا داخلة علينا والشر متربع براسج

اجتي ووكفت كدام مهيمن ورفعت نقالها كبال عيونه.
كانت شاشة النقال بيها محادثة بالواتساب
وكالت بعصبية .. هاك شوف اقرة صديقتي شنو تكول

نقل نظراته منها للشاشة وصار يقرة المحادثة بعدها باوع عليها وكال بكل برود .. اي وشنو يعني انتي كليلها خطيبي وجاي يأدبني
انتوا شلكم غرض

ريم بغيض .. مهيمن انت خليت الكل يحجي بية وبموقفك
شفت شسويت

.. ماسويت شي غلط وهم نفسهم الي جاي ينتقدون تصرفي لو كانوا بمكاني هم راح يسون مثلي ويمكن يزيدون بعد حمدي ربج
الموضوع انتهى بس على سحلج من الكلية مو زين ما سويتلج مشكلة هناك

على فكرة
وكلي لصاحبتج مهيمن يكول خلي اسمع واحد فاتح حلكه
ويجيب طاريج بكلمة والله العظيم ازوعه حليب امه

جاوبته .. وانت شنو سالفتك كل شي عندك عركة وتهديد وصوت عالي تعرف شنو اتمنى

كتف ذراعه وكال .. اي ست ريم بالله كليلي شنو تتمنين
بلكي اكدر احقق امنياتج

.. اتمنى يجي اليوم واشوفك توكع بيد واحد. حامض بوز مثلك ويكسرك تكسر
ويسحلك كدامي بساعتها يرتاح گلبي من اشوف غرورك ينسحل

مهيمن نصة صوته وكال.. اريد احلفج بالله اذا اتحققت امنيتج
معقولة راح تبقين بس تعاينين عليهم وهم يسحلوني على كولتج

جان يحجيها بستهزاء
جاوبته بغيض وكالت .. اي راح اكتفي بالمشاهدة ومن يخلصون منك انا عود اخذك لاقرب مستشفى واشمرك بيها حتى يعالجونك
لان ما يهلي اشوف حزن امك وخواتك عليك

على العموم انا ما اجيت حتى تحلل ردود افعالي اني اجيتك
حتى احطلك حد مهيمن ترة اني تعبت منك

جانت تحجي بضعف مبين عليها كلش مريضة لزمت كصتها تمسد عليها وكالت
.. انت ليش دائما تحاول تحاربني احس بيك كاعدلي عالزلة

غمضت عيونها الذبلانة بتعب

مهيمن اتغيرت معاني وجهه من البرود للاهتمام
و انهى كلامه وياها وكال.. ما راح اجاوبج هذا الكلام مو وكته انتي مبين عليج كلش مريضة اتوقع حتى ما تعرفين شنو تحجين ولا راح تعرفين توزنين كلامج

رحت عليها ولزمتها وكلتلها .. ريم حبيبتي مو وكته هذا الحجي
انتي كلش تعبانة لا تتخربطين علينا

ريم باوعت علية مثل الطفلة تكابر .. اني ما بية شي بس تصرفات اخوج هي الي متعبتني

باوعت عليه وكالت.. مهيمن هاي اخر مرة اسمحلك تتجاوزني
ترة للصبر حدود اتمنى تفهمني

نهت كلامها ودارت وجهة وطلعت من الغرفة مثلما دخلتلها بغضب خلت الباب وراها يتأرجح

راح كعد بالكاع واتكأ على الحايط
باوع علية وكال .. يالله هاج استلمي واحد يرفع والثاني يكبس ما اعرف منين اتلكاها من اخوي مدري
من بنت عمج الي كل يوم تصدمني بشي جديد.
هاي البنية متجددة كل يوم طالعتلي بسالفة تصدمني
احس تصرفاتها تهديد الي حتى لا يوم افكر واغفل عنها

كسر خاطري حال مهيمن
رحت كعدت يمه وكلتله.. ريم موضوعها ما يحتاجله تفكير
هاي شخصيتها وكلنا نعرف هي كانت عايشة وية عمها وبالخارج

وعمها هو نفسه الشخص الي يصير ابونا
ما كدر يحتوي اولاده الثلاثة
ويجمعهم ويحرص عليهم فشي اكيد هيج شخص
ما راح يكون حريص على التزام ريم بحجابها او صلاتها
او يراقب تصرفاتها

اتوقع ابونا كان فاهم الموضوع غلط عباله الاهتمام
فقط بتوفير الحماية لريم وتدليلها راح يعوضها عن كلشي
بس مع الاسف مات وما عرف ان اهتمامه كان بمثابة اهمال
وريم ضحية جاي تحصد هالشي

رفع راسه وكال.. زين شنو الحل شنو احطلها وتطيب والله حيرتني واحتاريت وياها ما اعرف الصوج منين مدري انا صعب وما
جاي تتحملني مدري هي تصرفاتها غريبة وماجاي اكدر اتغاضاها

.. مهيمن خصم الحجي الموضوع كله راجعلك
هاي ريم وهاي تصرفاتها يا اما تحبها وتريدها على ما هي عليه بحلوها وبمرها. او تتركها وتخلي حال سبيلها وتخليها تشوف حياتها
وانت هم تروح تشوف حياتك

جر حسرة وسألني .. تتوقعين راح يحلالي العيش بحياتي بدونها ؟؟؟
لا ما اتصور يكون عندي شي اسمه حياة اصلاً

جلال
جنت البس بملابسي وايدية ما تعيني من كد الخبصة
اجاني اتصال من الصبح من ابو ذياب يردني التقي بيهم حتى يسلموني جزء من المبلغ

وهالشي اجراء روتيني عادي بس الي رعبني وصدمني
سؤال ابو ذياب عن اسم عناد
كلي.. انت تعرف واحد بهذا الاسم

احس گلبي وكع بين رجلية لا يا ربي دخيلك هذولي شوصلهم لعناد
جاوبته وانا ادعي البرود .. لا ما اعرف واحد بهذا الاسم
شنو كلت اسمه
.. اسمه عناد
.. ولا مار علية بحياتي واحد بهذا الاسم
هو حتى اسم عناد غريب بس ليش تسأل عنه شبي

كلي.. من تجي يمنا نگلك شنو سالفته
.. تٌـٌـمــام انا بمسافة الطريق يمكم.

جنت احجي وياه وكوة لازم روحي والف حسبة اجتي براسي
شنو شبي عناد وهذولي من وين يعرفونه
اتحرك بالغرفة وابدل بملابمسي بدون وعي

فاجئتني نور بدخولها للغرفة ونظرات الشك بعيونها
كالت .. جلال حضرتلك الريوك تعال اكل قبل لا يبرد

..انا طالع عندي شغل مستعجل ما الحك اكل
اتوجهت للباب اريد اطلع حتى بدون ما امشط شعري
ما اعرف شلون بدلت اصلاً

استوقفني صوت نور قبل لا اطلع من الغرفة وسألتني
.. جلال انت ليش كنت تنكر معرفتك بعناد قبل شوية من كنت تحجي بالنقال. شنو شكاعد يصير وياك جلال

غمضت عيوني بنفاذ صبر وانا منطيها ظهري
على اساس انا عايز شد اعصاب ونور جملتني
جاوبتها .. نور انا وعناد مو على توافق بينا مشاكل وزعلان من عنده لذلك انا حجيت هيج وية الولد

ما انطيتها مجال تحجي مباشرةً طلعت من البيت متوجه للجماعة
ابو ذياب وابو جراس ينتظروني.

انطيت الاشارة المتعارفة بيني وبين الجهات المسؤلة
ورحت عالمكان لكيتهم ينتظروني وبيدهم علاكة ماركة
بيها الفلوس كانت كلها بالدولار

سلمت عليهم بلهفة اقنتصت دور الفرحان المامصدك روحه
راح يصير عنده فلوس
وبعدما حسبت الفلوس كدامهم كنت اتصرف بشراهة

سألتهم .. انتوا شلون جايبين هيج مبلغ ضخم بهاي العلاكة ما تخافون احد يتعرضلكم وياخذها منكم والله انا مجرد ما اباوع عليهن گلبي يوكع من الخوف عليهن

ابتسم ابو ذياب وكال.. بعدك ما شايف من الخير شي
هذا بس نص المبلغ والنص الثاني من تلتحق ويانة وتبدي تنفذ
وعدك النة وتصنع لنا عدة اجهزة من نفس نوع جهازك
وتشدها بمحركات سياراتنا

لمعت عيوني وكلت .. احلف كول والله يعني راح تنطوني بكد هذني
الفلوس لالا ما اصدك خاف انا جاي احلم واحد بيكم خلي يطمني ويكلي هذا مو حلم

ابو جراس طبطب على كتفي وهو يبتسم بفخر
.. والله انك فقير وعلى نياتك شوف وليدي الي يحط ايده بيدنا
امه داعيتله ويعتبر نفسه ابواب النعيم انفتحت بوجهه

لفيت علاكة الفلوس وفتحت دكم القميص وخبيتها جوة
وجاوبتها .. الله يبشرك يا ابو جراس صدك انتوا ملاك ونزلتوا من السما واجيتوا بوكتكم

بعدها انتقل ابو ذياب بكلامه للجد وصار ينطيني الارشادات
وسألني .. كلي شنو الادوات الي تحتاج نوفرها الك هناك بورشة المعسكر مالتنة حتى من توصل يكون مجهزين لك كلشي وتباشر بسرعة بشغلك

كان يقصد بالمعسكر على مكان الوكر مالتهم يسمونه المعسكر او القاعدة

انطيته مجموعة اسماء لادوات وآليات احتاجهم بصنع الاجهزة
لان هم طلبوا اسويلهم مجموعة اجهزة

كان ابو ذياب يحجي وانا عقلي قافل على شغلة وحدة شنو سالفة عناد
بعدما خلص كلامه. وذكرته
.. اي صدك ما كلتلي شنو سالفة هذا الي اسمه عناد شبي ليش سألتني عنه

جاوبني بلا مبالات .. هذا واحد سوسة وصلتنا معلومات
عن واحد اسمه عناد جاي يسأل عنا وينبش ورانا وهالشي
ادخل الشك والحذر بگلوبنا. والي عرفناه هالشخص ساكن بالبصرة
فسألتك لان كلت احتمال تعرفه مثلما تعرف انت بصرة وهو بصرة هيج ربطت من هذا الباب

جان ابو ذياب يحجي وانا احس النار كامت تفور بصدري على عناد
ااااااااخ والله لو الزمه الا امسح بي الكاع هالسكط
ماناوي يتوب الا اخليله عاهة بجسمه بس بسيطة انا اعلمه
وين يروح مني

ريم
بقيت يومين بالبيت ما داومت لان كنت كلش مريضة ما ادري بالدنيا طشت لو رشت سكنت الفراش

واليوم كعدت من النوم احس بصحتي صارت اليوم احسن حسيت بشفايفي توجعني متشققة وطالع. بيها حبوب

شافتني حور وكالت متفاجئة .. يبوووي كناري شصاير بيج
شفتج مورمة طلعتلج حرارة من ورة الحمى

اتلمست شفايفي اتحسسها ورحت وكفت كدام المرايا
حصرتني البجية
.. لااااا هاي شنو شفايفي راح تتدمر
حور جاوبتني .. خرب والله عليج حظ اليوم من دون الايام
طلعتلج حرارة بشفايفج

باوعت عليها وسألتها.. ليش شكو اليوم شنو عندنا
.. شنو نسيتي اليوم حنة رغد صديقة نور بنت الحجي ابو حيدر

ضربت على كصتي وانا اتذكر بذاك الاسبوع نور كالت عن رغد
صديقتي عازمتني على حنتها راح تسويها بالقاعة
ومهيمن من عرف كال لأمه تاخذنا وتروح تقوم بالواجب

جاوبت حوروكلتلها.. ولج اي شلون انسى وانا ونور قبل يومين طلعنا اشترينا هدية لرغد
اووووف شلون ورطة هاي والله راح ابجي

رجعت اتفحص شكلي بالمرايا
دخلت نور للغرفة وشافتنا وكالت .. اي واخيراً كعدت الاميرة النائمة من سباتها العميق

رفعت حاجبي وكلت.. انتي متأكدة فرحانة بستعادة صحتي علودي
لو علمود اسويلج ميك اب
ابتسمت وكالت .. تكدرين تكولين نص من هاي ونص من ذيج
انت بالحالتين فرحانتلج

طلعت من الغرفة ورحت للمطبخ همزين اليوم جمعة عطلة ما يحتاج اروح للدوام بهذا شكلي
لكيت مهيمن وجلال جاي يتريكون
سمعت جلال كان يسأل مهيمن عن عناد وجاوبه كله صارله يومين مسافر واليوم رجع من السفر ليش تسأل عنه

.. لا هيج بس انتبهت لشغل المعمل صاير مخربط فسألتك عن عناد لان هو المسؤل عن الشغل هناك.

انتبهت لمهيمن كان يحجي وية جلال وعيونه علية تراقبني وثبتت
نظراته على شفايفي
هزيت شعري بحركتي المعروفة وردت وجهي عنه

شافتني ام مهيمن وكالت .. ياااا خالة هاي طالتلج لطمة حمى من ورة الصخونة

بالله شنو تعالي كعدي خلي احطلج مرهم من عندي
سألتها وانا اباوع عليها طلعت علبة من الكانتر بيها دهن
مدري كريم واقتربت مني ولفحتني ريحته الكريهة عفست خشمي وكلت
.. خالة هذا شنو رحيته مو حلوة
جاوبتني .. ولج خالة هذا مرهم مال اعشاب بس ادهن مكان الحمى بسرعة يمتص الحرارة كلها. من شفايفج

جانت ام مهيمن تحجي وسمعت واحد غص بأكله وكام يكح التفتت
ولكيت مهيمن يكح وجلال انطاه ماي وكال

.. شكلها امك نبع الحنان انتقللها فايروس باربي ابو الصراحة المشفرة وصار السانها مزروف

باوع عليه مهيمن وكال بغيض .. ما تاكل تبن وتكرمنا بسكوتك

احلى شي ام مهيمن كعدت تدهن شفتي وبعدها منطلقة بالكلام
بالها مو يمهم

.. خايبة لو تدرين انا خلطاتي شلون يدورون عليها دوارة جان ما
كعدتي تتدلعين براسي

حسيت بلسعة حرارة قوية بشفايفي من ورة الدهن وسألته بخوف
.. خالة هاي شنو انتي مو كلتي الدهن راح يمتص الحرار من شفايفي اشو شفايفي زادت حرارتهم

ما حسيت الا الكرسي انركع بالكاع ومهيمن عاط بينا
اني وامه

.. خيييييير سالمين شجاكم كمتوا علينا من الصبح تحجون كله مشفرات كولوا هنا رياجيل جاي ياكلون تبن ويسمعونكم ومسموط ابو ابوهم من وراكم

امه نترت بي .. ما تاكل ياهو يمك متكلي شمالك گمت علينا
جنت عجوز بس تدردم من صباحيات الله

غمض عيونه وكال .. انا خلي اطلع من البيت واروح اشوف شغلي احسنلي قبل لا ابتلي على عمري

طلع من البيت وترك وراه. هدوء متكهرب
سألت مستغربة .. هذا شبي مهيمن مو طبيعي صاير وضعه ما ينحمل فجاءة يعصب على اتفه الاشياء

جلال جاوبني .. همزين راح المكرود وما لحك يسمع كلامج
جان انجلط بجلطة ثلاثية الابعاد

عقدت حواجبي مستغربة كلام هذا الثاني فتحت حلكي اريد احجي
ما اشوف الا جلال
طفر من مكانه وكال
.. لا على بختج كل شي لا تحجين. انتظريني اطلع وغردي براحتج
انت وعمتج

جان يباوع على ام مهيمن
الي طلعت من المطبخ وعافتنا.
برطمت شفايفي بزعل وكلت .. عابتلك جلال شنو صرتلي مهيمن الثاني تفسر كلامي على بنيتكم السيئة

ابتسم وكال .. مو انتي وعمتج ما خليتوا للنية الصافية مجال نزلتوا علينا اكس ومربع كله. طوووووط

.. بسيطة يا جلال والله زعلتني منك بعد شوف منو يساعدك
وينطيك قياس اصابع جعفوري

سمعت شهكة حور ولكزتني بخاصرتي
وكالت .. جعفوري بعينج يا عوبة ام عطوب

جلال ضحك عليها وكال
.. تعال جعفوري ماعليك من باربي عوفها شكلها بعدها مريضة ما صحت

حور برطمت وسألته بصوت ناصي وكالت.. شنو سالفة قياس صبعي شتسوي بي

ضحك وكال .. طبعاً انا ردت اسويها الج مفاجئة بس شكلها باربي
من تعصب تحرك الاخضر واليابس.
.. شنو هاي المفاجئة وشنو مناسبتها

كال وهو يتوجه للباب .. اوكفي انتظريني خلي احيبها واجي
راح بسرعة ورجع للمطبخ وبيده علبة صغيره

باوع داير ما دايره يتفحص المكان كنا بس اني وحور بالمطبخ
نور وخالة ما موجودين
سالته حوروهي تباوع على العلبة .. شنو هاي ؟؟
فتحها وكال .. هاي حلقات اشتريتهن بيوم الي سمعت بأخوج رفض الخطابة ساعتها جنت ناذر اذا الله وبعدهم عن طريقنا اروح بوجهي اشتري حلقات الي والج

جلال كان واكف قريب عليها مبتسم يدور على نظرات عيونها المتهربة من الخجل

مدت ايدها واخذت العلبة بين ايديها وعيونها تلمع وضمتها لصدرها
بفرحة وكالت بصوت رقيق جديد على اذني بالحقيقة اول مرة اسمعها تحجي بهالرقة
كالت .. ربي يبعد عن طريقنا كل واحد يحاول يفرقنا عن بعضنا

وعلى طاري الفراق دخلت علينا خالة زهرة مفرقة الجماعات للمطبخ ولجحت المنظر وخزرت حور الي ارتبكت وابتعدت بسرعة من يم جلال واتعثرت بالكرسي اما جلال فما شفت غير بس غباره وراه

طلع جلال وام مهيمن هدت على حور وكرصتها من زندها وكالت
.. ولج مكموعة شلون واكفة تتمضحكين وية الولد وتسولفين ماخذة راحتج وياه

رجع كرصتها من زندها وحور ابتعدت عنها وهي تفرك مكان الكرصة وكالت

.. اوكفي يمة لا تفهميني غلط انا جنت اضحك على نكتة حجاها جلال
..شنو ولج جاي تضحكين عليمن ولج انا زهرة ما يعبر علية شي
شنو حجة نكتة وانتي كعدتي تتتمضحكين
جا شو هاي بنت عمه اشو ما جاي اشوفها تتمضحك وياه مثلج

هدت مرة ثاني على حور ونور دخلت مستغربة صوت ام مهيمن العالي. حور راحت ختلت ورة نور وكالت

.. يمة ابوس ايدج بس فهميني انا وجلال كبار وكلامنا دائماً يكون بأحترام. انتي ليش دائما تاخذين الموضوع لو ابيض لو اسود

عاطت بيها .. ولج خايبة حويرة شنو جاي تقشمرين عليمن
شنو كبار شنو تحجون بأحترام ولج مكموعة ما يجوز تكعدين تسولفين وتتمضحكين وياه نازعة المستحة

رحت وكفت يمها حتى اهديها وكلت .. خالة ليش تحجين هشكل ترة
عادي تحجي وياه هم عايششين سوية ببيت واحد ولتنسين جلال يصير اخو اخوها
فشي اعتيادي لازم يصير بينهم كلام حالها حالي حال نور

ام مهيمن باوعتلي وكالت .. لا خالة هالشي عادي اذا جانت تحجي وياه بالمعقول. بس تصير السالفة ماصخة اذا كعت تاخذ وتنطي وياه بالكلام وتتمضحك وياه والحليم تكفيه الاشارة.
وهالشي ما يجوز هو مو اخوها لا ابوه نفس ابوها
ولا امه نفس امها. فهالشي حرام يخالة. وهي لازم تحترم نفسها وتلزم حدودها.

دارت وجهة على حور وكالت ..شوفي ولج لا عبالج تفتوني هالحركات بالقران احطج بحلك اخوج واخلي يشوف شغله وياج
وتعرفين بي يتخبل من سوالف البنات العوجة

ما اتحملت مجرد ذكرت اسم مهيمن وكعدت تهدد حسيت بالغيض
كلتلها معترضة .. خالة ترة ميصير تحجي وية بنتج بهذا الاسلوب
انتي حتى ما لحكتي تسمعين شنو كانت تحجي وية جلال

.. يخالة ما يحتاج اسمع شجانت تحجي الحليم تكفيه الاشارة وانا بنتي واعرفها كلش زين عاجنتها وخابزتها على ايدي
اعرف شوكت تمشي بطريق اعوج واعرف بيها شوكت تكون محترمة نفسها

.. اي خالة كلامج صحيح انتي ربيتيها ولازم تعرفيها زين
بنتج كبرت وراح تصير دكتورة ومستحيل تسوي شي غلط

ام مهيمن بعتراض.. وشنو يعني واذا دكتورة على نفسها
انا ما عندي لحية مسرحة لو مو دكتورة تصير عسى ما تصير
رئيسة وزراء راح تبقى بنظري حويرة واراح ابقى اردها من اشوفها على غلط

نور
هدأت اجواء البيت بفترة الصبح واتحولت من بعد الظهر لاجواء الحماس والترقب والتحضيرات
حضرنا نفسنا وكشخنا على اخر حباية. اني والبنات
لان اليوم معزومين بحنة رغد
خطية اتصلت واكدت علية بألحاح. حتى احضر فرحتها
اني والبنات. وام مهيمن

ام مهيمن بس سمعت برغد انخطبت كامت كل شوية تباوع علية
وتگلي خالة لا تضوجين ان شاء الله تجي قسمج وربي يرزقج بأبن الحلال الي يسعدج ويحافظ عليج

ابتسمت وكلتلها .. منو گلج انا زعلانة. بالعكس خالة اني كلش فرحانة لرغد ربي يسعدها ويتمم عليها

صدگني ترة اخر همي الزواج
اهم شي بحياتي اخواني وريم وانتي وحور انتوا عندي بالدنيا
انا حتى بعدني مشبعانة من حنانكم وامانكم

جاوبتني وكالت .. ياخالة الله يكملج بعقلج وكون حويرة تصير مثلج هيج رزنة. جان انا بخير

اجة جلال بسيارة مهيمن وكال مهيمن دزني حتى اوصلكم للقاعة
جان طول الطريق جلال مشغل اغاني عن الحب
ويستغل اي لحظة تغفل عنه ام مهيمن حتى يسترق النظرات لحور
مثل الحرامي ما اعرف

اضحك عليه مدري انقهر علموده شنو ينتظر اذا جان يحبها لحوراء
ليش ما يتقدملها شنو الي مانعه اوووف منك جلال

باوعت لريم او بالاحرى باربي جانت بغير وادي شالها على راسها
لابسته هيج مجرد شكل مغطي شعرها حتى بدون ما تحكمه
وام مهيمن كل شوية تعدله الهة وتنبهة عليه لا يسرح من شعرها

وهي تسمع كلامها فقط من باب الاحترام وصلنا للقاعة واستقبلتنا
مرت الحجي ابو حيدر وجناينها وبنتها الصغيرة
سلمت على البنات وام مهيمن ومن وصلني السلام
گلبت وجهه وسلمت علية من ورة خشمها

وكامت تحجي وياي بتكبر هي وبنتها اما زوجة حيدر فكانت حبابة
وياي. والغريب بالامر من تحجي وية ام مهيمن كانت عادية وبسيطة زين شمعنا اني

اخذتنا وكعدتنا على ميز يصير قريب على كوشة رغد
كانت رغد بعدها ما واصلة.

زوجة حيدر كالت .. اتفضلوا كعدوا هنا رغد كالت اريد نور تكعد قريبة علية.

ام مهيمن ضحكت وكالت .. اي غير صاحبتها وكلمن يطرب لحله
جانت ام مهيمن تحجي ومرت الحجي ابو حيدر تخزرني

رمشت عيوني مستغربة تصرفها وياي
حور حجت بصوت ناصي
.. ونوب هاي شبيها منو دايس على ذيلها ليش سلمت عليج من ورة خشمها وتباوعلج عبالك كاطعة عليها ليلة عرسها

باوعت لحور واني الدمعة بطرف عيني بالحقيقة ما متعودة
شخص يعاملني بتكبر ومن ورة خشمه هالشي جديد علية
همست بصوت يرجف
.. اني عمري ما اذيت احد او خشنت خاطر احد اني حتى ما اتذكر حاجية وياها
ريم قربت راسها يمنا وكالت وهي تباوع لام حيدر

.. شنو شبيج نور نسيتي ترة انتي رفضتي تتزوجين ابنها الامير عناد وهالشي اكيد
راح يخلق العداوة بينج وبينها واكيد حالها راح يكون مثل حال اي ام عندها ابنها شي نادر وماكو منه اثنين ما ينرفض
فلا تتوقعين تاخذج بالاحضان

بقيت مصفصفة على كلام ريم وبنفس الوقت مصدومة
.. بس هالموضوع مر عليه سنة وكسور يعني معقولة هي لحد هسة شايلة بگلبها علية

جنا نحجي ومنظمة الديجي علنت عن دخول رغد وخطيبها
وفعلا انطفت الاضواء ودخلت رغد والضحكة مالية وجها

كدرت رغد بنظرها وفرحتها تنسيني موضوع امها
وتصرفها

وصلت يم الميز مالتنا وشافتني واتسعت ابتسامتها وسلمت علية من بعيد وكملت مشيتها وية خطيبها للكوشة

بعدها انشغلنا بأجواء الحفلة كانت كلش حلوة انتبهت لعيون حور وريم كل وحدة بيهم سرحانة بوادي اكيد جاي يتخيلون نفسهم بمكانها هههههه

ريم همست بصوت ناعم .. اووووف شوكت يجي اليوم
الي نركص اني مهيمن مثلهم سلو

اباوع لحور غصت بالعصير

واني كوة لامة حلكي حتى ما اضحك كدامها
ما اعرف ليش ما اكدر اتخيل مهيمن يركص سلو وية ريم
هههههه بالله جلال عادي اتوقعه بس مهيمن منين ما اجيبه
ما جاي ترهم حتى الخيال رافض يخضع للصورة يكول مكان هذا الشخص غلط

خلصت فقرة الرقصة الخاصة وبعدها
علنت منظمة الديجي عن دخول اخوة العروسة حتى يلبسونها هديتها

ما اعرف ليش گلبي ارتعد ولكيت نفسي بلا شعور درت راسي
للخلف حتى اشوفه. حالي حال كل البنات الي كانت نظراتهم
على عناد واخوه الجبير حيدر

كان لابس قاط سبورت واخوه قاط رسمي
السترة كانت حاضنة كتفه بتحدي

سمعت وحدة من البنات حجت بدلع
وكالت .. جلعني سترتك واحضن اكتافك ااووف

صديقتها جاوبتها .. هو هذا عناد الي جنت احجيلكم عنه قبلزشوية وذيج امه

هم يحجون هيج وانا گلبي گام يكمز من مكانه ما ادري شصار بحالي انخبصت عبالك واحد يريد يسرق مني شي ثمين ملكي

احتاريت شسوي ما بيدي شي غير بس نظرات عيوني كانت ترافقه
بكل خطواته مثل حارس شخصي خايفة لا يحلى بعيون باقي البنات

انا حتى متفاجئة من نفسي وردت فعلي ومن المشاعر القوية الي هجمت علية معقولة اني احب عناد وما ادري بروحي

اي اكيد انا واكعة بحبه بس من غير ما احس على روحي او يمكن جنت عمية اااي اكيد عميية

اباوع عليه شلون اتقدم على اخته وهي كامت من مكانها
دنك عليها وباسها من راسها سوى مثلما سوى اخوه حيدر

وبعدها لبسوها هديتها كدام زوجها واخذوا وياها صور
وبعدها اتغيرت الاغنية

كل هذا الصار وانا عيوني ما عافته ولا لحظة صرت اتمعن بكل حركة تصدر منه اراقب ابتسامته نظراته وشخصيته
اغلب كلامه وابتساماته كانت لامه واخوه واخته الصغيرة الي كانت
تركص يمه وهو كل شوية يلزمها حتى تتوقف عن الرقص
شكله ما يقبل تركص

وهي اقتربت منه وشاورته
بعدها رفع راسه وجان توكع عينه بعيني صادني واني
اتمعن بي. حسيت بأحراج

ما نزل عيونه من علية اشر بعيونه على راسي
رفعت ايدي واتلمست راسي لكيت شالي شوية نازل

عدلته وضميت شعري بعدها كافئني ببتسامة رضى
هاي من شوكت انا نور ابحث عن ابتسامة رضى من عناد

شكاعد يصير وياي اكيد اني انضربت بعقلي
لكيت روحي تلقائياً ابادله الابتسامة
حسيت على لكزة بخاصرتي التفتت وشفت حور

كالت.. خية نور ستري علينا ونزلي عيونج لا تصيدج
زهرة ترة صايرة هالايام. مثل ضابط استخبارات
تحلل النظرات وتفسرها وهي طايرة

ريم بضحكة .. اي والله نور كلام حور صحيح اسأل مجرب
الاخت قبلج انصادت

رمشت عيوني مرتبكة .. ششنو تقصدون ما جاي افهم عليكم
واني شنو سويت حتى خالة تحجي علية

حوراء رفعت حاجبها وكالت.. شنو علينا سيدي
ترة السالفة واضحة خية نور نظرات عيونج فاضحتج شوفي غيرنا
وقشمريه بهذا كلامج

مديت ايدي على العصير الي كدامي
وانتبهت لام عناد لزمته من زنده وكالت

.. تعال يمة عناد شفتلك بنية تجنن تكول للگمر كوم وانا بمكانك
الله عليك تعال شوفها.

جانت تحجي وعناد عيونه بعدها علية
ما اعرف شصار بية من سمعت كلامها اتخردلت
وانگلب العصير من ايدي وتلف الميز
وملابسي وصرت امسح بالكلينكس مخبوصة والدمعة بطرف عيني

كانت عين عليهم وعين على ملابسي
بعدها بفترة اجتي اخته الصغير من وراي ودنكت وشاورتني وكالت

.. حٍٍِْــًبٌٍـــِٓېٍٓ امي تكول اذا متصير زحمة ممكن توخرين من كدام عناد ترة صارت نظراتكم ماصخة وبلا ملح

اتسعت عيوني متفاجئة بكلامها وجمدت بمكاني
همست .. اااااني ما سويت شي

.. لا تكعدين تتمسكنين وجاية بدور البريئة. ترة صارت قديمة
جاي تشوفين اخوي عيونه معلكة عليج وانتي جاية بكل صلافة بعدما رفضتي كاعدة تلعبين على اخوي
فحسي على دمج وابتعدي من كدامه وخلي امي تفرح بأبنها
وتشوفله بنت حلال تستاهله

كملت كلامها وانسحبت من يمي مثل الحية
بحيث حتى البنات حور وريم ما حسوا على سمومها
الي نفثتهم يمي وراحت

نهضت من مكاني ودموعي غوشت عيوني
سألتني ريم .. شنو نور وين رايحة

حاولت اداري بدموعي ما اريد احد يشوفني
.. رايحة للحمام انظف فستاني من العصير

تركتها ورحت من غير ما انطيها مجال تحجي
طلعت من القاعة وصوت الديجي العالي بدأ يخفت

كنت ادور على الحمامات او اي مكان اختل بي قبل لا انهار
مثل الطفل المهضوم

فجاءة وحسيت على شخص قطع علية الطريق
رفعت راسي وكان اشوف عناد واكف كدامي عاقد حواجبه سألني
.. شنو نور ليش تبجين منو زعلج احجي

جاوبته .. عفية عناد بعد عن طريقي لا تجي امك وتشوفك واكف يمي وتكعد تسمعني كلام يسم البدن

.. نور احجي امي شنو كلتلج وانتي هيج مهضومة

.. امك تتهمني بسبب رفضك للزواج بس هي فاهمة الموضوع غلط
انا عاذرتها من حقها تريد تفرح بيك حتى تشوف حياتك

قطع كلامي وسألني بصوت هاديء وكال .. زين وانتي شنو رأيج بهذا كله ترديني ابتعد عنج واروح اشوف حياتي

كلامه سحب البساط من تحت رجلي وسلب مني الكلام
وانا هذا طبعي من اخاف افقد الكلام
اي اني خايفة لا عناد يروح مني دب الخوف بأوصالي

سمعت صوت ريم من وراي التفتت مرتبكة ورحعت باوعت لعناد الي كان واكف ينتظر ردي على سؤاله

بس وين هيهات انا نور الجبانة صاحبة اللسان المعقود
دنكت راسي وتركته ورحت لريم الي كانت واكفة بنهاية الممر تباوع علية.

اقتربت منها وسألتني .. شنو شبيج صاير شي

جانت تحجي وتباوع وراي على عناد
ما جاوبتها تركتها ورحت كملت طريقي وكعدت يم ام مهيمن الي بس شافتني ابتسمت وحجت وية المرية الي كانت كاعدة بصفها

.. شوفي حبيبة هاي بنتي نور الي جنت احجيلج عنها قبل شوية

حور ابتسمت وكالت .. لحكي نور زهرة شافتلج عريس ههههه
ما تضيع فرصة

ما بادلتها الابتسامة وريم اشرتلها حتى تسكت وحوراء التزمت الصمت

لفت انتباهي صوت ام عناد كالت
.. شنو عناد وين اختفيت انت ليش تحاول تحرجني كدام الناس

عناد سألها .. شكو يمة شصاير
.. ما صاير شي بس مو قبل شوية طلبت منك تجي تشوف هاي البنية الي كلتلك عليها

جاوبها .. يمة وكته هذا الحجي عندي شغل مهم ولازم اطلع

جاوبته وهي ضايجة.. انت الى متى اظل تتهرب

.. اخوي حيدر وين
.. اخوك طلع
.. يالله انا رايح عيب وكفتي هنا بين النسوان
تركها تدردم وراه بغيض

جلال
صارلي يومين اريد اوكع بهذا التيس عناد ماكو طلع الاخ مسافر
واليوم يالله لفى للبصرة بس صبرك علية
خليني اشوفه

اااااخ مسحت على وجهي وانا احس بروحي مخنوك
عناد ومهيمن جاي يضايقون علية الخناق
وخايف عليهم وزاد. خوفي من وصل الموضوع يم داعش
يعني اذا لمحوا اي حركة من حركات عناد الطايشة
ساعتها ما يترددون لحظة وحدة بقتله
اعرفهم ما عندهم رحمة بهيج امور

دك نقالي وكان المتصل مهيمن
.. جلال تعال للكوفي
.. ليش شكو
.. ماكو شي بس عناد يريد يحجي ويانا بموضوع مهم

رفعت حاجبي وجاوبته
.. خلي ينتظرني انا جاي

انهيت الاتصال
ببتسامة نصر
اجيت والله جابك جايني برجليك يا عناد

يتبع

اتمنى لكم قراءة ممتعة
اختكم نهى الحسون