قضية لم الشمل الفصل الثامن وسبعون 78 - بقلم نهى

ب 🌹🌹🌹
#الكاتبة_نهى_الحسون
#قضية_الشمل

مساء الانوار والسرور عليكم

نور

سافر مهيمن وبدت رحلتنا بالمعاناة مع الانتظار
كل وحدة بينا كانت تحتفظ بمخاوفها لنفسها

كنت كلما استسلم للخوف على اخواني ويبدي الحزن
يسيطر علية اتذكر كلام مهيمن
طلب مني ما اسمح للضعف والخوف يتمكنون مني
لازم اكون قوية حتى اكدر اواجه الحياة بغيابهم
واوكف وية خالة زهرة والبنات
بشدتهم. مهيمن وجلال بحاجة دعائنا

مهيمن من سافر للموصل انقطع اتصالنا وياه
وانقطعت اخباره

لان باخر مرة حجينا وياه بلغنا ان هو راح ينزل للجبهة ويلزم واجب وية الجنود وطمنا عليه وكال
.. خاف ما تحصلوني ترة ماكو هناك شبكة للاتصال
لا يظل بالكم علية
انا راح ابقى ملازم مكاني بالموقع نازل واجب وية الجنود

ومن يوم نزل للواجب بعد ما سمعنا عنه خبر
وكلما نتصل عليه يطلعلنا الجهاز مغلق او خارج منطقة التغطية

ومن هذا اليوم عشنا بحرب اعصاب
وكل وحدة بينا تدورلها على
وسيلة تتبع بيها الاخبار وتتحرى
ريم كانت مكابلة مواقع التواصل الاجتماعي الي عن طريقها تعرف الاوضاع بالموصل

واني عن طريق عناد واتصالاته وية الضباط اسمع الاخبار
وحور حالها من حال ريم
واي وحدة بينا تسمع خبر يخص الموصل وقوات الجيش العراقي تجي تركض تخبر الكل

اما خالة زهرة
كانت مگابلة التلفزيون وكاعدة. وصارعدها هوس بقنوات الاخبار
متابعة الاخبار كان شغلنا الشاغل
هو وسيلتنا للتواصل وية اخبار مهيمن وجلال واولاد خاله ومنها نعرف الاوضاع

ومرة من المرات بوحدة من النشرات الاخبارية نشروا خبر بخصوص صعوبة توصيل المؤنة للمقاتلين. بالجبهات

وطلعوا مقطع فديو لمجموعة جنود عراقيين نايمين بين الصخور وحاضنين اسلحتهم
ولازمين واجب بمواقعهم كانوا يرجفون من البرد

واحد من الجنود كان يحجي بالفديو يكول
.. مرات يمر علينا يومين ما ناكل لان المساعدات بالگوة توصل لمواقعنا لان
القناص مترصدلنا يعني لو تحرك صبعك تجيك الطلقة تركض

وبعدها عرضوا مقطع فديو كان عبارة عن اصوات دوي
المدافع اصوات القصف ممزوجة لاصوات زئير الجنود العراقيين

وبيومها خالة زهرة نصبت مناحة
.. يمة مهيمن سودة علية شلون بيك

رحت عليها حتى اهديها باوعت علية وهي تأشر على التلفزيون فاقدة وكالت
.. ولج خالة نور اخوج هناك يتلاوة وية الموت
يمة وليدي ما اعرف بيك بردان لوجوعان
وين الگاك يمة واغطيك واخذك لحظني وادفيك
وبلحظتها انهارت من البجي

وخوال مهيمن اجوي يشوفون اختهم ويتطمنون عليها
من اشوف حرصهم على اختهم اتذكر جلال ومهيمن
وادعي ربي يسلم اخواني

وكاعد اتذكر طيبة گلبهم وياية من اول يوم التقينا
هم اخذوا على عاتقهم يحيطوني بالحماية والامان

مرت الايام بينا والانتظار والترقب كان سيد الموقف
خالة زهرة قررت تنهض وتوكف على حيلها
ورجعت لشغلها بخلطات الاعشاب الطبية

خطية كاعدة تطحن بالاعشاب اسمعها تحجي وية نفسها وتنذر
.. نذراً علية لوجه الله تعالى من ورايح اسوي خلطات للعلاج
وازوعها للمحتاجين ببلاش منا لحد ما يرجعلي ابني سالم
وياهو اليجي وتنطيه. تكله امانة اندعي لمهيمن و لاخوه يردون بسلام

وصدك من يومها صارت خالة تسوي الخلطات للنسوان وترفض تاخذ منهم اي فلس

وحتى البنات من شافتهم كثرت غياباتهم عن الكلية
گامت تحجي عليهم
.. ما يصير نعوف واجبنا ونگابل حزننا ما اريد
مهيمن من يرجع يلكاكم مخربين كل الي بناه وتعب عليه

اي يمة حور اخوج ما تعب كل هذا التعب ووصلج لهيج كلية
مو علمود انتي تهملين مستقبلج بلحظة حزن

بعدها التفتت باوعت على ريم وكالت
.. وانتي خالة ريم شدي حيلج وتركي عنج الحزن
واهتمي بدراستج. واعتني بشعرج وترافة وجهج
ما اريدج تهملين نفسج. اريد وليدي من يرجع يلكاج مثل
شطب ريحان اريده بشوفتج تزيلين كل همومه

هي جانت تحجي وية البنات واني غصب عني دموعي غدرتني. وصرت ابجي
باوعت علية وربتت على كتفي وكالت
.. كافي خالة نورة بس لتظلين تبجين والله ما يلوكلج الهم

جاوبتها واني اناشغ
.. والله خالة موبيدي ما اكدر اسيطر على دموعي من يمر طاري اخواني كدامي.
.. عفو عليج خالة يعني اني احجي وياج حتى تبطلين نحيب من تزيدين بالبجي

يعني شكول لاخوانج اذا شافوا عيون اختهم ذبلها الحزن
شكللهم اذا عاتبوني على الامانة
الله يرضى عليج مسحي دموعج وبطلي حزن خليني
اتلگى اخوتج بالوجه الابيض

كان كلام ام مهيمن دافع قوي حتى نستمر بحياتنا
وكل وحدة بينا شافت شغلها

وبهاي الايام اتعودت على عناد كل يوم يجي من يخلص شغله
رجع مثل ماكان مهيمن مسافر المرة الفاتت استلم الشغل وية طالب
يجيب مصرف للبيت ومسواك بين فترة وفترة

ومن تطلب منه خالة زهرة يدخل للبيت
.. صدك جذب خالة قابل انت غريب انت ابننا
تعال فوت ادخل

جاوبها وهو واكف بالباب .. والنعم منج خالة
بس گوليلي شلون يطاوعني الگلب اخطي عتبة باب ربعي وهم ما موجودين

ماكان يرضى يدخل للبيت يبقى بالباب يسلم السجلات والمسواك ويروح.
اما اني فيتطمن علية بالنقال
يسمع صوتي ويسأل عن احوالي
وبعدها اسأله عن اخبار مهيمن وجلال

وهالمرة اتصل علية يسألني عن امه
.. نور اريد اعرف منج امي ما كالت شي من اجتكم هي وعمتي
جوابته .. لا ما كالت شي كانت كاعدة وية خالة زهرة تواسيها هي وعمتك
يعني ما دار بيني وبينها كلام
وبعدها سألني
.. انا جايكم للبيت جايب مسواك وحتى انطيج السجلات تدقيقها
تحتاجين شي اجيبه بطريقي وانا جاي
.. لا ما اريد اي شي غير بس سلامتك

سكت وبعدها كال .. اشو صايرة قليلة الكلام وياية
حتى كلمة حبيبي بعد ما سمعتها منج خيرج حمامة بغداد
شلج بخطية ابن الملحة

ابتسمت وكلت.. لاتخاف حمامتك بعدها على العهد
حتى لو الدنيا شغلتني بمصايبها اتطمن
حبك زرع بذوره بالگلب

عناد .. حييييييييل يعني هستوج يالله بديتي تزرعين
بذور حٍٍِْــًبٌٍـــِٓېٍٓ بگلبج يعني افتهم من كلامج حبي حديث العهد بعده ماله جذور ثابتة بگلبج

ابتسمت وكلت .. اكول استاذ عناد
صاير تدور الزعلات علية

ابتسم وكال .. ما تعرفين شكد مشتاقلج مرات اكول هسة انا لو رايح متطوع وية مهيمن وملتحق مو احسن من هذا العذاب على الاقل هناك التهي وما اشوف حلالي كدام عيني وما اكدر اطوله

جاوبته .. لا عفية عناد صير عاقل وبطل هالحجي والله كافي علية خوفي على اخواني وگلبي معصور بغيابهم

وداعتك اني لحد هسة گلبي ينتفض من اتذكر شلون سافرت للموصل بذاك اليوم. علمود توصل سيارة مساعدات ودخلنا كلنا بالانذار من وراك.

.. اسم الله على گلبج
يالله انا راح اسد النقال سيطرة كدامي
عود ما اوصيج ديري بالج على بذوري واسگيهم
انهى المكالمة

باوعت على النقال ابتسم على خبالات عناد

ريم سألتني .. ليش ما كلتيله عن امه
جاوبتها .. لاعيب استحي ترة كلامها كان نصيحة

جنت احجي وية ريم واني اتذكر كلام ام عناد البارحة
اجتي هي وعمته. علمود يتطمنون على صحة خالة زهرة ويواسونها

ومن قدمت الصيافة الهم وسلمت عليهم
طلبت مني تحجي وياية لوحدنا
باوعت عليها ورجعت باوعت على خالة زهرة اريدها تسعفني
شنو اسوي بهاي الحالة. ما اعرف ليش انمغصت بطني من طلبها

خالة زهرة كالت .. نورة يمة اخذي عمتج وكعدي انتي وياها بغرفة البنات وشوفيها شتريد اكيد عندكم خصوصيات وامور عائلية تردون تناقشونها بينكم قبل الزواج

حركت راسي بالموافقة
اخذتها لغرفة البنات حتى تحجي
وهناك. ام عناد اول ما دخلت فاتت بالموضوع وكالت

.. شوفي خالة سمعيني زين احنا اهل بيت وعيال
وانتي راح تدخلين ببيتنا وتصيرين جنة.

وانا عمتج واحنا بشر
ما معصومين من الغلط
ومصارين البطن تتعارك. فما بالج عائلة بيت
يوم نتعارك ويوم الثاني نتراضى

من تسمعين مني حجاية تزعلج او اي واحد يسمعج حجاية تضوجج تعالي كعدي وياية وگوليلي وعاتبيني واني اكولج الي
مزعلني منج وتحجيلي الي زعلج مني ونتصافى بينا

لاتدخلين عناد بمشاكلنا انا وياج.
وحاولي تخلين الامور بيني وبينج ولازم تعرفين مو كلشي
يدور بيني وبينج من مشاكل وعتاب
ترحين توصلينه

عناد بطبعه عصبي نار. وما عنده شي اسمه خط رجعة ومن يحجي يخرب الاول والتالي بلحظة
وما يفكر بكلامه تدرين بذاك اليوم حرگ البيت علينا وضغطه ارتفع من وراج حتى هدد يعوف البيت ويطلع
والظاهر انتي الج تأثير كلش قوي على عناد

الي افتهمته من كلام ام عناد ان هي تحس بالتهديد
من وجودي ببيتها

باوعت عليها وكلت
.. بالحقيقة. انا بطبعي ما احب انقل كلام بس الحقيقة هالمرة كنت مضطرة اگوله
لان شفت الامور بيناتنا ماراح تمشي عدل
ومن الافضل هو يكعد يحجي وياج ويفهمج عني
هو ابنج وانتي امه واحدكم يعرف بطبع الثاني

لان اني بوكتها لو حاجية وياج كان اعتبرتي كلامي تجاوز عليج اكيد راح تصير مشكلة والزعل يكبر بينا ما يقل

باوعت علية بنظرة اعجاب على شك بكلامي وكالت
.. انا ما اريد منج شي كل الي اريده
تدارين ابني وتتقين الله بأمه وابوه
موتستغلين طيبة گلبه وحبه الج وتكعدين توزينه علينا

جاوبتها .. اني اعرف حق الله
ولوما اعرف حق الله جان جاوبتج بوكتها وماسكتت وتكبر المشكلة بيني وبينج
وقتها ماراح نكدر نصلح شي

اما اعلى الجايات ان شاءالله مايكون اكو شي جاي غير الي صار
اني اكول انطي لنفسج فرصة تعرفيني خيري من شري
وبعدين قرري شلون تعامليني وان شاءالله راح تلاكيني عند حسن ظنج

بالنهاية احنا اثنينا نريد سعادة عناد

بعدها صارت ام عناد تحجيلي عن حياتهم وبيتها وبناتها
كانت تحاول تنقلي صورة عن نظامهم بالبيت
وحياتهم شلون ماشية
واني فضلت اسمعها واجاريها

ريم باوعتلي وكالت
.. اي بس اني كنت افضل لوما كاعدة وياها لوحدكم احسن لان ما ارتاحلها

.. ريم اذا كنت اريد السفينة تبحر بسلام
لازم اتوصل لحل وية ام عناد ونحط
النقط على الحروف وكل واحد بينا يعرف حدوده

سمعنا صوت الجرس بعدها اجتي حور تركض بسرعة وكالت
.. نور. . نور .. تعالي بسرعة هذا واحد بالباب اسمه
امير يكول جوارينكم ببغداد وجاي يسأل عليج

كمزت من مكاني متفاجئة بالشي سمعته

جلال

كنت اباوع على هَنا هي وبطنها منظرها الضعيف
تخلي الواحد غصب عنه يحميها وما يطاوعه گلبه
يشوفها تتأذى

قررت احجي وياه. بموضوع انسحابي من معسكر داعش
بس اكيد من غير ما اكوللها شي عن السبب او عن شخصيتي

جليت صوتي ورحت كعدت على السرير وكلتلها
.. هَنا تركي الشغل من ايدج وتعالي كعدي اريد احجي وياج
بموضوع مهم

باوعت علية بنظرة استفهام كانت شايلة بيدها ملابسي الوسخة تريد تغسلهم
تركتهم على حافة السرير واجتي كعدت بالكاع يم رجلية

وكالت .. كول جلال اسمعك
.. شوفي يابنت الناس انا قررت اغادر واترك المعسكر فكلت
اسألج قبل لا اروح اذا كنتي تردين تجين وياية

.. شنو ليش تريد ترحل يعني انتقلت لغير مكان
جاوبتها .. ردي على كد السؤال ولا تسألني عن شي
ما يخصج هذا مو شغلج

كانت تباوع علية مستغربة اللهجة الحادة بكلامي
كنت متعمد اكون وياها جاف بالكلام ما اريدها
تشك بولائي لداعش وبنفس الوقت اريدها تتطمن
تجي وياي

جاوبتني وكالت .. اكيد اروح وياك مستحيل ابقى
هنا لوحدي اكيد اذا تركتني راح يهدوني لغيرك احتمال
يأذيني مثلما اذوا اخواتي البقية

جاوبتها .. يعني موافقة تٌـٌـمــام
جهزي حالج باجر نطلع من المعسكر انا وياج

استوقفتني بتوسل وكالت
.. جلال واخواتي شلون اروح واعوفهم هنا لوحدهم بخطر

هذا الي جنت خايف منه
باوعت عليها حتى اضمن ولائها هي واخواتها ما يطعنوني لازم اكون انا المسيطر

باوعت عليها وكلت
.. اسمعيني يامرة. انتي جاريتي ولي حرية
التصرف بكِ واذا غادرت المكان. انا وياج مو مشكلة
بس اذا اتصخمت وقررت اخذ اخواتج ويانا معناها
راح تصير عملية تهريب وهذا الشي راح اتعاقب عليه

عيونها لمعت بالدموع ولزمت رجلي تريد تنزل عليها تبوسها
.. احلفك بالغالية امك وبمحبتك لاختك ما تتركنا انا واخواتي هنا
احنا بحاجتك

كمزت من مكاني معترض على حركتها احس گلبي انمرد عليها بس لازم اكون قاسي بتعاملي وياها هي واخواتها
حتى اضمن الموضوع ما يطلع من ايدي

كلتلها بنترة .. يكفي يامرة كافي لاتلغين
امسحي دموعج هاي هي امري لله راح اتورط على عمري واخذ اخواتج
على كل حال اذا جنتي تردين اخذهم ويجون ويانا
فلازم بالاول تحجين وية اخواتج بالاول وتتفقين وياهم وتضمنين
التزامهن بالسرية.

انا عني ما علية شي او خطر
شوكت ما يجي بعقلي اعوفكم واروح

بس خواتج اذا رادوا الحرية والنفاذ بجلدهم
لازم يبلعون لسانهم ويصيرون خرسات وينفذون كلامي بالحرف الواحد
يمشون بأنتظام مثل الساعة شنو اكولهم يسون بدون مناقشة
منا لحد ما اطلعهم من داخل المعسكر
والله المستعان

سألتني.. بس شلون اتواصل وية خواتي واتفق وياهم وافهمهم على الكلام الي كلته

باوعت عليها وكلتلها
.. انا راح ارتب الموضوع واطلب الاذن من الامير يسمحلج
بلقاء خواتج

طلعت من يمها واتوجهت على مكان الامير
الوقت جاي ينفذ مني
كنت امشي وعقلي يخطط لطريقة مضمونة اهرب بيها البنات

وصلت لغرفة الامير طرقت الباب ودخلت والقيت السلام
لكيته مجتمع وية مجموعة من القادة ووجهم مرسوم عليه
معالم الريبة شكلهم الجماعة مزنوگين

رفع راسه وكال .. اهلا وسهلاً جلال قربان بماذا ادين لك
بهذا الطلة الحميدة

جاوبته .. مولاي الامير جاريتي حامل وانا ابتليت على عمري وما اعرف كيف اهتم بها فقلت الجيء اليك
واطلب منك ان تسمح لأخواتها الجواري
يشوفونها ويدارونها لبعض الوقت

اتسعت عيونه بفخر وكال .. ايها الملعون يبدوا ان الفحولة
عالية لديك لدرجةً جعلت جاريتك تحمل منك في فترة وجيزة

ابتسمت بغرور وكلت .. صدقت يامولاي الامير انا فحل ابّاً عن جد.
بس غير انا ما احجي

طكها ضحكة وكرشه يصعد وينزل يضحك وياه
وكال .. لك ما تريد اذهب وسوف ارسل
اخواتها خلفك ليجلسوا مع اختهم

طلعت ورحت للغرفة وبلغت هَنا بوصول اخواتها
والله وصدك دقايق وجان يندك الباب ويدخلون علينا خواتها
ثلاثتهم اباوع عليها شلون صرخت بفرحة ولهفة من شافتهن

وهن بالمثل نفس ردت فعلها اتبادلوا الاحضان ممزوج بالدموع

غلقت الباب وكلت لهنا اذكرها وانا اباوع لساعتي
.. هَنا ما عندنا وقت بسرعة احجي وية خواتج وانا داخل للحمام.

تركتهم ودخلت للحمام
كنت واكف اتسمع لحديثهم. ما اكدر اامن بيهن كلهن خايف لا وحدة منهن تفشي سري. اريد اعرف بشنو يفكرن

كانت هَنا وخواتها يحجون عن الصار وياهم من بعد الفراق ولكل وحدة بيهم قصة تختلف عن الثانية.

لكن هَنا انصدمت من عرفت بخبر وفاة اختها الصغرة
وبعدما اتبادلن الاخبار بلشت هنا تشرح لاخواتها عن موضوع الهروب

سمعت وحدة منهم سألتها وكالت

يعني شنو الي يضمنلنا ما يسوي بينا شي
هو داعشي قذر وكلشي اتوقع منهم

اسمع هنا تسكتها .. اششسش نصي صوتج لا يسمعج جلال ويعصب علينا ويغير رأيه
.. هنَا احنا شفنا ايام سودة على ايدهم مستحيل اكدر
اثق بي هيج بكل سهولة.

سمعت صوت اختها الثانية تأكد على كلام اختها
.. اي صدك هنا. شنو الي يخلينا نأمن بي وننطيه ثقتنا
هيج بكل سهولة
هنا جاوبتهن وكالت .. بنات ما عدنا اي حل اخر كدامنا غير بس
نسلمه ثقتنا واني متأكدة جلال ما راح يخذلنا
لان يحمل بداخل قلبه رحمة. وعطف وهذا الشي يخليني اثق بي

وبعدما اتفقوا البنات على الموافقة
غسلت شعري وطلعت من الحمام
التفتوا يباوعن علية
كانت نظرات الشك والحذر تحوم بعيونهن

عجبني حذرهن وخوفهن مني وهالشي شكل نقطة لصالحهن

هنا شافتني وراحت ركضت جابتلي المنشفة
اخذتها منها وكالت

.. جلال اني حجيت وية البنات واتفقنا كلنا نطلع وياك
جاوبتها وكلت .. حلو.. هذا هو لعد خلونا نحجي بالمفيد

لكيت نفسي مستلم دور القائد وكعدت انطي الاوامر بتنفيد الخطة. كانوا يباوعون بوجهي وعيونهن مثل عيون القطط

.. شفوا بنات اريدكم تركزون وياي وتسمعوني زين
باجر الساعة سبعة بعد المغرب كل وحدة بيكم تدبرللها عذر
حتى تطلع

اريدكم كون الساعة بالسبعة بعد المغرب
تكونون كلكم موجودين بالورشة ما اريد اي تأخير وحاولوا
بقدر الامكان ما تلفتون الانتباه
خلوا ببالكم اي غلطة راح تكلفكم حياتكم

اتفقنا على كل شي وراحوا واني متاكد من نجاح الخطة لان
كانوا يملكون بداخلهم روح قتالية للنجاة. من هذا السجن

مهيمن

الجنود اجوني على صياحي
كنت احوم بمكاني قرب الساتر احس بروحي فرت
مثل الطير المذبوح

واحد من الشباب الي لازمين الواجب كان اسمه عباس
صار يحاول يهديني

.. مهيمن اهدي شوية

جاوبته وانا ما اعرف شنو اسوي
.. ولك عباس شلون اهديء ولك
يردون يقصفون المعسكر الي بي اخوي

.. لاتخاف على اخوك انت مو تكول هو استلم الرسالة اكيد هو مو غبي حتى يبقى هناك وهو عارف بالاوامر

صار عباس يحجي وياي حتى يخليني استوعب
.. لا تخاف اخوك ذيب ما شاء الله
لان الشخص الي يتوغل بين الضباع والثعابين بكل اصرار اكيد شايل گلب ميت ما يهاب المنية وراح يكدر ينقذ نفسه

ابو الهمة عض على جروحك و گوم يابطل
لاتخلي الحزن ينسيك واجبك
ترة وارضنا بعدها مسلبة ومهضومة
والواجب بعده ينادي علينا

گوم وياي وصب غضبك الي جاي اشوفه بعيونك
على راس الانجاس
طلع حرگت گلبك واشفي غليلك بيهم

كان يحجي واصوات القصف احوم فوگ راسنا

نهضت من مكاني الغضب والحقد على هذولة الانجاس مالي كلبي
جاوبته .. وداعتك ياخوي الا احرم عليهم شم الهوى
وافنيهم فني واخلي بذكرهم يرافقه اللعنة

مرت الساعات علينا اندمج ليلنا وية نهارنا
واختفت معاني الوجوه من اثر الغبرة

نحارب ونناور وصرنا نتقدم ونتوغل
والگلوب ميتة

طر علينا الفجر وسيطرنا عالمنطقة. الي احنا بيها

كنا نتناوب وية الشباب
مجموعة ترتاح وتجي مجموعة بدالها

انا كنت مسؤول على القاذفات لگيت روحي استاذ بالفطرة
ما انكرالتحاقي بالدورة الخاصة بالمتطوعين
هواي فادتني.

يوم ثاني الظهر
اجاني عباس يركض شايل بيده اللاسلكي
وكال .. اجتنا اخبارية تكول سيارة مدرعة.
محملمة. (....) طن من المتفجرات
وبيها انتحاري

اجتازت السيطرة العراقية . وعبرتها من غير ما يكدرون يوقفونها. جاية بأتجاهنا

اجة الصوت الضابط يملي الاومر يجب توقيف المدرعة
اجة واحد من الجنود يستعجلنا كان شايل بيده ناظور

جان يركض .. شباب .. المدرعة بينت من الافق
الضابط المسؤل عنا صار ينطي الاوامر

رحت وكفت يمه وكلتله .. سيدي هذا ما راح يوكف
الا بقاذفة

باوع علية وكال
..ولك مهيمن انت مجنون. المعلومات تكول المدرعة
بيها (..)طن من المتفجرات. يعني الا انتحاري جاي ينفذ المهمة

سألته .. ليش سيدي
.. ولك ما ينفع مع انطلاق القذيفة . وابعادها
صار الضابط ينطيني احداثيات. عن مسافة وسرعة القذيفة
وقوة انفجار المدرعة التخمينية

جاوبته بكل همة ونار الغضب تسعر بگلبي وشلت القاذفة وثبتتها على كتفي.

صحت بصوت .. سيدي انطيني الامر بالتنفيذ
باوع علية ولزم كتفي وكال .. مهيمن هاي مجازفة صعبة انت بگدها ؟؟؟

ضربت صدري وكلت
.. سيدي فوت بيها وعالزلم خليها
انا ابن الملحة گدها وگدود

وافق الامر بالتنفيذ

وانا لمعت عيوني بالحماس
شلت القاذفة وثبتتها على كتفي.
المفروض الزم الطريق بسرعة. . حتى اسبق الوقت
كنت امشي وعباس يمشي بصفي ويملي علية بالمعلومات
والاحداثيات

وصلت لراس الطريق كان مثل التلة عالي المستوى
ثبت القذيفة على كتفي وحطيت قطعة الكاتم بداخل اذني

حامل سلاح المنايا وهاجم عليهم بكل عزم وتصميم
متوكل على رب العالمين

يتبع

اتمنى لكم قراءة ممتعة
اختكم نهى الحسون

.