قضية لم الشمل الفصل التاسع وسبعون 79 - بقلم نهى

ب 🌹🌹🌹
#الكاتبة_نهى_الحسون
#قضية_الشمل

مساء الانوار والسرور عليكم

نور
كمزت من. مكاني متفاجئة.
.. اميرر!!!

حور جاوبتني .. اي يكول اسمه امير

اتبادلنا اني وريم نظرات المعرفة
حور كملت كلامها .. امي كالت صيحي لنور لان الولد يريد يشوفج ويسلم عليج

بس خرب يومه والله بقلاوة
انخبصت ما اعرف شصار بية
اجتاحتني كمية مشاعرغريبة ماكدرت احزرهَا شنو
احس بروحي دخلت بحالة فوضى
صار عندي تضارب بين الماضي والحاضر

هجمت علية الذكريات صرت مثل واحد فتح كتاب قديم تتوسطه وردة قديمة
رغم جففها الزمن وسلب منها عطرها وجمالها لكن بقت بين ثنايا الروح لها قيمة
كلما نشوفها تحرك مشاعرنا غصب
هذا حالي كان وية امير

ريم اقتربت مني وبيدها شال وكالت .. نور بالله شو هاج اخذي لبسي هذا الشال واهدي
خلي نفتهم ليش جاي

اخذت شالي منها ولبسته وبعدها سحبت نفس عميق
وطلعت من الغرفة وريم اجتي وراية لكيت خالة زهرة واكفة بالباب تحجي وية امير هنا وجان اسمع صوت عناد سلم على خالة زهرة وامير
ما اعرف ليش من سمعت صوت عناد رجلية اتوقفت عن المشي اترددت اكمل طريقي للباب

ريم بصوت ناصي.. شكو ليش اتوقفتي
باوعتلها بحيرة ما اعرف احس الموقف كلش مربك ومعقد

التفتت خالة زهرة على صوت ريم اتحركت للجانب تفسح المجال وكالت
.. هاي هي نورة اجتي.
تعالي خالة نور سلمي على جاركم استاذ امير

اتقدمت وعيوني وكعت على امير احس وكف بية الزمن ورجعت ذيج نور الاولية الي جانت تشوف بأمير شمعة
تضوي عالمها المظلم

شافني واتسعت عيونه وابتسامته المتعجبة ضوت وجهه
وكال
.. لج نور هاي انتي نوارة نفسج !!!!

اتسعت ابتسامتي وحجيت بحماس .. امييييير !!!!!!
شلونك وشلون الوالدة وربي مشتاقتلها

رمش بعيونه وكال .. وربي لوما صوتج ما اصدك هاي انتي
نوارة

عناد جلى صوته وكال .. شنو راح تبقون واكفين تسولفون على الباب

خالة زهرة كالت .. يا والله عيب شلون زحمة اخذتنا السوالف ونسيت اكله اتفضل جوة للبيت

امير جاوبها .. والله خالة انا ما ناوي اطول بس حبيت امر
على نور واتطمن عليها

عناد جلى صوته متضايق وكال
.. اتفضل ادخل جوى للبيت وهناك كمل سوالفك
مبين عليك عندك هواية سوالف

جاوبه امير وهو يبتسم بخفة وكال .. اي والله من شفت نور
انطلق الساني مثل قبل من احجي وياها. انسى نفسي

عناد نطت عيونه من كلام امير وكال .. شكلك بديت تنسى نفسك مرة ثانية
كلام عناد وية امير كان بمثابة انذار بس شكله امير كان غافل
عن تحذير عناد

دخل للاستقبال وكعد وريم دخلت قدمتله ماي وعصير
انتبهت عليه كان كل شوية يباوعلي بنظرة تعجب ممزوجة بالفضول

سألته ..امير ما كلتلي شلون صارت صحة الوالدة
واختك الدكتور سرى شلونها
وزوجتك شلونها

جاوبني وهو يجر حسرة وكال
.. والله امي صحتها كلش متدهورة. اما اختي سرى تزوجت
وسافرت للخارج وية زوجها

اما زوجتي الي هي بت خالي مع الاسف. انفصلت عنها
لان سبت امي سباية سوت مشاكل هواية
وبأخر المطاف خيرتني لو اخلي امي بدار. عجزة. لو اطلگها
ماكان بيدي غير اطلكها وابقى اهتم بأمي

جاوبته واني احس أتجاهه بالاسف .. يااااخطية خالة ما تستاهل الي يصير بيها

.. تصدكين نور من عهد ما تركتينا بعد ما دخلت بيتنا
وحدة مثل اخلاقح وحنيتج على امي
كل وحدة اجيبها كانت روحها بخشمها وكوة تهتم بأمي

كنت اتمعن بشكله مو هواي متغير يمكن جسمه شوية مليان
قبل كان ضعيف وهزيل

رفع راسه وباوع علية ونفض عن وجهه معالم الحزن وابتسم
.. عوفج مني وتعالي كوليلي شنو هاي الاخبار الي سمعتها عنج.
يكولون عندج اخوان من ابوج

ابتسمت .. منو وصلك الاخبار يعني شلون سمعت
اني عندي اخوان.

نور تصدكين اذا اكلج انتي دومج على بالي
انتي من يوم راد زوج خالتج يزوجج لسعدون بالغصب
احس صرتي مسؤليتي ما اعرف ليش

ورة ما اتعرضت للضرب على ايد جماعة صابر وسعدون انتي اختفيتي.
وانقطعت عني اخبارج

رحت لبيت خالتج اسأل عليج هي خبثت ما قبلت تنطيني اي معلومة عن مكانج
ووين تعيشين جنت خايف لا يكونون مزوجينج لسعدون

بس بعدما بقيت مصر اعرف اخبارج كالت نور طلعوا عندها اخوان وما تعرف عنهم وراحت وياهم

وخلتني معلك طلبت منها رقم نقالج او اي شي اتواصل وياج
بس ماكو كانت كلش معندة وياية

بس قبل ثلاث اسابيع اتفاجئت بخالتج اجتنا للبيت
تطلب مني اتوسطلها عندج حتى بلكي ترجعين تصرفيلهم الراتب الشهري

وبيومها انطتني عنوانج بالبصرة. بس بدون رقم نقال
تكول انتي بدلتي الرقم ومتقبلين تتواصلين وياها
وكالت اخوانها مسيطرين عليها
وعلى اساس واحد من اخوانج مطلوب للحكومة لان يشتغل
عميل وية داعش

ما تعرفين شنو صار بينا انا وامي من سمعنا بأخبارج
امي كالت من تسافر للبصرة مر عليها
واسأل عن احوالها واذا اقتضى الامر وشفت نور بحاجة المساعدة كللها بيتنا مفتوحلها هلا بيها بأي وكت

نور طمنيني صدك هذا الشي الي سمعته انتي مغصوبه عالزواج من واحد فرضوه عليج اخوانج

وعلى طاري الزواج عنادبعد مااتحمل طك وانفجر من يمه
باوع عليه وكال
.. خايب ما تحجي عدل صارلك ساعة كاعد ما كلت سالفة براسها خير كل سوالفك غثيثة

امير عقد حواجبه وسأل ..العفو انت منو حضرتك
حتى تعلي صوتك علية

عناد نطت عيونه واني بسرعة اتدخلت وجاوبت امير
.. امير هذا عناد خطيب.....
عناد قاطع كلامي وهو يخزرني وكال .. لا مو خطيبها انا زوجها

خالة زهرة اتدخلت وكالت لأمير .. خالة لاتصدك كلام بيت خالتها هذولي ناس ما عندهم مخافة الله يحبون يتبلون على الوادم اخوانها اتطوعوا وسافروا للموصل
روح اسأل عن اخوها مهيمن وخلي الناس تحجيلك عنه وعن
اخلاقه. وهذا زوجها كدامك ابن اصول والنعم منه

عناد حجة بغيض وكال .. خالة مالة داعي تكعدين تبرريله افعالنا ومكانتنا
وهو بصفته شنو حتى يكعد يقيمنا ويحكم علينا
خال ولد عم بنية

امير جاوبه .. بحكم العشرة والزاد والملح وكلام خالتها
هو الي جابني لهنا حتى اتطمن عليها

جاوبته بأمتنان وكلت .. امير مشكور ما تقصر انت دومك
صاحب نخوة وما يوم خذلتني ربي يحميك ويحفظك لامك

خالة زهرة كملت على كلامي وكالت .. والله اتمنيت اخوانها
هنا ويشوفونك حتى يشكرونك على طيب اصلك ووكفتك وية اختهم

امير جاوبها محرج ..انا ما مسوي شي هذا واجبي والناس لبعضها يوم لك ويوم عليك وانا كل الي ردته اشوف نور واتطمن عليها. والحمدلله
بعدما شفتها اتطمنت خصوصاً من شفت وجهها المورد يدل على الراحة

عناد نهض من مكانها بنفاذ صبر كان مبين عليه گوة لازم روحه ما يطحنه
شكله محكوم بأصول الضيافة
گام من مكانه وكال .. مشكور ما قصرت كلفت نفسك واجيت تتطمن ان شاء الله نردها الك بالافراح من تتزوج مرة ثانية

كانت طردة بنزاكة
امير جلى صوته وحس على نفسه وكام من مكانه
وكال .. انا صار لازم اترخص منكم لان عندي اقاربي ينتظروني بالسيارة برة

واني نهضت وياه وكلتله .. امير مشكور على سؤالك عني
امانة توصل سلامي لخالة.

.. على شنو تشكريني هذا واجبي انا ما سويت شي اي واحد بمكاني هم راح يسوي مثلي و العشرة ماتهون الا على ابن الحرام

خالة زهرة .. والنعم من اصلك
امير اتجه للباب ورة عناد واني وخالة زهرة اتبعناه
للباب وصل للباب واتوقف والتفت علية وكال
.. نور ديري بالج على نفسج
باوع لعناد وكال .. ما اوصيك عليها
الله حط بيدك جوهرة دير بالك تفرط بيها

عناد غمض عيونه بقلة صبر وكال
.. انا مو غبي مثل بعض الناس وافرط بيها

عناد كان مبين من نظرات عيونه كان يقصد امير بكلامه
عقدت حواجبي مستغربة عناد شبي معصب من امير
عبالك عنده عداوة وياه

كنا واكفين بالطارمة اني والبنات وخالة وعناد واكفين بالباب
ريم حجت وياية بصوت ناصي وكالت
.. اذا راح امير لزمي عناد واحجي وياه لاتخلينه يروح وهو هيج مطنكر
شوفي شبي ليش هيج كالب الخلفة

حور كالت وهي تباوع بتفكير .. حسب تحليلي
لانواع الطنكورات الي مارة علية اخونا بالله جاي يمر بحالة الغيرة الطنكورية

ريم .. وهو وين لحك يشوف امير وشنو عرف عنه حتى يغار منه

حور .. والله هذا جوابه راح نلكاه عند صاحب الطنكورة

دخلت خالة وعناد بقى بالباب يحجي وياها
رحت يمهم وكلت .. عناد تعال ادخل جوة للبيت ليش واكف بالباب

جاوبني بدون ما يوجهلي نظرة كال
.. اريد اروح مستعجل عندي شغل مهم اجيت بس انطيكم الاغراض والسجلات

خالة زهرة كامت تدعيله. واني بقيت واكفة بمكاني منتظرة
خالة تدخل حتى احجي وياه

اخذت منه السجلات وراحت دخلت جوة للبيت تصيح للبنات حتى يدخلون المسواك

استغليت الفرصة وسألته
.. عناد شنو شبيك ليش گالب الوجه شنو صاير شي

جاوبني من ورة خشمة وكال .. ما صاير شي سلامتج
.. عناد بدون لف ودوران احجي شنو شبيك
.. كلتلج ما بية شي لا تلحين

.. شلون ما بيك شي وانت قبل شوية جنت تحجي وياي بالنقال طبيعي وجنك العافية. اشو هسة انگلبت احوالك خصوصاً من شفت امير. صرت مو على بعضك

عناد ادري بيك مستغرب جية امير وسؤاله عني
بس هو مثل ماشفت اجة بحكم
الجيرة والعشرة يسأل عني ويتطمن

مسح وجهه بكفوف ايديه ونتر بية وكال

.. انتي ما انتبهتي لروحج شنو سويتي
مشفتي نفسج شلون لمعت عيونج. من شفتي امير
انتي حتى ما كلفتي روحج تعرفيني عليه
حقج معذورة لان حضرتج جنتي فاصلة عن العالم وما تشوفين كدامج غير بس امير

.. عناد ترة ماله داعي هالحجي ومو حلو بحقي
اشو كمت تحلل بكيفك وتستعجل بحكمك وتدور الزلة علية

.. ترة الموضوع واضح ما يحتاجله تحليل
لا عبالج عبرت علية سالفة جاي يتطمن عليج حباً لله

ترة جان مبين عليه
هو جاي وبباله يلگى نور نتنظره وباقية على العهد القديم

من يلتقي بيج يطلب ايدج الظاهر ما لگة وحدة تتحمل امه
غيرج

.. عناد شنو هذا الحجي تفكيرك هواي رايح زايد
كلامك ما بي اي ربط
شنو امير جاي يطلبني شنو ما لكة وحدة تتحمل امه غيري
انت منين جاي تجيب هذا الحجي.

جاوبني وكال . . نور ترة الحليم تكفيه الاشارة
هو اول ما سألتيه عن احواله. بلغج بخبر انفصاله من زوجته
انا رجال واعرف الرجل من نظراته وبشنو يفكر

هزيت راسي برفض وحجيت

وگلت .. لا عناد انت متوهم وكل هذا الحجي الي گلته ماله وجود

.. نور ترة اعرف امير شنو جان بالنسبة الج
والظاهر بعدها اثار حبه باقية لليوم بگلبج

اتسعت عيوني وسألته بأستنكار. متعجبة
.. اثر حبه بگلبي ؟؟؟؟

عناد انت منتبه لنفسك شنو جاي تحجي لو لا
ترة كلامك هذا اتهام باطل بحقي

واني ما انطيتك سبب حتى يخليك هيج تحجي وتتهمني
انت حتى ما تعرف امير شوكت لحكت شفته وعرفت
اني احبه وهو هسة جاي يريد يرتبط بية

كان ينزل بالاغراض من السيارة
كمل تنزيلهم وحطهم بالباب
ووكف كدامي وكال

.. شنو نور نسيتي لو اذكرج ترة انا نفسي
عناد او خلي نكول رغد. الي كان يتواصل وياج
و انتي بنفسج حجيتلي عن حبج لأمير
وشلون انولد حبه بگلبج وكيف انتهى

والله العظيم بختج باخوانج. ما موجودين والا جان خليت هذا امير يطلع من بيتكم زحف على ركبه على هاي سوايته
بس انا مو عديم المروة واخلف بوعدي لصاحبي

شكهت مصدومة وحطيت ايدي على حلكي متفاجئة
بكلام عناد

بعدها دار ووجه وراح وتركني
يا الله الدنيا شكد صغيرة.

دخلت للبيت احس بروحي خاوية وضايعة
اتهامات عناد كانت بمثابة طعنة بالثقة

اول ما دخلت للمطبخ خالة زهرة استلمتني
وكالت .. اكول خالة نور طبعاً انا ما كدرت احجي كدام
عناد

بس هذا الولد مبين عليه جاي وكان ناوي يخطبج
بعدما يشوف وضعج كان يريد يستغل
سوء حالج ووضعج عباله انتي مثل قبل لا حول ولاقوة
مالج سند وظهر فحب يستفيد من الوضع

اتسعت عيوني من كلام خالة زهرة
معقولة هم ما جاي يشوفون الي اني اشوفه
. .. حييييييييل خالة انتي رايحة لبعيد

ترة امير مو بحاجتي وهو صاحب الفضل علية
واذا كنتي تقصدين على سالفة امه ترة هو يكدر
يجيب اي وحدة. بكل سهولة لاتظلمينه بحكمج
بس كل ما في الموضوع هو حب يعمل بأصله
ومسوي حساب للعشرة واجاني بسال عن احوالي

جاوبتني خالة زهرة وكالت .. هذا الشي قنعي روحج بي
خالة انتي على نيتج فتشوفين الناس كلها مثلج
بس خلي ببالج هذا سالفته مبينة لاصامَ ولا صلى الا لحاجةً
تُقضى

باوعت عليها محتارة شنو اجاوبها بالحقيقة كلامها
سلب مني القدرة عالكلام

ريم

مرت الايام علينا وصار يوم يجر يوم واسبوع يتبعه اسبوع وضاع علينا الحساب الشي الوحيد ثابت بعد سفر مهيمن
هو المشاعر كانت عبارة عن خوف وحنين واشتياق
وانتظار رجوعه بلهفة

كنت كل يوم اصبر الگلب وواتعشم برجعة حبيبي واكول
هانت باجر حبيبي يعود و نتسامر اني وياه
ونعوض كل ليالي الشوگ بثمرة صبرنا

صحيح اتعودنا عالوضع وكدرنا نرجع لحياتنا بغيابه
بس ما نسيناه ولا نسينا جلال

هو هم ما اعرف وين صفت بي دنياه
سكوت مهيمن وتغاضي حورعن موضوع انضمام جلال لداعش جلال
شي مو طبيعي احس الكل يعرف شي عن جلال الا اني

كنت كاعدة بالمطبخ على الميز جاي ادرس
اباوع لنور دتشتغل اليوم مسوية حملة عالبيت احس بيها
جاي تطلع حركتها بالتنظيف

وهاي الثانية هم وضعها ما عاجبني
خطية من صارت سالفة امير
و هي وعناد علاقتهم توترت ودخل بينهم الزعل

وبعدها عناد قلت مكالماته وية نور بس ما بطل زياراته النا للبيت
وبقى مستمر يشوف طلبات البيت ويتسوك
ويسلم على خالة زهرة. ومرات اني اطلعله
لو حور بس نور رغم تعرف بموعد جية عناد
ولا يوم فكرت تطلع تفتحله الباب وتحجي وياه
هي هم شايلة بخاطرها وزعلانة عليه وماخذة موقف منه

اندك الجرس ونور جمدت بمكانها والتفتت علية وهي تباوع للساعة بلهفة وگالت
.. اكيد هذا عناد هو كل يوم هيج وقت يجي

كمت من مكاني ورحت فتحت الباب وصدك ابن الحلال بذكره كان عناد واكف بالباب

لابس نظارات شمسية وتيشيرت ابيض
وبنطلون جينز الي يشوفه يكول هنيال الي تصير من نصيبه
وشكد محظوظة

بس محد يعرف المحظوظة عايشة بتعاسة وياه

سلمت عليه .. هلا عناد شلونك
جاوبني وهو ينزع نظاراته وكال .. الحمدلله بخير
شنو خالة زهرة وين اشو اليوم انتي صايرة ابو البيت وتفتحين الباب

جاوبته وانا عابسة
ما اعرف اني شبية منو يمي شنو يعني تضامناً وية نور ومطنكرة على عناد
.. خالة زهرة. جوة جاي تحجي بالنقال

بعدها سألني عن دراستي واحوالي
ما اعرف ليش احس بي من يحجي وياية عبالك جاي يحجي وية وحدة صغيرة يجاملها
عايز بعد بس يكرصني من خدودي وينطيني لّعابة عابتله

انطاني الاغراض وكال .. يالله حبابة فوتي دخلي جوة
دار وجهه راد يروح استوقفته وگلت
.. عنااااد .. لحظة. . شنو
باوع علية . . هَـا شكو كولي

حاولت المح عن نور بس بصورة غير مباشرة
حتى لايفهم كلامي غلط ويكول نور رسلت بنت عنها
حتى احجي وياي

جليت صوتي وكلت .. احم ما ناسي شي منا .. منا
باوع علية وكال .. لا سلامتج ما ناسي شي واذا اتذكرت عندي رقم نقال ام مهيمن واتصل عليها

راح عناد وكالعادة ما جاب طاري نور. ولا سأل عنها
اني لو بس اعرف هو ليش هيج مكبر الموضوع وماخذ موقف من نور

دخلت الغراض للبيت ونور سألتني

.. هذا عناد الي كان بالباب
كلتلها .. اي عناد وجاب السجلات
سألتني .. شلونه .. ما سألج عني ؟؟

جاوبتها وانا مقهورة عليها .. لا ما سألني عنج ولا جاب سيرتج

ساد الحزن بنظراتها ورفعت راسها تكابر
. . عادي وشنو يعني ما يهمني وعنه لا سأل
اصلاً اني هم ما احب اعرف عنه شي ولا يعجبني اسمع اخباره

كانت تداوي كبريائها المجروح
.. نورايتي ليش ما تكعدين تحجين وياه وتصلحين الموقف
ترة هو مجرد سوء فهم

دنگت راسها بوهن وكعدت عالكرسي كدامي
وكالت .. المشكلة كان كلام عناد وخالة زهرة بخصوص امير كله صحيح
وطلع توقعهم بمحله
وموضوع جية امير وسؤاله عني طلع مو لله مثلما اني متصورة

عقدت حواجبي مستغربة .. شلون يعني ما افتهمت
.. طلع امير عنده غاية بزيارته الي
وحب يضرب عصفورين بحجر واحد بس اني ياغافلين الكم الله

لان بعد الي صار اتفاجئت بأتصال من اسيل
تحجي وياية بخصوص موضوع امير
هو حاجي وياها وطلب منها ان تحجي وياي تجس نبضي
اذا كان بية مجال اوافق على طلبه

اتخيلي يكول لأسيل انا شفت خطيبها ومبين عليه
عصبي ما ينجرع. اكيد اخوانها غاصبيها عليه

سألتها .. زين امير شوصله لأسيل
.. هو يعرفها من زمان كنت دائماً احجيله عنها
فعادي مثلما خالة سناء حبت تستغلني
هو هم شاف بية فرصة ما تتفوت

بس اني ما سكتت انطيته الرفض وفوكاها رسالة بيها رزالة محترمة. مثل البسمار بالنعش
وخليت اسيل توصل الرسالة

بس تدرين اني هذا كله ما همني
الي قاهرني تصرف عناد
شلون هنت عليه وانطاه گلبه هيج يديرلي وجهه وينطيني
ظهره واني بأمس الحاجة لوجوده بهاي الفترة بغياب اخواني

ويعرف بية احبه و گلبي بيده من زمان
ما يدري بجفاه وصده شسوى بية

جنا نحجي اني ونور
فجاءة سمعنا صوت صريخ وصياح
واتبعها دخول خالة زهرة للمطبخ
كانت تعيط بصوت مفجوعة وتلطم
على راسها وحور دخلت وراها تلطم خدودها

جلال

الساعة بالسبعة مساءاً
دگت ساعة الصفر وآن الاوان.
كنت كاعد بالسيارة. خلف المقود وهَنا كانت كاعدة بصفي

تمت تنفيذ المرحلة الاولى من الخطة بنجاح
اخواتها تلاثتهم خاتلات تحت الكشن

طول اليومين كنت بالورشة اشتغل عالسيارة
حتى ارتبلهم مكان اخفيهم بي سويت تحت الكشنات مكان مثل الصندوق دخلن جوة بيهن ورجعت عليهم الكراسي
كانت السيارة عالية نوع جيب

اتفقت وية هَنا تحاول تسوي نفسها موجوعة عندها الام
ولادة.

اتخذت من حملها حجة حتى اطلع بيها من المعسكر
اخذها للقابلة المأذونة. الموجودة بالقرية حتى تشرف عليها وتولدها

طبعاً اختاريت هذا الوقت بالتحديد متزامن وية
لحظة شن الهجوم القوات العراقية على معسكر الدواعش

اتعمدت اطلع قبل الوقت بنص ساعة
مسوي حساب خوات هنا

حتى منا علما يفتقدون وجودهن بالمعسكر
ويربطون هذا وية خروجي انا واختهم هنا

اكون اني كدرت الزم نهاية المنطقة وتكون الطائرات
القوات العراقية بهاي الاثناء شنت الهجوم

يعني بين قوسين يلتهون بالهجوم ما يكدرون
يطاروني انا والبنات

كانت المعادلة صعبة مثل حد السيف

حركت السيارة واتوكلت على الله واتشاهدت
ووقفت كدام البوابة. وباوعت كان بس حارس واحد واگف
يم البوابة هم بهيج وقت عندهم يصير فتور وباقي الاوقات يكون اكثر من حارس عالبوابة
لذلك القوات العراقية اختاروا هذا الوقت بالذات لشن الهجوم
وكانت هاي الفقرة من ضمن المعلومات الي وصلتها الهم اني وباقي الصقور

الحارس كان شايل سلاحه بوضع الاستعداد لكن من شافني علگه ورة ظهره.
اجة بأتجاهي التفتت على هَنا.
وكلتلها .. يالله هَنا جنت اريد انطيها الاشارة
حتى تبلش تمثل

بس هي كانت تباوع على الحارس بنظرات كلها خوف وترقب ورعب
وجان تصرخ بصوت مرعوبة واتبعها عدة صرخات الم ولزمت بطنها

اتفاجئت بصرختها وباوعت عليها بشك متوتر
هسة هاي شنو تمثل لوصدگ

صار وجهها لونه اصفر وعيونها لازالت على الحارس
ونفس الوقت تتحسس بطنها

انا عاد هنا انخبصت وباوعت لبطنها بأرتباك مصدوم
وسألتها بخوف

.. ششنو شبيج هنا الطفل بي شي من صدك

خرب هاي بس لا من الخوف صدگ راح تطلگ علية
لا يا الله دخيلك كلش مو وكتها الوقت جاي يداهمنا
مو مال اروح ابتلي بيها

وبهاي الاثناء دنك الحارس على نافذة السيارة من جهتي
وباوع لهنا. ونوب علية وكال

.. ما الامر. ماذا هناك

التفتت عليه وانا مخبوص
وسألته .. المرة مثلما ترى يا اخي
انها سوف تجيب ارجوك ساعدني ودليني
على مكان قابلة تجيّب النسوان.

باوع عليه بعدم فهم وگال
.. لم .. افهم .. عليك ماذا .. تريد ان افعل بالضبط

اهوووو هذا الاخ مبين عليه من شكله وكلامه المگطم
مو عربي

و حافظله كم كلمة بالعربي وجاي يخرطهن براسي

وجان ست هَنا تصرخ مرة ثانية. بصوت عالي موجوعة

كمزت من مكاني مخترع. من ورة صوتها احس طبلة اذني انزرفت وطرشتني ينعل يومج على هالصوت

انداريت بسرعة عليه سألته مستعجل
.. ولك ابن الزفرة بسرعة روح افتح البوابة من الله ياخذك

بقى صافن بوجهي مثل الحمار كلشي ما يفتهم
اخير شي

باوعت عليه بحيرة. بالله هذا شلون راح افهمه

اخير شي حاولت احجي وياه بالاشارة
واشرت على بطني وصرت اعصر بوجهي عود جاي اطلگ وفهمته بالاشارة على كم كلمة عربي فصحى
واكول .. ااااااااه .. ولك. اااااااااه طفل .. طفل صغير قادم اوواااا. .. اووااااا
اخير شي صرت اقلد صوت الطفل الصغير وهو يبجي
من ينولد.

رفع حاجبه متفاجيء
وصاح بمعرفة .. انك اهاااااااااااااااااااا تقصد عندها الام المخاض

صحت براحة وانا اهز راسي بتأكيد
.. نعم .. نعم ياخي عندها الام المخاض .. جاي تطلك.

من الله ياخذ العربي الفصحى وياك
بس للامانة كلمة حق لازم تقال
على الاقل احسن مني باللغة العربية ابن الزانية ضابطها

اباوع عليه بسرعة ركض للبوابة وفتحها.
وشفته يحجي بالجهاز اللاسلكي
اكيد بلغ السطرة الثانية عن خروجي
وبلحظتها انطلقت بكل سرعتي اتسابق وية الريح
كنت رابط الجهاز الخاص بزيادة السرعة .. اختراعي
والله واجة وكته

سمعت هَنا تحجي بفرح .. واخييييييراً. لزمنا طريق الحرية

التفتت عليها متعجب وكلتلها
.. هاي شنو وين راح الم المخاص
وصرخات فلم الرعب الي شگت اذني

كنت احجي وياها وانا اسوق بأقصى سرعتي
جاوبتني .. غير انت طلبت مني امثل دور الالم

غيرت الكلام وكالت .. جلال انطي خبر لخواتي يطلعون من تحت الكراسي لو بعد

جاوبتها وانا اباوع بالمرايا الامامية

.. لا بعد مو هسة يطلعون انتظري
لان هذا الحارس الغبي عطلنا كلش هواي واخذ من الوقت المحسوب

واحتمال راح يكتشفون هروبنا قبل لا الحگ
الزم نهاية الطريق
وصلت يم سيطرة خففت السرعة وهنا كامت تصرخ بأعلى صوتها
خطية هاي من حلاة روحها عبالها كلما تصرخ اكثر يصدكن بيها

كانوا رافعين الرايات السود المكتوب عليها داعش
هاي السيطرة كانوا حوالي خمسه
واحد منهم كان يحجي بالجهاز
والباقين اشرولي اكمل الطريق اكيد عدهم علم من السيطرة السابقة
لان لازم يبلغهم عن خروج سيارة ووصولها بعد شوية يمهم

بنفس الوقت الي شفت اشارتهم الي حتى اكمل طريقي
سمعت الي بيده اللاسلكي صاح بصوت عالي .. اوقفوا السيارة
واني انطيتها اللهيب
وما اسمع الا وصوت الرمي حرگ الجو
باوعت بخوف بالمرايا الامامية وجان اشوف السيطرة
صاروا يرمون علينا واثنين منهم توجهوا لسياراتهم حتى يتبعونا

وبسرعة لزمت راس هَنا ودفعتها ونزلت جوة.
سمعت اصوات البنات يصرخون مفزوعات

صحت بصوت عالي
بنات لحد تتحرك من مكانها ابقوا مثلما انتوا

باوعت كدامي للطريق ودست سرعة. وانا حابس انفاسي وصرت اتسابق وية الريح والموت وراية يطاردني

مهيمن

واكف منتظر المدرعة المتوجهة على الفيلق مالتنا
انتشروا الجنود ينفذون اوامر الضابط
كل واحد بيهم اخذ موقعه.

اتحركت السيارات العسكرية.
حتى تعرقل حركة المدرعة وتبطيء من سرعتها

وانا كنت لازم صدر الطريق والجنود بلشوا يرمون عليها
وجان المحها جاية بكل سرعتها من نهاية الطريق

اتشاهدت وثبتت القاذفة على كتفي
انتظر اشارة من الضابط حتى انفذ وارمي
وهنااااااااك وجان اسمعه يصيح بصوت عالي

.. يااالله ياااابطل وديهم لجهنم خليهم الليلة هناك يتعشون
وية ابو لهب

رميت وانا اصيح بصوت عالي

عد عيناك ياعراق احنا زلام الكلفة

يتبع

اتمنى لكم قراءة ممتعة
اختكم نهى الحسون

ً