قضية لم الشمل الفصل الثاني وخمسون 52 - بقلم نهى

#الكاتبة_نهى_الحسون
#قضية_الشمل

مساء الخير عليكم احبتي المتابعين 🌹🌹🌹

مهيمن
كاعد بالمحل ملتهي بالشغل ابيع واسجل قوائم للمشتريات
واحجي وية العمال واصيح على هذا واعيط بذاك

وانا عقلي مشدوه واعصابي حيل مشدودة. منتظر عناد يتصل علية بأي لحظة
بالكوة لازم روحي ما اعوف المحل واروح وراه حتى اشوف شنو سوى بسالفة الخطة الي اتفقنا عليها

رفعت ايدي وباوعت للساعة للمرة الالف منتظر الاتصال
هاي نفسها ساعة جلال الي جابها هدية من سفرته
هو نفسه صاحب الساعة شاغلي كل تفكيري وهو السبب بكل مخاوفي

طول ذيج الايام وانا احاول ما ابين كدامه اي شي
صحيح ما فاتتني نظرات الشك الي بعيونه
بيوم شافني انا وعناد كاعدين سوية بالكوفي
بس حاولت اتغاضى عنها واخلي الموضوع طبيعي

دك نقالي وكان المتصل نور
تسألني عن حوالة خالتها وهاي نور الي هم هي الثانية حالها ما عاجبني هاي الايام
احس بيها خايفة من شي بس متحجي بمخاوفها هي هذا عيبها
كل مرة اسألها عن سبب قلقها وتوترها الي مالهم اي مبرر

نور.. الو .. مهيمن تسمعني

نفضت راسي وجاوبتها مستعجل .. اي .. اي حولتلها على نفس العنوان بس اشو هالمرة طلع رجل خالتج جاوبني وكال خالتج مريضة وهو راح يستلم بدالها

شهكت نور وكالت بجزع .. لا لا عفية مهيمن كلشي ولا صابر يستلم الفلوس والله ياخذها كلها ويصرفهم من غير ما ينطي فلس احمر لخالة سناء هذا قذر واعرفه كلش زين يسويها

.. والله عرفته من اول ما وكعت عيني على هالشخص ما حبيته
.. هسة شلون مهيمن ما تكدر تسوي شي يمنع استلامه
للفلوس

.. والله ما اعرف شنو اكلج انا حولتها قبل ساعتين احتمال هسة هو استلمها وراح
.. اكيد يستلمها هو بهيج امور ما يتأخر سريع

جاوبتها وانا اباوع للساعة اريد استعجلها حتى انهي المكالمة ما اريد اشغل النقال خاف يتصل علية عناد ويلكاني مشغول

.. استغفر الله هسة شسوي
.. بالله روحي اتصلي على خالتج وافتهمي منها الموضوع جائز ناطيها الفلوس

.. اي هو راح اسألها ولو اني متأكدة من صابر وسوالفه مستحيل ينطيها
ردت انهي الاتصال بس هي استوقفتني وكالت
.. اي لحظة مهيمن قبل لا تسد النقال بس اريد اسألك على جلال
.. شبي جلال

.. ما اعرف .. ااااا
كامت تتعثر بالكلام وهالحالة صرت اعرفها بطبع نور من تكون
متخوفة من شي هذا يكون حالها

.. كولي نور شبي جلال
.. عندي كلام وياك لازم اكوله الك يخص جلال.

وبأثناء ما كنت استمع لنور
وكان تدخل مكالمة ثانية عل النقال سمعت صوت تنبيه بمكالمة ثانية
عناد يتصل بك

قطعت كلام نور وجاوبتها .. نور اجلي موضوع جلال بعدين
انتظريني من ارجع
انا هسة عندي شغل مهم مستعجل ولازم انهي الاتصال وياج

بعدها انهيت الاتصال حتى من غير ما انتظر ردها كل همي كان مصبوب كله يم عناد

رديت عليه وانا حابس انفاسي .. هَـا عناد بشر شنو سويت

جاوبني وبصوته نبرت النصر
.. مهيمن ابو طبرة صار جوة ايدنا وهسة هو حالياً عندي بمزرعة اخوي حيدر هناك حبسته بسرعة تعال انتظرك هناك

كان عناد يحجي وياي وانا نهضت من مكاني وصحت لواحد من اولاد خوالي يصيرون قريبين علية حتى يجي يوكف بمكاني بالمحل

وطلعت اركض اخذت سيارتي ورحت وانا بعدني متصل وية عناد يحجيلي شلون خطفوه

كمل كلامه.. وداعتك جبناه للمزرعة مثل الخروف برجليه اجة
اتواعد واياه صاحبي علمود يشتري منه بضاعة مشبوهة تعرف انت هو اختصاص حشيشة وكبسلة وشرب اصلاً يگلك هو الممول
الرئيسي بهاي السوالف

كنت اسوق وانا اسب واغلط .. الله يلعنك يا جلال ما اعرف منين
جايبلي هذا القذر اريد اعرف منين يلكة هيج تحف ويصاحبهم

جاوبني عناد وكال .. هو اخوك صاير مغناطيس لهيج سوالف
هسة خلينا بالمهم

ابو طبرة وصل عالمكان الي حددناه له وهناك وكع بالكمين وكان المكان قريب عالمزرعة

والحمدلله هسة الخروف مربوط عدنا بالمزرعة وجاي نأكله علف
بلكي ينطق

عرفت شنو معنى كلام عناد
.. عناد لا تسويله اي شي دير بالك تلمسه
هذا حسابه خليه يمي

.. لا تخاف ما راح المسه. هاي لخاطرك راح اصير حباب واعامله بحنية علما توصل
انهيت الاتصال وانا احذره ما يتصرف اي شي بدون علمي

وصلت المزرعة

ولگيت واكف عناد ينتظرني بالبوابة فتحلي الباب ودخلت السيارة للمزرعة جانت بدايتها حديقة وكراج عادي وبيت بسيط وخلف البيت تصير مزرعة جبيرة متروسة نخيل. واشجار نبگ

دخلنا للبيت وكان فارغ وحتى ما بي هواي اثاث كلش قليل وبسيط
عناد كان يمشي كدامي وفتح باب حديد يصير ورة البيت كان مقفول بسرگي مو بمفتاح

دخلت وانا احجي وية عناد
.. شنو بس انت بالبيت
جاوبني .. لا انا والحارس ابو مشتاق المسؤل عن البيت والمزرعة

دخلنا للغرفة وجان اشوف
ابو طبرة عبارة عن علبة الوان مضروبة بخلاط
ما اعرف شلون اوصف حالة ابو طبرة المسكين مدري انقهر عبيه
لو احسن هيج صار بي يستاهل
جان نايم بالكاع يتلوى

باوعت لعناد وكلت .. هاي شنو عناد انا مو كلت ما تلمسه
جاوبني وكال بكل ثقة .. هو وانا عند كلمتي وياك والله ما لمسته

باوعت لوجه ابو طبرة المطبر وكلت .. زين وهذا الوجه المدعوم
منو لاعب بخلقته هيج اذا جنت ما لامسه لعد شمسوي بي

..انت گلت لا تلمسه بس ما كلت لاتستخدم وياه وسائل الراحة والترفيه
وانا گلبي ما انطاني اعوفه بدون ما اقوم بالضيافة عيب
زحمة علية

كان يحجي ولازم بيده
صوندة مال حديقة والظاهر هي الي وصلت ابو طبرة لهذا الحال

هزيت راسي بعتب وطبطبت على كتفه وكلت

.. اصييييل طول عمرك صاحب واجب

كنا نتبادل الكلام وعيني على ابو طبرة الي كان يتگلب بالكاع لازم بطنه و يصيح موجوع ونظرات عيونه تتنقل بيني وبين عناد
كان يباوع بحذر مثل الثعلب

رحت دنكت عليه ورفعته من ياخة قميصه وكلتله بتحذير
.. شوف ولك عار واسمعني زين وخلي كلامي هذا ترجية بأذنك
احنا جبناك لهنا سحل حتى ننطيك درس

جاوبني بخوف وكال .. انا خادم الكم وراح احفظ درسي عدل بس هدوني

انطيته لطمة على وجهه وكلت
.. اريدك تنسى شي اسمه جلال بحياتك

جلال

واكف محتار مخبوص وخايف على همام المختفي
شلون ما بقى على المهمة غير بس كم يوم وهذا همام اختفى فجاءة من غير سابق انذار وهذا الشي احتمال يعرقل تنفيذ خطتنا لان ما نعرف شنو سبب اختفاء همام

اجة الضابط دحام يتسحب ووكف يمي
كنت بعدني كاعد بالكهوة

باوعت عليه بأمل وسألته ..هَـا بشر
جاوبني بصوت ناصي وكال .. ابو طبرة مخطوف

.. شلون عرفت بي مخطوف ومنو الخطفه
.. عثرنا على سيارته وكانت مفتحة وهاي اشارة ان ابو طبرة
تعرض للخطف
وهسة جاي نبحث وننتظر اي اتصال من الخاطفين
بس المشكلة مرت ١٢ ساعة وكلشي ما بين محد اتصل علينة

سألته مستغرب .. منو يتصل عليكم
.. المتوقع ان العصابة الخاطفينه احتمال يتصلون علينا ويطلبون فدية المتعارف عليه بعد كل عملية اختطاف تنطلب الفدية هو الهدف الرئيسي او يكمن خلفه تحقيق غاية

كان دوحي يحجي وانا صارت الافكار تاخذني وتوديني
دك نقالي وكان المتصل ابو ذياب غمضت عيوني بنفاذ صبر والله جانت عايزة والتمت عليك يا جلال

دحام باوع للاسم المتصل وكال يذكرني
.. جلال مو تنسى التعليمات

كان يقصد بأوامر الضابط علي
طلب مني امدد بسالفة السفر لان مصادرهم الموجودة بالموصل
تواجه عرقلة لذلك طلب مني اتحجج بشغلي
جاوبته قبل لا ارد على ابو ذياب
.. لا توصي حريص
فتحت الخط
.. هلا ابو ذياب
.. اي نعم انا مجهز اموري ومستعد بس عندي كم شغلة
اخلصها وانطيكم خبر
كان يسالني عن سبب التأخير وجاوبته
.. محتاج اصفي شغلي هنا تعرف انا عندي فلوس
بالبنك واريد احولهن للخارج لان احاف بعدما اروح وياكم
يعلنون اسمي واني افلس من كل شي هنا

كدرت اقنع ابو ذياب بحجة تأخيري خلصت المكالمة ورحت
بعدها طلعت وية دحام ادور على ابو طبرة اتأخر علينا الوكت
ولحد الان ماكو نتيجة
وبطريق الرجعة دحام باوع علية وكال .. بعد ساعتين اذا ما بين ابو طبرة نبلغ الجهات المسؤولة لان اتعدت المدة المحدودة

مهيمن

انطيت المقسوم لأبو طبرة
وسويتله كرصة اذن من هاي التمام
بعدها طلعنا انا وعناد من المزرعة وخلينا الحارس بيها وقفلنا الباب على ابو طبرة بعدما انطيناه اكل وماي
وتركناه بالمزرعة

ورجعنا نكمل شغلنا خلص اليوم حتى بدون ما ارجع للبيت
ولليل مر علية عناد حتى نروح للمزرعة. علمود ابو طبرة

كنا بالسيارة بالطريق
عناد باوع علية وسألني .. شوكت نخلي سبيل الخروف

جاوبته .. نبقيه يومين للتخويف لا اكثر وبعدها نطلق سراحه
حتى لا يستهين بينا

جاوبني وهو صافن كدام يسوق .. وداعتك على طن الضرب الي اكله من عدنا اتوقع بعد راح يحرم يجيب طاري اسم جلال على السانه او يقترب منه انت ما شفته شلون صار يرجف ويتوسل حتى نعوفه وكل شوية يحلفلنا ويوعدنا بعد ما يعيدها ويتقرب لجلال
او يرافقه

جاوبته والشك لازال يراودني
.. تصدك عناد اذا اكلگ انا ولا ارتاحيت
لهذا ابو طبرة ما اعرف ليش احس بي جاي يمثل علينا دور الخايف من عدنا

.. شنو الي خلاك تعتقد ان هو يمثل وميخاف من عدنا
.. عناد يعني بكل عقلك واحد عار مثل ابو طبرة موكف تجار الممنوعات على قدم وساق وما مبقي زاخور ماخايض بي
يخاف من عدنا هيج بكل سهولة.

.. مهيمن انا وياك صحيح كلامك بس لا تنسى هو يبقى بشر حاله حال الناس ما عنده غير بس روح وحدة واكيد يخاف يفرط بيها
مهيمن برد گلبك وخلي ابو طبرة علية

كنا نحجي ووصلنا للمزرعة. وعناد دك هورن للحارس حتى يفتح الباب مرة مرتين. بس ماكو رد
نزل من السيارة وهي يحجي
.. هذا الاثول وين راح

نزلت وراه
ودخلنا للمزرعة.
عناد كان يباوع للمكان مستغرب
.. شنو السالفة المزرعة ليش ظلمة وابو گاصد وينه ليش ما مشغل الاضوية
دخلنا للبيت واتوغلنا للداخل وجان نسمع صوت مكتوم
ورحنا بتجاه الصوت وكان الصوت جاي من غرفة ابو طبرة المحبوس بيها

اتجهنا عليه وعناد لزم كتفي يوقفني وسحب سلاحه مسدس
وصاح .. ابو كاصد .. ابو كااااصد

وصلنا للغرفة ولكينا الباب مفتوح دخلنا وجان نشوف الحارس ابو كاصد مربوط تربط حتى حلكه رابطيه

كان يتلاوة وية الحبل يريد يفك روحه.
وكفنا مصدومين
عناد اتجه عليه بسرعة حتى يفك الحبل عنه وهو يسأله
.. ولك ابوكاصد شنو صار وابو طبرة وين

جاوبنا .. ابو طبرة غدرني وانهزم

لزمه عناد من ياخة قميصه وهدر بي بغضب
.. ولك من الله ياخذك انت وياه كلي شلون كدر يغدرك
واحنا عايفينه يتلوى من الالم مثل الحية بالكاع ما بي حيل يشيل روحه

جاوبه ابو كاصد.. والله انا هم مثلكم عبالي صدك موجوع
طلب مني ماي كلتله من ورة الباب يمك ماي واشرب منه
جاوبني بصوت متقطع مال واحد واصل للموت
بأخر انفاسه. كلي .. ردت اشرب بس وكع بالگاع

باوعت على الماي لكيته متبدي بالكاع
رحت جبتله كلاص ماي وفتحت الباب وبعدني ما فاتح الباب ما حسيت الا واجتني ضربة عالراس ما اعرف منين
واول ما فتحت عيني لكيت روحي مقيد

باوعت لعناد الي كام يغلط ويسب
.. انا اعلمه العار وين يروح منا

سالت ابو كاصد .. صارله شكد من هرب
باوع للساعة وكال اتوقع صارلها ربع ساعة
مصارله هواي

عناد.. اتوقع بعده هنا ما لحك يبتعد
كان يحجي ومشى بتجاه الباب الخارجي
وانا رحت وراه حتى بلكي نلحك على ابو طبرة قبل لا يفلت

نور

كاعدة بالغرفة. منتظرة رجوع مهيمن حتى احجيله عن موضوع جلال وسالفة الجهاز واكله على الكلام المريب
الي سمعته من جلال من كان يحجي بالنقال

بالحقيقة بعد الكلام السمعته ما ينسكت عليه بعد. والمراقبة لوحدها صارت ما تكفي. لازم اخبر مهيمن حتى يتصرف ويفهم منه شنو الموضوع
جائز اني فاهمة الموضوع غلط واتمنى ياربي يكون ضني بجلال مو بمحله

انفتح الباب مثل الاعصار ودخلت حور معطبة مدخنة ووراها ريم تهدي بيها

سالتها.. شنو شبيها حور ليش معصبة
ريم كعدت يمها وتطبطب على كتف حور
وجاوبتني .. هاي خالة ام مهيمن كامت على حور لان عرفت بمهيمن كنسل سالفة الخطابة وكللهم اختي ما تفكر بالزواج وتريد تكمل دراستها

حور كملت على كلام ريم
.. والله كرهتني بعيشتي
من الصبح لحد هسة. ناشبة وياي وكل شوية
تسمعني حجي عبالك مسوية مكسورة مو رافضة عريس

اباوع لحور شلون تبجي
واتذكر كلام ام مهيمن وياها
خطية كل شوية جاية ام مهيمن تسألها عن سبب الرفض
ساعة تكللها خاف عاشكة واحد
لو تكللها سالفتج مو خالية
لو ساعة تكعد تحجي وية روحها تكول
بس لا البنية مضرورة. شبيها نافرة من سالفة الزواج

ريم .. تردين احجي وية مهيمن واكله عن امج وكلامها حتى يسويلها حل

باوعت لريم ورفعت حاجبي .. لا ست ريم ستري علينا لاترحين لمهيمن ولا تحجين وياه. كافي القنبلة الي فجرتيها باخر مرة وية مهيمن من ردتي تبلغينه عن رفض حور

هزت شعرها بحركتها المعروفة وكالت
.. مشكلتكم تضوجون من الصراحة.
وتسوها شغلة شكبرها كامت ما كعدت

كانت تحجي وتعطس كل شوية
سألتها .. شنو انفلونزا
مسدت على راسها وكالت بصوت ناعم .. اي شكلي راح اوكع بيها واني عيبي من اتمرض اصير كلش نحيسة

جنا نحجي ودخلت ام مهمن وبيدها النقال وكالت
.. اكلج خالة نور بالله اتصلي على مهيمن وشوفي وين
اشوف ادك عليه ما يرد وضل بالي يمه بس لا زعل مني لان
اتعاركت وياه علمود هاي المكموعة حويرة.
من عساها لا اتزوجت هسة انا شبية حاركة دمي
عليها

بالله عفية شوفي وين صار اشو اتأخر

رفعت النقال واتصلت على مهيمن وما رد علية.
نهضت من مكاني وطلعت من الغرفة حتى ما اقلق ام مهيمن
واتصلت على جلال

جلال

دك نقالي وباوعت عالشاشة نور تتصل اكيد ظل بالها يمي لان اتأخر الوقت وانا لحد الان ما راجع للبيت

.. الو هَـا نور لا يظل بالج انا شوية اتأخر
قطعت كلامي وكالت

.. جلال عفية مهيمن جاي نتصل عليه بس ما يرد على نقاله

احس للحظة عقلي بند وفصل
.. شنو نور شبي مهيمن
.. خالة جاي تتصل عليه وميرد عليها وهسة الساعة بالوحدة وهو ماكو لحد الان بالله احنا متعودين عليك تتأخر بس مهيمن مايوم اتاخر عالبيت لهيج وقت ونوب هو متعارك وية امه علمود
رفض الناس المتقدمين لحور بس لا زعلان بالله شوفه وين

ما اعرف عقلي شيحس بهاي اللحظة صار يطفر من موجة لموجة
بين القلق والخوف والترقب بكلام نور عن حور اجتني نسمة ريح طيبة صارت تضمد بروحي العليلة سحبت نفس عميق وغمضت عيوني

وجاوبت نور
.. اهدي شوية وانا هسة اتصل على جماعته احتمال كاعد يمهم ونسى نفسه

.. عفية بالله اتصل على جماعته بلكي يمهم او يعرفون هو وين
.. يالله هسة اتصل

انهيت الاتصال ودحام سألني .. شنو شبيك وجهك انگلب
.. ماكو شي بس الاهل ظال بالهم على اخوي الجبير ماجاي يرد على اتصالاتهم

كنا نحجي وركنا السيارة خلف الكهوة يم مشتمل ابو طبرة
كان نص بيت تعبان صغير
نزلنا ودحام فتح الباب كان عنده نسخة من المفاتيح
دخل دحام وانا دخلت وراه
كنت اگلب بنقالي ابحث بالاسماء عن اسم حيدر صديق مهيمن
واول ما دخلنا

وجان يصير بوجهنا ابو طبرة المطبر
اتسعت عيوني متفاجيء حتى نسيت سالفة مهيمن

دحام سبقني وكال
.. شنو خيرك ابو طبرة هذا منو الي مسوي بيك هيج
كان ابو طبرة نازع قميصه. وحاطله صينية اكل وجاي ياكل
وكان يمه. علبة اسعافات اولية قطن وشاش وديتول وغيرها

باوعت لكتفه وذراعه مضمدة
كان يباوع علية وجاوب دحام .. هذولي اثنين حشرية الله وكعهم
بطريقي وخطفوني يردون يسولي كرصة اذن حتى ابتعد عن جلال

عقدت حواجبي ورحت كعدت يمه وسألته بأهتمام .. شنو منو هذولي وليش يردونك تبتعد عني

ابتسم وخده مورم كال .. هذا اخوك مهيمن وصاحبك الثاني
ينعل ابو شكله. شكد ايده خفيفة داروا علية واتولوني دك بالصوندة

جاوبته وانا مشلول من الصدمة .. لا تكول اسمه عناد
.. اي والله هو عناد ما غيره
ولك انا شكد جثل وضخم. بس ما كدرت عليه من طوقني من الخلف احس شالني من الكاع

الله يلعنه متكلي هذا اهله شنو يوكلونه جنه وحيد القرن
بس ينطح

عقلي ما جاي يصدك الكلام الي كاعد يسمعه عن مهيمن وعناد
احس بروحي صرت مثل بلاع الموس لا اكدر اطلع ولا اكدر ابلعه بالحالتين ميت

اخوي وصاحبي اتورطوا وخطفوا ضابط استخبارات من غير ما يعرفون
سألت همام .. لاتكلي راح تقبض عليهم وتشمرهم بالسجن ؟؟

جان مستمر بالاكل لكن من حجيت رفع راسه وباوع علية وكال
.. مستحيل اقبض عليهم. تعرف ليش لان بساعتها راح يعرفون انا منو وشنو اشتغل وراح اخرب الاول والتالي
وثاني شي هذا اخوك وصاحبك
همة تصرفوا هيج من حرصهم عليك حتى يبعدوني عن طريقك
تعرف رفيق السوء محد يحب يتورط وياه

وموقف اخوك مهيمن ذكرني بموقف ابوي من جنت صغير والعب وية اولاد المنطقة جان ابوي اذا شاف واحد من جماعتي سمعته
مو زينة. يروح عليه ويحذره ويبعده عني
لان يدري بية راح اعند وما راح اعوفه
وهذا حال اخوك .. ما كادرة امي الا على ابوي

مسحت على وجهي بتعب وجاوبته .. انا اعتذر عن الي صار بيك كله بسببي واشكرك لان ما راح تبلغ عنهم
.. لا تخاف اخوك وصاحبك بأمان
وعالعموم اصلاً انا مهمتي وياك شارفت على الانتهاء
يعني بعد ما عندي شي يربطني بيك يعني بعد فترة اللقاء بينا
تنقطع
وبنفس الوقت اخوك وصاحبك راح يعتقدون ان خطتهم جابت نتيجة.

ومنا ورايح انت راح تلتهي وية ابو ذياب وشلته
وما بقى شي وتسافر وياهم

حالة التأهب والاستعداد كانت تسري بدمي
خوفي من الجاي كلما اجاله يكبر ويزيد

يوم ثاني رحت لمحل مهيمن وانا ناوي احجي وياه بخصوص الي صار واحط حد لتدخلاته هو وذاك عناد

بالليل ما كدرت احجي وياه لان الكل كانوا موجودين فشفت الاحسن اخلي كلامي وياه بعيد عن البيت هنا بالمحل احسن اكدر براحتي احجي

وصلت للمحل ودخلت سلمت عليه رد علية السلام بصورة طبيعية
جان كلش مشغول والمشكلة بالموضوع ان الاخ ولا مبين عليه مسوي شي ولا عبالك البارحة خاطفله واحد

كلتله .. مهيمن عندي كلام وياك اريد احجي
بعدني ما كملت كلامي
وجان يدك نقال مهيمن
ورد على المتصل كان المتصل صديقة ريم
اسمعه

.. اي نعم انا ابن عمها مهيمن كولي شبيها ريم

.. ما بيها شي بس اتخربطت بالكلية لازم تجي عليها تاخذها للمستشفى او ترسل احد

اباوع عليه نهض من مكانه بسرعة وجهه انگلب لونه
راح يركض مخبوص وانا رحت وراه

.. مهيمن انتظرني اخذني وياك شنو شبيها ريم

صعد بالسيارة وكال وهو معصب
.. هي من البارحة جانت مريضة

.. شنو هي جانت مريضة البارحة لعد ليش ما اخذتها للطبيب

اباوع عليه جاوبني متضايق
.. اي مريضة ونور وصتني اجيبلها دوى ونسيت اجيبلها لان جان عندي شغل

رفعت حاجبي وسألته .. وشنو هذا الشغل
.. جنت اصفي حسابي وية واحد ارعن
ما علقت على كلامه لان مو وكته افتح الموضوع وياه

سمعته يكول
استغفر الله ما اعرف ليش هاي البنية احس بيها
حيل روحها ترفة

..انا من سميتها باربي مو من عبث لان هي كلها على بعضها
برقتها ودلعها ونعومتها وت..،

قطع كلامي وزمخ بية معصب وكال .. انت هيييي سالمين
اشو نسيت روحك. وكعدت توصف بيها

جان يحجي من بين اسنانه
ابتسمت ورفعت ايدية بأستسلام وكلت
.. لا يابوي مو انا الي احط عيني على البنت الي اخوية رايدها

وصلنا للكلية وانا نزلت من السيارة وسبقت مهيمن
تركته يركن سيارته
واتجهت على البوابة وراويت هويتي للحرس وبلغتهم ان مهيمن وياية حتى يسمحوله بالدخول

بعدها اجة مهيمن واتصل على ريم وصديقتها وصفتلنا المكان
ورحنا عليه وهناك وجان نشوف الكارثة الباربية جايبة العيد وجاية

جانت مايلة راسها وساندته على كتف صديقتها
بس مو هنا المصيبة
المصيبة ست باربي جانت نازعة شالها وحطته على كتفها
والهوى يلعب بشعرها القصير

ما حسيت الا على مهيمن كام يرعد وتحولت معاني وجهه من الخوف والقلق الى الغضب المدوي
راح بأتجاها وانا وراه عرفت مهيمن راح يخرب الاول وتالي

.. اوكف لحظة مهيمن لا تتهور وتحجي اي شي
منا الناس

.. لا تخليني هسة اسب ابو الناس لابو الساعة الي عرفت بيها بنت عمك

ما انطاني مجال راح عليها وجرها من حضن صديقتها
ورفع شالها وحطه على راسها
وريم المتفاجئة بمداهمة مهيمن وحركته السريعة

وزمخ بيها
.. ولج غضب انتي شلون تتجرئين وتتفرعين كدام الناس
البوم الا احرك ابو اصلج واربيج من جديد

ما انطاها مجال ترد جانت من صدك كأنها لعابة باربي
سحبها وراه سحل بحيث كامت تتعثر وانا امشي وراه

.. مهيمن عيب الي كاعد تسوي
ريم بصوت تعبان والخدود حمر .. مهيمن شبيك تخبلت شنو هذا التصرف
كانت تمشي وراه بلاحول ولاقوة. وتحاول تخلص ايدها من قبضة ايده .. عوف ايدي ترة دتأذيني

جانت تحجيها بصوت بي بحة دلع مدري هي من الله هيج

دار وجهه عليها وكال
.. اششششش ولا كلمة خلي اوصل للبيت واعلمج الستر شلون يصير

حجت بصوت آمر .. مهيمن لا تتخبل ما اسمحلك تتجاوز حدودك وياي هد ايدي مو لازم تاخذني للطبيب
ميحتاج اني اروح

شوف هاي شتحجي الزلمة معطب راح يحترگ وباربي تتنعوص علينا
قطع طريقنا طالب من الكلية شكله النخوة جابته عدنا
سألنا .. الي كاعد تسوي غلط وتصرفك غير مقبول
انت قريبها للبنية

مهيمن اتقدم عليه والنية باينة من عيونه راح يبتلي بالمسكين ويطلع حرگته بي

بسرعة دخلت بينهم ووكفت كدام الشاب وجاوبته
.. احنا اولاد عمها يعني اهلها فلا تدخل نفسك بأمور عائلية خاصة
يالله حباب اتوكل روح كمل محاضراتك

مهيمن كمل على كلامي .. مو بس ابن عمها انا خطيبها
بالله شو جلال بعد من كدامي خلي اشوف الاستاذ على شنو معترض

دفعت مهيمن كدامي وكلت . مهيمن خلينا نمشي البنية راح توكع علينا شوفها شلون كوة تفتح عيونها

جاوبتني ريم وهي تكابر تدعي القوة .. اني ما بية شي ما احتاج ابن عمك ياخذني وكله خلي يعوف ايدي

هي جانت تحجي واحنا طلعنا من الكلية ووصلنا يم سيارة مهيمن
اباوع لريم رفعت راسها بعناد على مهيمن وكالت معترضة
.. انت مو خطيبي منو سمحلك تتصرف وياي هيج وتتجاوز حدودك

فتحلها الباب وحجة من بين اسنانه بغيض وكال بتحذير
.. راح احسبلج للثلاثة. اذا ما صعدتي للسيارة بهدوء راح اتصرف تصرف ما يعجبج

باوعتله بعناد ومبين من شكلها ما ناوية تجيب السالفة على بر
رحت يمها وكلت .. ريم اتعوذي من الشيطان وصعدي بالسيارة
وهناك من نوصل للبيت انا انطيج عود شخاط وحركي البيت على راسه

باوعت داير ما دايرها وكالت
.. راح اصعد بس مو علمود انا خايفة منك. لا راح اصعد لان ما اريد الفت انتباه
الطلاب ما اريد صورتي تهتز بعينهم واصير موضوع يحجون بي.

نور

جنا كاعدين واندك الجرس وراحت ام مهيمن تفتح الباب وما اشوف الا مهيمن ساحب ريم من ايدها ودفعها كدامه وكال

.. ولج شلون تنزعين حجابج بالكلية كدام الرايح والجاي

ريم وكفت كدامه وكالت .. ومنو گلك اني متحجبة.
ترة اني لبست الشال احتراماً الك كدام منطقتكم لان كل بناتهم محجبات بس اني ما مجبرة التزم بي.

اباوع لمهيمن .. غصب عنج تلبسينه
جاوبته بتمرد .. مو بكيفك هذا الشي راجعلي وانا الي اقرره
انت متكدر ولا عندك الحق تجبرني عليه

هد عليها وعيونه حمر وجلال وكف كدامه وكله
.. مهيمن الزم حدودك اذا ناوي على اذيتها احذرك تتعداني يالله توصلها

دفعه مهيمن من كدامه وكال .. ما تاكل تبن انت الثاني
مو انا الي يمد ايده على مرة. ويأذيها

بعد عن طريقي لا ابتلي بيك. وخليني اتفاهم وية هالغضب الاحمر الي الله بلاني بي

ريم .. لحظة مهيمن على شنو كل هذا الكلام روح راجع نفسك ترة انت مالك حق تتحكم بية
اني ما مجبورة ابقى استمع او اخضع لتهديداتك
ولا عبالك شفتني باقية هنا ومتحملة كلامك وتصرفاتك وياي
عبالك اني ضعيفة ومالي لا حول ولا قوة

.. ريم اتقي شري وحطي عقلج براسج
ترة انا هسة كل شياطين العالم متربعة براسي
لاتكعدين تغردين بلسانج علية لا ابتلي بيج
.. الشياطين دائما ضعيفة ومتخوف بس الانسان الخاطئ واني مو غلطانة

ام مهيمن كامت تحجي على ابنها وتسأل بجلال شنو الصاير وشنو الموضوع واني حالي من حالها هم ما فاهمة شي

جاوبها مهيمن وكللها على الصار وام مهيمن لطمت على صدرها وكالت .. عزة بعينج يزهرة. ولج خايبة شلون يهون عليج سترج وتنزعين شالج كدام العالم والله هاي ما مرجية منج

ريم باوعت عليها وكالت .. لحظة خالة انتوا شنو سالفتكم ليش متفاجئين ترة اني ما يوم من الايام وهمتكم عكس هذا الشي كلكم تعرفون بية اني ما محجبة ولا اصلي
وعلى فكرة خالة انتي فاهمة سالفة الستر غلط منو كلج اذا حطيت شال على راسي اني مستورة

هواي بنات وياي بالكلية حجابهن مضبوط بس سمعتهم زفت صفر
هنا راح يكون الستر البنية من تحافظ على اخلاقها وعفتها وسمعتها

اني ما اكره الحجاب بس اني بعدني ما مقتنعة بي واصلا حتى ما اعرف البسه. فانتوا لا تكعدون تحللون تصرفاتي وتعتبروني انسانه مو زينه وماعندي ستر ولا عفة بس لان اني مو محجبة منو انطاكم الحق تحكمون علية بهذا الشي

مهيمن عاط بيها .. ولج ريم بس كليلي انتي شنو سالفتج كل يوم
طالعتلي بسالفة تجلطيني بيها
انتبهي لروحج واتلاحگي لنفسج قبل لا انفجر بيج

فركت ايدي من يمي وطلبت من جلال يحجي وية مهيمن وياخذه برة لان كلش معصب وهاي ريم ما جاي تقتنع او بالاحرى هي وصلت وية مهيمن لحد الانفجار
وهي منا مريضة. يعني راح توصل الامور بينهم لمرحلة مابيها مجال تتصلح

انتبهت عليها اتقدمت على مهيمن ورفعت راسها وباوعت عليه بتحدي وكالت .. اسألك بالله انت ما سألت نفسك فد يوم
شنو الي يجبرني ويخليني ابقى هنا واتحمل كلامك وتصرفاتك
واسلوبك الجارح مكلت لروحك هاي البنية شعندها باقية هنا

اني راح اجاوبك تعرف ليش اني باقية هنا ومتحملة احاول اغير من نفسي
حتى اماشي وضعكم مع العلم اني مقتنعة بنفسي وبشخصيتي وماشايفة بيها شي غلط
لكن كلت ميخالف اتنازل عن بعض الامور
علمود ابقى اعيش وياكم بين عائلتكم امك واختك ونور وجلال وحبك الهم وحنانك وياهم

التماسك والالفة الي بينكم كل هاي الاسباب خلتني ابقى هنا اتمسك بيكم بالرغم
انت ما يوم حسستني بالانتماء الكم حتى من تحجي باهتمامك وية اخوانك دائماً تعزلني عنهم خارج قوس
صحيح انا اتحمل تبعية قراري ببقائي هنا يمك وية عائلتك بس مو معناها ما اكدر اطلع واسافر وابتعدعنك

لا مهيمن انت تعرف كلش زين اني املك الصلاحية على اتخاذ قراري وعندي الامكانية المادية الي تخولني اسافر

اذا شفت بوجودي يسببلك المشاكل والاحراج عادي كول
ترة اتصال واحد لعمة اسيا مجرد ما اقدملها عرض انطيها راتب كل شهر حتى اضمن بقائها يمي تجي طايرة

جانت ريم تحجي وترجف

كلمات ريم كانت مثل الصفعة لمهيمن
اني مجرد سماع كلام ريم گلبي انقبض ما جاي اتخيل فكرة ريم تسافر وتتركنا

مهيمن جاوبها ماله داعي هالكلام انتي صرتي مسؤليتي حالج من حال نور من يوم الي وكعت عيني عليج

ام مهيمن راحت يمها وكالت .. يمة هاي عين وصابتكم والله
خالة اتهدي بالرحمن. انتي مريضة

وكأنما ريم كانت محتاجة احد يذكرها بضعفها لزمت راسها وفقدت توازنها

رحت ركضت عليها وسندتها واخذتها لزمتها لكيت حرارتها
مرتفعة
كالت بصوت واهن .. حتى لو كنت تشبه عمو واحبك ما راح
اسمحلك تتجاوزني

مهيمن هدر بصوت غاضب وكال.. ولج غضب انا مو عمج وعمري ما راح اصير عمج افتهمي عاااااااد مو تعبت لخاطر الله

اقترب عليه جلال واخذ وطلع بي برة البيت

نور
رغم الصار بين ريم ومهيمن من مشاكل
كل هذا ما كدر ينسيني موضوع جلال
لان بعد الي سمعته صار لازم اكول لمهيمن لان الموضوع اكبر
من ابقى مكتفية اراقب جلال هذا الشي ما راح يحل اي شي

انتظرته يرجع للبيت
وخطية اول ما رجع انطاني علاج ريم
وسألني عليها كان يحجي بتعب
.. شلون صارت صحتها
.. بعدها الحرارة ما نزلت.
وخالة يمها جاي تهتم بيها

ما جاوبني
راح صعد فوك لغرفته حتى بدون ما يرد

واني انتظرت شوية وبعدها صعدت
وراه حتى احجيله
لكيته متمدد على فراشه. وذراعه على عيونه حتى ما مبدل ملابسه مهيمن صارله يومين ينام بالطابق الثاني لوحده

وجلال بقى بغرفة مهيمن لوحده
كل واحد بيهم انعزل عن الثاني من غير ما يحسون على بعضهم
دكيت الباب
بعد ذراعه عن عيونه
سألته .. اكدر احجي وياك قبل لا تنام
كعد بفراشه وعدل كعدته وكال

.. تعالي فوتي تصدكين من كد التفكير عقل ما باقي براسي
وصرت ما اجمع وناسي حتى روحي

كولي شنو ردتي تحجين

بقيت واكفة بمكاني وبلعت ريگي وكلتله
.. مهيمن اكتشفت شي يخص جلال
سألني بأهتمام وكال.. شنو شبي جلال
.. قبل فترة عثرت على جهاز جلال الخاص بالسيارات
طلع ما مبيوع ولا اي شي

اباوع لمهيمن نهض على حيله من فراشه وسألني متفاجيء
.. انتي شكاعد تحجين زين وسالفة السفر وشركة السيارات الي اتعاقد وياها

يتبع

اتمنى لكم قراءة ممتعة
اختكم نهى الحسون