قضية لم الشمل الفصل الثاني وستون 62 - بقلم نهى

#الكاتبة_نهى_الحسون
#قضية_الشمل

اسعد الله مساءكم احبتي المتابعين 🌹🌹🌹

مهيمن

منين اجيب الصبر ياناس وانا عايف اخوية بوسط الذيابة

امشي بالشارع مفزوع
عمري وحياتي ما خايف على بشر مثل خوفي على جلال

مر شهر من رجعت من الموصل
وطول هذا الشهر اتواصل وية الضابط علي وهو يطمني عن احوال جلال و تقدمه بالمهمة بس اشو قبل اسبوعين انقطعت اخبار جلال وباقين العناصر المزروعة هناك عنهم وماعاد يوصللهم اي خبر منهم

وانا صارلي اسبوعين احوم اعصابي تلفت من التفكير
عمري ما انسى نظرات الفزع بعيونه وهو يهربني
كان بعيونه كلام
بس الوقت ظالم ما ينتظر كان لازم سيفه وواكف فوك راسنا مثل الجلاد

قبل شوية اتصل علية الضابط علي وبلغني
بأخر الاخبار عن جلال

كال .. الدواعش لازمين واحد من عناصر الاستخبارات المزروعين هناك وما نعرف منو بيهم الي كدروا يكتشفونه داعش
ونفذوا بي حكم الاعدام

. لااا ياربي دخيلك لاتفجعني بأخوية

بعدنا ما لحگنا نتبادل احضان الخوة الحقيقية واحدنا يفتح صدره للثاني
واحد يسمع الثاني بثقة بدون ماتحوم براسنا الشكوك

احس بروحي فرت هاربة مني من كثر الرعب الي حسيت بي

جاوبت الضابط بصوت يهدر وكلت
.. انا لهنا وحدي والقلق ياكلني ، بعد ما ضل صبر عندي انا جاي للموصل
بعد مستحيل ابقى انتظر هنا وانا ما اعرف اخوي عايش لو ميت

اترجاكم تشوفولي مكان يمكم براحتكم تردوني
الزم واجب حراسات تردون تنزلوني حماية تردون
اروح اقاتل بالجبهات اي شي تردونه انا مستعد

اهم شي اجي لعندكم وابقى قريب يمكم واتطقس واسمع بأذني عن اخبار جلال
ماكو غير هذا الحل اسافر باسرع وقت للموصل
لان والله اذا ابقى هنا اطك واموت من التفكير بمصير اخوي

جنت احجي وانا افور من الغيض والقهر
رفعت راسي للسما. وبگلبي ادعيله ربي اعمي عيونهم عن جلال

انهيت الاتصال وية الضابط بعدما اتفق وياية انتظر منه اتصال
لترتيب اموري حتى انضم وياهم هناك بالموصل

رجعت للبيت والدنيا طالعة من عيني حسبة تجيبني وحسبة توديني
لكيت طالب ابن خالي واكف بالباب ينتظرني

بس شافني كال .. ما تكلي شنو سالفتك
صاير مثل كاسبر ما نشوفك الا بالصدفة شجاك حتى شغلك
ما عدت تشتغل مثل الاول. عايفه براسي

جاوبته محتار شجاوبه وانا سر اخوي ياكل بروحي جاوبته
.. تصدك لو اكلك ادية ما جاي تاخذ عالشغل وعقلي مدوهن
وفكري كله يم اخوي

.. والله حقك ومعذور بس ما يصر هيج الى متى تبقى عايف شغلك وما اعرف تروح وين ما وين

والله حتى عمتي زهرة احتاريت شجاوبها من تسألني عنك
ولك حجج العالم كلها خلصت بعد ما عندي كذبة اقنع بيها امك وأسد بمكانك من يسالوني
على الاقل گلي انت وين جاي تروح بهاي الايام

جاوبته .. خلي يصير الي ببالي عود بوكتها
انت راح تعرف او......

جنت احجي وية طالب بالباب وجان اشوف سجاد جاي يتمشى بالشارع بدون ما ينتبه علية قطعت كلامي وية طالب
ورحت على العار استغليت غفلته

والله متحلف بي حلفة كون اخلي يمشي ويتلفت على سوايته بغيابي وية اهل بيتي هديت عليه. ولزمته من ياخته من الخلف دار علية متفاجيء بوجودي

.. دتعااااال غير اجيت بوكتك والله جابك خليني اطلع ضيم كلبي بيك
وين ولك تريد تختل مني لو تروح بأخر الدنيا لا بد ويجي يوم وتوكع بين ادية
عبالك راح انسى سوايتك لو اعديها الك

طالب اجة علية ولزم ايدي يريد يخلصه من جوة ايدي
.. مهيمن صلي على النبي
عوفه ابوية طيحلك حظه وبنت عمك ما قصرت وياه مسحت بي الكاع كلش كافي عليه الاهانة ووكفته كدام الناس وخلته يعتذرلها

ما انطيت مجال لطالب يكمل كلامه
.. كل هذا الي صار بي وگلبي ما فايخ بعدني احس بنار تشتعل بي

انطيته لطمة على وجهه وكلتله
.. ولك. انت كلك خلك مرة شلون تتجرأ وتتعدى على اهل بيتي بغيابي وتغلط على تاج راسك اختي وبنت عمي

سجاد.. اوكف مهيمن بس انطيني فرصة افهمك
والله انا عصبت عليهن من باب الحرص جنت خايف على حور

زمخت بي .. تاكل تبن اياني وياك تجيب سيرة اختي على السانك والله افنيك واخلي ذكرك على كل السان يرافقه لعنة

نهيت كلامي بضربة على حلكة
اتكوم بالكاع مثل الحضينة
اجة مؤمل وية طالب وخلصوا سجاد مني وانا بعدني احس بگلبي
بعده ماطفت ناره

فرغت كل قهري بي
اخذوا سجاد دفع لبيتهم اخذوا من كدامي اسمعه يكللهم بس خلوني احجي وياه وافهمه
صحت بصوت عالي حتى يسمعني

.. دير بالك تخليني اشوف ركعة وجهك والله اخربط جهرتك الزفرة

نور

كاعدة بالبيت ريم غيرتلي الشريحة حتى خالتي ما تتصل علية
بس نسيت انا بعدني مفعلة الواتس اب على الشريحة القديمة

اسيل صديقتي دائماً. تراسلني بالواتساب وكم وحدة من صديقاتي القديمات ورغد هم تراسلني بين فترة وفترة عليه
انطيتهم رقمي الجديد

خالتي كامت تدخل عالواتساب وتراسلني
وبعدها غيرت حتى رقم الوتساب بس
فاجئتني اسيل من اتصلت علية اليوم وتگولي خالتج اتصلت علية
تتوسل وطلبت مني احجي وياج حتى اقنعج ترجعين تصرفين لهم راتبهم الشهري

جاوبت اسيل .. حبيبتي اسيل خالتي ما كلتلج انا ليش قطعت الراتب الشهري عليهم

جاوبتني.. لا والله ما كالت ليش
بس كسرت خاطري وهي تبجي مبين عليها بأمس الحاجة لهاي الفلوس

.. لعد ليش ما سوت حساب بيوم اجتي واتهجمت على بيت اخوية وكعدت تتهم اخواني بالباطل

صرت اسولف
لأسيل عن كل الي سوته خالتي بية هي وزوجها صابر من اجوي للبصرة

اسيل جاوبتني .. عزة بعينهم والله الهم عين ويطالبون بيج هذولي من كل عقلهم يحجون

.. لج اسيل مو بس هيج واستغلوا حالتي ووضعي الضعيف واتهموا اهل مهيمن بحالتي النفسية

وانا تعرفين ب حالتي كله من ورة صابر
.. اي ادري بيج والله
بعدني كنت جاي احجي وية اسيل

وجان اسمع صوت مهيمن المعصب
وخالة زهرة تهدي بي

اترخصت من اسيل وسديت النقال ورحت عليهم
اريد اعرف شصاير رحت لكيتهم بالهول

خالة زهرة لازمة مهيمن .. يمة عيب من خوالك انا مو فهمتك وكلتلك يمة. خوالك طيحوا حضه وبنت عمك واختك اخذن حقهن وزيادة

مهيمن جاوبها .. انعم الله على ريم بيوم ساگت عليه وما عبرتها وخلتها تمر بدون ماتاخذ حقها وحق حور لان لو يبقى الموضوع عليج وعلى اختي جان بلعتيها وسكتي
وهذا الخنيث يبقى يستسبع عليكم

امه جاوبته .. عفو عليك شنو يمة شنو شايفني قليلة شر لو
مدمغة وما عندي السان واسكتله

جاوبها.. لايمة ادري بيج مو فقيرة. بس اعرفج كلش زين
تدورين خواطر وهواية تسوين حساب لخالي ابو سجاد
حتى ما تخربين العلاقة وية اخوج حقج ما الومج هذا اخوج وتتنازلين له
بس انا ما مجبور اسويلهم حساب

الما يحترمني ويحترم اهل بيتي ويتجاوز عليهم وانا غايب
احطة جوى حذائي بدون ما يرفلي جفن في غض النظر منو الي يكون

اذا هذا الخنيث ابن خالي الي مني وبية هيج يسوي
يعني بعد ليش اعتب على خالتها لنور ورجلها الاعوج بيوم اتهجموا عليكم بالبيت

تدرين يمة شصار بية من رجعت وسمعت بالصار بيكم بخلافي
حسيت مثل الي فرهدوا حلاله احس بروحي مغدور

والله ما اسامحهم ولا اعديها الهم وكلبي راح يبقى محمل عليهم
طول ما انا عايش

غمضت عيوني مقهورة على حال مهيمن
احس بي يحجي معترض مثل المغبون على الي صار بينا من بعده
انسحبت من يمهم من غير ما يحسون علية

ريم

استغليت خروج خالتي ونور للسوك ونوم حور
وصعدت فوك حتى اجيب جنطي الي خازنتهم فوك بالطابق الثاني
رحت بهدوء اريد اجهز اغراضي من غير ما الفت انتباه احد خصوصاً نور

لان ادري بيها اذا عرفت بسالفة سفري ما راح تتركني بحال سبيلي
وانا هم يالله لازم اجهز جنطي فكلت اجهزهم بهدوء ومن يحين موعد السفرو بوقتها راح اخبر نور
ما يكون كدامها وقت او مجال تحاول وياي اغير رأيي

لذلك البارحة
من شفت مهيمن رجع للبيت وهو معصب نار لان متعارك وية سجاد عرفت بلحظتها مهيمن رجع لوضعه الطبيعي وبدأ يستقر بحياته. كنت منتظرة اموره تتحسن ويستقر وبعدها ابلش بأجراء السفر

اتصلت على عمو ابو سيف
وشرحتله الموضوع كان عنده علم برجوع مهيمن بالسلامة

ما كال شي غير بس كلمة تعبر عن اسفه
.. حرامات كنت اتمنى تحققين وصية المرحوم عمج وتبقون كلكم سوية بس الظاهر القدر دائما له الكلمة الاخيرة

بعدها اتفقت وياه على ترتيب اموري من مستندات واوراق نقل
وكلي يحتاج كم يوم الى ان اخلص كل هاي المتعلقات الخاصة بكليتج وحصتج وغيرها من الامور
لذلك انا قررت ارتب شغلاتي من هسة لان عندي كومة غراض يحتاجلها كعدة

جنت احاول افكر بأي شي حتى لو كان بسيط اهم شي
يكون يشغلني عن التفكير بمهيمن وبسفري

كان المخزن بي هواي غراض تخص البيت ومن ضمنها جنطي الي حطوها هنا صرت اتوغل بين الاغراض واسحب منا واجر منا

وجان الكة مجموعة الجنط الخاصة بية
جانوا البنات مسفطاتهم على شكل برج وحدة فوك الثانية

تذكرت جلال يوم وصلت وية جنطي كان يضحك ويكول عليهم قطار
ونرسمت ابتسامة حزن عريضة على وجهي

شفت على الجنط حاولت اصير شاطرة ورحت سحبت خامس وحدة
كلت اسحب من النص وحدة وحدة حتى ما يوكعون

بعدني ما لحكت اسحب وما اشوف الا مجموعة الجنط واكعة فوك راسي
الحمدلله كانت فارغة بس وحدة منهم ضربتني بكصتي

احس راسي كام يفتر والدنية ظلمت بعيني ونفسي انكتم من ورة تل الجنط الي وكع على علية وبعد ما اعرف وراها شصار بالضبط
بس كل الي حسيت عليه بعدين اني متمدد على ظهري بين الجنط

وايدين خشنة تضرب على خدي حتى توعيني وماي ينرش على وجهي مغرك ملابسي عبالك مطلعيني غركانة من المسبح
فتحت عيوني وجان اشوف وجه مهيمن كلش قريب على وجهي
علامات القلق مرسومة على وجهه ولازم بيده طاسة ماي

انيت بصوت واهن .. ااااي راسي
سألني.. شنو جنتي تسوين بالمخزن مثل الحرامية ؟؟
جاوبته واني اتحسس راسي .. جنت ادور على جنط.......

جنت احجي واني اتلمس براسي
حسيت اكو ورمة بكصتي
قطعت كلامي وشهكت بخوف .. هاااااي شنو
انتقلت نظراته لكصتي وكال .. هاي طلعتلج عنجورة الظاهر الجنطة واكعة على كصتج

سألته مرعوبة واني بعدني متمدد على ظهري .. ششنو عنجورة لا عفية لاتكولها يعني وجهي تشوه وراح يطلعلي كرون

ابتسم ورجعت عيونه تعاين اوجهي يتمعن بتفاصيله
جاوبني .. لاتخافين حلوة اصلاً صرتي جنج غزالة صغيرة وجاي ينمو گرنها

رمشت بعيوني مستغربة كلامه هسة هذا شنو اعتبره ذم لو اطراء

رفع ايده يتلمسه وسألني .. تأذيج ؟؟
هزيت راسي بدون صوت (اي )

انتهبت لوضعنا كنا كلش متقاربين من بعضنا
وعيونه كانت
تسرح وتمرح على معاني وجهي عبالك يريد يرسم لوحة

ما اعرف ليش گلبي
نسى يخفق بصورة صحيحة وضاع عليه انتظام نبضاته

سألني .. تحتاجين اخذج لدكتور
انتبهت عليه يحجي وياي بصوت هامس

باوعت منا ومنا وسألته بنفس مستوى صوته الهامس اقلده

.. انت ليش دتحجي وياي بصوت ماصي وتهمسلي عبالك بلحظة حميمية

انا كلت هيج وما اشوف الا مهيمن طفر من مكانه منتبه على روحه
ووكعت علية طاسة الماي البارد وشهكت متفاجئة

وهو يلعن .. الله يلعن بليسج شنو من السان عندج

الماي وكع علية عدلت كعدتي وكبل رفعت مقدمة بجامتي من على صدري بصورة تلقائية والي لطشت علية لان تبللت
وشفته هو انتبه على حركة ايدي وظل صافن على المكان واني حسيت بالاحراج
صحت بي

..هيييي لك هاي شسويت سبحتني

نهضت من مكاني دايخة واتعثرت بخطواتي
هو گبل سندني
وجاوبني .. حمدي ربج وشكري ما شمرتج من فوك من ورة السانج المزروف

جاوبته .. لسان مزروف احسن من عقل شاطح

.. شنو قصدج بكلمة شاطح
ليش مو انتي الي كلتي لحظة حميمية بالله رحمة لاهلج ما ترجمين شنو معناها بقاموسج

زاد توتري من قربه علية وسؤاله دفعته من صدره وانا ابتعد عنه
رفعت حاجبي .. ترة واضحة ميحتاجلها علم

تركته ورحت اخذتلي جنطتين كانوا فارغات اما البقية منضودات بالغراض والحمد لله
هو ظل واكف بمكانه بالمخزن

ونزلت بيهم جوة
اتفحص البيت هدوء شكلها حور بعدها نايمة دخلت للغرفة وبلشت
اصفط بغراضي
واني عقلي راح يم مهيمن
طول هاي الفترة الفاتت كنت اراقب تصرفات مهيمن
كان موجود يمنا جسد بلا روح

انتبهت عليه بأخر ايام
صار ما يتواجد بالبيت ويرجع بنهاية اليوم كانت تصرفاته كلش غامضة ما اعرف بشنو يفكر وشنو ناوي يسوي ولا اريد اعرف اهم شي عندي هو سالم وما بي شي

اما حياته خططه مستقبله اني مالي دخل بيهم
ولا اريد افكر بي

كنت كلما التقي بي بالصدفة تتلاكة عيوني بعيونه
الاحظ بعيونه كلام احس بي يريد يتقرب لي
ويحجي وياية بس اكو حاجز يمنعه يقترب مني

كنت اصفط بملابسي بالجنطة

ودخلت نور للغرفة واول ما دخلت باوعت
لجنطتي ولغراضي وسألتني وهي مصدومة

.. ريم هاي شنًو جاي تحضرين جنطتج لاتكولين قررتي تسافرين

جاوبتها .. اي نعم صار لازم اسافر هاي هي مهيمن ورجع بالسلامةً وان شاء الله جلال لاحگه ويرجعلكم بعد ماعندي عذر لبقائي هنا

.. لج ريم شلون نهون عليج تعوفينا وتسافرين

.. عفية نور لا تحجين هيج وتكملين علية ترة انا كوة لازمة نفسي
من غير كل شي گلبي خلصان
وشايلة هم لفراكم كلش صعبة علية اعوفكم واروح
ما اعرف شلون راح اكدر اتعود على حياتي بدونكم

.. ريم انتي اذا تحبينا مامجبورة تسافرين

.. للاسف مهيمن ما بقالي سبب حتى اتمسك بي وابقى
حرگ كل الجسور بيني وبينكم
وماخلى خط رجعة صدمني بفكرته الي ماخذها عني
ترة صعبة واحد يجيج ويكولج لاتسممين افكار اختي بسوالفج الي جايبتهن من الخارج
يعني بين قوسين لاتخربين اخلاق اختي باخلاقج التعسة

.. بكل ضني وقوع مهيمن بيد داعش خلاج تتراجعين بقرار السفر
وتبقين يمنا

.. لا نور ما كو شي اتغير بس كل ما بالموضوع ان مسألة سفري تأجلت مو انلغت
وهسة بعدما مهيمن رجع بالسلامة واستقرت اموره
بعد وجودي هنا صار ماله داعي

ولا تنسين ترة انا لو لا الصار بجلال ومهيمن
جان هسة انا مسافرة للخارج ومستقرة بشقة صغيرة لوحدي وية اسيا

اباوع لنور كامت تحوم فوك راسي احتارت شلون تقنعني اغير رأيي

.. زين انتي مو تكولين احب مهيمن
يعني معقولة هذا الحب الموجود بكلبج ما يشفعله ويخليج تسامحينه على كلام كاله بلحظة غضب
ترة الواحد منا بساعة العصبية كل شي يبدر منه

.. انا صحيح احبه واعرف اليحب لازم يسامح محبوبه
بس للاسف اخوج اصلا طلع ما معترف بحبي اله
ويتصوره مجرد حب ابوي بسبب شبهه بعمو مؤيد

اوك ما اكذب انا صحيح احبه
لان يشبه عمو حبيت حرصه علية حبيت الامان الي يحيطني بي
مثل عمو

بس رجفة گلبي ولهفتي لقربه ووكلبي الي ينتفض من بمر طاريه. كل هاي الامور بعيدة كل البعد عن حٍٍِْــًبٌٍـــِٓېٍٓ لعمو مؤيد

حٍٍِْــًبٌٍـــِٓېٍٓ اله لهفة بعشگ ماله علاقة بحب عمو

بس مع الاسف مهيمن استهان بحبي واستخدمه ضدي
ترة الحب يصبح مكروه اذا صار. بي مذلة واهانة للحبيب
اكثر من هيج بعد ما اكدر اتنازل

كنت احجي وكلبي ينعصر الف مرة وانا اشوف دموع نور الي نزلت بقلة حيلة
وبعدما عجزت تغيري رأيي
اقتربت مني وحضتني وكالت بمحاولة اخيرة

.. ريم تتذكرين مرة من كلتيلي
وعدت عمو حتى اسعى بلم شمل اولاده واقربهم لبعضهم

.. اي صحيح قطعت وعد بس ...

قاطعت كلامي وكالت
.. لعد وينه وعدج ليش بسرعة تردين تتخلين عنا
وتعلنين الانسحاب من اول هبت ريح

غمضت عيوني متهربة من الاجابة وكفت عاجزة كدام سؤالها
دموعي لالت بعيوني وجاوبتها وانا ادور بعيد عنها

.. تكدرين تكولين وعدي جان امنية اتمنيت احققها
بس مع الاسف ليس كلما يتمنى المرء يدركه

اترجاج نور لو تحبيني كوليلي روحي لان هالشي من مصلحة مهيمن ومصلحتي
خلي هو يتحرر ويرتاح من مسؤولية ريم
وانا بنفس الوقت اتعلم اشوف حياتي بنفسي ولوحدي

كانت الكلمات جافة وهي تطلع من بين شفايفي
ليش هي اكو حياة بدونهم

مهيمن

اتصل علية خالي حسن وطلب مني احضر بالديوان يمه
الظاهر مجتمعين هو وخوالي اكيد السالفة بيها خالي ابو سجاد وابنه العار

وانا بالطريق
جنت رايح مشي ما اخذت سيارتي لان مضيف خالي حسن يصير بنفس بيته عازل من بيته مساحة ومسوي بيها ديوان خاص بس لكعدات العشاير والفصول ومرات يجتمعون الشيوخ عنده

دك نقالي وكان المتصل حيدر صديقي
رديت عليه .. الو هلا حيدر گواك الله
.. گوى الله حيلك
بعدها فاجئني بسؤاله .. اكلك مهيمن صاحبك المخبل يمك ؟؟؟

جاوبته مستغرب.. منو قصدك على عناد؟؟
جاوبني بستعجال .. اي هو عناد ماكو غيره مخبل بالعشيرة
.. شنو شبي عناد ؟؟

.. مثل الثور الهايج اتعارك وية امي وابوية لان يردون يزوجونه
بنت خالي وهو معند وراكب راسه ما يريد يتزوج
بعد انت تعرف بصاحبك من عهد وفاة كرار اخوي الله يرحمه
وهو رافض شي اسمه زواج عبالك يعاقب روحه
وامي وابوي صار شغلهم الشاغل يردون يزوجونه
ويفرحون بي

كلام حيدر حسسني بالذنب اتجاه عناد واهله
مااعرف ليش حسيت احنا السبب ورة تأخير قسمة عناد
لان الاستاذ حظه العاثر اول ما راد يتزوج وكع اختياره على اختنا

طلب ايدها من عدنا مرتين
بالاولى انا عرضتله ورفضته خليته يدعم
وبالمرة الثانية جلال رفضه و طفشه وخلى الرجال
يكره شي اسمه زواج

عمي حقه طلعت روحه وصارت بي خوفة من سالفة الزواج
ماكو رجال يقبلها على نفسه مرتين ينرفض من نفس البنية

ونوب خطية اهله عبالهم متعقد ما يريد يتزوج بسبب وفاة اخوه

جليت صوتي وجاوبت .. انطوه مجال لاتضغطون عليه هسة هو وين الاستاذ ؟؟

جاوبني حيدر .. ما اعرف وينه هو انا ليش اتصلت عليك وسألتك عنه
لان من اتعارك وية الاهل اخذ غراضه وهويته وطلع من البيت معصب

وهسة احنا صارلنة ست ساعات نتصل على نقاله ما يرد علينا
كلت اكيد هسة الكاه يمك او اعرف اخباره منك

.. لا والله ما اجاني ولا اتصل علية اليوم كله
وهاي مو من عوايده يخلص اليوم وما يجي يمي

.. بالله رحمة على اهلك ما تتصل عليه وتشوفه النا وين ولى
لان حضرته ما يرد علية

.. هسة اتصل واشوفه وين راح

انهيت المكالمة من حيدر وطلعت رقم عناد بالنقال

وصرت اتصل عليه وما رد مرة مرتين بالاخير
اجاني صوته يكطع الشبكة
كلمة اسمعها وعشر لا

.. الو عناد تسمعني
.. اي .. اي. اسمعك
.. متكولي انت وين يا اخي اهلك حاركين الدنيا عليك

جاوبني .. خلهم هم دومهم حارگين الدنيا على عناد
.. گلي انت وين. خلي اطمنهم

جاوبني .. مهيمن انا بالطريق مسافر للموصل

جمدت بمكاني مفزوع .. ولك عنيد خايب صدك تحجي لو تجذب

.. اي والله هسة انا بالطريق اوصل شاحنة مجهزة بالمساعدات
هناك للموصل وجاي امشي وية رتل شاحنات وكم سيارة عسكرية
للحماية والله الحافظ جان يحجيها بكل بساطة

هزيت راسي وابتسمت وكلتله.. والله العظيم احلف عليك انت مخبل تجي وتذب روحك بالنار بدون مقدمات
عايف امك كلبها عليك مثل النار

جاوبني.. يا اخي اذا بقت السالفة ورة امي تاليتي تلكاني كاعد بالبيت الف كبة وياها

خليها ترتاح هي والحجي ماعندهم سالفة غير عناد شوكت يتزوج
والله كون تسمعهم من يحجون عن معاناتهم وية زواجي
يحسسونك كأن قضايا العالم متوقفة كلها على زواج عناد

ابوي اكله سكرك لا تاكل حلى مو زين عليك
يكلي سكري كله من وراك انت الي ترفع السكر عندي مو الحلى

امي اكوللها خففي شوية وزنج. السمن مو زين عليج
تكولي كله من وراك ومن ورة قهرك
تعرفني من انقهر واضوج اظل اكل ومن هيج سمنت

مسويني حايط انصيص
اتخيل ابن حيدر استلم النتيجة وطلع راسب
اشو الكل داروا علية وصاحوا كله من وراك الولد
رسب لو متزوج وملتهي وية مريتك
جان ماكعدت وية ابن اخوك تلعب وياه بلي ومسويله واهس على اللعب ويعوف دراسته
بالله هاي شحطلها وتطيب

.. والله حاس بيك عندي من هذا النموذج
بس اخذها بالعيني والاغاني

.. خاب شوف مهيمن شيحجي
ولك هاي امي مو ياهو الجان انت شايف امي من تسوي علية صولة الفرسان بنص البيت وتشحن ابوية

والله متأكد من تسمعها راح تكول حرامات هاي المرية مكانها بهذا البيت المفروض يحطوها عضو بارز بمجلس النواب

وروح المرحوم ما اطلع عناد وابن ابوية
اذا مو يوم ثاني تلكاها معزلة المجلس بليلة ظلمة وتخلي طشارهم ماله والي

..الله يحفظها الك بس سفرك للموصل مو حل لمشاكلك هذا عقاب لامك ولابوك تريد تروح للموت

جر حسرة وكال .. مهيمن كلي شلون ما اروح بطريق الموت
وانا كل يوم اشوف بعيون امي وابوية نظرات عتاب ولوم غير منطوق ما يكدرون يحجونه كدامي
انا متأكد بينهم وبين نفسهم يحملوني مسؤولية موت كرار

واليوم امي زل السانها وحجت بهفوة وكالت
.. مو كافي انت اخوك الصغير راحت فرحتنا بي
ليش تبخل علينا نفرح بزواجك

تعرف مهيمن شصار بية من سمعت هذا الكلام
اتمنيت كون انا بمكان كرار ميت بذيج اللحظة ولا سامع منها هاي الحجاية احس گلبي ينزف مثل مطعون بخنجر

خليني اروح للموصل هناك بلكي تلوحني طلقة الرحمة وارتاح من عذاب الضمير اصعب مرض يوكع بي البشر هو عذاب الضمير
مرض يشبه السرطان اثاره الندم بس ماله علاج ولاعقار يشفي

جان عناد يحجي معاناته وضيمه

.. الله يساعدك وحقك بس على الاقل رد على اتصالاتهم

.. ما رديت عليهم جنت محتاج ابتعد عنهم ما اريد ارد على اتصالاتهم خاف اسمعهم كلام يخشن خاطرهم وانا اعرف روحي
لساني دومه يسبقني

.. شلون حجي هذا بابا ما يصير لازم تنطي علم لاهلك

.. اكيد انطيهم خبر بس كلت من اوصل للموصل اتصل عليهم واطمنهم حتى احطهم امام الامر الواقع وما يعارضون على سفرتي

.. ولك انت شلون بيك يعني تبقى هيج راسك يابس شورك من راسك
انا منا عقلي مشغول بجلال تجي انت تزيدها بسوالفك والله
عقلي من وراكم راح يطلب لجوء ويهج مني

.. لاتخاف علية ما يصير بية شي انت سامعلك بشر يموت مرتين

گلبي انمرد عليه هذا عناد اذا هاج بي الحنين لاخو يكعد يلوم بروحه
.. بالله شو بلا حجي ماصخ طلعت اضرب من امي هي هم هواي تنعي حظها مثلك

غيرت الكلام واتفقنا من يوصل للموصل ينطيني علم

انهيت المكالمة وانتبهت لروحي بعدني واكف بالشارع
والله ياعناد كلمن ضيمه شكل
هذا يحس بالندم لان خسر اخوه
وانا الندم ياكل بروحي خايف لا اخسر اخوي بسبب استهانتي بي

دك نقالي وجان المتصل طالب ابن خالي يسألني
.. يا اخي وين صرت اشو اتأخرت عمامي وابوي ينتظرونك

.. هذا انا اجيت يمكم بالباب

دخلت عليهم بالديوان وسلمت ولكيت خوالي واولادهم كلهم موجودين. حتى سجاد وابو موجودين

رحت كعدت يم خالي حسن
صحت الله بالخير
ردوا .. الله بالخير وهلة
باوع علية خالي وربت على رجلي وكال

.. شنو هذا الخبر الي سمعناه
.. وشنو هو الي سمعتوه ؟؟

.. سمعنا ناوي تسافر للموصل هناك شنو الموضوع
.. ماكو موضوع يعني كل امة محمد اتطوعوا وراحوا يحاربون بالموصل

وانت اثنين من ولدك منتصر ومنتظر اتطوعوا قبل شهرين ومنتظرين يردون يسافرون

.. افتهم بس انت سالفتك تختلف ما تكدر تتطوع
.. ليش بوية شناقصني ايد رجل

.. لا بس انت ما عندك احد يخلفك بأهل بيتك من بعدك
بس ولدي اتطوعوا عندهم من يلزم البيت من وراهم انا وطالب
ومؤمل ماجد

باوعتله بتفكير وجاوبته
.. الله موجود ما يترك عبده
انا عايفهم برعاية الله

خالي جاوبني .. والنعم بالله بس يابعد خالك هذا مو حجي
ربك انطاك عقل حتى تعرف تتصرف بي

انا اعرف خالي حسن وين يريد يوصل بهاي اسألته
وانا بقيت مصر اجاريه

.. شبيدي عليهم هذا حظهم وهاي قسمتهم
خالي جاوبني وكال
.. لا بيدك عليهم ما دامك انت هيج معند وراكب راسك ومصمم الا تسافر
للموصل
زين شنو رأيك تزوج اختك حور لسجاد ابن خالك وهو ميت حتى يتزوجها واليوم اجاني هو وابوه وطلبوها مني ووكعوا بركبتي حتى احجي وياك بسالفة حور

هم انت تأمن على اهل بيتك وهم هو ابن خالك اولى من الغريب وعينه عليهم ويدير باله على البيت مو احسن ما تصير مثل سالفة اختك نور بيوم اجة هذا الملعون رجل
خالتها وخالتها يردون ياخذونها علمود حلالها وهي البنية لا حول ولا قوة ما لكت احد يشفعلها غيرنا احنا وصاحبك الله يرضى عليه

كمل كلامه وهو يباوع علية بأهتمام
.. هَـا هسة شنو كلت موافق حتى نقراً الفاتحة

جاوبت خالي وانا رافع راسي بكل فخر وكلتله بصوت عالي اريد الكل يسمعني من احجي
.. خالي انا اعذرني يعز علية ارد طلبك
بس اختي حور مخطوبة

عقد حواجبه مستغرب وسجاد كمز من مكانه وسألني
.. المن مخطوبة وشوكت انخطبت اشو محد عنده علم بهاي السالفة

عاينت لسجاد بكل برود وكلت .. حور مخطوبة لاخوية جلال قربان.

خالي كلي .. معقولة انت مهيمن تكول هيج حجي شلون انطاك گلبك تفرط بأختك لهيج واحد عار على الزلم

.. ما اسمح لاي واحد يجيب طاري اخوي بالشينة
ما دامه هو ما موجود يدافع عن نفسه اذن محد اله حق يكعد يتفلسف

جنت احجي وكوة لازم روحي لا احجي بسر اخوية
وساعتها عرفت شلون جان شعور جلال بيوم كلنا درنا عليه وصرنا ضده وندينه بأفعاله

انا هسة مجرد سمع وانا اعرف بأخوية بطل
اتمنيت اكوم اخنك سجاد وادوسه جوى رجلية

بس ما علينا لا بد ويجي اليوم ويظهر ضوة الحق

سجاد نطت عيونه وصاح
.. تريد تزوج اختك. لواحد زايعته الدنيا ويشتغل وية الدواعش. صدك انت مخبل مو عاقل

عاد انا هنا رايدها من الله على الله
هديت عليه وزنكته .. خاب دتعال ماكو واحد زايعته الدنيا مثلك

يتبع

احداث البارت القادم

نور
گلبي انتفض وعيوني راحت على مهيمن متفاجئة من سؤاله
مهيمن .. هَـا هسة شنو رأيج اي لو لا

اتمنى لكم قراءة ممتعة
اختكم نهى الحسون