قضية لم الشمل الفصل الحادي وستون 61 - بقلم نهى

#الكاتبة_نهى_الحسون
#قضية_الشمل

مساء الانوار والسرور عليكم 🌹🌹🌹

ريم

سجاد كان يغلط وانا ابجي واصرخ لحد ما لميت الناس وام مهيمن ونور الكل اجوي يركضون على صياحي وغلط سجاد

ام مهيمن .. ولج خالة ريمة شبيج تصرخين كولي شنو الصار ؟؟

رحت عليها وانا ابجي .. اهيء خالة ما اعرف شبي هذا المتوحش اشو نزلنا انا وحور من السيارة واجة اتهجم علية ويغلط ويسب على بابا ويكلي الدايحة الصايعة

ونوب فوك هذا الغلط
هد علية ونتر ايدي وانضربت بالباب هاج شوفي
شوفتها معصم ايدي الاحمر

وعلى اثر الصياح اجة ابوه يهوس ولحكه ورة خمس دقايق خال مهيمن حسن ابو مؤمل
صاح بينا كلنا
.. شنو هذا الصياح ترة عيب وكفتكم بالباب بالله شو بلاحجي زايد. فوتوا دخلوا جوة بالبيت وهناك نتفاهم مو كدام الناس

ام مهيمن سمعت كلام اخوها. واجتي تدخل جوة هي وحور
بس انا ما سكتت

.. لا عمو ليش تطلب مني اسكت وادخل جوة. للبيت
يعني فوك ما ابن اخوك اتهجم علية وسبني وسب اهلي بدون اي سبب وتريدني اسكت على سوايته وادخل هيج بكل سهولة جوة للبيت

جاوبني متضايق .. عيب عمو انتي بنية وما يصير صوتكم يطلع بالشارع
انا خوفاً عليكم كلتلج هيج

.. يعني من ابن اخوك اتهجم علية وعلّى صوته وسب وغلط بالشارع اشو ما سوى حساب للعيب والبنية.
ليش من صار الحق الي وردت احجي ادافع عن نفسي كلتوا بنية وعيب يطلع صوتج

ام مهيمن .. يمة ريم استهدي بالرحمن اخوي حسن حتى ما يعرف شنو الموضوع وعيب نخليه يوكف بالشارع

اخوها كمل على كلامها وكال
.. عمو فوتي دخلي للبيت وحقج علية انا اطيح حظه

سجاد ابتسم بأستهزاء وهز ايده كان مستهان بية
همس بصوت ناصي.. مو عشم ابليس بالجنة اعتذرلها

باوعت لأبو مؤمل وكلتله
.. لا عمو اعذرني انا مستحيل اتنازل لسجاد وادخل للبيت هيج بكل سهولة وكأن شيئاً لم يكن

مثلما ابن اخوك ما سوى حساب ولا خلة تقدير لحرمتنا واتعدى علية وغلط وسبني بالشارع كدام الناس

انا هم ما ما اتحرك منا ولا ادخل للبيت قبل ما واحد منكم
يحكم بيني وبينه وياخذلي حقي منه وبشرط بالشارع وكدام الناس كلها

ابو سجاد زمخ بية .. ولج انتي مو بنية نسرة ما يكسر عينج شي
سجاد .. بوية خليني اهد عليها واسكتها

حسن نتر بي وكله .. انت اسكت ما اريد اسمعلك ولا كلمة

اجوي طالب ومؤمل يسألون عن الموضوع هسة يالله سمعوا بالصار

خالة زهرة حاولت وياي هي ونور حتى يخلوني ادخل للبيت وهناك جوة ينحل الموضوع

بس انا عندت ويبست راسي ودكيت رجلي بأرضي وكلت

.. والله ما اتحرك منا الا عمو حسن يحكم بيني وبين ابن اخوه وياخذلي حقي. لو لان ما عندنا رجال بالبيت يدافع عنا
هيج سجاد يغلط بحقي ويذلني كدام الناس والله العظيم لو مهيمن وجلال موجودين جان حرموا عليه يمشي على رجليه وكصوا لسانه

طالب ومؤمل كالوا.. ما عاش الي يذلكم احنا موجودين احنا مثل اخوانج
ابو مؤمل باوعلي بنظرة تقدير وكال
.. ما طلبتي غير حقج بس غير بالاول نعرف شنو الموضوع

حور حجتلهم السالفة كلها.
ومن وصلت لفقرة ضرب ايدي انا كملت عنها
وكلت .. هاك عمو شوف شلون فصخ ايدي

سجاد صاح .. والله العظيم جذابة تتبلى علية

كلتله .. يعني تنكر كلامك وياي مو انت الي كلت علية صايعة ودايحة وسبيت بابا الله يرحمه

جاوبني بدون ما يحس على نفسه .. اي صحيح سبيت وغلطت بس ما ضربتج

طالب هد عليه وزنگه من ياخته وكله
.. ياقليل الغيرة والناموس ولك انت صدك خنيث روح البسلك عباية واكعد بين النساوين احسنلك على هاي السواية

ابو مؤمل صاح بيهم .. طالب بوية عوف ابن عمك هذا حسابه يمي بعدين

التفت علية وكال .. شوفي عمي حقج علية الي صار ما ينسكت عليه

هزيت راسي بموافقة وكلتله .. اي انا اعرف سواية سجاد مو هينة وما ينسكت عليها والمفروض تصير عليها كعدت عشاير وفصول

بس انا بنت اصول ولخاطرك عمو ولخاطرخالة زهرة
راح اسكت وارضى بحكمك.

ابو سجاد زمخ بية بغيض واحتقار .. خاب شوف هاي ام العشاير وانتي شعرفج بالعشيرة مصدكة روحها هي لو بيها خير عشيرتج جان ما اجيتي كعدتي يمنا لفو

زمخ بي ابو مؤمل .. عيب ابو سجاد شنو هذا الكلام هاي انت الجبير المعدل

ام مهيمن بقهر جاوبته.. هي ماجاية عندك وتعيرها هي كاعدة ببيت ابن عمها والكلام الي تعيرها بي معناها تقصد بي مهيمن
وهاي ثاني مرة اسمع منك هالحجي وانا مااقبل واحد يعير ابني بأهله

ابو مؤمل .. خوية زهرة لا تحركين اعصابج انتي تعرفين ابو سجاد من يعصب يكوم ما يثمن كلامه

باوعت لابو سجاد وكلتلهم.. لا ابو سجاد انت غلطان صحيح احنا كاعدين يمكم
ومعتبرينكم مثل اهلنا بس مو معناها احنا طالعين من زرف الحايط
احنا هم حالنا حالكم عدنا عشيرتنا واسمها معروف

واكدر بأتصال واحد لعمو ابو سيف المحامي يروح لجبير عشيرتنا ويسولفله الموضوع. باوعت لعمو حسن وكلت

.. اضنك عمو انت شيخ عشيرة وتعرف احنا منو اهلنا وشنو اصلهم
ولوما عارفيهم ماانطيتوهم مرة منكم

فكول لأخوك لايكعد يجرح بالكلام ويعير بينا فوك سواية ابنه
يكوم يزيد الطين بلة بكلامه

ابو مؤمل باوع علية وكال .. عمي ما عاب حلكج كلامج لازم يوزنونه ذهب. ويجرالج
الي تردينه
حقج بركبتي وهذا سجاد هسة اذا ما اجة واعتذر منج
اتبرى منه

سجاد كام يكمز .. والله لو تموت ما اعتذرلها

حجاية منا وحجاية مناك والحلو بالموضوع انا بعدني واكفة بالباب حلفت ما ادخل للبيت الا وانا ماخذة حقي من سجاد

بقى سجاد يمسلت بالحجي وية عمه حسن
منا لحد ما ابوه طكت روحه منه وضربه راشدي
وكال لسجاد .. دير بالك تتجاوز على عمك الجبير والله ادفنك بأرضك بدون ما يرفلي جفن

يالله بالله شو فضها وروح اعتذر للخاتونة
خليها تسكت وتكفنا من طلايبها

سجاد رص على سنونه اجة واعتذر مني بس شنو نظرات عيونه
مزقتني تمزق يمكن لو كانت النظرات تقتل جان هسة اني مطروحة بأرضي ميتة من ورة نظراته الحاقدة

باوعت عليه بأنتصار وتشفي ودرت وجهي ودخلت جوة واني اتشكر من عمو ابو مؤمل لان نصفني

بس قبل لا ادخل انطيت باص لخالة زهرة وكلتلها
.. هَـا اي خالة صدك قبل لا انسى ترة حور بعد ما تكدر تروح للكلية

عقدت حواجبها وسألتني .. ليش خالة اسم الله شنو صاير
باوعت لسجاد وكلتلها

.. مو سجاد خطية عصب لان اتأخرت وحلف وكللها اكسر رجلج وخلي اشوف مرة تعتب الباب وتروح للكلية

هو انا كلت هيج وهي خالة زهرة صارت علينا فاندام
دارت على سجاد وانزلت عليه اكس ومربع بالرزايل

تركتهم ودخلت وخليت ام مهيمن تغرد لسجودي
اسمعها تكله .. خاب من كون شلل لهل الحلگ الاعوج وانت منو
حتى تبطلها

دخلت للبيت ونور وحور دخلوا وراي

نور بأعجاب.. والله لو ما عيب من الناس جان صفكتلج على هالروح القتالية الي عندج ينعل ابليسج حيرتيهم بزمانهم

حور لكزتني وكالت.. هاي شنو ريم ولا عرفتج هاي من شوكت
صايرة تعرفين بسوالف العشاير الي يشوفج يكول مگابلة دواوين العشاير وكاعدة

جاوبتها وكلت .. من عاشر القوم اربعين يوماً وانا عاشرتكم سنتين ودخلنا بالثالثة.

مو همة يردونها عشاير واصول خلاص هاي هي انا گلت اجي وياهم وين ما يردون ترة لا تنسين انا بالحقيقة هذا طبعي ما اخاف
ترة انا نفسي ريم ام لسان المزروف
وما حجيت ولا سويت غير الي يملي علية عقلي

لاعبالهم انا بزونة مغمضة ومطفية وكل شي ما افتهم
لا بالعكس انا اجيت من مكان وبلد
يكون هناك الانسان عندهم اول ما ينولد يعرف حقوقه
وانا هم اول ما بديت وياكم اول شي اتعلمته هو وين تكمن حقوقي بين اعرافكم وحبيت اعرف شلون احصل عليها واعرف شنو الالي وشنو العلية
بس هذا كل ما في الموضوع

سمعنا صوت صياح الزلم
وركضنا لكينا ام مهيمن واكعة مغمي عليها واخوانها واولادهم
اتعاونوا عليها ودخلوها البيت

رحت ركضت جبتلها جهاز الضغط ونور راحت تجيبلها علاجها
حور اخذت مني الجهاز وبدت تفحص الضغط ولكته مرتفع
اخذت علاجها بالكوة

ووكعت الملامة كلها على راس سجاد الي
كان السبب بكل الي صار بعمته زهرة لان كام يتعدى حدوده وياهم بغياب مهيمن

بالليل
لكيت حور كاعدة لوحدها تبجي كانت لازمة صورة لمهيمن وصورة لجلال

رحت كعدت يمها وكلتلها .. تدرين شنو اتمنى
التفتت علية ومسحت دموعها كالت.. شنو تتمنين
.. اتمنى انفجر وابجي مثلكم انتي ونور. احس بغصة متكومة ببلعومي ما راضية تطلع باقية تتكسر اريد ارتاح

مرات الدموع نعمة تساعد البشر حتى تخفف عنه همومه
بس بحالتج. هاي لا الدموع تصير نقمة

جرت حسرة وكالت.. لو مهيمن هنا جان محد يتجرأ ويتجاوز علية او على امي مثلما سوى خالي ابو سجاد وسجاد ويانة

جانت تحجي بحركة گلب
جاوبتها وانا اكابر بالالم وكلت.. هاي وانتي كاعدة بين خوالج وهيج تحجين وتبجين مستهضمة.

لعد انا شنو اكول الي كاعدة بنص ناس غربة لاناصر ولامعين
واولاد عمي الي هم كل ما املك من عائلة
اختفوا ومالهم خبر حمدي ربج وشكريه على النعمة الي انتي بيها
عندج ام وعندج خوال واولاد خوال طيبين ما عدا خالج ابو سجاد وعائلته

البقية كلهم ينرفع بيهم الراس بنات خوالج واولادهم كلهم يحبونكم

مهيمن

وصلت للبصرة
مثل طير ورجع من الهجرة على بلاده بس كان حالي
مكسور الجنح راجع للبصرة . وانا تارك وراي
اخوي بنص نار العدو غصب عني رجعت

الضابط ما تركني الا من ضمن وصولي للبصرة
لان انا كنت ما شايل هوية ولا عندي فلوس

وصلت لمنطقتنا وكلبي طار كدامي وسبقني يركض
متعني لبيتنا مشتاق لشوفة الاهل والاحباب

وصلت لبيتنا واكف كدام باب البيت اعاين عليه
وعيوني تلالي بالدموع كان الوقت عصر

جهال المنطقة مروا من يمي ينظرولي بخوف
اكيد يخافون لان شكلي عبالك واحد سفاح
لحيتي طويلة ووجهي مطبر كله اثار تعذيب

دكيت الباب بكل لهفة وانا انتظر وجان اسمع احلى صوت بالدنيا
صوت امي كلبي انتفض

اسمعها تسأل بصوت واهن تعبان. .. منوو بالباب

صحت بصوت عالي اريدها تسمعني
.. يمة انا ابنج مهيمن ابنج

كررت الكلام اكثر من مرة حتى تسمعني

هو انا كلت هيج وبعدها سمعت صياح امي وانفتح الباب
على وسعه وصاحت .. يمة وليدي. رجعلي يمة نظر عيني
يمة من رحت فدوة لطولك

خطية ماعرفت شنو تحجي من الفرحة
لمتني بحضنها بكل قوتها وصارت تتلمس بوجهي وبأكتافي ممصدكة تريد تتأكد انا موجود بذات نفسي كدامها
وعيونها مدمعة
كالت .. يمة گلي انا صاحية لو بحلم.
رفعت ايدها وبستها من ظهر الكف وباطنه وانا اطمنها

.. يمة انا هنا يمج لاتبجين

البنات اجوي يركضون على صوت امي ورفعت راسي
وجان اشوف نور شلون شهكت متفاجئة من شافتني

وركضة حور علية مثل طفلة وشافت ابوها
اول مشافتني ركضت علية وطارت لحضني من العصفورة واتعلگت برگبتي

تشم صدري وعيونها تدمع ممصدكة
.. ابوية انت كحل عيني انت مهيمن ما جاي اصدك عيوني

بستها من راسها وانتبهت لنور كانت واكفة وراها تبجي منتظرة دورها

بعدت حور من حضني ورحت على نور وفتحتلها ذراعي اثنينهم
هاي امانة اخوي وصاني عليها جلال كلي ديربالك على اختنا

باوعت مترددة لذرعاني المفتوحة بعدها شهكت بصوت عالي مهضومة وشمرت روحها بحضني لميتها على صدري

اتذكرت حال جلال بلحظة تبادلنا بالاحضان
وطفرت دمعتي جانت هاي اول مرة احضنها لنور
اول مرة تعرف معنى حضن الاخو شلون يصير

رفعت راسها وعيونها مبللة بالدموع
سألتني من بين دموعها وكالت .. مهيمن وين اخونا ؟؟؟

جمدت بمكاني
جنت شايل هم لهاي اللحظة بالذات من اجيهم ويسألوني عن اخوي وينه

شنو اكللهم تركته وراية بيد الذيابة واجيتكم خالي الايدين من اخوي
صرت اتهرب من نظرات عيونها مالي عين اعاين بعيونها

انسحبت من حضني وارتدت للخلف وهي تراقب وجهي بخوف
.. شنو مهيمن كلي وينه جلال. ليش ما رجع وياك ؟؟

جاوبتها .. جلال بقى هناك يكمل شغله وگال يرجع وراية ان شاءالله

نفضت راسها من الافكار المرعبة وكالت
.. مهيمن عفية گلي ولا تضم علية ياشغل هذا انا سمعت بجلال راح يم داعش

جانت نور تسألني وامي وحور ملتمات حولي امي تجري اتصالاتها وحور هماتين يردون يبشرون خوالي والناس برجوعي سالم

من بين كل هاي الخبصة حسيت بنسمة هوى طيبة الريح مرت علية

رفعت راسي ادور على صاحبته هيج حسيت بوجودها
قبل لا اسمع بصوتها

اتسعت عيوني من شفتها واكفة يم باب المطبخ تعاين علية عيونها جامدة. مفتوحة على وسعهن. مشاعرها مكبوتة بداخل عيونها

لكيت رجلية ماخذتني يمها بدون شعور وكفت قريب عليها
وحجيت من بين صدمتي وكلت .. هاي شنو ريم انتي هنا بعني ما سافرتي !!!!

رفعت راسها لمستواي حتى تعاين علية
ما حجت اي كلمة كان الفعل عندها ابلغ من الكلام

وداهمتني بحركتها المفاجئة.
شمرت روحها بحضني وحوطت جذعي بأديها الناعمة

ماكان مني غيري المهة كلها على صدري بحيث احس بيها ضاعت بحضني اتمنيت اضمها جوى ظلوعي بدون حواجز

حضنها كان بالنسبة الي شعور بالسلام
وصدري صارلها الملاذ احس واحدنا كمل الثاني

بعدها بلحظات حست على نفسها ومكان تواجدها المحرج بحضني
جلت صوتها وانسحبت من بين ايدية وابتعدت عن حضني

رفعت ايدها وحطت شعرها ورة اذنها مرتبكة وكالت بصوت بي رجفة بجي
ودلع وكالت.. الحمد لله على سلامتك نورت البيت بجيتك

امي والبنات كانوا داير ما دايري البسمة على وجوهم
ما لحكت اكعد وياهم غير بس عشر دقايق ومن بعدها
ما شفتهم لان خبر رجوعي للبيت طش بين الاقارب والاهل والاصدقاء وصار الباب كل شوية يندك

لحد ما مليت وخليته مفتوح على وسعه
خوالي واولادهم اجو للبيت وهم مامصدكين. بالخبر
الا من شافوني
بس بنفس الوقت انتبهت كانت بعيونهم هواي اسئلة

جلال

گلبي انتفض والعرگ البارد ينضح من جبهتي كنت واكف
انا وابو ذياب وابو جراس ومجموعة جنود من الدواعش
كدام ابو اعصار جان معصب وثاير وكل شوية يسأل ويحقق

ابو عصار .. راح اتخبل شوكت صار هذا الشي كله واحنا وين جنا
سألت وسويت نفسي ما اعرف عن شنو. كان يحجي

.. شنو الموضوع مولاي الامير اهدي شوية وفهمنا الموضوع

ابو عصار باوع علية وكلي .. شلون تطلب مني اهدي
ما راح ارتاح ولا يهدالي بال الا اعرف ومنو هذا الخاين الي موجود بينا

ابو ذياب جاوبه .. مولاي الامير كلنا ثقة انا وجلال وابو جراس
والجنود هنا. ممكن نعرف السبب الي يخليك تشك بيناتنا خاين

ابو جراس سأله .. انتوا شلون اكتشفتوا بوجود خاين بينا
ابو اعصار جاوبه بغضب .. اربعة من جنودنا القناصيين لكيناهم مقتولين غدر

ابو جراس كال مستغرب.. احنا هواية استشهدوا من عندنا
شمعنا هذولي القناصين كلت عنهم مقتولين غدر

جاوبه.. اول شي اكتشفنا الرصاصة الي تم استخراجها راجعة النا لنفس نوعية السلاح المستخدم وثاني شي تم رمي القناصين من مكان قريب ومن الخلف يعني لوكانت الاصابة من الامام جان گلنا

هم الجنود العراقيين وكعوا على اسلحتنا واستخدموها ضدنا تصير مرات هاي الحالة من يقتلون جنودنا ويسلبوهم الاوغاد

بس ما دام تم الرمي من الخلف ومن مسافة قريبة اذن القاتل منا وبينا
وموجود بيناتنا يتنقل مثل الحية ولا بد وان يجي اليوم ويوكع بيدي

هم يحجون وانا گلبي يرتعد الله ياخذهم الشياطين يملكون عقول تحفر الصخر

ما الوم جماعتنا بالاستخبارات على كل الحيل والدهاء الي يستخدمونه بالمهمات اثاري يعرفون بعدوهم خطير وذكي ما يستهان بي

الله يستر منهم على شنو ناوين
منا ورايح لازم اخذ احتياطاتي واخفف لعب اكيد بالايام الجاية راح
اخضع لعدة اختبارات يمتحنونا بيها حتى يوكعون على الخاين الموجود بينهم

مهيمن

خلص الوقت وانا استقبل الناس واتلگاهم حتى بالكوة كدرت افرغ نفسي واسبح بدون ما ازين لحيتي وجابولي للبيت مضمد

الوالدة ماكدرت تعالجني تكول مالي عين ولا كلب اشوف جرحك واتحمل اشوف وجعك

كعد يعالجني وضمد رجلية مؤقتاً وكال اتوقع هذا التواء بالقدم
لازم تروح لمجبرجي يطكها الك بقيت اعرج عليها وطالب كال باجر يصبح الصبح واخذك الهم حتى يسووها

بالرغم من الخبصة والهوسة والناس الي تجي وتروح على بيتنا
بس لازال عقلي يفكر بطريقة حتى يوصلني لجلال
بس كل الي احتاجه شوية وقت استرجع صحتي ومن عندها
راح اتصرف

لحظات وجان اسمع صوت عناد يسألهم عني ما مصدك
شافني وركض علية بكل لهفة
ممصدك برجوعي الا من شافني واخذني لحظنه ودموعه نزلت على اكتافي سألني بصوت مكتوم وكال
.. شلونه صاحبي البطل طمني عنه ؟؟

جاوبته .. ولك عناد صاحبك طلع ذيب عنده واجب مقدس صاحب مهمة

عناد حاوبني وكال.. كفو منه والله
كعدنا انا وياه لوحدنا بالاستقبال بس كان طالب ومؤمل موجودين كاعدين برة بالباب يرحون ويرجعون علية

سألته.. شصار بيك من وصلت وما لگيتني

گال .. وروح كرار اجيت اتخبل عقلي وكف ردت اكمل طريقي واروح وراكم بس الي لزمني لگيت سيارتك مفتحة ابوابها واثار الدم مالية المكان حسيت السالفة طلعت من ايدي ما بيها مجال اسكت وانا صار لازم انطي خبر لأهلك وابلغ
عن اختفائك بساعتها ما جنت اعرف انت ميت لو عايش

جان عناد يحجي واتذكرت مراقبتنا لجلال وحشريتنا وعرقلتنا اله وكلتله
.. تتذكر عناد شلون جان جلال يعصب من يعر ف بينا كاعدين نراقبه اثاري طلعنا لاعبين طوبة بالمسكين

وكل المصايب الي صارت وية جلال من جوة راسنا خطية كان بكل مهمة يريد ينجزها يلگانا كدامه سابقينه
مثل الطناطلة نجي ونخرب عليه الاول والتالي

جاوبني عناد بأبتسامة حزن وكال.. خطية صدك مسكين الله بلاه بلوة بأخ وصاحب مثل الثيران يجون وينطحون بدون ما يفتهمون شنو الموضوع
لا رحمناه. ولا خلينا رحمة الله تنزل عليه فوك ضيمه حاصرناه

.. بالقران لو بعد الف سنة ما اصدك ولايجي على بالي جلال اخوي يصير ضابط زين شلون وليش وشوكت صار كل هذا من ورانا

شغلة توكف العقل يعني لو ما الضابط علي كعد وياي وفهمني بنفسه عن كل شي صار وية جلال وشلون اتطوع بالاستخبارات
جان جذبت الخبر وما صدگت

.. انا هم مثلك جنت مصدوم بالعرفته عن جلال

سألته بصوت ناصي .. بس ما كلتلي شلون عرفت بسالفة جلال
.. جاوبني وهو يبتسم .. لو تدري شلون عرفت جان وكف عقلك
مثلي بس تعرف شنو ما راح اكلك خليها مفاجئة اريدك تتفاجيء مثلي

بعدها عناد سألني .. تعال احجيلي من اخذوك منا شسويت وين اخذوك وشنو هاي اثار التعذيب

صرت احجي لعناد عن كل الصار وياي وشلون جلال جان مبتلي على عمره محتار وين يضمني عنهم
جان يحاول بكل الطرق ما يخليهم يوصلوني
بس هم شياطين يستغلون عدم وجوده ويجون علية يراوني النجوم بعز الظهر

جنت احجي لعناد شلون جلال هربني من المعسكر وگلبي وية كل كلمة ينزف

غمضت عيوني وكلت .. تدري عناد اول مرة بحياتي اكون هيج خايف على حياة احد
ما تعرف گلبي شلون صاير هسة بهاي اللحظة انا كاعد الف حسبة تجي على بالي شلون بجلال وشنو كاعد يسوي بهاي اللحظة لزموه لو بعده والرمي الي سمعته بذيج المغربية عليمن عليه لو على غيره

.. اشو جني اشوف بعيونك نية هَـا مهيمن على شنو ناوي

باوعت لرجلية المضمدة ضايج من ضعفي
وجاوبته .. بس خلي اتشافى ويصير خير

نور

عودة مهيمن للبيت بشارة خير وامان وزاد الامل بگلبي عن قرب رجعة اخوية جلال
وتتكحل عيني بشوفته مثل مالله خلاني اشوف اخوية مهيمن

صارله اسبوع من رجع صحيح هو رجع النا سالم
بس بقى باله وتفكيره بعيد عنا

من يوم الي رجع ما شفناه غير بس يومين بقى بالبيت يخضع للعلاج على ايد الممرض يجي للبيت يداويه
وخالة زهرة ما تحملت هي هم صارت تشارك بعلاجه لان خطية كان متعرض للتعذيب

كلما نسأله على جلال يتهرب من عدنا وينخطف لونه. لاحظت على مهيمن كان كلش قليل الكلام ويانا

ومن رجع لليوم ما اكل بالبيت غير بس هذني اليومين
كلما يطلع امه تسأله وين رايح

ام مهيمن جانت بعدها متخوفة ولحد الان ما تكدر تتجاوز فكرة فقدان مهيمن

مرات يروح يكعد بديوان خاله حسن ابو مؤمل يدز عليه
لان امه اتصلت على اخوها وسولفتله على وضع ابنها الي ما عاجبها

مرتين رجع للبيت متعارك بالسوك بسبب سالفة جلال
وكلام الناس عنه على هو عميل وية داعش ويشتغل وياهم

هذا السبب الي خلة مهيمن ينگلب وحش
وامه داعيه عليه الي يفكر او يحاول يلمح عن سالفة جلال
من بعيد او من قريب

اما ريم فهاي كانت عالم ثاني لحالها هواي اشوفها كاعدة تفكر
اول ما يوصل مهيمن عيونها تترصده وتبقى تعاين عليه

لكن مو ريم الي اعرفها قبل الي كانت تنتهز الفرص حتى تقترب من مهيمن لا هاي الي جاي اشوفها كدامي غير عن ذيج ريم
صحيح فرحانة برجوع مهيمن بالسلامة
بس كانت محوطة نفسها بحاجز عازلها حتى عنا احنا

اندك الجرس وكان الوقت الساعة ب ٩ بالليل
كان مهيمن دخل وسلم علينا كنا اني والبنات وخالة زهرة كلنا كاعدين

امه سالته .. شنو يمة وين جنت اشو صايرين ما نشوفك هم كول هاي امي خطية خلي اكعد يمها شوية مشتاقة لشوفتي

باسها من راسها وكعد يمها اباوع عليه بدت صحته تتحسن من بعد اسبوع علاجات بدا يشفى

جاوب امه وكال.. يمة حقج علية عذريني جنت اكمل الشغل الي جان متراكم طول هاي الفترة الي غبتها

وقبل شوية جنت كاعد بديوان بيت خالي حسن جنا نحجي ونسولف تعرفين شلون مشتاق لكعدتهم وسوالفهم

وكمل كلامه .. وفاجئوني بسوالف بنت عمي وبطولاتها

جان يحجي ويباوع على ريم وعيونه تلمع بفخر

.. كل يوم تفاجئيني بيج ريم ما اعرف شلون اشكر وكفتج وية امي والبنات يكفي انتي ما سافرتي وتركتيهم وراج هالشي لوحده يكفي
من رجعت اكتشفت بيج هواي اشياء متغيرة

جاوبته ريم .. على فكرة مهيمن انا ما سويت شي ولا اتغيرت
ترة هي نفسها تصرفاتي الي كانت ما تعجبك ولا كنت مقتنع
بيها قبل

هي نفسها الي اتصدت لكلام الناس وحطت حد لكل واحد يتجرأ يتجاوز علينا او يستغل عدم وجودكم انت وجلال بالبيت
انا نفسي ريم ما اتغيرت بس الظاهر انت الي اتغيرت وصرت تشوف الناس بغير نظرة

مهيمن

هاي ثاني مرة اخطأ بحكمي على شخص الاول جلال وهسة ريم
اثنينهم اتهمتهم باللا مبالاة استهانيت بيهم وبشخصياتهم الغريبة

حكمت على جلال وريم بالطيش وعدم المسؤولية
لكن الزمن ثبتلي خطأ نظرتي و حكمي بحقهم

لكن اكتشافي اجة بوقت كلش متأخر
الفترة الي عشتها وية جلال بين داعش خلتني اشوف العالم
بعيون جلال هواي اشياء بداخلي
جلال بمواقفه غير كل مفاهيمي وثبتلي العالم مرات يدور بالعكس
مو مثلما احنا متوقعين

اما ريم بتصرفاتها وموقفها ثبتت لي
ان الحياة متلونة مو مثلما انا كنت اشوفها لو ابيض لو اسود

كنت اعاين عليها وادورعلى لهفتها واللمعة الي كنت اشوفها دائما بعيونها

بس اشو هسة ماكو ما شفت لا لهفتها ولا لمعة عيونها
شكلي سلبت منها احلى شي عندها وكسرتها بلحظة غضب اعمى

نهضت من مكاني
احس بروحي اختنكت بالزايد فوك ما انا مختنگ
نظرات عيونها الجامدة نغزت گلبي

ريم

انتظرت الامور تستقر ومهيمن يوكف على حيله
اتمنيت اسمع خبر عن جلال حتى يطمني
بس شكلي ما راح الحك اشوفه

مر شهر على وصول مهيمن بس الغريب بالامر مهيمن
صرنا ما نشوفه نهائياً الي افتهمته من كلام حور
تكول .. مهيمن ما اعرف وين يروح هو حتى حلاله عايفه بيد طالب. وطلع طول ذيج الايام ما يروح للمحل مثلما كايل لامي
تصرفات مهيمن حيرتنا. حتى امي انتبهت عليه

سألتها .. لعد وين يروح كل هاي المدة

.. ما اعرف بس شكله طالب وهذا صاحبه عناد يعرفون بمكانه

.. لاتخافين ماكو شي بس اتوقع كل ما في الموضوع مهيمن
نفسيته تعبانة ترة الي شافه على ايد داعش من تعذيب مو قليل وضيفي عليها كلها هو ترك اخوه وراه اكيد هذا الشي جاي ياكل بگلبه

يتبع

البارت القادم

نور
.. ريم هاي ليش تحضرين جنطتج شنو قررتي تسافرين

ً

اتمنى لكم قراءة ممتعة
اختكم نهى الحسون

ً