قضية لم الشمل الفصل الثالث وثلاثون 33 - بقلم نهى

#الكاتبة_نهى_الحسون
#قضية_لم_الشمل

مساء النور عليكم

بما ان اليوم جمعة والكل يعرف ان انا بيوم الجمعة عطلتي بس ما كدرت اعوفكم واقطع عليكم خط سير الاحداث لذلك اخذت من وقتي وكدت اكتب البارت
وما انطاني گلبي اخليكم تنتظرون
فاتنمالكم مقدماً قراءة ممتعة

جلال
كنت امشي متلهف واني طاير من الفرحة بشوفتهم
لازم بيدي اليسرى رنين وبيدي اليمنى رند وصلت يم بيت كلش حلو وفتحت بابه على وسعه

والتفتت وانا انادي على خالي وزوجته واولادهم حتى يجون يدخلون للبيت الي سويته الهم ويشوفونه

.. تعال خال شوف البيت شلون حلو جهزته الكم
تعالي خالة ام مصطفى دخلي وشوفي من جوة شلون واسع يشرح الگلب

دخلت زوجة خالي للبيت وهي تبتسم واتبعوها البنات دانة واسراء بس لفت انتباهي ملابس اسراء كانت لابسة بدلة عرس

عقدت حواجبي مستغرب وكلتلها
.. بربج اسراء اكو وحدة تسافر ببدلة عرس بالله شنو كلتي لروحج بالطريق وانتي بهاي بدلتج البيضة

ابتسمت وكالت .. عفية جلال لا تقلد علية والله مو بيدي
كان لازم البسها للبدلة حتى يخلوني اروح وية اهلي

تركتني وراحت دخلت ورة امها تشوف البيت
كانوا الكل فرحانين حتى الطفل الصغير حنوش كان يضحك وخدوده المليانة موردة

دخلنا كلنا للبيت فرحانين ومتشوقين اباوع لاولاد خالي انتشروا بالبيت وصاروا يدخلون ويطلعون من غرفة لغرفة يستكشفون المكان

لكن فجاءة انطفت علينا الكهرباء
وصار البيت اظلم بحيث كلشي ما اشوف

سمعت صوت خالي گال
.. جلال روح شغل الجهاز حتى تجي الكهرباء
.. يا جهاز خالي
.. شنو متعرف ياجهاز الي تشتغل بي
.. اي هسه حاضر

مشيت بالبيت وانا اتلمس طريقي مثل الاعمى
اريد اوصل للجهاز حتى اشغله لكن ماكو ما عثرت عليه طولت وانا ابحث عليه فزيت من مكاني على صوت قصف عالي

واتبعه اصوات صراخ رنين ورند يستنجدون بية خايفات اسمعهم ينادوني

.. جلال .. جلال وينك

واسراء تصيحني بصوت عالي .. جلال تعال طفي النار من على بدلتي جاي تحترك

انخبصت
.. انتظروني جايكم ياربي دخيلك صرت اركض بكل الاتجاهات اريد اتبع مصدر اصواتهم حتى اوصللهم واساعدهم

كمت احجي وياهم حتى اصبرهم انتظروني لتخافون
هسة راح اشغل الجهاز وتجي الكهرباء

لكن مع الاسف ما سمعت منهم رد وزاد خوفي عليهم
حسيت بأنفاسي ضاقت على صدري من كثر الخوف والهلع

انتفض جسمي يطالبني بالهوى وهزيت راسي بكل
ونهضت على حيلي مفزوع. وشهكت الهوى بقوة لداخل صدري وصرت اخذ عدة انفاس متسارعة عبالك الهوى راح يخلص ولازم امليء صدري

فتحت عيوني وغلقتها اكثر من مرة وصرت اتلفت واتفحص المكان الي انا بي
لحظة انا وين

انا بفراشي. وهذا مهيمن نايم بصفي
ادركت ان كل الي صار قبل شوية كان مجرد حلم

للحظة اتمنيت ارجع انام واكمل حلمي اريد الكاهم واشوفهم والحك عليهم واخلصهم

ارتعد جسمي ياربي بعدني لحد الان اسمع اصوات صياحهم بأذني ينادوني حتى اجيهم.

مسحت على وجهي بكف ايدي
ونهضت من مكاني واني عاقد النية
.. اي صدك هو انا شنو منتظر ولحد هسة ما رايح الهم
على الاقل يمكن اذا شفت قبورهم بعيني گلبي يرتاح وعقلي راح يستسلم ويرضى بالامر الواقع

اتجهت للكنتور حتى اطلع ملابسي واحطهم بالجنطة
انا لازم اسافر للموصل واروح للبيت خالي

كنت اطلع بالملابس واحط بالجنطة بصورة عشوائية لا على التعيين كانت الغرفة ظلمة وما بيها غير ضوء خفيف جاي من برة

وكعت غراض من على الكنتور ما اعرف شنو بس سوت ضجة

بعدها سمعت صوت مهيمن المستغرب بي اثر النوم

.. جلال شنو جاي تسوي

جاوبته وانا اغلق سحاب الجنطة
.. راح اسافر للموصل

حجيت هاي الكلمات وما احس الا مهيمن طفر من مكانه وبسرعة فتح الضوء

باوعت على وجهه اختفى كل اثر للنوم من عليه
اقترب مني وعيونه تباوع علية بريبة وحذر

.. شنو جلال شبيك سامع شي
.. لا ما سامع شي بس انا قررت اسافر للموصل
اريد ازور بيت خالي

مهيمن

اباوع لجلال وشكله المخربط مبين عليه كان كاعد من النوم كانت حركاته سريعة ومتوترة وهو يجمع بملابسه ويحطهم بالجنطة

فاجئني بكلامه من سألته شنو كاعد يسوي
وعرفت من جاوبه ان جلال اتخذ قراره وهو مو واعي
لنفسه

.. جلال شنو هذا الحجي شبيك صار لعقلك شي

جلال بأعتراض.. لا ما صاير لعقلي شي
بس كل ما بالموضوع انا اشتاقيت لبيت خالي
واريد اروح ازورهم. اريد اعرف وين دفنوهم

خلص كلامه واتجه للباب يريد يطلع

بقيت فاتح حلكي هذا بكل عقله يحجي
رحت ركضت وراه وكفت كدامه وقطعت عليه الطريق وكلتله

..لك جلال عن ياقبور يا زيارة تحجي بهذا الزلك
ولك الموصل صارت ساحة حرب
وبخيت الي يطلع منها سالم

انت ما جاي تشوف الاخبار
ولو انا ليش اسألك طبعاً انت ما تدري بالدنيا طشت لو رشت

لان حضرتك متقوقع على نفسك وحابس روحك
تنعي حزنك لوحدك وكأنه خلاص هاي هي الدنيا اتوقفت وية وفاة عائلة خالك

جاوبني وهو معند .. مهيمن ابتعد عن طريقي

.. لا ما راح اتحرك من طريقك مستحيل اخليك تسافر للموصل وانت بهذا وضعك

جاوبني وايديه بدت ترجف وهو يشيل بجنطته يريد يستعد حتى يطلع

.. جلال .. انت مالك دخل بحياتي انا حر وبكيفي اريد اروح للموصل انت متكدر تمنعني فاهم

حجاها بصياح واني جاوبته نفس الشي بصياح
.. امنعك غصب عنك لو اعرف احبسك بالبيت الظاهر انت عقلك فاصل وما جاي تستوعب الوضع الي تريد تحط نفسك بي

.. مهيمن ابتعد عن طريقي لا تخليني اسوي شي ما يعجبك

.. اعلى ما بخيلك اركبه وهاي كدامك اربع حيطان واضرب راسك بيها انا كلت طلعة منا ما تطلع واريد اشوف شلون تكسر كلامي

نور

كان الوقت ليل وكنا كلنا نايمن تقريباً لكن فجاءة
سمعنا صياح جلال ومهيمن
نهضت من مكاني مفزوعة ورحت لمكان صياح الولد وام مهيمن والبنات تبعوني
رحت يمهم اريد اشوف شنو الصاير

دخلت عليهم للغرفة لكيت
جلال معصب مقهور
ومهيمن واكف كدامه وساد عليه الطريق ما يخليه يطلع

ام مهيمن.. شكو شبيكم ليش صوتكم عالي بهذا الليل

مهيمن جاوبها .. هذا الغبي فجاءة كعد من النوم وقرر يسافر للموصل

جلال هد على مهيمن ودفعه من صدره بغضب
كانت ايديه ترجف
كان يدفع بمهيمن بكل قوته حتى يزيحه عن طريقه ويطلع

ام مهيمن تهدي بي.. خالة جلال استهدي بالرحمن وكول يا الله وخلي الصبح يطلع وسافر للموصل
خالة هسة الدنيا ليل

بس الظاهر جلال كان فاصل بغير عالم ما يسمع
لأي احد محكم عقله يسافر

زدات دفعات جلال بحيث مهيمن ارتد للخلف
وبعدها صوت صياحهم بدة يعلى اكثر

صوت صياحهم ومدافعهم كدام عيني
حسيت لساني يثگل وارتعد جسمي
كنت كلش خايفة منهم وعليهم
اريد احجي حتى اهديهم او احرك جسمي حتى امنعهم

كنت بس اباوع بعيوني ياربي معقولة رجعت لي الحالة
صرت اجاهد واحاول حتى يطلع صوتي واحجي بس ماكوا

كنت اباوع لمهيمن ولجلال يتلاوون ويتصارعون بينهم كل واحد بيهم يحاول يفرض سيطرته على الثاني
ويطلع اقوى ما عنده حتى يخلي المقابل يخضع له

جلال كان عدواني حيل لكن انتبهت لمهيمن ما يرد على ضرب جلال لكن كان يحاول يقيد حركته

بس جلال انكلب وحش مو جلال اخوية الي اعرفه
من منظره ونظرات عيونه المخيفة

عرگت كصتني بعرق بارد
وغوشت عيوني ما اعرف شصار بية

ام مهيمن تصيح بيهم بخوف وحوراء وريم خايفات يتدخلون بينهم لا تلوحهم ضربة من الولد بدون ما ينتبهون عليهن

بعدما ما مهيمن فقد كل طاقة الصبر والتحمل وية هجوم جلال عليه فجاءة. وبحركة وحدة من مهيمن انهت كلشي

ضربه كلة براسه خلته يفقد توازنه ويوكع من طوله ويغمى عليه

كل هذا وانا باقية جامدة بمكاني اباوع عليهم وصوتي محبوس
ساد الصمت جو الغرفة

وام مهيمن لطمت على صدرها وراحت على جلال الواكع بالكاع

.. يمة صخام ولك يمة مهيمن شسويت بأخوك

حوراء وريم دنكو على جلال وصاروا يساعدون ام مهيمن حتى يصحون جلال

مهيمن عدل تيشرته وكال وهو يدنك على جلال
.. بالله شو ابتعدوا عنه خلوني اخذه للمستشفى
هذا شكله محتاج دكتور

كان يحجي ويرفع بجلال من على الارض وحوراء وريم ساعدوه.

الكل كان يتحرك بالغرفة مخبوصين
واني عقلي وروحي تتحرك وياهم بس جسمي ولساني ساكن بمكانه

مهيمن اخذ جلال وراح بي وما قبل ياخذ امه وياه
لان كان مستعجل يريد يروح بجلال قبل لا يصحى
ويرجع يعند حتى يسافر

ريم

دخلت ام مهيمن للبيت بعدما سدت الباب ورة مهيمن
كسر خاطري منظر جلال شلون بي ياربي

رحت ورة حوراء لغرفة مهيمن حتى نرجع الغراض والهوسة الصارت من ورة عركتهم

لكن اتفاجئت بمنظر نور الي كانت بعدها واكفة بمكانها مثلما ما هي على حطتها وصافنة على المكان الي كان
مهيمن وجلال يتضاربون بي
حوراء بدت تلملم بالملابس الواكعة بالكاع وانا اتجهت على نور ولزمت ايدها كانت اصابعها باردة ثلج

وسألتها بشك .. نور شنو شبيج

لازمة ايدها واسألها مستغربة وكفتها الجامدة بمكانها بدون حركة ولا صوت

.. نور ليش واكفة هيج شنو شبيج
ما جاوبتني حوراء اتوقفت عن حركتها وباوعت علينا
وسألت .. شنو شبيها نور شكلها مو طبيعي

.. والله ما اعرف
رجعت هزيتها من كتفها حتى تحجي وياي
.. نور عفية احجي والله خوفتيني

طلعت حوراء من الغرفة عالسريع
لزمت ايدها
ومشيت وهي تمشي وراي بكل طاعة من غير ما يبدر منها اي ردة فعل

كعدتها على كرسي كان موجود بزاوية الغرفة
وكعت كدامها على رجلية ولزمت ايديها الباردات وصرت امسد عليهم حتى ادفيهم كانت نظراتها
للامام
دخلت حوراء جايبة كلاص ماي
.. هاج اخذي خليها تشرب شوية ماي هاي انصدمت من
الصياح

اخذت كلاص الماي وشربتها على كيف
وبقيت احجي وياها بصوت هاديء اطمنها
وهي بقت على هذا وضعها
تقريبا مدة عشر دقايق

وبعدها فاجئتني من شهكت بصوت قوي ونزلت دموعها وكامت تبجي

احتاريت ما اعرف شنو اتصرف وياها
وشنو اسويلها
نهضت من مكاني واخذتها لحضني وصرت اطبطب عليها
حوراء .. ياربي هاي البنية شكد مسكينة مو حمل مشاكل

حوراء راحت تتنقل بالغرفة تعزل الهوسة

ونور بدت شوية بالتدريج تهديء وترجع لوضعها الطبيعي
سألتها
.. ها هسة شلون صرتي
هزت راسها بموافقة تطمني بس بدون ما تحجي

عفتها ورحت اساعد حوراء لكيت جنطة جلال كانت واكعة بالكاع

شلتها وفتحتها وطلعت ملابسه منها
لكن وكع بيدي دفتر قديم بي هواي شخابيط وخطوط
مرقمة. واشكال غريبة ما افتهمت منها اي شي
سديت الدفتر وباوعت للغلاف من الجانبين

جلال شيسوي بهذا الدفتر القديم
كان مكتوب على غلاف الكتاب كلمة (المخطط )
وجواه مكتوب عبارة (حلمي )

رجعت الدفتر لمكانه وخليت الجنطة بالكنتور
واني اتسأئل شنو الموضوع

ورة ساعة رجع مهيمن وجلال كان وياهم مؤمل ابن خاله يساعده حتى يدخلون جلال للبيت

هم انهيار عصبي بس هالمرة مهيمن ماخذه لدكتور اخصائي وانطاه علاج خاص يفيد بحالة جلال

بتالي الليل تقريباً ساعة ب٢ دخلت للغرفة وية البنات
حتى انام

لكيت نور متمددة على ظهرها وتباوع للسقف صافنة

رحت كعدت يمها واني الفضول كاتلني
سألتها عن الحالة الغريبة الصارت بيها بساعة العركة

باوعت علية وجلت صوتها وجاوبتني بصوت ناصي
.. هاي الحالة صارت وياي من بعد وفاة امي
بدت وياي بالتحديد من انتقلت ببيت خالتي
تصرفات زوج خالتي صابر وكل الظروف اتعاونت على خلق هاي الحالة عندي

.. وشنو هالظروف الي خلتج هشكل تفقدين السيطرة
صارت نور تحجي عن كل ماضيها ومخاوفها وية تحرشات صابر ورعبها منه ومن كل شخص يأذيها

كنت مصدومة من الي عرفته عن ماضي نور
وينك عمو تعال اسمع ببنتك شلون جارت عليها الدنيا
هو مجرد شافها تشتغل خدامة انتكست صحته ومات بيها

هو ما يدري ما خفي كان اعظم وبنته عايشه وشايفه بلاوي بحياتها

اوووف

وكملت نور كلامها
وصارت هاي الحالة تصير وياي
كلما انحط بموقف صعب او اخاف افقد السيطرة. على نفسي ولساني يثكل

لكن من انتقلت وعشت ببيت مهيمن
هاي الحالة فارقتني واتوقعت اني اتخلصت من هاي العلة للابد
بس اثاري بعدني اني نور الخرسة الاولية ما اتغيرت
وراح ابقى طول عمري نور الخرسة

كانت تحجي واتذكرت كلام زوج خالتها بمكتب المحامي بيوم لقبها بالخرسة
هسة يالله عرفت ليش حجة هيج الله يلعنه

باوعت عليها وكلتلها
.. تدرين لو مهيمن يعرف بسواية رجل خالتج وياج
كان يدفنه بأرضه من غير ما يرفله جفن

نور بخوف.. لا لا عفية ريم اريدج توعديني هالكلام يبقى سر بيني وبينج لا تعقدين الامور فوك ماهي متعقدة مهيمن ما ناقص ضيم
كلش كافي عليه مصيبة جلال

لتخافين سرج ببير ما راح احجي وافتح حلكي بأي حرف بس انتي هم شوية ساعدي نفسج وصيري قوية
شنو هالخوف الي انتي عايشة بي

.. شسوي هالشي خارج عن ارادتي غصب عني مو بيدي
.. لا نور انتي حيل جبانة لدرجة بأول هبة ريح
راسا ترفعين راية الاستسلام
الراية البيضة
وتخلين الشخص بالمقابل يتمكن منج ويستقوي عليج

مر هذا اليوم ومرت بعده الايام
واني وحوراء بدينا نقدم عالكليات
اني معدلي انقبل كلية. ادارة واقتصاد
وحوراء انقبلت بكلية طب اسنان

وجلال بدة يتحسن عالعلاج والحمدلله حتى صار ينزل للشغل وية مهيمن
بس ما بطل من كعدت السطح بقى معلك فوك

رجعنا للبيت بعدما كملنا اجراءات التسجيل وخطية مؤمل ابن خالهم كان ويانة على طول وهو الي سعى
النة وكمل كلشي لان هم اخته نغم انقبلت كلية طب عام

كانت كلش فرحانة. انا مو اكرها بس ما اعرف ليش اضوج منها بالرغم هي البنية الله فوك الراس ما مسويتلي شي بس هيج اني من الله ما اطيقها

حوراء

حلم معلق على شجرة احلامي
كنت كلش فرحانة اليوم انقبلت كلية طب
اول ما دخلت للبيت صارت عيوني تدور على جلال
اريد احجيله عن فرحتي

لكيت امي ونور وبشرتهم بقبول الكلية
وامي هلهلت واتصلت على مهيمن تبشره

استغليت انشغال امي ورحت صعدت فوك بكل
لهفة. لكيت جلال بطرك الفانيلا الداخلية يشتغل
على هالشي الغريب الي كتلني الفضول حتى اعرف هذا شنو حاي يسوي

المهم ما علينا
التفت علية وباوعلي ورفع حاجبه بتسائل
.. شكو شعندج صاعدة فوك ترة بعده مو وقت اكل

اتعودت على ثقل دمه
ابتسمتله و جاوبته. .. اجيت اشاركك فرحتي
اليوم طلع قبولي كلية طب اسنان

باوع علية شفت لمعة الفخر مرت بعيونه لكن اتداركها ورجع دنك راسه عالجهاز يكمل شغله
وكال .. الف مبروك حوراء انتي حصدتي ثمرة تعبج

وكمل شغله ولا كأني موجودة يمه
مو مهم عادي
اقتربت منه وصرت اجمع بأدوات التصليح والصيانة الي كانت مشمرة بالكاع

سألته.. اخذت علاجك لو بعدك
جاوبني بقلة صبر.. لا بعدني ما اخذته واصلاً راح اقطعه لان بعد ما احتاجه

اقتربت منه وحجيت
.. جلال شوكت الله يفرجها عليك وتروح هاي الغيمة من على وجهك وحياتك

.. حوراء انتي محد كلج هواي تحجين
.. لا محد كايلي
.. اكيد محد يتجرأ ويكلج انتي كلش لزكة

عقجت وجهي ضايجة من كلامه وجاوبته بغيض
.. اكيد محد يكدر يحجي وياي هيج
الا بايعته امه كلت كلامي الاخير بتحذير

ودرت وجهي حتى انزل وكلتله قبل لا انزل
.. ترة انا مو لزگة. وهاي هي جلال انتهت وياك بعد تحلم اصعد واجيبلك اكل او احجي وياك وشوف
كنت احجي وياه واتوعد بغضب
تركته ورحت نزلت جوة يم البنات

التهيت اسمع نصايح نور عن حياة الكلية
بقيت احسب الساعات لجلال انتظره شوكت ينزل هالمرة حلفت ما اصعدله شنو كل مرة يرزلني واصعدله ولا هالمرة داس بمصاريني

يكلي لزكة
لزكة بعينه اوووف منه
كل شوية عيني تصد عالدرج
ادري هذا شنو سالفته ما يمل ولا يتعب من كعدت السطح معقولة

اباوع لنور قبل شوية صعدتله صينية الاكل وهسة نزلت وهي ضايجة شكله ما اكل

اوف منه صاير شكد عنودي
غصب عني لكيت نفسي اتسحب من يم امي والبنات
وسويتله لفة. وصعدت فوك

وانا بعدني متضايقة من كلامه
صعدت ولكيته كاعد يدخن جيكارة
ومتكيء عالحايط

باوع عليه وكال .. هاي شنو انتي مو الصبح حلفتي بعد ما تصعدين فوك ولا تحجين وياي اشو رجعتي بكلامج

.. لا تفرح وتاخذ بنفسك مقلب ترة انا ما صعدت علمودك

رفع حاجبه وابتسم نصف ابتسامة
.. لعد علمود منو
.. اني صعدت انطيك اللفة حتى تاكل. ما اريد توكع مريض و اخوية مهيمن المسكين يبتلي بيك فهاك اخذ
واكل هاي اللفة

مد ايده واخذها مني وبدة ياكل بيها
جلال.. تدرين من تزعلين وجهج ينكلب
يصير يخوف من تطنكرين عفية انا ما ناقص ضيم
رحمة على والديج فردي وجهج
لو تكومين من كدامي

حجيت وياه بزعل.. جلال كافي عاد هواي تنتقدني وتقلد علية
هسة شوف روحك بالاول صاير تشبه خراعة الخضرة. وبعدين تعال قلد علية

ضحك وعيونه لمعت على كلامي
يمة احس بضحكته الشمس اشرقت وضوت العالم بنورها.

يارب شكد مشتاقة لضحكته
انتبه لروحه وعدل كعدته وجلة صوته وكال
يالله راوينة عرض اكتافج هوينا اريد اشتغل وانتي

. اصلا بدون من تحجي اني نازلة ما كاتلة روحي على كعدتك الحلوة
اشو شوكت ما اجيك الكاك عايش دور المالك الحزين

انطاني ظهره وما جاوبني
نزلت واني ابتسم بنص الدرج وضربت كصتي اهو
وانا حلفت بعد ما احجي وياه

شلون نساني حلفاني بكلمة وحدة نساني حتى اسمي
شلون بية وتالي وياي

سمعت صوت امي تصيحني
نزلت بسرعة خاف تشوفني وتكوم تحجي علية وترزلني رحت عليها كانت كاعدة بالهول

.. ها يمة صحتيني

.. اي يمة صحتلج ردتج بشغلة
.. امري يمة

اشرتلي على مكان بصفها
.. تعالي كعدي يمي حتى احجي وياج

كانت نور كاعدة يمنا
رحت كعدت يمها وكلبي خفق امي ما تسوي هاي الحركات ولا تنعم صوتها الا وراها شي بلعت ريكي

باوعتلي وكالت .. شوفي يمة اليوم خالج حسن فاتحني بموضوع خطوبتج انتي ومؤمل وانا گلت اكعد احجي وياج براحتنا قبل لا يجي اخوج مهيمن

هنا الموضوع طلعت السالفة بيها خطوبة
لا وتريد تحجي وياي لوحدي حتى تكدر تسكتني اذا ارفض بس اذا ارفض ومهيمن اكيد ما يوافق

.. اكول يمة احنا مو سدينا هذا الموضوع وانتيهنا منه شنو رحمة الله من عادها ادري كم مرة رفضته لهذا استاذ مؤمل شنو ما عنده احساس

.. اكلي تبن واحجي عدل اشو طالعلج لسان ترة بعدج حبوبة ما صرتي دكتورة وكعدتي تتغلين علينا

ابن اخوي الف وحدة تتمناه ما متعوق عليج بس غير هو اخوي حسن شاري قربنا

والا انتي ام لسان لو نظل عليج الله وكيلج محد يدك بابج

.. اهو يمة ادري نبتلي على عمرنا اذا رفضنا ابن اخوج
ونصير ناس مو زينين اذا كلت ما اريد اتزوجه
حلوة هاي قابل هي بالكوة

.. وجعة وغمة نصي صوتج فضحتينا
لا تخليني اكوم عليج واطين عيشتج
سمعني بالاول وبعدين احجي

حجيت بقلة صبر .. كولي يمة اسمعج
.. خالج حسن كال ما دام حوراء خلصت السادس ودخلت الكلية خلي نزوجها هي ومؤمل قبل لا تبلش
بالدوام وتنشغل وما تلحك على تجهيز نفسها

.. والله والنعم منه خالي طلع يفتهم وخوش يفكر
هاي شلون حلها والله جانت تايهة ولكاها

.. شنو ولج حضرتج كاعدة تصنفين على اخوي

.. لا حشاه ماعاش الي يقلد على اخوج
بس انتي الله يحفظج كلامج يدوس بالبطن اكلج
ما اريد اتزوج مؤمل تكليلي خالج يريد يزوجكم قبل الدوام. يعني كوة شلون
تحجين الصخر

.. صخر يكسر ظلوعج كولي امين

.. امين يارب اموت وارتاح من ملحّتكم علية

دخل مهيمن علينا وسمع صوتي وكلامي وية امي وسأل

.. شكو شصاير شبيها حور زعلانة

امي بس شافته بدلت الموجة وابتسمت
.. اختك كلشي ما بيها عيارة بنات

.. لا مو عيارة بنات كليله لمهيمن شبية ضايجة ماكو انا اكوله

.. ولج انتي صدك عوبة وتبقين عوبة وسليمة ما يصير براسج خير

جانت امي تحجي بغيض لان خربت خطتها
مهيمن.. اكول تحجون الموضوع لو شنو

رحتوكفت يمه وكلت .. انا اكلك امي رجعت فتحت موضوع خطوبة مؤمل وتكولي خالج حسن حجة وياي بريد يخطبج لمؤمل قبل لا تبدي الكلية

مهيمن باوع لأمي وكال.. اكلج يمة انتي شنو سالفتج
مو كلتلج من ذيج المرة تبلغيهم برفض حور
بس الظاهر انتي ما مبلغتهم برفضها وعايفة موضوع معلك
.. يايمة زحمة ارفضهم والله استحي ارد اخوي واكله ما الك مرة عندي بنتي ترفض ابنك ما يهلي اكسر بخاطر اخوي

.. ما دام هيج الحجي خلي الموضوع علية انا راح ابلغ خالي واكوله
اذا انتي تستحين من اخوج فانا ما استحي منه
كل شي بالقسمة والنصيب

صار وجه امي ينطي الوان وكل شوية تخزرني واني طلعت من يمهم وصرت اتجنب اكعد وياها لوحدي خاف تستلمني بالرزايل

جلال

رجعت اكمل حياتي لكن جسد بدون روح
هيج تكملة طريق

كنت كاعد يم عناد واصدقائي متجمعين ببيت عناد
حتى نسلم عليه لان عناد باجر يسافر للعمرة

انتبهت من صفنتي على ذراع عناد على كتفي
كال.. جلال اريد من ارجع الكة جلال صاحبي الاولي
ما اريد اشوف شبح جلال

ابتسم بأستهزاء .. ليش انت رجعت عناد الاولى حتى تريد مني انا ارجع مثل قبل

عناد جاوبني .. ما رجعت مثل قبل وما اريد ارجع لان عناد الاولي كان غلط يعني اكو فرق

وفاة اخوي غيرت كل مفاهيم الحياة عندي
وقلبت كل موازيني تكدر تكول بموت اخوي صار سبب
بهدايتي
مستحيل ارجع امشي بطريق الاعوج مال عناد القديم

للحظة حسدت عناد لان على الاقل كدر يلكة راحت باله
ويعرض عن فقدان اخوه

زين وانا شوكت ترتاح روحي وتنطفي هاي النار الي جاي تسعر جوة گلبي. يا ترى هم يجي اليوم الكة
راحة بالي
اتمنى احط راسي عالمخدة وما تزورني الكوابيس واصوات صراخ عائلة بيت خالي
تاكل براسي

ما اعرف شنو اسوي حتى اتخلص من هذا الالم
كانوا الشباب يسولفون بينهم وسمعت عناد يوصيهم علية ويكللهم

.. شوفوا خاف اسافر ديروا بالكم تعوفون هذا لوحده ترة يدفن روحه بسرعة وما نلحك عليه
فما اوصيكم بعد ديروا بالكم عليه

واحد اسمه عدنان
كال .. لاتوصي حريص هذا جلال قربان احطه بعيوني

دك نقالي وكان المتصل مهيمن
وهذا الثاني هم كل شوية يتصل عبالك عنده طفل وخايف عليه يضيع

رديت عليه .. ها مهيمن
.. انت وين اشو اتأخرت

عقجت وجهي .. شنو السالفة مهيمن ترة انا رجال شنو كل شوية متصل علية وتسألني انا وين
وحتى او اتأخر لا تخاف علية ما يصير بية شي
بزونة بسبع ارواح ما اموت. باقي على گلبيك

جاوبني مثل كل مرة .. بدون حجي زايد انا اتصلت عليك مو خوفاً عليك بس هاي امي اكلت گلبي
كل شوية تسألني عنك والا انا لو علية تحلم اتصل عليك
وانت بهذا مزاجك الزفت صاير انت تدري بروحك صاير غثيث وما تنطاق لو ما تدري

ابتسمت وجاوبته.. اي ادري بروحي غثيث
لان هو اني بذات نفسي ما طايق روحي
فاكيد الناس البقية ماراح تطيقني

.. رحمة الله امرءٌ عرف قدر نفسه
يالله مو تتأخر انا راح انام باجر عندي شغل ولازم اكعد من الفجر

.. وشنو الجديد بالموضوع انت كل يوم تكعد من الفجر
لو هوفلم حتى تجبرني ارجع من وكت للبيت

.. خايب انا لو اريدك ترجع من وكت للبيت
اجيبك سحل غصباً ما عليك بس انا كلت انطيك خبر حتى تسوي حسابك من ترحع للبيت وتدك الباب ومحد يفتحلك

.. روح مهيمن تصبح على خير لا تنتظرني احتمال اتأخر وية الشباب جماعتي

انهيت الاتصال قبل لا يسألني عن اي اصدقاء لان
صرت اعرف مهيمن
شكد يحاول يبين ان هو مو مهتم وما يحب يتدخل بحياتي لكن بالحقيقة تصرفاته تثبت عكس كلامه

طلعنا انا وعدنان. من بيت عناد
وصعدت بسيارة عدنان باوع علية وسألني

.. ها اوصلك للبيت
.. تصدك اذا كلتلك ما اريد ارجع للبيت
لان احس بروحي اختنك اذا رجعت

عدنان.. اهووو اثاري طلع كلام صاحبنا عناد صدك انت غركان يابة شبيك هيج مصعب الامور على روحك ترة كلنا على هذا الطريق يعني هاي سنة الحياة
يا اخي هونها وتهون

.. مو بيدي غضب عني راسي راح ينفجر من كثر التفكير بيهم تصدك اذا اكلك صرت اخاف انام بالليل
لان بس انام تهجم علية صور مرعبة واصوات صراخ مفزوعة.

تدري وصل بية الحال صرت ادور على اي شي ينسيني او يلهيني ويتعبني ومن التعب يغمى علية وانام
عدنان متعجب .. لهاي الدرجة انت متأذي

.. فوك ما تتصور
عدنان .. واذا اكلك عندي الك علاج مو بس ينسيك كوابيس الليل حتى اسم امك ينسيك

باوعتله بأمل وكلت .. الله وايدك والله ياريت

عدنان .. تعال وياي وانا اعلمك شلون

شغل السيارة وانطلق بيها ولزم نقاله واتصل على صاحبه وكله احجزلنا يمك ميز انا جاي وجايب وياي ضيف جديد وعزيز على گلبي الدنيا كامزة بوجهه

انهى الاتصال وباوعلي
.. شكل امك داعيتلك. الجماعة كلهم موجودين

وصلنا لمزرعة كلش جبيرة وبيها فلة فخمة ومسبح
كان اكو هواي سيارات فخمة صافة يم الفلة شكلهم عندهم عرس لان اسمع اصوات اغاني من بعيد
ركن عدنان سيارته ونزلنا ودخلنا لداخل البيت الكبير

وهناك وكان اشوف عالم من الف ليلة وليلة
نسوان ورياجيل واجواء حدث بلا حرج وبلحضتها
عرفت عدنان وين جابني

باوعت عليه وكلتله
.. عدنان بربك انا بروحي غركان وانت جايبني هنا يم هاي الشكولات بكل عقلك هذولي الي راح ينسوني ايم امي

عدنان لزمني من ايدي وهو. يضحك
.. دصبر يا اخي انت ليش مستعجل انت غير طلبت مني علاج ينسيك همومك وكوابيسك

وكفني يم ميز طويل وعليه مشروبات وعصاير ومقبلات اشكال والوان

اسمع اصوات ضحك البنات المايصات وعيونهن الشيطانية الي تتأمر عالضيوف

عدنان شال قوطية بيرة ورفعها. كدامي

.. هاي شنو عدنان

انا اعرف هذا شرب عرگ لان خالي الله يرحمه كان دائماً يشرب فصار عندي فكرة عنهن

بس ما عرفت شنو غاية عدنان
عدنان .. جلال انت شايف هاي القوطية
.. اي شايفها شبيها

.. هاي يسمونها ترياق الحياة و الاسم الثاني اسمها
راحة بالي يعني
اذا شربت من هاي القوطية عقلق راح يصفى وتنسى هموم الدنيا كلها اصلا تحس بروحك مثل. الطفل الصغير ما عنده شي يشغله بس يحب يلعب ويتونس

مديت ايدي واخذت القوطية من عنده وفتحتها
دجيب عسى ما تحط هسة كدامي سم اشربه بس كون انسى

يتبع

في البارت القادم

جلال

.. الو لحظة هذا مو نقال سلوان
شنو شلون!!!!!!
انت شكاعد تحجي شلون سلوان وكع بيد الدواعش
لا ياربي دخيلك

مع تحيات اختكم نهى الحسون