قضية لم الشمل الفصل الرابع وثلاثون 34 - بقلم نهى

#الكاتبة_نهى_الحسون
#قضية_لم_الشمل

السلام عليكم ورحمة الله وبركاته
اسعد الله مساءكم ❤️

حوراء

كنت استمع لكلام مهيمن وية جلال
اتصل عليه وسأله ليش اتأخر

بعدما انهى الاتصال وياه وسد التلفون نور سألته
.. ها مهيمن شنو جلال وين

مهيمن جاوبها.. لا تخافين عليه هذا طنطل
يكول راح اتأخر ببيت عناد
لان عناد باجر راح يسافر للعمرة

اباوع لعيونها لمعت بفرحة
لكزتها وهمست يم اذنها
.. شبيج شكيتي الحلك الي يشوف فرحتج يكول
عناد كان كافر واعتنق الدين الاسلامي بالجديد
فضحتينا لمي حلكج

دفعتني من كتفي وكامت من يمنا
وانا اضحك عليها امي شافتني وهزت ايدها
.. على شنو تضحكين فوك خيبتج روحتي علينا عريس لكوة
بالعافية على الي راح يكون من نصيبها وانتي ظلي مكابلتني وكاعدة جنج تيس من يعند

.. عمي انا راضية اصير تيس ولا اتزوج ابن اخوج
والف عافية على گلبها الي راح يصير من نصيبها
هسة الي يسمعج يكول رابحة اليانصيب لو متزوجة الامير وليام
ترة هو كله على بعضه سجاد الاملح الاجلح

جاوبتني امي بغيض ومهيمن كاتم ضحكته
.. اكلج تكومين هسة من كدامي لا صدك اطلع حركة گلبي بيج

دخلت كناري بالخط وكالت
.. لا حوراء بهاي انتي غلطانة وحرام عليج ظلمتي سجاد بوصفج
يعني مو لان انتي ما تحبينه
تكعدين تعيبين عليه وتطلعين الف عيب بي

والله اني شفته لسجاد كلش خوش ولد واخلاقه حلوة
وشكله هم حلو مملوح

كانت كناري تغرد وتحجي واني فاتحة حلكي
هاي شتحس مديت ايدي واخذت تفاحة من الماعون الي يم امي وصرت اكل بيها واباوع لريم

اشو هاي روحي كعدي يم امي وحجت بصوت ناعم

.. اكول خالة صدك سمعت سجاد ابن اخوج جاي يدور على مرة يريد يتزوج

جاوبتها امي بتلقائية
.. اي والله يخالة وطلب ايد هاي العوبة ورفضته
بشرفج اكو واحد يرفس نعمة الله برجليه

عضيت التفاحة وجاوبتها بغيض .. ونوب راح تسويني كافرة علمود رفضت ابن اخوها

ام مهيمن .. اششش انتي سكتي ما اسمعلج ولا كلمة
ريم .. عفية حوراء كافي خلينا نفتهم من خالة

اكول خالة هو سجاد شنو يشتغل
وكعدت امي تحجي لريم عن شغل بيت خالي واولاده

ما اشوف الا مهيمن قطع كلام امي وكال
.. شكو شعندج ست ريم نزلتي تحقيق عن اصل وفصل الولد
شنو راح تطلعيله جنسية لو عندج له وحدة تزوجينه

رمشت بعيونها وحجت بكل ثقة .. لا هذا ولا ذاك
بس كل ما في الموضوع ان شخصية سجاد عجبتني
وجاي اتحقق عنه يعني تكدر تكول جاي ابحث عن زوج مناسب

اختنكت وغصيت بالتفاحة وكعدت اكح
عزة بعينج كناري صدك قنبلة موقوتة هسة مهيمن يخنكها
لا والاخت تحجيها بكل ثقة خرب يومج ام عقل التنك

مهيمن عاط بيها .. ولج غضب انتي شلون تحجين وياي هيج
شنو حضرتج جاي تدورين على عرسان

ريم كمزت من مكانها على هدير صوت مهيمن وكالت .. لا ما جاي ادور على عريس بس بالصدفة عرفت سجاد يدور على مرة للزواج واني صرت افكر
يعني ما بيها شي اذا كنت اريد اامن مستقبلي

.. هسة انا اذا لزمتج وغسلتج هنا اكو واحد يلومني
ولج غضب بلاء الكلام الي جاي تكولي يسمونه قلة حياء
انتي نسفتي قاعدة البنات وكلبتي الموازين بهاي سوالفج

انا راح انجلط ويصير عندي شلل كله من وراج
الله ياخذني وارتاح

كان مهيمن عبارة عن كرة ملتهبة من النار
معصب احتار شلون يتعامل او يتصرف وية ريم

مهيمن اخوية كان هو الي يدير حياتنا
كان دائماً واثق من نفسه وبتصرفاته
ومسيطر من يتخذ القرارات ويتناقش وية امي بأمورنا. وحتى بشغله متمكن

لكن كل هاي الصفات تتبخر من يوصل التعامل وية ريم اباوع لمهيمن يفقد سيطرته على تصرفاته ويصير مثل الواحد الي داخل بحالة انذار ما يعرف شوكت يتم القصف ومن يبدي كناري يغرد صلوات
كله TNT قنابل كاسحة اباوع عليه يحتار شلون يقمع لسانها ويروضه
كوة يلزم روحه ما يخنكها

وهسة هاي وحدة من القنابل الذرية الي شمرتها علينا كناري

ريم .. اريد افتهم انت ليش معصب هو كان مجرد اقتراح
هسة الي يشوف وجهك يكول راح اروح اخطبه
اصلا من ورة صياحك خلاص بعد ما اريد سجاد سديت نفسي خلي ابن خالك على گلبك

مهيمن .. مو هو على الاساس انا بكيفج تردين وما تردين
ريم كلمة وعلكيها ترجية بأذنج
تحلمين اخليج تتزوجين وانتي بهاي تصرفاتج التعبانة
شوكت ما اشوفج اتغيرتي وصرتي مرة حوك ويعتمد عليها عود بساعتها انا ازوجج بيدي

.. يا اخي انت ليش هيج شايل همي
يعني مو مشكلتي اذا كانت تصرفاتي واسلوبي ما يعجبونك

بس مو معناها بقية الرجال مثلك ما يعجبهم اسلوبي وشخصيتي
منو يكول مو احتمال تعجبهم شخصيتي العفوية الطبيعية

ترة اصابع ايدك ما متساوية
مهيمن كام على حيله وكال

.. لاااااا انا لهنا ووصل حدي هاي لازم
احطها بالغرفة واقفل عليها يالله ترتاح
بالله شو تعاي خلي اعلمج شلون تحجين

اتجه على ريم
والنية واضحة بعيونه ريم كمزت من مكانها وراحت ووكفت ورة امي وكالت بتحذير

.. والله اذا اقتربت مني احرك الدنيا مو عبالك من تسوي هيج وتكعد تصيح راح تكدر تخوفني ترة هاي حركاتك متخوفني

كانت تحجي وهي خاتلة ورة امي تحتمي بيها

مهيمن .. كون انتي صدك مرة طلعي من ورة امي واوكفي كدامي وعيدي هذا كلامج

ريم .. ما اريد اطلع من ورة خالة شكرا خليني هيج مرتاحة بس هذا مو يعني اني اخاف منك
وهذا اسلوب المتنمرين رجاءا بطله لان ما احبه

عض ايده من الغيض وكال .. ااااااخ بختج بأمي

امي حجت وياه تردعه.. ولك يمة مهيمن خف على بنت عمك ما عليك منها تراها زايعة روحها بس لسان الله وكيلك بوخة كل خير ما بيها بس تنفخ عليها يغمى عليها عوفها خليها تحجي لوحدها لاتخلي عقلك وياها

جانت امي تحجي وانا اباوع لريم تهز براسها مستنكرة الكلام

.. يمة شلون اعوفها تحجي بكيفها باجر عكبة تداوم بالكلية شلون بينا من تكعد تحجي وية الشباب بهذا لسانها المزروف حتى ما تجيب التايه

وتعال منو بيهم راح يعرف بيها ان هي ثلثين كلامها
ما خاضع للرقابة ولا تقصده خو ما اظل اكعد الزم واحد واحد بيهم واشرحله سوء الفهم
واصحح وراها

.. صحيح كلامك بس علمها بهداوة مو هيج

.. يمة ريم محسوبة علية ما جاي تدرك جفصات لسانها
وانا لازم افهمها شلون تحجي وشوكت تحجي ومو اي كلام يطري على بالها تكدر تحجي بي

ريم .. اي بس انت مخلصها علية كله تزمخ وتصيح كلشي ما افتهم منك غير بس العصبية

مسح وجهه بصبر وسحب نفس عميق وكال
.. تعرفين شنو معنى كلمة حدود

ريم هزت راسها بموافقة وكالت .. اي اعرف
.. تمام لكل واحد بينا و له حدود المرة والبنية والرجال والشايب والطفل

كل هذولي الهم حدود وقوانين يتصرفون على ضوئها

يعني مثلاً عندج الطفل اذا غلط او سب واحد اكبر منه
ما راح نكدر نحاكمه وندينه بكلامه لان يبقى طفل مو مسؤل عن كلامه لكن لو كنت انا بمكانه وغلطت على رجال كبير اكيد ما راح بتقبلون تصرفي وراح يتهجمون علية
نفس الشي حالتج انتي لازم تصونين لسانج لان انتي مو طفلة ويعذرونج

انا اتشدد وياج لان اعرف الوضع بالكلية شلون يكون يختلف عن عالم المدرسة والطالبات والمدرسات الي انتي كنتي

عايشة بي يعني راح يكون هناك شباب وغلبهم يصيدون بالماي العكر فاريدج تكونين فطنة ونبهة
ما اريد احد يستهين بيج ويستغل عفوية السانج ضدج

وبساعتها اذا صار الخايف منه صدكيني انا ما راح اكعد اسكت اكيد احرك الكلية فوك روسهم

كان مهيمن يحجي ويعلم بريم واني وامي صافنين عليه
وريم بقت ساكته تستمع لمهيمن ما قاطعته شكلها هي الثانية هم مقتنعة بكلامه

تقريباً حتى اني استفاديت من كلام مهيمن صدك انا هم
لازم انتبه لكلامي بالكلية ماكو بنات خوالي وعركة بالساحة وفزعة ووحدة تركض ورة الثانية

اكيد هناك لازم نصير ثكيلات اوووف شنو هاي من هسة احس اختنكت من ورة التقييد

بعدها مهيمن انهى كلامه وكال
.. انا فايت انام يمة كعديني الفجر وياج حتى اروح للشغل

.. الله وياك يمة تصبح على خير

طلع وتركنا وريم مشت من كدامي وحجيت
ابسمرها

شعدها اليوم المراءة الحديدة اليوم ولا عرفتج
شحلاتج وانتي خاتلة ورة امي جنج تويتي بيوم ينهزم من سلفستر ويختل بحضن المرية العجوز حتى تحمي
عيناً كان هذا منظرج

ريم دفعتني وكالت .. يا ثقل دمج صاير كلش غثيثة
بالله شو بعدي عني

راحت ريم وامي دخلت لغرفتها حتى تنام
واني شغلت التلفزيون بحجة اريد اسهر واباوع فلم كل شوية اباوع للساعة شنو السالفة جلال وين صار اشو كلش اتأخر وهالشي مو من عوايده

دخلت نور وكعدت يمي وهي الثانية شكلها مثل حلاتي
هم ظال بالهاعلى جلال

ورة ساعتين حسيت عيوني قفلت كلش نعست
باوعت لنور لكيتها لازمة النقال ووجاي تتصل

وتباوع عالشاشة منتظرة الرد
بعدها سدت النقال وهي تحجي
.. استغفر الله هذا وين صار اتصل عليه وما يرد

كانت تقصد على جلال
.. الغايب عذره وياه لايظل بالج ترة كال يم اصدقاءه
يعني انتي ومهيمن هم شوية خفوا عليه
وعوفوا براحته يعني بالاخير يبقى جلال رجال وهو مسؤول عن نفسه اكيد ما يحب احد يتحكم بي

كنت احجي وية ونور عن معرفة لان
قربي من جلال وهو بفترة حزنه خلاني اعرف عنه هواية امور بشخصيته والي عرفته جلال حر مثل الطير ما يحب القيود

نور.. احنا نسوي هيج وياه من حرصنا عليه
.. كلامج صحيح بس احياناً الحرص الزايد يأذي ويخنق

بقت نور صافنة تفكر بكلامي واني
نهضت من مكاني وكلت
.. نور اني راح افوت انام

دخلت للغرفة حتى انام وتركت نور تنتظر جلال كان بالي متطمن اكو من ينتظره ويتأكد من رجوعه للبيت ويفتحله الباب

حطيت راسي عالمخدة واني ابتسم واتخيل شكل جلال وعيونه وجهه مطبوع بعقلي مثل الصورة كل يوم
قبل لا انام يجي خياله على بالي
ياربي شكد احبه يمكن هو حتى ما يفكر بية ولا اطري على باله لكن امر الحب مو بيدي

مثل الحظ يانصيب ما احد يكدر يختار حبيبه بكيفه
الحب مثل الفلاونزة يعدي على غفلة ما نحس الا واحنا واكعين مرضى

غفيت واني افكر بجلال وبالكلية باجر راح يكون
اول يوم و هواي متحمسة

بعدها بفترة فزيت على صوت حركة باوعت لكيت نور جاي تفرش بالكاع شكلها راح تنام

سألتها.. ها نور شنو جلال رجع للبيت

جاوبتني بصوت ناصي .. اي رجع والاخ اول ما وصل حتى ماكلف روحه يكلي ليش اتأخر
كبل عافني وراح صعد فوك بالسطح وكلي عوفيني لوحدي لا تصعدين وراي
والله حيرني هالولد

اتمددت على فراشها وتغطت واني رجعت حطيت راسي عالمخدة حتى اكمل نومتي.
ورة ساعة كعدت عطشانة كمت من فراشي ورحت للمطبخ حتى اشرب ماي

بالرجعة سمعت صوت واحد حاي يتقيء
اتبعت الصوت كان جاي من السطح

شهكت عزة هذا جلال بس لا مريض
تلقائياً بدون تفكير لبست شالي وصعدت فوك
بسرعة. حتى اشوفه

كان ضوة السطح ضئيل لكيته راكع على ركبته
ومدنك يتقيء

اقتربت منه .. جلال انت مريض!!!! كلي شنو يوجعك
راح اروح اصيح لمهيمن يجي ياخذك للمستشفى
يمكن اتخربطت صحتك

مسح حلكه ورفع راسه وعيونه حمر وكال
.. لا لا ما يحتاج لا ترحين تكعدين مهيمن بس جيبيلي ماي اغسل بي وجهي

رحت نزلت جوة واخذتله سطل بي ماي وطاسة من الحمام وخاولي صغير

صعدتهم له وهو اخذهم مني وصار ينظف نفسه بس انتبهت عليه ايديه كانت ترجف او ضعيفة لان كان يزلم الطاسة وتوكع منه على مرتين عاد المحاولة

حيل كسر خاطري بقيت واكفة ولازمة المنشفة
اباوع عليه حتى غسل راسه وبلل ملابسه كان ما مهتم انطيته المنشفة واخذها مني وكام من مكانه وراح قريب عالسياج واتمدد بالكاع

.. شنو جلال انت راح تنام هنا بالسطح
حجة بصوت تعبان منتهي
.. اي اريد انام بالسطح بس لا تصيحين نصي صوتج سطرني كلش عالي

رمشت بعيوني مستغربة هذا شبي اني شوكت مصيحة
عليه اصلا كان كلامي كله ناصي

اوف منك يا جلال
رجعت نزلت جوة وصعدتله فراش وفرشته له بالسطح
وندهته حتى يكعد
وبالكوة يالله حرك روحه ونام بالفراش

اني باجر لازم اكول لنور حتى تحجي وية مهيمن وياخذونه للدكتور اخوهم كلش مريض بس محد منتبه عليه

معقولة جلال يحاول يداري بمرضه بعيد عنهم
توصل بي يهمل صحته لهاي الدرجة هو كاره عمره والدنيا

تركته ونزلت جوة ونمت واني ادعيله بگلبي ربي يشفيه

مهيمن
كعدت الصبح وعيوني وكعت على فراش جلال
اشو ماكو هذا وين راح

كمت من مكاني ودخلت للمطبخ ولكيت نور وامي كاعدات سألت نور
.. اكول نور شنو جلال وين اشو ماكو بفراشه وينه

جاوبتني .. البارحة اول ما وصل صعد بالسطح خاف نام فوك
.. ليش هو بيش الساعة رجع للبيت

.. الساعة ب٢ ونص بالليل واول ما وصل راح صعد
بالسطح شكله جان كلش ضايج

تركتها وطلعت من المطبخ وصعدت فوك للسطح ادور عليه

لكيته فارش فراشه ونايم بنفس ملابسه حتى ما مكلف نفسه يبدل هدومه
هالولد عيشني بقلق كل يوم طالع لي بسالفة حتى شغله همله ما اعرف شتصرف وياه

لا اكدر اقسى عليه خاف لا يهج ويعوف البيت ويطلع وانا اعرف ما عنده احد يروح له

ولا انا اكدر اسكت على تصرفاته وامشي السفينة
على عماها بالحالتين اذية

اقتربت منه وكعدته
.. جلال كوم اكعد كافي نوم
جلاااال اكعد

حط المخدة على راسه وجاوبني بصوت مكتوم من جوة المخدة
.. شكو شتريد من صبح الله جاي تكعد بية

.. كوم صاير تنبل مال نوم محتاجك اليوم وياي بالشغل
عندنا اليوم اثنين سيارات حمل جايات من الميناء
واريدك توكف على راس العمال حتى ينفضوها

.. روح انزل كدامي وانا جاي وراك
.. يالله بس مو تتأخر انا راح انتظرك جوة
استعجل

.. صار بس روح شكد لزكة

.. ها شنو شكلت
بعد المخدة ورفع راسه وكام من فراشه وهو لازم راسه وعاگد حواجبه
وكال
.. ما كلت شي روح كدامي وجاي وراك

نزلت وتركته
صارت ريم بوجهي
كانت ريم طالعة من الحمام
مرت من يمي وراحت للغرفة

ولفحني عطرها واتوغل بصدري
هاي البنية حتى من تمشي احس بيها مو تمشي عالكاع مثل العالم
جاي تمشي على كلبي

ما اعرف ليش هي من دون الناس كلها انا هيج مهتم بتفاصيلها
وهواية ادقق بكل صغيرة وكبيرة بتصرفاتها
حتى اختي حوراء الي ربيتها على ايدي ما كنت ادقق وياها بكد ما دققت وية ريم

بالبداية كلت هاي امانة ولازم اتصرف وياها بتشدد
وبعدين كلت هذا خوفي عليها من باب الحرص
وبعدها بررت تصرفاتي ان انا جاي اسوي هيج حتى احميها

بس المشكلة كل اعذاري وحججي خلصت وما عادت تنفع او تقنع عقلي القافل
انا شنو اريد منها بالضبط

رحت بدلت ملابسي ودخلت للمطبخ لكيتهم مجهزين الريوك كعدت اكل

دخلت ريم للمطبخ وهي لابسة زي الكلية كانت نور
تصب جاي

ابتسمت لأمي ولنور ومن باوعت الي اختفت ابتسامتها وتحولت شفايفها لبوز
وكالت من ورة خشمها
.. صباح الخير مهيمن

.. صباح النور

هاي لا يكون هيج ناوية توزع ابتسامات بالكلية
اااااخ يا الله الصبر الصبر
صرت اتفحص بملابسها اريد فد غلط بيهم حتى تكون عندي حجة

.. ويامن راح ترحين للكلية
.. شنو شبيك مهيمن نسيت البارحة حوراء مو حجت وياك على السايق وكالت ابن خالكم مؤمل راح ياخذنا وياه بسيارته هو هم يداوم بالكلية وحوراء كالت نخلي يوصلنا وندفعله
هو يصير ابو الخط الي يودينا ويجيبنا احسن من الغريب

.. ما لكيتوا الا هذا الاثول مؤمل
.. ليش شبي حباب

.. انتي خو عندج الناس كلهم حبابين
.. لا مو كلهم حبابين اكو بعضهم عكرة
مثل حضرتك

رفعت حاجبي متعجب على السانها وصلافتها
حجت .. شكو شبيك متعجب ترة انت بنظري مو حباب

جاوبتها .. اخر همي اصير حباب بنظرج
زين انتوا ليش ما تأجرون سجاد ابن خالي اشوف احسنلكم

دخلت حوراء للمطبخ وهم كانت لابسة زي الكلية
وكالت
.. لا اوووع سجاد ما اريده. فكنا منه كوة
خلصت من امي ونگتها. منا اني رفضته من اتقدملي ونوب يكعد يوصلني للكلية وامي تشوفه كل يوم غير تكعد تاكل راسي

كانت حوراء تحجي واني بالي وعقلي يم المصيبة الي كعدت كدامي وجاي تتريك

هو من شوكت صار الريوك خطيئة ومشهد اغراء
هو لو الشيطان اتربع بعقلي ويخليني اشوف كل حركة تبدر من ريم اغراء لو انا انضربت بعقلي وصرت ما اعرف اوزن الامور

رفعت كوب الجاي لشفايفها عاد انا هنا
نهضت من مكاني واتعوذت من ابليس

لا ما يجوز مهيمن ريم عرضك ومو حلال عليك هيج تكعد تتمعن بتفاصيلها ما يصير هو المفروض ابدي احميها من نفسي وبعدين اكعد احميها من باقي الناس

وهذا حالي من يوم الي وكعت عيني على ريم ودخلت لحياتي صرت ما اعرف راسي من رجلية
حياتي صارت فوضى وما جاي اسيطر عالامور من ناحيتها

امي صاحتني .. ها يمة اشو ما اتريكت ليش

.. ما اشتهي شبعان اكلج يمة قبل لا انسى اليوم راح
اجيب اسطى يشوف الفوك

البارحة اتناقشت وية صديقي علمود ابني قاط ثاني للبيت

امي لمعت عيونها وكالت
.. اي والله يمة فكرتك عين العقل احنا نحتاج
تبني قاط ثاني بالبيت لا تنسى انت وراك زواج
والبيت يحتاج نوسعه ونعدله

ما اعرف ليش هي جابت طاري الزواج وانا عيوني حطت على وجه ريم

انتبهت عليها جمدت بمكانها ونزلت كوب الجاي ورفعت عيونها وباوعتلي
كانت نظرات عيونها بيهم
لوم وحقد بنفس الوقت

ريم

ام مهيمن حجت كلماتها بود وية ابنها واني احس واحد عصر گلبي من جابت طاري عرسه
رفعت راسي اباوع عليه لكيته يراقبني
شايفين واحد يكره ويحب نفس الشخص بوقت واحد

جاوبها مهيمن وعيونه علية .. الله كريم يمة العافية بالتداريج هسة خلي ابني القاط الثاني ويصير خير
بعدما اتفق وية امه على موعد جية الاسطى

رفع واسه وصاح
.. شنوووو جلال وين صرت لا يكون رجعت نمت مرة الثانية

حوراء

كعدت يوم ثاني كعدت من الصبح واني ببالي شغلتين
اتطمن على جلال ودوامي بالكلية

بدلت وجهزت نفسي ورحت للكنتور وطلعت
العلك الاخضر مالتي الي امي جابته الي من الزيارة

وطلعت لكيت مهيمن جاي ينزل الدرج وراح للمطبخ

ما دام الكل كاعدين بالمطبخ
استغليت الفرصة ورحت صعدت فوك حتى اشوف جلال شلون صار اليوم
البارحة عفته صحته كلش متدهورة والظاهر مهيمن بعده ما يعرف لان نزل
شكله عادي ما بي شي

طلعت للسطح ولكيت جلال كاعد بفراشه وشعره مهوس والحواجب معقودة ولازم راسه يمسد عليه

رفع راسه وشافني
.. استغفر الله انتوا شنو سالفتكم انتي واخوج واحد يرفع وواحد يكبس اتخلص من اخوج تجين انتي شنو اكو واحد موصيكم علية ماعندكم واحد غيري تلطشون عليه

.. استغفر الله يعني اخلاقك زي الزفت حتى وانت ستوك كاعد من نومك
يا اخي متكول شنو مسويلك اني واخوية وهشكل تحجي علينا
على فكرة اني واخوي رحمة نازلة عليك من السما دير بالك تفرط بينا

اقتربت منه وكلت له
بالله شو مد ايدك
رفع راسه وباوع علية
.. شكو شتردين من ايدي

.. لا تخاف ما راح اخطبك
نفذ وانت ساكت

مد ذراعه كدامي وباوعت لمعصمه
وطلعت العلك من جنطتي ولفيته مثل السوار
حول معصمه وشديته

عكد حواجبه مستغرب حركتي وسألني
.. ليش لفيتي ايدي بوصلة قماش
شنو هذا سوار

ابتسمت على جهله للعلك وكعدت افهمه
.. شوف يا محفوظ السلامة هذا السوار الاخضر احنا نسمي علك

نستبرك بي لان امي مزورته اضرحة اهل بيت النبي
يعني مثل التذكار او اثر
واني هذا العلك اتفائل بي
تصدك اذا اكلك ما اروح وادخل امتحان الا ولابسة هذا العلك بيدي

.. يعني افتهم من كلامج شنو انا راح امتحن

.. لا انت حالتك تختلف لفيت العلك على ايدك بنية الشفاء العاجل بلكي تطيب

.. ليش انا مريض وما ادري بروحي
.. لعد منو الي البارحة الليل كله يتقيء واتخربط علية
والله لو ما انت وقفتني وكلت لا تصيحين مهيمن
جان نزلت وخليته ياخذك للمستشفى

باوع علية بشك مثل الي انصدم وهمس متفاجيء
.. البارحة ؟؟؟؟؟؟

.. اي البارحة شنو شبيك جلال نسيت
حتى فرشتلك بالسطح لان حضرتك من التعب نمت بالكاع جلال انت لازم تروح للدكتور

جان صافن وجاوبني .. ها اي الله كريم اروح
كان يحجي وتفكيره شارد

كمت من يمه وعدلت تنورتي ومسدتها لا تتعقج
.. يالله اني راح انزل
جلال دير بالك تنزع العلك وتشمره
خلي بيدك للحفظ

اباوع عليه مسح وجهه ضايج ما اعرف شبي وكال قبل لا انزل

.. حور
.. نعم
.. مرة ثانية اذا شفتيني بهيج حالة لا تقتربين مني
فاهمة

.. يا حالة جلال انت كنت البارحة مريض شلون تريدني اشوفك متأذي واعوفك

غمض عيونه بصبر وكال
.. حور لمرة وحدة بحياتج سمعيني ونفذي الي اكلج عليه اذا صادف مرة الثانية وشفتيني بهاي الحالة
اياني وياج تجين ناحيتي بيج ما بيج ابتعدي عني

عقدت حواجبي مستغربة طلبه الغريب هذا شبي
وجاوبته .. على كل براحتك اني ما ذابحة روحي عليك
مشكلتك هاي تريد تتمرض لوحدك هاي بقت يمك
اني ما يخصني

بقيت ادردم كدامه حتى ما ابين غيضي منه ومن طلبه
اشكد اضوج من يصدني ويبعدني عنه

واني بذيج الايام توقعت ان انلغت الحواجز بينا
وصرنا نتشارك كلشي بس شكله جلال هو نفسه ما تغير

سمعنا مهيمن يصيح بصوت عالي على جلال حتى
يستعجل

كام من فراشه وهو بعده تعبان واني تركته ونزلت اسمعه يحجي
.. ااااخ راسي راح ينفجر عبالك داعمني قطار
انا شسويت بروحي

جلال
رحت نزلت للحمام وفتحت الدوش ودخلت جواه حتى
راسي يفك شوية احس بي جاي ينكد من الالم

فاجئتني حوراء من حجت عن الصار ليلة البارحة
وانصدمت اكثر لان انا ما اتذكر ولا اي شي من
هذا كله

فعلا كلام عدنان شكل علاجه جاب نتيجة
بس الي زاد خوفي ان حوراء
كانت البارحة يمي وشافت وضعي وانا اتقيء

خفت عليها مني لا ااذيها وانا شارب فحذرتها بعد ما تقترب مني

ما اريد اخسرها لان هواي خسرت اعزاز بحياتي وما مستعد اخسر بعد.

حوراء الشي الوحيد الحلو بحياتي
كانت مثل الوردة الحمرة الندية بوسط حديقة محتركة وصارت رماد

جهزت نفسي ورحت وية مهيمن للشغل
ومهيمن استلمني اكس ومربع بالشغل حتى ما انطاني مجال اكعد افكر بالصار

وهالشي انا رحبت بي
حتى للبيت ما رجعت بقيت بالشغل
صرت مثل الناعور افتر من مكان لمكان

دك نقالي وكان المتصل عدنان
عفست وجهي وجاوبته

عدنان.. ها شلونك ابو الشباب بشرني شلون صرت اليوم
.. زين الحمدلله

.. البارحة لان تشرب اول مرة ما اتحملت معدتك
بس لا تخاف ما يصير بيك شي
كلي اليوم تريد احضرلك الميز لو عندك خطط ثانية

قاطعت كلامه واعتذرت منه
.. لا عدنان ما اريد اعيد الصار

جنت احجي وانا اتخيل منظر حوراء وجهلها للموضوع
كرهت نفسي

ريم

داومت بالكلية وبديت اتعرف على بنات
وسوولنا حفلة تعارف لطلاب المرحلة الاولى

كنت احاول اتجنب الشباب واكتفي بس بالسلام
مو خوفاً من مهيمن وانما شفت اغلب البنات المحترمات كانت تصرفاتهم هيج
اتعرفت على بنية حبابة اسمها دعاء كانت بنت عميد الجامعة
مر شهر على دوامنا

وحوراء خطية كلما اشوفها
تكول وهي حاصرتها البجية
.. ولج ريم صدمة .. صدمة
ما جنت متوقعة الدراسة هيج صعبة ما جاي الحك على الدكتور من يلقي المحاضرة ولا جاي افتهم اي شي
المواد كلها صعبة

اني كنت متوقعة ان ماكو دراسة بعد اصعب من السادس اثاري طلع السادس صف اول
بالنسبة لصعوبة المواد الي جاي ادرسها

جلال كان ياكل ويستمع لكلامنا وفاجئنا من كال
.. حور ترة كل طالب بأول سنة هيج يعاني
يعني مو لان انتي طب عبالج صعب

اتذكر حتى انا اول ما دخلت مرحلة اولى هندسة ميكانيك حسيت بروحي ولا طگة
لكن من بعد ما اتعلمت على نظام تدريس الاساتذة
سيطرت

كنا اني ونور وحدة تباوع للثانية فرحانات بمشاركة جلال ويانة بالكلام

دخل علينا مهيمن مثل الاعصار والوجه مدخن
امه شافته وكالت
.. الله يساعدك يمة نصبلك غدة

جاوبها وهو يباوع علية وكال .. يمة تعاي عندي حجاية وياج

طلع قبلها من المطبخ
وهي كامت من مكانها وراحت وراه

حوراء.. يا ستار ابو الهمة غضبان
جلال.. هو اخوج شوكت ما اجيته مطنكر ما اعرف شبي عبالك واحد عنده ثار

.. جلال رجاءاً ما اسمحلك تحجي على اخوية
رفع حاجبه وجاوبها.. ترة هو هم اخوية والي حق بي

كان جلال وحوراء يحجون وسمعنا صوت مهيمن يصيح بعصبية

.. انا كلت لا يعني لا وهذا ابن اخوج حسابي وياه بعدين اذا ما كسرت رجليه وفكست عيونه الحيوان
ما اطلع مهيمن

جاوبته امه وهي تهدي بي
.. ولك يمة هسة الي يسمعك يكول ساطي على عرضك
ترة هو ما سوى شي غير اجة ودك الباب وطلبها منك

يعني فهمني وبن الغلط بالموضوع

.. خلي يولي الحيوان والله انا من الاول كلبي ما مرتاحله يعني احنا امنا بناتنا عنده جتى يوصلهن للكلية

شنو يسمونها يجيني ورة كم يوم يطلب ايدها مني
معناها عيونه كانت تبصبص عليها والعار كاعد يتمعن بيها

بس والله انا اعلمه اذا ما خليته يبطل يرفع راسه ما اكون ابن ابوي

حوراء كالت بصوت ناصي
.. عزة هاي بس لا على مؤمل
سألتها بهمس.. ليش شبي مؤمل

.. مو نسيت اكلج هو ذيج الايام كعد يسألني عنج
وشكله كان يفكر يطلب ايدج للزواج

.. وزين هو ليش معصب

كنت احجي واني محتارة بتصرف مهيمن وغضبه
معقولة يغار لا مستحيل هو بالاول خلي يحبني
وبعدين يكعد يغار

اصلاً اني اشك مهيمن عنده گلب مثل بقية الخلق و العالم ويعرف يحب

نور كانت تباوع علية وبعيونها نظرة العارف

جلال

قبل ثلاث ايام اتصلت على سلوان وبلغني ان هو لكة
واحد راح يساعده هو والشباب حتى يهربهم من الموصل
والبارحة بالليل طلعوا

بس اشو اليوم كله اتصل عليه يدك وماكو رد معقولة
النقال وكع منه او تركه بمكانه زين كان انطاني علم
بالموضوع جان كلي انا ما راح اخذ النقال

بقيت قلقان كنت بالمعمل اشتغل واتصل
صار الليل وماكو اي نشدة حتى الي اعرفهم كم واحد من اتصلت عليهم
هم جانوا مثلي ما عندهم علم بمكانه

اجة ومهيمن وشافني وسألني .. شنو شبيك صاير شي
.. والله يا مهيمن خايف على سلوان
اتصل عليه بس ما يرد

.. هاي شنو يعني بعدك لحد الان ما عرفت طلع من الموصل لو بعده

.. ماكو اي جواب منه وكل الي اكدر اوصللهم من جماعتنا
ما عندهم اي خبر ممكن يطمني على سلوان
والله اذا صار لسلوان شي اموت

.. كول يالله لا تفاول على الولد

خلصت الشغل بالمعمل تقريباً
و مهيمن طلع وكال ..من تخلص شغلك اقفل انت المعمل اني رايح

جنت طول اليوم افكر بسلوان هذا وين راح
لزمت النقال بمحاولة عقيمة يائسة
واتصلت عليه عسى ولعل

اجاني الرد وگلبي فز
كان الصوت غريب هذا مو صوت سلوان
.. الو لحظة هذا مو نقال سلوان
شنو شلون!!!!!!
انت شكاعد تحجي شلون سلوان وكع بيد الدواعش
لا ياربي دخيلك

حسيت مثل الصاعقة ووكعت على راسي من كالوا سلوان اخذوه الدواعش

صرت مثل المخبل كل شوية اتصل واخذ المعلومات
عن سلوان

كل الي افتهمه ان الدواعش قبضوا على سلوان
ولحد الان ما يعرفون اخباره عايش لو ميت

وكعت من طولي وكعدت بالكاع
.. وصرت اتصارع واتلاوة وية الافكار السودة
صرت اروح وارجع بالمعمل لوحدي
ما اعرف شسوي والمن الجيء حتى اخلص
صاحبي منهم.

ضربت راسي بالحايط من القهر
ما بقى عقل براسي شلون وشسوي احس بروحي عاجز مثل المشلول

اتصل علية مهيمن علمود يتطمن
وانطيته الاخبار سكت ما كال شي شكله هو الثاني هم انصدم بالخبر

سألني .. هسة انت وين
.. بالمعمل

.. انا جايك
.. ما تكولي شتسوي تجيني
ابقى بمكانك لاتجي انا بس اخلص الي بيدي اجي للبيت

مهيمن كال.. عندي جماعة ضباط اعرفهم مسافرين للموصل راح اسألهم الك بلكي يفيدون

.. ماشي
راح اسد النقال
غلقت الخط رفعت راسي بلحظة ضعف وهوان
غمضت عيوني واتصلت على عدنان
وطلبت منه يجيبلي السم للمعمل حتى اشربه واتزوهر

لان اذا بقيت لحظة وحدة بعد افكر احتمال اتخبل
هروب ضعف اي شي الجان المهم ما اريد الليلة ابقى اتصارع وية افكاري السودة

يتبع

احداث البارت القادم

حوراء
خايفة ومرعوبة ومصدومة وجسمي كله ينتفض
جوة ايد جلال لا لا مستحيل هذا مو جلال هذا الوحش جلال

اتمنى لكم قراءة ممتعة
مع تحيات اختكم نهى الحسون