قضية لم الشمل الفصل التاسع وثلاثون 39 - بقلم نهى

#الكاتبة_نهى_الحسون
#قضية_الشمل

مساء الانوار والسرور عليكم 🌹🌹🌹

لي مع الزمن ثأر
فالدهر عاث بحياتي خرابا واخذ مني كل عزيز
دون رحمة
ها انا انهض ثائراً ضد ظلمه
عازماً اخذ ثأري
والانتفاضة ضد القدر ، يكفي ما خسرته الى الان
ان الاوان لكي اقف بوجهه

جلال
فاجعة ورة فاجعة
بعده جرح حزني ماشفى ولا طاب
بعدني ما لحكت ارفع راسي من كسر فاجعة بيت خالي

سلوان صاحبي وصديقي وظلعي كضيت وياه احلى ايام
عشنا وشفنا الحلوة والمرة سوية

اعاين عالناس تمر من يمي وارجع احاجي روحي واجر حسرات ولك سلوان شبسرعة
استعجلت عالموت ماكلت هذا شلون راح يكضي العمر من بعدك

غمضت عيوني وانا احس بنفسي عاجز عن رد القدر

عناد واكف يباوع علية ونظرات الحزن والخوف من ردة فعلي مرسومة على وجهه

حجة بصوت هاديء وكال .. انا لله وانا اليه راجعون
راح شهيد الف عافية عليه

كنت اجاهد مثل الغركان حتى انفض عني غيمة الحزن الي كتمت على انفاسي وظلمت عقلي
اني تعديت مرحلة الحزن صرنا اني وياه اصحاب

هسه صرت اريد انتقم من الي اخذوا
اعز ناسي من عندي اريد اسوي شي يشفي غليلي ويطفي نار گلبي

نهضت من مكاني بدون ما اجاوب عناد
هسة اجة وكته وصار لازم اتخذ القرار

رحت اركض عالسريع ركبت الدراجة واسمع صوت عناد يصيح وراي
.. ولك جلال على وين ناوي تروح وانت بهاي الحالة

شغلت الدراجة وحركت من غير ما ارد عليه
كنت ما اشوف كدامي
احس بروحي اتعديت مرحلة الالم والحزن وصلت لمرحلة الغضب والانتقام

وانا بالطريق
طلعت من البيت تارك نور اختي قلقة
بلغتها بوفاة سلوان بس ما كلتلها راح اسافر
انا مسافر وعايف كل شي وراي لا بلغت احد ولا فهمتهم انا على شنو ناوي لان اعرف كلش زين مهيمن راح يعترض على قراري ويحاول بكل طريقة يردعني

فتحت الدفتر وطلعت الكارت الي موجود عندي دورت على نقالي
وغمضت عيوني بغضب استغفر الله هسة وكتها انساه

اكيد نسيته بالمعمل
اجرت تكسي وطلب منه يوصلني للكراج حتى مناك اركب سيارة واسافر

بس قبل كل شي لازم اجري اتصال مهم
خلي اشوف احد ينطيني نقاله اتصل بي

وصلت للكراج ولكيت كشك يبيع ارصدة وحلويات وغيرها
اشتريت رصيد ابو الخمسة وانطيته للرجال ابو الكشك وطلبت منه يسلفني نقاله

.. عمي نقالي ضاع واريد اتصل على اهلي و انطيهم خبر
حتى ما يظل بالهم
جاوبني الرجال وهو يمد نقاله
.. هاك عمي اتفضل

اخذته منه وطلعت الكارت الي موجود بي الارقام
والله واجة يومك

اتصلت على اول رقم وبعد خمس محاولات اجاني الرد
الو نعم تفضل

العفوا سيدي حضرتك الضابط علي ؟؟

.. اي نعم تفضل منو وياي
.. انا جلال قربان اذا تتذكر علية

لحظات وكال متفاجيء.. جلال الي شفتك بالمستشفى قصدك
اي اي تذكرتك

.. اي نعم هو انا نفسه
.. اتفضل بشنو اكدر اخدمك
.. اذا تتذكر قبل سنتين تقريباً عرضت علية عرض وانا بوقتها رفضت

.. شلون ما اتذكر هذا الشي كان موثق عندنا وبي اقوالك
بس ماكلت شنو تريد بالضبط

.. حبيت اعرف اذا العرض الي قدمته الي بذاك اليوم
بعده لو فات الاوان
انا قررت اعاونكم واحط ايدي بأيدكم بس انا خايف تكولي اجيت متأخر

الضابط جاوبني .. ان تأتي متأخر خيراً من ان لا تأتي ابداً

ماكو شي اسمه فات الاوان ما دام داعش بعدهم يصولون ويجولون بأرضنا اذن بعده الخطر يلاحقنا ويحيط بينا

شوف جلال هذا الكلام يطول لازم تجي تشرف يمنا ونكعد نحجي ونتفاهم انا حالياً
ببغداد راح انطيك العنوان وانت هناك تجي
سؤال انت وين هسة
.. انا بالبصرة

.. اها يعني وراك سفر

..نعم سيدي انا هسة راح اطلع بوجهي لبغداد
ها قبل لا انسى هذا الرقم مو الي خاف تتصل
انا نقالي تركته يم اهلي

.. تمام مو مشكلة انتظرك توصل لبغداد وانا هناك استلمك
ونتفاهم

كنت هواي مستعجل وحسيت بخيبة امل لان الضابط كال تعال لبغداد
بكل ضني راح يطلب مني اسافر مباشرتاً للموصل
كان دمي بعده يفور وبعدها غصة فقدان سلوان تحرك بگلبي

نور
صار الفجر ومهيمن رجع للبيت ووجهه اظلم ما كدر يعرف مكان
جلال

ام مهيمن شافته وصل واجتي عليه وكانت مرعوبة
.. يمة مهيمن شنو هالكلام الي سمعته من خالك

مهيمن كعد بالكاع واتكأ عالحايط وكال بصوت تعبان
.. وشنو الي سمعتيه من خالي
.. يكول مهيمن كال اذا باجر الظهر ما بين خبر من جلال انا اسافر للموصل وراه

يمة صدك تريد تسافر للموصل

.. اي يمة ماعندي غير حل

.. يمة اصخام الصخم وجهي ولك يمة انت شكاعد تكول
.. شنو ترديني اسوي اخوي ما اعرف وين اراضيه وبيا مكان
وماعندي بالدنيا غير بس هو ترديني اعوفه يروح للموت وانا اكعد انطره

.. اي بس سفرك وراه مو حل
يعني تريد تسافر وراه على عمة وجهك لاتعرف هو وين ويا طريق اتجه

ريم

ام مهيمن تحجي واني گلبي انقبض من ورة تفكير مهيمن
معقولة يفكر يسافر وراه باوعت عليه كام من يم امه.

ما بي حيل ياخذ وينطي وياها بالحجي
طلع برة ورحت وراه. لكيت كاعد بالحديقة صافن وبيده النقال ونقال ثاني عرفته هذا نقال جلال

رحت اقتربت منه وكعدت بصفه
اول مرة اشوف مهيمن حيران
التفت وباوع علية. ما كال شي

سألته.. مهيمن صدك راح تسافر للموصل
.. اي اذا ما لكيته لجلال اكيد اروح وراه ومحد يكدر يمنعني حتى دموع امي ما راح تكدر توكف بوجهي

.. زين اذا لكيته برأيك شنو راح تسويله

.. هو مو بكيفه لو اعرف ارجعه وياي سحل عالبصرة اذا اضطر الامر

.. اي بس جلال رجال كبير وهو حر بتصرفاته

.. ماكو شي اسمه حر بتصرفاته
ما دامه دخل لهذا البيت واختار ياخذ دور الاخو معناها
لازم يعرف كل حقوق الاخ على اخوه
يتحمل كل تدخلاتنا بحياته
حياته صارت مو ملكه فقط احنا النا حق عليه ولازم يسويلنا الف حساب قبل لا يتخذ اي قرار

باوعت عليه وكلت .. مهيمن انت من شنو خايف اول مرة اشوف بعيونك خوف انت ليش هيج متمسك بجلال بالرغم هو ما صارله سنتين من دخل بحياتك معقولة جلال كدر يترك اثر بنفسك وبحياتك
بهاي الفترة

.. ريم الموضوع اعمق مما تتصورين
يكفي اسمه اخوية يعني ما يحتاج فترة زمنية حتى تتقوى علاقتي وياه
الاخو اول ما ينوجد ينخلق حافز الحماية اتجاهه تلقائيا هي فطرة
بشرية اغلب الناس تلكيهم مثلي

ريم انا عشت عمري كله وانا اعاين على خوالي واولادهم واعاين لروابط الاخوة بينهم وتماسكهم
انتبهت لشغلة رغم طيبتهم وياي ووية امي واختي بس ماكدروا يحسسوني بالانتماء

بقيت الشخص الوحيد بنظرهم خارج السرب شكد حاولوا ان ما بينون كدامي بس غصب عنهم الظروف تدفعهم يظهرون هالشي من غير ما يحسون

عرفت ان الشخص يكن الولاء لأقرب الناس اله وبعدين يجون البقية وراه

هذا حالي وية اهل امي كنت انعد من البقية الزايدة
الي عنده شي زايد ينطي لمهيمن كل شي
ملابس غراض حتى العواطف الزايدة يعطفون علينا وينطوها النا

حاولت ان ابين انا ما احتاجلهم بس الزمن يشمرني عليهم
وتصير حاجتي يمهم واكون بعازة السند

ومن دخل جلال بحياتي جنت متخوف منه بس مرت بية الايام ولكيت روحي غصب عني واكف مفتخر عندي اخو سند
يوكف بظهري واسنده ويسندني

كان مهيمن يحجي واني اسمعه كانت هاي اول مرة نتبادل الكلام اني ومهيمن بسلام بدون مناوشات وعراك ويحجيلي عن مخاوفه من غير ما ينتبه على نفسه

.. مهيمن لا تخاف على جلال اني واثقة ان هو مستحيل يتخلى عنك
مثلما سلوان صاحبه عزيز عليه اكيد انت اخوه اعز عليه
ما راح يعوفك ويدور وجهه هيج بكل سهولة

.. ما اريد شي بس اعرف هو وين
مسح على وجهه. وجر حسرة وكال وهو يباوع علية

.. كومي روحي نامي الوكت كلش اتأخر وراج دوام
.. شكلك تريد تصرفني وتبعدني عنك
لو بس اعرف انت ليش هيج تسوي وياي بينما وية نور وحوراء ما تتصرف وياهم هيج وتحجي وياهم براحتك
شمعنا اني تصدني

.. ولج ريم هذني خواتي
.. افتهمت قصدك يعني اقرب عليك مني

نهضت من مكاني معبسة وحيل ضايجة
لزم طرف ثوبي وجره حيل للكاع بحيث بسرعة كعدت يمه بالكاع وكال

.. اي انتي غير عنهن
لان انتي تحلين علية تردين الصدك وانا ما حاجيها
اضمها عليج على الله ما تنضم
من تجين وتكعدين يمي ما اعرف ليش الشيطان يتربع براسي
ويوزني عليج

رمشت بعيوني وكلت .. يعني قصدك يوسوس براسك حتى تأذيني

باوع علية وهو ضايج .. ولج ريم منين طلعتيلي بهذا الليل من وراج نسيت حتى ضيم اخوي

ولج غضب قصدي
انتي غلط وجودج يمي انا رجل وانتي بنية ومو اي بنية
لالا.. انتي بنية لسانها سابق عقلها
تخلين الواحد غصب عنه يطلع عن طوره ويحتار منين يبدي بيج
واتمنى تعرفين شنو قصدي وتكومين وتخليني لوحدي

كمت من يمه واني اباوع عليه واحلل بكلامه
.. يعني قصدك اني خطر تخاف لا توكع بالغلط وياية

.. عفية عليج صايرة تعجبيني من تحللين

دك نقال مهيمن وكان المتصل عناد
اسمع مهمن كال لعناد تعال هنا الساعة بالسبعة حتى اسلمك المفاتيح راح انتظرك

انهى الاتصال ورجع باوع علية
.. بعدج كاعدة ولج انا شنو كلت

كمت من مكاني واني احس بحفوني ثكلت
.. رايحة بدون ما تكول لان كلش نعست

جلال

وصلت لهدفي وانا اعض على جرحي
وكفت كدام البوابة ورفعت راسي اباوع عليها
كنت جاي وانا شايل روحي بيدي والقرار خلف هذا الباب راح يكون تقرير المصير.

كان اكو حرس واكفين يم البوابة
حجيت وية واحد منهم وبلغته
.. انا جلال مؤيد بلغ الضابط علي .. هو عنده علم بحضوري

حجة باللاسلكي وبعدها طلب الهوية للتأكيد وفتشني وفتش الجنطة
وبعدما كمل اجراءات التفتيش دخلني

كان المقر بناية ضخمة وبيها كومة سيارات
مظللة وعسكرية لكيت عريف كاعد على مكتب
وسألته وهو كام من. مكانه وكال
.. اهلا وسهلا الضابط ينتظرك حالياً

اخذني وطرق باب المكتب سمعنا الصوت يأذن بالدخول
فتح الباب وسوة مجال حتى اتقدم عليه وادخل للغرفة

كام الضابط من ورة مكتبه وابتسم
.. يا اهلا وسهلا بجلال
انغلق الباب والعريف راح وبقيت انا والضابط علي

الضابط علي.. تعال اتفضل اكعد وخلينا نحجي
بالموضوع

كعدت وهو رجع لمكانه وباوع علية بنظرات يحاول يدرسني
وسألني .. اكدر اعرف شنو الي غير قرارك بعد ما كنت رافض
رفض قاطع بأن تقدم يد المساعدة

دنكت راسي وكلت.. قبل كنت خايف على روحي وماكان عندي ثار وية داعش
بس هسة انا جاي ما خايف من شي وكلبي محمل على داعش واتمنى اكدر اصير الايد
الي تضربون بيها داعش بطريقة او بأخرى اهم شي اسلب منهم هدفهم
مثلما سلبوا مني اعز ناسي

باوع علية الصابط وكال
.. هو لو من الاول كل واحد منكم ما يكول كلمة وانا شعلية كان ما وصل حال العراق لهاي المواصيل

دنكت راسي وانا اتذكر كلامي وسبب رفضي
بوقتها كلت هو قابل العراق منتظر جلال يحرره ويبعد عنه الدواعش لكن ادركت شنو معنى كلام الضابط

يمكن لو متعاون وياهم .. يمكن جان كدرت اغير مصير هواي ناس .. يمكن ويمكن
صحيح انا شخص واحد لكن كان بيدي اسوي هواية اشياء

تنفع اهلي وناسي واكيد مثلي هواية انطوا ظهرهم للوطن وكال
هو الوطن غركان اني شنو اكدر اسويله

رفعت راسي وكلت
.. سيدي كلامك صحيح بس تكدر تكول الحياة دروس وانا اتعلمت
درسي واخذت العبرة

جاوبني الصابط.. تدري اني فقدت اثنين من اخواني شهداء
وبعدني مصر ومتمسك بالقضية وراح ابقى انا وجماعتي الضباط نحاربهم لحد اخر نفس بالروح ولا نعوفلهم الكاع

الا واحنا محنيها بدمنا

كان كلام الضابط مثل المرهم على جروحي احس الحماس اتوغل بدمي وحجيت وياه بلهفة

.. شوف سيدي انا من ايدك هاي لأيدك هاي عندي جهازي
موجود وطورته

.. اعرف ان جهازك هو بمثابة بطاقة دخولك لداعش وبسبب الجهاز
احنا اختاريناك انت بالذات ان تدخل ويانا بهاي العملية

.. هاي هي بس كلي شوكت اباشر بالمهمة وشنو المطلوب مني
اذا تريد من اليوم انا ما عندي مانع

ابتسم الضابط وكال
.. لحظة جلال قربان صبرك علينا انت عبالك الشغلة سهلة
على بالك احنا مباشرتاً نوديك لداعش

عكدت حواجبي مستغرب وسألته.. ها لعد شنو الي ننتظره
شنو المانع انا موجود والجهاز موجود

.. شوف جلال هاي عملية استخباراتية يعني يحتاج لها
تخطيط وتنظيم يعني انت لحد هاي اللحظة كنت مواطن عادي
يعني ما عندك اي خبرة ولا معرفة
وشلون تتم هيج عمليات

بالاول تحتاج تنظم النا وتتطوع
واحنا نحتاج ندخلك دورات تعليم وتأهيل بمعسكر خاص
حتى نهيأك ونعلمك شلون تتوغل بين داعش وشلون تتصرف
دورة التطوع والتدريب يحتاج تقريباً ثلاث اشهر طبعاً انت حالة استثنائية

.. شنو يعني انا اكعد انتظر كل هاي المدة

.. اي نعم المهمة مو سهلة حتى نزرعك لازم تكون على دراية بجميع جوانب داعش والتجسس والاستخبارات ونقل المعلومات وارسال الشفرات احنا لازم نجهزك بكل شي حتى نتجنب الوقوع بالخطأ

كان الضابط يحجي ويعددلي شغلات لازم اتدرب عليها واتعلمها واني مستغرب شكد ينقصني خبرات وفعلاً كلامه
انا لازم استعد استعداد كامل حتى اكدر انجح بمهمتي

.. بالبداية احتاج منك بعض المستمسكات الي لازم نقدمها
للتطوع ونثبت اسمك من ضمن دفعة الضباط

.. يعني شنو ما افتهمت
.. يعني لازم يتم كل شي بصورة قانونية صحيحة
من تتطوع بالدورة التدريبية راح تتخرج منها
برتبة ملازم

بس قبل كل شي لازم اقدمك للمدير
هو عنده علم بوصولك اليزم البارحة انت من اتصلت خبرته عنك
وراد يسمع منك كل الي صار وياك لذلك لازم تكوله على كل التطورات بوضعك وبجهازك

بقى الضابط يجري اتصالاته واتلقى المعلومات وتمت الموافقة
من الجهات العليا كل هذا صار وانا كاعد منتظر
تمت امور شغلتي بصورة مباشرة عن طريق الضابط علي لان
حالتي استثناء همة رايديني

بعدما خلص اتصالاته
كال .. شوف جلال اريدك تسمعني زين
اول درس بمهمتك ان تحافظ عالسرية
يعني جداً مهم التكتم على الموضوع الي بيناتنا

.. ممكن توضح اكثر يعني السرية تشمل حتى اهلي مثل اخوية
.. اكيد احنا نحتاجك ان تكون مواطن عادي
حتى اقرب الناس الك ما نريدهم يعرفون لتجنب الوقوع بالغلط

تحسباً لداعش اكيد هم ما يدخلون وياهم اي عنصر اذا ما يكونون متأكدين وجامعين عنه كل المعلومات شنو تاكل شنو تشرب

حتى اخوك اهلك وناسك اتوقع راح يتوغلون بحياة كل فرد من عائلتك
.. بس انت كلت انا لازم ادخل دورة احتمال تستغرق فترة. وهاي الدورة تتم بمعسكر زين شنو راح اكوللهم

.. هاي بسيطة عوفها علينا هناك نبعثلك شخص ينتحل شخصية مندوب مرسل من قبل شركة لتطوير السيارات بالخارج وسمع عن
اختراعك للجهاز وانت بالمقابل راح تحجي بهذا الموضوع
يم اخوك قبلها على اساس انت قدمت مشروعك لشركات خارجية ومنتظر الرد

صار الضابط يفهمني وطلب مني كل مستمسكاتي
قتحت جنطتي الي بيها كل شي يخصني
جامع كل حياتي بهاي الجنطه وشايلها على ظهري

نور

مااعرف شلون صبح الصبح علينا اني ومهيمن ظلينا كاعدين عيوننا متاخذ نوم
طلع مهيمن وقبل لا يطلع انطه لأمه المفاتيح حتى تسلمها لعناد لان هو راح يفتح المحل
ويكعد يتابع الشغل اليوم بمكانه

اما هومهيمن راح حتى يكمل البحث عن جلال صحيح هو حاير ميعرف وين يسال
بس بالنسبة له لازم يطلع يدور
يسال بالكراجات بلكي احد شافه ويعرف وجهة جلال ووين راح
يسال المستشفيات خاف صار وياه قدر بالطريق

البنات راحوا للدوام بالكلية
كانت حالتهم مو افضل من حالتنا اثنينهن يمكن غفلت عينهم ساعة بالنوم وكعدوا راحوا للدوام
انا باقية انتظر رحمة الله وعبالك كاعدة على نار

سمعت صوت الجرس وكمت بكل لهفة من مكاني ياربي بلكي هذا جلال
حطيت شالي على راسي بسرعة ورحت اهرول للباب وفتحته
وانا انفاسي مقطوعة
فتحته وصار بوجهي عناد
ارتبكت وتلقائياً حجيت ونسيت اصلاً عناد على شنو جاي
.. ها عناد بشرني لكيت جلال

عناد كان يباوع علية لكن من سمع سؤالي انتبه على نفسه ودار وجهه انطاني ظهره وكال

.. جاي ندور عليه والله كريم ان شاءالله يرجع عن قريب

ما طول وياية وراسا استدرك كلامه وكال بسرعة مثل الي يريد ينهزم
.. بس اذا تكدرين تنطيني المفاتيح مهيمن كال تلكاهم بالبيت

.. ها اي صحيح المفاتيح هسة انتظر لحظة

رديت الباب بس عالنص ورحت
مشيت بسرعة واتعثرت بخطواتي وردت اوكع
استغفر الله الثول ركبني فرد نوب

سمعت صوته الناصي من كال .. اسم الله
كلبي ما اعرف شصار بي على هالكلمتين
التفتت وشفته التفت وانطاني ظهره

دخلت للبيت
وكلت لخالة عن المفاتيح وانطتهم الي لان هي كانت جاي تحجي بالنقال وية اخوها

اخذتها من ايد خالة ورجعت بسرعة وانطيتها لعناد
هواخذهم وراسا فتح باب سيارته ركبها وراح
بدون ما ينطق بحرف او حتى يرفع عيونه ويباوعلي

هذا مو عناد الي اعرفه. كنت اسمع من رغد ومهيمن وجلال عن تغير عناد
بس ما كنت اتخيل هيج متغير حتى بتصرفاته
يمكن لو عناد الاولي كان استغل الفرصة وحاول يحجي وياي

لكن هذا يختلف اختلاف جذري
اووف
انا بيا حال وكاعد احلل بعناد مو على الاساس عقلي ناقص
هم يفكر بي

صار الظهر وكل شوية اتصل على مهيمن اسأله ومع الاسف ماكو رد يبرد الگلب مهيمن كال انا جاي للبيت حضريلي جنطتي اني طالع للموصل
اطلع بالباصات الي تطلع بالليل اصبح الصبح هناك

.. وين رايح مهيمن الله يخليك مو كافي هو راح
.. نور اني لازم اروح الحك على اخوية و ارجعه بيدي
ما مستعد افقده بعد ما لكيته

يتبع

اتمنى لكم قراءة ممتعة
اختكم نهى الحسون