قضية لم الشمل الفصل الثامن وثلاثون 38 - بقلم نهى

#الكاتبة_نهى_الحسون
#قضية_لم_الشمل

السلام عليكم ورحمة الله وبركاته
اسعد الله مساءكم ❤️

ريم

بالكلية كاعدة بالمحاضرة سرحانة بالموقف الي صار البارحة بحيث الليل كله ما كدرت انام بس افكر

ام مهيمن ارتفع ضغطها ونامت بالفراش تعبانة
دخلتنا كلنا بالانذار وخصوصاً مهيمن الي كان كلش خايف عليها

واتفاجئنا بجية
خوال مهيمن كلهم ومن ضمنهم خالهم حسن
اجة حتى يتطمن على صحة اخته

وام مهيمن من شافت اخوانها وخصوصاً حسن كامت تبجي وهو اعتذر منها وباس راسها
كل هذا الشي خلة الكلوب تصفى وتنصلح بينهم وتصالحوا

بس الحقيقه هذا كل الي صار ودار بينهم فقط تراضي بين اخت واخوها
بس انا كنت خايفة لا صلحهم يشمل رجوع المياه لمجاريها ويرجعون يكملون خطوبة مهيمن من بنت خاله

بقيت اتكلب الليل كله من الارق والتفكير
وانا ما بين مد وجزر ساعة اعاند نفسي واكول
هسة اني شلطشت بمهيمن قابل بس هو رجال بالعالم
هاي شباب كومة مالين الكلية وبيهم من ينظرلج بأعجاب انسيه وشوفي حياتج

ااااووف هو صحيح اكو هواي شباب مثل مهيمن واحسن منه بعد
بس ماكو واحد بيهم يشبه عمو مؤيد ولا يشبه حنانه وحرصه علية

انتبهت من صفنتي على لكزت صديقتي دعاء
.. عيني صحي النوم المحاضرة خلصت يالله كومي امشي حازم كال عندي موضوع مهم وياكم اريد احجي

جمعت غراضي وشلت جنطتي وكلت
.. وشنو هذا الموضوع
.. والله ما اعرف بس هو كال جيبي ريم وياج وتعالي

.. يالله امشي

رحنا لمكان الي كان كاعد بي حازم وياه واحد
شاب من الطلاب ويانة اني شايفته من قسمنا بس من المرحلة الثالثة

سلموا علينا وحازم حجة وياي وكال
.. ريم طبعاً انا اليوم جايج بموضوع بصفتي واسطة خير

رفعت حاجبي .. اتفضل حازم شنو هذا الموضوع
.. والله يا بنت الناس هذا صاحبي معجب بيج وسأل عنج وحاب يتقدملج

كان يحجي والشاب الي يمه بس يوزع ابتسامات
الولد اسمه علاء

بعدما حازم فاتحني بالموضوع التفت على صاحبه
وكال .. هسة شوف شغلك ابو الشباب واتفضل احجي

بدة الولد يحجي عن حياته ومستواه العائلي والاجتماعي
يعني المعلومات التعارف

هو كان يحجي واني كنت اتفحص شكله وملابسه وطريقة كلامه

كان شكله وملابسه لاغبار عليهم مرتب وانيق
ووسيم ولكيت نفسي من غير ما احس اقارنه وية مهيمن
اجمل من مهيمن واناقته سابقة مهيمن
شعره كله على بعضه يتقدم على مهيمن بهواي نقاط

لكن طريقة كلامه وارتباكه ولطفه الزايد
بأختصار هاي الشغلات خلتني اكون فكرة عن شخصيته كان هواي متردد وخجول

عكس مهيمن شخصية قوية وما اتوقع اذا يريد
يطلب ايد بنية راح يطلب من صاحبه يتوسطله
اكيد راح هو يروح بذات نفسه ويخبرها بدون مقدمات
واضافة الى ما يحب يخلي فوك راسه رقيب ويعلمه شلون يحجي

حازم قطع علية تفكيري وكال
.. ها شنو رأيج بالموضوع
.. بالحقيقة انت فاجئتني بطلب صديقك
بس على كلً اني مثل اي بنية عندي اهل ارجعلهم بهيج امور وراح انطيك رقم اهلي وانت. تكدر تتواصل وياهم

طلعت نقالي وانطيت لعلاء رقم مهيمن حتى يتواصل وياه

اول ما شافتني حوراء سألتني .. شنو شبيج اليوم انتي موطبيعية من الصبح وانتي وجهج مكلوب

.. والله يا اختي ما بية شي يتخيلج اصلاً اليوم اتقدملي
طالب من المرحلة الثالثة وطلب ايدي

اباوع لحوراء دارت كل جسمها علية بأهتمام وكالت
.. اي وشنو جاوبتيه

.. كلشي ما جاوبت بس كلتله لازم ارجع للاهل بهيج موضوع وانطيته رقم مهيمن حتى يتواصل وياه

حوراء جلت صوتها وسألتني
.. ريم خلينا لا نضحك على نفسنا انتي بعده گلبج ينبض بحب مهيمن شكد تريدين تحاولين تثبتين للكل
ان مهيمن انتهى من حياتج وهو مو مهم بس تبقى نظرات عيونج له فاضحتج وهالشي انا ملاحظته
صحيح تصرفاتج عبرت على نور ومهيمن بس ما عبرت علية

.. مو مشكلتي اذا كلبي غبي وما يعرف يختار محبوبه
اني لازم اشوف حياتي ميصير ابقى معلكة گلبي على امل واهن انتظر استاذ مهيمن يحن علية

لازم انسى وجوده واستمر بحياتي واشوف مستقبلي بعيد عنه
مثلما هو راح وخطب غيري انا هم لازم اشوف حياتي وية غيره

حوراء.. اتمنى تكونين بكد هذا كلامج
غمضت عيوني
اي بكد كلامي وگلبي غصب عنه يعض على جرحه
ويتقبل قراري مثلما اتحملت اني اختياره لحب اعمى هو هم خليه يتحمل قسوة قراري

لليل
حوراء سألتني .. شنو شوكت ناوية تفاتحين مهيمن بالموضوع لو خايفة تفاتحينه

باوعت عليها بأصرار وسديت الملزمة
ونهضت من مكاني وجاوبتها

.. ومن شنو اخاف ترة اني ما مسوية شي غلط
وهسة رايحة ادور عليه وابلغه بالموضوع حتى يكون عنده علم من يتصل عليه علاء

رحت طلعت ادور على مهيمن ولكيته كاعد بغرفته
دكيت الباب ودخلت بدون ما انتظر جوابه

كمز من مكانه وبسرعة خزرني وسحب التشيرت ولبسه وكال
.. انتي شنو سالفتج ماكو عندج بريك داخلة مداهمة
كولي رجال بغرفته

.. اي بس اني دكيت عليك الباب

اباوع عليه عدل كعدت وهو يلبس التيشرت
فعلاً وكان متمدد بفراشه وماخذ راحته

.. انت ليش دائما تحسسني قربي منك يشكل اكبر تهديد على حياتك رغم اني ما مسويتلك شي

.. ومنو كلج انتي مو خطر انتي قنبلة موقوتة ساعة الساعة تنفجر بوجهي ما تنحزرين
وتعالي اكلج انا كم مرة مأكد عليج ما تدخلين غرفتي وانا
قاطعت كلامه

.. اهووو حفظتها للكليشة وانت رجال وما يصير ادخل عليك واني بنية عيب
يعني اذا حضرتك طول اليوم مشغول ومحد يكدر يشوفك لايكون تريد احجز موعد حتى اكدر احجي
وياك

گلبت عيوني بعدم اهتمام وگلت

.. على كل اني ما اجيت حتى اتناقش وياك بمدى خطورتي على حياتك اني اجيت لان عندي موضوع مهم اريد احجي وياك

باوع علية وكال .. كولي اسمعج شنو هذا الموضوع المهم الي خلاج تقتحمين غرفتي وانا نايم

.. اليوم زميل الي بالكلية حجة وياي ويريد يتقدملي واني انطيته
رقم نقالك حتى يتواصل وياك ويفهمك مثلما الاصول تقتضي

حجيت كلامي بدفعة وحدة وبنفس واحد واحد بدون انقطاع
اباوع عليه ضاقت عيونه بحذر مثل الذيب
وعدل كعدته وكال

.. ومنو هذا الزمال اقصيد الزميل الي اتقدملج
يعني شنو اسمه وشكد عمره ومنو اهله وين ساكنين

جاوبته ببرود .. اسمه علاء هو مرحلة ثالثة بنفس القسم مالتنا
وانطيته المعلومات الي ذكرهم الي علاء بالكلية
وهو من راح يتصل عليك انت هم تكدر تسأله

مسح على لحيته وكال بتفكير .. اممم كلتي اسم عريس الغفلة علاء. يصير خير يابعد عمج
كل شي قسمة ونصيب

باوعت عليه بشك واني ما مرتاحة لتقبله للموضوع بكل رحابة صدر
.. مهيمن اياني وياك تتصرف بكيفك او تقرر عني

.. بدون ما تحجين انا وعدتج بعد ما ارفض اي واحد يتقدملج اكيد هذا الشي راجعلج اني عني بس اقوم بالواجب

.. اوك اخليك تاخذ راحتك
طلعت وتركته رجع اتكا للخلف وحط ذراعه ورى راسه

سديت الباب وشفت جلال
مدنك بالكاع يباوع تحت الكاونتر

رحت عليه وسألته .. شنو ضايعلك
.. ادور على السلسلة مالتي ما شايفتها

ما اعرف وين اختفت

حوراء

اباوع عليها وابتسم وكل شوية اكلبها على وجهة واشوف المكتوب
دخلت للحمام ولكيت سلسلة فضية معلقة بيها سبيكة منقوش عليها اية الكرسي
ومنقوش تحتها اسم جلال وبلحظتها عرفت السلسلة
راجعة لجلال

لكن من كعدت اكلب بيها اتفحصها كانت المفاجئة
كان محفور بظهر السبيكة ثلاث اسامي
بقيت اباوع للاسامي وكلبي كام ينتفض بكل قوة
عبالك عندي سباق

اتلمست الاسامي وعيوني دمعت
كان محفور اسم رنين ورند وحوراء
بس مبين الاسماء محفورة بالايد مو ليزرية مثل
نقش الاية واسم جلال

يعني هذا دليل حب جلال الي
كان اجمل شي يحصل بحياتي هو معرفتي بحب جلال

ضميت الكلادة لصدري واليوم كله لبستها
ومن رجع جلال انتظرته يفتقدها اذا كانت السلسلة عزيزة عليه
راح يسأل عنها واذا لا فراح ينساها

وفعلاً دخلت للمطبخ ولكيته يسأل ريم عن السلسلة

جاوبته .. قصدك تدور على هاي السلسلة
باوعت عليه شلون نهض من الكاع بسرعة

وعيونه باوعت علية بحذر مثل الي تم القاء القبض عليه
بالجرم المشهود

جلى صوته ومد ايده واخذ السلسلة مني وهو يكول بتحدي وعيونه بعيوني
.. اي نعم هي هاي اتمنى يكون ما عندج مانع
لان الموجود بالسلسلة يصير ملكي

عرفت شنو كان يقصد من كلامه
عرض لي حبه ويريد يعرف رأيي

ابتسمت بخجل وجاوبته وگلبي يهتز بين ظلوعي
.. الموجود بالسلسلة هو ملكك من زمان

هو اني كلت هيج وجلال اتسعت عيونه وكال بفرح
.. عيدي شنو كلتي شكلي ما سمعتج زين مدري
اذني وشت

قاطعتنا ريم الي نسينا وجودها وكالت
.. شنو بيك جلال صرت اطرش الخاتونة تكولك
الموجود بالسلسلة هو ملكك من زمان

جانت واكفة بيني وبين جلال وتباوع علينا منا ومنا
كلت واني اضحك.. شفت حتى ريم سمعت احسن منك

جلال ضحك .. والله عذريني ما مصدك اذني

ريم بأنزعاج .. انتوا هيييي واحد بيكم يفهمني
شنو الي كاعد يصير ليش احس بروحي واكفة بينكم مثل الاطرش بالزفة

.. باربي عوفج من عدنا وتعالي كوليلي
شخبار علبة الضلال الي كسرها مهيمن وشمرها بالزبالة

شهكت ريم ونطت عيونها
.. عزة بعني لاتكولها
لا يكون قصدك العلبة الي خالتها على مراية المغسلة

جلال حك راسه بذنب وكال .. شكلي حركت فلم مهيمن
وراح تنلاص

ريم بغيض.. جلال جاوبني
.. اي اتوقع هي نفسها

ما اشوف الا ريم كامت تكمز وتعيط
وتصيح وهي رايحة لغرفة مهيمن سوت عليه غارة جوية

اسمعها تكول .. كلشي ولا الميك اب مالتي هاي العلبة ماركة
جانت تحجي وهي حاصرتها البجية

جلال حجة واني رحت ورة ريم المخبلة
.. والله جان مهيمن خوش رجال الله يرحمه

جلال

كنت احس بروحي انسان انولدت من جديد
بكلام حور حسيت ملكت العالم
وبديت اخطي اول خطوات حتى ابني حياتي

قررت اشتري قطعة ارض تكون قريبة على بيت مهيمن
اتصلت عليه وسألته بخصوص الموضوع
وهو كال هذا الموضوع خلي علية انا احصلك قطعة ارض
كانت كلها ارض زراعية لان المكان الي كاعد بي مهيمن وخواله كلها اراضي زراعية

انهيت الاتصال من عنده
ورحت سحبت مبلغ من رصيدي الموجود بالبنك
واتبرعت بي لدار الايتام بثواب عائلة بيت خالي
حسيت براحة غربية وانا اشوف فرحة الايتام بالهداية
كان عمرهم يتراوح بين عمر رنين ورند وحنوش

بحيث اول ما وكعت عيني عليهم گلبي روف واتذكرت
رنين ورند وفرحتهم وضحكتهم بالاشياء الي اشتريها الهم

ومن لحظتها اخذت عهد على نفسي ان اخصص كل فترة مبلغ للايتام

اتصل علية عناد وهو معصب
.. شنو وينك يا اخي
.. هذا انا جاي بالطريق شنو شبيك .. الشغل بي شي
.. ما بية شي تعال وانا احجيلك

رجعت للمعمل حتى اكمل شغلي
ولكيت عناد كالب المعمل على العمال بالصياح مبين مدخن

.. شنو شبيك تعوي جنك ذيب مدعوم بلوري
.. كلشي ما بية
اكول انت مو وراك توصل البضاعة على محل مهيمن لو انا غلطان
.. اي هو انا اجيت حتى اخذ سيارة الحمل واروح للمحل

بس ما كلتلي انت شبيك معصب
.. هذا ابوية صارله اسبوع طالع لي بفلم جديد يكلي خلي نزوجك لان الله يحفظها امي كلتله خلي نزوجه

حتى بلكي يطلع من قوقعة حزنه وهمه ولا واحد بيهم
يعرف انا نفسي من بعد المرحوم كرار
انسدت وداعتك ما جاي اتخيل بروحي

اعرس وافرح بعرسي واخوية ما لحك يشم الهوى مثل الشباب

.. والله يا صاح شكلك حجيت للشخص الخطأ
لان اذا نريد نحجي على النسيان فانا اخر واحد يحجي عنه بس خلي اكلك كلمة الحياة تمشي ما راح تنتظرك
او تعذرك

يعني الموضوع بقى يمك اما تتمسك بالحياة وتمشيها على مرامك او تخليها تدوس عليك وتمشيك على مرامها وساعتها تروح بالرجلين
لان صدكني محد يعرف مصلحتك بكدك انت

باوع علية وكال .. والله يا جلال صاير من تحجي تصرح تصريحات خطيرة
ما عرفتك

قطع كلامنا صوت نقالي
وكان المتصل مهيمن
.. انلاصت والله مهيمن يتصل اكيد علمود البضاعة

يالله انا ماشي

وصلت للمحل وبدوا العمال ينزلون البضاعة
وانا دخلت جوة حتى اسلم القائمة لمهيمن

لكيته كاعد بالمكتب وجاي يحجي بالنقال
وانتبهت على شاب كاعد عالكرسي مقابيل مهيمن

سلمت ورد السلام كان شكله واناقته وترتيبه مومال ابن سوك شكله بين قوسين كيوت
كان مكانه غلط بالمحل

انتظرت مهيمن يخلص مكالمته وكعدت كدام الولد بالكرسي المقابل

انهى اتصاله وباوع على الشاب واعتذر منه وكال
.. انا اعتذر منك خليتك هواي تنتظر بس تعرف
موسم شغلنا عالابواب وصاير ضغط علينا

الشاب جاوبه بكل اخلاق وكال.. لا عادي اخذ راحتك معذور انا ماوراي شي انتظر

بعدها التفت علية مهيمن كانت ابتسامة مهيمن مبينة
مصطنعة ومجاملة
كال.. ها جبيت المواد
.. اي جبتهم كلهم وهاي هي القائمة حتى تكدر تطابق وياها السلعة

.. اي اي صدك جلال قبل لا انسى بطريقك اريدك تجمعلي الدين من التجار وكللهم ما اريد اي تأخير

.. صار
.. واخذ وياك سلاح خاف كل شي يصير

عقدت حواجبي هذا مهيمن شنو يحس عن اي سلاح يحجي

.. ما اريد يصير بيك مثل الي صار وياي
باوع عالشاب وحجة وياي

.. بعيد عنك والله يسلم انا بذيج الايام
كانت عدنا طلابة وكنت اجمع الدين من الناس وواحد من الجماعة اعترض طريقي وعصبني وانت تعرف الي يعصبني شسوي بي گبل طلعت المسدس وصوبته

اباوع للشاب وجهه كام ينطي الوان
وبلع ريگه مهيمن يحجي وانا كلشي ما جاي افتهم بس
ما علقت على كلامه
بس هزيت راسي بالموافقة على كلامه

بعدها التفت على الشاب وسأله
.. العفو شنو كلتلي اسمك ؟؟
.. اسمي علاء

.. اها اسمع يا علاء خلي انطيها الك من الاخير
البنية الي جاي تطلب ايدها انا اصير ابن عمها
والي يريد يطلب ايدها كدامه طريق طويل

ولازم يتعداني يالله يوصلها
علاء .. شلون يعني ما افتهمتك
دك جرس عندي جاوبته وانا اباوع لمهيمن
.. الحليم تكفيه الاشارة.
يعني ياحباب اخوي يكلك بنت عمنا خط احمر

علاء .. يعني اعتبر هذا كلامك رفض
مهيمن باوع علية وكال .. جلال انت سمعتني كلت كلمة رفض

جاوبته.. لا حشاك ما طلعت منك الكلمة
.. لعد ليش هذا الاخ يكول رافض

التفتت على الشاب وكلتله .. يا اخي ليش تخلي اخوي يزعل منك وتالي يعصب وانت تعرف اخوي اذا عصب
الله لا يكولها ويكفيك الشر

كنت اذكره بكلام مهيمن قبل شوية
علاء كام وكال.. يعني ملخص الحجي ماكو بالطيب نصيب

.. جلال انت شاهد على كلامه
بعدنا ما بدينا هو سحب كلامه وكام وكال ماكو بالطيب نصيب

علاء كام يباوع علية وعلى مهيمن مستغرب
عبالك جاي يباوع على وحوش مو بشر كدامه

جنت كوة لازم روحي لا اضحك على شكله
خطية مهيمن حيره وحصره بزاوية
خلاه لاهو طايل سما ولا هو طايل ارض

علاء .. اي بس انا ما حجيت شي
جاوبته.. يا ما حجيت شي وانت الكتاب باين من عنوانه
شكلك تريد تفلت

وصار مهيمن يلف ويدور وية الشاب بالكلام
اباوع عالشاب المسكين الي وكع بيد مهيمن
ابتلى على عمره وكام يحاول ينهي الموضوع وية مهيمن ويطلع روحه بأي طريقة

بحيث من طلع اخر شي من المحل وانا وصلته للباب
راح وهو يدردم بصوت ناصي كان غافل عني بعدني
امشي وراه

اسمعه يكول .. انا شورطني وية هذولي
شبية اتخبلت اناسبهم الا انا بايع روحي احط ايدي وية هذولي المخابيل
فتح باب السيارة وصعد وحركها ومشى

وانا كوة لازم روحي
والله شرده للولد

ريم

كنت منتظرة جية مهيمن حتى افتهم منه شنو سوى
بموضوع علاء وعلى شنو اتفقوا

كنت احاول اعود نفسي واهيئها بكل طريقة حتى
اتعود على فكرة وجود علاء

حتى لو جنت كارهة الموضوع اكيد بعدين راح اتعود وابدي اتقبله هي هاي سنة الحياة مو كل وحدة اتزوجت عن حب واكيد بعد الزواج راح يكون الفة ومحبة

كان هذا كلامي وية گلبي مثل الي يحاول يقنع له طفل ان ياكل شي ما يحبه ويجبره عليه

لليل اجوي وكان مهيمن وجلال كاعدين بالحديقة
يتناقشون على قطعة ارض قريبة بالمنطقة

شكله جلال يريد يشتريها حتى يبني بيت
هيج افتهمت منه

لكيت نور شايلة صينية الجاي وراحت كعدت يمهم
وام مهيمن كانت كاعدة على صفحة تطحن بالهاون
اعشابها الطبية

كعدت يمهم
وانتظرتهم يخلصون وكان جلال يلتفت علية وكال
.. شنو باربي اشو كاعد عاقلة ماكو مفرقعات بالجو

مهيمن .. جلال عوفها بحالها اي صدك علبة الضلال
الي خبصتينا بيها وصيتلج عليها وراح يجيبونها

.. احسن حتى تبطل تستهان بالميك اب مالتي ترة
مو لعبة هو حتى توكعه وتشمره بالزبل

.. عمي كلنا ما عرفته مكياج عبالي علبة رسم
شمعرفني بيج تشخبطين وجهج بهيج سوالف

.. اوووي شنو هاي المسطلحات لا عفية مهيمن
انت متأكد راح تشتريلي نفس علبة الظلال الي كسرتها
ما اعرف اشو من طريقة كلامك شلون ما اشوف
احس راح تشتريلي علبة اصباغ

.. شنو حضرتج تستهزئين
جلال.. هسة غير تكعد ست باربي لا تنسحل

.. عالعموم اني ما اجيت علمود علبة الضلال
اني اجيت حتى اسألك عن موضوع علاء شنو صار

انتبهت لجلال لم شفايفه ودار وجهه بعيد عني

اما مهيمن فكان وجهه جاد كال
.. والله يا بنت عمي اجة الولد الي اسمه علاء للمحل واتعرفت عليه مبين عليه خوش ولد

وكلبي ارتاحله وحجينا بالموضوع وانا انطيته كل الشروط الواجبة وهو هم ما جاوبني
شكله مبين علية خلوق ويحترم
وهالشي عجبني

هو جان يحجي بكل برود وانا ما اعرف ليش گلبي كام يفور يعني شنو حضرتج كنتي منتظرة مهيمن يغار عليج ويرفض الولد
اصحي بابا هو خلي بالاول يحبج وبعدين عود يغار عليج

رفعت راسي بكبرياء وكلت .. الحمدلله طمنتني
كنت متخوفة لا يكون ما عجبك
اكول اي صدك ما گلك شوكت الخطوبة

اباوع عليه انكلب استكان الجاي من ايده على رجل جلال وطفر جلال من حرارة الجاي

.. احتركت لشتك يامهيمن
حركتني بنارك يا اخي انتفض على كدك انا شكو
التهيت بجلال ونسيت الموضوع

جلال
حب من النوع الصامت هذا حالنا كل واحد بينا خايف يحجي بحبه لا تصيبه اللعنة وتنكسر رگبته
ويروح كلبه بالرجلين

اباوع لمهيمن
مثل حلاتي زين انا منتظر الفرصة واكمل اموري واخطي خطوتي لحور
زين هو شنو الي لازمه ما يحجي وية باربي مو احسنله من حرب الاعصاب الي جاي يعيش بيها

راحت ريم تركتنا وانا ومهيمن ودخلت جوة وانا التفتت عليه وسألته
.. اكول مهمين انت ما خايف اذا باجر تحجي وية علاء
وهو يحجي وياها

ابتسم وكال.. علاء من طلع من يمنا ما مصدك روحه الله نجاه من عدنا
فهو مو غبي يروح يحجي وياها وهو بالاصل
فلت بروحه العزيزة

اباوع لمهيمن او ابو الهمة
.. انت صدك داهية يا رجال غلبت الشيطان عشرة صفر بسوايتك هاي

ريم
ويوم ثاني دامت بالكلية وحجيت لدعاء عن الصار
وية علاء
دعاء.. الحمدلله لعد هسة اكيد راح يجي وياخذ موعد حتى يجون اهله

.. اهوو ونوب بعد وراي لازم اهله يشوفوني واشوفهم
.. ومو بس هيج وراج تطلعين تشترين الذهب انتي وياه

.. اهووو والله خبصة
.. اوكفي لحظة اشو ما جاي اشوف اي لهفة من حضرتج يعني الي اعرفه البنية تگلب دقلة من الفرحة من يتقدملها عريس وتكعد تخطط بفرحة اشو انتي
من هسة كابلة الخلقة

جنا نحجي وفات من يمنا علاء هو وصديقه
اشو هذا باوع علينا ودار وجهه بسرعة وغير طريقه
عبالك شايف وجه قاتل ابوه

عقدت حواجبي وباوعت لدعاء .. هذا شبي
جاوبتني دعاء مستغربة .. وانا ادري شبي اشو شكله يريد يغلس علينا

حةرصيت اسناني وحجيت.. يعني شنو قصدج جاي يتهرب مني
.. اي هو مبين من شكله يكول هيج
.. من عليه وتغرب
عاد والله انا شلون كاتلة روحي عليه

دعاء.. ترة هو الي اجة وحجة وياج مو انتي خلي يولي الجبان

نور
بالبيت جاي ننظف القاط الثاني بعد ما خلص
دخل علينا جلال مثل العاصفة
وجهه مخطوف ما بي قطرة دم

تركت السطلة من ايدي ورحت عليه
.. شنو شبيك جلال صاير شي
ما جاوبني وتركني وراح دخل لغرفة مهيمن
وفتح الكنتور بسرعة كان مبين عليه عقله فاصل
سحب جنطته وفتحها كانت جنطته تحتوي على مجموعة وثائق واوراق ودفتر

بدة يجيك بيهم واني احجي وياه
.. جلال شبيك جاوبني
لبس الجنطة على ظهره وصعد فوك وخذ جهاز الخردة
وخلاه بعلاكة كبيرة ونزل يهرول

واني اركض وراه
لزمته من زنده قبل لا يطلع من باب الشارع
شكله هسة يالله حس علية وانتبه من سهوته
باوع علية ونظرات عيونه ضايعة
سألته.. جلال گلي شبيك

جاوبني بصوت مكسور وكال
.. نور سلوان صاحبي لكوه ميت
خلص كلامه وتركني وراح يركض
وكا اعرف وين

هو راح منا ومهيمن اتصل علية وكال
.. نور جلال اجة للبيت لو لا

.. اي اجة للبيت اخذ غراضه وطلع

سمعت مهيمن كام يلعن ويغلط بعصبية
.. بس لا يتهور ويسافر
جان مهيمن يحجي بأستعجال شكله كان يهرول

.. شنومهيمن وين يسافر
.. اتصلوا عليه وبلغوه عثروا على جثة سلوان
وعناد يكول هو سمع بالخبر راح طلع برة المعمل يركض بدون مثل المجنون
وناسي نقاله بالمكتب يم عناد

مهيمن انهى الاتصال وشكله راح يدور على جلال
الي ما نعرف وين اراضيه

مرت الساعات علينا وصار الليل ومهيمن لحد الان ما راجع وام مهيمن عشمت كل اخوانها واولادهم حتى يدورون على جلال

ومابقت دعاء ما دعته وانا كالعادة الساني ينبلع
واظل بس اباوع بعيوني

لحظات خوف على رعب

حوراء
خوفي على جلال بلغ لحد الوجع
لكل واحد بينا مخاوف بتجاه جلال

مهيمن خايف عليه لايكون سافر للموصول ونور خايفة لا تنتكس صحته ويتقوقع على نفسه واني
خايفة لايكون يرجع لطريق الضياع ويرحع للشرب

وهالشي اذا صار معناها جلال حكم على علاقتنا
بالاعدام وراح اضيع من بعده

صار وقت الفجر ودخل
نور
مهيمن والوجه اظلم رحت عليه ولزمته من قميصه
.. مهيمن كلي فهمني اخونا وين اختفى
ليش ما جاي تلكاه

بقى هذا السؤال يحوم فوك روسنا مثل غراب البين

يتبع

جلال
وصلت لهدفي وانا اعض على جرحي
وكفت كدام البوابة ورفعت راسي اباوع عليه كنت جاي وانا شايل بيدي روحي والقرار خلف هذا الباب راح يكون تقرير المصير.

اتمنى لكم قراءة ممتعة
مع تحيات اختكم نهى الحسون