قضية لم الشمل الفصل الحادي وأربعون 41 - بقلم نهى

#الكاتبة_نهى_الحسون
#قضية_الشمل

مساء الانوار والسرور عليكم 🌹🌹🌹

ريم

وصلت للبيت واني گلبي يفور من ورة تصرف مهيمن
اخذت الطريق كله حوراء تسألني
.. ريم شبيج بس تنافخين منو وياج

.. اخوج اكو غيره بحياتي يخليني ادك على راسي

.. شبي شنو مسوي اخوي وياج هالمرة
.. نوصل للبيت وتعرفين شبي وياية
لان ما اضمن روحي اذا احجي هسة احتمال انفجر

.. اسم الله الرحمن عمي سكتي ما اريد اعرف شي لا تنفجرين
علينا وتتطشرين هنا وشنو يلمج
عمي صدك لو گال جلال انتي ثبتي قنبلة
متنقلة ساعة الساعة تنفجرين بدون سابق انذار

.. بعدج ما شفتي شي يا حوراء بس كون اوصل واشوف اخوج

كانت تباوع علية بحيرة وكالت .. الله يكون بعونك يا مهيمن
اخوي كان خوش ولد

وصلت للبيت ونور فتحت الباب مريت من يمها وغباري وراي
وسألتها واني ادخل للبيت

.. مهيمن بالبيت
نور جاوبتني .. لا بعده ما رجع للبيت بس هسة على جية لان اتصل على خالتي وسألها على الغدا شنو طابخين

.. اي غير يتدلل الاستاذ يسأل على الاكل مو يلوكله يريد ياكل بعدما
سوى الي براسه
بس ما علينا يجي ويصير خير تركتهم وراي

ودخلت للغرفة اسمع ام مهيمن تسأل نور
.. شبيها بنت عمج تتنعوص منو دايس على ذيلها

.. والله خالة علمي من علمج ما اعرف شبيها هي من دخلت مدخنة

شمرت سجلاتي وجنطتي
وبدلت ملابسي حتى ما اعرف بروحي شنو لبست سمعت صوت
الجرس وانا كمت ابدل على السريع

سمعت صوت جلال واتبعه صوت مهيمن
رحت طلعت من الغرفة وسألته

.. واخيراً شرفت استاذ مهيمن
بالله ما تفهمني انت شنو حاجي وية سلام

باوع علية وكال .. كلامي وياه كان علمود احط حد لهذا الموضوع
يعني تكدرين تكولين حطيت النقط على الحروف

.. اكدر اعرف انت شنو كايله بالضبط
.. كلتله انه انتي مخطوبة الي

اني ومهيمن كنا واحد واكف مقابيل الثاني بنص البيت
وام مهيمن والبنات وجلال اجوي على اصواتنا

.. وانت بأي حق تكوله هيج شي بدون علمي شنو هاي الثقة الزايدة الي عندك
تعرف استاذ انت بهذا كلامك وقفت قسمتي وبعد محد راح يتقدملي

.. وهو المطلوب

ريم ترة انا اعرف نتائج كلامي بالحقيقة انا ردت افاتحج بالموضوع قبل لا هذا الخروف يجي بس هو طلع گدامي فجاءة
لذلك انطيته المقسوم وكلتله بنت عمي مخطوبة الي

.. لا ياشيخ احلف .. كول والله مرتين
وانت منو كلك اني راح اوافق عليك

باوع علية وعيونه ضاقت وسألني .. شنو قصدج

سمعنا شهكة ام مهيمن المتعجبة على كلامي وكالت
.. صخام الصخمني

باوعت للبنات وكالت
.. ولكم هاي اتخبلت وتكول ما موافقة

مهيمن التفت على امه وكال .. يمة رحمة لوالديج صبري لحظة
خلينا نفتهم ريم شنو تقصد

.. قصدي واضح مهيمن. يعني حضرتك ما كلفت نفسك
تجي تفاتحني بالموضوع مثل الخلق والعالم

وكأن موافقتي شي مفروغ منه وواثق انه اني كاعدة انتظرك تحن وتتكرم علية وتعلن زواجك مني
واني بكل طاعة عمياء راح اوافق عليك بكل لهفة

.. اذا كنتي معترضة على الاسلوب والطريقة فأنتي بهاي حقج
بس سبق وان كلتلج كنت ناوي اتقدملج بشكل نظامي

.. لا مهيمن انا اعتراضي مو بس على الاسلوب
لا وانما على كلشي شنو شبيك مهيمن نسيت كلامك وياي
ترة اني نفسي ريم الي ما اصلح تكون زوجة لحضرتك

مو انت الي كلت راح اختار وحدة تكون ام بيت وبيها كل المواصفات الي اريدها بالمرة
مو انت الي ببالي وتناسبيني ورفضتني واختاريت بنت خالك على هذا الاساس
گلي شنو الي غير رأيك

.. انا كلت هذا الشي صح بس اتغيرت وية الوقت ..يعني ماكو شي يبقى على حاله
وشفت انا ابن عمج واولى بيج من الغريب
واكتشفت محد راح يصونج ويحرص عليج بگدي

.. زين واذا اكولك انا بعدني نفسي ريم ما تغيرت
ابقى ابجي اذا ظفري ينكسر
ولا اصلح اكون ام بيت حتى ما اعرف اگلي بيضة

جاوبني .. هاي امور عادية مو مهم تكدرين تتعلمين بمرور الايام
انتي مو ذاك اليوم كلتي انتي مستعدة تتعلمين كلشي لخاطر ابو بيتج

كان يذكرني بكلامي وياه بيوم اتقدملي مؤمل كنت بساعتها احجي بتحدي جاوبته

.. اي بس هذا الكلام كان مو الك لأبو بيتي
.. اي هو انا راح اصير ابو بيتج

.. يعني افتهم من كلامك انه انت موافق على زواجك مني
وراح تتحمل ريم وتصرفاتها الطايشة والسانها المزروف
وعدم تدبيرها

.. اي نعم وراح ابدي اعلمج على ايدي

ام مهيمن كالت بكل ثقة
.. شفتي خالة وليدي شلون شاريج وطالب ودج

رفعت حاجبي وكلت
.. مهيمن اذا كدرت انت تتغاضى عن كل عيوبي وتوافق تتزوجني

فأني هم مثلك تغيرت وية الوقت وهسه اني عكسك
اعتذر ما راح اكدر اوافق واتنازل واغض النظر عن عيوبك

باوعلي مصدرم وام مهيمن كالت
.. عزة بعيني ولج خالة هو رجال ما ينعاب

باوعت عليها وكلت .. لا خالة ابنج كله عيوب
مثلما هو يشوف بية هواي تصرفات طايشة وغلط وما اصلح اكون ام بيته

اني هم اشوف هو عنده هواي عيوب بشخصيته وما يصلح يكون ابو بيتي

واذا هو وافق يتنازل ويتحمل عيوبي
فاني عكسه ما اكدر اتقبل تصرفاته

اباوع لمهيمن نطت عيونه
.. بالله ممكن تفهميني شنو هي التصرفات والعيوب الموجودة بشخصيتي وما تعجب حضرتج

.. بالحقيقة هن هواي ومحتارة منين ابدي
بس راح اكتفي بعصبيتك وصوتك العالي
على ابسط خطأ يبدر مني انت بسرعة تعصب بوجهي وتظل تصيح وهذا الشي ما احبه بزوجي المستقبلي ترة مو بس اني
اكول هيج صدگني كل بنية ترفض تربط حياتها وية شخص
متنمر وعصبي

اريد زوجي يكون متفهم وواعي مو بسرعة يطنكر

رفع حاجبه وكتف ذراعه على صدره وكال
.. اي بس هذا الي كلتيه ما يسموها عيوب

.. لا بالعكس مهيمن هاي الصفات الي ذكرتهم اكبر
عيوبك وتعتبر اكبر مشكلة
احلفك بالله راجع كل تصرفاتك الي سويتها وياي
وخلي اختك حوراء بمكاني
راح تقبل عليها

.. اذا كنت واثق من صدق نيته وحرصه واهتمامه اكيد راح اوافق عليه بدون تردد

.. كلامك مو صحيح تعرف ليش

لان مستحيل راح تقبل واحد يجي هيج بكل سهولة ويتحكم بحياة حوراء من غير ما ياخذ رأيها ومو بس هيج هو حتى ما يملك الحق
ان يتدخل بحياتها ويقرر عنها ويلغي وجودها

وهذا حالك وياي انت دائما تتصرف وتقرر وتددخل بحياتي بدون حق انت حتى ما تكلف روحك تسألني لاغي وجودي
وعلى ابسط الامور تعصب مني وتظل تصيح بوجهي بدون تفاهم

يعني هاي وانا بنت عمك بعدني ماصرت زوجتك وانت
هيج تسوي بية

زين اذا اني وافقت عليك وصرت زوجتك
شنو راح يكون حالي وياك وشلون راح تتصرف وياي

ام مهيمن بقلة صبر .. يعني خالة افتهم من كلامج انتي رافضة
باوعت عليها وكلت .. والله اذا بقى مهيمن على نفس تصرفاته واعصابه النار فاني اعتذر اكيد ما راح اوافق

انا اريد رجل يعاملني بأحترام ويكون حنين علية مو ياخذني بالصياح ومو بعيد يمد ايده علية
ومهيمن ما يعرف يداري المرة

ام مهيمن .. يا خالة شكاعد تحجين ليش مو هاي احنا كدامج
امه واخته
اشو عشنا وصرنا واحنا تحت جناحه ما يوم سمعنا حجاية منه تغثنا
وهاي كدامج شوفت عينج

شفتي شلون يعامل اخته ما بيوم جبرها على شي غصب عنها ولا بيوم علا صوته عليها او هضمها عايشة معززة ومكرمة بجاه اخوها ولو تطلب النجمة بالسما يجيبها لها

وهاي انا امه كدامج
ما يوم قلل احترامه وياي ولا بيوم علا صوته على صوتي
ياخالة الرجال الزين تعرفين معدنه من تعامله وية اهل بيته

مهيمن حجة بصوت هاديء وعيونه علية وكال
.. يمة كافي ماله داعي تكعدين تبرريلها هي حرة بأختيارها

شوفي ريم راح اعتبر هذا كلامج كله ساعة عصبية
بسبب الي بدر مني
انا راح اعوفج براحتج تقررين

ودار وجهه وراح صعد فوك للطابق الثاني
ونور وحوراء وجلال الي انسحب من غير ما يكول اي كلمة
وسوى حركة البوكس على خده وباوع على مهيمن وهو يصعد

وام مهيمن راحت لغرفتها وهي تدردم
اما نور وحوراء بس خلى الجو اثنيهم حجوا بصوت واحد

نور .. انفجرت القنبلة

حوراء.. واصبحنا اشتاتاً
ولج كناري شجاج ولا عرفتج فصختي اخوي تفصيخ سودة علية
اتفرهد من ورة لسانج اشتغلتيه اكس ومربع

نور .. ريم مو جنج استعجلتي بكلامج وياه

باوعت عليهم وگلبي انتفض بخوف من كلشي
وكلت .. بنات هذا مستقبلي وتصرفات مهيمن تخليني افكر الف مرة
قبل لا اوافق عليه وحقي اخاف منه

تركتهم ورحت

نور

اباوع للبيت صار هدوء لان كل واحد دخل على غرفته من بعد انفجار قنبلة ريم
حرت ويامن اصف من اسمع وجهة نظر ريم اكول حقها كل وحدة بينا تحب يكون زوجها متفاهم
ومن اباوع لتصرف مهيمن يثبت حبه لها وحرصه عليها

اوف خلي اروح اصب الاكل لان الكل جوعان
صبيت وجهزت السفرة وصحتلهم واجتي ام مهيمن وحوراء وجلال
وبقت ريم ومهيمن ماكو

ام مهيمن كالت.. سودة علية انسدت نفسه من ورة كلامها

.. لا خالة بعدني ما كلت لمهيمن عالغدا هسة اروح اصيحه

صعدت فوك ولكيته كاعد بالكاع بوحدة من الغرف يگلب بنقاله
.. مهيمن تعال تغدى ويانا

باوع علية وسألني .. منو جاي يتغدى
.. الكل كعدوا ما عدا انت وريم وخالة كامت تحجي لان ما شافتك
كاعد عالسفرة

اباوع عليه نهض من مكانه وكال .. خلي انزل اتغدا لا الحجية
تفتح ابواب جهنم على بنت عمج وتذب حمم غضبها عليها اذا اني متغديت

ابتسمت على تفكير مهيمن وكلت .. يعني راح تنزل تتغذا حتى
ما يحجون على ريم ويطلعوها مذنبة
متريد امك تحجي على ست ريم

.. تصدكين لو اكلج صاير اخاف عليها حتى من نفسي

.. ما يحتاج تكلي انت مفضوح من يومك بس محد حاس بيك بس اني

.. زين ما دام هيج الحجي احتاجج بعدين بشغلة عود استعين بيج

.. صار من عيوني رگبتي الك سدادة بأي وكت تريد

جنا نحجي وننزل الدرج
لاكتنا ريم مطنكرة وعيونها حمر راحت للحمام

استوقفها مهيمن وكال .. لج ريم هاي شنو شمسوية بروحج
اباوع عليها اتوقفت بسرعة التفت علينا وكالت

.. شنو كلشي ما مسوية ورجاءاً لا تسوي روحك خايف علية

مهيمن باوع على جسمها وكال .. لا ما خايف عليج بس خايف على عقلج بس لا انضرب فيوز

.. اسم الله على عقلي يوزن بلد كل شي ما بي
.. زين ام عقل يوزن بلد عود لبسي ملابسج عدل
مو جايتني لابسة البجامة بالمكلوب
وتكولين عقلي يوزن كيلو طماطة

باوعت للبجامة وصدك كانت لابستها مگلوبي
كوة لزمت نفسي ما اضحك اما ريم فرفعت راسها بكل ثقة مثل الطاووس وفاتت من يمنا

وكالت.. عادي ترة اني لابستها بالعكس هيج عاجبني موديل

ودخلت للغرفة وسدت الباب بسرعة
مهيمن هز راسه وابتسم وراح يتغدا

كعدنا كلنا وريم اجتي بعدين بعدما وكعت وصلة من الساني
باوع مهيمن للبجامة كانت لابستها صحيح هالمرة

وحجة وياي .. نور شنو سالفتج كل شوية تغيرين الموديل ثبتيلج على رأي ترة دوختينا

باوعتله وابتسمت اعرف شنو كان يقصد وريم يا جبل ما يهزك ريح وبقت تاكل

اباوع لجلال جلى صوته وكال .. مهيمن اتصلوا علية اليوم وبلغوني
ان اجراءات السفر خلصت وان شاء الله باجر راح اسافر للخارج

جمدت بمكاني وعقدت حواجبي وسألته
.. شنو ليش تسافر للخارج ليش شنو صاير

اباوع لحور نفس حالي اتصنمت بمكانها
جاوبني جلال وعيونه على حوراء

.. انا مثلما تعرفون ابتكرت جهاز يخص سرعة السيارات
وهذا الجهاز ودزيته لبعض الشركات بالخارج واكو شركة بينهم وافقت وطلبوا حضوري

وصار جلال يفهمنا عن كل شي يخص سفره وحتى مدة السفر
كانت طويلة وهالشي ادخل الخوف بگلبي
ما اريد نبتعد عن بعضنا واحنا بعدنا ببداية علاقتنا كأخوان

بس ما كدرت اعترض طريقه واصير انانية خطية هذا حلمه مثلما
كال وتعب عليه وصار لازم يحصد ثمرة تعبه

بس نباوع للجانب الحلو بالموضوع ان جلال بدأ يشوف حياته ومستقبله واتقبل وفاة صاحبه وهالشي يطمن احسن من يكعد يتقوقع على روحه ويندب حزنه

بقت حوراء تحوم وبعيونها هواي اسئلة لجلال بس ما تكدر تبوح بيها كدام اخوها وامها

ام مهيمن حجت .. يا خالة الله يسهل امرك ويوفقك ويجعلك رفعة راس لأخوك

باوعلها جلال وكال .. اي والله خالة ادعيلي ربي يوفقني هواي محتاج الدعاء

ورة ساعتين ام مهيمن صاحتني وكنت اغسل مواعين
كالت خالة نور تعالي
رحت عليها ولكيت جلال بعده ما رايح للمعمل ومهيمن كاعد يشرب جاي

.. ها خالة صحتيني
.. اي خالة صحتج حتى احجي وياج
بموضوع مهم شلون نسيته كله من ورة مهيمن وبنت عمج
نسوني
.. كولي خالة شنو

.. والله خالة اجو ناس طلبوا ايدج ولولد متزوج ومطلك بس ما عنده جهال من الاولى انا اعرف امه وخواته خوش ناس

مهيمن سألها .. منو هذا وشنو اسمه اعرفه لو لا
دارت على مهيمن وكالت .. اي يمة اكيد تعرفه يكول عنده هو واخوانه محلات البان

اسمه صلاح
مهيمن صفن وكال.. اهاااا صلاح ابو الالبان اي اعرفه شلون ما اعرفه خوش ولد شاغول بس لازم اسأل عنه
يعني ليش مطلك وشنو السبب

باوع علية وكال .. طبعاً الكلمة الاولى والاخيرة لصاحبة الشأن
دنكت مرتبكة ما اعرف شحجي .. مهيمن اني بكيفك انت شنو تشوف

.. الله كريم خلي اسأل عنه بالاول وبعدين نگول رأينا

جلال

يوم ثاني كعدت الصبح بعدما اتفقت وية صفاء نطلع ورة الظهر
خطية نور حظرتلي جنطة السفر كان بعيونها خوف

واليوم الصبح قبل لا اطلع ودعتني وكالت .. عفية جلال مو تتأخر
والله انا احس بالامان بوجودكم بحياتي

مسحت على راسها وكلتلها .. اوعدج هن ٣ اشهر وارجع ما اتأخر بس ادعيلي ربي يتمم علية وافلح

.. ان شاء الله ابقى ادعيلك منا لحد ما ترجعلنا
انا طالع للمعمل ومناك اروح لمهيمن وبعدها اتوكل اسافر

.. عفية نبقى على اتصال مو تكطع بينا
.. لا توصين حريص

طلعت من البيت وانا مستعد ومحظر نفسي وجاهز للقادم الاتي
بس بالاول امر على المعمل اكمل السجلات واخذهم لمهيمن واسلم على عناد واكمل كم مشوار قبل لا اسافر

وصلت للمعمل وشافني عناد وكان وجهه مدخن
سلمت عليه وسألته .. شنو شبيك گالب الخلقة لا يكون ضايج لان راح اعوفك

باوع علية وكال .. لا يابوي والله مصدك روحك
اضوج عليك شكو
هو انت وين مولي قابل راح تجاهد
هو انت راح تسافر وتتونس بالخارج وعايف عناد هنا يتگلى بين الدهن وحرارة المكاين

بعدها كعدت انا وياه نراجع بالسجلات ونضبطها
ولطالما كنا نشتغل كان عناد ينافخ.

شمرت القلم وباوعت عليه
.. هسة شلون ما تكلي شبي وجهك معقوج يكول قوطية ببسي مطعوجة

.. لا هيج اكو موضوع شاغل بالي

.. وشنو هذا الموضوع

.. هستوني سمعت بخبر قهرني
ومحتار شلون افاتح صاحب الشأن واحذره من الي عرفته خاف
بفتهم كلامي غلط

.. شوف عناد اذا كنت تعرف صاحب الشأن وعندك علاقة وياه ليش ما تصارحه وتكله اكيد يعرفك انت شنو

.. يعني انت هيج رأيك
.. اي لان ماكو غير حل

.. زين طمنتني خلي احجيلك واكولك شنو الموضوع

عقدت حواجبي وكلت .. يعني حضرتك صارلك ساعة تحجي وطلعت انا المقصود بهذا كلامك

.. اي والله مو انت واخوك الله يحفظكم ما تتحاجون وتقلبون الكلام وتفسرونه حسب ما يعجبكم

.. اي بالله غرد خلي افتهم شنو الموضوع

.. انا لازم ابري ذمتي وابلغك بالشي الي عرفته واطلع من السالفة حتى ما اكون مسؤل امام الله وانتوا بكيفكم

.. شنو السالفة عناد خوفتني
.. يا اخي كل ما بالموضوع انا سمعت من واحد بالسوك
اسمه صلاح ابو الالبان على الاساس متقدم وطالب ايد اختكم

ضيقت عيوني بشك وسألته .. اي وانت شنو شكو شدخلك بالموضوع

جاوبني بسرعة وكال .. والله عرفت راح تنظرلي بهاي النظرة
بس قبل لا يروح بالك بعيد

انا كلت ابلغك على الي اعرفه وانتوا بكيفكم لان هذا زواج مو لعبة
واختكم عندكم امانة بركبتكم

.. اي كمل وشنو هذا الشي الي تعرفه

.. انا اعرف صلاح ابو الالبان كلش زين هو خوش ولد وابن سوك وسبع بس الي ما تعرفونه ان صلاح مستكعد وحدة وحاطها ببيت لوحدها بدون علم اهله
واكيد هذا الشي ما راح يصرفلكم ولا راح تسكتون عليه

.. وانت شلون عرفت
.. مو كلتلك. انا اعرفه من زمان وجماعتي بالصدفة حجوا بسالفته
ومن سمعت بي متقدم لأختكم انا برج من عقلي طار
ااااقصد كلت لازم اكلكم الصار

بس ها مو يروح بالك بعيد
وعبالك انا ادور على الرجال عيوب حتى تزحلگونه وتتفركش قسمة اختكم

لا والله انا نيتي صافية واحبلكم الخير والي ما ارضاه على نفسي ما ارضاه لغيري بس صحبتي وياكم تقتضي علية انبهكم

طبطبت على كتفه وگلت ..رسالتك وصلت يا عناد وراح انطي خبر لمهيمن وابلغه بكلامك وهو يروح يتأكد بنفسه حتى ما نظلم الرجال

يالله ياصاح انا صار لازم اروح هم يالله اكمل كم شغلة قبل لا اسافر
يالله اسلم عليك

اخذني بالاحضان وعصر ظلوعي وكال
.. دير بالك على نفسك مو تشطح عيونك منا لو منا وتلعب بذيلك
شيخلصك مني والله اسويك مزق

.. ههههه وين يا حصرة هو سفر شغل مو ونسة

.. احلف خليني اصدك عود راسلني مو تنسى

كان عناد يحجي وياي وبكل ضنه انا مسافر للخارج وكل كلمة تصدر منهم تحسسني بالذنب والارتباك عبالك انذار او تحذير

حوراء

خلص الدوام وطلعت برة يم البوابة انتظر ريم
كنت كلش ضايجة اليوم جلال راح يسافر باوعت للساعة وبرطمت شفايفي اكيد هسة هو بالطريق للمطار
بالحقيقة انا فرحانة لجلال وحزنانة بنفس الوقت عليه
فرحانة ان هو راح يحقق حلمه وهالشي خلاني افتخر بي

وحزنانة لان ما اكدر على فراقه هواي ٣ اشهر
بس ما بيدنا شي غير بس الصبر

كنت واكفة وسمعت صديقاتي واكفات يمي ويحجون
.. لج عيني هذا شنو الصاك الي نازل على كليتنا

الثانية جاوبتها .. توجد كائنات تركية قرب جامعتنا يا مرحبا
يامرحبا

.. انصهرت بنات هذا شعنده واكف بالشمس سودة علية

هم يحجون واني اخذني الفضول اباوع وياهم عالشاب
سالتهم .. وينه بالله خلي اشوف خبصتوني بي

اشرت على مسافة مو بعيدة عنا
شهكت وگلبي انتفض من وكعت عيوني على جلال

عزة هذني صارلهن ساعة كاعدات يتغزلن بقرباني
ما حسيت على روحي من مشيت ورحت يمه

شافني وابتسم واجة اقترب علية
حجيت وياه بغيض وانا التفت على البنات وارجع اباوع عليه

.. جلال شتسوي جاي هنا حضرتك كاعد تستعرض
ابتسم وكال .. اجيت اودع غزال البصرة قبل لا اسافر
ما انطاني گلبي اروح وما اودعج

هو كال هيج واني نسيت روحي واتبخر الغضب وحتى نسيت المكان الي اني بي

.. يعني اجيت للكلية متعني علمود تودعني
.. اي

كان يباوعلي بلهفة
وعيونه وضوة الشمس خلتني ادوخ واضيع بنظراته

.. حور انا رايح ديري بالج على نفس ونور خليها بعيونج
انا راح ابقى على تواصل وية مهيمن ونور
وتكدرين تعرفين اخباري منهم

.. ما يحتاج تعلمني شلون اجيب اخبارك
جلال
.. عيونه
.. خليني على بالك وياني وياك عيونك تروح على بنات الغرب
وتنغر بيهم ترة من هسة اكولك
ما تلكة مثلنا ولا بحنيتنا لو لفيت العالم كله

ضحك وعيونه لمعت وكال .. هو انا اكدر اتجرأ
واشر على گلبه قبل لا يروح
.. هذا حالف ما ينبض الا لغزال البصرة

يالله مع السلامة
.. في امان الله توصل بالسلامة

وبگلبي كملتها في امان الله يالغالي

راح عبر الشارع واجر تكسي ونظرات عيوني كانت تلاحقه
نزلت دمعة من عيوني وعرفت روحي موحمل بعاد

حسيت على ايد تربت على كتفي التفتت اشوف منو واتفاجئت بريم

كانت نظراتها تتنقل بيني وبين المكان الي اجر منه جلال السيارة

ريم .. اي ياحلوة ممكن اعرف ابن عمي شنو كان يسوي هنا يم كليتج

باوعت منا ومنا بحذر وحجيت
.. اشششش لج نصي صوتج لا يسمعونج البنات ترة
صارلهن ساعة يراقبني
امشي خلي نصعد بالسيارة وبعدين افهمج

ريم
مر يومين على موقفي وية مهيمن
بعد الي صار بعد محد طرق الموضوع مرة الثانية
ولاحجوا بي

مريت من المطبخ وكالعادة ام مهيمن كانت تسوي تركيبة الاعشاب والعلاج
شافتني وكالت بصوت ناصي عود تحاجي نور
.. والله بنات هالوكت متعافيات يرفسن نعمة الله برجليهن
مكرود يالي بكلبي ماعندك حظ وبخت

بس ام مهيمن كانت محروك گلبها وكلما تشوفني لازم تسمعني كلمة مو بيدها

اما هو نفسه مهيمن فهذا حرمني حتى شوفته عبالك ديعاقبني بس بغير طريقة
واذا التقيت وياه بالصدفة يسوي نفسه ما يشوفني

كنت احجي وية نور
.. واخيراً خلصت الامتحانات وكعدنا بالبيت هسة اكدر اتفرغ لنفسي
احس بروحي هاملة روحي يحتاجلي اسوي فرمتة وعناية لبشرتي
واعدل كصة شعري

ام مهيمن تدردم بصوت ناصي وتطحن بالاعشاب بيدة الهاون وكالت .. مكرود يالي بگلبي راح تبقى بحسرة الشعر الطويل

باوعت عليها ونور كاتمة ضحكتها
.. هسة هاي شلون حلها على كل كلمة احجيها تعلق

نور.. عذريها ترة حقها گلب والدة وتشوف ابنها مشلوع گلبه
وضايج اكيد راح تسوي هيج

.. اووف والله اختنكت كليلي شنو اسوي

.. والله يا اختي عقلج براسج تعرفين خلاصج
يعني انتي صاحبة القرار وتعرفين مصلحتج وين

قطع كلامنا دخول مهيمن
للبيت كان كلش ضايج من يوم سفر جلال كلنا ضجنا وخصوصاً نور وحور كان واضح عليهم افتقاد وجود جلال بالبيت
اما مستر حجر فما يبين عليه مشاعره مدفونة

باوع لنور وكال .. نور تعاي وياي اريدج بشغلة عندي موضوع وياج

باوعت لنور ارتبكت وكالت ..هسة بس اغسل ايدية واجي وراك

نور
غسلت ايدية واني وريم نتبادل النظرات
شنو يريد مهيمن
رحت صعدت وراه كان صاعد للقاط الثاني
لكيته كاعد بالغرفة.

.. ها مهيمن كول شنو ردت

رفع راسه وكال .. نور تتذكرين صلاح الي طلب ايدج مني
هزيت راسي بموافقة.. اي اتذكره شنو شبي

.. بالحقيقة كنت اتمنى ان افرح بيج واشوفج عروسة بيوم اسلمج بيدي لرجال كفو يعرف قيمتج ويصونج
بس مع الاسف سمعت عنه كم شغلة ما عجبتني وسألت عليه.
وتأكدت بنفسي من الكلام الي وصلني وطلع كلامهم صيحيح
لذلك كلت ابلغج بقراري

دنكت وجاوبته .. الخيرة فيما اختاره الله. لاتزعل نفسك مهيمن
.. لا يابة على شنو ازعل بالعكس خسارته ربح الي
وين لاگيها اختي تبقى منورة ببيتي
بس خايف عليج لاتضوجين يعني كل بنية بعمرج تتمنى تتزوج وتكون بيتها وعائلتها وتحقق احلامها

ابتسمت .. مهيمن هاي احلام البنية الطبيعية
بس اني مو اي بنية الي مثلي اقوى احلامها ان تعيش بأمان

باوع علية وكال .. انتي بأمان ما دامني عايش اشم الهوى
.. ربي ما يحرمني منك
درت وجهي حتى انزل كال
.. نور بالله رحمة على والديج ما تسويلي كلاص جاي وتودينه
بيد المفخخة ريم. عندي حجي وياها

.. صار من عيوني
رحت نزلت جوة ادور على ريم لكيتها كاعدة يم ام مهيمن تعلمها
شلون تطحن الاعشاب والاخت مندمجة تدك باليدة

وام مهيمن تكلها .. خالة شبيج مايعة دكي حيل
ريم .. اخاف ينكسر
.. سدج امين ما ينكسر بس خاف ايدج تنكسر

.. لا بس شوية بدت توجعني
ام مهيمن .. الله يكون بعونك يالي بگلبي

ريم تباوع عليها بعدم فهم ورجعت تدك حيل وتقلد
كلام ام مهيمن وتكول بصوت ناصي
.. الله يكون بعونك يلي بگلبي

هي كالت هيج وحوراء طكتها ضحكة .. ردها ان استطعت
ام مهيمن .. ها خير خالة منهو هذا الموجود بگلبج

ريم حركت حواجبها وكالت .. الموجود بگلبي بطينين واذينين وشوية شرايين

حوراء .. والله انك خطيرة يا كناري ولا عرفتج

ام مهيمن دارت وجهة على حوراء .. بالله شو تعالي
ناوشيني ذيج العلبة واشتغلي ويانا بدال ما كاعدة تتمضحكين

حوراء رفعت المنشفة كدامها وكالت .. راح ادخل اسبح
عذريني يمج كناري كافي عليج كل اصبع مرة هسة تشوفين بعينج

راحت طلعت من المطبخ وام مهيمن هزت ايدها وباوعت لريم بعدم اقتناع
.. يامرة
هي اصابعها وين يلحكون يصيرون نادرات اذا شوكت ما اجيها ملونتهم يكول قوس قزح مو اصابع حشى

ريم ترفع ايدها وتباوع على اصابعها وتكول
.. يمة فديتهم هم الروح والرية

اني كنت اصب بالجاي واستمع لمناوشاتهم بالكلام واضحك بدون صوت

اخذت كلاص الجاي وكلت لريم
.. انطيني عنج اني اساعد خالة. شكلج راح تشلعين گلبها
وانتي هاج اخذي الجاي وديه لمهيمن

كامت ريم ومبين عليها تريد تشرد من ام مهيمن

ريم
اخذت الجاي وصعدته لمهيمن
يعني مثل الي يشرد من الطاوة ويشمر روحه بالنار
انهزم من ام مهيمن لمهيمن شلون اثنين

لكيته كاعد بالغرفة
دكيت الباب حتى ينتبه علية
باوع علية وحجيت .. صعدتلك الجاي بس ها مو يروح تفكيرك بعيد
نور الي دزته بيدي يعني اني لو علية ما اصعد

جاوبني بهدوء .. اعرف نور ودتج لان انا الي كلتلها

رفعت حاجبي وانطيته الجاي
كال بأمر .. تعالي كعدي كدامي اريد احجي وياج

رحت كعدت كدامه بكل هدوء الفضول كاتلني واريد اعرف شنو يريد مني
شرب الجاي وباوعلي وكال .. احجي كولي شنو هي شروطج
حتى توافقين

.. اني ما عندي شروط واتوقع اني رفضت

.. ليش ترفضين
ريم مو انتي الي كلتي انا احبك وينه هذا حبج
معقولة حبج جان نزوة عابرة لو هو حب مراهقة وتبخر

ما اعرف شصار بية من سمعت كلامه حسيت استفزني بكلامه نهضت من مكاني وهو اتبعني وكام وسد علية الطريق
رفعت راسي وباوعت عليه

.. .. مهيمن انا عكسك ما راح استحي واخجل واتهرب من كلامي وياك
فعلاً انا احبك ولهذا يومك اني ابقى احبك
ما اخجل لان اعرف بروحي ما غلطت الحب مو حرام ولا عيب
مثلما انت متوقع

نظرة ثقة مرت على وجهه وكال .. زين اكدر اعرف شنو المانع

.. بس مثلما حضرتك كلت سابقاً وعلمتني ان الحب مو سبب كافي حتى يخليني ابني حياتي واتزوجك

ضربته بنفس كلماته وباوع علية بنظرة اعجاب وكال

.. ريم انتي جاي تحجين وية رجال مو مراهق ما يعرف شلون يدير حياته. كولي من الاخير شنو الي تريدينه من الاخير

..تعرف شنو مشكلتك
انت لحد هاي اللحظة ما معترف بغلطك وياي وجاي تحجي وياي حتى تسكتني عبالك جاي تحجي وية طفلة

.. ريم انا لو شايفج طفلة كان مستحيل تلكيني واكف احجي وياج
او اتقدم لج
واذا كنتي تقصدين على تصرفاتي وياج واسلوبي الجاف بالتعامل وياج بخصوص.
طريقة طلبي بموضوع الزواج منج اني اعترف انت الج حق

بس صدگيني انا كنت ناوي اجمع خوالي كلهم واتقدملج واسوي حفلة خطوبة ترفعين راسج بيها
ريم مو انا الي اقلل من قدر بنت عمي

بس طلع الموضوع من ايدي اول ما شفت هذا الخروف جايني يتقدملج ويطلب ايدج
مو زين ما حطيت اسنونه بيده حمدي الله انتهت السالفة بس كلام

.. زين انت ليش جاي تكولي هذا الحجي هسة ليش ما كلته من الاول

.. ريم انتي المفروض تعرفيني زين
شلون ترديني احجي والكل جان واكف يسمع حجينا
يعني مثل هيج كلام خاص ما احب اي واحد يستمع له

باوعت عليه بتفكير وصرت ادرس كلامه
بس هو مهيمن نسى جرحه الي ويريدني اغير من تصرفاتي
وهو يبقى على نفس تصرفاته وياي وهذا الشي ما يرضيني

جاوبته بتحدي وكلت ..

اذا كنت تريدني اوافق
فلازم تبدي تغير تصرفاتك واسلوبك الجاف وياي
اني اريدك ما تقرر بدون علمي وما تعصب علية وتعلي صوتك
وما تجبرني على اي شي
واذا بدر مني تصرف غلط اريدك تجي تفهمني بهدوء

.. صار يابعد عمج يجرالج التردينه
بس خلي ببالج هاي اخر مرة اجي واسألج عن رأيج بالزواج

راح انتظرج انتي تجيني برجليج وتبلغيني موافقتج من تشوفين نفسج مستعدة ومقتنعة بالزواج من مهيمن

جان يحجي بكل ثقة
جاوبته واني متأكدة من نفسي
.. اذا كدرت تلتزم بكلامك وياي اكيد راح اجيك بنفسي وانطيك موافقتي

رفعت راسي وهزيت شعري بحركتي المعتادة
باوع علية بأعجاب من غير ما ينتبه على نفسه

ورحت اتوجهت عالباب وقبل لا اطلع كلت
.. ترة خلي ببالك اني اكره الشعر الطويل فلا تتوقع مني اطول شعري

جاوبني وهو يبتسم .. ومنو كلج انا احب الشعر الطويل اصلاً انا
من يومي اموت عالشعر القصير

انطيته ظهري وضحكت على كلامه ونزلت

جلال
التحقت بالمعسكر وهناك بديت اول مرحلة من
الحياة هنا تختلف عن حياتي قبل
اول ما دخلت حسيت بروحي مثل الطفل الصغير الي يتركونه اهله
لوحده بالمدرسة بنص الليل

افتقدت حياتي وشغلي وية مهيمن وعناد وشوفتي لحور ونور وريم
هواي اشياء افتقدتها

بس كل هذا الحنين يزول من اتذكر صرخات رنين ورند وبدلة عرس اسراء ودموع حنوش والحلم المذبوح لسلوان صاحبي

كل هاي الاشياء حطيتهم كدام عيني وصرت ابدي يومي بيهم
هناك خضعت لجميع انواع التدريب والتعليم والتأهيل

مرت علية الايام
وبديت اتعود على قساوة التدريب
اتعلمت حمل السلاح وتفكيكه اتدربت على طرق متعددة للقتال
وصرت يوم عن يوم اكتسب خبرة واكتشف فقرة عن الاستخبارات

كنت اتواصل وية مهيمن ونور واتصل عليهم عالواتس اب
والشريحة اول ما وصلت للمعسكر طلعتها من الجهاز حتى ما يكدرون يتصلون عليها

يتبع

احداث البارت القادم

اتصل علية الضابط علي وبلغني عن قرب موعد انتهاء الدورة

مهيمن
نظرات الحذر بعيون عناد وكلامه عن جلال خلاني اتفاجيء واخلي الف علامة استفهام

اتمنى لكم قراءة ممتعة
اختكم نهى الحسون