قضية لم الشمل الفصل الثاني وأربعون 42 - بقلم نهى

#الكاتبة_نهى_الحسون
#قضية_الشمل

مساء الانوار والسرور عليكم 🌹🌹🌹

جلال
لابس الزي العسكري
وواكف بوضع الاستعداد بين صف من الضباط المتخرجين

بعدما قمت بتأدية قسم الولاء لأرض الوطن بصوت عالي
كان كل حرف من كلمات القسم نابعة من جروحي النازفة
اتقدمت على مجموعة ضباط ركن واديت التحية العسكرية امام كل واحد منهم
والضباط الي كان لهم الدور بتأهيلي وتعليمي

ااقتربت على الضابط المسؤل اخذت التحية امامه
وعلق الرتبة على كتفي حسيت بشعور غريب قريب للفخر
ارتعد گلبي من كد المشاعر الي صالت وجالت بعقلي بهاي اللحظة

اتمنيت بهاي اللحظة مهيمن ونور وباربي وحور كلهم موجودين
وام مهيمن تكعد تصلي وتهلي فرحانة تباركلي بهاي اللحظة

بعدما علق الرتب على اكتافي رجعت للخلف واخذت التحية
مع هتاف (عاش الوطن )

مريت بكل الاجراءات ومراسيم التخرج حتى اوصل لهدفي
واكيد الضابط علي كان موجود من ضمن الحاضرين وكان ينتظرني
وكان لابس بدلته العسكرية وهو برتبة رائد

رحت عليه واديتله التحية وسلمت عليه
الضابط علي .. مبروك يابطل ان شاء الله نفرح بالنصر

.. بأذن الله سيدي
.. جلال صار وقت الجد
.. انا مستعد سيدي

.. بس بالاول اريدك ترجع لأهلك وتطمنهم وبعدها نبدي بالمرحلة الثانية من التأهيل

وبدأ الضابط ينطيني الاوامر
من ترجع للبصرة راح تتقابل مع النقيب همام هذا راح يكون مسؤول على تأهيلك واستعدادك بتطبيق العمليات الاستخباراتية
الي اتعلمتها بأرض الواقع وهو راح ياخذك وياه

للاماكن الي راح تفيدك بأستخدام خبراتك وتنفيذها وتساعدك بتقوية كفاءتك وتطويرها

.. تمام سيدي
.. يالله جهز نفسك وجنطتك حتى تتوكل
وقبل لا تروح مو تنسى تشتري هدايا للاهل بصفتك كنت بالخارج

اديت التحية ورجعت للخلف
.. تمام سيدي

وبيومها جمعت اغراضي وجنطتي وطلعت من القاعدة ورحت للمول موجود ببغداد
اشتريت الهدايا كلها ماركة على كولت باربي حتى ما اتعرض لموقف الشك

واشتريت ساعة لمهيمن وعلبة ضلال ماركة لباربي
ومدالية معلق بيها ملاك لنور
وحور اشتريتلها سوار بي حروف مبعثرة من ضمن الحروف اول حروف بأسماءنا واشتريت لعناد
جداحة تشتغل عالشحن منقوش عليها صقر هو يحب هاي الاشياء

وام مهيمن احتاريت شنو اشتريلها بقيت دايخ
ما اعرف المرة الي بعمرها شنو يهدولها
ماعندي خبرة بهاي الامور لان حتى ام مثل العالم ماعندي واكعد اشتريلها

بقيت دايخ ادور وبعدين لكيت خاتم ذهب بي حجر لونه فيروزي
مال عمرها كانت هي اغلى هدية بيهم وبالحقيقة هاي الانسانة
تستاهل اكثر من الذهب
موقفها وياي انا واختي نور وبنت عمي عمري ما راح انساه كانت
مرة طيبة عاملتنا بكل ود وحنان ما بخلت علينا بعطفها واهتمامها
ومواقفها تشهدلها

كنت حيل متلهف لرجوعي للبيت
مشتاقلهم بكد رحمة الله

نور

اليوم البيت كله يضوي كنت حيل فرحانة ومخبوصة ومحتارة شنو اسوي جلال اليوم يرجع للعراق

كل شوية طابخة صنف من الاكلات الي يحبها جلال
حور اهتمت بالحلويات وريم بالترتيب

وام مهيمن كعدت تبخر بالبيت طبعاً واكيد من الخلطات الخاصة الي تسويها

مهيمن كان كل شوية يتصل عليه
بس جهازه مغلق بس قبل ساعة حصله وكله انا وصلت
وراح اركب تكسي واجي للبيت

.. جلال وصل

كلمات كالها مهيمن بلهفة
ركضت للباب وشفت جلال جاي يسلم على مهيمن
رحت سلمت عليه وعيوني تلمع بالدموع

يسلم ويبتسم كان اكو شي متغير بجلال بس ما اعرف هو شنو
يمكن شوية طولان او اكتافه مفتولة ما اعرف بس
التغيير كان نحو الاحسن ويارب دوم بخير

مهيمن ربت على ظهره وسأله وهو يتفحص شكله وكله
.. شنو حضرتك جنت تلعب حديد لو رايح تعلن عن اختراعك

.. لا بس يمكن لان الشغل بالسيارات علمود الجهاز واشيل واحط شغلات ثقيلة

ام مهيمن اجتي وسلمت عليه ودخلته للبيت واحنا وراه
حوراء سألته .. صدك جلال شنو سويت على الجهاز وشوكت راح
تبين نتائج مشروعك

باوع عليها وابتسم .. ان شاء الله عن قريب ما ظل شي

وريم
سألته .. جلال عفية راوينا صورك الي اخذتهم بالخارج

اباوع عليه جمدت معاني وجهه للحظة وكال
.. ولج باربي على طاري الخارج تذكرتج وانا هناك من شفت علبة الظلال الماركة اشتريتها الج

مهيمن گلب عيونه بقلة صبر وگال .. اهووو هسة شفتحت علينا من باب اي مو جانت ناسية السالفة شنو جيت ذكرتها بيها

ريم بفرحة.. احلف صدك والله جبتلي شدو ماركة
.. اي والله

وكعد جلال يطلع بالهدايا
وسلم كل واحد بينا هديته
مهيمن باوع وكله تصدك انا ما ابلس ساعة بس لخاطر هديتك راح البسها

انطاني هديتي كانت كلش حلوة وفرحت بيها وحور ما فتحت هديتها كانت نظراته لحور من سلمها هديتها بيها لغز

وهي هزت راسها بموافقة وشكرته
وبعدها طلع هدية ام مهيمن وباسها من راسها
وكال ..احتاريت شنو اشتريلج وما لكيت شي يلوك للذهب الا الذهب

شافت المحبس ورفعت راسها وعيونها دمعت
.. يا خالة ليش هيج مكلف روحك والله سلامتك عندي تكفيني كون انت واخوانك بخير هاي اغلى هدية

كنا كلنا متجمعين حول ام مهيمن والبسمة مرسومة على وجوهنا

صار الليل ومهيمن عزم جماعتهم وخواله بمناسبة رجوع
جلال من السفر

واني والبنات انشغلنا بالتحضيرات للعشا
دخلت للمطبخ ولكيت ريم متحزمة وصايرة ام بيت
صارلها فترة نازل عليها الوحي وكاعدة تتعلم الطبخ

وام مهيمن اخذت دور المعلم وية ريم تعلم بيها وما تلحك
لان الست ريم تربي علة بالگلب وتحط گلبنا بيدنا يالله تتقن الشي

لازم كون تسوي كارثة بالمطبخ صرت اذا ادخل بالمطبخ واشوفها
جاي تشتغل او تطبخ احط گلبي بشيشة لان راح تخرب الاول والتالي

وتعالي يانور رجعي رتبي كلشي ورجعيه لمكانه اصلح ما افسده الدهر ..قصدي ريم

رحت يمها اباوع شنو جاي تسوي لكيتها مطلعة دجاجة منكعتها بالماي حتى تموع وكاعدة تثرم بصل والعيون تدمع والخشم احمر عبالك واحد كاتلها بس يالله ما علينا اهم شي مسك الختام

.. ها ريم شنو راح تسوين

التفتت علية كانت رافعة شعرها وواكعة خصل بصورة عشوائية بس ناطيتها حلا فوك حلاها

.. راح اسوي تبسي دجاج
.. تبسي دجاج مرة وحدة شنو هاي ولا عرفتج
ريم انطيني عنج انا اسوي ترة مهيمن عازم جماعته مو مال تكعدين تحاولين

دخلت حوراء وسمعت كلامنا كانت شايلة سطل المسح
كانت تريد تصعد تنظف القاط الثاني
وكالت .. ولج كناري انطيها خلي نور هي تطبخ العشا متسمعيها تكلج مهيمن عازم جماعته. يعني اصدقائه ناس بشر طبيعيين
مو فئران تجارب وتكعدين تطبقين براسهم تجارب الطبخ الانفلاقية
لحضرتج

.. حور مالج دخل انتي خليج بشغلج
باوعت علية وكالت .. نور عفية لا تحطمين مواهبي بالطبخ وتكسرين مجاديفي

.. يالله امرنا لله نخليج تطبخين ونشوف بس ها من هسة اكلج انا راح ابقى فوك راسج واني هم راح اطلع كبة واكليها لان خالة كالت .. بس دجاج ما يكفي

بديت انظف الخضرة واغسلها وحطيت الدجاجة على الكاونتر
.. ريم ترة الدجاجة ماعت هم يالله تحطيها عالنار

كانت ناطيتني ظهرها دتثرم بمواد التبسي وكالت
.. هسة بس اخلص الي بيدي ابلش بيها

قطع كلامنا دخول جلال للمطبخ
.. اكول نور ماتكوليلي وين حاطة كيس الهديا بالله تعالي انطيني
هدية عناد خلي انطيها له لان اكل گلبي كل شوية يكلي وين هديتي
عبالك طفل

ابتسمت واني اجفف بيدي وكلتله .. هسة جاية اني اطلعها الك
ادري بيك ما راح تدبرها وتخرب الكنتور كله تدور عليها

اباوع لحور مرت من يمنا وهي شايلة سطلة الماي تريد تصعد فوك

جلال استوقفها واخذها منها .. انطيني عنج انا اصعدها
وهي بكل طاعة انطته السطل وصعده لها

كنت شاهدة على تبادل نظرات الحب بينهم

رحت وفتحت الكنتور وكعدت ادور
.. اني حاطتها بعلاكة كلت خاف جهال بيت خالهم يجون ويلعبون
بالغراض
دخل وراي للغرفة وكال
.. ههههه يعني ضامتها حتى الجهال ما يضيعونها وتالي انتي ضيعتيها

كنت احجي وياه و مديت ايدي ورة الملابس المصفطة وطلعتها
.. هاك هاي هي عابتلك شبسرعة اتبليت علية واتهمتني

اخذها مني وسمعنا صوت عيطة ريم
.. عزة بس لا حركت روحها

رحت ركضت ورة جلال على صوتها ما لحكنا عليها طلعت تركض من باب المطبخ

جلال ركض وراها وصاح .. من اشتعلتي نار ونفط ولج باربي وين طالعة منا جماعتنا كلهم بالاستقبال

بس لا حياة لمن تنادي
ريم كانت طلعت بالشارع تركض وما نعرف شنو السبب
ام مهيمن اجتي وراها حور .. شنو شصار شبيها بنت عمج تصيح

التفتت عليها .. والله ما اعرف شبيها طلعت للشارع
.. عزة لا تكولين طلعت مفرعة
.. اي خالة طلعت ما لابسة شال

ام مهيمن شهكت ودارت وجها وكالت
.. ولج حوراء لحكي جيبيلي عباتي راح نشتهر هاي الخبلة راح تسويلنا مصيبة

هذا الحجي جلال اخذ شالي بسرعة وراح وام مهيمن طلعت وراه

واني رحت جبتلي شال خليته على راسي وطلعت اريد اعرف شصاير

لكيت مهيمن طلع من باب الاستقبال على الصوت ووراه كم واحد من جماعته بس واحد منهم اتوقف التفت علية وخزرني
وحجة بغيض وكال .. فوتي جوة شعندج طالعة

ما انطيته مجال يكمل كلامه بسرعة رجعت ادراجي وسويت انسحاب ودخلت جوة
دكات گلبي صارت تنبض بايقاع
.. عزة هذا عناد

ريم

اليوم قررت انا اطبخ لمهيمن وجماعته واخليه يفتخر بية وبطبخي حضرت كل شي وبلشت بالطبخ كانت نور تحوم فوك راسي بعدم ثقة شكلها خايفة اخرب الطبخة

بس هي ما تعرف ريم من تصر على شي تسوي
اليوم الا افاجئهم كلهم لان اني اول البارحة طبخت التبسي كدام ام مهيمن ونجحت حتى هي اثنت على طبخي وكالت انتي صحيح بعدج جديدة بالطبخ بس عندج نفس طيب على الاكل

طلعت نور من المطبخ ورة جلال وانا بقيت اكمل ثرم البصل والبتيتة اشكد اكره البصل حرگ عيوني وريحته مو طيبة
بس ينطي للطبخ طعم طيب

سمعت صوت حركة من وراي عبالي نور دخلت للمطبخ
ودتشتغل واكفة وراي بالبداية ما اهتميت متعودة على نور
دائماً هادئة حتى من تشتغل

بس لفت انتباهي صوت سقوط شي وردمه بالكاع
التفتت وجان اشوف البزونة ماخذة الدجاجة وتريد تطلع من المطبخ

عزة انا شفتها وانا عطت بيها وهي سمعت صوتي العالي
اخذي الدجاجة وشردي

وانا ركضت وراها بدون تردد شفتها شردت من الباب للشارع والدجاجة وياها رحت اهرول وراها والسكين بيدي

وانا اصيح شفت كم ولد من اولاد بيت خالهم صغار يلعبون طوبة بالدربونة. هي شافتني طلعت وراها بالشارع تركت الدجاجة

بالكاع يم سياج البيت الخارجي وراحت تركض ما بيها حيل
رحت دنكت شلت الدجاجة وانا اصيح بانتصار

.. لج انتي ويامن تلعبين انا ريم محد يگدر يغافلني

وعلى طاري الغفلة التفتت اريد ادخل وما اشوف الا مهيمن طالع وراي بالشارع وعيونه صايرات بكصته
وخالتي وجلال جايين
كان جلال شايل يركض وبيده شال
بسرعة اجة علية وحطه فوك راسي ومهيمن

اقترب مني وزمخ بية .. ولج غضب بلاء شتسوين طالعة مفرعة بالشارع

جاوبته وانا اباوع وراه .. البزونة اخذت الدجاجة وشردت

حاصرتني البجية من الموقف بكبره
باوعت وراه. وانتبهت لصاحبهم عناد كان يمشي وراهم لكن من اتطمن ماكو شي بسرعة التفتت ودار على جماعتهم وكال

.. رجعوا شباب ماكو شي.
ما انطاهم مجال يشوفون شي بسرعة دخلهم دفع للبيت

كنت اتمعن بتصرفات كل الي حولي الا مهيمن ما اتجرأت ارفع عيني واحطها بعينه

لان هسة يالله وصل الايعاز لعقلي وانتبهت لوضعي ولمكاني الغلط بالشارع

لزمني من زندي ودخلني بسرعة للبيت وهو يلعن ويسب ويغلط
وامه تهدي بي وجلال كال
.. مهيمن كول يالله منا جماعتنا بالاستقبال بعدين حاسبها مو هسة

.. ولج غضب بختج بالخطار بس بسيطة اليوم ما اكون مهيمن اذا ما كسرت رجليج على هاي الطلعة ولج انتي شنو ما عندج عقل بس اريد افتهم هذا الي براسج شنو عقل لو حجارة

كان هو يحجي ومشاعري انتقلت من الخوف والتأنيب للغضب والاعتراض على كلامه وياي

شمرت الدجاجة عالسنك ونترت ايده من زندي وكلت
.. كاااافي ترة ماله داعي كل هذا الصياح ترة ما سويت شي اني

ام مهيمن اجتي علية وكالت .. خالة كافي مو جاي تشوفينه معصب سكتي ولا تجاوبينه هو راح يهدي من وحده

باوع لامه وكال
.. يمة انا طالع يم الشباب لزميها ولا تخليها تسوي اي شي ستري علينا لا والله اطلع اجناني عليها بهذا الليل واخلي السادة والعلام يحتارون بيها

ارتعد جسمي من وعيده وغضبه
وجاوبته وانا اكابر .. عايفتلك المطبخ وطالعة يا غبي الي يبقالك هنا

عفته يرعد من الغضب والبنات يهدون بي
ام مهيمن.. يمة كافي اهدي ما صار شي
اسمعه يحجي .. شلون ما صار شي وجماعتي شافوها مفرعة تركض
بالشارع هي وبجامتها وشعرها ما خالة شي ما مسويته بروحها
تجيب التايه لو يضيع

رحت دخلت للغرفة وسديت الباب حيل واني ضايجة ومقهورة من كل الصار
بقيت كاعدة لوحدي بالغرفة وكل شوية وحدة من البنات تدخل للغرفة اذا عندها شي هنا تريد تاخذه

ورة اربع ساعات طلعوا جماعتهم بعدما تعشوا وكملوا
طلعت من الغرفة حتى اشوف الاجواء واجس النبض لكيت جلال بالمطبخ جاي يسولف وية نور وحوراء كانت ترتب بالمواعين وتخليهم بالكاونتر

بس شافني التفت منا ومنا حتى يأمن الطريق وكال
.. والله يا باربي بيح بخت وسكت مهيمن عنج.

.. وشصار ما وكع من السما دما شدعوا عليه استاذ مهيمن
هيج كلب الدنيا

.. ولج باربي طالعة بالشارع تركضين مفرعة بالبجاما شتريدن من مهيمن يصفكلج
والله تريدين الصدك نقذج عناد
اتلاحك للموضوع ودخل الشباب للديوان قبل لا يشوفونج انتي وكفشتج والا لو شايفيج جان كتلج يصير عمل شعبي
شيخلصج من مهيمن

برطمت وكلام جلال زاد الطين بلة
.. عفية جلال احتفظ بمعلوماتك عن قدرات اخوك الخارقة لنفسك
اني ما عايزة ترهيب. شنو حاسة نفسي عايشة بفلم رعب

وانا عقلي يكمز من سالفة الترهيب
حوراء .. هسة هي كنار غير تستر على روحها وتبطل حجي
هاي وانتي خايفة وتشعرين بالرهبة هيج لسانج
زين اذا مخايفة شراح تسوين بأخوي

.. لا تخافين على اخوج ما ....
قطعت كلامي فجاءة من شفت مهيمن بالطارمة وجاي بتجاه المطبخ يريد يدخل

جليت صوتي وكلت
.. على العموم الكلام ما يفيد اني اروح للغرفة احسن لي

وانسحبت بسرعة من المطبخ قبل لا يدخل مهيمن ويشوفني
كنت خايفة منه ومعصبه عليه بنفس الوقت

رجعت للغرفة ورديت الباب ورحت كعدت على سريري
كنت جوعانة لان ما اتعشيت والغدى كل شي ما افتهمت منه لان التهينا وية جلال وفرحانين بي من كد السوالف وياه حتى الاكل ما اعرف شنو اكلت

سمعته سأل حور علية وكال .. وينها ريم
جاوبته .. بالغرفة
وكملت كلامها تستعطفه
.. ترة خطية ريم ما اتعشت زعلانة

جاوبها .. وزعلتهم وعنها لا اتعشت

عافها وراح
ظل گلبي يفور من ورة جاوبه لحور
ويلوموني ليش رفضت الزواج اي ما يشوف روحه بالاول
تصرفاته كلها نتر وزمخ عبالك اشتغل عنده صبي
ماكو شي اسمه تفاهم والله ابو طبع ما يجوز من طبعه

صارت الساعة ب١٢ بالليل انتظرتهم كلهم ينامون حتى اروح اكل
غير متت من الجوع
الجوع لا دين له اجتي نور وهي تحجي عالصار اليوم وياي وحوراء تجاوبها

نور .. ياعمري ياريمة انتي لازم تصيرين فطنة
حوراء .. ولكم انتوا مو هنا المشكلة لكيت امي
كاعدة تحجي وية روحها بسالفة ريم
اسمعها تكول

.. لا والحظ من حظج يا زهرة.
اخيط شي منا يطلعلي فتك اكبر منه
فرحت كلت الله هداها واتعلمت تطبخ اشو هاي اتخبلت وطلعتلي بالشارع مفرعة بالله هاي شحطلها وتطيب

نور ضحكت وكالت .. خالتي راح تتخبل من وراج
خرب يومج ريم خليتي الرجال كلها تتراكض
وانا اليوم من وراج هم زمخوا علية واكلت فشلة من هاي التمام

باوعت عليها وسألتها .. ليش منو عاط بيج
.. مو شفتهم كلهم طلعوا ظل بالي وردت اشوف شكو
وهم ردت اطلع بس ما اشوف الا هذا صاحبهم عناد
عاط بية وكلي دخلي للبيت شعندج طالعة

واني دخلت ما تشوفين الا غباري
.. لج نور انتي ليش هيج ثولة
شلون تسمحين لعناد يصيح بيج ويأمرج هو منو اصلاً ويكلج دخلي للبيت وبصفته شنو ينتر بيج

نور انتي ليش هيج جبانة يعني ما يصير هيج تخلين الناس يتجاوزون حدهم وياج
انا الي اصغر منج اعرف
احط حدود لأي شخص يحاول يستقوي علية

نور .. صدك انا ليش خفت منه ودخلت المفروض ما اسمحله

كانت نور تحاجي نفسها مثل الي كعدت تراجع الموقف براسها

حوراء قاطعتنا .. خير انتي وياها الموضوع وما فيه الرجال
صاحب الولد وبحكم الغيرة حجاها هيج من باب الحرص

وانتي ست ريم مو كل شي عندج تسوينه عركة وتحولينه لقضية اثبات رأي
الحياة اخذ وعطاء

وغضب مهيمن عليج كان بمحله واي رجل عنده غيره على عرضه هم راح يعصب ويغضب ويسوي هيج

اصلاً اني متعجبة مهيمن اخوي شعجب لحد الان ما شامرج من السطح

التفتت على نور وكلت .. شفتي وشهد شاهدٌ من اهله
هاي اخته تأكد على عنف اخوها

حور نامت بفراشها وكالت .. اهووو هاي الكلام صدك وياها ضايع
مثل الي يترس ماي بجرة مكسورة خليني انام احسن ما افقد عقلي

بقيت اسمع صوت مهيمن يتحرك بالبيت شنو سالفته هذا سحير الليل
شوكت ينام اي متنا من الجوع نريد نطلع ناكل

شعنده كاعد يحوم بالممر
لحظات وصارت هدوء كمت من مكاني ورحت للمطبخ على كيف
وطلعت الاكل من الثلاجة وحميته

وطلعت السلطة وشفت سلة الفلفل الحار هم طلعتها
حطيتهم وصبيت العشا وكعدت اكل

شوية ودخل مهيمن .. واخيراً حضرتج قررتي تطلعين من الجحر
مالتج

بلعت لگمتي وباوعت عليه واتصنعت القوة وجاوبته بلا مبالاة

.. شنو قابل اني فارة واطلع من الجحر
.. لا انتي ارهاب رقم اربعة وخاتل بالجحر
لان تعرفين روحج غلطانة.

اجة كعد كدامي واني باقية محافظة على هدوئي ومستمرة بالاكل
حاولت ما ابين ارتباركي كدامه

.. لا اني ما غلطت بشي الموقف الصار كان تلقائي غير متعمد
يعني محد صار بي شي ولا احد اتأذة

بس ردة فعلك حسستني عبالك سويت كارثة كونية.
.. تعرفين شنو الكارثة بالموضوع
.. شنو
.. الكارثة الي صارت ان انتي لحد الان ما جاي تعرفين خطأج
انتي حتى رافضة تعترفين

.. وليش اعترف بشي اني ما قاصدته

كنت احجي ونزلت عيونه على شافيفي
.. هذا السانج لوين راح يوصلج

.. فديته الساني هو مركز قوتي

باوع علية وسألني .. يعني راح تبقين معندة وما تكولين انا الغلطانة وحقكم علية
.. ابد والله ما راح اعترف بغلط ما قاصدته

باوعت عليه
.. ما دام هيج .. جا بسيطة

سحب وحدة من الفلفل الحار ومسحه على شفايفي بقوة

حاولت ادفع ايديه بس هو كان مثبت راسي ويفرك الفلفل على شفايفي عبالك جاي يحطلي حمرة

قاومته وصرت ابعد براسي بس بدون صوت خاف احجي يوكلني الفلفل وبعد ما اتأكد من الفلفل صار كله على شفايفي

اطلق سراحي واني عطت بي وعيوني نطت من الحرار
احس بشفايفي من ورة الحرارة طككت عبالك نار محتركة

دفعت الكرسي بغضب ووكع بالكاع ورحت عالمغسلة واني احجي
.. انت مجنون وربي احلف عليك انت مجنون

كنت احجي وابجي لان كنت موجوعة وخايفة على شفايفي
هي مو هنا المصيبة
المصيبة بالواكف فوك راسي. كان يضحك ويباوع علية

سألني بلا مبالاة .. تعترفين بغلطج لو بعدج مصرة

باوعت عليه واتلمست شفايفي ونزلت دموعي وكلت .. ما اكدر اجاوبك لان شفايفي كلش متأذية

اباوع عليه راح فتح الثلاجة وطلع منها لبن زبادي
وانطانياه وكال

.. هاج حطي على شفايفج حتى تبرد
دفعت الزبادي وكلت .. ما اريد منك اي شي ما اثق بيك

اخذ الزبادي وغمس ايده وصار يمسح على شفايفي وكال وهو معصب مني
حرت واحتاريت وياه يجرح ويداوي بنفس الوقت هذا شنو يحس

.. وخر عني انت خبيث منو يكول انت ما تريد تزيد حرارة شفايفي باللبن ..

.. لج غضب انا لو اريد ازيد حرارة شفايفج عندي الف طريق.......

انتبه على روحه وكال استغفر الله
الله يلعنك يالشيطان انقلب السحر على الساحر
خلي اطلع احسن واستر على روحي

انطاني علبة اللبن وكال .. هاج غضب اخذي انتي حطي لروحج
وهذا عقاب الج حتى مرت الثانية ما تنسين نفسج وتنتبهين على روحج وما تعاندين

بعدها تركني وراح وانا جامدة بمكاني متفاجئة

نور

اليوم كنت احجي وية خالتي بالنقال مثل كل مرة وبلغتها ان مهيمن راح يحوللهم مبلغ مصرف الهة وللبنات وهي فرحت واندعتلي
كنت بين كل فترة وفترة ارسللها
انهيت الاتصال من عندها وام مهيمن سألتني عليها

.. والله زينة الحمدلله وخطية كلش فرحت من كلتلها انطيت فلوس لمهيمن راح يحولها الكم مصرف الج وللبنات

ام مهيمن.. زين خالة لشوكت تبقين تصرفين عليهم
يعني هي رجلها ما يحس على دمه ويشتغل ويكد على اهل بيته بدال ما ظال عالة

.. يشتغل بس يكولون راتبه ما يكفي
وانا الحمدلله عندي خير من الله ما بيها شي ارسللهم

.. اي خالة كلامج صحيح انا ما اريد اصير مناعة ماعون بس خلي افهمج انتي لازم تنتبهين لنفسج وتفكرين بروحج باجر عكية وراج زواج وبيت انتي حتى قطعة ذهب مثل البنات ماعندج
اشتريلج سورات كلادة انتي حلوة ويلوكلج تلبسين

.. فعلا اني ناسية روحي
اتفقت وياها حتى تاخذني للصايغ حتى اشتريلي كم قطعة ذهب
مر من يمنا جلال

سلم علينا وطلع من البيت رحت وراه اسأله
.. شنو جلال وين رايح اشو حتى ريوك ما اتريكت ليش مستعجل
.. ما الحك اتأخرت عندي شغل

شنو سالفته من رجع لحد اليوم ما كمنا نشوفه
احس بي هواي متغير
هدوئه غريب وتصرفاته الغامضة محيرة
وكان اغلب الوقت باله شارد التفكير وهالشي مو من طبع جلال

كنت احجي وية نفسي واجتي حور وكالت
.. يعني مو بس انا الي منتبهة على تغيير جلال حتى انتي اخته ملاحظة غرابة تصرفاته

يعني نور اتخيلي كلما اسأله عن شغله او الجهاز
يتهرب اصلاً صاير حتى يتهرب مني ما يريد حتي يحجي وياي

بالرغم اني ما فارضة روحي عليه واحجي وياه من باب النصيحة
كانت حوراء حيل مقهورة منه
بس تكتم بگلبها ما تريد تلفت انتباه امها واخوها

لليل رجع مهيمن وبعدها اتصل على جلال يبلغه على قطعة الارض
وكله اشتريتها الك تعال خلي نتكاتب عليها

رجع جلال للبيت وكان حاجبه مضروب سأله مهيمن
.. هاي شنو متعارك

ضحك جلال وكال .. لا يابة متعارك شنو هي مال عرايك
بس كل ما بالموضوع انضربت
بحافة باب السيارة مال صاحبي وانا جاي انزل

مهيمن .. اي غير تنتبه شعندك مستعجل ما طايرة الدنيا

رحت ركضت جبت عدة الاسعاف وصرت اضمده
ومهيمن يحجي وية جلال عن قطعة الارض وصفها اله وكله
قريبة منا وموقعها كلش حلو

وحوراء ظلت تحوم وكالت ترة جرحة عميق يحتاج خياط

جلال .. بعدين اجيكه هسة ضمدي وراي شغل

مهيمن .. انت شنو سالفتك شوكت ما اجيك تصيح عندك شغل وما تلحك ما تكلي شنو هذا الشغل الي ما اعرف عنه

جلال .. بالحقيقة انا جاي ادور على محل بالصناعية اريد افتح مشروع خاص بية
لصيانة الاجهزة والمكائن وغيرها

مهيمن .. حلو خوش فكرة بعدما سويت جهازك الجديد بعد ما ينفع
تبقى بالمعمل حرامات تدفن روحك بشغل مو من اختصاصك

جلال .. لا مهيمن انا حتى لو سويت مشروعي راح ابقى
ادير المعمل وياك

مهيمن .. والله اجذب عليك واذا كلتلك انا مو بعازتك
بس يبقى هذا مستقبلك وتكون انانية مني اذا احتكرتك الي

.. لا تشيل هم انا اعرف شلون اوازن بين شغلي والمعمل

.. عالعموم عناد موجود هم فايدنا بس هو يدير المعمل لان الهم بي حصة

طلعوا مهيمن وجلال من البيت وهم يتناقشون بالشغل

جاي اسد الباب وراهم وجان يشرفون نسوان اخوان ام مهيمن هن وكم وحدة من جاراتها

حوراء كانت واكفة وراي بس شافتهم صاحت
.. اهوو بدت فقرة نشرة اخبار المساء

باوعت عليها وخزرتها وكلت .. اي غير خالة كلتلهم تعالوا
بعد العشا على علاجاتكم

دخلوا الحبايب وام مهيمن استقبلتهم

حوراء كالت وهي تقدملهم الماي .. اكول يمة. منا ورايح
حطيلج سكرتير يوزع ارقام مثل عيادة الدكتور

حتى يصير نظام وكل وحدة تنتظر سراها و تجي بالموعد

ام مهيمن .. يا يمة على شنو هالتعقيد هذولي ناس ما تخاف الله
هو الشافي المعافي رب العالمين
وهذولي نازلين عالناس حلب بالفلوس

همزين الهوى بيد الله مو بيدهم جان حتى الهوى منعوه

كالت مرت خالهم.. اي والله خية. انا روحة وحدة للدكتور علمود السكر مالتي اخذ مني ٧٥ الف لا ماكلة ولا شاربة
بس مراجعة وعلاج كل شي ماكو

على الحجية ام مهيمن الله يخليها النة علاجها مسحة الرحمن
اعشاب

ريم

كنت كاعدة بالغرفة اعدل بشعري وحطيت مسكارة مكثف رموش للعلاج ودهنت. شفايفي بالمرهم المعالج

باوعت لشفايفي بالمرايا واني اتذكر كلام مهيمن وياي بذاك اليوم
ما اعرف ليش كلبي ينخبص

انا لحد هذا يومي ما احجي وية مهيمن وهو الاستاذ هم
وجهه ما يكصه السيف اشو هو هم حضرته زعلان

طلعت من الغرفة وسمعت اصوات النسوان جاي من الهول

لكيت حوراء شايلة صينية الجاي تريد توديها
سألتها .. حوراء منو عدنا

كالت .. نسوان خوالي وجارتنا
.. اها
رحت دخلت وراها

وام مهيمن شافتني وكالت .. تعالي خالة ريمة سلمي على نسوان خوالج

عقدت حواجبي نسوان خوالج شنو
ورحت سلمت عليهن
اباوع لعيونهن تعاين علية بتمعن ويباوعن لأم مهيمن ويرجعن يباوعن علية

حوراء اخذت الصينية وراحت
ام مهيمن باوعت علية وكالت.. خالة ريمة بلا امر عليج روحي جيبيلي العلبة الكبيرة مالت الادوية

كانت تقصد عالاعشاب
.. صار خالة ترديها كلها
.. اي كلهم جيبيهم

رحت وجبتها من المطبخ وصلت يم الباب وجان اسمع وحدة منهن تكول

.. يا خية زهرة هاي جنتج مبين عليها فاهية ومايعة كلش فرد نوب

ام مهيمن جاوبتها .. خية هو وليدي هاويها ودك رجل وعند وكال
لو هالمركب لو ما اركب

اشرت على روحي مستغربة هاي علية جانوا يحجون بصوت ناصي
.. ولج خية اخاف هاي مسويتله سحر وعامية الولد بيها

ام مهيمن ضحكت وكالت.. لا خية استغفري ربج
هاي فاهية مو حوك وينها وين السحر هاي تخاف من ظلها

اجتي حوراء ونور ووكفوا وراي اشرتلهم يسكتون
اريد اسمع

وحجيت بصوت ناصي
.. اشششش خلي نسمع امج صايرة اذاعة رويتر
وطاشة الخبر اريد اعرف امج شنو تحس واح تجلطني

سمعت صوت وحدة تسألها واني اقتربت من الباب
هن هم ماكالوا لا اخذوا وضعية الاستماع وياي

.. ياخية زهرة سودة علية هاي وين جانتلج انتي النادرة الحارة
توكعين بهيج جنة عاوية

ام مهيمن كالت.. خية صحيح هي مايعة بس تردين الصدك
هي بس شوفتها عيشة يعني الواحد شيريد
من يكعد الصبح ويصبح بهيج وجه. ترد الروح.

حوراء بصوت ناصي تباوع علية وعلى نور وكالت
.. ام مهيمن علية وعلى اعدائي عود عبالكم تنطي على روحها لزمة
وتخلي النسوان يتشمتن بيها

نور.. هم كالوها انا واخوي على ابن عمي وانا وابن عمي عالغريب

وسألتها هاي ام نغم

.. زين هو شعجب هيج غير رأيه بليلة وضحاها وصاح اريدها
يعني وين جان عنها

.. والله ياخية هو كان مبين عليه رايدها من الاول بس راد يصبر عليها لحد ما تكبر

بس اشو كاموا الخطابة ما شاء الله يجون عليها
وهو سودة علية كدر يلزم روحه بأول واحد اتقدملها سوى عركة
وثاني واحد اتقدملها شرده

بس من اجاه الثالث يطلبها منه
هو هنا خلص صبره

اجاني بيومها وصاح كال يمة الثالثة غاثة وبعد ما بية صبر
بنت عمي الي ما اريدها تصير لغيري

حوراء .. اكلكم متأكدين امي جاي تحجي عن مهيمن اخوي
لو خاف جاي تحجي بصفات كاظم الساهر

نور.. عابتلج حور ترة مهيمن حباب بس ما لاگي الي يفهمه
ويحتويه

كانت تحجي وتباوع علية
حقها مو هي ما شافت الحباب شسوى بية
اتلمست شفايفي وانا اتذكر شكله

مهيمن

كنت موجود بالمحل واتصل علية عناد وكان مبين عليه من صوته ضايج

.. الو هلا عناد
.. مهيمن انت وين
.. انا موجود بالمحل كول محتاج شي
.. لا سلامتك بس عندي موضوع كلش مهم لازم احجي وياك

.. كول شنو الموضوع
.. انا جاي للمحل واحجيلك الموضوع ما ينفع بالنقال

.. يالله تعال انتظرك

بقيت انتظر عناد وانا الف حسبة اجتي براسي شنو الي كاعد يصير

وصل عناد للمحل وكعد كدامي عالمكتب وكال
.. مهيمن انا اجيتك مجبور ومو من طبعي انطي بصاحبي
بس الموضوع طلع من ايدي وصار لازم انت تتدخل

.. شنو عناد كول وكعت گلبي
.. جلال اخوك. ما اعرف شبي صاير ما يتحاجة وتصرفاته كلش غريبة وفوك هذا كله مرافقلي واحد. سمعته زبالة ومشبوه

.. شنو وانت شمدريك بالولد مشبوه من وين تعرفه

.. بالحقيقة انا ما اعرفه معرفة شخصية بس جماعتي شافوا جلال
وياه بمكان مشبوه
وكلولي شعجب صاحبك مرافق هذا
هو حتى اسمه مشبوه

.. شنو اسمه
.. ابو طبرة

جماعتي يكولون الي يرافق هذا الرجل يزحلكه يعني محد رافقه
اذا ما ضاع

نظرات الحذر بعيون عناد وكلامه عن جلال خلاني اتفاجيء واخلي الف علامة استفهام عليه

يتبع

في البارت القادم

جلال

.. ابو طبرة انا ما اريد منك اي شي غير بس اخوي ما يصير عليه شي

اتمنى لكم قراءة ممتعة
اختكم نهى الحسون