قضية لم الشمل الفصل الثامن وأربعون 48 - بقلم نهى

#الكاتبة_نهى_الحسون
#قضية_الشمل

اسعد الله مسائكم. احبتي المتابعين 🌹🌹🌹

ريم
هبت ريح البغض بين الاخوان وتوغلت لقلوبهم
وخلفت وراها الخراب

بلحظة انقلبت الموازين وتشتت شملهم
كنت شاهدة على كل الي دار بينهم من زعل
ومحتارة الجيء لمنو حتى يهديهم

دموعي نزلت على خدودي بعجز
واني اباوع بعيوني على مهيمن وجلال
شلون يتضاربون بينهم مثل الذيابة و وهم يتبادلون الاتهام
والكلام الجارح

جلال وتصرفاته المحيرة وسكوته الغريب حتى ما كلف نفسه يبررلنا موقفه
ومع الاسف صمته الغريب حرك كل الجسور الي بينه وبينا
طلع من البيت زعلان بعدما اشتد الخلاف بينه وبين مهيمن

لو نور الي كانت واكفة متصنمة تباوع عليهم ما تحرك ساكن
لون وجهّة الشاحب ونظرات عيونها الضايعة تثبت دخولها بحالة الصمت المرعب

وعليهم كلهم مهيمن الي كان عبارة عن كتلة من النار اكل بطريقه الاخضر واليابس وعماه الغضب

ما اعرف شكاعد يصير باولاد عمو مؤيد
كل واحد منهم صفى لوحده
والحلم الي كنت اسعي وراه بجمع شمل اولاد عمو مؤيد
اقتربت من تحقيقه

لكن مع الاسف بلحظة غضب تبخر الحلم

مر اسبوع على الصار
وبهذا الاسبوع صبيت كل اهتمامي على نور
هاي البنت حيرتني

من يوم العركة وهي ساكتة ما تحجي
خطية اباوع لأم مهيمن عجزت وياها حتى توكع على علتها

لكن الي مايعروفونه نور تعرضت لصدمة
بعد عركة اخوانها وعناد

بذاك اليوم نور اتصلت على عناد تحذره
من جلال
كنا واكفين بالحديقة ننتظرهم وام مهيمن بساعتها اتصلت على
واحد من اخوانها وطلبت منه يلحك مهيمن وجلال

وبعدها بكم دقيقة سمعنا صوت مهيمن وجلال وخالهم يحجون يم الباب

فزت نور من مكانها بلهفة وكالت
.. اي يارب رحمتك رجعوا مهيمن وجلال

وراحت فتحت باب الشارع واحنا وراها نريد نتطمن عليهم

حسن خال مهيمن
كان لازم جلال ويهدي بي

وجلال طلب منه .. خالي رحمة على اهلك خليني اروحله
انت ما تعرف هذا عناد شسوى

مهيمن زمخ بي يتوعدله.. شوف ولك جلال قسماً بالله اذا لمست شعرة من عناد لكون دافنك بأرضك

سحبت انفاسها براحة وهي حاطة ايدها على گلبها وكالت
.. الف الحمدلله لحكوا على جلال وماخلوه يروح

خالهم حسن كال.. يالله يابعد خالكم فوتوا دخلوا جوة للبيت انت مهيمن الزم اخوك واتفاهموا. بينكم وماكو شي ما ينحل

ام مهيمن .. اي والله خوية احجي وياهم مدري شجاهم اشو فجاءة اتعاركوا

كان خالهم حسن يهدي بيهم وبهاي الاثناء
وصلت سيارة ووكفت يمهم ونزل منها عناد

نور شهكت بخوف وحجت بيأس
.. لك عناااد شجابك !!!

عناد فتح ذراعه وكال .. جلال عندك حساب وياي
هذا انا كدامك تعال صفيه وياي لا عبالك
انا خايف منك

اي اعترف انا الي خبرت مهيمن عن كل افعالك وما متندم على الي سويته

عزة هو كال هيج وجلال غافل خالهم حسن ومهيمن
وطفر على عناد .. ولك عناد انت ليش ما تجوز مني

ختم كلامه ولطمه على وجهه
وعناد زنك جلال وردله الضربة باضعافها
وعلى اصواتهم اجوي خوال مهيمن البقية وفضوها للعركة
وعلى اثر الي صار نور دخلت بحالة صمت

انتهبت من تفكيري على صوت نقال نور
كان النقال يمها بس ما ترد
صافنة
ام مهيمن شافتها وكالت وهي مقهورة
.. خالة جاوبي عنها وشوفي منو المتصل

اخذت النقال وكان المتصل خالتها
ومن سمعت صوتي سألتني مستغربة
.. شنو لعد نور وين اشو صارلي كم يوم اتصل عليها ما ترد

حرت شجاوبها وكلت .. خالة نور مريضة ومتكدر تحجي
.. يمة اسم الله عليها شبيها مريضة. بالله شو اخذني النقال يمها خليها تحجي وياي

.. مو جاي اكلج نور متكدر تحجي
سمعت صوت زوج خالتها صابر يحجي وية خالتها
يكللها خلي يكولون شنو مسوين بالبنية شبيها ما تحجي

وهي هم مثل الببغاء رجعت كالتلي شيكول
و سألتني .. احجي كولي شنو مسويين ببنت اختي
البنية سلمناها الكم مثل الوردة.
الله العالم شنو مسوين بيها وهي هيج صارت

.. ماله داعي هالحجي شنو قابل نور عايشة بغابة.
ترة ماكو مكان احسن واامن من بيت اخوها يعني لا تقنعوني انتوا
احرص عليها من اخوانها

.. اي انا احرص عليها من اخونها
انا خالتها
و اخوانها الي جاي تحجين بيهم مصارلهم سنتين من ظهروا بحياتها وانا الي ربيتها على ايدي فلا تكعدين تتفلسفين براسي

سمعيني زين هاي رسالة اريدج توصلينها لاخوانها
اذا صار بنور شي ما تلومون الا نفسكم
خلي يعتبرون هذا تحذير الهم

غمضت عيوني بصبر وكوة لزمت الساني لا انزل عليها
هي ما تدري انا اعرف بكل سوالف زوجها الناقص
واعرف هي تتصل دائما لان نور تدزلها فلوس
جاوبتها ببرود .. هاي هي اعتبري رسالتج وصلت بعد تأمرين على شي

.. لا ما اريد شي غير بس تديرون بالكم على بنت اختي
ترة هاي امانة اذا اولاد عمج مو كفو يحافظون على الامانة
خلي يكولون
انا اجي و اخذها تعيش يمي معززة ومكرمة
وانا اعرف شلون احافظ عليها

.. من غير ما توصين نور نحطها بعيونا

انهيت الاتصال
وباوعت لنور .. نور هاي خالتج كامت تحجي من عرفت بيج
ما تكدرين تحجين وكامت تهدد وتحذر

نور

مرت الايام وبديت ارجع لحياتي الطبيعية
كلبي اتعلم على الصدمات والخوف
وصرت احاول انسى الي صار
حتى ما اريد افكر بي خوفي بذاك اليوم من العركه
زلزل كياني

من ذاك اليوم وجلال طلع من البيت وصار يبات كله بالمعمل
وهذا الشي حز بخاطرنا

طبعا محد يعرف بسبب عركة مهيمن وجلال بس اني
فقط اما البقية فمهيمن اكتفى ان يفهمهم
مشكلة بينه وبين جلال وعناد تخص الشغل

انصدمت من عرفت بتصرف جلال وزعلت منه
حتى ما اتصلت ولا سألت عليه

وبيوم الي اتصل علية جلال
يسألني عن صحتي شكله سمع من البنات نفسيتي تعبانة ومريضة من ورة الي صار
سلمت عليه ببرود وحس عليه وسألني

.. شنو نور صاير شي ليش تحجين وياي ببرود
.. جلال انا زعلانة. عليك
. . نور انتوا هاي مشكلتكم تجون وتحكمون
يابة كلتلكم الف مرة انا عندي ظروف وامور
انتوا ما راح تفهمونها

نور انا جلال اخوج وتعرفيني زين
مستحيل ااذي نفسي او اسببلكم المشاكل
كل الي اريده منكم توثقون بية صدكوني ما راح تتندمون
.. بس مالك حق تطلب منا نوثق بيك
وانت حتى ما كلفت
نفسك تكعد ويانا وتفهمنا شنو الي كاعد يصير وياك

يعني مثلما تريد منا نوثق بيك حتى احنا اخوانك نريدك تعتمد علينا
وتشاركنا مشاكلك

سحب نفس عميق مبين عليه جاي يعاني كال
.. صدكيني معادلة صعبة ما اكدر اكول شي

كال بصوت واهن .. نور انا كلش تعبان

نزلت دموعي غصب عني وكلت .. جلال ارجع للبيت
.. لا خليني بالمعمل احسن براحتي لا عيني التشوف ولا گلب اليحترگ
من. نظرات الاتهام والاحتقار مال اخونا

.. لا تلومه يعني انت اتعديت حدود المعقول والغير المعقول
مالك حق تعترض انت اختاريت السكوت معناها
تتحمل الي يجيك

سمعت صوت الجرس ونهضت من مكاني وكلت لجلال
.. جلال الباب يندك
.. يالله اخذي راحتج. انا هم اروح اشوف شغلي.
ديري بالج على نفسج
.. وانت هم

انهيت الاتصال وية جلال وانا ضايجة ومقهورة منه وعليه

ريم

بدة الدوام ورجعنا لروتين الكلية
كنت واكفة احجي وية وحدة من البنات واجتي دعاء
وهي ضايجة
وكالت .. ريم عفية ممكن تجين شوية عندي موضوع احجي وياج

استأذنت من البنات ورحت وياها
.. شنو شبيج
.. ما بية شي بس والله حيرني سامر
.. خطية بعده يفتر وراج يريد يخطبج

.. واني مو كدامج رفضته
.. اي رفضتيه علمود كان مكبل وية وحدة قبلج
بس الفرق كبير بينج وبينها
يعني هو جاي وطالب ايدج يعني دك بابكم مبين عليه مشتري

.. ما اعرف والله احتاريت كلتله خليني افكر بالموضوع
بس الله يحفظه كل يوم الكاه
منتظرني من اخلص المحاضرة كدامي
ويطلع الاعذار والحجج حتى يسولف وياي ويحجيلي عن اهله
احس جاي يضغط علية

دعاء تحجي واني عقلي وتفكيري راح يم مهيمن وطريقة تعامله وياي وصرت اقارن بين تصرفات سامر ومهيمن

ما اعرف حسيت بغيض شنو ناقصني حتى حضرته ما يحجي وياي

خلص الدوام ورجعنا للبيت وانا طول الطريق
افكر بكلام دعاء واراجع تصرفات مهيمن

حوراء.. شنو شبيج
.. ما بية شي
.. اكول ريمة عفية اليوم اتصلي على جلال واحجي وياه وخليني اسمع. صوته والله كلبي طاك عليه
سودة علية گلبي نار عليه من يوم العركة وية مهيمن وانا
حالي صاير حال لا انا لهلي ولا انا لحبيبي

محتارة هذا اخوي وهذا حبيبي المن اركن
يعني مهيمن شدعوة عليه هيج مكبر الموضوع والله حرام عليه
ليش يخلي مشاكل الشغل تأثر على علاقته وية اخوه

باوعت عليها وجاوبتها .. هو اخوج حجارة دومه هيج
يتعارك حتى وية ذبان وجهه
وبرود الگلب الي عنده يستفزني
اريد اعرف هو على شنو شايف نفسه

ما يتحاجة ولا يطخ راس عبالك العالم يدور من حوله
وعايشين بس علمود يرضونه

حوراء لكزتني وكالت .. انتي هي خير سالمين اشو نزلتي على اخوي فرد نزلة

.. لج حوراء كلبي مخزن من وراه يجيني يوم وانفجر بي

حوراء.. لا دخيل ربج ستري علينا ست قنبلة
كلشي ولا تنفجرين والله تجيبين العيد وتكلبينها فوك حدر

وصلنا للبيت
ولكيت مهيمن موجود كاعد بالمطبخ جاي يتغدى
سلمنا عليه رد السلام من حتى ماكلف نفسه يرفع راسه من الاكل ويباوع.

يعني راح اموت من لامبالاته
جانت امه كاعدة يمه وتحجي وياه
بصوت ناصي. من شافتنا قطعت كلامها وكالت
.. هلا بيكم الله يساعدكم.
ها يمة حورة شلونج
جانت تحجي وعيونها تلمع على وجه حوراء

تركتهم لوحدهم
ودخلت للغرفة ابدل ملابسي ولكيت نور
كانت الدمعة بطرف عيني

.. شكو ريم شبيج
باوعت عليها وحجيت بغيض
.. انتي منتبهة على تصرفات اخوج شنو كاعد يسوي

عقدت حواجبها وكالت .. شنو شبي مهيمن

.. نور هو مو على الاساس طلب ايدي واني كلتله انطيني فرصة افكر اذا اتغيرت اطباعك اني اوافق

.. اي وشكله كلامج جاب وياه نتيجة احس بي صاير كلش هاديء وبطل يعصب عليج

.. نور اي بس اخوج شكله فاهم السالفة غلط
ومن يوم الي طلبت منه يبطل يعصب علية وهو
صار يتجنبني لج حتى كلام ما يوجهلي عبالك وحدة بيها فايروس وخايف اعديه

يعني بربج واحد متقدم لوحدة ويريدها توافق
عليه غير يتلحلح ويكعد يتودد لها

يحسسها ان هو فعلاً رايدها يتقرب منها يقوي علاقته وياها

يعني عندج. صديقتي دعاء من اتقدملها زميلها بالكلية ومن طلبت منه فرصة حتى تفكر بطلبه هو ما بطل صار
كل يوم يجي للقسم مالتنة وينتظرها.

يحتار شلون يرضيها
او يلفت انتباها صار يحجيلها عن خططه بالحياة
وقدملها هواي ووعود حتى تتطمن ومتخاف من موافقتها عليه بالزواج

اشو اني ما شفت ولاشي من هذا الي ذكرته
يعني شلون ترديني اوافق عليه وهو ما يكلف نفسه يبادر ويتواصل وياي المفروض هو الي ينتهز الفرصة ويحاول وياي حتى يقنعني ونحجي بأمور حياتنا الي راح نبني مستقبلنا عليها
مو هيج الحجي لو اني غلطانة.

انور حوطت كتفي تواسيني وكالت بهدوء

.. هاي الاشياء الي ذكرتيها المفروض تصير من تنخطبون
يعني المن حطوا فترة الخطوبة. غير حتى تتعرفون على اطباع بعضكم وتقوون علاقتكم وتتقربونزمن بعضكم بس ها ضمن الاصول

وانتي تعرفين كلش زين مهيمن شخص يعرف حدوده
هو حريص عليج اكثر منج على نفسج
والحرص والحماية احد علامات الحب

.. بس هذا الشي انا ما اكدر اشوفه
يعني انا هم بنت حالي حال البنات وبنفسي احظي بأهتمام
مهيمن بية. اني ما طالبة شي خارج عن ارادته

يعني ما اتجريء واكول اريده يسمعني كلام عن الحب
بس على الاقل خلي يعاملني مثلما يعاملكم
ويتصرف وياي بدون قيود بأريحية مثلما يتصرف وية بنات خاله

ليش احس بروحي انا واجب مفروض عليه ما جاي اشوف اي لهفة او اصرار حتى طلبه بالزواج مرة وحدة. ذكر الموضوع
وبعد ما عادها تدرين مرات اكعد وية روحي واكول
يمكن اني متوهمة بطلب مهيمن
وهالشي من نسج خيالي او يمكن طلب ايدي بلحظة غضب واتندم
على قراره.

.. ريم لا تخلين المظاهر تغرج وتوهمج
لا عبالج كلمن گال كلمة حبيبي واتغزل بكلام الحب صار رجال
منو گلج كلام الغزل هو يقوي العلاقة
ريم افعال الحبيب بتجاه محبوبه ابلغ من كلام الحب

كانت نور تحجي واني اتمعن بكل كلمة تحجيها

دخلت حوراء وصاحتنا على الغدى
رحنا للمطبخ وكعدنا كلنا سوى ومهيمن اول ما شافنا نهض من مكانه وكال .. الحمدلله

باوعت لنور ورفعت حاجبي
بلشنا ناكل وهو راح غسل ايده وبعدها اتجه عالطباخ
وصبله جاي بكلاص

جلى صوته مثل الي محضر روحه يلقي خطاب
وكال .. انا اليوم رحت للمعمل لان صارلي هواي ما مار عليه ملتهي بالمحل
واتفاجئت بجلال

نور وكعت الخاشكة من ايدها وسألته .. شنو شبي جلال صاير شي

مهيمن بأستسلام كال .. نور اخونا حالته كلش تعبانة
ووضعه ما عاجبني

تصدكين اول ما شفته اتخليت عن الزعل وبقيت مصدوم
بشكله

ما اعرف شنو كاعد يصير وياه
بس كل الي اعرفه ان انا مستحيل اتركه لوحده بالمعمل
هذا اذا كان صدك هو يبات بالمعمل

امرمهيمن .. يايمة سودة علية هالوليد من يومه مشلوع گلبه
رجع اخوك للبيت ترة محد يفيدك اذا صار بي شيد
ونوب تكعد تاكل بروحك لان عايفه لوحده هايم على وجهه لا له بيت ولا له احد يحتويه

.. هو انا هذا الي مخوفني ان خايف لا يوكع بيد ناس يضيعونه
باوع لنور وكال

.. نور كل الي اطلبه منج ومنكم كلكم ان جلال اذا رجع للبيت
اريدكم تعاملونه. وكأنما شيئاً لم يكن

جاوبته .. والله بالحقيقة احنا كلنا ما عدنا شي وية جلال
كول هذا الكلام لنفسك. انت الي اتعاركت وياه وزاعلته

باوع علية بنظرة متكبرة وكال
.. ريم لاتحجين بشي ما يخصج ولا عندج عنه علم

باوع لنور وكمل كلامه
وكال .. نور مثلما فهمتج. اذا اجة جلال نرمي كل شي ورانا
خلي نجني اخونا قبل لا يضيع من ايدينا

كلام مهيمن عن جلال اربكني وتصرف نور وردت فعلها بتجاه موضوع خروج جلال من البيت كانت باردة
ليش جاي احس ان ورة سالفة عركة مهيمن وجلال موضوع غير الي كال عنه مهيمن

جلال
حانت بوادر الرحيل وشد الرحال
ما بقى شي. اليوم المقدم علي بلغني ان منا ورايح راح ننتقل بنتفيذ
المهمة. وية داعش

طول هاي الفترة العصيبة الي فاتت كنت عايش لأجل اتمام المهمة
خسرت اخواني واهلي وبيت خالي وما بقى شي يشفعلي غير بس
تراب الوطن هالشي الوحيد الي اسويه وانا مرتاح الضمير

اما مهيمن ونور فمستحيل افكر او احلم ان يرجعون علاقتهم
وياي مثل الاول
اما عناد صاحب صاحبه
هذا وجهه وشكله ما يكصه السيف لايحجي وياي ولا يقترب مني
واحياناً اشك بي هو يتعمد ان ما يشوفني ولا يلاحظ وجودي

بس بشغلة وحدة غفل عنها
وعباله ما اعرف هو ورة. الاكل الي يوصل كل يوم للمعمل
كلما ارجع للمعمل من شغلي وية الضابط او اكعد من الصبح لازم الكة اكل موجود
يعني صمون واجبان لو حافظات للغدى

حتى من سألت العمال محد يعرف منو
كلت يمكن هذا مهيمن اخوي ماكو غيره

بس بيوم من الايام لكيته اول ما نزل من السيارة من الصبح مثل كل يوم هو يبسط المعمل
كان شايل بيده علاكة صمون واجبان.

وبساعتها عرفت صاحبي گلبه ذهب
وماكو منه اثنين

بس اليوم اتفاجئت بجية مهيمن المفاجئة للمعمل
كانت
شافني وكانت معاني وجهه باردة والزعل لكن بلحظة اتغيرت
للصدمة بيوم شاف شكلي
الجديد بعدما طولت اللحية

وصدمته كانت مشابهة لصدمتي بيوم فاجئني بطلبه
حتى ارجع وياه للبيت

ضاع مني الكلام وحل محلة الصمت
افرحتي بطلب مهيمن رجعت لروحي الحياة كلامه وياي
تطهير لجروحي الندية

بس مع الاسف فرحتي ما دامت وانا اتذكر التحاقي وية داعش

ريم
دخلت للحمام. بعدما طلعوا البنات وخالة ام مهيمن لبيت خالهم حسن ابو نغم ومؤمل

كالت خالة تعالي ويانا بس اني رفضت
.. لا خالة ما اريد اروح.

ام مهيمن ما لحت وياي وشكلها حتى هي ما تريد تاخذني وياها
لبيت اخوها حتى ما تشتغل الحزازيات

لان هو انا بالكلية مو يمها ولا بقربها مجرد امر على حور واخذها وست نغم كل يوم مسويتلها حركة لو تشمرلي كلمة تسمعني
تبسمرني

مو نوب اروح وياهم لبيتهم ولا ولخطوبة مؤمل
حتى ما ياكلوني بسنونهم والله

بس نور وحور حظروا نفسهم وراحوا وية ام مهيمن

طلعت من الحمام وانا لافة شعري بالمنشفة ولابسة بجامتي
كنت مبسطة بالهول بعلبة كريماتي والزيوت المرطبة
كولها ماركة فكتوريا ما بعد الحمام

كنت ادهن ايديه بكريم مرطب
ورفعت البجامة لاقصى حد يسمحلها وصرت ادلك سيقاني بكريم مرطب خاص بالجسم مشغلة النقال وحاطته على اغنية
ومندمجة وياها

يعني بين قوسين مسويتلي اجواء احب ادلل نفسي
ما اتخيل نفسي استغنى عن هاي الامور
يمكن لو بخيمة راح ابقى لو يعيشوني بخيمة
راح تبقى اشيائي واكسسوراتي والميك اب وياي وين ما اروح
ما اتنازل عنهم. مهما يكون

مش حتنازل عنك ابداً مهما يكووووون مهما يكون
مندمجة وية الاغنية القديمة لسميرة سعيد وعايشة اللحظة
وما اشوف الا غيم الجو علية رفعت راسي وجان الكة مهيمن

واكف متصنم بمكانه يباوع علية صارت عيني بعيونه
انتبه لروحه ودار وجهه وطلع

انا نزلت رجلين البجامة. وطلعت وراه
رحت للمطبخ ادور عليه

شنو وين راح التفتت اريد اطلع
لكيته وراي

باوع ومنا ومنا يعاين المكان
.. شنو انتي وحدج بالبيت
.. اي. اني لوحدي. خالة اخذت البنات وراحت

حسيت بي انخبص
وجلى صوته وكال .. صارلهم شكد من راحوا
.. ساعتين تقريباً

.. يالله انا طالع اجيبهم واجي

كان مبين عليه متضايق من وجوده وياي لوحده بالبيت
حسسني وكأنما راح اكله

اتقدم متوجه لباب المطبخ يريد يطلع
كنت واكفة بطريقه

قطعت عليه الطريق وكلت بتحدي

.. شنو تخاف
عقد حواجبه ونظرات الحذر بعبونه .. شنو منين اخاف
وشنو سبب هالسؤال اصلاً

.. كول لنفسك ليش انخبصت اول ما عرفت بروحك لوحدك وياي
لهاي الدرجة تنفر من وجودي بقربك

.. لا ريم غلطانة تفكيرج راح لبعيد
بس ما يجوز نبقى لوحدنا سوية بالبيت

.. لاتخاف مهيمن انت ما يشملك مقولة الشيطان شاطر
لان البرود الي شايله بگلبك اقوى من ان يذوب لشي تافه
مثل ريم

غمض عيونه ورص على اسنانه
.. مهيمن سؤال انت ليش اتقدمتلي اذا اتندمت على طلبك
وتريد تغير رأيك كول لان انا هم وصل بية الحد من معاملتك
ونبذك الي
وتهربك مني تحسسني وكأنما وحدة بيها مرض معدي
ويخاف على نفسه

انفجرت احجي بغيض
اترجاك اعفي عني وحررني وخليني اشوف حياتي
اريد احب وانحب اريد رجال يعاملني. بلهفة بأهتمام
يحسسني بأنوثتي من اكون قريبة منه

ما حسيت الا مهيمن هد علية ودفعني وحط كف ايده
على حلكي
رجعت متعثرة. للخلف ومتفاجئة من ردة فعله
دكات گلبي انتفضت رجت اركان صدري رج

اقترب مني وانفاسه الحارة لفحت خدي وسحب المنشفة
من على شعري وكال

.. ولج غضب تردين رجال موووو

يتبع

البارت القادم
ريم
بالغرفة كاعدة ودخلت علية حور وعيونها حمر تبجي
كمزت من مكاني وسألته .. شنو شصاير حور ليش تبجين
.. لج ريم لحكي علية اجوي ناس طلبوا ايدي من مهيمن
ومهيمن وامي موافقين

اتمنى لكم قراءة ممتعة
اختكم نهى الحسون