قضية لم الشمل الفصل التاسع وأربعون 49 - بقلم نهى

#الكاتبة_نهى_الحسون
#قضية_الشمل

اسعد الله مساءكم 🌹🌹🌹

ريم

رجعت متعثرة. للخلف ومتفاجئة من ردة فعل مهيمن
دكات گلبي انتفضت رجت اركان صدري رج

اقترب مني وانفاسه الحارة لفحت خدي وسحب المنشفة
من على شعري وكال
.. ولج غضب تردين رجال موووو

سحبني عليه شكهت مرعوبة
ودنك راسه على ركبتي وانفاسه لفحت مكان النبض
وبنفس الوقت ايده الثانية لزمت خصلة من بشعري يثبت راسي

اقشعر جسمي من هوى انفاسه لامست بشرت رگبتي
بعدني ما مستوعبة صدمة هجوم مهيمن
وحركاته فاجئتني وسلبت مني الكلام

رفع ايده يتلمس رگبتي وصار يتحسس مكان النبض
اقترب مني اكثر يفرض خشونت جسمه وسألني بتهديد
.. جاوبيني تريدين رجاال يحسسج بأنوثتج
دتعالي خليني اعلمج
قرب وجهه على شفايفي والنية باينة من عيونه

وصار ملمس شفايفه على شفايفي
كانت ناعمة وحسيت بالرعده بكل جسمي

حسيت بالتهديد
عقلي صار بحالة فوضى ودكت اجراس الانذار
انتفضت خايفة من حركته الجريئة

ودفعته من صدره بكل قوتي
ما انطيته مجال يكمل الي بداه
جنت كلي ارجف
لاول مرة بحياتي احس بالخوف وعدم الامان. وانا بقرب مهيمن

كان بعده تحت تأثير الموقف الي هو وصله
ورجع حضني بقوة حسيت اضلاعي فاتت باضلاعه
وحاول يبوسني مرة ثانية

.كال بصوت خشن مبحوح واني بين ايده
. ها شنو اشو خفتي ليش خليج بكد كلامج
منو الي صارلها ساعة تطالب بقربي واهتمامي واكون رجال يحسسها بأنوثتها

اتخلصت من ايده بصعوبة
رجعت للخلف وعطت بي
.. لا مهيمن اياني وياك تتجرأ. وتلمسني وتهيني بمعاملتك الحقيرة وياي
ما راح اسمحلك تشوه مقصد كلامي وتستخدمه ضدي

جنت احجي وجسمي كله يرتعد

رجع جاوبني وعيونه احس بيها تاكلني بنظرات جريئة ممتعودتها منه
.. مو هذا كلامج قبل شوية لو انا غلطان

نزلت دموعي غصب عني
.. صحيح كلت ما انكر اني ردت اهتمامك و حنانك وقربك
بس مو بالمعنى الي انت فاهمه
منو گلك احساس الانوثة يكمل بتجاوزك وجرأتك
وياي تصرفك هذا اهانة الي

مسح على وجهه بصبر وكوة لازم روحه
اتعوذ من ابليس وكال

.. مسحي دموعج خلص بس احب اكولج ريم اني رجل
لا تلوميني لومي نفسج بالاول
لازم تعرفين نتيجة كلامج وياي وصلتني لحافة الهاوية بالصبر عليج

جايتني تدللين وتتدلعين كدامي منو گلج انا ملاك
انتبهي لروحج ترة افعالج تنطق الحجر وحمدي ربج
انتي انتبهتي بالوقت المناسب وانا لزمت نفسي عنج
الحمدلله ما وقع المحظور وسويتلج مصيبة

اتسعت عيوني متعجبة هذا شجاي يخبص
.. هو مو صوجك صوجي اني الي حاولت اصارحك وانطيك فرصة
مو مشكلتي اذا عقلك المحجر فهم كلامي على انه دعوة حتى
تقترب مني

ابتعدت عنه ودرت وجهي اريد اطلع ما اتحمل اشوفه
لزم زندي وسحبني حيل وكال بغضب

.. ما تتحركين منا قبل ما اخلص كلامي وتسمعينه زين

ريم انا رجال ما ارضى بأنصاف الحلول
هذا طبعي

لازم تعرفين اذا. كنتي تردين اهتمامي وقربي منج
فلازم بالاول توافقين تصيرين حلالي بكل معنى الكلمة

وساعتها. تصيرين كلج على بعضج الي
ويحقلي احجي واسوي كل الي تردينه
من اهتمام والفة واتودد لقربج

كان يحجي ويأشر على صدره
.. واسمعج كل الكلام الي بنفسي اكوله الج

غير هيج ما عندي حل ثاني
انا تاركج براحتج تقررين

اما اذا كنتي تشوفين نفسج مو بكدها و بعدج ما مستعدة
فألاحسن كل واحد بينا يلزم حدوده
بس ها مو تجين تشتكين بعدي عنج وتكعدين تفسرينه. صد ونفور

كنت واكفة مصدومة من كلامه وياي
رفعت راسي بكبرياء وكلت.. تعرف شنو عيبك

كتف ذراعه على صدره وسألني .. اتفضلي غردي وكولي شنو عيبي

.. عيبك الغرور عامي عيونك ما يخليك تشوف حقيقة الامر
جايني بكل صلافة تقايضني بتقديم مشاعرك الجياشة مقابل موافقتي

خلي اوضحلك نقطة انت غافل عنها.
ترة انت الي اجيت واتقدمتلي محد ضربك على ايدك
وكلك تعال

يا اخي اصحى على نفسك و خاف نسيت اني اذكرك
على فكرة اني رفضت وانت الي عاندت واصريت تاخذ موافقتي
وكلت انتظر

وخلي ببالك كلامي وياك بطلب الاهتمام والتقرب
كان بمثابة مد غصن زيتون
حتى انطيك فرصة علمود تصلح موقفك وياي
برفضك لحبي وتفضيلك لبنت خالك. علية
وتحاول تخليني اغير رأي حتى اوافق بيك

غمض عيونه وكال ... هم رجعنا لبنت خالي انتي شلون بيج
شنو ما ناوية تخليني انسى عملتي

كل شوية مذكرتنا بيها مو كلنالج اكلنا تبن وغلطنا
وحاولي تتجاوزين هاي الهفوة

.. ليش انت شنو سويته علمود تصلح موقفك
اذكرلي موقف واحد يشفعلك يمي
وانسى كل الي صار وافتح صفحة جديدة وياك
بس الظاهر انت مو مال الواحد يتنازلك
ويلتقي وياك بنصف الطريق

اباوع عليه عروگه بينت بكصته وكال
.. ولج والله حيرتيني وياج وطلعتيني عن طوري
عمري وحياتي ما تعبني احد بتعاملي وياه الا انتي
شلعتي گلبي وگلب الخلفوني
كوليلي شنو الي تردينه مني بالضبط

رفعت راسي وباوعتله بكل برود
.. حاولت مرة وياك وحجيتلك الي اريده
وكانت هاي النتيجة اتعديت علية
وخسرت فرصتك يمي

بعد لاتترجى مني افتح گلبي مرة ثانية واحجيلك الي اريده
مهيمن هالمرة انت لوحدك بالطريق ولا تتوقع مني
بعد احرك خطوة وحدة بتجاهك.

راح ابقى بمكاني مثلما انا
واذا كنت تريد. موافقتي فلازم تسعى وتبذل جهدك وتتعب حالك حتى تحصل عليها

اجيت اطلع وصاح
.. اوكفي لحظة انتي لشوكت تبقين تعقدين الامور

.. شوكت ما انت تبطل تستهين بية عود بذاك الوكت انا اتساهل وياك
تركته وطلعت واني مقهورة منه ومن نفسي

سمعت كام يلعن ويغلط
.. بيمن ادعي على عمج بيوم حط هيج غضب احمر بطريقي
يلعب علية وين جانتلي هاي

سمعت صوت ردم الباب بصوت عالي اهتز الشباك من اثرها

جلال

واكف امام الضابط علي واتلقى منه المعلومات
عن المخطط

.. شوف جلال انت بعد كم يوم لازم تسافر لبغداد
للصناعية
هناك وصلتنا المصادر بواحد اسمه زاهر
يشتغل بالسيارات عنده ورشة خاصة بس لتحوير السيارات

من المعلومات كدرنا نعرف ان هذا الشخص عنده اتصال وية
جماعة الهم علاقة بداعش

.. نريدك تروح تراوي وجهك هناك بالصناعية وتتعامل وية هذا زاهر بالذات.

..شنو اسوي
.. كل شي ما تسوي فقط نريدك تعرفه على اسمك
بصورة عابرة. وتنطي عنوانك بالبصرة.
واحنا راح نسلمك سيارة محورة تدخله بحجة يفحصها الك محورة اولا

.. سيدي وهذا شنو راح استفاد ليش اللف والدوران خو ليش ما اروح مباشرتاً لداعش هم يعرفوني وطالبيني بالاسم

ابتسم الضابط وكال .. لا جلال
نريد داعش هم الي يجون يدورون عليك
لان اذا انت رحتلهم برجلك. راح يكون هناك هواي شكوك
تراودهم اتجاهك. خصوصاً بعدما شردت من عدهم وبقيت مختفي طوال هاي السنتين وشوية

اكيد راح يتسالون شنو السبب الي خلاه يظهر فجأءة ويوافق يساعدنا

لذلك احنا راح نسفرك لبغداد
مجرد ما تنطي معلوماتك وعنوانك. بالصورة الي اتفقنا عليها
راح تلكة داعش خلال ٣ ايام مزروعين يم بابك

كان الضابط يفهمني على كل جوانب وابعاد خطتهم
المدروسة بشكل دقيق.
لدرجة ما يتركون وراهم اي اثر للشك ولا يخلون للصدفة
اي مجال

دك نقالي وكان المتصل نور حطيته وضع الصامت
الضابط انهى كلامه وكال
.. هذا حالياً كل الي نريده منك

بعدها ننتظر ونشوف
طلعت من يم الضابط واتصلت على نور

ااااخ يانور هاي البنية من يوم الي حطيت رجلي بالبيت
وهي ما تركتني لحظة اختلي بروحي

من اول ما ادخل للبيت الكاهة منتظرتني حتى مرات ينكسر خاطري عليها
من اشوفها نايمة عالقنفة تنتظر جيتي
كانت تحاول تحجي وياي تتقرب مني

وانتبهت عليها كل محاولاتها كانت مرتبكة ومترددة
حتى المواضيع الي تفتحها وياي كانت على گدها

اتصلت عليها وسألتني.. شنو وينك جلال اتصل عليك ليش ما ترد
.. كنت مشغول كولي نور محتاجة شي

.. اي محتاجة شوفتك شوكت ترجع للبيت. كلنا متجمعين
تعال اتعشى ويانا. حوراء مسوية كيكة. من هاي الي يحبها گلبك
وام مهيمن محضرة دجاج محشي
وها ونسيت اكلك. مؤمل ابن خال مهيمن اسبوع الجاي حددوا موعد عرسه. يارب يوم الالك واشوفك عريس من الي يحبها گلبك

كانت نور تحجي بصورة مستمرة ومتأكد راح تبقى تحجي وما تهدني لحد ما انطيها موافقتي .. نور لحظة ممكن ستوب
اخذيلج نفس
قطعت كلامها والتزمت الصمت .. انا اليوم ما اتأخر راح اجي من وكت. وكولي للبنات يحضرون نفسهم
اشتريلكم غراض للسهرة

هي جاوبتني بفرحة.. صدك والله. جلال
يالله خلي اروح اكول للبنات
هسة ينصدمون ما يصدكون

انهيت الاتصال وانا همي كلما اجاله يزيد
كلما اگول جلال عوفهم وروح خليهم يتعودن على عدم وجودك بحياتهم ما اريد ادخل بخطيتهم بس صعبة والله صعبة مو بيدي
مالي غنى عنهم

نور

كنت كاعدة بحفلة خطوبة مؤمل
كانوا الكل مجتمعين وفرحانين
اجواء الفرح مالية المكان هاي ثاني مرة احضر حفلة خطوبة

كنت اباوع لمؤمل يحجي وية خطيبته ويبتسم
وهي مدنكة خجلانة كان منظرهم كلش حلو.

ام مهيمن فرحانة واسمعها تكول .. يارب يفرحني بمهيمن
واكحل عيني بشوفته وهو عريس

اجتي زوجة اخوها وسألتها
.. هَـا خية زهرة شنو رأيج بعروسة مؤمل حلوة لولا

جاوبتها وهي تبتسم.. خية مهنى بيها حلوة البنية
بس مو احلى من جنتي.

اباوع لمرت اخوها بقت متصنمة لاتودي ولا تجيب
.. الله يفرحج بي وبعرسه

حور بصوت ناصي
.. جا غير تكعد راحة زهرة. كون تحطلها بصمة

دارت وجهها علية وكالت .. تدرين نور
مرات احس بريم تشبه شخصية امي عندها هواي خصال مشتركة
ووحدة من عندها.
ما تفوتلها كلمة وكل واحد تنطي طينته بخده

ابتسمت .. ما نگول غير الله يساعدك مهيمن
حور.. اي والله ياخية الله يكون بعونك يلي بگلبي

كالت مقولة ام مهيمن الشهيرة وطكيناها ضحكة
وعلى طاري مهيمن

رن نقالي وكان المتصل مهيمن
حور باوعت لنقالي وكالت
.. والله كالوها ابن الحلال بذكره

رديت عليه وحاولت اطلع من الهوسة كلشي ما اسمع
.. الو هلا مهيمن

.. شنو السالفة ما تكلولي وين شامرين نقالاتكم
شلعتوا گلبي اتصلت عليكم كلكم ماكو ولا واحد بيكم يرد

جاوبته .. مو تعرف بعد احنا بحفلة خطوبة وصوت الديجي عالي كلشي ما نسمع

..المهم جهزوا نفسكم انا جاي عليكم اخذكم
كلي لأمي وياج

.. صار هسة اكوللها
.. نور الله يرضى عليج بس اوصل اتصل عليج طلعوا بسرعة مو تشتلوني بالباب
.. ان شاء الله هسة نجهز نفسنا علما توصل

انهيت الاتصال مستغربة مهيمن مبين من صوته متعارك
لان كلش معصب
رحت لامه وبلغتها وهي كالت مستغربة .. هذا شبي شجاه
حارك الدنيا

.. والله خالة ما اعرف

حضرنا نفسنا واجوي نسوان اخوان ام مهيمن لزموها حتى تبقى

.. هَـا وين بعد وكت المن طالعين
ورانا عشا اتعشوا وروحوا
خية زهره الله عليج هسة وكت طلعة

جاوبتهم وهي تلبس عبايتها
.. والله يا خية هذا مهيمن حرك النقال علينا جاي علينا
والبنات وياي

كان بيت خاله قريب اتصل علية وطلعناله وصعدنا بالسيارة
وام مهيمن نزلت عليه
.. شنو خير شصاير حركت النقالات علينا
البيت احترك صار عليكم شي

جاوبها وهو الدخان يطلع من اذانه وكال
.. يعني الا صاير شي يالله تعوفين الخطوبة
شنو ما شبعتوا. لو الا تعزلينها على ايدج يالله ترتاحين

امه حجت وياه .. صدك صاير ما تستحي شلون تحجي وية امك هيج

.. خلي اسكت احسن لي انت من ما يعجبج الحجي
تزعلين

كان مهيمن وخالة يتناكرون مثل الديج والدجاجة على طول الطريق

.. هسة هو غير يكول المن حارگ الدنيا
جاوبها .. اي غير تعبان واريد ارجع للبيت ارتاح مثل الناس والعالم

ام مهيمن .. ما ترجع منو الي مانعك احنا عايفين بنت عمك بالبيت

ختمت كلامها ومهيمن لزم بريك ووقف السيارة
كلنا شهكنا بخوف.

دار وجهه علينا وكال يالله نزلوا وصلنا

كنت لازمة گلبي من الهبطة وامه كالت
.. الله ياخذ عدوينك على هاي السواية ولك خايب شجاك اتخبلت

فتح الباب ونزل من السيارة ونزلنا كلنا وراه ودخلنا للبيت
وهو فات على غرفته.

من غير ما يحجي
امً مهيمن نزعت عبايتها وكالت
.. والله هذا الولد راح يموتني ناقصة عمر
هسة من البس عباتي واطلع من البيت اكو واحد يلومني

راحت وكفت بنص البيت حتى تسمع مهيمن
وكالت بصوت مجروح .. امدا حظي الاغبر

حور بصوت ناصي .. اهوو هسة ام مهيمن تدخل بدور الدراما
وكملت جملة امها

.. هذا حظج يازهرة من يوم يومج مشلوع گلبج
ما مكتوبلي افرح واتهنى مثل النسوان

كانت تحجي هي وامها بنفس الوقت
عبالك عندهم قصيدة ويرددونها سوى

ما اعرف اضحك. على هاي الخبلة لو انقهر على ام مهيمن

طلعت ريم من غرفتها. جنها مدالية متأنقة عبالك هي الي جانت بحفلة الخطوبة مو احنا. انيقة حتى لو ببجامة البيت

باوعت لوجهّها لونه شاحب وشفايفها مبرطمة مهضومة
سلمت علينا وام مهيمن نست تكمل كلامها وصفنت بوجه ريم

بلحظة اتغيرت من الحزن الى الفضول
سألتها .. شبيج خالة شو وجهج ذبلان. يا يمة بس لا
لاحتها العين

حور .. يمة رحمة على اهلج رجعي گلبي الموجة على الاكشن
جنا مستمتعين اكثر شوداج على برنامج جويل

لكزتها .. اششش لا تسمعج امج وتمسح بيج الكاع
والله محد يخلصج منها

.. عفو عليج يعني انتي وين رحتي وين النخوة
.. والله اني عني اناوشها النعال حتى تتوبين

تركتها ورحت لريم

.. شنو شبيج
جاوبتني بصوت ناصي منعوص.. ما بية شي بس شوية تعبانة

ريم اعرفها مو من النوع الي ما تكتم بگلبها اصلاً اني اشك عندها شي اسمه باطن مثل الناس العاديين

شنو يخطر على بالها تحجي
وهذا الشي نتيجة حياتها العاشتها وية مؤيد

طلع مهيمن من الغرفة. وهي رفعت راسها بسرعة وباوعت عليه
وكبل دارت وجهها ورجعت دخلت للغرفة

حوراء بفضول .. شنو القضية. اشو كل شوية ينفتح باب وينسد باب
يدخل واحد يطلع الثاني شنو الجماعة عندهم لعبة ختيلان

مهيمن جلى صوته وكال .. يمة انا طالع
جانت امه كاعد من شافته طلع من الغرفة
دارت بكعدتها وانطته ظهرها

كرر كلامه .. يمة انا طالع
ما جاوبته وهي تغمض بعيونها بزعل ورافعة حاجبها

اتوجه للباب وكال بغيض .. ان شاء الله اروح ما ارجع بدرب الصد مايرد

كالت من وراه .. اسم الله على اسمك كون الي يكرهونك

مهيمن مو طبيعي اليوم
دخلت للغرفة على ريم كانت كاعدة على سريرها وتكلب بنقالها اقتربت منها وشفتها تگلب بصور عمها

جانت تنظر للصورة بنظرة حنين
حوطت كتفها وقربتها علية وسألتها .. يالله هسة احجيلي انا اسمعج
كولي شنو شبيج

كان سؤالي مثل كلمة السر احجيها حتى تنفتح الشفرة عند ريم
وفعلاً ما طولت

ما شفت الا ريم شمرت نفسها بحضني وكامت تبجي مهضومة على صدري
لميتها لحظني متفاجئة بأنفجارها

.. شنو شبيج ريمة احجي منو الي مزعلج

ريم حجت من بين دموعها .. نور اني تعبت
.. منين تعبانة

.. تعبت من كل الي كاعد يصير وياي
بس اريد اعرف ليش
المتعلم عالصراحة حياته تصير صعبة وياكم

غمضت عيوني وخمنت معناها الاخت مغردة بلسانها المزروف
ومتعاركة وية مهيمن
بعدما هدأت. ريم بدت تحجيلي على الكلام الي دار بينها وبين مهيمن كنت
مصدومة ومتفاجئة من الي عرفته

معقولة ما اصدك مهيمن يفقد صوابه وما يسيطر على اعصابه
ويحجي وياها هيج خطية.
ريم كانت حيل متأثرة

رفعت راسها من على حضني وباوعتلي وكالت وهي تناشغ مهضومة
.. تعرفيييين .. نور ... مهيمن .. شسوى
.. شنو شسوى
.. اجة .. سلب مني برائة شفايفي

عقدت حواجبي مفهمت عليها .. شنو هذا اسم. قلم حمرة
كسره الج مهيمن

رفعت راسها والعيون تلمع بالدموع والخشم احمر
.. شنو شبيج نور دتحششين علية ترة مو وكتج والله

بقيت مصفصفة وعلامة الاستفهام مرسومة على وجهي
كملت كلامها وكالت .. قصدي مهيمن اتعدى حدوده وباسني وحضني و....

شهگت ولطمت على صدري. وسكتتها
عزة بعينج ريم. كامت تجفص
سحبتها ورجعت راسها على حضني

.. تعالي خية .. تعالي
استمري حبي بالبجي استمري استرلنا
كل شي لا تحجين

يعني اذا كانت الست حاجية وية مهيمن بنفس الصراحة الي حجتها وياي
معناها مهيمن راح ينجن رسمي

ونوب تكول صراحة ولج هاي مو صراحة هاي صاعقة

اشوف الرجال طلع مخبوص اثاري الاخت جايبة العيد

حوراء

كنت احضر بالعشا وية نور جلال كال راح ارجع من وكت اليوم
حضرت الكيكة وجهزتها

مشتاقتله بكد رحمة الله. كنت كلش فرحانة
البارحة سمعت مهيمن يحجي وية جلال وگله
العمال بلشوا بالبناء وصبوا الاساس

وابن الحلال بذكره دخل جلال وسلم علينا
ام مهيمن .. گواك الله شلونك
.. گوة حيلج خالة

كان يحجي وية امي
ويسرق النظرات ويباوعلي من جوة لجوة
نهضت من مكاني مخبوصة

لهفة جلال كانت واضحة من نظرات عيونه
وخفت لا امي تحس علينا وتطين عيشتنا

بس جلال غزال وما يصيدونه ما لاحه سهم صياد
يصيد ما ينصاد

كمل طريقه ومر من يمي وكال بصوت ناصي
حضري روحج اخذج انتي والبنات حتى تشوفون البناء

ما حجيت ولاكلمة بس نظرات عيوني كانت كفت ووفت بالكلام
صرت اتنقل بالمطبخ مثل الفراشة
اساعد نور وطلعت الكيكة من الفرن
كنت حيل مخبوصة

رجع مهيمن واول ما وصل صاح لأمي يمكن يريد يراضيها
لان متزاعلين

اانتبهت لنظرات نور شلون اتبعت مهيمن من دخل لحد ما طلع عبالك دتخمن حالته

.. شنو شبيج
.. ماكو شي روحي حضري الصحون
بسرعة بالعجل ما دام كلهم موجودين حتى نصب

.. اكول وست كناري ليش ما تدخل للمطبخ تساعدنا

دخلت ريم بعيونها الذبلان
.. اجتي ست كناري تتمشى بدلع
عايز بس واحد يغنيلها انزل ياجميل بالساحة واتمختر كدا بالراحة

ريم .. يعني انتي ما تعرفين تسوين شغلة الا
كون الشعب العراقي يشارك بيها

.. اي احب اشجع العمل الشعبي
يالله تحركي شوفي شغلج

كنت منطلقة بالكلام وية البنات وسمعت صوت امي صاحتني
سلمت المواعين لريم
.. هاج لزمي اخذيهم للسفرة

رحت على مكان صوت امي وكانت بالغرفة دكيت الباب ودخلت
لكيتها هي ومهيمن كاعدين

عقدت حواجبي مستغربة مهيمن وامي يردوني
معناها عندهم موضوع

شافتني امي وكالت بصوت دافي
.. تعالي يمة حور فوتي جوة وسدي الباب

دخلت وسديت الباب وراي
ما اعرف ليش گلبي ما مرتاح احس مثل الي دخل لقفص النمر
وسد الباب وراه

بلعت ريكي وباوعت عليهم
مهيمن باوع لأمي وكال
.. انتي احجي وياها

..شوفي يمة حور انتي كبرتي وصرتي مرة والحمدلله
ربي وفقج ودخلتي كلية

عركت كصتي كملت كلامها .. شوفي يمة. جايين ناس من جماعة اخوج مهيمن وطلبوا ايدج منه بالاسم
لان صادف مرة شافوج وانتي طالعة للكلية

باوعت امي لمهيمن مثل الي تنطي الاشارة حتى يكمل على كلامها
.. حور هذولي الناس الي اتقدمولج ناس ذهب
ما اخيرهم على خوالي. اصل واخلاق وما طالعة منهم العيبة

اعرفهم عز المعرفة. ولوما واثق منهم هم شنو
ومتأكد منه راح يعرف قدرج ويصونج جان ما حجيت
وما فتحتت الموضوع وياج اصلاً.
بس انا اثق بيهم وانتي تعرفيني زين احبلج الزين

باوع علية وسألني .. هَـا حوري شنو گلتي
امي طفرت من يمها وگالت .. اكيد موافقة ما يحتاجلها علم
وهي شورها من شورك.

جمد الدم بعروگي وعرگت كصتي وارتعدت اعضاي
لحظات مجرد لحظات لا اكثر ولا اقل. حياتي انگلبت

نهض مهيمن من مكانه واتقدم علية وباسني من راسي
وكال .. حور انتي مو بس اختي انتي بت گلبي الي ربيتها
على ايدي وما ضاع رباي بيج

رفعت راسي وعيوني لالت بالدموع
.. بس مهيمن اني ما مستعدة للزواج اني اريد اكمل واخذ الشهادة
واصير دكتورة يعني كدامي هواي احلام بعدني ما محققتها

جاوبني .. من غير ما تكولين كان هذا اول شرط حطيته كدام الولد
وهو طمني وكال .. تكمل واحطها بعيوني

احس بروحي اتحاصرت
مستحيل زين وجلال وحبنا وبيت احلامنا وصبرنا
ولهفتنا ووعودنا احس بروحي اختنكت

صرت اتلفت منا ومنا محتارة. شلون احمي احلامي واحافظ عليها
ما اريد احد يقترب مني ويسلب مني اغلى احلامي
صار حالي مثل ام جاي تنزف وتقاتل بنفس الوقت حتى تحمي اطفالها هذا حالي وية احلامي

مهيمن رفع راسي من طرف حنكي
وباوع لنظرات عيوني وگال

.. انطيج فرصة تفكرين بالموضوع فد يومين وتجيني وتردين الخبر

امي قاطعت كلامه وكالت .. لا شنو ما يحتاجلها تفكير خير البر عاجله

باوع بعيوني وكال .. يمة حتى لو حور انطتني موافقتها هسة
ما راح ابلغ الناس الا ورة يومين والاصور هيج تكول
فبيها وبلاها انا منتظر يومين

ريم

كاعدة بغرفتي متمددعلى ظهري وعقلي صاير مثل شريط الفديو
كل شوية ارجع الاحداث واكعد اتذكر الصار بيني وبين مهيمن

گلبي ينتفض من يمر طاريه على بالي
مااعرف شيصير بية بين لحظات الخوف تتوغل اللهفة
مثل الي يريد يدفي نفسه بحرارة النار وخايف منها لاتحرگه

..........................................................................
لسان حال ريم

القاك
ألقاك ولا ادري أبقلبك شوقا لي
كشوقي للقياك وانت تدنو لي
وعيونك تقتلني بنظرات النمر
وانا ارقبها وشيطاني يوسوس لي

يداك على نبضي مازال لها اثر
اتحسسه حينا فيحترق لي كفي
اتذكر حرارتها وانفاسك تلفحني
حين امررتها تتلمس لي ثغري
وشفتاك تلثمني فأثور وانتفض
ثورة الخائف من زلات القدر
وعيناك تعدني المزيد بلا وجل
تقتحم مجاهلي وهي تغمز لي

وانا اداري خيبتي فيك وخجلي
كطفلة تهت في غياهب الصدر
اناديك تتركني ايا قلبك الحجر

القاك ...
القاك ولاادري

هدى سعد
.....................................................................

اتخذت قراري اتجاه مهيمن بعد مستحيل اتنازل
انا قدمت كل الي عندي وسويت كل الي اكدر عليه
وحاولت وياه. وكانت هاي النتيجة

صار لازم هو يبادر اذا كان من صدك يريد يتزوجني

كنت اتصارع وية افكاري واحاجج نفسي
وفجاءة انفتح الباب بكل قوة
ودخلت علية حور مثل العاصفة. وعيونها حمر تبجي

كمزت من مكاني وسألتها .. شنو شصاير حور ليش تبجين
كالت والرعب محتل معانيها .. لج ريم لحكي علية اجوي ناس طلبوا ايدي من مهيمن
ومهيمن وامي موافقين

نور
خلصت المطبخ وغسلت الصحون وانا محتارة بيمن ابدي افكر
بمهيمن لو بريم لو بجلال لو حور

انتبهت لمهيمن قبل ساعتين راح كعد بالحديقة. وجلال
اقترح علينا ياخذنا اني والبنات بس حوراء اعتذرت وكالت باجر عندي امتحان واريد ادرس

وهاي الثانية ما اعرف شبيها بسرعة انگلب حالها مثل شمعة وانطفت
رحت صبيت جاي واخذته

وطلعت لمهيمن لكيته بالحديقة كاعد لوحده صافن
يتصفح بالنقال. اقتربت منه ورفع راسه وشافني عدل كعدته
انطيته كلاص الجاي اخذه وكال
.. رحمة الله والديج اجة بوكته

كعدت يمه وسألته .. شنو شبيك مهيمن اليوم مو على بعضك

حبيت احجي وياه بلكي هو يصارحني ويكول على صار بينه وبين ريم لان انا استحي من وحدي افتح هيج موضوع
اتمنى افهمه ان موقفه وية ريم غلط ولازم يحاول يغير من نفسه

جاوبني .. مابية شي بس عندي مشاكل بالشغل

مهيمن

جانت نور كاعدة بصفي وتسألني عن حالي
حرت شجاوبها
منين ما اجي للسسالفة عوجة.

حرت المن اروح واستشير
اروح لعقلي يطردني من كثر الملامة
الجيء لگلبي الكاه صافي رماد مابي مكان لغضبي

ماعرفت شكول لنور
اكوللها فتت للبيت شفت الهول يضوي اكثر من كل يوم
كان منور بسيقان ريم

لو احجيلها شلون انا مهيمن يصير وياي هيج افقد عقلي وسيطرتي على نفسي
واخلي ريم تستفزني بلسانها وعطرها الي لحد هسه اشمه وية كل نفس باقي بهدومي

غمضت عيوني وگلبي انتفض يذكرني بنعومة بشرتها تحت ايدي
نفضت راسي اريد اطردها من تفكيري وانسى الي صار

بس غصب عني الكة تفكيري ماخذني للمكان المحظور زاحف
عالترابي.
صرت كم مرة اتعوذ من ابليس بس ماكو فايدة
هو شنسى بشرتها .. صوتها .. عطرها.. شفايفها

قربي من شفايفها نعومتها طعمها ماينسي
احاول انسى مااكدر

مثل عطشان ويشوف كدامه نبع ماي عذب
ويريد يروي عطشه بس فجاءة يتحول الماي لسراب

بقيت ضامي ما رويت عطشي
بقيت لا انا ميت ولاانا عايش

ريم

كاعدة بالكلية منتظرة جلال كل شوية اباوع للساعة
كلتله من توصل اتصل علية حتى اطلع لك برة
لان الحرس ما يدخلون للكلية اي واحد
الا كان عنده باج يالله يسمحوله بالدخول

دك نقالي وكان المتصل جلال رديت عليه بعجل
.. هَـا جلال شنو وين صرت
سألني .. انا هنا يمج بالكلية بس كليلي انتي وين كاعدة

جاوبته.. تٌـٌـمــام انتظرني راح اطلعلك
.. ولج باربي مو كلنالج احنا يمج بالكلية بس كولي وين انتي وانا جايج

بقيت مصفصفة وجاوبته .. انا بالكافتيريا
لحظات وجان اشوف جلال كان لابس نظارات شمسية
جاي يمشي بتجاه النادي
كان شكله مرتب وحتى اللحية الي مطولها ضايفتله وسامة

اباوع لعيون البنات صارت تزفه مثل العروسة بكل خطوة
وينج ياحور تعالي شوفي جلولي

جريت حسرة واني اتذكر مصيبتها اوووف
وصل يمي وسحب كرسي وكعد وهو يوزع ابتسامات
نزع نظارته وعلگها بقميصه

.. هَـلا باربي شلونج

سألته مستغربة .. انت شلون دخلت هنا
شلون خلوك تدخل

ابتسم وكال .. عفو عليج انا جلال قربان
بس طلعتلهم هويتي العسكرية وعرفوا بية الضابط جلال ملازم اول هم كبل اخذولي تحية وكالواتفضل سيدي

گلبت عيوني بستهزاء
.. ههه دور غيرها صارت قديمة ماتضحك
بالله رجاءاً بطل خفة دمك وتعال خلي نحجي بالمفيد

.. اي صدك كولي المن جبتيني سحل لهنا

باوعت عليه بتفكير ما اعرف منين ابدي وياه بالموضوع

باوع منا ومنا وكال .. لاتكولين كسرت خاطرج وجبتيني لهنا
علمود اقطف الورود من حديقة كليتكم اشتم عطرها

شفت بروده ولا مبالاته واتذكرت حيرة حور وخوفها
انفجرت بي بدون مقدمات

.. انت لشوكت تبقى بهذا برودك وية حور شوكت ناوي تخطي خطوة جدية يعني الى متى يبقى هذا الوضع

.. ما بقى شي
.. شوكت شهر شهرين سنة سنتين جلال انت لازم تحسم امرك وية حور وتخلي علاقتكم ضمن ايطار الخطوبة

.. لا يابة شتحجين بعد وكت على هاي الخطوة كدامي طريق طويل
لحد ما اوصل لحور اريد ابني البيت واخلص شغلي
وهي هم لاتنسين عندها كلية ودراسة

عطت بي ما اتحملت .. لك انت شنو من گلب شايل
شنو هذا الغرور والبرود الي عندك.
من صدك اثبتت انت اخو مهيمن بهذا ردك
اريد اعرف على شنو شايفين نفسكم
ترة. بنات الناس مو لعبة عندك وعند اخوك

يا اخي اتحرك اتلحلح لا تبقى على هذا الجمود
ترة حور ما باقية تنتظر حضرتك تحن عليها وتخطبها

جلال يباوع علية متسغرب تهجمي عليه
.. شنو شبي باربي اشو انفجرتي بوجهي جنج مفخخة
احجي شكو شصاير

غمضت عيوني بقلة حيلة وكلت بصوت واهن
.. جلال .. حوراء اتقدمولها خطابة ومهيمن وامها وافقوا عليه

يتبع

اتمنى لكم قراءة ممتعة
اختكم نهى الحسون