رواية قضية طلاق الفصل الثالث عشر 13 - بقلم Aseel🤗

مرحبا حلوياتي ..
 

قضية طلاق ..

بقلم Aseel...

بارت ١٤.

...........

رشا :فتحت تلفونها وانطتة الي وراحت كعدت على الجرباية وحطت المخدة بحضنها وصافنة بغير عالم ..

اخذتة ودخلت على الفايبر قريت المحادثة ونصدمت بكلام عماد الها ..

جان كاتبلها ..

عماد(زهرة رجاءا كافي تأثرين بعقل رشا اني ماريدج اعتبرج اختي ).

(كتلج كافي ماحبج هية كوة )

(زهرة والخلق الكون اذا متبطلين انتي وامج زن براس امي راح اجي افضحج كدام خوانج )

(انتي شنو بلا كرامة دكلج ماريدج افهمي ويارين تفهمين امي هم اني احب وحدة وراح اخطبها غصب عنج )

انصدمت من كلام عماد بحق زهرة .. رغم شكد الكلام بي اهانة بس هية مجاوبت ..

زهرة ماعرف شكلج بس ترة عماد متغير حيل من يوم معرف هاي الي مدري منين جايبها ..

زهرة :رشا لا تبررين لاخوج .. الظاهر جنت عمية من فكرت احب واحد مغرور وشايف روحة ..
اني بس اريد افهم منو كلة اني كاتلة روحي عليه اني ما كتلة حبني ولا كتلة تعال اتزوجني ولا دزيتج واسطة .. منين جاب هذا الكلام ..

ولج حرك كلبي .. اني من وراه اعتزلتكم كلكم حتة ميكول اني حاجية ولج ميتوب ميتووووب ..

رشا :كامت تدك على رجلها سودة علية .. من يمي احترك كلبي من الكلام ...

حبيبتي خل يولي ليش تسوين هيج بنفسج .. تذكرين من صهيب عافني ..

شلون وكفتي وياي .. وخليتيني اتقوة ..
ماريد اشوفج هيج ضعيفة وبلا شخصية ..

تدرين مرة سامر كلي كلام وبفضلة صرت هيج ..تدرين شكلي .

زهرة :وشكلج ..

رشا :كلي لتخلي يشوفج مكسورة .. بلعكس خليج قوية حتة يعرف انو هوة مكدر يكسر منج شي .. والي صار ماخلاج غير اقوة واصلب من قبل.  ..

فهسة الي اريدة يا حبيبتي .. تكومين على حيلج وتشوفي لعماد انو هوة ولا شي بالنسبة الج ..

خل يشوفج انتي اقوة من قبل .. رجعي زهرة الي تتعارك ويا ذبان وجها ووجه غيرها هم ..

كومي بدلي وترتبي وتعالي وياي لبيتنة ..

زهرة: ماريد اجي وياج ماريد اشوفة هسة عبالة جاية احرك بامج عليه.

رشا :دخل يطير هوة بيتة لو بس هوة بالبيت ..كومي لو تشوفين بنات سامر يجننن .. ولج ينكرطن كرط .

زهرة :والله طاك كلبي واريد اشوفهم .

رشا :دكومي يلة والله ستأذنت ساعتين من امي لان خطاطير يجونة ومحد اكو كلها راحن البنات ..

زهرة :يعني هسة انتي تريديني اجي حتة اساعدج عود ..

رشا :اي وليش شبيج مكرمة ..

زهرة :يابة دكومي .. هوة اني اكل مماكلة اتعاجز اعلس انوب اشتغل ..

رشا :لا يلة مااشغلج اخليج تكعدين يم سهام تونسيها خطية تضوج من الكعدة ..

زهرة :عساس تحبني هية ..

رشا :والله تموت عليج بس انتي حيوانة وتتحارشين بيها .

زهرة :رشا ترة كمتي تتجاوزين واني تعرفيني لساني زفر .

رشا :ديلة كومي تحضري ..

زهرة: بس اني مكايلة لامي .

رشا: اني اكللها .. وها عندي الج خبر تازة .

زهرة :شنوة .

رشا :اني انخطبت ..

كامت لحيلها ووكفت على لجرباية وفتحت عيونها .
كالت ..
زهرة :جذذذب كولي والله .

رشا :والله ..شبيج .

زهرة :احجيلي كلشي .

رشا :مو هنا سالفة طويلة ابيتنة احجيها الج..

زهرة :طيرة راح ابدل وانزل عما تكولين لامي ..

رشا: ماشي يلة .

نزلت وعفتها تطلع هدوم الها .. رجعت كتلها .
سبحي مو تبدلين فوك وصخج .

زهرة: انظف من وجهج..

رشا :ديلة يلة فضيها
نزلت لخالتي نهاد كتلها وقبلت اصلا فرحت لان زهرة صار بالاشهر مطالعة معتكفة ..

خابرت سامر يجيني وبالطريق ..

سامر :هلة والله بالكاطعة ..

زهرة :جنت مريضة وماكدر  اطلع .

سامر :بالجذب خابري علينا باركيلنة ..

زهرة :ماعندي رصيد انتظرت واحد يخابر حتة اباركلكم ..

سامر :اول مرة اسمع واحد يخابر حتة يباركولة..هاي بس انتي عندج هيج .

زهرة: مو انت تريد اباركلك ..جان خابرتني

سامر: دسكتي سكتي ام لسان جيتي وجتي هوستج وياج ..

زهرة: ترة ارجع ..

سامر: ومترجعين .. بس يازوج يرجعج.

زهرة: عادي انزل هنا وارجع مشي .

سامر: اكول شو دسكتي احسلج ونزلي وصلنا ترة .

رشا: همستلها ..زهؤة ماوصيج حبابة بلا مشاكل .

زهرة :رشا ترة اني الي مالي خلك مشاكل اكعد بغرفة خالتي يم سهام ومااطلع ..

رشا :عفية حبيبتي ..

زهرة :ترة اني مو طفلة حتة تكليلي عفية 😑

رشا: ديلة نزلي ..هسة تلكين امي واكفتلي بالباب واترزل من وراج .

نزلنة وطبينا والحمد لله مالكينة خطار يعني ماكو رزالة ..

طبت زهرة وسلمت على امي وسهام وضلت كاعدة يمها يسولفن ..

وراها رحت بدلت وصحت لزهرة حتة تبدل هدومها ..

صعدنا اني وياها ودنسولف جان ينزل عماد صارو وجه بوجه .. زهرة كملت مشيتها عبالك مموجود .

جان يحجي من فاتت يمة بصوت مسموع ..

عماد :شيه يالله ماكو احساس..

من يمي جمدت بس زهرة عبرتة ولا عبالك وياها ..

طبينا غرفتي
..اسفة والله عبالي طالع .

زهرة :قبل اشوية كتيلي صيري قوية .. تصدكين صرت احسن من قويت روحي وشفتة..

رشا :عفية عليك اعتبري مموجود..
يلةخل نبدل وننزل نساعد امي خاف يجي احد ..

زهرة :ماشي .

رشا: كملنة تبديل ونزلنة نساعد امي اشتهيت كيكة طلعت مواد وكعدنة نسوي ..

اشوي وجتي امي عصبية ..

رشا :شكو شبيج ماما.

ام سامر :اكو غير اخوج الي الله غضب علية وانطانيا.

رشا: منو..عماد قصدج .

ام سامر :ليش اكو غيرة امرمرني

رشا :اهدي يمة اعصابج شكو شبي هلمرة.

ام سامر: يريد يروح يجيب هاي الدايحة .. ادري مو مصارلها سبوع من جتي شنو هلبلوة يربي

رشا :ضليت صافنة هذا تخبل اكيد...
اجت زهرة كالت ترة كيكتج حتخرب كمليها.

رحت اكمل وجتني ..
زهرة :ترة ادري عماد حيجيبها حتة يغثني .. اني شمسويتلة وهيج حاقد علية .

رشا :معليج بي من تجي ضلي بغرفتي خاف تسمعج كلمة لان مااستغرب اذا طلع عماد كايللها اشو كلشي خارط علينا الاخ .

زهرة :دخل تطير .. خل تحجي كلمة دحط رجلي بحلكها ..علينا مخابيل انوب ..

رشا :لا فدوة لا تسوين مشاكل ترة توكع براسج متعرفيها شلون فارة عقل عماد ..صيري احسن منها لا تخليها تستفزج وتصير هية ام الراهي ..

زهرة: الله يصبرني بس ... لو ادري مجاية وسامعة كلامج .

رشا :لا عوزج تنحرمين من البيت على مود شكولها ختولي انتي الاساس والله ..

زهرة :هسة عوفج منها ماكتيلي على سالفة الخطوبة . .منين تعرفي وشوكت كلشي اريد كلشي.

رشا:.والله نسيت من وراج وورة مصايبج ...
بديت اسولفلها شلون عرفتة وشوكت بدينا اتصالات ..

زهرة :ايا كلبة كل هذا يصير واني مادري ..

رشا :اذا انتي عايشة اللحظة ودور المجروحة شوكت احجيلج هوة شايفتج اني

زهرة: هسة المهم .. امبين صهيب بعدة رايدج .

رشا :حتة لو يريدني .. منرهم بعد صعبة حيل حتة لو ردت ارجعلة اهلي مراح يقبلون ..

زهرة: وتتصورين يسكت .

رشا :اكيد لا .. ماعتقد ولج ماشفتي عيونة شلون صارت شرار من عرف اكو غيرة دخل حياتي ..

زهرة :اسألج سؤال وجاوبي الصدك.

رشا :تفضلي سئلي عيني ..

زهرة: انتي مهيمن تحبي لو لا .

رشا :ماعرف احبة لو لا بس اعرف روحي ارتاح ويا

زهرة :زين وصهيب بعدج تحبي .

رشا :هية هاي المشكلة الي ماكدر اتخطاها .. انو بعدني احبة بس صعب ننجمع. بس هوة ميفهم هذا الشي ..كل مااحاول انساه يطلع بوجهي ..

زهرة :شلون ترتبطين بواحد وانتي كلبج ويا غيرة .

رشا :لا اني وعد روحي انو انساه بس ارتبط رسمي بمهين ماريد اشيل ذنب من وراه..

زهرة: اي هذا احسن حل ...

رشا :دتحجي جانت وفجأة سكتت وصفنت وعيونها لمعت بيهن دمعة..
شكو شبيج ..باوعت باتجاه نظراتها المكسورة ..
لكيت عماد جاي وجايب سجى ويا ..جانت تباوعلهم من شباك المطبخ وهمة طبو من باب الشارع ..

كتلها زهرة روحي صعدي لا تتصادمين ويا حاولت اجرها من ايدها .. نترت ايدي وكالت ..

زهرة :هييي هوة شكو... وليش اصعد اني ماسويت شي غلط همة الي يتحارشون واني اكيف على الحرشة ..

اثناء ما دنحجي طبو جانت امي كاعدة على الميز بس ملتهية بالتلفون تكلب .. واني وزهرة نسولف بصوت ناصي مامنتبهة علينة ..

طبوو ..

عماد :ها سلام عليكم ..
سجى: هلاوو خالتو شلونج ..شتاقيتلج والله ..

ام سامر :من ورة خشمها .... هلة بيكم وباستها .

عماد :تعالي سجاوي اعرفج على بنت خالتي وعمي ..
..
واجة باتجاهنا ..سلمت عليها ..

عماد :سجاوي هاي زهرة .. زهرة هاي مريتي سجاووتي ..

سجى: يعني هية هاي زهرة ...هلو زهرة .. وباستها ..

زهرة :اي حبيبتي هية اني زهرة بس الظاهر اني صايرة بنص سوالفكم ..

عماد: وليش تصيرين بنص سوالفنة ..

زهرة :بس اني دحجي ويا البنية .. ليش تدخل بين النسوان ..

عماد: وانتي حاسبة روحج من النسوان ..

زهرة: لا والله حاسبتك الك ..

عيونة صارت بكصتة كال..

عماد : هينة يزهرةة بسيطة .

زهرة: بس اريد اعرف انت ليش مضغوط مني .

عماد :وانتي شنو حتة انضغط منج كلج خلك مرة مسترجلة ..

زهرة :خليت الانوثة الك .

ام سامر: زهرة حبيبتي تعالي وياي عاونيني ..

رشا :جنا نباوع اني وسجى مصدومات من الحوار الي طير نص الجبهات .. واحد يقصف الثاني

راحت زهرة بعد ما امي نقذت الموقف .. وعماد صار اعصاب اخذ سجى وراحو كعدو بغرفتة ..

بس حيل بي هوة الي بدة ..

كملت الكيكة وطلعتها من الفرن .. سويت جاي ..كمل ورحت وديت لعماد وسجى .. ولو بودي انطيها سم شكد اكرها يربي مدري شلون متقبلها عماد ..

قدمتة الهم ..

سجى: شوووكرا حبيبتي الله جنت مشتهيتهاااا ..مع جر اخر الاحرف ..

رشا :بالعافية ..
عفتهم وطلعت ..

نزلت سويت صينية ورحنا كعدنا يم سهام .. ضلينا نسولف وناكل وزهرة كلساع تصفن وعيونها تدمع وترجع تسوي نفسها ويانة حتة متبجي .. عجبتني قوتها ..

ام سامر :يمة سهام سامر وين راح ..

سهام :راح ويا عمي كال عدنة شغلة ..بس مكلي شنو .

ام سامر :يلة اني رايحة امدد اخذو راحتكم ..

رشا: ماما بيج شي هستوج كعدتي ..

ام سامر :ماريد اتصادم ويا هاي البلوة الي الله ذبها علينة .

رشا :راحت وهية تدردم .. شكد تقهرني امي لان من يوم الخطوبة وكرايبنا مارحموها ..
كل شوية واحد مسمعها حجي ..

اووف الله يخلصنا من البلوة هاي .

زهرة :هوة شلون عرفها منين جاب هاي الشكولات .

رشا: يكول جانت تجيني للمحل وتعرف عليها يعني بين قوسين جابها من الشارع .

سهام :رشا عيب تحجين هيج مهما يكون تعتبر عرض اخوج .

رشا :هوة شمصبرني غير عماد الي من يوم مجابها تغير حتة ويانة صاير بس عصبي ويتعارك ويا روحة .

سهام :الله واعلم شمسويتلة ..

رشا :اكول سهام صدك خاف ساحرتلة ..

سهام :استغفر الله شمدرينة منريد نشيل ذنب هيج شكولات ..

رشا :اووف الله كريم...
وراها نزل عماد كاشخ وكال رايحين للزوراء ومناك يرجعها ..

كملنة يومنا بين خطاطير وهوسة وجني البنات وانجمعنة وجانت احلة لمة .. ضحك وسوالف وشغل بدون منحس بتعب ..

كمل اليوم وزهرة فرشت بالكاع الها ..

زهرة :افيش يا ريحة بطانيتج المعفنة ..كلها ريحة بول ..

رشا :هههه كبر اي والله هاي بطانيتج بس انتي تتغطين بيها ترة ..

زهرة :يلا لعد عوفيها اريد اغفة على الريحة تذكرني بطفولتي .

رشا :يا طفولة هاي الي تذكريها بريحة عفونة ..

زهرة :مو جنت صغيرة من انام اسويها على روحي . واخاف اكول لامي فادنة من الفراش واروح ابدل واجي انام على النضيف واغفة على الريحة ..

رشا: اييع شنو هلقرف .. هسة يلا اعترفتي ..

زهرة :وداعتج احلا ايام خاصة من امي تشوف الفراش مبلل تكلي هاي شنو اكلها هذا محمد اخوية  دار علية مي واني نايمة .. وهية تصدكني ويحصل كتلة من وراي بدون ميعرف شكو .

رشا :لعد اشو مامسولفتلي ..

زهرة :شسولفلج هية طفولتي هم مثل الباقين ماكو براءة بيها .. كلة معارك .. اصلا استعر منها .

رشا :ههههههههه اي والله هوة انتي جبيرة مينكدرلج لعد شلون من انتي طفلة .. بعدين تعالي شلون تحجين هيج ويا عماد زين ما كتلج والله جنت متحضرة للفرعة كلت هذا حيكتلها ..

زهرة :هذا يكتلني الله وكيلج اصلا بس بوخة .. لا يهش ولا ينش ..

رشا :انجبي لج لا تحجين على اخوية ..
دك موبايلي جان مهيمن يتصل ..

رفعت عيوني لزهرة ونظرة عيوني الحايرة والمتوسلة حتة متحجي شي ..

زهرة :متردين شمنتظرة ..

رشا: بس حبابة لا تحجين ..

زهرة: يمعودة حنام اني اضل بس اتحسر على الحبجيات .. اييييه حظوظ عالم من حب لحب واني واحد وطيح حظي قبل لا ارتبط بي .. انام احسلي ..

رشا :. جاوبت بعد ما فصل ودك مرة ثانية ..

الوو .

مهيمن :هلا بمريتي ..

رشا :بعدني مصايرة مرتك .

مهيمن: لا والله ليش متدرين ابوج ردلي الموافقة ..

رشا :هاي شوكت ..

مهيمن: اليوم ورة العصر جانو يمنا جوي يشوفون ويسالون علينة بالمنطقة ومرولنة ...

رشا :اممم مادري والله ..

مهيمن :على العموم الاربعاء المشية ..احنة اتفقنة على كلشي ..

رشا: لعد اشو محد كلي .. ولو اني كملت وصعدنا فوك نسولف .

مهيمن ؛انتي ومنو ..

رشا ؛بنت خالتي يمي بس نايمة .

مهيمن ؛ها الله يحفظها الج ..

رشا: انشالله .. ضلينة نسولف وختمتها ويا ونمت ..

كعدت ثاني يوم ونزلت لكيت زهرة نازلة قبلي ..
لكيتها تسوي ريوك هية وامي ..

صبحت عليهم ورحت اغسل ..

كعدنا نتريك وابوية جان كاعد وخبرني انو المشية الاربعاء ..

ام سامر :اخوج اجة البارحة لو لا

رشا :مادري والله صعدت من وكت ..

ام سامر :شوف ابنك طلع لبارحة ولهسة مااجة ..

ابو سامر :ويامن رااح .

ام سامر :ويا الدايحة الي بلا اهل يسألون ..

ابو سامر :شنو هلحجي عيب صارت من عدنة ..
هسة اتصل واشوفة ..
طلع تلفونة واتصل ..

ام سامر: ها شنو ..

ابو سامر: مغلق ..

ام سامر :وين ولة هذا .كومي صيحي سامر ولج خل يشوف اخو وين .

.....

يتبع ..

تحياتي Aseel

احبكم ..😍😍