رواية قضية طلاق الفصل الثاني عشر 12 - بقلم Aseel🤗

مرحبا حبايبي..

قضية طلاق
بقلم Aseel .

بارت١٣....

...........

رشا:  .... ضلينا نسولف وختمتها ويا وسديتة
حاولت اتصل على زهرة مغلق. .

اوف ربي بس تخلص الهوسة اروحلها .. امها تكول حتة للدوام متروح ..تكول ماريد اداوم بعد ..

نمت من التعب ..

كعدت ثاني يوم هم هوسة وخطاطير بس الي صار بعد الغدة حدث بلا حرج ...

جنت كاعدين اني والبنات نسولف بالمطبخ لان خطاطير حتة نسوي جاي وعصاير ومي ...وهم ننظف المطبخ ..

منشوف الة طبت سجى هية وامها ووحدة من خواتها ..

سجى جانت لابسة بنطلون كابوي لزك وبدي ويا الكمر والحجاب نص كذلتها طالعة .. الظاهر كذلتها بعدها ما مقتنعة بالحجاب ..

والمكياج مال حفلات كلش سموكي ..

والام اووف يالام اذا جانت بنتها لافة الحجاب فالام اصلا هيج شامرتة مدري تقشمر على روحها علينة الله يعلم والبس والمكياج مثل بنتها ..

والاخت جانت اسمها مروة .. نفس سجى بس مكياج اقل من سجى بس هم صارخ .

طبن سلمن واحنة صافنات عليهن لان احنة عدنة عيب هيج لبس صح اكو هواي لبسهن هيج والبعض يكول عادي ..

بس بالنسبة النة هذا الشي عيب ومامقبول ..
صح اني مامحجبة بس لبسي كلة مستور ..

لذلك جانت صدمة النة بلبسهن والمكياج ...

طبن سلمن وكعدن شوية يم سهام طبيت كعدت يمهن لان عيب نسابتنة واعوفهن ..

ضلت الام تسولف على ولادتها وشلون تعبت وسهرت وربت ..

ام سجى : والله خالة الله كومج بسلامة ضل بالنة عليج من كال عماد خطرة حالتج .

ام سامر : الحمد لله معجزة صارت طلعت من حلك الموت ..

سجى :اووي هاي هيج الولادة صعبة (طبعا هية تجر بالحجي وتتموع بس ماريد حلككم ينعوج وياها ).

ام سجى : شعبالج ماما شفتي الام شكد تتعب .
انشالله اليوم الالج واشوف اولادج ..وانتي هم رشا انشالله نفرح بيج .

رشا :لا وين اني اطول مامستعدة هسة للزواج .

سجى: طبعا عماد كلي على عملة خطيبج النذل . .. اشلون انطاه كلبة يعوفج بيوم زفتج ..

رشا :اختنكت من فتحت الموضوع احس عيوني حركتني واني اذكر حركة كلبي بهذاك اليوم ..جاوبتها ..

بالعكس هذا الشي صار من صالحي لان وكفت على حيلي وكملت الي عفتة بسببة والي هية دراستي .

سجى :اوووي حبيبتي اكيد تاذيتي خاصة هسة بعد محد يجي يخطبج اكيد الناس تحجي تكول شبع منها وعافها ..

رشا: فورت دمي شلون تحجي هيج وفوكاها كدام امها وامي ..يعني لهدرجة ماكو احترام ..

العفو... داحجي وقاطعتني امي ..

ام سامر: خالة شنو هلحجي ولو مامقبولة منج بس معذورة متعرفينا هنا العالم كلها تعرف اخلاق بنتي ..

والناس شاهدة مافد يوم شافتها طلعت وطبت ويا خطيبها .. مو مثل باقي البنات طلعة وطبة حتة بلا خطوبة (بسمار من نبع الحنان).

سجى: خالة اعتذوور مو قصدي بس دكوول الناس هيج عبالها ..

ام سامر: (بنتر) ميهمنا الناس طالما نعرف بنتنا شنو ..

ام سجى: على كيفج حبيبتي بنتي موقصدها ..

ام سامر: اني مدحجي على بنتج بس اني احجي اخاف احد يفكر يمس بنتي بحجاية .. ساعتها ميهمني احد لو اعرف اكتل خلاص .. لان هاي بنتي ووحيدتي .. ومعزتها فوك كلشي ..

ام سجى: حقج حبيبتي ماكو اغلى من الضنة ..

وجان تخزر بنتها .. باوعت لسجى باوعتلي وعوجت حلكها كلبت عيونها معاجبها ..
لا مبين حنتوالم هواي ..

بعدها اجة عماد صاحها وصعدو فوك بس شنو وجها ميكصة سيف صار احمر دم ..

بس ضلت حجايتها براسي ..
الي يشوفني ممتزوجة اكيد راح يكول خطيبها شبع بيها لو شو شبيها ...ميفكرون اكو عندي گلب ولازم ينسة حتة يعيش من جديد ...

ففكرت انو لازم ارتبط بمهيمن حتة اثبت للكل اني محد لامسني او طاخ مني شعرة.  ...

قررت بدون تفكير انو هذا الصح ....

انتظرتهم يروحون الخطاطير حتة اتصل بمهيمن وابلغة موافقتي ..

مدري شنو جان بعقلي .. اول مسمعت حجاية تمسني قررت ارتبط حتة اثبتلهم العكس ..

صار الليل واتصلت علية ..
دك....

مهيمن :هلا بروحي ..

رشا: هلوو شلونك ...

مهيمن: صرت احسن من سمعت صوتج ..

رشا :انشالله دومك احسن ..

مهيمن: مشتاقلج صايرة ماكو ..

رشا: مو تعرف خطاطير وميصير اعوفهم واصعد اخابر..مهيمن .

مهيمن :يعيون مهيمن .

رشا :اني موافقة .

مهيمن :على شنو ..

رشا :على الخطوبة شبيك شنو غيرت رأيك .

مهيمن :شنووو ... لا لا صدك تحجين ... ياااااابةة ..ولج لو ماعيب جان هلهلت ...
ولج تدرين شتمنة هسة .

رشا :هههه وشتتمنة .

مهيمن: اتمنة عندي سلاح والقران الكريم جان رميت .

رشا :اووف لهدرجة ممصدك .

مهيمن: ولج انتي النفس مامصدك حتصيرين الي ..
اتحضري باجر يمج اني .

رشا: اوكف مهيمن لتنسة اهلي هوسة عدهم وخطاطير وين تفاتح موضوعي ..

مهيمن: لعد تريدين انتظر انوب ..

رشا: بس هليومين ميصير شي انتظرت هلمدة متصبر هليومين ..

مهيمن: مااشي امري لله يومين وبسسس فهمتي يوومين وبسسس

رشا: اي اي فهمت والله ..اكلك مهيمن ..

مهيمن: كولي وامري يا روح مهيمن ..

رشا :صايرة اشتاقلك .. بس لا تفرح بعدني ماحابتك ..

مهيمن :هاي وين صايرة تشتاقيلي ومتحبيني .. لا كولي مكدرتي تقاوميني ووكعتي بشباكي.

رشا: اووي عيني شنو هلثقة هاي ..

مهيمن :شو عيديها مال اوي عيني ..

رشا :ليش .

مهيمن: لا هيج حبيت اسمعها .. دكوليها .

رشا: اووي عيني ..بس ليش .

مهيمن: لا هيج ماكو شي والله بس عجبتني ..

رشا :يلة لعد خل اروح انام تعبت اليوم ..

مهيمن :يلة هليومين معذورة مالي حكم عليج .. بس بعدها انشالله اشوف مرة تروح تنام ..

رشا: لا تخوفني ترة ابطل والله .

مهيمن: لا يمعودة كلة ولا هاي .. اسف اسف ماعيدها بس قبلي وراها اعتذر بطريقتي ..

رشا: ماشي .. يلة تصبح على خير..

مهيمن: وانتي الخير ياروحي .. احبج .

رشا :باي .

مهيمن: باي .

سديتة واحس روحي مخنوكة مدري ليش صح بديت اميل لمهيمن واعتقد بديت احبة لان صرت يومي ميكمل بدونة ....

يجوز تعلق او حاجة لحب واهتمام .

مجنت اعرف مشاعري بس الي اعرفة بعدني احب صهيب ..

نمت واني افكر بمستقبلي ويا مهيمن شلون حيصير لو صهيب من يعرف انخطبت شيسوي ..

كعدت ثاني يوم هم خطاطير وبليل اتصل بمهيمن يتغزل ويحجيلي على امنياتة من نتزوج حبيت افكارة وشفت هواي اشياء مشتركة بيناتنة ..

مرن اليومين واجة يوم الي يتقدملي مهيمن .. جنت مفاتحة امي قبلها بيوم بالموضوع حتة من يجي يتقدم امي تفهمهم الموضوع بطريقتها

وامي خبرت ابوية بيومها انو جايين ناس يخطبوني وفهمتة انو استاذ وياي بالجامعة اتصل علية حتة يجي يتقدملي .. بعد ماسأل علية ..

وابوية انطاها موافقة .. وبلغت مهيمن يجي ..فبيومها جنا متحضرين بعد مااكدلي مهيمن انو هوة جاي ..

بدلت لبست فستان موديلة تركي وسويت شعري برمل وشلت نص وعفت نص وسويت الكذلة بوف .. وميكب خفيف ...صارت ب٥ العصر

رمشلي مهيمن معناها وصل .. ماكللكم احساسي كلبي صار طبل .. ركضت صعدت لغرفتي واباوع من الشباك شفت سيارتة طبكت ..

نزل منها جان لابس بنطلون جينز وتيشرت اسود وسترة صيفية جوزي .. وحذاء جوزي جان كلش انيق طالع ..

نزل ووياه نسوان ثنين ورجال جبير ..

استقبلهم ابوية ودخلهم بس ويا مادخل باوعلي عرفني واكفة فوك ..غمزلي

ابتسمت وسديت البردة .. يربي شديصير وياي .
صايرة افرح من يتغزل .. واطمع اكثر ...

اشوية وصاحتني امي حتة ادخل .. جنت شايلة صينية بيها قواطي بيبسي وكلاصات ..

دخلت واني اسلم وشايلة الصينية  .. ضليت ثواني حايرة شلون ابوس النسوان ... بعدن قررت اترك الصينية اسلم وارجع اقدم هذا احسن حل ..

خليت الصينية وسلمت عليهن والي عرفتة وحدة امة والثانية خالتة ورجعت قدمت لمهيمن والرجال الوياه (الي هوة عمة بمقام ابوه) بعدين لابوية ثم النسوان ..

بس الي صار من وصلت المهيمن صارت عيوني بعيونة رجف كلبي بنظرتة الي جانت كلها لهفة وحب ..

قدمتلهم ورجعت كعدت يمهم صرت مقابيل مهيمن ..
فتحو الموضوع واني افرك بيدي ..من الخجل والتوتر .

رفعت عيوني  صار مهيمن بوجهي حرك شفايفة بكلمة (احبج ) بس بدون صوت بس جانت واضحة .. يبووو احس خدي صار نار من الخجل .

اتفقو وابوية وعدهم نفكر ونرد جواب  وودعناهم ..

بعد ماراحو رحت بدلت وسبحت لان حتريت من التوتر ... اشوية وصاحني ابوية ..

ها بابا صحتني ..

ابو سامر: اي حبيبتي  تعالي يمي اريدج .

رشا :كعدت بصفة .. جان ايدة تحوط جتفي وكال .

ابو سامر :شوفي بنيتي الشاب الي تقدملج منفصل وعندة بنية وشاريج .. وشفتة من طريقة كلامة بس يريد يرضيني انو هوة متمسك بيج ..

فشوفي بنيتي اني الصراحة مقتنع بي .. بس بقت يمج ماريد اجبرج ولا بعمري راح اجبرج على شي .
واني مامتعاجز منج ولا مستثقل منج .

وهذا بيتج الج انتي صاحبتة .. فالي اريدة تكعدين ويا روحج وتفكرين عدل وتاخذين قرارج ماريد يتكرر الغلط القبلة .

وانتي الي تكولي اني موافق عليه لان هاي حياتج ..
واخوانج راح افاتحهم بالموضوع بليل ..

رشا :انشالله بابا بس اهم شي عندي رأيك لان رايك يهمني ..

ابو سامر: واني كتلج رأيي .. اني باجر ادز سامر يسأل عليهم واشوف .

رشا: انشالله .

ابو سامر: كومي سويلنة جاي اني ميمشي وياي سوالف البيبسي .

رشا :تدلل من عيوني ..

رحت سويتلهم جاي وجان اكو جبن طلعتة لان احب سوالف العصرونيات ..

وديتة وكعدو يشربون جاي ..

ام سامر: يمة روحي شوفي مرت اخوج كعدت لو بعدها حتة اوديلها اكل عدها دوة ..

رشا: لا بعدها هستوني شفتها من جبت الجاي .

ام سامر: والله تقهر هلبنية ..بعز وجعها تصيح يمة لحكيني .. احضن بيها اكلها يمج ييمة .. تصيح لا اريد امي امي .. اريدها وياي ..

والله شكت باب كلبي .. صعبة البنية بهيج وكت امها ماكو بس حكم رب العالمين منعترض عليه.

رشا :دمعت عيوني لان اسم الله الرحمن تخيلت روحي بمكانها ... يمة اسم الله .

كملنة جاي وشلت الصينية وورة ساعة اجة عماد ..

وبعدها اجة سامر جان معزوم بعرس صاحبة ..

ابوية اجتمع بيهم وخبرهم بسالفة الخطوبة ..
طبعا اخواني ميعترضون على رأي ابوية حتة لو غلط ..حتة اني وامي .. كلمتة محد يردها.

ومن شافو ابوية شكلة موافق همة هم رحبو بالفكرة ..وسامر كال.

سامر: باجر اروح اسأل عليهم من سابع جد شكم رشاوي عدنة

ابو سامر: اي عفية وليدي اريدك كلشي تعرف عنة .

رشا :كملوسوالف وكلها طشت وصعدت لغرفتي كاعدة جنت سرحانة .. جان يجي سامر ..

سامر: رشاوي بعدج كاعدة ..

رشا :اي بعد وكت تعال .
اجة كعد يمي على الجرباية وحجة .

سامر: رشا انتي مقتنعة بهذا الي تقدملج ..

رشا: طبعا لو مامقتنعة مجان انطيتة موافقة يجي يتقدم ..

سامر: يعني تعرفي انتي وعندج تواصل ويا .

رشا: ارتبكت من سؤالة ..
هوة استاذي بالجامعة واتصل وفاتحني بالموضوع

سامر :رشا ماريدج تتسرعين بالزواج وانتي بنفسج كلتي قبل كم يوم مامستعدة ..ماريد كلام سجى يأثر عليج ..

رشا: فتحت عيوني ..
يا كلام .

سامر: عرفت سجى شحاجية وياج سهام كلتلي ..

رشا: سامر تعبت اني وتعبت اهلي وياي اريد اريحهم من همي... وهم اريد ابدي صفحة جديدة بحياتي اريد اعيش ..

سامر :براحتج حبيبتي اهم شي راحتج ..

رشا :راح واني ضليت افكر بالسويتة اذا جان صح او غلط ..هسة لو زهرة وياي جان فكرتلي بحل ..باجر لازم اروحلها ..

كعدت ثاني يوم جان يوم جمعة وطلبت من امي اروح ..

ام سامر: ييمة عيب سهام جايبة وانتي اطلعين

رشا :يمة والله بس ساعتين واجي يمة زهرة مختفية ومو عوايدها اخاف مريضة وبيها شي ..

ام سامر: يمة جان امها كالت مو اجتي وكالت متريد تجي ..

رشا :يمة انتي تعرفين شي واني اعرف شي ..

ام سامر: شوفي واحد من خوانج يوصلج ..

رشا: اروح فدوة للتفهمني

رحت لسامر توسلت بي حتة يقبل يوديني ..
بالكوة قبل لان يريد ينام هم خطار وهم دوام.

لبست بسرعة وطلعت ..
وصلنة لبيتهم ذبني سامر وراح طبيت وسلمت عليهم جانو كاعدين بصالة وزهرة هم بس ذبلانة حيل .. ووجها ثكيل علية كوة سلمت..

كعدت يمهم شوية وندست زهرة تصعد اريد احاجيها ..

صعدنة واول مطبينة سألتها .

رشا :زهرة شبيج ..

زهرة: مابية ليش شفتيني بية شي ..

رشا: زهورة احجي حبيبتي ليش هيج .. خل يولي ميستاهلج ..

زهرة :رشا انتي شكلتي لروحج من رحتي وكلتي لعماد علية ..

رشا: نصدمت هاي شمدريها ..
اني .. شكايلتلة عليج .

زهرة: لا تجذبين هاج اقري محادثة عماد وياي وانتي تعرفين ..

رشا :فتحت تلفونها وانطتة الي وراحت كعدت على الجرباية وحطت المخدة بحضنها وصافنة بغير عالم ..

اخذتة ودخلت على الفايبر قريت المحادثة ونصدمت بكلام عماد الها ..

جان كاتبلها ...

يتبع ....

تحياتي Aseel.

لا تنسو التصويت ... احبكم 🙈