رواية قضية طلاق الفصل السادس 6 - بقلم Aseel🤗

هلووو حبايبي شلونكم..

النت شلع كلبي من زمان محضرة البارت بس ضعيف النت ومينزل ..هسة بديت بي من جديد حتة ينزل .

اترككم ويا لبارت ..

....

قضية طلاق .

بقلم Aseel.

بارت٧ ..

......
الخيانة تلك الكلمة الجبانة الّتي تجعل الإنسان يشعر بالإهانة عندما يضحّي الشخص من أجل غيره
........

رحت بدلت ونزلت تغديت وياهم سوالف وضحك.

جان سهام تذبلها قنبلة ..

سهام :.. احب ابشركم .. اني حامل بشهرين .

سامر: شنوو ...

سهام :شنو شنو دكلك حامل بشهرين .

سامر :سهام انتي متاكدة لو مثل كل مرة ..

سهام :اي متاكدة وسويت تحليل وطلع ايجابي..

سامر: اشوكت طلعتي واني مادري ..

سهام :جبت تحليل منزلي وصيت اختي ودزتة بيد ابنها ماردت اكلك قبل لا اتاكد يلة ..

سامر :لا تكفرينة سهام .. اشلون تسوين هيج منو يكول مضبوط ..

سهام: شبيك انت بدال ماتفرح .

سامر :شلون افرح بدون ماتاكد ..

رشا :سامر اهدء شبيك عصبي ..

سامر: انت متدرون شراح ايصير اذا طلع ماكو حمل ..
راح تكلبها مناحة سبوع كامل والله سبوع دك ولطم ونحيب..وتعال سامر عيد وكول نفس الكلام ..

بابا افهمي اني مامتوزاي على الاطفال انت كافية علية ..

سهام: يعني قصدك اني طفلة مو .

سامر: اي والله طفلة لان تعاندين هواي ..

ام سامر :يلة ابني مصار شي خل تحلل دم وبعدين تفاهمو ..

واذا لا سامح الله ماكو اني احاجيها وافهمها بس اهدء ولا تخرب الفرحة بلكت الله صدك حبلة ..

سامر: محد بيكم يفهمني .. عاف الاكل وكام .

سهام :شفتي خالة هاي ابدال ميباركلي .

ام سامر: حقة يمة حقة لان انتي متشوفين روحج كل مرة من يطلع ماكو حمل من يمي اشبع قهر شحال هوة ويحبج ويريد رضاتج .

سهام: بس خالة هلمرة متاكدة وحتة اعراض حمل عندي ..

ام سامر: يلة مصار شي العصر ناخذج ونحلل ونذر اذا طلع حمل صدك اطش جيس جكليت اباب العيادة ..

ابو سامر :خلصتو هسة ..

رشا التفتنة عليه وامي كالت ..

ام سامر :شخلصنة ..

ابو سامر: جلسة المناقشات .. حتة تصحلي فرصة ابارك لبنيتي .

ام سامر: والله ابنك الي كلب الكعدة .. شحلاتنة ونضحك ونسولف .

ابو سامر: هسة معلينة بهذا الخبل .. على الخير بنيتي وانشالله هلمرة صدك وتقرين عيونج بي ..

سهام :انشالله عمو ... تسلم .

رشا :اني اضم المباركة بعد التحليل ليش اصرف ثنين

سهام: شكد بخيلة لعد ..

رشا :اشاقة وياج حبيبتي .. مبروك حبيبتي يكومج بسلامة انشالله.

خلصنة اكل بس سهام تحوص لان سامر مااكل راحت وراه وتراضي بيه ..

شلت المواعين وغسلتهن ورحت نمت شوية اليوم هذا كلة قنابل ومفاجأت ..

كعدت العصر كلش نزلت لكيت بس عماد ..

لعد وين الباقين .

عماد: ابوية طلع لجماعتة ..وامي وسامر اخذو سهام للتحليل ..هسة على جية من زمان راحو ..

رشا :خير انشالله... ويا مدنحجي طبت امي تهلهل وسامر عيونة تضحك وسهام تبجي ..

عرفت يعني اكو حمل يالله جبرت بخاطرهم ..

ركضت عليها وحضنتها وهية كامت تبجي ..

سهام: ولج رشا ممصدكة والله اخاف حلم وعلى ساعة افز منة ..

رشا :اششش لا تحجين هيج اهم شي اكو نونو بلطريق ..

سامر: يلة سهام صعدي رتاحي وبعد ممنوع تتحركين هواي ..

ام سامر: اي يمة صعدي اهم شي هذن الاشهر الاولى خل يثبت والله كريم وباجر اخلي سامر يحجزلنة دكتورة زينة تشرف على حالتج ..

عماد: بالخير ابو السوس حيجيك ضلع لو ضلعة..

سامر :يوم الالك حبيبي ..

عماد: بالخير سمسومة يتربة بعزكم وتكومين بسلامة .

سهام :اهو عماد شكم مرة كتلك لتكول سمسومة بس هلمرة وبعد كافي تصيحلي هيج حصير ام وعيب تصيحلي سمسومة .

عماد: ديلة عاد لا تشيلين خشمج علينة من هسة .

سامر: لك غصبن عليك هاي الحب تامر وتنهي .ونصة صوتة بس لحد متجيب وشتريد سوي .

سهام :ترة سمعتك سامر ..

سامر :احم ....يلة صعدي ارتاحي ويضحك .

رشا: صعدت سهام وسامر وياها والفرحة مسايعتهم شكد جانو يحلمون بهذا اليوم وكلنة هم نحلم مو بس همة .. الله يثبتة ويكومها بسلامة ..

خابرت امي ابوية تبشرة وكال لا تسوون عشة اجيب وياي سفري .

كيفت وكلبي كام يكمز لان مابية اسوي عشة ..

رحت حضرت ملابسي وعزلت غرفتي واخذتلي نضرة على الكتب الي نطوهن النة .. شكبر الكتاب وكلة انكليزي .

شجابني لهلضيم لو داخلة رياضة مو احسلي .

كاعدة ارتب واجتني رسالة بتلفوني ..

فتحتها رقم ..غريب..

طالعة تخبلين اليوم .

ضليت صافنة منو عندة رقمي .. محد يعرفني بالدوام ..

اجة ببالي صهيب هوة عندة رقمي واليوم شافني .

جاوبتة : طبعا اطلع حلوة غير حتة اعجب شباب الكلية بس مكتلي منو انت.

رد رسالة .. كفر بيها وكال اني الج

جاوبت: وانت منو حضرتك .ومنين جبت رقمي .

رد .:اني ماضيج وحاضرج ومستقبلج الي مراح يكون بدوني لو اعرف اكتلج واكتل روحي..

مجاوبتة عفتة بس حضرت الرقم .. ماريد ازعاجات بس احس بفرحة من حركت دمة .. بعدك صهيب مشايف شي والله .

اجة ابوية جان جايب كباب شوي وتكة ومعلاك ..وبيبسي العشق ..

تعشينة واجواء فرح تعم الكعدة شقة وتصنيف من سامر وعماد على سهام .. وهية بسرعة تزعل ويرجع سامر يراضيها وعماد يرجع يضحك عليهم ..

امي وابوية كامو غسلو .

كملت عشة وطفرت كلت الاخير يشيل الصينية كلة طفرت وياي ..

سامر عاط بسهام لان كامت بسرعة ..

رشا :يلة عماد انت اخر واحد ..

عماد :والله ماشيلها اني كوة شايل روحي .

رشا: معلية بيك اني كلت الاخير يشيل الصينية ..

عماد: والله لو تموتين ماشيلها

سامر :عمي اني اشيلها هسة يسمع ابوية ويجي هوة يشيلها وشيخلصنة عاد نضل سنين نتعير منة على هلسالفة .. على ابو زلم مكسرة ونسوان فاهية ..

اني رجال جبير اشيل وانتو شباب بحيلكم متشيلوها .

رشا :والله على سالفتك هاي شطولها جان هسة شايلها وجاي ..

سامر: تعلميني بسوالفة... بابا اني صرت خبرة ..

رشا: ابو الخبرة شيلها وسهام عليج التعزيل لان اني سويت مال ظهر .. وهسة سفري كلة بزبل بس صينية وكلاصات غسلي ..

سهام :ماشي ماشي لاتتوسلين ..

رشا :لا هاي عايزة انوب اتوسل ..
يلة اني رايحة احضر ملابسي .

صعدت وعفت سهام وسامر يتغازلون على السنكي ..
يعني قلة اماكن ..

صعدت غيرت الي جنت محضرتهن معجبني ..
كملت وكعدت اكلب بالتلفون لحد مغفيت كعدت ثاني يوم الصبح غسلت وفرشت اسناني..

وعما صحصحت لان تاخرت بالسهر لبارحة ..

لبست بنطلون حبري وقميص وردي يجنن شكلة وحتة بارز لونة ويصير سيلفي ..

مكيجت وردي وحمرة وردي بس كلة فاتح ماحب الهواي .. وسويت شعري ظفيرة فرنسية بس راخية طلع شكلي كلش فخم ومرتب ..

رغم بساطة لبسي ومكياجي بس طلع كلش مرتب .

رشيت عطر هادئ .. ولبست اكسسوارات وشلت غراضي ونزلت ..

عماد :صوفر .. يمة شنو هلمزة الكامدة دي ..

رشا: صباح الخير ..

سامر: هذا الصباح خير على العراقيين

رشا :يعني حلوة .

سهام :كلش حلوة ومرتبة اصلا حلاتج ببساطتج ..

كملت وسلمت عليهم وطلعت ..

اتمشة وادعي الله مالكاه ماريد يخرب شكلي بالعصبية واكيد حيغثني وابجي .

وليش ابجي اني مغلطانة بالعكس خل يشوفني حتة ينكسر كلبة .. هوة جان خايف من هلحظة الي اداوم بيها ويشوفوني شباب ..

وهسة حسوي الي يخوفة .. اريدة ينطحن طحن .مو يكول بعدني احبج .. خل يعيش الحب على اصولة .

امشي وافكر ويا روحي شفتة من بعيد واكف بتسمت استهزاء والله انت جنيت على روحك ...

قريب مااوصل طلعت تلفوني عساس اخابر .
فتت من يمة ..

حجيت ..

الو ...اي هستوني طلعت ....مو جنت سهرانة البارحة وكوة كعدت الصبح ....يلة ماشي ....باي .. بس جنت ابتسم واحجي ..

سديتة وحطيتة بالجنطة انسحبت من زندي ونركعت بالحايط مال بيتهم من جوة ..

كلبي طفر من مكانة من الخوف احسة صار يدك ببلعومي ..ضليت فاتحة عيوني على حركتة ..

ووعيت على عيطتة وهوة يصيح ..

صهيب :منو هذا الي تحاجي ..

رشا :استوعبت الموقف وقويت روحي ..وانت شكو انت شدخلك بية ..

ومنو سمحلك تستوقفني بهلطريقة ..

صهيب: رشا لا تلعبين بعصابي ترة انكلب على الوجه الثاني ..

رشا: لا بلة خوفتني ومتنكلب ثاني وثالث ورابع شسويلك انت متهمني واخر همي احسبلك حساب .

الي بيناتنة انتهة وانت نهيتة بيدك ماجبرتك اني .

وهذا اختيارك انت ... فاهم انت ردت هيج .

ووخر عني لا اعيط وافضحك هسة .

صهيب :رشا حطيها ببالج انتي بس لصهيب افتهمتي .. والله ادمرج وادمر الي يحط عينة عليج .

رشا: انت شكو نافخ راسك بحياتي .. انت شنو

صهيب: جربي وشوفي ..

رشا :مانتظرك تكلي جربي لان هلمرة اذا ردت اختار اختار بعقلي مو بكلبي .. حتة ميتكرر نفس الغلط ..

اختار انسان يحترم ويقدري حبي .. مو ساعاتة بمزاجة ..وعن اذنك تاخرت ينتظروني ..

لزكني بالحايط من ركبتي

صهيب: ومنو ينتظرج بالله .

رشا :وانت مالك علاقة .. دفرتة ببطنة كام يتلوة

وطلعت ركض للشارع .. شلون راح تكضي ويا هذا الخبل ..

وصلت همزين بعد ٣ دقايق وتبدي المحاضرة دخلت سلمت علة هند ..

رشا: هلو صباح الخير ..

هند: هلو صباحو شهلكيك من الصبح عمي هذا الوجه الي يفتح النفس .

رشا: شكرا من ذوقج .

هند: والله لو شاب ولا اعوفج الة اكبل وياج .

رشا :انتي لو شاب جان حتة مخليتج تكعدين وياي

هند: هههههه لا همزين عمي اني انثى انثى وحتة كاتبين بجنسيتي انثى .. اطمني .

رشا :والله خوفتيني اكثر ههههههه .

طب الدكتور وبدة يشرح ..وخلصت المحاضرة طلعت للكافترية احس روحي شاحبة وعطشانة من الهبطة .

دخلت اخذت بيبسي من الالة وكعدت اشرب واكلب بتلفوني شفت خيال فوكاية حجب ضوة الشمس رفعت راسي طلع طالب ويانة ..

رشا :نعم تفضل ..

احمد: يزيد فضلج ممكن اكعد .

رشا :بصفتك شنو تكعد .

احمد: بصفتي زميل ..

رشا: لا اعذرني ماكدر اكعد وحدي وياك لان ماريد ياخذون علية نظرة من ثاني يوم .

احمد: اعتذر على الازعاج ..

رشا: لا عادي .. عافني وراح ..

كملت الببسي ودخلت لان بدت المحاضرة جان عدنة استاذ مهيمن .. دخلت واني كلبي يدك خوف نظراتة تخوف ..

دخل وراية واول مدخل باوعلي وضل صافن .وراها حمحم.. وبدة يشرح وكل مااشيل عيوني الكاه يباوع ومن ابوعلة ينزل عيونة ..

خلصت المحاضرة طلعو الطلاب اني ضليت الملم لان فارشة الغراض عبالك كاعدة بالكاع مو كرسي ..

صاحني كلي

مهيمن: دكتورة رشا من تفرغين مريلي للمكتب .

رشا: ماشي دكتور ..

كملت ورحت واني عداد الخوف الف بس تظاهرت بالقوة .. دكيت الباب ودخلت

كلي

مهيمن: تفضلي ..

رشا: نعم دكتور..

مهيمن: مناوية تعتذرين .

رشا :على شنو اعتذر ..

مهيمن: وتنكرين بعد .. والموقف مال البارحة وتجاوزج..

رشا :فار دمي وهذا الي جنت خايفة منة ..
اتوقع صار سوء فهم

واني متجاوزت الة لمن انت تجاوزت وثانيا اني مجنت ادري بيك دكتور بجامعة. .
وثالثا والاهم الي صار خارج سياج الكلية يعني حالك من حالي ..

لو متجاوزة او مجرد رفعت صوتي واني داخل الحرم الجامعي بوكتها اجي اعتذر ..

مهيمن: .. ضل صافن على جرائتها واسلوبها بالكلام المقنع بس مراد يسوي نفسة غلطان ..

يصير خير تفضلي .

رشا :انشالله اترخص

طلعت واني احيي واهنئ روحي على هذا كلام المثقفين خلف الله على المسلسلات والة جان كضيتها بجي وسحل بروحي ..

احس روحي صايرة قوية ..

دخلت للقاعة شافتني هند .

هند :شبي وجهج شاحب .واصفر شصاير .

رشا: حجيتلها الموقف بس مجبت اسم صهيب بس الي صار من وصلت للسيارة لهسة ..

هند: عزة بعينج ولج انتي شلون تحجين هيج هسة يشد وياج ..

رشا: اني محجيت شي غلط .

هند :ولج يا محجيتي انتي طيرتي ابو الجبهة

رشا: شسويلة لعد اعتذر منة وهوة بدة .

هند :ولج الله اليستر بس بطلي حركات بايسون كلك حركات ..

ترة هنا كلها تمشي باللواكة .. تلوكي تنجحين لا عبالج الدراسة كافية لا حبي لو جنتي شاطرة وهذا اللسان الي طالع رون سايد ابشرج باقية هنا وتتمددين بعد ..

رشا :دكافي خوفتيني عود كلت اسولف لوحدة تهديني ..

هند: صدك انطيني رقمج حتة نتواصل ..

رشا: ماشي سجلي يمج .

خلص اليوم واستمرت الايام بس جنت امشي من غير طريق حتة مااتصادم ويا صهيب ..ودكتور مهيمن يطب ويطلع يباوعلي بحقد ..بس ولا معبرتة ..

يحاول شكد ميكدر يقلل من شأني كدام الطلاب يعني بنص الشرح يكومني اشرح واني همزين بية عادة اقرة بلبيت الي ماخذي والي مماخذي .. يعني فاهمة .

ودائما هوة الي يخسر ..

جانت نظرتة الي من اشرح يتمعن بتفاصيلي احسة يباوع لحلكي شلون احجي ومرات ارتبك من نظراتة واكوم ماعرف احجي عدل ومن يصير هيج اشوف ابتسامة بطرف حلكة عرفت يسوي هيج حتة يفشلني ..

فتعلمت من اكوم ماباوعلة الهي روحي بغير شي واكمل اباوعلة بتحدي ..احسة يموت قهر لو بودة يذبحني ويشرب من دمي دومي مفشلتة .

تمر الايام وسهام بطنها تكبر وفرحتنة تزيد بيها اكثر

صارت شهر الرابع وبدت تتعب بالحمل مبين ثكل عليها هواي راحت للدكتورة وسوت تحاليل رجعت هية وامي العيون حمر .. سامر جان طالع فراحن بتكسي ومن اجن سامر شافهن وشاف وجوهن

جمد بمكانة وميعرف شيكول وشيحجي ..

رشا :شكو شبيكم .

سامر: سهام شكو ..

رشا :اشو هاي كامت تبجي وشمرت روحها بحضن سامر ..

سامر :جمد والدمعة تجمدت بعينية ...هسة غير تحجون وكعتو كلبنة شكو ..

سهام: سامر.. طلعت بية توم .

سامر: كعد بالكاع وصاحلي اجيبلة مي .

رشا :هاك سامر شبيك حبيبي على كيفك ..
انتي مخبلة شايفة روحج شسويتي جان مات من الهبطة شايفة وجهج .

ام سامر: يمة حتة اني من الصدمة نعكد لساني والله ممصدكين ..

سامر: يمة صدك تحجين والله عبالي سهام بيها شي والله راد يوكف كلبي .. اكو واحد يسوي سوايتجن

رشا :والله انت تجلطن اكبر واحد .. وانت ماما عود انت الجبيرة هيج تهبطينة بلة مخفتي لا ابنج يصير بي شي..

ام سامر: يلة مصار شي كوم حبيب امك وكرة عينك بجهالك .

سامر: ومعرفتو شنو جنسهم ..

سهام: لا ممبين ..

سامر: الله يعديها على خير ...

رشا: رحت اغسل ملابس وصعدت اشر بالسطح الجو يجنن .. صافنة وخصل شعري تتطاير وياةالهوة الي بي نسمة برودة واعتقد حتمطر اشو الجو يخبل وبي ريحة مطر ..غمضت وعشت اللحظة واسمع صوت صفارة فتحت عيوني لكيت المطيرجية كلها كبالي همزين محد منتبة الة جان صارت فضيحة .

نزلت وسمعت امي تبشر ابوية ..بسهام .

نزلت كملت شغلي وطبيت لغرفتي ادرس ..

كمل اليوم عادي وصرنة اني وهند صديقات كلش حتة زهرة تغار منها لان تتصل هواي بية ودائما تسال احوالي ..

مثل كل مرة وكاعد نسولف بتلفون جان تفتح وياي موضوع مهيمن ..

هند :والله رشا اشك بالدكتور معجب بيج

رشا: ليش ينعجب اصلا كل الي بيناتنة نظرات كره وحقد وتحدي ..

هند: لا بس دائما اشوفة يباوع عليج وانتي ممنتبهة .

رشا :خل يباوع شسويلة ..

اني مفارغة لهاي السوالف وكلبي ملجوم وماريد اعيد الي عشتة ..

هند: بس لتقارنين مو كل اصابيعج سوة .

رشا: غيري السالفة هند ترة اضوج افتح هيج مواضيع

هند :ماشي .. اي مكتيلي شخبار ضرتي ..

رشا: منية ضرتج .

هند :زهرة شبيج الي كل متشوفج تسولفين وياي تتعارك مثل الجهال..

رشا :زينة هم ملتهية بكليتها لان هية تركت وياي ورجعت قدمت وياي بس هية دخلت علوم حاسبات حكومي

هند :اها حلو سلميلي عليها .

رشا: غير تذبحني ولج .

هند: ههههههه والله دمها عسل .

رشا :كلت بكلبي يالله هاي عبالها تشاقة .. متدري زهرة مسويتها صدك ..

ماشي: حبي انشالله
..
سديتة منها ونمت كعدت ثاني يوم ورحت للدوام وطبعا باناقة بسيطة ..

صهيب مااشوفة غير بس من يعبر من يم بابنة اشوفة من شباك غرفتي الي يطل ع الشارع وكل ميفوت يرفع راسة وكأنما يحس اني هنا

والصبح احاول اتختل واغير الطريق ماريد اتعرض لموقف مثل هذيج المرة ..

وصلت الدوام وبين سلام وسوالف ومحاضرات ..
اجتني طالبة .. كالت استاذ مهيمن يريدج بمكتبة .

جمدت بمكاني ..

يتبع .....

لا تنسون النجمة ترة والله متعض جربو وشوفو ..

احبكم

تحياتي Aseel

بامان الله ❤❤❤