رواية قضية طلاق الفصل الخامس 5 - بقلم Aseel🤗

مساء الخير حبايبي شلونكم مشتاقتلكم كوومة .

اعتذر عن التاخير بس تعرفون النت ممستقر ..

وانشالله ارجع انزل كل ماالكة النت سريع وموجود .

....

..قضية طلاق ..

بقلم Aseel.

بارت٦

رشا :الايام تمر مثل تتر المسلسل يومية نفس الحن والصور والكلام .. شكد ماجنت امثل القوة بس داخلي مكسور ..

صعبة الي صار وياي .. مو اي وحدة تتجاوز هذا الخذلان .. يجوز البعض يكول عادي انسي ..

اصعب شي انسة .. شلون انسة اول حب . اول ابتسامة .. اول نبضة لكلبي.. مجنت اعرف الحب الة من حبيتة ..

جنت مجرد اسمع اسم صهيب حتة لو مكان هوة المقصود احس روحي عركت واحساس بلوية بالبطن وخدودي يصيرن حمر ولمعة بعيوني ..

حرك كلبي وعافني باحلى يوم .. بس بعدني احبة ..
بعدني احن واشتاق الة .. يومية بليل ادك على صدري اريدة يوكف ماريد ينبض .. لان كل نبضة ينبضها تكون باسم صهيب ..

احاول وشكد مااكدر مابين لاهلي على الي بداخلي ..
ماريدهم يتاذون ميستاهلون ..

مرت الايام بطيئة .. ويوم عن يوم يزيد عذابي واشتياقي الة .. عقلي يريد يفهم السبب ليش ..

اجة تقديمي للجامعة دخلت صيدلة كلية اهلية ..
حاولت اغير من مزاجي رحت صالون رتبت روحي وعدلت كصة شعري بس عفتة طويل وسويتلة عناية .

وسويت وجهي حاولت اطلع من جو الكأبة ..
بعدين اخذني عماد للسوك اشتريت ملابس للدوام ..

اشتريت ملابس عادية يعني مو الة الغالية لان اني اشتري الي يناسبني والحلو ..

هواي ملابس محلوة وتكون غالية والي حلوة تكون اسعارها مناسبة .

اشتري اليعجبني ميهمني سعرة رخيص لو غالي .

رجعت للبيت محملة علاليك .اول مطبيت لاكيت زهرة جتي حضنتني بس من طب عماد وراية شفتها تخربطت اوضاعها بس محسستها ..

زهرة :ولج رشااوي مشتاقتلج عوبة .

رشا :حبيبتي اشو طولتي الغيبة ..

زهرة :ضليت يم بيت خالتي نهاد الجو يموت يمهم ولمة حلوة تمنيتج وياي والله بس ادري بيج نفسية ومتنحملين وتكلبيها مناحة علينة ..

رشا : ايا عوبة هاي اني نفسية ..

زهرة: لعد ابوية انتي شايفة سوالفج مال عجايز صايرة .كلة قصص ومواعظ وحكم .

رشا :طاحضج .. تعالي شوفي ششتريت ..
ضلينة نكلب بالملابس وزهرة ششوف تروح تلبس ..

جان اكو قميص ينلبس جواه بدي وبنطلون يكون فوك الركبة اشوية ..

اخذتة وكالت ..

زهرة: خل البسة هيج بس اكدرة عجبني اشوف جسمي بي..

رشا :بس هذا مينلبس هيج فضيحة الة بدي.

زهرة :اني قابل طالعة بي بس هنا اجربة ..

رشا: لبستة طلع حلو عليها وهية جسمها يخبل كامت تتمشة عساس هية عارضة ازياء ..

رشا :اخذي زهرة الج هذا لان كلش حلو طالع بجسمج .

زهرة: لا ماريدة عيني بس من احتاجة اجي اخذة خلي يمج ..

رشا: هسة يعني اخذتي وضميتي يمي لو متريدي ومن يعجبج تلبسي حتة مالبسة .

زهرة: اكلج كل اهدومج بالنص نتلابس وبلا مستحة منج لان كلهن عجبني ..

رشا :باثناء ماجنة نسولف اندكت الباب وزهرة نست نفسها .. صحنة فووت .

دخل عماد وضل صافن وزهرة من الهبطة طبت جوة الجرباية وهوة كبل طلع وكام يسب ويلعن

رشا: خرب ببليسج غير تنتبهين .

زهرة: راح لو بعدة ..

رشا: راح طاحضج متحسين انتي .

زهرة :بللة اني نسيت روحي انتي شبيج متكوليلي.

رشا :انجبي انجبي .. هسة احصلي رزالة منة من وراج

زهرة :عزة عزة شكد عيب شافني هيج

رشا: لا طلع بسرعة .ديلة نزعي وبدلي دنروح نتعشة ..

زهرة :والله مانزل جيبي العشة لهنا ..

رشا: امي متقبل تحب كلنة ملمومين ..

زهرة :مانزل والله استحي منة شلون اباوع عليه وانوب اكل ويا ..

رشا: امشي عاد عود لا ترفعين عيونج حتة متشوفي ..

زهرة :والله استحي ..

رشا :دكومي منين اجاج الاحساس صايرة عندج مشاعر ومستحة عود دكومي كومي ..

زهرة: نتوكل على الله ..

رشا: ننزل اني وزهرة واسمعها تردد اللهم اجعل من بينهم سدا ومن خلفهم سدا فاخشيناهم فهم لا يبصرون..

كبر اي والله ترة تلكي اصلا نسة ..

زهرة: كلشي يصير.. معليج انتي

رشا :اهو دمشي عاد .

رحنا ساعدنا امي بالعشة وترتيب السفرة

طول السفرة زهرة مشالت عينها ويمكن لكمتين لو ثلاثة حطت بحلكها كوة تاكل ..

ام سامر: خالة زهرة شبيج وجهج اصفر ومتاكلين .

زهرة نطت عيونها من الفشلة واول مرفعت راسها شافت عماد كبالها اجت عيونة بعيونها ..

رشا : يجوز حتتمرض خطية ..

زهرة: كرصت رشا اصبريلي انتي وامج صايرات حنينات اليوم

ام سامر :اكلي خالة اكلي ..

عماد :الحمد لله سفرة دايمة ..

ام سامر : وين يمة ماكلت شي ..

عماد: لا يمة شبعت ومن اجي بليل اكل عود اذا جعت
عندي شغلة متواعد ويا ولد ماتاخر ..

ام سامر: براحتك عيني .

زهرة ماصدكت عماد راح وهية انطلقت بالاكل مالذ وطاب ..

ضلت رشا وام سامر صافنين عليها ..

رشا :سبحان مغير الاحوال .. يغير من حال الى حال

زهرة: انتي انجبي معليج .

رشا :اوي دولي طبج طوب اكلي بس علكيفج لاتاكليني.

زهرة: ماكل هيج نماذج لحمج مر ..

رشا: وليش يمة شبية ..

زهرة: كلة بجي وكاأبة وشبعانة مرار .. شيبقة بيج .

رشا :ديلة انتي تطولين ..

زهرة :يعني عادي اضوك واحكم ..

رشا :دولي صدكتي ...متوحشة صايرة

زهرة: دسكتي صاري بالنص ساعة اتحسر على الكل ومالي عين اشيل عيوني من ماعوني ..

رشا :والله خبلة والله.

زهرة :خليت العقل الج

رشا :اكوم احسلي راح تكومين تجفصين وماريد نتخارب ..مالي خلك زعلج البايخ ..

زهرة ضلت تاكل وبشراهة واني رحت غسلت وحطيت الجاي جانت سهام وسامر طالعين يم اهل سهام يباتون ..

ضليت انتضر الجاي ورحت الملم بالسفرة وزهرة بعدها اهلي كامو وهية حاطة راسها بسفرة عفتها بس شلت المواعين اليمها ..

طب عماد سلم ..

عماد: رشيوة فدوة كلاص جاي صبيلي وجيبيلي بالهول

رشا: ماشي هسة اجيبة ..طب وجان اتذكر الوحش جوة رحت وراه واشوف زهرة صافنة واللكمة بحلكها نافخة تك خدها .. وصاير عماد كبالها وكاتم الضحكة ..

اندار علية كلي جيبي فوك لغرفتي اخاف تاكلني هاي اليوم ناوية علية ..

رشا: اشوف زهرة عيونها لمعت والدمعة بينت بسرعة كامت

زهرة: لا اخذ راحتك اصلا اني مكملة بس جنت انكنك
وررركض للمطبخ ...

اول مطبيت كرصتني بزندي ..

زهرة: انتي ليش متحجين متكولين عجبج هذا الوضع الصار هسة ..

اني لومجاية احسلي ..يعني اول شي شافني لابسة خلاعي .

ويا كلمتها طب عماد ستوقفتة كلمة لابسة خلاعي ضل صافن وصاير وراها ..

وهية مستمرة ..
زهرة :وعساس اني مستحية ومااكل كدامة وهسة طب شافني اكل بالعشر اصابع حتة مو بخاشوكة ..

بعد راح الانوثة ..

رشا :اغمزلها وميفيد متسكت ..

عماد : ليش انتي هم حاسبة روحج انثى مثل البنات وضحك

زهرة :جمدت مكانها يمكن حتة دمها نشف ..ضلت فاتحة عيونها وماندارت ابد

بس نضرتها تحولت انتقام مني لان ماكتلها وراج ..

عماد: المهم رشا فدوة سوي الجاي ثنين وجيبيهن للاستقبال اجة صاحبي

رشا :. عيوني متنقلة بينة وبينها
اي مااشي صار هسة اصب انتضر اخذة.

رحت اصب وعفتهم وحيدهم مطبخنة حار وبارد يعني مفصول ..من النص

...
عماد :زهرة لا تحاولين تتصرفين على غير طبيعتج
ترة الافعال العفوية حلوة ..

زهرة: بس ..بس اني .

عماد: لا بس ولا شي بس لا تتصنعين تعجبني البنية الي تتصرف بطبيعتها ..

زهرة :اني ممتصنعة ابد .

عماد: . والي صار على العشة ..

زهرة: جنت خجلانة من الموقف مو اكثر .

عماد :اعتبري ماكو شي لان صدك ماشفت شي

زهرة: دنكت وحمريت من الخجل ..

عماد: ترة جنت اشاقة من كلت حاسبة روحج انثى

زهرة: اي ادري ...لان كل هلانوثة وتكول هيج .

عماد :شو وخري ..

زهرة: ليش ..

عماد :دشوف الانوثة وين

زهرة :.ركضت كبل فوك هذا سواها بلاية ملح اني صوجي وكفت يمة .

رشا: هاك عماد .. وعلكيفك وياها ترة صح تشوفها على طبيعتها وتلاسن بس والله كلش حساسة وخجولة بهيج سوالف .

عماد: وانتي شكو حاطة اذانج يمنة .

رشا :محاطة اذاني انتو صوتكم عالي ترة ..

عماد: دجيبي جيبي .. وروحي شوفي الخبلة لا تنتحر ..

رشا: راح عماد واني صعدت لزهرة .لكيتها تبجي .

هاي شبيج ترة يشاقة متعرفي

زهرة: رشا تعبت والله كلهم يقلدون علية لان الاسن وحركاتي مال ولد ..

يعني شوكت يقدر مشاعري ويحس .

رشا :هوب هوب شكو شصاير من وراية وبشنو يحس ..

زهرة: رشا انتي مو غريبة ..بس اني من فترة احس اوضاعي تتخربط من اشوف عماد .. ودائما من اريد انام يجي على بالي ...

رشا :بس لا حبيتي ولج .

زهرة :مادري والله

رشا: زهرة لا تعلقين امالج بشخص متعرفي يحبج او لا .. ويجوز يعتبرج اختة .

زهرة :ولج هوة هذا القاهرني يعاملني عبالك انتي ..

رشا: يمعودة لتحطين ابالج هيج شي ترة تتعبين والله ..

الحب من طرف واحد يأذي ومحد غيرج يحس بالوجع لا تجازفين وحاولي تضبطين مشاعرج ..

زهرة :مو اكلج سوالفج صايرة مال عجايز كلة حكم ومواعظ تزعلين ..

رشا: ضربتها بالمخدة .. هوة صوجي انصح بوحدة تافهة مثلج اروح اكمل احسلي وكومي وياي لا تعيشين الدور..

زهرة: هسة شوية واجي بلكت يروح اخوج .

رشا: ها هسة صار اخوية .. دكومي كومي.

زهرة :يلة جيت امشي كبالي وجاية وراج ..

رشا :ماشي نشوف ..

نزلت كملت الشغل ونزلت زهرة وراية ضلينة نسولف سوالف عادية و احتياجات للكلية شريد وشحتاج يعني نتذكر النواقص ..

وراها صعدنة نمنة بس كل وحدة تمثل على الثانية النوم .

كل شخص الة قصة قبل النوم ... مينام اذا ميسولفها ويا روحة ..

اني جانت قصتي مكررة ومعادة اكثر من الف مرة ..
قصتي تحتصر بذكرياتي وبس .. واغفة واني بنصهن .

اما زهرة جانت قصتها تفكر بالمستقبل اشوفها تتكلب ولمحت ابتسامة خفيفة بشفتها بس مغمضة عيونها ..

جنت هذا احساسي اول معرفت صهيب .. وخايفة على زهرة ..صح الي تحبة اخوية بس اخاف لا يكسرها بصدة الها .. وزهرة ضعيفة حيل .

مرت الايام واجة وكت الدوام جانت الكلية قريبة يعني بسيارة او بدونها اروح .. بس اني فضلت اروح مشي .. اريد اتنفس هوة اختنكت من البيت والسيارة .

اول يوم هوة الي يحدد شخصية الطالب لبقية الطلاب .. اعتنيت بمظهري بس باناقة .. لبست بنطلون اسود وبدي للكمر ابيض وفوكاه بوليرة طويلة للركبة يعني مستورة واكسسوارات خفيفة .

ولبست ترايشوز لون ابيض وجنطة سودة صفح تنلبس اشتريتها جديدة وشكلها كلش حلو .. احب الشغلات البسيطة ..

وسويت شعري ظفيرة صفح بس تركت كم خصلة نازلة باهمال صارت احلة .

نزلت اتريك وكلهم تعجبو على شكلي ..
كملت ريوك..

رشا :يلة سلام حبايب اني طالعة ماريد اتاخر اول يوم ..

سامر :انتظري اكمل واوصلج بسيارة .

رشا :لا فدوة ماريد مختنكة واريد اتنفس اشوية
اتمشة احسن الي .

سامر :براحتج حبيبتي بس اني موجود ترة .

رشا :متقصر حبيبي .

عماد :واني

رشا :شنو انتة .

عماد :ماكو حبيبي الية ..ترة والله جفاف عندي بلة سامر شابع كلمة حبيبي وحبجيات وانتي انوب تكوليلة بالجذب عبرولنة وحدة منا منا ترة ملينة ..

رشا: اجيت حضنتة من ركبتة وهوة كاعد ..شعندي غيركم انتو الحب كلة .

عماد :اي صبغي صبغي ..

رشا: هههههههه بكيفك لا تصدك ..وخرت من يمة يلة اني رايحة باي .

ردو كلهم: الله وياج .

طلعت من البيت واني متفائلة راح اكون مستقبلي وابدي من جديد.

وصلت قريب بابهم وكفت لثواني واني اشوف هلباب شكد جانت احلام تنبني من اشوفة ..

كملت مشيتي وصلت لبابهم مسدود .. يمكن بعدة ماطلع .. بس سهام كاللهة سامر انو صهيب طلع..

اووي شعلية بي طبة مرض ..

افكر وامشي وصلت راس الفرع صار بوجهي ديرجع لبيتهم ..

حاولت امشي استوقفني ..

صهيب :رشا اوكفي لحظة .

رشا :وكفت بدون مااندار ماريد اضعف ..
احجي شرايد ..

صهيب: رشا اسف سامحيني ..

رشا :اعتذارك ممقبول وماسامحك .. عندك بعد شي تريد تكولة ..

صهيب: رشا بعدني احبج والله بس انجبرت اسوي هيج لمصلحتج ..

رشا :اشكرك لان فكرت بمصلحتي اكثر مني ..
وممنونة الك لان خليتني التفت لمستقبلي ومااضيعة علمودك .

صهيب: لا تحجين هيج

رشا: انت هذا الحجي الي حاب تسمعة والة ماوكفتني.
درت وجهي عليه اجت عيوني بعيونة كبل نزلتهن بعدين رفعتهن ماريد ابين ضعيفة حاولت اسيطر حتة اكون قوية كتلة .. انت انتهيت ونهايتنة جانت بداية لحياتي ...

عفتة ومشيت واني دموعي تتسابق ياهية اسرع من الثانية .. .

كل ماتنزل دمعة امسحها قبل لا توصل نص خدي واحجي وياها .. لا تنزلين اني اقوة من هيج .. راح اصير احسن منة .. راح اخلي يتندم .. راح اكسر كلبة مثل مكسرني ..

حاولت اعدل وجهي قبل لا افوت للكلية .. وكفت يم سيارة مضللة جنت اراقبها من بعيد شفتها مركونة من زمان يعني محد بيها امان رحت عدلت وجهي ومسحت دموعي وعدلت كذلتي ويا ما دحط الكحلة للعين الثانية جان تنزل الجامة ويطلعلي شاب مبين جان نايم ..

كلي ..: ترة محد يستاهل تأذين عيونج علمودة ..

رشا: ..اني مباجية بس طب شي بعيني واني امشي .

مهيمن ...امبين امبين ..

رشا: وانت شكو .

مهيمن: ترة هاي سيارتي الي كاعدة تترتبين بيها مو مراية غرفتج ..

رشا :اعتذر ..عفتة ومشيت شكد وقح وسفيه ..

مهيمن: ترة سمعتج بس حعبرها بمزاجي ..

رشا: عززة يربي شهلمواقف من اول يوم ..

انداريت عليه .. ومتسمع شسويلك ميهمني ترة ..

مهيمن: توكلي بالله لا ارتكب جريمة بيج ..

رشا: رجعتلة اشو انت شايف روحك فد مرة ..ترة زودتها حيل

مهيمن: انتي شايفة لسانج شطولة .

رشا: محد كلك سولف وياي حتة لساني يطول عليك .

مهيمن: مو عساس اني جيتج وسولفت وياج ترة انتي جيتي على سيارتي تعدلين عطوبج .

رشا :لا تتجاوز احسلك .

مهيمن: روحي بابا فوتي لا تتاخرين مبينة انتي اول مرحلة وبعدج حامية ..

رشا :انت مو ابوية ومالك دخل افوت او ابات بشارع ..

عفتة ورحت واني الشرار بعيني اول مدخلت طبيت للحمام مال الكلية حاولت اهدي روحي وارسم ابتسامة ..

ماكدر هذا غثني حيل... حجيت شكد مغرور ..
هدئت وطلعت برة .. سألت على القاعة مالتي ..

دخلت كعدت بالكرسي كعدت بالوسط كانت شبه فارغة مابيها بس كم طالب لان بعد وكت .. ضليت كاعدة العب بموبايلي لحد مانملت القاعة ..

يسولفون اني مو يمهم عبالك اول مرة اطب للمدرسة من احس روحي وحيدة واريد امي .. اي اريد امي هسة حسيت بغربة ..

واستحي اندحس واصادق كون همة يجون يحجون وياي ..

سويت روحي مشغولة بالتلفون اجتي وحدة كعدت يمي ..

هند: هلو صباح الخير ..

رشا: صباح النور..

هند: اني هند وانتي

رشا: اسمي رشا .

هند: تشرفنا .

رشا: الي الشرف .

لحضات وسمعت صوت سامعتة كال :صباح الخير .

رفعت راسي اشوف الاستاذ الفات ..

لا يالله هذا نفسة الولد الي تكافشنة برة ..

حاولت انزل روحي ليجوة حتة ميشوفني ..
انتبهلي وعلى صوتة كال :

احب اعرفكم بنفسي اني استاذ مهيمن صالح مدرس المادة ..

رشا: اذا تذبحوني متلكون قطرة بية من الفشلة .. عزة شافني شافني .

هند :شكو منو شافج .

رشا: لا هيج ماكو شي

بدة يتعرف علينة وصل السرة الي كمت ومترددة ويمكن بعد اشوية هبطة ويغمة علية..

وكفت كلت .. اسمي رشا صابر اسعد ..

اشوفة يباوعلي بنظرة تحدي ..كال .

مهيمن: استريحي دكتورة .

رشا: باوعتلة بنظرة كره وكعدت شكد شايف روحة كمت اتخيل عندي قاذفة افلش راسة المنفوخ .

ضحكت على تفكيري صايرة مجرمة ..

خلص اليوم بين تعارف وقليل دروس لان اول يوم وبعد نص الطلاب ممداومين ..

رجعت للبيت مشي واني افكر شلون ويا هذا الاستاذ بس لا يشد وياي .. بس لا يريد اعتذر منة .. لا والله لو اموت ..

خل يولي فوك سوايتة يريد اعتذر لا والله حيل بي.
بس هوة هم خطية اني دست ويا زايد لان جنت فايرة نار وهوة صار بوجهي .. ادري شجابك من الصبح متكلي
حظك لو حظي المصخم ..

وصلت لبيتنة واني ماحاسة .. طبيت على ريحة الدولمة من ايد امي ..

الله دوولمة .

ام سامر :هلة الله يساعدج .

رشا :ويساعدج نسيت اسلم فقدت على الريحة ..

ام سامر: ستوت بس تتهدر روحي بدلي وتعالي حصب هسة ..

رشا: ثواني ابدل وانزل اساعدج ..
رحت بدلت ونزلت تغديت وياهم سوالف وضحك.

جان سهام تذبلها قنبلة ..

سهام :.. احب ابشركم .. اني حامل بشهرين .

سامر: شنوو ...

.........يتبع......

اسفة حبايبي على التاخير

بس احب انوه انو النت عندي مو تمام لان اني بالعراق والي بالعراق يفهم ضروفي ..

تحياتي ..

Aseel

احبكم ٠💘