رواية قضية طلاق الفصل الخامس عشر 15 - بقلم Aseel🤗

مرحبا عسولات ...

قضية طلاق ...

بقلم Aseel. .

بارت ١٦....

............

رشا: ماما شعري .. وشمرت نفسي بحضنها ..
حسيتها تلمست شعري وهمست الحمد لله والشكر ..الحمد لله والشكر ربي على سترك علينة ..

ام سامر :كومي ماما من ساعة الكشرة الي جينا بيها والي فكرنة نطلع من البيت ..

ام صهيب: امسحيها بوجهي خية والله مرمرني خية والله منة وكامت تدك على راسها ..

ام سامر: لا حبيبتي انتي معليج كلمت يشيل ذنبة ..
يلة ماما كومي وديري بالج تحجين شي ترة تصير دم والله ...سودة علية وعلى حظج يمة ..
.

رشا :طلعتني امي من الغرفة ومرتجية عليها جانت حالتي تبجي ..الشعر مكفش ومكصكص ..والعيون وارمة من البجي والمسكارة والكحلة نازلات على خدي وشفتي الدم يابس عليها ..

اخذتني امي غسلتلتي ورتبت شكلي ..وطلعنة بدون مانحجي شي حتة همة مصدومين ..

شكد جنت احبة لصهيب وجنت لاخر لحظة احن الة بس من حرك كلبي بشعري وهوة يدري بي اعز من روحي..

كرهتة وكرهت روحي لان بعدني احبة .. كرهت الدنيا كلها لان عرفتني بي ..

وصلنة للبيت وطبينا جانو بعدهم طالعين وسهام فوك امي كالتلي ..

ام سامر :شوفي الي يسألج كليلة احترك بالطباخ وكصكصتة ..

رشا :هزيت راسي ب اي

ام سامر: روحي يمة روحي لغرفتج ورتاحي ..مدري منين اتلكاها منج من اخوج العامياتة بالسحورة ..

رشا: رحت مشيت وعفت امي تبجي وتندب حظها وحظنا ..

تعبت نفسيتي كلش بهذا اليوم ... طبيت لغرفتي رحت للمراية شفت شعري .. ضليت اشهك بصوت وابجي من حركة كلبي ..

جنت ضافرتة من نهاية راسي ضفيرة عادية ..
والظفيرة كلها كصها يعني صار شعري ويا حنجي ..

ضليت ابجي واشتم بصهيب كرفصت بالكاع واني مغطية عيوني بايدي وابجي اسمع تلفوني يدك ..

ماريد اجاوب ضل يدك وترلي اعصابي ..
كمت ولزكتة بالحايط صارت الشاشة طحين ..

رحت على الميز تواليت كمت اشيل واشمر واعيط ..
كااااااافي ارحمني ياربي كااافي ماتشوفني عاااد ...

طبت امي مخروعة وسهام هم...

امي تهدي بية وتبجي .. وسهام مصدومة من شعري

سهام :رشا شعرج شبي

ام سامر :شبي يعني وتدك على رجلها ..شبي اكو غير هذا الكلب ابن الكلب صهيب..

سهام: عزة العزاني ولج هاي شمسويي بيج ..

رشا :كافي طلعو كافي راح احرك روحي ..

طب سامر على عياطي ..

سامر :شبي صهيب شمسويلج هذا النذل ..

رشا :حطت امي ايدها على راسي حتة سامر ميشوف بس سامر جان اسرع منها وانتبه ..

سامر :رشا صهيب هوة سوة هيج موو . بعياط

رشا: كمت ابجي حيل ...

ام سامر :اذا سويت شي مارضى عليك .. اهدى خل نتفاهم .

سامر: شنتفاهم متكليلي .. والله اليوم اسبي سبايا ..
حاول يطلع امي تجرجر بي..

ام سامر :يمة لخاطر بنياتك لا توصخ ايدك بي خل يولي شعر ويطلع غيرة ..

سامر :صدك تحجين يمة شعر ويطلع شنو ... ولج هذا تعدة علينا احنة واذا مندمي عار علينة ..

ام سامر: يمة خايفة عليك اني ماريدك تتورط خل يولي ... والله البنية تروح سمعتها فكر باختك والله رجلها يعوفها ..

سامر :انعل ابو السمعة يمة هذا طوخها ..يومية مكابل البيت وكاعد من اطلع يسوي نفسة يتمشة وميدري اني مراقبة. ..
ادري ميت عليها شكو عفتها اريد اروح وافهم منة شيريد ..

ام سامر: يمة ارحمني ولا تموتني منين اتلكها لا تصير انت هم علية كافي علية هم ذولة والله كلبي خلص كافي رحموني وفكرو بية ..

رشا :جنت اسمع نقاشهم وابجي امي كامت تحجي وتدك على رجلها وتبجي ..دنك عليها سامر ..

سامر: يمة كافي لا تبجين انعل ابو لابو الجابة .. هاهية كافي اهم شي راحتك اوعدج بس اروح افهم منة شيريد واجي اشوفة  ليوين يريد يوصل ..

ام سامر: يمة اذا تحبني عوفة كافي خل تتزوج اختك وشتريد سوي بس خل يعدي هلشهر على خير ..

لا تكول لابوك والله يموت بيها تدري روحة برشا لا تأذي بيها ..

سامر :صار يمة حصبر منا لحد متتزوج رشا بس وغلاتج وغلات دموعج الي نزلت بسببة الة اندمة ..

رشا :حجة سامر اخر كلامة وعافنة وطلع ..بس مبين على اعصابة ..

يمة كافي لخاطري .. رحميني يمة لا انتي هم تزيدين قهري .. كافي عاد كاافي تعذبيني وتخليني احس روحي السبب ..

ام سامر: يمة تعبتوني والله احس روحي صدري انقبض علية حروح امدد اشوية تعبت ..

رشا :راحت امي واني ضليت وحدي .. تعبت ابجي تعبت انوح ..
..سهام اريد انام ماريد احد يكعدني لو لباجر ..

سهام: يلة حبيبتي نامي واني حنظف الغرفة ..

رشا :ماجاوبت كبل شلت الغطة. وحطيت راسي وغطيتة مدري غفيت او لا بس احس بسهام تنظف وتشيل الغراض والكزاز ..

جريتها نومة او شبه نومة بس مغمضة عيوني لثاني يوم والي حاول ايكعدني ماكعد اكولهم تعبانة فخلوني براحتي ..

نزلت ثاني يوم  الظهر جانو خواني طالعين لكيت امي كاعدة بالمطبخ ويمها البنات .. تلعبهم بيدها بس وجها متعوب وشكلها منايمة ..

طبيت عليهم .. كالت ..
ام سامر :ها يمة كعدتي ضل بالي عليج شلون صرتي بنيتي..

رشا :كعدت يمها بالكاع ومددت بحظنها ..زينة يمة طالما انتي زينة وراضية عني ماريد شي بعد ...

ام سامر :الله يكملج بعقلج ييمة كومي اكليلج لكمة مماكلة من البارحة ..

رشا :هسة اشوية واسوي لتخافين ..
جنت احاجي امي وامثل القوة واني داخلي منهار ..
وبس افكر احرك كلب صهيب اريد اعذبة ..
هواي اذاني بأسم الحب ..لا رحمني ولا رحم روحة وعافني بحالي ..

كمت سويت اكل لخاطر امي  سويتلي لفة جبن وحميت الجاي وكعدت اكل يمها صح مالي نفس بس ادري بيها تضل مقهورة اذا ما تتاكد من اكلي ..
وفعلا اكلت يلة شفتها فكت شوية ...

خلصت ورحت هيج افتر بلبيت ادور على شي يملي الفراغ الي احس بي .. ماكو شي يلهيني .. تنظيف سهام مكملة والغدة تطبخ بي ..

رحت طبيت سبحت لان من البارحة مسابحة
طبيت جوة الدوش واني ابجي بدون صوت خاف امي تسمع ... ضليت اتلمس شعري وابجي ازيد ..

كملت حسيت روحي رتاحيت اشوية استرخيت على المي البارد ريح اعصابي المشدودة ....

طلعت ورحت لامي كتلها ..
ماما خل نروح العصر للصالون اعدل كصة شعري مابقة شي للعرس ..

ام سامر :ماشي عيني بس كون هذا الشي يريحج ..

رشا: اي اكيد ..
ورة ساعة اجة ابوية والولد ابوية وعماد انقهرو على شعري لان عبالهم احترك وكصيتة ..بس سامر سودة علية شبع قهر والي لازمة امي حلفتة ميسوي شي الة ورة عرسي ..

كملو غدة وشربو جاي وكعدت وياهم ما بينت القهر البية .. تصرفت طبيعي ..

صار العصر واخذنة عماد للصالون ذبنة وكال ..

عماد :يمة حروح افتر بسيارة ومن تخلصون خابروني ..

ام سامر: يعني مراح تروح للمحروسة مو ..

عماد :يمة كافي لخاطر الله مشي اليوم حبابة ..

ام سامر: توكل ابني الله يهديك ويفك الي انت بي..

عماد :يلة من تكملون رمشو بس واني اجي ..

ام سامر :الله وياك دير بالك .

رشا :راح وطبينة للصالون عدلت كصتة سوتة كصة فرنسية الكدام طويل والورة قصير جان وكتها دارج
وموديلها كلش حلو والكل يسوي مثلها ..

اشوية رجعتلي الامل من شوفتني الصور وشفت روحي احلة بالشعر القصير ..

بس مو بيدي احب شعري احب اتباهة بظفيرتي ..
خلصنة ورمشنا على عماد عشر دقايق واجة .

عماد: يمة شنو هاي الكيكة فدوة لله ..

رشا :تسلم يعني حلو ..

عماد :والله خاف تزعلين بس احلالج من شعرج الطويل ..

رشا :انت هيج تشوف.

عماد :اي طبعا .. يلة صعدو ترة ابوية خابر وكلي مهيمن يمنا ..

رشا :تذكرت مهيمن الي تفلش الموبايل ومافكرت اتصل وشعري... ماعرف شنو حتكون ردة فعلة ..

وصلنة للبيت طبيت كبل للاستقبال وكام مهيمن يباوعلي باستغراب .. سلمنا رسمي ..وابوية كال ..

ابو سامر :بالعافية على كصة شعرج زايدتج حلا حبيبتي .. يلة اعوفكم اخذو راحتكم اروح اصلي ..اترخص

مهيمن :مرخوص عمي ...

رشا :طلع ابوية ..جان مهيمن يندار علية وتقرب يمي ..

مهيمن: ليش متجاوبين علية واتصل مغلق وشنو هذا شعرج ..

رشا: تلفوني انكسر وكع مني من جنت تدك علية ..

مهيمن: وماكو غير تلفون تدكين منة علية ..

رشا: الصراحة صارت وياي مشكلة والتهيت ..

مهيمن :وليش كاصة شعرج الة علاقة بالمشكلة هم ..

رشا: نزلت دمعتي واني اسولف .. شعري احترك بالطباخ وجان لازم اكصة .. واليوم رحت عدلت الكصة ..

لزم ايدي الي جانت تفرك وحدة بالثانية وكال..

ميهمن :فدوة الج تدرين هيج احلة جان الشعر مغطي جمالج ..الظاهر هيج راح تزيد غيرتي عليج لان صايرة مزة عراقية

رشا :يعني عجبك ..

مهيمن :والله كلش عجبني وعاشت ايدة للطباخ لو ماهوة جان ماشفت هلجمال هذا ..

رشا :بلعت ريكي ... خل اروح اجيبلك شي ..حاولت اكوم جرني وحضني ..

مهيمن :اووف ياحضنج انام واكعد احلم بي ..

رشا: اجة ببيالي صهيب شلون حصرني بالحايط وكص شعري .. كبل دفعتة وصحت لااااا .

مهيمن: شكو شبيج حبيبتي اسف مو قصدي بس مشتاقلج ..

رشا: كمت ابجي  .. اني اسفة مهيمن .. سامحني مادري ليش هيج سويت ..

مهيمن :تعالي حبيبتي انتي ...

رشا: رجع حضني وهلمرة اني الي جلبت بحضنة ..
حضنة جان دافي حسيت بي اماني .. شميت عطرة وحسيت شي بداخلي تحرك ..

ونظرتي الة تغيرت .. احساس معايشتة قبل ..
ضليت حاضنتة وهوة مكيف ويمسد بشعري ويشم بركبتي .. اندكت الباب اثنينة فزينة ..

خجلت وحمريت عزة شجاني هيج معت  بحضنة ..

مهيمن: كام يحمحم.. ويعدل بهدومة ويمسح كصتة الي صارت مي من التوتر ..

طب سامر وسلم على ميهمن واجة عماد هم .. وكامو يسولفون ويضحكون اني كمت اسوي لعشة ويا سهام ..

رشا: شنسوي عشة ..

سهام: كال عمي نجيب جاهز بس نسوي زلاطة ونحظر المواعين ..
شبي وجهج احمر ...اشجنتو تسووون هااااا.

رشا: شكو شجنا نسوي يعني

سهام :اممممممم امبين من وجهج وصفناتج ..
ولج شبيج هيج متأثرة خاف حبيتي..

رشا :والله شكلي وكعت بي .. مدري شجاني احساس من قربة يمي ..

سهام :واو صايرة تطورات من وراية ..

رشا :هههههه ماكو داعي كلشي احجي ترة وبعدين مكلتي صدك شعري حلو ومطلعني احلة من الطويل ..

سهام :اي والله اصلا جان الشعر الطويل مغطي شكلج..هذا احلة برز وجهج وملامحج ..

رشا: ابتسمت لا اراديا ..

سهام :اممممم الله يديمها ..

رشا: اووي دكافي غلطت وابتسمت ..

سهام :هههههههه والله مبينة عاشكة ..

رشا: اهو اروح احسن ..

سهام: خوش حجة حتة تروحين تكعدين يمة ..

رشا: دولي انتي مو مال واحد يحجي وياج ...
عفتها ورحت بدلت لبست تراك بس يكون طويل
وعدلت وجهي اشوية بس مبينت حاطة مكياج وشفت روحي صدك لايكلي ..

نزلت يمهم باوعلي وغمزلي بدون مينتبهون اخواني ابتسمت ودنكت ..

اشوية واجة ابوية رحت حضرت العشة ويا سهام بس موتتني .. بس تذب بسامير ..

سهام ترة اروح واعوفج ..

سهام :وشبيج عيني نغثيتي .. وتحرك بحواجبها ... شكلنة ..

رشا :اووووف الله يعدي هليلة على خير ..
كملنة عشة ورحت جبت الجاي وكعدنة نشرب ...

مهيمن :من رخصتك عمي بس جاي حتة اكلك انو العرس هلاسبوع لان تدري دوام عدنة ولازم نرتب وضعنة للدوام .

ابو سامر: والله المرة مرتك كبع واخذ اغاتي ..

مهيمن: متقصر عمي على راسي ..بس يعني جيت اشوف شكد يكلف الجهاز حتة باجر اجيب المبلغ وتبدي تجهز و الغرفة الي ختاريناها تقريبا كملت .... يعني هلاسبوع انشالله ويجوز للخميس التجي ..

ابو سامر: انشالله ابني انشالله ..

مهيمن :والله الكعدة وياكم حلوة اني اترخص .. وكام لحيلة

سامر :وين ابو الشباب بعد وكت تعال نلعب كيم طوبة ونركل ..

مهيمن :والله غير مرة تعبان كلش وباجر عندي طلعة اروح اشوف نواقص العرس ..

سامر: اها براحتك بس اطلبك كيم ترة ..

مهيمن :انشالله ... يلة اودعناكم .

ابو سامر: رشاوي بابا طلعي وصلي رجلج ..

رشا: اي بابا ..
طلعت ويا للباب الخارجي .. جان يكول ..

مهيمن :والله ابوج يفهم وصدك طلع حباب ..

رشا: ليش شلون عرفت ..

مهيمن :عرفني اريد ابوسج يلة اروح ..

رشا :يمااا عيب ..

مهيمن :هااا عيب .. لعد منو قبل اشوية لزكت بحضني ..

رشا: اووو لا تذكرني ترة اخجل ..

مهيمن :اروح فدوة للي يخجل تعالي ..

رشا :جرني وشبكني حيل وباسني بركبتي مدري شلون طلعت مني وبستة اني هم بركبتة..

وخرني وهوة متفاجأ ...

مهيمن :اكلج هاي صدك لو متوهم ..

رشا :خجلت ودنكت اسفة مدري شلون طلعت مني ..

مهيمن: يا اسفة غير شعلتي ابو ابوية ..دتعالي خرب يومج..

رشا :جرني وعصرني بحضنة وضل يبوس بية واني ادفع بي..
ولك كافي ... لا يجي احد ..

وخر مني ..بس عيونة مسبلة وشكلة بغير عالم ...
ضل يمسد بخدي ..

مهيمن : ولج شكد احبج شوكت يجي الخميس والكاج بحضني ..

رشا: انشالله يلة روح ترة تاخرت اني عيب من ابوية ..

مهيمن: رايح ياروحي ..مع السلامة ..

رشا: الله وياك ..
راح وسديت الباب واني ابتسم .. نسيت همي ونسيت صهيب وابو صهيب ...

ربي شديصيرلي ....
طبيت من باب المطبخ واني بغير عالم .. رحت كبل لغرفتي ... واني الفرحة عندي موطبيعية ..

سبحان الله... البارحة نمت واني ابجي ... واليوم الفرحة مسايعتني ..

نمت من الفرح من وكت ... كعدت الصبح تريكنا وخابرت امي ام مهيمن واتفقن على المبلغ واجتي امة واختة العصر وطلعنة نشتري الذهب ونتسوك ..

رحنا وختاريت على ذوقي للامانة جانو كلش كريمين ماخلو شي بنفسي ولا حسسوني بشي كلش حبابين ..

كملنة امي كالت ..

ام سامر: خل نمر نتسوك للبيت من عماد ..

ام مهيمن :وين محلة ..

ام سامر :هذاك السوبر ماركت الجبير.. ابو لافتة خضرة

ام مهيمن :اللهم صلى على محمد .. حلو بالعافية عليكم ..

ام سامر: بعد كلبي تسلمين .

رشا :رحنا طبينا وبدينا نتسوك اشوية واجتي ام سجى ووحدة وياها .. كرفن اشكال والوان .. يحيرن شيعبن ..

اني وامي صافنات عليهن  ام مهيمن واختة الي اسمها  رفل .. جانن مامنتبهات ..

ضلينا نباوعلهن اخذن يمكن فوك ال١٠٠ الف ..
اشو هذن راح بالعربانة وعبالهن عماد بالجياس وراحن بدون دفع..

امي شافت هيج ...

يتبع ...

تحياتي Aseel

لا تنسو التصويت حبايبي ..

احبكم 😍😍🙈🌹