رواية قضية طلاق الفصل السادس عشر 16 - بقلم Aseel🤗

مرحبا غوالي .

قضية طلاق ..

بقلم Aseel..

بارت١٧ ....

...........
رشا :رحنا طبينا وبدينا نتسوك اشوية واجتي ام سجى ووحدة وياها .. كرفن اشكال والوان .. يحيرن شيعبن ..

اني وامي صافنات عليهن ام مهيمن واختة الي اسمها رفل .. جانن مامنتبهات ..

ضلينا نباوعلهن اخذن يمكن فوك ال١٠٠ الف ..
اشو هذن راح بالعربانة وعبالهن عماد بالجياس وراحن بدون دفع..

امي شافت هيج ...كالت ..
ام سامر يلة خلصي واخذي شكد متريدين وكولي لعيالج حسابهم واصل ..

رشا :يمة بس احنة تسوكنة هواي خطية عماد .

ام سامر :اسكتي وسوي مثل ما اكلج ..

رشا :رحت على عمتي كتلها امي تكول اخذي بعد شكد متريدين وحسابج واصل..

ام مهيمن :يا خالة شهلزحمة ميصير ترة ابطل وارجعهن ..

رشا: لا والله خالة اصلا عيب تدفعين والمحل محل ابوية .. اعتبريها عزيمة وامانة اخذي كل الي تريدي واعتبري هدية من امي ..عربون محبة 😊

ام مهيمن :الله يحفظها الكم بجاه امير المؤمنين ..

رشا :تسلمين خالة ..
كملنة ووصلنا نحاسب امي كالت ..

ام سامر :ام مهيمن اخذي غراضج وانتظرونة بسيارة عما اسوي غراضي ناقصني بعد ..

ام مهيمن :يلة اني هم تعبت من الفرة حرتاح وانتي اخذي راحتج ..

رشا :ضليت واكفة انتظر امي شتسوي حتة احضر روحي وافاكك خاف تصير من الروس ..
. باوعتلة بنص نظرة كالت ..

ام سامر :عماد احسب الغراض شكد يطلعن ..

عماد :حساب نسابتنة ٧٥ الف ..وانتو ٨٣...يعني كلهن ١٥٨...

ام سامر: هااا يلة لعد عبيعن بجياس دنروح نتاخر ..

عماد :يعني شنو متدفعين ..لو بالبيت تنطيني ..

ام سامر :وليش انطيك ...

عماد :غير فلوس محل يلة يمة ماريد ملازم اذا ماعندج ..

ام سامر :لا شايلة .. بس ردت اشوفك تاخذ مني لو لا ..هاك (شمرت الفلوس بوجهه)الله لا يعوزني عليك حرامات تعبي بيك تاخذ من امك ومن ام السحورة متاخذ .. هاك لا هناك الله بيهن..

عماد: يمة انتظري تعالي يمة.. رشا فهميها ..

رشا :شفهم انت هنت امي والله يستر اذا شدت عليك الحرب حتة المحل هذا تطردك منة .. ماستحيت ..
تاخذ من امك وعمتك متاخذ منها ... وهاذ الخير كلة من ابوك مو منك عيب عليك والله ..

طلعت لكيت امي ترجف من الاعصاب لزمت ايدها كتلها .. يمة كافي خل نرجع للبيت ونتفاهم ..

ام سامر: راح يجلطني والله قهرني حيل هلكلب.

رشا :يمة كافي ترة انتبهو اكو شي..شوفي روحج شون ترجفين ..

رجعنا للبيت محملين غراض وباجر هم نروح نكمل النواقص ونشتري غراض للغرفة..

مر اليوم عادي ومهيمن قليل نلتقي لان اثنينة مشغولين بالتحضيرات .. بس خابرني كال جاب الغرفة وكاعد ينصب بيها ودزلي صورها ..

امي ماكالت لابوية على سالفة عماد .. مترسد تسوي عركة قبل العرس تريد بس عرسي يمشي وبعدين تكب العيطة ...

مر الاسبوع بسرعة .. محسينا لان جنا ملتهين ليل ونهار نكمل ..بداخلي احساس غريب لا هوة فرحانة ولا هوة مقهورة ماعرف شريد ...

اجة يوم الحنة وكعدت الصبح وهوسة وبنات عمي وعماتي وخالاتي وبناتهم الكل جاي .. ودك وركص من الصبح ... تريكت وياهم وسوالف وضحك وهنة يعزلن بالبيت وجانن يسولي كوشة للحنة ..يرتبن بالاستقبال ..

صارت ب٩ ونص رحت سبحت وبالحمام اشوف جسمي الوارم من الشيرة مال البارحة .. مو شيرة تعذيب جانت ..سبحت بمي بارد حتة يروح الورم ويخف .. كل جسمي يوجع ..

خلصت ورحت للصالون ..راحت وياي زهرة الي صايرة حلوة على خطوبتها الظاهر مرتاحة لان راجعة لحلاوتها قبل .. وحافة حواجبها لان جانت قبل يومين مشيتها وامها خلتها تعدل وجهها ..

كملت المكياج ولبست البدلة حتة تبدي تشتغل بشعري ..جانت بدلتي زيتوني وكلها ستن وبيها شغل تور من الصدر للخصر ونفشتها قوية كلش ..

جانت تجنن .. كملت وكعدت حتة تشتغل بشعر.. طبعا مالعبت بلونة لان مهيمن مقبل يحب لون وهوة بي خيوط شكار عبالك ملون ..

حطتلي خصل وطولت شعري وبدت تسوي تسريحة ..

تسريحتي صارت تجنن ولا عبالك مو شعري ..صدك فنانة بشغلها ..

كملنة واجة مهيمن بعد ما اختة رفل لان بس هاي الي بعدها ماعدها جهال يعني فارغة تجي وياي ..جانت اصغر وحدة وبكد تطلع ..

طلعنة الة جان لابس قاط نيلي طالع يخبل عليه كاعد فيت .. شافني وكلي

مهيمن : صعدي ليورة وانتي رفل تعالي بالصدر ..

رشا :ضجت من تصرفة وبينت زعلي بس هوة صلح موقفة كال..

مهيمن :والله لو بيدي احطج بالصندوك .. يمة مريتي شطالعة اليوم ..خرب غطي وجهج لا ننفضح ماريد احد يشوفج ..

رشا: ابتسمت .. وماجاوبت بس نزلت شالي على وجهي ..مشة بينا للاستوديو .. بس بداخلي فرحت بعد ماعرفت الي سواه غيرة مو فضل اختة علية ..

اخذنة صور وجان كل ما نسوي حركة يكرصني بزندي ويكول ..

مهيمن :اووف الله ارحم بحالي شيصبرني الباجر ..

رشا: لا تخوفني وتخليني ابطل هسة ..

مهيمن :دحرك ابوج غير..

رشا :وابوية شكو بالنص ..

مهيمن: هوة سبب عذابي مو كتلة نسويها حنة وزفة سوة مقبل .. الله يقبلها كدامي حلالي وانتظر لباجر ..

رشا :كملنة ورجعنا لبيتنة وراح لبيتهم...حتة يبدي الحنة مالتة ..

طببت واشتغل الدك والركص واجة هوة واهلة حنوني جانت مشاعري مختلفة .. احس بداخلي صدك فرحانة من اشوفة شلون يهتم باصغر تفصيلة بية ..
صح صهيب جان يحبني .. بس جان ميبين حبة كدام احد ... انما مهيمن مفضوج ..ولا عبالك اكو احد .. كلساع يبوس بيدي لو يوخر كذلتي ويكول ..

مهيمن :هذا كلة الية ..

رشا :كافي فضحتنا عيب..

مهيمن :والله شكيتي كلبي بالعيب مالتج.. بابا اني رجلج مو صاحبج ...بسيطة باجر اشوف العيب مالتج شلون يصير انتي حضن ومعتي ..

رشا :كافي مهيمن ترة زودتها حكوم جوة اطب ..

مهيمن: اي مو هية بكيفج ..

رشا :اجتي اختة اسمها غزل اكبر من رفل ..كومتنة نركص وجانو يصورون ..

تونسنة حيل بليلتها ..راحو واحنة خلصنة حفلتنة وبدلنة اني رحت سبحت وتعبت من البدلة والتسريحة .. نمت كبل بس سبحت وعلى المبردة ..نومة تجنن ..

كعدت ثاني يوم اخذنة سامر ..للصالون وكملنة واجة مهيمن اخذنة هم للاستوديو وهم مابطل حركاتة بس يتحارش .... جنت حيل اخجل منة بس حبيت حبة الي ..

رجعنة للبيت ذبنا وراح بس كال..

مهيمن :ب٦ الزفة حبيبتي تحضري ..وغمزلي ..

رشا :انشالله .. نزلت واستقبلوني بالجكليت والصلاوات..واشتغل الركص وصارت ب٦ وكلبي قبضني .. تذكرت ذاك اليوم المشؤؤم .. عبرت ١٠ دقايق كلبي راد يوكف .. صار يدك خوف وشفايفي يبسن .. وكمت ارجف وحصرتني بجية .. اكيد حيصير بية مثل هذيج زفتي ..

انتبهت علية سهام واجتني ..
سهام :اهدي شبيج رشا لا تفضحينا ..

رشا :ولج تاخر خاف مراح يجي .. ادري بروحي فكر ..هم حيعوفني .. انتحر والله اذا عافني هوة هم .

سهام :اسم الله شبيج ابيش مفاولة يجوز ازدحام ..

رشا: انشالله ... انشااالله ..يارب يارب.

سهام :خبلة والله ... شبيج اهدي عيب ترة حينتبهون عليج كومي وياي طبي للحمام خاف محصورة ..

رشا :اي والله محصورة حيل واستحي اكوم ..

سهام :يا وساكتة ووراج فرة طريق شطولة وين تتحملين كومي بسرعة قبل لا يجون ..

رشا :رحت طبيت للحمام وسهام ساعدتني بالبدلة ..

كملت ورجعت للاستقبال ومرت نص ساعة وهم ماكو..

كلت هاهية مابيها مجال بعد خل احضر دموعي وعياطي..والنسوان كامت تتبسبس علية ..

اشوية وكلبي رجف وبطني لوتني واحس دكات كلبي ببلعومي من سمعت صوت المزيقة والدمام .. والهوسات مال ولد ... (عريس وربعة يزفونة )

فرح كلبي لان مافشلني .. اجة هوة وقاطة الاسود وقميصة الابيض ورباطة .. اجة عمي سلمني الة لان ابوية مااتحمل يسلمني بيدة .. اجو اخواني سلمو علية واني ماصدكت جنت حابستهن كوة ..

كبل اطلقت العنان الهن .. وسمحتلهن ينزلن ..
طلعت واني ادور على ابوية بعيوني ..شفتة سودة علية بالمطبخ واكف وعيونة حمر وامي يمة مغطية حلكها بربطتها وتبجي ويا ..

رشا :مهيمن خل اسلم على امي وابوية ..

مهيمن :وينهم اني هم ادور عليهم ..

رشا :بالمطبخ .. رحنا وسلم عليهم مهيمن واني سحلت روحي سحل ..شابكتهم وابجي بكل حركة كلب ..

ام سامر: يمة كافي لا يخرب مكياجج كافي نجيج الصبح .

ابو سامر :بنيتي لا تفشليني سمعي حجاية رجلج لااخليهم يكولون ماعرف يربي ..

رشا :حشاك يابة .. ارضو علية ..

ابو سامر :الله يرضة عليج ..مهيمن صارت امانتك ديربالك عليها هاي رشاوتي ..حطها بعينك هاي عزيزة ابوها ترة هواي شافت ضيم

مهيمن: بعيوني عمي هاي مرتي وام بيتي اصونها وادللها مثل مجانت يمك..

رشا: اخذني. واهلة يهوسون

(نتشكر من كالو اخوها .. نتشكر من عمها وابوها )

طلعنا من بيتنا واني اودع طفولتي وذكرياتي الحلوة والمرة بيها حتة حب عمري شمرتة وراي بهذا البيت ..

طلعنة من بيتنا واشوفة واكف ولازم شي بيدة ..

وصلنة يمة وجان اشوف ظفيرتي بيدة وحطها على خشمة يشتم بيها ..وعيونة دم حمرة .. رفع ايدة واشرلي بعلامة مع السلامة ..

مهيمن مجان منتبه لان جان يسولف ويا السايق ..

وطول الطريق يلزم ايدي حتة يهديني ..واني ابجي همزين المكياج ميسيل والا جان صرت فلم رعب ..

وصلنا للفندق .. طببوني للغرفة جانت غرفة وحمام يعني مو سويت ..

جابولنة العشة ومهيمن كال..
مهيمن :بعد لحد يدك ترة مافتح اريد اشبع بمريتي ..

رشا: يمة من يمي متت خجل..
اجة تقرب علية ورفع البركع من راسي صلى على النبي..

مهيمن: رشا واخيرا صرتي مرتي..

رشا: باسني براسي ونزل على خدي ورفع راسي بطرف اصبعة من حنجي وباسني بحلكي بوسة خفيفة ..

مهيمن: هاي الحمرة خما تطبع ..

رشا: لا ثابتة ..

مهيمن :ها يعني اقوي بوستي ..

رشا :ضليت صافنة على جفصتي ... لا مو قصدي .

مهيمن انتي انطيتيني الضوة الاخضر بعد ..

رشا ةلا بس .. بعدني ممكملة جرني ببوسة وتعمق وتفنن بيها دخت وانسطرت بيها..

وخر مني وكال ..

مهيمن: بدلي وروحي توضي حتة نصلي .. قبل لا نسوي شي حتة الله يباركلنة بيها ..

رشا:رحت بدلت بالحمام وستحيت اكلة ساعدني المهم اتهرب منة .. دك علية الباب.

مهيمن :تريدين اساعدج بالبدلة ..

رشا: لا نزعتها ميحتاج ..شكرا .

مهيمن: كلت اساعدج خاف متكدرين ..

رشا :لا كملت ..بدلت ولبست تراك نوم يصير ربع ردان ابيض فانيلة وردانة تول والصدر من فوك هم ..

والبجامة عريضة من جوة .. غسلت وجهي وتوضيت ..

وطلعت لكيتة واكفلي كصني من فوك ليجوة ..

مهيمن :لا مبين راح اصبر لورة الصلاة ..

رشا: رحت لست ايزار صلاة لكيتة بالكنتور محضري وسجادتين وقرائين ثنين.. وهوة راح اتوضة واجة

وكف هوة واني وكفت وراه وصلينة ..

كملنة الصلاة وكلي تعالي نتعشة اني جوعان ..
حضرت العشة اني وياه بالكاع .. وفتحنة السفريات وطلع كباب وتكة يعني مشويات وزلاطة واهم شي العشق ببسي...

كملنة اكل واني ميتة خجل شراح يعدي هليلة على خير ..

همسلي بصوت رعبني ..

مهيمن :يلة ترة الجماعة ينتظرون ..

رشا :ها يا جماعة ..

مهيمن :هههههه شبيج انتي .. غمزلي .

رشا :يعني شتريد ..

مهيمن :لبسي الي موجود بالحمام عجبني ..

رشا :جان يقصد سيت نوم العرس جان قصير ومشلتح اصلا بس خيوط وتول ومقشمرين على روحهم حاطين ستن لطعة بس ..عود للستر ..

ماشي ...

مهيمن :يلة انتظرج ..

رشا :جنت انت عندي فكرة شيصير عن ليلة العرس والبنات ماقصرن شرحنها بالقلم العريض .

طبيت للحمام ارجف من الخوف .. لبستة واباوع على روحي بلمراية عززة خو انزع على وجه ..

حاولت اطلع ولفلفت روحي بالروب مال سيت جان تول شفاف .. بس اقشمر روحي ..

افتح وارجع اسد .. صاحني ..

مهيمن: يلة تعالي ... لو ناوية تباتين بالحمام ..

رشا :اي اي جاية ..
تجرأت وطلعت اقدم خطوة وارجع خطوة كوة وصلت ..
شفتة نازع باقي بس بالداخليات ومشغل الكلوب الاصفر الخافت مال تيبل لامب ..

اني شفتة هيج وهوة شافني .. اني طفرت للحمام ..
عززة صارت صدك .. قفلت الباب علية ..

دك الباب علية ..

مهيمن: رشا طلعي بلا لعب جهال انتي مو صغيرة ..

رشا :ما والله اخاف ..

مهيمن: طلعي ماسويلج شي بس نسولف ..

رشا :احلف بداعت بنتك واني اطلع ...

مهيمن :رشا كتلج مااسوي شي طلعي واذا سويتلج شي غصب عنج شتريدين سوي ..

رشا :مااطلع اريد ارجع لاهلي ..

مهيمن :رشا انتي مو طفلة خلصي الناس ينتظرون ..

رشا :انت كلت مااسوي ليش تجذب ..

مهيمن: رشا بديت اعصب ترة كتلج ماسوي شي غصب عنج ..

رشا: ماشي روح واني اطلع وراك ..

مهيمن :راح اروح للفراش احسب للعشرة اذا ماجيتي اكسر الباب ..

رشا :اي ماشي والله

مهيمن :يلة رحت ..

رشا :طلعت على كيفي.. والخوف والرجف عندي مو طبيعي ..

وصلت للفراش لكيتة ماكو محسيت غير حاوطني بيدة من خصري ودافن راسة يشتم بركبتي ويهمس بصوت كلش رومانسي ..

مهيمن :ليش تشلعين كلبي مو تدرين ميت عليج ..
حبيبتي ... وحياتي انتي . احبج واموت عليج ..
مامصدك انتي يمي .. اذا حلم اتمنة مااصحة منة .

رشا :ضل يبوس ويسولف وياي يحاول يهديني لان شافني ارجف ..

مهيمن :ليش هيج متقلصة انداري علية ..

رشا :دارني عليه واني مدنكة اخاف ..
باسني من حلكي بوسة خفيفة .. يبوس ويوخر ..

شافني مااتفاعل ويا ..
كعد على الجرباية واشرلي اكعد يمة ..

رحت كعدت .. وخر شعري عن خدي وباسني وايدة تتلمس ضهري ..

ضل يسوي حركات جبرتني اتفاعل ويا ...
.....(شكو داحسين راسكم .. عيب عرسان )...

....................

كعدت ثاني يوم على بوسات بجتفي خفيفة ..صحيت شفت روحي نايمة جانبي على ايدة وظهري صاير على صدرة .. وايدة الثانية. حاطها على خصري حاضني بيها ...

رشا: صباح الخير ...حجيتها بدون مااتحرك ..

مهيمن :.. ياحلى صباح وياج ...

رشا :خل اكوم اسبح لا يجون ..

ميهمن :ماشي بس تعالي اشوية شتاقيتلج ..

رشا :لا مهيمن كافي والله تعبانة ..

ميهمن :هوة بكيفج ......

رشا: كملنا .. طبيت سبحت وطلعت لافة روحي بالمنشفة تلكاني وغمزلي ..كال ..

مهيمن :شلون بلتتحارش ..وتريدني اعوفها ..

رشا :اهو مهيمن كافي شبيك نرجع للبيت والله كريم ..

ميهمن :كلمة رجال ..

رشا :ههههه انت بكلشي تاخذ الي يعجبك ..

ميهمن :اروحلج فدوة .. يلة كملي ترة خابرو راح يجون هسة دقايق ..

رشا: ماشي .. رحت بدلت لبست فستان ابيض مال هيج يوم .. ومكيجت مكياج حلو يوالم ويا ..وسويت شعري برم خفيف ويا كصة شعري صار يجنن

انتظرتة يكمل وجابو الريوك مال فندق اكلنة اشوية
واجو حتة ياخذونة رمشولة ونزلنة ..

اخذونة الطريق كلة هوسات وهورنات عبالك زفة ..
جانو كرايبة كلهم جايين نسوان وزلم .. ماعرف اذا جانت هاي عادتهم لو لا..

وصلنة لبيتهم وجانت هاي اول مرة اشوفة .. ابد مجاية ..

جان بيت حلو طابقين وجبير يعني بيت العائلة ..

تلكوني اهلة بالهلاهل والرمي بس ثواني وشفت دم طفر على فستاني ..

عطت بدون ماعرف شنو ..
عيوني غوشت ومحسيت بعد ..

فتحت عيوني جان مهيمن يوجهي ويسولف وياي .

مهيمن: رشا حبيبتي اصحي ماكو شي هذا طلي ذبحو ..

رشا: يعني مو دم احد ..

ميهمن: كومي ولج فضحتينا شكد فاهية ..

رشا :كمت كوة بس دوخة بية ..هبطت عبالي مهيمن لو احد تصوب بسبب الرمي جان مو طبيعي ..

كعدن النسوان يمي ومهيمن طلع للخطار بالاستقبال يباركولة ..كلساع جاية مجموعة وابوسهن وكل وحدة متشبع الة سبع بوسات ثمانية ..

حتة حلكي صار مر من كثر البوس .. وشفتي احسها بيها هوة شرجي ...انعوجت ...

اشوية وصعدوني لغرفتي حتة ارتاح ..
طبيت للغرفة تجنن نفس الي ختاريناها صاج عراقي بتصميم تركي .. جانت الوانها خرافية ..

والفرشة والفراشات والزوالي كلهن اختياري ..

مرتبيها مثل ماتخيلت حتة التحفيات مترتبات بطريقة اني مافكرت بيها .. صدك مبين ذوقهم حلو. ..

عافني وراحن اني مددت اشوية ارتاح جان يطب مهيمن ..

رشا: ها شكو ..

ميهمن: بلة هاي حجاية تنكال لرجلج بمصباح عرسة ..

رشا: ههه اسفة بس انت سويتلي رهبة من وجودك ..
اجة اقترب يمي ومدد وحاوطني بايدة ..
وقرب حلكة يم اذني وصار يحجي بصوت همس ..

ميهمن: اي احجي ليش صارت رهبة ليش شسويتلج

رشا :اووه ميهمن مو وكتك هسة واحد يطب ..

ميهمن: مو لازم كاعد ويا صاحبتي ..وبعدين قفلت الباب..

رشا :شوكت اشو ماشفتك ..

مهيمن: من طبيت جنت اسولف وياج وانتي مانتبهتي حايرة بالرهبة مالتج ..

رشا :وهسة شتريد يعني .. واذا الباب مقفول .. ترة والله استحي اسبح كدام المجاميع الجوة ..

ميهمن: والله عمي انتي تفكيرج فاسد بابا يعني هسة اني من اجي يمج يعني اريد شي والله جيت اشوفج وارجع لان خطاطير بعدهم بس تحججت بجكايري ..

رشا :بس انت مدخن ..

ميهمن :لعد ابيش اتحجج.

رشا :ههههههه والله ضحكتني .. لهدرجة متوازي تشوفني ..

ميهمن :غير اموت عليج .. ومارتويت بعدني ..

رشا: فتحت عيني ... كل هذا ومارتويت ..

مهيمن: ليش اني شسويت ولج ..

رشا: لا هيج ... اندكت الباب ... صاحولة ..
فتحها وطلع .. كمت عدلت وجهي وحمرتي الي مسحها ببوساتة

اشوية وطبن اخواتة ..

يتبع .....

تحياتي Aseel

لا تنسو التصويت حبايبي ..

احبكم ..