رواية قضية طلاق الفصل الثالث والعشرون 23 - بقلم Aseel🤗

مرحباااااا شلونكم ..

قضية طلاق ..

بقلم Aseel..

بارت ٢٤...
_________

رحت وكفت على السنك لكيت مواعين مدري منين مع العلم نظفت وصعدت ..

دغسلهن احس نفس حار وراية انداريت لكيتة سلام واكف بظهري ..

سلام :اسم الله شبيج ..بس اريد اغسل ..

رشا :تفضل عفتة وصعدت لغرفتي .. صوجي نزلت
طبيت للغرفة وكلبي يدك سريع من الخوف ..هذا الكلب خرعني ..

ضليت بالغرفة لليل لحد مااجة مهيمن .

ميهمن: هاي حبيبي شو هنا ..

رشا: مانزلت انت مو كتلي لا تشوفين وجهج لسلام ..
وهوة بالبيت ماريد اتصادم ويا .

مهيمن :يلة تعالي ننزل حتة نتعشة جبت عشة وياي ..

رشا :ماشي حبيبي روح واني اجي وراك ..

مهيمن: لا ننزل سوة يلة .

رشا: ماشي ...
نزلنا وبوجهي للمطبخ .. حضرت السفرة وسويت زلايط وحضرت كلاصات ..

اجة مهيمن اخذهن .. فرشو بالصالة ..
رشا: مهيمن اني ماريد اتعشة مارتاح بوجودة اللكمة متطب .

مهيمن :كعدي بسدي ولا تباوعين عليه .. تحملي ياروحي عيب من اختي خطية وين تروح ..

رشا :تمام .. اغسل واجي ..

مهيمن: يلة حبي راح احجزلج بصفي ..

رشا :غسلت ورحت كعدت يم مهيمن وهوة جان كاعد بصف مهيمن بالجهة الثانية .. يعني مهيمن حاسب حسابة لكلشي بحيث ميكدر يسوي شي لو يباوع ..

كملنة عشة وراحو الولد بالاستقبال ...

عزلت المطبخ .. واشوف عذراء تطب وتطلع تنافخ ..

رشا :شبيج عذراء محتاجة شي..

عذراء: هاي لعايزة انوب .. بكيفي بيت ابوية شريد اسوي..

رشا: شبيج اني شحاجيتج .. كتلج محتاجة شي ماكتلج ليش تفترين ..

عذراء :عوزج حتة مااكلب البيت عليج .

رشا :عذراء شبيج .. اسفة يلة اعتبريني محجيت شي ...

عفتها ورحت صعدت ...قهرتني الحقيرة ..

مدري شبيها فيوزها ضاربة كامت تشمر حجي عامي شامي ..

رحت نيمت ريم وغطيتها وطلعت وبعدين غسلت وتحضرت لمهيمن ....

اتاخر لل١ يلة صعد .. كبل لف راسة ونام ..

رشا :هنودي .. حبيبي.

مهيمن : همممم ..

رشا: شبيك حبيبي ..

مهيمن: مابية شي بس نعسان ومالي خلك ..

رشا: شبيك يعمري.انتة.... منو وياك حاجيني ..

مهيمن :رشا عوفيني هسة من اهدئ اسولفلج كلشي ..

رشا: دنام حبيبي ...
مدد بحضني وضليت العب بشعرة لحد ماغفة ..

ملامحة مبين عليها مزيج بين الحزن والغضب والهم ..

معرفت شبي ... اول مرة يصعب علية فهم مهيمن ..
حضنتة ونمت ..

كعدت ثاني يوم نفس الروتين اكعد اول وحدة ...
احضر الريوك واكمل الشغل بين ميكعدون حتة بس يتريكون اني اغسل المواعين واسوي غدة ..لان يتاخرون بالكعدة واني متعلمة اكعد الصبح ..

كملت ونزل مهيمن وصبح علية ..

واشوية اشوية التمو ..

بس انتبهت طول الكعدة محد حجة ياكلون بهدوء ..

كملنة ومر اليوم عادي ..

مرت يومين نفس الحالة ..
بعدين اخر شي من صعدنا دنام ..

رشا :مهيمن حتضل هيج .. احجي شمضوجك ياعيوني ..

مهيمن: تعبان يارشا .. حاير منين ماجيبها سودة مصخمة ..

رشا :اسم الله شبيك حبي..

مهيمن: .. تدرين عذراء شتريد ..

رشا :شبيها ..

مهيمن: تريد تسكن ويانا تكول الي حصة بالبيت وتريد تجيب رجلها ابو النسوان ويانا ..تعبت لا بيدي اكلها لا لان بيت ابوها .. ولا اكدر اكلها اي لان رجلها مو راحةويومية حيجيبلنا طلابة ..

رشا: زين ليش متبني بالحديقة الي ورة البيت كلش جبيرة وهم ينعزلون عنة ..

مهيمن: عبالج مافكرت بيها .. تدرين شتكلي..

رشا :شتكول ..

مهيمن : تكولي شنو تريد تخلي بيت شكبرة شكدة لمرتك هم ياريت عندك ولد شي حتة نكول ميخالف هية بس بنية وباجر تتزوج تبقة انت ورشا بي..

وامي اذا تمرضت منو يداريها وانت ومرتك دوامات ..

رشا :لهدرجة حاقدة علية والله مامسويتلها شي..

مهيمن :رجلها يوسوسلها والة هية ماعدها هيج سوالف بس من تزوجت سلام انجلبت ..

رشا :زين امك شتكول ..

مهيمن: ماتقبل امي لان تعرف رجلها مو راحة بس كالت خليهم هنا فترة لحد ماتصفة ...

رشا :عذراء درت بقرارك ..

مهيمن :اي درت وكلبت وجهها علية هية ورجلها فوكاها هية ام الراهي دنكللها يابة مرتي غريبة ميجوز يكعد ويانا ..

تمد لسانها شطولة وتلعلع خايف على ست الحسن من حورها من جمالها هلعاقر لو بيها حظ جان خلفتلك ولد يسند كبرتك ..

والله عمي حقها عمتها متريدها مجنت متصورها لهدرجة وكحة..

رشا :عوفها حبيبي على الله هية تصفى ..

مهيمن :المشكلة اخاف تحاربج الج حتة تخليني اقبل.

رشا: حبيبي الله موجود وانت هم ..لتخاف علية اتحمل كلشي منها لعيونك ..

مهيمن :اروح فدوة لعيونج .. كومي طفي الضوة وتعاليلي مشتاقلج صارلي يومين مامرتوي منج ..

رشا: انت الي مالك خلك والا اني انتظرك...بس انت تجي كبل تنام ..

مهيمن: وهسة منتظرتني لو لا ..

رشا: لا ..

مهيمن: تعالي احاجيج لعد ..
..................

مر كم يوم والوضع كما هوة .. محد يحاجي الثاني ..
وفعلا كلام مهيمن كامت تحاربني ..

توصخ البيت وتعوف المواعين بالسنك ..من انظف واصعد بليل اصبح الصبح ماكو ماعون نظيف .. حتة عمتي كلبت علية ..

خواتها من يجن جيتهن خفيفة ياكلن حتة مواعينهن يغسلنهن الا هاي .. شادة وياي حييل ..

واكثر من مرة يحجن وياها حتة تشيل وصخها بس ماكو ويا حايط ..بس تكتفي تكول ..

عذراء :والله بيت ابوية اجي بي معززة مكرمة ..
شريد اسوي عسما افلشة هسة محد يحجي..

رشا :اسمعها واعرف قصدها تسمعني لان عبالها اوصل الحجي لمهيمن ..

فديوم نزلت بليل للتواليت ..

سمعت صوت بغرفتهم وسمعت اسمي بالنص ..
ماجذب واكلكم ماصار عندي فضول حتة اسمع..

سلام :دصيري مثلها شوفي شلون تهتم بروحها ..

عذراء :طبعا تهتم لان لا خلفة ولا شي حتة تركض وراه وحتة ريم كلة على امي ..

سلام :عوفج من الخلفة هسة هم شفتيها فديوم ضلت على نفس لبستها لخاطر الله يومين صارلج بنفس الدشداشة هم الواحد تبزع روحة ..

عذراء :يعني قصدك وصخة اني ...وهذيج نظيفة ..

سلام :مادكلج وصخة بالعكس ريحتج طيبة وتخبل بس هاملة روحج اشوية اني هم الي حق عليج اريد اشوف مرة تهتم بية.. والله عمي هنيالة مهيمن ..

عذراء: انت شنو بس لا حاط عينك عليها ترة افكسها لعينك ..

سلام: دنامي نامي .. .

عذراء :نام انتة ..
........
رشا :ركضت كبل للحمام قبل لا تطلع ..
عزة هذا منتبه لكل تفاصيلي حتة لهدومي ..هذا يخوف صايرة ..
اشوف عذراء شادة وياي اثاري يقارنها بية ..

كملت عسريع وطلعت .. وكبل بوجهي للغرفة بس شنو احس كلبي طبل من الخوف ..

ثاني يوم قررت اروح لاهلي مرايحتلهم من زمان من السبعة مال عماد وهم طلعت سم ورجعت ..

مهيمن وصلني بعد ماستأذنت من عمتي ورحت

ذبني بباب البيت .

رشا: لعد.متنزل ..

مهيمن: لا من اجي اخذج اسلم عليهم هسة عندي شغلة مستعجلة وهم دسوي اوراق التسجيل مال ريم احضر كلشي حتة الصبح كبل اروح اقدم

رشا: ديلة حبي على راحتك
نزلت وهوة راح ..

طبيت للبيت جانت ساعة تقريبا ب١١ ...
كبل فتحت الباب وطبيت .. دخلت للمطبخ هدوء والاكل يتهدر .. دكيت الباب .. واصيح ..

رشا :يااهل الدار .. متريدون خطار ..

طلعتلي سهام تتلكاني مثل عادتها ..بوستها وطلعت امي هم سلمت عليها..رحت بدلت وجيت ..

كعدت على الميز .. ويسولفن ..

سهام: ماكلتي حماتج شوكت تروح لعد ..

رشا :يمعودة سكتي لا تذكرني كلبي خلصان لعبت خلقة بية ..

ام سامر: ليش يستار شكو ..

رشا: يمة موتتني .. بس تناكر وتبسمر ..
والوصخ لا كلج ولا تكليلي ريم انظف منها والله جزعتني

ام سامر :يمة تحملي بيت ابوها يعني المرة شعدها غير بيت ابوها بعد بيت رجلها تروحلة ..

رشا: يمة هية اتحملها بس رجلها مو راحة عوينجي حسرة علية افوت من يمة يفصلني تفصال حتة اكلي قل من وراه لعبها لنفسي .. .

سهام :يمعودة هونيها تهون .. خليها على الله تصفى متضل هيج ..

رشا :انشالله ...
صبتلي جاي .. وكعدنة نشرب ..

رشا: لعد بناتج وين مالهن حس ..

سهام :مكابلات طيور بيبي وخانسات عليهن .

رشا :فدوة لطولهن ..

سهام: شالعات كلبي ديطلعلهن سنون وبس سهال موتني ..

رشا :مو كتلتي روحج على الجهال ..هذا الجاهل ..

سهام :يمة اتحمل كلشي منهن ولا لوعة ال٥ سنوات..

رشا: الحمد لله الله عوضج بيهن وانشالله يزيدون بعد ..

دنحجي ونزلت سجى لازمة بطنها والايد الثانية ظهرها ..

شفتها من بعيد ..

لا تكلولي سجى حامل ..

سهام: اي شمدريج ..

رشا :ضحكت .. ولج لازمة ضهرها .

سهام :ولج البارحة حللت ..وطلعت حامل .. حتة بعدة الطفل نقطة ..

ام سامر: يمة عوفنها ختولي لتحطن بالجن وياها .تروح تشد وياجن ..

رشا :ضحكت من تقربت علية وسلمت ..

سجى :والله البارحة متت تقلصات مال حمل كتلتني ..ولا نمت ..

رشا: بالخير عليج الحمل بس بعدج وينج وين التقلصات ..

سجى: وانتي شمفهمج .. دحبلي وشوفي شلون ..
ولو نسيت انتي متخلفين ..

رشا :منو كلج ماخلف يمة .. ترة مابية شي اني ماجلة الموضوع لحد ماخلص دراسة ..

سجى :اي خطية صدكت ..

رشا: عافتني وراحت تسوي ريوك .. مدري ريوكيش ب١ ..

بس قهرتني .. انهضمت حيل بس مابينت ماريد اخليها تتشمت بية مثلت القوة ..

اجة ابوية .. وراها خواني .. والتمو صبت امي وسهام الغدة .
جان تشريب لحم وتمن برياني ..

تغدينا وشربنا جاي ..صعدت فوك ..وكعدنا اني وسهام ..

رشا :ماكلتيلي شسويتو وراية من رحت بالسبعة ..

سهام :يمعودة بالكوة نسيت زين ماانجلطت وراج ..

رشا: ليش شصار ...

سهام :هوة مو اول شي من طبت امها وخالاتها وبناتهم ..هاي من كامن يعيبن على الغرفة وليش مو هيج وليش هيج ..

انتي من جنتي موجودة وكبت العيطة بين عمتي وامها لان ممودية بنتها لصالون على ابو احنة ناس يجونا عالم وتالي بنتي تطلع مرايحة صالون ..

رشا: اي ادري لحكت على هاي الهوسة بس وراها ماكتيلي شصار ..

سهام: دصبري جايتج بالحجي..

بعد مافضت السبعة انتي رحتي مالحكتي ..
اشو امها من طلعت كومي واخذي نص الهداية وياج ..

عمتي وكفتها ..

ام سامر :عيني بلا زحمة شلون تاخذين هذن لغراض هذني هداية عرس ابني ..

ام سجى :والله هذني كرايبي جابوهن مو كرايبج معايزين عليها .. واني الي اوجب كرايبي .. لذلك اخذهن على الاقل مستفادة من واجبي ..

ام سامر: ترة اني معايزة عليهن. بس عيب على الاقل ورة السبعة هية ترجعهن الج اذا كاتلة روحج على الواجب ...

ام سجى :وانتي شكو بنتي ام الانة قبلت ..

ام سامر :والله عمي حقج علينة .. اسفين .

سهام :عافتها عمتي وطبت وهذيج طلعت
.

رشا :صدك عود .. يعني اخذت الهدايا مال السبعة الي جابوهن كرايبها .

سهام :اي والله هسة روحي وطبي لغرفتها بس هداية كرايبنا موجودة هاي اذا مو هم اخذت منهن .

رشا: يمعودة العينة فارغة ميترسها بس التراب ..

سهام :بس تعالي كليلي .. شنو سالفة رجل حماتج

رشا: ولج بزعت متت من التقيد وين ماروح الكاه بوجهي .. وانوب اخاف اكول لمهيمن لا تكب العركة وتعالي شيخلصني انوب ..

سهام :رشا اذا يتحرش بيج لا تسكتين عسما تصير دم ترة لازم تكولين لمهيمن عليه خاف يذبولج تهمة ..

رشا اني هم اكول هيج بس هوة يدري بي عوينجي ..
ولج تصدكين كل مااوكف على السنك الكاه وراية واكثر من مرة يطخني ويسوي نفسة يغسل .

سهام: وانتي مكيفة .. بابا هذا يجيبلج تهيمة وخاصة هسة مسوين عليج حرب .. ديري بالج لا يذبولج تهمة يخلون مهيمن يطردج حتة يعشعشون بالبيت ..

رشا: اووف اني ادري منين طلعولي هذولة مو جنت مستقرة ومرتاحة لازم تطلع من خشمي الراحة ..

سهام: الله كريم تفض .. بس لازم مهيمن يعرف كلشي ترجعين من عدنا تكعدين ويا تكتيهن كلهن ..بس لا تكليلة يطخج لو شي يروح يكتلة ويتورط بي.

رشا :انشالله الله كريم ..
...
خلصت اليوم عادي يمهم واجة مهيمن بليل حتة ياخذني ..طب جوة وسلم وكعد وسهام راحت تجيبلة الجاي ..

اشوية وطبت سجى .. اشو ضاربة المكياج واللبس والعدسات ..
مهيمن دنك بعد ماسلم ..

اجت سهام جايبة الجاي وقدمت لابوية ولمهيمن ولاخوتي..
من وصلت لمهيمن كاللها ..

مهيمن: رحم الله والديج ام زهراء ..

سهام: ووالديك ابو ريمة ..

سجى :صدك مهيمن مابباركتلي .. اني حامل ..

رشا: ضلينا اني وسهام وحدة صافنة عثانية يعني شجاب السالفة بالنص .

ميهمن: بالخير عليكم انشالله ..يتربى بعزكم .

سجى :يوم الالكم .. اووه نسيت رشا متخلف .

مهيمن: ليش العفو شبيها احد كلج بيها شي ... ترة رشا تعالجت بس اني مانعها من الحمل حتة تكمل دراسة وتصير احسن من عندي حتة ..

ورشا عندي تسوة ابو الجهال مو بس الجهال ..
واذا اريد طفل فعندي رشا وريم احلة من كل الاطفال..

يلة رشا كومي .. ماضل وكت .

ابو سامر :وين ابني توك طبيت ..

سجى :ترة مو قصدي دشاقة ترة والله .. لا تزعل فدووة (طبعا تتموع بالحجي وتجر المصارين وياها)

مهيمن: مزعلان من شنو ازعل محد يسوة يزعليني ..
خلصتي حبيبي..

رشا :اي كملت عيني يلة ..
طلعنة وحتة سودة علية جاية مشربة ..

طول الطريق وهوة ساكت .. بس حاط ايدة وعاضها بحلكة ..

رشا :مهيمن لا تضوج فدوة ترة تعودت اني ..

مهيمن: ترة اني مضجت من هاي .. ضجت علمودج ..

رشا :والله ماتأثر بية بس لا تضوج حبيبي..

مهيمن: الله كريم ..

رشا :وصلنا جانو كلمن بغرفتة صعدت فوك .. غسلت وبدلت وانتظرت مهيمن....

مر كم يوم .. الحياة نفسها روتين والخوف يزيد من عذراء وزوجها ..

فبيوم كملت شغلي مثل عوايدي جانو الكل نايمين الظهاري ..بعد ماتغدو ..

شفت الحديقة والطرمة وصخات لان قل غسلي الهن من يوم ماجوي عدنا ..

رحت طلعت عدة التنظيف .. رفعت دشداشتي اشوية حتة اتحرك براحتي ..

نظفت الحديقة وسكيتها ..وبلشت بالطرمة ..

لهناك واندار على صوت عذراء من شباك الاستقبال المطل على الطرمة ..

عذراء: ايا حقير يا نذل عليمن تباوع ..
على عرض اخوية ...

رشا :هية ثواني من سمعت صوتها ومن جتي تجر بشعري ..

عذراء :ياطايحة الحظ .. تسوين اغراءات ..يالشريفة.
ولج اخوية ميقبل يبقيني من وراج يخاف عليج وانتي تستعرضين كراعينج ..

رشا :دفعتها ووكعت بالكاع ..احترمي نفسج .. استعرض شنو فد نعال هوة حتة استعرضلة ولج ميوصل لتراب نعالة لمهيمن ..

ضبي رجلج مو كادرة علية ..

سلام :لج احترمي نفسج لعد لما انتي جتني تغمزين وتبتسمين كل متشوفيني اباوعلج من الشباك ..

رشا :لطمت على وجهي .. عزة العزاك ولك هاي شوكت يا حقير..

عذراء: ها يالشريفة ..

رشا :حاولت تلزمني دفعتها وركضت للغرفة وقفلتها علية .. ادك على مهيمن مشغول ..

وكتك هسة ... ضليت ادك وادك اخر شي رد ..

مهيمن :الو ها رشا

رشا: مهيمن الحكني .. عذراء راح تكتلني ..

مهيمن :خير شكو شبيكم ..

رشا :الحك وانت تفهم بسرعة حباب ..
كامت تدكدك وتعيط ..

عذراء :افتحي يا ام الزلم ..

مهيمن :جايج جايج لا تفتحين الباب.

رشا: سمعها لعذراء لان جان صوتها يلعلع....
ضلت يم باب الغرفة متحلفتلي دقايق واسمع صوت مهيمن فتحت الباب ..

لكيتها بوجهي تلكتني تريد تاكلني فلتت منها وركضت للدرج تراطمت ويا مهيمن صرت وراه ..

هاي الهوسة كلها وعمتي تصيح

ام مهيمن :ولكم شكو احجو شبيكم..

مهيمن :شكو شبيكم ليش هادة على رشا شصاير .

عذراء: هاي ام الزلم مشلحة وصايرة نادرة تستعرض كراعينها الزرك كدام سلام ..

مهيمن: انجبي لج شنو ام الزلم ترة هاي مرتي الي دتحجين عليها ..

عذراء :اسألة هوة كال تضحكلي وتغمزلي جانت ..

مهيمن :وانتي تصدكين برجلج العار .. اني مرتي اثق بيها اكثر مما اثق بيج وبرجلج ..

عذراء: ولك تجذبني مهيمن اني اختك الجبيرة .

مهيمن :من تطعنين بشرف مرتي بوكتها ماعندي اخت .

عذراء: وسفة عليك ياخوية ..

مهيمن: تعالي كليلي رجلج شلكيتي يسوي فهميني.

عذراء: لكيتة فاتح البردة مال شباك الاستقبال ويتفرج على استعراض الخانم الي رفضت تعيشني ابيت ابوية لخاطر تاخذ راحتها ..

مهيمن :رجلج وين .

عذراء :طلع مدري وين ولة..

مهيمن: شوفي عذراء انتي تعرفيني ماامد ايدي على مرة .. ولايوم مديتها عليج. .. لذلك راح اكلج اخر مرة ..رجلج ميجي لهنا بعد ابد فهمتي ابد ...

واذا اجة انتي تطلعين ويا وماعندي اخت اسمها عذراء تبقين هنا معززة مكرمة لحد متنحل سالفتج ..
بس رجلج ميجي هنا لو على موتي ..

والكلام الي حجيتي على رشا راح اعذرج عليه لان مبين كلبج محروك من رجلج بس متريدين تطلعين الصوج بي..

عذراء :ولك مهيمن شنو تريدني احجي واني اشوفة يباوع لعرضك

مهيمن :مو كتلج اكثر من مرة من كتلتي روحج عليه كتلج عوينجي وابو نسوان لو مكتلج ..

بوكتها طلعتيني زعطوط وماافهم وماصدكتيني وجان عمري ١٨ يعني فاهم كلشي مو زعطوط مثل مجنت بنظرج ..

انتي تتحملين نتائج اغلاطج ..

رشا: طول مايحجون اني لازمة قميص مهيمن عبالك هوة يحميني اذا هديتة راح انكتل .. جانت عيونها تريد تاكلني ..

والقران يعذراء وداعت امي وابوية مجنت ادري بي يباوعلي .. اصلا من شفت الكل راح نام كلت انظف لان الحديقة جانت كلش وصخة ..

عذراء :انتي لتحجين شي لا عبالج افوتها الج اصطبريلي.

مهيمن: هيييي شبيج اني واكف وتهددين مو بعينج ..لاتشوفيني سكتتلج عبالج ماكدر اسويلج شي.. ترة اكسر راسج اذا احطج ببالي .. احترمي البيت الي كاعدة بي .. ورشا خط احمر افتهمتي ..

اعرفها واعرف اخلاقها .. واعرف اخلاق سلام .ولهذا السبب رفضت تعيشون ويانا دائما ..

هذا الموضوع ينسد .. وماريدة ينفتح بعد ابد .. وسلام يحرم يوصل لهنا ترة متحلفلة وحسابة ثكل .

رشا: حجة وعافها ومشة واني لازكة بظهرة طبينا للغرفة ..

والله مهي......قاطعني .

مهيمن: اشششش ماريد اسمع صوتج ..

رشا: انصدمت من ردة فعلة ... بس لا يصدكهم .. صوجي ماكتلة على تصرفات سلام .. عززة شلون بية ..

جنت احجي بيني وبين روحي واشوفة يحضر ملابسة حتة يسبح ..

طلع من الغرفة وضليت ساكتة وكاعدة ونظري للفراغ الي كبالي وبحياتي الي متصفة كل مااكول هانت تصعب اكثر ...

دفكر ودك تلفون مهيمن رقم غريب ..
مجاوبت شعلية بي..

ضل يدك اكثر من ٣ مرات وراها جتي رسالة بس انعرضت بشاشة ...

(ليش متجاوب عود هاي كتلك مشتاقة اسمع صوتك )...

رسالة خربطت كياني .. خلت اصابيعي ترجف عيوني غوشت كلبي وجعني ..لوية بمعدتي ..

هيج جان احساسي .. ماكو فكرة سودة مااجت ببالي .

فتحت الموبايل ودخلت على الرقم جان مكالمات هواي اكو مكالمة ٣ دقايق بالوكت الي بيه العركة جانت ...واتص بيه ويطلعلي مشغول

بس الي مرت بهذا الشعور تعرف شعوري شنو ..
طب مهيمن شافني لازمة تلفونة ..

باوعتلة وعيوني مغرغرة دموع بس ميقبلن ينزلن ..
سحب التلفون مني ..

شاف الي جنت اشوفة..

مهيمن :رشا خل افهمج ..

يتبع ....

..........

حبايبي اعذروني لان تاخرت بس والله جنت مريضة وماكدرت اكتب هذا البارت صارلي من الثلاثاء لهسة يلة كملتة ..

اتمنة تعذروني ... احبكم ..

تحياتي Aseel