رواية قضية طلاق الفصل الرابع والعشرون 24 - بقلم Aseel🤗

مرحبااا مشتاقتلكم موووت ..

قضية طلاق ...

بقلم Aseel..

بارت ٢٥ ....

...........

فتحت الموبايل ودخلت على الرقم جان مكالمات هواي اكو مكالمة ٣ دقايق بالوكت الي بيه العركة جانت ...واتص بيه ويطلعلي مشغول

بس الي مرت بهذا الشعور تعرف شعوري شنو ..
طب مهيمن شافني لازمة تلفونة ..

باوعتلة وعيوني مغرغرة دموع بس ميقبلن ينزلن ..
سحب التلفون مني ..

شاف الي جنت اشوفة..

مهيمن :رشا خل افهمج ..

رشا: بعيون مدمعة وبحة بصوتي الي اختفة من صدمتي ...
شتفهمني ... مهيمن شتريد تفهمني ..

مهيمن: رشا والله هية لازكتلي ..

رشا: ٣ دقايق ولازكتلك مهيمن ..

عفتة وطلعت حاول يلزمني دفعتة من صدرة مدري منين اجتني القوة ...

رحت للحمام وقفلت الباب علية ...فتحت دوش بارد وطبيت بملابسي ..اسمعة يحجي من ورة الباب..

مهيمن: رشا والله هاي وحدة لازكتلي .. اطلعي وافهمج كلشي والله ..

رشا: روووووح ماريد اسمع كلمة منك ..

مهيمن: وحق هو الله اذا مافتحتي راح ادفرها واكسرها واطب اسحلج .. دكلج طلعي خل اكل خرة وافهمج ..

رشا: بصوت شبه اختفى من كثر البجي والغصة .
مهيمن عوفني  ... ماريد اسمع شي ...

جنت كاعدة حاضنة رجلي والدوش فوكاية ..احس نار كلبي متطفة ...

محسيت غير الباب اندفر .طب وتفاجأ من منظري ...
كبل ركض للمنشفة جابها واجة سد المي ولفلفني .. ادفع بي وانرعصت بين ايدة ..

حسيت حرارة طبعت بخدي واذاني صوفرت ..

مهيمن: اهدي لا تتخبلين ..لعد اني ليش ماكتلج عليها لان متوقع هاي خبالاتج

رشا: ضليت ساكتة وفاتحة عيوني من ضربتة احس خرسيت ...
جرني من الحمام وطببني للغرفة نزعني ملابسي ..
وطلع كلابية ولبسها الي بدون اي شي ..

ولف شعري بالخاولي ... يحرك بية مثل اللعابة خفت من ضربتة جانت كفيلة بفقداني النطق والحركة..

كمل كعدني عل الجرباية وكمبر كبالي كال...

مهيمن :ترة هاي صارلها يومين تلح .. ودزلي رسايل حتة اجاوب ..

فمرة جنت دسوق واتصلت علية .. جاوبت بدون مااشوف عبالي انتي ..

فتحت خط كلت

..الو .. جاني صوت ناعم ومايع ..

-الووو همزين حنيت وجاوبت ..

رفعت التلفون جان اشوف نفس الرقم ..

-نعم تفضلي خير ..

-..انت ليش هيج ثكيل .. بس اموت على ثكلك ..

-..وانتي منو بلة .

-... اني وحدة حموت على نظرة منك ..بس اوووف من ثكلك نيالها لرشا عليك .

-... منين تعرفين مرتي ..

-... اعرف كلشي عنها وعنك ..واعرف انت شلون خطبتها ..

-... انتي منو .. احجي حتة استمر وياج ممعقولة تريدين نظرة واني ماعرف منو ..

-... هههههه ( ضحكة كاولية اصلية ) مو علية هاي حركاتك نووودي ..

-....بربج رجال شكبرني وتكليلي نودي .. شو دولي ..

-... دست الخط جان اشوف رشا تتصل ..
بس كملت كلامها ... كالت ..

-.. ترة اكدر اأذي رشا اذا ماسمعت كلامي .. بحركة اصبع مني اخفيها ورة الشمس هية وبنتك .

-...ولي ولي ...طبكتة وخابرتج ..

والله يارشا هاي جان حجيي وياها ضليت اخذ. انطي وياها بالكلام حتة اعرف منو هية بس جانت ذكية ومبينة خبرة ..

رشا :وتريدني اصدك ..

مهيمن: رشا لا تضوجيني .. تريدين اتصل بيها ..

رشا: لا عليمن ميهمني بعد .. كمت وكفت ..
جرني كعدني ..

مهيمن: انجبي وكعدي بعدني ممكمل ..

رشا: لا تتجاوز .

مهيمن: اتجاوز واشك حلكج عندج مانع ..

رشا: مو بكيفك عساس ..

مهيمن: رشا حتصل كدامج بس ابد لا تطلعين صوت ..

رشا: معلية بيك كتلك ..
اتصل كدامي ..

اجة صوتها ...

-الوووو شعجب حنيت ..

مهيمن: اسف بالغلط دكيت اشتبهت ..

-.. لا. عليك الله لا تسدة بس اشوية اشبع من صوتك ..ولك والله ليلي ماانامة اتحلم بيك واتخيلك نايم وياي ..

-.. كافي كافي تورطت دكيت على هيج شكولات ..

-... راضية بيك وميتة عليك حتة لو تغلط لو تضربي فدوة الك ولك بس تعال وطفي ناري..

رشا :اني كبل اخذت الجهاز ولطشتة بالحايط ..

مهيمن: انتي تخبلتي شنو هاي التصرف .

رشا: لعد انتظرها تكمل حجيها وياك حتة الكاك منتهي وياها ..

مهيمن: احترمي نفسج شنو شايفتني زعطوط حتة ادور سوالف مراهقين اشو انتي مدري شلون تحجين .

رشا :هاي البنية عرف صوتها مو غريب .. واذا سمعتك راجع محاجيها اكلبها كلاب عليكم والله ..

مهيمن: اي مو امشي بكيفج .. ترة لو اريد احاجيها اكدر امسح المكالمات من اكمل ..او للسهولة اشتريلي جهاز مخفي عنج .. ترة كلشي اكدر اسوي بس موببالي هلسوالف ..

رشا :انسد الموضوع بس اني اخذت اشوية موقف ..
رجعت الحياة لطبيعتها .. بين حروب عذراء وبين التحضيرات لبداية الدوام ..الي باقيلة اقل الشهر ..

فمرة  سمعت عمتي تسولف ويا مهيمن .. بغرفتها واني بية طبع من اسمع اسمي الكة اذاني ماشية وحدها ولازكة بالباب مثل الجهال ..

مهيمن: يمة الف مرة كتلج اني مامستعجل ..

ام مهيمن :يمة انت كبرت ليوين تبقة بس على ريم ..
والله يمة لو ترجع نور وخليهة بس تخلف الك وابقة انت ويا رشا محد لازمك .

مهيمن :يمة تحجين صدك انتي .. لما بنفسج شفتي الي صار .. يمة ترة اني من سديت سالفة نور مو معناها ناسيها لا والله لحد هسة متحلفلها .. واكلجيها من الاخير .. بس اشوف نور اكتلها ..

الي ترخص روحها علمود رصيد ابو ال٥ ماتصيرلي مرة لو يصيغوها ذهب ..

ام مهيمن: يمة عوف نور ملازم هاي عندك بنات خالات وعمات كومة اختار واستنكي وبنات بيوت ..

مهيمن: يمة رشا ماابدلها بكل نسوان الارض ..ماتزوج عليها لو تنزل فتوة بهذا الشي رشا مرتي وبس ..

ام مهيمن: ييمة راح اموت وابقة بحسرة الطفل ..
اريد اشوف ولدك ... اريد اشيلهم اناغيلهم ..

ليش تخليها غصة بكلبي ..

مهيمن: يمة الف مرة كتلج رشا مابيها صوج .. تعالجت والدكتورة كلتلها رحمج نظف ومستعد للحمل .. بس الظاهر رب العالمين بعدة ممقررلنة الرزق .. انتي تأمنين بالله عود المفروض تتفهمين ..

رشا :طفرت قبل لا اسمع الباقي لان الواضح وصلو للختام .. بس بداهلي فرحة لان سمعت مهيمن مراح يتخلة عني ..

خلة عندي امل انو رب العالمين مراح يخذلنا ومراح يكسر بكلبي .. يكفي الي شفتة ..

بدة الدوام وريم هلسنة اول ابتدائي .. جهزناها اني ومهيمن احلة جهاز مدرسة ...

جنا نطلع سوة اني ومهيمن وريم عدها خط لان دوامنة  يتاخر مرات اني وياه ..

مر اول شهر عادي مثل اي بيت ..بس بهذا الشهر حسيت خمول مو طبيعي ... ارجع بس اريد انام .. ومهيمن ماارغبلة .. يجيني يتقربلي ماعندي اي لهفة الة .. جامدة ويا صرت ماعرف ليش .. احس الفراش صار واجب مو رغبة وحب مثل قبل ...

لحد ما استفقدت الدورة صارلها ب٩ ايام مجايتني .
من طلعنا من الدوام كلت المهيمن ..

رشا: مهيمن خل نروح للمختبر احلل ..

مهيمن: خير حبي شبيج تشكين من شي ..

رشا :لا بس دايخة وخاملة احس بية فقر دم ..

مهيمن :يلة ماشي ...

رشا :طبعا مهيمن اخذ مني موقف اشوية لان ماابادلة بالمشاعر وحس اكو تغيير بية .. بس ماحسسني

وصلنة وطبينا للمختبر ومن سأل نوع التحليل جاوب مهيمن ..

مهيمن: فقر دم ..

رشا: كملت على كلامة
..وحمل ..

فتح عيونة وشفت لمعة فرح بيهن 
همسلي ..

مهيمن: صدك لو تشاقين ..

رشا :صدك .. فايتتني صارلها ٩..ايام .

مهيمن: وليش مكتيلي ..

رشا: حتة اشوف هاي نظرة الفرح بعينك وهم اشوفك منصدم مثل ملامحك هسة ..

مهيمن: يعني متاكدة حامل ...

رشا: هههه شبيك لو متاكدة مجان جيت حللت ..

مهيمن: انشالله خير انشالله ..

رشا :نص ساعة واخذت النتيجة ..

مهيمن: دمعت عيونة من عرف الاختبار ايجابي..

ولج ممصدك ولج حيصيرلي طفل منج.. حيصير ثمرة حبي وصبري ..

رشا: الله يعديها على خير ..خابر عمتي وبشرها ..

مهيمن: لا اريد انطيها التحليل بيدها .. اليوم انتي اميرتي اطلبي شتريدين شمشتهية بس كولي اجيبة الج ..

رشا :اممممم خل افكر .. اريد موطة ام االجاكوج بس لون اخضر وبي كرصة حموضة ..

مهيمن: هاي شلون صايرة منين موطة بهلبرد ..
بس يلة امشي نروح للفقمة وتدللين طلب خاص النة اخلي يسوي  

رشا: يمة فدوة للي يدللني ..

رحنا للفقمة وطلب الي مشتهيتة وجابة الي ..
اوويلي موطة خضرة وحموضتها طيبة وتكرص اشوية .. رغم الجو جان بارد وثلج بس استلذيت بيها واحسها طفت البوخة الي بجسمي

رجعنا للبيت وهوة طب قبلي حتة ماانتظرني انفوت سوة جانت فرحتة مو طبيعية ..

اول مطبيت جانت عمتي تهلهل .. وعذراء ابتسامتها مال فرح جتي بوستني ..

عذراء: بالخير .. بالخير والف مبروك والله يتمم على خير.. متدرين شكد فرحتلكم .. .

ام مهيمن: عساج بفرحة مولودج مثل مافرحتينا هسة ييمة الله يكومج بسلامة ...

رشا: جتي عمتي حضنتني وباستني وباست مهيمن هم ..

جان حملي متعب بس فرحتي بي خلتني اشوفة احلى من العسل .. اهتمام مهيمن بية خلاني اتدلل اكثر رغم انو اني مارغبلة صايرة .. عمتي تكلي البكر تكوم تكره زوجها ..

ماعرف شبية من يكون خارج البيت اشتاقلة وارغبلة واموت علية ...ومن يطب اكره وجودة احسة شي مكروه ..

اكثر من مرة يريد يتقربلي بس اول ميجيني اكوم اركض اتقيئ... لحد ما ابتعد عني وعذرني بسبب وضعي ...

وكل ما زاد حملي كل مزاد معاناتي ...
لحد مطبيت شهر الخامس وجنت بوقتها مخلصة دوام ..

تعبت حالتي حيل وتأزمت ... واضطريت اكمل باقي حملي يم اهلي ...

فأستمريت يم اهلي وجان مهيمن يجي يومية او بين يوم ويوم .. وبس الخميس يبات يمي هوة وريم وثاني يوم يروحون ..

عمتي جانت تجي .. ومرات عذراء وياها...
طبعا عذراء طلعت من البيت بعد مازوجها اجر بيت يمنا .. واتدخل بينهم طرف محايد وصالح مهيمن وسلام .. بس رغم هذا بقى طبت البيت محرمة على سلام ...

مر تقريبا شهر على وجودي ببيت اهلي .. وبهاي الفترة .. لاحظت سجى متكشخ غير بس من يجي مهيمن ..

حتة اوقاتة صارت تعرفها .. مجنت حاطة ببالي هلشي .. بس حطيتها ببالي من شفت مهيمن الي مجان يحجي وياها غير السلام هسة صارت شقة وميانة  ...

جنت افسرها انو جان مستحي .. وهسة اخذ عليهم ..
حتة اهلي جان عدهم هذا الشي عادي .. الة سهام ..

دائما تنبهني اخلي بالي منهة لان مو راحة خاصة انجلبت من طرحت ابنها وهية بعدها ببداية الشهر الثاني .. اصلا انشك بيها جانت حامل اساسا ..

كل ميمر يوم مهيمن تكثر جياتة وكعداتة ويا سجى .. خاصة تتعمد تضل يمنا والاكل كلة هية تسوي ...

جنت استغرب تصرفاتة جان ميطيقها ...

وصار حتة من يجي بس شلونج وشلون النونو .. وامي تسلم عليج ..
مجان غير هذا الكلام بيناتنة ...

جنت افكر بحملي وبس ... انقطع اتصالاتة الي جانت بنص اليل ويخابرني مشتاق لصوتي .. لو يكعد يسولف وياي سوالف همس تالي اليل ..

لحد مصار اتصال ماكو بيناتنة نهائيا ...

حتة كام ميجي يمنا ... قليل .. واذا يجي مالحك علية بس امي تكول اجة ولكاج نايمة ومابقة هواي ..

صرت احسة يتعمد يجي واني نايمة حتة ميشوفني ..
جنت ابررلة انو اني اخذ الامور بعظمة لان حمل..

طبيت الشهر الثامن واني الهث من امشي خاصة وزني زاد حيل ... وانفخت لان صار عندي زلال حمل .. جان النفس بصعوبة اجرة ..

فمرة اتأزمت حالتي واختنكت حيل واحس كلبي يخفق سريع .. اتصلت عليه حتة اروح لدكتورة ..

كل مااتصل مشغول .. ورة النص ساعة من اتصالاتي ..يلة جاوب ..

الو مهيمن .. صارلي ساعة اتصل وينك ..

مهيمن :شكو  خما اكو شي .. شصاير.

رشا: يعني الة يصير شي يلة تجاوب ..

مهيمن: احجي رشا بسرعة ماعندي وكت ..

رشا: ليش شعندك ..

مهيمن: هسة دحجي ..فضيها ..

رشا :مهيمن تعبانة واريد اروح للدكتورة ..

مهيمن: يلة تحضري فد ساعة اشوف اذا كدرت ..

رشا: يلة انتظرك لعد ..

سدة كبل .. طبعا تعلمت على اسلوبة الجديد مجنت مهتمة لغير حملي بس اريدة يخلص ..

صارت الساعة والساعتين والاربعة  والسبعة ساعات..

مهيمن ماكو اتصل ميجاوب لو مشغول ..

اخر شي جاوب ..

مهيمن: شكوووو ثبرتيني شبيج متكليلي ..

رشا: هاي شبيك مهيمن .. كمت ابجي بسرعة لان عيطتة جتي ترس بأذني .. واحس دخلت بروحي ..

مهيمن: شبيج يعني مدجاوبج يعني مو فارغ شبيج انتي ..

رشا: والدكتورة مهيمن .. نستني ..

مهيمن: مصارلي مجال .. روحي هسة بعدين عود شوفي احد من اخوتج يوديج ..

رشا: مو صوجك صوج الحيوانة الي تتصل بيك ..
سدة بوجهي ...هوة ابو الراهي فوكاها ..  

عفتة وشمرت جهازي اذا مااخلي يتوسل حتة اجاوب واشلع كلبة مثل مشلع كلبي..

ثاني يوم رحت للدكتورة وسويت تحاليل وطلع الزلال نسبتة عالية اكثر ويرادلي عناية خاصة حتة يخف من كمية الزلال والا الطفل راح يموت ببطني قبل لا ينولد ..

يعني من ناحية الاكل والحالة النفسية واكثر من الحركة وشرب مي حتة الزلال يطلع ويا الادرار ..

استمريت على العلاج اسبوع وجانت حالتي تزيد متنقص لان حالتي النفسية تدهورت حيل ببعد مهيمن الي تغير ...

احسة مو مهيمن الي يتنفس هواي ...
حيل تغير علية واحس بي شي مو طبيعي..

والمشكلة من نتلاكة اني وياه حتة اني اكوم ماارغبلة ..

جنت احتاجة هواي بس ماالكاه ...
اشتاقيت لكلمة محتاجة شي حبيبي..

مجان يتصور شكد ابجي وحدي بليل .. شكد اشتاق اسمع صوتة واني اتصل وميجاوب لو يرفضني ...

... هيج جان يمر علية الليل...

كعدت الصبح مثل العادة كوة اكوم من الجرباية الي هية جربايتي نزلوها الي بغرفة امي لان وزني كلش زاد وصرت بصعوبة اكوم واكعد ..

رحت غسلت وكملت لحد ماوصلت المطبخ اني نفسي مسدود ..

سهام :صباح الخير ..

رشا: اشرتلها بمعنى انتظري.... صباح .. النور ..

سهام: ولج والله صايرة فيلة ... بس يلة هوة الولد ياخذ حلات امة..

رشا: عمي مرايدة حلاة لا الي ولا الة بس خل اجيب واخلص تعبت والله... كمت ابجي..

سهام :ولج هاي شكو من الصبح .. متكليلي شبيج صايرة بس تبجين اذا واحد حاجاج ..

رشا :تعبانة نفسيتي حييل ومهيمن ابتعد عني ماعرف شبي... صوجي جيت هنا وعفتة

سهام :هوة من ناحية صوجج صوجج صدك. ...
المفروض متعوفين بيت رجلج ابد حتة لو يطلعوج جنازة .. متعرفين النسوان شسوي .. وهوة ماشأء الله مال وجمال وشهادة دكتوراه .. وكشخة هم ..

والله لو منج انام على كلبة .

رشا: يعني شنو قصدك مهيمن عندة وحدة .

سهام: والله هذا مبرر تصرفاتة ...
ولج نسيت اكلج غير عماد حيطلك ..

رشا :لا صدك بربج ليش شكو خير شصاير..

سهام :شمدريني اشو راحت لاهلها قبل سبوع وهسة عماد يكول تريد تطلك .. ولج كالبها مناحة عماد .. كسر كلبي..

رشا :واني ليش مادري ..

سهام :دحيري بروحج اول ..

رشا: لا والله احجي شكو ..

سهام: شمدريني اشو فجأة كلبت .. كامت تتحجج.. واخر شي راحت لاهلها وكالت اريد طلاك ماارجع ..

رشا :زين مكالت السبب..

سهام :يمعودة هذولة عائلة كاولية .. تلكيها شافتلها واحد غيرة ..

رشا :لا شنو هلحجي حرام اذا مشايفين شي..

سهام :ولج دسكتي انتي شمدريج شكو بالدنيا حايرة بكرشج ..

هية غير عمتي راحت لوحدة ام الخيرة طلعت بلاوي صايرة. واحنة مندري..

رشا: خير ياستار شكو انوب .. ولج خوفتيني..

سهام :اوكفي خل اجيب الريوك ونكعد نسولف ..

رشا :شوقتيني والله ..
راحت جابت الريوك وكعدنة نتريك وتسولف..

سهام :ولج غير طلعت هاي الشفية لاعبة لعب بالسحورة ...

رشا :لا صدك ..

سهام :هوة شنو لا صدك اصلا جنا متوقعين هذا الشي ..بس المشكلة منكدر نحجي لان الكل طابك وياها خو ابوج سكتي وخليها صايرة اعز منج عندة شحدة الي يحجي وياها ..

رشا :زين امي متسوي شي ليش عايفة هيج الوضع ..

سهام :انطتها بطل مي وخل مقروء عليه كالتلها رشي البيت منة يهدى النفوس .. بس شنو الفايدة اذا شبعانين بالاكل والشرب.....

رشا :يمة شنو السالفة.... زين هاي وين صايرة ..

سهام :ليش شتريدين منها ..

رشا: اريد اخذ لمهيمن اريد اشوف ليش متغير وصاير ميرغبلي..

سهام :والله اشك برجلج مسويلة عمل لان ممعقولة هيج من كيفة يعوفج وهوة كتل روحة حتة تقبلين بي ومو من النوع الي يحب الونسة ...

رشا :والله خايفة حيل .. ماكدر اتصور مهيمن يتركني .. او يتغير علية ..

سهام :شبيج كمتي ترجفين اهدي ..

رشا: مدرجف شبيج لتخوفيني ...
جنت باثناء ما اسولف وياها تجي لويات بظهري . ..
بس عبالي عادي .. جنت متحملتها واعصر بروحي لان جانت تجي بفترات ...

سهام: رشا دتحسين بشي .. احجي لا تكتمين شبيج وجهج اصفر وترجفين ...

رشا :ماكو شي بس هاي الاوجاع الي دائما تجيني ..

سهام: تشاليع قصدج ..

رشا: اي بس اليوم تاذيني اكثر ..

سهام :انتي شكد الج بالثامن ..

رشا :٢٣ يوم ليش شكو .

سهام: خل اروح اكعد عمتي تاخذج للمستشفى ايجوز بداية ولادة يلحكون عليج موزين تجيبين هسة ..

رشا: يمة سم الله شبيج .. ابيش مفاولتني ..

سهام :رشا كومي تحضري عما اخبر سامر يرجع ياخذنة ...

رشا :كمت ابجي ..

سهام: هسة شكو تبجين والله حتخبليني ..

رشا: ماعرف خايفة مو يكولون الي يجيب هسة يموت ..

سهام: اسم الله شبيج ماكتلج ولادة كلت خاف عندج بداية ولادة .. لا تكبرين السالفة وبعدين عبرتي نص الشهر مو اني هم مثلج .. متذكرين ....

دخابري مهيمن خلي يجي ..

رشا :ماكدر انتي خابري اعصابي ترجف ..

سهام :يلة حخلي سامر يتصل بي استحي احجي ويا..

رشا :كعدت امي سودة علية بلا ريوك راحت وياي بعد ماسامر اجة اخذنة .. رحنا اني وامي وسامر ..

رشا: ماما جان اكلتي شي لا تتخربطين عيني ..

ام سامر: يمة سوتلي سهام لفة بالجنطة اشوية واكلها لتخافين .. اقري ايات بكلبج وادعي ماكو شي ..

رشا :انشالله يطلع بس تشاليع ..

اكلك سامر خابرت مهيمن حتة يجي ..

سامر :اي خابرت كال يتلكانة هناك هوة وامة ..

رشا: انشالله .. ضليت ادعي واقرة ايات مال تسهيل وانخة بكل الائمة انو ميطلع ولادة بس الاوجاع كامت تزيد واحس روحي تطلع من الوجع جنت ويا كل لوية اعصر ايد امي واعيط ..

ام سامر: يمة استعجل هاي مبينة راح تولد ...

رشا: يمااااا احس شي نزل علية الحكي ..

ام سامر :ولك الحك اختك سامر ...
...

يتبع ...

شلونكم حبايب قلبي .. اعذروني للتاخير لان سبق وكلت جنت مريضة .. واشكر كل الي دزولي رسايل بالخاص واطمنو علية .. ..

الحمد لله رجعت صحتي تمام وهذا بارت وانتظروني راح اكتب بعد وانشرة تالي الليل انشالله ..

احبكم فديتكم ...

لا تنسو التصويت وجثرولي تعليقات ....

تحياتي Aseel.❤❤❤❤