رواية قضية طلاق الفصل الثامن 8 - بقلم Aseel🤗

مرحبا حبايبي ..

قضية طلاق..

بقلم Aseel.

بارت ٩....

..................

طلع ودز طالبة تصيحني للمكتب ..

هوة هذا الي جنت خايفة منة .. هسة لازم اقرر

ياما اي او لا ماكو ماعرف ومادري

رحت دكيت الباب واجاني صوتة ..

مهيمن: تفضل.

رشا :دخلت واني اسمع دكات كلبي من التوتر هذا مصير حياتي ..

كتلة :اني قررت انطيك فرصة ..
بس مو معناها انو وافقت راح احاول اتعرف عليك واذا شفت روحي اكدر ارتبط اكلك موافقة على الزواج.

مهيمن :يعني قصدج تريدين تعرفين حياتي وعيشتي شلون..

رشا :بالضبط لان اني كلشي ماعرف عنك غير انك استاذ ودكتور بجامعتي .. وماكدر ارتبط بشخص ماعرف شي عنة.

مهيمن :واني تحت امرج شتريدين تعرفين اني حاضر .

رشا :انشالله .

مهيمن: انطيني رقمج حتة نتواصل ..

رشا :ماشي سجل يمك .
انطيتة رقمي وترخصت منة بس خوف بداخلي مو طبيعي احس روحي تورطت ..

طلعت ولاكتني هند والابتسامة شاكة حلكها .

انتي شنو سالفتج هواي متأثرة بية .

هند: ولج اموت على قصص الحب ..

رشا: ياحب هذا ولج .. ترة هوة بس كلي رايدج يعني مامتاكدة منة

هند: يااا صدك تحجين ولج انتي متشوفين عيونة ميشوف غيرج من يدخل للقاعة اصلا كلها منتبهة عليه بس انتي ثولة .

رشا: لان كلبي تايب من هلسوالف .

هند :لعد ليش وافقتي تتعرفين عليه..

رشا :لان اريد اخلص من صهيب متدرين هذا صاير خبل بكل مكان طالعلي .

هند: اممممم والله عمي لو هيج الحب لو ماكو .

رشا :اي خوش حب .. سكتي لا تذكريني بالكوة نسيت .

هند :اكلج انتي مو تكولين كل مرة يكول مجبور اعوفج ..ليش ماتحاولين تفتهمين منة شنو السبب.

رشا: لان اكثر من مرة سألتة وماحصلت جواب وكافي عاد ماضل اركض وراه اني هم اريد اعيش حياتي ..

هند: اووف يالله... الله يساعد كلبج .

رشا :الله كريم ...
كملت الدوام وطلعت للبيت اتمشة وهلمرة ماغيرت طريقي ليش اغير طريقي علمودة ..

مشيت ووصلت راس الفرع جان يدك تلفوني باوعت رقم غريب ..

جاوبت ..

الوو..

اجاني صوت ..الو رشا .

رشا: الو نعم تفضل منو وياي .

مهيمن: اني مهيمن هذا رقمي .

رشا: ها العفو استاذ اعذرني بس معرفت صوتك بتلفون.

مهيمن: ستاذ شنو احنة خارج الجامعة كولي بس مهيمن على كولتج حالك من حالي .

رشا :ضحكت . بعدك تذكر .

مهيمن: ليش اكو شي يخصج ينسي ..

رشا: خجلت حيل وكتلة يلة من اوصل اتصل لان هسة بعدني بطريق ..
ماحسيت غير التلفون انسحب من اذني ..

صهيب :لك حيوان تبعد عنها لو اجيك اشوه وجهك.

مهيمن: انت منو وشلون تتجاوز هيج .

صهيب :اني زوجها وطبك الخط ..

رشا: انت منو سمحلك تسوي هيج انت شدخلك فهمني .

صهيب: رص على اسنانة وحجة وهوة ضاغط على اعصابة ..طبي للبيت بسرعة ماريد اعلي صوتي بشارع وتجيج حجاية .

رشا: ماطب وجيب موبايلي واني اعرف شلون اخليك تبتعد عني

صهيب :طبي دكلج .

رشا :ماطب.. وكتلك جيب .. بعدني ممكملة ماحس الة انجريت من ايدي وطببني لبيتهم ..

والقران اذا ماتهدني اصيح وافضحك..ولا كانو احجي طببني بالاستقبال ..

صهيب: شوفي لج سكتتلج هواي بس مال تتمعشكين بالدوام هاي ماسكتلها ابد ..

رشا: كمت اعيط .. وانت شعليك بية .. احب اصادق اطلع شقق انت مالك دخل ..

محسيت غير ضربة على حلكي حسيت شفتي خدرت كمت اتلمس بيها ..رفعت عيوني اباوعلة ..

صهيب: اذا بعد عدتي الي كلتي والقران اخيط حلكج.

رشا: ظلت دموعي تجري من الضربة كلش وجعتني ..
وعلى صوت عياطنة طبت امة ..

ام صهيب: يا يمة شجاك شمسوي بالبنية

رشا :اني منا جنت ابجي وسمعت امة تحجي طكيتها بجية اقوة وياها شهكات مثل الطفل ..

واشوفة كام يروح ويجي ويفرك بوجها ويستغفر ..

وامة حاضنتني وتمسد بشعري وهوة يرجع يباوعلي ويفرك بعصبية ..

رشا: عمة وديني ماكدر بعد ..

ام صهيب: انتظري عمة اهدي وفهميني شصار خما تروحين هيج لاهلج يتخبلون والله ..

رشا: عمة ترضيها يتدخل بكلشي .. كليلة كافي خل يبعد عني مو هوة الي عافني شيريد مني بعد ..

ام صهيب :خل يولي هلمخبل هذا الادبسز.

صهيب: يمة ..

ام صهيب: وغمة اسكت ولك خبلتنة انت شبيك ساعة تكول اريدها وخطباها وساعة بطلت وتصيح ماريدها وهسة لازكلها ترة حتموتني انتة وتعيط ..

رشا :شفت عمة تهسترت كمت اهديها وكامت تملخ بروحها .. .

ولك ارحمني ارحم شيباتي ولك انت وحيدي وهيج امرمرني لو جاية بنية ولا جايني هلولد العاق .. ربي ردتة منك عون طلعلي فرعون ..

صهيب :يمة اهدي افهمي الموضوع ..

ام صهيب: مافهم شي ماريد بعد اسمع كلمة منك ..
كامت وكومتني وياها ..

كومي حبيبة كومي غسلي وعدلي وجهج وردي لاهلج واذا حاجاج بعد كليلي .. اني اعرف دواه ..

رشا: انشالله .. وبكلبي والله لو يذبحني ماكللها اني بس كتلها هيج هية تهسترت تروح تموت المرة .

رحت غسلت وعدلت وجهي وهوة يفتر وامة واكفة يمي تخوزر بي كملت وسلمت عليها وهية ضلت تتعذر وتبجي كسرت كلبي .. بوستها وكتلها .

عمة انتي تبقة معزتج بكلبي لا تتصورين هذا الشي اثر على حبي الج .

ام صهيب :والله مشتاقتلكم ومشتاقة لكعدات امج بس مالي عين اطب بعد سواية ابن بطني .

رشا: لا بالعكس والله امي تحبج ودائما تسولف بيج بس متكدر تجي لان تعرفين صعبة عليها بس والله تتمنة تزوريها ..

ام صهيب: انشالله امرلها عن قريب .

رشا: هلة بيج بأي وقت ... مع السلامة تاخرت حيل ..

طلعت وتذكرت موبايلي ضل يم صهيب رجعت صحت لامة كتلها موبايلي ضل يم صهيب ..

صاحت لصهيب بالثلاث مرات يلة اجة ..

انطانياه وهمس بدون متسمع امة .

صهيب :والله متصيرين لهذا الملطلط ..لو اعرف اسويها دموم ..انتي الي حطي ببالج هذا الشي ..

رشا: فز كلبي من الخوف واحس رجلي كامت ترجف لان جنت قبل اكول بوخة بس حجي بس من شفت نظرة عيونة شلون صايرة نار عرفت ميجذب ويسويها صدك .

اخذت الموبايل وطلعت كبل للبيت .. شفت امي وسهام ديطلعن هستوهن ..

رشا: هلووو

ام سامر وسهام:. . هلو بيج .

رشا: ها خيركم وين .

ام سامر: اليوم مراجعة للدكتورة .

سهام بوجه متعوب وثكلانة :.. والله دموت من الثكل ماتحمل بعد .

رشا :مابيج الله العافية طمنوني عود .

ام سامر: ماشي دطبي ارتاحي ومسوية الغدة احنة تغدينة بقيتي بس انتي لان تاخرتي ..

رشا: صارت لوية ببطني من الخوفة همزين مسألتني وين جنت ..

اي مو عدنة محاضرة اضافية ..

من ورة صهيب حتة صرت استاذة بالجذب ..
طبيت كبل بدلت وماتغديت ماشتهي الخوفة بداخلي بعدها وحلكي خدران .. الله يشل ايدك انشالله مو ايد كرك عبالك .

مددت وتذكرت مهيمن ..ياا عزة نسيتة هسة يضل بالة .

فتحت جهازي وتصلت اول مدك جاوب ..

مهيمن :الو رشا ليش سادة جهازج طمنيني انتي زينة .

رشا :اي مابية شي والله ..

مهيمن:لعد منو هذا الي حجة وياي ..

رشا :هذا صهيب .

مهيمن: منو صهيب هذا .

رشا :هذا خطيبي السابق .

مهيمن: وشجابة بطريقج ..وشلون هيج يحجي وياي ويتعامل وياج بهلاسلوب الهمجي .

رشا: بكلبي والله لو تدري لزكني براشدي بحلكي شجان كلت ..

لا هوة هيج بس حجي ميسوي شي ..

مهيمن :وليش تسمحيلة يتعرضلج ..

رشا :يعني شسوي اروح اكول لاخواني والله يكتلو ويدخلون سجن بسببة .

مهيمن: لعد يضل هيج .

رشا :خل يولي شسويلة .. سد الموضوع .

مهيمن: والله مبين خوش فال اول ماسمعت صوتج كبت عركة ..

رشا :ضحكت بقهر .. هههههه حظي بعد .

مهيمن: احلة حظ هوة وصاحبتة ..

رشا حمحمت: .. احم احم انت وين هسة .

مهيمن: والله طبيت قبل اشوية للبيت بس لحد هسة بملابسي واتصل عليج ومغلق ضل بالي ..

وهسة حروح اسبح وابدل واتغدة .. لان انفتحت نفسي ..

رشا: انت ومنو تتغدة ..

مهيمن :اني وامي وبنتي ..

رشا :بنتك .؟؟
انت متزوج ..

مهيمن: طبعا ...بس جنت متزوج .. وحاليا منفصل وكلمن عايش بطريقة ..

رشا: انصدمت بي طلع متزوج ..

والله ماجنت اعرف بيك متزوج الصراحة فاجأتني .

مهيمن: بس اكيد هذا الشي مراح يغير نظرتج الي لان انتي هم منفصلة وهذا الشي ماغير من حبي الج ..

رشا :سكتت ماجاوبتة لان مجنت متوقعة جوابة ..
يلة بعدين اتصل لان حاليا مشغولة شوية ..

مهيمن انتظري رشا .. شنو زعلتي .

رشا :لا ليش ازعل انت محجيت شي غلط ..

مهيمن: رشا مو قصدي والله .

رشا :مهيمن كتلك مزعلت بس تعبانة ارتاح وبعدين نتواصل .

مهيمن: ماشي اخذي راحتج .الله وياج .

رشا: باي .

سديتة وضليت افكر هذا شلون يشوفني ..
نمت واني افكر بكلامة حسيت على سهام تندسني .

سهام: رشا ...رشاا...ادري ميتة ..رشاا.

رشا: ولج هااااا شتريدين .

سهام: كومي يصيحولج تعالي تعشي كومي ..

رشا :ماريد اريد انام نعسانة .

سهام :ولج كومي شجاج اليوم من الظهر لهسة نايمة ..ولج ب٨ ..

رشا :كتلج ماريد اني من اجوع اكل .

سهام: رشا باعيلي ..

رشا: ها ..

سهام: رشا شصاير وياج .. ليش هيج حالج مكلوب..

رشا :عبالك ماصدكت واحد كلي شبيج كبل كمت ابجي .

سهام: يااا ...رشا شبيج حبيبتي ..

رشا: تعبانة سهام احس روحي ماكدر بعد ..وحضنتها

سهام: احجيلي شبيج...

رشا :سولفتلها على كلشي ..

يتبع ..

اعتذر حبايبي على التقصير .. بس والله دضغط على روحي واكتب لان مالي واهس بسبب منظر الشهداء .والاهالي كل ما اريد اكتب الكة شهيد جديد ..

الله ينصرهم ويحميهم يارب .

#نريد_وطن

#ثورة_اكتوبر

احبكم .. 💘💘
تحياتي Aseel

ملاحظة النت عندي ضعيف كلش هذا البارت نشرتة من ال٣ ولهسة ماينشر بس يحمل ويخرج..