رواية قضية طلاق الفصل التاسع 9 - بقلم Aseel🤗

مرحبا حبايبي ..

قضية طلاق ..

بقلم Aseel

بارت ١٠

....................
سهام: رشا باعيلي ..

رشا: ها ..

سهام: رشا شصاير وياج .. ليش هيج حالج مكلوب..

رشا :عبالك ماصدكت واحد كلي شبيج كبل كمت ابجي .

سهام: يااا ...رشا شبيج حبيبتي ..

رشا: تعبانة سهام احس روحي ماكدر بعد ..وحضنتها

سهام: احجيلي شبيج...

رشا :سولفتلها على كلشي ..

سهام :وكل هذا يصير وياج ومتحجيلي .. ليش اني مو اختج .

رشا :مو قصدي هيج بس ماريد أذيكم بهمي .

سهام :لعد شنو فايدة الاخوات اذا ميشيلون هم بعض .. بس تريدين نصيحتي .
انتي تسرعتي من قررتي ترتبطين بمهيمن وفوكاها منفصل .. يعني مافكرتي يجي يوم ويرجع لمرتة ساعتها شنو موقفج ..

رشا :بس هوة متمسك بية .. ماعتقد يرجع .

سهام :وانتي شعرفتي عنة .. مو صهيب شكم سنة انتو سوة وبالتالي سوة بيج هيج ..

رشا :يعني قصدج ارفض طلبة .

سهام :لا ماكلج رفضي بس قصدي لا تثقين بحبة اذا ماسوة شي يثبت كلامة.

رشا: انشالله .. حيرتيني اكثر مما اني حايرة ..

سهام: فكري زين انتي بعدج صغيرة ترة ممجبورة ترتبطين .. كدامج دراستج ومستقبل حلو ..

رشا :ماعرف سهام اني سويت هيج حتة اخلص من صهيب صاير كلش يدخل .

سهام :رشا انتي بعدج تحبي ..

رشا: اجذب عليج اذا اكلج لا .. اصلا اشتاق الة يومية وحبي الة يزيد .. بس اكو حاجز بيناتنة ماعرف شنو احساسي ..

سهام: الله يسهل طريقج وينسيج ..

رشا :عوفج مني انتي شلونج ..شنو مابين ولد لو بنية .

سهام :بين .. راح يجي الي ياخذ مكانج ..

رشا :دحجي شنو .

سهام :طلعن بنات ثنينهن...

رشا: اووي فدوة . وشلون صحتهن.

سهام: الحمد لله وضعهن مستقر بس لازمني راحة وماكو ثكل ..

رشا: اي تحملي ولا تضلين تحوصين كعدي وسكتي

سهام :ولج ماكدر اذا ماتحرك لو اشتغل اتكسر واثكل بالزايد ..

رشا: الله يعديها على خير..

سهام :دكومي يلة غسلي ونزلي حتة اصب العشة ترة ينتظروج .. وامج حاسة بيج شي .
كومي لا تكسرين فرحتنة اليوم .

رشا :ماشي هسة اجي وراج ..
نزلت ونزلت وراها تعشيت ومابينت الي بية اضحك واسولف ..بس مو من كلبي ...

كملت كمت غسلت المواعين وصبيتلهم جاي وصعدت اخابر زهرة مشتاقتلها صارلها كومة ماكو ..

اتصل ومتجاوبني ... هاي شبيها
سديتة وتصلت بهند وكعدنة نسولف سديتة منها وكمت حضرت ملابسي وقريتلي شكم موضوع اضيع وكت ..

ثاني يوم داومت وستمرت حياتي نفس الشي بالدوام مهيمن استاذي وبس واني طالبة ..

ومن نرجع نسولف شوية ويروح وصهيب بعد مشفتة مدري وين حتة شتاقيتلة ..

كملت امتحانات الفاينل .. واجتي العطلة ...

الغريب زهرة مامبينة شكد مااتصل ماجاوب وخالتي من تجي مجيبها ..

مرة كلت لامي خل نروح لان كلبي طك عليها وهية ماكو ممتعودة عليها تغيب عني هلكد..

عاد رحنا اول مسلمت على خالتي كبل صعدت عليها دفرت الباب بس انصدمت بشكلها ..

رشا :زهرة ..

باوعتلي وضليت ارمش ... ولج هاي شصاير بحالج ليش هيج ..

جانت صعفانة ووجها اصفر وجوة عيونها سواد كلش ..وعيونها حمر .. ماكو اي ملامح من زهرة القديمة .

شافتني وغطت راسها وعاطت .. شكو جاية .
ضليت صافنة هاي شكو ..

زهرة شكو احجي شصاير ..

وخرت الحاف من وجها .
زهرة :شكو جاية اطلعي برة ماريد احد منكم جذابين .

رشا :ولج فهميني شبيج .

زهرة :انتي وحدة جذابة .

رشا :غير اعرف شنو السالفة ..

زهرة: انتي جنتي تدرين بعماد يحب وحدة ويريد يخطبها وماكتيلي ..

رشا: لا والله مادري بس فهميني شكو لخاطر الله .

زهرة :.. كامت كعدت وحضنت رجليها وحطت خدها على ركبة رجلها وتسولف..

تذكرين اخر مرة من جيت يمكم بتت .. .

رشا :اي اذكر ..

زهرة :اي بيومها نزلت بليل اطب للتواليت ..
بس ستوقفني صوت من الاستقبال صوت همس ..

رحت تسحبت لان فضولي مو طبيعي ..شفت عماد كاعد يسولف وفاتح كامر ويا وحدة تخبل وحجيهم كلة حب وغزل .. واسمعة شلون يتغزل ..

ماتحملت شهكت وهوة ندار وشافني سدة واجة باتجاهي واني جنت ابجي بسرعة نزلت دموعي. هوة من شاف دموعي حجة..

عماد :شبيج زهرة صاير وياج شي ..

زهرة :ماكو شي .. سكتت ودموعي تجري

عماد :لعد شبيج تبجين ..

زهرة: لا بس ايدي تعورت انضربت بالباب ووجعتني .
سكتنا ثنينا ..

عماد منو هاي حبيبتك لو صاحبتك .

عماد :ههههه صاحبتي شنو ... هاي حبيبتي وانشالله اخطبها عن قريب بس ادعيلي يقبلون اهلها ..

زهرة :ضليت صافنة وساكتة مشاعر متضاربة .. ماعرف شسوي بهيج حالة ..

الله يوفقكم .. عفتة وصعدت فوك ..

رشا: واشوف كعدت الصبح ملكيتج اثاري فالتة من الصبح ..زين اني شعلية .

زهرة: لان انتي اختة واكيد تعرفين هوة يحب وتركتيني اتعلق بي..

ولج ماعرف شسوي نار بصدري ماعرف .. ماعرف .
بس مخنوكة وماكدر اجر النفس كلبي يوجعني..

رشا: والله ماجنت ادري بي .. وبعدين اني شكتلج من البداية مو كتلج ميفيدج اخوية واعرفة يعتبرج اختة ..

زهرة :وهذا هوة طلعتة من كلبي اصلا ميهمني ..

رشا :هااا كولي والله مرتين .. لعد ليش مسوية بروحج هيج ..

زهرة :مالي واهس بالدنيا كلها ..

رشا: لعد اني شكول .. على الاقل انتي لا وعدج بشي ولا كلج احبج وعلقج بي .. انتي من كيفج رحتي وحبيتي ..انتي ثولة .

زهرة :لا تشوفيني ساكتة تكومين تغلطين ترة والله اكوم اجفص ببطنج انتي وهند .

رشا: ههههههه وهند شجابها بالنص ..

زهرة :هيج من الله مارتاحلها واكرها .

رشا :والله البنية فقيرة وتحبج واصلا دائما تسلم عليج

زهرة :ماريد سلامها ..

رشا :دكومي امي تريد تشوفج ..

كومتها كوة ونزلنة وامي كذلك انصدمت بشكلها بس كالتلها بسبب الدراسة وتتعب

رجعت للبيت كبل للعماد ..

رشا: عماااد ... عماد ..

عماد :شكو تصيحين شبيج ..

رشا :..رحت لغرفتة وطبيت وسديت الباب..

عماد :والله ممسوي شي ليش طبكتي الباب.. حبابة لا تكتليني..

رشا: عماد بلا شقة .. انت عندك حبيبة ..

عماد: اي .. ليش .

رشا: وتريد تزوجها مو .

عماد :اي .. بس انتظر اهلها يقبلون حتة احاجي اهلي ..بس انتي شمدريج .

رشا :عماد انت بحياتك ماحسيت بزهرة تحبك .

بانت. علامات الصدمة والتعجب بوجهة.
عماد :شنووو يازهرة بنت عمي ماكو غيرها .

رشا :اي .. اصلا تحبك وبسببك حالتها تبجي الكافر .انت ماكلت ليش بطلت تجي لهنا .. ولك حتة بطلت تسولف وياي عبالها اني ادري بيك وساكتة .

عماد :واني شعلية شمسويلها يعني اني حبيت ماكفرت واقرة كفة ايدي واعرف بيها تحبني ..

واني ماواعدتها بشي .. ولا عبالج من تكولين هيج اغير رأيي ترة قافل على سجى لو للموت اخذها اخذها.

رشا :ياسجى هاي .

عماد :شبيج حبيبتي ..اسمها سجى.

رشا :عماد اني ماريد اخسر زهرة بسببك ..ياريت لو متكوللها هذا الشي ترة هية باقيلها خيط وتتخبل.

عماد :عساس هسة هية صاحية ..

رشا :ترة مااسمحلك ..

عماد :بلله هسة انتي صايحتني علمود هاي السالفة والله عبالي اكو شي

رشا :انت ليش مستهان بهالموضوع ترة زهرة كلش متأذية والله..

عماد :والمطلوب شنو رشا اروح اكلها احبج يلة نتزوج ترة مصايرة هاي ..

رشا: لا ماكلك هيج بس اشوية راعي مشاعرها وحس بالحب من طرف واحد .. وياريت من تجي انت لا تتواجد .. خليها تنساك اشوية .

عماد: ههههه لهدرجة واصلة .

رشا: انت ليش متبطل شقة .

عماد :ههههههه والله صدمتيني .. زهرة تحب وعدها مشاعر ..

رشا :لعد وحد عن البنات ..

عماد :متوخرين من يمي هم حاسبتها من البنات اشو اسبع من عدنان درجال ..

رشا: كتمت ضحكتي لان صدك انطيها بس عرايك ومكافش ولسان ..
بس تبقة بنية ترة ...

عماد :خليها الج ..

رشا :عفتة وطلعت ومر كم يوم مثل القبلة بين شغل ونوم ومهيمن مرات يتصل فمرة كاعدة يم سهام

شفت موبايلي يدك يلمض ضوة لان حاطتة صامت
.. كان المتصل مهيمن ..

طلعت من الغرفة ورحت لغرفتي

رديت.. الوو

مهيمن: رشا اني لعبة عندج .

رشا :خير مهيمن شكو .

مهيمن :انتي ليش وافقتي علية اذا بعدج عندج صلة ويا خطيبج السابق ..

رشا :مافهمت ياصلة تحجي عليها .

مهيمن :رشا اذا تريدين تعوفيني ترة تكدرين تكوليلي ماكو داعي تدزين حبيبج على كولتة .. وتخلي يوصلي السالفة .

رشا: مهيمن فهمني شكو ترة مادعرف على شنو دتحجي ..واصلا خطيبي حاضرتة من كل البرامج ومن اي رقم يدك علية احضرة ..

مهيمن: جنت كاعد واتصل بية ويكلي رشا تكول ماكدر اكمل وياك لان اني رجعت لحبيبي بس مستحية اكلك .. وطلبت مني اوصلك هذا الحجي وياريت تبعد عني .

رشا :وانت بسرعة صدكت مو .. هاي بعدنا بالبداية وياهو الي يجي يكلك رشا سوت رشا كالت تصدكة ..

مهيمن: لعد منو عندة رقمي غيرج .

رشا :صفنت اتذكر من اخذ الموبايل وامة تصيح عليه وتاخر يالله جابة ايا خبيث ..

هاهية تريد تصدك صدك براحتك .. سديتة منة ..

وفتحت الحضر من صهيب .. واتصلت ..

الو صهيب.

صهيب :ياهلا بالعمر والروح .

رشا: صهيب الف مرة اكلك ابعد عني .

جان يحجي ببرود ورومانسية وهذا الشي استفزني اكثر..

صهيب :هههههه شبسرعة لحك يخابرج النثية مالتج ..

رشا :احترم نفسك ولا تتجاوز على انسان محترم ..

صهيب :وشبيج ترجفين عليه .. عبالج اعوفج تصيرين لغيري لا والله .. وراج وراج لحد مارجعج لحضني..

رشا :انت مريض ... والله مو صاحي ..

صهيب :. مريض بحبج .. ليش متخلينا ننسة الي صار وترجعيلي والله متعذب بلياج ..

رشا: ههههه انت تحجي صدك لو تشاقة .. انت تعرف شسويت بية وكسرة كلبي ولجمة روحي .. تحس بوجعي انت تريد ارجع بسهولة وكانما ماكو شي صار .

صهيب :والله من تعرفين ظروفي تسامحيني وتكرهين روحج لان ماوكفي وياي..

رشا: شنو اوكف وياك .. ولك بابا انت طلكتني بيوم زفتنا .. تريد اوكف وياك بشنو بالله .

صهيب :لا تكولين ولك لو اجي اشك حلكج ..

رشا: وانت عفت السالفة كلها وركزت بكلمة ولك ..

بكلبي اووف ياهالسالفة ماينساها ابد .. كل مااكول جملة بيها ولك يعوف الحجي كلة ويجلب بكلمة ولك ..

صهيب :احبج رشا ادري بيج صفنتي تذكرين سوالفنة ..من اكلج لا تكولين ولك .

رشا :شتريد مني صهيب ..

صهيب: اريدج رشا انتي الي ومتصيرين لغيري والله .

رشا :لا تحلف.. لا تحلف على شي ميصير.

صهيب :رشا مشتاقلج بكد الهوة الي اتفستة بحياتي ماعدة مرات انشل وماكو هوة هذا ممحسوب

رشا: ضحكت بس حطيت ايدي على حلكي ..

صهيب :اروح فدوة لضحكتج ..

رشا: بس اني ماضحكت ..

صهيب :بس احس بيج ضحكتي .

رشا :احب اكلك احساسك غلط .. ويلة باي وبعد لا تتدخل بحياتي ترة اوصلها لاخواني وتصير طلايب .

صهيب :والله لو توصليها للبرلمان هم وراج وراج ..

رشا ماشي نشوف .. وسديتة بوجها ..

يتبع ..

تحياتي Aseel

احبكم ..💘💘💘

دوسو النجمة لا تنسون