رواية قضية طلاق الفصل السابع عشر 17 - بقلم Aseel🤗

مرحبا .. شلونكم .؟؟☻☻

قضية طلاق ..

بقلم Aseel...

بارت ١٨...

......
رشا :ههههههه والله ضحكتني .. لهدرجة متوازي تشوفني ..

ميهمن :غير اموت عليج .. ومارتويت بعدني ..

رشا: فتحت عيني ... كل هذا ومارتويت ..

مهيمن: ليش اني شسويت ولج ..

رشا: لا هيج ... اندكت الباب ... صاحولة ..
فتحها وطلع .. كمت عدلت وجهي وحمرتي الي مسحها ببوساتة

اشوية وطبن اخواتة الكبار جانن مجايات بعدهن وهستوهن اجن ..سلمن علية وباركلي ...وتعارفنة ونزلن ..

غيرت هدومي لبست فستان ثاني من جهازي .. وانتظرت رفل تجيني حتة تكلي انزل لو لا لان استحي ..

اشوية واجتي كالت ..

رفل: يلة متنزلين اجوي خطار يريدون يشوفوج وهم نزلي تغدي ويانة ..

رشا: هوة دنتظرج استحي انزل وحدي ..

رفل : والله ملتهية جنت هسة يلة امي ذكرتني من كالت صيحي مرت اخوج .. يلة اذا مكملة خل ننزل ..

رشا :اي مكملة يلة ..
نزلنة وجان اشوف نسوان كومة .. يعني ماخلصو .. هم بعد بوس والله تعب حلكي ..

سلمت عليهن ووحدة مرة جبيرة وبنية تطلع اكبر مني بوسن من ورة خشمهن ..

ماعرفت ليش ..

صبو غدة وكعدنة نتغدة وهذني بس يخوزرن مدري شبيهن حتة ماعرفهن .. جتي رفل كعدت يمي ..

رشا: رفل منو هاي المرة الي لابسة جبة ماروني والبنية الي بصفها ..

رفل: هاي عمتي والي بصفها بنتها .. ليش تسألين ..

رشا :لا هيج بس اشو احسهن مطايقاتني ..

رفل: يااااا نسيت اكلج هاي تصير امها واختها لمرت مهيمن الاولى ..

رشا :نغزني كلبي من سمعت طاري مرتة الاولى  ..
هاا اني اكول شبيهن 

رفل :عوفيهن خل يولن لتهتمين هنة هيج شكلهن ميحبن احد حتة اختها هيج متشوفين طلكها مهيمن ..

رشا: ومهيمن ليش طلكها ..

رفل :ليش هوة مامسولفلج ..

رشا :لا ابد اصلا مجان يحب يفتح هذا الموضوع ..

رفل: والله مالي علاقة اني هوة اذا يريد يسولفلج لان هذا باعتبار خط احمر ..

رشا :مافهمت شلون يعني ..

رفل :يعني هذا الموضوع حساس اشوية فلا تفتحي ويا مهيمن حتة لا تعصبي ..

اذا يريد جان هوة سولفلج ..

رشا: يعني لهدرجة موضوعهم حساس ..

رفل :اكثر مما تتصورين ..

رشا: الله كريم ..
صار الفضول عندي فوول .. اريد اعرف ليش طلقها ..
ولا مرة خلاني افتح هيج موضوع ..

كملت غدة واحس اللكمة كوة تطب من التفكير ..

رحت غسلت وصعدت فوك تعبت كلش ..بدلت لبست دشداشة قصير وربع ردان فانيلة ومددت غفيت شوية وحسيت واحد يتلمس جسمي كعدت مخروعة..

شفتة مهيمن..
مهيمن ليش هيج فززتني ..والله كلبي راد يوكف

مهيمن: اسم الله على كلبج يا كلبي انتي ..

رشا :ساعة ابيش ...
مجاوبني جان حاير يبوس بركبتي ...

..
مرت الايام عادية واحلى من العسل .. مهيمن غركني بحبة .. يمكن بديت احبة ..

صارت السبعة ورحت للصالون ولبست بدلة ماروني جان تصميمها يجنن .. مو نفشة قوية انما خفيفة بس مبينة فخمة لان بيها شغل هواي ..

صارت السبعة واجوي اهلي وحضنت امي وشبعت بجي .. عبالك سنين مو اسبوع ..

كملت السبعة وكلمن راح البيتة بقو بس اهلي وكرايبهم .. ودعوني اهلي وراحو ..

وبدو الكرايب ينسحبون شوية شوية ...
لحد مراحو ..

رحت ركض للحمام سبحت لان الجو بعدة حار واحنة حنطب العاشر ...

سمعت صوت جوة مال سوالف وضحك .. كملت وطلعت والاصوات بعدها ..

لبست دشداشة فانيلة بس مستورة يعني للبيت جوة ..

نزلت واشوف عمتهم هاي الي جانت تخزر بية ..
ووياها طفلة عمرها يطلع بال٥ سنوات او اقل بس فدوة شايلة جمال مو طبيعي ...

طبيت سلمت جان مهيمن كال..

مهيمن: رشاوي هاي بنتي ريم ...روحي بابا ريمة سلمي على عمة ..

ريم :هاي عمة الشريرة  ...ماحبها مااريدها ..

ميهمن :عيب بابا هاي عمة تحبج ..

ريم :اني بس ماما تحبني ..

ميهمن :ريم ليش تزعليني منج .. ترة بعد مااشتريلج العاب ..روحي سلمي يلة ..

ريم :لا لا حسلم .....

رشا: انصدمت من ردة فعلها .. مبينة الطفلة معباية براسها من اولها ..

جتي سلمت علية بكل طفولة ومبتسمة ..

ريم :هلو عمة الشريرة .. وباستني ..

مهيمن: ريم (بنتر )..اني شكلت اسمها عمة رشا مو شريرة...

ريم :العفو بابا ..

ميهمن :اعتذري من عمة رشا يلة حبابة انتي وتسمعين الكلام ..

بيبيتها كالت من يمها ..

ام مصطفى :على كيفك وياها طفلة شتفتهم ..

ميهمن: رجاءا عمة لحد يتدخل بتربيتي هاي عفتها سبوع يمكم تعلمت الغلط على الجبير ومتسمع كلامي ..

ام مصطفى: يعني شنو قصدك يبن اخوية قصدك احنة خربنة تربيتها .. لا ممرجية منك بمهيمن ...

مهيمن: ماقصدي هيج عمة .. بس تعرفين على شنو اقصد .

ام مصطفى :هاي بعدنا باولها تغيرت علينة خو اطردني علمودها لمرتك ...

ميهمن: ومرتي شجابها بالنص ..

ام مصطفى: امبينة محشيتك براسك ودافعتك على المكرودة ..

ميهمن :انتي شتخربطين .. مرتي متعرف شي عن الي صار ..ومااسمح لاحد يتجاوز على مرتي كائن من يكون ..

والي ميعجبة كلامي ليعجبة .. .

ام مصطفى: هاهية هاي بنتكم يمكم وبعد لا دزها خاف نخرب اخلاقها ... خليها هنا تتعلم من ام اخلاق .

ميهمن :والله لو ما عمتي جان عرفت شجاوبج .. بس محظورة ..

رشا اخذي ريم وصعدي فوك ..

رشا :جنت صافنة على محادثتهم وتعجبت من كمية الحقد الي ضامتة الي عمتة .. فزيت على عيطتة بية طلب مني اخذ ريم واصعد ..

رشا: يلة ريم تعالي اشوفج شجبتلج ..

ريم :جبتيلي ملاعيب كومة ..

رشا: اي كومة بابا اشترالج هم .. طبعا جنت مشتريتلها العاب للحاجة حتة اكسب ودها لان مهيمن كلي نقطة ضعفها الالعاب

طلعت من الاستقبال ..ودصعد الدرج جان اسمع صوت حجي مهيمن

مهيمن: عمة رجاءا بلا مشاكل ترة لهسة ساكت على سواية بنتج .. والا اوصلها لعمامها اخليها حتة ذبح يذبحوها ..

فاحسلج لا تدخلين بشي ميعنيج ..

رشا :خفت وصعدت قبل لا يشوفني .. لان مبين صار اعصاب ..

اخذت ريم وصعدنة وطلعتلها العاب وكعدنة نلعب ..
جان تكلي .

ريم: انتي عمة الشريرة طلعتي حبابة ..

رشا :ضحكت على طفولتها .. منو كلج اني شريرة .

ريم: ماما كالت بابا جاب مرية شريرة وراح تذبج برة بشارع وتاكلج الجلاب لا تحبيها ..

رشا :لا حبيبتي اني احبج شوفي شلون جبتلج الالعاب ..

ريم: يعني انتي مراح تضربيني وتنطيني العاب كومة مو ..

رشا: اي ماضربج لان انتي مو وكحة وتسمعين الكلام .

ريم: اي اني حبابة وانتي هم حبابة وبابا هم حباب وكلهم حبابين احبكم كلكم ..

رشا: كرصت خدها يمة فدوة للبنات الي يسمعن الكلام ..

طب ميهمن شافنة فارشين بالغرفة نلعب ...

ميهمن: ليش هنا تلعبون ما خليتها بغرفتها ..

رشا :لا يمعود خليها يمنا اليوم خطية صارلها اسبوع عايفتك ..

ميهمن: خو انتي تكيفين حتة تتهربين مني اليوم مو ..

رشا :لا مو هيج .. بس اريدها تاخذ عني فكرة حلوة ماريدها تكول اخذتك منها .. ماريدها تكرهني

ميهمن :اوووف وتلوميني ليش احبج ولج اني الله يحبني وعوضني بيج ..

رشا: زين ميهمن سؤال واريد اجابة لان والله من حقي اعرف .

مهيمن :سألي

رشا: ليش طلكت مرتك الاولى ..

ميهمن :رشا الف مرة كتلج هذا السؤال ماريد اسمعة
يعني فوك ضوجتي عود صعدت ارتاح .. (بصياح )

رشا: ميهمن اوكف حباب لا تطلع ...
عافني وطلع مادري بي وين

ريم :بابا وين راح ..

رشا :هسة يجي للحمام ..تعالي نصعد ننام بالجرباية ..
خليت ريم يمي وضلينة نسولف اشوية ورادت تروح للحمام رحت وديتها ورجعت وشفت ميهمن ماكو بلبيت عفتة على راحتة ماريد اضوجة ..

رجعت لفراشي وريم وياي وبس تسولف حجيها ينكرط .. ...ضلينا نسولف لحد ما نمنا ثنينا ..

..............

ميهمن ..

هسة اجة الوكت تعرفون منو اني ..

اسمي مهيمن عمري حاليا ٣٥سنة ذ. اكبر اخوتي الولد ..ابوية توفة من احنة صغار جانت اصغر وحدة بينا رفل عمرها سنة ونص ..

وفاتة بحرب ايران جان قائد فرقة .. واستشهد بيها
بس عافلنة املاك خير من الله .. يعني الحمد لله ماعتازينة لاحد ..

كبرتنة امي ووصلتنة للي احنة بي هسة .. بس قبل ٧ سنوات امي خطبتلي بنت عمتي جانت كلش حلوة شايلة جمال مو طبيعي واحلة خواتها..

جان زواجنة تقليدي .. تزوجة واول ايام جنت مدللها دلال مو طبيعي .. طبعي رومانسي .. واحب اعامل المرة بكل رقة لان احسها شي مقدس ..

لكوني شفت امي شلون تتعب علينة لذلك قدست المرأة وجنت ضد العنف والضرب حتة خواتي الي اصغر مني مافد يوم رفعت صوتي عليهم ..

كلة اسايسهن .. وهنة يحبهن طبعي ويطيعني ..
رغم هذا الشي جان الي كلمة عليهن ..يعني يحترمني واخواني يحترموني ..

نور الي هية زوجتي مجان عاجبها طبعي .. اكثر من مرة تهيني وتكلي انت رجال فاهي ..

مهيمن: احترمي نفسج شنو فاهي .. شفتيني اعلج النهار كلة لو العب بكذلتي ..

نور: اريدك فد يوم معصب اذا تعصب بس فراحان تهدد بابا اغلط اضرب عيط بس لا تتصرف بهلتصرفات مال فاهين ..

ميهمن: يعني لان محترمج واسايسج اطلع فاهي ..
يعني انتي تحبين الاهانة مو ...
اول مرة اشوف وحدة تطلب تنضرب ..

نور: اريد احس برجولتك ..

ميهمن: هنا فورت دمي ضربتها راشدي طبعتها بالكاع ..جانت اول مرة بحياتي امد ايدي على مرة ..

نزلت عليها سحبتها من شعرها ...تريدين اشوفج الرجولة مو ..بسيطة بعيني ..

شبعتها كتل حتة دم طلع من وجهها اجو اهلي فاككوني ..

ميهمن :ولكم موتتني لان محترمها تكلي فاهي بنت الكلب بسيطة امشي ولي لاهلج الله لا يرجعج انشالله على هاي الشوطة الي حركتي كلبي بيها ..

نور: كرة عينك هذا الله كدرك علية ..

ميهمن: ولكم بس عوفوني عليها ...فلتت منهم ونزلت عليها راشديات سحبوني سحب منها اخوية مقداد..
كال لرفل .. الي جانت بعدها مامتزوجة ..

مقداد :رفل كوميها ولبسيها خل ناخذها هاي مو مال احترامات صدك تحب الاهانة ..

رفل: كومي كومي ..

مهيمن :اخذوها وودوها لاهلها جنت ناوي اطلكها بس خابروني ورة اسبوع وعرفت هية حامل ..

وامي لحت علية ارجعها .. رجعتها وغيرت اسلوبي وياها صار كلة اعاملها بالاهاين .. حتة اخليها تعرف شلون تكون الرجولة عبالها الرجولة بالضرب والكتل ..

جتي فترات تتحجج على اقل شي ومعاجبها كلشي رغم جنت موفرها ماي العين .. بس ميعجبها العجب جانت مغرورة بشكل مو طبيعي .. وانغرت اكثر من حبلت احلوت اكثر ..وصارت تسمع مديح من النسوان بجمالها ..

ولدت نور وجابت بنية سميناها ريم ..
جانت هاملتها وكلة على امي ورفل اصلا حتة نوم تنام يمهم وهية صارت تعتني بشكلها هواي ..

وكل ماافوت الكاها لازمة الموبايل .. كامت تبتعد عني اشوية اشوية .. رغم جنت احبها واريد قربها بس دائما تتحجج لحد ما وصلت شهر كامل احنة ما متقربين ..

اخر شي طكت روحي ..وجبرتها بس شنو عياطها عبالك مال وحدة بنت شوارع تعيط بكل قوتها وتصيح عوفني ماريد .

عفتها لان هلمرة طوختها وحلفت ماجيها بعد لو مدري شيصير .. الة اخليها هية تتوسل ..

جنت اروح للدوام واجي امي تتلكاني ورفل تغديني وتهتم بملابسي .. يعني تركت مسؤلياتي ..وصابر عليها ردت اشوفها وين تريد توصل ..

مرة جيت من وكت قبل موعدي صعدت للغرفة سمعت صوت سوالف فتحت الباب لكيتة مقفول ..

دكدكت بسرعة واحاول افتح صاحت ..

نور: منو ..

ميهمن: اني افتحي شكو قافلتها ..

نور: دقيقة دبدل..

ميهمن :اشوية وفتحت الباب .. جانت ضاربة مكياج صاروخي متحملت .. طبيت وسديت الباب ردت احضنها جريتها لفت انتباهي شي يلمع جوة الجرباية ..

بس من حضنتها كالت..

نور: اييع ريحتك موطيبة ..

مهيمن: .. شميت روحي عطري بعدة بقميصي ..
كتلها .. خير سالمين منين تجيني الريحة اشو سابح الصبح ودنيا شتة وعطري من هذا الغالي
شووو دولي مو صوجج .

عفتها واخذت هدوم ابدل برة بعدين تذكرت الي يلمع جوة الجرباية ..

رجعت عليها نزلي حضريلي الحمام بسرعة ..

نور: اوووف ماشي ..

ميهمن :اول ماطلعت رحت جريت لكيتة سيت نوم حتة مالابستة الي جان شكلة احمر صارخ وكلة تتر يلمع شكلة مغري ضليت اتمعن بي ..اريد اعرف اشوكت لابستة الي ولا مرة شفتة ..

صعدت وشافتني لازمة ... فتحت عيونها وجتي
لكفتة مني وراحت ضمتة بالكنتور ..سألتها ..

..نور المن جنتي لابستة .. اشو مشايفج بي ..

نور :مو مالتي هذا جبتة من اختي وجنت اكدرة ..

مهيمن: والمن تكدري واحنة اخوان رجعي الها وانطيها العندج بعد احنة مو بعازتهن ..

عفتها وطلعت بس صار عندي شك مو طبيعي ..
بس مابيت الها ..

رجعت ثاني يوم طبيعي هم ومر كم يوم اني اراقب تصرفاتها ماتفتح تلفونها يمي ابد وبليل تقفلة وتنام جنت انتبه عليها بس ماابين اريدها تتطمن من ناحيتي ..

فمرة هية نايمة جريت الموبايل وفتحتة طلعت مغيرة الرمز .. اجاها اشعار رسالة بس ماكو شي .. يعني مسوية اخفاء ..

هنا صار شكي بمحلة .....

ثاني يوم رحت للدوام عادي  ومن رجعت رحت اشتريت موبايل ابو الكامرة الحديثة وسعة تخزينة عالية ..

رجعت للبيت طبيعي وبليل نفس الحالة .. مابينت الها شي ....

وراها كعدت الدوام .. طبعا هية متدري شسوي مااسوي لان متكلف روحها وتكعد وياي .. حتة من اسأل امي تكول والله ماتنزل غير بس من تسبح وتصعد قبل لا تجي ..

اصلا بس اسم زوجة لا واجبات ولا حقوق ..

ثبتت الموبايل بعد ما شفتلة البارحة مكان يبين كلشي منة ...غطيتة بالغراض وبس بقيت مكان للكامرة

دست تشغيل وعفتة وطلعت

رحت للدوام على اعصابي مدري شلون كمل الدوام ..

رجعت للبيت واني اتامل انو ميكون شكي بمحلة اتمنة اطلع غلطان وانو اكون ضالمها

اول مرة بحياتي اتمنة اطلع غلطان بشي متاكد منة
بس مثل ميكولون الغركان يتعلك بكشاية ..

طبيت للبيت اقدم خطوة وارجع عشر خطوات ..
طبيتلهم تلكتني امي بالي مو يمها .. كبل صعدت ماعرف شحجت رفل بس اشرتلها بمعنا لا ..

صعدت لغرفتي هم لكيت الباب مقفولة ..
فتحتة جانت سابحة هستوها ..

حتة كلمة هلة مكالت رجعت مشطت ونزلت جوة ..
رحت للموبايل لكيتة طافي شحن ...

ردت اكفر الة اشوية ..
ركض رحت شحنتة وانتظرتة يفتح ..
ضليت اشوف بالفيديو جانت نايمة .. ضليت امشي بي..

وصلت للساعة ١٠ تقريبا ..كامت من الفراش راحت ورجعت يمكن غسلت .. اجتي بدلت ولبست ثوب نوم شفاف اسود مغري حيل ..

ابد مشايفة عدها ..ولا اذكر لابستة الي ..
بعدين بدت تتمكيج ..

عدلت شعرها وراحت الموبايل ..
طبعا الكامرة حاطها على تاج الجرباية .. لان اعرف بيها تكعد هنا دائما لان متتحرك منها ..

كعدت صار طرف راسها بالكامرة فتحت موبايلها وشفت حتة الرمز ..

ضلت تراسل وراها صار اتصال كامرة ..
فتحتة ويا شاب ..هنا عقل ماضل براسي ..

صعد شي لراسي بس لزمت اعصابي ..
وراها بدو يسولفون كلة كلام حب وغزل ..

بعدين بدو يسوون شغلات ردت اذبحها ..
تسوي شغلات الي ممسويتها .. واني اكول مترغبني .
لان عدها اسلوب محدد وهوة الشتم والمسبة والاهانة ..

ماتحملت اشوف اكثر ..

رحت طفرت ونزلت جانت تسوي ريوك الها ..
لزمتها من شعرها سحلتها للغرفة الفوك كلة سحل من شعرها ..

لزمتها ملختها ماخليت شي صاحي بيها لزمتها من شعرها ولطخ براسها بالحايط و نزلت عليها اخنكها وهية متعرف بية اني دريت ..

ازركت بيدي .. محسيت غير مقداد دفعني طلع كاسر الباب وطاب ..

كوة اخذوها مني وشالوها ..
ودوها للمستشفى ..
كمت اعيط هاي عار مال ذبح... والله اذا اشوفها اذبحها ..

اجتي رفل..

رفل : شبيك مهيمن علكيفك .

مهيمن: ولج هاي عار حرامات تعيش

رفل :اهدة عيني وبعدين نسولف ..

مهيمن :رحمة لاهلج طلعي من يمي لا ابتلي بيج

ورة اشوية اجتي امها هدادة ..
نزلت الهة واني عيوني دم اعصاب اريد بس الزمها لنور

ام مصطفى: هلة شرف النسيب النجر .. بلة ماستحيت على روحك.. كاتل البنية بدون سبب ..

متلام من تصيح طلكوني منة مخبل وتجي حالات خبال ..

مهيمن: هاي اني هيج مو ..من رخصتج انتظري اشوفج اشوية من حالاتي وكوليلي الي عندي شنو نوع المرض ..

رحت جبتلها الموبايل وجيت جانت كاعدة رفل وامي وياها ..

فتحت الفيديو .. وشوفتلهن كلشي بس لحد مابدت تقوة سالفتهن ..كلتلهن ..

ماكدر اكمللكم بعد .. لان اذا اشوفة بعد احتمال اروح اذبحها وماابرد لحدما اشوف دمها يمشي بمجاري مو بالكاع لان ياعمة بنتج عار ..

واذا شفتها او لمحت خيالها صدكي اذبحها لو بعد ١٠٠ سنة ..ماريد اشوفها .

وهذا الفيديو يمي يبقة اي كلمة زيادة اشوفها لعمامها همة يتصرفون وبوكتها تصير فضيحتكم على كل لسان

من هسة اكوللكم طلباتي ..حتة يبقة الفيديو يمي ومحد يشوفة. .

ريم الي هية عود بنتها توقع تنازل ومتطالب بيها ابد .

والمقدم والمؤخر واي شي يخصها بهذا البيت من غرض تتنازل عنة وتروح بطرك الي لابستهن هسة

امها خرست بعد مافتحت عيونها ...

وفعلا طلكتها بدون ماتاخذ شي وياها  وحتة بدون مااشوفها ولهسة نارها بية اذا اشوفها اذبحها ..ومحد يحاجيني الحك الي ..

اول شي سويتة بعد الطلاك لميت غراضها كلهن حتة مكياجاتها ..وكلشي يخصها ذبيتة بقطعة ارض متروكة وصايرة مزبلة وحركتهن ...

مرت الايام وماحسيت بغيابها ابد لان جانت وجودها مثل عدمة حتة جانت توصل ايام كلام ميدور بيناتنة ...

ريم اصلا متعرفها ..

مرت السنوات امي جانت تلح علية اودي ريم تبات يم امها وجان كلامي نفسة ..

يمة تروح وياج وترجع وياج غير الساعة ماكو ..

وجان كلامي يمشي ..

ريم صار عمرها ٤ سنوات.. وماخذة جمال امها ..
امي تلح علية اتزوج بس اني جنت ارفض الفكرة لان صعبة اثق بمرة بعد اذا مااعرف طينتها شنو ماريد اكرر الي عشتة

فد يوم بليل اختنكت حيل وحسيت الدنيا صغيرة احس روحي متبهذل واريد مرة بحياتي ..

طلعت افتر بالشوارع .. للفجر .. كلت متسوة ارجع البيت طبكت يم باب الكلية وجان الدوام مصارلة شهر من بدة بالنسبة النة الاساتذة اما الطلاب هذا اول يوم ..

طفيت السيارة وسديت الجام وخليت مجال للتهوية ..

وغفيت .. حسيت على صوت بجي .. فتحت عيوني واشوف بنية تبجي جانت تمسح عيونها وتباوع  بالجامة مال سيارة ..

ضليت صافن عليها .. ومستغرب ..
بعدين طلعت كحل وفتحت عيونها وقربت علية واني شفت الغضب .. شفت عيونها .. سبتني سباية ... متحملت نزلت الجامة ...

هية فزت خطية ..

بس شنو من لسان رشاش مو لسان ..

دخلت بالي .. واخذت عقلي وحتة كلبي بعيونها ..

ضليت اراقبها .. وحاربتها بكل الطرق .. في سبيل الكة زلة عليها واقنع كلبي يعوفها ..

عرفت سبب وحشيتها وعنفها ويا الشباب ..بعد مااستجوبت صديقتها المقربة هند ..

عرفت جرحها شنو .. من يمي حقدت على خطيبها ..

من شفتها متأذية من الخيانة كلت هاي هية لازم اعترفلها لان الي يجرب الخيانة يكوم يتحاشاها لان يعرف لوعتها شنو ..

بديت اتقرب الها لحد ما قبلت بية شكد حبيتها من شفت معدنها شنو .. وتاكدت هاي الي راح تصوني ..

بليلة السبعة من انفتح موضوع نور متحملت .. طلعت من البيت افتر بالشارع ... ماكدر افضح انسانة عندي منها بنية .. باجر عكبة بنتي يعيروها بامها ..

موضوع كاتمة بكلبي سنين .. وماكدر احجي لاحد ..
لان العار يركبني ويركب بنتي قبل اهلها ..

حتة الفيديو مسحتة وكسرت الجهاز .. بس محد يدري لان لو اموت مااشوف الاحد الفيديو ..

رجعت للبيت طبيت للغرفة بعد ما رتاحيت من غيرت جو ..

شفتها نايمة وحاضنة ريم .. يمكن ولا مرة شفت نور سوت هيج شي لبنتها من جانت صغيرة جانت ريم نومتها واكلها وشربها وهدومها  يم امي ورفل ..

مجانت عدها حنية على بنتها ..
اصلا شيل متشيلها ..

رحت من جهة رشا رفعت الغطة على كيف ومديت ايدي حضنتها وغفيت احلة نومة .. حسيت باحساس حلو ... اني ومرتي وبنتي ..  اول مرة انام هيج نومة .

...
يتبع ...

تحياتي Aseel..

هاااا هم كولو قصير البارت ..

لا تنسون التصويت حبايب .. وياريت تسوولي دعم بكل مكان اريد تعلون المشاهدات .. ووعد اذا صعدن المشاهدات لل١٠ الاف اسويلكم بارت ٥ الاف كلمة ..

وتدللون..

احبكم 🌹🌹

احبكم