رواية قضية طلاق الفصل الخامس والعشرون 25 - بقلم Aseel🤗

مرحباااا بارت هدية ..

قضية طلاق ..

بقلم Aseel...

بارت ٢٦ ....

...............

رشا: انشالله .. ضليت ادعي واقرة ايات مال تسهيل وانخة بكل الائمة انو ميطلع ولادة بس الاوجاع كامت تزيد واحس روحي تطلع من الوجع جنت ويا كل لوية اعصر ايد امي واعيط ..

ام سامر: يمة استعجل هاي مبينة راح تولد ...

رشا: يمااااا احس شي نزل علية الحكي ..

ام سامر :ولك الحك اختك سامر ...

رشا :مرت ثواني احس بيهن سنين من الوجع ..
وصلنة وراح سامر يركض يجيب سدية لان ماكدر امشي فضيحة اصير ..

اجة مهيمن تلكانة وعمتي تصلي على النبي ..

مهيمن: شبيج شجاج متكليلي ..

رشا: راح اموت مهيمن ..

مهيمن :اشش ماكو شي لا تخافين اني يمج اصبري ..

رشا :مهيمن لا تعوفني ابقة يمي ..

مهيمن :باقي يمج والله هياتني ..

رشا: لزم ايدي واني كل متجيني اللوية اعصر بيها ..
اجة سامر وشالوني من السيارة ونيموني بالسدية ..

ماتركت ايد مهيمن ولا هوة تركني نسيت الوجع الي سببه الي ونسيت تغيرة علية نسيت اهمالة الي ..

كل الي فكرت بي هوة وجعي ووجودة بجانبي بهاي اللحظة الي جانت كفيلة تمحي كل ذنوبة باتجاهي ..

طبيت جوة واني كوة رضيت اهد ايد مهيمن عبالك راح يطير اذا اهدة .. اتمسكت بي لحد ما امي جرت ايدي ودخلتني بالردهة جنت فاقدة من الوجع مااحس بالي اسوي ...

طبيت للدكتورة .. فحصتني ..

الدكتورة: بسرعة للولادة الطفل راسة مبين ..

رشا :اني سمعت هيج كلبتها مناحة ..

الدكتورة :شكو ليش تبجين ترة عادي ..

رشا :بس الطفل بعدة بالثامن ..

الدكتورة: معليج احنة نهتم بي انشالله مابي شي

رشا :دخلت للولادة جانت من اصعب لحظات حياتي ...عمري مراح انسة من الوجع الي شفتة لو من طلعو ابني ازرق ويضربون بي وميتنفس ... احس شي قبط على كلبي ...

نغزة براسي .. وعيوني غوشت..
اخر كلمة سمعتها ...
...دكتورة لحكي هاي دتنزف ....
...........

فتحت عيوني اشوية اشوية ..

ماما .... اريد مي ... حلكي يابس ..

مهيمن: الحمد لله على السلامة خوفتينا ...

رشا: ركزت شفت مهيمن لازم ايدي والايد الثاني يمسد بشعري ..

بس انطوني مي ...

مهيمن: اتحملي عيني بس يخلص المغذي واشربي ميصير ..

رشا: تذكرت الي صار كمت ابجي ..
مهيمن ابني وين .. عليك الله احجي ... وامي ليش مو يمي احجي صاير شي ..

مهيمن: اهدي ماكو شي والله بس اشوية حالتة تعبانة وبالخدج حطوه لان الرئة بعدها مكاملة كلها .. لان اجة قبل اوانة ..

رشا: يعني مابي شي ..والله ..

مهيمن :شبيج رشا يعني الي خلك هسة اتشاقة وياج ..

رشا: لعد امي وامك وين اشو ماكو ..

مهيمن :اي غير يم الطفل قابل يعوفنة ياعيني...
اشبيج مدري شلونها اسألتج

رشا: اخاف عليه ... متدري شلون شفتة من طلعوه ..

مهيمن: ادعي يكوم بسلامة ..

رشا :مصارلي مجال اسألك شراح تسمي .. لان مجنت موجود حتة اخذ رأيك بالاسم ..

مهيمن: بكيفج انتي ..

رشا :خلي امك تسمي مو هية جانت تريد ولد خلي هية تسمي حتة يصير عزيز عدها ..

مهيمن :انشالله محتاجة شي حروح اشوفهم شمحتاجين ..

رشا :لا ممحتاجة بس سلامتك ..

طلع واني غمضت عيوني وغفيت ..
حسيت اصوات يمي وبوسات بخدي ..

فتحت عيوني واشوف حبيبتي زهرة .. حضنتها واني نايمة ...

رشا: اووف شكد مشتاقتلك حقيرة هيج عفتيني بس تزوجتي ..

زهرة: شسوي غير انس ميقبل اطلع خاصة لبيتكم ..
وهم ايات شالعة كلبي بالطلعة هسة بالموت كدرت اجي وربع ساعة وارجع ..

رشا :عليج الله تعالي ترة تعبانة ومحتاجتج يمي .

زهرة :انشالله يعمري اذا كدرت والله .. متدرين بابن عمج عقدة ..

رشا :وشجابرج متكليلي ..

زهرة: ممجبورة بالعكس مرتاحة ويا حيل مدللني واهم من هذا ... حلو جنة حلقومة .. الله يخلي الي ..

رشا: الله يحفظة الج ..

زهرة: يلة اني حروح حبيبتي .. ماريد اتاخر انس واكف برة يم الولد ووصاني اسلم عليج ..

رشا: الله يسلمة سلميلي وبوسيلي ايات ..
دنكت بوستني وكالت ..

زهرة :يوصل عيوني .. دربالج على روحج حبيبتي ..

رشا: انشالله ..الله وياج .
طلعت زهرة واجتني امي وعمتي يسولفن وياي واني ريكي احسة كام يلزك من العطش والمغذي مناوي يخلص ...

يمة دخت من العطش بس اريد مي راح اموت ..

ام سامر: يمة تحملي ٥ دقايق ويشيلو وانطي الج مي والله..

رشا: امري لله ..

ام مهيمن :شراح تسمين حفيدي ..

رشا :عمة انتي سمي هذا حفيدج ..

ام مهيمن: لا شلون انتي انتو اهلة ..

رشا :انتي بيبيتة اولى بي راح يصير عزيزج فسمي انتي ..

ام مهيمن :اذا هيج اسمي مصطفى ..

رشا :حلو ... يجوز متصدمين جنت مفكرة بي والله.

ام سامر :اكو احلة من اسم النبي

رشا :يمة ابني وين شوكت اشوفة ..

ام سامر :مو هسة حبيبتي فد ١٠ ايام يلة يطلع وضعة تعبان اشوية ويرادلة عناية طبية ..
راح اروح اصيح لممرضة تشيل المغذي قبل لا يخلص ..

رشا :ووياج مي يمة ترة حموت والله ..

ام سامر :"انشالله يمة .

رشا :راحت وضليت امطك على مي ..
جتي الممرضة وشالت المغذي واني عيوني على بطل المي العركان من البرودة واتخيل شلون اشربة ..

اول مراحت الممرضة جريتة من امي وشربتة كلة احس روحي ردتلي مجنت عايشة هسة عشت ..

مر على دخلولي ٣ ايام استقر وضعي لان جان عندي فقر دم ونزيف ..

جان مهيمن رغم اهتمامة بس احسة بارد ... اهتمامة مال واجب مو مال حب ولهفة ..

كلت كلشي يهون الي راح مضى وخل يولي ..
راح ارجع لبيتي وارجعة لحضني ..

كتبولي خروج .. وطلعت للبيت واني صدري يوجعني .. وكلبي بنغزني على ابني الي ماشفتة غير مرة وحدة بالخدج ..

جان احمر حيل وكلش صغير وملفلف بقطن واجهزة هواي بي ..

تدمع عيوني من اذكر منظرة سودة علية ..
طبيت للبيت وذبحو جوة رجلي ذبيحة...

طبيت لغرفة امي الي بيها جربايتي ..امي جانت وياي ...عمتي ومهيمن ضلو يم ابني ..

طبينا وسلمو علية وكرايبنا جانن كلهن موجودات يتحمدولي بسلامة ....

مر اليوم عادي .. وهم اجة الليل .. واخ ياليل ..جنت اتحسر على مهيمن هس ابني وابوه ..

جنت هناك مامنة بنفس المكان حتة مهيمن مجان يبقة يمي بليل امي تضل وهوة وامة يروحون بالخدج يم الطفل .

اتصلت بي اشتاقيتلة كلش واحس اختنكت .. جانت الساعة تقريبا ب١ ونص ..

طلعلي مشغول .. هنا كلبي راد يطلع .. اتصلت مرة ثانية هم مشغول .. صار بية هوس اتصل واتص واتصل بالساعة والساعتين ...

اخر شي اتصل طلع رنين لغاه وانطفة النت عندة ..

محد يعرف شنو جان شعوري بلحظتها .. مدري قهر مدري وجع مدري الم ... والله حسيت بوجع كلبي .. احس النفس يوجعني ..

لازم ارجع لبيتي .. قبل لا اخسر مهيمن
ماتحمل فكرة خسارتة او فكرة وحدة ثانية تشاركني بي..

مرت ال١٠ ايام امر من المر .. كل يوم يزيد عذابي .. من اشوفة مشغول .. حتة مااتصل وكلي شمحتاجة ..

عمتي تتصل واتمنة بس اسمع صوتة من تحاجيني ..
بس ماكو .. كل مااكللها وين مهيمن تكلي برة يدخن ..
ارجع اتصل عليه يطلع مشغول ..

شكد مااحجي ماراح اكدر اوصل المي بهذيج اللحظة ...جنت محتاجتة باعز اوقاتي ...

هاي اللحظات الي ابقة اتذكر تفاصيلها للموت ..

اليوم يطلعون ابني واترس حضني بي ..
جنت متلهفة عليه ...حاطة كرسي وواكفة بباب المطبخ البرة ..

ام سامر: ولج يمة مو زين عليج انتي نفسة طبي تلفلفي ..

رشا :يما خليني هنا حيجي ابني ..

ام سامر: ادري يعني من تطبين جوة مراح يجي ..

رشا :لا يمة الثانية عندي بسنة ..

ام سامر: الله يحفظة الج ..

رشا: طب مهيمن ووراه عماي جايبة ابني مصطفى ..
وملفلف مامبين شي منة ..

كمت ركضت عليهم .. واخذتة من عمتي واني ابوس واشمشم بي ..

اخذتة وطبيت جوة ..
مهيمن مدار بيني وبينة كلام لان اخذت منة موقف من اخر شي سواه وياي ..

والي هوة جان قبل ثلاث ايام من اراسلة مجاوب حتة لو يقراهن ..

اخر شي طكت روحي كتبتلة لو تموت بعد مااهتملك ..ردلي بلايك صغير ..استفزني اكثر ..وحلفت مراح اهتملة لحد ماارجع للبيت وارجع رشا الاولية ..

طبيت ركض للغرفة وطلعت صدري حت ارضعة ميقبل ياخذة .. بسرعة دمعت عيوني كالت عمتي ..

ام مهيمن :ولج ماما مو هيج كبل الطفل تعلم على الممة ...

رشا :لعد شنو مراح يرضع مني ابد ..

ام مهيمن :لا ماما مو هيج بس اول شي حطي حلاة حتة يسلذ بي وياخذة ..

رشا :وصدك حطيت مي وشكر وكام يرضع .. صح وجع احس بس عندي بالدنيا ..

كمت ارضع بي واني ملامسة خدة شكد ترف .. جان وردي على حمار وبوجهة شعر ناعم قريب للون الابيض ..

مجنت مصدكة هذا الي .. هذا ابني الي صارلي ١٠ ايام متلوعة على شوفتة ..

طب مهيمن وسلم علية مرديت ...رفعت راسي شفتة صافن علية ورافع تك حاجبة ..

اعرف هاي الحركة يعني ضاج من تصرفي ..
هز ايدة وكال ..

مهيمن :يلة يمة خل نروح نجي باجر تعبان اريد اسبح وارتاح عدل ..

رشا :حجة وطلع ..حتة مكال في امان الله..محتاجين ممحتاجين هوة ابو الراهي .. هم عاجبتة روحة...

ابو الوصخ تريد تسبح لو تريد تحاجي الدايحة ..

اني الك بس خل اكوم على حيلي اصطبرلي ..الة اعرف كرعة ابوها منين هاي بنت الكلب ..

....يتبع ...

ولكم عيوني راحت كمت اشوف ثنين ثنين ...
بس فدوة الكم ..

ملاحظة اكثر من مرة اغفة على الجهاز من التعب والنعس ... في سبيل اوصللكم الاحداث بصورة تخليكم تحسوها وتعيشون وياها.

تصوييت ..تصوييييت تصوييييت ..

اعذروني على التقصير .. وهاي قفلة مابيها شلل ..

تحياتي Aseel.

احبكم ❤❤❤❤❤❤❤