رواية كفي والمنجمه الفصل الحادي والسبعون 71 - بقلم Leo Alfatlawi

فتحت الكام وأشوف كدامي أوراق مسجل باسم غزل معتصم وختم جواهن. -شنو هاي مصطفى؟ -رجعتلك أملاكك. -عزا! شلون؟ -شغلي هذا، بعدلج. بس الكاع مال صبوحة شغلة أسبوع تكون باسمج. -مصطفى فدوة، منريد مشاكل ويه مؤتمن، كافي الصار. -ماكو مشاكل، لا تخافين. أصلاً محد يدري شلون ردن باسمج، حسبالهم خربطة من الشهر العقاري، جايه غلطانين بالاسم، وهسه لازم ترجعين تبصميلهم من جديد. -وجدو شنو وضعه؟ -سلم عالشهدا اللي معاك!

يطبه حريشة حضرة جنابه الكسيف، فرحان موازيكم ماخذهن بنص السعر، بس والله جسر كلبي من شال الفصل كله بفلوسه ههههاي. -شنو كاللكم؟ أجي أوقعله؟ -أي ولج، من الصبح لسه حلقه يابس وشايط، واكع بركبة مؤتمن، رد مرتك خلي تعيد البيعه. -أوقعله على مرض بعد. -ههههه حتى مؤتمن هم عرف السالفة، أصلاً ما رد، عافه ينبح وكام طلع. صدك رجاء انطتج عمرها؟ -خطية الله يرحمها. -من كلبج غزل؟

-والله من كلبي. هم خطية رغم السوته، كافي عليها من شافت ابنها ميت بأيدها. -يلا ولج ولي، أريد أنام. صدك شوكت تجين؟ -ما أعرف، بس دا أحس بتعب ما أكدر. -لا سلامتك. شوكت موعد العملية؟ -هذا الأسبوع. -أوف، هذا الأسبوع ميصير. تتأجل شوية لو تتقدم؟ -لا لويش؟ -موش مؤتمن عنده سفر خارج القطر؟ -إشكَد يبقى؟ -ما أعرف، بس أظن يوصلهن ويتفق ويه المستشفى ويجي. -ألمن رايح إشعده؟

-رايح يكمل كراهه بقلبج، حتى من يدخلوا بتابوت بدل ما تبجين تفلين عليه. -ما فهمت شدتقصد. المهم خليها فرد مرة مفاجأة يجي يشوف ابنه. -الله كريم، يلا ولي أريد أنام. -سلم وسد الفون. مر يومين، أجه عمو أبو سيف ومرته من السفر. كل ظني ماما راح تغار، بس جان وضعهم جداً طبيعي يسولفون ويضحكون ولا كأنما اكو شي. أخذوا الغرفة الجوة لأن شغلتهم مطول كم يوم ويرجعون. نزلت لكيتها تلعب بكيوت يمه كاعدة. كعدت كلتلها:

-ماما لا تكولين كدام أحد منفصلين. -لويش حبيبتي؟ حريتي هاي، شنو الغلط؟ -ماما مؤتمن إذا دره، ما راح يخليني. هسه يكول رجال غريب. -منو غريب ولج؟ ابن خالي وزوجته ويا بعد، شنو الغريب؟ -ميخالف، فدوة بين ما يمشي لا تحجين. ما أريد مشاكل، مو بالبالج بأمريكا بعدنا هنا كلشي ممنوع. -لج ماما بيته هذا، فوك ما متنازل الرجال وقابل نظل بي. -فدوة إذا سألك مصطفى لو مؤتمن، كولي رجعتله لخاطري. -ديلا كملتي تحضير؟

خلي نلحق نروح، ما طولهم هنا باقين بالبيت. رحنا أني وماما، جيكنا الوضع وحجزنا بالمستشفى. طلبوا العقد، لازم ماكو غير مصطفى يجيبه الي. كالوا لازم قبل هالايام تجين. ردت ماما بس نحضر أمورنا ونجي. ما عنده شي، كملنا الحجز ورجعنا. وكفت بالطريق أشتري كم شغلة أعتازهم. بعدنا واقفين نشتري ومؤتمن خبر ماما كالها راح أجي أشوف كيتي. رجعنا عالسريع للبيت.

دخلت شمرت الغراض، ما بيه كلش تعبانة. غيرت ملابسي، شلت شعري. نزلت، اندق الجرس. ضليت بالصالة ما صعدت غرفتي. لأن جنت مشتاقة أسمع صوته، كلش أحس كلبي رف مجرد عرفت جاي. بعد ما كدرت أتحرك، ردت بس ألمح شكله لو أسمع ضحكته ويه كيوت. دخل للطرمة، أعرفه من يجي ما يتعدى الطرمة وكيوتي تروحله. كعد وكيوتي طلعت تركض تتلگاها. يضحك شالها يبوس بيها يگلها: -هلو بابا، شلونج؟ غمضت عيوني. إشكد مشتاقتلك!

شنو من قلب شايل، ما سألت، ما كلت شلونها، إشكد صاير ما شايفها، ما حنيت، ما ذكرك موقف مر بينا، كلمة حلوة. ش هالحقد الشايله بقلبك؟ ضلت ماما يمه تسولف. كالتله كيوت: -بابا أجينا سرعة سرعة. -أهااا، جنتي طالعة يبعد أبوچ؟ ماما: -أي والله طلعنا، اشترينا كم حاجة وأنت خابرت. كلنا شيرجعك بعد، أجيت خلينا المشترة غير يوم. -لا والله ما أكدر أجي، لأن عندي سفر بره. -أهاا، عمل أكيد؟ -لا والله علاج. -هم رجاء؟

-لا رجاء راحت لرحمة ربها قبل كم يوم، أول البارحة خلصت الفاتحة. بس دعاء عدها علاج وحجزنا لإيران، باچر السفر بحيل الله. -شنو بيها خير؟ -ما أعرف، شغل حريم. أني سمعته كال دعاء وعلاج وأني أحس النار طلعت من كلبي. يعني هيچ خلصت البينه، خلص كلشي. هيچ هنت عليك؟ حتى سؤال ما تسأل وماخذ دعاء تعالجها حتى تجيبلك طفل. لعد إشكد حقير وحرامات بيك الحب اللي حبيته إلك.

جنت واقفة، كعدت بالكاع أحس كلبي وجعني. وأني اللي أريد أسويله مفاجأة هههههه. طلع أصلاً ما مفكر بيه من الأساس. هذا مكمل حياته وماشي كلش تمام وجاي حتى يسلم. مسحت دموعي. خلص، على شنو كاتلة روحي على واحد ما يستاهل من الأساس. الله يلعنج دعاء، عرفت شلون تاخذه وصار الها. دخلت ماما، كال: -شكو كاعدة هنا؟ -ماكو ماما، حسيت روحي دايخة. -بيج شي ماما؟ احجي. -لا بس هيچ لوية أجت ببطني. -عزا بعينج غزل!

ديري بالج أنتي مو مال طبيعي، روحي نامي ارتاحي. -أوك ماما. كمت ردت أصعد. شفتها دخلت للمطبخ. ما أعرف شنو أجه براسي، يمكن ردت أحرك كلبه مثل ما حرك كلبي. ردته يشوفني وأني حامل وضامة عليه، ما معبرته. ما أعرف بس ما شفت نفسي غير أطلع من باب الطارمة. صار كدامي جان مدنك على صوت كيتي. كالت: -هياتها غزل! شال راسه باوعلي، صارت عينه بعيني. رجع دنك ما يريد يشوفني. كلتله: -توصل بالسلامة. -مشكورة بنت عمي.

-الله يرزقكم طفل إن شاء الله. هز راسه وكال: -إن شاء الله. ما شال راسه أبداً. بسرعة باس كيوت خلاها بالكاع، كاللها: -يلا بابا راح أروح، شنو أجيبلك وياي؟ -دب. -من عيوني. كالها وباسها. اندار راد يمشي. كلتله: -مؤتمن.

أخذت نفس وطلع ما اندار ولا وكف. إشكد حسيت بقهر وقتها بس مو بيدي. ردت ياخذني بيدي ويآمني، يوكف وياي وأني شامرة روحي بالموت. مشتاقتله غصباً عني. ردت أحجي ويا، ردت يشوفني شايلة ابنه ببطني، ردت يشوف شلون ضحيت بروحي لخاطره. الليل كله وأني أتقلب من الحركة، ميتة ما كدرت أنام. قلق من الولادة لأن دا أحس أوجاع. وغيره تاكل بقلبي من سمعته راح ياخذها. أحس بخنقة وقلبي يوجعني. أني ما سويت ويا شي اللي هيچ فجأة خلته يتخلى عني.

ردت بس أحد يهديني ويشيل عني. ما لكيت غير اتصلت بسماح، ردت بجيت. كالت: -أشبيج غزل؟ -مخنوكة. -أشبيج خيه؟ -سافر مؤتمن لو بعده؟ -لا الصبح إن شاء الله. تردين شي؟ -لا بس إشكد راح يبقى؟ -والله ما معروف، يمكن بس يوصلهن، ما ندري. -حسب علاج دعاء مو؟ -أوف، أي خيه. صار شهر تدك وتلطم تكله من وراها بعد ما يصير عندي، وتتوسل يعالجها. كوة قبل يحجزلها، كالها ما أظل وياچ، حدي أوصلچ وأرجع. راحت أمها وياها، خلي نخلص من دوختها. -وينه هسه؟

-يمها، جاي يلمون غراض السفر. -كومي انطيني إياها دا أحجي وياها، رايدة شغلة منه. -غزل، شرايدة؟ -بس عندي شي دا أريده منه. كومي بسرعة يلا، ما أعطله بسرعة. -ما أدري، خلي أشوفه كاعد نايم. خليج وياي. كامت وأني ضليت عالخط وياها. صعدت عالدرج وصلت غرفته. دقت الباب. فتحته دعاء. كالتلها: -ها سماح؟ -مؤتمن نايم؟ -لا بالحمام يسبح. هم يا الله وقت طلعتنا. رايدة شي؟ -لا بس غزل عدها شغلة تريدها. -وينها؟ -هاي بالنقّال.

-جيبيها أنه أوصله إله. كالتها وأخذت الفون بسرعة. أسمع سماح تتجادل وياها. تالي انسدت الباب. فتحت كام. كالت: -ها غزل شرايدة؟ وضحكت. أباوعلها لابسة قميص نوم يخزي. باوعتلي عضت شفتها وضحكت كالت: -أمري. -وين مؤتمن؟ -هههه يسبح. -أوك، أنطيني إياه دا أحجي ويا. -والله ما فارغ. نريد نلم الجنط ويه الفجر السفر. عود جاي ألمهن، ما خلاني أتشيطن عليه تالي مثل ما تشوفين إذا ما أشبع ما عافني هههههه. غمضت ما أريد أشوفها. كالت:

-إشبيج عميتي؟ وضحكت بصوت عالي. أسمع مؤتمن كال: -ويا من تحجين؟ دارت الكام. أشوفه كدامي ينكث بشعره. شافني دار وجها. كال: -إشرايدة؟ كامت يمه كامشة الفون وكامشته من ظهره تمشي إيدها عليه. كوة اتمالكت نفسي. أخذت نفس كلتله: -أريد العقد. -شتسوين بي؟ -عندي شغلة بي. -سهلة، أدزه بيد مصطفى. يلا بويه دعاء كملتي غراضچ؟ -مؤتمن! -أستغفر الله! دعاء غلقي النقّال، ما فارغلها. -طلكني. أتحسر وكال: -من أرجع سهلة.

كالها وهو أصلاً ما باوعلي. -لويش مو هسه؟ -لازم مؤمن، لأن هاي الأخيرة حتى نخلص فرد مرة. -باچر ح أدخل مستشفى. -الله يشافيچ. -شنو ما راح تجي؟ -عندي سفر. -يمكن أموت ما أطلع منها. -عليش؟ شكو شعدچ داخلة؟ كالها وباوعلي. -شغلة ما تخصك. -أها ما تخصني. جا الأعمار بيد الله، مو يمي. الكاتبه الله هلا بي. -ما راح أسامحك عمري كله. الله ياخذك إذا اكو شغلة اتندمت عليها هو حبك. روح مؤتمن، هسه أكدر أكلك انتهت من صدك.

اندار باوعلي ما رد. من الحركة حسيت بطني وجعتني. عصرت نفسي. طاح الفون ما تحملت. صرخت: -مامااااا لحكيني! لج ماماااا ح أموتتتت! أعصر ببطني أحسها تتقطع. دخلت ماما على صوتي. كالت: -إشبيج؟ -ح أموت ماما بطني! -عزا بعينج! كلتلكي ارتاحي نامي. وين أوديج هسه؟ -ماما راح أموت بعد ما أتحمل! -هسه انتظري، أصيح عمچ يحضر السيارة. طلعت ورجعت تركض مخبوصة أكثر مني. كالت: -كومي لبسي بسرعة. راحت رجعت تركض. كالت:

-لا لا خليچ أخاف توكعين، أني أجيچ هسه. طلعت تركض. أحس بطني تتقطع، أعصر بيها. متت أريد أكوم ما أكدر، وجع مو طبيعي. أسمع صوت مؤتمن يصيح بالفون، بس ما عندي قدرة أشيله وأغلقه لو أسمع شنو يحجي. دخلت ماما كومتني. طلعنا ردت أنزل ما كدرت متشنجة. صعد عمو شالني ونزل يركض بيه. دخلني للسيارة. صعدت ماما وكيوت.

الطريق صار إشطوله. شفت الموت. كل عصرة تاخذ روحي من الألم. الطريق طويل وأني حسيت نهايتي هاي من الخوف والألم. فقدت بعد ما أحس بشي. فتحت عيني أحس راسي دايخ. كوة أفتح عيوني. السيروم مشكل بإيدي وبطل دم هم بإيدي الثانية. أسمع دكات قلب وأحس جهاز على بطني. باوعت لكيت مثل الوايرات على بطني. درت وجهي ردت أصيح ماما. لكيت مؤتمن كاعد مدنك خال راسه بين إيديه. كوة كدرت أحجي، أحس حلكي يابس. همست: -شتسوي هنا؟

شال راسه باوعلي وكام أجه يمي. كال: -عليش؟ منهو اللي يستاهل وتضحين بروحچ لخاطره؟ -لخاطر واحد ردت أفرحه، بس طلع ما يسوه. دعيت عليه مؤتمن تتمناني أموت. كلتها ونزلت دموعي. فرك وجها مد إيده راد يمسحهن. درت وجهي كلتله: -أطلع ما أريد أشوف وجهك. -لا تبجين. -أطلع مؤتمن! ما أريدك يمي. روح مو كلت من زمان انتهت، شكو جاي؟ -هدي بويه مو زين عليچ الانفعال. -مؤتمنننن أطلع! ما أريد أشوف وووجهك! -ميخالف ميخالف. بس هدي طالع.

كالها واندار راح وصل للباب. كلتله: -أوكف. وكف. اندارلي. أشرتله: -تعال. أجه. كال: -ها بويه شرايدة؟ كمشت إيده خليتها على بطني. كلتله: -ما أريد أحلف ولا أكلك لأن ما تستاهل. بس ما أحب أموت بدون لا تعرف الحقيقة وتعرف شلون ظلمتني بعد ما دمرت حياتي لخاطرك. -كافي غزل. -وداعت ابني اللي بعده ما شايف الضوه، لا وصلت يم دعاء وطيحت طفلك ولا ضربت أمك وبيبي. -اتركچ من هالحجي، ارتاحي. راد يسحب إيده. كمشتها كلتله:

-يمكن أموت ما أطلع. وراي حساب إذا جذبت، وحتى لو طلعت آخر بشر يمكن أسأل عنه هو أنت. أو يمكن ما أسأل لأن ماكو إلك شي حلو يمي حتى أذكرك بي وأسأل. بس وداعت أطفالي ما سويت هيچ. هز راسه وكال: -أنتي تعبانة كافي. عوفچ من الفات.

-لا ما أعوفه ولا راح أنساه السويته بيه. بس دا أكولك حتى من أتركك مرتاحة. تريد تصدق ما تريد مشكلتك. بس خلص لهنا وبعد هالوكفة ما أريد أشوف وجهك. وإذا ما طلعت منا مشكولة ذمتك تاخذ أطفالي لبيتكم، عوفهم يم ماما. سحب إيده مسح وجها. انطاني ظهره. كال بصوت مخنوك: -كافي بروح أبوچ. راح تكومين سالمة وتربيهم أنتي. -أطلع مؤتمن! حتى لو طلعت اعتبرني متت، لا توصل بعد.

ما حجه ولا عاند. طلع بسرعة لأن شاف حالتي صدك تعبانة، مو مال يتجادل وياي. دخلت ماما. كالت: -ها حبيبتي صحيتي؟ -منو كله يجي؟ -والله ماما محد. هو جاي للبيت من الصبح. وأنوب خابرنا كال وين أنتم. منين دره ما أدري، لأن جايب ويا عقد الزواج. -الطفل شلون؟ بس لا صارله شي؟ -لا اسم الله، بس لازم تظلين يومين لحد ما يشوفون وضعچ يستعدل، يولدوج. انطوج مهدئات للتقلصات. بس أي حركة أو حالة انفعال ماكو، كون تهدئين. -دره عنده ولد؟

-لا ما سأل. محتار بيج. بس نزل عليه نزلة معدلة حتى غلط. كال: هي متفتهم، أنتي شلون طاوعتيها وسكتي؟ وشوكت جنتوا ناوين تكلولي؟ من تموت؟ -وعلى الأساس مهتم كلش.

-لا والله ماما تردين الصدك، من أجه لسه متخبل ومحتار. أول مرة أشوف مؤتمن هيچ، ما يعرف شيسوي، يفتر مثل المسودن. لا خله دكتور لا مستشفى ما خابرها. من مكان لمكان. كل دقيقة يجي يوكف يباوعلچ، يعض إيده بحرگة ويرد يباوعلي بكسرة. ولچ أول مرة أعرف عنده إحساس وهيچ الدمعة تتلالى بعينه، كوة كامشها. أول ما دخل وشافچ بهيج وضع انهبط. -وين مصطفى؟ -يبو! هذا المكرود هههههه. -إشبي؟

-وجهه منفوخ، أظن ماكل بوكس من أخوه طايرة عينه. يمكن هو الكايله وماكله كتلة. هسه أخذ كيتي وطلع يفتر بيها ما تكعد. راد مؤتمن ياخذها لسماح ما رضى. كله: لا بنت غزل تبقى يم أمها، محد يكرب يم جهالها. عالاكثر متلاغين وشغلتهم هالمرة قوية لأن ما يتحاجون. -ماما دا أحس بألم بطني قوي. -يووو! ولچ تقلصات هاي! لا أنتي اللي تكدرين تولدين طبيعي ولا وقت العملية هسه. أستغفر الله. هي تحجي وأني أجاني الألم. صرخت. كعدت عدل وكمت أصيح:

-ماما لحكيني ح أموت! على صوتي دخل مؤتمن يركض. صاحت ماما: -ظل يمها، أروح أشوف الدكتورة وين. هي طلعت وهو أجه. أني أعصر ببطني وأبجي بصوت عالي. وهو دنك راد يكمشني. صرخت: -أطلللع! ما أريد أشوف وجهك! رجع ليورا. رجعت أعصر بروحي وأبجي. كل عصرة أحس روحي تطلع. جان واقف يم الباب خال إيديه وره راسه يتنفس سريع ويباوعلي محتار شيسوي. دخلت الدكتورة تركض. ضربتني إبرة بالسيروم. ثواني وبعد ما أحس بشي.

كعدت تالي الليل على صوت الدكتورة. فتحت عيوني. كالت: -يلا الحمد لله، قافت. حضروها للعملية. -لويش؟ مو كلتوا بعد يومين؟ -لا ماما، وضع الطفل جداً ممتاز و إله يومين بالسابع. ما يعتاز نأجل، أخاف هم ترجع الطلقة ووقتها ما نعرف شنسوي. -يعني طفلي ما عليه؟ -لا ما عليه إن شاء الله. كلها ساعة أو أقل وهو بحضنچ. أجت ماما كعدتني عدل. ذبت ملابس، لبستني مالات العملية. كمت نمت على السدية المتحركة.

طلعوني من الغرفة. صار بوجهي مؤتمن ومصطفى. أجه مؤتمن راد يكمش إيدي، سحبتها ودرت وجهي عنه. دنك باسني من راسي. دفعته وكلت: -شكو جاي؟ لبالك أموت وتاخذ جهالي؟ حسبي الله بيك! إذا اكو شي أموت وأني متندمة عليه هو أنت. روح مؤتمن، لا راح تاخذ جهالي ولا راح أسامحك قبل لا أغمض عيني. وكف مبين تعبان. فرك راسه واندار. كمشت إيد مصطفى كلتله: -ديربالك على كيوت. أشر على عيونه وكال بصوت مبحوح:

-وأنه ما أسامحچ إذا ما طلعتي سالمة. ومتندم على شكو يوم شفتچ وما تفلت عليچ. ولي غزل يلا. ضحكت. أشر بيده: -روحي. وكال: -متانيچ، خليچ كدها وطلعي بسرعة. غمضت عيوني ودخلت للغرفة. بعدني بالباب وأسمع مصطفى صاح بعلو صوته: -هااا خويه! وصوت دبة قوية بالكاع. ما أعرف منو الوكع. دخلوني سدوا الباب. ضربوني إبرة التخدير. ثواني ورحت بعالم ثاني. كعدت حلكي مر وبلعومي يوجعني، أحس شي بي. فتحت عيوني.

لكيت مؤتمن يصلي يمي ومصطفى متمدد نايم عالقنفة ومنيم كيوت على صدره فاتح حلكه. خلص صلاة. أجه يمي دنك باس راسي. كال: -الحمد لله على سلامتك. أشرتله: -روح. هز راسه: -أي. ورجع باس راسي وطلع. أجت ماما اتحمدتلي بالسلامة. همست بتعب: -وين ابني؟ -بالخدج، يجنن أبيض بس صغير. -هم راحله مؤتمن؟ -لا وين؟

غير صار عنده انخفاض وطاح. وعلى ما استعدل طلع راح للكاظم عليه السلام. تالي مصطفى أخذه. أذن بأذنه. ما أجه لمن خبره. كله طلعت تعال. عاد أجه شاف الطفل. -فرح مو؟ -طبعاً. بس جان فرحته بطلعتچ أكثر. مبينه ذيج وياها. يبوو فاتچ على الاسم من اتعاركوا. مؤتمن راد يسمي ذياب ومصطفى صاح: تيم، من أول يوم صار سمينا، مالك حق تبدل. -وتالي شنو سموا؟ -بعد لسه منتظريچ تصحين. طولتي حضرتچ، إله تأكلين قلوبنا يلا تصحين. -ماما بطني توجعني حيل.

-هسه أصيحهن ينطنج مسكّن. طلعت ماما. كام مصطفى أجه. ضحك كال: -الحمد لله على سلامتك أم تيم. -الله يسلمك. روح كول لمؤتمن خلي يرجع ما أريده هنا يبقى. -لا بره كاعد. ولچ والله خطية، جسر خاطري. تركيه يفيدنا بدفع المصاريف. -هههه أخ بطني! ما أكدر أضحك. إشبي وجهك؟ -غير رجلچ الشفية استلمني. ابن المتردية. وين اللي توجعك عاد؟ بناء خلقتي من جديد. -لويش؟

-نايم بأمان الله واندفرت الباب. شفتني، شالني من فراشي وما أشوف إله البوكس بنص وجهي. طفر وحدة من دعابل عيوني، الحمد لله ما راحت لكيتها. المهم يابه شكو وروح أبوي، ما عافني لمن زوعني دم. مخابرته بت فريال مو؟ -ههه أي، ردت العقد. لعد شلون عرف أني عندي ولادة؟ -لا هنا برنامج الصدمة. تركتهم بالبيت كلها تترادم. شلون وشوكت صار الفراخ؟ محد يدري. أنوب كلها تصيح: كله منك! -حلو ابني؟

-حرام چنه بريعصي مشلوع ذيله. أبيض يزابط بكد چف إيدي. ثاني يوم صار وقت طلعتي من المشفى. كلتلهم: -إذا موجود هنا ما أطلع، خلي يروح، لأن ما أريد أشوفه كدامي. هو هم أحترم نفسه وطلع. طلعنا للبيت. مرت عشر أيام. رحت فتحت الخياط. رجعت للبيت. تيم بالخدج وأني صحتي بعدها كاضيتها نوم. عمو أجل سفره لخاطري. مرته هم حبابة كلش. حمدت ربي بوجودهم، مخلصيني من كيتي. النهار كله يلعبون وياها، ما مصدقين بيها لسان وتحجي عربي بطلاقة.

مر وقت على ولادتي. استوني مرتاحة ماكو وجع ببطني وردت صحتي. دخلت ماما كالت: -غزل راح أكلچ بس لا تصرخين. افتهمي من أحجي. -خير ماما غردي. -سوي تجميل. -شنو ماما؟ مرة لخ؟ تره ما بيها شي بطني. -لا خربت هالمرة. ابنچ دبدوب مو مثل كيتي. بطنچ خربانة وهم شوية تعديل لجسمچ. ما طول ابنچ يم أم سيف هي شايلته وعمچ لكيوت. تذكرين كيتي من طلعت شلون تبهذلتي؟ إذا راحوا منو يشيلچ؟ -مو وقتها، أريد أرتاح هسه.

-بعد بكيفچ. شوفي دعاء بطنها مسفوطة وجسمها يخبل. خليچ حتى لو ما لج نية تردين، بس هم ما راح يباوعلچ. تلعب روحه. وهنا العمليات رخاص. أني منچ أروح أسوي تجميل وأعدل نفسي وأركعه بالحايط أخليه يموت قهر. بس يتحسر وما طايل شي بالمقابل يحس روحه صدك بعد ما موجود. لأن شفتي حياتچ وتفكرين برجال يقدرچ يكون من مستواچ وطبقتچ. -منين فلوس؟ -نبيع الذهب مو عندچ؟ ألمن ترديه؟ عدلي روحچ بي. رجعي مثل قبل وأحلى وهم خففي وزنچ صايرة دبة.

-ماما تره بس خدودي منفوخة. -يلا تره ما ضل وقت حتى قبل لا يرحون. تره ما أكدرلكم كلكم. حتى طيبين ترحين كوافير تعيد خلقچ من جديد. أريدچ تردين غزل القديمة اللي الكل يسولف بنزاكتها وتشيلين هالترهلات والشحوم. ولج أشوفچ لعبانة روحي منچ. -تره كرهت نفسي دا أحس روحي غول من تحجين. يلا بكيفچ. بس مؤتمن شلون؟ ما أريده يعرف. -وهو إشعرفه؟ إشو حتى للبيت ما يدخل يوكف بالطارمة يشوف بنته ويروح. -أوك، شوفيلي مركز. ما أعرف بعد يمج هاي.

طلعت ماما طايرة من الفرح لبالها أعارض. ما تدري أني محتاجة هيچ شي. أريد أرجع مثل قبل وأعيش بثقة وأنسى كل المر من عمري. حجزت ماما. نزلت باعت ذهبي ودفعت. مؤتمن من بعد العملية لا شفته ولا أعرف أخباره. حتى من ماما تريد تسولف بي أكلها: -سكتي. بعد ما يهمني. من شوفته آخر مرة وشوفة دعاء لعبة نفسي منه. لعد إشكد ما مهتم لغيابي وهيچ نايم بغرفتها. قررت أغير كلشي وأعيش لنفسي. الحمد لله ربي انطاني اثنين أطفال اكتفيت بيهم.

سويت العملية. ما جنت كلش معتازة، بس ماما عدها هوس بهيج شي. صح تعبت وتأذيت هواي، بس من أتذكر وكفته ويه دعاء جنت أقوي روحي وصدك اتعديت المرحلة. كبر تيم. جانت عنايته شوية صعبة لأن ناعم. ماما خطية ابتلت بي. ما أعرفله وأخاف أشيله لأن أحسه صغير أخاف أموتنه. أني بعدني ما مخلصة كورس العلاج. انحبسنا اثنينه بالغرفة. كم مرة أجه مؤتمن راد يشوفه ما أخليه. كلتلها: -كوليله خلي ينساه تره هذا نفسه الموته بالهند سقط حقه منه.

هو هم كام يجي يشوف كيتي ويروح بعد ما يكول نزلوا شافني قافلة بعد ما لح. كبر تيم صار دنفوش. بس طلع يختلف عنه. عيونه ملونة على بيبي أم ماما. صح يشبه كيوت بس هادئ لدرجة أكرصه يالله يكعد يرضع. نايمة بليل رن الفون. شلته شفته سماح. طول هالمده قافلة فوني بس أعتازته اليوم لأن حجزت يم كوافير اضطريت أفتحه. ردت كالت: -ها ولچ وأخيراً حنيتي؟ -مو دا أشوف حنيتچ أنتي لويش ما أجيتي تشوفيني؟ -منهو يجيبه؟

خيه أكول لمؤتمن يكول مريضة لحد يوصلها خلوها ترتاح. مانع حتى أمي رادت تجيچ ما رضى، سواها هوسة وطلع. -مم، شكو ماكو؟ -ماكو على حطة إيدچ. بس شنو هالمفاجأة ولچ! والله لسه ما مصدكة. حتى مؤتمن يصفن ويضحك يكول: حتى من أسولفها يجذبوني. بين ليلة ويوم يجيني طفل ما مصدق ومن منهو؟ من غزل! -عوفچ من طفلي. بشري ما حبلن ذني اللي طردني على مودهن؟ -لا خيه منين يحبلن؟ -شنو منين؟؟ -هاا لا مو تهاني يمكن كبرت. ودعاء لا إله

علاج وهو قافل وهم يكول: أنه بيه سكر منهو يكول الطفل يطلع صاحي؟ -لويش مو على الأساس يسفرها؟ شنو التغير؟ لو استكفى صار عنده صدك؟ هم حجه وياكم من رجع على طفل دعاء شلون وكع؟ -لا أصلاً هالسيرة ما جاب طاريها لا طكة جدتي ولا طفل دعاء. بس قبل كم يوم سمعته كالها: طفل منچ ما أريد ولا تصدكين يجي يوم وأسوي ابن منچ. تردين تبقين بكيفچ ما تردين طلعي ولي لهلچ يطبچ مرض. على شنو اتعاركوا ما أعرف.

-لا والله زحم روحه يومين وراح تضحك عليه كم حضنة وبوسة تنسي الصار. وهاا لا تدافعيله تره شفتهم. -خيه خلينا نحجيها الحق. دعاء صغيرة وحلوة وميتة عليه وهو حامي. شيريد يصبر شهر شهرين؟ هم تدخله معدلة وتسويله كم حركة تخليه بعد ما يشوف طريقه. وحلال ما زاني من حقه. -عوفچ منهم كافي حركتي كلبي. شلونها عمه هيفاء؟ -والله أمي تريد تجيچ كالت حتى بسكوت عن مؤتمن. بس ملتهية بجدتي مريضة شاغلتنا تعبانة كلش. -خطية إشبيها؟

-من طلعتي هي أحوالها تعبت. وبالأخص قبل فترة جان يحجي بهزل وياهن. كالهن: أخذجن للعباس أحلفجن عالصار. عمتي كالتله: أروح. بس جدتي اعترضت كالت: ما أدري يجوز أنه وكعت موش هي دفعتني وأنه مرة چبيرة ماخذني للعباس لخاطر جاهلة ما تفتهم. عاد مؤتمن بطل كالها: أتهزل لا تخلين ببالچ. -بعديش جاي يحلف؟ راحت السالفة صارت قديمة وكلمن شاف طريقه.

-وداعت بنيتي يا غزل لا شاف طريقه ولا راح يشوف. تعرفين مؤتمن شلون يحبچ. والله عينه بالباب بلكي تردين. ذاك اليوم كلتله: روح حاجيها بلكي يحن كلبها. ضحك كال: ولچ ابني ما تخليني أشوفه يحن كلبها. يكول غزل خلص حلم وكعدت منه بعد لا تجيبين طاريها. -ههههه جان يكول يوم واحد ما أكدر بدونجن. هسه أشهر ما سأل حتى عني. إشكد أستحقر نفسي من أتذكر توسلت بي يصدقني وردت أبقى وهو طردني بدم بارد.

-شوف هاي أكلها عايش مثل اليتيم ماكو ضحكة بوجها. كاضيها يا واجبات يا شغل. وإذا فرغ شوية خابرته الوكحة خلته ما يشوف طريقه. يلبس ويروحله ركض يتأمل بلكي يشوف الأعزاز. تالي يرد مثل ما راح. أنه من أشوفه راد وطايح أزمخ بيهن أكول: ما طلعتيله؟ ولچ ما حن كلبچ؟ -على شنو يحن؟ تره هو الطردني وميريدني بعد. لا راح أحن ولا راح يشوف ابنه أصلاً. خلي يكمل ويه اللي فضلهن عليه ويسوي منهن جهال. ما إله شي يمي بعد خلص. ما ردت.

شالت راسها كالت: -ها دعاء رايدة شي؟ -لا بس ويا من تحجين؟ -غزل. -أي جيبيها أبارك لها بالنغل المدري منين جابته. -خلي يسمع مؤتمن. -شو جيبي. كالها وسحبت الفون. صارت كدامي باوعتلي وضحكت كالت: -ها حسبالچ تخلفين ويردچ؟ موتي خليچ يم أمچ عفني. -مم ميخالف بس أقلها عندي أطفال مو عاقر. -راح أتعالج وأجيب بدل الواحد عشرة. إشو عندي رجل سبع ما يفوت الليل. مرات يجرها للصبح ههههههه.

-ولي يلا أنتي ورجلچ. عود شبعي زين حتى ما يباوع لغيرچ لو يجي يكضيها جوه الشباچ يتأمل بلكي أطلع ويشوفني. -لا أمني حتى شوفي. كالتها وفتحت سحابتها وضحكت بصوت عالي. أسمع سماح ترزل بيها تكلها: -استحي! هي ردت: -على شنو أستحي؟ رجل والله منطيني وأتباهى بي. عليش أضمه لو تخافين على ذوله المركونين محد مكلبهن؟ بس والله عجبني حبيبي يخلف منچ وأنه خلاني حتى يتونس وياي. خايف عليه ما يريدني أخلفله. إشكد

أكله خلي نروح نعالج يكول: كافي ما أريد يخرب جسمچ. هيچ خليچ چنچ حورية. كافي ذنيچ خلفلي. أي صدك وين ابنچ شو أشوفه؟ عليش ضامته؟ لازم منغولي. -عفية هو منغولي. يلا ولي. ردت أغلق الفون. سمعت صوته دخل للغرفة. رجعت دعاء الفون لسماح وراحتله. أسمعها تگله: -هاا شو نزلت؟ موش كلتلك هسه جاي؟ رد بعدي بويه، شنو عاملتلي حبس إجباري؟ ولي روحي حضري ملابسي.

غلقت الفون لأن أحسهن يدوسون بقلبي. نزلت ضايجة. لكيت ماما وعمو كاعدين يتفرجون أفلام كارتون ويه كيتي. رحت يمهم كعدت. كالت ماما: -إشبيج قالبة خلقتچ؟ -هيچ ضايجة مخنوكة. -كومي طلعي. روحي مول اتونسي. -ما لي واهس وتيم نايم خطية أزعج نومته. عمو: -شوكت تشترين سيارة؟ -والله ما أدري هي الفلوس حولها. -أي صار شهر. ما طول ضايجة خلي تيم يم أمچ وكومي نطلع للمعارض نشوف بلكي تعجبچ وحدة. -ما بيه حيل عمو خليها غير يوم. ماما:

-لا إشو كومي حتى تسجلين كيوت بالروضة. توديها وتجيبها تره خطية راح تتعقد. أربعة وعشرين ساعة أمكابلة الجلب لبالها الحياة ما بيها غير بوحه. -أوك، غيريلها حتى أكوم أغير. يلا عمو أنت حضر. كمت صعدت غيرت ملابسي لبست حجاب ونزلت. لكيتهم متحضرين. أخذت كيوت ورحنا للمعارض. أني أحب اللون الأحمر. وهنا السيارات أرخص مناك بهواي. ما أعرف شنو السبب. عجبتني سيارة حديثة كلش حلوة بس لونها أسود. ردت أحمر ماكو. وكفت ضايجة. عمو:

-بابا والله حلوة أخذيها. كافي صعدتي الحمرة، غيري هالمرة. -لا عمو ما أحب هذا اللون لا أحمر أحسه كيوت. أبو المعرض: -تأمرين. راح أدزكم معرض ثاني تلكون طلبكم وأني هم أوصي عليكم. عمو: -أي والله بابا تسوي فضل، مثل ما تشوفها مصرة. -لا خويه تأمرون. هذا اسمه سجلته، أخذه. وهسه أخبره على الموديل نفسه ونفس السعر اللي اتفقت وياكم تاخذوها مناك. -رحمة الله والديك، ما قصرت زحمناك. -لا أهلا بيكم. شايفين الخير مقدماً.

رحنا على اسم المعرض الثاني لكيناهم متانينا. وصدك لكيت طلبي. أحس بفرحة حتى نسيت ضوجة دعاء. بسرعة وقعت تگول راح يبطلون عليه. عمو ضحك وكال: -مو كلتلك يتغير مزاجچ؟ -أي والله عمو فرحت. بس أخاف ما كفن الفلوس. -لا كفن وزاد. -أي والله معتازة الزيادة حالياً. يلا تعالوا نرجع بسيارتي. -لا لعد منو يرد سيارتي؟ أخذي بنتچ وروحن وأني أجي وراچن. أخذت كيوت وانطلقت أحس بحرية. أوف إشكد ما حاسة بهيج إحساس. اتصلت بماما كلتلها:

-أتأخر رايحة للمول. ما كالت شي. وصلنا. نزلت افتريت اشتريت شنو بنفسي ما خليت شي. هواي زادت فلوس من سيارتي. أهم شي اشتريت زي خليجي أحب هيچ وخاصة مفكرة أروح أشوف بيبي وأسحك الباقين وأراويهم مو أني اللي أنكسر. خلي يشوفون شلون عايشة وأني بعيدة عنهم. اشتريت لكيوت وتيم وأخذتلهم كراسي للسيارة حتى آخذهم وياي وكم حاجة للسفر. تعتبر سفرة من بغداد للبصرة لأن سياقتي مو سريعة، الطريق إذا أربعة أسوي ثمانية.

أخذت شنو أعتاز حتى جنطة وسنسلة لبوحه جديدة. طلعنا للكوافير. عدل كلتلها: -اشتغلي الج كامل الحرية، أريد أطلع شكل ثاني. اشتغلن بيه اثنين مو وحدة. شعري بعده سرح بس كلتلهن عيدن التسريع للعشرة بليل. ما خليت لا أظافر ولا تقشير ولا حمام مغربي، كلهن سويتهن. عدت طوخت الوشم. صح ما يستاهل بس أحس اللون خف. حتى اللي ببطني هم طوخته. سويت واحد لاخ على صدري بجهة اليمنة ورد ناعم باللون الأسود طلع شي خرافي.

وصلت للحساب وتفاجأت من طلع المبلغ هيچ. تالي خبرت ماما كالت: -هسه جاي عمچ وراج. ضليت كاعدة يمهن شوية. أجه عمو دفع باقي المبلغ. وصلت هلكانة تعب. شافتني ماما كالت: ما شاء الله، هسه أقول رجعت غزل القديمة. -إشلوني ماما، حلوة؟ -اتجننين والله، شنو أحس اكو شيء وراء التغيير؟ ليش هيج فجأة؟ -ها، مو داريد أروح أشوف بيبي. -يا بيبي غزل! اقعدي واسكتي، إذا شافج هيج لو تموتين ما يرجعج إلي.

-لا ماما اطمئني، والله بعد لو أشوفه ميت ما أرجع له، وإذا فكر بس يحاجيني مو يغصبني أقتل نفسي. -لعد شكو رايحة؟ -هيج، أريد أروح حتى أثبت له أنو أني ما مهتمة له وعايشة حياتي، مو مثل ما متوقع قاعدة دأبكي وراه، ومثل ما هو مكمل حياته ويا غيري، أني هم مو أقل منه. يحكي يوم وأشوف لي واحد مناسب يسواه هو وعيشته اللي جان معيشني بيها. -لعد عمج يجي وياج ما تروحين وحدج.

-تمام، بس نزلي هاي الجنطة بالسيارة، ودا أحضر كم شغلة آخذها وياي. قعدت ثاني يوم ويا أذان الفجر، دخلت للحمام سبحت. طلعت لبست الزي طلع تمام، بس ما عرفت هالكد ضيق. يلا أهم شيء أمرتب، هي من جوه أكلوشة ما مبين. سويت ميكب وثبته. صحيت كيتي غسلت لها ولبستها هي وتيم. باوعت له وابتسمت، وخيرًا مؤتمن راح يشوف ابنه، خلي أشوف شنو رد فعلك. كاضيها بحضن دعاء، مو سهلة مؤتمن؛ خليك شوف خسرت لخاطر المعفنة مالتك.

نزلت صارت ماما بوجهي شافتني ضحكت. -صباحو ماما. -هلا حبيبتي، ها ناويتها؟ -إي ماما شجعيني. -يلا الله يسهلج وتردين مرتاحة، شوية أقلها بلكي صدق تلتفتين لروحج وتنسي. -جيبي لي الملاوي مالتج فدوة، خلي يكمل لبسي. -ياا، صدق سيف دز لج هدية بمناسبة ولادتج؟ -شنو وينها؟ ليش لعد هسه تقولين لي؟ -البارحة وصلت وحضرتج ماكو نسيت، من إجيتي دز لج فون إصدار الجديد كال أدري كيتي مستولية على فونها. -إشكد هذا الولد يخجلني بسوالفه.

-إي بس حظ ما عنده، إذا طلع أبوها مؤتمن يلا خلي أجيب لج الأغراض وأقعد عمج يوديكم. تانيت عمو بين ما لبس، وكيوت استلمت الفون الجديد حتى ما اتهنيت بي. طلع عمو يغفي، كسر خاطري بس الحماس جان مسيطر على كل حواسي. صعدت الجهال وراي، ربطت كراسيهم عدل. صعدنا أني وعمو، شغل السيارة، مشينا شوية قلت له عمو فدوة طلب. -قولي بابا. -أريد أني أروح وحدي، لا تجي وياي. -شيخلصنا من أمج؟ لج بابا تطردني أني ومرتي. -فدوة لخاطري. -تندلين؟

-ها مو كلش، أنت بس نزل لي الموقع ومن أوصل أخابر يجوني، يلا فدوة عمو لا تردني. -ههههه صايرة تحجين مثلهم. -غير بتهم، أشقلت عمو حباب؟ -الطريق بعيد شلون وحدج؟ -نسيت من جنت بأمريكا أفتر بين الولايات، ترى البعد بين ولاية وولاية بعدال البصرة مرتين، وبعدين أطلع عدل أسأل ما أتيه، لحد ما أدخل للبصرة ومناك أمشي عال موقع. يلا عمو فدوة. -ليش هذا كله؟

-هيج شعور بداخلي من أدخل وأني بسيارتي وياي جهالي بكامل أناقتي، ما شايفه أحد بيهم. سكت ما رد، أخذ نفس يفكر شوية. باوعت له بتوسل، ضحك وأشر إي. نزل لي الموقع على خارطة السيارة ونزل كال يلا رايح، بس اليوم مبينة أرد لأمريكا يالله أخلص من أمج. -هههه يلا عمو باي. رسلت له بوسة بالهوا، وانطلقت للبصرة.

كل شوية أوقف أسأل يطلع دا أمشي صح. مرتين وقفت بالطريق، سويت لهم ممات وبدلت لتيم ورجعت لهم. كملت طريقي بعد عناء وتعب وساعات طويلة، وإيجان أوصل للبصرة. بكد بعد الطريق أضعافه، هنا الهوسة والخربطة. أندل المنطقة بس مكانهم بالتحديد ما أندله. وقفت سألت واحد على بيتهم، دلاني مشيت وهم تيهت. رجعت وقفت سألت ولد مار على بيت الشيخ، وصف لي طلع المكان غلط اللي جاية بي. لفت ورجعت عكس مشيت وهم تيهت.

ساعة ونص أفتر ما خليت بشر ما سألته يالله اندليت. عقلي كله وأني أتخيل إشوكت أوصل وأشوفه، وإشلون راح يستقبلني. قلبي أحسه يريد يطلع، كلما أوصل أقرب تزداد ضربات قلبي. أريده يشوف إشلون عايشة ومرتاحة بغيابه وساحكته ما مهتمة. ظليت على نفس الطريق أمشي وأسأل لمن شفت دعاء وأمها وريم يمشين، مدري وين أمواليات. لفت السيارة وصلت يمها وشحطتها حيل، طفرت وكمشت قلبها. نزلت الجامة. -هلوو بت علوان، خوما تأذيتي؟ دعاء: إشجابج ولج؟

فتحت الباب نزلت سلمت على ريم، ردت تضحك قالت شنهو هاي صايرة أتخبلين. -طبعًا خلصت من هالشكول، عايشة مرتاحة براحتي أطلع أدخل، اوووف يوم الإلج. -لا خيه، أنه وين أهلي أسوء من عيشتي، خليني هيج مستور عليّ. ولج هاي سيارتج؟ -امم حلوة. -يمه صلوات، الله يستر عليها ويحفظ لكم سلامتكم. تستاهلين، وووف يا اللي ببالي موتوا. -هههه تعالي أوصلج. -لا خيه، رايحة لبيت الخياطة ما أعطلج، روحي بطريجج.

ردت أصعد لقيت دعاء وأمها فاكات حلقهن يباوعن عين بيّ وعين بالسيارة. صعدت وطبقت الباب حيل طفرتهن. شغلت السيارة وإيجان وصلت للبيت؛ وقفت باوعت له وضحكت، إشكد مشتاقة لهذا المكان. ركنت سيارتي، نزلت كيتي تركض للبيت حتى ما لحقت أسوي مفاجئة، بت النعال راحت خربتها. شلت شيشة العطر فرغتها حتى أعطر البيت، ردت بس أغيضهن. نزلت تيم، شلته من بطنه، ودخلت لقيتهم يبوسون بكيتي، لبالهم عمو جابها.

دخلت صارت سماح قدامي، وقفت متفاجئة. ضحكت وأشرت لها، إجت تركض شبكتني وباستني، صاحت يمه إشكد مشتاقة لج. -هههه ترى البارحة چنه دنحكي. -ولج شنو المفاجأة؟ ما مصدقة. -قلت أجي أشوفكم لأن شو ولا واحد عبرني وقال أجيها أبارك لها. -شو انطيني هذا يمه صدقة لمحمد شنو هالجمال؟ إجت هيفاء تركضت، ضحكت شبكتها حيل إشكد مشتاقة لهن. عصرتني وبجت، وخرت عنها، قلت لها انجبي لا تبچيني وياج يخرب مكياجي.

-هههه الله يطيح حظج، ولو زعلانة ما تردين على اتصالاتي، بس شسوي قلبي حنين عليج. -امم من إجيتيني وتحمدتي لي بالسلامة؟ -وين أجيج إذا أنتي كله هيج حشك مفاجئات؟ إجيت الصبح قالوا عافت البيت ردت لأمها، إجيت وراء فترة قالوا جابت غزل. ولج أنتي تشتغلين كله دفن، سالفة مكرم يقول بت خالي تشتغل عال ثقال ما يعجبها مفاجئات العادية.

هي تحكي وعيني عالدرج أمتانيته ينزل. شافتني سماح ضحكت قالت هسه ثواني بسرعة اتصلت قالت له تعال اكو ناس يريدوك جوه. -ليش هيج تقولين له؟ -ما أقصد عليج، على جهاله خيه. باقي بحسرة الفروخ هنا، وجهاله بالمحافظات مزروعين. -خلي أروح أشوف بيبي.

-دباوعي منهو اللي نزل. شلت راسي شفته نازل يطبق بردان قميصه. شافنا ابتسم بس مو ذيج ضحكته القديمة، لا مال واحد طالع القهر من عيونه. وراه جانت تهاني نزلت، شفتها ودرت وجهي لسماح، طلعت الحسرة غصبًا عني. وصل يمي كال الحمد لله على سلامتكم بويه، أشرت له براسي ما رديت. سماح: هاك شوف القمر. أخذه من إيدها باوع له ضحك وقال بسم الله ما شاء الله اللهم صل على محمد وآل محمد. دنّق باسه.

تيم استوى متعلم يبتسم، فك حلقه لأبوه صفن بوجهه كال موش أشوف عيونه زرق لو غلطان؟ سماح: ههههههه، اسكت النسل هالمرة غير ضربت الرقم القياسي بتعديل النسل. -هههههه عليمن طالع هذا؟ قلت له على بيبي أم ماما. شال راسه باوع لي بس نظرته كلها حيرة وشوق. درت وجهي ما معبرته، رحت لبيبي. دخلت سلمت عليها جانت نايمة قالت منهو هاي غزل؟ -إي بيبي أني غزل. -شلونج يا جدة؟ -تمام. -إي يا بعد جدتج، ردي بيتج. زين من هيج عملتي ورجعتي.

-لا بيبي إجيت أشوفج قالوا مريضة. -لا بعد جدتج، خليج هذا بيتج لا تروحين. ردي لزلمتج. قالتها وقامت قعدت. -هههه يا بيت بيبي؟ مو هذا نفسه اللي ارتكبتي عليه بي وطلعتيني منه مطرودة؟ يلا انسي كل شيء بيها مصلحة، الله كاتب لنا كل من طريق. شفتها ما ردت أتباوع وراي، عرفته واقف وراي. بطلت سكتت. إجه أنطا تيم لبيبي قال لها سمي جدة هذا حفيدج. سوت صلوات وشالتها باستها خلته بحضنها وبجت.

قعد قدامها صافن عليها يباوع لها بأسف عاللي سوته. فرك وجهه ودنق. دخلت دعاء هي وعباتها، وقفت يم مؤتمن. قالت له ترضاها بنص الشارع تقول لي شلونج بت علوان؟ سماح: هههههههه يجوز نست اسمج، وعليش مغتاضة؟ جا أنتي موش بنته؟ -رادت تدعمني، سحقتني اله شوية. باوع لي مؤتمن قلت له فلت الستيرن مني بدون قصد. ذبت عباتها وقعدت يم مؤتمن. درت وجهي عنهم، حس هو قام طلع. سماح: ياا، جاية مناك لهنا وحدج بالسيارة؟

قبل لا أجاوبها، دخل مصطفى شايل على متنه كيتي كال ها ثولة إشجابج؟ -ههههه، اشتريت سيارة قلت وين أروح بيها ماكو غير مصطفى أجي أحميه عليها. -لا بربج إشوكت اشتريتي؟ -البارحة بس شنو، زيرو آخر موديل. ظل أنت على سيارتك المطعطعة. -منين لك فلوس بت المنغولي؟ -هاا عندي. -هاا وصلت الفكرة. يلا عمي جاهية حظوظ، يا با ما أريد سيارة أقلها تلفون مثل اللي بيد بنتك. دنّق على كيوت قال لها ولج ما تنطي لأبوج؟ صاحت لااا مالة غزل.

-ولج غزل شنهو، بايكة البنك إشلون طكت عدها الأولى؟ -جابه سيف. هي قالت سيف وأني عصرت قلبي، شلت راسي وأشوف مؤتمن وقف قريب عالدرج يدخن وعيونه عليّ. بسرعة غيرت السالفة قلت له فدوة مصطفى، الجنطة بالسيارة وتيم جاع، نزلها. هز راسه ما عرفت شنو يقصد. درت وجهي، ومصطفى كال شنهو جنطة؟ ناوية تستقرين؟ -لا وين أستقر، دا أسوي له ممة. -أو الغسل ممة؟

راح أطلع الفرخ أثول مثلها. يابا أخذي لك هايشة منا وياج، نريد ابنه يطلع ينطح حياطين. هسه أحملج وحدة من هوايش صبوحة أخذيها وياج. بيبي: ياا وعليش صبوحة ما تاخذ من هوايشكم؟ -جدة موش تردين تموتين شتسوين بيهم؟ -قوم لك. قالتها وشمرته بالعصة، طالع يضحك راح. جاب الجنطة دخل شمرها وشال تيم، يبوس بي كال موش قلت لج هذا العطر موش طيب شكو خالة له منه؟ -مو مال أطفال، ما يصير أغيره.

سماح: يلا بالله، ناس تتمنى تشمه وناس تتبطر على عطره. ولك وأني أقول وين على ساعة تختفي، أثاري أمقابلها وقاعد. -غير أفريخاتنا يمها، شنهو سايبة الشغلة؟ يبووي إذا ما أشوف كيوت يومية وآخذ لي كم بوسة شينيمني بليل؟ -جا من نقول لك نريد صورة أنشوف تيم تقول هو أنه ما شايفه؟ -شفت الفرخ يختلف قلت أخاف تنصدمون، أنتم خلفتكم كلها أمجعمرة. الصراحة خفت ينضرب عين. -ولك منهو يضربه عين؟ تشوف أبو متلهف بس على صورته يريد يشوفه إشلون شكله؟

-هسه من حلاته، إشو چنه أقطينة ما يبين من المخدة. سويت ممة وهم يتناقرون. إجت سماح أخذته مني هو ومميته، وراحت يم مؤتمن ترضعه. جان بره، من شافها قعدت عالدرج ترضعه قعد يمها. جان يباوع له يلعب بشعره ويضحك. خلص أخذه يشتم بي. دخلت تهاني، قعدت متغيرة صايرة حلوة ومكياج قوي. هاي هيج مؤتمن رد لكن شبابكن؟ والله وقت. باوعت لي، سويت روحي ما أشوفهن. خليت رجل على رجل وانتجيت، عيني بفوني أكلب بي جذب وابتسم عال أساس ماكو هيج.

شوية وأسمع هلاهل، عرفت عمتي دخلت. إجت تمشي بسرعة طشت چكليت وهلهلت. قمت حضنتها، شبكتني وبجت. قالت هيج يا عمة تقطعين بينا؟ مصطفى: عمة تراها ما تركتكم، كل اللي يجي يقول لها عليش البنت انشحنت منا؟ عمة: اسكت ولك أنت، منهو يقدر يطلعها وهذا بيت أبوها؟ عفتها وقعدت. بيت أبوي استغفر الله. مؤتمن أخذ ابنه طلع يشتم بي بره، خاله على قلبه ما مصدق يبوس ويحضن ويرد يباوع له. قعدت عمتي يمي باستني قالت ردي. -وين عمة؟

-لزلمتج، والله يا عمة مجسور قلبه وراج. -هههه عمة لو يصبوا ذهب بعد ما أباوع له، مو أرجع له؟ صدق تحجين أترك كل هذا النعيم وأرد له؟ ليش حتى ربي يقلبها بيّ؟ دعاء: هو ما ميت على شوفتج عساج ما رديتي. ما رديت عليها سكتت، عفتها تتكلم وحدها. كافي عليها من دخلت لسه مؤتمن ما شال عينه يباوع لي ويتحسر بقهر. عمتي طلعت وسماح قعدت يمي تسأل شلونج ووين أقضي وقتي. عاد انطلقت.

قمت أجيب جذب منا وأشمر منا. طلعت قاضيتها مولات وكوافيرات. تهاني ودعاء وحدة تباوع للثانية ويعوجن حلوكهن. هيفاء: ياا وأنه شايلة همج أقول قاعدة ضايجة. -هههه على شنو؟ ترى ما جنت عايشة هنا بس لا هاي تسميها عيشة؟ دعاء: وإشمالها عيشتنا؟ -لا ما بيها شيء. أنتي تدرين الخدامة مالتي هم أحسن من عيشتج، أقلها العصر آخذها وياي للمتنزه تكسر خاطري بس شغل. دعاء: اممم هي ميته على الرجعة وتحكي هيج؟

-ههههه هذا عقلج المريض يصور لك، لو كل من يشوف الناس بعين طبعه اللي يرضى على نفسه يعيش بذل يشوف الكرامة رعب. -شقصدج؟ -وليش تحسستي؟ منو جاب طاري الخدم؟ هيفاء: إي والله خيه صدق. جا احنا هم عايشين خيه. مكرم ما يتعارك وياي وتاخذيني وياج وهيج سيارة ولبس مثلج وأفرفر بكيفي. -لا مو وقتها هسه، أجليها. دا أسافر لأمريكا أريد أجنس تيم.

-استلم انوب مؤتمن جهاله كلهم أمريكان. عمي والله حظ، هم ينقرطون وهم مجنسين. جا إشماله حظه عكس بالأخير؟ دعاء: هيفاء احترمي روحج وتعلمي تحجين. هنه يتجادلن وأسمع الصلوات علت بالجو. قلت لها شكو؟ سماح: غير مؤتمن ذبح فدوة لتيم. -شنو ذبح؟ ترى أريد أرجع لا تسووا لي ذبح وراح يعزم وراي طريق. -لا خيه خطية والله. ذبح وعزم غير فرحان بدخلة ابنه. لا تجسرين قلبه هذا اللي الله عوضه بي. فدوة أروح لك بس اليوم. -شنو سماح يا يوم؟

إش بسرعة ذبح وعزم؟ لا تخلوني أندم لأن إجيت، هسه دا أقوم أريد أروح. دخلت عمتي قالت وإذا قلت لك لخاطري؟ والله يا يمه بجيت من شفته حاضن أوحيده وواقف يم الذبايح يذبحون ويقول لهم بعد ذبحوا. ما مصدق يباوع له ويضحك. -عمة والله ما قلت لماما أتعطل، هي قوية خلتني أجي. -أنه أخابرها. -عمة حتى لو هي رضت أني ما أظل. إجيت قلت ساعة أشوفكم وأرجع. -باتي يمه، آخذج وياي بس خلي فرحان بفرخه.

-أستغفر الله عمة، والله خليتوني صدق أندم وبعد ما أجي أبد. -شنهو ما ناوية تردين؟ -إشبيج عمة شرد؟ دخيلج شو وخري خلي أقوم. شلت الجنطة وطلعت. صحت لكيوت يلا ماما إجت تركض. طلعت لقيته شايله ويبوس بي ويضحك ويا مكرم. وصلت يمه قلت له انطيني اياه دا أروح يلا. -وين تردين؟ -مؤتمن جيبه. قلتها وجريته من إيده حيل. مكرم: شنهو يا با ما تسلمين؟ -أو مكرم والله ما منتبهة وراي طريق وأتعطلت لازم أروح.

مؤتمن: إحنا نوصلج، خلي تخلص العزيمة. عزمت العالم والمطهر راح يجي حتى يطهره. -شنو؟ منو قال لك مؤتمن؟ انطينا دا أروح. -ردي وتيم باچر أجيبه. -والله لا، وإشكد سهلة تحكيها؟ مؤتمنننن جيب ابنيييي! مكرم: إشبيج يا خويه؟ تردين تفترسينا؟ كلج بس اليوم بعد ما ترهم. عزم العالم كلهم طهر ابني. إشلون رأيج يجون شَنقول لهم؟ -وأني شكووو؟ منو قال لكم تتصرفون من كيفكم؟ أخذتوا إذني لو هيج إجت براسكم لبالكم بعدني العبدة القديمة أسمع وأنفذ؟

-غزلل خويه شبيج؟ -مااابيه. إجيت ساعة أشوف بيبي، ليش تخلوني أندم وأحرم أجيب الجهال بعد؟ مكرم: ما يخالف بس هالمرة، عود بعد لا تجين بس خلي نطهره. -منين له؟ دشوفه هالكدوتة فدوة جيبه ما أريد أطهره راح يتأذى. ما رد مؤتمن، أخذه وطلع راح للمضيف. خلاني أعض بأصابيعي، ميتة قهر. أني إشجابني عود ردت أحرك قلب دعاء انوب ابني راح يتأذى. اندريت لمكرم قلت له هسه تروح تجيبه، لا وروح بابا أسوي لكم فضيحة وأشهركم هسه. -أنتي خبلة؟

ولج راح يجي المطهر ودز له يجيبوا له زي للطهر. ارجعي بابا الله يهديج. قالها ولحق مؤتمن. نزلت دموعي، رجعت دخلت قعدت. إجت عمتي قعدت يمي تبوس براسي وتتوسل. سكتت شوية وصدق بدت العالم تجي. صار البيت هوسة. دخلت هيفاء قالت غزل قومي غيري ملابسج فشلة العالم إجت. -وين أغيررر ولج أريد أرجع؟ -أنتي مخبلة شترجعين؟ العالم التمت والذبايح انذبحت. هسه لو تنطين ما ينطيج اياه مؤتمن. -أني غبية والله وأستاهل إشلون إجيت.

-أحسن شيء عملتي. والله أتمنيت جيتج هاي البارحة من نزلت دعاء تتمندل شايخة ما تنحاجى عود صارت أم البيت حتى كسرت خاطري مهرة، قتلتها وردت تفلت على تهاني. اثنينهن خافن ما ردت أقول لها وسكتن. -وأخوج الشفيه وين عنها لو فرحان؟ -هو وين أخوي؟

غير يلفي للبيت، وحتى لو إجه تدرين ما له شغل بعركات النسوان. من زمان يقول وحدة تدق راسها بالثانية، يطبّهن مرض لحد ما يملّن وينكتمن من وحدهن. د قومي خيه غيري ملابسج، بعدهن بكنتورج. لبسي لك شيء حلو، غيضي لي هاي المعفنة بي. بروح أهلج ما أقول لك ردي بس فركيها لي. ولج داقتني. -هيفاء ولي عني. -بروح أبوج أنتي بديتيها كمليها. شايفة هسه إشلون واقفة تباوع لمؤتمن وهو حاضن ابنه يبوس بي ويشتم ما مصدق؟

وكل ما قال مكرم صدق كل هالذبايح للكطف هذا يرد مؤتمن انكتم هذا الشيخ تيم شيخ عشيرة الـ... من بعدي. كل عقله راح أنطي ابني ليش؟ من قلة الزبايل اللي عنده ما يخلف منهن؟ -خلي يقرب لهن بالأول وبعدين يفكر بالخلفة. -شتقصدين؟ -هاا لا هيج. قومي خيه بروح أبوج طلبتج بس بردي قلبي. -لازم هم قاتلتج؟ -لا والله أتحيل مؤتمن عليه، أقول له بكل شيء أدخل روحها. وساعة تسمعني أنه وعمتي شنهو جايين يومية؟

-عزا بعينها، صدق هاي ما شايفة واحد يضبها ويرواويها مقدارها؟ ومحد يراويها مقدارها غيرج لأن قلبها لاكشها كل ما تسمع مؤتمن راح لهناك تقوم الأمة ما تقعدها، تخاف تطلعين وتحجين ويا وتعرف وقتها طوفت موش هسه. انوب شافتج إجيتي غزل، قلت لج طلبتج أعرف موش بحال أخوي وأعرف ما تردين لو يبني لج قصر من ذهب ويقدم لك اعتذار الدنيا. بس هيج قرصيها لخاطر كل يوم أذكرها وأجر أذنها بيها. -والله ما بيكم واحد يستاهل.

-نعرف بس أنتي أخيتي، واللي صار موش قليل. إشعرفنا السالفة جذب بس لخاطر يطلعنچ. وعلي إذا أقول لك الندم ينهش بيّ طول هالمدة تجذبيني. خو من أشوف أخوي قاعد عالشط مختنق أعض أصابيعي شلون ما وقفت بجانبج ومنعته يطلعج. -هههه كلش متأخرة، المهم إجت من صالحي خلصت من عيشتكم الوسخة ومن جبروت أخوج. -هه أخوي، شايفة حال أخوي إشلونه؟

منهو يصدق يطلعج بيده وبعد ذيج ضحكته وهو يشاقيج بالبيت. صار ما يلفي بس وقت التعب والدنيا طالعة من عيونه. يلا قومي لخاطري. هزيت راسي وقمت صعدت. دخلت للغرفة باوعت، قلبي دق. سرير كيتي على حطته وجربايتي وفرشتي. رحت عليها قعدت، مسحت المخدة، هنا چنه ننام وتخليني بحضنك. هنا لعبنا وضحكنا. شلت المخدة حضنتها وشتميتها، أدور عطره بيها. اندريت عالجرباية. تذكرت كل لحظاتنا سوة، شلون جنت أتحارش بي وهو يضحك. وين ضحكتك هسه؟

وين حبك ووعودك لي؟ شنو معقولة بلحظة تبخرن هيج؟ عيونك بعدهن نفس النظرة والهفة بيهن بس تصرفاتك تعكس هالشي، شنو الصح منهن؟ أخذت نفس من المخدة طويل، أحس عطره دخل ريتي. بلحظة تمنيته يدخل وأقوم أحضنه مثل قبل وأخلي راسي بصدره، أشكي له على الأيام اللي بعدتها عنها وأقول له إشكد بجيت لأن اشتاقيت لك.

رجعت المخدة فتحت الجرار لقيت ساعته شلتها وخليتها بحضني، رجعت اشتميتها. سمعت أحد يصعد، خليتها بمكانها وقمت طلعت كلابية. دخلت للحمام بسرعة غيرت. طلعت لقيت هيفاء شهقت، قلت لها شكو؟ -ولج شنهو هذا جسمج؟ -إشبي؟ -شعامله له وهيج صاير مقسم؟ -ههههههه شوية تعديل، تعرفين ماما روحها بهيج شيء. -اشتعل أبوچ دعاء، ولك مؤتمن تعال شوف الضيم. ولج خيه غيري كلابيتج هاي فضيحة مقسمتج ودلعتها چبيرة. -تمام لعد باوعي لي شراح أسوي.

قلتها ودنّقت طكيت من الجهتين. قلتها وهسه؟ -بالعباس إذا لقفج مؤتمن بهالشكل يفصم راسج. -ولي أنتي ومؤتمن. منو هذا مؤتمن أصلاً؟ يلا ولج أريد مكياج أعدل شكلي. -إشبي مكياجج حلو؟ -لا بعد أريد أعدل. نزلي جيبي لي من سماح. نزلت وأني وقفت لميت شعري رفعته. انفتحت الباب لبالي هيفاء، قلت لها إش بسرعة إجيتي. اندريت لقيت مؤتمن واقف.

إيديه بجيوبه، باوع لي ودنق. طلع إيده من جيبه حك قَصته. عرفته متوتر، هاي الحركة ما يسويها إذا ما التوتر مفول. يمه قوية أتمالكت نفسي ما أركض أحضنه. أخذ نفس رد باوع لي. درت وجهي دنّقت، شلت قراصتي. أحس إجه يمي صار قريب، دقات قلبي قد ما واضحات أحسهن طلعن من صدري. أدعي يا ربي قويني لا تخليني أضعف.

أتقدم أكثر، عطره صار قريب عليّ. دا أحس بقرب حضنه بس أندار أصير بي. خليت القراصة، سحبت الشال وطلعت بسرعة. وصلت يم الباب أسمعه قال غزلل. فتحت الباب ونزلت. غزل إشكد سهلة عنده من تقولها. وصلت يم الدرج خليت إيدي على قلبي أخذت نفس. ونزلت رحت لغرفة بيبي، لقيت العالم متجمعة. قعدت يم بيبي سحبتني وباستني. اندريت متعجبة، باوعت لي بكسرة قالت أبري لي الذمة يا جدة. -ههه بيبي مو أبريتها؟ -لا من قلبج. -من قلبي والله بيبي.

-أروح شكول لمعتصم؟ هيج عملت ببنته وأخذت زلمتها منها وطلعتها بدمعتها. -يلا بيبي خلص صارت ماضي انسي. -ردي يا جدة. ولج زلمتج مدوّهن بدونج حتى ضحكته راحت. -هو الريحة بيده؟ -لا أنه اللي أخذتها منه من خليته يطلعج أنتي وبنتج منا. وروح يا ولادي يا جدة ردت بس يجي ظنه يشيل اسمه. أنه لو أدري بيج حبلى چا ما عملت هيج. بس أعرفن مؤتمن ما يرد حريمه إذا أنتي معارضة، وأنتي الله يهديج ما تنحاجين ودعاء هم أمريته حرام يتركها.

-لعد بيبي كافي لا تحجين خلي أمكمل وياها. سمعت الهلال شلت راسي أشوف مؤتمن نازل من فوق لابس دشداشة بيضة ولاف غترته يسد بالساعة، ومكرم شايل تيم هم ملبسينه دشداشة بيضة وعرقچين. أخذه أبوه شاله باسه وضحك وهنه يطشن چكليت تقول عرسان. إشكد يلوق له هالزي. عمتي تصلي على محمد، تصيح خطف الخضر، خافت عليهم من العين. باس تيم ورفعه يلقف بي ويضحك. يمه أباوع لابني صدقة لايق له اللبس طالع كيكة.

راحوا للديوانية قالوا راح يطهرون. هم قالوا وأني قلبي عصرني. قمت رحت طلعت للصالة وقفت وياهن وقلبي أحسه يريد يطلع. إجت سماح قالت إشمالج ترجفين؟ -ابني سماح، عزا بعيني أني إشجابني؟ -هههه يلا هو هم درى غير هالجيّة مالج. قال لك استغلها وأطهره. كمشت إيدها وبجيت. قالت ياا ولج إشبيج؟ أول واحد يطهر؟ -خطية صغير.

أني قلتها وسمعت صرخته وصوتهم وهم يصلون على محمد والهلاهل بدت. شوية وصار صوت ضرب بالجو. إجت هيفاء تباوع لدعاء وتقول بعد ابن الشيخ الوحيد إشلون ما يعمله هيج؟ أني قعدت على الدرج، قلبي رايح. أمتانية يدخلوا وذني يتناقرن. ردت دعاء تترس له البيت فروخ بس انطيني مجال، وذوله صدق شيوخ من أم أب. هيفاء: هههههه عود الله يسهلج خيه. هسه خلينا فرحانين بشيخ تيم. اندارت لي قالت أصخام أبوها غزل حتى ما راهمة شيخ تيم، منين جبتي هذا الاسم؟

-وينه إشوكت يجيبوه؟ -هسه خيه إشبيج وجهج أصفر؟ -دا أسمعه يبكي فدوة روحي قولي لهم يجيبوه. احنا نحكي ودخل مؤتمن شايله يبوس بس قمت ردت آخذه منه حسيت الدنيا افترت بعد ما شفت قدامي. فتحت عيني على قريولة جدو، مؤتمن يمسح بوجهي. وخرت إيده اندريت شفت سماح يمه. قلت لها وين تيم؟ -يم أمي خيه. إشجاج ما تقولين لي؟ ما تتحملين حتى بكاء طفل؟ قمت قعدت. هو ما حكى بس قال لهم ديروا بالكم لا يلجم وطلع.

إجت هيفاء قعدت يمي عضتني من متني. قلت له إشبيج؟ -ولج هذا الوشم اللي بصدرج إشوكت عملتيه؟ -وين؟ -أخخخ يمه بـ... ج بت فريال شوطتي أخوي. يباوع وقوة كامش روحه. ظل ما يعرف يغسل وجهج لو يضم صدرج. -دوخري أني ميتة وهم يقلبون بجسمي. -بروح أبوج إشكد كلفتج العملية وهيج صبّوج؟ -يااا ولج والله بس نحت ما سويت شيء. باوعت لي وعضت شفتها قالت لا تجذبين، وذني الجبال الشامخة إشرفعتهن؟

-عزا غير استوني والدة. دوخري دفعتها وقمت رحت يم تيم بعد عمري لقيت نايم دنّقت بسته. عمتي: قرة عينج يا يمه، إن شاء الله تشوفين عرسه. -إن شاء الله الله يحفظه لي. -ياا وأبوه شنهو؟ -عمة لا تضوجيني منج، سكتي عن السالفة. -آاوف والله هذا الفرحة ما تدوم له ابني. أخوي حده يوم من شوكت راح عنه الضحكة. اليوم أول يوم أشوفها ردت بوجهها. تعالي أحبنكن عبنكن هيج فرحتي قلبه وعوضتي عن اللي راح.

-هههه عمة عوفي الحبات راح يلجم ابني لا تتحركين. ظليت قاعدة والناس تجي، أحلى فقرة مال الواجب. كل اللي تفوت لازم تورّق تخلي بحضن عمتي لأن تيم بحضنها، وعمتي تلفهم تخليهن جوه رجلها. انوب عمتي تخاف من عينهن لا يباوع لي. كل شوية وقالت غزيلة صدرج ضمي. -ما طالع عمة. -يبوو ولج ضمي لا أصيح زلمتج. هسه بالعباس حامي واصل له لخشمه يكضج يطلع بيج التوبة. -يلا عمة ضمّيته كافي. صار الليل، الناس طلعت بس أحس روحي بندت.

دخلوا الولد، إجه أحمد دنّق باس راسي وبارك لي ودنق باس تيم. كال هسه منهو يصدق هذا ابن أختي؟ مصطفى: طالع عليه مو شرط عليك. -ولك يا عليك؟ الفرخ عيونه زرق وملون. -يشبه كيتي بس فرق العيون بس هم طالع عليه. ولج غزيلان وين الواجبات؟ ضحكت أشرت له على عمتي، وعمتي خزرته قالت له وأنت شكو تسأل عن الواجب؟ دخل مؤتمن قعد ودخل جدي. قمت سلمت عليه باس راسي وقال تعالي يمي قعدي. رحت يمه.

مؤتمن يم بيبي صار مقابيلي. طلع جدو فلوس قال هاي عنقوط ابنك وهاي عنقوط ولادتج بالسلامة. بعدني حتى ما حاكيت قام مصطفى أخذهن كله مشكور جدي جيبك عامر. عمتي: ياا ولك مصطفى أترك فلوس الفرخ. -هو جاي ألمهن له. وين الباقيات؟ جيبيهن خلي أحسب الشيخ تيم إشكد حصل. قام أخذ الفلوس وقعد صفطهن. قال لمؤتمن وأنت شو ماكو واجب، وين حرك جيبك؟ ما رد رفع حاجبه وشال كيوت خلاها بحضنه.

هو هم طبق الفلوس خلاهن بجيبه. عمتي صاحت يااا ولك انطيهن لأمه. -يا أمه عمة صدق تحجين؟ سبعة أشهر وأنه ضامّه بقلبي يوم يوم أحسب لجيته. بس فلوس الدكتورات والسونارات أربع مرات بكد ذني صارفهن. -هاا طلعت هسه؟ ولك جا إشلون تقول حالي من حالكم ما أدري؟ -ومنهو قال لك أدري يا با هاي أول مرة أشوفه. بس خرب بغيرتج بت فريال ما خلت شيء ما اشتهته بحملها. انفجعت عليه أجيب وتصيح بعد.

سماح: والله جنت صافنة البنت تأكل هواي موش طبيعي وتصيح جوعانة. هيفاء: هههه خيه شيبين عليها إذا تلعب وتنزل تطفر من الدرج؟ خو مرة مؤتمن شالها شمرها بالحديقة ولا كأنما. باوعت لمؤتمن لقيته حاضن كيوت وصافن عليه. دنّقت. ردت دعاء قالت بس أريد أعرف هي موش نزلته بالهند؟ إشوكت صار هذا؟ مصطفى: هو بالهند ما تشوفينه معفن مصلّب؟ دعاء: إش قصدك مصطفى؟

-سلامتك مرت أخوي، والله ما جاسر خاطري غير الفرخ اللي راح يصير عدكم يخلص عمره كامش كتاب الله يمشي ويحلف هو أخو تيم ومحد يصدقه. دعاء: مؤتمن ما تحكي؟ مؤتمن: إشبيج بويه؟ واحد هم ابني شيختلف؟ مصطفى: لاااا، خلي الله بين عيونك وقول حق الله تجيب فروخ غزل لفروخ دعاء. لا هاي واقفة. -د شوفه هذ إشلونه. اندار لي كال بروح أبوج نريد بعد واحد الفضول قاتلني إشلون يطلع هالمرة شكله؟

سماح: ههههههه والله أنه نفس الفكرة براسي. هسه أفكر قلت كلما جاي تتعدل بالنسل أكثر، هاي هالمرة إشلون يجي ابنها؟ جدو باس راسي وقال بعد وحيد وكافي، هيج نريده ملون مثل أخوه، سند له يا جدي. مصطفى: يا سند جدي؟ هاي بذرته مال تعرضهم بمعرض مو مال طك ودواوين. تهاني: جدي أنه أجيب له سند، أتركها لأنها مريضة أخاف تجيب بعد وتموت. عمتي: برد شرج. والله ما أحبنها بحلقها من ضمت حملها وجابت بالسلامة من فالاتج السود مثل وجوهكن.

قمت قعدت يم عمتي أخاف على تيم لا ينسحك لأن داخلين طالعين. إجت هيفاء يمي همست قالت مؤتمن يقول خلي تضم أصخامها عدل. -شنو ما فهمت؟ -ولج صدرج صار ساعة يخاز نطت عيونه وأنتي ما منتبهة. -ترى ما مبين. -إشلون وهذا؟ قالتها وقرصتني بخفة إيدها. لا إرادي طلع صوت صرختي وكمشت صدري. خجلت من صوتي شلت راسي لقيته خازرني. دنّقت وعدلت الدلعة خليت الشال بيها حتى ما يبين شيء.

هم يسولفون وكيوت نزلت من حضن أبوها وإجت تركض. شاورتني عود تخجل قالت ممة. همست ولي مو وقتج. -مااا. -كيتي ولي من وجهي ما أقوم قدام الثور أبوج وأسوي لج ممة. باوعت لي ولمت حلقها عود ضاجت. راحت لأبوها قالت له بابا غزل تقول. صحت كيتي، باوعت لي عضيت شفتي وخزرتها. ورجعت باوعت لأبوها شالها وقال لها شنهو قالت. هي تشاور بي وهو باوع لي رفع حاجبه ورجع ضيق عيونه باوع لي بتوعد ورجعها بحضنه.

خنست يم عمتي فشلة. هسه جاية خطار أنسحل حتى شريجاتي يهلهلن. باوعت لكيوت خزرتها. صارت عيني بعينه رفع حاجبه وأشر سهلاً. دنّقت بسرعة. مؤتمن: سماح قومي بويه سوي لها ممة. -يا جنها على ممة؟ تعالي يا بعد أمج وياي أسوي لج. أخذتها شايلتها وطلعت. دخل خالهم شهم سلم دنّق باس راسي. شعره مبلل مبين تعبان. رديت السلام راح قعد يم مؤتمن بس يصفن وكل نفس يسحبه من الجكارة يطير نصه. بكى تيم، قام مؤتمن شاله يبوس بي ويسولف ويا.

قمت طلعت أسوي له ممة. رحت للمطبخ لقيت كيتي عالميز قاعدة وسماح تسوي ممة. دخلت جريت أذانها صاحت قلت لها إذا سمعت تصيحين أذبحج. سماح: يااا إشجاج وياها تركيها؟ -وخري سماح. هاي إذا ما تنضرب ما تصير آدمية. ليش دتفتنين ولج بت الثور؟ مو قلت لج كل شيء لا تحجين؟ أني قلتها واحد ضربني على ظهري. حسيت قلبي وقف اندريت ومستعدة للكتلة. مصطفى ضحك كال كلمة موش قدها عليش تقولينها؟ -عزا مصطفى متت. قلتها وقعدت كامشة قلبي.

-قومي ابنك يبكي، اعملي له ممة. قمت سويت الممة وانطيتها لمصطفى قلت له وديها. أخذها وطلع. رحت أغسل إيدي شفت سنسلة عالسنك بيها حلقة شلتها. قلت لها سموح هاي لمن؟ -يااا جيبيها مالة عمي. سودة عليّ إجه ضغطه مفول دنّق غسل راسه ونساها. -شنو؟ شو حلقة مالة من هاي؟ -مالة ذولاك الناس اللي سمعنا بيهم. اليوم رجعوا لزلمتهم من جديد. -من زمان ترى رجعت. -بس استونا درينا. المهم جيبيها ولا تحجين إذا شافها بيد أحد يقوم القيامة علينا.

احنا نحكي ودخلت دعاء ملابسها منكعة قالت إشبي ابنك هيج دمرني؟ -شنو إشبي؟ عزا بعيني؟ طلعت بسرعة أركض لقيت مؤتمن خاله على متنه يمسح على ظهره. أخذته منه قلبته. عمتي: يمه إشمالكم انخبصتوا؟ ما بي شيء شو جيبوا ليه. -عمة هو ما يتقيأ، ليش هيج صار له؟ -الجو تغير عليه ومطهر بكى هواي. ما عليه جيبي. -هاج بس ديري بالج عليّ على كيفج. -انطيني ملابس. قعدت يمها طلعت له ملابس نزعته. هو دبدوب أبيض ومصطفى ما صدق إجيت عليه يبوس ببطنه.

-مصطفى فدوة لا يلجم. -ما عليه. خالين له فنجان جدي بالحفاظة. باوع له كله ولك هيبة المضيف بالحفاظة لا يا كلب. -هههههه شوف إشلون ديضحك. -بويه فدوة تروح العشيرة لهالضحكة. قالها وشاله يبوس ببطنه. مؤتمن: هههههه ولك لا تلجمه. قالها دنّق أخذه يبوس برقبته ويشتمه. عمتي: ... يا دجيبوا لا يبرد، اشبيكم؟ ويا عمه مؤتمن لا ياخذ نظره، جيبه. أخذته، لبسته فانيلة ولباس صغير، رجع أخذه مؤتمن وكعد يم بيبي، عود راد يشربه

ممه ومصطفى يعلمه يكله: -هيج موش هيججج. مؤتمن: -خايب وخر أعرف. -شعرفك اسألني انه خبره. عمتي: -ومنين خبره يبعد عمتك؟ -سألي بت اخوج، عود اروح منا لبغداد اوصل ميت تعب، اريد افتر اتونس تبلشني بخلفتها، انيّم كيتي وارجع انيّم هذا. -أطلبك هواي لا تنسى، لو ما هي جاهسة أنت بالسجن. باوعلي، ضحكت، غمزلي. أشرتله على جدو ودنكت، سمعت مؤتمن كله: -خير إن شاء الله، الله يستر من هاي حركتكم.

نعست وذوله ما يرضون ينامون. مؤتمن ما ذب تيم على كلبه، وكيتي متمددة هم خاله راسها بحضنه. شافتني سماح أثاوب كالت: -قومي خيه نامي بغرفتي. -لا اهنا أنام بغرفة بيبي. باوعتلي ورجعت باوعت لمؤتمن ودنكت خجلانه، تذكرت من كلتلها حرمة عليه دخلت غرفتج. سماح: -چا ننام يمج اليوم، دكومي خلي نفرش. قمت، مؤتمن باس تيم ونيمه على قريولة جدو، راد يطلع جلبت كيتي، شالها وطلع. فرشنا، جدو نام بالديوانية، تمددت ميت تعب ونعس بس منو يخليك تنام؟

جذب. كيتي ومصطفى سووا حرب البسوس بالصالة، أسمع ضحكة مؤتمن عليهم. سماح: -من اشوكت هالهوسه فاقدينها؟ -يالله هم حلوة الهدوء. -لا خيه موش حلوة، عليش واحد يضحك على روحه؟ اسمعي مؤتمن اشلون يضحك، من اشوكت ما اسمعه ضحكته من يوم الطلعتوا. -هذوله شديسوون شنو هالاصوات، كلتها وكمت.

وصلت يم الباب وأشوف كيتي شادلها على راسها شورت صبوحه، مصطفى كاعد بالنص خال طاوه ياكل وهيه وجلبها يفترون داير مداير، وتصيح وي وي وي وي، تعبد مدري تسوي طقوس. بس المهم ازعاج، وكلما تخلص لكمتها يرجع يسويلها لكمه يخليها بحلكها ويكلها انطلقي وترجع للركضة وصراخه الي كعد البيت كله. صارت عيني عالدرج. مكرم: -ها خويه لا تخلين بنفسج يعدي طفري. -هههههه لا ما بيه حيل. -كلت أخاف مشتاقة للتطفر.

-بطلت اشتاق، كلتها وباوعت لمؤتمن الي اصلاً لكيته صافن بوجهي، رجعت للغرفة، تمددت خليت تيم يمي ونمت. اخذولهم ساعة كلمن راح لغرفته، كلتلها سماح: -وين كيتي؟ -حبت تسترجع الذكريات، اخذت أبوها لغرفتج وناموا. -اليوم المن منجن؟ -لتهاني خيه. -وين مهرة؟ -ويه عمتي بالزيارة، مصطفى يكول جذب راحن للمقبرة يسون سحر، بس يكول لحد يحاجيهن خليهن براحتهن. -عزا، يعني مهرة هم طلعت جماعة السحر؟

-أووف لا خيه، هاي يمشينها وين يردن بفلوس ومصطفى مغلس يكول لا تدخلين. احنه نحجي دخلت دعاء، كالتلها سماح: -شكو جايه؟ -ما اجاني نوم وهذا العلاج الاخذه قوي بطني توجعني. -يلا بلكي تحبلين، ما يخالف تحملي. -هو متحمله. قامت سماح تغسل الممات مالت جهالي، ضلت دعاء يمي، كالت: -شنهو ناويه تبقين؟ تره مؤتمن ما رايدج بس ما يريد يخجلج. -لا امني مو اني الي ابقى وأظل أتوسل مثل غيري.

-غير رجلي، چا حلوة أظل مثلج أملطلطة من بيت لبيت، عاد أنا استقريت وجاي أكمل علاجي وهالمرة راح نسوي أنابيب، كال ما أخلي نفسج بطفل. -إن شاء الله، يلا قومي اريد أنام. -شوفي قبل لا أقوم. طلعت ايدها راوتني، وأشم اسمها واسم مؤتمن وبينهما قلب، كالت: -شوفي اشسوه بيهن، اشلون مورمة من عضاته، كلما شافها وعضها ميت على الرسمة، وها صدك جاي يمسح الرسمة مالتج، دكها ليزر ماسح جلسة أولى، بعد جلسة ينّمحي مثل ما انمحيتي. اليوم شافج كال:

-خطيه جايه بس تريدني أردها، جسرت خاطري، ما تدري نفس ما ظل الي بيها، ألف الحمد لله، تذكرين شنهو جانت أمنيتي وهسه اتحققت، صفه الي. كالتها وضحكت، قامت طلعت. خليت راسي بالمخدة، ردت بس أهدي روحي ما أريد أنفعل، أني شنو الجابني، لويش هيج سويت؟ راويتيهم انتي ما مهتمة، راويتيهم اشلون عايشة من دونه، راويتيهم ماخذة حريتج والله عوضج بأطفال جانوا يتمنوها، أي وشنو استفاديتي؟ بس احتركت روحج. قمت لميت جنطتي ولبست، دخلت سماح كالت:

-وين غزل؟ -اريد اروح. -بهالليل اشبيج خيه؟ -ما بيه، جيبي كيتي يلا دا اروح. -غزل اشبيج؟ منهو حاجاج؟ اشكالتلج دعاء؟ بالعباس يحركها مؤتمن اذا محاجيتج. -ما حاجتني، يلا جيبي كيتي بسرعة. أخذت الجنطه طلعت خليتها بالسيارة، ونيمت ابني ربطته عدل، دخلت أخذ كيتي لكيت مؤتمن نازل شايلها، كال: -وين تردين بهالليل؟ ما رديت، سحبت منه كيتي، صارت عيني بيده، لكيت صدك اللون خاف، غصباً عني نزلت دموعي، شافني أبجي كال: -منهو وياج؟

شلت كيتي عدل فزت رادت ترجع لأبوها، أخذتها، ردت أطلع صرخت، كال: -اشبيج بويه؟ غير تفهميني منهو وياج؟ -وخر مؤتمن اريد اطلع. -وين تردين بهالوكت؟ من شنهو مغتاضة؟ منهو سمعج حجي؟ -محد، وخر دا اروح. أنا امسح بدموعي وتنزل، وكيوت تصرخ تريد أبوها، تالي أخذها من ايدي سكتت. طلع مصطفى مكعدته سماح، أجه كال: -شكو اشبيكم؟ مؤتمن: -شوف بت عمج وافتهم منها. مصطفى: -اشبيج غزل؟ شهكت كلتله: -اريد أمشي. -عليش هيج فجأة؟

هسه جنتي ما بيج شي وتضحكين. -مصطفى توصلني لو اروح وحدي؟ -لا يابه اوصلج. مؤتمن: -وين يابه؟ العلم تجينه الصبح اتبارك، اشلون تاخذون تيم؟ كلتله: -هذا الهامك. عفته وطلعت، أجه وراي كمشني من ايدي، ردت أهد ايده، كال: -شنهو الصار؟ -وخر مؤتمن، من البداية غلطت من اجيت، استاهل اليصيرلي. دفعت ايده وطلعت، صعدت بالسيارة، أجه مصطفى راد ياخذ كيتي، صرخت مچلبة بأبوها، يكلها: -بابا والله اجيكم روحي هسه. -ماااا لا بابا ما اروح.

-حبيبتي اشلون؟ شوفي ماما وتيم رايحين، لا تبجين يبعد أبوج. -ماااا لا حباب، خلي غزل تروح لأمها أنا ابقى وياك. مصطفى: -لا يا ناقصة، باعت العشرة بثواني وطردتها بدون احساس. باوعله مؤتمن وهو بسرعة دار وجها يغني تيه السالفة. رجع جر كيتي منه كوه وهيه ترافس، جابها للسيارة انطانياها، مسحت دموعي وكمشتها، سد الباب، وكفت تدك بالجام تتوسل بأبوها يرجعها وتبجي.

أباوع لسماح واكفة تبجي على بچيت كيتي ومؤتمن ورث جكارة، هيه سمعت شغل السيارة وهيه كامت تكمز وتفرفح تضرب بالجام وتصيح: -باااباااا. بحركة كلب. أباوع مؤتمن يباوعلها بكسرة، ما اتحمل شوفتها، فرك راسه وراح للجهة الثانية، وهيه ضلت تطفر، طلعنه، كسرت خاطري خليتها بحضني. مصطفى: -حبيبتي هسه بابا خابر كال أبدل واجي آخذ كيتي، كافي لا تبجين. شويه هدأت، كال: -غبي هاي الوكفه والمنظر يسوه عمرك، خرب بتفكيرك. -اشوكت مسح الوشم؟ -يا وشم؟

-الي بيده. -منهو كلج مسحه؟ -محد، أنا شفته هيج، كارهني اشدعوه، اشسويتله وهيج انقلب؟ -ولج والله ما ماسحه، بس يجوز خف لونه، تعرفين مؤتمن برمائي، أربعة وعشرين ساعة مطوف بالمي، على هاي بچيتي؟ -لا. -چا على شنهو غزل بروح أبوج كولي؟ -شغله مو يمك ما تنحجي. -هاا فهمت، يلا خلي تولي، بس عاشت ايدج من اجيتي، أوووف غير گلبتي الطاولة بيهم، شوفي باچر من تجي شعشبونه وتعرف شتعمل، واشلون راح تعلك بينها وبين مؤتمن. -وعلى شنو تعلك؟

-ولج حسبالج سهلة عليه من أخذتي جهاله وطلعتي جدام عينه؟ ظل وراج بس يباوع، تره بالعباس تسوه عمره، شايفه من شايل ابنه وطهره اشلون فرحان ويضحك، لو من يلاعب بنته شنهو المتعة من عشيته هسه من بعيد عن أطفاله؟ -هاي هيه صاروا جهاله المهمين. -ههههههه تره اكو أشياء ما يصير الواحد يحجيها يا الثولة. سكتت ما رديت، مشينا شويه اتذكرت النگوط. -مصطفى اريد أسألك سؤال تجاوبني بصراحة. -على نوع السؤال. -لا على نوع المعزة.

-لا هيج نتخاربنه، شنهو غردي؟ -وين تودي الفلوس التاخذها؟ -أووو فكر عينج بنگوط تيم. -لا تعرفني مو هيج، جاوب مصطفى وين توديهن؟ -يجي يوم وتعرفين. -لا هسه فدوة. -موش هسه، فد يوم آخذج للمچان الي مضيع فلوسي بيه. -اشوكت؟ -كم يوم بس يا غزل، والعباس لو ما الخوه البينه ما اكلج، بس اذا عرفت طالع السر تنتهي الخوه، موش بس الخوه أنا هم انتهي. -لا والله أبد. رن فونه، رد صوت مؤتمن تعبان مبين، كله: -سكتت كيتي لو بعدها تبجي؟

-لا صفكتها مرتك راجدي سكتتها بمچانها. هيه سمعته كيتي حجه وهيه شهكت كالتله: -بابا تعال. -يبعد أبوج باچر اجيج باچر. -لاااا هسه بابا. -استغفر الله يا روحي لا تبجين والله اجيكم. سمعت مو هسه، صرخت صميت حلكها عضتني، صفكتها راجدي وهيه صرخت، أسمع مؤتمن صاح: -غززززل، لك مصطفى رجعهن بسرعة. غلق الفون، كلتله: -لا تسمعله يلا أطلع طريقك. -لا وعلى الأساس أسمعله هههه، يابه غير أريده يطلع حركته بالمعفنين.

-لا تخاف محد يفتن عليها، راح يضمن السالفة حتى سماح تخاف من المشاكل. -أفا وأنا أخوج، تطلعين مختاضه والمعفنه تنام بسلام، خايبه چنج ما عرفتيني، شو انكتمي شويه. كالها واتصل، أول ما رد كله: -بالعباس ما صايره، أنا شكو وابتلي متكلي؟ عمي والله كرهت روحي مؤتمن، لو تلم نسوانك وتضبهن، لو ترد كلمن لبيت أهلها وكول أنا موش كدها، يله هسه بيمن ابتلي بهاي التبجي؟ لو مرتك الي تخربطت وين أولي؟ ... شرجع رحمة لدينك، هاي كل قوتك؟

ارجع روح خويه أهم المعفنه، ديربالك عليها هاي اذا موش انت الدازها هيج تكلها، روح خويه الله يهديك. كالها وغلق الفون، ضحك كال: -اشلوني؟ -هههه مصطفى صدك دتحجي؟ -خلي تاكل كم صونده على كم دفره يسلنها، بليل زلمه نايم بأمان الله، بنيته بحضنه ومريته وابنه جوه، تجين يا المعفنه تخربيها عليش؟ -تره ما حجت شي بس هيج أشياء صحيحة. -أدري أتمسلت أم أسبال، تريد أنابيب بلكي لأنچ فالتة كلمة وتچلب بيها حتى تجسر گلبه ويكلها ما يخالف أعمل.

-يعني ما ناوي يسوي؟ -هااا لااا ناوي إن شاء الله، بس والله استمتع من أشوفها مورمة خاصه هسه بعدها دمعة كيتي بعينه وطلعتج وانتي تبجين وابنه الما لحك يشبع منه، أوووف بويه، ولج غزل ما تجين تسوقين مجاني وخليني أرد، بالحرام يفوتني المنظر. -مصطفى تره تعبانه دا اريد أنام. -درداية التدردم فجج، ولج صدك محتاج فلوس؟ ما عندج؟ -لا عندي كم دينار زادن البارحة. -بعد بيتي من نوصل انطينياهن. -تآمر من عيوني بس شتسوي بيهن؟

-ولج اريد أشتري ملابس، رجلج عص ما ينطيني. -أهاا يعني تريد بس للملابس؟ لبالي تريد هواي. -لا لا أصلح سيارتي هم. -ولو ما أصدك بس ما يخالف من نوصل ذكرني. نعست. -خمدي، تيهتي النومه عليه خرب بشكلج. كيتي غفت رجعتها مكانها وغطيتها، همزين تيم عنده سبات والسيارة تتحرك بعد ما كعد، خليت راسي ونمت، ما كعدت لمن كال: -هوشش وصلنه قومي. كعدت نزلت، شال تيم انطانيا وشال كيتي، دكينا الباب، طلعت ماما، كالها:

-أدري ابتليته خو ما ابتلينا، شنهو يوميه هيه؟ عمي بنتج ما نريدها يوميه دازتها شنهو؟ ماما: -خير شو نص الليل جايين؟ -الصراحة ما كدرنا نتحمل، تكول صراصر مبدلة جلدها، يابه ذوله ذبيهم بمجري حشه خلقة الله، خو هذا الصغير بريعص غرفة ما لايحته الشمس، هاج هاي بنتج الثانية هم أخذيها. -هههه ياا وين أدخل جوه وين راجع هيج وكت؟ -لا والله الصبح عندي شغل لازم أرد، أخذ تكسي عدل عال بصرة وانعل أبو مؤتمن اذا ما دفع ولبسها براسي،

رجع كال: هوشش وين الفلوس؟ -هسه دا اجيبهن انتظر. دخلت صعدت أخذتهن من الكنتور ونزلت، اسمعه يكول للماما: -يا خاله كاضيها أگدي بالتقاطع وآكل عايش ويه وحوش، لكمه ما ينطوني. عليش أكلج حلفي صبوحه، ذاك اليوم خبزه بحلك البزون شفتها، ساعة أركض وراها وحاصرها. عاد كضيتها وفركت حلكها طلعتها، شيعمل الجوع ما يرحم. ماما تسمع ومسايرته، تكله: -أي عمه كمل. طلعت جريت ايده، خليتهن بيده، كلتله:

-يكفنك سنة أكل وشرب بعد، لا تكدي عيب صرت جبير روح اشتغل. -ولج منهو يشغل أحد؟ مرت أخوه معوقه. -منو معوقه؟ -چا دعاء ترديها صاحيه؟ -لسه -أوكفي لج بعد عندج لو ذني كلهن؟ -مصطفى دتحسسني تطلبني. -ولي بت الفكر اشكد جلف، يلا ولي وكون رجلج ما يدفع الكروه والحمزه أكابله وأكعد لباچر أسويها مناحة. -هههههه روح الله وياك، صدك لويش ما تأخذ سيارتي؟ -واطلع معتصم من كبره يردها الج، دخلي لج كلنه مفهيه بس غبيه هاي صارن هواي، يلا ولي.

سلم وراح. دخلنا، كالت ماما: -خير لويش اجيتي هيج وكت؟ -ماما مليت. -جذابة اتعاركتي؟ -لا. كلتها وصعدت لغرفتي، ذبيت ملابسي وتمددت، شفت فوني يضوي شلته، لكيت سماح رفضته. دزت مسج فتحته، كال: -شنو كالتلج خلتج تطلعين هيج وكت؟ ما جاوبت. ردت اتصلت فيديو فتحت باوعتها كالت: -شنهو غزل؟ شهكت كالت: -هسه غير نفتهم عليش تبجين؟ مسحت دموعي كلتلها: -ماكو شي لا يظل بالج. -شنهو ما يظل بالي؟

ماعونه نشوفج وتجين والدنيا ما سايعتنه، تالي تطلعين نص الليل انتي وبنتج تبجن. -نامت هسه تنسى، للصبح تعودت عادي صارت عدها. -غزل بروح أبوج احجي شنهو كالتلج؟ -ماكو شي، كالت الصح أنا الغلط، كل كلمة كالتها هيه الصحيحة، الصبح كولي لمؤتمن اريد أطلق. -يااا هيج السالفة جايدة؟ شنهو ولج؟

-ماكو شي بس أنا هم من حقي أعيش، خو مو أدفن روحي بهالعمر، وها أخاف ما يرضى يطلق تره مو صعبة، عند أي سيد أطلق غيابي وحتى اشتكي عليكم بجوازي، بس كلت ما أريد أكسر رجولته وأطلق غصباً عنه، خلي أطلقني كدام العالم أحسن. انسحب الفون صار مؤتمن كدامي، كال: -شنهو كالتلج؟ ما رديت، اجيت أسد الفون، صاح: -غززززل لا تغلقي احجييي. -طلقني مؤتمن. ما شفت بس الموبايل انشمر والشاشة صارت سوده، راح فون سماح. غلقت الفون ونمت من التعب، ما كعدت

غير على صوت ماما كالت: -رجلج جوه. -شنو؟ -رجلج يريدج بالطارمة واكف. -ماما ما أنزل، وديله بنته خلي يشوفها ويروح. -هو بنتج مچلبة بركبته، قومي يكول بس أحجي وياها. -ما اطلع. عافتني ماما، قمت وره البرده أشوفها واكفة يمه تحجي وهو مدنك، أشرلها براسه لأن ما أسمع شنو يحجون، رجعت مكاني نمت. مر يومين هم أجه مؤتمن، بس ما نزلت، أخذ ابنه فتح الضماد اله وجابه، اسمعه يحجي ويا ماما بصوت عالي ما فهمت، شويه وطلع. اجت ماما كالت:

-عزا اشبي رجلج؟ -اشبي ماما؟ -ولج صاح بوجهي رعبني، أنوب صوته خشن خلاني ما أعرف أجاوبه. -على شنو؟ -تيم ملتهب شويه، كال أمه ما تفتهم، انتي اشبيج اصخام بوجه، خلاني أتيه حلكي، صفنت على شنو كاتلات روحجن عليه؟ -يا أتيهين حلكج، هاي انتي نرعبتي من صوته، شايفه من يكعد ويورث جكار ويأشر تعالن، قمة الحنان يكت منه، يا حلكج غير تنسين انتي ذكر لو أنثى. -مو اكلج مطي مال كتل انتي وأنوب تبجين عليه، يلا بالله.

-ماما حقج، عمو جان فاهي وياج، ما حاسه بالنحسه، خو من يعصب يكلج وين تطيرين اليوم ويلكفج يعيد ترتيب ملامح وجهج، تحسين روحج أميرة زمانج، لو من يجي يحضنج تتكسر عظامج بحضنه ويكلج لا تبجين بس مره ثانية لا تعيدها، لأن أفصم راسج قمة الرومانسيه. -تف أمداج انتي ورومانسيتج الخايسة، وخري من وجهي حتى حرمات التفلة بيح. غمتني وراحت تدردم ضايجه، ضحكتني، لبالها صدك دا أحجي مستمتعه باليسوي. شفتها تريد تطلع، كلتلها:

-ماما البارحه جان عمو شهم هناك، ولكيت قلادة بيها حلقة، تعرفين شنو قصتها لو لا؟ -لا وحتى شهم ما أعرفه، وغزل لا تجيبين طاريه مره لخ لا تخليني أرجع لقتيبه. -مم تمام بس لا تعصبين تره بس هيج سألت. ما ردت طلعت ضايجه، شفت فوني يضوي مصطفى يتصل، رديت: -ها مصطفى؟ -هلو خويه اشلونج؟ -تمام، تره صارلك يومين ماكو وينك؟ -هههه بالطريق حضري نفسج. -شنو أحضر نفسي وين نروح؟

-موش حلفتيني بالمعزة، تردين تعرفين فلوسي وين، يلا وهاي أنا جايج أخذج حتى تشوفين وين أصرفهن. -الله عليك يلا هسه أغير ملابسي وأنتظرك. -حضري لكيوت ويانا. -بس مصطفى بداعة صبوحة، لا تسوولي دراما من توصل سلم سلام عادي وادخل بروح أبوك. -ولي لج ضلي الغل والحقد ياكل بيج منه، يلا ولي حضري أقل من نص ساعة واصل. سد الفون وقمت عالسريع غيرت الي ولكيتي، وأخير راح أعرف شنو السر الضامه مصطفى. استوني خلصت شفت فوني يرن يعني وصل.

نزلنا لكيناه ويه عمو يسولف، شافته كيتي. هدت ايدي دنكت فتحت أيديها ولولحت براسها وهو شافها بعد عمي عن طريقه وسوه نفس الحركة. اشكد تلعب نفسي من درامتهم، اتشابكوا واتعاتبوا وأنا واكفة على أعصابي اريد أدفرهم. كالتله وهيه مغمضه وعايشة الدور: -أين نذهب يا بابا؟ -نأخذ أغراضنا ونذهب لجزيرة لا يوجد فيها فقط الصبوحات. هو كالها وهيه على الأساس تأثرت فرت راسها بيأس. وهو وياها عايش الدور، صحت:

-هييي انتم مو كافي تره زودتوها، أنوب نحوي، وبعدين شنو تردون للطمر الصحي شنو بس صبوحات؟ قاموا باوعولي اثنينهم صفح، ردت كالت كيوت: -نأخذها معنا يا بابا؟ -ماذا نفعل يا ابنتي انها لزگه. -أي والله، كالتها وهيه مغمضه عيونها وهزت راسها وهو هم صار نيتهم يعيدون الدراما. شفته دنك وهيه فتحت أيديها، صرخت بيهم طفرتهن، قام كال: -مرض كمزتيني. -مصطفى عالسيارة لا أفشخكم. اندار لعمي كاله: -استلم منين هالعطلات تطلعلي؟

-يااا أنوب عطلات، باوع حظي فوك ما حاملة تفاهتهم، يلا مصطفى بسرعة عالسيارة. رحنا وعمو يضحك على سوالفه، سلم وشغل السيارة. أول ما حركت كال: -غزل أمانه محد يعرف. -أبد والله، زين وين بالبصرة لو بغداد؟ -لا بغداد هنا قريب. -حلووو يلا الفضول راح يكتلني. مشه بينا مسافة طويلة حوالي نص ساعة وكف، كال: -يلا نزلوا. نزلنا، أشرلي وهو يضحك كال: -هااا شفتي وين مضيع فلوسي؟ رفعت راسي وتفاجأت وأنا أشوف كدامي…