تحميل رواية «كحل عرب» PDF

الحلقة_١٠

(درب الهوى)

تلولحي بروحي گصيبة تلولحي

تمرجحي بكلبي قصيدة تمرجحي

احنه خلانه وكتنا تراب بحلوك الرحي

شما يطول الجرح بينا يطيب بس ما ينمحي

تلولحي تلولحي

تلولحي وتمرجحي

(عريان السيد خلف)

روريدا او راديون كل يوم جمعة تنزل للسوك بعد ما تلح على امها بالطلعة، خاطر تنزل تشوف أنسان تقابله بالنظرات و المشاعر ، نزلت بهيئتها و بكل الزينة اللي هي بيها ، عيونها تبحث عن ذاك الرجل الشغل بالها طول اليوم .

اكثر من نص ساعة تفتر و هي ما شافت اللي ابالها، فكعدت على دچة صغيرة متضايقة و امها واكفة ادور و تتفكد بالأقمشة

- راديون هيج كماش اخذلجياه ؟

- ما ادري ما جاي على بالي اشتري

- شنهي اللي جرى فركعتيني خاطر ننزل للسوك و ساعة النزلنا گلبتي وجهج .

- لاله لا بس القندرة اذتني ما بيه شي.

بعدت العباية و دنجت افرك برجلي اذاها الكعب خصوصا الكاع مال السوك صاعدة و نازلة كلش اذتني ، شلت راسي عاينت زلمة مبين عليه الغنى وشفقة اعلى راسه مال ذوله الأغنياء

فصلني تفصيل وهو يعاين من ثوبي و الذهب العلى صدري لحد رجلية، فجأة ، اندفع الزلمة بقوة راد يطيح اعلى وجهه

خنجر :- انا كلش اعتذر بس المرت الأخرى عاين الدرب خوية خاطر لا احد يعثر بيك

ضحكت ، و اخيرا اجا اللي يتمناه كلبي ، اعاين عليه لابس قميص ابيض و بنطرون اسود و العركجينة فوك راسه و الشماغ على متنه ، قبضة حديد بأيده و الأيد الثانية لاف عليها زنجيل .



الزلمة من عاين عليه و شافه شقاوجي ، ما حجه ما راد يورط روحه وياه، من ورى البوشية كمت اضحك و اعاين عليي .

دار وجهه هو و خزرني خاطر اسحب رجلي و الف العباية ،التفيت بسرعة ، وكف هو نافخ صدرة و يتنوعلي باطراف عيونه .

كمت من مكاني ادور بالأقمشة و ارد ادور اعاين عليه، اخذ تفاحة من بسطية الرجال خاوة و عضها و هو مستمر يعاين، تنوعت لابو البسطية علامات الأنزعاج وضحت علية بس ما يكدر يحجي يخاف منه .

ضحكت و اهتزت اكتافي ويا الضحكة، انتبهت امي :- شمالج تضحكين

التفيت بسرعة :- لا يمة بس القماش بيه تراب جثير و كام يحك بخشمي

صاح بصوت عالي :- يالضحكتك ساحرة الوادم خاف الله بعبادة ، تراك ضيعت اعگولهم

- دنجت و انا مبتسمة ، حجه ابو البسطية :- عمي يرحم والديك ابعد عن البسطية كطعت رزقي ، الوادم من تشوفك واجف ما تكرب اعليه.

- شنهي شكلتتتتتت

راديون :- يمه من رخصتج بس اشوف ذيج البسطية ، دكيكة و اردلج.

كضيت عباتي رفعتها و مريت من يمه وانا متعمدة و رحت اعلى البسطية اللي جدام، هو من شافني دار عن الحجي و ظل مركز وياي

عاين منا و منا، بس الحجي موچد بيه ، صاح بنبرة تهديد :- دير عيونك عني لا اديرلك المحل كله

اندار الحجي، و هو بحذر صار يتكرب ، انا كضيت حجل فضة و اعاين بيه ، بس بالي كله وياه.

اخذ نفس ملى ريته و تنهد و هو جريب من يمي، حجه :- نظرة وحدة كافية علي اواسي روحي بيها ليه الجمعة التجي، لا تبخلينها علي بروح موتاج

عاينتله والبوشية اعلى وجهي وطالعة بس عيوني، حجه :- ااااخ يا كلبي الكوي المرجف گلوب الوادم شجاه ورجف يم عيونج .

حجيت ويا ابو المحل :- حجي بيش هاذ ؟

- من تحجين ويا غيري احترك و تحطيني بنار ما بياش اعلى طفيتها.

اجت الشيخة ملوك :- ها يراديون

- عجبني هاذ الحجل

- فضة و موش حلو ، العدج ذهب احلى

- انا رايدة الفضة عاجبني

- ما دامه عاجبج ، اخذيه خاطر ندفع حكه .

انتبهت الشيخة لواحد شقاوچي جريب من بتها تقريبا، جرت ايد بتها و كالتلها :- غير مرة نشتري هدي ما نريدة

- عليش

- كتلج هديي

اخذت ايد بتها و كالت الها :- خلصنا خل نرد

- لا يمة بروح جلوب عليج بعدنا ما صارلنا ساعة من جينا

- ما محتاجة شي

- واذا انا مليت من كعدت الغصر خلينا افتر شواي

- افتري بالبستان موش بالسوك ، امشي يالة

- يمه

- كلت الج امشششي .

تضايكت كلش لين ما صارلي اقل من ساعة من وصليت السوك، مشيت بأنزعاج .. عاينت وراي ، هو كاض الزنجيل و يفر بيه و يتنوع وراي.

جرتني امي :- عينج جدام

- يمه لا تجريني هيج شمالج شنهي جاهلة انا

- جا من كونج مو جاهلة حطي عينج بالكاع و امشي

- انا كلت الج رايدة الحجل الفضة

- موش كودج حجل يراديون ، ولا تخليني احلف و احرم اعليج طلعت السوك، امشي.

- مشيت مشيت

ركبت الربل و صعديت و انا اعاين اعلى ذيج الصفحة هلبت يتبعني و اشوفه اخر مرة



ما خيب ظنوني و اجا، ابتسمت عيوني بشوفته، و دنجت بسرعة لين امي صعدت .

نزعت الحجل الذهب اللي برجلي و طريته اعلى صفحته ليغاااد ، تحرك الربل و صاح الزلمة (دييييخ ) اخذت نظرة اعليه ، شفته تكرب و دنج اخذ الحجل من الكاع .

يا كثر فرحة گلبي بشوفته، من اعاين جن اصير طير حر و ارفرف شما بيا حيل و اتمنى احط اعلى جفوفه .

رديت للبيت و انا الشوك ماخذني ليه

اول ما دشيت ، لكينا الخاتون مرت ابوي البغدادية حاضرة القصر، نزعت العباية و البوشية و امي نزعت و عاينت اعليها، تكربت ليها خاطر اسلم لجن امي كضت ايدي و خزرتني خاطر اوكف، وحجت :- دشي داخل.

عفتهن وانا اتمشى لحجرتي، لاكيت مرت اخوي زناد و هي شايلة ابنها اعلى خصرها و بتها كاضة بذيالها :- هاي مرت ابوي موش يو لاله ؟

- الا هي بذاتها

- عمية ما تشوف ؟

- اي فكدت نظرها من زمان

- مسيچينة

- التبوك زلمة من حرمته موش مسيجينة و ما تتعداها الحوبة

- شهالحجي ، ان جان الزواج مرت الأخرى غلط و اعليه حوبة جا عليش الله حرمة

- جا ترضين رجلج لو عرستي ياخذ عليج

- ما ارضى لجن ما اكولن حوبة و اتشمت ابشر من طين مثلي يغلط و يصح .

- روحي عاد ولا تبيعين مثاليات براسي.

عفتها و انا رحت لحجرتي، دشيت لعالمي، كفلت الحجرة ، فكيت شعري و شعلت الراديون اعلى اغنية ام كلثوم (سيرة الحب ) و ظليت كاعدة اعلى قريولتي و العب بشعري ، و بالي سارح بدروب الولف .

(بيت حاكم )

هدية :- دشيت البيت و انا العب بكصيبتي، صارت امي جدامي

- ها يهديوة شبعتي خوارة يو لا ؟

- يمه و علي ما خورت ، رحت للغصر ورجعت

- وشعدج بالغصر انا موش عفتج ابيت اجدادج

- رحت اشوفن راديون رادتني اروح وياها للسوك و ما رحت كلت الها امي ما ترضى

- لا يبوي مكلفة رويحتج يمة ، لو رايحة

- صكد !!! ترضين ؟

- خاطر اكسر اجدامج

- جا يمة شني ليمتها انا اظلن هيج

- وشناكصج ؟

- يمه انا اريدن اصيرن مثل راديون ، جيبيلي حجل

- يمه اليعاين فوك يبنيتي تنكسر اركبته، كبلج عاينيت اعلى الشيخة و ردت اصيرن مثلها تالي الله بلاني بحمل ما شفت دربي بعدة، ارضي بعيشتج و احمدي الله و اشكري، احنا موش شيوخ يمه خاطر نكت هالذهب اعلى صدورنا.

- جا يمتى اشتري ذهب ؟

- بس يصير عد ابوج شويه انا اشتريلج، هساع عاونيني وخلنا نكضي شغلنا يلا يمة

- اي يمة .

ظليت اشتغل ويا امي، ليغاااد و خلص الماي البسطل الجبير ، كالت امي :- اخذي الجرة و امشي كبل الغروب ترسي ماي بساع وردي .

كضيت الجرة ما عونيت ، و طكيتها ركضة للشط، لجن جانو ناس جثيرين اعلى الشط من كون المغرب نزل و هاي ساعة الناس تكثر بيها اعلى الشط ، يترسون كبل يهود الليل .

ظليت موجفة بمچاني ليما خلصو، كربيت اخذ ماي ، بس كصيبتي طويلة و اطيح بنص الماي، شما اوخر بيها تصير جدامي .

صدت عيني اعلى واحد يعاين اعليه چيف ما كدريت اخذ الماي، دار وجهه من عاينتله، شكلة موش من الديرة جنه واحد حضيري.

دنجت مرت الأخرى و همين طاحت كصيبتي، هميت خاطر احط كصيبتي جوا ثوبي، تكرب الزلمة و هو يكول :- تريدين اساعدج

ما رديت عليه و دنكت اترس ماي، من كون امي ما ترضى احجي ويا زلمة تشوي اعلى اذاني بصل لو سويتها .

هو وكف اعلى كتر من شافني ترست .

ابتسم من شافني شلتها اعلى متني :- شماله هاذ ؟

عفته و مشيت .

غريب :- الحلو و المروبنفس الوكت هنا بالديرة الناس بدائيين وعلى فطرتهم ، بالسبعين و هم حنفيات ما عدهم .. لجن تشوف الواحد يسعى بجهد خاطر يكضي يومه ، مو مثلنا غاد ابغداد العيشة تختلف.

دنجت شربت ماي ورديت للمضيف ، كربت و الوالد واكف اباب المضيف يتوضى ، مشيت ليه ، صاح واحد من وراي

-هلا بهيبة زلمهم ، هلا بعزة عگلهم هلا وجثير الهلا بمهيوب العشيرة

درت ليه شفته حجي رحيم ، ضحكت و كربيت ليها و هو كال :- ولا يهون الشيخ مطر لجن هالولد انا احبنه من الله .

الشيخ :- المادح ولدي مادحني يبو حسن

سلمت اعلية ، راد يحب جتفي، سبگته و كضيت راسه و حبيته بگصته :- هلا بيك عمي مشتاقلك هواي

- هلا و جثير الهلا، شلونك يوليدي

- بخير الحمد لله

- شلونعا بغداد وياك

- نعمة

- يدومها ان شاءالله

زناد :- انا سابكك بوية للجامع

غريب :- عاينت عليي جنه تضايك ، حجه الوالد

- توضى وامش ويانا للجامع ياله

- خلص بنائه ؟

- اي الحمد لله ، جنت رايد اسمي جامع الشيخ ضاحي لجن كلت السيد علي الله يرحمه اولى بالأسم .

- خير ما سويت، سيد علي جان رجل سيد من اهل الله وخوش زلمة و يستاهل

- يالة توضى خاطر نمش

غسلت و توضيت و رحت و عمي رحيم يسألني اعلى وضعي ابغداد و اعلى جيتي، وصلنا غاد للجامع، نزعت مكرم السامع القندرة اباب الجامع و دشيت ويا الوالد ، وكف ابوي ورا السيد و اصطفينا كلنا صلينا جماعة .

خلصنا، حجه الوالد :- ياله نمش للقصر الجماعة محضرين العشا لجيتكم

- اعاين الجامع و اجي وراك ، اسبكني يابة

- جا خوش ناطرينك

مشى و انا ظليت اعاين بالجامع و اشوف شلون شغله و السيد يشرحلي اعلى شغله و ادارة الجامع.

الى ان سلميت و كلت اله :- اودعناكم

- هلا بيك

طلعت لباب الجامع، ادور قندرتي، ما هي : اها جا وين راحت

السيد :- شنهي ضاعت غندرتك

- توني خليتها هنا و دشيت

- عاينها غاد خافنها مذبوبة

مشيت غاد ، صاح خنجر :- تقبل منك مولانا

- خايب عاين وياي القندرة ما هي

- لااااه ياهو الأخذها

من حجه، شلت راسي ليه، و اعاين قندرتي برجله ، صرخت :- هااااااي

- ووجعاي

- دنزع انزع لا اشوفنك الوجع شلونه

- امش منا لا اردك لقصر ابوك ملون

- لا عليك العباس ناوشني

- دخيل العباس، انا معتاز قندرة و اجت بوكتها

- انت منين طلعتلي من ساعة الأجيت فرهدتني لا محفظة ولا قندرة ، تزوعهن لا وعلي اكضك اخربط معاني وجهك

- يالمتطين جا انت موش تصلي، ذاك الجامع دش و اطلب من الله يرزقك بقندرة عليش جاي عليّ وانا العبد الفقير .

- من عوينة ابو اصلك ادري الله مكرم اسمه يرزق قنادر ، دردلي القندرة لا ابتلي بيك وعلي.

- ابد والله

- جا اروح للبيت حافي شلون بلوة هاي

- المؤمن مبتلى و انت مؤمن ورجل متطين ما بيها شي لو مشيت حافي .

- عفت الأيمان الك اطيني و ادخل الجنة

- خب دكمممممم ابو الوصخ هو انا بعمري ما عملتلي حسنة تالي وكتي اتصدق عليك و ادش الجنة ، يابة عليش ادش الجنة والله انطيت لسرحان المتطين قندرته ودشيت ، انا خنجر ابن خنجر ادش للجنة بقندرتك يالوصخ

ضحكت من كل كلبي :- جا هسه شلون

- خلني اصير چريم براسك و اطيك نعيلي (نعالي)

- يابة هم رحم الله والديك و كثر الله من خاواتك وساعة السودة الشفتك بيها

- خايب امش لا وعلي البگك بجلاق اخليك تمشي و تركص هچع

ضحكت و مشيت ، و هو رافكني :- ادري ابتليت اعلى عمري زهرة رضعتني و صرت عمي ؟

- وتاج راسك

- توني جاي و عيب انا زلمة مستقيم و ما افشر .

ضحك بصوت عالي و ظلينا نمشي ليما وصلنا القصر، حجه :- تجي بالليل ؟

- وين ؟

- كعده نتونس

- انا ما اكرب النسوان

- جا انا اكربهن ؟ بس نكعد نريح راسنا بجم كاس

- ولا اشرب

- شلون انا بالمتطين

- لا والله مو قصة ديانة بس ما اقرب هالأمور

- جا اشوفنك باجر

- ما ظلي شي ينباك و داعتك

- لا لا ترا انا حرامي شريف ، و غداك عليّ

حجيت بأستهزاء :- على راسي والله

ردفني بغلطة :- ***** فوك راسك

ضحكت بصوت عالي و انا افوت للقصر، نزعت انعاله الاجرب بالباب و دخلت حافي ، لكيت الكل كاعدين اعلى السفرة ناطريني ، رفعت ادية سلمت و ردفتها:- الزاد ما عليه سلام ، نسلم بعد الأكل

كريم :- تكرب هنا

راديون :- صاير شحلاتك

- اياااابه دباع هاااااي اشون صايرة وج شبسرعة كبرتي

راديون :- ديلا عيني يالبغدادي موش مثل تغييرك ، ما جنك اخوي

الشيخ :- سمو بأسم الله بوية و خلنا نحترم النعمة و ناكل بلا حس.

كلنا التزمنا الصمت ، عاينت لأمي حسنية كاعدة اعلى صفحة و صبيحة مكابلتها :- شلونج خاتون

- هلو حبيبي ماما

- ان شاءالله مرتاحة

زناد :- جنك نسيت تحترم الشيخه و ترحب بيها

الشيخ :- شمالكم موش كلت الكم بلا حس ، نعمة الله جدامكم

تجاهلت ودنجت اكل

احلى شي بهاي الديرة الأكل ، تبذير لحم مو بأنصاف، فخذ الطلي جدامك اعلى تمن عنبر و تردفه بسراحية لبن تشرب لحد ما تحس بطنك تكلك :- جزاك الله الف خير .

تبلتها وكمت خاطر اغسل ، اجا كريم اخوي سلم علي ، و اجت راديون ، حبيتها براسها : شلونكم ولكم

- ننشد عليك لا تمر لا تكول عدي اخوة انشد عليهم

- و علي حكج ، لجن هاي جية ما وراها روحة بعد ، مجابلكم

- اممم رد رد احجي بغدادي احلى

- اخافن من ابوج لا يزفني

ضحكنا ، وكفت الشيخة ملوك :- شلونك يسرحان

- هلا بيج يابة

وكفت وراها سليمة تعاين علي، حجيت :- جهزتو غرفة لامي .

راديون :- سليمة جهزي حجرة للخاتون

ملوك :- كريم الحكني

عفتهم و مشيت تبعتني راديون، كعدنا يم الشيخ الكاعد يحجي ويا الخاتون ويسولف ، عاين علي :- بوية غير هدومك ، زحمة عيب لابس هالبنطرون الضيج نزعه بوية.

- ان شالله بوية ، بس خل استقر بعدني ما اندل غراضي و غرفتي وين .

دش زناد بالدشداشة و العركجينة ، كعد :- الله بالخير

- الله بالخير و الرحمة.

- شحوالك يخوي

- الحمد لله بعد ما خلصت جامعة كضيت شغل المعمل مالت الخاتون بعونة خوالي غاد .

ضحك بأستهزاء :- جنك نسيت خوالك ال ثجيل

عقدت حواجبي متضايق من منطق الأستهزاء اليحجي بيه، وردفته :- الأم الربت موش الجابت وانا اعتز بالخاتون و اخوتها .

الشيخ :- ولا تهون الخاتون لجن اخوتها ما احبنهم

- للغريب ما يتوددون لجن .....قاطعني زناد

- وانت صرت منهم يخوي

- من عاشر قوما اربعين يوما صار منهم، و انا احبهم من كون ما شفت منهم شي يخلوني اكرهم

الخاتون :- هم صح ضد زواجي من الشيخ لكن يحبون سرحان على كد حبي لكون يشوفوني اعتبرة ابني.

زناد :- ايييه الله يثخن لبنكم ، هي هم عيشة بغداد طابت لخوي بالكوة يالة رضى يجي للديرة ويو ما جلمة الوالد ما يرد

سرحان :- كلمة الوالد اعلى راسي و بالفعل هذا اللي خلاني ارد و اتشرف اتعلم منه اصول عشيرتنه و عاداتنا و تقاليد خاطر اخلفه بخير.

تنهد زناد و ما حجه، ردف كلامي الشيخ :- ولدي و عزوتي لا ما اشوف طولكم جدامي و تارس ديواني ما يطيبلي خاطر .

حجينا :- الله يديمك يابة

دشت سليمة وبيدها صينية الجاي، و الشيخة دشت وراها، اول ما حطت كبال الجاي، حجه زناد :- يا هلا والله بسليمة

حطت استكان الجاي كدامه و هي تكله :- يطول بعمرك ابو ياسر .

من الأصول تتوزع الأستكانات من الجبير للزغير، بحطتها كبال زناد اشارة الى ان زناد هو الجبير من بعد الشيخ مطر.

تقربت حتى تحط كدام غريب، رفع ايده و كال الها:- شكرا ما اريد .

الشيخ يعاين بدون تعليق وزعت الأستكاين ع الكل، حجه سرحان :- راديون

- امرني خوية

- يسلم راسج اخيتي ولو ازحمج لجن رايدلي استكان جاي ثكيل اعدل بيه راسي زعم كثرت بالدهن اعلى العشا .

- من عيوني

كامت سوت الجاي و اجت حطته كبال اخوها، شربه بسرعه و كام، و الشيخ يحجي على سالفة بالعشيرة، قاطع ابوه و كاله :- من رخصتك يابة اكومن اغير هدومي تعبان من الطريق .

سمحله الشيخ، صاح :- سليمة

اجت وراها :- نعم يابة

- حضريلي الغرفة اللي بصف غرفة الخاتون

- الغرفة البصفها لجهال ابو ياسر

- اغسل و ارد الكا الغرفة جاهزة .

ما جاوبته ، راح هو سبح و غير و رد ، فتح الحجرة لكا جهال زناد كاعدين ، باسهم براسه و لاعبهم و طلع، لاكته راديون

- تحتاج شي خوية ؟

- لا لكن ردت اسأل ، بس سليمة تخدم بالبيت ؟

- لا خدم جثيرين لجن يوم الجمعة عطلتهم بس سليمة تظل لخدمة امي، الا اذا جان اكو خطار ، يظلون الخدم ، بس بيوم الجمعة مامش احد ، عليش معتاز شي ؟

- لا بس ردت اسأل ، غرفة كريم وين ؟

دلته عليها ، راح كعد ويا اخوه و يحجي ويا و يتعرف عليه عن قرب ، دشت الشيخة :- غريب ، يا غريب

رفع راسه كون هذا الأسم بعد ما راح لبغداد ما سمعه ابد، عاين الها ، حجت :- خليتهم يجهزولك حجرة بصف حجرة كريم ، تكدر تروح ترتاح بيها .

ما جاوبها ، دار وجهه الكريم و كاله : عود باجر نروح و نشوف

كريم :- ان شاءالله

عافهم و طلع، تجاهل الغرفة و مشى لغرفة الخاتون، دخل : يا مساء الخير على عيون احلى خاتون بالطرف

ضحكت و هي تكله :- يا حلاة هاي و عيون ماكو

تمدد على رجلها و هي تتلمس بوجهه و كامت تلعب بشعره :- احلى عيون بكل الطرف

- سرحان وليدي اني لاحظت توتر العلاقة بينك و بين اخوك ، مهما يكن يبقى اخوك ياريت حبيبي تعاملة بمحبة لكسر حاجز العداوة بينك و بينه.

-هاي العداوة مو من هسه ، من اول ما فكيت عيني على هالدنيا اخوي زناد يتسابك وياي و محاربني، و الصوج امه.

- مهما يكن حبيبي، منريد عداوات و عمر الشر ما ينحصد منه خير فبلاه .. حبيبي انت

- ملوك لازم ينحط الها حد خاتون

- جان انحط من زمان بس بلا فايدة

- ان جان محد حاط الها ، فخل تصبر و احدودها على حسابي

- شتسوي ؟

- اول سوسة بلا لملوك بهذا القصر سليمة

-اي ؟

- تنكلع و اعتبر هاي كسرة خشم لملوك

- وتكيدلك بعدين ؟

- وتكيد ، نشوف انا لو هي

- مجبور

- يمه ان ما لاويتها لوتني، هاي الديرة تكره الطيب و تحترم الحقير ، طيبتي ويا الحقير ما تنفع

- حط عينك بعين الله وليدي و توكل عليه و تحسب عليهم

- الله كريم .

كام من مكانه و اخذ ايدها و دلاها على سريرها ، و غطاها، حجت :- وانت وين راح تروح

- راح انامن هنا بالكاع

- خوش .

واكف يدور فراش خاطر يمده، دش الشيخ للحجرة ، هو من شاف ابوه حضر سحب نفسه و طلع من القصر كله ، راح نام بالمضيف .

كعد الصبح، لكه حميد كباله يوجر بالفحم حدر الدلال .

كام من مكانه و كال :- ها صباح الخير يابه

- هلا وليدي شلونك

- الحمد لله ، امي زهرة شلونها اخوتي رباب عبيس

- كلهم بخير مشتاكيلك

- ان شاءالله لو صارلي مجال الضحى امرن عليهم

- هلا بيك، لجن بوية اريد اوصيك

- عليش ؟

- تحاذر من زناد ، تراه مثل اخوة يوسف ما يفرك عنهم بشي و انا اخافن اعليك منه يوليدي

- لا تحط اعلى بالك ، الحافظ الله انت بس ادعيلي الله يوفقني.

- روح ان شالله يوفكك و يفتلحك سبع سماوات جدامك ليما تعلى و تصير انت شيخ هالديرة

- الله يحفظك يابه

- تتريك بويه ؟

- لا والله ما اشتهي، راوحن اخذ الفرس و افتر بالديرة دا الشمس كربت تطلع و الجو طيب

الا ردت اسألك ..

- اي كول

- شسالفة خنجر ؟

- هاذ انا متبري منه عبن صخام وجهي جدام الشيخ كله منه

- شنهو اللي غيره و خلاه هيج شقاوجي و يدور خاوات

- رفكة السوء والله يبويه، هو طيب كلب و شهم و ازلمة خدوم لجن خرب نفسه بهالخاوات

- الله يصلحه

- امين ربي.

عفته و اخذت الفرس ، داريته و نظفيته ، قررت اسميه (جُديل ) ، سامعني انت يا جديل ؟ والله شكلك موش سامعني، كرب خل نفر هالديرة و نشوف شبيها .

ركبت اعلى ظهره و صحت :- دييييخ.

((بيت حاكم ))

كواغد :- كعدوا ياله بساع خلوني اروحن للقصر كبل لا اتأخر وتزفني الشيخة

جسومة :- حاكم يمتى يجي من بغداد

- ما ادري

- مو كالو ابن الشيخ رد كلت هلبت يجي وياه ، شو طول

- يكمل شغله و يرد ، ولج هديييييييوة ياله اكعدي الشمس طلعت و انت الفاهية نايمة

- شني يمة هديني انامن شويه

- كومي اطركي العجين و اخبزي انا هم يالة اروحن ، كووومي

رفستني برجلها ، كمت و انا اتعوذ من ابليس، غسلت وجهي :- شنهي مو جبت ماي امس شبساع خلصتو

ستار :- لا تظلين تعوين خبزي بساع متت جوع

- دامك متت جوع روح جيب ماي على ما اخبز

- والله لو تموتين شنهي انا مرة و اشتغللجن بعد كولي اخبز بمچاني

- يمه شنهي ردي ، جا كله عليييييي

- خلصي شغلج ياله وبلا تهذري

- اريدن ماي

- كملي خبز و روحي جيبي الماي، وريكي اخوتج ، و هااا هاي اخيتج مشطيلها وياج ، ياله يمه انا اروحن

- و علي ما يصير هيج شني ابتليت انا صرت بت كلهم مرتاحين بس انا .

جسومة :- دروحي حبوبه و انا الأحضر الريوك بس اخبزي كملي

وكف اعلى التنور شنكيت ، و خبزت بساع، فحطت ردت ماي، ماكو اخذت الجرة و طلعت تعبانة ، اجت جمارة وراي لحكتني ، عاينت اعليها :- بس اتلحكيني اكتلج و علي

- ماااا اريدن اروحن وياج

- لو تموتين

- اخذت الجرة و خليتها تنط بالبيت و انا طلعت ، رحت ركض للشط، وكفت انطر ليما يكضون الوادم

عاينيت اعلى كتر ، لكيت الحضيري الواكف امس، اليوم لابس اعرُبي وصاعد اعلى حصان :- يا شنهي هاذ شو يومية بشكل ، البارحة حضيري و اليوم ابدوي و صاعد فرس ، شماله هاذ .

ظليت مركزة وياه ، ليما هيسيت هو حس بنظراتي اله، درت وجهي عنه ، و نطريت ليما فضت الوادم ، تكربت اترس، صاح الحضيري :- الكصيبة

عاينت لكصيبتي متكدمه جدامي ، خليتها جوا ثوبي ، صاح :- شااااطرة

نشنشت من مدحني مدري ليش، اخذت ماي بساع ودرت خاطر اردن بساع، شو هاذ لحكني :- ياااع شيريد مني هاذ

مشيت و دشيت العجد (الشارع ) فارغ ما بيه احد بس النخل منا و منا ، وذاك يطربك وراي ، و بس حس رجلين الحصان اهيسهن .

طك ما طك .. طك ما طك

ياااع .. خافنه هاذ زلمة موش من الديرة وما يستحي !

ما عدنا زلمة يلحك مرة عيب ما يصير لجن هاذ جنه زايعها ..

تعديته شواي، و انا امشي بالجرة كمت ادندن ويا روحي ( نخل سماوة يكول طرتني السمرة )

شو هاذ من يمه غنى وياي (وشجابه للغراف طير الميجرة سابي كل هالناس حيرني بأمره )

انداريت ببأبتسامه اعاين اعليه، ضحك هو ، كلت اله :- منين انت

- من هالديرة

- ماعدنا وحيد بهالديرة ما يستحي

انتفض و جر احصانه ووكف :- عليش تكولين هيج ؟

- جا ما يلحك الحرمة الا الفاسد

جر الفرس ليفوك بقوة، صهل الخيل بوجهي ، تعثرت بدربي، و هو طربك جدامي ، طاحت الجرة مني و تنكسر ، صحت :- نعلعله ابيك يا متستحيييي

دنجت اشيل حجارة من الكاع اطره بيها، شفته سحب الفرس و دار بأتجاهي :- شتمتيني

- عليش كسرة الجرة

- انا موش اثول هاطر اكسر جرة ، يو كاضتها عدل ما جان طاحت

- ماكو اثول غيرك

اندار مرت الاخرة ، فز من حصانه و نزل :- انت شنو من ابنية

- انا معروفه ابنية لجن العتب اعلى الواحد الما ينعرف اصله منين ساعة حضيري و ساعة يتنومس بلهجتنا .

- انت بت منو

- مالك غرض

دنجت اصيل الوصلة من الكاع

حجه هو :- الظاهر ءاهلج شبعوج اجل لجن ما شبعوج تربية .

- مترباية و غصبا ما على راسك ، لو بيك خير ما توكف اعلى الجرف تتنوع للنسوان

- انا يمتى معاين للنسوان

- جا ياهو الجان مشكل باله ويا كصيبتي

- حبيت الاشيج لجن طلعت مو كفو ملاشاة

- اعرفنك تعرفني و تلاشيني

درت عنه و مشيت

تكدمني هو وركب حصانه ، عفته وومشيت ، طربك بحصانه و اجا حط وجه الفرس براسي و خلاه يصهل ، جفلت من كل حيلي، عافني و طر بحصانه

شلت حصواية من الكاع ورميته بيها .

غريب رجع للبيت كلش متضايق بعد ما هدية رزلته رزالة غسل ولبس مثل ما يكولون، عاف الفرس برا و سلمه للحرس و نزل، دش للقصر

فات مادين السفرة ، حجه الشيخ :- وينك لهسه و احنا ناطرينك

حجه بنبرة انزعاج :- اعذرني شيخ البيت اللي ما الي احترام بيه مالي كعدة اعلى سفرته

الشيخ بأستغراب :- وياهو هاذ القلل من احترامك

- من مرتك و انت نازل ، ويااااريت تكللها اسمي مو غريب سرحان ، عجبا ١٥ سنه و انا ابغداد و اهي ديرة غرب ما طره اعلى اذني اسم غريب و يوم الادش بيت ابوي يندهوني بغريب و ما يخلولي كل احترام

زناد :- وكت اللي ادور الاحترام الك احترم الاكبر منك ، مرته التكول عنها تراها شيخة هاذ البيت

- شيختك انت انا ما تشيخ اعلى راسي مرة

- شيختك و غصبااااااا عليك

- احترم نفسك و حسك ما اهيسه افتهممممممت

الخاتون :- بوجود ابوكم الكلام هشكل جدا عيب

الشيخ :- لا عيفيهم خاتون انا ناطرهم

غريب :- السموحة منك يشيخ لجن طلعت اعصابي و الا ما معكول اول ليلة الي بقصر ابوي انامن برا .

ما رد عليه الشيخ ، وكام من على السفرة و كال الهم :- دايمة

ملوك :- زناد اتبع ابوك و حب راسه و اعتذر منه

كام من الزاد ، كضيت ايده و كلت اله :- مرت الاخرى صير زلمه وواجهني برا موش جدام النسوان .

دفعه و صاح :- انا اخوووووك الجبير و من تتعدى حدودك افصم راسك ولك

كضاه من هدوه و صاح :- خافنك مصدك روحك انت الجبير تراه من اكضك اسحك اعلى راااااااسك والله

وتدافعوا بنص البيت، وكف بنصهم كريم ، وهو يدافع و يصيح بزناد :- تراه يضل اخوك الجبير احترم يا زناد

شلون تكلي هاذ اخوك الجبير ، ابتلى بكريم ، تحولت العركة من سرحان على كريم ، وكام يتدافع وياه و امه و مرته يجرن بيه ..

سرحان سحب كريم و زناد دفعهم و طلع ، صرخت ملوك :- شنعي من شيطان انت ، اخوة اعلى حب الله بين ليلة و ضحاها خليتهم يتعادون ويتكاتلون

- لو امربية ابنج اعلى الاصول و احترام الاكبر منه جان محد تعدى اعلى شاربه

- والله و طلع الك حس يبن الفصلية وواكف تحاسبني

- انا ابن شيخ و افندي وبيگ بشغلي و امي خاتون ، واذا جنتي تقصدين الفصلية فردحة من ال جلوب شيخة بت شيوخ ما لفت اعلينا بالجول، لمي السانج و عرفي كدرج كبل لا تحجين .

- انا بت جول يغريب

- هاذ قصري و قصر ابوي و جدي ضاحي و جدي جلوب ، ما الغريب الا الداش اعلينا من الجول

(قصري )بهذه الكلمة ضرب الشيخة ملوك كون بعادات و تقاليد ال جلوب ، القصر هو ورث لليخلف الشيخ بعد موته و يصير الشيخ بمكانه، وهذه العادة صارلها مئة سنة واكثر .

انتفضت الشيخة ملوك و ما ردت غير بكلمة :- هينة يغريب .

مشت و هو اندار لكواغد جانت واكفة و كاله اله :- الله بالخير ام ستار

- هلا بيك يوليدي

- الحجرة اللي بكتر حجرة الخاتون ، تتفرغ بالكامل فورا، اما اللي اسمها سليمة ، تنطونها اجورها و تشكرولنا جهودها .

سليمة :- بس انا مالي غرض والله

- سمعتي يا ام ستار

كواغد :- ان شاءالله وليدي

- ام ادريس

صبيحة :- امر يمه

- الخاتون تتريك و تنطي علاجها بوكته و ما اريد اي تقصير بحكها، صار معلوم .

- صار يمه

حجت مرت زناد :- مع احترامي الك بس شو انت تتامر و جنك شيخ اعلينا ما جن ابوك موجود .

- انا وابوي واحد يم ياسر ، الحجرة اللي بصف حجرة كريم ، اخذيها ورتبيها للجهال.

دارت وجهه ما راضية .

عاين على السفرة كلها بمكانها ، اندار لراديون اخته كاعدة ما تحركت، مد ايده عليها و مسح على راسها :- اللي بيني و بين امج ما اريده يكون فارق بيني و بينكم انت و كريم ، انتم اخوتي و عزوتي و انا اشد ظهري بيكم .

- وانا ما الي غرض بكل اللي يجرى بيناتكم ، هي امي و زناد اخوي، و انت اخوي.

- تريكي بالعافية

حجاها و راد يمشي ، صاحت الخاتون :- سرحااان

-ها يمة

مدت ايدها و هي تحاول تندل مكانها، هوالها بسع و اخذ ايدها :- خير ؟

- اخذني للغرفة مالتي

- الصوت اذاج

- مدا اصدك

- على شنو

- دنعوف بغداد و نجي نتورط هنا بهالمشاكل

- هذا امر الوالد بعد ما بيدنا شي

- و اني ما اتحمل هالوضع

سحبها و دخلها بالغرفة و هي تكله :- دير بالك يوليدي والله خايفة عليك يمة ؟

- انت اسد هايج و اعصابك ثايرة على كل اللي كدامك ، لكن اللي وراك ذياب ما يواجهوك بل يحفرولك الف حفرة حتى توكع بيها ، ديخلصون منك ، اخذ عيوني عبرة يا ابني ولا تغامر بشبابك.

- ملوك و ابنها ما عدت اطيقهم امي، عداوتهم الي تطاير من عيونهم ما بعمري سويت الهم شي مع هذا ادور الهم مبرر خاطر ابرر كرهم الي ما جاي الكا

- مثل ما المحبة عادة الكره هماتين عادة بكلوب البشر ، و الكلب اللي ينزرع بيه الحقد من الصغر يصير مثل الصخر صعب تلينه من يكبر.

- ما عاد يفرق وياي شي، انا مليت اتحملهم ، يا اهد الهم الديرة ، يا الميدان جدامنا و نشوف ياهو الياخذه

- اني راح احاول اقنع ابوك نرجع لبغداد.

- ما راح يقبل اني متأكد، هسه خل اروحله للمضيف طلع و هو متضايق مني .

- كون حذر بكلامك وياه سرحان

- ان شاءالله يمة

طلع ، و شاف مرت زناد واكفة و تگول لكواغد :- والله انا جهالي ما يطلعون من حجرتهم الداش اعلينا من تالي خل هو يشوف اله حجرة .

تحجي و مطية ظهرها و سرحان واكف، وكفت كواغد عدل و كالتلها :- ها يمه سرحان

جفلت هي و اندارت ، حجه :- ام ستار اللي يطول السانه بهالبيت يا ريت يكصره مثل ما تكصر لسانات غيرهم، و كليلهم انا ما احط كوري ويا النسوان اكتفي بطلعتهن منا، اللي تريد نظل يم جهالها خليها تكض السانها .

حجه و اندار طلع .

كواغد :- انهجم بيتي كون انا شدخلني بهالطلابة ربي، جا هسه انا شسوي ويا جلمة اخذ ، سرحان يو الشيخة ؟

ليلى مرت زناد ما ترضى اطلع فروخها من الحجرة ، و الشيخة ما ترضى تكلع سليمة من القصر ، و انا بين حانة و مانه ضاعت لحانة

افتر راسي اجي منا و اردن منا، كضيت راديون و كلت الها :- خايبة ديه يمه تعاي جابليني

- ها خالة

- يخالة انا ابتليت ، سرحان منا و الشيخة منا ، انا جلمة ياهو الأخذ

- والله خالة هي هم حيرة ، بس انا اكولن يو تروحين لابوي و تاخذين منه الخبر اليقين احسلج

- اي هو هم هيج ، مامش غيره يحلها ، البس عبيتي واروحن له .

لبست و جاي اطلع تلاكيت بهديوة :- ويييين مولية الغصر هاج و اعلى ساعة ينهد فوك روسنا شعدج تخورين

هدية :- يمه كضيت كل الشغل واجيت اعلى راديون شمالج وياي ؟

- احطج و اطلع حركة هالقصر بيج ، ردي ياله ، بساع

- يمه مو انا اريد اكللج شي.

- شنهي ، هم مصيبة ؟

- اااا الجرة مالت الماي زلكت مني و تكسرت

- تكسر اعضامج كون جا انا هسه منين اجيبن جرة اخرة ، ن اكضج و ابيس بيج بهالساعة احد يلومني

- يمه ما ادري طلعلي وحيد اعترضلي جفلني و زلكت ، شسوي

-ما ادري وحيد افيسد

- يااااع و شسوالج

- ما سوالي شي هطرته بحصواية و شرد

- عفية بتي لا تخلين احد يكربج ، و اليكرب عايني حدرج جلمودة حصوة عصه و اطريه بيها لا تسكتين

- اي اي يمه جا انا بتج ما اعتاز توصا

- عفية ، وهسه ردي للبيت ياله

- بس احجي ويا راديون شوية واردن وعلي ما اتأخر

- اخ يراديون التارسة مخج ، امشي من جدامي خليني اولي.

مشت و انا اعاين وراها و اهز ايدي، عدليت كصيبتي و كذلتي، خاطر لو جان كريم ابن الشيخ ، يشوفني حلوة موش مخرذله .

مشيت للغصر و دشيت ، الجو جنه بيه تكهرب، رحت اعلى حجرة راديون لكيتها خالة اغنية عفيفة اسكندر و تسمع و سارحة

- جا شنهي اليعشك بس يسمع اغاني

فزت :- هلا هدوة .. موش من العشك ، ضيم القصر هم ينرادله حيل ، صكيت الباب ورفعت صوت الغنا خاطر ما اسمع من عراكهم شي

- شصاير شو امي هم خرعانة تكول القصر مكلوب فوك حدر.

-اخوي سرحان رد و امي و زناد موش طايكين جيته

- يا جا غير بيت ابوه

- بعد مشاكل متخلص، صكد عوفينا منهم خليني اسولفلج اعلى امس من رحت للسوك

- بس لا شفتي ؟

- ال بس شفته و حجيت وياه ، اخ ولج هدوة دليلي طار من مجانه ، اعلى ساعة يوكف و ما اهيسنة اعلى كثر ما دك اعلى شوفته .

- هنيالج

- يا هنيال هاذ و انا لهسة ما عرفت اسمه و لا هو شنو ومنو ، لجن جنه واحد شقاوجي ويدور خاوات

- ااااخ ذوله شكولهم تصير حلوة

- مو بس حلو خايبة ، الصدر كايل هيج

وتنفخ بصدرها وترفع بجتافاتها و هي تقلد وكفته ..

: و العركجينة و الشماغ اذوبن بيهن ولج .. مدري شلون كضيت روحي وما معت من وكفت يمه

- حلو

- خايبة الرجولة الشايلها ما شايفتها بين الزلم

- ياااا جا اعلى وصفج حتى انا عشكته

- طاح حظج ، ولي لج هاذ مالي وما يصير لغيري

- اتغشمر وياج والله ، بس عودينه انا عليش ما يطلعولي هيج بوجهي ، ما طلعلي غير واحد حضيري راكبلي حصان

- راكب حصان ؟ ماكو احد بالديرة عنده حصان غير كريم اخوي بس ما يطلع بيه

- لاله لا موش كريم، واحد افيسد امس واليوم و هو وراي

- شلون لون حصانه

- ابيض

- لا كريم اسود حصانه

- مو كتلج مو كريم

- جا ياهو هاذ الراكب فرس و يتدنالج يهدوووووة

وغمزت الها

- يا و علي هطريته بحصواية

- عزا العزاج حتى لو بيه رجا طار

- هههههههههههههههههه اي وعلي حتى لو جان معجب بيه همين شرد بريشة

- عزا بعينج ، انت والله سينما وين جنتي صارلي ساعة كاعدة و اسمع بس صياح القصر ، ظلي يمي ولا تروحين

- لا يا عيني لازم اردن امي ما ترضى

- شجاها امج ، اكلج هدي هدي كومي خل نروح للحديقة نكطع ورد ، كومي

- ياله .

......

غريب:- دشيت للمضيف لكيت ابوي كاعد و عمامي اثنين :- السلام عليكم

كام عمي قاسم :- هلااااااا وعليكم السلام شلونك

وحجه عمي جاسم :- مصبح اعلى الطلايب يسرحان

-.دنجت ومديت ايدي و سلميت اعليه و هو كاعد و رحت لابوي، زناد كاعد يمه ، حبيت راسه :- انا اتعذر منك بوية

ما رد ، كعدت :- انا اعرف اطباعي مو اطباع ريف و كلبي مل ظلم حرمتك بوية ، اذا ما تتحمل كعدتي ، انا هم ما احمل قلة احترامهم

- انا القصر و البيه ما اعترف بيهم ولا يهمني ، اليهمني انتم ولدي سرحان و زناد ليمتها تظلون واحد يكاوم الاخر ، يا خوفي تغمض عيني و تنعاد ملحمة ضاحي و ثجيل والله لالعنكم و انا بكبري و ما ارضى اعليكم الى يوم الدين خليها بمعلومكم .

حميد :- من رخصتك شيخ

- ها يا حميد شنهو بعد ما انكلب اليوم من صباحيات الله .

- بس من القصر رايدينك

ابتسم سرحان بأستهزا، كام الشيخ و طلع ، لكا كواغد برا ، كام سرحان راد يطلع ، شاف ابوه يتكرب من كواغد

ظل يعاين اعليهم ، حجت كواغد :- شيخ ضاعت و حلها يمك ادخيلتك انا .

- شنهي يم ستار كولي

- سرحان طالب الحجرة البكتر حجرة امه الخاتون و طلب ننطي اجور سليمة خاطر تترك الشغل لجن مرت زناد ما ترضى تهد حجرة فروخها و الشيخة ما ترضى تطرد سليمة شسوي انا

- الحجرة الطلبها سرحان تتحضر اله ، موش انا الولدي ينام برا القصر خاطر مرت زناد تنوم فروخها ، اما سالفة سليمة انا اردن الظهر و احلها.

- هااااه ، خوش ، انا اروحن جا

- مودعه

اندار شاف سرحان وراه ، اشرله يكرب، تدهده سرحان وكرب اعلى ابوه ، مشو اثنينهم و حجه الشيخ :- شنهي البالك بوية

- انا ابالي نطلع رحلة صيد انا وياك و نشوف ياهو اليصيد اكثر

ضحك الشيخ و هو يضرب اعلى ظهر ابنه :- جا حضر روحك باجر من غبشة نطلع

- و انا حاضر ، لجن بلا السيارة ، خلينا نعاود امجاد اجدادنا بثورة العشرين و نقصد البادية بخيولنا .

- والله حيهم ، نركب الخيل عليش لا ، لجن الاريدنه منك تكسر الحاجز البينك و بين اخوك زناد ، انت جبيري و انا رايد اعتمد عليك ، انت موش مثلنا ، انت دارس ومثقف وعقلك واسع ورايد تحل الامور موش تعقدها .

- بوية انا لو اعلى الزلم سهلة و اخوي احبن راسه ، لجن انت حاط بالقصر حياية موش نسوان

- الحية التمد و تحاول تلدغك كضها و املص راسها عوفك منهن و شد حيلك ياله ، خاطر ازوجك

ضحك :- ضحكت و انا اعاين اعليه .

.....

هدية :- ندلنا للحديقة مالت الشيخة ملوك ، هاي حديقة خاصة الها ، بيها مفرش و متروسة ورد و اشجار زينة .

وانا و راديون اعلى طول نجي هنا خاطر نتمشى بيها ، تصير بكفا القصر و اطل اعلى البستان مالت الشيخ ، لجن مسيجة خاطر النسوان تاخذ راحتها بالحديقة

نمشي و نكطع ورد و نغني انا وياها ، اخير شي كالت انطري خل اجيبن الرتديون هنا و نحط حسين نعمة ونطرب اعليه بهالجو الطيب

- ياله

راحت و اجت امي :- ها يمه بعدج هنا

- يمه شوفي كطعيت وردة

- وين الله ويوفكنا و اكدر ازرع الصفحة مالت البيت مالنا و نسويها حديقة مثل هاي

- انا ازرعها اعرف

- يتراد الها حيل و فلوس و احنا الأثنين ما عدنا ، خلنا نفرغ و نسويلنا حديقة مثل هاي

- شسويتي اعلى السالفة الدايخة بيها

- يا ضكرتيني خايبة خلني اروحن احلها

عافتني و مشت و انا درت وجهي اعلى الورد اغني ( جان الكلب ساليك )

سرحان :- ها ام ستار

- هلا يوليدي

- فضت

- والله يوليدي بعدني هالرايحة اكل لمرت زناد ، الا صدك ارد انشدنك اعلى حاكم شلونه غاد

- بخير الحمد لله

- اعليك العباس ، ما عده مرة ، موش معرس ؟.

عقد حاجبه بضحكة :- لا ماكو هيج كلام

- لا عليك العباس لا تضحك علي من كون انا كلبي موش متطمن

- طمني كلبج يم ستار ، حاكم ازلمة و النعم منه و ما يسويها

- هاااه ، جا انا النهار كلة يو اجا اكرط بذنه بهالسالفة

- هههههههههه و تخلينه يهج كبل اوانه

- اي وعلي من عبن احبنه

- انتن النسوان مصيبة يو حبيتن زلمة اطلعن الدنيا من فص عيونه

- جا وين نروح

- هاااه هم صدك حكج

ضحكت ، ومشت من جدامي ، ردت ادخل ، طره اعلى مسامعي حس بت تغني ، عاينت ، الصوت جاي من الحديقة الورانية

تمشيت ورحت اشوف شنهو هاذ الصوت ....

الحلقة_١١

( جرح يؤثر في إيمان )

وِانِت طيف المحبه .. اوشوك

الولايه

وانت .. زخات غيمه .. ابكَاع

صبخايه

يشاتل بالكَلب دايات .. دايه

اتلوب .. من دايه

يبو الشط التعيش اوياك ..

قصته .. طينته .. اومايه

اشتكَل للطاح .. بين ارماح .. كلها

اوياه كَصايه .. ؟

اشتكَلي ؟ .. اوبيك روحي اتموت

وترد .. بيك تتحايه

(عريان السيد خلف)

سلطان :- اليوم وانا مار من جامع العمراه مطر ، شفته هو و ٣ اولاد .. الأثنين اعرفتهم .. زناد و ذاك اللاخر كريم ، الثالث منهو ؟

ناصر :- سرحان ابن ردحة ، رد من بغداد كبل يومين

- هاااه هيج صاير زلمة

- اي لجن الأمور حسب ما عرفنه متوترة بيناتهم ، من الأساس ما يطيكون سرحان و يندهونه غريب و ابن الفصلية

- من عبنه بيه رس من ال ثجيل هالمايرغبوله

- هو جبير ال مطر لجن انشوف بيهم يوم مثل يوم ضاحي و جدي ثجيل .

- عليش ؟

-على ما اظن زناد هو خليفة ابوه بالمشيخة موش سرحان ، يندهونه غريب و مغربينه لبغداد و ما يردونه وعود هسه رد .

- اسمع ، اريدن كلشي عن ولد مطر ، مزاياهم، فعايلهم، شيهوون شيكرهون ، ويا منهو يمشون كلشي.

- زناد متعصب ديني وضنك ، كريم شاب طايش ما معروف عنه شي، وسرحان توا جا ما نعرف عنه شي .

- كلشي اريد اعرف عنهم ، احفر بأبره عنهم ولا تخلي احد يهيسك .

- ان شاءلله عمي تامر .

- يا ال ضاحي ضاملكم بكلبي حيل بس الله يعلم بيه ، بس صبركم علي، القصر الأخذتو من ابوي ثجيل و صرتو شيوخه لاهدمه اعلى روسكم.

(القصر )

هديه و هي تغني ( جان الكلب ساليك ) وصوتها واضح، تقرب سرحان و هو يسمع الصوت

عاين ع الحديقة ،عقد حاجبة لما شاف البنية نفسها صاحبة الجرة ، وكف بمكانه و هو يعاين ما تقرب ، اجت راديون من وراه .

- ها

فز :- شبيج ؟

- عليش تعاين ؟

- منو هاي ؟

- هدية

- بت منو ؟

- بت كواغد

- اها بت حاكم هاي

- اي ، عليش تسأل

- اهلها خوش ناس لجن بتهم الله يهديها

- شمالها ؟

- ما بيها شي بس ما عجبتني

- لا عليش تكول هيج خوش بنية

- الخوش البيها بس صوتها الباقي عفا

- امها حسها حلو و تنعى بالقرايات ، و هي ورثت الحس الحلو من امها لجن هي تغني ما تنعى مثل امها

- ما شايفه ابوها من يجر مواويل يشك الكلب

- عليك الله ؟

- اي والله حسه يبجي، دارت وجهه شافتنا ، استلمي ، انا اروحن ، انت شوفيهم جهزوا الغرفة

- هسه اشوفنهم

تقربت ليها :- هاذ شيكربلج ؟

- اخوي

- لا جذب

- اي والله شبيج سرحان اخوي

- ياااا

- شمالج شهكتي

- ولج عزا بعيني هو هاذ السولفتلج اعليه الهطرته بحصواية .

- ياااا هههههههههه و انا اكولن شماله يكول ما عجبتني

- يكول عليّ ؟

- اي يكول اهلها خوش بس هي لا

- يمه ، خافنه يشكي لأمي عليه وعلي الا تكصبني .

- لاله لا لتخافين، امشي خل نشوف حجرته .

دشينا داخل، كضتني امي :- انت راح تظلين هنا

- يمه خليني شوية

- بسج خوارة ، للبيت ياله تلاكين اختج و حبوبتج ماتن جوع

- بس اشوف الحجرة

- بعدنا ما مخلصينها هوسة ، امشي جدامي ياله

دفعتني و طلعتني برا .

طلعت من للقصر و مشيت للبيت، سويت الغدا و انا افكر بهاذ الرزلته شلون عيب هالدور طكيته بحصواية ، هسة شيكول عني ؟

مدري شبية خلصت الوكت بس افكر بيه، جا انا جنت اعاين لكريم طلع هاذ افلك منه ، مثغف وداش كلية ، خرب انا شلون ضربته ، امداني .

من فراغي ما جانت سالفة ابالي غيره

لليل و انا منجطلة وافكر بيه ، ليما نمت و حلمت بيه هو و حصانه جنه يلاشيني ويضحك وياي و انا الفن بكصيبتي و العب بيها و اعاينله و اضحك .

كعديت الصبح بواهسي

ركضيت خبزت و سويت الريوك ، و خلصت شغلي و عدلت روحي و حطيت كحل عرب بلا ما تدري امي واخذت الجرة و طلعت للشط

و ادور بعيني هلبت اعاينه ، لجن ترسيتي ورديت و انا ما شفته .

ظليت احوس خاطر اروحن للغصر لجن ما صحتلي فرصة، الا ثاني يوم ياله رحت ، لجن هم ما شفته و هم ع الشط ما طلع ، نشدت اعلية راديون بحجة سؤال عابر :- وينهم اخوتج شو ما همه

- يطلعون هيج وكت ما يظلون ، لين وكت شغل و النسوان تفتر ، بس اذا عدهم حاجة يجون.

... صفنت جا يمتى يجي و اشوفنه ؟

طلعت من القصر و انا افكر و حاجيت روحي :- هسه انا صارلي يومين بس افكر بيه شمالني ؟ .. دخل يولي فوك ما افيسد

رديت للبيت و انا مقررة ما افكر بيه بعد، بس هو عود ليش ما كالي انا ابن الشيخ و سكت ؟ .

المكان : بغداد

الزمان : الثانية ظهرا

حاكم :- استادي كالولي الأستاذ يريدك كبل لا تحل .

منير :- اي حاكم تعال

تقرب :- تفضل ابو لؤي كول

منير :- انت تعرفني اني اثق بيك و انت صديقي اكثر مما انك مدير حسابات بالمعمل.

- الشاهد الله بحسبة اخوي الجبير و الك معزة بكلبي

- اني اريد احجي وياك بموضوع

- شنهو ؟

- انا طلع عندي مرض خبيث

- اهاه ، لاااا صدك تحجي

- نعم التقارير الطبية اثبتت المرض

- عندك العافية ان شاءلله والله قهرتني بالخبر

- هذا امر الله والعمر ما ضل بيه شي ، لكن اني رايد اوصيك

- اي كول عد عيناك

- لما ردت اشغلك هنا حسنية خاتون اختي هواي مدحت بيك و سرحان وصاني عليك هواي و زادت ثقتي بيك اكثر و اكثر لما اشتغلت وحسبتك مثل اخوي

- الله يسلمك

- اني اريد اكولك سر ما كايله لاحد

- و شنهو هو هاذ السر

- اني متزوج على ام لؤي من حوالي ١٨ سنة صار عندي منها بنية وحدة و اطلكنا و ظلت البنية عد امها من اتزوجت امها عافت البنية عد خوالها ، و هسه هي رابية عدهم ، اني مستمر بتوصيل مصرفها ، وكتبت وصيتي و خصيتها من ضمن الوصية .

- العفو ابو لؤي لجن انا ما عرفن العلي شني ؟ شمطلوب مني اسوي

- البنية بعمر ال١٥ سنة و ما بالغة واذا متت اخوتها يظلمون حصتها لإن اعرف امهم و اعرف شلون تفكيرها، وما اريد الوصاية تكون لأمها ولا لاخوتها .

يكلك مرات الغريب يكون الك اقرب من الكرابة و اني امنت بيك كل هالسنين و راح امن وصاية هاي البنية يمك لحدما تبلغ و تاخذ حصتها .

- هذا حمل ثكيل و احتمال ولدك الله يحفظهم ما يتقبلون .

- اني كتبت كلشي بالوصية و انطيتها للمحامي و اعتبرها امانة

- والله ما ادري شكلك، اذا على مصرف بس اوديلها سهلة ، لجن غير امور وصاية و غيرها اخاف يصير بيهن اشكال

- ماكو اي اشكال لكن اللي اريده ، محد يعرف بهذه السالفة الى ان اموت

- عمرك طويل ابو لؤي وبعدين انت عليش مفاول روحك بالموت ، الشافي الله و ان شالله تبلغها وصاية بنيتك و تزوجها بيدك

- ان شالله لكن الوصية واجبة بهالظروف .

طلعت منه و انا صافن : ابو لؤي ما يستاهل ، زلمة و خوش ولد لجن انا شلي بهالطلابة ، بعد يومين اخوتها رادو وصايتهة ، لو امها و خوالها انا شلي بالنص ؟

بس هي هاي بعد امانة و الزلمة حاط رجاه بيه ، الله كريم .

المكان : عرب ال جلوب

الزمان : المغرب

خنجر و سرحان كاعدين غاد من الشط ويدخنون و على سوالفهم يعاينون للشط

خنجر :- ابوك رايد يزوجك

- اذا لكيت المرة الزينة و تناسبني و اعلى المواصفات الاريدنها ليش ما اتزوج

- شنهي مواصفات بويه ؟.

- عاجبني اخذ بنية مثقفة تقرأ تكتب موش راعية ولا صاحبة حلال .

- جا لا ادور هنا زعم بنات السلف اكثرهن ما داشات مدرسة .

- ميهمني من وين المهم تناسبني

سحبت الجكارة و طلعت الدخان و عاينتله طرف :- جا و انت شنهي راح تظل اعزب طول عمرك ، دشيت بالثلاثين

- المثلي ما يعرس لجن اااااه

و حط الجكارة بحلكة ورثها و ذب الدخان من صدرة

- ها شو اه و سكتت

- خله الحجي بالكلب مضموم

- عاشك

- سكت ما رد

- شنهي خجلان لو خايف ؟

- ولا وحدة لجن انا حطيت رجلي بكاع رملها ما يتحاذه و شما احاول ابعد ، اركد و ادوس اكثر و تغيص الرمل بيه ، و هاذ حالي ويا دنيا

- لهدرجة وضعك صعب

- واكثر يخوي

- عليش ؟

- العاشكها محرمة اعلية وكلبي موش طوعي، طوع امرها.

- محرمه اعليك شلون ولك ، عاشك خالتك لو شنهي ؟

- خالة امك ، عاشك خالتي شنهي شو ما تستحي

- جا انا يو انت التكول محرمة اعلية

- قصدي صعب اخذها يالكديش

- والله ما كديش غيرك و انا راح بالي وكلت هاذ تسودن .

ضحكنا و كمنا من الشط رجعنا .

رديت للقصر ،وانا امشي مر احد من جدامي ركزت عينه بيه، عاينت عليه :- هذا وين شايفة ؟

هو دار عني ودش للبيت ، مشيت :- مدري جني شايفة من كبل بس ما اتذكر وين .

عفته و كملت دربي، لاكيت ام ستار :- ها ام ستار راجعة

كواغد:- اي والله يوليدي اردن للبيت صار الغروب هم اسويلهم اعشي مسجينة هالبنية كل شغل البيت متركب براسها .

- الله يحفظكم، لجن ردت اسألج شصار من سالفة سليمة

- الشيخة انطتها اجازة ولهسه ما رادة خاطر ننطيها اجورها و تولي

- دروب الشيخة ما تنكدر ولزوم ينحط الها حد

- واللع يوليدي انا اخافن اعليك منها من كونها ما تخاف الله و الما يخاف الله ينخاف منه ما عده لحية مسرحة كلشي يعمل

- الله الحافظ ام ستار ، ياله نشوفج بخير

- هلا بيك يمه

رديت للبيت لكيت هدية و ستار مطابخين وستار كاض هدية من راسها ويدك عليها :- ها ولكم شماااااالكم

ستار :- بتج هااااي لو خطى جدمها الباب و علي لكصن جدمها فاهمة

- ياااااع شمالك وياها

هدية :- والله اطلع وغصبا عليك يالمذربن يالمعفن يالطايح حظك

ضربتها جف اعلى خدها و صحت بيها ما احس الا ستار ناكز من فوكنا و كاض بشعرها و يرفس بيها :- ياااا ولك عوف البت ، وخررر عنها

هدية تصيح بكل علو حسها و انا اجرن بيه و ام حاكم اجت تفارغ بيناتهم.

ووكف يهدد ويصيح و عاف البيت و طلع ، و هاي كعدت تبجي :- شني انتم بس عليييي كومي هديه كعدي هدية طبخي خبزي جيبي ماي سبحي هاي ، شني ابتليت صرت بت يا الكايم جاتلني و يتأمر اعلية

- اشعملتي وهيج طكج ، اشاف اعليج احجيييي

- اشاف عليييي، شعدي انا ويشوف علي، كولي انا الشفت علييي ، شفته هو و بت خالي صلاح يتحاببون ورا البيت

صمت حلكي :- صمي حلكج اشششش

ام حاكم :- يااااع شعده ويا البت

- انا هددته اكللج و هو كضني و جتلني وكام يهدد بيه .

كواغد :- يمصيبتي و بلوتي يمه جا لو تصخم وجهي ويا اخوي شكلله و شحجي وياه ، شلون انا بفروخ حاكم و حاطهم اعلى طلبي و اهو يهوبز ابغداد ، يا بلوتي يا يمه

ام حاكم :- دا الولد يريدله عرس ، عرسيله

- شيعرس عمه دخيل بختج الولد توه نهض عمره ١٦ سنة حتى ما يدبرها

- جا هو الكاض بت و يحبحب بيها ما يدبر عرس ، عرسيله ولا تصخمين وجوهنه

- خب هو العرس بست تحبحب يعمه ، هالعريست انا اشحصليت ، حسبالي صفكة و هلهوله تالي ابتليت من ساعة الاخذت حويكم و انا مهدود حيلي

- يااااع تحجين اعلى ابني ، حويكم بلوة ولج

- جا انا وين ارطن و انت وين ، تعاي يمه هل اعاينج

جريت هديوه اعاين جسمها، اثار ايده هالنكس بجسمها ، ولك ستير اكضك يو لا ، الا ابيس بيك و علي .

اخذت عباتي و كلت الها :- كومي حضري العشا اعلى ما اروحن اكضن ذاك

صرخت هدية :- والله ما اشتغل ، تاكلون سم

تكربيت ليها :- شلووون ولج ياهو الياكل سم

وكفت ام خاكم كبالها :- البت غلطت غلطت ما تدري هديها كافي عليها طكت ذاك الاغم ستير

- اكضج يهديوة اكضج بس صبريلي

طلعت وضربت الباب وراي و مشيت لهلي، وصلت غاد لكيت ستير جويعد يم ابوي

:- ستاااار امش وياي

شمخي :- ها بوية شعدج ويا الولد

- هاذ شايف ارويحته هالايام و ظال يتشيم اعلى راس اخته

خلود :- جا هو هالواحد عدج و تريدين اطينه

- و انعل ابو فوكاه ، من يطك اخته انعل والديه والله ، تعااااي جاي ولك

شمخي :- وراي هدي

- اعليك العباس بويه ميل عنه من عبن بلوته جبيرة ما ينسكت عنها

ستار :- هديوة هاي تجذب وعلي من اكضنها اكص زردومها

- ولك بويه بس هده خلني اكله بستوني هالكوا****

وضل ابوها يبعد بيها و امها تجر ليما طلعوا الولد و شردو من امه و هي ضلت تحجي و تصيح عليهم و تحجي اعلى ابوها :- كله منك يا بويه محد سوفله غير دلالك و خليته يشيخ اعلى روسنا

بهية :- اي والله صكد تسوفل شنهي ولد ولده ١٢ و هو كاض ستير ويحبحب بيه شنهي قلة اولاد

- انت صمي حلكج ولا تسمعيني حسج

شمخي :- جا غير وليدي هو ما ارضالج تكضي و سايم الله و محمد و علي عليج يو طكيتي

- لا والله اطكنه ، بويه انا حيلي انهد منهم ما بيه بعد لمصايبهم

- جسومة شعامل و هيج شادة اسنونج اعلى الولد

- الا اكللج كاض بت و حابها جا لو عمل الجبيرة انا ما ابتلي

نشمية :- يااااع

شمخي :- حشا ستوري وليدي وما يعملها

- الا عاملها يبويه ، طالبتك دخيلك حط عكله براسه ، لو حاكم هنا و درى الا يحز اركبته ما يرضاله خصه و هو كاض اهديوة و طابع اديه اعلى جسمها و حاكم لو درى جاتل هدوة الا يتخبل .

شمخي :- لا جا انا كايم احجي وياه مالج غرض انا اعكلنه .

كام ابوي و كعدت يم امي اشكي حالي و حاكم ما هو، نطت خليدة :- اكللج خافنه معرس حاكم و ما تدرين

- لا ما معرس انا اعرفنه

- يا جا شنهي تمعنينه يو عرس الزلمه ما ينكض وبعدين حكه حاكم لو عرس

- و عليش حكه يمه ؟

- جا انت بعد ما تخلفين كعدتي اعلى هالبت و عمرج ماهو صغير ٣٨ سنة حتى بعد ما بيج طلكة و حويكم بعده شاب ٣٧ سنة و بحيله هم يريدله ولد خوما يظل اعلى هالواحد

- خايبة تسكتين يو اكومن ابيس بيج ؟

- عليش تبيسين بيه ، جا هاذ حك.

- اكومن منكم اخيرلي من عبن حياية و كعدتجن تنز سم من حلوكجن .

كمت و اسمع امي تترادم وياها و ترزل بيها من عبن حجيت وياي هيج، بس ما انكر .. الحجته حك و انا كبريت و ما عدت اخلف ، لا خليت سيد ولا امام ما نخيته وما حبلت بعد شسوي ، ضربني عين الما يخافن الله شلون حبلت ورة شهر من طلعت حويكم من السجن يكومن و يكعدن شبساعوو شبساع و ذاك اليوم طلع .. و هالكعدت هالكعدة هاي

دشيت للبيت و انا عكلي ياخذ ويطي " معكوله حاكم ياخذ علي مرة جا انا التحمليت و انهد ظهري اعلى عيشته و عيشة فروخه و امه و ياخذ علي ، لا انا ادري ما يسويها .

جمارة :- يممممممممممه شوفي هديوة طكتنيييييي

شلت النعال و طكيته وراها :- انعل ابوكم يا ابو الجابكم ميلو عني اردن من ضيمي ارتاح تكابلوني تعاي لهاذ و تعاي لذاك عوينة ابو اصلكم

ام حاكم :- تسبيييين ابني

- شنهي انت فارشة وكاعدة اعلى السااااااني ، شو دميلي عنيييي.

( بغداد )

حاكم :- اخذت فلوس من ابو لؤي و اطاني عنوان العائلة اهل مرته القديمة و كال وصل هاي الفلوس لبته .

اخذيت الفلوس و مشيت ، البيت بالكاظمية ظليت ادور اعلى العنوان ، طلعت روحي يالة اندليتهم ، دكيت الباب ، طلعلي زلمة ، سلمت اعلية و كلت اله اعلى بت ابو لؤي كالي ، اي وصلت .

انطيته الفلوس وكلتله :- شتحتاج البت انا بالمعمل مال النسيج تندله، مر علي و تدلل

- تسلم و ما تقصر

- اودعناكم

- هلا بيك

عفتهم و مشيت طلعت اعلى الشارع ، توني رايد اعبر و اسمع حس وراي :- عموووووو عموووو اوكف اوكف عمو

انداريت خاطر اعرف يصيحون علي يو على غيري، اعاين ولنها بت يطلع عمرها ب١٦ سنة تارسة شوية و شهرها لحد زندها و لابسه نفنوف ويه ركبتها ، وكفت :- ها يبعد عمج

- انت اللي دازه بابا

- انت ياهي ؟

- اني ايمان منير

- هاااه انت بت ابو لؤي

- ما اعرف ولده البقية الاعرفه ابوية اسمه منير

- اي بويه انا الدازة ابوج ، امري

- عمو اني رايده اكولك حاجة

- شنهي ؟

- بيت خالو ما كاعد ينط....... قاطعه خالها و هو يصيح :- ايماااااااان

فزت البت و جن لاذت بكتاري :- ها بويه شكو

- ماكو شي روح عمي توكل

و خزرها و هو يكللها :- امشي كدامي

عاينت اعلى البت خايفة و هي تعاينله :- شعدك وياها بوية ليش هيج البت خايفة

- ماكو شي هي هي بنت اختي و اني اخاف عليها

- اي حكك البت بيضة حمرة و ركبها طالعة حكك تخاف اعليه ، عفية عليك ، انا اروحن .

مشت و هي ادير بالوجه تعاين علي ، و ترد تمشي و تعاين على خالها ، انة عفتهم و درت ظهري، جان نهاية شهر و لازم ارد للسماوة اظلي ١٠ ايام و اردن ، و انا حيل مشتاك لبنياتي و عايلتي ، ما اجلتها لباجر ركبت و صعدت للسماوة من ساعتي .

وصلت غاد تمشيت لهلي ، نزلت كبل الغروب عدهم، فكيت الباب و صحت :- ها الله يساعدهم

وبناتي تناكزن ، جمرة صعدت فوكي و هدية اجتني تركض تحبحب بيه ، حضنتهت و انا احب احب بيهن :- شلونجن بوية ؟

هدية :- انا مو زيننننننننننه

وبجت

:- ها يبعد ابوج ياهو العال وياج

- ستار طكني ، عاين عاين

وطلعت اله زندها ، هو شافها و نزل جمارة من على جتفه ، و صاح :- ستااار

طلعت امه :- ياااا اجيت يمه

- ستار وين ؟

- عد اجداده ، شلونك يمه دكعد خلنا نشوفه

- اوكفي يمه الظاهر من انا مو هنا هاذ الجلب يستحكرهن ، خلني اروح اربي

افتح الباب و طلع للبيت شمخي ، و ام حاكم تكرص بهدين جيف شكت لابوها اعلى اخيها وراح تصير مصيبه من وراها .

دك الباب حاكم و صاح :- هاااااا يهل الدار وينهم

طلع جبار :- هلا ابو ستار ، شلونك خوية تفضل تفضل

- هلا بيك خوية ، بيت العامر ان شاءالله ، لجن انا جاي اعلى ستار اريدنه

- طالع ويا جده للبستان ، شوي ويجون ، تفضل اكعد

- لا تسلم اغاتي ما تقصر هاي جيتي من بغداد

- الحمد لله على سلامتك هلا بيك

سلمت و طلعت ، بالدرب لاكيت ابو صلاح و ستار وياه ، سلمت على عمي و حبيت راسه و خزرة ستار يمشي كبالي، ذاك طكها ركضة للبيت

كملت سلامي و تبعتهم ، دشيت البيت ، اخذ العصا الينهش بيها اعلى الحلال و صحت :- ولك ستااااااار

ام حاكم :- عليك العباس لا اطكه ، شاب و طايش و هو اخيته يتكاومون

كض امه و ظل يصيح من وراها :- ستار اكضك لو لا وعلي الا افصم ظهرك ، حيواااان تزورك خواتك ولك ، بس انا الا بختك بجدتك واكفة الا انا كاضك و ناعل سلفاك طايح الحظ

هدية و جمارة خاتلات من عصبية ابوهن بحجرة امهن، دش هو للحجرة ، التفن ابعض، عاين الهن و دار وجهه كعد :- امجن ويييين هم بالمهجمووووم القصرررررر

هدية :- اي بويه

-جيبلي ماي بساع

طلعت تجيب ماي، دشت كواغد :- شنهي هاذ حس ابوج

- اي اجا

- عدلت رويحتها و غسلت وجهه و نشفته و نزعت الشيلة و اخذت الماي و طبت :- ها الله يساعدك

عاين عليها :- هلا

واخذ الماي يشرب

- ها يمه شمالك شو الهلا من طرف الأذن

- ابنج هاذ محد سوفله غير ابيج كل الوكت خالته عده لينا شت الولد و علي من طخ براسي احركج انت وابنج و اهلج كلهم ، بعد لو خطى دار اهلج الا اهجج

- يااااع شمالك وياي ، جا انا يو ابوي من يوم الانسجنت ولليوم و هالولد على افادة ليما تعود اعليه و صار عكازته

- سمعتي لوووووو اعيد

- سمعنا بويه على امرك بس اهدئ شمالك جاي متحامي

- جا ارد والكا البت مزوركه و انت متهيه البيييييت شكال القصر و شحجه القصر و البيت هدد لا تدرين عن بناتج ولا عن ابنج السكط و القران من اكضه ما ارحمه .

سكتت هي ما ردت عليه، كامت ، لكت هدية تحضر بالعشا ، كضتها من زندها و كرصتها :- ااااخ يمه

- شاكية لأبوج ولج

- جا غير اكلله اعلى ستار شنهي اسكت

دمغتها اعلى راسها :- و هالهجم البيت اعلى روسنا وراس ستار ، يالنمرة اااااخ منج ام كحيلة ، جا هو من عاين جسمج ما عاين هالكحل هاذ و سطرج اعلى عينج و عماها ،حسي الكحل من عينج بساع لا افكسها

-شنيييي يمه

- وغمة كووون ، عوينة ابو اصلج .

ام حاكم :- جا شمالة الولد ما يتحاجه

- جا غير هاي مفلوكة البيت مواريته جسمها و خالته يشب نار

- استير يرجف مت عيني اعليه

- ورجفتهم وتوالي اهلهم عبن كوته مطلعها بس اعلى خواته و لو اجا ابو خنس و صار ما ينشاف هالطرن .

- جا غير ابو شنهي تريدينه يوكف بوجه ابوه

- عمه دخيل بختج انت ما تميلين عني

هدية خلصت العشا و خذته و خلته كدام ابوها، اشرلها تجي، كعدت بصفه ، حبها بخدها :- شلونج بوية

- زينة بس بوية انا.....

كواغد عضت اصبعها خاطر ما تحجي، سكتت، عاين حاكم :- شمالج واكفه اعلى زردوم البت

- موش وكت حجي، نعمة الله جدامكم اكعدو .

حاكم :- جمرة بوية ندهي اعلى جدتج و خلها تتكرب تتعشى

كواغد :- و ستار شنهي ينام بلا عشا

- خل يولي

- ابو ستار عيوني جا هم خوان يتجاتلون و ساعة الاخرة تلاكيهم يتضاحكون

-هاذ الحجي ما يمشي عدي. الولد كوى عوده و ايدة ثكيلة اعلى جسم البت ، طكه من طكاته الطايشة عاباها و سكط البت ، ياهو اليفيدني ، ابنج السرسري؟

سكتت ، حجت هدية :- بوية ما يخليني اطلع صارلي ٤ ايام محبوسة الباب ما اشوفه حتى اختنكت

كواغد تأشرلها من جوا ، بمنعى (اصبريلي ) و ابوها يكللها :- تعشي بوية مالج غرض بيه ، هلا يمه كربي

- ما اكل لا ما ستار يكعد

- صيحي هالصخام خل يجي هو انا اريدنه

ام حاكم :- اعليك العباس بسك نريد نتعشى بهنا

- يمه جا انا عدوة ، ما اطكه لجن اريده يتعلم مو ساگم خواته ، اذا شمخي معلمه المراجل هيج ، انا هالحجي ما يمشي.

- دياله ، جا هو ابوي ما محصل غير الجلمة الشينة يربي بفروخك حتى خلف الله عليه مامش ، لا والقسمة و الوعد اي والله

ابتسم حاكم و هو يدنك للاكل و يسمي بسم الله خاطر ياكل، و ام حاكم راحت جابت ستار و جرته خاطر يكعد.كبال ابوه ، و ذاك يرجف خوف .

حاكم ما شال راسه ولا عاين عليه، خلاه بخوفه .

(القصر )

الكل اجتمع على السفرة للعشا، كعد سرحان ، و رفع راسه لصبيحة :- جا الخاتون وينها ؟

- تعبانة و طلبت الاجل لحجرتها

الشيخ :- شمالها ؟

- شوي مالها خلك

سرحان :- بوية ترخصلي اكومن اشوفها

- كمل اكلك نعمة الله كبالك ، نخلص عشا و نشوفها انا وياك .

دنك سرحان و مد ايده للاكل، ندسه كريم :- اليوم كعدة من العمر مسوين

همس :- كعدة كيولية قصدك.

- اي و جايبين مطرب

- انا ما اكربهن و انت هم لا تكربهن ، تراه عدوانه كثر و يصطادولنا .

- يمعود يا عدوان غير الكل حاضر حتى شيخ من عرب ال مطشر جاي ، مطرب من الناصرية جايبين و الكل ملتم .

- التريده شنو ؟

ضحك :- اريدك تسدسدلي

- الوالد لو عرف يكطم روسنا ، تعرفه كلش يكره سوالف الكاولية و الغنا.

- جا ابونه كا يحب شلون ننحرم

ضحك :- دكل وبورة العشا نحجي

كريم :- زناد عينه ما شالها عنه

- هسه حسباله جاي نتأمر اعليه

ضحكوا اثنينهم ، الكل انتبه الهم ، دنكوا

الشيخ ابتسم الهم ، يفرح من يشوف ولده متصافين ، لجن زناد ظل يعاينهم .

خلص العشا، ترخص سرحان و كام لامه ، دخل عليها :- الخاتون شبيها اليوم كالو تعبان الحلو

ابسمت و هي تمد ايدها تتحسسه:- هلا حبيبي

- شبيج شنهو اليوجعج

-والله يوليدي صحتي بالنازل ما اعرف شبية

- علاجج جاي تاخذينه ؟

دش الشيخ :- ها ام سرحان شنهييي

- هلا بيك شيخ

- يكولون تعبانة

- علاجي دا اخذه ، بس مدا اعرف شنو اللي ديصير ويايه ، اديه على طول ترجف و جسمي تايخ من التعب و اني كاعدة بمكاني .

سرحان :- خافنه الجو هنا ما والمج ؟

الشيخ :- عليش ما يوالمها ، جو طبيعي لا مصانع ولا دخان ، لجن يمكنها متضايكه ، انا باجر اكللهم يطلعوها للبستان الشمس تضربها يصير بيها كل العافية

- صح الشمس زينة عليها

الخاتون : الله كريم

........

حاكم :- شنهي نامو ؟.

- اي كلهم نومتهم بحجرة جدتهم

ادنه من الفراش و انجطلت كاغد يمه، سألها :- شلونكم شخباركم

- احنا الننشد اعلى اخبارك ، مشتاكيلك

- والله انا المشتاك الكم جثير ، لجن ما باليد حيلة شغلي غاد وملتهي .

- شغل يو غير شي

- مثل شنهي ؟

عاينتله ، ردفها :- اييييي يسالفة معرس ، وعلي يابة لا معرس ولا شايفلي مرة هو انا معاين روحي الشغل لفوك راسي .

- انا كبل جم يوم سمعيت حجاية و ظلت نايمة اعلى افادي

طفة جكارته و كاللها :- و شنهي هاي السالفة يا ستار

- خليدة مرت اخوي تكلي حكه حاكم لو اخذ عليج من عبن عده بس هالوحيد ، و انا من سمعت جلمتها و النار شابة بضلوعي .

- شوفي يكاغد ، انا لو خيروني بينج و بين نجمة السما ، اختارج و ان ما جان عدنا غير هالوحيد هاذ حكمة ربج ولا اعتراض اعلى حكمه، انا فد سوم مسمعج جلمة يو كتلج رايد مرة لو خلفة

- الحك لله صح كاض اهلي و تنعل بيهم لجن ما فد يوم سمعيتك غثيتني بهيج حجاية و لجمتني

ضحك :- يشهد الله من بعد امي عدي اهلج ، اخوتج اخوتي وووالديج مثل والدي لجن ساعة عصبية و تطلع الچلمة للشينة

- وهم ازود امي و ابوي يدافعون عنك ازود من اخوتي و يحبونك و انا هم ما احجي الزلمة العصبي كلشي يحجي .

- جا خليني احجي

وعاينلها بمكر ، ضحكت هي ودنجت .

......

هدية :- صاح الديج ، و انا اعلى صيحته فزيت ، كمت من مكاني، رحت للحلال كابلتهن بعدها الشمس ما طالعة .

كلت اي دام اهلي كلهم نايمي خلني اخذ الجرة و اروحن للشط هلبت يمر و اشوفنه ، لفيت حجابي و شلت الجرة ، جاي افك الباب و كضني ستار :

- هاااا ولج وين رايحة

- وعلي بس اطكني اگل لابوي

- الا اكعد ابوي و اكله كضيت هديوه و هي تشرد

- وين شاردة اروح اجيبن ماي

- ممنوع ، دشي داخل لا هاي كصيبتج اكطمها والله

- شني اريدن ماي

- خل اشوف السطلة بيها ماي يو لا ، راح للسطله ، شافها بيها ماي، مشى لهدية لف كصيبتها اعلى ايده و جر راسها و مشى :- هاذ شنهو ؟

- اي شوي اريدن اجيبن بعد

تعال وحط راسها بالسطل و دخله كله :- هاذ هواااااي يو مو هواااااي

وهي صرخت :- بووووووووووووووية

هدها و اشرد، فك الباي و طفر ، كعدوا الكل ، و حاكم :- هاااااا حرامي

- ستار طكنيييييييي

كواغد :- طكج العباس كون ، شو تعااااااي

وكومي و كضيها جر من كصيبتها و دمغ اعلى راسها ، جرها حاكم منها و هو يحجي :- نصبح اعلى صياح الله الاحد هالبيت هاذ ما يهيدله يوم ، غضب الله عليكم كون .

كامت كواغد تحضر بالريوك و هدية وياها و كلساع دامغتها اعلى حسها الكعدتهم عليه، كملوا غدا.

هدية كضت ابوها :- بوية عليك الله خلني اروحن ويا امي للقصر

- شعدج غاد بوية ، كعدي

- ويا راديون ما اطلع بس اكعد وياها

هي شافته ما يستجوب عليها ، كضتها بجي ، و جمارة شافت هدية تريد نطلع ، نكزت :- انا هم اروحن

صاحت كواغد :- راحت روحجن كون ، كعددددن ، انتن تشوفن ابيجن وتكومن تتنغوصن اعلى راسي والله التفك حلكها الا اشكها .

ثنينهن ظلن يبجي و حاكم يهدي بيهن ، غمز لهدية و اجت يمه ، شاورها :- حضري روحج و اطلعي كبل طلعت امج بلا ما تشوفج جمارة

هاي فرحت حيل و شكت حلكها بضحكة لابوها و كامت ، و صاح حاكم :- ولي ياله طايحة الحظ والله اليكرب جمرة الا اكسر ظهرة

جمارة و سمعت ابوها يدافعلها كامت تتمدد على رجليه ، غمز لكواغد خاطر تاخذ هدية وياها ووصاها :- عينج عليها خلها تتونس خطية .

كواغد اخذت هدية و الطريق كله ترزل بيها ، وذيج بغير عالم تفكر اذا تشوف سرحان اليوم لو لا .

وصلن ، كبل صبت الريوك ، هدية جاي تمشي لغرفة راديون ، طلع سرحان بوجهه ، عاين الها بنظرة عابرة و فات ، ظلت تعاين ورا .

هاذ بس لا حاقد اعليه عبني هطريته بحصواية .

رحت لامي وكفت يمها و هي تشتغل، اعاين سفرتهم من بعيد ، موش سفرة تخلي الواحد يسبل غصبا اعليه ، نعمة الله كلها جدامهم ، جا موش مثلنا حميسة بيض و نوكع اعليها هبد.

رادت تمشي امي، كضيتها :- يمه يمه

- ها

- عليج العباس سويلي لفة من ذييييج الحميسة

- ياهي مالت اللحم

- اي

- اليسمعج يكول ما ضايكة اللحم

- اشتهيتها والله ، فاتت راديون و امي طلعت :- هلا هاي جاية من الصبح اليوم .

- اي انا كلت لابوي و خلاني اجي.

- ها اجه ابوج

ملوك :- راديون ، الريوك يالة

- اي يمه ، اكمل ريوك و اجيج

راحت و انا ظليت افرن بالبيت ، عاينت حجرة سرحان مفتوحه ، عاينت محد بيهم طالع ، كلهن كاعدين يتريكون.

دشيت اعاين ، دشوف حظي شلون حجرة جا احنا نندحس ويا جدتنا بهالهجرة الهاكدها ، و هاذ بس غرفته بكبر بيتنا .

ظليت اعاين كتب هواي عده، شفت وحدة بيها الوان ، خذتها و ظليت اكلب بيها ، جذبتي التصاوير ، ظليت بس اعاين .

سرحان :- اليدخل غرفة مو اله ، يعتبر فاسد و ما يستحي لو شنكول عليه

فزيت و طيرت المجلة من ايدي ، جفلت ..

دنجت اشيل و انا عين عليه و عين على الكاع ادورها ، انشلشت ،:- ااا ما ادري ما ادري .

دنك هو جر المجلة ، ووكف .. وكفت :- انا ، شسمه ، يعني انا

- لو شفتج بعد هنا راسج املصه

- ما اظلن والله

- مو بس بالغرفة ، بالقصر كله

انربدت ، اريد اندل دربي بعد ما هيسيت روحي، عثرت بالسجادة ، وطحت، كضيت روحي و شردت .

انلطمت بأمي :- هااا شمالج ولج ؟

- يمه انا اروحن

- اركدي ، ابوج لو شافج رادة لوحيدج يملص ركبتج

- لا لا يمه ما اريدن اظلن هنا ، اريدن اروحن

سرحان :- ام ستار يا ريت تراقبين الغرف لما ما نكون بيها .

- عليش خالة ؟

- الشبابيج لما تظل مفتوحة يدشن طيور للغرفة و يخربن بكتبي

- صار يمه انا اسد شبابيج حجرتك

مشا و هو يعاين علي، اني كلبي يركص هچع من الخوف ..طمبك طك طك طمبك طك طك .

يمه خل اروحن ؟

- استجني بمكانج ، فد شوية اخذ رخصة من الشيخة و انزل غبن ابوج اليوم جاي .

ردت بس اطلع ، ما رضت اجت راديون كالتلي :- هدوة نطلع للبستان ؟

- عاينت عليها

اخذت ايدي و طلعنا ، رحنا للبستان الجبير ، هي لابسة عباية خفيفة على جتافها و حجاب اسود ذابته اعلى راسها و تمشي ، و انا امشي وياها و استمع الها تسولف بهاذ التحبه .

من بعيد عاينت سرحان واكف ويا خنجر ، كلت الها :- عفية راديون خل نرد

- اصبري اصبري

- شني ؟

- ولج ذاكه ؟

- ياهو ؟

هو هاذ الاحجيلج عليه واكف ويا سرحان

- قصدج خنجر؟

- اسمه خنجر ؟

- اي هاذ اخو حميد شمالج ، امشي لا يشوفونا

- مشت و هي تكلي :- ياهو خنجر احجيلي شتعرفين عنه ؟

- واحد شقاوجي سرسري يكول عنه جدي

- سرسري ؟

- اي شلايتي وياخذ خاوات

- عليج الله ؟ ظلت تعاين علي

اوكفي خل اشوفنه

ظلينا نعاين عليهم من بعيد ، اجا ابوي سلم اعلى سرحان :- يممممممممه امشي امشي اجا لبوي

- دوووكفي

- اوكفي انت انا لو شافني ابوي يكصبنيييييي

وطكيتها ركضة

حاكم :- ها السلام عليكم

سرحان :- اهلااااااا و عليكم السلام، شلونك يابه

- والله بخير ، انت شلون شغلك

- والله عفته غاد و رديت

- جا وياهو الظال غاد

- خليت وكيل ، انت شلونك ، شني ما شني ؟

حاكم ، عاينت لخنجر معقوبة سرحان يمشي ويا هاذ :- ياله بوية اودعناكم ، خل اروحن للمضيف اسلم ع الوادم

- هلا بيك يابه

خنجر :- جنه شاف بعبع من شافني هالاغم

- حاكم خوش حاكم ليش تحجي هيج ؟

- ما شفته

- عوفك منه ، كلي شصار اعلى امس .

- قصدك الكعدة

- اي ، وصيتك عليه

- جان وياي و تونسنه ونسه من العمر .

- بس كون محد شافه من الديرة

- والله هم جثيرين لجن ما. اظنن عاينو اعلى كريم ، يعوفون هالحلوات اليهزن و يعاينون اخوك شمالهم عميان .

- اكلك انت مو عاشك عليش تسهر ويا الكاوليه

- وعلي ما كضيت وحدة منهن بس شربت .

- خايب لا تحلف و علي حرام عليك خلك واحد سكط تجيب هيج اسم اعلى السانك

- بري مني لجن تعويدة السان ، تروح اليوم ، هم كعدة

- شنهاي يومية ؟

- لا ثلث تيام و تفض لجل هاذ المطرب اللي من الناصرية.

- زين ، جا انا اروحن هسه ، اشوفنك العصر

- ماشي

- اودعناكم

رديت للقصر ، و طلبت منهم يطلعون الخاتون بالبستان برا خاطر تضربها الشمس، كواغد كومتها و كامت تمشيها ، صاحت اعلى بتها ، ذيج طلعت من حجرة راديون

تعاينلي بخوف ، حجيت :- كضي المرة عدل لا تطيح

دارت وجهه و هي كاضة الخاتون ، و طلعناها برا ، و البت ترجف و هي تعاينلي ، ضحكت و ضيعت الضحكة و انا ادنك اعلى الخاتون و الاشيها .

كعدنا الخاتون ، و كواغد راحت تجيب حصيرة ، درت وجهي و كلت الها :- انا مو كتلج ما اريدن اشوفنج بالقصر ، شو انت ما تسمعين الكلام

دارت وجهه ، ومشت ، شوية و اجت كواغد ، حجت :- من رخصتكم انا بس اروحن للشيخة اخذ رخصة هاي البت عرست عليه

سرحان :- شمالها ؟

- بس تبجي ما ادري شجاها ، خلني اخذها و اردن

- الله وياج

مشت، حجت الخاتون :- ليش هيج ويا البنية امي

- يمه حكي ، جابتني بحصواية نومتها بضلعي

- ليش

- شلون تلاشيت وياها و ضحكت و هي ما تعرفني تعاي و هطريني بحصواية

ضحكت :- اصيلة ، ليش تلاشيها ولك

- غير ابتليت يا يمة ، بس وعلي لا اطلع هالحصواية الطكتني بيها من عيونها .

ظلت تضحك

كعدنا بالشمس، لهناك دشينا

العصر شفت حاكم ، كلت اله :- ابو ستار طالبك

- كول

- هاي الخاتون جبتها هنا ، لجن ظلت تشكي من الوجع ورايدلي وحدة جوا ايدها تساعدها وادليها لو مشت

- جا وانا شنهي وحدة يو تريدني اعاونها

- لا ههههه حشاك ، لجن احنا نثق بام ستار و نريد وحدة ثقه و طالب بنيتك تشتغل للخاتون

- لا بوية لا ، بنيتي وينها وين الشغل ، ما تكدر

- انت شاور الاهل وردلي خبر خاطر لا ما صارت ادورلي وحدة ثقة جا سوي بعد

- ان شاءالله .

رد حاكم للبيت ، لكا كواغد رادة :- ها شو اليوم من وكت رادة

- من زمان رديت خاطر اسويلك اعشي زوين يكض كلبك

ضحك و هو يشكرها، وكعد كبالها و هي تطبخله و كاللها سرحان هيج كالي

- علواه

- يا علواه ، البت بعدها صغيرة

- تتعلم و هي جوا ايدي و انا غاد وياها ما تروح من عيني و بدل الرويتب اثنين

- لا ، البت لو كثرت طلعاتها ما تكدر تكضها بعد ، عوفيها

- لا يحاكم خلها تتعلم هاي الدنيا ما تعرف شبيها ، جا انا لو ما اشتغل بالقصر و اعتمد اعلى روحي و افتح عيوني، جان شحالنا بغيبتك و انت بالسجن، ولا تخاف اعليها بت امها و ما تغلط ويا احد و عيوني عليها

- الله كريم

جان حاكم متردد يخلي بته تشتغل، لجن كواغد هي اللحت اعليه و كالتله انا اخليها وياي ، بعد ٥ ايام .. ياله قنع بته تشتغل بخدمة الخاتون

لما اجت و تريد تكل لبتها بعد راح تشتغلين وياي، هاي كامت تبجي وتصيح :- ما اروحن للقصر ما امشي

- ولج شمالج ، غير تعاونيني

- لا يمه هنا اخلص كل الشغل لجن ما اروحن ، عليج العباس خليني

- انجبي و اسكتي، حضري روحج باجر تمشين وياي ليمتها اظلن بس انا اعينكم ، و بعدين تعاي جاي موش تريدين كردانه ذهب ، يو اشتغلتي و حصلتي الا اشتريلج كردانه

- يمه اخافن

- خاب تخافين منين يحظي ، ولج شمالج تبجين .

- ما اريد اروووووووحن

-.خب دكووومي

عافتها و راحت نامت، ثاني يوم غصب اخذتها ومشتها لحجرة الخاتون و كالت الها :- شتكلج اعليه الخاتون سوي ، شتطلب ، جيبي واذا ما كدرتي بس صيحيني

- يمه و اذا اجا ذاك

الخاتون ضحكت ، و كواغد لطمت اعلى خدها :- خايبة لا تصخمين وجهي ، ذاك منهو

- عوفي البنية دادة اني احجي وياها .

راحت كواغد ، و اجت هدية يم الخاتون :- شسمج ماما ؟

- هدية

- يا حلو هالاسم ، منو اللي سماج هالاسم ؟

- عم ابوي

دش سرحان :- ها يوم

شاف هدية ، حجه :- انا مو كلت ما اريد اشوفج بالقصر ، انت ليش ما تسمعين الكلمة

- والله مو اني ، اني اروحن لامي

- سرحاااان عوف البنية

- هاي الخاطرج خاتون راح اسكت ، بس ما انساها .

يحجي و هو يعاينلها و هاي كاضة ايد الخاتون و مدنكة و ترجف ، الدموع تهل

متحمل، طلع برا و ضحك و هدية تحجي و يا الخاتون :- انا اريدن اروحن لامي ما اظلن هنا

- لا معليج بيه ، عوفي ، انت ابقي ، خل نكمل سوالفنا ،.كلتيلي عمج سماج

- لا عم ابوي .

دش سرحان :- عم ابوج سلطان ابن ال ثجيل مو

سكتت البت ، ما طلع حسها ، خزرها :- هو مو ؟

- انا معليه وعلي هو السماني اني جنت جاهل .

حسنية :- لك سرحاااان

سرحان :- تعرفين اطكين حصو بس واحد يسميج ما تحجين

- جا انا ما ادري والله

- لا تدرين

- لا وعلي ما ادري

وبجت

عاف المكان و طلع و هو يضحك و الخاتون تسكت بيها ، اجت كواغد ، و كالت :- ها

وكف سرحان :- ام ستار هاي البت من اجت ليجاي بس تبجي

- يااااع شجاج ولج

الخاتون :- ما بيها شي عوفيها

سرحان :- المهم تعرف اداري الخاتون ياريت تعلميها ام ستار

- جا انا علميتها و علي

الخاتون :- روحي ام ستار عيوني ، البنية يمي

- هاااه .. مشت

حجه سرحان :- خاتون اذا غلطت وياج بحرف بس كليلي

هدية :- انا اريدن امييييييي

الخاتون :- سرحااااان

- انا رايح خاتون

خزرها ... عينج عليها

وهاي تجر و تشهك .

عاف و طلع برا ، شوية ورجع لكا هدية واكفة ويا راديون بالحديقة ، تقرب و كاللها :- و انت عايفة الخاتون وحدها ؟

- لا وعلي لا ... امي امي هي يمها ، و عمه صبيحة

- انا كلت الج ما تفاركيها ، كلت لو ما كلت

- امي كالت

- كلت لو ما كلت

راديون :- ها سرحان .. خير ؟

- انا هسه اروحن والله

- يلا ...

مشت بسرعة وراديون صافنه :- هاي شمالك وياها ؟

- حك الحصوة

ضحكت :- هاطرتك بحصواية مو

زناد :- اصباح الخير

انداروله اثنينهم :- هلا

زناد :- شيلتج لفيها عدل لما اطلعين بالحديقة ، ياله بساع

- خلاتها اعلى راسي بعد وين اخليها

- لفيها كلت الج

سرحان :- هاي شبيك

- اخوي البغدادي ، ابوي رايدك بالمضيف

- شرايد

- شعامل و مخل ابوي واج نار ؟

- حرامي لا تصير من القاضي لا تخاف، الحمد لله نعرف انفسنا ما نغلط .

- جا من كون هيج، روح شوف ابوي شماله

- رايح

.....اندكت الباب اعلى بيت حاكم :- هلا يابه

- يريدونك بكهوة حجي نوري

- عليش ؟

- اتصال الك من بغداد

- ها ، جايكم بس البس اهدومي

لبس و طلع للكهوة، اتصل بالرقم المتصل عليه :- الو

- هلا ابو ستار اني ابن حجي منير

- هلا يابه

- احنا عرفنا بوصية الوالد و عرفنا النا اخت من زوجة لابونا و عرفنا انت الوصي اعلى اعليها و رايدينك

- بوية انا كلت للحجي مالي غرض بهالسالفة بس هو رفيجي و حطني بيها

- و احنا رايدينك حتى ننهي الشغلة .

- باجر غبشة انا عدكم

- تشرفنا ..

ظليت اعاين ذوله شرايدين مني، و انا شلي غرض بهالسالفة ، والله يا حجي منير ما ادري شكول عليك .

ثاني يوم غبشة طلعت لبغداد.، وصلت غاد ، كالي احنا نريد البنية، تجيبها من خوالها و تتنازل النا بوصايتها و احتا نتكفلها

- الحجي يعرف بهالموضوع

- الحجي مريض و بالمستشفى و احنا ولده انوب عنه ، و اختنا ما نريدها تظل عد خوالها

- اذا اخوتها و تحنون اعليها ، انا ما عدي مانع ، اجيبنها و اجي و اطلع من هالسالفة .

- ننتظرك

اخذت فورتات من الاعظمية للكاظمية ، و نزلت غاد ، تمشيت لبيت الخوال ، دكيت الباب ، طلعلي الخالها الطلع كبل شوية

:- يابه السلام عليكم

- اهلا وسهلا تفضل

- انا وداني حجي منير على بته ورايدها

- حجي منير لو غيره ؟

- و شيفرق ، الوادم رايدين بتهم

- البت بتنا و ما ننطيها

- البت راجعه لاهلها و امها عرست الله يوفقها و انا واسطة خير بيناتكم الله وكيل و محمد كفيل مالي كل غرض بهالسالفة

طلعت مرة جبيرة بالعمر مدحدحة و لابسة فوطة بيضة ، كضت الباب و هي تكلي :- شنو هسه تذكر عنده بنية

- عليش هالحجي هو مو كل شهر يودي الها مصرف

- ليش هي بالمصرف، مداري عن بنته شنو واحنا المتحملين كلشي .

جاي اريد تحجي، طلعت البت شفتها كبل مرة ، وكفت و كالت :- بيبي اني اريد اروح لبابا

اندارولها اثنينهم ، يخزرون بيها، بيبيتها كامت تجر بيها ، و خالها يصيح :- فوتي جوا

ودار وجهه علي ويكلي :- ما عدنا بنية اله و مصرفها غصبا عنه يوصل

- لا بعد عمك ماكو شي غصب، و البت تريد تهلها و انا مضطر لو ما خليتو البت تمش وياي، ابلغ الامن

-تهددنا انت

- لا بوية انا شلي غرض اهدد ، انا مامور اجيب البت و اجي

- ما عدنا بنية ، امشي منا .

حجاها و اسمع صياح البت بالبيت تصرخ، كلت اله : تعذرني بوية انا رايح ابلغ و تظل انتم و اهلها و الشرطة

وكفني و دش جوا ، بالساعة و اني اسمع حس الصريخ جوا ، الزلمه يكول : خلوها تروح ما النا خلك مصايب

والاماية تصيح : متروح

ختموها فوك الساعة يله ، طلعت البت وجهه احكر طماطة من البجي و تشهك ، شايلة جنطة صغير ، كلت الها:- انطيني بوية اعاونج

سلمت و مشيت ، و هي تشهك ، درت وجهي :- جا انت عليش تبجين ؟

ايمان :- ضربووووووني

- ياهو الطكج ؟

- بيبي

- عليش طكتج

- عمو اني عايشة هنا بالويل ، والله يومية يضربوني و مينطوني مصرف كله ياخذوه الهم ، و اني بس اشتغل خدامه عد نسوان خوالي

- اها ، جا ليش ما تكولين

- حاولت اوصل لابوية بس مكدرت ، امي تزوجت و ابوية بس يدز مصرف ما فد يوم اجا و شافني و كلما يدز مصرف و احاول احجي ويا الدازة يمنعوني

- هسه انا ماخذج لاخوتج و ان شاءلله يراعونج

هزت راسها و بعدها تبجي، ردفتها :- عليش هالدموع بعد ابوج ، كفيهن

- ضربوني

ضحكت ، ذكرتني بهدوة من تشكي من اخوها ، كلت الها :- انتن البنيات كلجن اعلى هالطبع

دارت وجهه عاينت علي ، كلت الها:- عدي بنية بعمرج اصغر منج ، ما ادري ،هم من اروحن غاد للسماوة يم اهلنا تكضني و تظل تشكي هاذ طكاني و هاذ تعدى علي

- و شتسوي ؟

- اكضنهم انعل والديهم

- تحبها ؟

- جا شلون غير بنيتي ، كطعة من كلبي .

دنكت تبجي :- جا انا احجي وياج ، خاطر تسكتين يو خاطر تزودين

كامت تبجي واداري بعويناتها ، انكسر خاطري عليها ، وكفت يم واحد شايل صينية ويبيع كعك ، اشتريت الها كعكاية و انطيتها الها .

اخذت الكعكة و سكتت ، ضحكت و هزيت براسي .

ما صعدتها فورتات ، اخذت الها تكشي و مشينا .

وصلنا غاد ، دكيت الباب اعلى بيت حجي منير ، طلعلي لؤي ، الولد يطلع بحلي بعمر الثلاثين ، لجن عده شوارب موش مالت بشر ، نازلات من فجه .

حجه :- هااااي

البت من سمعته حجه ، تعاي ولوذي بكتاري و كضت ردني

ها بوية ....

رواية كحل عرب الفصل الثاني عشر

( قرار حاكم )

جنت كبلك حلم يحلم بالحلم

جنت وتلكيتك بروحي الجديده

وما عرف من يا كتر للروح اطب

وخفت من سنين عمري

يلبسن وجوه الغرب

وعالكرب حدر بهمك على الكرب

وعلى الكرب يضوي النهر

كلما يصب

وهات هات الليل

يل مالك شغل بالليل

وهات هات الاه

يل ما تشتعل بالاه

الدنيا لو ما بيتتها

لغيرك تلولي وتبات

لغيرك تلولي و تبات

(عريان السيد خلف )

((بغداد ))

إيمان :- اسمي ايمان منير ، بنت حجي منير اللي شايفته بعمري ٣ مرات ، ما شفته بعد ، بس اسمع الي اب و يدز كل شهر مصرفي.

ابويه على الرغم هو زنگيل و صاحب املاك ، بس شخصيته ضعيفة كدام زوجته الاولى (ام لؤي) يخاف منها يحترمها ما اعرف ! ، بس حسب ما جنت اسمع من امي و هي تحجيلي ، يرجف خاف لا تعرف بزواجه و هذا الشي اللي جان سبب المشاكل بين امي و ابويه ، الى ان انتهى زواجهم بالطلاق و اني بعمر ال٥ سنوات

ظلت امي كاعدة عد اهلها ٤ سنوات ، جنت مدللة لما جانت امي وياية ، بس بعدين بيبي و خوالي قنعوها تتزوج بحجة "الى متى تبقين بلا زواج وبعدج صغيرة و الف واحد يتمناج و البنية اول و تالي تتزوج و تظلين محد الج "

قنعت بزواجهم ووافقت على واحد حالته المادية جيدة، بس رفض تاخذني وياها، رادت ترفضه لخاطري بس خوالي قنعوها و تكفلوا بقائي عدهم و بيبي كالت الها ( عندي تبقى و اعتبرها بنيتي و انت شوفي حياتج عليمن تظلين )

تزوجت بس بزواجها كلش تأذيت

زوج امي كل 5 اشهر يلا يسمح الها تجي لأهلها تشوفهم و تشوفني و ممنوع اروحلها لبيتها زوجها ما يقبل . صفيت لا اب ولا ام تحت رحمة بيبي و خوالي .

اشتغل سخرة عدهم ، روحي تعاي

اسمع عندي اب بس ما داري عني ولا ادري بيه، حتى ما جنت ادري يبعث مبالغ مادية كل شهر مصرف الي، اساسا جان حسرة عليه الفلس محد ينطيني.

مرتين رسبت بسببهم ميخلوني ادرس بس اشتغل ، خصوصا بعد ما تزوجو خوالي الاثنين (اسعد و محمود ) صرت وكاني الجنة الثالثة و اكثر الشغل على راسي.

صرت صف سادس ابتدائي و هم رسبت بنصف السنة ، هنا خالي كال :- هاي هي بعد مدرسة و ما فالحة بيها شعدج بعد اداومين ، تعلمتي قراية و كتابة كافي ، اكعدي بالبيت عاوني البنات بالشغل .

حيل انقهرت وبقيت كل ليلة ابجي و اتمنى اوصل لبابا بس حتى اكوله اريد اكمل مدرسة ، بس ما جنت اعرف عنوان ابويه ولا رقمه ولا حتى شي عنه.

الى ان عرفت هو كل شهر دا يبعث شخص يوصل مصرف لخوالي اليه، أستغربت !!

كل هالسنين يدز مصرف و اني حسرة عليه الفلس !

وينها لعد الفلوس ؟

وليش اني ما ادري عن كلشي .

طلبت من بيبي اشوف ابويه ، تكولي ميريدج ، كلت الها :- هو مو ديدز كل شهر مصرف

اول محجيت هيج ، انهدت بيه :- تعيرينا و انت كن هلكدج احنه مربينج ، هالاكل التاكلي و الشرب و الملابس و تحجين بمصرف ابوج .

وصلت لحد الضرب ، ضربتني لإن كلت الها على هذا الموضوع ..

انحبست داخلي اقفاص روحي

كلشي بيه ذبل ، كأني ورقة وكعت من شجرة ، يهيم بيها الهوى ما تعرف وين تهوى و تستقر .

لا اب ولا ام و عائلة ولا اي شي.

من بعدين عرفت ان الي اخوة و خوات من ابوية، صرت اتمنى بس اروحلهم بس خوالي ميرضون اروح ، مو محبة بيه ، استعزاز بالفلوس لإن المبلغ اللي يدزة بابا كل شهر .. مبلغ عالي .

لاحظت ان ابوية كل ٣١ بالشهر ، يدز المبلغ بيد اشخاص متفرقين مو موكل شخص معين .

الى ان يوم اندكت الباب الظهر و سمعت خالو طلع و عرفت ابوي دز المبلغ، خليت خالو يدخل جوه و اني طلعت اركض ورا الرجال بس اريده يوصل حالي لأبويه ويبلغه بلكي يحن گلبه و يجيني .

بس ما صارت لإن خالو حس بطلعتي و تبعني، واول محجيت ويا الرجال قاطعني هو و رجعني للبيت ، ضربني هو و بيبي ضربتني ، بعد هذا الصار ، ساءت معاملتهم اكثر ، نسوان خوالي زادوا بالشغل علية

تأذيت كلش هواية .

ماكو حسبة ايام و اندكت الباب ، و رجع الرجال اللي دزه ابويه ، بس هالمرة مو على مصرف ، لا جانو رايديني اروح وياهم .

كلت لازم اطلع و احجي ، اذا سكتت ما راح اكدر احجي طول عمري، تجرأت و طلعت ، جانت بيبي واكفة و خالو اسعد .

كلت الهم (اني اريد اروح لبابا )

حجيتها و ابتليت بروحي ، خالو يغلط و بيبي تجر

سحبتني للهول ، ضربتني ومرت خالي تكرص ، بيه و حتى خالو اجا يصيح عليه .

بس الرجال اللي دازة بابا كايللهم :- لو تخلوها تروح وياي لو مضطر ابلغ الأمن .

تعاركوا خالو اسعد و محمود ، واحد يكول (خليها تروح ما بينا حيل مصايب ) والثاني ميقبل ، الى ان لموا ملابسي و غلطوا عليه و كالو روحي ما طلع بيج الربى ولا غزر وياج معروف .

طلعت ابجي من عدهم ، الرجال شال هدومي و اني مكدرت اسكت ، جنت متأذاية حيل .

اشترالي كعكه ، سكتت وامنت و مشيت وياه .

وصلنا لبيت بابا، دك الباب ، طلع رجال طويل و شواربه كبار و يأشر عليه و يكول :- هاي ؟

خفت و صرت ورى الرجال .

حجه هو :- ها بوية

ظليت لازمه بردانه واباوع

لؤي:- فوتي جوا

حاكم :- عاينت ، استقباله للبت موش مالت الله ، ولا جن اخيته و ما شايفها ، هيسيت الوضع موش تمام .

كلت اله :- هله هله بالبت ، تراها اختكم و صغيرة و غريبة دار ، والله موصي بالخوان .

لؤي :- ان شاءالله ان شاءالله ابو ستار ، بس بقت بس التنازل عن الوصايا

- اتنازل بيها المن .

- الي

- انا اكولن لو تكبر البت و تاخذ حكها و انا امانة الله ورسوله لا الي غرض بفلس ولا اكضن منهن درهم .

- احنا اخوتها و اعرف بمصلحتها، نشكر امانتك للوالد و الوالد جان هواي يثق بيك ، بس عينك على مالك دوا و احنا نداري اختنا .

- اي حگکم ، درت للبت بعدها لابدة بسدي :- تعاي يابه لا تخافين هم هم اخوتج ان شالله و ما يقصرون وياج

شفت البت لا هاويه ادش ولا بودها ترد ، و حايرة بنص الدرب و العيون يتلاصفن :- سمعي بويه انت امانة الحجي الله يكومه بالسلامة ان شالله، و انا ان شالله اسوي هالاكدر عليي ، لو احتاجيتي شي ، انا متواجد بالمعمل من الساعة ٨ لي الساعة ٣ الظهر ، شتحتاجين بوية الركبة سدادة و تدلل بت حجي منير.

خوش بوية ؟

تعاين بعيني و ما تدري شتجاوب، اطيتها العلاكة و كلت الها :- يالة بنيتي ، دشي و صيري سباعية ، لا تخافين .

والاخو ما طلعت منه الجلمة ولا جني احجي وياها، و هاي صاكة بمچانها لا تمش ولا تحجي، بس العيون دمعن .

:- جا هسه اروحن يو لا ؟

نطق صنم ابو الهول لؤي و كال :- لويش واكفة بمكانج ،ما تفوتين ؟

دخلت للبيت ، و هي تعاين وراها ، نطقت :- اني ما اعرف الرقم .

ابتسمت بوجهه ، كسرت خاطري ، جن عايف هديوة موش بت غريبة ، كلت الها :- انا باجر امرن و اطيج الرقم بعيني .

لؤي :- اهلا وسهلا بيك ابو ستار ، و ان شاءالله باجر العصر نكمل كل الاجرائات .

- ان شالله ، اودعناكم .

أيمان :- من جنت جاية لهنا ، جان املي جبير انو راح اعيش ابيت ابويه و اخلص من ظلم خوالي، بس الصار ، ساعة الوصلت و شفت الرجال اللي عرفت اخوي .. خفت

حسيت بيت خوالي أمن الي من هذا البيت الغريب .

على الأقل ذاك عايشة بيه سنين ، هذا مشايفته و ناس ما اعرفهم ، و ابويه اللي هو ابويه لو مر كبالي ما اميزه و اعرفه ..

دخلت و ادية تتراجف و اني شايلة علاكة هدومي ، حجه الولد :- فوتي جوا

دخلت لكيت ٤ ولد .. ٣ بنات ، وحدة منهن جبيرة بالعمر ، اول ما دخلت ، باوعت للولد و حجت :- منو هاي

- هاي اللي ابوي مخلفها من المرة الطلكها و اللي مورثها و ناطي وصاية ورثها لواحد عُربي چلفي و ما نعرفه اصله منين ، الظاهر الحجي ميثق بينه .

باوعتلي المرة بخزرة غضب و حجت ويايه بصيغة عصبية :- امج وينها

- ابيتها

- وين بيتها

سكتت ، حجت :- متزوجة ؟

هزيت راسي بمعنى : اي

- و انت وين جنتي عايشة ؟

- عد بيت بيبي

حجه واحد :- هو جان ناقصة اخت جديدة

رد الثاني بطريقة استهزاء :- اخت بالباكيت

لؤي :- هسه ما علينا ، البنية تظل هنا ، الهم عدنا حصتها لازم ناخذ الوصايا بيها .

حجه الثاني :- ترا الوالد بعده عايش وصايتيش

- يالغبي ، ابوك كاتب وصيته وموزع علينا بالتساوي ، وهاي ماخذه مثلي و مثلك ، هم مو بالشرع و نكول ماخذة نص .

حجت الأم :- الحجي مو وكته ، فتوي جوا انت ياله .

ضاق صدري على كبر هذا البيت، مدري لو ظالة ابيت بيبي هم احسن على الاقل اعرفه و ما استغربها حتى لو تضربني ، بس اكل انام ببيت معروف مو غريب.

دخلت بغرفة وكعدت ولميت نفسي ، ٣ ساعات محد اجا ولا سألني، كاعدة بنفس كعدتي ، يمرون مني ويطلعون بس يباوعون بلا كلام .

اخيرها دخلت المرة الجبيرة و كالت : تعاي

كمت وياها ، اخذتني لغرفة بيها حجي جبير نايم .

باوعته، حجت :- هذا ابوج و ما دامج بنته ، اخدمي و كعدي هنا و كابليه ، بلكت تشبعين منه كبل ليموت .

حجت هالكلام بنتر و طلعت ، بقيت اباوع ع الحجي ، شكله مريض ، ضعيف مصفر ، كعدت يمه.

ومنا ابتدت معانات اكثر و اكبر مما جنت اتوقع .

(( عرب ال جلوب ))

سرحان :- بويه كالولي الشيخ رايدك

- رايح لكعدة الكيولية سرحان

- لا

بدون فهم ، ضربني راشدي :- تجذب عليه وووووولك .

شلت راسي :- ابوي حتى لو ضربتني تمون بويه ، لجن ما رايح و انا مو جذاب خاطر تجذبني.

- و الشايفينك هنا انت و اخوك كريم

- اليكلك شايفني خل يلبس عوينات و يعاين عدل ، لجن موش انصاف تصدك غيري و تجذبني و انا ابنك .

- لو جدمك خطت غاد يو احد منكم راح و جالس الكاولية وعلي لطبع هالعكال اعلى جسمه و اشوهه افتهممممممت.

زناد :- كريم موش عادته يدش هيج مكانات ، انت شجاي تعلم الولد ، ما تدري العين محوطتنا و اعدانا تتربص النا.

عاينت اله بغضب و كلت اله :- وفر النصيحة الك ولا تدخل بغيرك

صاح الشيخ :- سرحااااااااان .

عفتهم و طلعت ، كام يصيح وراي، ما درتله بعد ، تعنيت للشط ، غسلت و كعدت مورثه اعصابي ، انا يضربني و جدام عمامي و اخوي الزغير ، عليش ؟

شنهي انا زغيرون لو مو بعينه .

ظليت ادخن و احرك بروحي، ساعتين و انا اعلى كعدة وحدة ، اجا خنجر :- ها يالكديش شو هنا جويعد

- بربك ميل عني

- شمالك

- اكله ما رايح ، يطكني ، شنهي انا هيج زغير بعينه و مستحكرني ؟

- وين تروح

- لكعدة الطرب مالت امس.

- هو بس كريمو مغطي رويحته ، هذا لزوم من بيتك ، من عرف انت الك ايد بروحت كريم هالحطك وياه ، و انا اظنن هذا زنيد المتطين

عاينت عليه : هو هم حاسبني جن انا اخوه للزغير مو الجبير

- هاذ يريد يثبت للشيخ هو الكفو موش انت

- هاي نعرفها

- تعرفها شي و يطبقها شي ثاني

- و شسويله ؟.

- تحاذر وياه ، ان ما صرت ذيب تاكلك الواويه و اخيك هاذ زنيد واوي الليل ما يتامن ، وحيد ملعب وووجهه مدوحس و لو تخليني اطكه و اريحك منه

عاينتله بطرف عيني ، حجه :- وعلي خلني اخلصك منه

- شطكه ؟

- خايب اخذه انا و جماعتي الهتلية ، نكضة نكضي بيه الليل و نردة الكم غبشة مطفين عويناته و مكسرين سنيناته و شوفه فنه لو فتح حلكه بعد وياك

-دسكت انت اللخ

- خايب خلني اخدمك

- اخدم روحك و عوفني

كمت ، كام وراي

- دا انت بيها بيها تعال الليلة و خلنا نتونس

- فك عني .

عفته و مشيت و هو يكلي :- عود ما اوصيك هم صير متطين مثل اخيك و طكلك جم ركعة و هدني.

عفته ورديت للقصر، ما عاينت احد ، مشيت للغرفة كبل ، صفكت الباب وراي، انفتحت و دشت هدية كاضة علاج بيدها ، بعدها تريد تنطق ، صحت بيها :- مو وكتج اطلعي براااا هسه

جفلت ، و ردت منين ما اجت بسرعة ، صحت عليها بساع :- تعااااي

ردت وكفت كبالي ، و العيون خايفات :- احجي بساع شرايدة

- سيدي .....

- كاعد بنقطة شرطة و تكليلي سيدي ، شفتي الرتبة اعلى متني و صحتي سيدي ، منيلي سيدج

عاينت :- جا شكلك ؟

- كليلي سرحان

سكتت ، ردفتها : لا تسكتي كليلي عليش جاية ، تره حدها واصلة للهامة وخلكي ضايك

- انا الصبح من جيت اطتني صبيحة هذا الدوة ، هن ٣ وحد اطيها كل ما تاكل ٣ باليوم ، و اثنين ....

- اختصري

- انا اطيتها الصبح و اشرت عليهن بنكطة و نجمة خاطر لا اتيه بيهن ، من اجيت الظهر اطيها ، ما لكيت اعليهن نجمات و تيهيت هاذ يمتى انطي و هاذ منين ، وهذا الدوا الاخضر ما جان موجود الصبح ، الظهر شفته .

- يعني شنو

- انا ما عرفت شطي ، لين النكطة و النجمة الرسمتهن ما هن (ماكو )

- انت متأكدة من حجيج هااااذ

- سيدي انااااا والله ما اعررف ..... قاطعها

- اششششش

عاين ع الباب، مشى خطواته لخارج الغرفة ، عاين منا منا ، ماكو احد ، رد و صك الباب و كال الها :- الشي اللي الكلتي عليه مو هين ، حجيج هاذ معناه جاي ينلعب بعلاج الخاتون ، اطيني هاذ العلاج خليه يمي و اريدج تراقبين الحجرة منهو يطلع منها و منهو يدش اعليها

- حجرة الخاتون ؟

- اي ، ماشي

هزت راسها :- بس انا

- اعرف اعرف ما الج غرض بهالموضوع ، بالعكس انا اتشكر منج من كتيلي ، لزوم اراقب الوضع ورايد منج تساعدين من عبن هنا اكو ناس تريد تكتل الخاتون

- يمه

- لا تخافين محد يكرب منج ، بس اريدنج تفتحين عيونج عدل ، ماشي ؟

- اي

- اي شي يصير وياج بس كليلي

- خوش

- ياله روحي .

هدية رديت للحجرة و انا اعاين الدوا ، رسمت اعليهن مرت الأخرى ، و حطيتهن اعلى كتر .

اجت امي :- حضري روحج خاطر نرد

- اي

لغيت الشيلة ، دش سرحان :- هااا

- ها سيدي

- هم سيدي، ياله هم مقبولة سيدي ولا حصواية

سكتت ، حجه :- رايحة

- اي امي كالت..... قاطعني و هو يمر يشيل الدوا و يتأكد منه

طلع و صاح :- خالة صبييييييييحة

اجت :- ها يمة

- ما دام البت رايحة عينج لا تفارك حجرة الخاتون ابد ، و ان مشيتي حطي بدالج واحد

- عليش ، هكو شي ؟.

- الحذر واجب

- تامر

ظليت اعاين الدوا ، معقولة الدوا جاي يتغير ، المشكلة ما افتهم كلش بالأنكليزي ، اطكطك بيه اطكطك فما جاي افتهم شنهي هاذ، شلت الدوا و خليته عدي خاطر اخذه للمضمد يعرف شنهو هاذ .

كعدت بحجرتي ما طلعت منها ، ندهوني اعلى عشا كلت الهم :- ما اريدن ، رايد انام خفيف

عافوني لجن اعرف الوالد يتضايك لو ما حضر واحدنا اعلى السفرة اليكعد اعليها .

لهناك اخذت الدوا والورقة ما الطبيب الكتبها النا غاد ابغداد ، ورحت للمضمد، عاين علي ، كال "ما اعرف" مشيت للمستشفى الجريبة اعلى ديرتنا ، كال هذا دوا مالت مفاصل و قوي كلش وكثرته تسبب امراض و الماعدة مفاصل تأذي حيل و تمرضه

طلعت اله الورقة مالت الطبيب، كلت اله :- هاذ نفس الدوا

كال : لا مو نفسه ابد

اخذت الورقة و اشتريت الدوا مرت الاخرى ورديت للبيت ، شرب الخاتون بنفسي و اخذت الدوا عدي.

ثاني يوم الصبح حاولو يندهوني ما كعدت ، راسي من يطنكر تنتهي عدي بعد ما احب اجابل احد ، على سالفة امس .

صحيت من النوم ، لجن ما كمت من فراشي، ظليت حاط رجل اعلى رجل ، و ادخن، شوية و اندكت الباب، دشت هدية :- سيدي

ضحكت :- ولج عدج عسكر لخاطر الرسوله

- لكيت الدوا

عقدت حواجبي :- يا دوا ؟

- البارحة الرسمت اعليهن نكطة ونجمه

- شو

كعدت و هي كربت اعلية ، اخذت الدوا من ايده ، واخذت ذاك ومدنج اركز يتشابه لو لا ، و هي مدنجه وياي تعاين

مدري شهيسيت ، جن گلبي رجف ، عاينت بعيونها ، و هي تكلي :- هااا ؟

رجعت اعاين بالدوا ، تيهيت علومي ما عدت اوچد (اركز )

انفتح الباب، درت وجهي ، شفت الشيخة ملوك واكفة اعلى الباب، عاينت اعلى ايدي، وردت عاينتلي :- يبن الشيخ ما تعرف الخدامة ما ينصك اعليها الباب و ما ينظل الواحد وياها بمجان واحد ، و ساعة اليفترن بالقصر الزلم تفارك ليما يخلص شغلهن ، هاذ الاصول يو لاله يبن الأصول

حجت و خزرت بهدية ، ذيج طلعت بساع شردت :- الأصول اعرفها كلش زين ، لجن الحيف اعلى الما يعرف الأصول و مفكر جاي يلعب علي و انا كاشف الاعيبه

وكضيت العلاج بدية و اعاينلها ، عاينت :- انا بحسبة امك من تحجي وياي ، احجي بأحترام يبن الاصول .

ضحكت :- صكي الباب وراج لو خلصتي حجي

درت عنها بلا اهتمام و انا اكعد

تنهدت ، و هزت راسها ، و ردت الباب .

مشت الشيخة ملوك ، والشيخ رايد يطلع، وكفت و هي تعدل بعباته و تنزل شماغه و ترتب بيه و تكله :- سرحان موش سرحان الاولي يشيخ

- انا ندهته اعلى الريوك و ما حضر

- سهلة يو ما حضر نكول ما يشتهي الزاد ، ولا احجي اعلى قلة احترامه الي و انا بحسبة امه ، لجن سالفة ينصك عليه الباب هو و ابن كواغد ووحيدهم بالغرفة و ادش والكاهم واحد لازك بلاخر ، صعبة يشيخ بقصرك

:- هاي من يمتى

- هسه توني رادة منه ، طردت البت من حجرته و طلعت، انا معلمة ولدي ما يوكفون ويالخدامات و يو افترن يطلعون و ما يحجون وياهن ابد ، لجن سرحان ترباته موش ترباتنا يشيخ ، ما بسه يدلي بأخيه الزغير اعلى الدروب الكاولية و يجي يتختل ويا الخدامة بقصرك .

- بت حاكم راجعه لال ثجيل..... قاطعته

- و الشيطان شاطر و البت و الولد مثل النفط و النار اعلى الريحة يكبون و بلحظة طيش تنهدم بيوتنا يشيخ

- اعزلي بت كواغد ولا تخليها

- جا لو عزلتها ، يسوونها برا ، خلهم كبال عينه ولا ورانا ، على الاقل نراقبهم و ننصهم ، بس يو غلط بيها من ورانا ، ساعتها شنسوي ؟

- انت شفتي بيناتهم شي؟

-الشاهد الله ما شفت غير مدنجين اعلى مجلة و جريبين من بعض مثلنا انا وياك هسه ويعاينون سوا، انا اعرف هللامور ابغداد تحصل ، لجن بطبايعنا ما تجوز.

- هاذ الولد ردته يتعلم غاد ابغداد خاطر يتثقف ، ردلي و هو راسه والف سيف ما يدنح و عيونه يجدحن حقد اعليمن ما ادري ، من ساعة الدش و هو متضايك و ما مرتاح

- جان خليته غاد

- انا رايد ولدي بكتري يملوك و اخليهم تحت عيني واوالمهم ، خاطر يو متت ما يظلون واحد ما يهوى الاخر ، رايدهم واحد ساند الاخرة موش اخوة يوسف.

- الله يوالم كلوبهم ان شالله ، لجن حطه ابالك عدل تراه ذبته ذب افندي موش ذبت ابن شيوخ.

حجته و حبته بجتفه و كالتله :- الله يحفظك و يديمك فوك روسنا

حبها بكصتها و كاللها :- لا تفاركينهم ، فتحي عيونج عدل ما بينا حيل مشاكل ، و انا هم احجي وياه و ادلنه.

- بعيني ، لا توصي حريص.

طلع هو ، و هي طلبت سليمة ودت اعليها للبيت خاطر تلتقيها بالبستان، لبست و طلعت للبستان ، اجت سليمة

:- شلونج شيختنا

- هلا يسليمة

- شيخة انا ..... قاطعتها

- عوفيني منج ، محتاجة ردتج للبيت بسرعة

- شلون و ابن الشيخ حاط كورة وياي .

- تروحين غاد الظهر ، الشيخ راح يودي اعليه ، و تطيحين اعلى اجدامه ... جدام الشيخ ، ضروري جدام الشيخ

- ويو ما رضى بردتي

- الرضى خير اعلى خير ، و ان ما رضى هذا مناي

- عليش

- اليرد مرة موش ابن اصول ولا هاذي طبايع شيوخ، بس اسمعي اريدج اثغبين و تبجين حيل و تشكيله الحال جن ما عدج بس الله و هم و يو ما رديتي تموتين من الفكر ... اشكي شما بيج تشكين .

ويو رديتي ساعتها نلعب براحتنا

- شنلعب

- غريب بجيبته لهدسة و هي بت ال ثجيل ، جاب منيته وياها

- ما فهمت

- الاريدن تفتهمينه ، لزوم ننطيهم مجال يتكربون من بعض موش يبعدون ، من تجي البت يمج سريها و خليها تنعجب بيه و امليها يو صارت مرته تصير مرت الشيخ حالها حال الشيخة ملوك اللي هي انا و كليلها .. هيج يصير عدج و هيج تصيرين و امليها بالمعتازته البت .

- و ان جان هو ما هاوي ؟

- الزلمة ما عده شي ما يهوى، شما تحطين جدامه و تحلين بعينه يهوى و يطيح اعلى وجهه من عبن عينه تعشك لو شما حجه عكله وردّه.

نفذي الكتلج اعلية و رديلي خبر

- امرج يشيخة

اجت راديون :- هلا يمه ، هنا

- شجابج للبستان

- طاكة ارويحتي واردن اشمن هوا، بروح امج خلنا نمش للسوك شواي .

- وشعدج بالسوك ، ما محتاحين شي

- محتاجة افتر ، اشمن هوا ، اشوف وجوه

- يا كثر الوجوه بالقصر و هاذ الهوى عذيبي و افتري هنا لينا تملين

- يمه افتر ششوف نخل و شجيرات ، عليج العباس يمه خلنا نطلع

تنهدت و هي تكللها :- امرج يشيخة راديون ، تدللين عيوني، حضري ياله خاطر نروح

فزت اعلى امها تحبحب بيها و هي تكللها :- احبنج و علي ، مامش ام مثلج يمااااي

وتحضن بيها

- خلصينا ياااااااله فضيها .

ركضت راديون و هي تحضر بروحها ،

لبست و حطت الزينة كلها و طلعت جنها الكمر ، وراحت ويا امها ... طرت الدرب ، و براس الفرع ، عاينت خنجر و هو كاعد لجن داير وجهه و ما يدري عنها.

كحت بحجة تراب دش بخشمها و ظلت تكح

اندار خنجر و شافها ، عاينت اله بطرف عيونها ، و هو شاهت عيونه عليها ، لا كدر يكض كلبه ولا يكض روحه ، و شاهك اعليها .

ركبن و طلعن ، و هو لحكهن للسوك

تمشي و هو لاحكها ، ليما سهت الشيخة ، مشت اعلى ابو محل وكفت عده و اجا وكف هو قريب منها

:- من شافج كلبي ضاعت علومه و دكاته شكن صدري ، جن يكلي هدني خلني اروحن ليها .

ابتسمت و هي مدنجة ، رد حجه :- جا راح نظل اعلى طلعت السوك وعلي ينهد حيلي و تمل خلكي الليالي اعلى كثر ما اتاني طلعتج و انا ما محصل غير الشوف

- جا شسوي

- شنهي هاذ صوت يو بلبل يغرد

دارت عنه بخجل ، ودت حجه :- اكدر اشوفنك بس يوم الجمعة جريب من الشط

- اجي لو ينزرع الدرب تيزاب و الهوى سجاجين هم اجي خاطر اشوفن هالعيون اليسحرن

ضحكت و هي تكله :- الجمعة بعد الها ثلث تيام

حجتها و مشت عنه ، و هو يتنهد ، كام يفرك بصدره اعلى كثر ما دك عشك .

.....

سرحان :- بدلت خاطر اطلع من البيت ، مريت ع الخاتون حبيت راسها و طلعت .

ظلت ابالي سالفة الدوا ، انا حفظت شكله ، لجن الشيخة ملوك دروبها ما يتأمنن ، لزوم اراقبها و لزوم اوصي هدية وصبيحة يراقبن الوضع

اااخ اااخ ، مو جنت مرتاح ابغداد شجابني اعلى هالسلف و طلايبه ويني ووين المكايد و المداسس .

طلعت و انا الف فكرة ابراسي ، اخذت الفرس وطريت بيه البستان و اعاينه ، وصلت الحد بالبستان مكان مجفي من الشوف و بيعيد ووجه اعلى الشط لجن محد يسگي منا .‌

ظليت كاعد حوالي بالثلث ساعات ولا طير مر من هاذ الدرب ولا بيت ولا صريفة موجودة ، مكان مهجور بكفه بستان ابوي .

ارتاحيت هنا و قررت يكون هذا مكاني الارتاح بيه من تضيك بيه الدنيا.

اخذت الفرس و طربكت للمضيف.

وصلت غاد ، نزلت و دشيت الديوان :- الله بالخير

ردوا - الله بالخير و العافية

مشيت لابوي ، حبيت راسه و كعدت ، ما حجه وياي ، حجه عمي :- شنهي يسرحان ما تبين

- موجود عمي

- من كونك موجود عليش ما تركد بمضيف ابوك.

حجه زناد بمكر :- اخوي ما تطيبله جعدت المضايف ، طابتله بغداد بنواديها و سهراتها و الدك مالها

- بغداد موش ملهى ان جانت ابالك هيج ، و انا صح موش ملتزم بالدين لجن موش نمام

زناد :- ياهو النمام يخوي

تجاهلت الجواب و انا اسأل ابوي :- بويه ردت اسألك عن علاج الوالدة

جاسم :- ياهي الوالدة

زناد :- غير حاسب الخاتون امه

ضحكوا ، تنهدت ، كام الشيخ وحجه :- امش وياي سرحان

كمت من مكاني، و هم ظلوا اعلى كعدتهم ، طلعنا و انا اكله :- ان جنت ساكت فبس لاجلك والا والله لو ما كعدتك جان كومت اسونه بحلكه.

- شعدك ويا بت ال ثجيل

- بت ال ثجيل !!؟

- بت حاكم

- شعدي وياها ؟

- انت الجبتها و انت...... قاطعته

- يا مسرع الفتنه من يفتنون علي يمك ، ماكو غير الشيخة ملوك كالتلك ، لكيتهم متشابكين متحاضنين ، لا لا شالتني منها كوه .. هيج كالتلك لو انا غلطان ؟

:- ليمتها تظل حاقد اعلى ملوك ؟ يمتى يكف هالحقد البينك و بين اخوك

- انا الحاقد ، جا انت ما تعاينهم تعاين علي ؟

- ما شفت منهم الحقد اعلى كثر ما شفته بعيونك و هن يجدحن شر اعليهم

ظليت صافن علي :- انا بويه ؟!

-اخو يتقشمر وياك ، انت تكوم تلهب و ما تتحمل الجلمة من حلكة ، حسرة حجالة جلمة لا ما ظليت تنافخ ويا تكله نمام يا تحاول تثبت انت الجبير و اعلى منه و تزغر بأخوك

ليمتها تظل هيج ؟

انا جبتك هنا خاطر تتودد الهم يو تشد حزامك اعليهم

ضحكت بتعجب و انا اعاينله و كلت اله :- شكثر حاجين براسك علي لدرجة ما جاي تميز ياهو الحاقد انا يو هم .

جابني بجف بساع و صاح :- احجي عدل ولك انا ابوك ما ينكالي ما تميز ، من تقلل احترام ، احط راسك حدر جدمي و اسحكنه افتهممممممممت

بلعت ريكي و العبرة التمت بزردومي ، اختنكت و احتقنت حيل و انا اطك بركبتي ، حجيت بخنكة :- اترخص منك شيخنا ، انا مالي ظله هنا بالسلف

راد يكضني درت بساع :- ولا تحاول تردني ، ان جان على المشيخة اطيها لخوي و اعتبرني متبري منهم كلهم ، و ابعد حقدي عن شيختك وولدك ما دامني انا الحاقد موش هم

التفتت امشي و هو يصيح وراي :- سرحاااان ، سرحااااااااان انا ابوك اصيحك رد سرحااااان

ما عاينت اعليه ، كضيت الفرس ، فزيت اعلى ظهره و انطلقت ، بس وصلت لدرجة تدموعي غرغرن بعيني اعلى الهضيمة الشايلها بكلبي منهم .

انا غريب ..

انا الما دريت ياهو ابوه

انا الما عرفت ياهي امه

انا الما ميزت كاعي

ابن عشيرة يو حضيري

افندي يو شيخ

انا الغريب بكل كاع اواطيها

انا الغريب بكل مكان

ما صدقت الشيخة ملوك الا وكت الندهتني بغريب

انا فعلا غريب

وصلت القصر ، انطيت الفرس للحرس و دشيت ، لميت كل غراضي ، رحت للخاتون كلت الها :- انا طالع لبغداد فورا

- و عايفني هنا ليش ؟ اصبر لباجر نطلع سوا

- ما اكدر لزوم اطلع هالساعة ، ادريس و صبيحة بخدمتج

رادت تحجي بس من العصبية و النار البداخلي ما اكدر اصبر بمكان واحد ، حتى ما ميزت هدومي شخليت و شحطيت ، ردت احجي ويا هدية و اوصيها ع الدوة لجن الكل جان واكف يريد يفهم شبية

اخذت ورقه و كتبت بيها ( اريد اشوفج بالبستان بسرعه اطلعي)

طلعت و هي واكفة ، و صبيحة بصفها ، ملت و خليت الورقة بيدها بلا ما يحس احد و طلعت ، نطرت بالبستان خاطر تجي

هسه تجي

هسه تجي

هسه تجي

ماكو !

يا الله ع الغباء الشايلته هالبنية ، نزل الغروب و انا هنا ، عفت ووصيت ادريس ع الدوة وكلت اله يبلغ امه .

هديه :- حط بيدي كاغد لجن انا ما اعرف اقرا و اكتب ، عاينت كلشي ما افتهم ، شني هاي الكاغد ، يمكن كاتبلي بيه (احبنج ) يو رسالة حب ؟

اخذت الكاغد ما هديته ليما ردينه البيت و امي رادت مني عشى ، ضيعيته من ايدي و تاه .

شالته امي و عاينت :- شنهاي الكاغد ، شمكتوب بيه

عاينيته بيده ،وكفن عيوني بالطول :- يااااه انشهرت و علي ، اااااا يمه يمه ، اطيني هاذ الكاغد خاطر اوجن بيه

- دخل اشوفنها شنهاي ، كاغد مالت كتاب نظيف و احنا ما عدنا هيج كتاب ، لزوم اعرف شمكتوب بيه

- يمه بس اطيني

- ستااااار

- يمممممه اطيني

- دهدي شمالج شجاج

ستار :- ها يمه

- اكلك انت موش داش مدرسه ، تعرف تغرا يو لا ؟

- ايييي يو اطيتيني كتاب هييييج افلسنه تفلس جني مذيع

- جا تعال اقرا هالوريقة هاي شمكتوب بيها

- هااا ااااا شسمه ، هاي شني

- جا هو انا اريدن اعرف شنهي

- ايييي هااا ييييي انا اقراها

- جا دقراها

هدية :- يمه كاغد من الشارع شنهيييي

- سكتي انت ، اقره انت يااااله فضنا

- دوكفي خليني اوچد عدل ( اتمعن النظر )

- جا هاي وريقة وهيج يبو التهمبل وينك افلس الكتاب تفلس

-.دصبري يا يمه شمالج

ام حاكم :- اطي صاول خل الولد يعاين زين توليتي ياله وياله شلشتي

- اي والله حبوبه حتى دماغي تاه و ما عدت اوچد ( اركز)

دمغته كواغد اعلى راسة :- دفضها يااااله

- لا طكين لا طكيييييين ترا وعلي ما اقرالكم

- خبببببب ديااااااااله

هديه :- شقصتج ييمه اخيي تعيبان ما بيه يقرا

ستار :- ا ..و ..ر ، ار ...و ييييييي اروي ، هاي شنهي؟

دمغته :-، دقره عدل شنهي ااااا و يييييي جا شفتهمنا

- يمه اضنن هاذ انكريزي

- خايب عُربي انا اعرفنه لجن ما اميز الحروف اقرا

- لا يمه وروح جلوب هاذ انكريزي و انا ما اعرف انكريزي

غمه بكصته :- من جيرة و خفت ، خايب هو موش صوجك ، صوج المدرسة الرضت تلفي وجهك يالاغم ، امش اعوينة ابو اصلك امش

- وعاي مو صوجكم ، صوجي انا متعب روحي و اقرالكم ، انتم مال قراية انت

-دمشيييييي

هدية :- ارتاح كلبي من شفت الكل ما يعرف يقرا ، لجن ظلت ابالي ، شكاتب الي سرحان ؟

امي من شافت الكل ما فسرها المكتوب ، ذبت الكاغد من ايدها و مشت، شلته و حطيته بالبقجة مالت هدومي ، ودفنه جوا كلش خاطر محد يشوفها.

(بغداد _ بيت الحجي منير)

إيمان :- ساعة الاجيت لهنا و اني احس الكل ما راغب وجودي، لا احد كعد وياية ولا احد حاول يتعرف عليه، ظليت مستغربتهم .

بس الأم جانت كلش متعصبه ، حيل خفت منها، ظليت مكابله ابويه و گاعدة ، لليل ، دخلت و حجت :- كومي نظفي البيت و المطبخ بسرعة و لو كملتي اخذي الزبالة وروحي شمريها بالساحة .

كمت من مكاني بخوف، رحت نظفت على الرغم البيت كله نظيف ، ملكيت بيه شي، وكم صحن بالمطبخ ، غسلتهم و طلعت الزبالة ، باوعت الساعة تبعد عنهم نهاية الشارع

اخذتها وطلعت ، جنت لابسه نفنوف لحد ركبة رجلي و الهوى كلش عالي يرفع بثوبي ، حطيت ايدي حتى ما ينرفع وكوة امشي و شايلة الزباله شمرتها و رجعت

اريد افتح الباب ، ما ينفتح ادفع بيه مقفول ! ظليت ابجي الجو اظلم والهوى عاي، دكيت الباب بس من صوت الهوى ، دكت الباب تصير خفيفة

كمت ادك بقوة ، لهناك طلع اللي اسمه لؤي ، هو طويل حيل و شواربه نازلات و شكله يخوف ، من فتح و شفته انرعبت ، صاح :- شعندج طالعة بهالوكت ؟

- رحت اشمر الزبالة

لزمني من اذني و دخلني جوا و كال :- سمعي لج ، كوا** امج ما تمشها هنا ، لو شفتج طالعة الباب والله راسج اكسره افتهمتيييييي

هزيت راسي و دموعي نزلو بلا صوت ، دفعني بشمرت ايده :- يلااااااااا جوااااا

ركضت جوا، دخلت لغرفة الحجي ، لكيته كاعد و المرة الجبيرة كاعدة يمه ، حجت :- وين جنتي ؟

- طلعت اشمر الزبالة و شسمه ضربنييي

وبجيت

كامت من مكانها و جرت اهدومي من جتفي و كالت :- و اليشمر زباله بهالووووكت

باوعتلها ، ضربتني على راسي و هي تكلي :- نزلي راسج وكحة

بقيت مدنكة و ابجي ، حجه ابويه :- ليش هيج وياها سهام

:- وشتريد اداري خيانتك الي بعد كل هالسنين ، تريدني اعتني بالجبتها من ورا ظهري ؟

- البنية مالها شغل باللي بيني و بيج

- الها ونص ، هذه نتيجة خيانتك الي ، كل هالسنين و اني نايمة و رجلية بالشمسسسسس منييييير، مستغفلني و متزوح و اني يا غافل الك الله ، عندك بنية مستحقة زواج و اني ما ادري لعد شكد غشيمة اني و عايشة وياك كل هالسنين بوهم

- دا اكولج القصة قديمة و اني طلكت من زمان ، بس البنية تظل بنتي و امانتي عدكم

- تامن خيانتك يمي منير

- وتالي يا سهام ، مو انت و الوجع عليه

- لا تتحجج بمرضك منييييير ، انت معيشني بوهم كل عمري وياك ، بعد كل هالعمر اكتشف عندك بنت بعمر ال١٥ سنة ، شلون تريدني اسكت و ما كانو صاير شي شلوووووون

دفعت ايمان من كدامعا ، على ابوها و طلعت ، ظلت ايمان تبجي يم راس ابوها ، حجه هو :- منو الجابج ؟

- واحد

- شسمه ؟

- ما اعرف

تحجي و تبجي

- يحجي ريفي ؟

- اي

- هذا حاكم ، اني امنته عليج وخليت الوصايه عنده ، بلغي لا يتنازل بيها لأي احد.

- شلون احجي وياه

- روحي للصالة تلكين دفتر صغير (دليل الهاتف ) جيبي و تعاي

- رحت مثل ما وصاني جبت و اجيت ، طلع رقم المعمل و كال :- هذا الرقم تتصلين عليه باجر الصبح و تكولين اريد حاكم من يطلعلج تكليله يكول ابوي لا يتنازل بشي لأي احد بعد ما اموت ، و خلي يجي اريد اشوفه بأقرب وقت

- ماشي

ساعدته للحمام غسل و رجع لفراشة كوة يمشي، نومته بفراشة و اني نمت بالكاع .

للصبح اخذت التليفون لما الكل اختفى من الصالة ، وجبته للغرفة ، الحجي جان نايم ، دكيت الرقم الگلي عليه ، اتصلت ... رن

شوية و اجا صوت رجال :- الووو

- الووو

- منو انت

- اني بنت حجي منير اريد حاكم

- ها ، اي ، اسطه حااااااااااااااكم ، حااااااااكم

حاكم :- هاااااا شعدك

- يريدونك ع التليفون

تقرب : ياهو ؟

- بت صوتها ناعم تكول انا بت حجي منير

- ها ، اطيني

اخذت سماعة التليفون ، و جاوبت :- الووو

- الو اني ايمان بنت حجي منير

- هلا بيج يابه امري

-ابوية يكول ليتنازل لاحد ابد

صفنت :- شلون مشكلة هاي يا ربي ، جا انا شمورطني بينه و بين ولدة هم عدي عايلة و اخافن اعلى روحي ، ردت حجت :

- الووو

- وياج بوية وياج

- يكول خل يجي اريد اشوفه

- ان شاءالله يابه ، اليوم العصر انا عدكم .

- تمام ، باي

- باب بويه باي

شهالطلابة يحاكم وينك ووين الوصاية ، جا هسه انا شمورطني بالوسطة ، بيها عليها ، حكيم عليم بصايتك احنا.

مشيت ، و شفت غريب دش للمعمل :- ها ولك شجابك لبغداد

- هلا حاكم شلونك

- هلا يابه

سلمنا سلام ايد و خد :- شنو جاي شغل

- بغداد هي دياري

- صاير شي ؟

- كول شنو اللي ما صاير

- يا ستار ، احجي شكو

- سولفتله الصار كله ، صفن :- خايب سرحان انت حالك حالي ما تتوالم ويا عيشة السلف لو هسه تحط روحك بروحهم ... نكره العكل و سوالف العشاير و الطلايب و ما تطيب النا غير عيشة الحضر

- و انا صاح بيدي يا حاكم ، ابوي حاط بعكله اظل هناك وبعد لو تنكلب السما ع الكاع رده للسلف ما ارد ، خله لشيخته و لابنه المتدين و ابن الاصول ، انا واحد حضيري شرايد مني كوة هي لو مو كوة

- هدي اعصابك هدي و خلينا نمش ناكل النا الگيمة و نسولف برواح .

- ياله

مشوا و كعدوا بصف واحد حجي مفتح كشك يبيع بيه لفات بيض و كيمر و مخلمة وباكلة و لبلبي

حطوا كبالهم و كضوا استكانات الجاي وكعدوا يسولفون ، انجر الحديث و حجه حاكم :- ولك انا تورط بسالفة وصية حجي منير

- الا صدك شلون صار ؟

- على الله لجن ولده جنهم طامعين بحك البت

- هاي الوصاك اعليها ، اي موش رديت ليجاي اعليها

- اها ، صدك

- اي والله و هالرايدها تفض

- و هسه شراح تتصرف

- دايخ دوخة ما وراها جزية ، الا اكلك صدك سرحان

- كول ابو ستار

- خليني تخطبلك البت ، هم صغيرة و مثقفة و ترفة و حليوة و هم بت اخو الخاتون و كرابتك و انت زلمة يعرفونك و خلصني من هالسالفة .

شتكول ؟......

رواية كحل عرب الفصل الثالث عشر

( زواج حاكم )

چـنت اظنك

چـنت اظنك...

توگـــــــــف ابوجه الوكت ....

واتنشف الدمعه ابجفنها

وا چـنت اظنك ...

بالمحبه ..الفاگده اوحنت لابنهه

ثاري ...

ســــــچـينه خواصر !

گـــطع الدال ,سنهه

جاسي واجراحك ينزن ...

لو ردت ...تنشدني عنهه

مادريت !..

المايهزها الريح ...

تالي يخف وزنها ..!

او مادريت ..!

اگـــلوب ...

بشطوط العشك

تركس لذنهه

ااااااااخ ...

ياروحي البعد هينوب . مايعدل غصنهه

ورطتني ...

ابزيد واعبيد ...

اومثل فص ملح . بالماي ظنهه

طاحت اباخر ردك ...

وتبرت الخلان ...

منــــــــهه ..

هاي روحي ...

الماتمل منهم ...

وبعد باتعس عسنهه

(من روائع الشاعر الكبير عريان السيد خلف )

حاكم :- شتكول ؟

سرحان :- انا اخطب ؟ لا يابه ، اعرفها تعرفني

- جا شنهي رايدلك وحدة عرف

- لا لجن ما احسن وكت زواج ، انا بروحي حاير ، لا للسماوة ولا انا لبغداد ، اروح اخذ بت الناس و اني ما اعرف وين رايي

- البت صغيرة و تناسبك و هم

- لا حاكم لا .. ما ابالي عرس هسه

-عمرك راح يدش ال٢٧ سنة، جا ليمتها ناوي تظل هيج ؟

- الله كريم

- بحلك انا عدي ستار و هديوة و لو ما السجن مسطرهم فد سبعة

-هههههههههه الله يحفظهم الك ، خليها هسه، ياله انا اكومن ، اشوفنك بالليل .

- ان شاءالله ، هلا بيك .

ودعيته ، و كمت رديت للمعمل ، بعدني ارد اطلع، دش الشيخ مطر :- ها السلام عليكم

- اهلااااااااااا وعليكم السلام ، هلا بيك شي هلا بيك ، تفضل تفضل

- يا الله ، شلونكم يابة

- الحمد لله ، الأهل شلونهم غاد

- بخير الحمد لله ، الا ردت انشدنك اعلى سرحام هم اجاك ؟

- اي ذيج الساعة جان عدي ، و تريكنا انا ويا و شربنة استكان جاي ، عليش صاير شي ؟

- شنهي ما سولف الك ؟

- والله هو كال عيشة الريف ما طابتلي و ما اتوالم وياهم و من هالحجي ، شكل الولد متضايك

- هكو احد يتضايك من اهله

- بعده شاب و ماخذته العزة بروحه خله براحته

- جا انا شنهي حاط الورور (مسدس) اعلى زردومه ، غير اريدنه يوجب بمضيفي يعزب الوادم ، خوما يظل حضيري وراكس ابغداد .

- عاش ابغداد اكثر من عيشة الريف ، و اليعيش هنا تصعب اعلية العيشة غاد انا افهمنه ، لجن بعد انتم براحتكم ، بس انا اكولن لو ما تضغط اعليه زايد ، سرحان انفعالي و وكت اعصابه ما تعرف شيبدر منه.

- لزوم يحط عكلة براسه ويوزن الأمور ما يظل هيج ، اليوم انا هنا، عكبي شيصير هو و اخوه

- هو زناد ما يوده .

- اهو الما يود زناد موش زناد الما يوده .

-بعد ما ادي، الاعرفنه كلت لك بيه

- انا رايح لبيت الخاتون يو رد كله ابوك ناطرك غاد

- مايرد لهنا، هو يفر ويرد للبيت ، اخذ راحتك.

- ياله اودعناكم.

- هلا بيك

كام راح و انا طلعت وراه لبيت حجي منير ، دكيت الباب، فتح ابن الحجي "لؤي" شافني :- أهلا ابو ستار ، تفضل

- هلا بيك يابة ، الحجي كاعد ان شاءالله ؟

- ليش عندك شي وياه ؟

- انا جاي اعليه ، من عبن اتصل بيه و رادني

- شوكت اتصل

- الصبح

- خافنك غلطان الوالد ما يقوى على الوكفة شلون اتصل.

- جا شنهي اجذب عليك، غير اكلك اتصل بيه

- هااا ، اي فوت تفضل خل نحجي

- يااااااا الله

- محد موجود تفضل

دشيت كعدت ، جابولي شربت شربت، كلت : الله بالخير بوية

وبديت سالفتي ، رد

- الله بالخير

- تريد الصدك يو ابن عمه

- الصدك

- انا ما رايد الوصية ولا انا طلاب حك ولا احبن ادخل روحي بقضية غيري، لجن انا هم زلمة و ابن اصول و ما نكدر نكول لواحد اعلى فراش الموت " ما عده غير العافية" انا مالي غرض بيك الزلمة وكلني و اهو واثق بيه و صديجي ورفيجي و مديري من اسنين ، انا شنهو البيدي ؟

- كله اي ، بس تتعهد في حال لو صار شي تتنازل بالوصايا النا .

- جا لو صار شي ، تصير ميت وم..........قاطعني

- هاي خليها عليه اني احلها

- شلون تحلها ؟

- ابو ستار صير مكاني ، بت ما عاشت عدنا ولا ربت وما نعرف هي شنو ، من تالي تجي و تاخذ حالها حالنا وتاخذه للغريب

- زين زوج البت الواحد من ولد عمها

- وننطي مال ابونا لولد العمام

- اكلك خوية ، الله بالخير عليك ... جا هي هم بنيته و ان جنت عشت بخيره ، البت عاشت مبعده لا عرفت معنى ام ولا اب و انحرمت ، هم شذنبها هي ؟

- ذنب امها

- لا موش ذنب امها لا، جا هو العكل للزلمة يو للمرة ، و بكل الاحوال البت مالها لا بذنب ابوها ولا بذنب امها ، مكرودة

- مكرودة وماخذة حق حالها حالنا حتى مو ع الشرع

- هو كال انا انطيته حصة كامله تعويض الها خاطر تعيش بعده حياة كريمه من كونه لا ام ولا اب.

- من الاخير ابو استار فلوسنا ما تصير لغيرنا

- و انا عمي هم ما اكدر اخالف جلمة الوالد

- يعني تصف ضده

- انا ويا ابوك موش ضد احد

- ابو ستار بهيج حالة راح ادخل نفسك بمشاكل انت في غنى عنها

- اعتبر هاذ تهديد ؟

- لا اني اعتبرك بمثابة اخوي بس اللي يوكف ضدنا عدونا

- ابوك مو عدوك و انا صاف وياه ، وياريت تخليني التقي وياه.

- نايم هو هسه

- ياريت لو تكعده و تكله حاكم موجود

- الوالد مريض ما يكعد .

تنهدت :- لا حول ولا قوة الا بالله العلي العظيم ، اروحن و امري لله نشوف هالسالفة وين توصل .

كمت سلمت اعلية و طلعت للبيت .

انا من راحوا الخاتون و سرحان للسماوة ، خلوني بغرفة الحارس جويعد بلا ما مأجر غرفة و ادفع حكها، هم خوف من البوك لا يسطي حرامي و هم اخيرلي تتوفرلي جم فلس لعويلتي.

دشيت العصرية ، لكيت الشيخ كاعد ، هم حجيت وياه و سولفت اله كل السالفة ، كال :- كلشي ولا ادش بطلابة فلوس ، عند الفلوس تتغير النفوس اطلع منهة

- جا و الحجي ، هو هم صويحبي

- شلك بهالطلابة يحاكم ، المال عزيز بمعزة الولد ، مفكر بسهولة ينطون

- والله يا ابو سرحان انا هم حرت و ضاعت علومي و بعد ظلت يم ربك شلون يحلها .

ظلينا نسولف و هم سويتله جاي اعلى الهيتر و صبينا و شربنا ، ليغااادي و دش سرحان ، الشيخ جان يضحك و منطلق بسوالفه وياي، بس شاف ابنه عيونه چلبن بكصته ولنه يفز جنه ديج هراتي ويتلگه الولد

:- سرحااااااان

- هلا يابه

حجه وراد يدش، كضه من ايده :- من احجي وياك تووووووكف

ودفعه كدامه

- بس اريد افتهم شتريد مني

- ولك انااااااااااا ابوك من تحجي ويااااااااااي احترررررررم

-على عيني و على راسي و احب جدمك ، بس يابه و علي ما اطيكن عيشة السلف ، انا و مرتك مثل الزيت و الماي لو خبطنتنا منا لسنه ما نتوالم .

- تعوف ابوك لخاطر ما تريد فلان و علان

- انا ما عايفك ، انت العايفني و مصدكهم ، دوا الخاتون جاي يتغير و منطينها غير دواها ، و يفتون علي يمك بسوالف جذب و من اكلك ما رايح لجعدة الطرب اطكني و جني مذنب و اتحداك لو كربت كريم انت عرفت بيه رايح ... عليش؟

من كونها ما ماليه عكلك عليه

ما حاطه ابالك مثلي انا ، خلهم الك و خلك الهم و انا عوفني هنا ابغداد و خل الخاتون تجي لهنا

- من احجي كلمة تنفذ و بدون نقاش فاهم.

- اعذرني بوية ، جلمتك فوك راسي لجن رده للسلف ما الي .

حجاها و الشيخ جابه بجف و جره من ركبه وخلاه بوجه :- موش انت التفرض عليييييي سرحاااااان

حاكم :- ها ها كولو يا الله شمالكم صلو على محمد

:- هذا الجف الثالث اكله منك ظلم يا ابوي الما حسيت بيوم انت ابوي

بعد منه ، و الشيخ يصيح :- سرحااااااان ، ما ارضى عليك طووووووول عمري يا سرحاااااااان

ضل يغلط عليه ، و سرحان طلع

وين طلع محد يدري .

رحت ركض اجيبن ماي، ما رضى و دش جوا ، يكح بقوة، ظليت موجف بمچاني : جا انا احلن طلابتي يو ابتلي بلأخرة ؟

ظل الشيخ لليل ياله طلع شوي و رد بلا ما يحجي ويا احد ، تانى تانى و سرحان ما رد، ظل باله وين راح ؟

وبقى جدامي يا طالع يا داش .

(بيت الحجي )

لؤي :- ايمااااان ، ايييييييمان

طلعت ايمان بخوف ، كل جسمها يرجف من قوة صوته ، تفرك باديها و باوعتله ، جرها من اذنها :- انت الماخذة التليفون للوالد يخااااابر

- مو اني موووووو اني، اذاااااااااااني

حسيتها رادت تنكطع بيده ، صرخ و هو يدفعه للكاع :- و تجذبييييييين

نزع حزامه و تولاها ضرب ، و هي تصرخ بكل صوتها ، و رجع دنك عليها :- تحجيييييين لو لا بنت الكح***

وكفت كدامه مرت اخوه :- حرام عليكم هيج والله ميصير الطفله شذنبها

حجت و دفعها لؤي و هو يصيح :- سااااااااامر وخر مرتك عني لا والحك ادفنها هي وهاي

سامر :- خل يفتهم منها ، فوتي ما الج علاقة

- شلون ما النا علاقة ، احسبها بنتك ترضى احد هيج يربها بلا ذنب ، شيلها راح ينهيها شيلهااااااا

و ايمان تصرخ بالكاع و هو يض ب بيها ، و الحجي بصوت مريض من الغرفة يصيح :- لؤؤؤؤؤي حرام عليك يا لؤي

سدت الباب عليه امه ، و اجت دنكت عليها وكالتلها :- تمشين ويانا عدل نمشي عدل متمشين ، ع الجمر نمشيج افتهمتي ؟

ايمان :- والله اني معليه والله ، رجعوني لبيت بيبي

سامر :- تنازلي عن حقج و رجعي روحه بلا رده

لؤي :- شتتنازل انت الاااااخ ، ابوك كاتب وصاياها لحاكم و حاكم ما راضي يتنازل ، مسويلي بيها حلال و حك الله هالمهتلف العُربي .

سامر :- الحل شلون

لؤي :- الوالد كاتب وصيته اني راح اتخبل تالي عمرنا يجي الغريب يشاركنا بمعملنا و املاكنا.

الأم :- يعني لازم نجبر ابوكم يغير وصيته ؟

- و شلون ؟

باوعت للبنية، باوعولها همه و هزو روسهم ، دنك عليها لؤي و شالها ، ودخلها كدام ابوه ، كال الها :- اكعدي

كعدت و الوجه احمر و العيون دم و تشهك ، حجه الأب :- الله لا يرضى عليكم

- عوفنا من الله احنا وياه نتصافى و اختار ، يا بتك يا الوصية

- رجع راسه و غمض عيونه و هو يصح : اااااه ااااه

حجت مرت سامر ، هاي وهو منطيكم حقوقكم و هيج انكلبتو شحال لو حارمكم ؟

سامر كوم على مرتك الزمها من شعرها و طلع من الغرفة ، كام لؤي و هو يخابر على المحامي حتى يجي ، وايمان كاعدة بصفحة تبجي و تباوعهم.

قبل جية المحامي الحجي تخربط و أوكع .

ذوله تخبلوا ، شيل الوالد و انقلوه ع المستشفى ..

للليل و ما يعرفون اخبارة ، و ايمان كاعدة اطك سن بسن، و تتمنى لو ما جاية لهنا و ظالة على بيبيتها احسن الها .

لهناك بالليل بحدود الساعة ١٠ و فوك ، شافت التليفون البصالة محد يمه ، دك الرقم مال المعمل و اتصلت :- الووو

- الو منو

- اريد حاكم

- منو انت

- اني بت حجي منير

- التليفون هنا بالمعمل و اسطى حاكم حل من الظهر

- عمو فدوة اريده بساع الله عليك

- راح احولج اعلى بيت الختون ، اذا رد اكله عليج و اذا ما رد تعذريني ،

- اي

خابر على بيت الخاتون ، رد الشيخ متلهف و هو ناطر جيت سرحان ، من كاله التليفون الحاكم و رايدينه ، طلع و صاح حاكم ، و اجا

رد حاكم :- الو

- هلا ابو ستار، اكلك هاي بت حجي منير تبجي وتريدك بسرعة

- خير اللهم اجعله خير شصاير

- والله ما اعرف انت بعد افتهم منها

حجه ويا ايمان ، ذابحة روحها من البجي ، اول ما رد و هي كالتله :- عمو تعال الله عليك تعال

- ها بويه شمالج ؟

- حيكتلوني عمو الله عليك تعال

- ياهو الكتلج ؟

- لؤي و سامر ضربوني قوي بالحزام

- هاااه ، صدك تحجين

- بابا وكع وهسه هو بالمستشفى

- لاااا

الشيخ :- شنهي السالفة ؟

:-كوم شيخ كوم وياي

- هاااه

- البت بورطة ما ادري شمسوين بيها

- جا و ترورط روحك

- افا و احنا اولاد جلوب عمي تنخانا مرة و نخاف الورطة

- لا والله حشا ، امشنا ياله .

ركبوا سيارة الشيخ و طلعو ، هم قريبين بالاعظمية ، بيت الخاتون و اخوها ، بس ليغاد عنهم ، وكف بالباب ، دكو الباب ، اول ما حط ايده و دك فتحته أيمان و كأنو منتظرته

كضت بأيد حاكم :- عمو الله يخليك اخذني منا حيموتوني

- بس فهميني شصاير

- ضربوني

هي لابسه نص ردن و شوفته ايدها و اثار الحزام و تكض بيده و تتوسل ، راد يدك الباب خاطر يفهم و هاي كامت تبجي و تتوسل :- عمو لا الله عليك والله والله يذبحوني

الشيخ :- جا بويه شلون ننهبج ، احنا ولد عشاير هالسالفة ما تمش عدنا.

حاكم :- خلنا ناخذها اعلى بيت عمها جواد

الشيخ :- هاااه

- اي والله جا بعد شنسوي ، هالتشوف جالدينها

كاعد يحجون و طلعت المرة الام صاحت :- ايمان شعندج طالعة

الشيخ :- يابه السلام عليكم

- هلا و عليكم السلام ، فوتي

- انا عمج الشيخ مطر زوج الخاتون حسنية

- هااا هلا بيك عيوني ، الخاتون شلونها

- بخير تحت رحمته ، لجن جايين اعلى هالبت مسيجينة عليش هيج بويه ، جا هي الفلوس تنفع يا بويه

- لا يا عيني اي فلوس بس اخوتها لو مشايفين عليها شي ميضربوها ، البنية متنضرب بلا سبب

حاكم :- على بختج خوية البت ما صارلها عدكم جم يوم منين شفتو اعليها شي ، لا تظلمين بخت البت

- اخوانها اعرف بمصلحتها

حاكم :- يا مصلحة هاي و انتم مزوركينه تحجين صدك انت يو تشاقين.

:- احنا نعرف نحل مشاكلنا لتخاف عليهم اخوة بيناتهم.

الشيخ :- والله بويه احنا ناس موش طلابة شر و نريد نطب بالمعروف ، لجن الوجوه مكلبة ، جا هي زلم مامش بالبيت خاطر نحجي وياها يو نظل اعلى الباب نتعاتب

حاكم :- خلنا ناخذ البت عمي

- جا بعدنا بالبياب و تهمتها عدها شي يو اخذنا اطلعنا معرسين اعليها و تتهمنا و احنا ناس النا سمعتنا .

حجت :- ايمان فوتي جوا

هاي واكفة وره و تجر بخشمها من البجي ، بس حجت كضت بقميص حاكم ، حجه :- عمي تتهمنا شنهي تايهة ناخذها لبست عمها و هو يتحمل مسؤليتها

الشيخ :- اي هيح كول ناخذها لبيت عمها من كونها مرة و نختنا و احنا عدنا عيب اعلى الزلمة التنخاه مرة و يردها ، ياله بويه امشي ناخذج لعمج ، جا لو اخوتج هنا كلنالهم لجن البيت مامش بيه فحل ، ان شاءالله يصبح الصبح و نمش لبوج نتحمدله بالسلامة.

صعدت البنية وياهم و طلعت و الأم واكفة و تكولهم :- هذا التصرف ما مقبول ، وراح اخابر الامن.

تجاهلوها و طلعوا، لما وصلو لبيت عمها ، يدكون يدكون .. مامش احد

الشيخ :- جا ذول وينهم

- خافنه مسافر والاهل عد اهلهم من كون شغلهم تجارة و ايامهم سفر

- يهالطلابة هاي ، جا انا وين ما امش تتلكاني هالطلايب

- من كونك اهل لحلها يشيخ

- و انت الصادك ، امشنا

صعدوا السيارة ، حجه :- جا هسه وين نروح

- اخو الخاتون الزغير تندله

- ذاك موش طلع لبريطانيا ؟

- اي جني اتضكر الخاتون كالتلي طلع

- جا هسه وين نروح

الشيخ :- نمش لنقطة الشرطة الجريبة اعلى بيت الخاتون ، نخبرهم و نطيهم علم احنا اخذنا البت بعد ما نختنا من كونها مضروبه ، و ناخذها لبيت عمتها لا تكول البيت النا ، اسمها جويعد ابيت عمتها ليما يطلع الصبح و نشوف وين ننطي وجوهنا وربك يدبرها

ياله ، مشينا و انا و الشيخ نعرف الشرطة و الضابط البهاي النقطة ، خاصة الشيخ يعرفونه و يحترمونه، مشى عليهم و كال الهم :- هااااا حيهم والله

كاموله الحرس الباب :- اهلا وسهلا

-جا النقيب وينه

- جوا

صاح النقيب و طلع ، سلم ع الشيخ و كاله ، هاي البت هيج و هيج قصتها وولي امرها بالمستشفى و احنا يا بويه احتارينا حيرة بأمرها ، و نخاف اعليها كبل لا نخاف اعلى ارواحنا من الجلمة من كونها بت و البت مثل الكماشة البيضة لو طاحت اعلية نكطت سواد صخمتها .

احنا راح ناخذ البت لبيت عمتها و اريدنك تروح وياي شهود باجر عكبة تهمونا بيها ، لو يتهمونها بينا انت اريدنك شاهد ، احنا نخلها بالبيت و نكعد برا ليما يطر الصبح وربك يحلها يا بوية

- هاي هي شيخ ، اللي تأمر بيه على راسي

- سالم راسك بوية ، الله يحفظكم ولدنا النشامة

اخذو البنية وراحو لبيت الخاتون ، و حجه الشيخ :- دشي بوية و سركي الباب عدل اعليج و احنا هنا جاعدين هنا بالحجرة

فاتت البنية للبيت ، و وكفوا يحجون ويا الضابط و يفهمونا ، كون البنت قاصر تشكل مشكلة ، لما راد.يروح الضبط ، الشيخ ندس حاكم و كاله :- خله الباب مفتوح لا تصكه شعدنا ذهب يو الماز شو هي الخاتون و غاد و البت و مسرگة الباب، هد هاي الباب خلها مفتوحة

عافوها وراح الضابط و كعد حاكم و الشيخ بغرفة الحارس، نزع عكاله الشيخ و هو يحجي :-، كل هالطلايب و الروحة و الردة و سرحان ما هو ، وين اختفى هالولد هاذ بالله كلي

- انا كلت الك يا شيخ ، سرحان انفعالي و عصبيته تغلبه ، انطر ليما يهدى، يرد و يحب راسك

- والله تعبني عالولد هاذ

- واحنا هم تعبناك اليوم بهالقضية

- والله يا حاكم مية طلابة ببيوت الوادم تحلها ولا طلابة ابيتك ، تحير شلون تحلها.

- جا هي هم مصيبة نحل طلايب الوادم و اطلابتنا تصعب اعلينا .

- اي والله جا شنسوي هاذ امر ربك بعد .

عدل القريوله (السرير ) للشيخ و هو جر بطانية على الكرويته و تمدد ، للصبح سامر جاب الشرطة ، و اندكت الباب

طلع الشيخ :- ها بويه ؟

- حاكم خضير موجود

- هاذ الزلمة نايم شتردون منه

- عليه مذكرة قبض بقضية اختطاف المدعوة ايمان منير مساء يوم امس .

- اوجب بويه اوجب ، شنهي قبض ، البت مجتوله و خابرت اعلينا و هاذ بيت عمها و احنا جبناها لبيت عمها وكعدنا اعليها حراس، جا هاي جزات المعروف ؟

الشرطة رفضت الكلام و قررت تاخذ حاكم و تمشي بالاجراءات ، بس الشيخ وكف وكاله :- احنا موس حرامية خاطر ادوس اعلى عتبة بابي ، احنا ناس عشاير و كاعد اتفاهم وياك بالعكل

- هذا القانون حجي و يمشي على الكل

- قانونك حط اعلى صفحة احنا موش ناهبين خاطر اطبقه اعلينه ، غصبا اعليك تنطر ليما يجي الضابط ساعته تاخذ وليدنا

- اني ملزم بتنفيذ القانون

- بيك زود دوس عتبت داري ، و عود خبرلي عمامك عدي جعدة وياهم

- حجي هذا قانون ما بيه عمام اني رجال ملزم بتنفيذ.... قاطعه

- ابنه اله سمعته و صيته بالمنطقة بوووووويه شيكولون اعليه يو طبقت قانونك ،عليش خذوه ناهب مرة ؟ جا هي الناس ما تعول تلكف هالجلمة الشينة ، شنهي بوية فوك زينيته .

حط الشيخ السكملي وكعد بالباب

وكف الشرطي محتار ، هذا شيخ عشاير شيخلصه من الطك و الفشك لو تورط وياه

اجا الضابط الخفر بالنقطة و سلم و ووكف وحجه ويا الشرطي و الشيخ و حاكم ، شوية و اجا سامر جنه جان واكف اعلى كتر يعاين

الشيخ صاح البنية وهاي شكو عدها دموع ذبتهن و تشهك من كل كلبها تخاف تروح ويا سامر و تكول :- يذبحوني

كام سامر و كال :- اختنا غلطت سيدي و احنا اخوتنا صح قسينا عليها بس من غيرتنا و خوفنا عليها

حجه حاكم :- خافو ربكم خايبين الجلمة ذمة والعباس اطك ما تخيب ، يومين و تموت شتكل لله تهمت اختي لجل جم فلس شهالنفس العدك ، هد البت و لا تطعن بشرفها و ذاك ابوك بالمستشفى وخله يتنازل بحصتها الكم، ولكم شهالناس هاي بلوة وعلي

حجه الضابط :- ماكو هيج اخ يتهم اخته ، الغريب يدافعلها و انت تتهمها ما تستحي على روحك انت شنو من بشر انتم

طال الضابط راد يضربه وكفو بيناتهم وشحتوه

باوعو اثار الضرب واضح على وجهه و جسمها ، وهي تشهك و تتوسل بيهم و كاضة بحاكم من كون ابوها وصاها بيه .

حجه الشيخ : وعلي ابن ابي طالب بويه جويعدين الليل كله نواطير هنا زعم لا وصلنا البيت و لا دشينا خاطر نحفظ البت تالي هيج نتجازة ؟

الشرطي اعتذر من الشيخ و الضابط اتكفل القضية بس بقت البنية ، صعب تظل بالبيت وما بيه احد وزلم غربة موجودين .

قررو يرجعوها لبيت خوالها ، دار الها حاكم و كاللها :- نرجعج لبيت خوالج .

ما حجت بس تبجي ، كال الها حضري غريضاتج خاطر ناخذج ياله ، دشت و هي تشهك و هم يعاينون وراها ، اندار الشيخ و حجه

:- خايب حاكم عليش ما تاخذها و تفضها

- دخيل بختك شيخ ، البت بكد هديوة حتى ما تطيبلي نفس بيها

- جا هو منو الكايلك عرس اعليها لجن خلنا نحل الموضوع .، البت هاجة من اجداده نردها ليهم ؟ وابوها حاط وصايتها عدك ، اعقد اعليها جدام الوادم هنا و خلنا ناخذها غاد خاطر ما يكولون نهبوها يو يطكونه بجلمة ، و خلها بقصري غاد يم عمتها منا ليما الله يحلها فك العقد و خلها لحالها .

- هاه

- اي والله جا بعد شنسوي .

خابروا اعلى المعمل نشدو اعلى الحجي بالمستشفى يو بالبيت ، كايلين الهم ، رجعوه بالليل للبيت و هو هسه هناك

الشيخ مطر اخذ ازلام يعرفهم هو وحاكم من المنطقة و اخذوا شيخ وراحوا لبيت الحجي و البنية وياهم ، اول شي ما كالولهم جايين خطابة ، عود كأنما مرجعين البنية لهلها .

وكعدوا ويا اخوتها و طلبوا ابوها و فتح وياه الموضوع الشيخ و كاله : انت امنت وصايتها عد حاكم و هالحمل ثكيل و انا جاي اخطبها لحاكم

قاطعهم اخوها لؤي و كاله :- لا اعذرنا اختنا ما ننطيها محافظات

حجه الشيخ :- افا جا تحجي و ابوك موجود

حجه الوالد.:- حاكم و نعم الرجال و اني امنت بتي يمه، و لو صارت عده اغمض عيني و اني مأمن .

حجوا الزلم و اتفقوا ويا ابوها ، بس جان مريض حيل ، و عقدوا لحاكم على البنية ، و قرروا ياخذوها غاد يم عمتها.

الشيخ راد بس يفضها ووياخذها هنا ، و كال الحاكم خله الموضوع بيناتنا ، انا لو خذتها غاد عد عمتها افسخ عقدها منك و اخذها لسرحان ، البت خوش بت.

حاكم ما حجه ، و كال هاهيه ، بس صعبت بداخله ، يروح يفسخ العقد و ينطيها على الرغم هو الطلب من سرحان يتزوجها.

اخذوا البنية و طلعوا البغداد ، وسرحان ما هو .

اخذوا البنية ، هي ساكته و هدت من البجي، اخذوها و مشو ، تقربت ايمان من حاكم و هي تسأله :- وين راح نروح

- راح نوديج لعمتج الخاتون غاد بالديرة

- بعيدة

- مو كلش بس حلوة غاد راح تحبينها ، بساتين وجو طيب وبتي هديوه غاد تتعرفين اعليها و جمارة .

عاين وراه الشيخ ، لكا حاكم يمشي و مدنك يحجي وياها و يحجيلها عن الديرة غاد ، ضحك .

ركبوا السيارة و توجهوا للسماوة ، وصل غاد ، نزلو اباب القصر ، كاله :- شيخ انا اروحن للبيت بعد

ايمان : و اني ؟

الشيخ :- شلج غرض بيه بويه بعدنا تونا عقدنا و ردتي رجيلج

.ضحك حاكم :- لا شيخ حسبة بتي

- لا تكول هيج ، شوف هواها لون هوتك ، الشرع حلل اربع وابوها موصيك بيها وبعد هاي امانة .

- الله كريم ، يلا بويه دشي ويا الشيخ ، عمتج غاد شوفيها و انا اروحن لعويلتي .

ظلت تدخل و عينها على حاكم لما راح ،

دخل الشيخ و البنية وياها ، صاح :- يا خااااااتون ، ابشري بت اخوج اجتج

هي مغمضة و كاعدة برا ، حجت :- بنت اخويه !

- اي بويه روحي سلمي اعلى عمتج

ملوك :- ها الله يساعدك

- هلا بويه

- شنهي شسالفة هالبت

- سالفتها طويلة ، لجن كلولي بسرحان ، ما رد لهنا

- لا ، جا شنهي ما لكيته غاد

- تحاجينا انا وياه و طلع مغضب ما رد

ملوك :- هده يهيد وحدة و يرد

تقربت ايمان سلمت على الخاتون ومحد تعرف الثانية ، ووكفت مستغربة الجو بعد اكثر مناك، ذاك بيت بغدادي و متعودة عليه ، هنا الجو كله يختلف ، بيت جبير و خدم و طراز عربي .

التفت الشيخ و كال لكواغد - ام ستار حويكم رد ، اخذي البت وردي شوفي ابوكم

كواغد و هدية فرحن من سمعن بحاكم هنا ، لبسن عبيهن وراحن و الضحكة شاكة وجوهن بفرحتهن بجيته ، وصلن و لگنه كاض جمارة و يشمر بيها للهوى وامه واكفه فرحانه بيه ، هديوة ركضت لحضنه و هو يحبحب

تكربت كواغد ، حب راسها ، ضحكت و هي تكله :- جا اليوم جنك مرتاح عبن وجيهك يضحك

- يا مرتاح و علي التعب هاد حيلي، ربج ستر اليوم و طلعت منها جان رحت بيها بالعباس

- عليش

- غير الشرطة رادت تاخذني ، كلت بوية خست بالسجن يحاكم وراح ترد ليه

- ياااااع ، شلون

- لوما الشيخ ربج جابه امس ، جا انا الله يعلم بحالي

- عليش

- شفتي البت الجابها الشيخ

- اي هاي البت المتيريسه الحمرة ؟

- اي هي

- رادت تجيني من وراها مصيبة لجن انحلت الحمد لله

- شلون

- عقدت عليها

- شني

- عقدت اعليها عقد شيخ

- عرررررررررررررررررسيت ؟.

- خايبة شمالج ياااااااع

ام حاكم :- يا صلاوات عرست يمه

- خايبين مو هيج

كواغد :- يماااااااااااااااااااي ، ءهلاااااااا ءهلااااااا يهالوادم ءاهلاااااااااا ، عرس علي

يااااااااع تاخذ علي حوييييكم

- خايب يواشج خلني افهمج

هدية :- لاااااا بويه لااااااا

وبجت

كواغد :- يماااااااااااي عرس زلممممممه يمه ، اليوم انبش خضير اليوم

- اهااااه لا تشتمين ابوي شمالج

- عوينة ابييييك لابو ال ثجيييل لابو ال جلووووووب لابو البزركم لابو الجابكم لابو اليوم الشفتكم بيه ، انا تاخذ اعلييييية حويكم

- انت شلون تشتميني ، و تشتمييييين جلوب استحي اعلى روحج

- يممممممممماااااه يممممه اخذ علي الزلمة يمه

- خايبة حسج شهرتينا شمااااالج انت

- انا ما اظلن بعد هنا ، و علي ما اظلن ، يا شمخيييييي يا بويه .

- ولج تعاي جاي شهرتينا

- ميل عنيييييي

- ولج صووووووووتج

صرخ و دفعها ليغاد ، انضربت حيل و هي صاح :- اطكنيييييييييي ماخذ علي و اطكني

الربد ( الكرك ) اعلى كترها ، هو هم عليها خاطر يصم حلكها ، و هي شيلي الربد و نومي براسه

وهو صرخ بعلو حسه ، عاينت اعليه و لن الدم ينز ويسيل اعلى كصته : يااااااااااع

راد يكضني ، و انا كضيت عبيتي و شيله ابو الزين

واركض ، لاكني الحبايب و انا جابليتهن :- خايبات تعالن ليه ديييييييه

- ها ام الحبايب دية شمالج

- اخذ علي الزلمة اخذ علييييي

- ياااااع حويكم سوااااا

- وخذها بكد بزررررررره دية ، ضاع تعبي و رجوة سنينييييي ديييييه

- بهداي دية بهداي مت عيني عليج

التمن عليها النساوين و زتنها لبيت ابوها و دشن وياها ، و صاحت من باب البيت : وينكمممممممم يهلييييييي ، عالو علي وينكممممممممم

طلعت امها و نسوان اخوتها و الفروخ كلها و اخوتها ، يصيحون هاااا من شافو النسوةن وياها وكفوا برا

وكفت هي ولطمت حدادي حييييل و كال الهن :- ايدجن ويااااااي

نشمية :- شمالج يمه ياهو وياج

و لطمت .. احو احو

زلمتج راح يالي بي تزمطين

زلمتج راح يالي بي تزمطين

نوخذ منج غفل بخت النساوين

وزلمتج راح يالي بيه تزمطين

كواغد راح منج حاكم الزين

زلمتج راح يالي بيه تزمطين

يعين ابجي بهظم حد ماتوشلين

وزلمتج راح .... احو احو احو

كابلتها وحده وهي تردها بلطمة :-

وياخذ زغيونه ....

وياخذ الزغيونه خسر المعدله وياخذ زغيرونه

احو احو احو

رواية كحل عرب الفصل الرابع عشر

( الخطة )

يا تل الورد . . تل آخر السباح

حته اطفه . . من اشوف ارويحتي انتلت

كلت انجفه الماي . .

وذبل عود الياس

والوادم نست

وبغيرنه اتسلت

وأول ما شفت طولك نسيت الصوت

وروحي بلاسبب بجفوفك افتلت

يا كمرة حياتي البعد ما هلت . .

يا انت . . وكفاني اتوهدنت وياك

تحسبني . . وحسبتي وياك ما فلت

كلمن عرف وشره . . وشال منها الشال

وتعده العمر والوادم اندلت

هسه الراح راح . . وبين ايديك الروح

بس ذمه ابركبتك يوم لو سلت !!

(عريان السيد خلف )

نشمية :- يااااااااع حويكم عرررررس ؟

كواغد:- ولج يمه عينيني بعد ما بياش حيل واوكف يمه، اخذ علي يمممممممه .

جبار :- خايبة بهية دشي النسوان للحجرة ، خلنا ندش داخل خاطر نعرف شمالها كاغد.

كواغد مشت و امها و النسوان يكودنها للحجرة ، وهي تون ، كعدت تلطم على رجليها :- شمالني وياخذ علي ، قصريييييت ، اعتاز وما وكفتله ،شنهي قصوري اطووووني

- يمه بس فهمينا ، يمتى اخذ ياهي الاخذها ، اخوتج برا يريدون يفهمون .

- يمه اخذها بكد بزرة ، بت متروسه و حمرة ، بحل بزريييييييييي يمممممه .

حاولو يفهمون منها شي ما كالتلهم غير اخذ علي، طلعت امها و حجت لصلاح و جبار ، حجه جبار :- انا رايح لبيت حاكم و افهم منه شنهي السالفة و اردن.

كض الدرب و طره اعلى بيت حاكم.

وصل غاد ، بعده ما داش البيت ، سمع ام حاكم تحجي :- استهترت كلش هاي، عبنك ما تردها خذ عليها و خلها عوينة ابيها .

وحاكم يداوي براسه، و ستار و هدية واكفين اعلى كتر ما يعرفون شيسوون، و جمارة كاعدة، صاح جبار :- ابو ستاااااار

كام حاكم و كال لأمه :- بسج ، دشي داخل

فتح الباب ، و حجه من وره خشمه :- هلا

- جا شو انت ابو الراهي الدور، فوك ما ماخذ اعلى خيتي تسلم علي من طرف خشمك.

- اخيتك ما مرباية يا جبار ، ووالله ثم والله ، يو ما الجهال ، هسه اطلكها و انعل ساسها .

- احترررررم نفسك شنهي ما مرباية

- ايييييي ما مرباية من عبن بعدني ما مكمل سالفتي ، ناحت و صاحت و شهرتنا و طكتني و شردت ، اكو مرة اطك زلمتها ؟ بس البلايا اصل.

- ام ستار ما تسويها يحاكم

- الا سوتها جبااااااار ، خلني كاض روحي عنكم و اكول رفيجي و اهلي ولا تخليني اطلع عن طوري .

ظل جبار صافن ما يعرف شيحجي و يتسائل ( معقولة كواغد اسويها و اطك زلمتها ؟)

دش حاكم و صاح اعلى ستار ، يضيف خاله ، تبعه جبار :- وين رايح ، انا جاي افتهم منك شصاير ووصلكم لهالحال ، كواغد تكول اخذ علي ، صدك هالحجي .

- اخذ اثنين و عشرة محد اله حجاية علي ولا ارضى لأحد يحاسبني

- خايب شمالك ، احاسبك شنهي جاي اكلك ، رايد افتهم منك.

حجت ام حاكم :- اختك طلعتها من ماعونها عيب نسكت و نكول ابو صلاح خوش زلمة ، بس لهنا و بسكم بعد ما نتحملها .

جبار :- شنهي السوته يم حاكم و ما تتحملينها ، كضت عمرها شايلتكم فوك راسها ، و ان غلطت و ضربته احنا ما نرضالها اكيد و نحاسبها لجن لا تحجون ويانا هيج ، تراه ما نرضاها.

وكف ستار و كاله :- خالو امشنا ، ابوي و حبوبتين معصبين هالساعة ، خلها تهدا الامور ، و هي تتوضح من كيفها.

عاين علي ، و طلع .

غسل و كعد حاكم ، و كعدت كباله امه ، و يمه هدية ، و سولف الها السالفة كلها بما انزلت ، و كام لفراشه و نام.

اجا ستار ، سولفتله الصار، و ستار حجه لجده كلشي .

شمخي :- يعني ما ماخذها مرة اله، بس فتره و يهدها ؟

ستار :- هيج كال

كواغد :- شمالك بوية هي من تحله بعينه يهدها بعد ، و علي ما يهدها ، بس يا حسافة بعد كل هالعمر اسيس و تجي وحدة بكد زري و تاخذ زلمتي .

تحجي و تمسح بدموعها من عيونها .

جبار :- خوية انت هم ما مقصرة ، الا اكو مرة اطك زلمتها، شنهي تسودنتي ؟

- ساعة عصبية و فلتت ايدي جا شنهي ابتليت

صلاح :- خوية الله بالخير عليج

دارت وجهه ، حجه :- احنا من زمان نعرف حاكم يعرس ما يظل ، و انت وحدة من الناس حاطه هالامر ابالج وجنت متأكدة ماخذ وحدة ابغداد صح يو لا .

- جا و شنهي تريدني ارضى .

- خوية جا شتسوين ، واحد يحجي حك الله ، انا ما رايد اكدر خاطرج لجن عده هالوحيد هاذ ، ما يريدله اخو ، شنهي جويعد على اثنين بنات بولد واحد،حك يو مو حك ، بويه احجي .

شمخي :- والله يا بويه حكه ، لجن كاغد شبيدها هذا امر ربك

جبار :- بوية حاكم خوش زلمه ورجال محشمنا ، الا اعلى سالفة كاغد هاي و طكتها ينسكت عنها ، و سكت لخاطر شيباتك ، و ليهسه الزلمه ما غلطان ، بت انجبر بيها موش راغبها ، لو ما يعز اختنا جا من زماااان عرس و هو صارله سنين و دهور ابغداد ، يجي لعويلته هالجم يوم يشوفهم و يرد .

جا لو ما يودها ما يكول اخذلي وحدة و احطها ابغداد ابدال ما ظال يتحسر اللكمة و الهدمة .

كواغد :- شنهي انتم اهلي يو هله ، شو صافين وياه

صلاح :- خوية احنا موش وياه ، لجن الغلطان هسه انت موش هو ، ما النا عين نحط وجوهنا بوجهه بعد العملة السويتيه ، و حتى لو راد يعرس ، ما النا حك اعليه

اجانا و كال ارد اعرس رايدلي اخو لستار

شنهي نكدر نكول لا ؟ .

نشمية :- مو هيج ويا اختك يمه ، جا هي بيدها وما تجيبلها وليد لاخ غير ربك وحكمته .

- انا ما رايد اقهرها لجن انا ماريدنها تهجم بيتها، هي مرة فاهمة و عاكله ونريدها تلم المشكلة لخاطر هالفريخات هاي.

كواغد :- ردة ما اردن بعد

جبار :- عوفوها ترتاح ، خلها اداور عكلها و تراجع فكرها.

عافوها و هي ظلت بوحيدها تون.

( القصر )

زناد:- بويه الفرس مالت سرحان ما هو

- جا وين راح

- ما نعرف ، الزلمة يكول من الصبح و انا ادور اعليه

- شنهي معكول سرحان اجا ليجاي ؟

زناد :- والله يا بويه ، هو صح اخوي و اعزنه ، لجن طبايعه مفشلتنا ، ما جنه ابن شيخ ، يا مرافك خنجر هالسرسري ، يا يضرب جلمتك عرض الحايط و ما يكول ابوي واوكف وياه و ابيض وجهه جدام العشاير ، حشاك من الغلط بويه لجن من خليته ابغداد و ليجاي سرحان تبرى من هالديرة .

الشيخ :- اليعيش بغداد صعب اعليه يرضى بعيشته هنا يبويه لجن انا هاذ الولد دوهني حيل علعلني

- والله يا بويه ، الله يساعدك اعليه .

ملوك :- ها الله يساعدكم

- هلا

- ابو زناد جا هاي البت شنهي ضلتها ، من كون حاكم عاقد اعليها ما تروح ليه

- البت صغيرة و احنا سوينا العقد خاطر بس نصم حلوك ، خلها يم عمتها .

- و حاكم رايدها يو لا ؟

- ما اعرف ، الرادها و رضت بيها نزفها ليها و الما رضت ، تظل هنا الا انا هدوني من سالفة البت ، سرحان وينه ؟

.....

ام حاكم :- جا انت يمه راح تخلي البت ابيت الشيخ يو تجيبها

- يمه من جيت و ليهسه يا البت يا طلابة البت ، البنية بحل بتي شاخذها و شجيبها، عوفوني منها رحمة لوالديكم ، صرعتو راسي.

زهك بوجه امه، و هدية واكفة :- جدة يعني ابوي ما يريد هاي

- مالج غرض انت .

عافوني و مشوا، ظليت واكفة بمجاني ، مدري انقهر اعلى امي يو على وضعنا يو على سرحان الخاتون ما تكف و هي تنشد عنه .

رحت للحجرة ، فتحت البقجة و كعدت اعاينلها ، معكول بعد ما يرد للديرة ؟ .. لا يمكن فترة ويرد.

ظليت الهي نفسي بالتفكير بيه ، اصد عنه و اكولن ما افكر ، بس ما عدي شي افكر بيه غيره ، مدري شجاه و لزك براسي .

للصبح ردت اروحن للقصر ، كعد ابوي كال انا اوصلج

- جا بويه امي ما راح ترد

- لا ،

- عليش بويه والله امي مسيجينة ما تكصد اطكك

- اششش لا تحجين هالحجي بويه مال كبار مالج غرض ،دشي داخل و انطري امج ليما تجي .

دنجيت وردت ادش كال :- اندهيلي ايمان

- ياهي ايمان ؟

- البت اجت امس

ضاك صدري من طلبها، ضجت رحت لكيتها كاعدة يم الخاتون و صافنه، كتلها :- ابوي يريدج

ظلت تعاين بوجهي

- شمالج مو اكلج ابوي يريدج

- منو ابوج

- الجابج امس ، كوومي

كامت واجت وياي ، طلعنا ابوي واكف ، اعاينلها تبسمت من شافت ابوي، بس ابوي ما ضحك ، كال الها :- ها شلونج يابه

- زينه

هدية :- بويه انا اروحن

حاكم : هاي بتي هدية يو احتاجيتي شي كليلها و هي ادير بالها عليج

عاينلي : ماشي بويه ؟

هدية : هزيت راسي

و دشيت

راد يروح وكال :- ياله فوتي انا اروحن

ايمان :- ليش اني راح ابقى هنا

- درت ليها ، و هدوة دخلت : شنهي متضايكة

- لا بس ما اعرفهم

- تتعودين اعليهم

- و انت وين عايش ؟

- انا هنا بالديرة

- وين ؟

ضحكت :- رايدة شي بويه

- سكتت

- متضايكة

هزت راسها ، حطي اعلى راسج شي ، و امشي وياي خل اراويج بستان شيخ

ضحكت ، و دخلت ، و هو ضحك و هز راسه، شوية و رجعت كالتله :- منين اخلي ؟

ضحك و كال الها :- ها هذا اشماغي ، حطي اعلى راسج ، و اطلعي .

اخذت منه الشماغ و لبستها و يعدل بيه ، وكال الها : امشي ياله .

مشت و هي فرحانه و عيونها شاهكة اعلى البستان ، و هو يمشي كدامها ، شافت شجرة ، كضته و كالتله :- باوع هاي برتقال هوااااااي .

ضحك و هو يكللها :- لا هاذ مو برتقال

- لعد شنو ؟

مد وكطع الها وحدة و كال الها :- نومي حامض او نارنج تسمونه

- هاا

كضتها و مشت ، وحجت :- يعني اني راح اعيش هنا بعد ؟

- عليش تكولين هيج ، شنهي ما مرتاحة

- لا بس انت ليش مو هنا تعيش ويانا

- انا عدي بيت و مرة و جهال

حجت بأستغراب- انت متزوج ؟

- جا منين مخلف ؟

- مرتك حبابه لو مثل مرت بابا

- شلون يعني مثل مرت بابا ؟

- يعني عصبية و تضرب

مد ايده على راسه و فرك الجرح مال راسه : اااييي لا لا ، هي ما تضرب ، حبابة

- خل اعيش ابيتكم لعد

ضحك :- شوفي يابه انا ما عدي مانع من عين باجر احطج بالبيت ، بس انا ما رايد اظلمج

- ليش

ضحك بصوت عالي : انت رايده تظلين وياي

- احنه غير تزوجنه ؟

- بس انا بكد ابوج

- لا بابا جبير ،انت بكد لؤي ابن بابا

ضحك ، عاين بعينها ، تقرب من يمها و حجه : يعني تريدين تروحين وياي ؟

- سكتت

عدل الشماغ على راسها و مشى، مشت وراها ، حجه :- لا انا رايد كم يوم تظلين هنا ترتاحين و ارجعج لخوالج

- لاااااا

ضحك بصوت عالي :- جذب ما ارجعج

ضحكت و هي تكله :- انت حباب

و ادنت يمه ، ضحك و ظل يعاين الها ، حس بشعور غريب و هي وياه ، ما جن غريبة عنه ، جن شي هو مسؤل عنه و يفرح بفرحتها .

تنهد و كعدوا ، بالبستان تسولف اله شلون خالها بطلها و شلون امها عافتها و هو يستمع الها ،سألها :- من كون صارلج سنوات ابيت خوالج و متأذية جا عليش ما اتصلتي اعلى المعمل و خبرتينا

- ما عدهم تليفون و ما اعرف الرقم

- اذا امج طلبتج و كالتلج تعاي عيشي عدي ورجلها رضى تظلين عدة ، ترجعين.

- ليش انت ما تريدني ؟

- لا مو هيج بس سؤال

- ما اريد اعيش وياهم ، اني اعرف انت ما تريدني بس والله بس ارجع يضربوني .

دمعن عيونها بساع ، و دارت وجهه

هو فز :- لا وعلي يابه مو هيج ، امونه ، شو عايني علي

باوعتله العيون حمر ، ضحك و هو يسحبها لحضنه :- يولون و الله ما اخليج ترجعين ، بس كفي ادموعج ما يستوجب البجي ، افا هاي و انا اكول السباعية

- ظلت تبجي بصدره بالزايد

ظل يمسح اعلى ظهرها و هو يكوله :- بسج بسج شو ، كومي خل اخذج اراويج امي شرايج ياله

شالت راسها :- اخاف ما تقبل

- لا لا تقبل ، كومي يلا بس لا تبجين ، بعد ابوج ما احبن البجي انا .

كواغد :- هااا

هدية :- هلا يمه ظل بالي اعليج والله

- هلا بيج بنيتي، شلونكم امس ؟

- ظلينا بالضيم خلافج والله

- مت عيني اعليكم يمه

نصت حسها :- و ابوج ؟

-شماله ؟

- شكال اعلى هاي البت ؟

- انا سمعيته يكل لحبوبتي بكد بزري ما اريدنها و بلوني بلوة بيها

- صكد ؟

جا خل اروحن احبن راسه و اتعذر منه

رادت تمشي ، ردت .. اكلج جا هاي المتيريسه وينها ؟

- اااا

- شمالج ما تحجين

- يمه ابوي ما يريدها ، بس هي لازكة ببوي لزكة ، وكفت بالشارع تبجي ، واخذها للبستان خاطر تسكت ، جنها مسمومة

- يااااااع ، و هسه هو وياها

- ما ادري بس صارلها ساعة من طلعت و لهسه ما ردت

كضت اعبيتها و كالت الصبيحة : سدي مجاني

توزرت بعباتها و شدتها اعلى بطنها و كفت ردنها و طلعت من القصر ، و راحت اعلى البستان ، توها تريد ادش ، و شافت رجلها يمشي و هاي تمشي وياها و مدنكه و تضحك

وهي وكفت بنص الدرب و صاحت :- يماااااااااااااااااااي

دار وجه حاكم بساع :- شمالج ولج

- يمه باكن يمممممممممه ، بت بغدااااااااااااد باكت رجلي ، هدوني اعليها

وطكتها ركضه ، و ادفعي ايمان دفعه نومتها بنص الطيان ، و كضتها دمغات و جتل وين اليوجعها ، و حاكم يجر بيها و كاغد ترفس بيها برجلها ، و يكللها : ولج شمااااالج تخبلتيييييي ، كوااااغد

ايمان تبجي و تصيح ، فلتت ايد خاكم منها و نامت عليها نيوم ، و الكطيها بعضة من زندها و هاي فرفحت روحها من البجي، جراها حاكم دفعها منها و ضربها راشدي بكل قوته

:- اطكني

- و انعل والدييييج و اكسر راسج

عاينت واحد عليهم ، جرها و نصه حسها و كال الها :- و علي لو ما رحتي منا ارمين اعليح يمين الطلاك و تحلمين اردج اعلى ذمتي

- تبيعني لخاطر وحدة بكد بزرك حاكم

- كلت الج ردي لدار اهلج كوااااااغد

حطت شيلتها اعلى راسها ومشت منه و تبجي ، و هاي واكفه اعلى كتر تبجي و مطينه :- امشي ياله

- اخاف

- امشي يا بوية دمشي لخاطر الله .

اخذها و مشى و هاي جابت الدرب كله تبجي، و هو يسكت بيها ، وصل للبيت ، كال الها : دخلي

فاتت و هو دخل وراها و سد الباب، و صاح :- يممممممه ، وينننننج يمه .

راح للقطعة مال الحلال، لكه الحلال ما هو ( ما موجود) ، اندار الها و كال الها :- فوتي امي جنها مو هنا ماخذه الحلال هي و جمارة و طالعة تسرح بيه .

عافها و دخل لغرفة امه ، فتح بقجة هدية و طلع الها ثوب من ملابس هدية ، طاحت ورقة ، ما دنك الها ، فاتت ايمان وياه

- هاي توجعني

- شنهي ؟

نزلتله ثوبها من يم جتفها و طلعت اله العضة البزندها ، تقرب منها عاين الها ، مكان العض زراك على بنفسجي ، هو كام يمسح عليها ، البنية تارسة وزنودها بيض ، وبس وحدهم بالبيت ، توتر

تنهد و هو يكللها ، هاج هاي ملابس روحي غسلي و تعاي ، مشت و هي تكله : ما اندل

طلع و اخذها ، دش ستار ، حجه حاكم :- فوتي هنا يابة

فاتت و ستار مستغرب الوضع ، اندار على ابوه :- انت مو كلت ما اخذها يابه

- اخذها و غصبا عن اليرضى و المايرضى افتهمتو ، و خل اسمع واحد يطلع حسه الا ومحمد الا ادفنه.

ما رضى ستار بالكلام و ما يكدر يحجي ويا ابوه ، ضاج حيل دار وجهه و طلع و سد الباب وراه ، تنهد حاكم و فرك و جهه بتعب .

فتح الباب و طلع ، مر جارهم :- ها السلام عليكم

- و عليكم السلام

- ع الخير كالو عرست جديد صكد

- ياهو الكال

- و الله من العايلة سمعت ، يلا اودعناكم و ان شالله شايف الف خير حبيبي .

هز راسه حاكم و هو يردد :- عفية مرة ، اخ كواغد اخ .

ايمان :- اني خلصت

اندار و دخل للبيت ، نشفي راسج الجو بيه هوى

دخلت للحجرة و هي ادور على منشفة ، شالت ورقة باوعتها ، قرتها ( اريد اشوفج بالبستان بسرعة )

:- ها

- اريد خاولي

سحب الها من ورا الباب و انطاها بقت تنشف بشعرها ، كعد بالكاع يفرك براسه ، دنكت وكعدت يمه :- هاي المرة ما تقبل ابقى هنا.

- هاي السوالف لا تشغلين راسج بيها .

دارت عنه و تنشف براسها ، و هو يعاين بيها ، ظل مركز بكل تفاصيلها ، ضحك :- صارلي شكثر اشوفج اول مرة انتبه انت حلوة حيل .

ضحكت ، ردفها :- و من تضحكين تاخذين العكل بضحكتج

خجلت و دارت وجهه منه ، رادت تكوم ، كض ايدها :- شو اشوف ايدج شلون صارت ؟

رجعت كعدت بصفه وهي تكله :- الثوب ضيك عليه

نزل الثوب من جتفها ، و تنوع لأيدها و هي تعاين وياه، شال راسه يعاين لمعاني وجهه ، و هي تكله :- صارت زركة حيل و توجعني .

فتح الها حضنه و كال الها :- تعاي

ظلت راكدة بمكانها و تباوعله :- لا تستحين تعاي ، مو تكولين تزوجنه

سحبها يمه ، كعدت ، حضنها و كام يفرك بأيدها ، و هي مستغربة و متحنطة ، تجرأ اكثر و كام يفرك بأيدها ، و هو يقرب وجهه يم خدها .

حس بيها تضايقت، ابتعد منها و كعد عدل ، ابتسم الها :- تظلين يمي ؟

- اي ، بس اخاف تجي مرتك تضربنا

ضحك :- لا تخافين ، بس تكدرين تعيشين هنا

- و انت تبقى هنا ؟

- اي

- ابقى يمك

- عليش رايدتني

- حباب

ضحك :- بس اذا صرت وكح اخاف اذيج

- تضربني

- عسى ينكص راسي لو مديت ايدي اعليج .

من حجه هيج ، تقربت و حضنته و خلت راسها اعلى صدره ، تنهد و ظلتويجر حسرات و هي بحضنه عاين الها :- شجابج انت

- ليش

كرص خدها :- بعد يومين مو تكولين ما اريد اعيش هنا

- لا اريد يمك

- اخ يا يابة يابة اعلى الكاتل روحه خاطر يظل يمي ، ولج انت منين الله جابج علي كليلي .

حجه و سمع صوت الباب انفتح ، فز راد يكوم ، دخلت امه للحجرة جفت دارت ولكته ، مخليها بحضنه

- ياااااع ، منهي هاي

كام منها و كاللها :- ها يمه اجيتي .

ظلت تعاين على البت ، دخلت جمارة :- مني هاي جدة ؟

حاكم :- يمه هاي ايمان

جمارة :- ياااااا لابسه هدوم هديوووووه و علي بس تشوفج تكتلج

ايمان :- لا والله هو انطانياهم

حاكم :- ايمان اخذي جمرة و روحي غاد

حجاها ، بعد ما شاف ما ما راضية بالوضع ، طلعن كال الها :- ها يمه شمالج ؟

- جا امس تكول ما اريدنها و بكد بزري و هسه ادش اعليك الكا حاطها بحضنك .

- يمه انا ما ردت اظلم البت ، لجن هي رايدة تظل وياي ما تريد تكعد ابيت الشيخ

- وكاغد

- كواغد اعلى عملتها السوتها كبل شوية، لو تصير ذهب ما اريدنها بعد

- ها يحويكم يمه ، شفتها حمرة و طمعت بيها و نسيت ام فروخك

- ما طمعت ولا نسيت لجن كواغد طلعتها من ماعونها ، الدنيا كلها درت بهالزواجه ، تعاركت بالشارع و فضحتني ، غير طكتها امس الما انساها الها.

- مرة و عرس اعليها رجلها جا شتسوي

- هسه حجيج هيج صار ، وين الجانت امس تكلي اخذها و معليك بكواغد و خلها ابيت امس

- حجي بساعة عصبية من شفتها تعدت احدودها اعليك، لجن ما ارضاها تبدلها بهاي

- هاي ! شني ما افتهمت انت ما راضية بزواجتي لو بأيمان شخصا

- كلبي ما تطمن الها ، من عبنها امس اجت و الساعة متوسدة رجلك بلا مستحة ، اتضكر كواغد يوم الدشيت اعليها كلبت اعلينا البيت فوك حدر من عبنها تستحي ، موش مثل هاي البغدادية الكطرة مستحى ما بكصتها .

- يمه البت زغيرة ، و انا الكلت الها كربي

- جا كالوها ، كلت ادني و تدنت .

- يمه شمالج

- لا مالي ولا مالك ، اليوم انا اروحن و اردن كاغد البيتها

-كواغد مالها دشة لهذا البيت

- عليش بالله

- جا عود انسى عمايلها

- جا عملتك وياها جليلة ؟ هالماخذ اعليها بت بكد بتها

- انت شغيرج امس ما جنتي هيج

- من عبن ما ارضى ابدل كاغد بوحدة ما نعرف اصلها منين ، ذيج التحملتنا و شالتنا اعلى راسها و دارتني اكثر منك

- هاااه هسه صارت كواغد بتج و انا الغريب

- اي بتي ، احجي اعليها اتعارك وياها بتي وما ابدلها بهاي ، و يو ما ردت اليوم انا بهالبيت مالي كعدة

- لا ترد ، و كعديها ، لجن صبرجن علي و شوفن شراح اسوي .

طلع و كال الها : جمرة جيبي عباة من جوا بساع

دخلت جابت عباية ، اخذ ايمان ، و مشى بيها البيت الشيخ ، و طلب الشيخ

- ها حاكم

- والله شيخ جيت اعليك خاطر اكللك البت كاضة بذيالي و تكلي اريدن اظلن عدك

- هي من امس تنشد اعليك، البت جنها امنتلك .

- اي والله و تريد تظل عدي، كلت اخذهازوجة بعد عليش معلعلها بعد.

- متأكد من قرارك هاذ

- ان شالله، انا رايد اسوي زفة و عرس هنا بالسلف .

- زفتها تاخذها من بيتي ان شالله

- و النعم منك ، لجن احتاجلي اسبوع بس اعدل البيت ، عدي حجرة مخلين بيها الغراض الزايدة ، اريد اعدلها خاطره اخليها الها و ارتب البيت .

- براحتك ، لجن ردت انشدك

- كول ؟

- سرحان تعرفله رفجان ابغداد ، وين يروح

- سرحان موش من الشباب اليحبون السهر و الكيف ، و رفجانه اعلى اصابع الايد ينعدون وما جان يطلع ويا احد بعد المغرب ، اكثر وكته يقرأ.

- هاذ الولد راح يسودني ، لليوم و هو موش مبين

- يرد وين يروح

- بالي اعليه ، و افادي موجر

- لا يظل بالك هو موش صغير و يدبر امره كلها جم يوم يصفى باله و يرد .

- ان شاءالله .

ام حاكم ... دكت الباب

خلود :- منهو ؟

- انا خالة انا

- هلا هلا ام حاكم شلونج دية

- زوينة ، الا اجيت انشد كاغد ردت من بيت الشيخ يو لا ، انا ردت اجي الضحى لجن كلت ما الكاها.

- هسه اعلى جيه ، فوتي فوتي.

فاتت و تلكتها ام صلاح :- هلا دية هلا

وتحبحبن ، و كعدن يسولفن ، و ام حاكم تكللها :- ديه جيت خاطر اردن كاغد لبويتها .

نشمية :- جا ديه هي مفرفح كلبها اعلى زواجة حاكم ، مت عيني اعليها كضت الليل تون

- دية الون ما ينفع ، و يو هدينا ديارنا ، يستحلنه المسمومات و كاغد معدله و ما تستاهل تاخذ بيتها وحيدة ما تستحي.

- شايفة اعليها شي دية ؟

- جا غير دشيت اعلى البيت و الكاها متوسده اعلى رجليه و هو مسنح اعليه

- يااااااااع شكثر ما تستحي هاي

- يا اكلج نكطة مستحى ما ما عدها ، انا حويكم وليدي الثكيل ما يوم مال لبت ، مرتها و هي مرته ما يوم خبها جدامنا لو سوا وياها هيج ، دية شو ها بعدنا باول يوم سنح اعلى شليلها و تيه الزلمة علومة

- ديه خافنها ساحرته

- شمدريني والله يدية، كلشي يطلع منهن ذني.

دشت كواغد و هدية و ياها ، عاينت الها كاغد :- شنهي جيتج يعمة شماته ، لونها شماته تراه كلبي ما يحمل الشمات.

- جاية اردنج يبنيتي

- اعليمن ترديني ، اعلى الطاير كلبه اعلى بت بغداد

- مالج غرض بيه ، البيت بيتج ، هظيمة تهدين بيتج و تخلينه يسده بهاي اللفت اعلينا من التوالي.

كعدت و حطت شيلتها و نعت :- ضيعيته ضيعيته الولي من تاه رايه ضيعيته

نحان وياها ... يمه يممممه لا تحسبين الرجل والي ، يمه و فيّه مثل فيّ البواري ..... ويبجن بقوة

- بسج يمه بسه ، يعينج الله ييمه

- ولج يمه ربيت و انكسر ظهري ، ولج يمه و داريت و اشتغلت و بنيت تالي تجي الما تعبت وياه يوم وتاخذه مني يمممممممه .

وظلت تنعى و تبجي و النساوين ينعن وياها ،

بس ما رضت ترد هسه كالت الها (خليه انا ما اردن هسه ، ما بيه اشوفنه و يحترك كلبي )

حاكم من ثاني يوم اجر عمال ، و طلع الغراض البالغرفة ، و بنى سكف بين الغرف و حط باب و سوا هول جبير يطل اعلى الغرف و المطبخ و خله مكان برا حوش و صبغ البيت ، و اثث الغرفة بكومدي و قريوله و جاب رادية و حط و علك بردات للشباج و سواها حجرة عرس ترهش .

ام حاكم شافته عدل البيت و باجر عرسه و يجيب هاي اللافية اعليهم من تالي، كضي عباتج و طري لبيت شمهي ، كضت كواغد و كالت الها :- خايبة و علي يو ما اجيتي وياي اليوم لحطج و ادمغ اعليح ، خايبة سوالها حجرة مثل حجرة الشيخ

- يااااع صكد

- خايبة و علي يو ما رديتي تسيسين ، ردي ولج

لبسي عباتج و طري ويا عمتها ، ردن للبيت ، ما عرفت بيتها ، صابغ و فارش و مغير كلشي :- ياااع هاذ بيتي ، جا مو ٢٤ ساعة يبجي بوجه الله ويكول ما عدي منين طلعت هالفلوس هاي ؟

ام حاكم :- ياااا جا غير بيها عروس و دسم و تمطك ، يطلعن عليش ضامهن

كواغد :- خايب ستير يممممه ، كرب يمه كرب ، جا من حيث انا حجرتي هاي بعد عبن بيها غريوله و ضليعاتي يوجعني ، جيب هديماتي يمه جيبهن .

دخلت هدوة و جمرة و ام حاكم و كواغد ، كلهن كعدن على القريوله (الجرباية ) ، كواغد.جرت جمرة و كالت الها :- سمعي يمه ، لو دش ابيج ، انت دبجي حيل اعلى الغريولة

ستار يضحك وواكف الهن برا البيت ، كالنله بس يجي ابيك كللنا ، والله هو ما قصر ، بس شاف ابوه بين

طبب راسه من البيت و صاح :- اجا اجا

و هن صفكن و كامت جمرة تدبج حيل اعلى القريوله و ام حاكم تصفك هي و كواغد :- دكن حيل يا شيباتي دكن حيل

وهدوة تهوس بالغرفة و جمرة تدبج ، و كواغد كاضة شيلتها وتفر بيها ، دخل حاكم ، سمع الهوسة بغرفة العرس ، هام اعليها

عاين مسويات الحجرة قرج .

دارت كواغد و شافته :- ياااااع هاذ ابو ستار ، كرب كرب ، جويعدين نصفك و نهوس عبن باجر عرس ابوهم

هو فاتح عيونه :- شعدكم هنا ؟

كواغد :- والله انا و البنيات كلنا نظل هنا من عبن ضليعاتي يوجعني من الشغل و كلت انامن بعد اعلى القريولة تكفيني انا و فريخاتي

- شرجعج يكاغد

- ياااااع جا غير بيتي

هز راسه و كال الها :- من كون تريدين العرس على فراشج يكاغد، انا ما عدي مانع ، بالعافية اعليج الحجرة الجديدة .

حجاها و مشه ، وكفن صفكات و هوسات ، و تنهدت كواغد :- عمه انا يو ما راده اخيرلي .

- لا تتضايكين ما نريدها الحجرة ، نشيل الغريضات و نحولهن بحجرتج وخله هالحجرة الملونه اله و لصخمته الجديدة

هدية :- اي يمه صكد صكد

وكامن بساع ، جرن البردات و اخذن القريوله و الكومدي و الفراش و هدوة تصيح :- الراديون الي يمه الرديون الي .

و امها ترده بالعافية يمه ما ينعز عليج

لبست عباتها ، حجت عمتها :- جا انت وين رايحة

- جا غير عدنا عرس باجر لزوم نروح نشوف العروس شتعتاز

ام حاكم :- جا نطري نجي وياج

لبسن اهدوهن و كامن ، مغربية وراحن اعلى بيت الشيخ ، سلمن اعلى الشيخة و كعدن

حجت ملوك : ها يكاغد

- والله يشيخة جاي ليجاي من عبن باجر ناخذ مرة من القصر و هالاجينة خاطر نعرف العروس شمعتازة

ملوك :- اي عاد هي بت اخو الخاتون و تعرفيني شكثر اعزن الخاتون

- يطول بعمرج شيخة ، بس اندهولنا اعلى العروس

شوية و اجت العروس ، كامتلها كواغد ، و ايمان كامت ترجف :- لا خالة الله عليك لتضربيني

- من خلخالة الخلة اضلاعج ، هازة كاروك و تكليلي خالة ولج

وكطتها حيل اعلى زندها تتلمس بيه : شنهي ولج تاكلين حصو ، شو انا جني جنحان زرزور ما بيهن علج لحيمة من فلك طرج كون

بجت ايمان ، ردتها كواغد :- لا تبجين ديه لا تبجين جا انا بعد منا و هيج شريجتج و حبيبتج و حسبة اختج الجبيرة

- ما تضربيني؟

- ياااا خايبة شمالج اتكشمر وياااج

وكطتها حيل اعلى ظهرها

اكلج ديه انا اريدن اسرنج بشي ، بس لا تكولين للزلمة و النساوين جويعدات ، هالشي بس تكولينه للزلمة تموتين

ايمان :- يمه اخااف

- هو انا شحجيت و خفتي ، دسمعي ...

همست :- بيتنا بيه طنطل

ملوك :- يا بعده الطنطل بالبيت

كواغد :- ايييييي جا غير ذاك اليوم راد يكرط راس ستار ابني

ايمان :- شنو يعني طنطن

دمغتها اعلى راسها :- طنطل طنطل موش طنطن من طنطلج البين كون

- يعني شنو مفهمت ؟

- يعني جنيجين

- يعني شنو

- ديالة عاين يربي ، هاي بيا لغة احجي وياها

ملوك : يعني جن وحش كلش يخوف

ايمان :- لا لا اخاف اخاف

- اي اي يخووووف ، خوبن يو احد تكرب اعلى حاكم يطلع راسه الاسود و عيونه الحمر و يكوم ينفخ و ياكل الاوادم

- لا لا عفية اخاف والله اخاااف

- جا حتى احنا نخاف منه ، بس شنسوي دية ، هاي قسمتنا بعد و تعودنا اعلى الطنطل صار وحيد من البيت

- لا لا اخاف اخاف من الوحش

- خايبة اسمه طنطل طنطل لا تتمزهدين ... و طكتها .. لا تتمزهدين

- لا لا اني ما اريد اروح بعد ، اريد اظل هنا

- جا قسمتج و جابتج اعلينا دية وين تروحين من عدنا بعد .. جا غير نحبج لا تضايكين شماااالج

ودمغتها

اسمعي يو اجاج حاكم لا تخلينه يكرب ، بس يكرب يجيج الطنطل خووووش

هاي ظلت تبجي و تعاين عليهن

كامن منها و و كاللها :- ياله احنا انروح من عبن لو هدينا البيت هواي ياكلنا الطنطل

و هاي تتراجف .. طلعن و كالت ام حاكم :- دهر صابج يكويغد ذبيتي فلك

- يا عمة جا بعدنا شمسوين

- يا جا بعد اكو ؟

- جا غير اليوم الگول و باجر الفعل

- يااااع جا شتسوين

- نشوفها الطنطل ......

رواية كحل عرب الفصل الخامس عشر

( ظهور الطنطل )

طرت عالخاطر ايامه .. ومرت

وذكرته ونشفت ارياگي .. ومرات

أعتصم مرات انه بصبري.. ومرات

أتضعضع والوسيعه تضيج بيه.

( عريان السيد خلف )

راديون :- مر أسبوعين و انا اواعد خنجر اعلى الشوفة ، لجن ما صحت ، كلما كلت لأمي( اريدن اطلع) ما ترضى ، خصوصا و مرت زناد ما مخلية كصرة وين ما اروح مرافجتني و ادريها مو ضمامة سر هالما احجيلها، ولين ما احجي ظاله تبحوش وراي خاطر تعرف شعدي ، من كونها يو شافتني سارحة يو اضحك ويا روحي تظل تحوس خاطر تعرف شمالني.

بس بعد ما بيها مجال باجر جمعة و لزوم ادبر روحي و اطلع و اشوفنه ، خلني استغل عرس حاكم و ايمان ، هلبت اكدر افرن و اطلع.

مشيت للگبة امي جويعدة ، و ايمان و الخاتون احذاها، كاعد تشكيلها وتكللها (اخافن اروحن ) و الخاتون تعلم بيها.

صاحني كريم :- راديوووون

- هااا

- تعاي جاي

كمت ليه ، و كرب ، حجه بحس ناصي :- اكلج انا شاك بشي اعلى فكدت سرحان

- بشنهو تشك ؟

- زناد اله ايد بيها

- لا تكول هيج ، جا هو غير اخوه

- راديون انت ما تعرفين زناد شكثر حاقد اعلى سرحان و يعرف كلش زين لو ظل سرحان ياخذ المشيخة .

- لا ولك لا تكول هيج، صكد هم ما يتوالمون لجن ما توصل بيه الهالمواصيل .

- و يو وصلت ؟

- خذيت كلبي شمالك ، دكول يا الله يمكنه لبغداد و عازل ارويحته ، عليش تفاوله

- جا ابغداد و اسبوعين ما بين و ابوي ما خله لا شرطة ولا مركز ما خبر اعليه ابغداد ، حتى المعمل مال الخاتون ما واصللها ، اخونا شغيلته موش خالية و زناد ما يكف ليل نهار يذكر ابوي سرحان متعدي اعلى جلمته و ما يحترمه و يحرض بيه.

- جا هسه احنا شنسوي.

- لزوم نراغب زناد و نعرف شنهي السالفة .

- خوش .

(بيت حاكم )

دخلو للبيت ، لكوا حاكم كاعد ، بس الأعصاب نار ، عاين عليهم دخلو ما حجه، من ما حجه هم گلوبهم كامت ترجف من الخوف، يعني وراه مصيبة.

من خوفهم كل واحد دش حجرته و ظل هو كاعد بالهول ، شوية و صاح :- هدية

فزت و كامت اعلى حيلها :- ها ها بوية.

مشت ليه ووكفت جدامه، حجه :- غراض الغرفة وينهن ؟

- اااا ، شس.. اااا

- وينهن

- بحجرة امي .

- ياهو النگلهن ؟

كامت تتلعث كدامه بالكلام و ما تعرف شتجاوب و هو يعاين عليها بملامح جافة من شافها اتوهدنت ، كام من مكانه و كال الها :- صيحي امج و خلها تلحكني بساع.

ركضت هي اعلى حجرة امها :- يمه يمه ابوي يريدج كومي بساع .

- شيريد ؟

- ما ادري ، كومي يكول بساع.

كامت و راحت ليه ، لكته متربع و ساد اديه و داير وجهه ليغادي، تقربت و كعدت يمه ، ما دار عليها ، حجت :

- وكت الأنسجنت ضاجت بيه الوسيعة مرة و عجوز مشلولة و ٢ فروخ و زلمه ما ادري وين كاعة ، ما دنجت راسي لأحد ولا كلت لأحد اطيني ، جنت افج عيوني وي صياح الديج و اطلع للزرع و يا طكة البريج ، الفن الشيلة اعلى وجهي خاطر لحد يكول شفت مرت حاكم و تلوحك السمعة و اتكبع و اشتغل ، اردن الضحى اداري امك و اغسللها و اطبخ لفروخك و اردن اخدم بقصر الشيخ ليما تغيب الشمس اردن لفروخج وامك ليما تغفى عيني و انا جويعدة لا شكيت بيوم ولا كلت الك تعبت ويوم الرديت كلت الك كلهن حدر جدمك من كونك طيب ورديت لينا بالسلامة ، اتنومس بيك جدام النساوين يحاكم و اكللهن يعشكني و هيج و هيج يگلي و هساع دست اعلى افادي و خليتني علج بحلوك الوادم، ما اكولن بس يا حيفن اعلى السنين الراحت.

حجتها و هملت دموعها بهضم

دار وجه اعليها :- صارلنا شكثر معرسين ؟

دارت عنه تبجي ، ردفها : جاوبي

- ١٧ سنة

- احلفج بعزيز كلبج ، فد يوم انا طاكج ؟ غير طكت البارحة من كونج استاهلتيها اعلى الفضيحة ، لجن كليلي ، فد يوم انا طاكج ؟ فد يوم شفتي عدي سوالف نسوان ، و امدح بهاي وذيج جدامج ، اشكال و ارناك اشوفن ابغداد و اردن لادير احب كصتج ، هم يوم كتلج شنهي هاذ وضعج و مدحت الأشوفهن و قارنتج بيهن ؟

زين اسألج بالله ١٧ سنة متزوجين لو تعدين الأيام العايشهن ابغداد يطلعن اكثر من ايامي وياج ، عليش ما عرست ؟ عليش اغسل بيدي و اكل بيدي ، و عليش متحمل كل هذا ابغداد ؟ لو اريد الغوى اتونس غاد و ما افكر بيكم ، لجن اضم الفلس ع الفلس خاطر اجيبنه الكم.

عليش تعايريني بالسنين الشلتي حملي بيهن

- انا ما اعايرنك

- لا ... معايرة

اسمعي كاغد .. طكيتني و انا زلمتج لا حجيت ولا فكيت حلكي كلت مرة اغتاضت و كعدت اطلعلج اعذار و سكتت ، فضحتيني بالسلف و صميت حلكي و سكتت ، و هسه اشوفن تصرفاتج ، تصرفات جهال ، فهميني الرايدته خاطر اعرف .

انت ام ابني و بناتي و مرتي و لا تظنين بيوم انزل منج يو اهيننج جدام احد لجن تصرفاتج تعدت حدودها و شلون ما اجيبها ما جاي افتهما ، كليلي شتريدين.

- جنك نسيت باجر عرسك.

- بت وابوها اطاها ليه و كالي امانتك ، شسوي ؟

- زوجها لابنك ، شنهي هي موش اصغر من ابنك يو لا.

- عقدت اعليها بساعة و تم كلشي خاطر نفض مشكلة شنهي تريديني افك العقد مني و اطيها لأبني .

- جا اطيها لأي واحد مستحق زواج.

- جا هي امانة و البت كاضة بذيالي و تصيح لا تهدني ، شلون كليلي .

- انا لو احجي منا ليباجر ، ادريك هاوي العرس وما راح تبطل.

- اعلى عينج نور ، كليلي الراي شنهي ترانا موش زعاطيط و نتلاعب .

- لا راي شني، روح يبو ستار ، عرس و الي الله.

- انا ما رايد اظلمنج بس وعلي الصار كله موش اعلى البال ، ولو شما يكون تظلين انت عدي مثل ما انت.

تنهدت و هزت راسها ، حجه :- الغريضات ان جانن عاجباتج اخذيهن ، انا عود اداين و اجيبن غيرهن.

- لا تتداين ، ذيج هنه و اخذهن.

- بالعافية اعليج، بس كاغد اريدن اوصيج ، البت زغيرة ، حسبيها اختج بتج ولا تكصرين وياها ، تراها مظلومة.

هزت راسها ، ان شالله .

كام هو من مكانه و هي راحت لحجرة عمتها و كعدت تبجي ،و هدية و عمتها يواسنها .

لهناك دش و سيارة حمل بالباب، و حس حاكم يصيح اعلى ستار بصوت عالي، و ذاك يركض .

طلعت يشوفن شكو

لگنه جايب غرفة نوم ، كنتور طلاقتين وقريوله و مرايا.

كواغد :- يااااع جا انا اخذيت منه الكومدي و القريوله راح جابلها كنتور ، خايب هاذ منين خضرت بجيبه الفلوس .

كملو نگل .. و اجا يطلب هدية بته خاطر تساعده بتنظيف الحجرة .

حاكم :- هدوة يابة عاونيني ، تعالي ليه.

كواغد :- اكلك شنهي طلعلك ورث خضير ؟

حاكم :- لا، عليش ؟

- جا منيلك صبغ و بناء و غراض و هسه جبت اخشاب

- ما اشتريتهن ، ابن حجي نوري اطانياهن عطية.

اكلج يمه عزمت عمامي من بيت ثجيل و باجر بحيل الله جايين ، شنهي التحتاجونه، انا كلت الهم راح اذبح طلي .

- و منين تذبح من الحلال ماااااااالي ؟

- اكلج شنهي القضية اليوم شو حلالي و حلالج و تعبي و تعبك ، شنهي تسودنتي انت ، غير معازيم جايين باجر شنطبخ الهم.

- جا هي ظلت اعلى الحلال ، شو كل الألي انوخذ مني.

حجتها بنبرة حادة و مشت بهمة.

كامت هدية تعاون ابوها اعلى الحجرة ، تممها كلها و ظلت بس البردات ، كال: عودينه من يصير عدي اجيب ، هسه خليها.

ثاني يوم الصبح ..

كعد حاكم و كال لهدوة تجيبله ماي، وركضت الثانية تجيبله ، وهو راح زين و جر البردة يسبح ويغني (ميحانة ميحانة ) بحس العذب ... و سارح بروحه و ما داري بالحواليه.

وكواغد كاعدة بحجرتها و تسمعه و شابعة قهر

على هالوضع و دخلن حبايبها ، و جاراتها المنا وومنا .

دشن و صاحن :- ديييية ام الحبايب

كامت ليهن هي و ام حاكم :- هله دية ، هلا بيجن تفضلن

- ديه صكد هاذ العلم يو لاله

- شنهي

- يكولون الزلمة اليوم عرسة

تنهدت :- اي والله يدية

- يااااع و ساكته

- جا شبيدي يو كال اريدنها

- دية صكد زغيرونه البت

- ازغر من ستار

- ياااااع شماله هاذ الزلمة شنهي تسودن ؟

كامت تبجي كواغد و تنعى اعلى الرجال .. و هن يبجن وياها و يصبرن بيها

و هن اعلى نعاويهن ، دش شمخي و نشمية و نسوان ولده ، بدشته ، طلع حاكم :- ها عمي هلا بيك

- هلا يحويكم ، جنك فرحان و موش مغصوب .

- لا عليش مغصوب لجن بعد ارادة ربك عمي شنسوي.

- اسمع بوية ، طول عمري و انا اعتبرك ابني الثامن موش رجل بتي، لجن والله والله يا حاكم يو غثيت كويغد يو اذيتها و علي ما تلوم الا نفسك .

- الحجي ما مقبول منك عمي، كاغد مرتي و ما يحتاج احد يوصيني بيها .

عافه و مشى و هو يصيح :- كاغد گلبي بويه

النسوان من شافن ابوها دش، ترخصن و كامن، دخل و هي حضنته .. من حضنته ما تحملت ، بجت

:- شمالج بوية اعرفنج كوية عليش هالبجي

- ومن عبني كوية يبوية هالدنيا متوليتني ، شما اتگاوه اعليها اتلاويني وحيل انهد من املاواها.

- عمت عين الدنيا التلاويج بويه و انا موجود ، بيت ابوج عامر كومي امشي ويانا.

- عامر دوم بشوفتك يالحنين ، بس ما اكدر خلني

نشمية :- شنهي ظلتج ييمه والليلة عرسة ، على الاغل بس الليلة تعاي لينه و باجر ردي لبيتج.

- جا يمه هي بس الليلة ، جيتكم اليوم و باجر و عكب ؟ خليني يمه خليني.

بهية :- خاب سباعية و علي لا تهتمين ، شنهي جا هي اخير منج ، يو معدله مثلج .

خلود :- اي والله لا تهتمين ، و احنا جينا خاطر نظل وياج .

- الله يسلمجن ان شاالله

و ظلو يواسون بيها خاطر يخففون عنها .

راحت هدية للقصر تشوف اذا العروس معتازة شي.

كضتها راديون :- محتاجتج يهديوة

- عليش ؟

- اريدج تكليل لخنجر انا ارد اشوفنك اليوم العصر.

- و يو شافني احد ؟

- هو بكفا البستان يكعد ما يشوفج احد ، ركضي كليله و ردي.

- و شلون اطلعين و امج ما ترضى

- اتحجج بالعرس، امشي ليه واشوفنه و الحكجن للعرس غاد و اضيع وياجن من كون امي ما تروح بس رضت احضر العرس.

- ابوي وداني اعلى ايمان اذا معتازة شي

- انا جاي احضرنها وموش بحاجة شي ، امشي

لفت حجابها و طلعت من الباب الخلفي مال القصر اليطلع ع البستان ، و طرت البستان ركض، لكت خنجر كاعد هو وصحبانه و ضحكهم واصل ليه اخر العالم.

من شافتهم لفت وجهه خاطر محد يتعرف اعليه، خنجر شافها و كام ، كال الها :- شتريدين بوية ؟

- ودتني راديون وتخبرك العصر تشوفك

- صكد ؟

- انا اروحن

ركضت و هاذ طار بكاعه من عرف اليوم يجابل اهواه.

ردت للقصر وخبرتها . و ظلن ويا ايمان يعدلن بيها و لبسنها ثوب ابيض و الذهب مال راديون و حجلها .

وهاي خايفة تروح لا صكد هكو طنطل ، و تحلف بهديوة :- عليج الله كولي صدك اكو جن

هدية :- ايييي يومية ما يخلينا انام للفجر و هو يطكطك بروسنا ، خاصة يو وصلنا لابوي ، يجتلنا ، هيج احنا ما نكرب لابوي

- ليش

- مو الطنطل يحب ابوي و ما يرضى احد يكرب منه .

- لا عفية لعد اريد ابقى هنا .

- جا انا شعلي، احجي ويا ابوي و كليله

راديون :- ولج مكرودة عليش هيج وياه.

- جا امي هم مكرودة عليش دموعها يهملن من وراها ، شنهي ما ظل زلمه غير ابوي و تاخذة.

- بعد هاي قسمتهم ، حرام.

- جا مو حرام امي تنوح من امس لليوم.

- امج هم مكرودة

- همينا ياله خل نخلص من هالعرس الاكشر.

و سون حفلة صغيرة و كعدن خوات الشيخ و بناته يصفكن للبنية ، الشيخة ملوك طلعت كعدت بحديقتها تشرب جاي ويا اخوها كويطع .

- اكلك جا سرحان شنهي ، بلعته الكاع

- كلنا دايخين بمصيبته

- انا خايفة من هالغيبة يكاطع و اظنن وراها مصيبة

- عليش

- من كون سالفته موش خالية ابن الفصلية ، و راح يدسترها ، لا تستهين بيه ، هاذ ابن ال ثجيل و المكر وارثه من اخواله، ما تعرفهم اعلى يا ساعة يطلعون بوجهك و يهدون اعليك.

- جا انت خايفة من شنهي.

-انا خايفة اعلى وليدي منه ، ما يبردلي كلب الا واشوفن ابني الشيخ ، و هالقصر ملكه اهو و بزره.

- يجي هاليوم تطمني يبت ابوي.

للظهر و تحضر كلشي و اجو بيت ثجيل نسوان و زلم

من ضمنهم .. بيت ناصر

الزلم برا فرشوا و النسوان جوا ،

من اجن النسوان تحزمن للطبخ ويا كاغد و عمتها.

دش ستار و هو يكللهن :- محتاجات شي .

عاينتله يسرى بت ناصر :- يااا انت بس لا ستار

- اي انا

- شبساع هيج كبرت

- جا شنهي اظلن جاهل

- ادور شحلاتك انهجم بيتك.

- اشكرنج خالة

- يا جا انا بت عمك شنهي تكلي خالة

- غير اكبر مني

- انت شكثر عمرك ؟

- ١٧ سنة

- يا و انا اكبرنك بس ب١٠ سنوات شمالك و سويتني خالة .

-هههههه شسمج

- يسرى

- حلو الاسم

- من عبنه جريب من اسمك .

ضحك :- هسه ما محتاجات شي.

- محتاجين هالضحكة الشحلاته ، يو كل الزلم تضحك هيج ما ظلت نسوان كلهن تسودنن

خجل هو و طلع برا ، و هي ظلت تعاين وراه .

حجت وياعا امها :- شمالج انهديتي بالولد.

- جا اظلن طول عمري بايرة ، جا خل احصللي وحيد ، حت يو ابن عمي و ازغر مني هم اسمه زلمه .

- وشنهي تتعشمين ياخذج ؟

- يو حطيته ابالي اخذنه.

- جا شمتانية ما تحطينه.

- صبرج ، الا يمتى الزفة ؟

- ساعة و نمش نجيب العروس

- يكولون زغيرة و تنكط سم.

- شعرفنه عنها ، حتى شوف ما شايفينها.

لهناك و بعد ساعة ، توجهو زفة حاكم و طلعو لبيت الشيخ ، الشيخ جان فاتح ديوان قصره ، بس ال ثجيل ما دشوا ، يستنكفون يدخلون قصر ال ضاحي ظلو موجفين برا.

و الزلم الغربة دشت

والنسوان دخلن جوا

(و فصوص روبه يا كفاها وين دورها و لكاها )

ودكن الحبايب و هزن و دبجن.

راديون تحضرت و لبست و تعدلت ، ازود من العروس ، و طلعت ويا زفت العرس ، و فلتت من هوستهم اعلى القصر.

انتبهت مرت زناد لطلعت راديون للبستان ، راقبتها

شافتها ما ردت بعد و مشت ويا الزفه ، دخلت البستان و اختفت ، كضت اختها و كالت الها :- تبعيها و شوفيها وين راحت .

حاكم كض بأيد ايمان و صعد بسيارة اجرها من واحد صاحبه ، المكرود غط بالدين من ورا هالعرس هاذ .

انتبه ايدها ترجف و هي متوترة

حجه :- شمالج بويه

- اخاف

- منين

- من الجني

- يا جني هاذ

- يكولون ابيتكم طلطول

- شنهي

- اني اخاف منه

- لا تخافين بوية وعلي ماكو شي.

عصر اعلى ايدها خاطر يطمنها

راديون و البوشية اعلى وجهه ، كاضتها و هامة بين المشي و الركض خاطر تصل بساع، الى ان وصلت ، ولكت خنجر واكف و متلثم وناطرها.

- هلا يبعد العشيرة كلها

- كلبي يريد يوكف من الخوف

- من عسى گلبي وكف ولا كليبج يبعد اهلي.

ضحكت و هي تعاين منا و منا، انا ما اكدر اطول جثير زعم شاردة من العرس و جيت

- غزال و شارد ، جا انا شسوي بكلبي

- خنجر

- اخ يهالاسم شحلاته بحليكج

- انا من عرفت انت شقاوجي حيل ضاك خلكي .

تنهد :- هاي بعد

- لاله ، انا اريدنك تهد هالدرب

- و بيش اعيش ؟

- افلح بيع اي شي لجن عوف هاذ الدرب الخاطري

- خاطرج عزيز يبت الشيخ

- اعلى هاذ الحال جمعتنا مستحيلة و انا سلمت الگلب بيدك و ما بيه لغيرك.

- انا اموتن ، لو احد شاف رمش عينج.

- و انا اموتن بلياك كل يوم ، اوعدني تهد هاذ الدرب

- الله كريم .

- جا اروحن

- بعدج توج اجيتي

- ما اكدر يخنجر ، لو احد حس اعليه انتهي ، خلني ادش ويا الزفة لبيت حاكم.

- ما اريد اضرنج ، لجن راح اشتاكلج هواي.

- موش كثر شوكي .

- انا ما مسوي لله حسنة لجن طامع و طالبج منه.

- انا امشي

- مودعه بالله

مشت و هي تتلفت ، مشت بفياي البستان ليما وصلت بيت حاكم و دشت .

لكت الزفة توها واصلة و جاي يدخلون ، طبت وياهم ، كضتها ليلى مرت زناد :- جا وين جنتي ؟

- ويا الزفة

- انا جيت وياهم ، دوريتج و ما شفتج

- من عبن عيونج ما يشوفن عدل

رفعت البوشية و هي تتجاهلها و تدخل

ليلى :- هين يراديون .

كواغد تلكتهن تصفك و تهوس اعلى جروحها و تضحك الهن ، خاطر ما تبين للناس اللي بكلبها .

وفاكة حلكها و تضحك للرايح و الراد.

تكربت يم ايمان و كالت الها :- هلا بجيتج ، توه ضوه البيت

و هاي الفطيرة تضحك الها ، ردتها :- مثل ما كتلج يدية ديري بالج خافن الطنطل ياكل راسج

- لا حاكم كال ماكو جني

كرصتها :- اسمه طنطل موش جني

- عفية لا تكرصيني توجع

- جا العرس ما يوجع يزمو ، تسوين ارويحتج افقيرة و اتي كل المصايب من حدر راسج .

صفصفت البت و سكتت خافن تحجيلها جلمة لخ و تلوحها كرصة ثانية و تشلع وذرة من زندها .

وبرا نسوان ثجيل ملتهيات بالطبخ ، و الزلم غاد بالشارع فارشين وكاعدين ، ناطرين العشا ويا الغروب ينصب.

هدية :- ها يمه

- خايبة قهر و العباس

- عليش

- جا انا يوم الجابني حت ما اجا بزفتي ، جابني الهوايش و الطليان و المسعده جابها بسيارة ، شنهي هي ذهب و انا اتراب

- حشاج يمه ، لا تهتمين و لا تفكرين بهاي الامور

-الله لا يحطج بهالنار يبنيتي ولا يراويج لوعتها من عبنها نار وموجرة بفادي لا راضية تطفى و لا راضية تتعود.

- احنا يمج يمه لا تهتمين

- اكلج هاي ياهي الواكفة ويا ستار

- يسرى بت عمي ناصر

- شو صافة ويا و تضحك هواي

- والله ما ادري عنها لجن من جيت من القصر وليجاي ، جن ما فاركته

- ادهدي ليهم لا تخلين اخوج بوحيده وياها، امشي.

- اي يمه.

طلعت راديون : ها يهدوة

- هلا راديون

- جا ما ادشين و تركصين ، البنيات كلهن كاعد يركصن

- جا اركص بعرس ابوي ، شمالني تسودنت ، ضحكت

دش جسام ابن سلطان ال ثجيل و هو يكللهم :- استعجلوا بالعشا ياله

يسرى ركضت ووكفت اعلى الجدر تصب ويا النسوان و هديوه مدنكه وياهن ، و راديون واكفة و الذهب اعلى صدرها و الشعر نازل منا و منا و و الحجاب مذبوب اعلى راسها ذب .

جسام :- ستار

- ها

- ياهي هاي الواكفة بحوشكم ؟

- الواكفات هواي ، ياهي منهن

- العلى صدرها باون ذهب

- جا هي من الباون معروفه ، ياهن اليلبسن الذهب غير بنات الشيوخ

- يعني شني ؟

-هاي بت الشيخ مطر

- معرسه ؟

- لاع السلف كله يتمناها ، ابوها شارط اليريدها يبنيلها قصر مثل قصر اله ضاحي.

- جا كول بارت البت

- المثلها ما تبور ، الانه الاصغر منها اتمنى طرف شيلها .

-هههههه ولك انت موش راحة

- الراحة عفناها لاهلها

- دكللهم استعجلو بالعشا ، الليل كرب ينزل.

يسرى :- ياله وينكم ، كربو شيلو

دخلو الشباب يشيلون اكل و يطلعون ، و يسرى حجت :- ستار ، كرب شيل وياي الجدر نرفع من الدرب خاطر يمرون براحة

- يله

تقرب يشيل و هي تعمدت تنزل الشيل من ركبتها و تبرز ملامح صدرها ، بساع جذب عين ستار و عاين عليها و دنج ، ضحكت هي و لفت الشال و كالتله : عينك غااد

شال وياها بسرعة بس ارتبك ، عاف و طلع يشيل وياهم ، هديه اجت :- ها ؟

- مامش ، بس شلنا الجدر اعن الدرب.

- اي

اجت كواغد ، مشت يسرى ، عاينت اعلى اصخام الجدر ، و كالت الها :- من يهدون و يكعدون ياكلون كليلي

- عليش

- مالج غرض، بس من اندسنج انت اخذي مرت ابوج و امشي بيها للحجرة

- شراح تسوين ؟

- مالج غررررض ، نفذي ولا تحجين ، والله لهججها بليلة ظلمة ام زنود

- يمه خافن ابوي يعصب و نطيح بيها

- هالاريدنج ما تعرفين شي ، خليني وحيدي

كعدوا الكل ياكل ، بس راديون مرضت تاكل ، كالت الهم ما مشتهية ، و ظلت واكفة بالحوش ، شافت كواغد ، كاضة بجمارة و تصبغ بيها بصخام الجدر

- يا خالة هاي شجاي السوين

- اهشش امشي غاد ولا تكلين لاحد

- خطية خالة

- اششش امشي .

مشت و هي مبتسمة ، انضربت بشخص :- اتعذر منك هواي

جسام عاين بعينها ، ركز بيهن ، استغرب نظرته ابتسم الها و كال :- تفوتين يو افوت ؟

مشت و هي مدنكة ، ليلى مركزة وياها ، ندست اختها :- هاذ ياهو الواكف

- اظنه ابن سلطان ال ثجيل ، اعرفنهم من الملامح

- زعم بس لا هاذ الشردت خاطر تشوفه بكفى البستان

- ما اظنن ، لين ذاك لبسه و هندامه موش مال شيوخ، عاين هاذ شحلاة الدشداشة السودة اعليه و شلون مرتب

- جنج انت العشكتي موش راديون

ضحكت و دنكت.

كواغد :- يمه هدية ، تعاي ليه

- ها يمه

ندستها :- ياله يمه خلنا نفض شغلنا خاطر يدش ابوج يرتاح

شاورتها :- من تدخلينها افتحي الشباج

اي يمه

اخذت ايمان و مشت بيها للحجرة، كعدت ايمان و هي تكللها : انت شكثر عمرج

- و انت شلج غرض ، صمي حلكج وفكينا.

سكتت مشت للشباج فكت السركي ماله بس ما فتحته ، و كالت الها : عودينه ديري بالج لا من السم مالج يطلع الج الطنطل

- لا اخاف

- من تخافين ، لا تخلين ابوي يكرب ليج ، ولا تكليله هم كالولي من عبن لو فتنيتي ، نكضج ونذبج للطنطل و علي.

هاي كامت تلم بنفسها و مدمعه ، طلعت هديوة و ايمان كعدت تبجي بهداي ، تخاف منهم و هي تشوف الكل ما راغب وجودها بس حاكم اليضحك الها.

انفتحت الشباج اعلى كيف ادعده و انفك اعلى حيله

طلع الها صوت يخوف يسوي ( وووووووووووو )

ايمان :- ماماااااااااااااااااااا

هي صرخت و طلع كدامها راس مكفش و فاتح عيونه و الوجه اسود ، و نفخ بوجهه

صرخت بكل علو صوتها و هجت من الغرفة :- رجعوني لبغداد ما اريد ما اريد ، عوووووووووفوني

يريدون يكضون البت و هي تتفلت من اديهم و تنشغ من كل گلبها ، انكلب البيت اعليها ، و هي تبجي و تصيح : اريد ماما ودوني لبيبي

ما رحموا بجيها ، اعتبروها وحدة تنعوص و تدلل ، كامن النسوان يصيحن عليها و ام حاكم تغلط عليها ، و هاي تبجي

اكثر النسوان كامن سلمن و طلعن و ظلن العرف ، و هاي بعدها تصرخ ، وصلو الحجي لحاكم ، كال الهم ، خلوني ادش الها البت فرفح كلبها ، اسمعوا صياحها .

ردوها غصب للغرفة و هي تبوس بديهم ما تريد تظل ، كعدوها غصب، و دخلو حاكم عليها ، و هي تكله :- لا تجي يمي الله عليك روووح روووح

- لج يابه بس فهميني شجالج

- اريد ارجع لبغداد ، رجعوني فدوة رجعني

- وين تردين لخوالج

- اي اي ارجع لخوالي ، رجعني الله عليك رجعني

- بس اهدي و انطيني ايدج

- لا لا لا روح روح ما ابقر ما ابقى ، اريد بيبي.

سحبها غصب حضنها ، و حضنها حيل و هي تبجي تشهك و تبعد بيه ، كال الها :- بس اهدي و شوفي ، بس هيدي.

كض راسها و هي الدموع تجري ، باسها بكصتها و رجعها للصدرة :- بس عوينة ابو اصله اليكربج والله بس هيدي

- جني اني شفت جني

- وين شفتي بس كليلي

- هنانه اني شفته ، صغير وشعره مهوس و اسود ، اخاف اخاف ، الله عليك رجعني لبيبي.

- وعلي اوديج بس اسكتي اهدي ، هسه اشوفن شكو برا .

عافها و طلع ، هو طلع منا ، و تطلع الها جمارة من حدر القريوله ، و هاي صرخت بكل علو صوتها ، كومي جمارة و اطفري من الشباج.

رجع حاكم و يريد بس يسيطر عليها ، البت فحطت بعرفة .

و البرا يصيحن :- خايبات شكثر تدلل هاي ، شو عرسينا و ما طلع منا حس و هاي هرجتنا هرج.

- جا التاخذ زلمة من بيته بين ليلة ويوم شتظنين يطلع منها.

حاكم يريد يسيطر على ايمان ، ما كدر ، صاح امه خاطر تهديها ، ما ترضى يكرب ليها ، دشت امه ، كالت الها : اششش شني هالعيارة هاي صمي حلكج

وبس حس الشهكة يطلع منها و العيون كل دمعة تهمل ولا الثانية ، طلع حاكم برا ، مشى ورا البيت ماكو كلشي .

اندار راسه شجاي يصير بالبت

هدية :- يمه بسج لا تتسودن البت

- ضمي اختج لا يشوفها ابوج

اخذتها للحمام دخلتها و غسلت الها ، فتح حاكم البردة ، هاي سدت على اختها خاطر لا يشوف صخام بوجه جمارة .

- شجاي اسوين

- بويه جمارة سوتها اعلى روحها و جلي اغسللها

- شفتي احد ورا البيت

- لا

- قسما عضما لو دريت انت لو امج لو وحدة منجن الجن ايد بالجاي يصير ، بالقران ما تلومن الا انفسجن

سكتت و دارت وجهه و هو ذب البردة بنت ، و ذيج ضامه وجهه خاطر ليشوف ابوها ، اجت كواغد :- ها

- يمه ابوي هددنا

جمارة :- جا شني نخاف ، انا اهججها

- خايبة اكعدي يالمصخمة راح تتسودن البت

خلود :- و علي عرفت انتن ورا السالفة

- اششس لا يسمعج احد

- هههههههه دهر فرجن شعملتن بالبت

بهية : خايبة جميرة من دهر صابج مو بت ، وريثة كواغد

كواغد :- يااااع جا شمالني

- جا احنا كلنا شي ، غير تشبهج

جمارة : يمه اروحن بعد

- اكعدي لا يشوفج ابوج.

ليلى :- يلا راديون خلنا نرد للقصر

راديون :- بعد وكت

- الناس كلها فضت شنهي ننطر بياض العروس

- شمالج تنترين علي ، احترمي نفسج و اعرفي انا منهو ، جنج نسيتي روحج.

كامت منها بأستفار و مشت ، لفت الشيل و البوشي ، و لبست العباية و طلعت ، رادت تمشي ، كالت الها : انطري كريم يجي

- منو كال كريم يجينا ؟

- حكج من سيسيتي بالبستان ما عرفتي ياهو اليردنا .

- شو تحجين الغاز ؟

جسام :- ان جنتو محتاجين توصيلة اكدر اوصلكم

ليلى :- موش احنا النرضى ال ثجيل يتمننون اعلينا ، خلكم بعيدين ومشكورين .

صفت سيارة كريم و مشت ليلى و راديون تهمس :- مريضة مريضة

ظل يعاين جسام اعليها ، و ابتعد من شاف كريم كرب.

بيت شمخي ظلو بايتين الليلة يم كواغد ، و بيت ناصر هم كالو نبات اعلى اللمة .

شالت يسرى عشا العرسان وودته للغرفة و كواغد تعاين اعلى الحال ، دشت هلت الصينية و ايمان بعدها تبجي بهدوء و حاكم كاعد يمها و يحلفلها بالله وانبيائه ماكو شي و هي جاي تتخيل.

اشر لامه و مرت ناصر يطلعن من الحجرة و يتركونها وحدهن. طلعو كلهم و ظل هو وياها :- امونه الحلوة ، شمالها هالعيون ورمن

- رجعني لبيبي

-مو كلت الج و علي اخذج

-جا هسه دنيا الليل ، وين اخذج

- باجر تاخذني

- بعيني ، بس كربي اكلي

- ما اريد

- تجين بحضني

- اخاف

- اهاه تخافين بحضني و انا حويكم ، شو انا راح اكرب ليج

حجه بضحكه :- هاذ ياهو الحنى رجليج

مسحت دموعها و عيونها يتبسمن :- راديون

- فنانه من عبن صاكلتهن الهلرجلين عدل ولو هن موش رجلين ، ادور الذهب اعليهن يهرش

- هذا مو مالتي ، مالتها.

- انا اجيبلج حجل ، شنهو ابو جبير ، الا اكلج سولفيلي شلون كضيتيها ابيت الشيخ

و هداها و خلاها تطمن و تسولف و تنطلق وياه بالسوالف و تنسى الخوف.

و النسوان كاعدات بالهول، حجت مرت ناصر :- خايبة كويغد ما تنعيلنه اعلى الحسين شوية

ام حاكم :- يااااه دخيل الحسين جا وكت نعي بليلة عرس ابني

- جا انت موش ما رايدتها

-اي ما اريدنها لجن النعي فال موش زين اعلى وليدي.

- الحسين بركة ما يجيب الفال النحس كولي يالله

ردتها يسرى :- اي والله انعيلنا شوية الكلوب تعبانة، خلنا نبجي .

كواغد حطت الشيلة و كامت تنعي ، بس ما تنعى اعلى الحسين ، نعت على الدنيا و مصايبها و شلون تغدر ببنادم.

طلع حاكم :- شنهي هالصوت ، هي وكت نعي ، ناس تريد تنام كصرن حسجن

كواغد :- يااااع يريد ينام خايبات كومن كومن

خلنه يدش و كامن الحبايب ، وكفن و لطمن حداد

شيكضيهه

ياليله عرسه شيكضيهه

احو احو احو

ولطمن حيل

طلع الهن حاكم يركض : اليوم اخليجن اتلطمن اعلى توالي اهلجن بنات الجلاااااااب

وكض الهن العوده ، و طشن كلهن للحجرة

و هو يطك وراهن ، طشهن و رد للغرفة ، المن كلهن بالحجرة البصفة و دبجن حيا :- شيكضيها يا ليلة عرسة شيكضيها

كام من حيله ، و دار الهن :- اليوم اعرس اعلى ابهاااااااااتجن

ووكفت امه : اشمالك يمه اشمالك كول ياله

وبعدته :- لو سمعت حس وحدة منجن وعلي ما تلومن الا ارواحجن

كلهن يضحكن بدموع و هو عصبي ، صاحت كواغد :- جا شنهي ما ندبج ما نلطن ، نكض ادينه شلووون

حاكم :- يمه ما اعيدنا و لو انعادت ما ارحم وحدة بيجن.

ام حاكم : بسجن وما بينا حيل سوادينا .

كعدن بحجرة كواغد يسولفن .

يسرى طلعت من الحجرة ، برا لكت ستار كاعد ويا اخته جمارة بالباب : جويعدين و انا شبعت رزايل غاد

- عليش ؟

- ابوك رايد يعرس وبلانا بلوة

ضحك بأستهزاء ، ضحكت هي : جنك عرفت السالفة

اندار الها : يا سالفة ؟

- سالفة ليلة العرس

ضحك و دار وجهه يعاين بالفرع ، حجت :- جمارة فوتي ياله امج تريدج

دخلت جمارة وهي وكفت بالباب : هم تتمنى تعرس ؟

تعجب من جرأتها ، عاين الها :- ليش ؟

- هيج اسأل ، ابن عمي و اسألنك.

- ماكو احد ما يتمنى يعرس لجن بعد وكت

- اي حكك تحجي هيج ، الا انا شكول اعلى حظي

- شمالج ؟

- صار عمري ٢٧ سنة و بعد محد يدك بابي، حتى ويلاد عمي مامش وحيد طلبني ولا نهى عليه، خ اتي عرسن و انا قسمتي واكفة .

- و عليش ما تعرسين

- هو انا لاكية وما كايلة لا ، الا شفايتلي اشوفن وحيد مثلك ، و اخذنه و نخلف جهال و يصير رجلي

ضحك هو ، كامت تمسح على بطنها و جسمها و تكله ، جسمي يحكني اليوم ما ادري شجاه.

هو ارتبك من تصرفها .

- عليش كاعد هنا ، ادخل جوا خل نسولف ضوجة

مشت و عافت الباب مسدود و راحت ورا البيت ، هو دخل راسه عاين ، شافها مشت ، كام من مكانه وراح

كاعد.يمشي وراها ، وكفت ضرب بيها ، ضحكت هي و تكله ، بس عاين عاين .

غرفة ابوه خال البطل مشتغل اعلى الشباك لإن ايمان تخاف لو ظلمة ، متمدد و مخلي ايمان بحضنه :- شكلهم يخليك تعرس من باجر

- اششش لا تعاينين عليهم

- يمتى اعرس و اصير مثلهم .

كامت تحجي و تقرب نفسها عليه ، هو اخذه الطيش و تقرب عليه ، تجاها للحايط و اخذ راسها يبوس بيها وايده تلعب عليها

هي تبعد بيه و تقربه اله ، افترت مرت ناصر و لكتهم بهاذ الوضع و صرخت :- يااااااع شجاي اتسوي بالبت .

فزوا اثنينهم :- يمه انا .. انا

ستار :- اااااا

ما عرف شيكول ، هد المكان و مشى ، كضت ايده :- تعال جاي شنهي تتعدى اعلى البت و تشرد ، وينه ابوك

حااااااااكم

ستار :- خالة مالها داعي ما صار شي والله

- لاله لا انا اكضن ابوك يو لا ... كواااااغد وينج

( القصر )

زناد : ها اتونستو غاد

- يا ونسة بت اخو الخاتون تتعاير و كضتها اعلينا تنعوص

- البت زغيرة

- افادها افاد جاموس يا زغيرة

- بت المدينة موش مثل بت الريف

- الا اكلك ، ردنا نجي ليجاي اعترض النا ابن سلطان

- شرايد ؟

- يكول اوصلجن

- يخسى

- والله يبو ياسر بس ما اريدنك تزعل من كونك غالي اعلية

- شكو

- راديون مثل اختي و اخافن اعليها

- و شمالها ؟

- وكت الزفة ما صفت ويانا ، انا شفتها طرت الحديقة و طلعت من الباب متل البستان ، و من وصلنا بيت حاكم ياله اجت .

- شقصدج

- ما اعرف لجن ما بطلت ضحك ويا ابن سلطان ال ثجيل ، انا اعرف هي زغيرة لجن الطيش جايز يوصلنا مواصيل و تصير من وراها دم ، ال ثجيل ما يحبونا و خافن يورطونها و هي زغيرة .

كض اختك يزناد...

رواية كحل عرب الفصل السادس عشر

( شيء مريب يحدث في البيت)

لا تعاود ..

اچفوفهم

حرگت اسنينك

والسمه مغيمة كواغد

لا تعاود ..

دنو الموت الرگبتك

وانته ذاك

اليم رگبهم

تغزل وتمطر گلايد

لاتعاود ..

جرحك !!

أولاية غميجه

والندم ماكل قسمتك

واسمك بكل شفة جامد

ابالمن ؟؟

تنشاف دهله ابالمن

ابالمن ؟؟

تخطف عيونك

خطفت الريح اعله گذله ابالمن

كافي بسك

حزنك تعده گذلتك

وجفك ..

بكثر المتانه

ناسي اصابيعه بصفنتك

لاضگت !!

ضحكة احبيبه

ولا ضحك وياك وكتك ..

(بيت حاكم )

ام يسرى :- وينكممممممم تعاااااالو ليه

ستار :- هش عمه شنهي السالفة

- وعمى العماك ولك ما تستحاي كاض البت و حاصرها ، ما كلت بتعمي ، وينك يحااااااااكم تعال و شوف ابنك

كواغد :- شنهي الحس ، شجرى و الصار شمااااالكم

- تعاي كربي عيوني كربي و سوفي ابنج شمسوي ابتي

عاينت يسرى تبجي اعلى كتر و ستار الوجه كركم و بس يحاول يسكت بيها و البالبيت كلهم طلعوا يعاينون ، حجت :- شماله ابني ، شسوا، شعامل يمة

ستار :- يمه والله

حاكم : شنهي الصوت هاذ ؟

مرت ناصر : تعال عاين ابنك كاض البت و حاصرها و هاي مكطعه روحها من البچى ، شنهي مامش مستحى ما كال بت عمي ، رايد.يصخم وجوهنا ابنك يحاكم ، يدوس بتنا و يتعدى اعليييييها يممممممممه .

ستار :- بويه بس افهمك و علي...... قاطعه حاكم بعد ما جان صافن مستغربو، كاله :- امش وراي

اخذ ابنه و طلع و مرت ناصر عجت البيت ، ايمان وكفت بالباب تعاين عليهم ، وملفلفة روحها ، وواكفه طرف ، طلع حاكم بالباب :- شنهي الصار احجيلي

- بويه

-احجي ولا تجذب

- وعلي ما اجذب لجن ما صار شي قوي

- شكصدك

- يعني

- خذت البت ؟

- لا وعلي يابه ، هي وكفت بالباب و تحجي بجرأة و كالتلي تعال غاد عليش واكفين بالباب ، بس دشينا هي كامت تتحارش و صار الصار

- هي يو انت ؟

جاي يحجي ، طلعت مرت ناصر من البيت و حاطة العباية اعلى راسها و جارة بتها ، وكفها و كال الها : اصبري يابه وين هايمة ، اطنا صبر نعرف شنهي الجرى

- شنهي اتاني بتي تنفضح

- بتج ما مفضوحه ، بتج و الولد بارادتهم ما غصبها اعلى شي

- يااااااع يعني تتهم بتي

- بويه اعلى هونج ، شتهم ، اوكفي حدج ، شهرتينا

- لا و العباس ما اوكف ، اليوم اخلي الدم للرجاب اعلى عملة ابنك العايبة ، و اروحن لسلطان ادشن اعليه.

راد يكضها لجن ما كدر، اخذت البت و مشت ، و ظل هو اعاصابه هايجة ، كض ستار كضاه كضيات ،دفرا اعلى رفسات اعلى جلد بالحزام، و هديه و كواغد يفازعن بيه و هو يصرخ:

- اليوم انعل سلف سلفاك كوااااااااااا* ولك سرسررررري ابيتك ادوس مرة ، ولك ما تستحيييييي ، ما عرفت العيب

كواغد: جا مو هيج

- الا انت ما تحجين من عبن كله منج ، احجي و ارد يكواغد هدي شغل القصر و جابلي فروخج ، يكواغد عوفي الخوارة و اكعدييييييييي بالبيت ، هايمة اطرطرين بنص هالسلف.

ارتاحيتي يوم الأبنج صخم وجهييييي ، ارتاحيتي من جاب المصيبة و حطها اعلى راااااااااااسي ، بدل اللطم و النعي لو موچدة ابنج يصيييييييير هيييييج ، عايفة افرووووووووخج هدا و ها ها ها ها مكضيتها لطممممم

كواغد سكتت ما ردت ولا فكت حلكها ، ظلت واكفة و محامية اعلى الولد ، و ذاك مزورك ،و حاكم ما بطل صياح.

لحد ما لبس دشداشته و طلع بهالليل من البيت ، راح اعلى بيت اخوه ، عاينت كواغد لأيمان و كالت الها : تعاينين ولج ، تف لا علا بجيتج من ساعة اللفيتي و انا بيتي مك من المصايب.

ام حاكم عاينت اعلى ايمان ، صاحت بيها : شنهيييييي وكفتج ، دشي و صكي الباب .

ايمان : اخاف وحدي.

ام حاكم :- دششششششي ولا تتعايرين

دخلت و جمارة راحت وراها كعدت يمها ، عاينت اعليها :- انت ليش اجيتي ليجاي ؟

- ابوج تزوجني هناكه و اجينا

- لا تجذبين اليوم عرستو

- لا والله صار هواية.

- هم شفتي الطنطل

- لا تكولين اسمه اخاف

- هو من وراه صارت هاي الطلايب.

- صدك ؟

- اي هو دايما يسوي طلايب بالبيت

- عوفي عوفي لتحجين شي ما اريد اسمع

- ذاك اليوم انا دشيت للحمام خاطر اسبح و لكيته جاعد

سدت اذانها ما تريد تسمع ، عافتها و طلعت ، كامت ايمان وكفت بالباب و تعاينلهم. .

كواغد تحجي ويا ابنها : جا انت من شفتها مو خوش شكو تجاريها ، اهدنها و ادش

ام حاكم : جا هي المرة التستحي يو الولد ، الويلد زغير و لعبت اعلى عكله و حمينا و ما شاف الدرب عكبها ، لجن الحيف اعلى ذيج الزايعه المستحة فد دور.

كواغد :- جا انا عدالج ما اعرفتها ، و العباس اعرفتها من وكفتها و مضاحكها وياه اعلى الباب ، و كلت الها هديوة يمه عينج اعلى اخيج لجن ااااااااخ اااخ من دروب النسوان ، يو حطن زلمة ابالهن ، امس رجلي و اايوم ابني ، تعالن و جابلني شلوووون بيه كللي.

هدية :- يمه انا ما افتهمت يعني شنهي شسوالها

- دشي انت الاخرى ، دشي جوا.

(القصر )

اندكت الباب ، صاحت راديون :- ياهو

انفتحت الباب و دش ازناد :- انا ازناد ، رايد احجي وياج

- هلا بيك خوية ، دش تفضل

وكف بالب و كال الها : رايح لكفا البستان اليوم العصر

- لا عليش

- ما اريدن نكران و لو نكرتي محد يفكج يمي ، شعدج بكفا البستان.

- مامش غير مرتك الحية حجت هالحجي

ضربها راشدي اعلى خدها : تضربني ازناد

كضها من شعرها : سمعي ولج تحجين شعدج غاد لا والحسن هنا اكصبج

- عوف ايدك ميلها ازناد

- احجيييي

- جاي اكلك ماااااا رايحة ما راييييحة ، يمممممممه وينج .

ضربها الضربة الثانية و دفعها للكاع ورفسها و هو يكللها: شجاي تهرمين من ورانا ولج

راديون كامت تصرخ بصوت عالي و تبجي، دخلت الشيخة ملوك ، صرخت : ايددددددددددك

- حاسبي بتج وين جانت

- يمه جنت بالعرس و علي

- لا تحلفين جذب ، ناس اجو و كالولي شفنا اختك بكفا البستان و اريد اكمل ، احط الجيلة براسج والله ، احجييييي

ملوك :جني انا مةش موجودة يزناد ، و تعال جاي الكالك شفناها شلون صدكتهم و اختك طلعت للزفة مبوشه ووجها ما ينشاف.

- تنعرف من عبايتها المذهبة

راديون :- ما لبست العباية المذهبة ، يمه والله لبست السودة ، هاي كله عمايل ليله مرته من عبن هي كضتني بنص العرس تكلي وين رحتي ، اكلها جنت هنا وما تصدكني.

زناد: تنكرين ما شفتي جسام ابن سلطان

- ما اعرفنه والله ما شايفته والله يمه.

ملوك ، اطلع برا

زناد : اطللللللللع برا زنااااد

طلع و سدت الباب، و راديون صاحت :- يمه والله.... قاطعتها ملوك و هي تدفعها للقريولها و همست

- يو جنتي ظانه منومتني اعلى كفاي تكونين غلطانه يبت بطني ، انا اعرف رحتي و اعلى ابالي احاسبج لجن كلت بهداي احجي وساج، و موش وكت احسابج ، امشي لاخوج و مرته احلن امرهم ، و اردنلج ، منا لذيج الساعة باب الحجرة ما تعكبينه افتهمتي يو لا

- فهمت

- صكي الباب وراي

طلعت و توجهت لحجرة زناد ، دشت زناد ماهو ، بس ليله مرت زناد تمشط لبتها ، وكفت بنص الحجرة و حجت بصوت واضح :- زناد وينه ؟

- مامش ، طلع و ما رد

ضحت للجاهلة و صاحت : سليمة يا سليمة

- امرج شيخة

- اخذي الفرخة منا بسع

وكفت ليله و سليمه ضحكت ويا الجاهله و اخذتها :- شنهي يشيخة شرايدة من بتي.

- هاي حفيدتي و انا الاعرف بامرها ، لمي اغراضج بساع و اطلعي من القصر.

- عليش

- موش انا اليتوشوش اعلى بتي وينحجي بسترها ، و لا صار ولا دار اليجيب طاري راديون اعلى السانه

- بس انه

- انت الكلتي لزناد

- لا وعلي عمه مالي غرض ....... قاطعتها

- جلمه و ما اعيدنها ، لمي اغراضج و اطلعي و ان نفذتي ، لستهدي لفضيحة اختج

- اختي شمالها

- التبيع الشرف يم بتي و ما تعاين اختها شمالها ، خلها توحد عدل خافن الجلمه تلوحها هي ولو انفضحت اختج تطلكين من كون ولد الشيوخ ما ياخذون من بيت طالته الفضيحة.

- عمه احبن ايدج

- ايدي تنكسها المثلج ، نفذي .

حجتها و طلعت وهاي كامت تصفك اعلى وجها و تلطم و تبجي ، سألت الحرس اعلى زناد ، كالولها ( راح للمضيف )

ردت لرايدون ، فتحت الباب، لكت هاي تبجي و تشهك ، حجت : كفي دموعج و تعاي جاي كليلي ، شنهي سالفتج.

- ما عدي كل سالفة

- وياهو الملثلم اللاكيتي بكفا البستان.

- مامش..... قاطعتها

- انا امج سترج و غطاج ، و يو كتيلي ما افضحنج ، و احميج من الرايدين يطيحونج ، لجن اريد اعرف ياهو هاذ الماخذ عكلج و خلاج تنسين طوايف اهلج و عاداتهم و تفرين و تشوفينه.

- واحد احبنه

- ومنهو هاذ الواحد

سكتت ... عاينت اعليها الشيخة : ناطرة الرد ؟

- يمه ياهو الجان ، لجن انا..........

- ياهو ؟

مو احجي وياج ، يااااهو

- خنجر

نشغت الشيخة :- اخو حميد ؟

هزت راسها راديون

- تشيلينه من بالج كلش ما تجيبين طاريه، يالما بيج حظ عفتي هالزلم كلها و ركضتي اعلى هاذ النكري .،دحبيلج شيخ تاجر ، مطيحة روحج بواحد نكري.

- يمه ما اكدر

- اشششش لا تكولين ما اكدر ، انسي انسي انسي كلش ، لا ابوج ولا مقامة سرضى يناسب واحد نكري ، عليش معشمة ارويحتج بعشج ما من وراه رجية

وهي تحجي سمعت حس ليلى تبجي و تحجي ويا زناد ،كامت من مكانها طلعت و صكت الباب

شافت ليلة تبجي و تشكي لرجلها ، وكف : شنهي الجرة و اطردين مرتي

- عوفني من مرتك انا باجر اجيبلك عدالها بت بيوت زغيرة و احلى منها، تعال اريدنك

هاذ عاف مرته و مشى وره امه ، و هاي كامت تصرخ ،كضتها سليمة و طلعتها.

و الخاتون تصيح : صبيحة شديصير ؟

- خاتون طردو مرت زناد من القصر

- لويش ؟

- الشيحة ملوك بعد

- راح يوكف كلبي على سرحان كليلي وين ممكن يكون

- سرحان زلمه و ما ينخاف اعليه خاتون لا تشغلين بال .

زناد : من طردت حرمتي عرفت السالفة جايدة يشيخة

- مامش سالفة ، لجن ما ارضى لوحيد يفرك بين ولدي.

- يفرك لو حجه الحك و خاف اعلى مصلحة العايلة

- مصلحة عايلتي انا الاعرفها موش احد غيري.

- راديون كبرت يشيخة و صار الزوم نزوجها ، كل اليجي لاع و لاع، لا تاجر تريد ولا ابن شيخ ، شنهي اسباب رفضها عدها شي

- اسبابها مدلله و ما ترضى تهد.بيت ابوها

- هاذ موش سبب ، ان جان الحجي صح و ابن ثجيل رايدها

- ابن ثجيل ياهو هاذ

- جسام ، شايفينها تحجي ويا و تضحك بالعرس

- الكالك جذب اعليك

- كلهم يجذبون بس بتج الصادكة

- زناد هاذ الحجي ما ينحجي بوجهي و انا امك

- محشومة ، لجن انا قررت و من بعد قرار الشيخ ، راديون لابن عمي ناظم و تنتهي السالفة

-موش انا الارضى بهالحجي

- ولا انا الارضى بكعدتها البحلها عدها ثلث فروخ و هي ظاله هنا كاضة هالراديو هاذ و التفزيون و تسمع بهالاغاني .

حجاها و طلع.

(بيت سلطان )

حاكم : السلام عليكم

سلطان - هله وعليكم السلام

- ما ادري ان جان واصلك خبر

- اي دشت اعليه مرت ناصر وكالتلي

- الصار بارادتهم موش غصب

- غصب يو موش غصب ، اخذ البت لابنك و استر اعليها

- ابني جاهل دخيل بختك شنهو هو و اعرسله

- الجاهل ما يعمل عملته

- لا حو ولا قوة الله بالله ، ولكم والله ما صاير هالعرس الاكشر هاذ طلعوه زقنبوت اعليه.

- انا كوة هديت مرت ناصر و كلت الها تسكت اعلى السالفة و البت ماخوذة بلايه صايح ولا فضايح.

- لجن هو يكول هي الرادت منه و هي الجرته

- جا شتريده يكلك انا السويت ، لزوم يحط اللايمة اعلى المجني، و بعدين انت شو طالع ابو الراهي ، ابنك غلطان و تريد تطلع منها سلامات ان ما اخذها ينجتل هو وياه ، عليش توصل لامور لهالمواصيل .

جاي يحجي و دش ناصر ، بلا حجي هد اعلى حاكم و كضاه من هدومه و تكاومو اثنينهم و حاكم يغلط و ذاك يرد.

طلع منهم حاكم و هو روحه تفور ، دش البيت ، ستار بحجرة امه و نايمين كلهم حتى ام حاكم وياهم ، و ايمان كاعدة بالهول : جا شعدج هنا

- كاعدة

- عليش كاعدة هنا

- مدري جنت واكفة بالباب شو كلهم فزو وطب نامو من دخلت انت ، اني كعدت هنا

مد راسه و هو يكللهم( نامو اليوم و شوفو باجر شراح اسوي بيكم)، مشى للغرفة مالته و ايمان وراه

دش نزع و بدل ملابسه و هي تكله :- اني اخاف وحدي

- تراج طرشتيني باخاف و اخاف ، نامي عاد و فضيني البيه كافيني.

ايمان : بقيت صافنه و هو يحجي اول مرة يصيح عليه، ضاق نفسي و مشيت و اني اباوعله ، هو كف الغطا تمدد و دار و نام ، كعدت و اني اباوع منا و منا ، و عيني ع الشباك لا هم يطلعلي الجني و شايلة رجلية ،

تمددت و تغطيت قوي و احس على ساعة يطلع الجني من جوا الجرباية و يجر رجلية و ياكلني، بقت تجي على بالي تخيلات كلش مخيفة ، كمت ابجي بهدوء ، انرفع العطا عني

فزيت من مكاني بسرعة ، شفته حاكم : شمالج تبجين تراج والله علعلتي گلبي .

- اخاف ليطلع الجني

- بويه ومحمد الف الصلاة و السلام اعلى اسمه ماكو ، جا بيش احلفلج بعد و تصدكين.

- اني شفته بعيني انتو ليش مدا تصدكوني ، دا اكولك والله شفته

- وين شفتي

- طلع منايه ، وجه اسود و شعره يخوف

ظل صافن بيها ، خاف البت بيها شي ؟

جرها و كال الها : شو تعاي

و جرها لحضنه و كام يسولف الها على الصار و شلون تعارك ويا ناصر ، ردت سألته ليش تتعارك وياه ، رجع حجالها قصته من اول ما صار الى ان اخذته السوالف ورادها ، كال الها : انا اعرف انت اجيتي لهنا و محد علمج اعلى العرس ولا كالج شنهي العليج

- شنو ؟

بقى يسولف الها بطريقة بسيطة حتى ما تخاف ، و اتفق وياها ان القصة كلها ما تاخذ هواي و الموضوع لازم يفض الليلة

تعسر وياها شوية .. بس تمت بينهم بخير

ونام الكل

كواغد و جروحها

و ستار و مخاوفه

هدية و حسباتها

وراديون و ظنونها

وهدت الديرة و حتى الحلال هود و نام

وما عاد ينسمع غير صوت الجلاب و الواوية.

وظل غريب الديرة مفقود و محد يدري عنه.

للصبح كعد حاكم مرتاح ما جن مصيبة البارحة صايرة ابيته ، مبتسم و يكل لأيمان : استعجلي انت و هدية بالريوك على ما اغسل

كواغد تعاين ، ام حاكم كاعدة ، تقربت ايمان : عمه هايه حاكم كال انطيها لامي.

- شنهي هاي

عاينت الها ، وصلة بيضة وبيها دم

كال الها :- بالمبارك ان شالله ، ضميها عدج ، و طلعت الها فلوس ظن حدر فراشها و حطتها بأيدها

كواغد تهز براسها : و انا اكولن الزلمة طلع منشنش ، اثاريها ماخذ بنية و فرحان برويحته .

- جا بعد صارت ، نرضى بالجرى والله كريم

كواغد : ايييييه بالخير ، اكومن اروحن للقصر ما بيه اشوفن هالتمسلت هاذ .

رادت تطلع ، كضها حاكم : وين ؟

- هاجه شعدك وياي

- اكعدي نشوف مصيبة ابنج

- اليشوفك منشنش ما يكو عدنا مصيبة

- شو حاطة كورج ويا وجهي، كلت الج ، كعدي خاطر نحجي ، ياله

- من اردن ما الي حيل

هدته وراحت ، هو عافها ما حجه ، طلب من هدية و جمارة يروحن يجيبن ماي ، ذني تسابكن اعلى الماي ركض للشط

بالدرب و شافن راس صخلة بيها كرون و كلها دم ، كضتها جمارة من كرونها

هدية : ايييي هديها ميلي عنها كلها وصخ و دم

- انا انا اريدنها

- شتسوين بيها

- مالج غرض

اخذت الراس و دخلن للبيت ، و جمارة ركضت حطته ورا البيت ، و هدية انطت الماي لايمان خاطر تحضر لابوها ، بس هاي كلشي ما تفتهم وين تحط وبيا معجنه .

حاكم : هدوة بويه كعديلي اخوج بالعجل

-اي

راحت للغرفة كعدته ، و مشى كبال ابوه :- ها ستار

- ها بويه

-رضيت من طيبنت شيبات ابوك ؟

- بويه و علي ما جان ابالي هيج

- اجان ابالك يبني ، بساعة طيش ضيعت عمرك يا تاخذ بت يا كبرها يا تنجتل.

- بويه والله ما دريت

- الدريت و الما دريت ، البس نخطبها من ابوها اليوم ، و تنزل اعلى راس عمك تتعذر منه و كله المرة حرمت خاطر نعقدلك اعليها.

لبس ستار و راح ويا ابوه لبيت عمه ناصر.

هدية :- ولج جميرة شجاي تسوين

- امشي غاد

- شنهي هاي ، يا ولج شمسويه براس الصخلة عليش صابغة راسها بدم

- اشششش

اعاينلها حطت الراس بعلاكة سودة ، و مشت بهداي عاينت بالهول مامش احد، اجت شالت الراس وركضت بيها لحجرة ابوي وايمان تسبح .

ظليت كاعدة بمچاني حتى تخرت اعلى العلى القصر من وراها ، طلعت ايمان ، و دشت الحجرتها توها حطت رجلها و صرخت : عاااااااااااااااااااااااااااااااااااا

و طلعت من الحجرة زحوف و تصرخ بكل حيلها ، و جدتي تكض بيها و هاي تصيح : اخذوني لبيبي ، اخذوووووووني

- خايبة شمالج

- وحش وحششششششش ما ابقى ما ابقى

وتريد تطلع من البيت و هدية و ام حاكم كاضينها

و جمرة زركت شالت الراس و طلعته وايمان تصرخ.

كضتها ام حاكم طكتها و صكت الباب اعليها.

البت انرعبت من صدك كامت تضرب اعلى الباب : عليكم الله طلعوني اخاااف والله بعد ما ابقى وياكم طلعووووووووووني .

هدية انكسر خاطري اعليها ، ردت ادش اعليها صاحت بيه جدة و كالتلي امشي وره امج بسرعة ياله.

رحت لامي كلت الها : يمه هيج و هيج سوت جمارة

كواغد : بعد امها معدلة

- يمه البنية ما شفنا منها شي ، و حسب ميكول ابوي البت مظلومة عليش نظلمها فوك ظليمتها ؟

- انت كل خير ما بيج يو مثل اختج جان صار براسج حظ امممم "و غمتها"

ايمان : ابجي و اصرخ و محد يفتحلي الباب

بقيت ادعي ربي يجيب حاكم دا يفتحلي الباب ، و ام حاكم تصيح عليه لإنو ابجي .

هنا كلش صعب حياتهم ، اني ابقى يم بيبي احس

خلي تاخذ فلوس ابويه ما اريدهم بس خل ارجع لبيبي.

بقيت كاعدة ولامه نفسي وابجي و اباوع بأكتار الغرفة

شويه و اسمع صوت يم الشباج يسوي ووووووو

كمت اضرب بالباب حيل ، كل جسمي صار يرجف

واصرخ من كل كلبي ، دخلت ام حاكم و كامت تصيح عليه ، انس عفتها و طلعت

جرتني من ايدي كمت اصيح : عوووووفيني عووووووفيني

- ولج شكثر نمرة انت ، راكدي

دخل حاكم اعلى الصوت و ستار وراه : ها ها شكو

ام حاكم : تعال و فكني منها تراني جزعت و علي ، دخذها

- شماااالج

- واله والله شفت راس وحش والله

- دكولي يا الله بنيتي و اخذي نفس ،

- والله والله شفته

- صحيح مصدكج بس بهداي خلني افهم عدل

اخذ ايدها و هاي تشهك ، دخلها الغرفة و كال الها : وين شفتي الوحش

- هنانه ، والله شفته هنانا ، راسه جبير و احمر و بيه هيجي كرون .

عاين زين ، اكو اثار دم اعلى الميز ، مد ايده و مسح ، شاف دم وريحة زنجة بالمكان ، مبين ريحة راس ذبيحة.

كام و طلع و كال لامه : التصرفات هاي المن ؟

- يا تصرفات

- دم اعلى الميز و ايمان جلي تشوف اشياء غريبة

- جا شنهي انا شلي غرض

- يمه البنية شذنبها وياكم كلولي ؟

كواغد مغتاضة مني خل تجي اطلع حركتها بيه ، البنية بيش اذتها و جاي تسوي وياها هيج.

ام حاكم : جا كواغد موش هنا شلها غرض

- لا تكليلي شلها غرض ، كواغد مرتي و اعرفها هالسوالف تطلع منها ، ستار صيح امك بساعة ياله .

اندار اعلى ايمان كال الها : لا تبجين بويه ذوله مناعيل الوالدين كاعدين يتلاعبون بيج من عبنج تخافين ، يو شفتي شي غريب كضي وجيبي الي

- لا تخافين وعلي ماكو شي.

- اني شفته

- ادري شفتي مصدكج اني بنيتي انت ، لجن لا تخافين ، البيت ما بيه طنطل لجن بيه ناس الطنطل ارحم منهم .

كام من مكانها و ظل يدور بالبيت كله ، الى ان لكه راس مال صخله بعلاكة سودة ومدمايه ، صفن بيها : بالله هاي لو تحطها جدامي هم اخترع ، ادري ما عدكم عقول نا تكولون البت تتسودن.

دشت كواغد و ستار وياها ، بدخلتها ذب الراس يم رجليها و كال الها : شنهاي ؟

- شني انا ادري ، عليش صحتلي عدي شغل

- والله من انعل شغلج لابو الخلفج لابو الساعة التعرفت بيها اعليج ، كضها من هدومها : كلب ما عدج انت ، ما تكولين البت شني ذنبها و تخووووووووووووفين بيهاااااااا

كواغد : جنك من عرست نسيت انا منهي و تعديت اعليه يحاكم ، هلي الثانية و الاثنين لخاطر ايمان

- و انعل سلفاااااج ، عدج وياي شي احجي الي الي الييييييي البت شلها غرض ، شنهي من مرة انت ، ولج لعبت روحي من مكايدج و دسايسج ، مافرق بينج و بين ملوك التحجين عنها وكت اليلوحكم شي اطلعون وجوهكم الاخر

- هس انا الطلعت مو خوش و اشبه ملوك ، خوش انا اهدلك البيت و بالعافية اعليك انت و ايمان

ستار: يمه لا ، عليج الله لا ، بس دشي داخل

- ميل عني يستار

- يمه لخاطري وعلي ، بس اصبري ابوي عصبي

- ميل عني يمه

دفعني و دخلني للحجرة و انا دموعي تنهمل ، جان يو طب ما يفاركني و هو يسولف وياي ، حتى من اكعد ويا الحلال يكعد وياي يسولف ، من اجت هاي للبيت و لهساعة و الزلمة ما يشوفني ، شسوي و اخلص منها ، منين اجتني هالمصيبة هاي

كعدت بحجرتي ابجي اعلى حظي و نصيبي و اسمعنه يراضي بذيج ، و باباتي و بنيتي و لا تخافين و انا يمج

ااااااخ يا نار كلبي زلمتي و انوخذ مني غفل شلون اردنه ... شلون ارد لذيج الايام الجان يجيني بيها مشتاك .. صبرك يبري تراه الكلب بعد موش حمل هموم.

ستار : لا تبجين يمه ، شنهي تهتمين لابوي و احنا يمج

- لو عشرة ييمه كلبي يظل معلك بابوك ، وابوك من يوم الجاب هاي و هو عينه ما حطها اعليه ولا حجه وياي كلمة تطيب خاطري.

- بعد بعد اصبري تمشي الامور ، والله يرجع طبيعي ، لا تلومينه منا تعارك ويا عمامي و منا سالفة راس الصخلة و كلها جمعت عليه.

جمارة : يمه انا ما اعوفنها والله ، ما دام تبجين الا اخليها تبجي مصلج

- هديها يبعد حيلي انت ، هديها يمه

الا صدك ستار شصار اعلى سالفة يسيره هاي

- ابوي يكول باجر نعكد اعليها

- ياااع و تعكد اعلى وحدة اكبر منك بعشر

- جا شسوي يمه عمامي يو ما ابوي رادوا يحطون الجيلة براسي

- يولون غير انعل ابهاتهم يو كربو منك .

حاكم : تعاي شوفي تعاي

ايمان : اخاف والله اخاف

- لا تخافين بس كربي

اخذها ووداها لراس الصخلة و كال الها : عايني هاي راس باجة عادي لا وحش ولا ابد

- و الشفته البارحة

- اشفتي

- جني مكفش و اسود

شلونه هاذ الجني ؟

صغير

- ههههههه عرفته

جمررررررررة جمااااااارة

- ها بويه

- كربي بعد ابوج

- اي

دنج و كعد و كال الها : تعرفين اليحلف بالامام الحسين جذب شيصير بيه ؟

- الله يذبه بالنار

- عفييييه بنيتي المومنه ، هسه كليلي ، و الامام الحسين موش انا الفززت امونه و سويت روحي طنطل

- عاينت عليه

- لا بويه موش انا

- جا ياهو

- هاي هديوة

- متكده

- اييييي ، و انا اكللها مكرودة مكرودة ما ترضى و طتني و طلعت دم من راسي

- ولج جميرة خافنج تجذبين

- لا ما اجذب انا.

- سمعي يابه ، اريدنج تصيرين صديقة لأيمان و تحنينها ماشي .

- ماشي بويه ، بعد ما اخلي الطنطل ابو وجه الاسود يكرب ليها

ضحك و هو يكول الها : و علي ما طنطل غيرج

شالها ويحبحب بيها و هاي تتمضحك بحضنه.

ظلت ايمان تباوع الهم ، ضحك و كال الها : جن اكو طير غار ؟

وفتح الها ليده ، ضحكت ايمان و حضنته ، نزل جمارة و مشا للغرفة و ايمان وياه : بعد لا تطلع ابقى يمي

- وشلون اظل مجابلج

- بابا مو انطانا فلوس هواي

- اييي

- بعد لا تشتغل و ابقى يمي

- ولج شايب كاتلني الضيم شحبيتي بيه

- حباب

- بس

: اي

- جا ما طولني حباب ، تعاي نعرس من جديد.

اخذها وهو يدغدغ بيها و هاي تضحك بصوت عالي ، و هم غرفة ابطن غرفة ، و كلهم يسمعون الضحك مالهم.

للعصر مشى حاكم و ستار لبيت سلطان و كاله :- باجر ناخذ البت

ناصر :- شنهي ماخذلك فصلية و تاخذها هيج بلا عرس

- والله هاذ العدي ، امس جان لبيتي عرس ، و تريدني اسوي عرس لاخ ، اعذرني خوية ما عدي ، و يو تفضبت و اطيتني حك ابوي من كاعه ، ابطن عيني اسوي لبتك عرس

- جاي ادور حكوك يحاكم

- انا ما مدور وياك حكوك لجن ما عدي ، كاعد عطال بطال لا شغل ولا مشغله

- تريد تغشم نفسك و انت ماخذ بت واحد زنكيل و شابع فلوس و مسوي ليك عرس يسولف بيه السلف كله.

- جا بت و صغيرة و تستاهل العرس

- و بتي بايرة

- انا ما عبت بتك ، و خلها بمعلومك ماخذها من طرف خشمي لجن سداد فضيحة ، و عرس مامش ، ناخذهم للسيد يعقد ليهم و ابوك الله يرحمه

- سهله يحاكم ، عدك بت وولدي ناهين اعليها و نردها الك بالعافية يناصر .

حاكم : جرب و انهى اعلى بتي و شوف شعمل بحالكم

- بتك ما تصير لغير فلاح ابني

- لو اعلى جثتي ، بتي ما انطيها ليكم

طلعت منا و النار تفور براسي ، عاينت اعلى ستار و كلت اله : الله لا ينطيك اعلى هالورطة هاي ، هي سرسري ، جا ما حميت الا اعلى بت عمك

اخذه و رده للبيت ، وكاللهم : باجر ناخذ البت ونعكد اعليهم ، و ام حاكم ظلت تلطم ، شنهي ذول و تاخذ منهم بت

- جا شسوي غير ابن ابنج هاذ السرسري الورطني بيهم

كواغد - يو ما عازمهم اعلى عرسك جا ما صار كل هذا

- بالله انت خليج محضر خير ، يو مفتحه اعيونج اعلى ولدج و عايفة الدك و اللطم جا ما صار ، لجن هدد و ما فالحة غير بالدبج و اللطم.

هدية : جا هسه عوفو العرك و كول ، ياحجرة ياخذ ستار و احنا ما عدنا بس هالهول

كواغد: ناطر يطي حجرتي و يخلينا انا و فروخي بالهول

تجاهلها و دار وجهه لامه : يمه ولو اكصر بحكج لجن اطي الحجرة لستار و انا بعون الله باكرب فرصة ابنيلج حجرة

- ما عدي شي يمه ، افرشي افريشي هنا و انامن انا و هديوة .

-هاهية انحلت ، رتبو الحجرة بوية و فرشولكم فراشين بيها ، بس كون زينات موش راكدات و خلنا باجر نجيب البت و نخلص من طلابتها

ثاني يوم حاكم اخذ ستار و راح بيه لبيت ناصر، اخذو البت من انفوس متضايجة ، اخذوها للسيد بالجامع ، عقدو اعليها و جابوها للبيت.

حتى محد هلهلت ولا وحدة صفكت ، اخذوها للغرفة و صكو الباب اعليهم

يسرى : جني فصلية ولا جني بت عمك

- ابوي ما عده من عبن كبل امس معرس وغاط بالدين

- جا بس كدر يجيب لذيج البغدادية كنتور و ميز و قريوله ، و انا وياك حاطنه بحجرة مصخمة و ما بيها غير فراشات

- العرس صار بساعه بساعة

- انا مظلومة بكلشي يستار ، حتى بعرسي

وكعدت تتبجبج و هو يسكت بيها ، و حضنته تبجي بحضنه الى ان تم عرسهم باقل من ربع ساعة .

دخلهم حاكم لغرفتهم و كعد كال الهم : بس صبولي لكمه خلوني انامن هنا ما اريد صوت

ام حاكم : جا انت ادور بطنك و ابنك زغير و عرستله ، علمته يو لا

- لا والله ما حجيت وياه بهالموضوع ، استحيت

- جا كون يدبرها

- يو ما دبرها احنا موجودين

بعدهم ما جايبين العشا ، طلع ستار و مبدل ، و يسرى لابسه غير هدوم ، و دنكت اعلى راس عمها حبته ، و اعلى راس جدتهم .

حاكم : هااا

ستار : جا غير تباركلنا

- عليش

- تم عرسنا

- هااااااا ، دكول وعلي ؟

كعدت يسرى مستحية و خلت بياضها بيد كواغد ، و كواغد تعاين :- يااااااع ، خخايبين تحجون صكد يو تشاقون

- بويه بعده العشا ما جاي ، شنهي اسرع من القطار انت

ستار : شنهي بويه جا غير تباركلي

- والله بويه لو مباركلي انا ابرك ، ظليت الليل كله اعلم و افهم ليما فضت ، هو بالاولى ، حتى البديرة مطشر سمع انا راح اعرس اعلى صياح المفضوحة

كلها ضحكت ، و حاكم ظال يعاين : خايب كلت اخلص العشا و اصيحنك اعلمك ، جا انت اسرع من العشا طلعت

و يسرى تضحك اعلى ضحكهم ، جابتها كواغد بدمغه : عروس تستحي موش فاجه حلكها و تضحك

- شمالج وياي عمه

- و عمه العماج ، جا من كونج عرستي ، كاعدة يمي روحي جيبي ماي من الشط الج و لزلمتج ، خاطر تغسلون.

دشت ايمان : على شنو دا تضحكون

كواغد :- دد ضحك اعلى توالي اهلج يبعددددد روحي

- يعني شنو مفهمت

- خايبة تمشين عني يو اكومن ابيس بيج

حاكم يضحك ، اندارتله ايمان :- يعني شنو توالي اهلج ، قصدتها التواليت مال بيت بيبي ؟

حاكم سمعها كالت هيج ، و غص بالضحك صار ازرك

و كواغد تكله : شنهي يعني تواليت ، خافنها هاي جاي تسبني

سمع كواغد تحجي هيج ، انطل اعلى حيله ويضحك ، وحدة ما تفهم اعلى اللخرى

- كومن عني و علي يو كابلتجن ، انا اطكن و اموتن

ايمان :- لا الله عليك كول

- شكول بويه ، جاي تمدح بيج و باهلج

- صدوك

شالت كواغد الشيله و طكتها بيها : اسمها صكد موش صدك ، لو عدتيها مرت الاخرى اكض بوزج و افكرنه

- هاي لبدت يم حاكم

و كعدو يتعشون ... سوا كلهم

ثاني يوم

كواغد و بتها طلعن للشغل

و ستار راح اعلى بيت جده

و حاكم طلع للمضيف

و ام خاكم و جمارة اخذن الحلال وراحن يسرحن بيه

للضحى البيت فرغ ، مامش احد غير ايمان و يسرى.

ايمان : بعد ما طلع الكل و سديت الباب وره حاكم ، ضجت حيل ، تذكرت ادوات التطريز مالتي ، اني كلش احب التطريز ، و من جنت ابيت الشيخ كلت لعمتي الخاتون و هي كالت الصبيحة تجيبلي قماش و خيوط ملونه و اطرز اشكال و الوان و كاعدة بغرفتي.

حاكم حيل حبيته

هو اكثر واحد يحبني بهذا العالم

ميأذيني ولا يجي وياي قوي ، و ميقبل احد يأذيني و كلش حباب ، كلت اله ليطلع ، كال ما اتاخر اشوف المضيف شكو ماكو و ارد ، لأن ابن الشيخ مفقود و عيب زحمة ما اروحن و اسال و اخبر الشيخ بالصار ويانة .

راح بس كلش اضوج من يروح ، ظليت اطرز و اني اتذكر احجاياته و كلماته، كانو طرى على حياتي شي جديد معايشته كبل.

سمعت باب الكراج انفتح

فرحت كلت يمكن حاكم رجع اليه، كمت من مكاني و عفت الخيوط و القماش على الميزت و مشيت للباب

بعدني ما طالعه ، و شفت مرت ستار الجديدة ، تحفر بالباب، استغربت ، هاي شنو دا تسوي ، ليش هشكل دا تحفر و تخرب شكل الباب.

شفتها طلعت وصلة بيضة ، اتذكر مثل الوصلة مال عرسي اللي كالي حاكم انطيها لامي ، شفتها تفلف بيها زين على عظم ما اعرف شنو و تحط .

تقربت منها و كلت الها : هاي ليش هيج تسوين

فزت بساع و كامت من مكانها

- ااااا لا هاي حتى تطلع شجرة

- شجرة بالباب ، خاف ميصير

- لا لا يصير ، انت دشي داخل و اني اسوي

- تمام ، اروح اكمل تطريز .

مشيت رجعت للغرفة و هي تدفن بالوصلة ، كملت اجت عليه للغرفة :- ايمان

- ها

- اااا لا تكولين لاحد انا زرعت شجرة هنانة

- لويش

- لا تكولين ، خلي سر بيني و بيج ماشي .

ماشي .

مشت و اني استمريت اطرز ، مشت لغرفتها كعدت ، و التهيت اطرز و ادندن بيني و بين روحي ( يا نبعة الريحان حني على الولهان ) و ادندن

شوي و سمعت صوت غريب !

كأنو مرت ستار دا تحجي ويا نفسها

كمت من مكاني ورحت اباوعها بغرفتها

انصدمت لما شفتها تحجي ويا نفسها و عيونها مفتحتهم حيل وراسها يهتز ، و تحجي تحجي كأنو واحد كدامها

فجأ انفتحن عيونها حيل ، و اندارت عليه بسرعة

فزيت ، ؤكضت وراي ، ركضت لغرفتي.......

رواية كحل عرب الفصل السابع عشر

(سرحان راجع بقوة )

جذاب اليكلك من تشح تغله

حمد شح و نسوه اهله

(عريان السيد خلف)

المكان : بادية السماوة

الزمان : عام ١٩٧٧

سرحان : صاعد اعلى الفرس و افتر بالبر ، كاض الكسرية و اصيد طيورو التفگه اعلى ظهري ، نزل الغروب و انا ما بهواي اردن، لا لبغداد ولا لديرة هلي، چن چزت روحي و فاضت الجروح بكلبي و هجيت للصحرا .

الهوى عذيبي اعلى نسمة برد

جنت متردد اظلن من عبن مالي مچان بهالصحرا

ولا ابالي ارد ، كلت ويا روحي اجمعلي حطبات و اسوي جميرة و اكعد اعليها و اخلص هالليلة .

اخذت الفرس ولميت هالاكدر المه ..

وكعدت ، طلعت الزناد ( قداحة ) من جيبي و شعلت النار وكعدت كبالها ، بس صوت طكطكة الجمر اسمعها و يتفركع جدامي.

ظليت كاعد و اعاين النار و حسباتي ياخذني و يردني

ساعة افكر بالخاتون شلون راح تظل وحيدها ، و اخافن لا ملوك تاذيها ، و ارد اكول عدها شيخ و زلمة انا طكت روحي، ارد افكر استقر ابغداد و اجيبه بس ما اعرف شلون راح تصفه و انا بزعان من كلشي من الاحبهم و الما احبهم.

طرت اعلى بالي هدية

رفعت راسي فوك جن اتخايلها و ارسم صورتها بالنجمات، ضحكتها و سمار اجفونها و سواد الكصيبة و ذبة الكذلة ، ابتسمت و اتذكرت دموعها و انا الاشيها ، جن ورقة بيضة اشلون ما تطويها تنطوي و شما ترسم بيها تتوضح الرسمة و تحلى.

يمتى ما اجا اعلى بالك تبجيها و تضحكها .

و انا رافع راسي ، سمعت حس احد جاي من وراي

فزيت من كعدتي و كمت ، عاينت زلمه معكل، كوة اعاين ملامحة بس جدنه ابدوي .

- هلا يالأخو

سرحان : هلا بيك خويي

- جالس وحدك ؟

- اي والله

- لا معاك خل ولا رفيج

- وحدي

قدم ايده : انا شامخ من بدو البو علوان

- يا هلا بيك ، انا غريب

- و علام الاسم غريب

- هذا الحال

- تفضل اجلس

- حياك الله

- ساعة العين شافت نار كلت اكرب و اعرف شعلوم عالطارش

- هاج من ديارة و ملكيت غير الصحرا تحويني.

- لهجتك ماني عارفها ، لا هي حضرية ولا هي ريفية .

- كلت الك اني غريب و مو من ديار احد

- عسنه لا غرب الله عبد ، من السماوة ؟

- انا الأريد اعرف انت من السماوة

- نحن بدو رحاله نزاله، نداور ورا حلالنا وين ما يصير دغل و ماي ، نحط و ترتع حلالنه .

- من يمتى حطيتو

- من كمن يوم ، الا ما حجيت عنك ؟

- ما عندي الاحجيه اكثر من اللي كلته

- يظهر انك ما تبغى اتحجه ، انا اهدك بروحك.

- بالعكس ، لجن انا جاي لهنا خاطر انسى موش خاطر اتذكر ، اكعد

ضحك و كعد يمه و ضرب اعلى جتفي : انت خيال هالفرس ؟

- اي اجاني هدية من الوالد.

- يظهر انك من ديارن عامرة .

ضحكت و انا اعاين للنار : شتنفع الدار لو ما حاويه اهلها.

ظل يسولف وياي ، ويحجيلي عن رحلاتهم و صعوبتها و شلون يدورون العلف لاغنامهم .

كلت اله : شغلني عندك

- وش تهوى بعيشة البدو

- الصبر ، انا اشوفن الصبر بعيشتكم ، الواحد بيكم يسعى نهارة بكل صبر خاطر يكضي يومه. بظل هالاجواء المتعبة .

-و انت الصادك يالاخو ، عيشة البدو ينراد لها گلبن گوي و خلكن طويل.

- و انا بعازتهن

- تمشى وياي.

اخذني ورحت وياه وانا و كاض بسرج الخيل و امشي، وصلنا لخيام يطلع بيهن خمس خيم ، صاح : ياااا عدنان

رده : ابشر بالاخوة

- معاي ضيف

- هلا والله ، تفضل تفضل

كعدوني بخيمة مال شعر ،صبو هالگهوة و كعدو يسولفون وياي ، و كضوا الربابه وغنو ومجدوا بأسلافهم .

طابتلي كعدتهم و هوى كلبي عيشتهم

واخذت ارعى وياهم كل سوم

و نصبولي خيمة لوحيدي ، و حالي من حالهم بالشغل.

ويا فج الفجر اخذ الحلال و اطلع ارعى وين ما الكى العشب وماي يرتع الحلال و اكعد ليما يرتون.

و اعلى هالحال عيشة شهر

لا احد سألني منين انت بعدها ولا احد كالي علومك

جربت عيشة الريف و الحضر و البدو ، لجن عيشة البدو اصعبهن ، ساعات ترعد و ويشتد البرد نظل نتراجف و احنا اندور الدفو ، لا بغطا ولا غطوتين ندفى و جسمك يتعود اعلى المكاوم و الصبر.

عكب الشهر ما كدرت اظلن مبعد اكثر عن ديار الاهل

لزوم ارد و اعرف اهلي شخبارهم ، خصوصا الخاتون ما غابت عن بالي ، حطيت رحالي و كلت الهم هاذ حدي .

اصروا الا يعرفون انا منين

ساعة الكلت الهم انا من عرب جلوب نشغ ابوهم و صفك الأيد و كال : اااا يصديج ، و انت من ال جلوب و ما اتحجى ، شبلاك

- قدركم اعلى راسي و ما كصرتوا بضيافتكم ، و ان شالله ما طلعت منا الشينة

- ما تحدك الشينة يبن جلوب ، سلامنا للاهل ، و ما نبغي الكطعه .

-انتم حسبة الاهل والله ، كفوا منكم .

اخذت الفرس و طلعت للديرة

وصلت غاد ، حطيت اعلى الشط ، دنج يشرب الماي و انا امسح اعلى ظهره ، و اعاين الديرة ، اتنوع للشط و تطره اعلى بالي هدية و هي تترس ماي .

ظليت موجف قرابة الساعة ، ولني اسمع حس خنيجر من وراي : ها يالردي

- ما ردي غيرك بالنكري

كرب و حضني، تشابكنا و سلمنا اعلى بعض.

- وين عنك ؟

- هجيت هجة ما من بعدها هجة

- و شهر يالظالم ، ما تدري شصار بأهلك

- شصار

- احترك المضيف

- لااااا

- و احترك الشيخ

- و دكول والله ؟

- و احتركت عشيرتك و عشيرة الخلفوك

- يكطع بزريتك ، هبطتني

- لا عليك العباس كول ، وين جنت ؟

- طلعت بر

- و كل هالوكت انت بالبر

- اي والله صفيت ويا ناس بدو و اشتغلت عدهم.

- و هسه شناوي ؟

-مشتاك لشوفت الخاتون

- كبل الخاتون رايد اخبرنك .

- كول

- ان جنت زلمة و تسمع كلي ، خاطر احجي و ان شفت روحك ما منك فايدة وفر اعلية الحجي.

- اسمعنك.

- امك

- شمالها ؟

-مريضة

- زهرة لو الخاتون ، ياهي منهن

- موش وحدة منهن ، ردحة يسرحان

تنهد ، ردفه : يو شما جان ، تظل امك ، و لزوم تدور اعلى علومها بقصر ابوك ، تراها مظلومه موش ظالمة

عاينت علي و درت و انا اتنهد ، كضيت الفرس ، حجه :- الام تتنومس بجال ابنها و ردحه مالها غيرك ، و ساعتها معلعلة و حالها ما يسر و هي مالها ولد غيرك.

- وينها عني كل هالسنين

- امرها موش بيدها و انت تعرف ال ثجيل و حقدهم اعلى ال ضاحي، احلفنك بالعباس تروح و تعاين حالها ، تره حالها ما يسر لا عدو ولا صديج ، كبل امس جنت امشي و طاحت جدامي و نعت نعي اعليك نعي شك كلبي ، يو انت كبالي ذيج الساعة ما ادريك يو حاط الجيلة بكصتك اعلى حالتها.

-هي مو معرسه

- الزلمة الانطوها اله مريض ،عاشت ويا ٧ سنوات و مات و ردت لال ثجيل و ظلت غاد.

فرك وجهه : امشنا نشوف حالها

- كبل لتمر مضيف ابوك

- من ارد امرن عود ، امشنا

جريت الفرس و اخذنا الدرب مشي و هو يسولف الي عن احواله ، دخلت كاع ال ثجيل و جانت هاي اول مرة رجلي تواطي ارضهم .

كاطع : زنااااااااااااااد ازنااااااااااد

- ها خالي ها

- الشيخ وينه ما هو

- طلع بطلابة هو و عمي جاسم ،كلي شنهو عليش تراكض و فحطان هيج.

- خايب اخوك اخوك

- ياهو كريم

- لاله لاا الاخر الاخر

- سرحان

-٨ايب شفته الساعة و اهو بكاع ال ثجيل

- انا اغلام ابوي ، وشعده بكاع ال ثجيل

- وراه مصايب ، لزوم نخبر الشيخ بالسالفة

- والله وراح بيها سرحان ، طلعت غيبته موش هينة و هو صاف ويا عدوان ابوي .

- عبنه ردي

- و احنا هاذ النريدة يخالي

- الشيخ يمتى يرد

- اعلى جية

- لا تكصر و انت تكله بحال ولدة و خيانته.

سرحان : خنجر عندك ، انا اروحن لغاد وحدي

ركبت اعلى الفرس ، و انطلقت بيه ابستان ثجيل ، ووكفت اعلى باب سلطان وصحت :- ياهل الداااااااار ، سلطااااان

طلعوا ازلام سلطان من قصرة وقل ما يتسمى بيت مو قصر مثل قصر ابوي ، حجه ابن الجبير نعمه : ياهو انت ؟

- انا ولد ضاحي و الي حك بهاي الكاع وجاي اخذ حكي.

سلطان :- شنهي الخبر ينعمة ؟

- ابن الشيخ مطر

عاين علي وكال : تخسى تحجي وياي و انت اعلى ظهر حصانك يبن ضاحي

نزلت من الفرس ، و تكدمت ومديت ايدي : سرحان ابن الشيخ مطر ابن الشيخ ضاحي الچلوب

ضحك و كال : ايدك هاي حمل تحها بأيد ال ثجيل ؟

- صدورنا السعت جيلات النكليز و اركابنا الما دنجت للذل ، بجدي و دم اجدادي حفظنا الكاع، ما نهاب الوطية و لا تطلع من الردية و ان حطينا ايدنا بأيد احد ما نچسرها اله ، لا تخاف.

حط ايده و كال : موش ابن ثجيل التكله لا تخاف

- اعلى راسي

- دايم

- الي عدكم حك و نازل عدكم رايد حك

- فوك حك ابوي ، يا حك هاذ الجاي تطالب بيه يبن ال ضاحي.

- ان جنت راداد حك احجي ، و ان جنت موش كفو ، اتعذرك

- جلماتك ثجيلة يبن ضاحي، اعرف ويامن تحجي هالحجي..

- للحك اصحابه و انا شايفك منهم.

- تفضل

فتحوله الطريق ، و هذا جان اول واحد بالعشيرة من ال ضاحي يدخل مضيف ال ثجيل.

كعد و هو يعاين صورة ثجيل بنص المضيف، حجه سلطان : هذا ابوي ثجيل ، لا تظن تهاون و ما طلع لثورة العشرين لجن جان العود موش كاوي وماله ظهر يطلع بيه ، تنومس بولد عشيرته ال....... قاطعه سرحان و هو يكول :

- الله يرحمه و يرحم جدي و امواتنا اجمعين ، ذكر الماضي ياذي و تبريره يطول ، انقسام العشيرة ضر الكترين موش كتر واحد .

ابتسم سلطان و هو يكله : زغير انا يوم العاينت جدي جلوب ، لجن الساعة اشوفنه جدامي بصورتك.

- شرف اليه اطلع اعلى جدي النتنومس بذكره .

- بس كونك تخلفه بخير ما تاخذها منك الواوية.

ابتسم سرحان و هو يكول : (ان الارض لله يورثها من يشاء من عباده والعاقبة للمتقين)

- صدق الله العلي العظيم ، شنهي الراي

- جاي و طالب امي ، المرة مالها حمل غير ولدها ، و انا شيال حملها.

- ردحة ؟

- اي

- ردحة الها اخوة ، انا احاجيهم

- الاخوة موش احك بيها مني، انا موش جاي اطلبها منكم ، لجن جاي انطيكم علم انا ماخذها.

- مالها دشه اعلى قصر ال ضاحي

- قصري و امي شيخته ، و انا الاقرر ادش يو لا

كام سلطان و ضحك و كاله : دم ثجيل يمشي بدمك يالولد .

- جدي وافتخر اشيلن دمه.

- و النعم ، و املنا بيك يوليد ثجيل

- انا و ان جنت اتنومس بجدي ثجيل لجن الزود لابوي و نا ارضى اتسمى بغير اسمه.

-دار وجهه و هو يگل لناصر : حضروا ردحة خاطر تشوف ابنها.

- تامر يشيخ

اندار عليه ، و حجه :- الهم شهر وهلك يدورون اعليك

- يتضحلي انت مدور اخبار اهلي اكثر مني، صار شهر ما سامع اخبارهم.

- وين جنت

- عدي شغل وطلعت خارج العراق

- يكولون الخاتون وارثتك فلوسها

- موجد عدل بأهلي و للمرة الثانية اكلك تعرف بأخبار اهلي اكثر مني ، لجن انا ما وارث احد ، بس كاض شغل الخاتون غاد .

- خليني اسرنك ، انا ذوفة الذيب اهون علي من شوفة اهلك ، اكرهم كره ما يطره اعلى بالك ، لجن انت دشيت كلبي من عبن بيك دم ال ثجيل.

- ممنونك

ناصر : تفضل امك ناطرتك

طلعت وياها ورحت لبيت جريب من بيت سلطان ، اول ما دشيت للبيت ، احتضنتني مرة يطلع طولها لنص صدري ، تصيح :- يمه وليدي ، ما مصدكه اشمن ريحتك يمه

و تنشغ بقوه و هي تحب و تشتم بيه بلهفة.

بعدتها عندي و بست راسها و كلت الها :- شلونج

- كلي يمه ، كحل عيني وكلي يمه ، احبن ايدك وليدي

- خلينا نكعد

كعدت اعلى جذع نخله و هي ما بطلت تتلمس بوجهي و تحب بيه جنها ما مصدكة انا كبالها ، رجف كلبي اعليها لجن جانت اعضاي جامدة و ما كدرت اطي ردة فعل .

كعدت تبجي من شافتني بارد بردي اعليها

انداريت الها : اسألنج سؤال ابالي صار اكثر من ٢٠ سنة

حجت بلهفة : كول يوليدي اسمعنك

- الأعرفه ساعة الجبتيني كلتي ما اريدنه ، اخذوه و ردوني لاهلي ، وما رضيتي حتى ترضعيني و تطيني حليبج و ذبيتيني غاد و رديتي ، هذا الحجي صحيح

رادت تحجي سبقتها كبل لا تحجي : انا ما حاولت اسأله لاحد لجن شنت اشوفه صدك لما مشيتي و ما فكرتي تردين تشوفيني بعد.

مرة وحدة شفتج و ساعته موش انت الردتيني ، كواغد الجابتني اعليج غصب، انا بس رايد جواب صح هالكلام يو لا ؟

- اديه مجتفه للعباس كونه يطكني بهالساعة و اموتن يو ما ردتك يوم .

عاينت اعليها : موش انت الرفضتي ترضعيني من حليبج.

- جنت اعرف يو رضعتك و ياخذونك مني، و نزلت اعلى جدام ابوك و اعلى جدام الخاتون و حبيتهم و اتوسلتهم و دخلت عدهم و محد رادني ، رضعتك بس مرة و هديت كلبي يمك ورديت بلياك بلايا روح.

تحجي و الدموع تجري بحركة من عيونها ، تنهدت خاطر اتحمل الموقف ، كلبي خفك و كام صدري ياذيني، رديت اعاينلها و كلت الها : ياهو الردج ؟

- ملوك

رفعت راسي و انا اخذ نفس بقوة ، هزيت راسي و كلت الها : سهلة ، حضري اغراضج تروحين وياي الساعة .

حجه ناصر : اخوها ما يرضالها تطلع البيت

درتله : لما انا ابنها اخذها ما تظل حجايه لاخوها ، ولو جانت عنده حجاية ، يلاويني بكاع ال ضاحي و ياخذها مني

كمت و انا اكللها : ناطرج

مشت حافية تركض و هي تصيح : عباتي ولجن عباتي ، وليدي جاي اعليه ، اطني عباااااتي .

عفته و انا اكل لخنجر ياجرلها سيارة ، ذاك راح جاب سيارة حمل و اجا ، عاينت اعليه : حمل ، شنهي رعيان و شايلنه بحمل

- خايب دكومممم ، جا وكتك تتمزهد .

اجا خال سرحان اخو ردحة : شعدج جاي يبن ضاحي

- جاي اخذ امي

- توك ذكرتها

- اذكرها وكت التطره اعلى بالي شعدك وياي

- ردحة مالها طلعة من البيت

حجه خنجر و هو يفر بالزنجيل و يفتحوو يسد بقبضة ايده الحديد و يصيح : شنهي الراي يسرحااااااااان

- حضر السيارة بساع يخنجر ، لزوم نطلع منا .

اخو ردحة : يو خذتها انا كوام ويا ابوك

- ابوي بمضيفه ، و حياك الله .

طلعت ردحة و اخوها يصيح اعليها ، تقرب منها سرحان و هو يعدل العباية اعلى راسها و يكللها : السيارة ناطرتج.

اخذتها و ساعدتها تصعد اعلى السيارة و بقجتها بحضنها ، الرجلين و الادين راكدات من التعب ، و الوجه جن وحدة بعمر السبعين موش داشه الأربعين .

(المضيف )

دش الشيخ مطر لمضيفه : ها الله بالخير

كام اله زناد و كاطع : الله بالخير و العافية ، بويه سرحان رد

جان يريد يكعد ، من سمع هالحجاية ، جفل وصاح : هاااه وينه ؟

- عد بيت ثجيل

- شنهووو ؟ شعده عد.بيت ثجيل ، ووين جان ؟ شرداه

- لهسه ما حجينا وياه ناطرينك ترد خاطر نتصرف .

....

سرحان :- خنجر اخذ الوالدة للقصر و انا رايح للمضيف ، اشوفن ابوي

ويا ما جاي يلف الفرس، طلع الشيخ من مضيفه ، عاينه سرحان ، جر الحصان و دارله و مشى .

وكف عده و الشيخ بكل ملامح حادة موجف بلا حجي ، تكرب منه و كاله : السلام عليكم

زناد : يا سلام هاذ و انت ما محشم احد

سرحان : تجاهلت زناد و انا اعاين لابوي وكفت كباله بطول ، جتفت ادي و كلت ( انا ناطر الجف الثالث )

عافني و مشى ، و زناد و كاطع وراه ، وكف حميد : الحمدلله على السلامه وليدي

- الله يسلمك يابه

حبيت راسه

- امش ورا ابوك ولا تخله شايل اعليك تراه زناد و كاطع ما مقصري بالحش اعليك يمه.

هزيت راسي و كلت اله : سلم الي اعل. امي زهرة و كللها عشاي يمها اليوم

ابتسم و كال : هلا بيك بويه.

عفته و مشيت و توجهت للقصر ورا الشيخ .

( بيت حاكم )

(تحذير : اذا كنت ممن يخافون مشاهد الرعب مرر الصفحة قليلا لحين علامة ✔⛔)

ايمان : ركضت وركضت وراي

صفكت الباب حيل من كد ما خفت ، درت وجهي ولكيتها مبتسمة ورايه

اتراجعت واني خايفه منها : يسرى شبيج ؟

- ما بيه شي ، جيت اشوفنج خافنج معتازة شي

- لا

- جا ظلي بحجرتج ولا اطلعين

مشت دارت وجهه ، ركضت سديت الباب ، و كلبي يدك بقوة، باوعت منا منا ، اخذت نفس و تنهدت : ماكو شي ، حاكم يكول ماكو شي

بس اني شفتها و هي تهز راسها و تحجي ، احتمال هي دا تلعب ويا نفسها او بيها هيج عادة ما اعرف.

ابتعدت من الباب على كيف ، ورجعت فتحت الباب بهدوء ، و دا امد راسي حتى اشوف وينها ، فتحت الباب و الكاها واكفه بوجه الباب و مخزرة حيل ووجهه اقرب للاسود .

صفكت الباب حيل ورجعت وراه صرت

كمت اشهك بقوة ، ضربت الباب سركي ، واحس الخوف يسري بكل جسمي ، نمّل .

ياربي دخيلك، الهي انقذني

كمت اردد المعوذات ، و اني قرات القران اكو شي بالبيت وكع و انكسر .

سديت عيوني حيل و اني اردد ( قل اعوذ برب الفلق من شر ما خلق )

كعدت بمكاني و اني ما بطلت اردد ، فوك الساعة و اني اخاف اكوم ، اخاف لا هم تطلع بوجهي .

اندكت الباب ، جفلت و كمت من مكاني بسرعة مرديت بس اباوع للباب بخوف ، و كلشي بيه يرجف خوف .

✔⛔

اجا صوت حاكم : امووومه عليش صاكة الباب

من سمعت صوته ركضت على الباب فتحته ، ويا ما فتحته وشفت حاكم ، حضنته حيل ، اخذني بين ادية : ايااابه ما هديتج هواي و هلكثر اشتاكيتيلي.

- اني خايفة

- ياااابووو اعلى سالفة الخوف

بعدني و هو يكلي :- من ايش خايفة كليلي

يسرى : عمي اسويلك جاي

- اي والله ياريت

دخلت و كعدت ويا امونه :- هسه كليلي عليش خايفة

-دا احس اكو اشياء مخيفة

- مثليش

- اخاف اكولك

- شو تعاي يمي ، البيت ما بيه شي ، وكل هاي تهيئات ، حتى كواغد مو بالبيت خاطر اكول تخوفج.

- اني شفت يسرى

- اي

- تحفر

- تحفر بيش

- بال..... طبت و هي تباوعلي ، بلعت ريكي ، و قربت نفسي على حاكم اكثر .

خلت الجاي جدامه و هو يسألها : شبساع سويتي

- جنت حاميته خاطر اشربلي استكان ويا امونه لجن عمي هي ساعة وكتها خاتلة بهالحجرة و ما تشوفنا طولها خاطر نتعلم اعليها.

- لا لا عليش ما اطلعين تكعدين وياهن

ظليت اباوعلها مرديت ، مدت ايدها على راسي و كالت : ياله اعلى راحتها

من حطت ايدها حسيت شي و انسحب من گلبي .

مشت وراحت ، اندارلي هو :- لا اظلين معتكفة بغرفتج يابه ، اطلعي و اكعدي ويا البنات خليهن يحبنج، شمحصلة من الجنفه و الكعدة لوحيدج

- حنروح لبغداد ؟

- والله ما ادري ، لجن لا تأملين روحج بالروحة غاد ، انا ردت اروحن للشيخ خاطر يشغلني بمعمل الخاتون لجن ما لكيته ، و سرحان ما هو ، و لازم الكا شغل ما اظلن كاعد

- بابا مو انطاك فلوس هواية

-فلوسج قابل فلوسي ، و موش هسه وكت اليوكت عودينه يصيرلي توكيل.

- اني اخاف هنانة

- تراج سودنتيني والله ، مو كلت الج ماكو شي يخوف، كومي يابه كومي ، شوفي شنو يحتاجن و تعاي رجعي يمي

- ما اريد اكوم اريد ابقى يمك

- انا شلون بالزونه الماتشبع حضن ، شو تعاي كربي

تمدد و اخذني بحضنه ، شويه و رجعت امه و طلعنا كعدنا برا يمها ، و اني عيني على يسرى ، كلبي ديكولي بيها شي ، ما احس هذه البنت طبيعي ، معقوله بيها جني ؟

كلش هواية ابغداد اسمع منتشر واحد اسمه ابو طبر يكتل البنات و شكله يوصفوه يخوف ، مدا اعرف ليش دا يتخايلي هاية ابو طبر ، بس لا هاية بنية !

هم ملازمي وميعرفوه بس يشوفون جريمة ناس مكتولين بالطبر ... اوووو هاي اني اشدا افكر هي مو ابو طبر ، بس هي تخوف ، و كواغد تحوف و كلهم يخوفون.

اني اشون راح اعيش هنانه ؟!

(القصر )

سرحان : مشيت و انا اتبع الشيخ للقصر ، جانت امي نازلة و ادك اعلى الباب و الحرس واكفين يستفسرون منها

وكف الشيخ : الله بالخير

وكفت انا : هلا بيج يمه تفضلي ، القصر ينور بيج

التفت علي ابوي ، كض ايدي و هو يأمر الحرس يرحبون بيها داخل .

دخلت و هو جرني : شنهي الراي يسرحان ؟

- مامش راي يعلى اعلى رايك شيخ، لجن امي مريضة و ان جانت موش مسؤليتك ، فمسؤليتي و عيب اعلى الزلمة اليهد امه عد المامش بكلوبهم رحم.

- و انا ويني عن قرارك هذا ، شهر تغيب وما جا اعلى بالك حتى تنطيني علم ، شنهي انت شحاسب روحك

- انا بس ردت اوازن نفسي و اعيد حساباتي، و شفت كلامك صح و انا الحاقد ورايح بتفكيري زايد ، عدت نفسي ورديت افتح وياك صفحة بيضة .

تنهد و هو يكول : علعلتني يسرحان بويه

- اتعذر منك

- بالي انشغل اعليك جثير

ضحكت بكلبي ضحكت استهزاء و ما رديت عليه .

دش داخل و الشيخة ملوك واكفة و عيونها تجدح و هي تعاين امي، دشيت انا و الصدمة بانت بملامحها ، ردت عاينت ع الشيخ و هو يكول للوالدة : تفضلي يم سرحان .

عفت الوالدة ويا الوالد و دشيت للقصر ملهوف رايد اشوفن الهاتون ، اخذت خطواتي بسرعة لغرفتها ، فتحتها ، لكيتها كاعدة و تسولف ويا هدية

:- يمه

فزت من مكانها و هي تصيح : سرحاااان

كامت هديه اعلى حيلها و انا تكربت احضنها حيل ، كامت تبجي و هي تعاتبني ، انكسر كلبي عليها.

حبيت راسها و ابتعدت ، و هدية مركز بوجهي ، درت ليها :- شلونج يابه

ضحكتلي ضحكة عريضة : كواكة

- عسى دوم

كعدت و كلت الها : استكان جاي اذا ما بيها زحمة

و الخاتون تولتني اسئلة (ويز جنو و شنو هالغيبة و طار كلبي بغيابك ، مكلت محجيت وووووو)

راحت هدية و انا كضيت اديه و كعدت اسولف الها مختصر و ختمتها بامي ، دخلت هدية : اييي رحم الله والديج ، ابوج شلونه

- كواك

- شصار ويا بت حجي منير

الخاتون : تزوجها وخلصوا

- عليج الله !!؟

هدية : وتزوج ستار

- لا لا ، شنهاي ، كل هاي الاحداث و انا ماكو .

- جا غير انت غطيت و الغطا غطه

عاينتله وابتسمت و انا اكلها : منا و جاي ما راح افارج .

ابتسمت ودنجت مستحية ، كمت اعلى حيلي و كلت الها : من رخصتج خاتون اشوفن الوالدة و اردن .

طلعت صادفتني ام ستار : ها خالة شلونج

- هلا بيك ييمه ، شني هالغيبة كطعت كلوبنه

- جان لابد منها ، مبروك وشايفين الف خير بعرس ستار

- عرسيش يخالة ، عرس الاكشر عسنه

- اها ، عليش

- سالفة طويلة يخالة ، نكعد و نسولف براحتنا ، الشيخ رايدك هسه.

- اي

مشيت للشيخ و ملوك كاعدة و امي ملفلفة ، التفتت حتى امرهم يحضرولها حجرة ، طلعت جدامي سليمة ، حجيت : اشوفج عاودتي الشغل

الشيخة ملوك : الشيخ رداها.

عاينتله و دنكت راسي بالقبول ، و درت الهن : تتجهز الحجرة البكتر حجرة الشيخ ، لامي .

ملوك : والله و تلفي اعلينا الفصليات و يدورن حجرة بكتر حجرة الشيخ

مطر : ملوووك

ملوك : انا هاذ الوضع ما احملنه يمطر ، من اول عرسنا شرطت اعليك ........قاطعها و هو يكللها

- الكلام كلش كديم وردحة عدي منها ابني الجبير وابني رايد امه بكتره ، لا تكلبين سوالف عتج

- جا من دام الحجي هيج ، انا ما اكدر اظلن.

سرحان : التزومت السكوت و خليتها هي و الشيخ يترادمون ، تقدمت الي راديون حبيت راسها و كلت الها : اخذي امي لحجرتي بساع

رادت تتقرب منها ، زناد صاح بيها: دشي لحجرتج بسااااااع

مشت ملوك و الشيخ طلع مغتاض و هو يهد الديوان ، و راديون تجاوب زناد : شنهي تراها ام اخوي .

تقربت و هي تتجاهل كلام زناد ، كضها و جرها من شعرها ، ويا ما كضها ، دفعته عنها : هالمرة راح اسكت مرة الاخرى لو جربت تمد ايدك اعلى البنية ما تلوم الا روحك

كضني من اهدومي : خايب انت الجاي من تالي تدفعني ولك

دفعته مرت الاخرى : و الثانية لو عدتها تنطرد من القصر انت و امك .

حجيتها و انا ادورن عنه

و هاذ كام يفور وراي راد يكض بجتفي ، درت عنه و انا اخذ ايد امي ، شفت هديه واكفة تعاين كلت الها : اخذي امي لغرفتي .

ردحة : يمه اذا جيتي تضرك انا اردن ، ما اريدن مضرتك يوليدي

- ما تضرني ، انت اخذي راحتج ولا تفكرين .

عفتها و طلعت ورا الشيخ ، طلعت للمضيف ، الشيخ مامش : ابوي ما مر هنا

- لا

- جا وين راح

تلكاه بالبستان اذا جان متضايك

نزلت للبستان ادور اعلية ، لكيته كاعد حدر نخلة ، تكربت ليه : عليش كاعد هنا بويه

-فرك وجهه و عاينلي .. و ين جنت

- بالبر

- شتسوي غاد

- اتعلم شلون اصبر و اطول بالك و اجر خلك، جنت محتاج هالعيشة بعد عيشة الترف ابغداد.

حجيتها و انا اكعد بصفه

- و ما فكرت شيصير بحال ابوك

- انا اعرف غيابي ما يأثر بأحد

- غصدك انت ما تهمني يسرحان

درت اله : رايد امي تظل وياي بالقصر ، لجن انا ما اريدن الشيخة تغتاض من عبن تظل بمثابة الوالدة دامها حرمتك.

ظل يعاين علي و هو مستغرب : انت تحجي صكد يو تتغشمر وياي

ما رديت عليه و هو ظل موچد بيه

ظل ينشدني اعلى عيشتي غاد و انا اجاوب .

من شاف اجوبتي مختصرة كام من مچانه و كال امشينا نرد.

رجعنا و تلكانا زناد : جنت ادور اعليك بويه

- و شرايد يزناد

- جنه ابن ردحة شاد اسنونه اعلينا ، الا ترضاها يكلي اطردك من البيت انت و امك .

صاح بيه الشيخ : شنهي جهال انتم ، ما تستحون ، ترا حدها الطلايب واصلة لهامتي مو ادور اكعد احلن مشاكلكم .

سرحان : زناد انت اخوي الزغير و انا اودنك ، و الامور ما تليق بينا ، موش لزوم ندوخ الشيخ بسوالفها ما الها صحة خاطر نكيد البعض ، نظل اخوان

صاح : حجيك تغير جداااام ابوووووي

صرخ الشيخ : اييييييه منين اهجن منك يو من امك

عافنا ومشى ، ضحكت بأستهزاء :- اشوفك بخير يخوي الزغير

حجيتها و هو كام يشمر بأديه ، ويصيح و يضرب بالطين برجليه ، عفته ومشيت، رديت للقصر ، هدية رايدة تطلع

وكفتها : الصبح بعدج تترسين مي

- اي ، عليش ؟

- هيج بس رايد اسأل

دنجت مستحية و مشت ، ابتسمت و دشيت للقصر .

طلعت جدامي سليمة : شلونج يسليمة

- عايشين بجالكم يمه

- جا خوش ، لا تنسينها ، تراه اللكمة تعثر يو غدرتي بصاحبها.

حجيتها و مشيت ، لكيتهم يحضرون العشا .

جاي امشي لحجرتي ، كضتني كواغد : معتاز شي يمه ، حجرة امك حضرتها و نظفيتها

- عاشت ايدج خالة ، اخذي راحتج و سلميلي هواي اعلى حاكم

يوصل .

كواغد : يوصل ان شالله

طلعت من القصر و انا اتعوذ منهم ، هالقصر هاذ الما يخلى من المصايب ، و يالشيخة ملوك الما تهيد

هدية : بس زين من رد سرحان ، احسن راح تصير الامور احسن بردته

- جا احنا شنريد ، لجن جية ردحة ما تبشر بخير و راح نشوف ايام سودة من الشيخة ملوك.

مشينا للبيت و دشينا، تلكتنا يسرى و هي ترحب بينا و تاخذ العباية من امي حطتها بالطشت و غسلتها بساع و هي تكللها : عمة حضرت العشا ، كعدي خاطر اصبن

- يساعدج الله يمه

هدية : زين بي اجت وحدة بمكاني تشتغل ، ظهري ميت من التعب

- انطرحي غاد و ارتاحي ،

كعدنا بالهول و امي تعاين اعلى حجرة ابوي ، دشت يسرى و العشا بصينية الخوص ، حطتها كبال امي و تصيح : هدوة يالة كربي حبيبة مت عيني تعيبانة

ضحك الها : اي والله

ندهت حبوتي و كعدتها خاطر تكعد تتعشى ، ندستها امي و كالت الها : كربي

تقربت اعلى امي و انا اتقربت منهن ، حجت امي : شنهي عمج وين

- والله يعمه ما اريدن اغهرج لجن حاطة حية ابيتج .

- هو هنا ؟

- ما عول يخلص الغدا و يدش وياها ، ما فاركها و كل ما يكوم تتبجبج و تكول اخافن و تتحضن وتلزك بروحها بيه ، و هو زلمه يعمه و هي هاكدها هم كلبه يسيح الها ، جا شنهي كلب يو حجرة ، و كلب الزلمة رجيج

- انا منين اجتني هاي بالله ، شعمل بيها

هدية : هم اشتغلت

يسرى : حرام و العباس گشاية ما شالت من الكاع كله علي ، هاي حبوبتي شاهدة

ام حاكم : واحد يحجي حك الله ، ساعة الرديت وليجاي ، ذيج كارصة داخل و هاي بس تفتر.

يسرى : عمه كلما تشوفني و تكول اخاف و انا والله ما كاربتها ، حتى شكيت بروحي خاف بيها شي ، كلساع و تكل لعمي اخافن منها ، حتى خلت عمي يتجنف مني.

- كعدي يمه ،ارتاحي

كامت من مكانها ودكت الباب حيل و هو حديد ، ربدته ربد : شنهيييييييي بس نووووووووم كووووووومو ياااااله

فتح حاكم الباب : هاي شمالج

- انا شمالني يو انت مالك ؟

- جا هو هيج يندك الباب

- رايد اعرف هالعرس يمتى يفض ، ترا صبري خلص يحاكم.

اندار لايمان و هو يكللها : اطلعي ياله

طلعت و هو طلع بالكراج ، مشت وراه كواغد : جا شنهي نسيت عدك مرة ثانية يو البت خذت عكلك يحاكم

- انا ما ناسي لجن البت جديدة

- جديدة ، جا دوري يمتر يجي ، تراك من ساعة الرديت من بغداد و انا وياك ما كعدنا كعدة احباب، جن هالحضيريه خذت كل عكلك و انا سيسيت

- لا تحجين هالحجي ، كدرج عالي و اعلى راسي ، و الليلة حك علي ، نكعد و نتسامر بهداي.

تنهدت و هي تاخذ نفس و ارتاحت ساعة الكالها اليوم يمج، ردفته : الا نسيت اكللك

- شنهي

- سرحان رد

- صدك ، ايييه الله يبشرج بالخير

- جا عليش ، شنهي ناطره انت

- رايدلي شغل خوما اظلن هيج كاعد بالبيت انا و ابني ، و انتن تشتغلن

- جا هاي مو طلع الها ورث

- شمالج هو ابوها ميت خاطر تكولين ورث

- جا عليش اخذتها اذا ابوها طيب

- مريض شنهي نظل نعيد بهالسالفة ، ياله انا اروحن امرن اعلى سرحان خاطر انظم لشغلي ابغداد غاد .

طلع و انا اهزن بيدي ، دشيت للگبة ، عاينيت الكل كاعد اعلى العشا الا ايمان موجفه و تعاين.

- جا ما تكعدين

- ما اشتهي

- و عساج لا اشتهيتي ، امشي ياله نظفي حجرتي ، حاكم اعلى جية و الليلة يبات يمي .

- و اني ؟

- جا شنهي رايدته كله الج

-اني اخاف ابقى لوحدي والله .

يسرى : عمه هاي لا ما نرجها ما تنعدل .

كواغد: و انا ادوها ، كمت ليها و كضيتها من راسها : سمعي ولج ، وعلي يو تكربتي من حاكم الليلة ما تعدي اعليج الليلة سلامات.

ايمان :- ما اتقربله والله ، بس خلي هدية تنام يمي .

هدية : انا انامن يم جدتي

جمارة : انا انا يمه انا انامن يمها

ضحكت كواغد و هي تكللها : ما نريد سوادين ، خوووش

و هاي تفتح الها بحلكها ، و تعاين لايمان : انا انامن يمج ما اخلي الطنطل ابو الوجه الاسود الشعر المشعف يجيج .

ضحكت هدية و كواغد و يسرى ، و ايمان تفرك بأديها اليسرى التضحك بوجهه و تخزر بيها.

(القصر )

كعدوا كلهم اعلى سفرة العشا الا ملوك ، حجه الشيخ : زناد كوم و احضر امك ليجاي خاطر نتعشا سلامات.

كام زناد و هو يحاول يقنع امه خاطر تكعد ، بالكوة يلا جرها و سحبها ، كعدت و هي تعاين ردحة كاعدة بكتر سرحان .

كعدت اعلى السفرة و هي تتنهد، سما بسم الله الشيخ و بدو اكل ، اكلت لكمة ملوك و رادت تكوم ، حجت : انا اترخص شيخ لجن ما الي نفس بالاكل

حجه سرحان : ان جانت امي السبب فانا ما رايد اضوج خلكج بيها ، و علوا لو الشيخ يرضى اخذ بيت الها و اكعد وياها و انتقل من القصر خاطر لا تتضايك الشيخة

كامت تعاينله بحقد و الشيخ يجاوبه : خوش والله ، تاليتي ولدي يدورون بيوت و يهدون ، و انا الما رضيت لظلتك ابغداد تالي تهدني و انت بالديرة و كصر ابوك عامر.

- و انا ما رايد افاركنك ، لجن الشيخة متضايكة و بنفس الوكت ، زحمة اعلى امي تكعد ابيتك و هي محرمة اعليك .

عاينت لملوك و انا مترهي و هي الود ودها تهد اعلية هدت ذياب جوعانة، نطقت : يو تعقد اعلى امي ، يو تخليني اخذها و اطلع من القصر .....يتبع

☆☆☆☆

شكرا على المليون مشاهدة

و باجر اطلبوني هديتكم

احبكم هواية ❤

((( بقلم زينب ماجد )))

الحلقة_ 18

(أصبحت الكذبة حقيقة )

الله يرحمگ

أنطينه للمچلوب ملحتنه .. ونگاد

چا ما يغزر ليش وياكم ... الزاد

(عريان السيد خلف )

(القصر )

عاينت لملوك و انا مترهي و هي الود ودها تهد اعلية هدت ذياب جوعانة، نطقت : يو تعقد اعلى امي ، يو تخليني اخذها و اطلع من القصر

ضحكت ملوك بأستهزاء : لا تظن تكض ابوك من الايد التوجعه و تنذره بطلعتك ، عقد امك ما يصير الا بطلاكي .

الشيخ مطر : زناد ، اخذ امك اظننها تعبانة

ملوك : انا موش تعبانة يشيخ ، لجن انا ناطرة اختيارك يو ظلتي يو الفصلية

سرحان : من رخصت ابوي بس رايد اسأل سؤال و الشاهد الله انا ما ابالي اضرنج ، لجن بعبي سؤال يدور من اجيت و انا انشد اعلى اعلومكم و سمعت بمرت زناد عد اهلها.

عليش ما ترضين لابوي يعقد اعلى امي ، و انت الشاحته مرت زناد و تريدينه يعقد اعلى غيرها يله تردينها اله ؟ الاعرف انا الشيخ ابوي مو زناد و الشيخ من حكه ياخذ اللي يشوف بيها اسباب تناسبه ، شنهي حكوك زناد اعلى من حكوك ابوي ؟

زناد : شيطان ورايد تفرك بيني وبين ابوي ، كوووم منااااا

صرخ زناد ، ردفه الشيخ و هو يكله : زناااااااااد

سرحان : و علي موش ابالي افرك ،و انا اتعذر من ابوي لو اخذ جلمتي بهالراي ، لجن انا بس رايد اعرف ، ليش معارضة زواجك ، وموش راضية ترد مرت زناد الا يتزوج اعليها ؟

انت اخوي و ما بيها شي لو فهمتني ان جانت الصورة ما واضحة عدي.

كامت ملوك من السفرة ، و زناد ترخص من الشيخ و كام ، و الكل كاعد واحد يعاين بوجه الاخر، درت اعلى الخاتون ، منزله راسها و تصنت ، و امي مدنجة و ما تحجي ، وراديون تعاين بوجهي .

الشيخ : كملو عشاكم و هدوا السوالف ، نحجي بعدين.

كملوا اكل ، كام الشيخ و حجه : سرحان ، كوم وياي رايدك.

كام ، وكفت الشيخة بعينه و كالتله : رايده احجي وياك .

- بالليل ان شاءالله.

عافها و طلع ، تعدينا باب القصر ، تلكانا حاكم : يااااهلا و جثير الهلاااا

تلكيته : هلا يابه ابو ستار ، شلونك شلون صحتك.

- بويه احنا الننشد اعلى لونك، شنهي الغيبة هاي.

الشيخ : انا سابگكم للمضيف

سرحان : شني ما شني ، سمعت معرس صدك

- اي والله

- وولد منير

- هو انا سمعت بهالسالفة و اجيت احجي وياك ، صارلي بالشهر جويعد بلا شغل ، و المعمل كاضه ابن الحجي و ما اريد امشي غاد و اتوهدن وياه.

- شوف حاكم ، انا من جنت بالبادية و انا افكر افتح معمل بالديرة هنا ما دامنا استقرينا ، انا اشوفن يو نستقر هنا و نبعد من بغداد.

- وشغلك غاد

- استمر بالشغل بيه ، لجن ابوي رايدني هنا و ما اكدر اظلن كاعد ، لازم اشوفلي شغلة ، و اشوف الحليب مالت الهوش و الجاموس ينباع بفلس ونص بالولاية و الولاية تبيعه بسعر عالي ، عليش ما نشتريه احنه و نشتغله شغل عرب ، نبيعه للولاية و المحافظات بسعر اعلى.

- خوش فكرة ، بس انا شنهي دوري بهاذ الشغل .

- انا رايدك وياي بالمعمل ، بس موش وكته ، رايدلي وكت شهور ياله نكدر نلكه مچان و نعمر و نحط .

- جا ولذاك الوكت انا شنهي كعدتي ؟ تريد الصدك انا رايد اردن البغداد ، خايب طكييييييت

- عليش؟

- جا غير مفاشخ من الروس

- هههههههههه جا هاذ حال اليحط اثنين

- الزغيرة كاضه بذالي و الجبيرة ما تهود ، يا الطنطل و يا طلابة الطنطل

- الطنطل شنهو هاذ الدور

- ولك جايبه راس صخلة ذيج الكل كرن براسها كاسل هيييج و صابغته بدم و خالته جدام هالبت و ذيج يكض حسها لو دوت .

ضل يضحك بصوت عالي : والله حالك صاير ما ينحسد يبو ستار

- جا ما تشوفني هالاكلك اريد اهجن من عبن احط و حيدة غاد ووحيدة هنا واوفك بينهن جا شسوي.

- ان شالله ان شالله بس افضى ، نروح انا وياك لبغداد وارتب الوضع

- اي واللهوبعد اخوك ، تراها جعدة البيت ما تراد و النساوين مجابلاتك

- الله يعينك ، امشنا للمضيف خل نشوف ابوي.

- لا والله اردن ، اخذ راحتك انت و الحمد لله اعلى سلامتك

- الله يسلمك هلا بيك.

مشيت للمضيف ، لكيت ابوي جويعد و كاطع كاعد حذاه و عمامين كاعدين جدامه: الله بالخير

ردوا :- الله بالخير و الرحمة

كعدت و انا اسمع عمي يحجي ويا ابوي اعلى راديون و رايدها لبته ، سكتت ما حجيت شي ، خليته يكمل كلامه ، كاله ابوي : ان شاءالله يصير خير .

كام عمي و اترخص و كاطع يكله : شيخ لون بت اختي و اختي رايدتلها ابو قصر العالي لجن البت كبرت و لزوم تعرس ، مامش بت تظل عد اهلها وجعدتها عيبة .

اندار غلي و كال : و انت يسرحان ، شتكول ؟

- الراي رايك شيخ و ما يعلى اعليك راي ، لجن انا اكولن يو تاخذ راي اخيتي من كونها هي التعرس و هي الاعرف بمصلحتها .

هز راسه و رد بسؤال مغاير : شنهي دشتك اعلى ال ثجيل ، و شنهي الحجي جان

- والله بويه انا دشتي اعلى امي مالي عدهم شي لجن العرفته ، ثجيل اعرف معلومنا من عدنا

- شلون ؟

- العرفته مراقبنا واحد واحد و ما استبعد يو لكيت عده علوم القصر .

- عدوينا متربصينا

- شرايد

- رايد حك ابوه مني

- و شنهو حكه ؟

- قصري يعتقده حكه وورث ابوه من عمي دوّاي وضاحي ابوي هو الاستولى اعليه ، هو يريد القصر ، و البستان، طالت مصايبنا وياهم و تعبنا من تحريض سلطان للعشاير اعلينا .

- بويه انا اشوف الطيبة كفر ويا ما بكلبهم طيبة.

- و انت الصادك يوليدي لجن ، المشيخة ينرادلها حكمة و الا دم واحد من عشيرتك يو طاح يطيح بركبتك، و انا موش حمل دم و هلني صابر اعلى عمايله و الا سلطان بارود متاني اليهيجة و يكله وج خاطر يشتعل و يشعل الديرة بأهلها.

دش زناد و هو يكول : و شنهي بارودهم يو جان بارودنا بدمنا و نشعله اباروده .

كعد بضحكة و هو يكول : سمعت اسم سلطان بارود ، و انا مناطر اليوم اليفج سلطان حلكة و علي لاوجر بيه النار هو واهله.

الشيخ : شنهي علوم الشيخة امك .

- امي متضايكة جثير بويه و ما ندري منين طلعت النا هالسالفة، لجن ما يعلى اعلى رايك يو نويت .

سرحان :انا كلت لبوي ، يو رايد اخذ امي و اكعد ابيت ما عدي مانع .

الشيخ : عفوكم من هالسالفة و خلونا نحجي بطلابة حجي نوري .

وكلبنا موضوع و ظلينا نحجي بسوالف العشيرة و شلون يهيئنا باجر للكعدة و شنكول وشنحجي ، وظلينا على هالمنوال طول الليل ، ليما ردينا.

(بيت حاكم )

ايمان : اني ما اكدر ابقى وحدي هنانه اخاف

- ولج بويه ماكو شي منين تخافين

- عفية ما اكدر ابقى وحدي والله

- جا شلون اظل مكابلج ، هم عدي مرة و حكها عليها من يوم العرسنا و انة ما كاربها ، لا والله كبلها.

- زين خلي انام يم امك

-ما عدي مانع ، اخذي فريشج و مددي غاد و انسدحي ويا البنيات .

شالت فراشها و بطانيتها و مشت للهول، و هن كاعدات ، حجخ : يمه ايمان تخاف تظل وحيدها بالحجرة ، خلها تنام يمج .

- جا ما تنام ياهو الكاظها.

مديت فراشي و هو راح كدامي لغرفة مرته الاولى، ضربت عكس و اني استمع لسوالف امه ، اندمجت وياها ، و ظلينا فد اني و امه و هدية و جمارة .

شوية و امه نعست و نامت و هديه غفت بلا ما تدري بروحه و جمارة نامت اولنا ، ظلست اتكلب بفراشي ، و بس البطل مشتعل ، اريد عيني تغمض مدا تغمض ، سمعت صوت ، فزيت من فراشي

طلع صوت السركي مال غرفة ستار ، طلع ديروح للحمام، رجعت نمت و اني اباوع للباب يمتى يرجع، شويه ورجع و دخل لغرفته .

بقيت كاعدة و اتذكر بوجه يسرى و اهاف بالزايد ، ارجع اتعوذ و اقرى قرأن و احاول ابعد هالافكار من بالي .

ضوا الشعلة بدا يخف و عيني ما مدا تاخذ نوم.

(تحذير : اذا كنت ممن يخافون مشاهد الرعب مرر الصفحة لحين العلامة ⛔✔)

درت وجهي للحايط و البطل بظهري، و اشوف خيال بالحايط يمشي ، ضخم حيييييل ، فزيت من مكاني ، باوعت من الصفحة الثانية ، ماكو احد .

بقيت ادور منا و ارجع اباوع منا ، ابد محد كام ولا احد مر ، بس اني متأكدة شفت خيال واحد فات .

الضوا يخف و يقل تدريجينا و قرب يطفى ، و دكات كلبي تتزايد و انفاسي تتصاعد من الخوف ، جسمي كله كزبر ، واطرافي جمدوا خوف .

طفى الضوا !

بسرعة دخلت جوا البطانية و سديت عيوني حيل، احس شي يمشي يمي ، و شخص قريب عليه ، اريد اتذكر ايه من القرأن مدا تخطر على بالي ولا ايه غير واني اردد ( ربي ربي )

فجأة حسيت احد واكف فوك راسي

هديت حتى اعرف اللي داحس بيه صدك لو تخيلات ، اني فعلا دا احس واحد على راسي و ديتقرب .

بلعت ريكي و انصكت اسناني و التفت رجلية من الخوف ، واحد فوك راسي ينفخ عليه ، صوت كلش مخيف .

تبعه صرخت بزونه قريب من الباب ، صرخت بصوت عالي ، ويا صرختها فزيت من مكاني ، كمت اصرخ : عاااااااااااااااااااااا حاااااااااااااااكم

اصرخ من كل كلبي و اباوع ما اشوف شي ابد ، كلشي اظلم كدامي ، زت بالصراخ بكل قوتي .

⛔✔

كعدوا الكل و الحجية تصيح : هاااا شنهييييي

و هدية تصيح : يااااااهو

وجمرة كاضة بهدية ، طلع حاكم مفزوع ما يندل دربه و هو يصيح : شنهي ، ايمااان ، وينج

كمت و اني اتلمس الكاع و اتبع الصوت مال حاكم ، لما لزمت رجلية ، كمت و اني ارجف و اكوله : واحد جان ينفخ يم راسي ، و شفت خسال ، اكو واحد بالبيت ، اني متأكدة شفت خيال مشى ومحد موجود. .

وهو يزلم بيها و يكلي : بهداي بويه بهداي خلنا نعرف شنهي السالفة ، ولج هديوة كومي شعلي الضوة ، هندس خلني اوچد دربي .

- اني شفت شي وللله شفت ، اريد اروح ما اريد اظل هنانه

- بس اهدي خليني اكضج

شعلت هدية الضوة و اسمان ترجف بين ادين حاكم و تحجي تحجي تحجي و هو رايد يفهمله كله مامش.

كواغد : عاي دواها يمي ، انا اعرف كودن انت نايم عدي و هي هنا عملت الها سالفة خاطر تظل يمها

- والله اني شفت والله ، حتى سمعت شي ينفخ

ستار : انا كمت رحت للحمام خاف خيالي

- لا لا اني شفتك لما طلعت مو انت

حاكم : ماكو شي وعلي ، هاج عايني ، ماكو شي

- والله مدا اجذب

هدية : جا احنا موش يمج نايمين جا ما نفخ اعلينا، يو بس اعليج ينفخ هالطنطل .

يسرى : شلون تصير العيارة يا هديوة ، انا اظنن عمتي كواغد اعلى حك و هاي البو غيرانه من عبن هاي اول ليلة يهدها عمي و يروح لعمتي

كواغد : جا تعلميني بدروبهن

حاكم : ولوووووو غاد ، امشوووووا ، ردي هديه ياله جمرة

ام حاكم : عساها بحظج و ابختج ، جلفتيني ، حتى حيلي توهدن وجدامي بادن ما بياش امدهن.

حاكم : يمه نامي خلني افتهم هالطركاعة هاي،

اندار بعصبية : شنهي بس فهميني سالفتج ترا شليتي حالي وعلي ، ما طلعت هاي من ساعة الاخذتج و انت اخاف و اخاف ، مو وياج عايشين ، شفتي واحد بينه نوكل راسه نكطعت ايده

ايمان : رزلني و ما فهم مني ، جان نعسان و النوم بعينه ، ابد ما تفاهم ، دنكت ابجي و نرديت عليه

بقى كاعد بمكانه و اني ابجي و الكل رجعوا لفراشاتهم ، بس كواغد واكفة فوك راسه و تكله : هسه شنهي

- جا غير افتهم خاطر اكلج شنهي

اني مستمرة ابجي ، رد : ولج بويه و علي نعسان ، كولي شرايدة

- اخاف

- منييييييين

- والله شفت خيال

- خياليييييش ، هكو وحدة كاعدة ليهسه ، الناس نامت وهودت و انت توچدين بالحياطين هلبت تلكيلج بيهن خيال، بسج بويه تعبنا وعلي الفحل تعبنا بس.

جريت الغطا و درت منه و ابجي بسكوت ، ظل هو كاعد اعلى راسي و كواغد تكله : هدها خلها تولي كوم

- روحي نامي ، شويه و انا اجي .

مشت كواغد و هو ظل كاعد و يغفي على راسي ، و اني مستمرة ابجي ، فتح الغطا : ادني ليغاد متت برد ، ادهدي غاد.

فتح الفراش و نام، اني تعبت من البجي لحد ما غفت عيني، مكعدنا غير على صوت كواغد و هي تضرب باب الهول قوي و هي تصيح : هديوووووة اكعدي ياااااله متووووثين نوم هذا الجانيته منكم

شلت راسي و هدية تلف بشيلتها ، اباوع الضوه بعده مطالع كلش كأنو مغرب ، مليت من حياتهم كلش صعبه ، بس لو اعرف شعدهم يكعدون من الصبح هيج جان ارتحت .

باوعت لهدية : وين حتروحين

- اجيبن ماي، تجين وياي ؟

ضحكت : اي

كمت من مكاني لبست حجابي و انطتني عباية و شدتها اليه من خصري و اخذنا الدلو مال المي طلعنا ، صارت كدامي كواغد : دروبج مال امس ما ناسيتهن ، لجن اردن و اعرف شسوي بيج .

مرديت عليها و طلعت ويا هدية ، نمشي و الجو كلش بارد ، و الشمس لسه ما علت : لويش تكعدون هيج وقت

- جا شوكت نكعد

- احنا هناكة ابغداد نكعد الساعة ٨ و مرات ب٩ .

- لا احنا نكعد ويا الاوذان

- مفهمت يعني شنو الاوذان

- يعني اااااالله اااااااكبر ااااااالله اكبر .

- هاااا اذان

- احنا هنا نسمي الوذان

- حجيكم صعب

ضحكت و مشينا ، وصلنا الشط ، جان كلش حلو عفت الدلو و ظليت العب بالمي ، اشيل بأيدي و اشمره ، درت لهدية لكيتها تباوع لواحد راكب على حصان : هدية

كمزت : هااا

- منو هذا ؟

- ياهو ما اعرف

- ابو الحصان

- ما احد ما احد

- مراح اكول والله

- لا امشي

- تحبي

- لا احبه شني ، امشي

- بس هو بعده يباوع

ردت باوعت، و اندارت و هي تخفي ضحكتها ، امشي ، اخذنا المي ورجعنا وابو الحصان تبعنا .

ويا ما دخلنا الفرع ، هو دار حصانه و مشى ، اندارت هي تباوع وراه : لا تكولين لا بلي انت تحبي

- لا

- عيونج هيج تكول

- عيب امشي .

- لويش عيب

- امشي

ضحكت و مشيت ، حجت هي : هذا ابن الشيخ مطر

- صدك ! اشو مشفته لما بقيت ابيتهم

- سرحان الجان الشيخ يدور عنه

- ما اعرف ممنتبهه ، بس حلو تتزوجين ابن الشيخ التشتغلين عدهم

باوعتلي وهي تضحك : يصير

- اي

- شوفي ايمان ، ابد لتكولين لاحد احنا هيج شفنا

- لا والله ما اكول .

- يلا امشي

رجعنا ، و حاكم ناطرنا : هاا

- رحت اجيب مي وياها

كواغد : و هالكثر تخرتن ، جا يو موديتجن تفلحن يمتى تردن الغروب ؟

اخذت المي من ايدنا بقوة و مشت و العرفته كواغد و حاكم متعاركين ، لإنو اثنينهم اعصاب.

حاكم : حضري روحج نخلص ريوك و نشرب جاي واخذج للسيد اكطعلج ، و بعدها خلني اشوفن شلون تخافين.

- بس اني مدا اجذب والله ، اني صدك شفت.....

ثاطعني و هو يكول : خيااال، افتهمت و انا ماخذج خاطر اشوفن شنهي علتج ، ما معكول من يوم الاخذتج و مكضيتها علي اخاف و اخاف .

هدية : بويه انا راح راوحن للقصر

- نطري امج امشي وياها.

نطرت امي ليما كمت غسل ، لفت روحها و طلعنا للقصر ، وصلنا غاد سرحان يربط الجام حصانه بالعمود البكتر القصر ، عاين علي من مريت انا دنجيت ما عاينت خفت لا امي تهيسني.

دشيت و انا احضر ريوك الخاتون ، و اتنطر مرته من المطبخ ، خاطر اشوفنه ، لجن ما مر .

خلصيت الريوك كبل ريوكهم و اخذته ومشيت وين ما هم جويعدين ، شفته كاعد ، دنج ، انا مريت احطن الزاد جدام الخاتون ، و انطر ليما تنصب سفرتهم خاطر تاكل.

الشيخ يحجي ويا زناد اعلى رجعت مرته و زناد يكله : موش وكته يابه ، رايد بت خالي كاطع ، اخذها واعرس اعليها و عودن بعدها اردنها.

سرحان : بت كاطع !

اندار عليه : اي شنهي ما عاجبك

ضحك استهزاء و هو يكلي : ياهو مالتي اخذ التعجبك خوية .

الشيخ : كريم وين

صبيحة : شيخ كريم من امس و هو ما راد .

- جا وينه ؟

- ما ندري عنه

زناد و هو يعاين لسرحان و كان يحمله الذنب : كريم من يوم اجدامه داست درب الكيوليه و ما هد هالدرب بعد ، تلكاه بايت عد وحدة .

سرحان : و احتمال ظال يم واحد رفيجه يو طالعين بر ، مالها داعي تحجي اعليه بظهره يخوي .

- انت من يوم الرديت و ليجاي و هاد حيلك تسعى هاطر اطلعني زغير و ما افتهم شي احرض اعلى اخوي.

الشيخ : زناد

- السموحة يشيخ

كام من مكانه ، و سرحان دار وجهه ، صدت عينه بيه ، دنج مبتسم و هو يفرك بوجهه خاطر يضيح الضحكة الوضحت بملامحه .

دشت صبيحة وبتها و امي يحضرن بالسفرة ، كام الشيخ و طلع ليما يخلصن، و سرحان تبعه ، كمت عاونت امي و اتناوش الصحون من ايدها.

خلصنا ، بلغت الشيخ خاطر يكعد اعلى السفرة ، اجت صبيحة : كومي يمه اعاون الخاتون

- انا راح اعاونها روحي ارتاحي خالة

- الله يطيج العافية بنيتي .

مشت و انا ظليت اعاون الخاتون بأكلها ، و الشيخة اجت و الشيخ و زناد و الكل حضر ، و طلب منهم الشيخ ياكلون بدون حس ولا سؤال ولا نقاش ، كمت اناوش الخاتون ، و بس حس اكلهم اهيسة

درت و اعاين سرحان مدنج راسه و شايل عينه يعايني، ابتسمت و درت وجهي خاطر لحد يشوفني.

اندك باب القصر ، ودش كريم : صباح الخير .

ردوا اعليه بس الشيخ ما اندارله ولا رد ، ظل يوجد بيهم شاف سرحان بنصهم ، صاح : لاااااا ، هاذ ياهو

ضحك سرحان و هو يكله : امش بعد الريوك نسلم

تكرب اعليه و حباه و هو يكله : اكعد اكعد ، بس و علي ظل بالي اعليك ، شنهي وين جنت

- بالبر

- امس انا غاد

حجه الشيخ : و ما تعرف تطي خبر كبل لا تروح

- جنه ناوين نص نهار ، لجن غاد و غيرنا راينه و ظلينا ، السموحة شيخ

وكعد وياهم ع الريوك و سرحان يعاين لزناد و ذاك مدنج ما شال راسه.

دشت امي للحجرة : شيخ كاطع يريدك بالديوان بساع

- ما كتيله كاعدين نتريك

- كتله لجن كال الامر ضروري يخص ال ثجيل و هم هساعة اعلى باب المضيف .

كام الشيخ من الزاد ، وولده ال٣ كاموا وياه ، زناد اشر لكريم : حضر التفك .

سرحان : يواشك ، خلنا نفهم شنهي السالفة

الشيخ : ها يكاطع

- ال ثجيل جايين هداده اعلى بتهم و يكولون الشيخ مطر ناهب بتنا .

- يا باطل ، امشوا

مشا الشيخ وولده و كاطع و زناد يكله : جا هاذ الجنيناه ، هساع صارت الحجة لثجيل يهدون اعلى ديارنا ، و اسبة انت يسرحان.

سرحان : حجة شنهي ، المرة امي و محد اله حك اعلية .

- جا رد خوالك يو كدرت

الشيخ : وكت اللازم تعاونون ، تكعدون تتعاينون وواحد يذب اثامه براس الاخر ، شمااااالكم انتم، خلونا نفهم شنهي بالاول .

مشوا غاد و لكوا ، اخو ردحة واكف و لاف شماغه اعلى راسه و التفكة بيده ، حجه الشيخ : شنهي الراي يفرحان

- اخيتي من اول امس ابقصر يبن ضاحي ، ترضاها اعلى حريمك.

سرحان : امي من حريمي و ثجيل مالهم جلمه اعليها .

فرحان : امك لجنها محرمه اعلى ابوك ان جانك تعرف الاصول .

الشيخ : انا الضحى كاتب كتابي اعلى ردحة و رادها لذمتي

- لا تظن ثجيل يرضى يناسب ضاحي و الصار غلطة فصل ما تنعاد .

سرحان : امي امرها يمي موش بيد احد خاطر تجي تفرض اوامرك اعلينا يخالي .

فرحان : الكم عطوة منا لليل ، يو ما رديتو المرة لدارها ، احنا وياكم و الفشك يبن ضاحي .

كض ولده وردهم ، اندار الشيخ : و هاي الحجة اليتانونها ولد ثجيل اعلينا.

زناد : ما ينرادلها حجه بويه ، هم انطونا الحل ، رد المرة وتفض السافلة

سرحان : التحجي عنها و تكول ردوها امي يزنااااد

الشيخ : بسكم ، امشونا اندش المضيف ، وندانش امرنا بدل مصايحكم هاااذ.

( بيت حاكم )

حاكم :- ياله بويه امشينا خاطر اخذج اشوفن علتج شنهيه

حاكم : وين نروح

- بويه هم هاي تخافين منها هو سيد يقرا عليج ، يطيج حرز و نرد خلصت فضت ، البسي هدماتج ياله فضينا.

لبست و طلعت ويا حاكم و هو الطريق كله يفهمني انو ماكو شي و اني احلف اله انو اكو شي واني متأكدة شفت و سمعت بس مدا يصدك، وصلنا للجامع و بصف الجامع غرفة للسيد ، كال: عدلي حجايج و لفي عباتج عدل.

دخلنا ع السيد سلم عليه ، كاله : سيد مرتي هيج و هيج حالتها و من ساعة الاخذتها شلت حالي بخوفتها ، هلبت تقرا عليها و تنطينا حرز يشافيها.

سأل : اشفتي

- خيال ، بس اني متاكدة مجان احد موجود ، بعدها انطفى الضوا و صرت احس احد قريب مني.

السيد : بس هاي ؟

بقيت اسولف اله ع الطنطل الشفته الطلع من جوا جربايتي و حاكم يضحك و يكله : ينصبون عليها و علي كلشي ماكو جيفن ماخذها جديدة النساوين رادن يهججنها

السيد : بس البت شايفة

- دكول ياله سيد ، اشايفة دخيل بخت جدك ، بيتنا هاذ صارلنه بيه ١٧ سنة ، كلشي ما شفنا

- ماله غرض بالسنين ، انا جاي اعاينها ، البت موش بس خوفه بيها ، البت مار عليها ، و لو طالت الحالة تتغمج و تصعب اعليك و تسوء .

- لا تحطها ابالها سيد ، ماكو شي كل الموضوع جابن راس مالت باجه و صبغنه .

- بكيفك ، انا نصحتك و انت ظلت يمك ، لجن اردن و انصحنك تاخذها لسيد زوين ، هاذ رجال معروف و هاذ اختصاصه ، يقرأ اعليها و يزكيها .

- وين صاير

- بالنجف

- ايييي سيد شياخذني دخيل بخت جدك ، اكتبلي حرز ، اي شي خاطر تمنع خوفتها .

- بكيفك

كتب .. و لفها و بقملش اخضر لفها ، كاله : هاذ حرز للامام الصادق يبعد عنها الخوف و اية الكرسي كتبتها وياها ولفيتها بعلك مالت الأمام الحسين ، خيطها ، و حط بيها دنبوس و كاله : هاي تعلكها بهدومها ما تنزعها ابا ساعة النجاسة و السبح ، بس الزوم تلبسها بكل وكت ، و انا انصحنك تاخذها تره انا ما بيدي غير اطيك حرز و البت انا جاي اشوفنها موش تمام و شايفته بعينها و سامعته و مار اعليها و يو مسها تضيع البت من كون نجمها خفيف .. تلاحكها.

- ان شالله سيد ان شالله، انا اتشكر منك ، شكثر تامر

- بثواب الحسين ، بس بويه لا تتهاون بيها ، البت الزغيرة

- اشكرك سيد على راسي مولاي

طلع و هو يسلم عليه ، حجيت : شنو يعني مار عليها

- ماكو شي يمعودة ، هم السادة ادخيل بختهم يو دش اعليهم وحيد يخوفونه ، بيك هيج و بيك هيج يخلونه يوهوس ليما يتسودن .

هاج هاذ علكي بهدومج لا تنزعينه ، خوووش ؟

- ماشي

دنمشي ، التقى بواحد ، وكفت وراه و هو كال : هاا الله يساعدك ابو عبيس

حميد : هلا بحاكم هلا

- شنهي شو تشحط

- خايب صبحنا الصبح اعلى هدت ال ثجيل

- يا ستار

- اي والله ، فززونا كطعوا ارواحنا

- عليش

- على ام سرحان موش جايبها لا يرضون يخلونها ولا الشيخ يعقد اعليها.

- يييييي جا يو نخلص

- راد من عبن مريتي مريضة و ترخصت من الشيخ

- روح ، انا راح امش للديوان ، اوصل العايلة و امش غاد

- يالله نشوفك بخير

- هلا بيك بويه .

- سرحان ابن الشيخ ؟

- اي عليش تسألين

- مو تذكرت سالفة

- شنهيه ؟

- ميصير اكولها عيب

- ضحك و هو يكللها : الله ينطيني صفوة بالج.

رجعنا للبيت ، امه مموجودة ، بس يسرى بالبيت : حباب خلي اروح للقصر

- شعدج غاد ، مستعجل اريد اروحن

- والله بس اشوف عمه ما ابقى هناكة

- جا تظل البت وحدها ، دكعدي بويه اكعدي.

عافني ومشى ، كعدت بالهول ، يسرى بغرفتها ومحد اكو، كمت بلشت اشتغل ، وسويت اكل على كد ما اكدر ، ويسرى مطلعت من غرفتها ابد .

احسن لا تطلع من اشوفها اخاف

شوية و كمت اسمع بيها تصيح و تحجي وحدها ، معرفت شبيها ، بس عفتها مهتميت .

انفتحت الباب بقوة.

( المضيف )

- ها الله يساعدهم

ردوا : هلا بيك هلا .

و كعدت وياهم : شنهي الراي ؟

الشيخ : راييش نجيبها منا و نحطها منا ما ترهم ، لا نكدر نرجع المرة الهم ، مريضة و رايدة تظل يم ابنها ولا اكدر اخليخا ابيت و ابعد ابني من قصري ولا اكدر اعقد اعليها.

كاطع : ما بيها غير تكعد ببويت بعيد عن قصرك ، جا ما بيها حل بعد

حاكم : عليش ؟ هي بيها و بلاياها براس سرحان ، البيت الطين البكفا القصر يبني و يخلي الها الصيت بيت السرحان منفصل عن القصر مكعد امه بيه .

الشيخ : رايه هم صحيح

سرحان : هاذ انسب حل

كاطع : بس ما اظنهم يرضون ، من كونه بستان الشيخ مطر !

- جا شنهي اعلى كيفهم ، كاعدة عد ابنها و ابستان ابوه بمثابة بستانه ، غير ابنه ؟!

الشيخ : والله وابن ثجيل يحل طلايبنا ويا ال ثجيل ، خايب سالفتك ما تتسولف يحاكم

ضحكوة و حاكم ردفه : جا انا وليدكم يشيخ، ربيت بكاعك و الربى اله حوبة

- و النعم منك يبو ستار

- الزود الك شيخ ، و ما دامني من ال ثجيل ، انا اروحن ليهم و ابلغهم بالحل و اكللهم ان المرة صارت ابيت لابنها بكفا القصر.

- امش و هدي الزضعية يحاكم

- تامر شيخ .

الشيخ : ان شاءالله تنحل اعلى هالمنوال.

جاسم : دامها انحلت ، نرد نحجي بسالفة وليدي ، من كونها السالفة طالت يبو زناد .

الشيخ : موش وكتك يجاسم ، خلنا تونا افتكينا من طلابة ثجيل

- جا بيها طلابة يشيخ .

حجه ابنه فاضل : شيخ انت عمي و انا احترمك لجن صار سنه و انا اطلبها و انت تردني ، و ابوي يتوسل من ذاك اليوم لهاذ اليوم.

سرحان : و شرايد

- رايد بت عمي

- و بت عمك ما هاويتك و لونها هاويه جا رضت من زمان

- موش اعلى كيفها ، انا ابن عمها و احك واحد بيها

- لا توهم روحك بهالكلام ، راديون يو ما هوت ، محد يجبرها .

- من رخصت الشيخ ، لجن اعتبروني انا ناهي اعليها

انتفض الشيخ ، وفز سرحان : انت تعرف شجاي تحجي

الشيخ : تنهي اعلى بتي ولك

سرحان : افصم راسك والله

- انت موش اخوها و لا تمشي براسي خوة ، انا ناهي اعليها ترضون يو ما ترضووون

سرحان هد ، طكه كله و كضاه بوكسيات و الزلم تفاكك و جاسم كض سرحان و ضربه ، و كبت الهوسة و الصوت وصل لاخر العالم و الشيخ يصيح : نعلة الله عليكم فضحتونا ، بالمضيف و تتافشخوووون

كضهم و اطردهم من المضيف كلهم ، وكف جاسم و ابنه وراه و هو يكول : سهله يسرحان

و ابنه فاضل ، يكله : انا وياك و الزمن طويل

سرحان : دمشييييييي لك امشييبييي

حجاها و اندار يمشي، طلع الشيخ و صاح : سرحاااان

اندار عليه ، حجه الشيخ : امش وياي

اخذه و راح لكفا القصر : انا حاب حرصك اعلى اخوك كريم و اخيتك راديون ، لجن موش هيج تنحل الامور

- جا ترضاها ينهي اعليها

- افصم ظهره ، و انا ما اكلك ترضى لجن هيج انت حطيتلك عدوين بنص مضيفك يولدي

- شلون ؟

- الف طلابة ويا العدو ولا طلابة ويا الكرابة ، من كون عدوك تكدر اطكه يو اذاك ، لجن المنك وبيك هو اليحفر ليك وهو اليأذيك ... و اكثر من عدوك بعد.

- جا شسويلهم .

- المشيخة بويه مو سهلة ، ينراد لها عكل و بال طويل ، التسرع يهجم بيوت يسرحان بويه ، خليك ساكت و عاين الامور بهدوء و فرزنها بمخك ، ولا تطي جواب بساعة ، بات ليلتك بمسألتك ياله تنطق بجواب رايدينه منك ، كون تحسب ليها و اداورها كون ما يسهى عنك شي.

انا يوليدي فرحان بيك ، زلمه مثقف عاقل تخاف ربك ، اخلاقك هيل ، لجن الاريدنه منك ما تفارك المضيف ، و بكل طلابة كونك وياي ، وبكل طلابة امرن بيها اختبرك و اشوفن شنهو حلك ليها ، خاطر بعد يومين يو سلمت امانته ، انامن بكبري و انا متطمن .

- عمرك طويل بويه

- كلنا اعلى هالدرب هاذ ، واروحن مثل ما راح جلوب و ضاحي ، لذاك الوكت اريدنك شيخ تحل بمجاني بخي و كونهم يترحمون اعليه ، و الشيخة يبوي موش عكال و تحطه اعلى راسك ولا هي جعدت راس المضيف ، المشيخة هنا

واشر على عقله

تراه الزلمة بويه تكضه بفعاله ، لا يغرك اليهوبز ، تراه جثير اليهوبزون لجنهم هبة شرجي اطكطك و تمش ، اخذ افعال ، جلوب صارله ٧٠ سنة و هو ميت عليش لليوم الناس تحلف براسه ، غير من افعال ، جثير شيوخ بوكته هوبزو وينهم ؟ مامش و ضلت فعايل جدك جلوب الراد و الراد يعرفها و يترحمله .

( فاما الزبد فيذهب جفاءا واما ما ينفع الناس فيمكث )

فعايلك الرديه زبد تموع وتمش ما تهيسها ، لجن فعايلك التنع بيها الوادم تضلك تاريخ ، فلان هييييج سوا لوادمه ، تراها تنذكر .

احرص بويه اعلى فعايلك ، و اعتبر كل الجدامك ذيابه ، حتى من امك و ابوك اتحاذر منه ،دام بليس يدش بعكول كل الناس ، لا تأمنهم.

- اشكرنك بويه و ان شالله اكون عد حسن ظنك

- و انا اظننك هيج، البيت هاذ ننده اعلى الخدامات البالقصر ، يعزلنه و يرتبنه و يفرشنه ، خاطر تجي امك ، تكعد هنا .

- بس المكان موش لايگ‌ بويه.

- خلنا نفض اللطلابة اليوم ، و انا ابنيلها بيت يليك بيك و بيها .

- اتشكرك هواي .

حاكم : ها السلام عليكم

سلطان : و عليكم السلام

- انا جنت عد الشيخ مطر و سمعت بالطلابة

- طلابة فرحان

- اي

ناصر : و شنهي انت صاف ويا ال ضاحي

- انا موش ويا احد ، انتم اهلي و ذولك ناس ربوني و متفضلين علي.

- جا شنهي راح تظل تصيح متفضلين علي و تذل روحك الهم.

- لكمة الحلال ما تضيع بس ببن الحرام ، و انا موش ابن حرام يناصر ، جا انتم اهلي و كلتو حكي ، تريدني اعادي الوكف بساعة الضيج.

سلطان : هدونا من هالسالفة و ردولنا لطلابة فرحان .

- سرحان اخذ البيت اللي بالبستان و قرر يحط امه بيه ، ويكعد وياها.

- متاكد من كلامك هاذ

- يكدر فرحان ياخذ حرمته و يمر اعليها غادي يشوفها، يظل خال سرحان ما يطرده.

-يعني سرحان طلع من قصر ابوه ؟

- اي

- منتاز .

ظل كاعد وياهم شويه و طلع ، عاين ناصر : اشوفنك تضحك يعمي

- ههههههههههههه انطر و تعرف يبن خضير

دش فرحان حط الفلوس جدام سلطان : كاطع سلمنا الفلوس و يسلم عليك هو و اخته الشيخة .

- هههههههههههههه

ناصر : جا غير افتهم

- كاطع ضمناه بجيبنا و لو فج حلكه ينكص راسه نعرف عنه علوم ال مطر كلها، و شيخة مطر طاحت اعلى كاع صبخاية و الاهم ... سرحان طلع من قصر ابوه .......

رواية كحل عرب الفصل الثامن عشر

(أصبحت الكذبة حقيقة )

الله يرحمگ

أنطينه للمچلوب ملحتنه .. ونگاد

چا ما يغزر ليش وياكم ... الزاد

(عريان السيد خلف )

(القصر )

عاينت لملوك و انا مترهي و هي الود ودها تهد اعلية هدت ذياب جوعانة، نطقت : يو تعقد اعلى امي ، يو تخليني اخذها و اطلع من القصر

ضحكت ملوك بأستهزاء : لا تظن تكض ابوك من الايد التوجعه و تنذره بطلعتك ، عقد امك ما يصير الا بطلاكي .

الشيخ مطر : زناد ، اخذ امك اظننها تعبانة

ملوك : انا موش تعبانة يشيخ ، لجن انا ناطرة اختيارك يو ظلتي يو الفصلية

سرحان : من رخصت ابوي بس رايد اسأل سؤال و الشاهد الله انا ما ابالي اضرنج ، لجن بعبي سؤال يدور من اجيت و انا انشد اعلى اعلومكم و سمعت بمرت زناد عد اهلها.

عليش ما ترضين لابوي يعقد اعلى امي ، و انت الشاحته مرت زناد و تريدينه يعقد اعلى غيرها يله تردينها اله ؟ الاعرف انا الشيخ ابوي مو زناد و الشيخ من حكه ياخذ اللي يشوف بيها اسباب تناسبه ، شنهي حكوك زناد اعلى من حكوك ابوي ؟

زناد : شيطان ورايد تفرك بيني وبين ابوي ، كوووم منااااا

صرخ زناد ، ردفه الشيخ و هو يكله : زناااااااااد

سرحان : و علي موش ابالي افرك ،و انا اتعذر من ابوي لو اخذ جلمتي بهالراي ، لجن انا بس رايد اعرف ، ليش معارضة زواجك ، وموش راضية ترد مرت زناد الا يتزوج اعليها ؟

انت اخوي و ما بيها شي لو فهمتني ان جانت الصورة ما واضحة عدي.

كامت ملوك من السفرة ، و زناد ترخص من الشيخ و كام ، و الكل كاعد واحد يعاين بوجه الاخر، درت اعلى الخاتون ، منزله راسها و تصنت ، و امي مدنجة و ما تحجي ، وراديون تعاين بوجهي .

الشيخ : كملو عشاكم و هدوا السوالف ، نحجي بعدين.

كملوا اكل ، كام الشيخ و حجه : سرحان ، كوم وياي رايدك.

كام ، وكفت الشيخة بعينه و كالتله : رايده احجي وياك .

- بالليل ان شاءالله.

عافها و طلع ، تعدينا باب القصر ، تلكانا حاكم : يااااهلا و جثير الهلاااا

تلكيته : هلا يابه ابو ستار ، شلونك شلون صحتك.

- بويه احنا الننشد اعلى لونك، شنهي الغيبة هاي.

الشيخ : انا سابگكم للمضيف

سرحان : شني ما شني ، سمعت معرس صدك

- اي والله

- وولد منير

- هو انا سمعت بهالسالفة و اجيت احجي وياك ، صارلي بالشهر جويعد بلا شغل ، و المعمل كاضه ابن الحجي و ما اريد امشي غاد و اتوهدن وياه.

- شوف حاكم ، انا من جنت بالبادية و انا افكر افتح معمل بالديرة هنا ما دامنا استقرينا ، انا اشوفن يو نستقر هنا و نبعد من بغداد.

- وشغلك غاد

- استمر بالشغل بيه ، لجن ابوي رايدني هنا و ما اكدر اظلن كاعد ، لازم اشوفلي شغلة ، و اشوف الحليب مالت الهوش و الجاموس ينباع بفلس ونص بالولاية و الولاية تبيعه بسعر عالي ، عليش ما نشتريه احنه و نشتغله شغل عرب ، نبيعه للولاية و المحافظات بسعر اعلى.

- خوش فكرة ، بس انا شنهي دوري بهاذ الشغل .

- انا رايدك وياي بالمعمل ، بس موش وكته ، رايدلي وكت شهور ياله نكدر نلكه مچان و نعمر و نحط .

- جا ولذاك الوكت انا شنهي كعدتي ؟ تريد الصدك انا رايد اردن البغداد ، خايب طكييييييت

- عليش؟

- جا غير مفاشخ من الروس

- هههههههههه جا هاذ حال اليحط اثنين

- الزغيرة كاضه بذالي و الجبيرة ما تهود ، يا الطنطل و يا طلابة الطنطل

- الطنطل شنهو هاذ الدور

- ولك جايبه راس صخلة ذيج الكل كرن براسها كاسل هيييج و صابغته بدم و خالته جدام هالبت و ذيج يكض حسها لو دوت .

ضل يضحك بصوت عالي : والله حالك صاير ما ينحسد يبو ستار

- جا ما تشوفني هالاكلك اريد اهجن من عبن احط و حيدة غاد ووحيدة هنا واوفك بينهن جا شسوي.

- ان شالله ان شالله بس افضى ، نروح انا وياك لبغداد وارتب الوضع

- اي واللهوبعد اخوك ، تراها جعدة البيت ما تراد و النساوين مجابلاتك

- الله يعينك ، امشنا للمضيف خل نشوف ابوي.

- لا والله اردن ، اخذ راحتك انت و الحمد لله اعلى سلامتك

- الله يسلمك هلا بيك.

مشيت للمضيف ، لكيت ابوي جويعد و كاطع كاعد حذاه و عمامين كاعدين جدامه: الله بالخير

ردوا :- الله بالخير و الرحمة

كعدت و انا اسمع عمي يحجي ويا ابوي اعلى راديون و رايدها لبته ، سكتت ما حجيت شي ، خليته يكمل كلامه ، كاله ابوي : ان شاءالله يصير خير .

كام عمي و اترخص و كاطع يكله : شيخ لون بت اختي و اختي رايدتلها ابو قصر العالي لجن البت كبرت و لزوم تعرس ، مامش بت تظل عد اهلها وجعدتها عيبة .

اندار غلي و كال : و انت يسرحان ، شتكول ؟

- الراي رايك شيخ و ما يعلى اعليك راي ، لجن انا اكولن يو تاخذ راي اخيتي من كونها هي التعرس و هي الاعرف بمصلحتها .

هز راسه و رد بسؤال مغاير : شنهي دشتك اعلى ال ثجيل ، و شنهي الحجي جان

- والله بويه انا دشتي اعلى امي مالي عدهم شي لجن العرفته ، ثجيل اعرف معلومنا من عدنا

- شلون ؟

- العرفته مراقبنا واحد واحد و ما استبعد يو لكيت عده علوم القصر .

- عدوينا متربصينا

- شرايد

- رايد حك ابوه مني

- و شنهو حكه ؟

- قصري يعتقده حكه وورث ابوه من عمي دوّاي وضاحي ابوي هو الاستولى اعليه ، هو يريد القصر ، و البستان، طالت مصايبنا وياهم و تعبنا من تحريض سلطان للعشاير اعلينا .

- بويه انا اشوف الطيبة كفر ويا ما بكلبهم طيبة.

- و انت الصادك يوليدي لجن ، المشيخة ينرادلها حكمة و الا دم واحد من عشيرتك يو طاح يطيح بركبتك، و انا موش حمل دم و هلني صابر اعلى عمايله و الا سلطان بارود متاني اليهيجة و يكله وج خاطر يشتعل و يشعل الديرة بأهلها.

دش زناد و هو يكول : و شنهي بارودهم يو جان بارودنا بدمنا و نشعله اباروده .

كعد بضحكة و هو يكول : سمعت اسم سلطان بارود ، و انا مناطر اليوم اليفج سلطان حلكة و علي لاوجر بيه النار هو واهله.

الشيخ : شنهي علوم الشيخة امك .

- امي متضايكة جثير بويه و ما ندري منين طلعت النا هالسالفة، لجن ما يعلى اعلى رايك يو نويت .

سرحان :انا كلت لبوي ، يو رايد اخذ امي و اكعد ابيت ما عدي مانع .

الشيخ : عفوكم من هالسالفة و خلونا نحجي بطلابة حجي نوري .

وكلبنا موضوع و ظلينا نحجي بسوالف العشيرة و شلون يهيئنا باجر للكعدة و شنكول وشنحجي ، وظلينا على هالمنوال طول الليل ، ليما ردينا.

(بيت حاكم )

ايمان : اني ما اكدر ابقى وحدي هنانه اخاف

- ولج بويه ماكو شي منين تخافين

- عفية ما اكدر ابقى وحدي والله

- جا شلون اظل مكابلج ، هم عدي مرة و حكها عليها من يوم العرسنا و انة ما كاربها ، لا والله كبلها.

- زين خلي انام يم امك

-ما عدي مانع ، اخذي فريشج و مددي غاد و انسدحي ويا البنيات .

شالت فراشها و بطانيتها و مشت للهول، و هن كاعدات ، حجخ : يمه ايمان تخاف تظل وحيدها بالحجرة ، خلها تنام يمج .

- جا ما تنام ياهو الكاظها.

مديت فراشي و هو راح كدامي لغرفة مرته الاولى، ضربت عكس و اني استمع لسوالف امه ، اندمجت وياها ، و ظلينا فد اني و امه و هدية و جمارة .

شوية و امه نعست و نامت و هديه غفت بلا ما تدري بروحه و جمارة نامت اولنا ، ظلست اتكلب بفراشي ، و بس البطل مشتعل ، اريد عيني تغمض مدا تغمض ، سمعت صوت ، فزيت من فراشي

طلع صوت السركي مال غرفة ستار ، طلع ديروح للحمام، رجعت نمت و اني اباوع للباب يمتى يرجع، شويه ورجع و دخل لغرفته .

بقيت كاعدة و اتذكر بوجه يسرى و اهاف بالزايد ، ارجع اتعوذ و اقرى قرأن و احاول ابعد هالافكار من بالي .

ضوا الشعلة بدا يخف و عيني ما مدا تاخذ نوم.

(تحذير : اذا كنت ممن يخافون مشاهد الرعب مرر الصفحة لحين العلامة ⛔✔)

درت وجهي للحايط و البطل بظهري، و اشوف خيال بالحايط يمشي ، ضخم حيييييل ، فزيت من مكاني ، باوعت من الصفحة الثانية ، ماكو احد .

بقيت ادور منا و ارجع اباوع منا ، ابد محد كام ولا احد مر ، بس اني متأكدة شفت خيال واحد فات .

الضوا يخف و يقل تدريجينا و قرب يطفى ، و دكات كلبي تتزايد و انفاسي تتصاعد من الخوف ، جسمي كله كزبر ، واطرافي جمدوا خوف .

طفى الضوا !

بسرعة دخلت جوا البطانية و سديت عيوني حيل، احس شي يمشي يمي ، و شخص قريب عليه ، اريد اتذكر ايه من القرأن مدا تخطر على بالي ولا ايه غير واني اردد ( ربي ربي )

فجأة حسيت احد واكف فوك راسي

هديت حتى اعرف اللي داحس بيه صدك لو تخيلات ، اني فعلا دا احس واحد على راسي و ديتقرب .

بلعت ريكي و انصكت اسناني و التفت رجلية من الخوف ، واحد فوك راسي ينفخ عليه ، صوت كلش مخيف .

تبعه صرخت بزونه قريب من الباب ، صرخت بصوت عالي ، ويا صرختها فزيت من مكاني ، كمت اصرخ : عاااااااااااااااااااااا حاااااااااااااااكم

اصرخ من كل كلبي و اباوع ما اشوف شي ابد ، كلشي اظلم كدامي ، زت بالصراخ بكل قوتي .

⛔✔

كعدوا الكل و الحجية تصيح : هاااا شنهييييي

و هدية تصيح : يااااااهو

وجمرة كاضة بهدية ، طلع حاكم مفزوع ما يندل دربه و هو يصيح : شنهي ، ايمااان ، وينج

كمت و اني اتلمس الكاع و اتبع الصوت مال حاكم ، لما لزمت رجلية ، كمت و اني ارجف و اكوله : واحد جان ينفخ يم راسي ، و شفت خسال ، اكو واحد بالبيت ، اني متأكدة شفت خيال مشى ومحد موجود. .

وهو يزلم بيها و يكلي : بهداي بويه بهداي خلنا نعرف شنهي السالفة ، ولج هديوة كومي شعلي الضوة ، هندس خلني اوچد دربي .

- اني شفت شي وللله شفت ، اريد اروح ما اريد اظل هنانه

- بس اهدي خليني اكضج

شعلت هدية الضوة و اسمان ترجف بين ادين حاكم و تحجي تحجي تحجي و هو رايد يفهمله كله مامش.

كواغد : عاي دواها يمي ، انا اعرف كودن انت نايم عدي و هي هنا عملت الها سالفة خاطر تظل يمها

- والله اني شفت والله ، حتى سمعت شي ينفخ

ستار : انا كمت رحت للحمام خاف خيالي

- لا لا اني شفتك لما طلعت مو انت

حاكم : ماكو شي وعلي ، هاج عايني ، ماكو شي

- والله مدا اجذب

هدية : جا احنا موش يمج نايمين جا ما نفخ اعلينا، يو بس اعليج ينفخ هالطنطل .

يسرى : شلون تصير العيارة يا هديوة ، انا اظنن عمتي كواغد اعلى حك و هاي البو غيرانه من عبن هاي اول ليلة يهدها عمي و يروح لعمتي

كواغد : جا تعلميني بدروبهن

حاكم : ولوووووو غاد ، امشوووووا ، ردي هديه ياله جمرة

ام حاكم : عساها بحظج و ابختج ، جلفتيني ، حتى حيلي توهدن وجدامي بادن ما بياش امدهن.

حاكم : يمه نامي خلني افتهم هالطركاعة هاي،

اندار بعصبية : شنهي بس فهميني سالفتج ترا شليتي حالي وعلي ، ما طلعت هاي من ساعة الاخذتج و انت اخاف و اخاف ، مو وياج عايشين ، شفتي واحد بينه نوكل راسه نكطعت ايده

ايمان : رزلني و ما فهم مني ، جان نعسان و النوم بعينه ، ابد ما تفاهم ، دنكت ابجي و نرديت عليه

بقى كاعد بمكانه و اني ابجي و الكل رجعوا لفراشاتهم ، بس كواغد واكفة فوك راسه و تكله : هسه شنهي

- جا غير افتهم خاطر اكلج شنهي

اني مستمرة ابجي ، رد : ولج بويه و علي نعسان ، كولي شرايدة

- اخاف

- منييييييين

- والله شفت خيال

- خياليييييش ، هكو وحدة كاعدة ليهسه ، الناس نامت وهودت و انت توچدين بالحياطين هلبت تلكيلج بيهن خيال، بسج بويه تعبنا وعلي الفحل تعبنا بس.

جريت الغطا و درت منه و ابجي بسكوت ، ظل هو كاعد اعلى راسي و كواغد تكله : هدها خلها تولي كوم

- روحي نامي ، شويه و انا اجي .

مشت كواغد و هو ظل كاعد و يغفي على راسي ، و اني مستمرة ابجي ، فتح الغطا : ادني ليغاد متت برد ، ادهدي غاد.

فتح الفراش و نام، اني تعبت من البجي لحد ما غفت عيني، مكعدنا غير على صوت كواغد و هي تضرب باب الهول قوي و هي تصيح : هديوووووة اكعدي ياااااله متووووثين نوم هذا الجانيته منكم

شلت راسي و هدية تلف بشيلتها ، اباوع الضوه بعده مطالع كلش كأنو مغرب ، مليت من حياتهم كلش صعبه ، بس لو اعرف شعدهم يكعدون من الصبح هيج جان ارتحت .

باوعت لهدية : وين حتروحين

- اجيبن ماي، تجين وياي ؟

ضحكت : اي

كمت من مكاني لبست حجابي و انطتني عباية و شدتها اليه من خصري و اخذنا الدلو مال المي طلعنا ، صارت كدامي كواغد : دروبج مال امس ما ناسيتهن ، لجن اردن و اعرف شسوي بيج .

مرديت عليها و طلعت ويا هدية ، نمشي و الجو كلش بارد ، و الشمس لسه ما علت : لويش تكعدون هيج وقت

- جا شوكت نكعد

- احنا هناكة ابغداد نكعد الساعة ٨ و مرات ب٩ .

- لا احنا نكعد ويا الاوذان

- مفهمت يعني شنو الاوذان

- يعني اااااالله اااااااكبر ااااااالله اكبر .

- هاااا اذان

- احنا هنا نسمي الوذان

- حجيكم صعب

ضحكت و مشينا ، وصلنا الشط ، جان كلش حلو عفت الدلو و ظليت العب بالمي ، اشيل بأيدي و اشمره ، درت لهدية لكيتها تباوع لواحد راكب على حصان : هدية

كمزت : هااا

- منو هذا ؟

- ياهو ما اعرف

- ابو الحصان

- ما احد ما احد

- مراح اكول والله

- لا امشي

- تحبي

- لا احبه شني ، امشي

- بس هو بعده يباوع

ردت باوعت، و اندارت و هي تخفي ضحكتها ، امشي ، اخذنا المي ورجعنا وابو الحصان تبعنا .

ويا ما دخلنا الفرع ، هو دار حصانه و مشى ، اندارت هي تباوع وراه : لا تكولين لا بلي انت تحبي

- لا

- عيونج هيج تكول

- عيب امشي .

- لويش عيب

- امشي

ضحكت و مشيت ، حجت هي : هذا ابن الشيخ مطر

- صدك ! اشو مشفته لما بقيت ابيتهم

- سرحان الجان الشيخ يدور عنه

- ما اعرف ممنتبهه ، بس حلو تتزوجين ابن الشيخ التشتغلين عدهم

باوعتلي وهي تضحك : يصير

- اي

- شوفي ايمان ، ابد لتكولين لاحد احنا هيج شفنا

- لا والله ما اكول .

- يلا امشي

رجعنا ، و حاكم ناطرنا : هاا

- رحت اجيب مي وياها

كواغد : و هالكثر تخرتن ، جا يو موديتجن تفلحن يمتى تردن الغروب ؟

اخذت المي من ايدنا بقوة و مشت و العرفته كواغد و حاكم متعاركين ، لإنو اثنينهم اعصاب.

حاكم : حضري روحج نخلص ريوك و نشرب جاي واخذج للسيد اكطعلج ، و بعدها خلني اشوفن شلون تخافين.

- بس اني مدا اجذب والله ، اني صدك شفت.....

ثاطعني و هو يكول : خيااال، افتهمت و انا ماخذج خاطر اشوفن شنهي علتج ، ما معكول من يوم الاخذتج و مكضيتها علي اخاف و اخاف .

هدية : بويه انا راح راوحن للقصر

- نطري امج امشي وياها.

نطرت امي ليما كمت غسل ، لفت روحها و طلعنا للقصر ، وصلنا غاد سرحان يربط الجام حصانه بالعمود البكتر القصر ، عاين علي من مريت انا دنجيت ما عاينت خفت لا امي تهيسني.

دشيت و انا احضر ريوك الخاتون ، و اتنطر مرته من المطبخ ، خاطر اشوفنه ، لجن ما مر .

خلصيت الريوك كبل ريوكهم و اخذته ومشيت وين ما هم جويعدين ، شفته كاعد ، دنج ، انا مريت احطن الزاد جدام الخاتون ، و انطر ليما تنصب سفرتهم خاطر تاكل.

الشيخ يحجي ويا زناد اعلى رجعت مرته و زناد يكله : موش وكته يابه ، رايد بت خالي كاطع ، اخذها واعرس اعليها و عودن بعدها اردنها.

سرحان : بت كاطع !

اندار عليه : اي شنهي ما عاجبك

ضحك استهزاء و هو يكلي : ياهو مالتي اخذ التعجبك خوية .

الشيخ : كريم وين

صبيحة : شيخ كريم من امس و هو ما راد .

- جا وينه ؟

- ما ندري عنه

زناد و هو يعاين لسرحان و كان يحمله الذنب : كريم من يوم اجدامه داست درب الكيوليه و ما هد هالدرب بعد ، تلكاه بايت عد وحدة .

سرحان : و احتمال ظال يم واحد رفيجه يو طالعين بر ، مالها داعي تحجي اعليه بظهره يخوي .

- انت من يوم الرديت و ليجاي و هاد حيلك تسعى هاطر اطلعني زغير و ما افتهم شي احرض اعلى اخوي.

الشيخ : زناد

- السموحة يشيخ

كام من مكانه ، و سرحان دار وجهه ، صدت عينه بيه ، دنج مبتسم و هو يفرك بوجهه خاطر يضيح الضحكة الوضحت بملامحه .

دشت صبيحة وبتها و امي يحضرن بالسفرة ، كام الشيخ و طلع ليما يخلصن، و سرحان تبعه ، كمت عاونت امي و اتناوش الصحون من ايدها.

خلصنا ، بلغت الشيخ خاطر يكعد اعلى السفرة ، اجت صبيحة : كومي يمه اعاون الخاتون

- انا راح اعاونها روحي ارتاحي خالة

- الله يطيج العافية بنيتي .

مشت و انا ظليت اعاون الخاتون بأكلها ، و الشيخة اجت و الشيخ و زناد و الكل حضر ، و طلب منهم الشيخ ياكلون بدون حس ولا سؤال ولا نقاش ، كمت اناوش الخاتون ، و بس حس اكلهم اهيسة

درت و اعاين سرحان مدنج راسه و شايل عينه يعايني، ابتسمت و درت وجهي خاطر لحد يشوفني.

اندك باب القصر ، ودش كريم : صباح الخير .

ردوا اعليه بس الشيخ ما اندارله ولا رد ، ظل يوجد بيهم شاف سرحان بنصهم ، صاح : لاااااا ، هاذ ياهو

ضحك سرحان و هو يكله : امش بعد الريوك نسلم

تكرب اعليه و حباه و هو يكله : اكعد اكعد ، بس و علي ظل بالي اعليك ، شنهي وين جنت

- بالبر

- امس انا غاد

حجه الشيخ : و ما تعرف تطي خبر كبل لا تروح

- جنه ناوين نص نهار ، لجن غاد و غيرنا راينه و ظلينا ، السموحة شيخ

وكعد وياهم ع الريوك و سرحان يعاين لزناد و ذاك مدنج ما شال راسه.

دشت امي للحجرة : شيخ كاطع يريدك بالديوان بساع

- ما كتيله كاعدين نتريك

- كتله لجن كال الامر ضروري يخص ال ثجيل و هم هساعة اعلى باب المضيف .

كام الشيخ من الزاد ، وولده ال٣ كاموا وياه ، زناد اشر لكريم : حضر التفك .

سرحان : يواشك ، خلنا نفهم شنهي السالفة

الشيخ : ها يكاطع

- ال ثجيل جايين هداده اعلى بتهم و يكولون الشيخ مطر ناهب بتنا .

- يا باطل ، امشوا

مشا الشيخ وولده و كاطع و زناد يكله : جا هاذ الجنيناه ، هساع صارت الحجة لثجيل يهدون اعلى ديارنا ، و اسبة انت يسرحان.

سرحان : حجة شنهي ، المرة امي و محد اله حك اعلية .

- جا رد خوالك يو كدرت

الشيخ : وكت اللازم تعاونون ، تكعدون تتعاينون وواحد يذب اثامه براس الاخر ، شمااااالكم انتم، خلونا نفهم شنهي بالاول .

مشوا غاد و لكوا ، اخو ردحة واكف و لاف شماغه اعلى راسه و التفكة بيده ، حجه الشيخ : شنهي الراي يفرحان

- اخيتي من اول امس ابقصر يبن ضاحي ، ترضاها اعلى حريمك.

سرحان : امي من حريمي و ثجيل مالهم جلمه اعليها .

فرحان : امك لجنها محرمه اعلى ابوك ان جانك تعرف الاصول .

الشيخ : انا الضحى كاتب كتابي اعلى ردحة و رادها لذمتي

- لا تظن ثجيل يرضى يناسب ضاحي و الصار غلطة فصل ما تنعاد .

سرحان : امي امرها يمي موش بيد احد خاطر تجي تفرض اوامرك اعلينا يخالي .

فرحان : الكم عطوة منا لليل ، يو ما رديتو المرة لدارها ، احنا وياكم و الفشك يبن ضاحي .

كض ولده وردهم ، اندار الشيخ : و هاي الحجة اليتانونها ولد ثجيل اعلينا.

زناد : ما ينرادلها حجه بويه ، هم انطونا الحل ، رد المرة وتفض السافلة

سرحان : التحجي عنها و تكول ردوها امي يزنااااد

الشيخ : بسكم ، امشونا اندش المضيف ، وندانش امرنا بدل مصايحكم هاااذ.

( بيت حاكم )

حاكم :- ياله بويه امشينا خاطر اخذج اشوفن علتج شنهيه

حاكم : وين نروح

- بويه هم هاي تخافين منها هو سيد يقرا عليج ، يطيج حرز و نرد خلصت فضت ، البسي هدماتج ياله فضينا.

لبست و طلعت ويا حاكم و هو الطريق كله يفهمني انو ماكو شي و اني احلف اله انو اكو شي واني متأكدة شفت و سمعت بس مدا يصدك، وصلنا للجامع و بصف الجامع غرفة للسيد ، كال: عدلي حجايج و لفي عباتج عدل.

دخلنا ع السيد سلم عليه ، كاله : سيد مرتي هيج و هيج حالتها و من ساعة الاخذتها شلت حالي بخوفتها ، هلبت تقرا عليها و تنطينا حرز يشافيها.

سأل : اشفتي

- خيال ، بس اني متاكدة مجان احد موجود ، بعدها انطفى الضوا و صرت احس احد قريب مني.

السيد : بس هاي ؟

بقيت اسولف اله ع الطنطل الشفته الطلع من جوا جربايتي و حاكم يضحك و يكله : ينصبون عليها و علي كلشي ماكو جيفن ماخذها جديدة النساوين رادن يهججنها

السيد : بس البت شايفة

- دكول ياله سيد ، اشايفة دخيل بخت جدك ، بيتنا هاذ صارلنه بيه ١٧ سنة ، كلشي ما شفنا

- ماله غرض بالسنين ، انا جاي اعاينها ، البت موش بس خوفه بيها ، البت مار عليها ، و لو طالت الحالة تتغمج و تصعب اعليك و تسوء .

- لا تحطها ابالها سيد ، ماكو شي كل الموضوع جابن راس مالت باجه و صبغنه .

- بكيفك ، انا نصحتك و انت ظلت يمك ، لجن اردن و انصحنك تاخذها لسيد زوين ، هاذ رجال معروف و هاذ اختصاصه ، يقرأ اعليها و يزكيها .

- وين صاير

- بالنجف

- ايييي سيد شياخذني دخيل بخت جدك ، اكتبلي حرز ، اي شي خاطر تمنع خوفتها .

- بكيفك

كتب .. و لفها و بقملش اخضر لفها ، كاله : هاذ حرز للامام الصادق يبعد عنها الخوف و اية الكرسي كتبتها وياها ولفيتها بعلك مالت الأمام الحسين ، خيطها ، و حط بيها دنبوس و كاله : هاي تعلكها بهدومها ما تنزعها ابا ساعة النجاسة و السبح ، بس الزوم تلبسها بكل وكت ، و انا انصحنك تاخذها تره انا ما بيدي غير اطيك حرز و البت انا جاي اشوفنها موش تمام و شايفته بعينها و سامعته و مار اعليها و يو مسها تضيع البت من كون نجمها خفيف .. تلاحكها.

- ان شالله سيد ان شالله، انا اتشكر منك ، شكثر تامر

- بثواب الحسين ، بس بويه لا تتهاون بيها ، البت الزغيرة

- اشكرك سيد على راسي مولاي

طلع و هو يسلم عليه ، حجيت : شنو يعني مار عليها

- ماكو شي يمعودة ، هم السادة ادخيل بختهم يو دش اعليهم وحيد يخوفونه ، بيك هيج و بيك هيج يخلونه يوهوس ليما يتسودن .

هاج هاذ علكي بهدومج لا تنزعينه ، خوووش ؟

- ماشي

دنمشي ، التقى بواحد ، وكفت وراه و هو كال : هاا الله يساعدك ابو عبيس

حميد : هلا بحاكم هلا

- شنهي شو تشحط

- خايب صبحنا الصبح اعلى هدت ال ثجيل

- يا ستار

- اي والله ، فززونا كطعوا ارواحنا

- عليش

- على ام سرحان موش جايبها لا يرضون يخلونها ولا الشيخ يعقد اعليها.

- يييييي جا يو نخلص

- راد من عبن مريتي مريضة و ترخصت من الشيخ

- روح ، انا راح امش للديوان ، اوصل العايلة و امش غاد

- يالله نشوفك بخير

- هلا بيك بويه .

- سرحان ابن الشيخ ؟

- اي عليش تسألين

- مو تذكرت سالفة

- شنهيه ؟

- ميصير اكولها عيب

- ضحك و هو يكللها : الله ينطيني صفوة بالج.

رجعنا للبيت ، امه مموجودة ، بس يسرى بالبيت : حباب خلي اروح للقصر

- شعدج غاد ، مستعجل اريد اروحن

- والله بس اشوف عمه ما ابقى هناكة

- جا تظل البت وحدها ، دكعدي بويه اكعدي.

عافني ومشى ، كعدت بالهول ، يسرى بغرفتها ومحد اكو، كمت بلشت اشتغل ، وسويت اكل على كد ما اكدر ، ويسرى مطلعت من غرفتها ابد .

احسن لا تطلع من اشوفها اخاف

شوية و كمت اسمع بيها تصيح و تحجي وحدها ، معرفت شبيها ، بس عفتها مهتميت .

انفتحت الباب بقوة.

( المضيف )

- ها الله يساعدهم

ردوا : هلا بيك هلا .

و كعدت وياهم : شنهي الراي ؟

الشيخ : راييش نجيبها منا و نحطها منا ما ترهم ، لا نكدر نرجع المرة الهم ، مريضة و رايدة تظل يم ابنها ولا اكدر اخليخا ابيت و ابعد ابني من قصري ولا اكدر اعقد اعليها.

كاطع : ما بيها غير تكعد ببويت بعيد عن قصرك ، جا ما بيها حل بعد

حاكم : عليش ؟ هي بيها و بلاياها براس سرحان ، البيت الطين البكفا القصر يبني و يخلي الها الصيت بيت السرحان منفصل عن القصر مكعد امه بيه .

الشيخ : رايه هم صحيح

سرحان : هاذ انسب حل

كاطع : بس ما اظنهم يرضون ، من كونه بستان الشيخ مطر !

- جا شنهي اعلى كيفهم ، كاعدة عد ابنها و ابستان ابوه بمثابة بستانه ، غير ابنه ؟!

الشيخ : والله وابن ثجيل يحل طلايبنا ويا ال ثجيل ، خايب سالفتك ما تتسولف يحاكم

ضحكوة و حاكم ردفه : جا انا وليدكم يشيخ، ربيت بكاعك و الربى اله حوبة

- و النعم منك يبو ستار

- الزود الك شيخ ، و ما دامني من ال ثجيل ، انا اروحن ليهم و ابلغهم بالحل و اكللهم ان المرة صارت ابيت لابنها بكفا القصر.

- امش و هدي الزضعية يحاكم

- تامر شيخ .

الشيخ : ان شاءالله تنحل اعلى هالمنوال.

جاسم : دامها انحلت ، نرد نحجي بسالفة وليدي ، من كونها السالفة طالت يبو زناد .

الشيخ : موش وكتك يجاسم ، خلنا تونا افتكينا من طلابة ثجيل

- جا بيها طلابة يشيخ .

حجه ابنه فاضل : شيخ انت عمي و انا احترمك لجن صار سنه و انا اطلبها و انت تردني ، و ابوي يتوسل من ذاك اليوم لهاذ اليوم.

سرحان : و شرايد

- رايد بت عمي

- و بت عمك ما هاويتك و لونها هاويه جا رضت من زمان

- موش اعلى كيفها ، انا ابن عمها و احك واحد بيها

- لا توهم روحك بهالكلام ، راديون يو ما هوت ، محد يجبرها .

- من رخصت الشيخ ، لجن اعتبروني انا ناهي اعليها

انتفض الشيخ ، وفز سرحان : انت تعرف شجاي تحجي

الشيخ : تنهي اعلى بتي ولك

سرحان : افصم راسك والله

- انت موش اخوها و لا تمشي براسي خوة ، انا ناهي اعليها ترضون يو ما ترضووون

سرحان هد ، طكه كله و كضاه بوكسيات و الزلم تفاكك و جاسم كض سرحان و ضربه ، و كبت الهوسة و الصوت وصل لاخر العالم و الشيخ يصيح : نعلة الله عليكم فضحتونا ، بالمضيف و تتافشخوووون

كضهم و اطردهم من المضيف كلهم ، وكف جاسم و ابنه وراه و هو يكول : سهله يسرحان

و ابنه فاضل ، يكله : انا وياك و الزمن طويل

سرحان : دمشييييييي لك امشييبييي

حجاها و اندار يمشي، طلع الشيخ و صاح : سرحاااان

اندار عليه ، حجه الشيخ : امش وياي

اخذه و راح لكفا القصر : انا حاب حرصك اعلى اخوك كريم و اخيتك راديون ، لجن موش هيج تنحل الامور

- جا ترضاها ينهي اعليها

- افصم ظهره ، و انا ما اكلك ترضى لجن هيج انت حطيتلك عدوين بنص مضيفك يولدي

- شلون ؟

- الف طلابة ويا العدو ولا طلابة ويا الكرابة ، من كون عدوك تكدر اطكه يو اذاك ، لجن المنك وبيك هو اليحفر ليك وهو اليأذيك ... و اكثر من عدوك بعد.

- جا شسويلهم .

- المشيخة بويه مو سهلة ، ينراد لها عكل و بال طويل ، التسرع يهجم بيوت يسرحان بويه ، خليك ساكت و عاين الامور بهدوء و فرزنها بمخك ، ولا تطي جواب بساعة ، بات ليلتك بمسألتك ياله تنطق بجواب رايدينه منك ، كون تحسب ليها و اداورها كون ما يسهى عنك شي.

انا يوليدي فرحان بيك ، زلمه مثقف عاقل تخاف ربك ، اخلاقك هيل ، لجن الاريدنه منك ما تفارك المضيف ، و بكل طلابة كونك وياي ، وبكل طلابة امرن بيها اختبرك و اشوفن شنهو حلك ليها ، خاطر بعد يومين يو سلمت امانته ، انامن بكبري و انا متطمن .

- عمرك طويل بويه

- كلنا اعلى هالدرب هاذ ، واروحن مثل ما راح جلوب و ضاحي ، لذاك الوكت اريدنك شيخ تحل بمجاني بخي و كونهم يترحمون اعليه ، و الشيخة يبوي موش عكال و تحطه اعلى راسك ولا هي جعدت راس المضيف ، المشيخة هنا

واشر على عقله

تراه الزلمة بويه تكضه بفعاله ، لا يغرك اليهوبز ، تراه جثير اليهوبزون لجنهم هبة شرجي اطكطك و تمش ، اخذ افعال ، جلوب صارله ١٠٠ سنة و هو ميت عليش لليوم الناس تحلف براسه ، غير من افعال ، جثير شيوخ بوكته هوبزو وينهم ؟ مامش و ضلت فعايل جدك جلوب الراد و الراد يعرفها و يترحمله .

( فاما الزبد فيذهب جفاءا واما ما ينفع الناس فيمكث )

فعايلك الرديه زبد تموع وتمش ما تهيسها ، لجن فعايلك التنع بيها الوادم تضلك تاريخ ، فلان هييييج سوا لوادمه ، تراها تنذكر .

احرص بويه اعلى فعايلك ، و اعتبر كل الجدامك ذيابه ، حتى من امك و ابوك اتحاذر منه ،دام بليس يدش بعكول كل الناس ، لا تأمنهم.

- اشكرنك بويه و ان شالله اكون عد حسن ظنك

- و انا اظننك هيج، البيت هاذ ننده اعلى الخدامات البالقصر ، يعزلنه و يرتبنه و يفرشنه ، خاطر تجي امك ، تكعد هنا .

- بس المكان موش لايگ‌ بويه.

- خلنا نفض اللطلابة اليوم ، و انا ابنيلها بيت يليك بيك و بيها .

- اتشكرك هواي .

حاكم : ها السلام عليكم

سلطان : و عليكم السلام

- انا جنت عد الشيخ مطر و سمعت بالطلابة

- طلابة فرحان

- اي

ناصر : و شنهي انت صاف ويا ال ضاحي

- انا موش ويا احد ، انتم اهلي و ذولك ناس ربوني و متفضلين علي.

- جا شنهي راح تظل تصيح متفضلين علي و تذل روحك الهم.

- لكمة الحلال ما تضيع بس ببن الحرام ، و انا موش ابن حرام يناصر ، جا انتم اهلي و كلتو حكي ، تريدني اعادي الوكف بساعة الضيج.

سلطان : هدونا من هالسالفة و ردولنا لطلابة فرحان .

- سرحان اخذ البيت اللي بالبستان و قرر يحط امه بيه ، ويكعد وياها.

- متاكد من كلامك هاذ

- يكدر فرحان ياخذ حرمته و يمر اعليها غادي يشوفها، يظل خال سرحان ما يطرده.

-يعني سرحان طلع من قصر ابوه ؟

- اي

- منتاز .

ظل كاعد وياهم شويه و طلع ، عاين ناصر : اشوفنك تضحك يعمي

- ههههههههههههه انطر و تعرف يبن خضير

دش فرحان حط الفلوس جدام سلطان : كاطع سلمنا الفلوس و يسلم عليك هو و اخته الشيخة .

- هههههههههههههه

ناصر : جا غير افتهم

- كاطع ضمناه بجيبنا و لو فج حلكه ينكص راسه نعرف عنه علوم ال مطر كلها، و شيخة مطر طاحت اعلى كاع صبخاية و الاهم ... سرحان طلع من قصر ابوه .......

رواية كحل عرب الفصل التاسع عشر

(واشتعل القلب عشقا )

على اعناد الحزن يازين غـَنـّي

حتــّه اصيحن ياحسرتي اتباعدي..

اوْيابسمتي الضاعت تـِدَنـّي ..

آخ مِنــٌي

وآخ من عمـري الخلَص

بس بالتمنـٌي

(عريان السيد خلف )

سرحان : خالة ام ستار

كواغد : امر خالة

- ما يامر عليج ظالم ، لجن اتمنى منج تاخذين وياج جم مرة من القصر و تروحين للبيت البكفا القصر نظفوه و تبوه بفراش زين و دفوه عدل ، خاطر اكعد بيه انه و امي .

- جا ليش خالة شنهي القصر ما مكفيك و تكعد بكفاه ؟

- صارت بعد و لزوم نحط غاد

- امرك

مشيت و صحت صبيحة و جنتها و و هدية و جبتهن و جيت ، تبعتنا ردحة خاطر تشتغل ويانا ، كتلها : ام سرحان جا ما يصير تشتغلين ويانا

- يا جا شنهي فركي عنجن ، ياله نفض الشغل بساع.

حاولت ابعدها و ما رضت و كامت تنظف ويانا بالبيت ، دش سرحان و كال الها : ليش متعبة روحج هم يخلصون الشغل.

- ميخالف يوليدي، الشغل صحة جا ما يضر ،و عيب من النساوين نخليهن يشتغلن و احنا نجعد ما بيها شي يو تعاونه .

حاولت ابعدها لجن اشوفنها مرتاحة بالشغل، عفتها ، شفت النسوان ادنج و تشتغل ، طلعت غاد برا بالبستان و كعدت اعلى جذع نخلة مكصوص ، و ظليت اعاين و اتأمل بنخل البستان .

باردة حيل ، لفيت الشماغ اعلى وجهي ، ويا ما جاي الف، طلعت هديه و هي شايله بساط خاطر تنفضه ، تحرك بيه و ثكيل اعليها ، كمت من مجاني ، كلت الها : عنج

اخذته عنها و طريته بقوة نفضته ، و هي مخليه شيلتها اعلى خشمها، درت خاطر انطيها و بس العيون جدامي ، عيونها كلش حلو لا هو اسود ولا جوزي اعلى حمار و بالضوا يصيرن جن شفافات ، حجيت و انا اغازلها:

- جا هي لو هيج العيون يو ما لازم.

ضحكت، ردفتها : اروحن فدوة لهالضحكة

البت شردت ما شفتها جدامي من المستحى ، درت و انا اتكهكه ويا روحي ، تقربت الشيخة ملوك و راديون وياها : اشوفنك تضحك ، يظهر انك فرحان بهالبيت الراح تكعد بيه .

درت عنها و انا اعاين لراديون : ها خوية عونه يو معاينة

ضحكت : لا ليش ، هسه اكومن وياهم

ورفعت ايدها تسرفن بردانها ، حجت ملوك : لا تكضين شي ، اكعدي

- لا يمه ما عدي شي اريد اساعدهم

وما سمعت منها و هي تركض ليهن ، تعاون بعديه تشيل انقاض، حجت : شفت !

ضحكت بأستهزاء و ردت تحجي : مرت الاخرى لا تفكر اتحطني ابالك يو تحط راسك براسي

- اطمني ما احط راسي براس مرة ، موش ثوبي.

- البيت يعني ، يناسبكم نوعا ما ، تكدرون تعيشون و تمشون حالكم بيه ، شتعتاز من القصر امانة لا يردك السانك

ضحكت و مشيت و كلت الها : والله يا ام زناد ، كبل شواي جنت انا و الوالد نسولف ، هيج سوالف والد وابنه ، عن المشيخة وطال بالوصاية ليه و هو يعلمني شلون اخلفه بخير ، فانا فكرت القصر اولى و تاليه راد لحكي فقررت اهد هاذ الحايط ، و افتحه باب اعلى القصر و يصير من ضمنه.

- الحجرة اللي بهالمجان لزناد

- نعم وانا قررت يطلع زناد منها و يخليها ممر يربط البيت بالقصر .

ضحكت و هي تكلي : حاول

- بأذن الله

مر الشيخ : هااا ؟ اشتغلتوا ، اي عفيه عفيه يابه ، ياله شدو الهمة

عاين راديون تشتغل وياهن ، دنج حبها من راسها : خافنج تتعبين بويه

- لاله عليش اتعب ، جا هو غير بيت اخوي

ضحك الشيخ و هو يكلي : جا بعد شتريد اختك الحلوة و جاي تشتغلك .

ابتسمت و انا اگله : الله يحفظها و يستر عليها ، الا صدك يابه ، قررت اهد هذا الحايط و احط باب و اربط البيت بالقصر.

- اييي عفية ، هو هاذ الصح ، انا جنت رايد اكللك ، و انت سبكتني .

ملوك : بس حجرة زناد ورا هاذ الحايط يبو زناد

- بويه القصر يا كثر حجراته ، شنهي شح ، ياخذ التعجبة و البنيات يرتبنهن اله .

سرحان : زين عليش ما اخذ الحجرة و افتحها باب على هاذ البيت خاطر يصير مربط الي يربطني بالقصر و ابيت امي .

- هم فكرة زينة ما بيها شي.

ملوك دارت وجهه و مشت ما تحملت الكلام ، ظليت اعاين وراها ، و الشيخ لف عبايه و كام يعاون وياهن ، يشيل و يحط ويوجهن

و صاح اعلى الحرس مالت القصر ووصاهم باجر يجيبون عمال و يفتحون باب بهاذ الحايط ، يربط القصر بالبيت .

و ظلينا نشتغل ، ليما نزل الغروب ، كفينا و فرشنا بساع و شعلنا جمرية خاطر يدفى البيت ، كتلها : يمه الليلة باتي غاد و باجر ان شالله يكمل وانداري بيه

- لاله اريدن اليوم اظلن بيه ، ما اريد القصر ، يخنك

- عليش

- من اشوفنه اتضكر ايام سودة شفتها بعمري.

- براحتج بعد ، جا انا اظلن يمج .

- راديون و انا همات اظلن

الشيخ : عليش ما تخلونا نفتح نار جبيرة بهالبستان و نسويلنا جعدة طيبة و ندفى اعليها

و صكد حضرنا نارة يا علوها ، و جبنا معلاك و طلبنا من النسوان تخبز .

صبيحة : يا جا موش هاذ العشا حضرناه ؟.

- الشيخ يريد يشوي بالبستان ، و يريد خبز حار

- جا شيخبزه هساع

- اندري منين طلعونا بهالسالفة ، يمتى نرد لهلنا ، بنصاص الليالي شلون بالله .

نشتغل و ارواحنا طاكة ، هم متونسين و فرحانين و احنا حيلنا نهد من الشغل ، يامن يفكنا و نرد لهلنا .

راديون واكفة يم النار تدفى ، و هديه يمه تنكل خشب ، و سرحان واكف يعاين عليها .

هدية: انتبهت اله و انا عيوني صارن بالنص ، جا غير يو اوچد دربي ، حاطة خشبه و اهيج بيها الجمر لجن ضيعيت و انا فكري يمه ، حطيت ايدي اعلى الخشبة المحتركة ، و صحت : ااااااااااخ

ها هاا

- ايدي انلسعت بالنار

تقرب الشيخ و هو يعاينها ، لفها بوصله ، و كال الها : امشي بويه ، ياله كلي لمج تاخذج و ردو للبيت ، صار الليل هم ياله تردون

ام ستار ، يا ام ستار

- ها شيخ امر

- البت هاي احتركت ايدها جاستها النار ، اخذي البت و امشي هم تعبتوا .

- امرك شيخنا

اخذت هدية و هي تون : ايدي تحركني

- جا من زمان و احتركي شمالج ، احنا احتركت ابعاتنا من وره الشغل ، جا فضيتيهااااا

- يمه شمالج ، جا شنعي بدال ما اداوي

- دخل اداوي ظهري انفصم ، من ذيج الساعة و احنا نكرب.

حاكم : ها شلونكم

- زينة

- جا كواغد وينها

- ما اجت اليوم

- عليش

- ما اعرف ، خاف تبقى هناكه ؟

- لا شنهي جا يظل البيت تايه ، بس خافن اكو شغل جثير هالاتاخرت ، صبي العشا ياله خل نتعشى، ستار وينه

- عد بيت جده

- عفيه ستار ما يفارك جدة وين ما ضيعته الكاه لازك بجده اي مو صارت عدك مرة ، دستجن .

دخل للبيت ، سلم على امه و كعد ، ركضت جمرة لحضنه ، طلعت مرت ستار من الغرفة : ها عمي الله يساعدك

- هلا عمي ، شمالها عينج هاي زركة ؟

- لا هيج انطكيت بالباب

- عدج العافية

-الله يعافيك عمي اروحن احضر الزاد

مشت و حاكم اندار على امه : يمه انت هنا ، شنهي ستار و حرمته متعاركين ؟

- ستار هاي طلعته من البيت و البت ذيج الساعة شفتهة طويبة ، هسه شفت عينها وياك .

حطينا الاكل و حاكم يكول : جا شنعي ناكل و كاغد و هدوة ما جايات ، خافنهن ما متعشيات و يظلن ، عزلولهن يابه

ايمان: اي

كمت جبت ماعون و رجعت ، كعدت و ايمان تنفخ و تفتح بحجابها ، متحملت فكت حجابها من صدرها ، انتبه حاكم ، حجه : ها بويه ، شمالج ؟

- السموحة عمي لجن منشولة و ما جاي اشمن الهوى

- اخذي راحتج

- لا ما بيه شي

و تباوعلي بنظرات ما اعرف شبيها ، حجت و اشرت على الحرز الخالته بصدري : شني هاذ

حاكم : حرز مالت الامام الصادق عليه السلام و اية الكرسي ، يبعد عنها الخوفة

- اي

بقت تتنفس بقوة و كل شويه عينها تركز بالحرز، ما تحملت كامت من العشا وراحت لحجرتها ، حجه حاكم : شمالها هاي

- ما اعرف

- اكومن اشوفن كاغد و هدوة وين صارن ، خاف صار بيهن شي .

كام من العشا ، بقيت انتظر ام حاكم كاعدة وتحط كدام جمارة و توكل بيها ، لما كملن ، اخذت الصينية و شلتها طلعت ، بعدني دا ادخل المطبخ اجت وراي يسرى و هي تصرخ

: تريدييييييييييين تجتلينييييييي اليوم اجتلج اليووووووووووم

و انهدت عليه اني من الخوف كرفصت على روحي و كعدت و هي ادك على ظهري حيل و تضرب بيه ، و تجر تردني اكوم و اني اصيح : اااااااااااااااا خاله جمااااااااره ااااااااااي

و هي تصرخ ، فزت ام حاكم طلعت النا : يااااع شمالجن ولجن ، و لج هدي البت ، ياااا شجاج هديها

- ترررررررريد تجتلنييييييييييي

- فكي عنها راح تكطعين البت فكي عنها .

بعدتها و هاي كامت تصرخ ورجعت لغرفتها

- شمالجن

- والله ما اعرف

- دشي دارج امشي ، هالبيت هاذ المابيه راح امشي.

مشيت للغرفة ابجي ، كلت راح اخلص من بيت جدوا و بعد بيبي متضربني ، اجيت هنانه كلهم يخوفون ، اني هسه وين اروح .

شوية و دخلت كواغد و هدية ، اول ما دخلن طلعت الهن يسرى : عممممممممه اتلاحكيلي عمه .

- هااا شمالج

- عمه انا ما اكدر اظلن بهالبيت ، ترضين هاي العايبة تشتمني و تغلط عليج ؟ ترضيها عمه ، ما خلت اعلى حالي حال ذاك الغلط عممممه

- ياااااع تغلط علي

- تكلي انت كارضة بحجرتج و انا النهار كله اشتغل و كواغد دايحة بالشوارع ، كتلها استحي اعلى نفسج ، كامت و شتمت ابوي عمه

كواغد : انااااااااا دايحة ، يااااااع

وينها هاي ، خايبة العااااااااااايبة وينج

دشت للغرفة و فزت ايمان : والله ممسويه شي والله ، اني معليه .

- انا دايحة ولج ، ولج انااااااااا

وانهدت عليه ضرب ، و دمغات على راسي و اني اصرخ و هي تصيح : ولج من الفجر اطلع و اشتغل و ينكسر ظهري تالي اطلع انا دااااااايحة ولج ، جا انت شيسمونج الشرررررريفة ، دشيتي بيتي مثل الحية و اخذتي رجليييييييي

- اني معليه ، وخري منيييي

- يااااع انا تكليلي وخري

وانهدت بيها ضرب ، و كضت ايدها و لوتها حيل و كالت الها : سمعي ولج يو هيسيت حسج بالبيت و علي الا ادبج بمصرانج و اطلع دمج ، غصبا ما على الخلفوج تشتغلين و تكربين و تخدمييييييني ، خووووووش

هدية : بسج هديها ، والله تعبت من المشاكل بسسسس ، عوفيها مليناااا

يسرى : عمه هاي يو سكتنالها تركبنا ، انا ما اكدر اظلن بالبيت و هي موجودة ، ما اكدر

هدية : بس انتي كااااااااااافي مليت

دش ستار : شنهي شكو ، صياحجن واصل ليبرا

دخل حاكم : هاذ شنهو الصياح

كواغد : صلوات اعلى محمد يوم البينت

- جا انا رحت غاد اسأل القصر عنج كالو طلعت ، شني هالصياح ؟

- تعاااال عاين تعااااي ، تعال و شوف مرتك هاي النهار كله تهفيلها و غافي اعلى شليلها

- هشش ، حسح شمالج منا العالم

- انا دايحة ، انااااااا ، كاسرة ظهري و منعول سلفاي من التعب وتجي مرتك تكلي دااااااايحة ، و علي يو ما شردتها اليوم البيت اهجمنا

- جاي اكلج ، حسسسسسج هس شمااالج ، عفت البيت ساعة اردن الكا الطلابة مكابلتي ، شمالكم

- انا اتعب روحي يو حجيت وياك ، انت ما تصف غير ويا اللفت اعليك من تالي ، ادشن داري اخيريلي.

حاكم : شمالكم ، شصاير ؟

ستار : ما ادري جنت برا

- خو انت مخلص وكتك داااااايح ، حتى شغل ما تشتغل ، دايح و الذبان يغوغي وراك

سكت و دخل جوا ، اندار على امه : شصاير ؟ صدك ايمان شاتمة كواغد

- والله يا يمة ما ادري ، جويعدة بمجاني و ما اهيسلك الا و حسهن واصل لذاك الصوب اعلى صريخهن ، و يسرى ادك فوك ايمان ، تكول تغلط علي.

حاكم : من ساعة السودة كووون

حجاها بنرفزة ،و هو يمشي لغرفة ايمان ، دش : شنهي بويه شمالج جاتلج الخوف يا عايلة اعليهم ، شجاج يابويه .

- والله ما حاجية شي ، هم ضربوني مغلطت على اي احد

- يسرى الضربتج ؟

-يسرى و كواغد ، شوووف

طلعت اله ايظهرها و اثار الضرب عليها تخبل : هاي هنه طاكاتج ؟

- اي

رفع هدومها ، عافها و مشى لحجرة كواغد : انت شلون هيج تتعدين اعليها و اطكيها

- و اهججها من البيت والله

- خاطر اهجج و اهجج الخلفوج وراج وانعل سلفاج ، انا اجيبنها مناك خاطر ما تتاذه تجين انت اطينها و تشوهيج جسممممممها

- تشتمني يحاكم لخاطر هاي

- و انعل ساااااسج ، يو مسيتيها بعد والله و علي الفحل يا كواغد لاهجج بليلة ظلمة

- انا تشتمني لخاطر هااااي

- و انعل اهلج واحد واحد

دش ستار : شنهي بويه صلوا اعلى محمد شمالكم ، جا احنا انحلها منا تكب هنا، سحب ابوه و اثنينهم يتصايحون دشت هديه تصيح : بس تعبنا بس كاااااافي .

طلع حاكم من الحجرة و هو يكول : حاط جلاب هنا مو بشر ، ساعة الاطلع و تولوها العفطية ، يا طنطل يا مدمغين اعليها ، دخل اشوفن واحد يكربها بعد .

ام حاكم : ياله يمه هن مصارين البطن تتعارك تظل عليهن .

- متت يمه غير لو تفض يومية طلابة جديدة ، طكت روحي

بقى يحجي و ويا امه ، و هدية كاعدة اعلى كتر ، تبجي بهداي ، اندار عليها : شمالج انت تبجين

بجت حيل : شبيج بويه ؟

- تعبببببن

- منيش تعبتي

تبجي و ما تحجي ،حجت ام حاكم : اديتها محتركة عمت عيني و تأذيها

- هااااه بيش محتركة ، شو اعاين ايدج .. بالله

جر ايدها ، شافها حمرة : بسيطة بسيطة لا تبجين بعد ابوج ، مسح دموعها و ظل يفرك باديها .

صاح : ستاااار ، ستاااااار

- ها بويه

- كوم امش للمضمد جيب مرهم مالت خرك لأخيتك محتركة ايدها.

- بويه و علي بردان خلها باجر

- امشي لك سرسري ، النهار كله دايح ويا جدك ما تبرد بس ساعة النزتك ، كضك البرد امشسشش

كواغد صاحت من الحجرة : جا هو ابوي ما محصل منكم غير الشتايم

ضحكت ام حاكم ، و ستار يلبس بنعاله غصب ، فزت جمارة : بويه خلني اروحن وياه

ستار: انجبي لا اكطع كصايبج والله

- لا بويه باردة اكعدي

مشت لابوها تحبحب بيه : بويه بويه بويه

حاكم : اخذ اخيتك وياك ورد بساع

- ايييي ، امشي اللزكة امشي

وصكعها على راسها و هي ما مهتمه تركض تلبس بنعالها و حاكم يصيح : صكعك الكون يا هتلي ، ما اطلع مراجلك بس اعلى اخياتك حيوان.

عاين لهدية ، تجر بخشمها : بسج بويه ، هسه راح يجيب المرهم اتحطينها ساعة و اتطيب تصير لوز ما تهيسينها

مكرفص جدامها و كاض ايدها و يمسح عليها ، صاح : ايماااان ، ايماااان

طلعت - هاا

- جيبي فراش لهدوة خلها تنام خافنها تعبانة

راحت ايمان جابت فراش ، فرشته و هو يحجي ويا هدوة : ياله بويه ، شو نامي هنا ، عليش تبجين ما تكليلي

- تعبت يومية طلابة

- نعلت ابيهم يولون بويه مالج غرض ، نامي

ايمان جابت الغطا ، تفتح بيه و حاكم موچد بيها ، تغطي و هو يعاين حركاتها غطت هدوة و انتبهت هو مركز بيها ، عاينتله ، غمز الها ، ضحكت

همس : اغدي فدوة

حجه بصوت واضح : امشي يابه نامي ، هسه الحكنج

عاين الهدوة جن سكنت ، حجه : مكرودة هالبت ترفة ما تتحمل مصايب ، تعبت عمت عيني.

- والله يايمة بناتك من يشوفنك يكومن يتعايرن الا كلشي ما بيهن

- شعدي غيرهن يمه.

- الله يحفظك الهن يوليدي، لجن البيت صاير تراب من يوم العرسيت ولليوم ، جن عين و صابتنا شافو عرسيت و عرست لابنك هالطكونا بعين و البيت ما يهدى كل يوم و كابة طلابة شكل.

- والله طكت روحي و منتظر سرحان هلبت يرد لبغداد و يشغلني غاد.

- هم راح ترد لبغداد

- انا يو ظليت هنا شهر لاخ و علي اطكن و اموتن ، خليني ارد و استر اعلى ارويحتي، هدوة نامت ، و انا نعسيت يو اجا ستار بس ادهني اديتها بالمرهم تراها متأذية خطية .

- روح يمه نوم العوافي انا ادهنها

كام و الحجية تمددت، دش اعلى حجرة ايمان لكاها منطية ظهرها و نايمة، تكرب و فتح الغطا و نام بصفها و حطها اعلى ايده : شمالها هالعيون الحلوة تهمل

- اني محد يصدكني هنانه

- عليش هالحجي ، انا مصدكج

- لا متصدكوني ، اكولكم شفت طنطل تكولون لا اكولكم مغلطت عليها ترجعون عليه .

- انا رجعت عليج ؟

سكتت، حبها براسها و كاللها : ياله يابه اخياتج هنا و يو احد جاسج بس كليلي انعل سلفاهم.

حطيتها اعلى صدري و كمت اهود اعليها ليما هدت ، سمعت صوت الباب انطبكت و حس جمارة ، نطرت ليما عاينت ايمان نامت، سحبت ايدي من حدر راسها و كمت ، غطيتها زين من البرد و طلعت .

عاينت المرهم ستار حاطة يم راس هدوة و داش لحجرته و امي غافية ، كنبصت و اخذ اديتها و دهنتها : جمرة بويه ناوشيني ذيج الوصله

جابتها : ردي لفريشج بويه

لفيتها ، فزت : هااا

- تاذيج ؟

- لا شوية

- ردي نامي ، حطيت الها مرهم شواي و اطيب

غطيتها عدل و غطيت امي ، حجت جمارة : بويه تعال نام يمي

ضحكت : نامي و هسه انا اجي يمج

مشيت لحجرة كواغد ويا ما دشيت ، الباب طلع صوت ، فزت : هااااا

- حسبالي كاعدة

- تعال ، كول رايد شي

- لا ردت احجي وياج

تعدلت من فراشها تلف بشيلتها : ان جنتي نعسانة كملي نومتج

- لا كعدت هلا بيك .

كعد جدامها : كواغد ليمتها نظل هيج ، انا من ساعة الاجيت و كتلج البت امانة و خذتها بسبب موش رغبة

- هاذ حجي و انا اشوفنك تودها

- جا غير صارت حلالي ، شنهي تريديني اكشّن بوجهه ، البت مكرودة معتازة اليضحك الها و يلاشيها جا تدمغ غاد و تجي هنا هم تتلكا المدمغة ، هاي انت التنعين اعلى الحسين جا شنترجى من الباقين ؟

- جا ارضى تشتمني و تغلط علي

- سمعتيها ؟

- غير مرت ستير كالت

- يسرى وكت التبلت اعلى ابنج و كالت تعدى اعليه جذبتيها ، عليش تصكدينها هسه ، شنهو الصار ؟

- ما اعرف ، لجن تعيبانه و ما هيسيت دربي و هاي صارت بوجهي .

- انا يعز عليه اصيحن بيج جدام يسرى و ايمان ، انت ام ابني و بنياتي و احترمج لجن اطلعيني من ثوبي، كليلي ليمتنا تظلين تحلين امورج بالطك ؟

دشت جمارة : بويه خلني انامن يمكم

ضحك : دشي بويه

دخلت و خلاها بيناتهم و دثروها عدل و ظلوا يسولفون ليما ناموا .

هدية : فكيت عيني الضوا بعدها ما طالع

كمت من فراشي و الجو بارد يكتل، طلعت شعلت جمرية و جبتها بالهول خاطر يدفى البيت .

طلعت امي من غرفتها : ها يمه

- اروحن اجيبن ماي

- لا خليج انا اجيبن عنج اديتج محتركة .

- لاله لا طابت ، ابوي امس حط للها مرهم و طابت .

- جا خوش امشي بساع جيبي ماي خلني احضرالهم الريوك خاطر نمش ، ياله يمه .

اي .

لبست قبوط ابوي و تلفلفت حيل و طلعت ، الجو بارد كلش ، اعاين جن الجيحة البكاع الماي مالها جامد من البرد ، برد يكص كص ، خشمي كمت ما اهيسنه .

مشيت الشط لكيت سرحان متلفلف وواكف بكتر حصانه ، الجو جن مغرب بعدها الشمس ما طالعة ، تكرب

- ظل بالي اعليج الليل كله افكر خافن ايدج تعورج

دنجت مستحية : الدنيا باردة حيل

اخذ الجرة من عدي و ترس الماي، عني ، كلت اله : عليش ما يعتاز انا اترس

- ما اريدنج اتعبين

- امش لا يشوفك احد

- هدوة

- ها

- انا احبنج

ضحكت و دنجيت و انا اسحب بالماي : اوصلها الج

- لا ، روح الجو بارد لا تتمرض

- تخافين علي

-سكتت

- هدوة انا وكت الاشوفنج جن شايف اهلي كلهم .

يهمس و البخار يطلع من حلكه ،حجيت : انا اروحن لا يشوفنا احد

- مودعه بالله ، لجن راح انطر اعلى نار ليما اشوفنج اعلى الريوك .

هزيت راسي و احس دخت ما اعرف شني اسوي ، كلبي ما عدت اهيسنة ، البرد ما كمت احسن بيه ، جن طرت بلايا جنحان .

اخذت الماي حطيته اعلى متني و مشي و هو ركب اعلى حصانه ، و تبعني ، و صوت الحوار بالكاع يطكطكن .

غنى بصوت مبحوح ( نخل السماوة يكول طرتني سمرة )

ضحكت و انا اكله : طبك حسك ، امش لا تتمرض

- جا غير لو اهيس روحي

وصل للعجد ، وكف و انا مشيت ، ما احسن اعلى روحي يمتى وصلت شلون حطيت الماي ، ياهو الصادفني ، شحجوا ويا، ضعت ، و جن طايرة بسماي .

ليما حجه ابوي : هدوة بويه

جفلت : ها بويه

- اديتج شلون صارت

- كواكة

- نعمة الحمد لله

مشيت ، طلعت بوجهي ايمان : شفتي ؟

- اي ، و حجه وياي

- صدك ؟

- كال احبنج

- ييييي حلو

- جبت ايدها و حطيتها اعلى كلبي ، كال : يدك قوي

- احسن يرفرف ورايد يمشي ليه .

دش امي : هااا شنهي مشتغله بتي طبيب و جايه تجيسين كلبها

ابتعدنا من بعض بسرعة : لا هيج دا تكول من البرد كلبها ديوجعها

- صكد ؟

- اي

- جا ظلي و انا اترخصلج من الشيخة

- لا لا لا اروحن اروحن ما بيه شي.

- جا روحي ياهو الكاضج

عافتني ومشت ، غير تخلص خاطر نمش ، الوكت كلش طال : ياله يمه

-اصبري شمالج خليني اصبن الجاي لبوج

- ايمان تصبه

خاكم : كعدن فرد مرة تريكن

هدية : لا بويه غاد الخير جثير ، حتى يذبونه .

كواغد : ياله اودعناكم

- الله وياكم

مشينا و امي الدرب كله تحجي ما سمعت منها عرف اعلى كثر ما جلمته ترن بذاني و هو يكول ( احبنج )

دشينا البيت و انا اعلى السريع احضر بريوك الخاتون ، خلصيت كيلهم و اخذتها عدها ، و هي تنطر ليما ياكلون ياله تاكل .

صبوا السفرة و سرحان ما هو ، ظليت اعلى نار عليش ما اجا ، كعدوا كلهم وهو ماكو .. . ليش ما اجا

ندست سليمة و هي تحط الجاي للخاتون : سرحان ما هو عليش ما يجي يتريك

ضحكت و هي تكلي : هسه يجي

شوية و دش ، صاح : صبحكم الله بالخير

و عاين علي بابتسامة و دار بسرعة خاطر لحد ينتبه

دنجت و هم ردوا اعليه : اصباح النور

كعد بكتر الشيخ ، و الشيخ يسولف اعلى العشاير و يحجي، و انا اعلى كثر ما متوهدنه مضيعة اعلومي ، الخاتون كالت : الخاشوكة

انا شلت الخاشوك و خليتها بوجهه ، حجت : شبيج بنيتي اذيتيني

انتبه الشيخ ؤ حجيت : اتعذر منج وعلي موش كصدي ، ما ادري

- ما صار شي حبيبتي ، انطيني خبز

الشيخ : تعتازين شي خاتون .

سرحان مبتسم و مدنج ، وكل شوية يرفع عينه يلكف نظرة . ردت الخاتون ( لا الف عافية)

هذا جان احلى يوم بكل حياتي ، كل عمري ما انسى لذة هاذ اليوم ، ولا بعمري طرت و سرحت كثر هاذ اليوم ، اول نبضت عشك دكت بدلالي .

سرحان : ما اهيس روحي و انا كبالها ، ساعة الاشوفنه ، افقد الشوف و اعاينها لوحيدها ، وما اتمنى لحظتها تخلص و انا وياها ، جنت لحظاتها تمر برك ..

وبلياها الوكت يا طوله .

اتنطر الفجر نطرة الصايم للفطرة

كلس افزن خافن يفوتني الوكت و ما الحك اوصل كبل لا تجي الشط ، ووكت التكر تاخذ روحي بطرتها .

كل عمري و انا غريب ، و بس من اشوف اعيونها الكه وطن وديرة و بيت و اهل ، انا بس حذاها موش غريب و الدنيا بلياها غربة .

يا محلا ساعات العشك وياها

وبملكاها جن جاهل و فززوه اعلى فزت عيد يناطر اليتكرم اعليه بكرمه ، و انا انطر من حلكها الجلمة

عاينت الساعة خمسة الفجر

خلني اكومن لا ما الحك جيتها

لبست و تلفلفت و حطيت دهن العود ، و توجعت لحصاني ، خذيته و مشيت للشط ، انطر جيتها

مرت الدقيقة و الأثنين و التلاثه و ميل الساعة جن عده طلابة وياي ما يمشي .

ما اعرف هي اتأخرت يو انا جاي مبجر

طلع ضوا الشمس ، وانت معامها و هدوة ما هي

ناس اجت و مشت و هي ماكو

تنهدت بيأس ، جن اليوم ما تجي ، كلت اردن لجن كلبي ما يطاوعني اعلى الردة و ظال مناطر اعلى ظهر حصاني ، ليما شفتها

كلش ارتاحيت ، جن شفت الحياة بعينها

نزلت من ظهر الفرس و انا اعاين اعليها ، كاضة الجرة و تترس ماي من الشط، شالت راسها ، شافتني من بعيد ، ضحكت بخجل و هي تشيل الجرة اعلى متنها .

ما اكدر اكرب ليها ناس تروح و ترد

اخذت نفس قوي و انا اعاينها جن اريد اترس ريتي بهواها .

اندارت تمشي و تتمايل جنها ناكة

ركبت اعلى ظهر الفرس ، ومشيت ، كمت امشي بطيئ و صوت حوافر حصاني تضرب بالگاع .

دارت الوجه وعاينت وراها ....اااخ يا جمال ضحكتها الخذت عكلي ... كملت مشي .

ما حجيت ولا هي حجت ، اكتفيت بس اعاين اعليها، ليما خلصت العجد و مشت بدربها، ما لحكتها بعد خوفن اعلى سمعتها ، خافن يشوف احد من السلف و تلوحها الچلمة .

وكف و نطيت من على حصاني ووكفت اعاين وراها ، انضرب اعلى ظهري بقوة ، جفلت و صاح خنجر :- هاااااا

:- متكلي شبيك فززتني .

- فززتك يو عينك طايرة اعلى بت السلف .

- اشش حسك يمعود

- عاشكها ولك

- مدري ، جن كلمة عشك زغيرة اعليها ، كلبي خفگ لهالسمرة يخنجر ، ساعة الأشوفنها ما اكوم اشوف الناس ، و انسى انه شنهو و منهو و اتيه بشوفها

- هلله هلله

- اي وداعتك ، اول بنية تتربع براسي

- جا انت ما تتربع براسك غير الطلايب

- وعليش تكول هيج ؟

- خايب سرحان هاي هدية بت حاكم ال ثجيل حطها اعلى بالك واصحى من احلام العشك تراه ما وراه غير اوجاع الگلب

- و ان كونها، انا اعشكتها

- اخذها نصيحة من اخو يودك و يخاف اعليك

عاينت عليه .. حجه :- اعبر النهر مادامه ضيج

- عليش ؟

- هدية منهي اعليها من ولد عمها ناصر و هالنهوة نهوة گماط ما تنفچ

- اهيييي انتم بأي عادات عايشين ترا الدنيا اطورت ، روح شوف العالم وين وصل

- يوصل وين ما يوصل اهلنا عكولهم لسه هي هي غريييب الحب ممنوع اعلينا والعشك مو ثوبنا

- العشك ينرادله زلام يخنجر

- واعرافنا وتقاليدنا كطعت روس ازلام يابو زلام يسرحان

- لا تظن بكلامك هاذ تخوفني ، تعرفني احب لعب النار و انا مكمل دربي وياها لوين ما تصل.

تكرب اعلية و دك اعلى صدري :- وهاي النار ما راح تحرك غيرك، اتذكر هالجلمة عدل و راح تتذكرها هوااااي وكت التلعب بالنار هاذ البصدرك يتحول جمرة وتكوم تصيح الغوث منه ، يبن ضاحي العاشكها من ثجيل و منهي اعليها ، و المنهي اعليها اقل ما يعملون للماخذها الچتل ، شلون لو جان العاشكها ابن عدوهم .. اهلك و ابوك و ديرتك و كل عشيرتك تحترك بهالنار التكول احب اللعب بيها. ....