رواية خلف القضبان روح يتيمة الفصل الحادي عشر 11 - بقلم الكاتبة جيهان آغا

#خلف القضبان روح يتيمة
#بقلم الكاتبه جيهان آغا

_

قبل مانبدي صلو على سيدنا محمد

( اللهم صل على سيدنا محمد وعلى ال محمد )

ولا تنسون تفاعلكم يحفزني
اكتب البارت وانزله اسرع

قراءة ممتعة ياقلبي
__________

منال - عيني هاي شكو شصاير

بتول - والله خاله حالنه حالكم كعدنه نتغده وسمعنه صوت صياح وهوسه طلعنا ونشوف الدخان تارس الفرع

جوان - سوده عليه يمكن اكو ناس جوه

منال - يااا سترك ربي

بتول - الله يستر

نور - اباوع الناس شلون مخبوصه رفعت ايدي
لسماء ادعي محد يتأذه نزلن دموعي واني اسمع صوت صياح داخل البيت ربي احفظهم يارب

ضليت واكفه شوي وجتي الاطفائيه طفو النار  ادعي وابجي عل ناس الجوه بنص الدخان طلع واحد طويل معضل لابس تيشيرت اسود لازك على عظلاته وجهاصاير اسود من الدخان شايل بيده طفل صار ازدحام والناس التمت تباعوع
رفعت نفسي اريد اشوف شصار شو هذا خله
الطفل بالكاع وشربه مي وغسل وجها
وبعدين دخل جوه شوي وطلع رجال
جبيره بالعمر ويه مره جبيره صفنت علي
شلون يغسل وجهم ويشربهم مي وشال الطفل
ونخبص بيهم يجي منا ويروح منا ضليت
صافنه علي  جتي منال

منال - اكلج شايفه هذا لابس تيشيرت اسود

نور - شبي

منال - يصير ابن هذا البيت بالركن

نور - ذوله العندهم حراس

منال - اي

نور - هما نفسهم الجابو الغده

منال - صدك

نور - اي والله

منال - ولج ذوله مريشين قابل مثل حضنه

نور - الحمد لله احسن من هواي ناس

منال - لا تصيرين شيخه براسي

نور - مو شيخه هاي حقيقه

منال - اوي صوجي اني الواكفه احجي وياج

نور - فاتت منال جوه واني بقيت اباوع
التفتت شافتني البنيه يلي اليوم جابت اكل
ابتسمت رديت الإبتسامه وصاحتني منال
طبيت جوه

منال - تعالي شيلي هذا الأكل من يجي سهيل حبيبي حميله الأكل

نور -  اشوف ناسفه الأكل ومبقيه شوي لزوجها
عزه بعينج چنج ماشايفه اكل بحياتج غسلت المواعين واخذت ملابسي ورحت اسبح خلصت بدلت ولفيت المنشفه على راسي فتحت الباب والصدمه اشوف زوج منال واكف يم باب الحمام ونظراته مو راحه كتله بتوتر

ش ش شنو تسوي هنا

سهيل - ها لا بس جيت اغسل ايدي

نور - تغسل ايدك بالحمام

سهيل - ها اي اي بس شفتج انتِ هناك كلت انتظر تخلصين

نور - ماناقشته بسرعه طلعت ورحت للغرفه
قفلت الباب بتوتر اجي واروح ياربي هذا الرجال
مو راحه ما ارتاحله ربي وين انطي وجهي

اندك الباب

منال - غراب البيل فتحي الباب شعندج قافلته

نور - رحت فتحته

منال - لج احجي شعندج قافله الباب

نور - شعندي بالله عليج ليش السؤال الماله داعي

منال - ليش واني شمعرفني يجوز تحجين ويه ولد

نور - صدك جذب ربي صبرني ياولد وين الموبايل العندي علمود احجي ويه ولد وتعرفين كُلش زين اخلاقي مو هيج شايفتني لهل درجه رخيصه

منال - خوش امل اخلاق يلا خلصي وتعالي سوي كيك سهيل حبيبي مشتهي كيك

نور - ليش ماعندج ايد تسويله

منال - بلا عندي بس اذا عندي خدامه ليش اتعب ايدي

نور - يهدي من يشاء بغير حساب

منال - شقصدج عيني

نور - فهميها شلون ماتردين وهسه طلعي اريد ابدل

منال - والكيك ست نور

نور - اخلص واجي

منال - يلا استعجلي

نور - راحت كمت ابجي جذب لا ابدل لا شي بس اختنكت من كلامها وماريد اشوف زوجها ياربي
شسوي لا عندي احد هنا لا شي ذوله مو امان
مو كافي منال ومعاملتهَ انوب زوجها ربي تعبت وين انطي وجهي مالي غيرك ولا راح يكون الي غيرك ربي احفظني

رحت مشطتت شعري ولفيت حجابي حتى عطر
اخاف اخلي من وره زوج منال هو هيج وعينه بس عليه انوب اتعطر رحت بيها

فتحت الباب رحت للمطبخ اشوفه كاعد هناك وبيده الموبايل مدري يخاير منو اول ماشافني عاف الموبايل وضل يباوع عليه واني قطرةدم مابقه بجسمي من الخوف نظراته ماحلوه احسه يريد ياكلني اكل  كتله

ع ع عمو

سهيل - عيونه وكَلبه 

نور - بلعت ريكي وكتله
بلا زحمه ممكن تطلع برا علمود اعرف اشتغل

سهيل - تسوين كيك مو

نور - اي

سهيل - اويلي يابه ها وين صايره كيك يسويلي
كيك اي اطلع لعيونج الحلوه

نور -  غمزلي وهيج كال فتحت عيوني من الصدمه خليت عيني بعينه وكتله واني منفعله

شددددتحجي رجال شكدك شكبرك رجيليك اباب الكَبر ماتستحي على نفسك الشيب تارس راسك
عيب عليك صدك الكال الستحو ماتو

اني هيج كلت وجان تدخل منال

منال - هاي شكو ليش صوتكم طالع

نور - اسألي زوجج

منال - زوجي
شصاير سهيل شكو

سهيل - صدك هاي البنيه ماتستحي على نفسها
بكد ابوها وتشمرلي حجي ومن كتلها بابه اني بكد ابوج مايصير هذا الحجي شوفت عينج ردت فعلها شلون جانت

نور - صدمني بزايد كَلب الكلام عليه كتله
عييييب عليك اجذب ماتستحي على شيباتك

اني هيج كلت وجان منال تضربني راجدي
فر وجهي فر

منال - حقيرره عليمن اتعلين صوتج بنت الفكوره خوما ابتليت بيج  اني يا ادبسز اعرفج مو امان رجال بكد ابوج ماااااتستحين شنووو تردين رجال كووولي علمود الكيلج رجال واخلص منج يا ادبسززز

نور - قهرني كلامها اكثر من ضربها كتلها

انكسرت ايدج ان شاءالله كولي ااامين
وهذا زوجج اكبر جذاب وملعب والله العظيم
هو بده يحجي واليوم شفته واكف اباب الحمام اكله عمو شتسوي من عمه العماه كولي امين اكله يكول اريد اغسل ايدي اكو واحد يغسل ايده بالحمام ااااحجي اكو واحد يغسل
ايده بالحمااااااام

التفتت على زوجها مصدومه

منال - سهييل صدك هذا الحجي

سهيل - وسفه عليج تصدكين بيها وماتصدكين بيه
لج هاي جذاااابه

منال - اصدك بيك يانظر عيني هاي ادبسززز اعرفها
ويه ولد اخوتي نفس السيناريو عادته وووولج نور اليوم اشوفج نجوم الظهر بنت الفكوره

نور - جتي سحلتني من الشال وكع سحبتني
من شعري اريد تهده ماكو وزوجها واكف يباوع عليه ويضحك

هدددي شعري تخبلتي حرام عليج والله هوَ الجذاب مو اني هدددددي شعري

منال - تحرم عليج عيشتج كولي امين
اني اعلمج

نور - سحلتني من المطبخ للحوش والدنيا مطر
وبرد وكعت بالكاع على ركابي ذبت الشال عليه
وكامت تغلط وتسب بيه

منال - والله العظيم اليوووم برا تنامين بنت الفكر
يرادلج تربيه من جديد

سهيل - لا منال شلون يصير تنام دشوفي المطر
والبرد تتمرض وتوكع براسنه

منال - لااا عوفها خلي تولي طبها الف مرض
بلكت تموت من البرد ونخلص منها

نور -  ماسكه ايدي من الألم وكعت على ايدي
ابجي واكول

حسبي الله ونعم الوكيل عليكم الله ياخذ حقي
منكم الله لا يوفقكم دنيا وآخره

قفلت الباب ولا اهتمت لكلامي
سحلت روحي سحل كوه كعدت بالزاوية
الحوش ماسكه ايدي واون من الألم
اااخ ايدي الله لا يوفقكم

حضنت رجلي وابجي اريد شي يدفيني ماكو متت برد والمطر قوه ربي وين انطي وجهي
اجه على بالي اخابر سوزان بس ماعندي موبايل
شلون اخابرها ضليت على كعدتي لا ساعه ولا ساعتين اذن المغرب جان اكو صونده مال مي ساحبي للحديقه رحت اتوضيت والهوى جان بارد كبل عطست لفيت حجابي وصليت عل كاع ومطر خفيف ينزل خلصت رفعت ايدي لسماء وابجي على حالي ربي تقبل صلاتي ودعواتي يارب تعبانه ربي تعبانه تعبت من كلشي مابقه بيه طاقه اتحمل يارب تعبت

_____________
في مكان اخر

رعد - جوي الاطفائيه طفو النار ورحت ساعدتهم طلعنا العائله من البيت الحمد لله محد مات بس اكيد اكو مناطق بجسمهم لايحه الحرك
المهم جوي الإسعاف اخذوهم وكلمن راح لبيته

يلا شباب نروح سوينه العلينه
الله يشافيهم

حيدر - اي والله خويه ماقصرنه 

سيف - اروح اسبح وجهنه كل صخام وريحة
دخان

رعد - اي والله حتى اني

جوان - يمه والغده

رعد - انتو تغدو اني كُلش تعبان اسبح وانام ورايه طلعه

جوان - يمه كلشي ماماكل انهد حيلك من التعب

رعد - يمه من اكوم اكل شي لا يضل بالج

جوان - ماشي يمه على راحتك

رعد - سيف الحكني لغرفتي نحجي

سيف - ماشي خويه

بتول - راحو رعد وسيف بقينه بس اني وتبارك وامي وحيدر واحمد تغدينه

احمد - يمه ابوي مارجع

جوان - رجع البارحه بالليل متأخر والصبح طلع

حيدر - يمه ماريد اشوف عائلتنه متفككه

جوان - شسوي يايمه شبيدي اخوك عنيد وحقه
ابوك فدنوب ويا لا تعامل لا شي من صغره وهيج تعامله ويا اخوك وهسه كبر وصار مايتحمل كلامه وحقه

احمد - اني ماحيرني غير شي واحد
ابوي مابي شي ويانه بس ويه رعد هيج

تبارك - اكلكم شي بس لا تفهموني غلط مجرد احساس

حيدر - كولي

تبارك - يعني ابوي تعامله ويه رعد عبالك مو ابنه

بتول - يااا منيلج هذا الإحساس

حيدر - طايحة الحظ شقصدج

تبارك - ولكم ماقصد شي بس اكول تعامل ابوي هيج ويه رعد يعني شي غريب اكو انه بالموضوع

جوان - اني اكول انجبي وكومي شيلي الاكل ويه تيلا يلا

تبارك - تم تدللين شعندنه غير نبع الحنان

جوان - ام لسان منو يكدرلجن

حيدر - يمه اريدج بموضوع

جوان - عيوني الك يايمه كول

حيدر - شوفي يعني ماعرف بس اني معجب بوحده وياي بالدوام وحاب اتعرف واسئل عليها اذا خوش بنيه علمود تخطبيلي ياها

بتول - هلااااا عرس راح يصير عندنا عرررس
كللللللوش

تبارك - كومي كومي

بتول - كمنا اني وتبارك نغني ونضرب جتف بتجف
نركص اجه احمد ويانه

تبارك - خاله ياام علي ياام علي خاله

بتول - ياام علي خاله

احمد - عيب عليجن تركصون بدون سمعوني
بعد شتكول سجوده

بتول - تكول بلمنه طك بلمكم ياهل العماره

تبارك - وبلمنه طك بلكم

احمد - يا اهل العماره

جوان - يااا هههههه شجاكم رادوها من الله

حيدر - هههه ترا بس كلام بعد ماصاير شي شبيكم

تبارك - طك كلبنه متنه نريد عرس كافي
صرتو شياب ازوجو خلي نخلص منكم

حيدر - ام لسان ليش بشنو متعبج

بتول - نريد نفرح نريد عرس نريد نركص
شنو السالفه

حيدر - خوش شكلتي يمه

جوان - يمه مو تدلل انت بس ازوج خلي افرح بيكم طك كَلبي عليكم شوكت افرح بيكم

حيدر - الخير فيما يختاره الله
ان شاءالله تفرحين بينه كلنا

جوان - ان شاءالله يايمه

_
_

رعد - رحت للغرفه شوي ودك الباب
اتفضل 

سيف - زاد فضلك خويه

رعد - تعال شنو الموضوع الردتني بي

سيف - تعرف كريم صديقي

رعد - شبي

سيف - يريد يتطوع بالجيش

رعد - هو شنو يريد بضبط

سيف - مثلك جهاز مكافحة الارهاب
بس هو يريد يكون جندي يعني مو ضابط

رعد - واني شنو اعرابي بالموضوع

سيف - يريد يعرف شنو المطلوب منا
حتى ينقبل

رعد - خويه ترا شغلنه كُلش صعب ومتعب بشكل
يراد واحد كَلبه ميت تعرف شنو يعني كَلبه ميت  جهاز مكافحة الارهاب تريد زلم ينشد بيهم الظهر

ترا الموضوع مو بس ملابس وتدريب وصور ينزلهن على حسابه مثل جيل هل وكت

سيف - اعرف والله وهو يكول اني كدها ان شاءالله

رعد - سهله  خلي يقدم واني من التحق
اشوف الولد هناك واوصيهم علي

سيف - لك شنو انت شنوماكو منك
احلى اخو بالدنيا كلها

رعد - هههه المصلحه عمي

سيف - افا عليك ترا هاي الحقيقه

رعد - خوش شلونك ويه الدرس

سيف - اخر سنه تهون واتخرج واخلص

رعد - ان شاءالله خير
تهون دكتورنه تهون

سيف - اي والله
يلا خويه اخذ راحتك تعبتك وياي

رعد - تعبك راحه بعد اخوك بس سد الباب وراك

سيف - ماشي

رعد - راح واني رحت
فتحت شباك غرفتي جبير وشغلت السيجاره
وبقيت صافن عل جو والمطر ونسمات هوى بارده

شوي وجيت اسد الشباك وجان انتبه على بيت القديم استغربت شفت وحده كاعده بالحوش حاظنه رجلها وتبجي شنو هاي حسب علمي
البيت متروك وبعدين اكو واحد يطلع بالحوش بهاي ألاجواء

بقيت صافن عليها كل شوي ترفع ايدها لسما
وتبجي امبين تدعي شوي واذن المغرب
كامت توضت وصلت بهذا البرد
لعد ايمانج شكد قوي

اااخ يارعد وانت شوكت الله يهديك وترجع لطريق ربك شوكت

سديت الشباك والبرده ورحت نمتلي ساعه كمت
سبحت وطلعت انشف شعري شفت الساعه
8 هسه وكت اللعب ياعمران

اخذت الموبايل وخابرت عليهم

تصير 8 و5 دقائق اريد تحركون الأخضر واليابس

- تم استاذ تأمر امر

رعد - سديت الخط وبدلت تعطرت اعدل بشعري وادندن لا تسولف علينا من يسألون عيون الناس لاتحسد عشكنا

مشطت شواربي
هسه تمام نزلت جوه اريد اشوف ردت فعل عمران من يوصله الخبر

بتول - جنا كاعدين كلنا اجه ابويه رحت حضنته
فددديت احلى واحن اب

عمران - وردة بيتي شلونج بعد ابوج

بتول - زينه يابعد الرواح والريه

تبارك - واحنا شنو عيني خراعين خضره

عمران - فديت التغار تعالي بعد ابوج تعالي
شعندي غير بناتي وردات بيتي

حيدر - افا بويه واحنا شنو

احمد - ايييه صدك المثل الكال
يامن تعب يامن شگة يا من على الحاضر لگه

عمران - و لك بشنو تعبان وياي

سيف - هو شالع كَلبك بمصاريف دراسته

عمران - اي والله و لسانه شطوله

بتول - راح يم امي وباس راسها وكال

عمران - يلا حقج عليه اني صرت عصبي
تعرفين هذا الولد يحرك اعصابي

جوان - عمران 
على كيفك ويا هوهم كبر مابقى طفل

عمران - ااااخ ماكول غير الله يصبرني علي

بتول - هيج كال وجان ينزل رعد

احمد - تعال هذا اليكل ذكرنه القط كام نط

بتول - ههههه يعني رجال شكبره شكده
تشبه بالقط

احمد - ههه شمعرفني هما هيج يكولون غير مثل

بتول - اجه رعد بكل هدوء كعد وشغل جكارته
وبكل ثكل جاوب احمد

رعد - خوش انذكرت بالخير لو بالشر

احمد - لا خويه بالخير

رعد - جيد

بتول - راح ابوي كعد عل تخم صار مقابيل رعد
وجان يدك موبايله جاوب

عمران - الو اي شبي شنووووو صدك تحجي

جوان - ياستار ياربي شكو

بتول - سد الخط وجها صاير احمر من العصبيه
هجم على رعد يريد يضربه اخواني ماخلو

عمران - لللللللللللك حقيررررر اليوم اموتك بيدي
شلوووون هيج تسوي شلوووون ولك ويامن اندكيت لك ذوووله ينهوك نهييييي

حيدر - بويه على كيفك فهمنا شصاير

احمد - اعصابك يمعود شكو

جوان - عمران فدوه بس فهمنا شكو شجاك
تهجم عل ولد

عمران - هدوووني اربي هذا الساقط على جتافه جم نجمه شايف نفسه شوفه ولك ويااااامن اندكيت

بتول - كلنا مانعرف شنو السالفه امي كامت تبجي وابوي صاير نار من الأعصاب ورعد كاعد بكل هدوء يدخن واخواني ماسكين ابوي يريد يضرب رعد شو هذا كام وتقدم يم ابوي وكال

رعد - هدو

حيدر - ررررعد اصعد فوك كاااافي شنو هل مهزله
يوميه مشاكل اصعد فوك

عمران - هذا الحقير اني اله هدووووني علي

رعد - هدو بالله عليكم هدو

حيدر - رعددد اصعد فوك اكلك

رعد - وااااني اكلكم هدووو مايكدر يسويلي شي هدووو

جوان - بدموع /
ولكم يمه شجاكم ليش هيج تسون راح اموت من قهركم شجاكم تخبلتو

رعد - اكلكم هدووووو

بتول - صوته رج البيت رج خفت منا بحياتي
ماشايفه اهلي بهيج منظر منا ابويه ومنا رعد
هدو ابوي احمد وحيدر وهذا بكل هدوء تقدم
يم ابوي رفع ايده ابوي يريد يضربه وهو مسك ايده وكله

رعد - عمران ياعمران تحلم بعد تمد ايدك عليه
وبعدين ليش هيج مستغرب

اليِلعب بناري يتحمل حركها
لا تستغرب القادم اقوى وربك القادم اقوى
بعدك كُلشي ماشايف

عمران - للللللللك لا تخبلني
تعرف راح ينهوك نهيييي اذا اني
اتحملك لخاطر امك بس هما مايعرفوف خاطر احد

رعد - لاه لاه  ياعمران بعيونك الخوف هيج تخاف منهم

حيدر - هسسسه احنا شنوووو هنا ليش محد يفهمنا بويه شصار احجي

رعد - اتفضل ياعمرن كلهم شنو صار لو
تحب اني اكلهم

عمران - ياحقيررر يانذل
ووووولكم رعد حرك روحه بروحه
وكولو عمرااااان كال راح ينهو نهيييييييي
واذكركم اني اعلمك اااني اعلمك سهله سهله

بتول - طلع ابوي ورعد يضحك بكل ثقه
حيدر صار عصبي

حيدر - على شنوووو تضحك عاجبك هذا الوضع
استاذ رعد

رعد - ههههه حلوه هاي مال استاذ

حيدر - ررعد لا تحرك اعصبي بعدين تشوف
شي مايعجبك

رعد - وشتسوي مثلاً تعال خلي اشوف شنو المايعجبني

حيدر - رررعد جاي تستفزنييي

رعد - اي وشنو تسوي

جوان - وووولكم كاااااااااااااااااافي حسبي الله ونعم الوكيل عليكم حرااااام عليكم رحموني رحمووووني شنو من جهال انتو كافي تعبت منكم
ومن ابوكم خلص شوكت اموووووت واخلص منكم شوووكت حرام عليكم والله حراااام ولكم لييييش هيج تسووون ليش شنو ناقصكم من شنو محرومين حارميني الراحه ووولكم راحه ماعندي مثل الوادم ليش هيج تسوون بيه ليش حرام عليكم والله حرااام

بتول - امي تبجي وتحجي انهارت كُلش لزمت صدرها وكالت بصوت متقطع

جوان - ا ا انه كله مني انه انه
ح ح حرام عليكم

بتول - امي اغمه عليها صار صياح وبجي
كلنا خفنه عليها

يممممه ولكم امي يمممه كومي
كوومي الله يخليج كووومي

تبارك - يمممه ولك احمددد
ررررعد حيدررر سيف ولكم اميييي راحت
يممممه كومي سيف شبيها شوووفها فدووووه

رعد - بصدمه /
يمه كومي الله يخليج سييف شوووف شبيها

سيف - بسسسس ابتعدو  اشوف النبض

احمد - كاااافي مشاكل ومهزله
راح تروح من ايدنه من وراكم كااافي

حيدر - ها سيف شبيها كوول

سيف - يمكن سكته قلبيه
بسرررعه لازم نروح للمستشفى

بتول - شالها رعد وركض بيها لسياره
واني ركضت اجيب الشال مالي
رحت جبته وصعدنه اني وتبارك
ليوره يم امي ورعد وحيدر ليكدام
واحمد راح ويه سيف 

حيدر - بسرررعه شغل السياره

رعد - دخلي يفتحون الباب
ووولكم فتحو الباب

الحرس - حاضر استاذ

تبارك - بدموع /
والله والله اذا صار بيها شي افضحكم كدام الناس اكول كله من ولدها هيج صار بيها

حيدر - كافي مو وكت هذا الحجي الماله معنى

بتول - لا خويه اله معنى ونصصص هذا مو حال
يوميه مشكله احس روحي بحرب مو ابيت

تبارك - القاهرني شي واحد اليشوف قلعة ابوج يكول نيال الكاعدين بهذا البيت مايعرفون الكاعدين جوه الخيم احسن منا

بتول - التفتت اشوف امي بعدها متت قهر
رررعد بسرعه الله يخليك استعجل سوق اسرع

رعد - اي بس شوفي نبضها بعد اخوج

بتول - خليت ايدي على قلبها ويم رقبتها
ومعصم الأيد الرسغ الحمد لله اكو نبض

رعد - الحمد لله

تبارك - حيدر خابر سيف كله لا تسوق
سريع اعرفه متهور بالسياقه

حيدر - هو منو المامتهور بيكم

بتول - طول الطريق ابجي على امي وابوس ايدها شوي وصلنا شالها رعد دخل للمستشفى

رعد - وووينكم تعالوووو وين الممرضين الدكاتره وووينكم

بتول - جوي الممرضين ركض جابو السديه
رعد صار مثل المخبل كام يصيح ويعيط عليهم

رعد - وووين الدكتور وووينكم ليش ماكو دكتوررر

حيدر - صوتك فضحتنه

رعد - دشووووف ماكو ولا دكتور

الدكتور - هاي شكو اخي ليش اصيح اكو ناس مرضى جوه

بتول - هجم علي رعد ومسكه من ياخته

رعد - اااسمع لك شوفو امي شبيها بسررررعه
قسماً عظماً اذا صار بيها شي احركم حررررررك فهمت

حيدر - وولك هده شبيك منا الناس
يمعود فضحتنه

الدكتور - هدني شنو هذا التخلف وين كاعدين هدني اكلك

حيدر - لك هده امك راح تمووووت هددده

بتول - هده رعد جوي الأمن مال مستشفى يردون يطردو برا اول ما رادو يمسكو طلعلهم الهويه مالته اعتذرو منا وراحو واني وتبارك نبجي حال الظيم حالنه جوي احمد وسيف ركض اجه احمد حظنا وكال

احمد - ماكو شي ان شاءالله حبيباتي
كافي تبجون بعد اخوجن ادعولها

حيدر - ان شاءالله ماكو شي ادعولها بويه ليش البجي

بتول - تعرف كُلش زين بدون امنا مانسوه شي
حرام عليكم يوميه مشاكل وتنقهر بسببكم

احمد - خلص الفات مات سدو الموضوع

رعد - ابتعدت عنهم رحت وكفت يم الشباك
نزلت دموعي اني نقطة ضعفي امي مالي غيرها احسها الشي الوحيد الحلو بحياتي امي اذا صار بيها شي ما اسامح نفسي

بتول - شويه وطلع الدكتور

حيدر - بشر دكتور

الدكتور - مع الأسف امكم............................

_
_
________________

《 يقول الشاعر كريم العراقي  》

كَمْ خَابَ ظَنّي بِمنِ أهديته ثِقتَي

فَأَجْبَرَتْنِي عَلَى هِجْرَانِهِ التُّهَمُ

كم صُرْتُ جِسْرًا لمَن أحببتهُ فَمَشَى

عَلَى ضُلُوعِي وَكَمْ زَلَّت بِهِ قَدَمُ

اِشرب دمُوعك واجْرع مُرَّهَا عَسَلًا

يغزو الشُّموعَ حَريقٌ وهِيَ تَبتَسِمُ

والْجِم هُموْمَكَ واسْرِج ظَهْرَها فَرَسًَا

وانهض كسيْفٍ إذا الأنصالُ تَلْتَحِمُ

_______________

قلبيييييييي البارت القادم نااار وشرار 🔥

ينزل على تفاعلكم وصلو هذا البارت
اقل شي 200 تعليق وعتبرو البارت ال11 نزل
وباجر انزل شبه الأبطال لان طلبتو مني
انزله وبس ياقلبي اذا تردون البارت ال11 الكله
ناااااار وشرااار لا تنسون 🔥

التصويت بالنجمة
تعليق بين الفقرات
تفاعلكم مع الرواية

ومبدئين شنو رائيكم  بالرواية
بدايتها حلوه او لا كتبولي بالتعليقات

_

حسابي انستجرام انشر هناك
كلشي يخص الرواية  👇

وحسابي واتباد تابعوني حتى يصلكم كل جديد 👇

Jehan-Stories

والان ياقلبي نختم لمتنه الحلوه بذكر الله

"""""""""
سبحان ألله
ألحمد لله
لا إله إلا ألله
ألله أكبر
"""""""""

#خلف القضبان روح يتيمة
#بقلم الكاتبه جيهان آغا