رواية خلف القضبان روح يتيمة الفصل الثالث عشر 13 - بقلم الكاتبة جيهان آغا

#خلف القضبان روح يتيمة
#بقلم الكاتبه جيهان آغا

_

قبل مانبدي صلو على سيدنا محمد

( اللهم صل على سيدنا محمد وعلى ال محمد )

ولا تنسون تفاعلكم يحفزني
اكتب البارت وانزله اسرع

قراءة ممتعة ياقلبي
______

رعد - ابتعدت عنهم رحت وكفت يم الشباك
نزلت دموعي اني نقطة ضعفي امي مالي غيرها احسها الشي الوحيد الحلو بحياتي اذا صار بيها شي ما اسامح نفسي

بتول - شويه وطلع الدكتور

حيدر - بشر دكتور شنو السالفه

الدكتور -مع الأسف امكم متعرضه لنوبه قلبيه او احتشاء عضلة القلب والحمد لله جبتوها في الوقت المناسب

حيدر - دكتور امي ماتشكي من شي

سيف - الصدمه او الحزن الشديد ايضًا اله دور 

الدكتور - صح كلامك تحدث النوبة القلبية عندما ينخفض تدفق الدم إلى القلب بشدة أو ينسد مساره
والحزن أو الصدمات اكيد الا دور والنوبة القلبية تحدث عند انسداد أحد الشرايين الي ترسل الدم والأكسجين إلى القلب

بتول - سوده عليه
دكتور فدوه امي شلونها هسه

الدكتور - حالياً هيَ تحت المراقبه
اريد يستقر نبضات القلب لازم تكون تحت المراقبه

حيدر - يعني ماترجع للبيت

الدكتور - لا باجر ان شاءالله طلعوها

حيدر - ماشي دكتور شكراً ونعتذر على الصار

الدكتور - اتمنى مايتكرر هذا التصرف

حيدر - اكيد دكتور ان شاءالله مايتكرر

بتول -  راح الدكتور اباوع يمين يسار اشوف رعد ماكو

تقدمت اكثر  اشوفه كاعد بالكاع  مدنك
وخال ايده على راسه رحت يما كعدت

شبيك خويه ليش هيج ساكت
اخذ نفس وكال بتعب

رعد - تعبان

بتول - التعب بيه ولا بيك

رعد - لا خويه لا تكولين هيج

بتول - مقهور علمود امي صح

رعد - اي حسيت اني الجنت السبب

بتول - رعد خويه انت انسان دارس وفاهم
ياخويه فدوه اروحلك افتح صفحه جديده ويه ابويه اني ماعرف شنو سالفتكم بس كل الي اعرفه انتو جاي اتعبون نفسكم وتعبونه وياكم رعد خلينه نعيش مثل كل عائله واحد يحب الثاني واحد يساعد الثاني

رعد - ليش اني شوكت مقصر وياكم

بتول - خويه ماقصد احنا اقصد ابويه
اعرف انت بحياتك مامقصر ويانه تصدك مرات
احسك اب مو بس اخ من خوفك وحنانك علينه بس فدوه اروحلك فكر بكلامي كافي مشاكل
افتح صفحه جديده ويه ابويه

رعد - الله كريم طالع برا ادخن اي شي تحتاجون خابريني 

بتول - ماشي خويه

____________
في مكان اخر

نور - من صليت المغرب خلصت وحسيت بألم شديد بمعدتي ماهتميت شوي وزاد الوجع عليه
كمت ادعي واذكر ربي اريد بس يخف الألم
حسيت نفسي راح اتقيأ رحت دكيت الباب

منال فتحي الباب فدوه فتحي اريد اتقيأ والله
فتحي معدتي توجعني

اسمع زوجها يكله

سهيل - عوفيها جذابه تريد تفوت جوه

منال - اعرفها حيه ام راسين عبالك ماعرف سوالفها
تعال نروح للغرفه هاي راح تضوجنا بصوتها

سهيل - اي حبيبتي كومي وحده ماتستحي

نور - اسمع كلامهم مثل السجاجين دخلت كَلبي
ضليت ادك الباب محد فتحه والألم يزيد جان اكو
كيس تكرمون بي احذيه طلعت الأحذية وخليت الكيس يمي علمود اتقيأ بي بقيت على الألم ربع ساعه وماحس نفسي غير اتقيأ بجيت على حالتي رحت سحبت الصونده مال حديقه غسلت وجهي صار الألم اقوى خلص بعد ما اتحمل دكيت الباب بكل قوتي

منال فتحي الباب والله العظيم مريضه جاي اتقيأ
فتحيييي الباب حرام عليج فتحيييييييييي

كمت ابجي واحجي طلعت واني اتقيأ

منال - وجع عمه بعينج

نور - حجيت هل كلمتين وبعد ماحسيت على شي  م م معدتي فدوه

منال - ياااا لج كومي

سهيل - هاي شبيها شو صدك داخت

منال - لج كومي جذابه

سهيل - والله ماتوقع جذابه

منال - جسمها بارد ثلج

سهيل - شنسوي هسه

منال - سهيل لازم نروح للمستشفى خاف يصير بيها شي واحنا نبتلي اني مايهمني هيَ طبها موت مو بس مرض بس احنا النوكع بيها تحيق وسوالف
القانون ماريد ندخل بهيج لخه

سهيل - ماشي يلا خلي اروح اشوف منو عنده سياره او تكسي

منال - ماشي لا تتأخر

_
_

نور - فتحت عيوني غوشن من الاضويه الفوك راسي اشوف نفسي بالمستشفى
شوي واذكرت شصار

منال - ها غراب هيج زين بهل ليل بهذلتينا

نور - حجيت بتعب
انتِ وصلتيني هاي المرحله كتلج فتحي الباب تعبانه

منال - دكافي كافي لسانج شطوله

نور - احس نفسي بردانه كلش
وائلم بمعدتي متت اجه الدكتور كال

الدكتور - احجيلي من شنو تشكين

نور - دكتور الم بمعدتي مدري بطني بس
الم كُلش قوي واحس نفسي بردانه كُلش

الدكتور - اي طبعاً ماخذه برد وجسمج ماتحمل

منال - عشتو يعني هذا السبب

الدكتور - اي ليش هذا سبب بسيط بنظرج

منال - ها لا ماقصد بس اكول نزاكه بعد تعرف
بنت هل وكت يدلعن

نور - ضل يباوع عليه الدكتور ماعجبه
كلامها كلت بكَلبي رجال غريب وضاج
من كلامج الله يساعدني شلون متحملتج

الدكتور - راح اكتبلها ادويه خلي تستمر علي وادفي نفسها زين وسلامتها

منال - تسلم

نور - بس راح الدكتور كامت تحجي

منال - كووومي يلا كووومي خلصيني

نور - سحبتني من ايدي قوي كمت
اصيح عليها من الألم
عووووفيني شتريدين مني

منال - صوتج بنت الفكوره كومي خلي نرجع من طاح حظج وحظي مبتليه بيج

نور - هدي ايدي اني اكوم لا تسحبيني هيج

منال - عشتوووو عود نازكه عيني من امداج اي والله وامداني وكعتي براسي كلهم مرتاحين بس اني الواكعه بيها

نور - ماعندي طاقه ارد عليها كمت حسيت بدوخه
بس ماكدرت احجي طلعنا اني وهيَ وجان اشوف بتول اول ما شافتني انصدمت خطيه كبل جتي يمنا

بتول - واني نازله اشوف رعد وين صار علمود يشتري الأدوية لي امي ماكو بالمستشفى والصدمه اشوف نور رحت اشوف شبيها

شلونكم خير داده شبيج

نور - ردتت احجي حجت قبلي

منال - عيني تدلل علينه وانتو منو يدلل عليكم

بتول - والله واحنا امي كُلش مريضه وجبناها هنا

منال - يااا خطيه سلامتها عيوني

بتول - تسلمين

منال - نور يلا امشي تأخرنه من رخصتج عيني

بتول - الله وياكم بس نور شبيها

منال - عرج مايطكها شبيها احسن مني ومنج

بتول - لا خاله تره امبين عليها شوفي عيونها ذبلانه
حبيبتي نور شبيج

نور - شوي برد ماكو شي حبيبتي والحمد لله على سلامة الوالده

بتول - كَلبي تسلمين
راحو واني بقيت بقلق احس نور بيها شي
بس شنو ماعرف طلعت برا اشوف رعد
وين صار

نور - طلعنه من المستشفى

منال - اوكفي هنا اروح اشوف وين صار سهيل

نور - راحت واني جان اكو مصطبه كعدت هناك
انتظرهم  التفتت على يميني شفت واحد طويل معضل  يسحب بهل جكاير ومايلحك يجي ويروح
امبين علي التوتر الله يعلم شبي

وجان اشوف بنيه جتي حجت ويا بس ماشفت شكلها من وره كتاف الرجال انداريت اشوف منال وين صارت وجان اسمع واحد يصيح بأسمي
التفتت طلعت بتول نفسها البنيه الواكفه يم الرجال

جتي يمي وهو التفت عليه

بتول - نور حبيبتي فدوه شبيج ضل بالي عليج

نور - لا كَلبي مابيه شي

بتول - زين ممكن سؤال

نور - جواب حبيبتي

بتول - هاي امج

نور - ابتسمت ابتسامة حزن وكلت
لو هاي امي ماجان شفتيني هنا

بتول - يعني مرت ابوج لو شنو

نور - اي

بتول - فدوه والله اكول امبين قاسيه
نور امانه انتِ زينه

نور - ماعرف والله 

بتول - حبيبتي امبين عليج المرض

نور - شسوي الحمد لله

بتول - ليش بعدج هنا

نور - انتظر زوج منال يجي علمود نرجع

بتول - ماشي دير بالج على نفسج

نور - حبيبتي تسلمين
راحت يم نفس الرجال وكفت بعدين ركزت
علي هذا هو نفسه الشفته اليوم بتول تحجي ويا
وهو كل شوي يلتفت عليه ويدخن اني ماهتميت التفتت لطرف الثاني شويه وجتي منال وزوجها
بالتكسي كمت شوي شوي امشي وصعدت ورحنا للبيت طول الطريق اباوع عل سما من الجام مال سياره واكول يارب ماريد ارجع للبيت وياهم بس ماكو شي بيدي يارب احفظني يارب

____

رعد - منو هاي الرحتي حجيتي وياها

بتول - قصدك نور
هاي جوارينه الجدد

رعد - يا جوارين

بتول - هذا البيت القديم المتروك
هما سكنو بي

رعد - اها اي مو اكول اول مره اشوفها
شبيها

بتول - خطيه مرت ابوها امبين وحده
مو زينه الله يعلم شصاير وياها لو تشوف عيونها
شلون ذبلانه سوده عليه

رعد - ليش وين اهلها

بتول - ماعرف اني عبالي هاي امها بس
طلعت مرت ابوها وماعرف ذاك الرجال
ابوها جان لو لا بس يمكن زوج مرت ابوها

رعد - صفنت بيني وبين نفسي
تذكرت هيَ نفسها الشفتها اليوم جوه المطر تصلي وتدعي اخذت نفس من السيجاره ومركز نظراتي
عليها دارت وجها لطرف الثاني

بتول - يبووو نسيت امي يلا روح جيب هاي الأدوية وتعال لا تتأخر

رعد - ماشي
رحت شغلت السياره دورة صيدلية صيدلية
بزور لكيت الأودية رجعت للمستشفى

بتول - سيف عود باجر من نطلع خلي الدكتور
يكتبلنه نظام غذائي صحي

سيف - اي اكيد

بتول - جنا واكفي وجان يجي رعد

رعد - هاي الأدوية

سيف - عاشت ايدك اروح اشوفه لدكتور

رعد - ماشي روح

حيدر - اكلكم شو ابويه اخابره جهازه مغلق

احمد - اي يجوز خلصان الشحن خابره على
موبايله الثاني

حيدر - نفس الشي مغلق

تبارك - الله يستر بس لا صاير ويا شي

حيدر - ضل بالي لان نادراً يغلق موبايله

بتول - يمعود تفائلو شنو السالفه ان شاءالله
مابي شي يجوز ضايج وغلقه لان يعرف راح
تخابرو

احمد - صح

رعد - ابتسمت
بس اني العرف وينه هسه
اي ياعمران كما تدين تدان

_
_______
في مكان اخر

عمران - طلعت من البيت ضايج
اااخ يارعد لو تعرف شسويت بنفسك اااخ
شغلت السياره ورحت يمهم اعرف هسه
كلهم مجتمعين اول مادخلت كلهم التفتو
عليه بنظرة غضب اجه صوته كال

الباشا - اكعد ياعمران

عمران - بلعت ريكي وكعدت

الباشا - ليش تأخرت

عمران - ازدحام باشا

الباشا - شنو الصار

عمران - والله حالي حالكم مو ذنبي الصار
حجه واحد منهم بغضب

- لعدددد ذنب منوووو

الباشا - هدوووء

عمران - كلهم سكتو التفت عليه وكال

الباشا - احجيلي السالفه وبسرعه

عمران - باشا والله ماعرفت هيج راح يسوي
والله حالي حالكم وصلني الخبر
حجه واحد منهم

- عمران ليش وشنو السبب ادخل بشغلنه

عمران - ماعرف حالي حالكم
حجه الثاني

- هو ضابط بجهاز مكافحة الارهاب
واكيد عرف شغلنه من خلال عمله

- لااني اشوف الموضوع موضوع ثار

الباشا - اذا ثار او مو ثار هو ماعنده شي ويانه
الا اذا السالفه تكون يم عمران

عمران - توترت من هيج كال
ركز على عيوني وكال

الباشا - ها عمران ليش ماتحجي

عمران - م م ماعرف

الباشا - ماتعرف لو تغشم روحك
زين تعرف مقابل الصار يمكن
راح تدفع ثمنه حياتك

عمران - مسحت وجهي بال كلينكس وكتله
ذكرو الله يمعودين كتلكم حالي حالكم
ماعرفت هيج راح يسوي

الباشا - موشغلي المهم واحد من عائلتك السبب
انت تعررف كمية البضاعه الحترقت شكد هواااي جانت تعرف لو ماتعرف

عمران - اي اعرف وشنو تريد اني حاضر

الباشا - ددددم اريد دم مقابل الخساره الراحت

عمران - بلعت ريكي وكتله
د دم منو باشا

الباشا - دم الجان السبب

عمران - بس شلون اجيبلك دمه

الباشا - اذن تدفع مقابل هاي الخساره
800،000،000 دولار أمريكي باجر

عمران - انصدمت بكلامه كتله
تم اعتبر من باجر المبلغ يمك

الباشا - جيد خليها ابالك هل مره عديتها على خير مره الجاي دمك ودمه مايريح كَلبي فهمت وخلص انتها الاجتماع

عمران - خلص الاجتماع واني الوكعت بيها
سهله يارعد اني الك وولك اني هيج تسوي بيه
اذا ما اخليك تدفع الثمن غالي ما اسمي عمران

طلعت شغلت السياره وفتحت الموبايل
اشوف حيدر دازلي رسائل خابرته رد

حيدر - بويه وينك انت ضل بالنه عليك

عمران - عندي شغل شتريد

حيدر - امي بالمستشفى

عمران - شنووو ليش شبيها

حيدر - من وره مشاكلكم صار بيها
نوبه قلبيه

عمران - كله من وره رررعد بسيطه
اني اله انتو وين هسه بيا مستشفى

حيدر - مستشفى ال..... هناك الطابق الأول

عمران - ماشي دقائق واني يمكم

حيدر - ماشي بويه

___

بتول - راحو حيدر وسيف ماعرف وين
وبقينه اني وتبارك واحمد

ورعد طلع برا يدخن
رحت كعدت يم تبارك خليت راسي
على كتافهَ صافنه على حالنه كتلها
تبو شتكولين رايحين للأسوء او الأحسن

تبارك - العلم عند الله حبيبتي محد يعرف
غيره شراح يصير بينه

احمد - احنا ليش مو مثل الناس

تبارك - اااخ ماعرف

بتول - تعرفين صديقاتي بالمدرسه كلها حاسدتني
على انو بابا منصبه بارز ومعروف وبيتنه وحياتنه وفلوسنه حلوه بنظرهم واي شي اطلبه يوصلني مايعرفون حال الظيم حالنه

تبارك - حتى اني كلها تكول حياتج احسن منا وحياتج هيج وحياتج هيج

بتول - اتمنى نكون مثل عائلة صديقاتي
واحد يحب الثاني واحد يساعد الثاني واحد
يفرح الثاني بالبساطه لا عندهم مشاكل ولا شي

والقهر مو هنا القهر عندهم هيج عوائل حلوه
ويكلولي ماعندنه حض قابل حضنه مثل حضج
كلشي تريدي يجرالج

تبارك - ااااخ صدك فتحتي جروح كَلبي
هاي مشكلة الأكثر من الناس عبالهم كلشي فلوس
لحظه وحده ويه العائله تسوه الملايين

احمد - ههه هاي انتو هم هيج لعد اني
تعالي شوفي اصدقائي حاسيدني
ها احمد بعد شتريد ارقه جامعه وملابس
وسياره وفلوس عبالهم السعادة وراحة البال
كلها بالفلوس والقصر ماكو انسان كامل
وحياته كلها سعاده كلمن وعنده نقص
في شيء معين

تبارك - اي والله صح كلامك بس يشوفون
الخارج ومايعرفون شديصير داخل البيت

بتول -  تبو بالفلوس كلشي نشرتي بس
مانكدر نشتري راحة البال والسعادة ويه العائله
تخيلي وصلت مرحله اتمنى اعيش مثل رنكين
بنت خاله سعديه هما هم كومه ولد وبنات وشوفي حياتهم شلون واحد يحب الثاني بس احنا كله مشاكل مانصدك شوي نفرح تصير مشكله
اكبر من الراحت

نزلت دموعي واني احجي مسحت دموعي
وباست راسي وحضنتني

تبارك - لا ياعمري ليش تبجي الحمد لله ونبقى احسن من هواي ناس ان شاءالله كلشي يتصلح
حبيبتي تفائلي

احمد - اي يمعود تصير سوالف تفائلو

بتول - بس اريد امي تكوم بسلامه ماريد شي ثاني

تبارك - تكوم وتسويلها حلويات حلوه من ايدج
ونضحك وياها وتفرح بتخرجكم انتِ وسيف واحمد

احمد - والله شكلي هاي السنه اعيد 

تبارك - بعدك بالبدايه ليش ولك

احمد - ماعرف من وره المشاكل وين الحك ادرس

بتول - اني هم خايفه اعيد الخامس

تبارك - انجبو وبلا كلام زايد ماكو نعيد ومانعيد
درسو ونجحو وفرحو امي وياكم

بتول + احمد - ان شاءالله

بتول - واحنا دنحجي وجان يجي بابا

عمران - هاااي شنو شصار وين امكم احجوو
شصاير

تبارك - بابا حبيبي اهده شوي خلي نفهمك

عمران - ليش وشلون هيج صار شلونها هسه
فهمووووني

تبارك - بابا فدوه لكلبك منا الناس مرضه مايصير نزعجهم مو كافي انفضحنه من وره رعد
وانوب انت

احمد -  عيب والله منا الوادم وين مانروح
ننفظح

عمران - كله مننننه ااااخ كله منه هيج صار ويه امكم اني اله ااااني اله راح يدمرنا بهذا عناده
الحقير

بتول - اجه سيف خطيه يركض يريد
يسكت ابوي واني اضحك علي وعلى حركاته هههه

سيف - اااخ منكم فضحتونه الله عيب
صوتكم منا الناس كلها مرضه

عمران - شلونها امكم احجو الصدك

بتول - تحت المراقبه بعدها

عمران - قسماً عظماً اذا صار بيها شي
رعد موته على ايدي هاي كتلكم

تبارك - اذكر الله بويه شنو السالفه
ان شاءالله مايصيرلها شي

حيدر - هاي شكو صوتكم طالع
ها بويه انت بخير

عمران - ووووولكم قسماً عظماً اذا صار بيها شي
رعد اموته

حيدر - صوتك يمعود كول يا الله شبيكم

اكلج تبارك هذا العلاج مالها
تعالي اعلمج عل جدول ولازم
يكون منتظم بعد اخوج ماشي

تبارك - اي اكيد خويه

_

رعد - طلعت برا ادخن وبالي يم امي
وافكر بكلام بتول غمضت عيوني
اااخ لو تعرفون السالفه ماجان لمتوني
بالي جاي اسوي ويه عمران

دك موبايلي اشوف منو طلعت ريتاج
كُلش مالي خلكها جاوبتها

ها ريتاج خير

ريتاج - حبيبي شوكت تجي تأخرت

رعد - ليش منو كلج اليوم اجي ناطيج خبر راح اجيج

ريتاج - لا بس كلت اكيد راح تجي

رعد - ريتاج مالي خلك كلش
ومااكدر اجي بالمستشفى يم امي شوي تعبانه
فا لا تنتظريني

ريتاج - زين حبيبي تجي باجر شتاقيتلك فدوه

رعد - اذا ما صادفني شي ميخالف اجي

ريتاج - ماشي كَلبي انتظرك دير بالك على نفسك

رعد - خوش
سديت الخط والله يرادلج خلك هل كبره
خلصت السيجاره ورحت اشوف امي
شلون صارت وجان اشوف عمران هناك
سويت نفسي ماشفته ورحت يم حيدر

هابشر

حيدر - لا زينه الحمد لله

رعد - الحمد لله اذا ترجعون رجعو اني وتبارك
نبقى يمها

بتول -  لا عيني لا ما اقبل واني شنو ارجع للبيت مستحيل

رعد - بعد اخوج رجعو وباجر ان شاءالله نرجعها ويانه

بتول - لا لا ما اعوف امي وحدها

حيدر - كلا رعد صح رجعي ويه احمد وسيف
وكافي عناد رجعو عندكم درس

بتول - تبووو احجي شي

تبارك - والله ياحبيبتي كلامهم صح رجعو
انتو واحنا نبقى

بتول - برطمت من قهري رحت يم ابويه كتله
ها بابا تبقى لو ترجع ويانه

عمران - لا بويه راسي موتني مصدع ارجع وياكم
حيدر تبارك دير بالكم على امكم واي
شي يصير بلغوني

حيدر - ماشي بويه

تبارك - تدلل فدوه اروحلك

عمران - يحفظكم الله بويه وين
سيف نرجع ويا

حيدر - هسه راح يم الدكتور
اروح اشوفه

عمران - ماشي بويه

بتول - بقينه 5 دقائق ننتظر استاذ سيف
ضليت مركزه على بابا ما يلتفت على رعد نهائي
وذاك نفس الشي دعيت ربي لا يحرمني منهم
ماكدر اعيش بدونهم ثنينهم احبهم الله يهديهم ويصلحهم اجه سيف رجعنه للبيت غسلت ايدي وجهي وتوضيت ورحت صليت ركعتين دعيت رب العالمين يرجع النا امي بخير وسلامه
وبعدين نمت

__________
في مكان اخر

نور - رجعنه وطول الطريق لا حجيت ويه منال ولا ويه زوجها اول مارجعنه رحت توضيت علمود
اصلي صلاة الليل رحت لغرفتي وقفلت الباب
وفرشت السجاده وصليت وادعي وتنزل دموعي تمدتت عل سجاده وكتله ربي نور مالها غيرك اني يتيمه يارب يتيمه مالي غيرك ربي ماعرف شنو ادعي ومن وين ابدي كل الي اعرفه اني مالي غيرك يارب كمت ابجي وادعي طلعت كل الي بكَلبي الربي حسيت براحه مو طبيعيه شويه اذن الفجر صليت

ورحت تمددت اباوع على السقف وكانما شريط ذكرياتي ويه عائلتي فيلم وديمر كدامي دموعي تنزل  مشتاكه لي امي وابوي احس نفسي محتاجتهم شويه ونمت

كمت الصبح الحمد لله خف الألم لان انطاني ادويه هم زين اشترتلي منال الأدوية رحت للمطبخ احضر ريوك كامت منال جتي للمطبخ

منال - اكول البومه بومه يابويه حيه ام راسين
كلشي مايصير بيج

نور - شوفي اني ما ارد عليج بس عندي نصيحه
الج لا تشبهين الانسان بالحيوان لان مايجوز
رب العالمين خلق الإنسان في احسن تقويم

منال - عشتووو تعلمني الحرام والحلال بنت الفكوره

نور - نصيحه ثانيه بنت الفكوره قصدج اهلي واهلي صارلهم سنين ميتين اظنج سامعه مقول
اذكروا محاسن موتاكم واهلي ماجانو فكر
مثلج علمود هيج تحجين

منال - هييييي شو ماخذج الواهس انجبي
نسيتي ليش ملفيتج ويانه ااااخ لو بس قابل اخلص منج جان راسي ارتاح

نور - استغربت من هيج كالت
شنو منو قصدج

منال - مو شغلج كملي الريوك

نور - حسيت كلامها غريب شنو قصدها

كملت الريوك وزوجها الأفندي طالع لشغل كملت شغل البيت حتى سالفة الدراسه ماعرف شصار بيها رحت اغسل الحوش جتي تصبغ اظافرها بالحوش هو منو ماخذ دور الثاني

منال - اكول اليوم العصر نروح لبيت جوارينه

نور - ياجوارين

منال - الشفناهم البارحه بالمستشفى

نور - اي

منال - عود سوي كيكه مرتبه قابل نروح ايدنه فارغه مايصير

نور - ضحكت على كلامها صدك ضحكتني
طلعت تعرف بال اصول

منال - ضحكينه وياج ست نور

نور - خربت من الضحك انوب اريد اسكت ماكدر
غسلت وجهي بالمي وهم ما فاد

منال - عابت ماتحجين على شنو تضحكين

نور - الصراحه غير عليج اضحك

منال - وليش يمه شبيه طنطل كدامج

نور - هههه لا بس يعني اكول هم طلعتي تعرفين بال اصول

هيج كلت وخربت ضحك وجان النعال تكرمون انشمر عليه

منال - من طاح حظج شوكت اخلص منج
وتضوج من اكول بنت الفكوره من امداج

نور - يكول المثل مو كلمن صخّم وجهه كال آني حداد انتِ الحبيتي تعرفين على شنو اضحك

منال - صخام بوجهج يا ادبسزز من عابت الا عابت خرب الصبغ من وراج وجه الفكر

نور - راحت جوه واني لفيت الشال على راسي وطلعت اغسل كدام البيت شويه ومرت سيارتينGMC سوده مضلله وكفت يم بيت بتول فتحو الحراس الباب ودخلو جوه يمكن جابو امهم
المريضه خلصت الغسل رحت كملت الغده

اذن الظهر صليت وتغدينه هم زين زوج منال كال ما ارجع للغده عندي شغل الحمد لله شوي اخذت راحتي بالبيت كملنه غده ورحت اسوي
كيكة الشكولاته كُلش طيبه اسوي
تعلمت من سوزان واني اعشق شي
اسمه صناعة المعجنات والحلويات

سويت ثنين واحد النه واحد لبيت جوارينه
ورحت سبحت ومشطت شعري ولبست فستان
لون زيتوني واني بيضه كُلش حلو طلع عليه
لفيت الحجاب لون اسود وخليت مرطب
ومسكاره بسيطه ويه مرطب شفه بس
هو بي لون سحري وردي بناتي حلو
يبين طبيعي

وخليت منا شوي على خدودي صارن شوي حمر واني بيضه طلعت كُلش حلوه تعطرت
وهسه تمام رحت اخلي الكيك بصينيه
شوي حلوه تكون جتي منال التفتت عزه هاي
شمسويه بنفسها جاره الكحل شعرضه جوه عينها
ولابخه وجها لبخ اساس وخاله حمره لون احمر
ولابسه عبايه لون بنفسجي شلون رهمتها ماعرف ههههه اليشوفها يكول رايحين لعرس مو زيارة مريض كتله واني كوه لازمه ضحكتي

منال شمسويه بنفسج

منال - حلوه مو

نور - لا والله اصلاً تخوفين

منال - دنجبي منيلج ذوق اسأل منو من امداني

نور - ههههه الحمد لله والشكر
صدك الكال العقل زينه

منال - يلا يلا مو وكت فلسفتج خلي نروح ونرجع
قبل لا يرجع سهيل حبيبي اكيد هسه تعبان

نور - اخذت الكيكه وطلعنه جانو واكفين
الحراس

منال - الله يساعدكم عيوني

الحراس - اهلاً حجيه

نور - هما هيج كالو واني خربت ضحك
هههههههه التفت عليه

منال - بسيطه اعلمج بالبيت
وانت عيوني بعدني شابه منيلي حجيه كوه
تكبرون الواحد المهم الاخت جوان رجعت مو

الحرس - اي

منال - خوش احنا جاين يمها زياره

الحرس - بس حضرتكم بيت منو علمود ابلغهم

منال - ها اي كول جوارينكم الجدد
وهما يعرفون

الحرس - ماشي ثواني بس اشوف

نور - راح شويه ورجع كال

الحرس - حجيه انتو بيت نور

نور - استغربت من وين عرف اسمي
التفتت عليه منال

منال - منين عرف اسمج من اكول مو راحه
: اي عيوني بيت نور عشتوو

نور - اخذ الموبايل وكال

الحرس - اي ست بتول هما ماشي تدللين
تفضلو

نور - اول ما فتح الباب انصدمت بمساحة بيتهم
ونظافته يلمع لمع وبيتهم طلع 3 طوابق مو طابقين اني مامنتبها وكُلش جبير التفتت على يميني حديقه جبيره وكله مرتبه

منال - عزه عزه شنو هاي ولج هذا بيت لو مول
المنصور

نور - كولي ما شاءالله

منال - ليش اشفتيني عيني وصخه احسد

نور - لا بس داكول لازم نكول ما شاءالله

منال - امشي مو صوجج صوج اليسمعج

نور - طلعت نفس الشاغله مالتهم جتي
استقبلتنه

تيلا - مرهبه ماما بتول جوه ينتظر انتو

نور - اباوع منال بعدها فاكه حلكها مصدومه

منال - اكلج

نور - كولي

منال - ولج ذوله عدهم خدم وحشم
اي عيني الخير يخير امبين مريشين وربي

نور - بالعافيه عليهم هسه شلون راح نبقى هنا

منال - دمشي امشي شكد تحجين

نور - اني لو انتِ
دخلنه جوه جتي بتول واختها استقبلونه

بتول - ياهلا ياهلا عيني اكول منو نور البيت

تبارك - هلا بيكم داده ياهلا تفضلو

منال - بالمهلي عيوني زاد فضلكم

نور - منال راحت ويه اخت بتول واني انطيت الكيك لبتول

حبيبتي هذا كيك اني سويته ان شاءالله يعجبكم

بتول - يااا داده ليش متعبه نفسج فدوه لعمرج

نور - لا كَلبي ماكو اي تعب الف عافيه

بتول -يممه امبين طيب اني كُلش احب هاي الشغلات حتى داعلم نفسي

نور - اي شي تحتاجين تعالي كليلي
تره اني فنانه بالمعجنات وبالأخص بالكيك
والحلويات

بتول - يمه فدووه امبين والله لان انتِ
احلى كيكه ما شاءالله عليج

تعرفين شنو قطعي الكيك واني اروح
اجيب القهوه بالمطبخ الثاني علمود تيلا تسويلنه القهوه هسه ارجع

نور - ماشي حبيبتي
راحت  بتول التفتت شلون مطبخ جبير
مثل المسلسلات التركية جبير واثاث راقي
ما شاءالله

تيلا حبيبتي

تيلا - نعم ماما

نور - ممكن سجينه اقطع الكيك

تيلا - اي ماما هذا سكين

نور - شكراً
قطعت الكيك طلعت الشاغله مواعين

واني داخلي الكيك بالمواعين واحجي ويه الشاغله وجان اسمع ورايه صوت خشن بي بحه اول ماسمعت الصوت حسيت بقشعريرة تجري
بدمي

رعد - ..............................................

_
_
______________
يكول

اخذ دمي حبر
لو خلص حبرك
واكتب قصيده
واشرحلي عذرك 
لازم كَلبي بيدي
وكاعد انتظرك
تانيتك تجي وماجيت
بس لو اعرف شمصبرك
واكف كل كياني وروحي تتلكاك

دكات الكَلب تحسبلك اللحظات
وعيني معلكه اعله الباب تنتظرك
لحظات انت عندك وانه عندي سنين
شوكت تجي وتبرد كَلبي المسكين

مختلط بقلمي         ✍

___

قلبييييييي انتوووووو البارت القادم
نار بعد اكثر من هذا 🙈🔥

تفاعلكم يحفزني اكتب البارت وانزله اسرع
ويوميه دنزل بارت والله مدللتكم 😌

وكتلكم اذا اكو تفاعل وتعليق بين الفقرات
ينزل البارت اسرع واطول قلبي وصلو هذا البارت اقل شي 200 تعليق وعتبرو البارت ال12 نزل
ان شاءالله

لا تنسون التصويت بالنجمة
شاركو الرواية ويه اصدقائكم اهلكم يلي يحب القصص دزولهم خلي يقرون وياكم

وبارت القادم راح يكون  كُلش حلوووووووو

حسابي انستجرام انشر هناك
كلشي يخص الرواية👇

_

حسابي واتباد
يلي مامتابع تابعو حتى يصلكم كل جديد

Jehan-Stories

ثقلو ميزان حسناتكم بذكر الله

"""""""""
سبحان ألله
ألحمد لله
لا إله إلا ألله
ألله أكبر
"""""""""

#خلف القضبان روح يتيمة
#بقلم الكاتبه جيهان آغا