#خلف القضبان روح يتيمة
#بقلم الكاتبه جيهان آغا
_
قبل مانبدي صلو على سيدنا محمد
( اللهم صل على سيدنا محمد وعلى ال محمد )
ولا تنسون تفاعلكم يحفزني
اكتب البارت وانزله اسرع
قراءة ممتعة ياقلبي
______
نور - لا كَلبي ماكو اي تعب الف عافيه
بتول -يممه امبين طيب اني كُلش احب هاي الشغلات حتى داعلم نفسي
نور - اي شي تحتاجين تعالي كليلي
تره اني فنانه بالمعجنات وبالأخص بالكيك
والحلويات
بتول - يمه فدووه امبين والله لان انتِ
احلى كيكه ما شاءالله عليج
تعرفين شنو قطعي الكيك واني اروح
اجيب القهوه بالمطبخ الثاني علمود تيلا تسويلنه القهوه هسه ارجع
نور - ماشي حبيبتي
راحت بتول التفتت شلون مطبخ جبير
مثل المسلسلات التركية جبير واثاث راقي
ما شاءالله
تيلا حبيبتي
تيلا - نعم ماما
نور - ممكن سجينه اقطع الكيك
تيلا - اي ماما هذا سكين
نور - شكراً
قطعت الكيك طلعت الشاغله مواعين
واني داخلي الكيك بالمواعين واحجي ويه الشاغله وجان اسمع ورايه صوت خشن بي بحه اول ماسمعت الصوت حسيت بقشعريرة من صوته
رعد - رحت اشوف تبارك وين لان احتاجيتها
بشي وجان اشوف بنيه واكفه ظهرها عليه
بويه مو بنيه صاروخ منو هاي
جانت واكفه تقطع كيك اول مره اشوفها يمنا استحيت اسئلهَ انتِ منو بين عليها التوتر اول ماسمعت صوتي
تيلا وين تبارك
تيلا - يم ماما كبير
رعد - اي روحي صيحيها
تيلا - حاضر بابا
رعد - واني داريد اطلع وجان اسمع صوت شي انكسر رجعت اشوف شكو اول مادخلت صفنت عليها شلون تضرب على خدها ضربات بهدوء وتحجي ويه نفسها ماخليتها تحس عليه ابتعدت شويه صفنت على رموشها وعيونها وحواجبها لو ايدها واصابع ايدها الجنهم اقلام من كد النزاكه مدري شصار بيه لاتقدمت ولا تراجعت ضليت ثابت بمكاني وعيوني تراقب تصرفاتها والشفايفي
الصافن عليهن ومامركز حتى شنو تحجي
نور - عززززه العزاج يانور وين انطي
وجهي شكد عيب وفشله ياربي والله ماجنت
اقصد ليش ازحلك من ايدي من امداني خلي
اشيله عزه هسه شتكول عليه البنيه يجوز مواعينهم غاليه اااخ نور وين ماتروحين
لازم يصير شي وياج
واني داشيل الكزاز التفتت وجان اشوف نفس الرجال واكف وصافن عليه اتوترت حس عليه وكال
رعد - انتِ زينه
نور - ها
رعد - بويه انتِ زينه
نور - ماعرف ليش توترت كتله بارتباك
اي ز ز زينه
رعد - بويه عوفي الكزاز هسه تيلا تنظفه
نور - ها
رعد - اكول عوفي الكزاز هسه تيلا تنظفه
نور - لا لا اني انظفه عادي
واني داحجي ودخلت بتول
بتول - جبت القهوه
هاي شنو منو كسر الماعون
نور - شكد فشلت كتلها
بصراحه اني جداً اعتذر ازحلك من ايدي
بتول - يااا حبيبتي يروحلج فدوه داده
اهم شي انتِ زينه ياعمري
نور - اي زينه
بتول - اي اهم شي
عوفي الكزاز هسه تيلا تنظفه وتعالي نسوي القهوه سوا
نور - ماشي
التفتت اشوف الرجال بعده واكف ويباوع عليه
بتول - ها خويه محتاج شي
رعد - ها اي شسمه
انوب نسيت شردت استغفر الله
بتول - رعد خويه
يااا شبيك صافن محتاج شي
نور - التفتت علي ضل صافن عليه ويحجي
ويه اخته نزلت عيوني في الأرض
رعد - ها اي مو تبارك اريد تبارك محتاجها بشغله
بتول - يم امي والضيوف هسه اصيحها
رعد - ماشي صاعد فوك اني
بتول - ثواني وتكون يمك
رعد - ماشي
صعدت فوك وكل شويه اذكر شكلها
شبيك رعد ماشايف بنات استغفر الله
بس والله نازكه وحلوه منو هاي
رحت لغرفتي اكمل شغلي عل لابتوب اندك الباب
تفضل
تبارك - هلا خويه
رعد - هلا بيج بعد اخوج تعالي بس
سوي وياي الكمبيوتر
تبارك - مو تدلل
رعد - بس لا عطلتج
تبارك - لا ماعندي شي جنت كاعده يم
امي وجوارينه
رعد - خوش اكلج تبارك
تبارك - كول خويه
رعد - هاي البنيه منو
تبارك - يابنيه اها قصدك نور بنت جوارينه فد حبابه تنكرط كرط
رعد - بصوت ناصي
بس تنكرط اله تشل الحال شل
تبارك - كلت شي
رعد - ها لا خويه كملي شوفي يمكن اكو
قطع هنا لو اني مخربط
تبارك - هسه اشوف
رعد - احجي بكَلبي
يعني هيَ نفسها الشفتها البارحه صاروخ مو بنيه
شبيك رعد متكلي شبيك چنك ماشايف بنات لعد جدي يوميه بالملا.هي استغفر الله ياربي شجاني مسحت وجهي شو عركت ( تعرقت) وحتريت
تبارك - ها خويه شبيك صافن
رعد - منو صافن
تبارك - انت
رعد - لا وين صافن افكر بشغل
تبارك - خوش شوف ماكو قطع هنا
رعد - اي زين
سوينه الكمبيوتر و راحت تبارك
واني طلعت الأوراق وبديت اشتغل بيهم
______
بتول - اكلج حبي تعالي نروح نكعد وتيلا تكمل
القهوه
نور - ماشي
رحت وياها لغرفة الضيوف انصدمت شنو هاي
الغرفه كُلش جبيره وكلها تماثيل الصقور واسد
بكل زاويه مخلين وتخم ملكي ذهبي وثريات ذهبيه كبار تخبل خالين 3 ثنين صغار وحده جبيره كُلش بالنص كُلش حلو ومرتب ما شاءالله رحت سلمت على امهم
شلونج خاله الحمد لله على السلامة
جوان - هلا يمه الله يسلمج حبيبتي
نور - كعدت يم منال جتي بتول كعدت يمي
وجان منال نفتح موضوع الزواج
منال - عيوني شنو نسميج ام منو
جوان - ام رعد
منال - الله يحفظه الج
والله يا ام رعد بنات مسؤوليه بهذا الزمن
انتِ شايفه المشاكل شكد كثرانه
جوان - اي والله صدكتي بس داده
الزينه زينه حتى لو عفتيها بين مية رجال
والموزينه مو زينه والله لو حبستيها بغرفه
منال - اي بهاي صدكتي
زين ام رعد جم بنيه وولد عندج
جوان - والله ياداده عندي 4 ولد و2 بنات
منال - الله يحفظهم عيوني شنو دارسين
جوان - تسلمين داده
الولد عندي رعد الجبير ضابط بجهاز مكافحة الارهاب
وحيدر استاذ جامعي بجامعة....
وسيف طالب طب عام بعده يدرس
احمد طالب كلية قسم علوم الكيمياء
والبنات عندي تبارك الجبيره مدرسه ادرس المرحله الاعدادية وتشتغل بمنظمات دوليه
واصغرهم بتول طالبه بعدها خامس ادبي
منال - شكد حلو كلكم واصلين ومريشين
نور - هيج كالت كرصتها حست على نفسها
منال - ها هههه اقصد زين مكملين دراستهم
الظاهر ماعندج چنه
جوان - لا والله ياداده مايقبلون يزوجون يكولون
من احنا نشوف بنت الحلال المناسبه نبلغكم
خطبوها
منال - الله يرزقكم جناين حلوين مثلكم
زين عيوني زوجج شنو يشتغل
جوان - مسؤول بالدوائر الحكومية
من غير المجماعات والشقق العنده
بأربيل
منال - بصوت منخفض/
الله يعلم شنو يشتغل اكول هذا القصر مو خالي بلاش
جوان - كلتي شي داده
منال - ها لا عيوني ماكلت شي
بتول - عاد خاله سئليها تحبين منو اكثر بين جهالج اعرف ماراح تختارني
منال - هههه ليش ياخاله ترا الأم ماتفرق
جوان - اي والله فهميهم
منال - كلهم هيج عيوني حتى بناتي
بتول - لا والله تحب اخوي رعد اكثر كلنا
منال - هههه الظاهر عنده حظ يم امج
بتول - كُلش
جوان - والله ياداده احبهم كلهم جهالي
على كولت اهل الكيوت حشاشة يوفي
بس ابني رعد من صغره تعبان وشايل مسؤولية خواته واخوانه طبعه حنين كُلش
منال - الله يحفظهم الج عيوني وتفرحين
بيهم ان شاءالله
جوان - امين وانتِ داده هاي الحلوه بنتج مو
منال - لا اني بناتي
بالموصل مزوجات هاي بنت زوجي المرحوم
جوان - الله يرحمه وانتِ تربيها
منال - اي والله عيوني من صغرها اربي بيها
وهسه كبرت مافرقة بيوم بينها وبين خواتها
احسبها مثل بنتي تصدكين احبها اكثر من بناتي
جوان - الله يجازيج الخير الام يلي تربي مو الي تخلف
منال - اي والله ياعيوني احبها اموت عليها
نور - احجي بكَلبي
ها شجاي تخرط وتسفط بالجذب والقهر المايعرف
يصدك اااخ بس لو تجون وتشوفون الحقيقه حال الجلب حشه السامع احسن من حالي وياهم ماكول غير حسبي الله ونعم الوكيل عليهم وعلى خالاتي وعماتي الذابيني هاي الذبه
جوان - وبناتج البقيه كلتي مزوجات
منال - اي عندي ثنين سوزان وشهد
جوان - الله يحفظهم
الموصل حلوه
منال - اي بس اخر فتره الأمان مو شي بصراحه
يوميه عبو.ه طاكه يوميه واحد ارها..بي مف.خخ روحه
جوان - اي صدك دوم يطلع بال اخبار
منال - اي
نور - جابت الشاغله الضيافه
ومنال وخاله جوان يحجون واني وبتول
جنا نحجي عل حلويات وشلون يطلع الكيك مرتفع وهش وجان تنزل تبارك اختها
بتول - ها شراد رعد
تبارك - ماكو شي هاي مال كمبيوتر يشكل
ساعدته
بتول - اي خوش
تبارك - حبيبتي نور ليش ماشاربه القهوه
نور - هسه اشربه
التفتت اشوف منال ناسفه كلشي
انصدمت عزه بعينج فضحتينه
تبارك - نور عمرج شكد حبيبتي
نور - 18 سنه
تبارك - العمر كله حبيبتي طالبه مو
نور - اي سادس بس من تحولنه
بعدني مامداومه
بتول - قدمتي اوراق النقل
نور - اي اختي قدمته
تبارك - اي شي تحتاجين تعالي كليلي
وان شاءالله ماقصر وياج
نور - حبيبتي تسلمين كلامج جداً كافي
منال - احنا نكوم عيوني مانريد انتعبج
الحمد لله على السلامة
ماشوفين شر
جوان - ليش بعد وكت
منال - لا عيوني انتِ هم تعبانه
نشوفكم بخير ان شاءالله
جوان - هلا بيكم داده البيت بيتكم شوكت ماتجون نورتونه هلا بيكم
نور - الحمد لله على السلامة خاله
جوان - يابعد روح خالتج تسلمين بنيتي هلا بيكم
نور - كمنا علمود نطلع وجان ينزل نفس الرجال
لابس قميس اسود لازك على عظلاته وجينز اسود ونظاره سوده وساعه فضيه مر من يمنا ريحة عطره ترس المكان شكد قوي عطره
اجه يم امه باسها من راسها وكال
رعد - يمه اني طالع اذا تأخرت لا يضل بالج عليه
جوان - يمه فدوه اروحلك لخاطري لا تتاخر
رعد - ماشي تدللين تبارك بتول بويه
اهم شي النظام الغذائي الصحي مو تنسون
وتبارك موعد الأدوية مو تنسين بعد اخوج
تبارك - اي اعرف سيف كلي عل مواعيد روح خويه لا يضل بالك
بتول - خويه لا توصي حريص
رعد - ماشي يلا يمه اروح اني
جوان - الله وياك يابعد كَلبي الله يحفظك يايمه
نور - عيوني في الأرض وصافنه على طريقة كلامه ويه امه وخواته من صدك تمنيت لو جنت اخته لو كلمة بويه من كالها احس نزلت دموعي صارلي سنين محرومه منها رفعت راسي التفت عليه واندار وطلع ولا سلم علينه كلت بكَلبي شدعوه السلام لله
على صفنتي وجان منال تسحبني
منال - يااا شبيج صافنه دمشي تأخرنه
بتول - هههه حتى بصفنتها حلوه
نور - ها اي
حبيبتي تسلمين انتِ الحلوه
واحنا دتنطلع صعد بسيارته السوده
فتحوله الباب الحراس راح واحنا رجعنه
للبيت اول مارجعنه ومنال ماسكتت كله شفتي بيتهم شفتي اثاثهم شفتي حياتهم شفتي وشفتي وشفتي صار بيه صداع من كد ماتحجي بيهم
لحد ماكالت
منال - شفتي ابنهم النزل شكد حلو وهيج شخصيه
ذوله شنو واحد ضابط والثاني دكتور والثالث استاذ جامعي والاب مسؤول مدري وين نيال التصير جنتهم ولج نيالهم على هذا البيت شكبره اي حظوظ هذا اليكول حض الجلحه والملحه
نور - يااا شبيج ترا البنات والأم وحده احلى من الثانيه على ياجلحه و ياملحه تحجين وبعدين كولي ما شاءالله والبيوت اسرار منو يكول مرتاحين بهذا القصر
منال - لج بابا عقلج شنو انتِ وليش مامرتاحين شعدهم حياتهم احسن حياة يلعبون لعب بالفلوس
انتِ ماشفتي ماعرف جم سياره بالكراج عندهم وحراس وخدم وحشم بيت سياح نياح على كولتهم بعد شكو اااخ حضي ماكعد بال اثنين ابوج الفكر الفكرني فوك فكري لو سهيل الحافي منتف
شبيه مااخذتلي هيج واحد من امداني
نور - تعرفين شنو بس اكول الله يهديج
كلامج كله غلط بغلط ومايجوز هيج تحجين
منال - اكوول روحي حضري العشه بلا كلام زايد يلااااا
نور - عفتها ورحت للمطبخ
سويت معكرونه وبطاطس وباذنجان وفلفل
وقطعت طماطه وخيار وكرفس وبصل يحبو منال وزوجها سويت عصير برتقال اذن رحت توضيت وصليت خلصت فرشت السفره شويه واندك الباب
راحت منال فتحته طلع زوجها رجع
رحت لبست حجاب الصلاة كلت احسن مستور
اول مادخل اجه للمطبخ ضل يباوع عليه بسرعه طلعت من المطبخ رحت لغرفتي تعشو هيَ وزجها خلصو يلا طلعت من غرفتي رحت سويتلي لفو جبن ومربه اكلت بالمطبخ خلصت وبديت اغسل المواعين وماحس غير اجه زوجها على اساس يغسل ايده عل سنك بسرعه ابتعدت
سهيل - على كيفج يمعود قابل متحرش بيج
هيج فزيتي هههههه
نور - ما جاوبته ردت اطلع كال
سهيل - تعالي كملي مواعينج نيال المواعين
هيج ايدين حلوه تغسل بيهم
نور - ماجاوبته بسرعه طلعت برا والخوف يجري بدمي
شوي وطلع من المطبخ يلا رجعت اكمل مواعين
ابد ما ارتاحله والله ماعرف وين انطي وجهي
هسه لو بس اعرف وحده من خالاتي لو عماتي بيتهم وين والله اخدمهم واعيش يمهم
بس اخلص من منال وزوجها
خلصت مواعين ورحت لغرفتي قفلت الباب
رتبت الملابس ولملمت الغرفه
اباوع الغرفه فارغه مابيها غير دوشكين
وسلة ملابس حتى السرير مالي باعته منال الله لايوفقج دنيا وآخره كلش باعت ومابقتلي شي جان عندي سرير وكنتور صغير (خِزَانَة) باعتهم وانطتني
سله اخلي بيها ملابسي حسبي الله ونعم الوكيل عليج يامنال
رحت فرشت السجاده وبديت اقره بالقرآن
كملت رحت اتمدد اول ماخليت راسي عل مخده
تذكرت من رحت لبيت بتول تذكرت اخوها
من جان يكله بويه وشلون يحجي وياهم
نزلت دموعي وكلت يارب اني ماعندي احد
يكلي بويه يارب اجبر بخاطري يارب
دعيت ونمت
________
في مكان اخر
رعد - طلعت من البيت خابرت ركان
ركان - هلاااا بضلع الماينشلع
رعد - هلا بيك شلونك ارعن
ركان - اييي يكول الشاعر الفلان الفلتاني
صافن وافكر بيك وشاربلي كولا كلما
اريد انسك انحصر ...افهما انت بعد
رعد - من طاح حضك وحض اشعارك ههه
ركان - اعجبك
رعد - هسه طلعت من البيت
تعال نروح لفد كوفي شي نغير جو ضوجه
ركان - ماشي اكول لعُمر يجي ويانه
رعد - اي كله خلي يجي
ركان - ماشي يلا اكوم ابدل
رعد - خوش
سديته وشغلت اغنية لا تسولف علينا من يسألون عيون الناس لا تحسد عشقنا وضليت ادندن شوي ودك الموبايل اهوووو هاي ريتاج
جاوبتها
ها خير
ريتاج - حبيبي وينك
رعد - بره ليش
ريتاج - شوكت تجي والله مشتاقتلك
رعد - اليوم اذا صحلي مجال اجيج بالليل
ريتاج - صدك اموووت عليك
انتظرك مو اطول عليه فدوه
رعد - ماشي اشوف
سديته ورحت للكوفي شويه واجوي عُمر وركان
ذوله ضلوعي بس هما اثق بيهم لو اكلهم الروح يكولون لعيونك ترخص كعدنه نحجي ونحشش ونضحك رحنا لمول المنصور نغير جو واشترينه ملابس وعطور رحنا للمطعم ناكل مرو بنات فاتحت شعرهن ولابسين ملابس استغفر الله عبالك كلشي مالابسين كد مالازك على جسمهن
ركان - بوووويه هاي تموت
رعد - كول تجدح جدح اويلي يابه
عُمر - هههه والله عيب عليكم تباوعون على اعراض الناس
ركان - خاب دنجب ياعرض
ذوله هنا عارضين نفسهن حتى الناس تشوفهن ياعرض تحجي بي
رعد - لا شوف هاي امل الأصفر بوويه شني من بنيه تجدح
ركان - اي لو هاي الشعرها اسود
بوويه ترعط رعط
عُمر - صدك جذب رياجيل شكبركم شواربكم
تارسه وجوهكم شبيكم والله عيب عليكم
ركان - يعني سؤال بربكم الهيج يلبسن شنو
يقصدن غير يعني تعالو شوفوني واحنا دنشوف
عُمر - دنجب شنو تشوف من طاح حضك
رعد - تره صدك كلام ركان هنا هيج يلبسن
حتى واحد مثلي ومثل ركان يباوع عليهن
عبالهن انعجبنه بيهن مايعرفن لو نموت ما
ننعجب بهيج نوع من البنات بس هيج نباوع
عليهن هنا غير عارضة روحهن احنا شكو
عُمر - بابا مايصير بهاي الطريقه تشوفهم حتى لو هنا هيج يسون هنا وربهن ينجازون بس انتو هم عليكم ذنب مايجوز الله سبحانه وتعالى كال
( قُلْ لِلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَلِكَ أَزْكَى لَهُمْ ) يعني اكثر من هذا الكلام شتردون ولو منين تعرفون انتو اكص ايدي اذا واحد بيكم خاتم القرآن ختمه وحده
ركان - دنجب انجب كل رمضان خاتمه
بس رعد ماتوقع حتى يعرف يقره ههههه
رعد - اي مو انت درست بمكاني واني ماجنت اعرف
عُمر - لا صدك رعد ماتقره القرآن
رعد - الصراحه لا ماقاري
ركان - شكتلك تلكه من زمان المدرسه
لحد هسه ماقاري
رعد - استلم سوه نفسه شيخ براسي
اي مو جدي اضيعه الكه بالملا.هي
ركان - غير انت علمتني هههه
عُمر - رعيد ضلعي حاول تقره صدكني ترتاح
ركان - دخلي يصلي مثل الوادم يلا انوب
يقره القرآن
عُمر - لا ان شاءالله يصلي رعد خويه
راجع نفسك صدكني بالأخص الي مثلنه
الموت قريب علينه ومحد يفيدنه غير أعمالنا
لا رتبه ولا راتب ولا منصب بعد اخوك طريق
ربك اهم من كلشي
رعد - ادعو الله يهديني
ركان - امين ويهديني وياك
عُمر - امين
رعد - اباوع لساعه صارت بال9 اكلكم شباب
اني اروح عندي شغل
ركان - اي احنا هم كافي نرجع
عُمر - اي نرجع ليش لا
رعد - ضلوع اشوفك باجر في أمان الله
ركان + عُمر - مع السلامة
رعد - طلعت من المول خابرت امي
شوي وردت
هلا بالعافيه
جوان - هلا بيك يايمه وينك شوكت ترجع
رعد - يمه بيني وبينج عمران موجود لو لا احجي
الصدك
سكتت شوي وردت
جوان - اي موجود
رعد - خلص لعد اني ما ارجع و عندي شغل
لا يضل بالج
جوان - يااا يمه شلون يعني ماترجع بالليل
رعد - لا يايمه ارجع بس اتاخر نامي انتِ
لا يضل بالج
جوان - فدوه دير بالك على نفسك بعد امك
رعد - والله تدللين انتِ اخذتي الأدوية
جوان - اي تبارك وبتول كل شويه وحده منهن
تزق بحلكي حبايه
رعد - هذا المطلوب
يلا يمه اني اروح لا يضل بالج
جوان - الله يحفظك يايمه
رعد - ويحفظج ياتاج راسي
سديته ورحت خابرت ريتاج
ريتاج - ها حبيبي وينك
رعد - نص ساعه واني يمج
ريتاج - ماشي انتظر ياكَلبي
رعد - خوش
سديته شغلت اغنية لا تسولف علينا من يسألون
ضليت ادندن ويه كلمات الاغنيه شويه وصلت صفيت السياره وصعدت كبل لشقه دكيت الباب
وجان تفتحلي الباب صافن عليها شمسويه
بنفسها عضيت شفتي اشتعلو اهلج يا ريتاج
شمسويه بنفسج
ريتاج - ههههه ولو زوجي يدلل
عيوني تروحله فدوات مو بس فدوه
رعد - سديت باب الشقه
خوش خوش غزل وكذا
ريتاج - اي غير يستاهل حبيبي
رعد - اي هو مال استاهل استاهل هههه
ريتاج - يمه
فددديت ضحكت سيادة الضابط رعد
متعشي حبيبي
رعد - اي
ريتاج - لعد اروح اجيب الفواكه
والنمنميات
رعد - ماشي
راحت للمطبخ واني شغلت التلفزيون
خليته على فيلم جابت الفواكه وكعدت
ريتاج - اكول حبيبي
رعد - كولي
ريتاج - بعدك ضايج مني
رعد - لا
ريتاج - فديتك اعرف كَلبك طيب
شلون صارت امك
رعد - الحمد لله احسن
ريتاج - اي دومها
حبيبي مشتاقتلك هوايه
رعد - خوش
ريتاج - وانت
رعد - اني شنو
ريتاج - ما اشتاقيتلي
رعد - مشغول من مشكله لمشكله بحال الشوك
جتي كعدت يمي وبأطراف اصابعها تتلمس
بوجهي
ريتاج - خوش مالاحظة شي متغير بيه
رعد - الصراحه حيل حليانه
ريتاج - ههههه اعرف
بس مامتغير شي بيه ركز
رعد - انتو سوالفجن النسوان محد يفهمه غيرجن
شنو الشي انتِ كولي ماعرف
ريتاج - ياا رعدي تره امبين ركز شوي
رعد - شو تقربي اركز اكثر
ريتاج - ههههه بطل سوالفك
رعد - اي غير علمود اركز
ريتاج - اي صدكتك
دشوف شعري صبغته اسود علمودك
رعد - علمودي صدك تعالي شنو جان لونه
ماذكر
ريتاج - ياااا حبيبي شبيك
جان لونه احمر
رعد - ناسي بس حلو الأسود عليج
ريتاج - احبك والله اعشقك مو بس احبك
مشتاقتلك رعدي
_
_
________
في مكان اخر
بتول - جنا كاعدني كلنا عائلياً
اجه بابا بعده ضايج ومايحجي هواي
اي حيدر الخبيث شصار بموضوعك
حيدر - عليمن خبيث طولج شبر وهيج لسانج شطوله
سيف - ههههه هاي قويه
بتول - يمممه شوفي شلون يتنمر عليه
جوان - يشاقه حيدر يمه بطلو
شقاكم الثكيل
احمد - بتول ابشرج يكولون 99% من الشقه حقيقيه و1% شقه هههههه
سيف - صدك هههه
بتول - بعد سودو ملفه يمي
احمد - ملفه لو مهفه ههههه
سيف - الظاهر محتر بعد اخوك ههه
احمد - كلشش ههههه
حيدر - دنجبو انجبو قشامر
بويه ليش ساكت
عمران - نعسان اكوم انام
حيدر - ماشي اخذ راحتك
بتول - كام ابويه حتى ماحجه ويانه
ماحب اشوفه هيج اااخ لو بس اعرف شنو الشاغل بالك
احمد - اكلكم ساعه بال11 وين رعيد
بتول - اسكت اااخ منك لازم تحجي ماتعرف تسكت
احمد - ليش شكلت بس لابعده بره
بتول - يبوو ولك علمود امي اسكت
جوان - ياااا صدك رعد اتأخر
بتول - ارتاحيت
احمد - شمعرفني بعده ماراجع
جوان - حيدر يمه خابره شوف وين صار
حيدر - ماشي حبيبه
بتول - يمه تلكي طالع ويه جماعته
حيدر - راح تصير ب12 ياطلعه ياصخام
بتول - سكتت
خابره حيدر
حيدر - ها وينك
لا وينك بضبط
يامول راح تصير بال12
رعد وينك احجي الصدك
زين شوكت ترجع
وليش شنو المناسبه
امي تكول خلي يرجع
ليش لا ارجع اهووو بكيفك مالي شغل
ولك مو اني امي تكول لا مالك شغل بي لخاطر امك شبيك ماشي سلملي على ركان ديلا روح
جوان - ها يمه شنو امي تكول شكو
حيدر - مايرجع يبات يم اصدقائه
جوان - شنووو اااخ هذا الولد راح يخبلني
حيدر - لا يضل بالج حبيبه اهتمي بصحتج
وبس
بتول - صدك يمه باقي اخر حبايه
اخذيها وكومي نامي فدوه لكَلبج
جوان - ورعد
حيدر - شبي رعد يايمه اليسمعج يكول
طفل زلمه شكده شكبره
جوان - اااخ يايمه لو شكد ماتكبرون تبقون
بعيوني اطفال
بتول - يمه هاج اخذي الحبايه وكومي نامي
ماشي يايمه
بتول - اخذت الحبايه وراحت
و كلمن وراح لغرفته بس اني وتبارك اثنينه
بغرفه وحده وغرفنه كلها فوك بس مال
امي وابوي جوه
شربت مي وصعدت فوك لغرفتي
عدلت السرير ورحت اسد البرده
دخلت تبارك كعدت عل لابتوب
اكلج تبو
تبارك - كولي حبيبتي
بتول - اليوم ابوي كلش ماله خلك
تبارك - اي والله سوده عليه انقهرت علي
بتول - اااخ ماعرف شوكت نعيش مرتاحين مثل
الوادم
تبارك - من مشاكل رعد وابوج تخلص وقتها
نعيش براحه
بتول - اي والله
تبارك - نامي وراج مدرسه
بتول - رحت بستها
اي تصبحين على خير يااحلى اخت
تبارك - حبيبتي وانتِ من اهلو
بتول - نمت وماحس غير ضوه الشمس
تارس الغرفه اباوع الساعه بال8 التفتت اشوف تبارك بعدها نايمه كمت غسلت وجهي نزلت جوه اشوف بابا كاعد عل لابتوب بيده اوراق رحت بسته
صباح الخير ياحلو
عمران - هلابوردة بيتي صباح الورد بويه
بتول - شلونك اليوم
عمران - لا زين الحمد لله
بتول - دومك نبع الحنان وينها بعدها نايمه
عمران - يمكن ماعرف روحي شوفيها
بتول - ماشي
رحت دكيت الباب محد رد معنى نايمه
فتحت الباب اشوفها نايمه رحت حضنتها
وبستها من خدها
نبع الحنان كومي كافي نوم يلا كومي نتريك
تحجي ومغمضه عيونها واني ضحك عليها
بنظري امي احلى والطف ام بالكون كله
جوان - اي اي روحي انتِ
بتول - نبع الحنان ماعوفج كومي احسلج
يلا علمود تتريكين وتاخذين العلاج
جوان - ماشي يمه روحي جايه وراج
بتول - ماشي
رحت عل مطبخ ها تيلا خلص الريوك
تيلا - اي ماما
بتول - روحي رتبي عل طاوله اروح اكوم البقيه
تيلا - حاضر ماما
بتول - رحت كومتهم واحد واحد طلعو روحي لحدما كامو التمينه كلنا على طاولة الطعام
بس كرسي رعد جان فارغ شويه وسمعنه صوت سيارته
جوان - هذا اكيد رعد اااخ منه يعني بات برا
راح يجلطني
حيدر - يمه لا تضوجين غير ويه أصدقائه
عمران - اي كلش
بتول - سمعنه صوت ضحكه ويه الحراس التفتت اشوف ابوي ضاج وجان يدخل والضحكه شاكه حلكه
رعد - صباح الخير
الكل ماعده عمران - صباح النور
جوان - فدوه اروح لهل طول يايمه
ليش مارجعت البارحه
رعد - فدوه الج حبيبه
اي مر الوقت وماحسيت
جوان - اااخ منك يارعد
رعد - كمت بست راسها
حبيبه سلامتج من ال اخ
بتول - كعد تريكنه كلنا واستغربنه هاي اول
مره نخلص الريوك بدون مشاكل ابويه حتى مايلتفت على رعد ورعد ولا مهتمله
وجان يكول حيدر
حيدر - يمه ان شاءالله بهل يومين حاولي
تروحين تشوفين البنيه الكتلج عليها
احمد - واخيراً راح نخلص منك
حيدر - دنجب قابل كاعد على كلبك
جوان - يمه شفتها سألت عليها
حيدر - اي والكل يكولون خوش ناس وخوش
بنيه
جوان - بيها الخير يايمه ادلل
بتول - هلاااا يعني صارت صدك
راح يصير عندنه عرس
تبارك - لازم احضر الفستان من هسه
بتول - فدوه خلي نروح لسوك اليوم
يادوب نلحك
حيدر - هوب هوب شبيكم
على كيفكم صبرو خلي نروح نطلبها رسمي يلا عود
انخبصو
بويه شنو رائيك انتَ
عمران - سوي الي تريده بعد ابوك
واي شي تحتاج تعال كلي وماقصر وياك
حيدر - تسلم الله يحفظك النه
رعد - يلا دايمه اني طالع
جوان - وين يمه
رعد - اروح اشوف تعميرات المجمع الحترك
اشوف العمال وين وصلو
حيدر - لا اتعب نفسك اني مرتب كلشي
رعد - ميخالف خويه اشوف وين وصلو
قبل لا التحق
حيدر - براحتك خويه
جوان - يمه الله يحفظك حبيبي دير بالك على نفسك
رعد - ادللي ويحفظج الي يالغاليه
يمه مثل ماكتلج اهم شي الأدوية فدوه اروحلج
اخذيهم بأنتظام
جوان - ماشي يمه
رعد - صعدت فوك لغرفتي بدلت وتعطرت
اخذت الموبايل والمحفظه وطلعت توني شغلت السياره وصلتني رساله عبالي ركان
فتحته اشوف مكتوب
-لا تثق بالنار مرات النار تحرك صاحبهَ ............
_
_
_______________
يكول
ألك بالكَلب سهم
مو سهم سهر ولا سهم وحرب
سهم آه
وسهم ونه
وسهم نار
وسهم جنه
وسهم حبك فلا منه
وسهم عشك وتعب
وسهم النار والحطب
وسهم العشك الدخل الكَلب
وسهم بعدك الحرك سهم سهمي
بقلمي مختلط ✍
_
تتوقعون في اي سهم يقع قلب رعد ؟
قلبييييييي انتوووو والأحداث القادمه 🔥
تفاعلكم يحفزني
اكتب البارت اطول وانزله اسرع
لا تنسون
التصويت بالنجمة
تعليق بين الفقرات
وتفاعلكم مع الرواية وصلو البارت اقل شي 200 تعليق وينزل البارت ال13 على تفاعلكم اذا اكو تفاعل يوميه ينزل اذا ماصادفني ظرف معين
شاركو الرواية ويه اصدقائكم اهلكم يلي يحب القصص دزولهم خلي يقرون وياكم
وتعالو يلي مامنزلين الرواية في المكتبه بعدهم شنو تنتظرون 😑 روحو بسرعه نزلوها قلب قلبي انتوو 🤗
وتابعو حسابي انستجرام
انشر هناك كلشي يخص الرواية ونزل إعلان الرسمي البارحه روحو شوفو👇
وحسابي واتباد تابعو يلي مامتابع
حتى يصلكم كل جديد
Jehan-Stories
والان ثقلو ميزان حسناتكم بذكر الله
"""""""""
سبحان ألله
ألحمد لله
لا إله إلا ألله
ألله أكبر
"""""""""
#خلف القضبان روح يتيمة
#بقلم الكاتبه جيهان آغا
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!