#خنجر_الغضنفر
#البارت_الأول_١
#حنين_حاتم
نايمة وحسيت احد يفزز بية
فتحت عيوني مخروعة
شفت شكل شخص فوك راسي
سدت حلكي بيدها ويم اذاني همست
كومي كومي وياي بساعج.
وين تردين بية
هسة ؟
اي هساع لازم تكَومين دتعاي برة نحجي لاتوعين امج واختج
كمت وياها
بباب لغرفة سدتها وتهمس الي
لغضنفر ناويلج على نية كَشرة
ليش شسويت
ماادري مساع اجة من برة وسمعتة يحجي وي قيصر ويكَلة خطارنا دكَو بينا لناقصة وعضو لأيد لشالتهم من ضيجتهم ونقذتهم من الموت
وبعد ماعرف شنو حجو
بس قيصر دزني وكَالي بساعج تنزليها الي برة يتانيج
تعاي هوة يفهمج
مشيت وياها ورجلية يرجفن
معقولة كشفوني
نزلت وياها نتخنس ونتختل بين لزرع
وصلنة يمة
همس لكشمشة
راح اوصلها للبيت القديم رجعي على امها واختها كليلهن يحضرن روحهن ساعة واجي اطلعهن انتي فهميهن لمهربجي وصل ولفجر يطلعهن واذا سألن عليها كليلهم مشت وياي كَبلهن علمود شغلة اوراق ومستمسكات وضلي يمهن ناطري لاتخلين احد يحس ولا تخليهن يشكن بشي
كشمشة اعتمد عليج ساعة زمان واجي الكَاهن جاهزات
فهمني شصايرر
ليش هيج تحجي ووين تردون بية
عصر ايدي حيل
انتي شردتي من الموت صح
اي
تردين تعيشين
طبعا
تردين اهلج يطلعون غانمين ومايمسهم سو
اكيد
امشي وياي ولتحجين ماسمعلج نفس
مشيت ويا مثل لعمية
لمكان اضلم
لأشجار متداخلة ببعض كأن غابة
ماجنت اشوف اي ملامح للمكان وكد مامشينة احس جاي نفتر بنفس لمكان ونرجع لنقطة لبداية
لحد ماوصلني لبيت من اجينة كشمشة كالتلي علي مسكون
وسولفتلي علي شغلات توكف لعقل
يجر بية يريد يطببني
جريت ايدي منة
وين تريد بية
تريدني اموت
هذا لبيت مسكون ترة ادري بي
ضحك
معليج بكشمشة هذا لبيت كلشي مابي
موبس كشمشة كل بناتكم يكولن مسكون وحتة جدتك كالت
معليج بيهن مابي شي امني
مااطب
وقت ماعندي اكعدي هنا شوية واجيج
جريت ايدة
شصارر كلي ليش هيج شردتني بسكوت
جر نفس طويل وكال
لانكار ميفيد بعد اعرف كلشي
بس لتخافين الج لأمان ماخليهم ياذوج
مشة وعافني رغم صحت علي وتوسلتلة وبجيت
بسد لشجرة كاعدة ولامة رجلية لصدري وحاضنتهن وراسي مدنكتة وابجي
اني بيمن ورطت نفسي
عاينت على ساعتي عبرت ال١
وينة وين صار
معقولة صار علي شي وتأخر
موكالي ربع ساعة واجيج
صوت لذيابة تعوي جماعة تنادي على جماعة
وصوت لحشرات ولضفادع خلاني تحولت لقوقعة
لبكَ يكرص بية كلسا اصفك جزء من جسمي كد ماللسعة قوية
ولبيت لوراي بي ضوة يشتعل ويطفة
ساعة بطيء وساعة علسريع
ولجو بي برودة خفيفة
بقيت ابجي منتضرتة وجامدة بمكاني
ياربي هونها اجينة حتة نهاجر عن طريقهم ودكَولنا صدر وكالو تعبرون ومايمسكم سوء
هسة تحولو علينا وحوش وراح لوعد ودكَة لصدر كلشي نسو
امي واختي هسة شحالهم
من بعيد اسمع صوت احد يركض
تقرب الي يلهث ثنة جسمة وكال
اهلج نرهنو ماكدرو يشردون
شنوووووو
ماما وانغام شلون شنو نرهنو
اخذهم لغضنفر رهينة لحد مايعثر عليج
وكفت على حيلي
واني شمسوية
ترة حتركَت اوراقج وعرف لغضنفر كلشي وحتة لساعدوج عرفهم
دموعي نزلت وبإستسلام كتلة
رجعني قيصر
ارجعج
تحجين صكَد
شرجعج مرهونة دم انتي !!
اهلي مالهم ذنب رجعني
اني الي تسببت بكل هذا
امج جبيرة بلعمر واختج طفلة يجوز يرحمهم انتي مايرحمج افهمي
رجعني اترجاك لتناقشني ولا تحاول تقنعني
رفع شعرة ليورة وكال
كومي يخطار لنحس دولبتينة بيومين دولباج لبين كون
مشيت ويا مخنوكة وبس صوت شهكاتي يرد على صوت لذيابة لتعوي
رايحة لموتي برجلية
امي واختي مااكدر اعوفهم مااكدر
دموعي تجري
والوم بروحي
شسويت بنفسي وويامن ورطت روحي
تقربنة للبيت عيوني علي من بعيد
كان صرح عمراني ضخم
بيبانة وشبابيكة ولزخارف وكلشي بي على لطراز لأسلامي لقديم
والي فهمتة من بابا انو لبيت عائد لأحدى عوائل البدون (غير محددي الجنسية) ومن صاير الترحيل صاحب لبيت اهدا لجدهم ونتقلو بي
بيتهم بصفة هم ماقاصر بيت حلو صح قديم بس فخم ومرتب
وكفت ارجف وعيني للسمة
ياربي انت تعرف بنيتي شنو
اني ردت اخلص روح
تالي ورطت روحي واهلي
وكف يم لباب دك لجرص وحجة بلحاكية ليم لجرص كالهم انة قيصر ووياي لرهينة
نفتحت لباب ودخلنة اني ويا
وكفت ابجي وامي واختي على كتر
اختي تبجي وامي تصفك ايد بإيد ويعاينلي بعدم رضا
عاين على قيصر واشرلة علية
برتباك رد علي قيصر
لكيتها لابدة بلخرابة وجبتهة
اهاااا لكَيتها
تقرب الة طبطب على كتفة وجهة بوجها وكالة
اضن انة كلت ليعثر بيها يكتلها بمجانها
شنو يكتلها غضنفر اكو عرف عشائري ويتطبق عليها احنة مانطلبهم دم على اي اساس تنكتل
والله وكمت تحجي بلأعراف
هلمرة لعرف يخدم مصالحك
سبع يبن امي سببببع
قيصر يبلع ريكَ ماحجة
جانو جدة وعمامة واكفين كلمن سلاحة بيدة وولدهم طاشين بلمنطقة يدورون علية
بلكَاع سجدت يم رجلين جدهم وصرت ابجي خجلانة مستحية من عندة
عمي احنة خطاركم هيج تسوون بضيفكم
مودكَيتولنا صدر وكلتو تعبرون ومحد يضركم
مو وعدت بابا وكتلة بأمانتي يعبرونو
احنة ضيوفكم عمي
غضنفر من يمة حجة
ضيوفي لماحشمو بيتي
ضيوفي لضيعو ماي وجهييييييييييي
جازفت بنفسي وسمعتي حتة اطلعكم من الموت وهيج تجازينة
لاغلطان والله غلطان
من جيبة طلع ورقة وحطها بيدي وصرخ
اي غلطان
قريتها جانت رسالة بخط ايدها تذكرلهم بيها انو هية عبرت لمحافضة وتكللهم انو ميتعبون نفسهم ويدورون عليها
عيوني تجري وشفافي ترجف
حجيت كآخر محاولة حتة ابريء نفسي
ماكو شي بهلرسالة يثبت انو اني الي مهزمتها
تقرب الي غضنفر بلكاع كمبص وايدة تتلمس لحيتة وكال
عبرة لحافضة يبت كربلاء ماتكدر عليها بتنة وهية عايبة ومايوم عابرة لوحدها عبرة لمحافضة تريدلها وحدة عدها معارف
رفع تك حاجب يقصدني الي
دنكت وكتلة
شنو لمطلوب مني ومن اهلي
تدلينة مجانها تمشون انتي واهلج غانمين ومايمسكم مخلوق
دنكت شدليهم وهية وصلت وعقدت على سنة الله ورسولة
بقيت بحيرة حسمت امري بأن اخدرهم بكلام الى ان اوصل اهلي لبر لأمان وشيصير وياي خل يصير
ادليك بمكانها بس بشرط
اللهم طولة لبال
شرطي
اشوف اهلي يعبرون لحدود بعيني ووراها احجيلكم مكانها
امي صاحت
انعام لتحجين بكيفج منطلع من هلبيت اذا مو انتي ويانة
فض لكلام ونتها كلشي وكلمن طب وقررو يوم ثاني يعبرون اهلي على طريق همة يندلونة ومعارفهم يعبروهم بلبساتين
لجابنة هنا اكبر من انو اتمرد ولمصيبة لطيحت روحي بيها ضيعت كل حق الي
اخذتنة مرت عمهم ام فدعم طببتنا للغرفة وقفلت لباب علينة ونزلت
بقيت من لشباك اعاين الهم
جانو قيصر وثنين من ولد عمامهم بلكاع كاعدين ويمهم تنكة بيها فحم وعليها قوريين جاي وللصبح يشربون جاي
وبعيد عنهم كاعد غضنفر ونفس اللمة يمة مانامو
وكأن فريقين ناس تكره ناس
ماطبو للبيت يخافون انهزم
بقو للصبح يتناوبون جماعة تنام وجماعة تحرس
تمنيت يغلبهم لنوم
تمنيت يطبون للبيت
امي للصبح تبجي وانغام تسكت بيها
عشاير وناس عدهم لحمة ومتكاتفين واحنة لوحيدين بلعراق
لاعم ولاخال
وبابا راح بضرف يوم وليلة
حتة ماشفنا ولا ودعنا
نباك من نص بيتنا بليلة ضلمة وماعرفنا عنة كلشي حتة جثة ماستلمنا
ونحبسنة بعد وفاتة ١٧ يوم قريت على لدنيا لسلام وكلت ايامنة معدودة
لحد مانقذنة الله عن طريقهم
ماعرف جدهم شنو شغلة بس الي ادري بي مركزة هوة الي شفعلنة وهوة الي خلصنة من مصير مجهول
بعد مانعدم بابا قررنا الرحيل ونلتحق بلأهل ولأحباب الي اغلبهم ترحلو على الحدود السعودية العراقية بلمخيم
بس طلعتنة صعبة حيل صعبة لأن خروجنا من السجن جان موقانوني
الي فهمتة تلاعبو بأوراقنة وبدلو شي مكان شي وكدرو يخلصونة
من وصلنة لبيتهم جدهم حجالنة شلون بابا متوسل الة ورايد يبوس ادي بس حتة يخلصنة
من دنك راسة ودمعة لمعت بعيونة وكال
ابو نغم خويي وصاحب عمري
امنكم امانة يمي وكالي
عايلتي امانة بركبتك مارتاح بكبري الى ان توصلهم لخوالهم
بقينة يمهم معززين مكرمين
وجانو منتضرين شخص يطلعنة كلك من معارف غضنفر
ولسوء لحض تأخر هلشخص شهر وبقينة بهلشهر يمهم شفنة لعجب ببيتهم
يمكن امور عدهم عادية بس عدنا شيء صعب تصديقة
صار لصبح ودبت لحركة بداخل لبيت لنسوان بلمطبخ ولبنات علتنضيف والتعزيل وكل وحدة لازمة اخوتها لزغار لبيت يغص ويبلع بلأطفال
عمامهم كلهم متزوجين ثنين
وجدهم متزوج ٣
بقت لغرفة مسدودة علينة لحد لساعة ٨ لصبح وامي تلوب سكر عدها ومتتحمل تريد تدخل لحمام
بعد ماختفة صوت صياح زلمهم وتذمرهم على كلشي
نفتحت لباب ركضت عليها تمنيت يطلع قيصر
صارت بوجهي وحدة من بيبياتهم
جانت ملامح امرأة سومرية عز نضيرها
لدك تارس وجها وتقريبا معانيها مختفية وسط لتجاعيد تنتجي على طفلة زغيرة من حفيداتها
صبحت ووجها معبس
دخلت جوة جانت امي كاعدة على سجادتهة وانغام ايدها على خدها
كعدت وتوجهت بكلامها الي
شوية ويجي صميدع ياخذ اميمتج واخيتج
وانتي تحضري ترحين وي غضنفر تدلي بمجانها
بلعت ريكَي ان شاء الله حجية
امي تبجي وتحاجيها
يعني بس تدليكم وتلحكَنا ؟
اي
خطاكم لسو يبنيتي
ليش دخلتي نفسج بسوالف زلام
خالة هذا لصار بعد موبيدي نكسر خاطري عليها
محمود مشكور ربي
نكسر خاطرج عليها ششفتينا نجلد بيها
خاب هية هاي غير عزيزة لغضنفر
ياعزيزة خالة غير شفتة يدفن بيها وبس راسها طالع
ضربت صدرها
وانتي علمود هاي شردتيها
لعد شنو شوية هاي غير دفنها للطفلة
اخ اااااخ
ضربت رجلها حييل وكَالت لحفيدتها
كومي خايبة راح يسكت كَلبي حباية اللسان بساعج
تقربت امي الها تفرك بصدرها واني اعاين الها نتهت وجهها بهت
نطتها حباية اللسان وكامت كوة تتوجة علطفلة وطلعت برة مدري شتحجي
اقل لساعة واجت كشمشة كَالت نطني جنطجن
نطتهن امي الها وودعتهن ونزلن
بقيت ابجي
واعاين الهن من لشباك
وامي تلتفت الية كلسا وتوكف وتجرها كشمشة
لحد ماصعدن لسيارة يلله جريت النفس
بقيت انتضر منهن اتصال من لحدود يبلغني انو هنة وصلن وسالمات
ثاني يوم لفجر فزيت على اتصال امي
جانت تبجي وتكلي بأسرع وقت لحكَينا احنة وصلنة ولكينا لكل هنا وكلشي مابينا
بعدها تحاجيني ندكت لباب حيل
ووراها نفتحت وشخص بحبح بصوتة
دخل عيني منزلتها
اعاين على رجلي جان داخل بشحاطتة ويدوس علفراش
تقرب الي وصاح
كشمشة
اجتة تركض
أمر خوية
خل تلحكني
وانتي وذاك لنجر حسابكم بعديييين
طلع وتقربت الي كشمشة تبجي
انة كتلة لاتورطني وياك لاتورطني
إلة حطني بلنص عايزني ضيم انة
اني اسفة كشمش من وراي تأذيتو كلكم
خية بعد شيفيد اسفج
دليهم بجانها وتوكلي درب لصد لارد ماشفنا خير من طبيتينا تبهذلت احوالنا
كشمش هاي انتي هيج تكولين
هاي عود انتي الي تعرفين نيتي
خية انتي بطرانة وبتنة هم بطرانة
هم عايبة وهم ترفس بنعمتها
انة بمجانها ابوس ايدي وارضة بقسمتي شينة زينة لمهم لستر
هية جانت تحب لدراسة ومارادت غير حقها رادت تكمل دراسة وتحقق حلمها
يادراسة خية ياهي بينا لدرست شو هية احسنة تعرف تقرة وتكتب
ماتوكل خبز هنا لدراسة
جافادت لزلم
موهذا لغضنفر مخلص تجارة ويشتغل كاسب
وذاك قيصر معلم راتبة مدري جم الف مايكفنة كراوي
جانت ملكة هنا
شردت وخلت لغضنفر يتخبل علينة
ضيعت ماي وجهة وطيحت هيبتة بين عمامة
من زمان قبل ٢٠ سنة امها جابتلنة لعار ونطم عارها ولغضنفر عاش ايام تصعب علكافر
صار وحش موبشر
حتة عمامي ماكَدرولة
يومية رايح على وادم وداكَهم
ويومية مصيبة بني سعد دكَت وناحت من ورة لغضنفر سنيين
اذا واحد مس طفل من ويلادنة ماتلكَين لغضنفر غير مجهز سلاحة وماخذ هلزعاطيط التعربد ورا
وداكَ لوادم
يخافون من جدي ويهابو
وليومج هذا لغضنفر مايعرف شيريد
حتة جدي جان قاسي وي كل لأحفاد يسويلهم كلب ويقسا وياهم في سبيل يصيرون زلام
بس وي لغضنفر جان لين
ويتستر على شيناتة
ودومة ويا حكَ باطل هوة بضهرة
اما قيصر جان يركَع ورا
ودومهم مناكَر مايوم صفو
سامعة لمثل ليكول انة وابن عمي علغريب
قيصر يوكف وية ابن عمة ووية لغريب ضد اخو
يكرهة كره لعمة ومايواطنة بعيشة الله
رغم لغضنفر مايرضة علي ويحبة ودوم يفزعلة
اووف ياكشمشة شلون راح تصفة ماادري
وكويكة مادري شلون ارجعها وانال حريتي
جريت نفس استذكرها
جنت راجعة من لحمام للغرفة الي خصصوها النة
جانت مال قيصر وواحد من ولد عمامة
نطوها النة وهمة بقو ينامون بلديوان
اتمشة للغرفة
وجذبني رجلية لوحدة من لغرف
ولفضول يقودني اكتشف كل مكان بهلبيت قبل ميحين موعد سفرنا
وكفت كبال لغرفة اسمع صوت بكاء وونين
حطيت راسي علباب وهلصوت الة يومين مابطل يمارسون حياتهم عادي ولا كأن اكو انسانة محبوسة هنا وتبجي
بقيت واكفة يم لباب لصوت موبجي ونين مكتوم مينسمع إلة لقريب من لباب
دكيت علي دكات بسيطة
بقيت احجي من ورة لباب
منو هنا
اكدر اساعدج
حاجيني ليش تبجين
صوت لونين يزداد
بقيت احجي بلكي ترد علية متت كلبي ختنكت على صوتها حييل
تذكرت سجن
طجة وضليمتنا وذيج لأيام لجنت انوح بيهن للصبح
كعدت بلكاع وراسي علباب تجيتة
من جوة لباب اجتني ورقة مكتوب بيها
وخري منا ليأذوج
مديت ايدي من جوة لباب اطلب منها لقلم
كوة نطتا الي
كتبتلها بلورقة
منو همة وليش حابسينج هنا
معليج انتي خطار لتتعدين لغرفة هناك مجانج ولحجرتي لاتوصلين اني مصيري وراضية بي
زين كليلي ليش تبجين واني وعد اساعدج
ابجي لأن راح يبطلوني من لمدرسة وينطوني هدية
هدية ؟؟
المن
لشيخ فضلهم مشكلة ودخل طرف مصلح واني لوسيلة الي يشكرو بيها
حلو شيخ يعني خوش قسمة الي ادري بي هنا اقرانج يتنافسن على هيج قسمة
شيخ اربعيني وبراسة ٣ نسوان
عزززززة
نزيت من قريت لكلام
وليش انتي بلذات ينطوج الة
لأن عايبة
شبيج
مالج غرض بية
كتبت الها
شكد عمرج
١٥
شهكت خوف
عمري ٢٥ سنة وتعينت وشبعت براتبي وشتريت سيارة وطلعت لدنية من عيني بلونسا ولطلعات ولساني اخاف من سيرة لزواج ومسؤليتة
جانت لصالة ضلمة واضطر اخلي لورقة جوة باب غرفتها حتة اشوف لكلام واكدر اكتب
بعدني اكتب الها
ماحسيت غير على واحد فوك راسي
وبصوت عالي نتر
منو هنا
جمدت بمكاني
رجع صاح منو واكَف يم هلحجرة
انة شكَاااااااااااايل
بقيت مصنمة بمكاني وارجف
ماحسيت غير على ايد حييل ملختني من زندي ونرطم جسمي بجسمة وبأيدة لثانية يتلمس وجهي
يريد يعرف منو
واصابعة تمشي على ملامحي
ايدة خشنة وبيها مثل لنتوئات من وصل لشفافي تغيرت لمساتة وايدة ستقرت عد شفتي لسفلى
من نزلت ايدة على شعري وركبتي
دفعتة ونترت حييل
اني انعام خطاركم
بصوت هامس نتر
خطارنة شتسوي تتختل ضلماي وتتسنط ببيبان غرفنة
هية هاي لأصول يابت كربلاء ؟؟؟؟
ارجو لمعذرة
بس جنت رايحة للحمام وطفة ضوة لصالة وخفت اتحرك من مكاني نتضرت ينفتح
بأيدة ضغط لنقطة وكال
تفظلي
جان ضخم بحيث عيني ماتعدت صدرة ولاوصلت بنضراتي لوجهة
مشيت للغرفة اتعثر
طبيت عاينت امي وانغام نايمات
حاولت انام ماكدرت صوت لبنية يرن بأذاني
ليش كالت اني عايبة شبيها
معقولة موبنية
اذا موبنية شلون ينطوها للشيخ هدية
لأرق غلبني وماكدت عيني تاخذ نوم
ورة اكثر من ساعة فتحت باب لغرفة وطلعت
رحت عليها
علكيف دكيت لباب
جنت متأكدة منها كاعدة
اسمع صوت ونينها
مدت الي ورقة
شتردين مني
اريد اساعدج
شتساعديني
ماعرف انتي كليلي شلون اكدر اساعدج واني مااقصر
بقت تكتب هواي وراها مدتلي لورقة
انة احب ابن خالتي
ببغداد عايش وامة تريد تاخذة وتسافر حتة يتعالج وعرضت لفكرة على جديتي وكالتلها ازوجهم هية ويا واخذهم للخارج ثنينهم يتعالجون
وهم واحد يتحمل لثاني لأن نفس لعاهة ثنينهم
غير لو اعرف شنو هلعاهة
خايبة شمالج رعنة جا انة ليش اكتبلج بلورقة غير ماعدي صوت يعيني
فهمت انها خرسة
زين لمطلوب مني شنو
توصليني لخالتي واتزوج ابنها ونطلع للخارج هم اتعالج وهم ادرس وهم اخلص منهم
افكر وارجعلج خبر
مديت الها لورقة ورجعت لفراشي
فكرت هواااي
وعدت مدة جانت لبنية محبوسة
الي فهمتة هية معاقبة نفسها لأن رافضة لزواج من هلأنسان
يومية من الاكيها يم لحمام احس نضراتها تسألني
شقررتي
وعدت مدة اني مقهورة عليها واريد اساعدها بس اتردد وليخوفني اهلها وناسها وقريتهم
ناس تعرف ناس وكأن عائلة وحدة
جنت اقرة بكتاب اخذتة خلسة من اغراض قيصر اقضي وقت بي علما يحين موعد سفرنا
سمعت صوت يم غرفتها
خفت عليها
من ورة لباب كمت اعاين
شفت غضنفر جان شايلها بيدة وعلى كيفة يتخنس نزلها عيني تصد على وجهها من نزل لدرج لجان ضاوي
جان وجهها احمر وعيونها وارمة بكد ماباجية
تأكدت طلعو
وطلعت خنساوي وراهم
وبالي افكار تجول ... راح يوديها لبيت لشيخ
راح يزوجها بسكوت عن لكل ؟
راح يشمرها بلترعة
افكار فاكار ....
مشيت ورا تخنس وارجف خوف
جنت ميتة خوف عليها
الى ان نزلها بلكاع كبال بيتهم لقديم وهية تبجي مموتة روحها من لبجي ختلت بداخل بعتبة لبيت ماطبيت جوة جانن اكو دنك كبار مسحوب بيهن لبيت ليبرة بقيت وراهن اعاين الة
جان ينتابني خوف منة ومن لقصص السمعتها من كشمشة عنة
بدة يحفر بلكاع
الى ان سواها نكرة جبيرة وبصفها صار تل مال رمل
شالها وببطن لنكرة حطها وصار يذب رمل بس بهداوة الى ان طم كل جسمها وخلة بس راسها طالع
عاف يمها لضوة وراح مدري وين
ركضت عليها ابجي واحجي وياها
لزمت لكرك واريد احفر
جانت تبجي وتهز براسها خايفة من رجعتة
ماعوفج لتخافين
هسة اجيج راح وليوم اشردج وعد
ركضت بين لزرع اتختل
صح مسافة قريبة بس جنت مرعوبة منة ومن لضلمة وصوت لذيابة
وصلت للبيت اتختل بين لزرع جنت وحسيت علي من طلع بيدة سطل ماي خليتة مشة
ركضت لداخل لبيت ضلمة وماكو صوت
جريت لتلفون من لصالة جانن ٣ تلفونات ببيتهم مربوطات على نفس لرقم
فكرت الى ان لكيت نفسي
اتصل بزميل الي بلمدرسة لجنت اداوم بيها وجان رايد يخطبني بس من عتقل بابا ولناس عرفت انو هوة عضو فعال بلمعارضة وكان بيتنا مركز للشباب لثائر بليل خلسة يخططون ويوجهوهم هوة ومجموعة من اصدقائة الي كان الهم ارتباط مباشر بلمؤسس الاول لهذه الثورة
بعد ماتم اخماد الثورة بضرف اسابيع ونعدم بابا هوة وهواي من زملائة وترحلو اغلب اقاربنا
لولد اختفة وبعد ماشفتة
بعد ماطلعنة من لحبس تواصل وياي عن طريق صديقة وقدم اعتذارة عن لخطبة ونها كل لبينة
جنت التمس بصوتة حسرة وجنت متاكدة مجبور على هلشي مالمتة
وبوقتها طلب مني انو ابقة اطمنة عني
من فكرت اساعدها مااجة ببالي غيرة
ومن كتلة بدون تفكير وافق
ورة اكثر من ساعة رجعها جان شايلها
من لشباك شفتة
رجعها للغرفة وسد عليها لباب ماعرف ليش رجعها بس الي فسرتة بداخلي انو هددها اما توافق او يدفنها وهية حية
ماعرف شلون سويت هلشي ومن اصفن اكول شلون جازفت
شلون عبرتها من بلكونة غرفتها على لغرفة لاحنة بيها واخذتها طلعتها ووكفنة يم لمكان لمتفق علي
واجة ولد جان محمد دازة النة من معارفة الي بميسان
وراحت ويا وهية تودعني وتتشكر مني
فزيت لصبح على صوت مصايح
عاينت فراش امي واختي خالي
كمت على حيلي ردت اطلع تذكرت مالابسة حجاب
رحت لجنطتي بساع بساع نفشت لكيتلي طلعت طويل لردان لبستة وذبيت لشيلة لنطتها الي كشمشة وطلعت ادور مصدر لصوت الي ماعرف منين يجي
مشيت للصالة وعبرت لغرف وصلت للمحجر دنكَت راسي اعاين
ثنين متكَابلين شلون لديوجة كل واحد يصرخ اعلى من لثاني وكلها داير مدايرهم تهدي بيهم
ولنسوان بلمطبخ يتلاطمن اسمع بس دويهن
صرت انزل وصلت لبداية لدرج تصير كبالهم
شو لكل ندار علية
توني حسيت على نفسي صوت شحاطتي يضرب بأرضية لدرج لكَرانيت ويسوي طكَة قوية
واحد منهم إستغفر وكال
طولة لبال يارب
بقيت امشي علكيفي اريد لدرج يخلص
وهمة كل تركيزهم يمي عبالك اعزف الهم
اخر بايات دنكَت بخجل نزعت لشحاطة وسويتهن شبختين وبضهرر ماماا ختلت اداري فشلتي
طلع قيصر برة
ووكف بنص لحوش وصرخ بكل حسة
غضنغر ولسماك عضنفر إن.مالكَيت كويكة خلال ٢٤ ساعة مايخلصك مني بس ملك لمووووووووووت
لحكَة بصياح
اوكَف اوكَف
جنك نسيت كويمة مني وشنهي بلنسبة الي
لامانسيت كويكة منو ولانسيت لعاباها منو
ولانسيت ليتمها منووووو
بس ساكت مولسواد عيون واحد
ساكت لغاية بنفس يعقوب عد الله خبرها
هين يغضنفرر هيييين
والله لأخلي صكَاط بني سعد تستعر منك
ركض برة ورجع نتر بي
نطيني لسويج
واحد لازمة من ضهرة ويكَلة
قيصر هاي سيارتي برة ويدحس بلسويج بجيبة
دفعة وكالة
لا شو الة.هلسيارة
انطيني
نتر بي
قيصر اعقل وروح من وجهي لتخليني اتخبل عليك
جنت ورة ماما واكَفة امد راسي اعاين وارجع اختل من يشتد لنقاش
عيوني لوحدها ترمش وانز وية كل صيحة مثل لطفل
وعمهم يهدي بيهم ويحجي
عيب عمي انتم اخوة شني هلسوالف فرجتو لوادم عليكم حتة لخدم تضحك عليكم صكَد جذب
مديت راسي شوية واشوفهم
متكامشين غضنفر لابس ملابس عربية وقيصر لبسة عادي قميص وبنطرون
متلازمين ويتضاربون
لنسوان جوة محد طلعت يخافن
ولزلم لبرة ثنين بضهر قيصر واكفين ويهدون بي
ولباقين بضهر لأسمة غضنفر
امي تصفك ايد بأيد
طلعت برة لزمت غضنفر وكَالت الة
يمة لرحمن عمة شجاكم شصاير اخوة لو اعداء
مجرد مالزمتة بتعدو واحد عن لثاني وحسو على روحهم
غضنفر نكت روحة وصاح على اخو
بعد افضح بينا افضح
ندار على امي وكالها
لسموحة عمة صارت بوجهكم اخذي بناتج وطبو تريكَو احنة هاي متعودين على هلنكَرة
بعد تعرفين رويسية
تقرب على اخو لجان منتفض حييل ومعصب
خلة ايدة على متنة
دفعة وكَالة مَيّل عني
امشي خاب لتصير اغم هَي ارعن احنة وين وانت وين
اختنة مختفية وانت تدور ثارات
ارحمو مو حتة الله يرحم دكافي عوفو لموتة بكَبرهم وبسك حقد
دفع ايدة وكَالة
موحقد ياغضنفر
لا وروحها لطاهرة ثار
ثار وماانسا للموت بس لمسكتني هلمسكينة
تحبك ومتعلقة بيك
وراسها الغالي إن مالكَيتها بضرف يوم مايصبح عليك صبح
تهدد بية على يامال
لأن انت لدفعتها للخبال وهية طول عمرها عاقلة ومعدلة ماتطلع منها لشينة
حطيت براسها عرس وهية تخجل حتة من عدنا من امراضها
غير رضيعتي ورايد مصلحتها
هاين علية بزرها عرسن وهية هلضالة يعيرن بيها بمراضها ويسمنها لمعنسة
عافة وطلع
طبو لكل جوة
ونتشرو ولدهم وولد عمومتهم بنفس لقرية يفتشون عليها بلكي يلكَوها
ركضت للتلفون
بسكوت دكَيت كلها ملتهية
الو
ها محمد
وصلت لأمانة
وصلتها وركبتها لبغداد ومناك يتلكاها ابن خالتي بلكراج نطيتة اوصافها ونطيتها رقمة وصيتها من اي مكان تخلي اخد يتصللها بي حتة يستلمها
وياخذها للعنون لكلتيلي علي
عاشت ايدك وممنونة تعبتك
لاتعبج راحة
بس تستلمها خالتها وتتصل بيج نطيني خبر
اكيد
سديتة منة فرحانة بأن كدرت اساعدها
وخالتها وعدتها انو مجرد متوصل راح تعقد الها على ابنها
ابنها هم من ذوي لأحتياجات لخاصة
ووراه من تزوجهم تطلع بيهم للخارج بعذر العلاج ومناك تتواصل وية اهلها وتبلغهم وتحطهم امام لأمر لواقع
نززتني كشمشة من صفنتي من كالت
فضيها خية هسة يضل يصيح
نزلت وياها خايفة وماعرف شراح اسوي وشراح اكلله
وكفت كبالة جانو عمامة ونسوان جدة كاعدات
سألني
اهلج وصلو غانمين
مو لأن انتي شرطتي لا
لأن احنة مانخلف وعد
ووعدنة وية ابوج توصلون غانمين
وانتي تلحكَيهم بس دليني بمجانها
وثقي وعتقدي لوما صورة ابوج تجي بعيني ماخليج تطلعين من هلبيت بطولج
عضيتي ادينا مثل لذيب
وسفة وسفة يمن امننالج وبينة عشتي
بعدني اريد احجي واتعذر سكتني وكَال بصوت عالي اشبه بلصياح
خلصيني كويكة وين ؟
عد عدددد خالتها البغداد
شنهيييي
اييي اي هية راح تعقدلها على ابنها وتطلعها
شوصلها
اني طلعتها عن طريق معارف
وتوج تحجيييين صفك على رجلي
ولدهم وكفو على حيلهم
بساع جر لتلفون واتصل
ماعرف شنو كَالتلة صرخ بكل صوتة
انة تضيع ماي وجهي مرة
امي ماجابتنيييييييييي
تقرب الي
بلكاع حييل نزلني صرت بوضع لساجدة
ومن جورابة مدري شطلع
دموعي تجري
اشوف كلها تتوجه علية
شي حاد نحط على ركبتي مراكض اهلة وكشمشة كبالي تبجي وتصرخ لاء
وصراخة مررررعب
جان يصرخ جنت بعار صرت بعارين يغضنفررر
ااااخ بوية كسرن ضهرررررري
حسيت حرورة بركبتي وايدة تضغط حيل على متني
غمضت وشي سال على صدري
ونار تطلع منة .....يتبع
مساء لورد اعتذر عن لتأخير لبارت ٤ الاف كلمة
لقصة احداثها متعبة وتتطلب مجهود مضاعف اريد اشوف تفاعل واحب اسمع ارائكم اللطيفة 😊
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!