رواية خنجر الغضنفر الفصل الثاني 2 - بقلم Hunen23Hatum

#خنجر_الغضنفر
#البارت_الثاني_٢
#حنين_حاتم

دموعي تجري
اشوف كلها تتوجه علية
شي حاد نحط على ركبتي مراكض اهلة وكشمشة كبالي تبجي وتصرخ لاء
وصراخة مررررعب
جان يصرخ جنت بعار صرت بعارين يغضنفررر
ااااخ بوية كسرن ضهرررررري
حسيت حرورة بركبتي وايدة تضغط حيل على متني
غمضت وشي سال على صدري
ونار تطلع منة

غمضت عيوني لفاضت مدامعهن
ونطقت بثقل ومن بين رجفة سناني
اشهد انك ربي وكنت مطلع على نواياي وسريرتي
واشهد انك ماترضة بلضلم
اشهد ان لا إله إلا انت وان محمد عبدك ورسولك

حسيت شي نجفة علية بكل قوة وثقل
بلكاع نهبد وفوكي صار مطافر رجلين
وصياح صياح
صوت يصرخ لدرجة حسيت حبالة لصوتية تتقطع
نعلة الله عليك وحسافة على الحليبة لرضعناها سوة
الله يرحمك بوية لذكرى لوحيدة لضلتلنة منك تلطخت بدم البريء والمخطي

ايدي نداست برجل واحد منهم شهكت الم
صوت كشمشة يم اذاني يتمتم
صخام بوجه العدو انعام تسمعيني

وصوت مرأة مسنة
ولجن إهلا يمة إهلا
اميية
امية خل ابل ريجها بيها نفس البت مخلوسة

احس بجسم يحتضني
وراسي على صدرها وريحة المسج احس وعتني
فتحت عيني برعب
وجهي مدفون بصدرها وصوت نبضها لعالي وصدرها كلة يرتفع وينخفض
اديها تمسح بوجهي
يبت العالم لخير يضيفة لدكَو صدرهم بلأمان الج ولأهلج
حاجيني خايبة نكَطع نفسي
يمة تسمعيني نعيمة

عيوني تدقق ملامحها
نفسها جدتهم الي اجتنة للغرفة

بيدها غسلت وجهي
تقربت الي كشمشة تمسح بركبتي بشيلتها وتبجي
ويم رجلية زوري تفرك بيهن وترجف وجهن مخطوف
ولمصايح بلحديقة ماينفهم منة شي

تقربت الي ام فدعم مرت عمهم
ايدها على جرحي

يمة صخم الله وجه لعدو ربج ماحاد الخنجر
جا راحت لبت
جيبلي عدتي

حطن يمها صندوق زغير اشبه بصندوق العدة مال السيارات وصخ وقديم من شكلة نزيت وكلتلها
شدتسوين

اخيطج

فتحتة طلعت من اغراضها

خفت منة طلبت منها تعقمهن

مدري ششاورت كشمشة
شالني لغرفة جوة
بعتبتها جان محطوط فرو مال طلي
وعلحيطان روس غزلان وثعالب معلكة مخالبها واسنانها وكلشي بيها سليم
وطيور بكامل جسمها محطوطة على كومديات لجرباية
شكلها مرعب ماعرفتها بس من حجمها خمنت صقور

بقيت اعاين الهن بخوف واتخيلهن عايشات

لحد مااجت كشمشة وجوة شيلتها مدري شضامة
نطتة بسكوت لأم فدعم بعد ماتأكدت من لباب

طلعتة جان بطل مال شرب
دارت منة على ادواتها
ولزمت شيلتي لفتها ودحستها بحلكَي خنكتني بيها

وية مانبتت لأبرة صرت اضرخ وكشمشة لازمتني بأيد وبأيد تدفع لشيلة بحلكي
عيني عليها دموعها وية دموعي
اصابعها الطكَطكَن بين ادية بكد ماعصرتهن
وزوري تتلاطم خايفة مني وعلية

لحد ماكملت خياطي اني منتهية من لبجي وصوتي من لصراخ ختفة وتجرح زردومي

ايدي اتلمس لخياط
جان عبارة عن حلق على ركَبتي
حسيتة هذا الحلق بداية لموتي بهذا المكان
واني هنا وحيدة لا اهل ولا اقارب
شلون راح اخلص منهم

ماجنت اكدر احجي من الألم والحركة
وخوفي تكون ام فدعم لوثت جرحي واذتني لفهمتة منهم هية قابلة
بس ماعرف اذا جانت دارسة لو مجرد مزاولة للمهنة

كومني للغرفة لفوك
كوة وصلت وتمددت على لجرباية
لألم لجنت احسة وكأن مجموعة بسامير وتندك بزردومي بآن واحد
حتة من اتنفس وتتوسع قصباتي جنت اتألم
وصلت مرحلة اكتم النفس
كشمشة يمي تبجي وتتلاطم خايفة على روحها وعلية
وزوري تطلع تتسمع الهم وتجينة ماترضة تحجي تشاور بكشمشة

لزمت ايدها وبصوت مجرح ويتخللة لألم همست الها
اني ماابقة هنا لو يضل اخر يوم بعمري
اطلع منا وانتي تساعديني مالي غيرج

بجت ولطمت خدها
خية لبية مكفيني وشارة جدج
انة هنا مكفخة ولغضنفر مايعديها الي على خير
عفيني ابوس راسج

عيوني للسقف ودموعي تجري وعلى صدري حاضنة قميصة
قميصة الجان لابسة من نصاب اثناء لأشتباكات وكال لتغسلو
هذا لقميص اذا صار لأصلاح راح البسة واطلع اصرخ هيهات منا الذلة
واذا متت علكَو على بيتي علامة شرف الكم
بابا ماخلوني اعلكَة على بيتك
جبتة وياي ذكرة منك تقويني
بابا درستني وتعبت علية وكبرتني وحفضتني قران واحكام وفنيت عمرك علية حتة تالي تعبك يجون مجموعة رعاع ومرتزقة ينهون حياتي بلاذنب يذكر
بابا معروف بشارت ابوك وجدك
قتصلي منهم وخلصني من جورهم
خلصني من امارة ال بني سعد وطلعني من هلبئر الي مالة قرار
بابا مكانك عد ربك جبير ومن نعدمت لليوم تجيني بأحلامي بهيئة ملاك
متت وانت تطالب بحقوق المستضعفين
متت وانت تمهد لثورة لتغيير

بابا تتذكر من اتخذتو من مقام الأمير مركزكم للثورة
تتذكر من جنت تحجيلنا شلون حتميتو ببيت المؤسس وبلحديقة وتحت السلالم
و شلون اخذكم ويا متنكرين على انو انتو من افراد عائلتة واقاربة
وبجامعة لكوفة حماكم وتصدى الهم
واعتقلو هوة واقاربة واولادة ونحبس عشر ايام
تتذكر من جنت تخابرنا وصوت الرمي يمك يحبس لأنفاس وتضحك وتتشاقة ويانة متريدنا نخاف عليك
بابا بهلوقت جنت اخذ التلفون للسطح واحاجيك اخاف على ماما تسمع
تتذكر من تحطنة اني وانغام بحضنك مثل لأطفال وتسولف النة عن حبسك
جنت فرحاان ماكأن محبوس
فرحان لأن نحبست ويا وجنت تسولفلنة عنة
كيف كان ذا بأس شديد تعجب منه حتى السجان
شلون كان يحثكم على الصبر والتزود بلتقوى وشلون يحافض على اداء العبادات بوقتها
انت منهم ومتت على نهجهم
ماخمدو نارك وانت على حبل المشنقة جدو
ابو خليل يكول عدموك شنق بس وصلتنا اخبار من معارفك يكولون عدموك بلتيزااااااب بابا
ايا كانت موتتك
انت متت موتة شرف رغم كلها تستعر منك حتة اقرب ناسك
بابا روحك لثورية تسكني
جنت تتمنة لو اني ولد ويعينك
رغم جنت ايدك المين الخطت كل رسالة وكل حرف يستشعل لثورة بنفوس محبيكم وليتبعوكم
ايدي الي تلمست رسائل جانت تجيك من مكتب المؤسس الأول وجنت افخر بكونك تتلقى رسائل من هيج انسان عضيم
وجنت اقراها الك بدموع فخر وانت تستمع الها وتردد نحن لها ياحفيد الشهيد
ماجان اقاربك جان ابوك لروحي وقدوتك
بابا بوسط لسجن ووصلنا من عندة مرسال يعزينا بموتك ويوعدنا ويحلف بلحسين بأنو دمك لطاهر ميروح هدر
بابا انقذني وانتشلني منهم
احلفك بلمؤسس ومعزتة بقلبك انقذني منا وخلصني
اخذني يمك
يمك راحة اني ادري

ماعرف شوكت غفيت

فزيت على ادين تتلمس جرحي

عاينت الها جانت تبجي وكوة تنزل لدموع من عينها وكأن عيونها جافة من لدمع

ايدها تجر ايدي وتبوسها
يمة دخيل بختج وبخت اهلج
يمة اهل شارة ومنارة انتم
يمة لاتحمقين إعلة غصنفر وين يروح من شارتج
دخيل بساط جدج
غضنفر طيب ومن داخلة طفيل والله يمة
بس همة اااااخ منهم ومن مكايدهم
همة لدمرو
همة لموتو وخلقو منة وحش يقتصون بي وياخذلهم ثاراتهم
خلقو منة لعيبية
وكلما يرد لعقلة والتمس بي لهداية ويكعد على سجادتة ويجي بليل يحط.راسة بحضني ويصرخ طلعيهم من راسي يدة (جدة)
يدة خلصيني من كوابيسهم

يردون بحقدهم واضغانهم يذكرو بيها
يذكرو بلشردت من حوشنا وي صاحب رجلها
ويخلو مثل لمخبل مايعرف شيريد
وكل اليسوي
يريد يغطي على شينتها
يريد يكلهم انة إزلمة موش مكَرن
وهسة اختة هلعادت علي نفس المصيبة
يمة لبيت كلة مرعوب
راح ترد ذيج اليالي الكَشرة
راح يرد لغضنفر براكين كَايدة مايطفيها بس الدم
شجرالج يبت لعلم ولدين
شموازيج يمة وهيج ذبيتي روحج بنار لغضنفر

انتي تعرفيني بت منو
وتعرفين ابوي مات على شنو
هاي احنة وهاي مبادئنة الختلطت بدمنة
احنة مانرضة بلضلم حتلو يكلف موتنة

الله يهديج يايمة
ويهدي غضنفر

بقت يمي ماطلعت من غرفتي
جانت تصلي وهية كاعدة
اغلب صلاتها غلط
عفتها على فطرتها ومابية احجي

ماعرف شنو لخلاها تنام يمي
بس من بجيها طول اليل وسهرها وهية تندعي وتردد
يامن خلصت ابراهيم من نار لنمرود
خلص غضنفر من نار لحقد ولعار

انام وافز على بجيها ونواعيها
لخوفني دعائها لماسكت

كل شوية تدك عليها لباب زوري مدري شيتهامسن
وزوري دمعتها بعينها
بين اغفي وبين اكعد على صوتها

عدن يومين اني بفراشي وزوري وكشمشة ماقصرن بخدمتي ولحجية تطمأن علية
وام فدعم تجي تنضف جرحي
ماكو صوت للزلم بلبيت ابد
ولاحتة جدهم
اسألهن يكللي راحو يحلون سالفة كويكة
ورة ٣ ايام من لصار فزيت لفجر على صوت لباب تنفتح ودخلت زوري ولحجية ومرت عمهم ام صميدع
ووياهن بنية زغيرة بملابس لمدرسة وبضهرها جنطة
وجهها لمزلغ ومحومر وعيونها لوارمة وملابسها لمتربه شكلها وحالها وكلشي بيها خلاني اطفر على حيلي ونسيت حتة لجرح.

تقربت عليها
وعيوني على زوري دنكَت وكالت
هاي غنيمتهم ونسدت سالفت كويكة بفصل وممشي عليج جدج وبختة لاتجيبين سيرتها وعقلي وركدي الى ان تنحل سالفتج ونخلص

شنوووو
هاي لطفلة فصلية
المن
ياضالم يرضة يتزوج طفلة

لتخافين عليها خية هية مصعجلة بس طبت بحولها ل١٥ مثل كويكة يعني مرة

مرتييييش
ولج طفلة طفلة ياناس ياعالم

خية طفلتيش هنا عدنة لبنية من ثاني غسلة تستحق زواج

طلعت بلصالة وصرت اصرخ
وينة جدو ابو خليل
وينة شيخ امارة بني سعد
سمعت من بابا عن عشيرتكم وسمعت عشيرتكم ترجع لعشائر بني سعد لتسكن قرى مكة
وسمعت انو عشيرتكم مضرب للأمثال وحليمة السعدية لرضعت لرسول انتمائها لقبلي الكم
فهموني لرسول يرضة بهاي افعالكم
تخطفون طفلة من مدرستها تحت اسم غنيمة
حرب حربيش هاي لغتنمتو منها مرة ؟؟
مرة ياناس ياعالم
مثل حفيدة لرسول تجيبوها سبية
شنو ذنبها
بتكم هية الي نهزمت برجليها
نهزمت من ضلمكم الها

نضرات جدهم الي تخازر مستغرب حجيي
وقيصر تنرسم على شفافة بتسامة مدنك راسة ويمسد بلحيتة
اما لأسمة غضنفر جانو لازمي فدعم وصميدع ويصرخ
سكتنها لا اصعد ادوس بمصارينهاااااااااا

زوري تجر بية للغرفة
طبيت مخنوكة شفتها كبالي كعدت وتقوقعت تبجي بدون صوت
بدون مااسأل عرفتها من لبسها من بغداد

زوري كبالي تشرحلي لفهمتة وهية بلمطبخ

خية خالتها بضرف ٣ ايام طالعة للخارج ومطلعتها وياها
راحولهم نطوهم عطوة يوم واحد وليلة لو يردون كويكة لو يفصلونهم

لناس ماكادرين يرجعوها ولا يعرفولها طريق
منطيهم فصل مدري شكد وهاي لبت

وشراح يسون بيها

يزوجوها

المن ؟

مادري غضنفر ميرضة يعرس من زمان كاللهم
وقيصر كال انة ماتزوج بهاي لطريقة
شوف ياهو ليتبرع ويعرس عليها

يتبرع ؟
اوووف ياربي مجموعة رعاع جهلة تلعب بمقدرات لناس وتذبح وتصلخ

طبت كشمشة تقربت الي لزمتني من متني وكعدتني

كعدي خايبة مذبوح زردومج وهيج تصرجين جا لو صاحية شتسوين
سمعيني خية
انتي هنا غريبة ووحيدة ومصيرج بيدهم
عقلي وستجني وبسج لاتدخلين بغيرج
كويكة هلطلعت وعرست وانتي هنا نحبستي
وهاي لبت التدافعين عنها احسن منج راح ياخذها صميدع وتستقر وانتي ضلي عربدي وخبلي لغضنفر علينة

مالومهم الومجن والوم رضوخجن الأزلي الهم

خية هذا لموجود جا شنسوي نتكاون وياهم

طبت زوري
جانت فرحانة وكالت
اجت عمتي امريكا

عمتج عايشة بأمريكا ؟
سألتها بدهشة

ضحكت وكالت
اسمها امريكا موعايشة هناك

زين وانتي يا مسكينة ليش مسمينج زوري

اسمي زهراء خية بس زوري هذا لدلع مالي ولأن احب لزوري

ايامسكينة

بقت البنية تبجي طول ليوم

لليل اجت ام صميدع اخذتها
جانت تبجي ولازمتني ماترضة تهدني

خالة شتردين منها
لبنية مرعوبة من لصبح لهسا بس بجي

نريد نعقدلها على صميدع جا المن جابوها يعاينون على طولها

بس هية ماقابلة ولزواج بلأكراه حرام

خايبة نعيمة لاتحجين حجي اكبر من راسج شني انتي تفهمين احس من لشيوخ

طلعوها
طلعت وراها جنت بصعوبة ارفع راسي من لكاع من الم لزرارات

بقيت من فوك اعاين الها من لمحجر
وهية طول لدرج تبجي
ورة باب لأستقبال كعدوها
وعلى راسها واكفات يوجهن بيها ومدري شيحاجنها

شوية ودخل قيصر
جان معصب صفك ايد بأيد من شافها ونتر بنسوان عمامة
ادري وخرن عن راس لبنية الله واكبر تكول يأجوج ومأجوج شوفنها شلون مخلوسة

خاب ماتسكت انت وتكفنا شرك وشر كتبك

كعد على اول بايات بلدرج وصاح
كشمشة

اكثر شخص ينصاح اسمة بهلبيت هية كشمش وبكل مصيبة يحطوها
ودائما هية الملامة وتوكع براسها كل لمصايب

اجتة تركض

وبصوت عالي حجة حضريلنا فد خمس انواط شجاعة نحطهن على جتف السبعبع مالنا

كبالها لحجية عضت اصبعها وضربت على رجلها وكالتلة
ولك اسكت ماتفوخ الة تتكاونون دبسكم واحدكم حلة فروخهم بطولهم وانتم كاضيها انت اسكت لا إسكت انت
شمنطيكم الله عقول كوم عاكَول

ماعرف شهمس لكشمش وراحت تركض للمطبخ تطلع اكل وتتلفت

حطتة بطوس وبلملحق خلتة وبساع اجت تركض

من شافتني مركزة عليها كسرت بتجاه بسعاد وكفت يمها بوستها وهلهلت واخذتها لغرفتهن هية ولبنات

رجعت للغرفة
بقيت فاتحة لشباك اشتم هوة واعاين
وافكر ليش كلهم هنا ضخامة وبنية جثلة وقوة عدهم حتة نسوانهم لاتكل ولاتمل من الشغل
من داعبت وجهي نسمة هوة حلوة
تيقنت ان لجو ولبيئة الها حوبة بأجسامهم وصحتهم

جانت ساعة متجاوزة ال١٢ واني بعدني اقرة بكتاب مال قيصر
خطف من كدام عيني يركض
دنكت نضري وركزت بي
جان لابس دشداشة وعريضة علي ومبين موملبوسة يمشي ورافعها ومحتار بيها
من طولة ومشيتة وشحاطتة عرفتة
والي اكدلي اكثر هوة لطوس الجان شايلهن والي شفت كشمشة تضمهن بلملحق بتوجيهات من عندة

وكفت اعاين الة بسد لمحجر ومدنكة

شفتة من طلع ووكف بعيد عن لبيت بقة يتلفت الى ان اجا ولد مدري شحجو جان يحجي ويا بأنفعال
ويأشرلة على شكم بيت ومدري شيحاجي عليهن

وراها اخذ لطوس وندار بضهر لبيت مدري وين رايح
بقيت اعاين علولد لحجة ويا
توجه بوسط لزرع الى ان ختفة وماعرف وين راح

بقيت متيقضة اريد اعرف شديصير

اقل لنص ساعة وشفت سيارات لأمن تطبك ببيبان لبيوت لأشر عليهن قيصر

وقتحموهن
غمضت عيوني وسالت لدموع وبداخلي ثورة تكلي قتلي وقتلي شكو خاين عشرة وجورة وزاد وملح
ضلام يحيط بية
هنا بابا ببجامة نومة يصيح عائلتي مالهم شغل
هنا ماما تصرخ ارحمو والله ممأذي بشر عمرة وحياتة
هنا نهتك سترنة الي مايوم شافة بشر
هنا بابا يصرخ بناتي لاااااء لاتلمسوهن لاتحطون اديكم على اجسادهن لمالاحها رجال غيري
هنا اصوات تنكتم وهنا صرخات تتكممم
هنا اخبار بابا توصلنة
نعدم مااات راح ونقضى علي وعلى ذكرة

بقيت ابجي
قيصرر لضنيتة يختلف عنهم
لكلت عنة مربي اجيال فاضل مثقف ولكتب ليقراهن كلها تتحدث عن الحرية والتحرر وروايات الحب الي تصير بين طائفتين وينتصر بيها لحب وتنذبح لطائفية على قبلة لثبات ولوفاء ولأصرار

شكد كرهتا وكرهت غبائي لخلاني اثق بواحد منهم

تمددت بفراشي بصعوبة نمت وبصعوبة غادرني ذاك ليوم وذكريات بابا وحبسنا
فزيت على صوت رمي
كعدت اتلاطم
وللبلكونة ركضت اعاين جدهم وثنين من عمامهم وغضنفر يرمون ليفوك رمي عشوائي
ادية على اذاناتي
بركن لغرفة صرت
اذكر هذا لطلق جنت اسمعة بلتلفون وانرعب
بابا جان هذا لطلق يحيطة وهوة يتختل بوسط لبيوت ويتهربون من لقصف ولقمع
وجان بوسط هلضرب يحاول يطمننا

شوية وهدأو
ضوة غرفتي طافي
صراخي مااسمعة لأن جنت سادة اذاناتي

حسيت باب غرفتي نفتحت
على نفس كعدتي واسمع صدى صوت صراخي من بين اصابعي لسادات اذاني

صوت اقدام تتقرب الي

وشخص يهمس يم اذاني
لتخافين لتخافين
هاي بشارة لعرس وكسرة عينهم
وراها ختفة لصوت

غمضت عيوني ونجفيت بلكاع
بقيت ارجف وكوابيسي ترجعني لذيج لأيام
اذكر ذيج لأيد الي نخلت على جسمي ويهمس الي صوت ماسمعلج لتخليني اغتصبج كدام امج واختج
بقيت كاتمة لنفس
وايدة تتسلل وتعبث بطهارتي شلون ميحب
وصورة بابا كبال عيني من جان يصرخ بناتي مالهم شغل

كعدت على هلاهل لبنات
مديت راسي وشفتهم مكعدين لبنية بسعاد

جانت لابسة كلابية بيضة وغاطة بيها بكد ماجبيرة عليها
وعلى راسها مشمر
وبلصالة صميدع يضحك ويسولف وية لولد لابس دشداشة بيضة

بقو طول ليوم مشغولين لبنات ولا شفتهن وهوسة جوة من لشباك اعاين واشوف لديوان لبرة ببابة احذية وشحاطات كوومة

اعاين طفل زغير طب من برة يتلفت
تقرب للنعولة
حضن مجموعة على صدرة وركض بيهن وكف يم بالوعة (مكرم القارء) تصير بنهاية لحديقة شمرهن بلكاع و بشي بيدة فتحها وشمر لنعولة بيها
وركض علباقيات يتحرك ويتلفت
اخذهن وهم ذبهن بيها وسد لقبق واحكم غلقة
ومشة بساع

لطفل ماشايفتة ببيتهم قبل
وماعرف شنو لغرض من هاي سوايتة بس ضنيتها شيطنة اطفال

وماهي إلا دقائق وسمعنة صوت صياح لغضنفر وجدة ورا يهديء بي

وكفت يم لمطبخ
واشوفة يصيح طب ليجوة
اسمع ملاطمهن جوة
وهوة يصيح
احجن وين نعولة لوادم
منو هلناقص غيرة الي يريد يفشلنة كدام ضيفنا
خايبات ماتحجججججججججن

ماحصل منهن شي
اخذ سلاحة وطلع
تبعو لولد ناس تهدي وناس تعربد ويا

وكف على لشارع لرئيسي
الي محطوط علي علم ضخم لونة سمائي ومكتوب علي بخط كبير * امارة ال بني سعد ترحب بضيوفها*

وكف جوا ورما ٣ طلقات
طلعو من كل حدب وصوب زلم تتراكض
حاول يلكالة دجة عالية ووكف عليها وصاح
من ديواني نشالن احذية ونعولة ضيوفي مكرم لسامع
وهاي شينة ماصايرة ويانة كبل
وانة وانتم ندري لسواها رايد يزغرنة ويخزينة كدام ضيوفنا
لنعولة وإن ردت ماترد هيبتنا جدام ضيفنا
ولسوا هلشينة نلكا بضرف يومين وبني سعد بزلامها واطفالها تسممممممع
وراها كل لويا ولد عمومتا وعمامة رمو
واغلب لجانو واكفين رمو وياهم كأن يكلولهم ليمسكم يمسنا
شي مرعععب مرعب ماشايفة بحياتي هيج شي
رمي ستمر اكثر من ربع ساعة
رجعني لذكريات لحرب ولقصف
بقيت ابجي وصورتهم متروح من بالي
منا ضعفت وهنا صرت مثلهن بلا شخصية بلا رأي بلا طموح بلا رأى مستقبلية بلا احلام
هنا تجردت من كلشي

من طب لغضنفر وصاح
خياطها نشالن نزلوها الي كلمتين وياها واريد لكل يسمع

نزلنني لبنات
ولأول مرة جنت خايفة
لأول مرة روح بابا لثورية غادرتني
وبقيت بمخاوفي بكوابيسي لوحدي اواجه لغضنفر وغضبة وكرها الي ولنفسة وللحياة بما فيها

نزلت عيوني تجس نبضة من ملامح وجها
واستذكرت هوة معروف بلعبوس ولملامح لخشنة ولنضرات لقبيحة لكارها لحاقدة على كل لنساء

كعدت بلكاع وايدي بيد كشمشة رادت تمشي بقيت مجلبة بيها
عيونها تعاينلي تدمع وتتوسلي
هديني خلية لايلوحني طشارج دخيل بساط جدج لبية مكفيني وفايض

هديتها
بقت لازمتني
رفعت راسي الها
دنكت عينها وهدت ايدي ومشت

خلسة عيوني تعاين للكاعين
عمامة نسوانهم ولدهم وجدياتة تلاثتهن
طمئنيت من تركز نضري عليها
هية لوحيدة بيهم مو من طائفتهم
من طائفتنا وتحب اهلي وتأمن بيهم وبشارتهم
وماراضية علصارلي
بس مالها راي بلبيت
هية مهدية للشيخ
لكلمة ولرأي لنعناعة
الي ماخذها عن حب ومتحدي بيها اهلة وكل ناسة
والي من طبيت لبيتهم وهية تسميني لنَمرة ماعرف معناها بس ادري بيها كلمة موحلوة

كام على حيلة ومن نفس لمكان من جورابة طلع لخنجر
رفعة ليفوك وكال
لموجودين كلكم تشهدون
هاي لبت داست بيتي وخانت لزاد ولملح وتسببت بكوارث مانحلت بسهولة
وانة حكمي عليها ولا يهون جدي

نزل خنجرة واشر علية
هاي لمرة مرهونتلي
تضل هنا للموت
لا تشوف اهلها ولاتوصلهم
لاتتزوج ولا تنخطب ولا الها اي حقووووووق
واذا اسمع جنس بنيادم مواطنها لو حاط عينة عليها لو ناوي ولو نية يتقدملها خطوة
اذبحهم بأراضيييييييهم .....يتبع
مسائكم معطر بلصلاة على الحبيب المصطفى
ملاحضتين اتمنة تقروهن زين وتفهموهن
اي تشكيك بمصداقية لأحداث لتنذكر بلقصة ماراح اتقبل ومباشرةً احضر صاحبة لتعليق لأن ماكتبت شي إلة بعد تدقيق واستعانة بكوكل
وملاحضتي لثانية ولإهم اي احداث سياسية كانت ام دينية راح تنذكر بلقصة هية متمثلني ولا تمثل ميولي وإنتمائاتي واحب انوه اني غير موالية لآل الشهيد الصدر  لكن الشيء بلشيء يذكر