#خنجر_الغصنفر
#الجزء_الثاني_بارت٥٠
#حنين_حاتم
طلعت للباب وياية المديرة والحارس للباب وصلوني
بعدني جاي اركب سيارتي
اسمع صوت واحد وراي صاح حمززززة
نداريت ولد مراهق يطلع دون ال١٨ دبدوب كصير وجهة دائري ابيض لحية خفيفة واسم شارب
حواجبة مطابكَات
جان سللامة بس بهيئة رجولية
بيدة تلفون صافن بي مندمج يحرك بي يمنة ويسرة واضح ديلعب
تقربت الة رفع راسة عاينلي
بعدني صافن بوجهة وعيوني غارن دمع
صوت وراي يصيح
ولك ابو طوييييييييييييلة
نداريت
لوهلة تخيلت جاي احلم
فركت عيوني
افتح بيهن واسد
هذا هوة معقولة
واني الي ضيعت سنين ادورهم وحاولت بشتى الطرق ومشيت بكل الدروب المزدحمة بلكي الكاهم
تالي تجمعنة صدفة على علبال ولا علخاطر !!
تدنالي يمشي بثكل
ادي مسهبهن وحواجبة ملتمات
بمكاني بقيت ماتحركت خطوة
جن تعب السنين كلة تجمع بهللحظة
كل لفاتني وكل لعشتة بعيد عنهم تجمع بهيئة دموع وحسرة
وصوت مكتوم اريد اطلعة واصرخ محتاجك ياخوية
تقرب الي ادي احتضنن وجناتي
دموع بللن رموشة
وصوتة بفرحة على حزن على فخر يهمس الي
هلا
هلا يبعد الماحلالة بعد عينك يصيح الآخ
اي وحكَ لمعة سمارك بعد عينك ماكلت اخ
هوة ليضيع اخو هم ينحسب عايش
هم يصيح آخ ويدور يلتفت علمامش
هم تشرق شمسة هم تلوحة ضلمة ليل
والله ليضيع اخو يكضيها بلياوييل
تفاركنة وذكرياتك بلحفظ والصون
لالاحتهن الغربة ولاراحن وية اليرحون
خيي وبعد خيي
ويضلعي لنابت بصدري
يلخذت حيلي... يلمعة بعيني .. يلجنك الماي
صح واحد لجن فركَاك مال هواي ......حنين حاتم
ماجنت اسمع حجي
جنت اسمع مشاعر تطلع من بين شفافة
حييل لصدرة اخذني
وايدة لرجلي البيها العملية متدت تتلمسها
دنك بلكاع كمبص يم رجلية
ومثل طفل من رجلية حضنني وصار جسمة كلة يختض
دنكت يمة بلكاع
حيل لصدرة جرني
ورجع يلزم بوجهي ويكلي احجي
احجيييي خلني اسمع صوتك
دموعي تجري وهمست الة
مشتاكَلك خييي
راسة ليفوك رفعة وصوتة يرد علية
يابعد اخيك وعمرة
يابعد اخيك وسنينة الكَشرة
ولك وين جنت متكَلي
هنا وادور عليكم صارلي سنين
واحنة ماخلينة بشر مانشدنا
ومن جنا برا مرتين دزيتلي طارش لهنا اسأل عنك
كَمت على حيلي وكَومتة
جنة حرفيا بلتراب مكمبصين ولجهال لحالة من المدرسة والمعلمات الجاي يطلعن والاهالي لجاية على اطفالها كلها تباوع علينا
صاح على حمزة الي تقدم بتجاهنا وكايد بيدة طفل زغير
اشر لحمزة
هذا عمك قيصر تعال سلم
صوتة يرد علي بفطارية
يااااا وانة اكول وين شايفة
تقرب سلم علية حضنتة ودنكت على لطفل لوياهم شلتة بوستة
صوتة يهمسلي هذا ابن صميدع عيسى الوكح
لزم رباطي ويرجع ليورا ويعاين على لبسي
اييي ابو طويلة شني هلكشخة شني هللبس
اسكت ليسمعوك وتطيح هيبتي
غير اخوك حولو اشراف
يا الله بلمبارك ابو القوص تستاهل
وين جنتو يمتة رجعتو
والله ياخوية جنة بعمان وصارلنة سنتين من رجعنة
بنهاية ٢٠٠٨
سحبني من ايدي
تعال اخذك للعزاز
وسيارتي
يلله جا راح نركب وانت الحكنة انت وحمزة خاف تتيه
جر حمزة من عكسة ويهمسلة بصبر نافذ
ذب هلغضب وعاين لدربك ودلي عمك لتخليني اكسرة براسك وانعل طاهرك انت ولجابة الك
ان شاء الله بوية ان شاء الله
مشة وياي يضحك بفطارية وهباشة ولاجنة مترزل وغضنفر يفور ويخازر بي من بعيد
من يضحك فجة كلة يطلع وهذا اكثر شي ماخذة من سللامة
رغم من جان زغير جنت اشوف بي شبه من غضنفر بس هسة ابد صاير نسختها
ركب يمي بلصدر وغضنفر اخذ عيسى ومشة كدامنا
لسيارتة
مشينة وهوة عين بلتلفون وعين يدليني
اسأل بي كلسا
حمزة هذا الفرع افوت بي لو اجزي
يرفع راسة خطف يكلي اي ويرجع يدنك
كد ماعصبني سحبت المبايل من عندة وشمرتة علجكمجة ونترت بي
ابوك شنهي كالك
عمي هوة انة مااشوف هلتلفون غير من اطلع برا لبيت
بلبيت كلما يشوفة بيدي يجرة مني
ماينلام اذا انت تزومل من تلزمة تفكَع المرارة
هه ههههه هههههه
يضحك كأن كايللة نكتة
الله يعين غضنفر عليك بس
وصلنة للبيت
بيت يطلع ٢٥٠ متر طابقين بفرع ضيق
غضنفر جان كدامنة واكف برة ولباب مفتوحة ويمة جهال
وبصفها بيت ازغر هم بابة مفتوحة وواكفين بي وليدات تطلع اعمارهم اكبر شوية من حمزة بيهم روعة من رجل عمتي امريكا
تقربنا الهم وصوت لجهال يصيحون حيهم حيهم
ذكرني بجدي الله يرحمة من يجينا ضيف
تقربنا للبيت جانت بلباب بردة اسمع صوت خبصة جوة
وخر لبردة
صارت بوجهي كشمش
دموعها يجرن وايدها على حلكها تهلهل وتبجي وجكليت من وراها ينطش
تقربت الها
جريت راسها على صدري خليتة
جسمها بين ادية جانت ترجف وشهكاتها على صدري
كافي يلحنينة لاتبجين
هذا انة رديت وبعد مايفركني منكم بس لموت
صوتها يهمس
ولك قويصر وين جنت ماتت جدتي وهي بحسرتها علييييك
صوت غضنفر نتر بيها ودفعها عني
عاينتلة
وين جدتي غضنفر
مسح وجهة وتقرب يريد يحضنني
شلون ماتت وشوكت
بس طلعنة منا ماتت
بلطريق اصلا جانت تعالج بس مادرينة ماتصورنا توعة على هلأحداث وتستوعبها وتبقة ببالها
ضنينة مثل كل يوم تحط راسها علمخدة وتنسة كلشي
بس موتتة جدتي ماتعدتها ولاكدرت تكمل
ضلتلها ليلتين بعمان ووراها حملت الحنينة
الي صار وراها حضن عمامي وصميدع ولجهال ونسوان عمامي ولبنات
جنت باهت ماحسيت بكلشي
بقى صدى خبر موتها مثل نقار الخشب ينقر بصدري
كعدت كلهم يحجون يستفسرون حاولو يغيرون علية سماع الخبر ماكدرت
ولكسر ضهري ماتت وندفنت غريبة
محرومة مشتاكة ملوعة ماتت بحسرتها من ورانا
اذكر حجاياتها من جنت اتصل
هلاهلها من كلتلهم نجحت العملية
لو اذكر شكد لوعتها بمرضي بيوم صوبوني وانة اشرد ام مهودر
لو اذكر فرحتها من اطب عليها من برة
صوت غضنفر نززني من شردتي
_ها قيصر شمالك
_شمالني توني تيتمت انة غضنفر تونيييي
_لبكَة بعمرك خوية لموت حكَ
_لموت حكَ بس موبهلطريقة
جدتي ماتستحق تموت هيج
_ولاجدي يستحق
ولافدعم بس هذا مكَدر ومكتوب
لله يرحمهم ندعيلهم بلمغفرة
_اريد امش
_ وين
_ماادري مخنوك طلعني منا
طلعنة انة ويا وصمديع فترينا بلسيارة بقينة نسولف
على وضعهم وعيشتهم هناك وردتهم
واحنة نحجي قاطعنة صميدع وكال
شعجب ماعندك تواصل وية رجل كويكة وخالك
لا ليش بلعكس دوم اتواصل وياهم
صكَد تحجي قيصر
اي
متأكد
اي وحكَ الله
عيني عليهم واحد يعاين للثاني
غضنفر غمز لصميدع دار وجهة علجامة
خضيتة شبيك شكو
كلشي ماكو خوية
شني كلشي ماكو ترة انة موغبي
صدكَني كلشي ماكو
غضنفر،احجي ترة وجوهكم فاضحتكم
_والله ياخوية من يوم لطلعنة اتصلنة بخالك سألنا عنك كال مانندلة فجأة كعدنة ولكينا ماكو ماخذ غراضة وراجع وعايفلنا رسالة كاتب بيها انة رديت للعراق بس ماحاط لاعنوان ولاكلشي
وكل فترة نتصل بيهم نكول بلكي رجعت تتواصل وياهم ويندلون مجانك بس بكل مرة يكولون لاء
لااتصل بينا ولاندري عنة
اخر مرة من اتصلت بيهم طلبت عنوانهم
جنت رايد امش ليهم كلت اجيب كويكة وابنها وعفا الله عن ما سلف
كلت الم شملنا شنهي ضلتها بلغربة
مرضها كسرني كلت اسامح والله لمسامح وانسا سوايتها
انة جليل وولدة سامحتهم اخيتي مااسامحها
مارضو ينطوني عنوانهم وكالو احنة نريد نرد للعراق ومن عدها كامو مايردون على اتصالاتنا
من جاب طاري كويكة كلبي نعصر
اشهر ورة موتتها كلما يتصلون اكللهم صوتها رد تأزم وماتكدر تحجي
جنت ناوي احجيلهم من ارد للعراق
وصار لصار ومالكيتهم
جريت تلفوني اتصل بخالي
دكيت علي جاوبني
سلم وبقة يسأل عن حالي الي اسبوعين مامحاجيهم
صاح على غضنفر الزغير يريد ينطي الي يحاجيني
قاطعتة وكتلة عوفة هسة بعدين احجي ويا
موصارلة ٣ ايام يسأل عنك واني كلما اريد اخابرك انشغل لوتصدف طبتي للبيت وهوة نايم
خالي عوف غضنفر لزغير وكلي غضنفر اخوي هم متصل بيك قبل
حسيتة ارتبك
لا لا مامتصل بية لو متصل ا كلك قابل ليش اضم عليك
اكيد خالي
قيصر انت وين
اني يم غضنفر اخوي
ص صصدك
اي صدك
احجي جاوبني ليش جنت تضم علية اتصالاتهم
احجيلك بس دقيقة خل اطلع برة لبيت
يلله شو انتظرك
بقيت استمع لصوت خطواتة وهوة يطلع ويسد لباب ورا
همس بصوت خافت
قيصر اسمعني بعد خالك ولاتاخذ من خاطرك علية
اني مالي شغل والله ولا راضي
بس ابو غضنفر ماقبل ابلغك بأتصالاتهم
خايف يكلي بس يندلون قيصر رح يلكاهم ويحجيلهم على موتة كوثر وخاف يجون وياخذون غضنفر الزغيرون مني
صدك تحجي خالي تندلهم وصارلي سنين ادور وماتكلي ولاتحجي
مع الأسف عليك اي والله موهاي المرجية منك
وبعدين شهلتفكير هذا خالي مو لهلدرجة ترة انتو بأمريكا مني يكدر ياخذة منكم
قيصر ترة ابو غضنفر وغضنفر الزغيرون بلعراق صارلهم كومة
هاي شجاي تحجي خالي لعد منو جان يحاجيني
موكل اسبوع احاجي غضنفر لزغيرون من اتصل واخاجي خالتي
سمير ابني جان يحجي وياك موغضنفر
وخالتك مارجعت وياهم ماخليتها
ليش ياخالي هيج ليييش مع الأسف عليكم
والله يابعد خالك موبيدي من جهة خالتك كلما اكللها راح احجي لقيصر على مكانهم تضل تدك وتطلم تكلي هسة يرحون لوليدي هدادة ويموتو ويضل حفيدي وتدك وتلطم تكلي غضنفر مايعوفة
غضنفر لكتل امة وهوة فرخ تريدة يرحم وليدي
ومن جهة هوة يوصي بية ويحلفني كل مايتصل
مع الأسف عليكم
وخصوصا انت خالي جان كدرت تحجيلي
جان كدرت تسرني وتوصيني
حسافة عليكم والله تشوفوني شلون اتكلة ومن ديرة لديرة ادور عليهم
ماكسرت خاطرك
ماكلت هلمسكين ضال يهبد لااهل ولا ربع
لو بس كايللي مو إلة تدليني على مكانهم
لوكايلي حتة اطمأن عليهم وارتاح وابطل ادور
هذا لصار بعد ماجان بيدي شي
ماكدرت اجازف وماجذب عليك صورولي هذا غضنفر فد وحش كاسر
بصراحة خفت على ابن خالتك مثل مااخاف عليك
هوة هم ابن اختي
وخفت اكثر على لطفل
روح خالي روح مع الاسف عليك والله
مامعذور ابد مامعذور
قيصر اوكف لاتسدة
سديتة قبل مايكمل
غضنفر لزم ايدي
قيصر كويكة ويين
موجودة وين قابل
ترة سمعت حجية موغشيم انة
كويكة ميتة
جريت حسرة مختنك ماردت هذا ليوم يجي ولاردت انقلة خبر موتها وهوة لآخر اتصال الها جانت تتوسل تريد تحجي ويا ومايقبل يحاجيها
ماتت ؟
من زمان
جا ليش ماتحجي ليييييش
ماكدرت
ولليوم مااريد احجيها
عفية عليك يخوي عفية
غضنفر والله ماردت اقهرك
لا والله اقهرنيييي
اقهرنيييي ويطبني الف مرض
دار وجهة علجامة وهمس اطبك
وين تريد
نزلني اريد اتمشة
غضنفر كول يا الله
نزلني رحمة للميتين
هوة ياهو الضل ماتكَلي شو كلها ماتت
وكفت لسيارة بعد ماالح علية
نزلتة ومشينة انة وصميدع
عيني علي بلجامة كعد علرصيف ورث جكارتة مد رجلي ودنك بلكاع يدخن مارفع راسة لحد ماجزينا
بقينة نسولف انة وصميدع
سألت شعجب بسعاد ماتواصلت وية بلقيس
والله خوية اول ماشلنة وضعنة جان صعب وغضنفر كل لعندة عايفة بجنطة انعام
لجنةماخذي ويانة يادوب حصلنالنة بي بيت زغير ولبقة عدنة مصرف
حبوبتي من ماتت تدودهنا كل احنة مالنة خلك كلشي
انة وعمامي من طلعنة منا جنة تعبانين من الضرب وطلعت عدنا كومة شغلات واحد من لناس انة شهرين اون من ايدي تالي بعملية يلله صارت زينة
بيني وبينك سكطت وابوي وعمي اسماعيل مابيهم علشغل
غضنفر الضربة بخاصرتة صح خيطناها من جنة بلعراق
بس من طلعنة اتضح كليتة بيها ضرر وهم عمليتين وكالو احتمال يحتاج تبديل كلية
وكوة يلله وكف على حيلة واتحسن وبقة بلأشهر يغسل كلاتة ٦ مرات وصرف فلوس
اخر فترة كام مايكدر يشتغل
بقيت انة كايم بمصرفهم
اشتغل وية اسطة مال بواري والي اجيبة يادوب يكفي لكمة يومنة
كل هلمدة نصرف بذهب النسوان ولباقي عدنا دكاترة وعمليات
الى ان تحسنت صحتنا شوية
حصلنالنة شغل
شوية وضعنة تحسن
جبنة احتياجات لبيت
اثاث غراض مطبخ جان لبيت مصلخ شترينا تلفونات
خطية جانت تتصل بيهم من لشارع ماتحصلهم لأن جنت اخذها تتصل بوقت متأخر لأن شغلي ينتهي بوكت متاخر
وراها بفترة كَامو ميتحصلون ابد
صفنت تذكرت انة هم ماحصلتها بعد من آخر مكالمة النة قبل ٥ سنين
تصورتها هي تتعمد ماتريد تحاجيني
بس من كال صميدع شكيت يكون صاير وياها شي
خصوصا اخر مرة شفتها بيها جنت متسبب الها بمشكلة جبيرة
صفك ايد بأيد وكال
هاي هم مسكينة مثلنة لاضلولها اهل ولاهية لشافت راحة ويانا
عاينتلة إبتسمت
- والي يجيبلك عنوان اهلها
_بويا غير تعيد بسعاد
_عد عيناك خل ناخذلنا فرة ونرد على غضنفر نجيبا ومن عين باجر اخذكم لبيتها
أو لمدرستها
ثنينهن اندلهن
_ديلله بساع لعد ردنة خل نبشرها
فترينا بلسيارة رجعنة لغضنفر
بعدة على كعدتة بنفس لمكان ولكطوف داير مدايرة
نزلت نطيتة ايدي
غمض وجر حسرة طويلة
نطاني ايدة
سحبتة بكل قوة
حضنتة وطبطبت على جتفة
ندعيلها هواي تعذبت
جانت دوم تكول هاي حوبة غضنفر بية
وسامحها امانة
بقت حسرة بكلبها تسمعك تكللها مسامحج
_اسامحها؟
ليش هوة كلبي حقد عليها اصلا
الله يرحمها ويغفرلها
هسة رتاحت نجمعت وية امي وابوي
هسة راحت تشكي لأمي مني
لاتكول هيج
انت عمرك مااذيتها بلعكس جنتلها اب وسند
بس هي غلطت ولفات مات
الله يغفرلها
ركبنة لسيارة ومن اول ماركبنة افصحلي عن نوايا
خوية انة اريد اجيب وليدها
خلي هنا تربي كشمش وي فروخها
لاغضنفر مالها داعي لولد عندة ابو وبيبيتة عايشة وهمة يربو
متعود عليهم ومايكدر يعيش بلياهم
جاابو مايضل بلية مرة اول وتالي يعرس
ليش يربة بني اختنة عد مرة لأبو وتأذي
هنا كشمش تربي
وهم يضل يمنا من ريحتها
احسن من ضلتة بلغربة لاام لاكرايب
غضنفر شيل هلسالفة من راسك ترة بأمريكا همة مو ورة لبيت
جا شني امريكا ابوها جبير
اركب وامش
جريت حسرة وبسري احجي
ماينلام لولد من محلف خالي
غضنفر انسا هاي السالفة ممشي عليك روح كويكة
لا ماانساها إتناني جم يوم ارتب اموري واروح
وانت تمشي وياي
سكتت عنة عبن حرورة سماع موتتها بعدها تلوع بجبدة
كلت خلي جم يوم يتأقلم ولوحدة يبطل
احسة يريد يعوض خسارتها بأبنها
لطريق كلة جنت اشوف رموشة بتلازكن كد ماترطبهن الدموع الماترضة تنزل
جن هلمرة مامسموح الها تتجاوز رموشة
عبن زغرتة بيوم من الايام
واحس لليوم كسرتها بي
ولليوم احس بصدرة العتب
ردينة للبيت
جانو مسوين غدا
اول ماطبينة صبو
ولتمينة على سفرة وحدة بعد سنين طويلة
سنين جنت افتقد بيها هاي اللمة
وروحي تفرفح عليها
من كد مااستاحشهم تمرضت كمت احس اي مكان اكون بي بدونهم يريد ياكلني
هسة عرفت شنهو سبب لصارلي باول سفرتي للأردن
المتعود على هيج لمة
ويفقدها فجأة يوصل لهلمواصيل واكثر
مااكلت لكمة
طول مااني كاعد تراوالي طيفها يفتر حوالينة
اذكرها من جانت تشمر لحمتها علينة
وتدني الخبزة والخضرة واللبنة وتضل طول مااحنة ناكل هي عيونها علينة ياهو ليفرغ ماعونة
تصيح علبنات بساع زيدنا
كد مامخنوك عليها مااكدر ابلع اللكمة
و٣ مرات اغص واختنك بيها ويناوشوني الماي
حتة الماي اغص بي
لحد ما كمت من لأكل وصحت على كشمش
لحكتني للمغسلة
_خوية جيبيلي شي من ثيابها
راحت شوية واجت بيدها شيلتها
نطتها الي
غطيت وجهي بيها وصرت اشم بيها
واكتم شهكتي ولصرخة لنايمة على صدري
ااااااخ ياجدة والله مفتقد الهلا بحسج
تدنتلي كشمش
ايدها على متني
كول ياالله خوية
تعال اشربلك استكان جاي تعال
خليت شيلتها على متني ورجعت جوة
بقيت انة بزاوية اجر حسرات على جدتي واذكر سوالف فدعم مكانة خالي
منين ماالتفت تجي سوالفة براسي
وغضنفر ماخذلة ركن يدخن ومطلع خنكتة بحمزة كلسا وضربة كلسا وعاط بي
وسلامة كبالة تفور
وحمزة كلسا يشتكي الها
وغضنفر كلما يشتكيلهة ينهد بي
يعيط بي ويكلة صير زلمة لتضل تتشكة لامك
هاي الفروخ احسن منك ولك جم دوب اعلم موسليتني خطن شواربك وعقلك عقل فرخ الروضة
عصرية ركبنا لبيتي انة وصميدع وستار وعمتي امريكا و اخذنا كشمش وزوري نصفي لبيت
بلطريق ضلينة نسولف
جابوها سوالف على لأحداث لصارت الهم
وهمة يسولفون سألت استفسر عن انعام وتهاني
غضنفر جر حسرة وكال
_انعام ضلت هنا بلعراق بس مااندللها
وتهاني ضلت وية رجلها هم مانعرف اخبارها شايلين
مورجل عمتي تهاني واخوتة وولدهم صدفة من طبو علينة جان رايح بفاتحة يم كرابتة للشامية
من ردنا نطلع وقررنا اجت عمتي وولدها وزوري يمنا علساس يودعونة وهم خفنة عليهم يضلون ورانة وينضرون
كلنا ناخذهم ويانة لبغداد ومناك من يرد رجلها وستار يمر عليهم وياخذهم
ماجننة ناوين نطلع كلنة
صاحب جدي دبرلنا مكان وكلنة نطلع بس انة والمرحوم فدعم وهمة يضلون شعليهم
بس صار لصار وتاخرنا بطلعتنا وخذونا غدر بلنسوان
بعد عمتي وزوري طلعو ويانة
وضلت تهاني يم بيت عمها
جانت رايحة للفاتحة عبن لميت يصير كرابة ام رجلها
تتصل بينا كل فترة جانت
ماجانت تدري بفدعم ميت
وعمتي ماترضة نحجيلها
تشكي من رجلها مأذيها ومتعبها يضربها عصبي
عدها ٣ بنات صايرات
من ردينة للعراق يلله درت بفدعم ميت
كل فترة تسمع طراطيش حجي من الجوارين
وتجي تستفسر
عمتي تكللها جذب ماكو هيج شي
لحد ماردينا بعد ماقتنعت بأي جذبة
دكت ولطمت ولليوم من تجينة من لباب تنجب وتنوح علي
ااااخ يافدعم اااخ
بقيت الدرب كلة استذكر سوالفة وحجاياتة
اتذكر الحبيب مالة
وصلنة للبيت تحزمن لبنات ونضفن لبيت
صميدع شاد حرابتة وية حمزة
كلسا ومطلة بلكاع
اعاينلهم اتذكر فدعم اختنك بلعبرة
ماادري شلون راح اتعود اشوف لمتهم وفدعم ماكو
كملنة لبيت سوالف وضحك وكشمش خاطت لبيت خوط هي وعمتي خلنة يلهث
قبل مانطلع صاحت ياا
اوكفو بعد الحمام ماغسلتة
خاب دكاااافي راح تطلعيلة خلقة جديدة
سحلتها سحل ليبرا واضحك عليها ماترضة تكلي زحمة
حملنة كلشي ورحنة للبيت
نزلو الولد لغراض ولبنات رتبنلي غراضي بغرفة ظاهر وحمزة
عمتي امريكا ضلت تحجي كلتلهم شني خالي وية الفروخ هاي انة عندي غرفة فارغة فوك كاتلها لتراب خل يجي يمنا
غضنفر مارضة كاللها مدة وكت نشتري بيت اكبر
لفروخ كبرت ولبيت ضاك علينة
ايدتة واني ابلغة انو لام مبلغ لاباس بي ومن فترة اريد اشتري بيت
بقينة اليل كلة نسولف وعمتي وابو ستار اجو يمنا
ليلتها مانمنة للصبح سوالف ومسامر
تذكرت الليالي الحلوة
تذكرت جدي وجدتي ولمتنة حوالين لصوبة
يوم ثاني نطلقنة لبغداد
بعد مااكلت كلبي بسعاد تريدني اخذها لبلقيس
ركبنة ورحنة انة وياها وصميدع وزوري كوة حشكت روحها تريد تشوف بغداد
وكفنة قريب على بيتهم
نزلو صميدع وزوري وبسعاد انة مانزلت
دكو لباب فتحتة الهم وحدة
بقو يحجون اعاين الهم شوية ورجعولي كالو هاي وحدة تكول اني مرة زياد
وبلقيس نهبت من زمان ومانندلها وين وعمامها متحلفين وين مايلكوها يكتلونها
ركبت بسعاد تدك وتلطم
نداريت عليها وانة اسوق احجي وياها
مالج غرض بيهم بلقيس ماتسويها مستحيل
لعد منيلهم هذا الحجي
اسمعي مني بلقيس اختج ماتطلع منها هيج تصرفات بس،يمكن هاي مرتة رادت تحرك كلبج
تعاي نروح للمدرسة مالتها ونسال عليها
اخذتهم ورحنة للمدرسة نزلت وهمة بقو
دخلت للمديرة سلمت وستفسرت عنها
كالت ماموجودة يمنا انتقلت من زمان
سالتها وين كالت مااعرف
شلون متعرفين ست ترة لكدامج بلإشراف واعرف الروتينيات شلون متعرفين
كليلي ناسية ممكن
بس موتكليلي مااعرف
ردت بارتباك
اي ناسية ناسية
زين ممكن تنطيني رقمها اذا عندج
لاوالله ممسوح من يمي
ممكن تصيحيلي اي وحدة من المدرسات صديقاتها
محد.يعرف اخبار عنها من زمان انقطعت
ست اترجاج اذا احد موصيج وخايفة مني
اني عوفيني اولي
بس اختها الها سنين تدور عليها وميتة على شوفتها هي ووالدتها
بفرحة سالتني
بسعاد
بسعاد اختها ؟،؟
اي بسعاد هاي برة بلباس
ياعيني
ست رونق ست رونقققق
تعالي هاي بسعاد اخت بلقيس الضايعة برة دكيلي على بلقيس ماعندي رصيد
اني هم ماعندي
شوفيلي هاي المطبقة المخطوبة شسمها لمياء اسمنها تخابر بخطيبها تلفونها بي خدمة
احجي وياها اكلها هاي اني عندي رصيد
شفت خبصتهن وحدة تخابر عليها وحدة لبست عباتها وركضت برا تريد تشوف بسعاد
اتصلت بيها
واخذت التلفون وطلعت ليبرا
مشيت وراها ليبرا وصلت يم لسيارة شمرت التلفون على بسعاد بخبصة تكللها هاج هاج هاي بلقيس احجي
عيني عليها تحاجيها
ودموعها
الو بلقيس
هاي انتي
ولج ماعرفتينيييييي
............
بلقيس
واني نايمة صوت التلفون يطب بحلمي
فزيت جريتة رديت لنومة بعيني
صوت انثوي
الووو منو
بلقيس هاي انتي
اي اني بلقيس انتو منو
ولج ماعرفتينييييي
اني بسعاد
بسعاد
زين والله وتذكرتي عندج اخت
لاتكولين هيج ماتدرين ششفت وشعشت من ظروف
شلونج كليلي شلونها امي
لحمد لله زينين بخير ورحمة
رقمج اثير شجابج للعراق وشوكت اجيتي
صارلي سنتين بس ماحصلتج خذني صميدع
رحنة لبغداد علساس لبيت عمو مااندليتة ضلينة نهبد ونسأل وتيهنا
تدرين سنين صارلي من تزوجت لارحت الهم ولاوصلت
تالي خلينا ورجعنا
وهسة شلون ندليتيني
هذا قيصر دلانة
لكاكم قيصر
حجيتها بفرح واني اذكر اخر حجايات الة من كالي انتي كل لضلي من ناسي لاتعوفيني
اي تلاكة وية غضنفر صدفة يم مدرسة عيسى ابني الزغير اخر العنكود
صوت حجي يمها وواحد يسالها كليلها وين مكانها
مدري شردت علي ورجعت سألتني
قيصر يكول وين مكانج
احنة يم المدرسة مالتج بعدنا
نطي لتلفون لأي واحد منهم انتي ثولة اعرفج
نطت لتلفون لرجلها
سلمت علي ونطيتة لعنوان بلمضبوط اسمع صوت المديرة ولمدرسات يحجن وياها هم يدلن بيهم
سديتة واني ارجف وابجي
ركضت لبست ورحت لبيت جواريننا لكيت لزفة رايحة وامي ونصير وياهم
وصيت بيبيتهم كلتلها اول ماترجع الزفة كلي لأمي ضروري تجي للبيت رح يجونة خطار
مريت بلمحل اخذت ببسي وكيك
طلعت فاكهة رتبت صينية
ركضت للمراية اباوع الشكلي
خليت شوية مكياج وطلعت جبة وشال لفيتة
لمدرسة عن بيتنا مسافة بعيدة
بس ماادري شبية نخبصت
مامصدكة راح اشوفهم
وصوت بداخلي يسال شنو حالة هسة
اكيد تزوج وخلف وعاش
مثل ماتزوح بامريكا
قبل مايجون اجت امي هي ونصير مرعوبة تكلي ياخطار ولج بسلا زياد ندلنا ويدلي خوالج ويسويلنا مصيبة
لايمة يازياد
صدك تحجين تخافين من هلفاشل
فرحي ام بلقيس افرحي بتج لزغيرونة بلطريق
هاي شجاي تحجين ولج
اي هسة اتصلت بية ملتقين بقيصر ومدليهم بلمدرسة مالتي وماخذين رقمي من لمديرة واتصلو بية هسة
وجايين بلطريق
من فرحتها بلكاع سجدت شكر وبعد ماكدرت تكوم تكلي رجلية ماجاي يشيلني
جبتلها مي شربت وغسلت وجها
بقت يم لباب كاعدة ساعة تبجي ساعة تضحك
بلمطبخ واسمعها تحاجي نصير تكلة راح يجون ولد
خالتك
راح يصير عندك اصدقاء تلعب وياهم
رحت علي اخذتة بدلتلة لبستة تراك
بقة فرحان مايدري شنو لسالفة بس مخبوص ويانة وفرحان على فرحنة
امي وصلت بيها تكلي امشي طلبيلنا من الجوارين فراش فراشاتنا ماتكفي
يباتون يمنا خوما نخليهم يرجعون
يضلولهم شكم يوم نشوفهم
هسة خل يوصلون والله كريم
واني احجي وياها ندكت لباب
كامت وية كومتها من خبصتها صار ثوبها جواها وعثرت
رجعت عليها كومتها
وتجيتلها للباب تقربنا ثنينا ونصير جوة رجلينا
فتحت لباب صارو كبالي.......
طالب..
دفعتني ومشت
بقيت وراها الى ان دخلت
ضربت لباب بوجهي وكالت
لتحط نفسك بعد ترة انت ممسؤل عني
مشيت اضحك
وية ماوصلت يم لولد لتفتت على فتحة باب بيت ام بدور واشوفها بساع طبت
اعاين متفاجأ هاي شوكت راحت موتوني عفتها وراي بلبيت
ضليت اباوع علبيت وارد اباوع علسيارة لطابكة ببابهم
الى ان نفتحت لباب
كلت ياالله واباوع عبالي رح تطلع
طلعو ٤ لابسين عسكري وثنين مدنين
ركبو لسيارة وام بدور وراهم بقت واكفا الى ان راحو وطبت وسدت لباب
بقيت واكف واعاين
ردتها تطلع ماكو
تالي رجت دكيت لباب طلعتلي لمرة
كلتلها امتنان امها تصيحها
شوية واجت
عاينتلي صفح مشت كدامي تفر بيدها وهمست كبررر
مدري اضحك مدري انقهر
نطيتها لعذر كلت طفلة ماحط عقلي بعقلها
عاينتلها طبت للبيت وسدت لباب
بقيت ببابنا ارش بي شوية وطلعت بدور تقربت على بيت انعام
كلما ارفع راسي الكاها تعاينلي وتشخص بية الى ان فتحولها لباب وطبت
دقايق وطلعت
من طلعت جنت انة واكف بلباب ليورا رجعت وطخت بية
عاينتلي بخجل وكالت لعفو ماشفتك
من يومها وصارت هاي لبت تعاينلي
اشوف منها نضرات وتصرفات جنت افسرها اعجاب
اباوعلها من تطلع متباوع على لولد تمشي وعينها بطريقها
حتة من اكون وية لولد متباوعلي بس من اكون واكف لوحدي
وبيوم جنت كاعد برا بليل براك لبيت تلفوني بيدي اخابر اخواتي
فاتت من يمي رايحة لبيت ام امتنان
عاينتلي وهمست
كاعد تخابر برا منين خايف
لاعليمن اخاف جاي اخابر اخواتي
هههههه حلوة هاي مال اخواتي ليش شارد برة لعد
عبن اختي عدها امتحان وتدوي مافهم شي من وراهم
اهاااا كلتلي
وانتي شلج غرض
لعفو
كالتها ودخلت جوة
عدت ايام اتصل بية رقم غريب
منو
اني بدور
شتردين
اريد احجيلك شي بس امانة مااريد احد يعرف
كولي
اني احبك
شلج بهلسالفة
والله احبك
من كعدتو واني اباوع عليك من شباك غرفتي ومراقبتك وماما تسولف بيك تكول اخلاقة حلوة وحتة لجوارين يمدحون بيك
اني حبيتك من حجيهم
شوفي يابت لناس انة احب بنية وناطرها تكبر واعرس عليها شوفيلج واحد غيري وتصالفي ويا وفتحي هيج مواضيع
منو هاي الوحدة
مالج غرض
منة اكيد
لا مو منة
لامنة لأن هية دوم تشكي منك تكول يباوعلي ويتدخل بية
سديتة بوجهها
ضليت متفاجأ من جرئتها
عدت ايام ماعافتني بحالي تدز رسائل حزينة وعتب من رقم غريب بس،عرفتها هي لأن ماعندي احد غيرها يدز
جنت راجع من لشغل ستوني نزلت من التكسي واشوف التانكي مالتنا فايض
طبيت سديتة وصعدت اشوف لطوافة شمالها
واني فوك لسطح واشوف منة بلحديقة هي ووياها واحد ضخم لابس ينطرون وقميص
بحزامة سلاح وبرة سيارتة موديل حديث
انة شفتها واكفة وتسولف ويا لو صعد لدم براسي
نزلت مسرع
ضربت لباب بكل قوتي
طلعلي هوة ينتر هاي ليش تضرب لباب هيج
دفعتة ودخلت سحلتها حييل
جر ايدي ونتر
هاي شدتسوي لك شيل ايدك عنها
شيلها انت لااكسرها الك
هاي بت عمي
امشي ولج كدامي
سحلتها للبيت وهي الطريق عبرنا تبجي وتتوسل بية لاتحجي لماما
وصلتها يم لباب دكيت لباب ودخلتها
جرت ايدي يم لباب تتوسل لاتحجي لماما
طبي جوة ويصير خير بكد لقندرة وواكفة وتدكين ويا سوالف ولج شنهي هلصلافة
انة اعلمج
دفعتها ليجوة وسديت لباب
طبيت لبيتنا افور
صحت على بثينة تسويلي جاي
وانة اشرب دك تلفوني اكثر من مرة مارديت
ماالي خلك احجي مخنوك احس اريد انفجر
دك رنة مال رسالة
شلتها عاينت مكتوب
هاشفتها الزغيرونة الي متانيها تكبر وتتزوجها
شفتها على شنو راسمة
ترة موبحالك
كلبي لعب
حيلي كلة يرجف خايف عليها
قررت احجي لأمها
شوية وندكت بابنة لداخلية
فتحتها صارت بوجهي
وخرت عن لباب دخلت تقربت الي تتوسل
فدوة لاتحجي لأمي
والله يحبني ويريد يخطبني
خايبة ياحححححب ولج وينج وووين لحب كلة عمرج ١٤ سنة
لااني موزغيرة بدور كالتلي يحبج وشاريج ظابط وزنكيل ويدللج
سيارتة راقية وبيتة وحدة
اني هاي مواصفات شريك حياتي
امتنان صيري ادمية وجري عدل وشيلي هلسوالف من راسج واذا شفتج بعد يم بيت ذني وحك الله مايصير خير
ماشي ماشي بس انت لاتحجي لأمي عليك بروح عمو فدعم
غصيت من جابت اسمة
حسيت بعجز
كدامي اشوف امانتة تتلوث بافكار متناسب عمرها
افكار شكد احبها بس ماتجرأت احطهن ببالها
ولاتقربت الها طول هلفترة
اكول زغيرونة مااشغلها بهيج سوالف
خليها تعيش طفولتها ولمن تصير ١٨ اخطبها
اشرتلها روحي مااحجي لأمج
بس ياويلج لوسمعت واصلة لبيتهم أو شفت هاي لصلفة جايتج للبيت
ماشي ماشي
شكرا عمو
احس حجايتها هدت حيلي
كعدت بلكاع احس شي جاثل على صدري
اندعي يارب مايمسها سوء
ورة يومين شفتها هي وامها رايحة الهم
طمأنيت اقلها امها وياها
ورة طلعتهن بشوية شفت واحد طلع من لبيت يتلفت بساع مشة للشارع
ركزت بي نفسة
ركب سيارتة الي خالها بعيد عن لبيت
احس روحي فارت
تحلفت بيها
وتانيت يجي اليل ووديت بثينة عليها تصيحلها
رزلتها لعبت بيها لعب
رجعت هددتها بامها
حلفت كالت كعدت يم ماما معلية بلي جان يمهم لاشفنا ولاشافنة
ماعندي حجة صدكتها
ولا الي سلطة واكدر اضربها واخوفها
........
انعام
عدت فترة احنة مرتاحين ماعدنا شي
منة تتوسل بية علروحة لبيت ام بدور مااخليها ولاأمن
كد مالحت تعبتني
كلتلها امشي ورحت وياها
بلبداية اول ماكعدو ماجنت امنعها اكول خطية تغير جو بس وراها من صارت عليهم رجل
كمت اخاف عليها منعتها من لروحة
اخذتها ورحنة الهم
بقيت اني كاعدة يم امهن نسولف وهي جوة يم لبنات
اقل لنص ساعة وصحتلها كلتلها يلله
رجعنة للبيت جانت فرحانة
سوت هي لعشة
وعدت مدة هي فرحانة ومتونسة
وراها بدت درجاتها تتراجع بلمدرسة
صحتها انتكست
يوم عن يوم تذبل
لاترضة تطلع لاترضة تطب
اسالها ماما شبيج تكلي مخنوكة مابية شي
الى ان بيوم جنة نايمين وفزيت على صوت صراخها
ركضت الها
على جربايتها وتصرخ مخنوكة
فززتها جانت تحلم
حيل حضنتني وتهمس الي ماما اني اريد اموت
اسم الله ماما شنو هلحجي
شو فتحي عينج حاجيني بعدج نايمة
فزي منة
هاج ماي
ستمرت تون
اسألها شبيج
تكلي مخنوكة
مشتاقة لبابا ولعمو فدعم
الى ان عفت راسها بحضني وهي تردد باساميهم فطرت كلبي وزودت همومي
جنت اهمس الها
اخذج لعمج قيصر هلأسبوع بس لاتبجين
ابوج وعمج فدعنم وين الكاهم ومنين اجيبهم الج
كل للي اكدر علي اخذج لقيصر .....يتبع
تعببببت 😭
٤ الاف و٥٠٠
ليش تفاعلكم هيج جماعة الواتباد 😢
باجر انزل بلكروب توضيح بخصوص لبارت لجاي ضروري تقرو
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!