#خنجر_الغضنفر
#الجزء_الثاني_بارت٤٩
#حنين_حاتم
بقوة ايدة دفعني من صدري علجرباية وآعتلى جسمي بكل قوتي دفعتة وصرخت
ماماا الحكينيييي
ايدة على حلكي بقوة يخرس صوتي
جنت بس بلداخليات بسهولة كدر يجردني منهن
صوتة يهمس يم اذاني بغضب
سنين عشرتي مااغزرت وبعتيني برخص بحجة لمى بس اسبوع يم قيصر غزر بيييييييج
قيصر لعافج ونهزم وتزوج وعاش وراجع هسة يريدج تسلاية
عضيت ايدة بقوة
وخرها وضربني راشدي
صرت ادفع بي واصرخ
ولك انت شدتحجييييييي
ياقيصر يابطيخ
عشرتك كرهتني صنف الزلم كلة
ولا اني مثلك ناقصة غيرة حتة اخون
وخر عنييييي
وخر ياحيوان
جنت اشوفك حيوان اتاري لسحر معلي
انت فعلا حيوان
اني حيوان يا...........
صرت اصرخ بعلو صوتي استنجد بيها تخلصني
ماماااا لحكيلييييي
صوتها برة تضرب علباب على كيف وتكلي صوتج انفضحنااااا
ولك زياد عوفها عووووفها تخبلت صدك جذب راح تخبلون لطفل
اسمع صراخ نصير برة
صرت اضرب بي بهستيريا وفوضوية يريد يسيطر على ادية ماكدر
ضربني حيل على وجهي ولوة ايدي
لزم ادية ثنينهن قيدني منهن وباقي جسمي يستغيث جوا
كل ايامي ويا مرة وكل ذكرياتي منة توجع
بس مثل هليوم ماعشت ولا راح اعيش
رجال يغتصب زوجتة هاي الي ماسامعتها بكل عمري
احساسي تجاهة كأن غريب وديتقربلي
شعور مقزززز
سنة موشوية
سنة اماتت حتة المودة والرحمة
وماعدت احس بي زوجي ولا احس اي شي تجاهة
ليـش ياربي هيـج صـار
معقـوله انـي استاهـل كـل هذا
معقولة ممسوية بحياتي شي زين يشفعلي
شي اتجازة عنة بلخير
تعبت من روحي خلاص بعد مااريد اكمل وياها !!!!! جنت اصرخ يارب خلصني من روحي ماااكدر استمر وياها
روحي ماعيشتني بس لتعب
فاركَني عنها يااااااارب
على كد الصراخ الي صرختة امي ونصير برة ضربو علباب بكل شي يجي كدامهم
ولحيوان لفوكي فاقد
اصعب شعور من تتعاقب المرأة بعلاقة بفراش
اسمع ضربهم علباب كل مرة بشي وكل مرة يعلة صوت لضرب
امي جانت غايتها تسكتني خوفا من لجوارين!!
وابني جان مفرفح علية ومتهستر من الخوف
بقيت اضرب بي واصيح جنت فاقدة
موبس كره الة وللي ديسوي بس ماردتة يكسرني
ولاردت انولة الي ببالة ويروح تعب سنة علخالي بلاش
بس ماكدرتلة
ماتصورت الرغبة تخلي لأنسان بهلقوة
حرفيا تحول لحيوان حتة لقوة لبدنية الي عندة مو كأن انسان
وتقرب الي باحقر طريقة ممكن يتقرب بيها رجال لزوجتة
طول مااني جوا جنت اصرخ واضرب واشتم بي ماستسلمت ولو ثانية ولو رمشة
من حجم لأصرار الي بداخلة تاكدت هلشي ابد مو رغبة
جان بهلشي ناوي يكسرني
ناوي يربطني بي للموت
وميسمح باي فرصة للخلاص منة
لهلسبب جانت مقاومتي بحجم اصرارة
لاخوفة صراخي ولاردعة ضربي ومهامشي
ماجنت احسة يتلذذ بلي يسوي جان يتشفة مني وبس
حرفيا جنت جوا في حالة مخاض
مخاض نولدت منة بلقيس ثانية جديدة غير عن النسخ القديمة الي نولدو من عشرتة
وهلمرة نولدت بلقيس جانت تهمس لنفسي بسري
هاي اخر مرة تنزل دموعج بيها
هاي اخر مرة يكسرج زياد
اني بلقيس
بلقيس اكتب هذا المشهد حرفيا باصابع ادية
اصابع ادية الي تغير حالهن من كد ماعضيتهن ندم على ليوم الي قبلت بي اكون لزياد بدل مااكتل نفسي وارتاح
اكتب هذا المشهد واني بحال يصعب علية وصفة
من هول الشعور حسيت هلأغتصاب راح يكون ابدي ماتخيلت رح يخلص ولاتخيلت بيوم راح يكون شي اكتبة واني ارجف وابجي
اكتب واني استذكر مرارة تجاوز الشي الي تحسة ابدي من غير زوال
اكتب عن اللحضات الي جنت اصرخ بيها
كسروني ياااارب
واني يتيمة
اغتصب عذرية اخر ذرة ضعف جانت بداخلي
ومابتعد عني غير على ضرب لباب بقوة وصوت ذكري برة يصرخ اطلع اطلع يانذذذذذل
كام على حيلة متفاجئ جن احد ذب بوجها مي بارد جر ملابسة شلون ماجان لبس
ركض علباب
جريت لجرجف غطيت حتة راسي
فتحها
مااسمع بس صوت لضرب ومدافع وصياح زياد
لتتدخل يابا لتدخل اني اريد اربيها لهل........
اطلع منها يابا
اطللللع من بيتي وعوفني اربيها لحد يتدخل
يابيت يابييييت
ولك انت فلس مادافع بي تضحك على نفسك ترة كلشي ادري
متريدك خلص عوفها انت تريد تبقيها على ذمتك تكوم تزني بيها
الرجال الي يتقرب لزوجتة بلغصب ترة يعتبر زاني خاف متعرف خل انورك
عوفها خليها عايشة وية امها لاعدها زايدة ولاناقصة كاعدة على ابنها وهي على ذمتك لاتطلكت ولا رح تكون مطلقة
تزوجت عليها لمى وكسرتها ومتريدك
حقها
كلشي بلغصب ينوخذ إلة الحب والرغبة
اسكت يابا انت كلشي ماتدري خليني علتي بصدري ضامها وساكت
ذيج سالة حالي وهاي هم
شمسوية هاي المسكينة
اشو شايلة بيتك وابنك وشايلة روحها ولجوارين تخلف بأخلاقها
لايابا ليغرك الحجي
الخافي اعظم
شنوة لمخفي زياد بلقيس درة بس احنة ماعرفنا نحويها وماعرفنا قيمتها غير من عاشرنا لمى وشفناها شنو من طينة نكسة
بت عمك ذهب صافي بس انت ماتتعاشر ابني واعرفك
محد دواك غير لمى
لتطلعني من طوري يابا
لمى مو انتو ردتوها موانتو كلتولي لتفسخ خطوبتك منها خليها احتياط اذا شالو رحم بلقيس اخذها واذا ماشالو افسخ منها
مو انتو لقنعتوني اتزوجها
غلطانين جنة ومعمين على عيونة
ومالنة بلطيب نصيب
هاي شوفة عينك سالة حالنة اني وامك وماجايبتلنا غير الحجاية من الجوارين اسمها صوتها طالع وعباتها براسها ومن بيت لبيت
اي هذا اختياركم لتحجون ولاتلومون لومو نفسكم
مااكلك لمى زينة بس اقلها عاينتني علدنيا وصايرة وياي موضدي
اقل مابيها لازمتني وصايرتلي قاصة
وكلبها علية كلما تشوف عندي فلس تكلي جيبة اضمة الك وجاي تشغل فلوسي وماشاء الله ربح ممتاز
مومثل بت عمي سجينة خاصرة وكلما شفتها تعيرني بتقصيري
لو اترسلها لبيت ترس هم ماينملن عيونها
جنت جوة مغطية راسي وابجي
امي رادت تطب يمي قفلت لباب وماخليتها لأن لوما هي تنطي وجه وتلفي ماجان كدر يسوي هيج بية
ولاجان استضعقني
لو صايرة وياي ماجان تجرأ يكسرني بنص بيتي
جان حسبلها الف حساب وفكر الف مرة قبل ميسوي هلشي
من سمعتة يحجي وية عمو روحي فارت
وصعد الدم براسي
كمت لبست ملابسي شلون ماجان ولبست عباية امي
بهلشي جنت اريد اوصلة انو الي سوا مومعناتة اني زوجتة
جان ويبقة غريب عني
لان روحي هي الي نفصلت عنة وهذا اعظم انفضال ممكن يحدث بين اثنين ولورق مجرد وثيقة لااكثر
طلعت برة عمو وكف على حيلة تقرب الي يريد يبوس راسي
دفعتة من صدرة وصرت اصرخ
راح ادعي الله بكل يوم وكل ساعة يشربكم من الالم الي شربتو الي واني مااستحق ذرة منة
عسا حسرة كلبي ولتنهيدة التخنكني كلما اسمع اسمك وحوبة كسرتي يكسرن ضهرك يازيااد
اريد الله يشوفني بيك يوم اسوء من المر العشتة وياك
اطلعو برا بيتي
اطلعوووووووو
الله ليوفقكم
الله يكسركم وينتقم منككككككككككككم
عسا حوبتي لاتعدتكم ولارحمتكم
عسا كسرة كلبي بعزيز كلبووووووبكم
اطلعوووووووو
بلكاع وكعت اصرخ وراسي للسمة
اني هنا يااااااارب تشوفنيييي
اني موشفافية ليش متشوفني ياااااااااارب
هاي دمعتي موتهز عرشك
شوكت يهتنز عرشك و تعاينلي ياااااااارب
لااني بسماك ولا اني بأرضك
لمسات امي على متوني تهمس الي
كافي يمة انفضحنا وابنج راح يتخبل لبي كافي
انفضحنا؟؟؟
هذا الهمج
اريد اصرخ ليوم بكل مابية من قوة بلكي تسمعيني
بلكي تبطلين تتجاهليني
بلكي تحسين بكسرتي ولوعة كلبي
ولج يوم اني بتج موزياد والله موزياد
ليش تكولين هيج ماما
شلون مااسمعج ومااحس بيج
فرفحت عليج برا
بس ماالة داعي كل السويتي وصراخج ماجاب نتيجة غير الفضايح
رجلج هوة موغريب عنج ليش هيج تصرخين
خبلتي الطفل وحيلي راح من وراكم
لو واكعة من طولي هسة شتسوالكم
لاماتوكعين يوم لتخافين
محد.يوكع هنا غيري
تقربت لنصير اريد احضنة
خايف مني
جريتة لصدري شبكتة حييل
كل حنين وشجن تجمع بية من شبكتة
وصوتي يتمتم الة شوكت تكبر ياماما وتسندني
وشلون تسندندي وانت هذا حالك
طبيت لغرفتي واخذتة يمي وقفلت لباب
دكتها امي اكثر من مرة
صاحت تعاي تغدي نطيني نصير خل اغدي توسلت رادت ماجاوبتها
بقت برة تحجي وتكلي جاوبيني
ولج احجي بيج شي ليش متحجين
ماحجيت شي
نصير بقة من ورا لباب يحاجيها كوة تسمعة وكوة تفهم علي
حسيت هلكانة وغلبني النعاس
نمت ودعائي بسري يارب كون مااصحا
فزيت على صوت نصير يوعي بية ويبجي
فتحت عيوني
صوتة يهمس ماما جوعان
فتحتلة لباب وطلعتة
عدت ايام لااداوم ولا اطلع من غرفتي
امي تدزلي اكل بيد نصير
لو اكللي لكمة لو مااكل
ماجان عندي طاقة حتة لأيماء راسي
تمنيت بس تنتهي هلأيام وخلص
لمعاونة لثانية اتصلت بية اكثر من مرة تبلغني انو محتاجتني بلمدرسة ولشغل تضاعف عليها وتلح علية اداوم
اتصلت بلأدارة وطلبت اجازة بدون راتب
ماجان عندي رغبة اطلع من لبيت ولا اشوف بشر
متمددة بفراشي واسمع صوت عمي برا
شوية واجت امي تكلي طلعي يريدج
ليش طببتي
بعد كل لصار وتدخلي
ماما ليش تخلينة نخرب اني وياج
يعني شلون اطردة
بلقيس ليش تكبريها رجلج ونام وياج قابل ذبحج لو جاب عليج زلم للبيت
روحي ماما روحي ابوس ايدج
وكليلة لعمو لبيتي ليوصل ومااريد اشوف خلقة اي واحد بيهم
وزياد وين مااشوفة انزع نعالي واضربة بلشارع
اي عفية عليح
صيريلي ضيم جديد
ماكافي علية ضيم ذيج الماعرف عنها كلشي
ماكافي علية اليل يمر علية اشهر واني افكر بيها
كلشي مابيها لتخافين عليها
هي تعودت تعيش بدوننا
احنة موااهلها بيت حجي عكاب اهلها
تردين اتصال منها
هية من جانت هنا بلعراق مااتتصل بينا ولا تذكرنا بلسنة حسنة
تريدها هسة من طلعت تتصل بينا
عافتني وطلعت تهز ايدها
بقيت اسمع صوت حجيها ويا برة
فهمت غايتة جاي يريد يصلح بيننا بفيت اسمع لصوتة واضحك
اضحك على الثقة الي خلتة يفكر انو ممكن اكون بهلسذاجة وارجع لزياد
والله يام بلقيس هوة ندمان ومقهور حيل
يكول ماادري شلون هيج سويت
بس هوة مقهور منها
يكول تريد تطلك مني وتاخذ قيصر
حلف يمين يكلي اكتلها حلال ومااطلكها
واحنة هم بلقيس مانتخلة عنها
مثل ميكول المثل جرب غيري وتعرف خيري
ومع لأسف ماعرفنا خيرها غير بعد فوات لأوان
بس ان شاء الله ترجع لمياه لمجاريها
واني ناوي اجيبكم يمنا بلبيت ام زياد تعبت مومثل قبل وهلي المسمومة لمى نودي عليها تعينها تتحجج وماترضة تجي
ولبنات هم عدهن بيوت ورجولة وخلفة مايكدرن يومية يجن
نجيبكم يمنا وعيننا عليكم واني اسد عازتكم
ادري بأبني مقصر وياكم
واني زياد افصم ضهرة اذا يأذيها لبلقيس
_والله ياابو زياد اني مابيدي شي
بلقيس راسها يابس تدري بيها ولا اكدر اقنعها ولا اجبرها وهوة هم الله يسلمة ماخلا خط رجعة
كلش مصخها بآخر سواية الة
بقيت استمع لحجيهم وافور دم
ماطلعت ولاكبرت راسة
عدت ايام جنت بيهن تعبانة
احس اشواك لسوا بية زياد لساهة مالية جسدي
كلشي تجاوزتة وتعدا وصار سوالف
إلا هلشي احس طرحني بلأرض وصفيت جثة بلا قدرة على الحراك
نايمة وصوت امي توعي بية بعصبية
كومي كووومي هذا الشفية برة شجااابة وشدلا ببيتنا
.............
قيصر
عدت ايام اني انتظر اتصال منها بلهفة
وكل يوم اصحا بنفس اللهفة وانتظر لحد مايجي اليل ويميت لهفتي
اكثر من شهر عدة ماكو منها اتصال
تعبت واني انتظر
وشكد اريد انتظر
عدا عمري ولا اني لحصلتها ولا اني لحصلت اهلي
بعد ماعندي طاقة اضيع لحظة بلأنتظار
كافي لضاع مني
كلش كافي
لبست بدون تفكير ورحت للمدرسة مالتها
ولحمد لله اكتشفت انو مغيرين لمدير وخالين بدالة مديرة
انسانة خلوقة استقبلتني وحجتلي عن حال بلقيس
وفهمتني انو مريضة وماخذة اجازة صارلها مدة
ماكدرت امنع نفسي
خوفي عليها وقلقي خلاني انسا اخر مرة رحتلها شنو صار
ركبت بدون تفكير ورحت لبيتها
دكيت لباب طلعتلي امها
سلمت وطلبت اشوفها
من لباب شرطت علية احجيلها بسعاد وين يلله تدخلني
وكلتلها ماشي
وماعرف شراح اجذب عليها
دخلت جوة صاحتها الي
بقيت كاعد بلأستقبال انتضرت هواي
شوية ودخل يمي طفل منغولي
ابيضاني احمر تجمعت كل براءة خلقها الله بوجها
جريتة بوستة
على صدري خليتة ادور ملامحها بتفاصيلة
ومن نحرة بكل حيل شميتة وصوت كلبي يصرخ
افيييش ياريحة هلي
خطواتها نززتني
رفعت راسي
بعيونها اومأت الة راحلها ماعرف شيسألها
بننفس الهدوء والأتزان
تقربت سلمت وكعدت كبالي
شلونج بلقيس
بتسمت بياس وردت
بخير انت شلونك
عايش ولحمد لألله
لحظات صمت جنت ادور بيهن على حجي اكولة
صوتها نززني بتساؤل كالت
تفضل قيصر
شنو لجابك
اجيت اسالج عن اهلي وبلباب اكتشفت من امج
انو ماعدكم معلومة عنهم
كلت اطب اشوفج واسأل عنج شلونج مالونج
وعرفت هسة شلوني مالوني تكدر تروح
فتحت عيوني متفاجأ من ردها المجحف بكل لمقاييس
عجب بعدج ماسامحتي رغم وضحتلج اسبابي
وليوم عندي استعداد اسوي كل لتردينة بس تسامحيني
كمت على حيلي تقربت الها
بلقيس
عوفي وخل نعوض الماعشنا
بصوت عالي نترت بية اطلع برا بيتي قيصصصر
لزمت ايدها
بلقيس شبيييج كليلي شبيج ذاك ليوم شحلاتج وبيدج اخذتي لرقم مني وبعيونج شفت الف كلمة شوك ووله
شحدا مابدا
يومية الج حال
مااااريدك ولا اريد بحياتي رجال
ارجع منين مااجيت وشيلني من حساباتك
لان ماراح اصيرلك بيوم
اختصرها الك حتة اوفر عليك تعب
الكدامك سعت للخلاص من رجال مر بكل مااكوبهاي الكلمة من دلالات معنوية
وباعت حتة ذهبها حتة تخلص منة
ونالت جزء من حريتها
وتحسب يوم يوم حتة تكون مطلقة شرعا من عدة
تعرف شنو سوة حتة يكسرها اكثر وحتة تبقة تحت جناحة ورحمتة مهلكة
اغتصبها
الكدامك اغتصبها رجلهااااا
فهمتتتتتت
لو اصرخ بعد
اطلع برا بيتي وبرا حياتي
كل الشفتة والداشوفة انت وامانتك جنتو سبب بي
ايدة عصرت عكسي حيل
وصوتة يهمس بغضب يم اذاني
تتذكرين بيوم قسمت وكتلح يابلقيس الي يكسرج اكسر ضلعة
تتذكرررررين من حجيتها ومانفذت
ليوم انفذذذ
طلع مسرع يهرول حافي مالبس حذاءة
لحكتة ليبرا
حاولت امنعة
مالحكت بي
بساع لبست عباية امي وركضت ورا
عبر لشارعين عرفت غايتة محل زياد
جنت اصرخ ورا قيصر لاااء
لاتزيد الطين بلة لبية كافيني
لاتأكدلة شكوكة وتثبت انو اني فعلا غايتي لطلاق منة حتة اتزوجك
لاتطلعني خاينة واني بعمري ماخنتة ولو بفكري
لاتركب لحلق علية
ماسمع كل ندائاتي
بقيت امشي مرة ومرة اهرول
من وصلت يم المحل جان عبارة عن تجمهر بكل لأعمار
وكلما اتقرب تتضح الي لصورة
راسي حسيتة اثقل من انو يحملة جسمي
ورجلية باردات للحد الي حسيتهن إصطكن
شفت قيصر فوك زياد ولناس تسحب بي منة
على وكفتي واجت دورية شرطة
طشت لناس محد بقة غير كم واحد
توضحتلي لصورة اكثر
زياد لازم راسة ولدم على وجهة
وقيصر ينهد وينفلت
بلسيارة ليورا صعدو زياد وعمو وقيصر وشكم رجال جانو يفاككون بيهم
رجعت للبيت ادك والطم
كلة مني
ليش حجيتلة
ليش سولفتتت
جانت غايتي افهمة انو لخلاص من زياد شي اشبه بلمستحيل فلا يتعب نفسة ويبتعد عني
لأن قربة ميسبب غير المشاكل
وانو نصير لبعض كطنة ويشيلها من اذانة
بس ماتخيلت هيج تصرف طائش راح يطلع منة
بقيت لليل انوح والوم بنفسي
ماحجيت لأمي تاكل كلبي بلزايد
ساعة ب٨ بليل ندكت لباب
ركضت للغرفة حبست نفسي
صوت ضربة علباب
ادية على اذاناتي وجسمي يرجع
رغم قفلت لباب بس بعدة لخوف بية
خايفة يعيد لسوا بية ذاك ليوم
صوتة ينتر
شفت بعينك يابا
موكتلك عدها غاية ونيتها سوووء
كتلك هاي مومجرد صدفة
المدام مخططة
والله اعلم يمكن من زمان وهي على ذمتي تتواصل ويا
بقيت اصرخ والله ممتواصلة ويا
ولا اعرف كلشي عنة
ولا كايلتلة يجي
ولو ادري بي جاي ماافتحلة لباب اصلا
لااريدك ولااريدة
عوفوني عتقوني
بقة يضرب علباب ويصرخ فتحيها
مافتحتها
بقة يهدد بية اذا متفتحيها اخذ نصير
ركضت علباب فتحتها
اول مافتحتها سحبني
دفعتة وصرت اصرخ
عوفني وعوف ابني زياد
ابني لتحطة بلنص ماالة ذنب بكلشي
الي تريدة مني شنو بلظبط
مد ايدة راد يضربني
امي حيل دفعتة من صدرة وكامت تصيح
عوفها زيياااااد
بلقيس لامتواصلة ويا ولا عدها شي
ولدليل جيتة للبيت
لو عدها تواصل ويا مستحيل يجي للبيت ويطلب يشوفها ويتوسل بية على هذا الشي
واني سمعت حجية وياها
جاي يسأل عن اهلة وبس
زياد:- وبسسسس قنعي نفسح بيها هاي
لو جاي يسأل عن اهلة ماجان اجة للمحل وضربني
بس مبينة بتج شاكيتلة واجة ياخذ حقها للمدام
اجة يضرب رجلها لأن نايم وياها
وخري خالة لتتعورين
بصعبية دفعتة
انت شو متحترم
ببيتي وتريد تمد ايدك على بتي
خاف ذاك ليوم سكتتلك ترة سوايتك موشوية
اكسر لشر واطلع برا لتخليني اسوي شي ميعجبك
تدافعيلها ؟
اي ادافعلها لان ماغلطانة
اني وياك مووياها وانت تعرفني مااقبل بلغلط
بس هلمرة بلقيس ماغلطانة ولصار كلة صدفة
ماشي وين ترحين مني
نومتة الج بلسجن وهسة احرك الدعوة واخلي يخيس
بسيطة يابلقيس نتواجه
طلع هوة وعمو
وبقيت اتلقة ملامة امي الي تأكدت انو هي متسنطة علينة وسامعة كل لدار بيناتنا
عدة اسبوعين زياد يتردد علينة لاكدرت امنعة ولا كدرت اسوي شي
وكلما يجي يتعمد يحجي بسالفة قيصر
وفهمت من حجية وية امي
قيصر محكوم اربع اشهر
اتصلت بلمحامي الي توكل بقضية طلاقي
سولفت الة
كلي لتخافين هي مشاجرة بسيطة وهسة يطلع بكفالة موظف مدني أو مبلغ مالي
بس نبهي ميعيدها لأن اذا تكررت احتمال تزيد محكوميتة
طلبت منة يروح للمركز يسألي عنة اذا طالع لو بعدة
لأن ماعندي احد يروح ويسأللي
لولد ماقصر كال تدللين
يوم ثاني اتصل بية كال ماهوة طالع
بليل جريت التلفون واتصلت بلرقم الي نطا الي
رد علية صوتة مبين جان نايم
دموعي نزلت وكوة طلع الحجي مني
شلونك قيصر
مثل لفز وصوتة تغير كأن هلكلمة خلتة يصحصح
بلقيس هاي انتي
اي
شعجب
اريد انبهك متوصل لبيتي ولا تحاول تتواصل وياي وتتساني
مااوصل لبيتج ولا اتواصل وياج مكدور عليهن
بس تتصورين اكدر انساج.
لو اكدر
جان نسيتج من زماان
انتي المرسا الي وكفت يمة سفينة حياتي وماكدرت تبحر بعد
يمج تكسرت اشرعتي وماكدرت اخطي خطوة بعد
الشفية داز علية ناس يريد كعدة وفصل
يريد رد اعتبار من عشيرتي
وانة اهلي مااندللهم درب
انت ويا قيصر طلعوني من بينكم ماشفت منكم بس لأذية
هوة جلب مال فلوس نطي شكم فلس يسد لسيرة
وبعد لاتوصلي خليني سالمة على روحي لايلبسني زياد تهمة زنا وخيانة
خليني سالمة على هلروح لخاطر ابني الي مالة بهلدنية غيري وروح منين مااجيت واخذ ذكرياتك وياك
انة مارايد اذيتج ولاناوي عليها
بس حجاياتج طيرن العقل من راسي
خلينة نفتح صفحة جديدة
انسي لفات وخلينة نفتح صفحة جديدة
وزيااااد
تتصور يعوفني
انت تحجي لوحدك قيصر
زياد مايعتقني اعرفة وسواها شغلة عناد يتصور اخونة ومتفقة وياك علطلاك حتة نرجع
ماطولة يتصور هيج خلينة نسويها من صدك
انت بكل لأحوال مشكوك بأمرج عاد خليها من صدك
اعتقني قيصر
اني كلب ماعندي موتو كلبي موتو
لابية احبك ولااحب غيرك اني روحي مااحبها
جذابة بلقيس
اي جذابة بس مااريدك
مااحصل غير المشاكل
واني تعبانة
ولخلق هلروح وجعلها مداس لزياد وامة تعبااااانة
اني ليوم بشحمي ولحمي اكلك ياقيصر
فركَاك ولا ملكَاك
روح وعسا الله يوفقك
ومسامتحك احجيها من كلب ولسان
مساااامحتك
تحب تتزوج شتسوي سوي
وعوفلي لتعب ولمرار اتجرعة لوحدي
اني مقسوملي التعب لو اشرد لآخر لدنيا لمتعوس متعوس
خليني سالمة على هلروح وعلى وليدي
ويكفيني اسمع انت عايش وبخير
واسأل الله الماجمعنة بلدنيا يجمعنا بلآخرة
وحبج لبية وين انطي وجهي بي ويييين
حبج الي لف بية الدول ينقلني من خيبة لخيبة
وبجنطة سفري خليتة وجبتة وياي
وجبتلج ويا ايام مرض وحبس وغربة وانين وخوف جان يضحك الناس علية
اريد ارتمي بحضنج وارتاح
بلقيس اترجاج لاتضعفين
كليلي اكتل زياد
ماتردد لحضة
ولج اني بيج وبلياج ميت
بلقيس الدنيا كسرت حيلي وخذت مني عزاز لتكسريني اترجاج
انتي اخر خيط امل متمسك بي حتة استمر بهلحياة البشعة
ماجنت اشوف النسوان
جنت اشوفهن بلقيسات منين ماالتفت
بلقيس ياثورتي لخاسرة
ياحلمي النباك من على رموشي غفلة
بلقيس يا ملكة على عرش كلبي بلامنازع
كليلي ذكرياتج شلون اتخلص منها
إلة احرك نفسي لأن تارستني
بلقيس
بلقيس
جاوبيني
لاتبجين احجي
انة اعرفج قوية شوكت صرتي بهلضعف
وين بلقيس الي وكفت بوجه ابوها علمودي
وين قوتج
جاوبيني
ولج كافي بجي
تكليلي انساج معناها توديني بيدج للهاوية
اني جان عشمي ارجع للعراق واصلح خرابي بيج
احجي
ولج ردييييي
ردي مو فرفحتي كلبي
بلقيس
بلقيس
وستمريت اصرخ بلقيس
وبس صوت بكائها لمخنوك يرد علية
ومرت لأيام كلشي تغير إلة حبها
وصدها الي جان اكبر من استيعاب عقلي
سنة عدت اني ضيعت روحي بيها
روحي الي عانت وذاقت الويلات ليوم كانت هاي اعظم خساراتها
وقررت الهرب من بغداد
لأن مالي سلطة على روحي
بليل يستيقض حنيني الها وبدون اقدام يذبني كدام بيتها
ابقة واكف واعاين الة مجتف مااكدر ادك لباب ولا هي لترد على اتصالاتي
ياما وياما نمت كبال بيتها ويفززني صوت هورن سيارة
ايام عدت علية اني متأرجح اتخبط بأحزاني وحنيني
لااهل لاحبيبة لاانتماء
تعببببت
قررت الهرب
منهة من ذكرياتها من شعور لضعف الي احسة واني اوكف كبال بيتها وبيني وبينة خطوات بس ماكدر ادكة
عديت العدة
والمحافظة اجدادي عزمت الرحيل
بمنطقة بعيدة عن ديارنا بمركز المدينة سكنت
بقة لمدير واولادة يتواصلون وياي واجوني مرتين للبيت
المدير مالتي نصحني على تقديم على الدراسات العليا كلي منها تتلهة
ماطول ماعندك التزامات ولاشي يعيقك
امتحنت وجتازيت امتحانات القبول
وقدمت رسالتي ونلت الماجستير بدرجة جيد جدا
وبهلفترة بارق خطب وعزمني على خطوبتة بس مارحت
وعدتة على زواجة اجي
ومشت لأيااام
حالوني علأشراف
وهلشي اجة من مثابرة دؤبة
ماجان باقيلي غير شغلي لهذا جنت اصب بي كل طاقاتي
طول هلمدة والدة بارق ووالدة يلحون علية بلزواج وكل فترة جايبيلي بنية شكل وتعال نخطبها الك
شخطب واني لا اصل ولا فصل
اهل لبنية ميردون عمام خوال اهل
شلت هلفكرة من راسي ومشت حياتي
اطبخ واشتغل وانام
بارق كلما يتعارك وية زوجتة يعوفها ويجي يبقالة يمي اسبوع اكثر
لبنية بت خالة واهلة ميخلوها تطلع من يتعاركون يكلولة انت اطلع
يجي يمي يونسني ونطلع اني ويا نغير جو
بهلفترة لناس نست لسوالف لقديمة
ورجعت لحياة طبيعية
صح بغداد ماجانت امنة بس محافظتنا ولجنوب كلة امن ومستقر
جنت كل مدة افوت من يم ديارنا
اروح للبيت للشطيط وامر على لمكان لجانت عمة امي ام مهودر ضامينها بي
اخذلي حسرة وشكم صفنة وترجع لذكريات تنخر بروحي
وارجع للبيت كل مدة هيج
كلشي بقة منهم مثل مزار واروح ازورة
وعدت لأيام عادية
يوم يجر يوم
ويشبه لقبلة ولورا
٢٠١٠ ساعة بل١٠ لصبح ركبت سيارتي وبسرعة متوجه لمدرسة طالعين اشراف اني وثنين وياي
تأخرت وجنت مستعجل
وصلت للمدرسة دخلت عليها ودوني للسادس
لاحظت الدرس ونطيت ملاحظاتي
وكعدت وية المديرة دققت وتأكدت من دفتر الخطة والدرجات وشفت اوراقهم وكل شي وطلعتي صارت وية حلة المدرسة
طلعت للباب وياية المديرة والحارس
بعدني جاي اركب سيارتي
اسمع صوت واحد وراي صاح حمززززة ..........
بلقيس....
اخر مكالمة الي وية قيصر توسلتة يعوفني
جنت خايفة من المشاكل لأن حرفيا معندي ذرة طاقة الها
التخلي جان اسهل
رغم حسيت روحي اشلع قطعة من جسمي وارميها
والجزء الباقي جان اكثر صعوبة
الملامة والسهر والييش
اليش اخذت من طاقة كلبي ياما
اليش بقت تدك براسي ايام وايام
زياد ماعافني
خصوصا بعد سالفة قيصر
هاي السالفة جانت الكارت الي نطا الحق يجي للبيت شوكت ميعجبة بحجة يخاف اني اخونة
لو اجيب قيصر للبيت
مرضني
لالعرك يفيد لالحجي ليوجع يفيد جربت ويا شتى الطرق
بس بخلة حتة بلأحساس
وكل شهرين تلاثة يجي للبيت بكل صلافة
يطب لغرفة نومي وللفراش يسحلني برضاتي غصب يتقرب الي
شتكيتة لعمو اكثر من مرة
وكل مرة يوعدني انو يمنعة
كل قفل اخلي يكسرة ويجيب واحد من يمة وشوكت ميعجبة يفتح لقفل ويجي
وبيوم الي يريد يتقربلي يختار اوقات معينة
ويطب غفل وخنساوي مثل لحرامي بحيث حتة ماحس على خطواتة
جنت قوية وموقفي زين
جنت صاحبة حق لأن متزوج لمى علية ماجان يجرأ يسوي هلشي وياي
بس سواية قيصر ضيعت حقي وخلتة يتجرأ يسوي كلشي بحجة اني خاينتة وديعاقبني
اتصلت بعمو ابجي واتوسلة يرحمني من زياد ويكلة يكطع رجل مني
وعدني يمنعة
شفت مامنة نتيجة يحجي عمو ميحجي ميفيد ويا
فكرت خططت قررت وانتهى
صارحت امي بلموظوع وخيرتها بين انو تجي وياي او تبقة ببيتها
حاولت تثنيني عن قراري حجت رادت
من ايست من لنتيجة مني
وافقت مجبرة
حصلتلي مشتمل اجار قريب بلمشتل
مشيت بنقلي الى ان حصلت النقل بمدرسة قريبة على لمشتمل
بعت الغراض لمعلمة صديقتي بس ماخليتها تاخذهن
حضرت شغلاتنا
لميت ملابسنة بليل الي منريدة بعتة بسعر الزبل لأن مشتمل زغير ميشيل غراض لبيت وبنفس الوقت مااريد احد يشوفني اشيل لغراض لأن استخبارات زياد يوصلولة اخباري اول بأول
ولفجرية طلعنة اني وامي بعد ماخليتها تحلف علقران انو متجيب طاري مكانة لأي مخلوق
وحلفتلها اذا سوتها متشوف وجهي للموت
سلمت المفتاح لجواريني وصيتهم ينطو لأبو لملك بليل
ووصيت المدرسة زميلتي تجي تاخذ الغراض قبل اليل
وصلنة للمشتمل ماويانا غير ملابسنة وشغلات بسيطة
جنت تعبانة لان اليل كلة مانايمة اعزل واسفط
نمنة كل احنة
كعدنة ضهرية
فزيت بأمل كلش جبير
طلعت للسوك اني وابني
من اشهر ماطالعة للسوك زياد محرم علية الطلعة لوحدي يخاف اروح اتقابل وية قيصر
يشوفني من عين طبعة
تسوكت للبيت واخذت فراشات وحصران وجبتهن بسيارة جبيرة واجينة
واستقرينا بلمشتمل
جان عبارة عن استقبال ومطبخ وغرفة نوم وطارمة وصحيات كلهن زغار
مرتاحين
شوية شوية بديت اشتري غراض
تقاعدبابا كملت بي غراض لبيت وراتبي مكفينة وزايد
لااحد يجينة ولانروح لبشر
نطلع عصريات نغير جو
امي رغم خذلانها بس تبقة امي
وملزومة مني تبقة من واجبي وابقة احس روحي بيها وبنصير قوية
روحي الماشافت من هلدنية غير التعب
اليوم يلله ضاكت لراحة
روحي الي ضاعت بيوم وليلة بسبب امانة
شبابي الي مر بلمح لبصر كلشي مافتهمت منة
ليوم يلله جريت نفس
وحلفت مااسمح لمخلوق يحرمني من لأستقرار ولعيشة بأمان وراحة بال
من كد مامرعوبة من زياد حلفت المدرسات كلهن علقران ميجيبن طاري مكاني الجديد
٢٠١٠ يوم جمعة ساعة ١٠ لصبح
طلعت من بيتي فرحااااانة
نصوري وياي يفرح من طلعةيفرفر علشارع ولناس
بوجهي للسوك اخذت لبن وخبز حار وخضرة وكيلو جكليت
طبيت للبيت وبنص لصالة وكفت وحيل بكل قوتي شلت لجكليت وليفوك شمرتة
ليوم صارلي ٥ سنوات مبتعدة عن زياد
ليوم اني حرة شرعا وقانونا
ودخلت للمطبخ بفرح
سويت نذري الي طلبتة من ابو الفضل قبل ٥ سنين
وطلعت اني ونصوري وزعنا علجوارين
واني برة تلفوني بيدي دك اكثر من مرة
عاينت رقم غريب
تانيت كملت لتوزيع ورجعت للبيت
رجعت طلعت الرقم دكيت اكثر من مرة ماكو رد
سوينة غدة وتغدينا امي معزومة على عرس جواريننا مارحت وياها
نصير راح
طبيت لغرفتي اخذتلي غفة
واني نايمة صوت التلفون يطب بحلمي
فزيت جريتة رديت لنومة بعيني
صوت انثوي
الووو منو
بلقيس هاي انتي
اي اني بلقيس انتو منو
ولج ماعرفتينييييي......يتبع
يابا اقدم اعتذاري الكم بس شحجي
النانو مالتنة طار لعجة ليوم خرافية صعد ابو فضولي دورة راد مالة وجود
خليت اقاربي يفتح المحل مخصوص علمودكم ويدزلي رصيد
دعولي نلكة النانو نديح بدونة 💔
شوفو ستوريات باجر بيها حدثين يفرحون وعذروني على الحزن الي بهلبارت والله وية كل مشهد تنزل دموعي طبعا هلبارت خصصتة لقيصر وبلقيس حتة نوصل بيهم ل٢٠١٢ لأن اكو بيكم ديخربطون
لكروب مالتي ردتو اسمة
(كروب قصص وعبر وكل مايهم المرأة)
وراح افتح الصداقة بصفحتي علمودكم شتردون بعد
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!