#خنجر_الغضنفر
#الجزء_الثاني_بارت٦٨والأخير
#حنين_حاتم
نداريت وية صوت قسورة وصلني قريب نطلع برا المطار وهمة ماكو
اتصل عليهم قسورا كالو برا
وية ماصاح ماما بااااعي نداريت ادور
اباوع غضنفر لابس قاط وواكف وكلهم يمة وسيارة وراهم مزروقة سيارة عروس
تقربت الهم سلام وحضن وهمة هواي
ماوصلت إلة إلا اخر شي
لصدرة اخذني وصوتة يهمس لحمد لله علسلامة اشرلي علسيارة
وقيصر ولولد يغنون جبناها واجت ويانا
ركبنا لسيارة وفرونة هواي بشوارع عمان ٣ سيارات كلهن مزروقيهن ويصفكون ويغنون وقسورا منطلق مكيف بعرس امة وابو
قيصر يكلة انت ونصير غاسل ايدي منكم
وصلنة للمكان الي يسكنون بي
عمارتين ٦طوابق وحدة مقابيل لثانية بلطابق لثالث شقة عمة امريكا دخلنة وهوسة لبنات وهلاهلهن وتكابلن يهوسن هنة ولولد كل واحد يذبلة كولة
وقيصر متكتر على صفحة ويكللهم انة شني موقعي من لإعراب طلع لعرس لغضنفر مو الي
شوية وخلو اكل اكلنة ولتمينة كل احنة على سفرة
بطرف لولد واحنة بطرف
لمة مفتقدتها من زمان
ذكرتني بلمتنا قبل بأيام بيبي وجدو وفدعم
وصوت غضنفر كال من كمل اكلة
اقرو لفاتحة للماتو هيج كل المواجع
وراها اخذونا على شقتنا بلطابق لأرضي فارغة ومغبرة ماقبلت ينضفوها كلتلهم هنة كلهن شكم يوم اقضيهن يم لبنات كل يوم يم وحدة ويخلصن
بس هوة اصر وخلة كشمش وزوري وبسعاد واماني ورقية تجمعن وكعدن ينضفن ردت اساعدهن ماقبلن اكيس اي شي
اخذتني عمة امريكا وصعدنة اني وبلقيس وانغام بقت يمهن كاعدة كيفت على كشمش إندمجن هي وياها
تضحك وتكلي انتن عرايس ومايصير تشتغلن
لليل يلله كملن خطية صعدن شحالهن بقيت احجي على غضنفر اكلة زودت حملهن وراهن عرس وركضة
يكلي معليج انة واخياتي
تعشينة ولتمينة نسولف وتعللنة يمهم اني وبلقيس وانغام ولبنات نسولف على تحاضير العرس وشوفني ملابسهن وبلقيس كعدت تشوفني لبدلات لحاجزتهن ولمكياج الي مختارتة وباقي تفاصيل لقاعة ولسيارة
وضحكت وهي تكلي
شرطت علي لسيارة الي ننزف بيها إلة مارسيدس
ضحكت متفتاجأة
شمعنا
اتذكر اول ماتعرفت علي بقيت عايشة على اطلالة واتمنا نتزوج بمارسيدس جانت الها هيبتها رئاسية
وبقة ببالي هذا الحلم وعدت سنين ومشت كلما اتذكر انو وصلت للحلك وردنا ننخطب تدمع عيوني واكول شيصير لو من لأول صرنة لبعض
بس بيها حكمة اجاني نصير
اكيد ربج كلشي يسوي بي صالح النا يمعودة انسي لتجيبين طاري ذيج لأيام ماعاولنا عدت
بس كليلي وين يحصللج مارسيدس هسة
عندة صديقة متفق ويا وكالة
قاطعنة صميدع دخل يلاشي ببلقيس
وكف كبالها ويهز بيدة
لعالم تتطور وانتي تردبن ليورا
بلله عليج مخلية هذا المسكين يهبد يدورلج على مرسيدس يزفج بيها
ولو هوة هم غاوي تعب يطبة مرض
عمي استهدي استهدي سايبة هواي عليج
لا ولنوب مدولبة مرتي وجايبتلها فسطان شطولة ٧ طبكَات لبستة لصبح عود تشوفة الي
ولفروخ طبو بلتور وافترو ختنكَو جوة نريد نطلعهم انة وعمتي ماكو
حرام موفسطان تكول مغارة علي بابا
كتلها اوكفي علحايط وغنيلنا بلقيس جابتلي ثوب مكَبكَب ثوب مكَبكَب ثوب مكَبكَب
فوك مامكشخة مرتك وملبستها
اطلع وسد لباب ترة مااخليك تحضر زفتي
لا الله عليج مروتج
من علباب جر لخاولي وكورة وشمرة عليها
صاحت قيصررر
طبك لباب حييل ويكلة مابيها شي تتعاير يخوي
وية ماطلع نفتحت لباب ودخلت اماني تهذي وغمت جهة لباب
عاطت بيها كشمش
شمالج ولج
اماني:- سللامة طبت من لباب تعد علية شلون عطت بحمزة عبن يجفت بدون لااحم لادستور وانة مشكلة ثيابي واغسل بشقة قيصر جنت
كشمش:-هوة يتعمد انة اعرفنة ناشبلج هسة اخلي غضنفر يعيط بي
ندفعت لباب ودخلت سللامة عاينت على اماني وكالت الها
ها اجيتي تتشكين حتة يسولفن لغضنفر ويهينة ويخزي جدام الخطار
كشمش كامت على حيلها وتقربت الها وكالتلها بصوت ناصي
سللامة انعام موخطار
انعام منة وبينا
عاينت الها هزت ايدها وكالت
جمعة خير ان شاء الله وخلت وطلعت
ماعرف شصارلي فرت من حجايتها وتصرفها
توجهت لكشمش افهم منها الي مافهمتة طول هاي السنين
_الله عليج كشمش هسة هية وجودها بينكم شنو
_والله خية انة حالي من حالج مااعرف
غضنفر يكول حمزة مابي خير وماعلي اعتماد مااكدر ازوجة هسة لاحصل شهادة ولابيدة صنعة يكول ورا عرس قيصر ناوي ياخذلة سيارة تكسي ويعلمة لسياقة بلكي يعتمد على روحة يريد يزوجة وكال ائجر الها واكعدها شوية بعيد علينا هي وحمزة وعروستة
قبل جيتكم لهنا يريد يخطي هاي لخطوة لأن يكول هي من تشوف انعام تتسودن
والله مااعرف شأكلج شنو الي مسويتة سللامة حتة يبقة متمسك بوجودها لهلدرجة
خية انتي هم لاتلومي وليدة صعبة يحرمة من امة
هوة انحرم من امة وهوة زغير وضاك هاي اللوعة ومايريد يعيشهيا
وانتي هم من جان حمزة فرخ كالج اخذي يمج ربي وية منة وخل اشمر سللامة واخلص منها كلتي مااكدر وتعذرتي
هوة هم ماجان كدامة حل ثاني نجبر بسللامة وهوة مايطيق وجودها
الله وكيلج لوطبت مجان يصيح اذا حضرت الشياطين ذهبت الملائكة ويخلي ويكوم
ذاك ليوم جبناها بضحكة كلنا ماكو واحد يخطبها ويخلصنا منها
بثنين ادي ضرب علكاع وكال عمي انة ابصم بلعشرة وازفها بيدي وانة ادفع مهرها بس شوفولها رجل
ضحكت على حجيها احاول اقنع نفسي بس يبقة شعور مسيطر علية كلما اشوفها
شعور يخليني اتوتر بدون سبب
اكره وجودها لأن مالة كل داعي وبلثانية اتوقع رح تخلق مشكلة
بكل لحظة تمر اتوقع على ساعة تسويلها شي لوبية لو بأبني
ولسة جمرة تبليها على امتنان تاكل بكلبي كلما اشوف وجهها بدي املخها
بس اتعوذ لشيطان واكبر عقلي رغم هي كلشي بيها فاضحها احسها من ابسط شي تريد تفتعل مشكلة وحمزة من اول ماطبينة وهوة يضحك وفرحان بينا ويسولف وية قسورة ويتناقشون على برامج وكَيمز مجرد ماطبت نكلب حالة
على كعدتنا وصوت قسورا صاح ماما وينج اني راح انام على روحي فضوني وين ننام هنا لو جوة
صوت غضنفر صاح علي كوم بابا ننزل جوة انة هم تعبان امك سالفتها مطولة
نزلو وبقينة اني ولبنات نسولف مااريد انزل ولا اريد ننفرد بغرفة اني وغضنفر كدام قسورة
استحي مجرد التفكير بلموضوع يخليني اسخن
كلت اتاني ينام يلله انزل
صارت لساعة بلوحدة واحنة نسولف
رقية واماني فرشن النا وكالن باتن هنا
بسعاد وزوري نومن لجهال وودنهم لشققهن وبقن كالن هنا ننبات وجلبن بية بعد استحيت
تمددنا وضلينة نسولف لنعاس كلة طار من ورا لسوالف
تالي طبت علينا عمة عاطت ولجن نامن ورانة ركضة باجر
غفينة كل احنة انغام يمي وطيبة بيناتنا كلسا تدفرني برجليها لناعمات
كشمش فوك راسي صايرة لغرفة زغيرة كوة كفتنا حشك صرنا
نايمة واسمع صوت شي جوا مخدتي
ايد كشمش كلسا تكفخني بصفحة توعيني تكلي تلفونج يمعودة
بعد اكثر من كفخة صحصحت سحبت لتلفون فتحتة كوة اباوع
٩ مكالمات ورسائل
فتحتهن بعدني اريد اقراهن وكع لمبايل من ايدي وعيوني وحدهن نسدن ورجعت غفيت
ورا ماادري شكد وعاني صوت عمة امريكا يم راسي تهمس كعدي
رفعت راسي كالت رجلج برا يريدج
كمت على حيلي متفاجأة عبالي صاير شي
طلعت برا جانت واكفة تحجي ويا تكلة شتريد منها هسة هوة شبقة علصبح
بأرتباك جاوبها
موقسورة فز ويسأل عليها
وترد علي مامصدكتة
شني زغيرون قسورة
لا عمة موهيج بس مدري شمالة تمارض جنة مسخن مدري تغير علي لجو
بساع سحبت حجابي ونزلت ويا كدامة ركضت
هوة وراي يمشي على كيف
ايدة سحبتني وهمس
على كيفج شبيج نخبصتي
شلون ماانخبص شايفة شكد نحس من يتمرض يلزمني انذار
كتلة لاتلبس نص ردن صح جو حلو بس مومال نص يعاند
على بايات لدرج عصرني بجسمة وهمس ضاحك
ترا قسورة كلشي مابي وشخيرة واصل لبغداد
بس ابو قسورة الي اشتعلت صفحة صفحتة وهوة ينتظرج وماكو
يووو غضنفر الله عليك هاي سواية
حرمتني لنومة لعزيزة وتالي تطلع تضحك علية
ادري لعد شكول
اكلها عمة انة لمسخن
انة لمريض واريد دواي عدكم نطوها الي
انعل صفحة كشمش شكو تجلب بيج انة اعلمها لصبح
كبل كلت كشمش شعليها لمسكنة متعلمين كلشي تذبو براسها
ضحك وكال
بوووية لعزيزة هاي ترا من حبك لاشاك
وحكَ الله من المعزة لاتتصورين واحدنا يحب لأذية الها
ضحكت وهوة ضحك
وراها صفن بوجهي وتقرب علية خلى راسة على متني ويدفع لحجاب تقرب لركبتي
همست غضنغر بلشارع احنة يمعود خل ننزل
صوتة قاطعني اشششش
صوت لأذان قريب صاح الله اكبر نززنا ثنينا
وخر يلله اريد اصلي
ها تبتي هسة على حظي
نزلت كدامة اضحك وهوة وراي خطواتة ثكَيلة
وصلنة للشقة على كيف دخلنا نتخنس
طبيت للغرفة ضوة طافي وبيها برودة يامن يناوشني لفراش
دخلت بي ولفلفلت روحي
بقة يدور على راسي ويضحك
تالي كوة دحس روحة يمي وصوتة يهمس
بوية شمالج ترا كلشي مارايد بس تغفين على ايدي
لايروح بالج بعيد انة زلمة وشلت
بضحكة دفنت راسي بصدرة
وهمست متأكد
ضحك بصوت عالي وكال
يحي العضام وهي رميم
بقيت بحضنة وضلينة نسولف
ورا لخمسة حاول يتقرب الي بس ماكدر
حسيت بضوجتة من لزم باكيتة وندار علجهة لثانية وبقة يدخن
تقرب الة حضنتة من ضهرة وهمست اطمنة
ترا كتلك اااااااخر همي على شنو ضايج
لاماضايج بس جان املي نخلف النا طفل ماطول بعد بينا خلفة
تالي اجت هاي لسالفة
الله كريم لاتيأس لأيام كدامنا وتتعالج وماكو شي مستحيل بعد لدنية تطورت ولكلشي اكو حلول
غفيت وراسي على صدرة
وعانة صوت قسورة من دفع لباب ودخل عبالة بس ابو بلغرفة
جنت نايمة بطرف لجرباية مارفعت راسي من الخجل وتضاهرت كوني لساني نايمة
صبح على ابو وسألة
بيت عمو صميدع كاعدين هسة لو لاء
اريد اروح يم ظاهر وحمزة
نسيت روحي وعطت بي ووين وين من لصبح تريك وروح
صوتة عاط
نعومة المهمومة كملي نومتج كملي
اني رجال جاي اريد اونس روحي واتفرفر شوية
طبك لباب وطلع
كعدت على حيلي الم بشعري اريد الحكة
من عكسي لزمني وهمس
عوفي ماخذ راحتة وفرحان لاتقيدي
كام كدامي نزل جاب ريوك
بعدنا نريد ناكل بدون جاي لأن غاز ماكو
ندكت لباب وطبت عمة شايلة صينية بيها مالذ وطاب
تريكنا وكملنا وراها بدا الركض وعدة ليوم علسريع
صعدت فوك انغام تخازر بية وترجع تغمز وتكلي وين رحتي
يمعودة لصبحية رحت هذا قسورة مسخن
ياقسورة عيني ذاك يكمز مثل لقرد تتبلون علولد
كولي ابو قسورة
اي صح هسة شتردين عود لزمتيها علية لزمة
طبعا تقربت تضحك
جرت حجابي تريد تنزعني وتكلي طلعي اثار لجريمة
منين يحسرا
احنة ناس شيبنا لبركة بيكم
انتو تشيبون عمي كلها تشيب إلة انتو
عين لحاسود بيها عود
شمرت طيبة بحضني وطلعت لملابس مالتنا وتكلي خل نتبادل
هي جانت ماخذة دراعة لونها اسود تصير شيفون ينلبس جواها بنطرون لإن بيها فتحتين طوال من الجوانب
مشغولة كرستال على لركبة طوق
وعلردانات شي بسيط
انغام طويلة من لبستها تخبل عليها لبستها اني ضعت بيها
رجعت على ملابسي
سترة طويلة جواها قميص بصلي وبنطرون كلوش
وشال بصلي وجنطة بوكس بيضة وحذاء كعب ناصي اوف وايت
لحلفة راح تقتصر على حفلة بسيطة وزفة من لصالون وراها نشمر لعرسان بشقتهم ونروح مطعم ونرجع
يعني ماكو حفلة ولا معازيم هواي شكم شخص جوارين الهم
لولد عازمين اصدقائهم ومعارفهم
ولبنات عازمات جوارين لعمارة بس
راحت بلقيس للصالون هي وبسعاد وسللامة جلبت وياهن توسلت لبلقيس لبنية نحرجت من عدها
راحت وياهن
اخذهن صميدع
لجهال كلولهم انتشرو برة لشقق بقو يلعبون علدراج
نزلنا اني وكشمش واماني وانغام خلينة لفرشة لبيضة ومسحنا لشقة وعطرناها وشغلنة لمراوح وطلعنة
رجعنة لشقة عمة امريكا جانت ملتهية تسوي غدا ساعدناها شوية وكضيناها سوالف
قسورا وضاهر وحمزة وجهال كشمش بشقة بسعاد
قيصر اخذو للحمام ومناك للحلاق
عمي ابو ستار بلبيت كلسا ماخذلة جولة لو يعارك بعمة امريكا لو يعيط علبنات
يرجع يباوعلي يفشل يهمس كل لهلا بيج بوية لبيت بيتج
ام فدعم خطية نظرها كلش تعبان ماخذتلها ركن وبيدها سبحة وكاعدة
ماالها شغل بأحد
احس كأن بيبي شكرية كبالي كل ماامر من يمها
تغدينا شلون ماجان علسريع تمن احمر ودجاج شوي
وراها بدينا نكتر لشقة ونتحضر
انغام خلتلي مكياج خفيف
كريم وشوية جرت عيني بلاينر ومسكارة وحمرة لون بيجي تغير شكلي نوعا ما
لبست بس لبنطرون ولقميص وفتحت شعري شسوار بسيط
وطلعت ملابس قسورة ودزيت لجهال يصيحو الي
قبل منجي اخذ سترة ورهم وياها بنطرون وقميص
شوية ونزللي من يم لولد لابس دشداشة وغترة
لدشداشة موقياسة مال حمزة لزمتها كشمش بللحظات الضائعة قرمتها الة
كل لولد الي بكصتة لبسو بناطير حتة حمزة إلة هوة كتل روحة علدشداشة
خليتة على راحتة
كملت لبس ساعة ب٣
بقيت لازمة طيبة بينما انغام كملت مكياج وتبديل
وراها مكيجت كشمش شنو احطلها تروح تمسح من عندة تكلي خية فشلة من لويلاد شيكولون
دخلن بنات جوارينهم بيهن سبع بنات ووياهن نسوان كبار ٤ ناس ورا ناس
واضح علاقتهن بلبنات قوية سوالف وضحك
شافن انغام تخلي مكياج للبنات لزمن عليها سرا
الي تكلها خطي عيني والي تكلها سويلي فيكة بشعري
رغم هنة مبدلات وممكيجات ومرتبات بس بعد هاي سوالف لبنات
كشمش استلمتهن اكس مربع تعيب على حجابهن
وبيهن ثنين زغار بكد اماني مامحجبات
انغام استلمتهن كلهن لبخ
لل٤ ونص وهنة بعدهن خاتلات بلغرف واحنة بلصالة عالكيلنة ديجي ونركص اني ولجهال وعمة امريكا واماني
صدك جنت مخنوكة حاولت اطلع لطاقة لسلبية وية لجهال
جهال زوري وبسعاد اعمارهم بين ١٠ الى ٦ سنوات بس ماشاء الله على تربيتهم ابد ماينتبهون بقيت اركص وياهم واركص ابن بلقيس ضايج ومدلغم على امة
وراها طلعن لبنات وفرغنا لساحة لأماني ورقية ركصن ركص رهيب
شعرهن طويل فاتحاتة وتكابلن ملاين ماتحلكهن وامهن تخرط بخدودها وتصيح فضحنا بنات سالم كاوليات درجة اولى
بسعاد تكمز بينهن تضحك ماتعرف تركص
طبتلهن كشمش تهوس بشالها لابسة كلابية مشغولة وشامرة شال على راسها
جايبين لفات وعصاير وزعن لبنات
نوب شغلو دبكة انطلقن بنات جوارينهم صفننا تاقناتها لبنات يدخلن وياهن يتعبن شوية ويوخرن وهنة وحدتهن تطفر للسقف وتدبج ومكملات ولاتعبن
ساعة فوك ل٦ دزولنا لجهال كالو يللة لجوارين طشت
وهنة دخلن يلبسن شي مستور وحجابات
بقو يدكون هورنات جوا يلله نزلن
اني بس لبست سترتي وشلت شعري ولفيت شالي
واخذت طيبة ووبللبلكونة وكفت
وراها نزلن كلهن
اماني من لباب تلكاها حمزة هي ورقية يحاسب على لبسهن
رغم خطية لابسات بناطير وعليها مانتو جوة لركبة
وكلشي ماخلن غير شوية حمرة لون وردي فاتح وكحلة
غضنفر عاط بي كالة عوفهن هوة عرس قابل يومية
وهنة وين رايحات شو من لسيارة للسيارة
نزلنة كل احنة سيارة جبيرة جايبين النا وللجوارين ولسيارات لزغار لولد صعدو بيهن
لصالون قريب مسافة ربع ساعة وصلنة
نزلنا اني وانغام وكشمش وية قيصر دخلنة جوا بلحديقة
بباب لصالون لداخلي واكفين وطلعت كبالي تخبل بلبدلة لبيضة
وكفت وعينها علسيارة لبرازيلي غرغرن عيونها دموع وهمست الة
_احنة مو اتفقنة على مرسيدس ليش جبت برازيلي
تقرب الها وهمس والله ماحصلت مرسيدس الي متفق ويا صارتلة شغلة ولثاني معتز بسيارتة يكول محد يركبها غيري
ركبت لسيارة مخنوكة دموعها نزلن وهوة بقة يراضي بيها ويسكت
تقرب صميدع للسيارة ويهمس الها من لجامة
_عاينليلي خاب هوة انتي بكَد حبوبتي وينج ووين لزفة
مصدكَة روحج
نزلت لجامة تريد تعاركة
بساع حركت لسيارة
ومشن باقي لسيارات ناس تصفك وتغني ولولد من لجامات ذابين رواحهم وناس تكلب دقلات
وكشمش تمد راسها كلما تتقرب لسيارة من يم سيارتهم وتغنيلها
بعد شتريد زفوها ببرازيلي
بعد شتريد زفوها ببرازيلي
صوت ضحكنا تعالة
عيني علي كاعد بلصدر
عيوني على ادي مدري شيسوي
شتغلت اغنية
صوت محمود انور يذكرني بلأيام لخوالي
مختلف إعلى عباد الله
لشمس إتنور بضلة
مختلف إعلى عباد الله
لشمس إتنور بضلة
بعينة عود لماصلة
من تمر هاي لناكَة
مابي نقص الله مكملة
مابي نقص الله مكملة
لوبس ادري منين اصلة
لأنصب خيمة كَبال اهلة
مانام احرس هلناكَة
مانام احرس هلناااكة
عاطن بي لبنات
شنو هاي لأغنية تذكر حبوبتي
طلعلنة ساجدة عبيد
دزن الة مبايل عبوسي متروس اغاني
وبسعاد تكفخ بي وتكلة كاولي ابن لكاولي متكلي شنو هاي لأغاني
وصل لتلفون الة من ايد لأيد شغل اغنية
طلعت لمسيقة
بسعاد بصوت عالي كالت
تحية لعمتكم ساجدة عبيد الراعي الرسمي لكل الحفلات
بقينة نضحك وطلعت اغنية خالة وياخالة
عيوني علجامة اباوع لقسورا بسيارة ستار صاعد
طالع نص جسمة من لسيارة ومن لجهة لثانية حمزة هم طالع ومكابلة ويهزون
صح ماعاشو سوة بس احس اكو بينهم محنة جبيرة
رغم اشوف بعيون حمزة غيرة من قسورة مرات
من يشوف اهتمام غضنفر بي
رغم هوة يشوفة محروم من عندة ويحاول يعوض حرمانة
فرونة هواي ماحاسين علوقت كاعدين اخر شي اني ولبنات وذابات لحم اضكك عليهن واصور بيهن
من تصير لسيارة قريبة من سيارات لولد يكعدن عاقلات
عمة امريكا وورجلها وام فدعم وام بلقيس بقو بلبيت
وابو فدعم بلصدر بلسيارة يم قيصر وبلقيس
ساعة فوك ل٨ رجعناهم لشقتهم واخذونا مطعم
حاجزين اكثر من نصة كعدنة على طاولات كبار توزعنا لطلب واحد متفقين علي وية اهل لمطعم حتة لايصير تأخير
لجهال ضلت تبجي يردون يطلبون بكيفهم
نزلولنا كباب كل احنة
تعشينا وكملنا ورجعنة للبيت
كل احنة تعبانين من لسيارة رحت لشقتنا مابيها غراض ولامفروشة عدا جرباية وكومديات خليت بيهن ملابسنا وبيها قنفات ثنين برا وعمة دزت النا فراشات وحصران ودبة غاز بس شكلت ذمتي كلشي مااطبخ
ومادزتلي مواعين وحلفت لبنات ميدزن نطتني بس قوري وشوية جاي
بدلنة ورتاحينة شوية كلمن التهى بمبايلة
شقة قيصر فوكانا كلما يندك بابها عبالك بابنا كلما يطلع غضنفر يلكا لوصميدع لو ستار
خبلو للفجر يدكون بلباب وهوة مافتحة ابد
اخر شي طفرو على لبالكون ودكو لباب لجوة هم مافتحها
كلسا جايبين صينية ويكلولة عمي عشا والله عشا بس افتح لباب
رجعو اخذولة كرزات وفاكهة وحلويات عود يغرون بي دازيلة صورتهن
كللهم خلوهن بلباب وروحو
اجو يضحكون علي يكلولون لبنية كتلها لجوع من ورا
كعدو شوية يمنا وراحو
وراها نزلو ظاهر وحمزة يمنا واحد شايل بلي واحد شايل شاشة زغيرة
وللصبح نسمع صوت ضحكهم وصياحهم ومعاركهم
كلما اريد اطلع احاجيهم غضنفر يكلي عوفيهم متونسين خطية قابل يومية ملمومين
ماكدرت انام كلسا اطلع اشوفهم
متمددين واحد بحضن لثاني وضحكهم وسوالفهم تجيب لتايه
سويت الهم جاي وعندي حلويات ومن لمطعم سفري جبنا ويانا طلعتة الهم اكلو
ساعة بل٥ طلعت اصلي لكيتهم نايمين ولتلفزيون مشتغل ولوايرات مال ليدات ملتفة على حمزة
اعاين حمزة نايم علقنفة بس رجلة وحدة علقنفة لثانية ووحدة على وجه ظاهر
وقسورا بلكاع نايم علكاشي
وعيتة يتدنة وغطيتة ستوا نام ماسمع غير عيطتة لمن اباوع والكة حمزة واكع عليهم ثنينهم
كامو يغلطون علي وطردو للمطبخ نام
وهوة غافي على روحة عثر بلباب وهي وكعة وهي غفية
بقيت اضحك عليهم
لصبح بل٩ كعدنة غضنفر خابر ستار كلة جيب ريوك للعرسان ودلا على واحد يبيع كيمر عراقي
عفنا لولد نايمين وصعدنا فلوك اول شي مرينا على شقة بلقيس دكيناها مرة وحدة مافتحوها صعدنا يم عمة امريكا بس هي كاعدة وتحوس بلمطبخ ويمها ابو ستار يعارك بيها
شافنة كعد يتشكة منها يضحك يسولف شغلات خاصة
خطية عمة خلت وطلعت
وغضنفر يهمس الي يكلي شوف عمي يشنكيلي ميدري انة
دنك يضحك ماكمل
عفتهم وطلعت جابت عمة ريوك كعدنا ناكل ونسولف ماحسنا علوقت ساعة فوك لعشرة دخل ستار بيدة علاليك من لباب كال
شتعلت صفحة قيصر هوة يعرس واحنة نبتلي صار ساعة افتر ادور على ابو لكيمر خلصن بانزيناتي وماكو
دخل نطة لعلاكة لكشمش ربتبتة بصينية وخلت ترمز جاي وكلاصات واخذتة ونزلت
شوية ورجعت هية وصينيتها تكول فلشت لباب ماكو
عمة كالت الها
خاف عبالة واحد من لولد من هاي مايريد يفتح
يطلبو كلهم
جان ياهو الي يعرس يدكَ بي لناقصة بليلة عرسة وبلصباحية
وكلهم ضاميها الة
اذكر بليلة الي خذو زوري خلالة جوا لخبزات بصينية لعشةطكَاكَية خلة ستار يطلع يدكَ على راسة
استمرت تضحك وهي تسولف دكَاتة وية لولد حتة اصدقائة سالمين من عندة عفتها بلمطبخ تنكع تمن
ورحت يم ام فدعم جانت كاعدة تتريك
بقيت اسولف وياها سودة علية لساها تذكر فدعم وتبجي علي تكلي تمنيت مثل هاي لزفة يزفونة لولد ونفرح بي
تالي للكبر زفو وحرمو من تهاني
بقيت اسكت بيها واكللها يندعيلج بلجنة فدعم شهيد
لا اذة ولا تسبب بأذية احد
كلبة ابيض مثل لكَطنة ولو نخا جار يفزع
كافي تسترهم على اصدقاء قيصر سنين هوة وجدو وهزموهم ودبرولهم جوازات ونقذوهم من موت حتمي
تفزعلة وكفاتة يوم لقيامة وكلبة لماكو اطيب منة
دموعي نزلت واني احاول اهديها
ماكدرت
وخرت من يمها للغرفة طبيت كلتلهم اريد احجي وية تهاني
نطتني اماني رقمها دكيت عليها
اول ماكلت الو وسمعت صوتي بجت
بقت تختنك بلعبرة كلما اسألها عن جهالها ورجلها واستقرارها
تكلي بخير بس صوتها يكول غير شي
سديتة وية دخلة قسورا يسأل على مبايلة
بلشحن تلكا
صديت علساعة جانت قريب ل١١
خابرت على تلفون بلقيس دكيت اكثر من مرة يلله جاوبت
كالت الو بصوت ناصي
يمعودة وينج ادري عايشين ميتين
نايمين والله
اي عيني حقكم للصبح نسمع الدبيج على راسنة
ضحكت وصوتة يمها مدري شيحجي وياها
وراها نسد لخط بوجهي
اخذت صينية لريوك واخذت انغام وكشمش ونزلنا
انغام بلخباثة محد يلحكها
نطتني طيبة وحيل تدك علباب بثنين اديها
بلقيس :-
زفونا للشقة ونسد علينا لباب واني بالي يم نصير وتأنيب لضمير ياكل بية علي
قيصر حس علية جنت مخنوكة واحس فرحتي متنغصة
من لباب للجرباية شالني
احس نفسي صاعدة جبل
مبتعدة هواي عن لكاع
نزلني علجرباية وكعد يمي بقة يسولف ويداهرني عبالة ضايجة علمود لسيارة
قيصر:- شبيج ترة نصير اصلا ميذكرج مندمج وية لجهال جاي يتسوكَلة بعلاكة شكم فشورة على شكم غلطة على وكاحة وشوية طول للسانة
بس ليوم والله حبيبي من عين باجر جيبي
واذا تردين هسة جيبي ماعندي مانع نومي يمج وانة انام بلكاع
صح حجاهة بس احس مومن كل كلبة
جريت لتلفون اتصلت بأمي سألتها عنة كالت يباوع وية لجهال كارتون وكشمش وبسعاد ماعافنة كلسا يشوفنة ويوصن لجهال علي
كلشي ماعلي ليضل بالج
شوية طمأنيت علي بعدني خالة لتلفون على اذاني سحبة من ايدي وسدة
وتمت ليلتنا بفرحة وضحكة وسالفة للصبح مانمنة نسولف
والولد الليل كلة يدكون لباب
جابو عشا ماقبل ياخذة من لثلاجة طلغلي لفات محضرهن من لعصر باردات وشحالهن اكلتهن من جوعي نوب طلع حلويات وكرزات وجباسة شبعت روحي بيهن
وكلما يدكون لباب يكلي غلسي بوية ذولة ماجايين لله
عدهم ثار وياي
ماكدرت انام من وراهم ومن ورا سوالفة
خلاني ستوني غفيت لفجرية ووعاني
ضليت ادفع بي
بصوت ناصي يهمسلي يلله بعد شوط ثاني
خباااال
حباب عوفني والله نعسانة وتعبانة ولتسريحة غلعت مخي
بقيت اتوسل إلة نقهر علية وعافني
بس بقة طول مااني نايمة كلسا منغص علية نومتي رجلي شطولهن محاوطاتني منين مااندار يقيدني
صبحية جريناها نومة
دك تلفوني اكثر من مرة
شلتة كوة اباوع انعام
جاوبتها سألتها عن نصير كالت تريك وديتفرج تلفزيون وية عبوسي ابن بسعاد خوش مجندة ومسوي تابع الة يكلة عيش يعيش يكلة موت يموت
اتفل على فلان يتفل
بوك من محفظة فلان يبوك
بقيت اضحك واكللها هذا ينرادلة فرمتة ابني
كمت سبحت مرة ثانية بقيت بشك من امري من ورا سوالفة
طلعت جان ستوة كاعد
انشف بشعري وهوة يأشرلي تعاي
بساع فتحت لمجر جريت لسجادة ووكفت اتملص منة
كام على حيلة
وية ماكلت الله اكبر
صاح الله اكبر على راسج
انة إلج بليل
دك علي غضنفر واني اصلي فتح مايك عود يسمعني
غضنفر:-شني عمي شمالك ماشايف مرا كتلها الحوع البنية خليها عاد تاكللها لكمة
_لامتريد شبعانة
_نهجم بيتك يلشويب هم بيك بلا ولك امها تلوب كوة مركداتها لبنات كلسا تريد تنزللكم فضوها واصعدو
_خوش خوش افكر
سدة ويباوعلي ويضحك
انة اريد ريوكَ
سلمت وجاي اندعي
نزل ادية وحط وجها بوجهي ويكلي
اريد ريووووووك شنو متسمعين
اي كوم خل نلبس ونروح يمهم نتريك
لابوية انة ريوكهم مايعجبني
هذا كيمر لسدة كبالي واتريك منة
تقرب يريد يبوسني طفرت للكنتور سحبت لملابس وبساع ركض للحمام وقفلت لباب
جنت ماخذة فستان مال حجاب لونة كريمي فاتح نفش من جوة ولردان منفوش وبي بزمة مشغولة
وعلصدر شغل بسيط على صفحة وحدة
لبست ويا ربطة ستن لونها بصلي وبيها ورد رماني ناعم
دخلتها بلثوب لأن لشغل علركبة ماردتة يضيع
طلعت برا اتخنس شفتة جان كاعد علقنفة
رفع تك حاجب واخذ لخاولي وراح للحمام
دخلت بساع لبست ذهبي سوار وحلقة ومحابس ثنين ولبست ساعة وشباحية بيدي لثانية
خليت مكياج ضلال ذهبي وبني وحمرة بلون الورد الي بلربطة وخطيت عيني شي بسيط بس من فوك خليت عطر وطلعت حذاء لون كريمي وجزدان اسود زغير خليت بي قلم لحمرة ومبايلي
تانيتة طلع لبس دشداشتة ومشط وخلا عطر طلعتلة شحاطتة لبسها وطلعنة
صعدنا فوك من لباب زفونا لجهال ونصير حضني بكل قوتة ويكلي وين جنتي ليش مااخذتيني
بقيت ابوس بي
بعد ماعوفك حبيبي اخذك وياية لبيتنا لجديد
دخلنة عمة ولبنات ذبن علينا جكليت وبقن يباركن وبوسني كلهن كعدنة بلصالة وكلهم يمنا
شوية وسمعنة صوت جوا طلعو كلهم
طلع صميدع نجايب فرقة تراثية يدكون دنبك ويركصون وفد اغاني حلوة تراثية
بقو بلبالكون الي بلباب يركصون ويغنون ويدكون دفوف ودنابك كبار ولولد ولجهال نطلقو ذابين لحم
اخذولهم نص ساعة بلباب وراها احنة طبينة وبقو همة يمهم شوية وراحو
دخلنة جوا لبنات للغرفة اخذني
كشمش من لباب لزمتني وتكللهن جيبن اكل عمي كتلها لجوع لبنية الله لايوفقك قيصر
وصميدع يرد علي
ابن الماشايف جان طاحت لبنية من ورا
همزين امها وياها جا لو لوحدها شسويت
بضحك رديت واني اسولفلهن عللفات لباردة ولحلويات
جابن صينية ريوك وخلولنة بلصالة كعدنا ناكل همة كلهم متريكين نصير بحضني كعد ياكل
وقيصر حاط عقلة ويا ويكلي ها
نصير افندي تحطي بحضنج لاتعبانة ولاتشكين من شي توصلين يمي تنكَلبين حبوبتي
غمزت واني اسكت بي
ويأشرلي كلسا يهدد بية
تغدينا وشربنا جاي نصير نام كاعد من لصبح وياهم ناس تمددت وناس تسولف وهوة يأشرلي واني مغلسة وراها غضنفر كال لعصر نروح لحديقة شوية مسافة عليهم بيها العاب ومكان مرتب
اشرلي كومي يلله حتة نتحظر
وكشمش نبت
شتتحظر لبنية لابسة ثوبها مرتب ولابسة حضينة براسها على كولة عمتي مدينة
بقيت اضحك مامفتهة الموضوع
وقيصر نتر بي عوف لبنية خل نشوفها مشتاقيلها
مت عيني صارلها شكثر ماجايتنا
وغضنفر يباوعلة ويضحك
عيني على انغام مدري شتهمس لغضنفر
وراها انقذ الموقف هوة وكال روحي بوية وية رجلج بدلي هذا ثوبج مومال هيج مكان
كمت ويا وهمة كلسا واحد ذابلة حجاية بس هيهات يكدرولة قبل مانطلع يأشر لصميدع على عبوسي ويكلة دمة مهدور ديربالك علي
يدري بي راح يدزة يدك لباب كلسا يخبث علينا نصير ماقبل يجي ويانا وهمة جلبو بي
دخلنة جوا حاولت اتملص مافاد
على كولة امي اخذ المقسوم يلله رجع لطبيعتة طول مااحنة كاعدين ببيت عمة احسة متحول
ستوة رجع لطبيعتة
صوتة يهمس بضحكة وهوة يباوع للمراية
لحمد لله ولشكر توة رد لدم بوجهي
عاينت للساعة جانت فوك ل٣دخلت للحمام غسلت ملابسنة وطلعت شريتهن
حضرتلة ملابسة بعد ماكالي طلعليهن الي بينما اخذلي غفة عل٤ ونص كعديني
كعدت ابدل واتحضر بينما صارت بل٤ ونص وكعدتة
ساعة بل٥ طلعنة كل احنة بلسيارات
اني وبسعاد وامي ولجهال وية قيصر
انعام وستار وزوري وقسورة وجهال زوري بسيارة ستار
وعمة امريكا وبناتها وولدها ورجلها بسيارتهم
بقت كشمش وولدها وسللامة وحمزة جوارينهم سايق تكسي اجرو الهم وطلعنة ناس ورا ناس
وصلنة خلينة فراشات ولوولد كعدو وحطولهم نركيلة
حمزة وقسورة وضاهر وجهال كشمش حتارو يصورون بلمكان وواحد يصور لثاني وراها كعدو يلعبون طوبة
ولجهال تحوم علينة لاخلو ماي لاخلو حب لاعصاير
ضلينة نسولف وطكينة صور عمة جايبة لفات عروك هي وكشمش مسويتة طلعنا جواعة اكلنا
وراها صارت لدنية تغرب وشتغلت اضوية لمكان حلو رحنة تمشينا اني ويا ونصير وطكينا صور وشفنا لمكان كلة
رجعنة جانت بس عمة وامي كاعدات كلهم طاشين
وراها اتصلن بيهم ورجعو
همة راحو للبيت واحنة رحنة للسوك اخذت صوغة لامي وبسعاد هم اخذت الها لأن عكب باجر بليل ترجع
نصير جلب ببايسكل قيصر اخذة الة
بلبيت عندة بايسكلين جانن واحد عادي واحد علشحن جنت اقشمرة بيهن من يريد لشارع
وراها كعدنة مطعم ورجعنة للبيت
امي وانعام نفس ليوم راحن بس انعام لصبح وامي بليل
يوم ثاني غضنفر اخذهم هية وقسورة وانغام للسوك ومارجعو
غير لضهر ب٣ رايحين للسوك وللمطعم وفارهم
وراها كعدنة نحضر
هية تحضر جنطتها هي وقسورة وانغام
واحنة حضرنة جنطة امي وجنطة ثانية نترست صوغات وغراض كلهم صوغوها ماقصرو
وراها راحت انعام هي وقسورة وانغام للمطار وصلوها لصبح قيصر وغضنفر وعمة امريكا وكشمش
لمكان وحشة عليهم حيل
غضنفر رجع طب لغرفة كشمش وكضاها نوم للعصر
لليل ودعنة امي ورجعنة اني ونصير لطريق كلة نبجي عليها وبسعاد هم
مامتعودة افاركها هاي اول مرة
نصير يصيحها ماما رجعنة للبيت ضل يبجي عليها الى ان غفة
انعام :- جانت ايام كلش حلوة قضيناها يمهم
قسورة على كد ماحبهم وحب اللمة والمكان كعد من كل عقلة يقنع بية يكلي ماما خل اعوف لامتحانات وخل نبقة هنا ولسنة لجاية اعيد
ميدري اني بس اريدة يكمل ويطلع من لمدرسة ويطب جامعة
قنعتة وكتلة ماما هي كلها شهر ونتاتي نتيجتك وتفرح ابوك بنجاحك ونرجع
تريد تضيع على روحك السيارة
من سمع بلسيارة غير رأية رغم ماموافقة علفكرة بس اخاف من تمردة غلست علموضوع وكلت لكل حادثة حديث
وصلنة بعد عناء ومشقة وتعب عزلت اغراضنة ونمنة نومة عميقة
عدت لأيام غضنفر كل يوم نتخابر اني ويا ورايح لدكتور وكاتبلة علاج
يضحك يكلي متاني جيتج حتة اجربة بيج
قسورة هسة بديت احس عندة استقرار نفسي
مهتم بدراستة بأكلة نفسيتة مرتاحة
انغام كلما تمر لأيام وتتذكر رايحين نعوفها تدمع عيونها وتكلي شلون رح افاركج
منصور بهاي الفترة قرر ينقلها يم بيت خالو تعيش وهي ويا عرك
هي رافضة وهوة يكللها اخاف عليج لو راحت انعام مااكدر ابقيج لوحدج واني اصعد ايام واسابيع
وعركهم كاب هي تكلة عوف هذا لشغل والكة شغلة ثانية مااكدر اعيش بغير شقتي ماا تاح
وهوة يكللها حرامات شغلي مكسبة زين ومرتاح بي
انتهى نقاشهم بزعلة انغام يمنة بقتلها اسبوعين
خليتها ترتاح وراها حاولت الكالهم حل مثالي يرضيهم لاثنين
دورت الهم على شقة قريبة يم بيت خالو ماكو واتضح هوة قبلي هم مدور ومالاكي ولهلسبب كاللها كعدي يم بيت خالو مؤقت
كاعدين بليل واجة منصور ركضت هي واخذت طيبة للغرفة
كعدنة اني وقسورا ويا جان مهموم بقة يشكيلي يكلي شنو لبيدي
قنعتة كتلة بيت خالو قريبين علينا كلها شكم شارع وجوارين العمارة كلهم نعرفهم ماعدهم زايدة ناقصة وام رواسي اوصيها تدير بالها عليها
ولتلفون يمها وهي موزغيرة ٣٠ سنة
وفر الها كل احتيجاتها قبل متسافر بحيث كتضطر تطلع ووصي ولد خالو يومية واحد منهم يمر عليها واذا لاسامح الله صار قدر أو احتاجو شي لتلفون موجود وتتصل بيهم
جرب وشوف ماخسران
عليمن هلخوف ماكو شي يستدعي ومكبرينها
ماادري والله ياانعام خايف عليهم
افكر بلموضوع وارجعلج خبر
صيحيها الي اريد احجي وياها واريد اشوف طيبة حرام عليها حارمتني منها صار اسبوعين
دخلت صحتها الة ماقبلت تطلع ومعاندة
اخذت طيبة منها شافها وبوسها اخذها اشترالها ورجعهة
يوم ثاني خابرني كال امري لله مابيدي حل ثاني
كليلها خل ترجع مو حل هذا شبيها زغيرونة هيج تسوي
حاجيتها ماقبلت
لليل هوو اجة عليها واخذها
يوم ثاني جان اول فحص لقسورا
رجع كال مجاوب وخابر ابو بشرة
وعدت ايام لفحص مالتة بكلهن يكول مجاوب مدري صدك مدري يقشمر علينا
بهلفترة بديت احضر صفيت لاغراص الي مااحتاجة اخذهن منصور لسوق يبيعون بي اغراض مستعملة باعن بربع قيمتهن رغم لازمة كليي من قسورا واخاف انضرب بوري بس كلت اخلص منهن عسا ينجح ونسافر باسرع وقت
وبقت بس لشغلات لأساسية
ليلة استلام لنتائج
جنت مأيسة من عندة وكلت ابسط شي يطلع بمادة
فاجأني لصبح من اتصل بية وكال ماما ناجح
لفرحة ماواسعتني اتصلت بغضنفر اريد ابشرة اتضحلي متصل بي هوة قبل ميخابرني
اكو تفاصيل بسيطة بس مرات توجع
من احجيها لانغام تضحك علية
اني الي ادري واني الي اتعب واني الي اركض وتالي هوة اول من يتبشر
حاولت مااخلي هلموضوع ينغص فرحتي
يوم ثاني وصينة شخص اجة اخذ لأغراض بسعر زهيد كلش ردت بس اخلص منهن ومنصور هواي بعدلة يلله يجي مومال اتاني يبيعهن بلسوق
بقينة ناكل يم انغام تسوكت مال اسبوع وشمرتة بثلاجتها ضلينة يمها نبات لأن مبقيت حتة لجرابي
فيزنا على يوم لجمعة لان منصور يجي لخميس وبدينة نحظر ونلملم بقت شغلات بسيطة احبهن مابعتهن ستحسفت سعرهن ميسوا
تحفيات واكسسورات وكوشات وزوالي وفرشات جرابي نطيتهن لانغام كلهن
يوم لخميس اجة منصور
تعشينا وبقينة نسولف وراها طلعو متعودين طول ماهوة موجود يكضوها طلعات يحاول يعوض غيابة عنهم لفترات طويلة وطيوبة تختنك
رجعو ساعة ب١١ جنت غافية وعيت على صوت طيبة طبتلي تصيح ننا
نامت على صدري وتلعب بشعري اني وقسورا بغرفتها نايمين الي هي اصلا متنام بيها
ضلت تجيب دبدوباتها وتذب بيهن على قسورة ماعافتة إلة كام على حيلة وبقة يلعب بيها ويكركر بيها
يوم ثاني جانت رحلتنا ساعة ب٣ لضهر لفجر رحنة للوادي زرت امي وخالتي بجيت يمهن ووصيتهن يندعن الي ارتاح واستقر وربي يجفيني شر سللامة ويبعدها عني رجعنة للبيت تريكنا وبقينة كاعدين اتاكد من شغلاتنا لأن اكو ملابس بقيتها للاستعمال
تغدينا انغام مسوية سمج وسفرة شطولها
جانت اخر مرة لتمينة بيها سوا
كلسا تباوعلي واباوعلها وتدمع عيني ماادري شلون رح افاركها وافارك طيبة
وشكد شايلة هم للوداع
ساعة بل١ نزل منصور غراضنا وتوجهنا للمطار
لطريق كلة طيبة بحضني ابوس بيها مااشبع منها ومن سوالفها
رغم ضعيفة وناعمة وشكلها عادي بس عجيب شكد محبوبة دمها يلعب تنكَع بلكَلب
نزلنة كبال لمطار ممسموح الهم يطبون إلة يدفعون مبلغ مالي كلتلهم خلص رجعو بقة نص ساعة على طيارتنا
حييل حضنتها وصرنا نبجي ثنيننا
هي تكلي رح تعوفيني ولج راح ابقة لوحدي
واني ابجي واكللها اقلها امي يمج هنا شوكت متردين تزوريها اني نحرمت من منة ومن عدها
سلمت على منصور وطيبة حييل بكل قوتي اشمها وابوس بديناتها وخدودها
قسورا حاضن انغام ويكللها اني اجيبج يمنة بس نستقر اجي عليج واجيبج يمنا كل فترة
راحو واني على وكفتي دموعي مابطلت لحد ماصعدو لسيارة وهمة يلوحون النا وطيبة تصرخ علية وتاشر فرفحت وانغام حاضنتها وتبجي
دخلت جوا على كراسي لانتظار كعدنة كملت بجيتي
اريد اسكت مااكدر
راح قسورا جابلي مي وعصير
شوية هديت وراها نادو على رحلتنا توجهنا وذرفت دموعي على كل ذكرى جانتلي بهذا البلد الحزينة ولسعيدة ودعيت الله ييسر رحلتنا
بعد تعب اكثر من يومين من مطار لمطار اوقات طويلة قضيناها بلانوم واكل
لحد ماوصلنا بلمطار جان ينتظرنا غضنفروحمزة وكشمش وبلقيس سلمنا عليهم وللسيارة اخذونا وصلنا تغدينا وكبل رحنة لشقتنا بس خليت راسي علفراش غفيت وجريناها نومة للمغرب
واني نايمة حسيت علي وراية جان حاضني ويهمس يلله صح لنوم صار الليل يمعودة كومي اكلولكم لكمة مااكلتو بلغدة
عوفني فدوا والله تعبانة
خوش براحتج بس ترا قسورة كعد وراح ياكل يم سللامة
طفرت على حيلي جريت لمبايل
لحيوان عود اني من البيت وصيتة كتلة سللامة لاتحتك بيها ولاتطب لبيتها ولاتاكل من اكلها
يمعودة اشاقة ببيت بيبيتة لاتسويلنا سالفة
سحب لتلفون من ايدي
كمت ويا غاز اكو ومسواك اكو ردت اسوي اكل ماقبل كال بلقيس عازمتج على عشة ومن لعصر تحضر وتطبخ
ليش كلفت نفسها
يلله لبسي وكليلها هذا لكلام
جنت لابسة دشداشة
طبيت جوا لبست كلابية تصميمها مغربي تنلبس كصاية لونها جويتي وبيها شغل كريمي برداناتها
ردانها يصير بي كلوشة طويلة
لبست وياها شال كريمي وشحاطة فلات وطلعنة
هوة صعد يصيح قسورة واني رحت يم بلقيس
لكيت بسعاد يمها وكشمش
دخلت وضلينة نسولف بلمطبخ
كشمش تثرم زلاطة وبسعاد تشطف لمواعين وتحضرهن وبلقيس علطباخ واكفة
طلعت لحم بعجين وبيتزا من الفرن وتكلي استلمي لتصنيف مال قيصر افندي من يشوف لطبخ
لمقلوبة يسميها تمن ابو المسواك
لبيتزا يسميها خبز عروك مال عيارات
لزلابية يسميها زقلابية
لسبزي يسمي مركَة حِنة
لداطلي ابو البامية حشة نعمة الله يكلي هذا بلبول نصير حاطتليا
خو البسبوسة خليها سكتة
غصيت بلضحك وبسعاد تكمللي تسمياتة لباقي لأكلات وتحجي على بلقيس تكللها
شكو متعبة روحج هم مايقتنعون غير بلمركة والتمن والثريد
بلقيس:- اي شسوي اني هم بشر واشتهي
احب لمعجنات بليل مااكدر علتمن والثريد ثكال
لنواشف خو ولا يقتنع بيهن يكلي ذني مقبلات
اذا هوة ستوة خلص لعشة يحطلة ركية ويكعد ياكل ركي وخبز حتة علم نصير شوفي شسمنا صاير
هوة شكو علي ياكل ويطول ولايبين بي لسمن بس هذا ملابسة صايرة متكفيلة
انعام:- هههههه يمعودة خلي شحلاتة وليدي لايكلة السمن
صبن وكعدنة ناكل
قيصر عينة عليها بس ماحجة اخر شي جابت بسبوسة وفاكهة وكرزات وحب ورا لعشة وصبت الهم جاي
نطتة قطعة بسبوسة انفجر بلضحك بصوت عالي ويباوع عليها
هوة يضحك وهية تضحك
واحنة مثل لأطرش بلزفة
كشمش تهمسلي اكلي خية اكلي ذولة مستهترين معليج بيهم
تعللنة يمهم تونسنا بلمطبخ كعدنا نسولف ونغسل مواعين وهمة ترسو لصالة دخان النركيلة وحمزة وقسورة روسهم بلمبايلات يلعبون
وراها طشينة
رحنة لشقتنا قسورة قيصر جلب بي
عرفت الفلم
دخلنة للبيت طبيت للحمام سبحت وطلعت لافة روحي بلمنشفة
بلصالة جان كاعد يباوع تلفزيون
دخلت للغرفة طلعت ملابسي ستوني ذبيت المنشفة اريد البس نفتحت لباب
بدون شعور جريت المنشفة
تقرب الي رافع تك حاجب سحبها من ايدي بلكاع شمرها
ادي على خصري ولثانية جوا رجلية
شالني للجرباية
صح لمكان شكم خطوة بس حسيت علي بصعوبة وصلني
تذكرتة قبل من جان يشيلني بكل سهولة
اعتلى جسمي وصوتة يهمس
ياصبر نفسي على شوفة إخيالها
كَُمر بَل ماللكَمر نورٍ سوا من جالها
حياك الكَلب والروح ياويييل حالها
حِنا علبعاد إنصَبر ولصبر للغلا يرخص
وترخص الدنيا بحالها ومالها
ودام فينا عركَ نابض ماينعكَطع للوصول إحبالها
خلك على كَد المرام عنودي يابس راس
هي الروح تعشك كلمن ذالها
وخلني على كَدك غطا ليَ الليل
ولهم باجي الأيام بحالها
جواي مهرا عنيدة خلِك يبوي
هي المّهار ماتبا راكبٍ سوا خيَّالهة .....حنين حاتم
(مطلع القصيدة مقتبس من شعر بقلم غضنفر )
جان يتفنن بأذابتي وجعلي ملك ادي
وتقرب الي بعلاقة كاملة والفضل يرجع للحباية الي جايبها الة قيصر
شفت بعيونة فرحة وكانما محقق فد انتصار
واتصل بقيصر يكلة جيبلي من عدها فد شريطين تلاثة
ندار علية يكلي اي ضحكي ضحكي
إلة اسرطهن بيوم واحد واخلي صراخج للضالين
طلعت برا اضحك
خابرت انغام حجيت وياها ووية طيوبة ومانختمت لمكالمة إلا وهي تبجي وتكلي مكانكم خالي واني كوة حابسة دموعي
وعدت لأيام استقرينا ونلم شملنا
قسورا من اول شهر اللعد صارت جا
وبابا صارت بوية
وكلشي بي تغير وتأقلم وياهم ولدشداشة شنو يشتري ابو يشتري مثلة
عصرية لو اني يم لبنات لو هنة يمي
سللامة تطلع تروح يم جارة الهم علاقتها بيها قوية لو تاخذ حمزة وتروح للسوق
ماشاء الله كلما تكبر تحلا وترجع من لسوك تضحك تتعمد كدام غضنفر تكول فلان تحارش بية
وحمزة يكلب وجها عليها مايرضة
لو يرجع متعارك
صاحبة خلفية بارزة مبالغ بيها حتة بلعباية تبين ومن الكعدة سمنانة هواي
جسمها فارش بس حلو مرتب
حمزة مخبل اماني بسوالفة
ورا جيتنا بشكم شهر شترالة غضنفر سيارة وخلا ستار وصميدع يعلمو على حسب فراغهم
يجون للبيت يكفخون بي يكلولة بس بلمبايل فالح
قسورا احس علي وعلى نظراتة كأنما يذكر ابو بوعدة الة بس ماحجة ولاجابلة طاريها
اكوبينهم حاجز مستحة من ناحية قسورا
مومثل حمزة ماخذ علي لأن رابي يمة
بعد مدة تعلم حمزة السياقة بعد ماتعبهم وكل يومية حاطي وكاتتلي بكد مايبزعهم
ياكل لكتلة ويكوم يضحك
احبة حييل ماكانما ابن سللامة مااكو بشر يكدر يكرها رغم الاعيب امة
طيب وماعندة دغش ومن كبر صار ابد مايقبل على سوالفها ودومة ضدها
بس تهددة بأماني تستغل حبة الها
بلقيس وصميدع ديوجة اسمهم مناكر
وبسعاد صايرة بنصهم اذا صارت وية اختها يزعل صميدع واذا صارت وية صميدع بلقيس تكلب وجهها عليها
نضحك عليهم وعلى سوالفهم يفوت من يمها يذب عليها ماي تفوت من يمة تكفخة وتشرد
هوا الي يبدي وهوة الي يعيل
وبلقيس ابد متعوف حقها هذا الي لاحظتة من خلال خبالها ويا
عبوسي قائد الجهال تحت إمرتة نصير وابن كشمش لزغير رغم اكبر من عندة وولد زوري
شراني ملعب مخبلهن
مسويلة حزب ويكتل بجهال المنطقة ويسلبهم
سوالفة تذكرني بجهال عمة مدينة
ورا فترة اجتنا تهاني مركبها رجلها هي وجهالها واجت بسيارة من كراج لكراج متبهذلة
جان واضح عليها زعلانة بس انكرت هذا الشي
رحبنا بيها بيومها والتمينا على سفرة وحدة
فرحانة بينة تبجي وتضحك
جهالها يشكون من عيشتهم وهي ماتشكي
تعبانة وجها مبين بي التعب والعمر
اقدرها اكبر من عمرها ب٥ سنين
ذبلانة موذيج تفاحة فدعم
مذبلها ابن عمها ومتعبها
اخذناها اني وبلقيس لصالون خلينا ام لصالون حفت الها وسوتلها تنضيف بشرة وميشت الها طلعت تخبل
وراها طلعنة اني وكشمش واماني اخذنالها ملابس الها ولجهالها لأن ماجايبن غير شكم قطعة وواضح طلعتها مال عجلة حتة مصرف ماناطيها
عدت فترة هي يمنا ارتاحت وجهالها ارتاحو نشنشو
ضلت يمنة اكثر من ٣ اشهر
صدفت دروة لسنة مال جدو وفدعم
سوو لولد ثواب وسللامة تعرف ملة من جاراتها حصلت النا رقمها وجابوها سوت قراية ختمة يسن
اكثر من ساعتين ملخن روحهن كشمش ماتت خطية وام فدعم تكسر لخاطر تنوح مثل لحمام
وتهاني بكل حيلها تلطم وتصرخ
كون لموت للنسوان
والشبان دفانة
وحيل تملخ بشعرها وتصرخ مامتت يافدعم عايش بكَلبي والله
على صفحة جنت متكترة وابجي تذكرت موتتة منة
وفاتحتها الي صارت ركض ركض
صوابها لليوم حار جن توني سامعة خبرها
طلعت كل حسرا ولوعة واشتياق بصدري عليها
ورا لقراية كشمش وتهاني نامن خطية من التعب
وراها عمو ابو ستار خابر على رجل تهاني وكالة شنو مرتك ماتريدها اذا ماتريدها كول حتة نطلكها
كالة لاعمي شلون مااريدها بس هي مشتاقة الكم ودزيتها تشوفكم
يعني بت حمرا خضرا دازها لوحدها ماستحيت على شواربك جان حجيت وانة اجي اخذها
دازها بطرك لكروة وهم مامكفيتها وكفت ابو لتكسي بلباب وطلعو لولد نطو كروة
ماتندل جاية تهبد وتسأل همزين حافظة رقم امها وناطيتة للسايق واتصل بينا وعلتلفون دلينا
صارلها ٣ اشهر لاسألت عليها لاسألت على بزرك
شني بوية ماتريدها احجي
بقة يحجي ويا وراها ستار اخذ لمبايل من عندة
وكالة ترا تهاني كلشي ماحجت نسالها مرتاحة تكول اي
بزرك همة الي فضحوك وكالو تضربها ومتطلع للشغل ولمسكينة مسويتلها بسطية هية وجهالها تعيش منها
انة ماحجيت لابوي لو يدري مايردها الك ولسواك
بس انة كلت ابن عمي اكون ستر وغطا علي
انعدل وصير ادمي ترا اطلكها منك واخذ لفروخ وشتسوي سوي
انة صابر عليك لخاطر عمي عبن ادري مالة احد وهي الي خادمتة
انة اعرف منين احصل اخبارك واريد اسمع اخبار حلوة
هاي الك فرصة
وماثنيها وروح فدعم
استغلها زين ودير بالك على مرتك تهاني ماكو منها بس انت رافس نعمتك
بقة يحجي ويا برا بلبلكونة
وراها سد لخط وكال عكب باجر انة اوصلها بيدي
بيومها طلعنة اني ولبنات اخذنا الها ولعيالها صوغات
ماكثرت لأن ردت انطيها فلوس تستفاد من عدهن
امها خطية حتارت شنو تسويلها
لاخلت كليجة لا خلت خبز عروك وخلت بيدها فلوس جانت مستلمة سلفة تريد تاخذ لاماني ورقية محابس هدية نجاحهن
خطية كالن الها مانريد نطي لفلوس لتهاني
لولد لمولها كلهم حتة كشمش شالت من مصرفها ونطتها
ضلت تبجي وماقبلت تاخذهن
بجنطها دحسناهن وودعناها للمطار اخذها ستار طيران وصلها وطمأن عليها وخاض رجلها خضة زينة وورا شكم يوم رجع
راح محمل واجة محمل
صميدع يضحك علي يكلة خاب انت حمار لكرادي
يروح محمل ويرد محمل
خابرناها ورا شكم يوم نسأل عن وضعها
غضنفر كاللها نطيني لجهال احجي وياهم بقة يستجوب بيهم
اتضح من كلامهم عايفة لبسطية ورجلها طالع للشغل ولرزايل جايبة نتيجة ويا
فرحانين يكلون لغضنفر عمو جاي ناكل لحم
كل يومية ناكل لحم
سدة وعيونة دامعة على فرحة الجهال
واقتربت امتحانات لولد ودخلنا نذار كل احنة
ظاهر وقسورا وولد كشمش وولد عمة امريكا لزغار نتناوب عليهم اني وقيصر وبلقيس كل واحد مادة
نحصرهم بغرفة وكوة مسيطرين عليهم من ورا لمبايلات وسوالفها
لزغار كصة عبوسي وجوا براس بسعاد وغضنفر
ساعة يكتلونهم ساعة يطولون خلك وياهم
الى ان خلصت لأمتحانت خلصت روحنا
كلهم ناجحين درجاتهم سحك مابيهم واحد يشفي لكلب
خو قسورا اعلى درجة عندة ٦١
حمدت الله على نجاحة وكلت علبكلوريا عود احطلة مدرسين بلكي يطلع معدل زين
غضنفر اني ويا علاقتنا لحمد لله كلش زينة
فرحان بروحة وبية
بس اخر فترة كلبة كام يتعب يلهث هواي من صعدة لدرج ينتهي يكعد علبايات وبعدين يكمل
لحيت علي وخليت قيصر اخذة للطبيب
من رجع فهمت انو سبب هلشي هوا الضغط الي متعرضلة كلبة بسبب لأدوية المنشطة الي اخذها
لدكتور مانعة منعا باتا من عدها
وكايلة اخذ عسل وجوز هاي لأمور مابيها مفعول فوري مفعولها على لمدى لبعيد بس متضر كلبك
ولأدوية كلش موزينة عليك
تركها لأن هوة ميعاول يستقر وضعة حتة يسوي عملية رجلة
يدك وينوح عليها مامتأقلم وية وضع رجلة ابد ولا متقبلها
كل املة يسمحولة بلعملية ويحسب يوم يوم
شغلة يقتصر على محل تبديل دهن مال سيارات حمزةشغلة دائم ويا ويحاول يعلمة لمهنة بس يكول شالع كلبي مايستلم
لابلسيارة فلح ولا وية ابو
لسيارة يومية جايبها مدعومة لو بتيل لو بلرصيف
اخر شي كلة عوفها فلشتها ويفتر نهارة كلة يجي مامشتغل
يكول ماكو كراوي بيها حظ
تالي اخذها من عندة خلة بيها سايق
ولد كشمش وقسورا يطلعهم ويا بلعطلة
قيصر يداوم بمدرسة اهلية وسيارتة يطلع بيها عصريات يشتغل
ستار وصميدع يشتغلون ببانزين خانة مرتاحين
ستار يطلع بسيارتة عصريات
وصميدع هم يطلع بسيارة عمو ابو ستار ينطي نص من جدة ونص الة
عمو ابو ستار عندة راتب مال اخو شهيد مكفي مصرفهم
واحتياجات لبنات ستار يسدها من شغل لتكسي
اني ماذابة حملي على غضنفر راتبي مكفيني اني وابني
وقيصر حط ببالي فكرة وشافلي وظيفة ويا
بلمدرسة
قنعت غضنفر وداومت
راتب لمدرسة نصة تبرعت بي لجهال كشمش دفعة بلا عن عمري لأن ايتام كل لاجر ولثواب من وراهم
ولنص لثاني انطي من عندة مبلغ لأماني ورقية
خطية ابوهن ذالهن على المصرف ويهدد بيهن يبطلهن وستار هم عندة جهال كوة ملحك عليهم
زوري يومية حبلانة
عدت لأيام بينا غضنفر حسرا بصدرة يكلي جتت اتمنا نكدر نسوي طفل
وينتظر لوقت الي يسمحلة بي لدكتور يسوي لعملية بفارغ الصبر احس كأنما هلعملية فرصتة لوحيدة بلحياة
قسورا لكفتة بلمبايل يحجي وية رقية من تلفون امها
تحجي ويا وتحذف لرسائل
لكلام جان عادي وبريء
بس اعرف هاي البراءة متدوم وكل يوم رح يتطور الوضع
لزمنا اني وبلقيس حجينا ويا خوفنا بأبوها
كلنالة اذا لكفوها هوة لو امها يموتوها ويبطلوها
التمست بداخلة الخوف عليها
مااعرف امشي ورا قلبي الي راغب بهذا الحب واتمنا تصير من نصيبة لأن خلقة واخلاق واعرف تربيتها شنو
لو اشيل الفكرة واقتلعها من جذورها حتة يهتمون بدراستهم
ماعفتة إلة حضرها ووعدني مايحجي وياها بعد علمود مصلحتها
ووعدتة بس يكمل دراستة احجزها الة
لأن خايفة من ظاهر ابن بسعاد لأن مرا جنة كاعدين نسولف وبسعاد كالت بنات عمة امريكا ماعدهن حظ رغم الجمال والنظافة والأخلاق وتالي لقسمة عوجة مثل تهاني
ضحكت وهي تضرب سللامة على رجلها وكالتلها يلله منفوت لفرصة اني وياج كل وحدة تاخذلها جنة
احسن ميروحن للغريب
حجيت وية غضنفر بلموضوع كام يضحك يكلي
انة اريد اخلف وانتي تفكرين بزواج قسورا
بقة صافن مخمخ لسالفة
كال مالج غرض انة راح اجس نبض عمي ابو ستار وبس يخلص سادس قسورا احاجيهم عليها وخليها لحد ميكمل دراستة ونعرسهم هوا وحمزة
راح حجة ويا اجة يكلي بس فتحت لموضوع كالي صدك جذب ابو قسورة كبع واخذ اي وحدة تريد انة اصلا ماعاجبتني سالفة طلعتهن وطبتهن بس هذا ستار واكفلي ويكلي مالك غرض انة كايم بمصرفهن
عدت لأيام مابيها شي جديد
قسورا على شكم مرا الكفة بلباب هوا ورقية والم لسالفة
ساعة اعيط بيها ساعة اعيط بي خبلوني
اماني صارحتني ماتريد حمزة وتكلي مااطيقة واشوفة حالة حال اخوتي
بقيت احجي وياها اكللها يحبج وشاريج
تكلي انعام انة طموحي اكبر من الزواج
انة اريد اكمل واتعين واعين امي وابوي
شحصلت تهاني من الزواج حتة انة احصل
وبعدين حمزة بكبرة ماداخل عقلي وسللامة ماطيقها بعيشة الله
نوب اصير جنتها
شبية مارايدة روحي
بعدين ياخية هوة حمزة مال زواج الله عليج
شنهي احساسي وانة رجلي لفروخ لزغار تضحك علي وعلى سوالفة
انة تعبت على روحي وماريد اتزوج
فدوا كليلة يشيلني من راسة
بيومها كضيت اليل مهمومة لا اكدر احجي اخاف تصير مشكلة ولا اكدر اسكت لان لمسكين يحبها بجنون وكل هلمدة متانيها تكمل سادس وياخذها
ورا مدة تقدم الها شاب وياها بلدوام
ابوها تخبل كاللها ممنوع تاخذين إلة عراقي وشرط منة وبينا
وحمزة رايدج وحاجاني عليج قبل ٣ سنين وكل هذا وهوة يناطر جنابج حتة تالي جايبتلنا واحد مدري شني ماشني
ونرفض لولد ونختمت لسالفة بتبطيل اماني من الدوام
رغم خطية قبولها هندسة مدني ومعدلها ٩١
وماشاء الله مثابرة
مااذكر احد درسها ولا اذكر احد تعب عليها
ضلت تبجي خطية وتتوسل بي وماخلاها ترجع غير لمن عقدولها على حمزة
جانت ماراضية ولا قانعة بس علمود مستقبلها قبلت
رقية اجت فتنت الي عليها
وفهمت هي وافقت وناوية تمرمرة وتجزعة وتكرها بيها الى ان يعوفها من ذاتة
عدت لأيام وحمزة طاير فرح بيها
يحل غضنفر يكلي ياكل لشغل اكل حتة يزيد يوميتة ويشتريلها هداية وينطيها مصرف
تبجي جانت تكول انقهر علي مااكدر ائذي شكد مااحاول كلبة طيب وعلى نياتة
يوم عن يوم احسها تميل الة بس تنكر
ورقية تجي تفضحها تكول تشتريلة هداية وتخابرة بليل
شترالها مبايل نوعية راقية
جان بين قوسين يحاول يكسب حبها بأي طريقة
رغم تعيب علي وماتعجبها تصرفاتة وتحاول تغير من طبعة وتقوي شخصيتة
بس من داخلها مكشوفة تحبة وتتخبل اذا واحد من لجهال يستهين بي لو يعيب علي
....
بلقيس
عدت لأيام يوم حلو ويوم مر
قيصر ماكو انسان يعاشرة وميكدر يحبة تركيبة عجيبة
بلجد جدي الى ابعد لحدود ووقت الشقة اجيبلي بطن واكعد اضحك على سوالفة
من لشهامة الة حصة جبيرة ومن لحنية ماكو احن من كلبة
لعائلة عندة اهم من كلشي واهم حتة مني
رغم يحاول يبينلي لعكس بس ميكدر ينكر هلشي
موبس هوة كلهم بينهم تكاتف عجيب
انعام تكلي جدهم هوا الي زرع هاي الحنية بيهم وهوا الي جان مخلي علاقتهم ببعض قوية
لدرجة داس على كلبة ونفة جليل وولدة لأن شافهم شرانيين وماعدهم كلب ولا رحمة
مرتاحة وياهم كلوبهم مليانة حنية وبينهم روابط ماممكن احد يتخلى عن لثاني حتلو تصير مشاكل او يتزاعلون
مجرد يسمعون واحد مريض او تعبان ينسون الزعل وكلشي ويجو يركضون
انعام علاقتي بيها كلش قوية اكثر حتة من بسعاد اختي
امي نفتح كام وياها كل يوم ونسولف
نوفل ومرتة انتقلو يمها تكول مرتاحة وياهم بس تشكي من وكاحة الجهال
تكلي عود مثل نصير جان صوتة ماينسمع
ابقة افهمها واكللها لتقارنين نصير بغير طفل ماما نصير وضعة مختلف
بسعاد وجهالها يحجون وياها كلشي ماتفهم منهم تكلي يكضوها ممالخ علمبايل وكلسا حاطتهم وكاتلتهم
قيصر يداوم بمدرسة اهلية اتوسل بي اكلة شوفلي وظيفة وياك
يكلي كعدي وسكتي انة متزوجج راحة ومسكن الي
ماريدلج لتعب وابنج وضعة خاص ماترهم تعوفي
حصل وظيفة لأنعام ويا بنفس المدرسة
حمزة رسب هواي وبطل
وظاهر لسنة سادس هوة واماني
رقية رابع اعدادي شطورات وسباعيات ابوهن كل سنة يهدد بيهن يريد يبطلهن بس ستار واكف بضهرهن يكلة شتريد منهن خل ينفعن روحهن عاد مو مثل كشمش ضالة لمسكينة تنتظر مصرفها كل شهر نلمة الها
ولد كشمش بلمدارس كل فترة تحط بالها وياهم تريد تبطلهم وتكول شوفولهم شغلة
بس غضنفر وقيصر مايخلوها
كاعدة صبحية الف دولمة ودك تلفوني
باوعت للشاشة امي
خليتة على اذاني واستمريت اشتغل
بعد السلام والسؤال عن لحال كالت بحسرة
غير زياد ابن عمج تلطم وتعزة وتصخم
شكو ياستار
مرتة لعوبة تشغل فلوسة صار فترة عد وحدة تعرفها هي ورجلها وينطوهم ارباح كل فترة
خلوهم يامنون الهم وكل فترة يزيد المبلغ وتزيد لأرباح
وتالي لامين فلوس من اغلب بيوت المنطقة يشغلوهن علساس واخذو لفلوس وطفرو للخارج
بس زياد ناطيهم ٣٥٠ مليون
وهسة يدك ويلطم ومرتة عد اهلها شامرها صارلها شهرين
جريت حسرة واستغفرت
لاحول ولا قوة إلا بلله وهوة شنو هلغباء شلون يسلم ملاين بيد ناس ميعرفهن
الي ادري بي زياد ميخطو هيج خطوا بدون دراسة شجا
لاعيني همة ملعبين يكلج صارلهم سنين مخليهم يأمون ويتعاملون وياهم بمصداقية وامانة وارباح ماشاء الله وكمبيالات ودنية
لا وازيدج من لشعر بيت قبل يومين جايلة واحد للبيت يسأل على مرتة
زياد متخبل مجلب بي من خوانيكة
طالع لرجال دازة واحد اعوذ بلله يشتغل اعمال يكلة مرتك عليها ١٧ مليون تشتغل يمي كل فترة وتسددني مبالغ بسيطة واني مشتغل الها ذاك لشغل
وهسة يريد يطلكها وبايع بيتة وشامرها عد اهلها
سديتة مخنوكة مابطبعي انشمت بس نزلت دموعي فرح لأن واخيرا ربي التفت الي واخذلي حقي
وبلطريقة الي جنت اتمناها
جنت دوم ادعي الله يفجعة بأعز شي على كلبة
وكلت ربي وهوة سميع مجيب
.......
انعام
نجح قسورا للسادس وفرحتي ماتنوصف من العطلة خليتلة مدرسين حتة يلتزم
ظاهر هوا وابن كشمش نجحو
واحد معدلة ٦٥ وواحد ٦٨ نقبلو تربية ثنيناتهم
وبعد عناء وجهد نجح قسورا ومعدلة ٧٣
فرحتي ماتنوصف صح ذبيت علي دم كلبي وسلف وذاك لحساب وصح تمنيت يطلع اكثر بس حمدت الله وشكرتة
ودخلتة قانون مسائي
حمزة بهلفترة حددو عرسهم بلعطلة لأن كمل كل شغلاتة
كلة من كدة وتعبة لغرفة ولذهب
جان كل فترة يجمع ويرحون هوة وياها يشترون قطعة ذهب
عجيب شكد غيرتة وشكد خلت عندة طموح وصار يحب لشغل وبس يريد يسعدها ويكمل شغلاتهم حتة يتزوجون
وبدينة نحظر لزواجهم وسوينالهم عرس يخبل
سلامة حالها حال لعروس لبست سبع بدلات
فرحانة بحمزة طايرة من لفرح
وهوة هم خطية يباوع لحلك اماني
بلعرس والكة قسورا ورقية خاتلين علدرج وواحد قريب من لثاني
نزعت نعالي وتوليتهم هية بقت تبجي وتكلة مو كتلك خاف يجي احد
وتتوسل الي تكلي والله خالة هوا يلح وميفوت حالي
تانيت لعرس خلص وفاتحت غضنفر بلموضوع
حجة وية ستار كالة لبنية سادس خل تخلص وبيكم خير وتدللون
كتلة عاد بس خل نقرا لفاتحة لأن خبلني فشلة من اهلها خاف يلكفوهم فد يوم
بقة يضحك ويكلي عليمن فشلة بوية بيوم الي يلكفوهم ثاني يوم ازوجهم
اماني من ليلتها حبلت مثل تهاني
والحمل وية دوامها كلش متعب
سللامة على اساس يأجرولها بعيد شوية عننا بس نلغة لمقترح لأن عمة كالت اماني اريدها يمي وعبني عليها اخاف عليها من سللامة ومكرها
كملت رقية امتحاناتها وطلعت معدل ٨١ انقبلت قانون صباحي داومت شكم يوم وراها عقدنالهم هية وقسورا
واخيرا اخذلة غضنفر سيارة
صح موذاك لشي بس تفيدة بلدوام
عصرية يطلع وية ابو بلمحل مطلع مصرفة وينطي لرقية شي بسيط
يوم جمعة وملتمين كل احنة ببيت عمة امريكا تلفون قيصر دك اخذة وطلع برا يحجي
وراها رجع بصوت عالي يسترعي انتباهنا كال طالب يريد يجي يزورنا وكال بهذا لأسبوع افيز واتصل بيكم
كلهم كالو هلا بي
ورا شكم يوم راحو لولد من لمطار جابو وسوو غدا ولتمو كلهم يمة
اتضح لغرض من جيتة جاي يخطب
وكايل لقيصر انة عرفت من رجل تهاني اخت فدعم ارملة وعدها ايتام وانة طالب لقرب من فدعم
انة ماصنت امانتة من امنني على منة
وهسة رايد اصون رضيعتة واكونلها ولفروخها سند وشتفصلون انة البس
تضل هنا وانة اجي يمها
ترد وياي للعراق ماعندي مانع
انة اخواتي عرسن كلهن ويتمنن اتزوج ويفرحن بية
فدعم لليوم ماعايفة كل خميسين انة يمة
وامانتة تاكل بروحي
ومن سمعت عندة اخية ارملة اجيتكم متعني طالبها
بلكي ارتاح من حملي
واسعدها واسترها واكوم بواجبها
وفدعم يرتاح بكبرة ويسامحني ويبريني لذمة
لولد باقين صافنين بوجها
طبو ليجوا محتارين واحد يضحك واحد يبجي متأثر بكلامة وتذكرو فدعم
رجع قيصر دخل يمة كالة خوية ترا بت عمنا جبيرة اكبر منك ب٤ سنين
وترا ولدها زلم بطولك
لو هي رضت مااضن ولدها يرضون
كايلة دانشو امركم وردولي خبر وشتفصلون انة البس
راد لولد يروح فندق جلبو بي
اجت بلقيس يمنا واخذو لشقتها سبح وارتاح ونام
صاحو كشمش على صفحة حجيناها وياها
ضلت تخرط بخدودها وتكللنا اشش لايسمعون لويلاد شلكم بهذا الحجي الماصخ
كعدنا كل احنة وياها وسوينا عليها حلقة
كل احنة حاولنة نقنعها وبقت رافضة وتدك وتطلم تكللنا شني هذا الحجي انة ويلادي عمر زواج
عكب ماشاب ودو للكتاب
كعدو وياها قيصر وغضنفر وعمو ابو ستار حاجوها رادو
حجو وية ولدها
تلاثتهم فقرا ويستحون كالو بكيفها هي احنة مالنا غرض
شهر عدا احنة نقنع ونحجي وياها ونسولف
تالي عمة امريكا سوت الها فلم وكالتلها حلمت بفدعم مغثوث ومقهور يكلي انة دزيت صاحبي يخطب كشمش عبن اريدلها لسترا ليش ترفض
ضلت خطية دمعتها بعينها ومصدكة
يوم ثاني عمة شافت فراشة طبت من لبالكون وكعدت تقنع بيها تكللها هاي روح فدعم اجت
اصرارنا هذا لأن نحسها قابلة بس تستحي من عمرها ومن ولدها
انتهى التفكير بموافقتها الرسمية
وخطبها لولد وعقدو عبر لتلفون وورا اسبوع وصلوها لولد وسافرت الة
ولدها لكبار ماقبلو يرحون وياها اخذت بس لزغير
طالب بيتة وحدة ويشتغل عامل بمطعم
تتصل بينا تكول مرتاحة
فرحانة خطية ومتغيرة شحلاتها
تتصل بينا اول مرة اشوفها تنزع لحجاب
اخواتة يموتن عليها ماخذاتها للصالون كالبات شكلها
حتة تاتو مسويات الها
مناك تروح على تهاني وتهاني تجي يمها
ورا شكم شهر راحولها ولدها
رغم كبار وطوال بس ماشاء الله علأدب والأحترام اعقل لولد واحسنهم من بين بزرتنا كلهم
وعلى كلبها حنينين
نقلتهم ومرتاحة تتصل بينا كل فترا
ولدها لكبار يشتغلون وية طالب يطلعون ويراوسون بين دراستهم والشغل
عدت السنين ومشت عجلة الحياة
يوم حلو يوم مر يوم عدل يوم اعوج
عمة مدينة اجتنا لوحدها ابنها لأخير مزوجتة بقت يمنا اكثر من شهر وزتوها لولد
تعبانة جانت ومتغيرة هواي
قسورا سوالفة مثل سوالف قيصر كل يومية نلكا خانب برقية اخر شي عاط بي ستار يلله صار ادمي
وصلتنا اخبار من لعراق نعناعة ميتة ماعرفنا تفاصيل موتها بس فهمنا ميتة بلخبيث
وولدها سمعنة كلهم همة وولدهم يشتغلون بلحزب العائد القائد جيش ال...... وصايرين احوال
وبسنة ٢٠١٩ انغام خابرتني وبشرتني حامل
شنو لفرحة الي حسيتها كل عمري ماحاستها
وجابت ولد وسمتة على اسم بابا
وعلاربعين بانت بشائر رب لعباد وهم طلعت حامل بقت شايلة هم لان عملية بس الله سهل الها وولدت ولدكتورا كالتلها بعد لتحبلين منا لسنتين على لأقل
منصور تغير شغلة علمودهم بقة يشتغل بداخل المعمل وترك لحمولات
وبلعطلة اجتي يمنا بقت ١٥ يوم
ونسناها وطلعناها ورتاحت من لجهال كلة يمي لو يم قسورا وراها راحت
وهاي لسنة جانت فاتحة خير علينا بشهر ل١٢
سمح لدكتور لغضنفر يجري عملية لرجلة وتحدددت لعملية على شهر لثاني من سنة ٢٠٢٠ بس للأسف بدت جائحت كورونا تنتشر وتاجلت عمليتة حالها حال اغلب لعمليات
حبنة مااثر علي لا مرضة ولا عجزا
حبي الة تعدا هاي المسميات وحتة ماافكر بيهن
وحبة اغرقني لدرجة تنسيني كل هلشغلات
ولدرجة تعوضني عن اي نقص ثاني بعلاقتنا
بقة كل فترة يزاغل وياخذ حباية
بضحك يهمسلي ماافوت يوم لخميس
عجيبة عناية ربي وعجيب عوضة شكد جبير
اكبر من ماجنت اتوقع
بللحظات الي جنت اتخيل بيهن انو بعمري ماراح اكدر اخلي يلمسني ولا راح اطيق ريحتة او انفاسة
كل هلشعور تلاشا ونمحة مجرد ماشفتة بيوم جان بلمستشفى
سنين ماكدرت تمحي هلشعور
بس خوفي علي
خوفي من فقدانة قضا على هلشعور واماتة
قسورا مرحلة ثالثة قانون ويحسب يوم يوم يتخرج حتة يتزوجون
خطوبتهم من طالت كل واحد عرف لثاني على حقيقتة حتة لرسميات راحت وماعادو يمثلون على بعض
يكفخ بيها كدامنه ويرجع يبوس ويراضي بيها
بلطبع ماخذ شي من قيصر وشي من غضنفر
اما لشكل كلما يكبر كلما تبين ملامحة الي تشبه قيصر الى حد ما
بلقيس وقيصر يخبلون بلابل حب ولساها هي وصميدع مناكر ومكافش وواحد يلزم للثاني زلات وبسعاد حايرة بينهم
زوري فقاسة سطرتهم ٧
حتة ماتعرف صفوفهم تنسا من كثرتهم
كشمش كل فترا توواصل ويانا مرتاحة وهي وتهاني وحدة دايرة بالها ع لثانية
اماني صارو عدها ولد وبنية واكتفت متريد بعد
تخرجت وكعدت بلبيت
سللامة مداهر وياها بس حمزة ماينطي بيها ومايقبل عليها
وعدت لأيام ملمومين كل جمعة احنة ببيت عمة كل وحدة تجيب غداها ونتغدا عصرية نطلع للحديقة علمود لجهال
لمتنا حلوة ولحنية لعدهم ماكو مثلها
غضنفر حبة الي ماقل ولا تغير يمكن لأن ماعشنة وية بعض غير شكم سنة
ويمكن على كد مانحرمنا من بعض صرنا واحد يقدر قرب لثاني ووجودة
ولسنة بفضل الله سمحولة بأجراء العملية بشهر ال٧
دعواتكم الة يجريها ويتحسن
وضعا ويرتاح
.....النهاية
وانتهت الحكاية
حكاية اغرب من الخيال
انتصر بها الحب واصبحو ابطالها للتضحية مثال
حكاية حبٍ وحرب وملحمة الكمال
فشخوصها حصنو انفسهم من الزوال
فمن مات دفن في القلب لا في الرمال
ومن عاش في الذاكرةٍ حياً لا يزال
دخلنا حياتهم اشهرٍ طوال
ويعز على قلبي ان اغلق الباب وانهي الوصال
ولكن آن اوان الفراق لامحال
حنين حاتم
وداعا خنجر الغضنفر ١٦/٤/٢٠٢١
انتهت حكايتنا الي طالت هواي
لبارت ١٠ الاف كلمة صار ٣ ايام اكتب بي وحتة مالي خلك اراجعة 😁
شكرا للي صبر و قدر والي التمس الي الف عذر قبل ميكتب تعليق جارح وشكرا للتعليقات الجارحة هم
واعتذر منكم على تأخري وتقصيري الله وحدة يعلم الظروف هي الي جانت تحكم عمري ماقصرت وياكم من ارادتي
ابطال لقصة حملوني اماااانة لسلام الكم ونعومة دزت الكم كووومة سلام وشكر لدعواتكم وتقدير لمشاعر لصادقة
واني هم حابة اشكركم من كل قلبي على دعواتكم الي
ان شاء الله باجر او عكبة افتح بث واستقبل بي كل اسألتكم عن اي شي ماتوضح يمكم ولو اني وضحت كلشي اعتقد
وهسة اترككم وية صورة للهدية الي اجتني من عمو غضنفر شكر على مجهودي وتعبي
صراحة دمعت عيني من وصلتني
هاي لهدية قطعت مسافات وطيران اجتني فرحتي بيها متنوصف وحبيت اشارككم بيها
والي هي سبب تسميتي للقصة لأن هذا الخنجر كان اول خيط نسج هذه الملحمة الرااائعة والي كلي فخر لكونها نضمت لمكتبتي وندرج اسمي عليها
احب اسمع رأيكم بلقصة كاملةً
وبلنهاية تقبلو تحياتي وحبي ومودتي وانتظروني في الجزء الثاني من يحدث في الرابعة مساءً قريبا بأذن الله
تصبحون على الف خير
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!