رواية خنجر الغضنفر الفصل الثاني والخمسون 52 - بقلم Hunen23Hatum

#خنجر_الغضنفر
#الجزء_الثاني_بارت٥٢
#حنين_حاتم

بلقيس.....

فتحت لباب صارو بوجهي
بسعاد شمرت  روحها على امي وجهالها من جوا رجلينا ركضو ليجوا بليبيت
بلكاع وكعن ثنينهن متحاضنات ويتصارخن
على صفحة وكفت ايدي على حلكي واعاين الهن
نسيتهم

نززتني امي من اشرت الهم تفضلو يمة تفضلو لبيت بيتكم
دخل صميدع سلم علية وراح على جهالة الي اكتسحو لبيت
تقربت زوري
متغيرا هواي سمنانة كبرانة
حضنتها بكل قوتي
ذكريات لاسبوع الكضيتة يمهم حنيتهن وطيبتهن وشيمهن مرت علية مثل حلم وداعب ذاكرتي
دخلت ووياها طفل
وهوة جان اخر واحد
تقرب ينزع بحذائة ويعاين الي
عين تدنك للكاع وعين تختلس لنضر علي
اباوعلة خلسة
عيني على ايدة اتفحصها لساهة خالية
بمقدمة راسة شيب
بعدة بنفس لرشاقة ولطول لفارع
تقرب يريد يسلم علية
نززتني بسعاد من هدت امي وكامت علية حضنتني وصارت تبجي تكلي شصاير بيج
ولج كاضية شضال بيج
تضرب على متوني وتكلي ضعفانة شني ماتاكلين

دخلو ليجوا
فات من يمي سلم ووكف كدامي
اشرتلة تفضل

بتسم وهمس
شلونح بلقيس

بخير لحمد لله

شفتي لدنية شكد زغيرة

اي شفت

شفتي الينهزم نلكا لو وين ميكون

راسي للكاع مارديت

دخلو ليجوا
جبتلهم لضيافة اكلو ويسولفون ويانا
بسعاد تبجي وتضحك من الفرح ترجع تسولف وتشكي النا وتتعذر عن تأخرها وعدم تواصلها وتوضح لأسباب
جنت منفصلة عنهم
عيني للكاع
كلما ارفعها الكا صافن بوجهي
مجرد ماارفع راسي يندار

جهال بسعاد احتلو لمطبخ ساعة يجيبون خيار ساعة يجيبون خس
وهي تتعذر خجلانة منهم
بقو يسولفون علصارلهم
استمع لحجيهم وعين تبجي وعين تضحك
شوية واذن
كامو يصلون
بساع لبست نعالي ورحت اجيب دجاج شوي موصية علي من لعصر
بعدني اتمشة صوت وراي يصيح تاني

نصير بيدي
نداريت شفتة

تقرب وهمس
شلون تطلعين هيج وكت جان كلتي وانة اروح

ترة اني متعودة وهاي منطقتنا ويعرفوني

ميخالف انة موجود لوماموجود طلعي
بس زحمة رجال بلبيت وانتي تطلعين

تقرب وهمسلي شنو تردين كليلي

لا اني اجيب ارجع هسة بساع اجي

هذا شلون حجي بوية

مديت فلوس واشرتلة من ذاك ابو لدجاج بس كلة ملات ام نصير

تقدم وهوة يتجاهل لفلوس لمادتهن ويهمسلي ردي انة اجيب واجي

لحكتة مشيت بمحاذاتة
قيصر انت ابن شيوخ شلون تقبلها علينة
ضيفنا وتدفع فلوس عشاكم
والله عيب شكلولك علينة مانعرف نضيف

والله بهاي حكج
بس ليش هلكلافة بوية ناكل هلموجود
ولو فروخ بسعاد كلو دوشمة لتخم بس مومعناها تكلفون روحكم

اي كلافة يمعود يومية جايينة

وكفنة يم ابو لدجاج
سلفنهن الي ست دجاجات وتمن وياهن ومقبلات
اخذناهن ونطيت لفلوس لنصير دفعهن
يفرح من يدفع فلوس لمشترا لو يدفع كروة التكسي
يمشي ويضحك للهوة
شوفتة لوحدها ترد بلميت لروح
كمية برائة ونقاء تتجمع بملامحة
ماخلق الله براءة بهلكون بكد لبراءة الي خلاها بمرضى متلازمة الحب
اخذناهن وتمشينة للبيت

واحنة نمشي همسلي

اي بلقيس شخبارج
وين ماوين

على حطة ايدك انت شخبارج

ماعندي اخبار لحد مالكيت اهلي

كرة عينك

رحم الله والديج

ساد صمت دقايق
جان يتمشة ببطئ كلسا اعبرة وارجع ابطئ خطواتي
احس عندة حجي وميريد نوصل للبيت
لحد قريب لعمارة حسيتة توتر كلسا يبحبح بصوتة
اخر شي كال

بلقيس من لأخير
شجابج لهنا وليش مرة زياد تكول نهبت
شنو لصار
اني كلت يجوز طلكها وطلع عليها هلأشاعة ماكو غيرها

شفايتلك طلكني
نهزمت منة لهنا ومايندلني ولايعرف شي عني حتة ارقامنا اني وامي بدلتهن

افهم من كلامج انتي بعد ماتردي

ليش اني يايوم ردتة
عيشتي وية زياد صارت ثامن لمستحيلات

ابتسامة بوجهة ماكدر يقاومهة وصوتة يهمس
يافرجك يارب

كملنة طريقنا وكفنا كبال لباب دكيتها
صوتة يهمس
انة لساني على حطة ايدج.

اي سولف شكو ماكو

تقرب الي وجهة صار بوجهي وصوتة يهمس
غيرج بلكلب ماكو

وية ماحجاها نفتحت لباب صارت امي بوجهنا

نترت تأخرتو

همستلها واني ادخل
جان بعدة جاي يشوي

دخلنة جوة
واني اسد لباب شفت سيارة خطفت
بس هلسيارة موغريبة علية
مديت راسي اتأكد
جانت رايحة ماكو

دخلت جوا بدينة نحضر لعشة اني ولبنات بلمطبخ
صالتنا زغيرة كوة شالتهم
كعدو لولد بلأستقبال
امي طابخة كدر تمن احمر
بينما سوينة زلاطة وحضرنا لخضرة ولمواعين ستوة
صبينا بلام تمن وكل بلم علي دجاجة
ومقبلات وخضرة وفاكهة رتبنة سفرة
احس بيها قصور
اذكر سفرتهم من يمدوها رغم اني وحدة اجيتهم
بس سوو لعمايل من رحبو بية
لتمينا علسفرة
امي من لفرحة كلسا تغص بلأكل عافتة وتكترت بقت توكل بجهال بسعاد رغم كبار تدحس بلأكل دحس بحلكهم
ونصير غيران يحوم داير مدايرها ويكعد بحضنها
فرح على جهال بسعاد وخبالهم

باتو يمنا فرشنالهم بلاستقبال واحنة ولبنات نمنة بلصالة
للصبح لااحنة نمنة ولاهمة
اسمع فتحة باب لأستقبال كلسا
واسمع صوتة يروح للتواليت لبرا لو يكطعد يدخن

فجرية كعدو يردون  يرحون
جلبنا ردنة اني امي
كالو ماكايليهم ومامهيئين وضعنة ولجهال عدهم مدارس
صميدع كال مدة وكت و اجيبها تضللها يمكم اسبوع

راحو واحنة نودعهم
امي تبجي وترجع تضحك تكلي لحمد لله من اجونا

رجعنة نمنة كلنا
واني نايمة اسمع صوت لباب حيل تندك.
كمت على حيلي طفرت وامي قبلي لكيتها بلصالة مثبورة تدور على نضاراتها تريد تركض للباب
سبقتها بخطواتي
لدك موعادي كأن ناوين يشلعوها للباب

وصلت الها مرعوبة
من ورا لباب صحت منووو
فتحتها
نفتحن عيوني
نزيت مثل لحلمان
رجعت ليورا وهوة يتقدم ..........

انعام..

نزل لرجال جوارينة الي بلصدر يم منصور وصعد هوة
واحنة نمشي فتح لورقة وكال هاي لكيتها خالينها يم جثة ام يدور
ماجنت انطق ولاعندي عقل يستوعب
كل احنة بتأثير الصدمة
فتح لورقة ويقرا بيها

هذا مصير كل وحدة تتاجر بشرفها وشرف بناتها وتجيب السمعة السز المنطقتهة
طهرنا المنطقة منج وان شاء الله نطهرها من امثالج

اسمع ليحجي بس ماجنت يمة وجهي بوجهها واترجا من الله معجزة تكومها الي
وصلنة للمستشفى تناوشها طالب واخذها ماتانا علما يطلعون سدية متنقلة ركض دخل بيها ليجوا
منصور راح يركن لسيارة واني وانغام نركض ورا طالب
كلسا نتيها بلهوسة وترجع انغام تصيح هذا منا دخل
جنت اتعثر بممشاي
ولطريق كلة اناجي ربي

اخر ممر دخلة طالب وكسر عليمنة جان يركض وانغام تلحكة وتندار تلكاني امشي واتعثر مدري الزم رجلية مدري الزم ضهري الأحسة خالي من لفقرات
تندار علية تتجيلي وترجع تركض تلحك لولد متريد تتيها مستشفى جبيرة وهوسة
الى ان خلصنة لممر بنهايتة ممر يودي عليمنة
مااعرف ليش جان يركض ليجوا رغم عبرناغرف الدكاترة الي يحولون المريض من برا للردهات والغرف لداخلية

دخلنة بلممر الي عليمنة عرفت وجهتة
طلع طالب من غرفا كبالي يضرب ايد بأيد
تقربتلة انغام لازمتني

ها طالب وين بتي

صفن بوجهي ودموعة تجري
حيل على وجها صار يصفك بثنين ادي

جريت ادي واخض بي حاجيني
بنتي وينها
وينهااااااااااااا

بتعد عني ليورا رجع يرجع نرطم بلحايط لورا للكاع نزل وحيل على وجهة يضرب
وبصوت عالي يصرخ

هافدعم جنك شفتني موكَد لأمانة
مامأمنلي وخذيتها
مادريت اخيك روحة صارت بيهاااااااااااااااااااااااااااااااااا
رتاحيت هسة من اخذتها رتاحيييييت

عفت انغام تحجي ويا تفهم منة
وركضت علغرفة لطلع منها
قبل مااوصل طلعوها مغطايا ويدفعون بيها
ركضت عليها
بعدني ولد مضمد وكال
حولوها علتشريح حتة نعرف انتحار لو فعل فاعل

هاي شدتحجي وخر عن بنتي وين ماخذها ياتشريح
بس خل احجي وياها هية هسة تكعد

ادين انغام لتفت حوالية ومنصور صار كدامي وياشر لأنغام
اخذيها برا

منصور بنتي متموت
بس خل احجي وياها والله تكعد
هسة بس اكللها اخذج لأبوج تكعد
والله تكعد بس خلوني احاجيهااااااااااااااا

ادين انغام ومنصور تسحب بية ويأشر الهم اخذوها واني لاحككم

نداريت علي بصراخ اهمش بي
ولك منصور تريد يشرحون جسمها
ولك منصور تخبللللللللت

هذا اجراء روتيني ام إمتنان خل نعرف شنو لصارلها حتة نعرف حقها وين

ولك ياااااااحق
بنتي ماميتتتتتتة
وخرو
ضهري لجنت احسة بلا فقرات
احسة اقوة من الحديد
وحيل بكل قوتي ركضت وراهم
طالب بلكاع على كعدتة ويضرب على وجهة مضمدين يمة يحجون ويا

جانو بعدهم ماتجاوزو الممر
بلكاع على ركبي جثيت وبكل صوتي صرخت
ولج امتنان يممممممة
وين رايحة ومخليتني
ولج يمة شردت بيج لآخر لدنيا وتالي لهنا لحكَتج لمنية
ولج شحجي وشكووووووول
ولج منة يمة شطلعج
وشودااااااااج

لحظات عشت بيهن سكرات الموت
حسيت ضوة المستشفى كلة نطفا
ونطفا العالم بعيني
لحظات مرت علية خطف مااذكر منها غير مقتطفات
مااعرف شكد مر يلله سلمونا جثتها
كل الي اتذكرة لوقت كلة مر علية ليل
بعز شمس الضهر جنت اشوف لدنية ليل
نطفة بعيني لضوة
مدري فص عيني هوة الي لبس السواد عليها
جانت العاصفة الي هزت ثبات اخر ذرة استقرار جانتلي بحياتي
شحجي
عن حسرة كلبي بيوم نفجع بأنسانة جنت اقاوم لحياة بضحكتها
عن وجع روحي بيوم وكفت واني اصرخ يارب كلشي نسلب مني برضاتي واني الي جنت انسحب
إلة منة
غصب نسلبت من حضني بلا وداع
بلادواع رحتي يمة منننننة

اذكر وكفتي على المغيسل واني اغسل جسمها المخيط من الطول للطول
اذكر صراخي واني اشوف وجهها ابييييض وشفافها بلا لون واثر الحبل الي على ركبتها يشبه اثر الطوق الي قيدني بي غضنفر بيوم من لأيام
اذكر شعري الترس كَاع المغيسل
لواذكر من ذبو التراب على وجهها لحلو
شذكر وشنسا
شنو اني وشضل مني
ضلت بس قصص 
متت وضلت هلقصص تارسة صدري ذكرياتها
هاي جانت اكثرهن الم
وشكد عجيبة حياتي
جن تتسابق وياي
كلما اكول هذا اكثر الم عشتة تكلي غلطانة وتقدملي الم اكبر منة

على كبرها وكفت
لاماوكفت جنت مثل لمبتورة رجلي يتمنة يكوم بس مايكدر

من نزلوها بلقبر
من ذبو عليها لتراب
من لقنوها
من سحلوني سحل من على قبرها
ذني اللحظات الي ماانساهن لو الله يكتبلي عمر جديد

شفت وجوه هواي بعضها شايفتها وبعضها لاء
شفت خالاتي وخوالي وولدهم وبناتهم واحفادهم
شوكت اجو ماادري كل الي اتذكرة جنت اغفة على روحي من لنعاس واصحا اصرخ بأسمها
اذكر اليلة الي عفتها بلكبر ضليت للصبح كاعدة بباب لحوش بجادر صلاتي وسجادتي
للصبح اصلي واصرخ ربي اصليلك لعمر كلة بس ردها الي
للفجر اني اكلهم هسة تجي لابسة صدريتها وجنطتها بضهرها
الدربونة كلها فاتحة بيبانها وطالب ترس لدربونة شموع من الركن للركن
اذكر من شيعناها يطش جكليت ويلطم مثل لنسوان ويصرخ فدعم رتاحيت هسة من خذيتها رتاحييييت 

جادرها برة منصوب ماادخل ليجوا
بلباب كاعدة والولد لشباب تلطم وياي
وبيت ام بدور لااحد نضبلهن فاتحة ولااحد وصل وحتة جثثهن دفنتها المنطقة

يوم ثاني ومانسمع بس صياح فدعم
طلعت انغام وشوية واجت كالت متكامش هوة وابو البيت لعالي
يريدة يرجعلة لكامرات ويشوف منو
ولرجال يكلة عطلانات وهوة معاند يكول جذاب
من سمعت حجيها جريت عباية خالتي ام منصور وركضت ليبرا
جان لرجال واكف وناس يمهم وفدعم يتهادد علي ولولد لازمي ولد خوالي واحفادهم
تقربت الة
تلكوني يكلولي طبي احنة نحلها
كلتلهم اريد احجي ويا
تقربتلة يم رجلي بلكاع وكعت ولزمت طرف دشداشتة وصرت اتوسلة واترجا
فدوة افتحهن خل اشوف بلكي ناري تطفة

استغفر الله ودنك علية فلت اديةمن دشداشتة ويهمس
استغفر الله بوية علوية بت رسول الله كومي

اترجاك افتحهن وخل اشوف منو سوة بيها هيج وليش

بنيتي بدون ماافتحهن واضح منو لسوا هيج
همة نفسهم الي كتلو لولد لحلو الي بيتهم براس لدربونة
ببلوكة فلشو راسة علرصيف ومحد يستخدم هلأساليب غيرهم منين تاخذين حقها من واحد ثنين
همة مسنودين وعالم باطلة لاتخاف الله ولاعبادة
وبنيتج راحت بذنب غيرها
ندعيلها وتعوذي الشيطان وطبي
طلعتج هاي غالية علينة بس والله مابيدي شي
اني هم عندي بنات واروح انضر

بعد ماكدرت احجي شي
لميت عباتي وكمت على حيلي ومثل عجوز منصور تجالي لباب لحوش
عباتي تك يسحل وتك مرفوع حجابي مخربط ونعالي تك وتك
دخلت للبيت اتلفت مثل لمخبلة
منين مااندار تتراولي

عدت هلليلة بمرار اكبر من لقبلها
اليل كلة اسمع طالب يتعارك وكلسا رايح علرجال يريد لكامرات من عندة
الى ان تدخلت ناس وتوسطو وفتح لكامرات
اجة بليل حجالنة
عارفين واحد من عدهم
اخذو لتصوير ودو للمركز
لزمو لولد بنفس ليوم
ولد مراهق كل عمرة ١٧ سنة بس ماخذة لطول
بساع اعترف على الي ويا واعترفو على الي وازهم
ونلزمو كلهم
كلهم من منطقتنا بس من اماكن متفرقة
يوم ثاني اجو عشيرتا يعزون وجايبين سيارة بيها روس غنم وفلوس لفاتحة وجاين يطلبون عطوة
طلعت برا من سمعت
كمت اصرخ طلعوهم من فاتحة بنتي
طلعوهم لولد وطالب يهادد عليهم
ركض علسيارة فتحها وخلة الغنم شردن وجرهن من ادين خالي وشمر الفلوس الجايبينها بوجههم

اسبوع مر علية لااكل ولاشرب
يومية يم لشجرا للصبح حاضنتها واصرخ يمة منة كضيتي اليل كلة معلكة هنا
ولج يمة شلون ماحسيت عليج
شلون ماسمعت صراخج
شلون نمت وعفتج من عسني ماكعدت
من كثر اللطم جنت اوكع من التعب ويوعوني
وبكل مرة اوكع اكلة ربي ليش مااخذت عمري
اروح لكبرها يومية
كلها تصيح ميصير قبل لسابع
لفجرية جنت اركب وهمة نايمين
عقل مابقة براسي نوم ماكو اكل ماكو
وصلت مرحلة احفر كبرها اريد اطلعها
وصلت مرحلة يلكوني الدفانة فجرية حافرة نص القبر واصرخ اكلهم باردة خل اطب يمها ادفيها
يمة من عفتيني مافكرتي بكلب امج
لوصايحتني يكتلوني وياج ولاعايفتني احضن كبرج
لحد مادرة منصور كبل راح بنا القبر
خوالي يمنة وخالاتي ونسوانهم وجناينهم وولدهم واحفادهم
ورة لفاتحة يلله نتبهت الهم
كد لبجي جفني نازل على عيوني
حرام اذا اميز شكول لناس
اذكر تواسليها شكد بجت على شوفتهم
تالي ماتت بحسرتهم

من خلصت لفاتحة
دزو ناس طرف يردون يكعدون حتة نتنازل
طلعولهم خوالي وولدهم تفاهمو وياهم
هاي لاحداث جنت ماواعية عليها
بهلأيام وصلت مرحلة ماواعية علحوالية
جن غايبة عنهم بروحي بس جسمي يمهم
بليل وشفتها بلحلم
شفتها تمشي وكايدها فدعم تقربت الي وتهمسلي
ماما ضربوني وشكو ملابسي
اني اجيت حتة اشكي لعمو فدعم منهم
هوة مو جان يكلي اي احد يأذيج من اجي سولفيلي
هوة تاخر ومااجة
اني اجيتلة حتة اشكيلة
هوة كلي بعد تبقين يمي ماترحين

فزيت اصرخ واملخ بروحي ولك ليش اخذت بنيتي فدعم
ولك والله ماشافت من حياتها شي
مثلك متعوبة والله متعوبة
خذيتها يمك والمتعوب يلوك للمتعوب
بقيت املخ بروحي تهسترت لاخليت غراض لاخليت صورهم المعلكتها فوك جربايتها
جنت اصرخ رجعلي بنتي فدعم
والله ماشبعت منها
ماوعيت غير اني بلمستشفى
بقيت بلمستشفى شخصوني انهيار عصبي
بقيت اغفة وافز وارجع انام
جانو يضربوني ابر مهدء مدري اني هلكانة
بعد ايام عرفت همة كاعدين وية عشاير لولد وفاضينها بفصل
رجعت للبيت على مسؤلية انغام طلعوني
يوم ثاني جان لسابع
كملو لسابع وخلصت قراية لنسوان ولعشة ولولد يغسلون بلمواعين
جانت دنية ليل
من فرط الألم والخنكة الي بصدري حسيتها هاي اخر ليلة الي
جريت الفلوس من الكنتور ولفيت شيلة بيبي شكرية الي لبستها ولبست دشداشتها بيوم جردوني من شرفي
وضلن ثيابها يمي جنت محتفظة بيهن
خليتها  على راسي تشيلت بيها وطلعت برة....
تلكوني لولد يتسائلون "وين تردين شنو محتاجة كليلنا"
عفتهم ورحت للجادر كلهم كاعدين وبيهم معكلين غربة
طبيت لفلوس بيدي بلكاع شمرتهن وصرخت
لاتكولون انتي مرة وعيب تطبين كعدة زلم اني ام ومفجووعة
هذا فصلهم ١٨ مليون جملتهن مليونين سويتهن عشرين ردوووهن الهم...
وكلولهم دمها مايروح هدر ...
كتالهه حدث ماينحكم هواي واول وتالي يطلع
وذولة زلمنة لتارسين الجادر اذا محد منهم اخذ ثارهه اني اخذلي سلاح واروح اخذة بيدي
كلولهم ابنهم دمة مهدور وشوغة كلبي عليها ماانساها
صوتهم تعالة "خوية ذكري الله حقها يم الله ميضيع والثار مايخلص يرجعون على ابنج وحيدج "
عفتهم وطلعت...
لعادات لبالية الجنت ضدها بيوم من الأيام....
ليوم احس مايطفي لهيبي غيرها ...
العادات الي بيوم من لأيام عرضت نفسي لخطر حتة احمي اراواح منها ليوم احسها هي القصاص والمحكمة العادلة لروحي المفجوعة بأعظم خساراتي

طبيت للبيت الوب
نارها بية
تذكرتة من جان يصيح لدم ينغسل بدم وغير هيج باطل ولباطل موش ثوبنة
عدت لأيام انتظر حكم لولد
هوة هذا الي علكها علشجرة لثنين لباقين جانو جوة لحد ماعلك منة وكمل ودخل صاحهم وطلعو
ملثمين بس طالب عرفة من هيئتة ومن معلكها منزل الثام عن وجهة وشاد لحبل بحلكة عاضة من جها ومن جها بيدة
طالب وولد لمنطقة عارفي
ورة شهر يلله نصدر بحقة حكم
جان حكمة ٢٠ سنة والي ويا نحكمو اكثر بس هوة لأن حدث حكمة مخفف

بهلشهر اني حرام اذا نايمتلي ساعة بليوم
حتة المنوم مايمض بية

وصلت لمرحلة التلاشي
جنت اتلاشة بين صفحات لأيام
من حجم الفجيعة البصدري جنت اوصل لمرحلة اضحك بهستيريا
انغام تكابلني وتبجي
اسمعها تكل لمنصور اختي تخبلت راحت من ادية
موبس من اديها جنت احسني جاي اروح من روحي

ايام ماتضاهيها ايام
قسورة طول هلمدة ماالة صوت
لاشفتة بجة ولاأحس بوجودة
منعزل منطوي عصبي يتعارك اسمعة يصيح على خالتة ومرات على منصور
لحد ماتخربط بليل سخن وركضنة بي للمستشفى
بقة اليل كلة يهذي بأسمها ويبجي عليها
هاي جانت اول مرة شفتة بجة بيها من يوم لفاتحة
لفرق بينهم قليل جانو مثل لتوم
من يومها قسورة ماصحة كل فترة يسخن بدون سبب

تعبت ايام ماترضة تمشي
ذكرياتها ماترضا تعوفني
طبعت صور وصور براسي

اخر ايام كمت اكعد يم لدرج وبلمحجر اضرب راسي اكلهم بلكي افقد لذاكرة وانسا
شلون رح اكمل عمري بهاي الذكريات شلون

طالب مااشوفة ولايطلع من بيتهم
بثينة لبنية ماعافتنا ويانا حتة مبيت تبات يمنا تكعد قبل لكل وتريك الخطار
ورة لسابع طشو ناس تزور لمعارف وناس راحت تزور وتاخذ صوغات
اكثر تواصلهم جان وية انغام لان عاشت فترة طويلة وياهم وتذكر منهم وكفات وطيب خصوصا من ماتت امي
اما اني أحسهم حاقدين علية
لأن كسرت كلمة امي وسويت لبراسي
رغم ماحجو ولافتحو دفاتر قديمة بس جنت
اشوف بعيونهم حجي
جن يكلولي شفتي شصار باحوالج من طلعتي بدون علم امج
طشو كل واحد رجع لحياتة
وكلبي على فرفحتة مايهجع
لحد ماودعونا وراحو وهمة يوصون وكلمن يحط بدية فلوس وملابس سود
اشهر عدت اخذت من طاقتي وعجزت بيهن
من دكتور لدكتور ومن علة لعلة
لااني لصحيت ولا اني لرديت لأولية
جية خالتي ام منصور جانتلنة فرعون مو عون
طول فترة تواجدها يمنا جانت تقرا براس منصور
شنو ضلتك بلاخلفة
لعمر يمشي وانتة كبرت
تزوج وجيبلك ولد يشيل اسمك
وغيرة وغيرة من الحجي
مانكسر خاطرها علينة لاكالت بت  اختي خطية ولاكالت احترم كسرتهن
بثينة سمعتها اكثر من مرة وتجي تحجيلنا
لبنية متفارك لمطبخ فتسمع اي شي ينحجي بلأستقبال

مارتاحينة الة راحت

عدت اشهر رجعت لدوامي
احاول اتعايش
احاول اتناسا لخاطر قسورة الي يوم عن يوم يتغير
يوم عن يوم تطغي القسوة ولبرود على مضهرة الخارجي
امالعصبية الي بي عجيب منين اجت وهوة لجان اهدأ من لدودة
درجاتة صفارة
صفر من مية
٣ اشهر متحن واحد مياخذ كلة صفر صفر
ويجي يشمر لورقة بوجهي بنتر كأن يعاقبني بيها
ضافلي حمول فوك حمولي
جنت اتختل ماابجي كدامة
وصلت بية ادخل للحمام ابجي عليها من اشتاقلها
تعبني وصارلي هم جديد وسلبان راحة
يومية متعارك يومية ضارب طالب بلمدرسة
يجيني وجهة كلة زلغات
ودو علية لأدارة
متمالخ هوة وولد وصايرين لحم مزلغ وجه لولد ومشكك قميصة
الي فهمتة من خلال حجي الولد الي شرحو المشكلة للمدير
لولد معيرة بمنة وكايلة اختك موزينة ونكتلت وية ذني الموزينات
هوة فاقد وممرعد الولد تمرعد
لمدير مدلي ايدة وهوة يراويني اثر عضة بيها ويشكيلي انو وهوة يفاككهم قسورة عاضة من ايدة
بقيت اتعذر وشرحت للمدير عن وضع بنتي وفاجعتنا
جنت ابجي واني اشتكيلة
لرجال قدر وضعنا ونطا اجازة ٣ ايام كلي خلي يرتاح ليداوم
رجعت للبيت كابلت صورتها وابجي
شردت منهم جنت خايفة يزل لسان احد بيوم وينخلق من ابني غضنفر ثاني
شردت لآخر لدنيا حتة لايصير هلشي
اتاري اقدارنا تلحكنة لووين منكون
اتاري المكتوب مامنا هروب
اتاري الوراثة موبس بلملامح والطباع حتة الضيم متوارثي
وبنفس لعمر الي نطعن بي غضنفر بأمة
نطعن بي وليدي بأختة
جن لتاريخ يعيد نفسة

ايام عدت علية صعبة صعبة وصلتني لمرحلة كمت اشك بوجود عدالة
جنت اقاوم نوبات المي وحزني وحنينيني عليها اخفيها بصدري حتة ليشوفني
شكد كعدت حجيت ويا شكد كلتلة اختك مالها ذنب
شكد كتلة راحت بذنب غيرها
شكد سولفنا ويا اني وطالب ومنصور وانغام وحتة بثينة يبقة يهز براسة بدون مايحجي

عدت ايام هاي لسنة ثكيلة مريرة
ماضكنة بيها راحة
جنت واكفا بلمطبخ انغام يم بثينة
قسورة بلصالة يتفرج تلفزيون

مااسمع غير صرختة
ماما تعالي تعاي شوفي بساع بساع لحكييييييييي

ركضت علي عاينت
اشرلي علتفزيون
صفنت بي
هوة بشحمة ولحمة
وجوا بلتايتل مكتوب
عضو مجلس المحافظة ......يتبع
عذروني ماكدرت اكتب اكثر من هيج احس ضغطي صعد وتعبت لمجرد جاي اكتب
الله يعينهم شلون عاشو هللحظات
طبعا اختصرت هواي مواقف تخص طالب وامتنان حتة يكون لتأثير عليكم اقل ماردت اعلقكم بيها هواي
ولهلسبب وصلني من عندة عتب بأيد احد لأبطال
تصبحون على خير