#خنجر_الغضنفر
#الجزء_الثاني_بارت٥٣
#حنين_حاتم
بلقيس....
وصلت الها مرعوبة
من ورا لباب صحت منووو
فتحتها
نفتحن عيوني
نزيت مثل لحلمان
رجعت ليورا وهوة يتقدم
صار لحايط بضهري تقرب الي بثنين ادري حيل يضرب
صرت احمي روحي واصرخ
بلكاع تقوقعت وجن عشر ادين عندة ويضرب من كل جهة وكل مكان
ضميت راسي بين رجلية ضرباتة صارت على ضهري وادية
يضرب ويصرخ شاردة منييييييييي
تتفرفرين انتي وذاك ال........ بكل صلافة وانتي على ذمتي لساج
ندار على امي لواكفة تصيح زياد عوفها يمة وتتلمس متشوف عدل
نتر بيها
مسويتها .......... عمة
زياد شاردات منة وذاك ال......... فاتحاتلة لبيت خان اكل ومبيت و...........
من صار يفشر ويحجي كلام اقبح من عندة
حسيت بلقيس القوية نهضت مني
بلقيس الي حلفت بأن لوشافت زياد بيوم بلشارع تنزع نعالها وتضربة بي
كمت علي وصرت اصرخ بي
انت شتريد منييييييييي
مااريدك يااخي مااريدك واني تطلكت منك خلاااااص انسة بعد تكدر تتحكم بية لو تجبرني على شي وابني حضانتة الي يعني تحلم تلوي ذراعي بي
لم كرامتك واطلع برا لا اطلع بلشارع الم عليك المنطقة كلها
تقرب الي يصيح لزمني من شعري
بلقيس الي تدعي القوة صارت جوا مثل كتكوت مهلس حيل يصم ايدة ويضرب على ضهري وبخاصرتي بغل وحقد ويطعنني بشرفي
بقيت اصرخ انت مالك شي علية اني مطلقة منك شرعا وقانونا
شرعا بلمشمش
ترة انتي منهزمة من عندي اني ماهاجرج
استشرعت وكلولي تعتبر مرتك شرعا
ومرتي للي تنهزم مني وتطلع من تحت طوعي وتفتح بيت وتستقبل بي ......... اكسر راسها وارجعلها عقلها
امي بقت تصرخ
زياد اكسر لشر واطلع
عيب عليك تحجي بشرف بت عمك خطار اجونة همة وبسعاد ورجلها وحماتها
شلك بهلحجي انت ليش متخاف الله
كلش صاير عمت عينك لفلوس حتة غيرة ماعندك
ولك هاي عرضك شلون هيج تحجي بيها
خلفلة علي هوة دلاهم بمدرستها وجابهم النا لوما هوة لانشوف بسعاد ولاتندلنة للموت
بلأستقبال نام لولد هوة وزوج بسعاد
يعني من نام بلأستقبال ماراحت بليل يمة
ماطلعو بلحديقة
تقنعيني ما اختلة بيها
مثل ماجان يسويها من يجيكم لديالى وبلبستان يحصرها وبهاي عيني شفتتتتتتتتتتتتتتتتتتة
كمبص يمي بلكاع ويكز على اسنانة ويهمس يم اذاني
اختلة بيج
باسج
نام وياج
ستمر يهمس يم اذاني تفاصيل جان سماعها يذيب احشائي
جنت مذهولة عيون مفتوحة رموش جامدة دموعي سيلان
وهوة يسألني تفاصيل مقززة ويصرخ بية
احجييييي بت الكلب احجييي........ ........
ولج ليوم اذبحج واطم عارج
الحسيتة واني اسمع كلامة جن احد حيل ضربني بآلة حادة على مقدمة راسي
نهزمت لآخر الدنيا حتة اتقي شرة واذا ولهنا لحكني يطعنني بشرفي
حسيت كلماتة تركتني مثل مشلول
ردت اصرخ ادافع عن نفسي
شفت التبرير هواي علي
امي جرتة من ملابسة وتصيح علي
ركضت للمنور عدنا بواري حديد قبل فترة ابو الملك بدل بواري البيت وبقن بلمنور نصير يلعب بيهن
جريت واحد من عدهن
ورا ضهري خليتة وطبيت ليجوا
جان بعدة واكف يصرخ بأمي
ويتهمها بأبشع التهم
من ورا وكفت وحيل بكل قوتي ضربتة براسة مرتين وحدة اقوة من لثانية
بلكاع وكع وكملت علي من راسة لرجلي بلبوري حيل حيل جنت اضرب بي بهستيريا ماواعية على نفسي ولا ادري شسويت ملابسي تملخن بيد امي وهية تسحب بية من عندة وتريد تاخذ لبوري مني
جنت اضرب بي واصرخ
زيااااااااد.
خاف ربك زياد
ولك والله ماخنتك مو لأن انت ماتستاهل
بس لأن روحي نضيفة ماترضة بلحرام واشرف واطهر منك يانذل
بهلضرب طلعت ضيم سنييين
ستمريت اضرب واصرخ
كبرتني مرضتني خبلتني طلعتني من طوري
شتريد مني
عوفني عوفنيييي
اشرد ازني يااخي اعتقني اعتقني
ارحمني من زياد يا خالق لرحمة ارحمنييييييي
ماوعيت غير على امي تشمر دولكة ماي بارد بوجهي
وكع لبوري من ايدي
اعاين زياد جثة كبالي ولدم يم شفتة وبكصتة
رجعت ليورا ارجف
بلكاع كمبصت
حسيت الكون وكع على راسي
جان ودي اصرخ بعالي لصوت ياناس ياعالم
انقذوني
او قتلوني
لمهم خلصوني من كابوس زياااد
امي تلطم على وجهها
نصير حاصر روحة بين القنفة والكرسي ويبجي
جسمي يرجف الملم بروحي بأدية
مثل ماي وتتبدا مني
اعاين على زياد شلون هيج وكع وشوكت
امي ركضت برا تصيح للجوارين يشيلو
ركضت علتلفون
دكيت رقمة
مااجة على بالي غيرة
بلأحرى مااعندي غيرة
اكثرر من مرة يلله رد
جنت احجي بصعوبة
دموع وخوف شفافي ترجف وصوت نفسي اعلى من الكلام الأحجي
على كيفج بلقيس بس خل افهم شبيج شصاير امج بيها شي
لاء لاء
زياااد زياد لبي شي
شبي سكة النعل
ضربتة اني مات يمكن ماااات
شنهوووو؟
ضربتي !! ليش شجابة وشوصلة الكم
من لبارحة من جبنة لدجاج اني وياك واني اسد لباب شفت سيارتة بس كلت يمكن يتراولي
هسة واحنة نايمين فلش لباب علينة وضربني وطعنني بشرفي وضربتة ببوري ووكع بلكاع يمكن مات
انتي ضربتي
صدك تحجين بلقيس لو تتشاقين
اي اي صدك
طاح من ضربتج
زلمتيش هذا
مو انت ماتدري شلون ضربتة
اني نفسي ماادري
لاحول ولاقوة إلا بلله
سدي سدي انة راد
قيصر....
طلعنة لفجرية من عدهم جنت فرحان رايد اوصل بأسرع وقت وافتح الموضوع وية اهلي
هلمرة ماكو شي يمنعني عنها
كل الأمور بصالحي
جنة ستونة مكملين اكل بلمطعم لفروخ جاعت وكفنا تريكنا جاي اغسل خاطر نكمل طريقنا
تلفوني يدك بجيبي بينما كملت تغسيل ونشفت ادية رديت اجاني صوتها
بلأحرى نفسها
جانت تتنفس بصعوبة وتلهث كأن تركض
كوة فهمت عليها
نطيت السويج لصميدع كتلة ردو وانة عندي شغلة اكضيها والحككم
بقو يسألون شكو شصار وشغلتيش لتكضيها هنا تعرفمن هنا
كوة قتنعو وركبو
خليتهم مشو واجرت تكسي ورديت لبغداد
علما وصلت جان بيتهم فارغ محد اكو
دكيت لباب محد فتحها الي طلعلي جوارينهم كال راحو للمستشفى اقاربهم مدري شبي وشالتة لجوارين واخذو
سألتة يامستشفى مايعرف
ضليت محتار وين اروح بغداد جبيرة لامستشفى ولاثنين خاطر اهبد
ضليت كاعد بباب بيتهم واتصل بيها
اتصل محد يرد
اكثر من ٢٠ مكالمة ماردت
تاكدت مشدوهة وناسية تلفونها بلبيت
بقيت انتظر اكثر من ساعة
كلسا اغفة على نفسي اليل بطولة مانمتة يمهم
جنت متمني احصلها واحجي وياها
جنت رايد اسألها تكدر تواجه هلمرة لو قرارها لقديم جان ابدي ومن غير رجعة
جنت رايد اسمع جواب منها
بصدري لحجي لسة مامات
لساني اريد اصرخ معقولة قرار التخلي بلاعودة جان سهل لهلدرجة
لفجرية طلعتنا جانت من وكت
همة نامو بلسيارة بس انة عبن جنت اسوق
علساس نتبادل انة وصميدع ورة المطعم واتصلت هية
كاعد بباب بيتها واحس عيوني لوحدها صارت تنسد
ننزني صوت سيارة وضربة باب بقوة
فتحت عيوني كوة اشوف واميز
شفتة جاي بأتجاهي ستوني كمت على حيلي اريد افهم الجاي يصير
طفر بكل قوتة ويريد يضربني
صديت الضربة ولزمت ايدي قيدتة
تقرب علية ابو كام يصيح علية ويفرغة مني
ويندار على بلقيس الباهتة وامهة التملخ بخدودها
وينتر بيهن اتاري زياد ماجذب من كال مسوية بيتة .......
قشعر جسمي من الكلمة الي كالها
نترت بي خاف الله واحترم شيباتك زياد ماراح يطب بكَبرك تدافعلة وتطعن لبنية بشرفها
اعرفها شنو من ملة
نزلت راس ابوها من اجتلك عناية بذيج اليلة الكشرة من جانت بنية
وهسة نزلت راس رجلها وهم انت طرف بلسالفة
واضحة صارت مثل عين الشمس
رفع ايدة يهدد ويكلي
احنة كوامة وياك
زياد ينتر
اييي
صدك يابا ذكرتني بيوم ضربني ودخل للسجن ووراها ضم راسة ونهزم وهسة جاي لبيتي ولازم لبلقيس الدرب وموبعيدة تطلع منهزمة ويا ويجذبن هية ومرة عمي
احنة كوامة وياكم تجيب عشيرتك وانت لممنون ووالله لأكسر ضهرك بفصل واخليك تحرم تعتب بغداد
تقربت الة كوة لازم روحي .. تريد عشيرتي ولك هوة انت حرمة كافي عليك
تقرب يريد يتضارب ويصيح
بقيت اصد ضرباتة ماضربتة مااريد اكون سبب اذى لبلقيس وبعدين يكولون مودية على عشيقها حتة يكتل رجلها ويألفون افلام مثل ذيج المرة
اخر ضربة اجت ببطني ووياها صيحتة من كال
ماعندة عشيرة مكطم منين يجيب وهوة اهلة مايندلهم نهزمو بجلدهم البعثية ولد الرفيقات
سحلتة حيل هوة كصير مايوصل لجتفي
خليتة جوا اباطي حاصر راسة بيدي وهمستلة
خاب اذا فلوسك تصنع منك شيخ
احنة نصنع فلوسك ونصنع حتة الشيخة
احنة شيوخ ولد شيوخ كبل ماتصير بضهر ابوك
خاب احنة لمارخينة عكَل ولاذلينة بيوم
عمت عين الدنيا من ندارت وخلت امثالك يحجي بينا
تريد عشيرتي مو
جا دحضرلك مجان بيوتكم ماتشيلنة
عفتهم ومشيت بقة يهادد
كلسا اندار اعاين الها طبت جوة بساع بساع تخاف منة
اجرت سيارة وركبت
لليل يلله وصلت لهلي
طبيت من لباب فاير صحت على غضنفر وعمامي وعمي ابوستار ولولد وكعدنة بلأستقبال وحجيت الهم
كلشي من يوم رحتلهم اسأل بلكي عدهم عنوان بسعاد خاطر احصل اهلي
لحد ليوم من خابرتني بلقيس ولصار ولحجي زياد وابو
عمامي بقو يلومون يكلولي ليش رحت ماطول تدري من زمان تاهمين لبنية عدها شي وياك
ومنهزمة من رجلها من ورا هلسالفة
غضنفر مارضة بحجي عمامي وكاللهم
حرمة وانتخت بي شلون مايروح
بقو يحجون انتها كلامهم بقرار لروحة الهم
عمي إسماعيل كال نروح ونركبة لباطل وانت ماغلطان بروحتك الهم
لا اول مرة من رحت طارش تسأل عن اهلك
ولاثاني مرة من تنخت بيك لبت
غلطتك لوحيدة ضربت زياد يم محلة وهاي هينة ندفع فصلة علقندرة
بس مال يتهمك تتحرش بحرمتة ولازملها لدرب
وتاهم بت عمة عدها شي وياك هاي جبيرة ماينسكت عنها
لازم نروح نحطلة حد ونبري ذمة لبنية كدام عمامها
تحضرو لفجر نمشي خاطر نوصل كَبل لصلا
سالفة روحتك الهم ليوم نمشيها بحجة ناسي محفظتك أو تلفونك عدهم ورديت علمودة
لاتجيب طاري اتصال لبنية بيك
بقو يسولفون ويتفقون غضنفر خابر على شيخ فخذ عشيرتنا وبلغة الزلمة كال عد عيناكم دزو احد يجيبنا مانندل
سدة منهن اشر لصميدع حضر روحك تروح لبيت لشيخ هسة تبات يمهم ولصبح تجيبهم وتجي
رجع اتصل على بيت اخو جدي الله يرحمة فدعم يسميهم الدببة الطيبون
لوادم عدهم ثنين من ولدهم جانو بلأستخبارات وعلساس يشردون سوة همة وبيت اهلي متفقين وية جدي ومرتبين امورهم
بس بوكتها انعام مأخرتهم حسب مافهمت
بيت اخو جدي طالعين لبغداد لابدين بمنطقة زراعية همة وعوايلهم
واهلي متعطلين وضالين وصار لصار وياهم
اما اخو جدي لثاني جان بعدة ماطالع بس مافازع الهم رغم بينا وبينهم مسافة قليلة
بس من داري ماخذ عايلتة وولدة واحفادة ومنهزم
من يومها عمامي ولولد منكطعين عنهم
وشيخ فخذ عشيرتنا لجبير شامرهم من العشيرة على عملتهم ومحد يندللهم مجان ذابين جرش وي نسابتهم
حجة عمي وي لدببة الطيبون دكو صدر وكالو لفجر احنة يمكم خاطر نطلع سوة
غضنفر اخذ لتلفون من عمي و وصاهم كاللهم كلكم تجون ولدكم وولدهم ونسابتكم واحفادكم من نسابتكم
حتة لفروخ تجيبوها
احنة يكول علينا مكطمين وولد رفيقات
نسوانة اشرف من الخلفو
كمت من يمهم لبنات يسون عشة سوتلي كشمش لفة ورحت للغرفة انام
شوية واجة حمزة اعاينلة من جوا لغطة دخل وسد لباب علكيف بس كعد طلع لتلفون من جيبة ويباوع بي
وخرت لغطة وطفرت علي حيلي جريتة من ايدة
بقة يتوسل ويتلاوا وياي يريد ياخذة
فتحتة اول مافتحتة صارن كبالي صور اماني بت عمتي امرريكا لزغيرة ١٥ سنة بس ضخمة وحليوة
بيها شبه من تهاني
لزمتة من خوانيكة وحصرتة وية الحايط
ولك شيسون عندك صور لبت
ممم مااادري والله ماادري
ولك لتصير جبان احجي الصدك موتوني شفتك تتخنس وتفتح لتلفون تعاين بيهن
رجعت ادقق بلصور موكلش واضحات
صورها بلمطبخ مالنة واكفة تشتغل وية لبنات ومبينة مامنتبهتلة من طاكهن لقطة تسولف لقطة مدنكة
عدل روحة وكال انة موجبان انة طكيتهن الها بلية ماتدري
شلون هيج تسوي يلردي هية هاي عملة صخم الله وجهك
انة احبنها
حبتك الجرادة على يامال تاخذ صور للفرخة بلية ماتدري ولك هاي خيانة
ولبت عرضك
انة اسف عمي والله ماالي غاية بيهن بس هيج اعاين عليهن قبل ماانام
احذفهن كدامي بسرعة
احذفهن والله بس لاتحجي شي لابوي
امي تدري وهية كالتلي انة اخطبها الك لاتخاف بس اطلع من الثالث وتم لعشرين
وانت لساك بلثالث
اي
جاشكم سنة راسب
سنة بلخامس ابتدائي وسنة بلثاني متوسط
كرة عين امك وتريد تعرسك ياهو ليصرف عليك بلسلامة
هي كالتلي ابوك يصرف عليك جاالمن يريد خيرة
امسح لصور وشيل خرابيط امك من راسك وليدي
ادرس وطب للجامعة تشوف لبنات تشوف لدنيا وينك ووين لعرس
يهز راسة ويضحك فجة كلة طالع
ادري اذا لحايط يفهم هوة يفهم
اشرتلة بعد ماحذف لصور كدامي وتعهد ميعيدها
اطلع وسد لباب
لفيت راسي بساع نمت هلكان
بساع وعوني فزيت عبالي مرت ساعة على كد مانعسان
طلع صاير الفجر
وعيت على ادين عمتي امريكا توعي بية
نوب عافتني وراحت لغضنفر كلت خل اخذلي غفة بينما تكعدة
ثواني وردت علية تكعد بية ومعروف عن عمتي امريكا من تكعد بنيادم تركَلة ركَل حيل تخض بية
فزيت مرعوب
عمة شمالج
ادري حليبة انة وتخضين بيها خاطر يطلع الزبد
اااخ يقويصر ذكرتني من جنة نسوي الخاثر الصبح على عهد امي
ديلله يمة كوم وراكم درب ستار وعمك ابو ستار تريكو ويتانون لصلا خاطر تمشون
عمة عوفيني روحي لغضنفر كعدي
خاب هوة نايم هذا سحير اليل جكايرة داير مدايرة وعيونة حول من النعاس
نفضت لفراش عني ورحتلة احس بذنب
دفعت لباب ودخلت
ليش كاعد
لو ادري هيج تشيل هم مااحجي ولا اكللكم
خاب انجب شني هوة بكيفك ماتحجي
مالها غرض سالفتك انة والليل موصلح
هاي من شوكت
من ذيج اليلة الكشرة
ياليلة
ماكو شي البس خوية وانزل تريك خاطر نمش
بعد وكت لسا مااذن احجيلي عن ياليلة تقصد
ورث جكارتة من يومة ماتحلالة السوالف بدون جكارة
نفخ دخانة بحسرة وكال
اليلة الي دريت بيها مرتي تلوثت على ادين المايخافون الله
وكملتها هي بيوم ضيعت روحها والفروخ مني وخلتني حاير بأرض الله لوسيعة مدري وين اهبد وانشدمن عليها
وراها اتصل بية رجل اختها وبلغني بجيتهم وكالي راح ناخذها ويانا ووصلني رسالة منها
كالي ماادور ولاتتعب نفسي
يعني خذوها لامريكا جا شلون طلعت بلفروخ بلية موافقتك
يجوز رهموها بواسطة ياخوي بوكتها لدنية هيتة نهب وسلب والموظفين تسيُب لاحسيب ولارقيب
اكيد رهمولها شي مزور
معقولة ماطلبو حضورك
ياخوي اسألني انة
جا شلون طلعت فروخ عمتي امريكا
انت اعرف بس هية ليش نهزمت انة الي ادري بي نعيمة خوش نعيمة وعافت الدنيا ورضت بعيشة مومن ثوبها عبن تحبك
بس لصارلها موشوية
اذا انة مااكدر اتقبلها ولااكدر احط عيني بعينها بوكتها جنت ناوي اطلعهم هية ولفروخ واطلكها واكعدها ببيت وحدها ومااشوفها وجهي الي ان هية تطلب
الى ان تنسا وتشفا كسرتها
يكفيني اطمأن عليها هية ولفروخ واكوم بواجبهم
ماالومها بوكتها جانت خايفة
وبنيادم من يخاف يتصرف بلاوعي ولصارلها
شي موعادي شي احنة لزلم كسرنا وخلانا لليوم من نجيب طاريها ندنك الراس
هية حرمة ونكسرت وخسرت اعز ماتملك
حقها بكل لسوتة ماالومها
بس الومها إعلى البعاد
الومها حرمتني منها ومن الفروخ مافكرت بية وهي تدري بعادهم عني جهنم الحمرة
انة اشهر بعدت عني وصلت لموت بيهن
بس الجان مصبرني هلمرة اول سنة جنت مريض
مابية كل طاقة جنت كل اسبوع اغسل كليتي مرتين
صميدع المسكين يشتغل من الصبح لليل يادوب يسد مصاريفنة
عمامي مومال شغل كل واحد علاكة دوا شكبرها
جنت الهي روحي عنها بفجيعتي بجدي وجدتي وفدعم
وكومة اللحم اركض على لكمتهم انة وصميدع نتسابق ويا النهار مسابق
مااحس بلأيام تركض ركض عبن ماكو راحة كلة شغل
جنت اضحك على روحي واكول جم يوم وتتصل انعام ماتكدر بلياي هي لضيعت احلى سنين من عمرها ومارضت تاخذ محمد
مستحيل تكدر على بعادي
كلت جم يوم يبرا جرحها وتشفة وترد لية
ولجم يوم جرن شهر ولشهر جر سنة ولسنة جرت ثنين وتلاثة وخمسة وانة اناطر
وحك لوعة فراكهم لليوم بية امل تتصل
وكل يوم اصحا على هلأمل
انة المرمرني منة
قسورة من طلعت جان زغيرون مالحكت اتعلق بي
بس منة ملّلاكَة وحبيبية
بوية موش فرخة مرهم ولخلق محمد
ارد للبيت شوفتها تموت كل تعب بية
ملكاها عافية ودنية ثانية
دنية مابيها تعب
تمنيت شايفها يقيصر وشايف لعبها وسوالفها
فدعم الله يرحمة جان روحة بيها
ااأاااخ يابوية هم تنشدين عني
هم تضكريني يو نسيتي ابوج
ااااااااخ ربيتي بلا ابو .. مات ابوج كون
هسة صار عمرها ١٣ يعني صبية يمكن لوتشوفني بلشارع ماتعرفني
ااااااخ ياقويصر صارت شوفتهم حلم
حتة الحلم هم مالي نصيب بي هوة يجي اليل وعيوني تتحزم بحيلين
كطعت كلبي التنهيدة ولحسرة لتطلع بعد كل حجاية يحجيها
_لومامتزاعل وية خالي جان خليتة يروح ويأسلك عنها تعرف عنوان اختها
اعرفنة على عهد قبل من جانت تتراسل وياها بلمكاتيب
جا سهلة عدي ربع هناك وعندي تواصل وياهم اخليهم يرحون لمكانها ويحصلولنا اخبارها
بتسم وطفة جكارتة وكالي
جا دكومنة يلله خاطر من نرد نتفرغ لسالفتي
هيج يقويصر واحصلهم
ان شاء الله خوية جاشني وين يرحون لابد نحصلهم
الحي مصيرة يتلاكة لوبعد الف سنة
ربك الجمعني بيكم وانة ياأس وحتة ناسي لسالفة تصعب علي يلمك وي فروخك ومرتك
كام وياي فرحان مستبشر
علما تريكنا ولبسنا وصلينة اجو الدببة الطيبون مامجذبين خبر
ثنين اخوة همة واحد مخلف ٦ ولد واحد ٨ وولدهم معرسيهم وهمة جهال هم كل واحد ولدة بطولة
حتة نسابتهم جايبيهم وياهم
٧ سيارات طبكن ببابنا
وكفت اضحك وانة احسبهم لدببة الطيبون معكلين ذيج العكل الزينة والعبي الهيبة وولدهم ٦ مرتبين واحفادهم شباب ١٤ واحد اعمارهم بين ١٨ وال٢٥ سنة
نسابتهم ٤ هم يطلعون كصة غضنفر وولدهم ٧ ولد شباب طلعنة انة وعمامي وعمي ابو ستار وستار وغضنفر وصميدع
وكفت يم غضنفر جان صافن
شمالك
نز جر حسرة وهمسلي
تصدك اباوع بينهم ادور فدعم وحكَ الله من كل عقلي
اااااخ مجانة خالي
بوية هلكلفات فدعم الها
الله يرحمة ويرحم شبابة ويعوضة الجنة
نقبض صدري من حجية
الكتلني ماشايفة من سنيييين وتالي ارد ازورة بلكبر
الكاتلني سلبو منة تهاني وخلو يصفك ايد بأيد وهوة من الزغر روحة بيها
تعوذت بليس بلكي تفكني الخنكة
بقينة نتاني لشيخ وربعة
شوية واجة هوة و٤ زلم كبار بلعمر
رحبنا بيهم وتسالمنة
ركبنة لسيارات بلطريق نزلنا غديناهم كبل الصلا
ترسنا المطعم حاسبنا وركبنا سياراتنا ومشينة
بيت اهل زياد مانندلة
اتصل بيها رقمها خارج نطاق التغطية
كلت ماكو غير كسرة
ضطرينا نروح لبيتة الي هوة بيت بلقيس القديم
نزل عمي اسماعيل دك لباب
طلعتلة مرتة كللها
بقة يحجي وياها
شوية واجة كال كلتلها اتصلي بي وبلغي عشيرة قيصر بلباب
شوية وفتحت لباب لبنية راحلها عمي
كايلتلة يكول زياد خل يجوني يم المحل مالتي
ركبنة ورحنالة ابو جان يمة
ركب سيارتة بدون ميسلم ومشة كدامنة واشر حتة نلحكة
مشينة ورا اخذنة لبيت اهلة
استقبالهم ماشالنة ضلو لولد لشباب كاعدين بلحديقة
طب جوا هوة بعد ماطلع
ابو جابلنة مي
بقة يخابر اسمع صوت صياحة بلمطبخ جنت واكف يم الشباب اسولف
اسمعة يحجي
اي انة ماادفع فلوس للعشيرة عبن ماعندي لازايدة ولاناقصة ولابيوم متعارك ولابيوم مسوي مشكلة على يامال انطي فلوس كل شهر
شمحصل انة
افهم من كلامك هسة ماتجون
عمي مروتك لعالم يمنا بلبيت فشلة لاتحطوني بهيج موقف
شنو شنو ادفع مليون يلله تجون
عمي كول يا الله
خوش خوش ادفع بس تطلعولي منهم فصل مرتب
يلله اتانيكم لاتتاخرون
بقة ابو يسولف هوة مادخل ضل بلمطبخ وكلسا يخابر يستعجلهم
اكثر من نص ساعة احنة نتاني ولولد طاحت رجليهم من الوكفة كلسا يتبادلون وية لجوة ناس تكعد وناس توكف
شوية ودخلو
طلع تلكاهم ويهلي ويرحب بيهم
واحد منهم من لباب نتر بزياد
ليش لشباب واكفين برا طب طلعلهم فراش
دخل مخبوص طلع جودليات خلاهن بلكاع
بقو يحجون انة برة يم الشباب مادخلت
عمامي حجولهم لسالفة بلظبط وشرحولهم غايتي من اجيت اول مرة وكلولهم سبب ضربي الة بلمحل مالتة لأن حجة علية وتهمني عندي شي وية مرتة
ولمرا لثانية اجيت بيها خطار ووياي اختها ورجلها وحماتها
بقو يحجون شيوخنا داهية فروها عليهم
وكلولهم ابنكم حاجي حجي ماينسكت علي
حاجي بعرضنا وتاهم ابنة عدة شي وية بتكم بدون اي دليل
اذا عدة دليل يثبت انو ابننا متعرض الها لو عندة شي وياها خل يشوفنا هلدليل
يكول علينا ولد رفيقات
نسوانة شدخلهن
بقو يتعذرون من سوايتة وكالو جيتكم على عيننا وراسنا وزياد من حجاها لحظة عصبية واكيد مانرضة على حجايتة
انتهت الكعدة وطلبو فصل ٤ ملاين لخاطر فلان ولخاطر علان صارن مليونين حطهن شيخنا بيدهم
وشيخهم كال النة جية رد اعتبار على حجايتة على نسوانكم
طلعنة واحنة نلبس نعلنا اعاين على غضنفر اخذة على صفحة
لحكتة
يتلفت وهمسلة
زياد من لأخير شكد تاخذ وتطلك لبنية
بقيت واكف وراهم البس بحذائي مدنك
زياد عصب ويكلة
شنو هذا الحجي شنو ابيع مرتي مثلا هاي شدتحجي انت
وكفت على حيلي واتقربت الة
صرت كدامة
زياد ب ١٦مليون تطلك بلقيس
حجيتها وانة اكتم الحسرة ال١٦ شكا عمري وناوي اشتريلي بيهن بيت جنت
عيونة نفتحت توتر حسيتة بعد ميعرف شيحجي
ايد غضنفر طبطبت على جتفة وهمسلة
نكول موافق
عاينلي وحجاها بغل
موافق بس بشرط
تشرط فوكاها
والله حقها من تجز نفسها منك
احترم نفسك موستونا حاليها لتخليني ارجع اكبرها
ليش ماكفاك الأخذتة هسة
اسمع قيصر بلقيس اطلكها اني بعد مالي نفس بيها تجز روحي منها ومن سوالفها
اطلكها بس بشرط ماتوصلها حتة بلحلم
واذا سمعت بيوم واصل لبيتها بحجة اختها لو خطار
اخذ نصير منها وبعد متشوفة واتهمها عدها علاقة وياك وحتة بلقانون اخذة
ليش يلنذذذذل
احترم نفسك كتلك لتخليني اكبرها
ماشي هذهو موافق
ماطولك وافقت خل انبهك على سالفة
خاف عبالك عود من اطلكها بعد ماالي دخل يعني وتصير حرة وتاخذها
لتنسا ترة بلقيس بت عمي وبعد لصار عمامي كلولها ممنوع تكعدين لوحدج
ودو على خوالها وراح ياخذوهن يمهم
غضنفر همسلي
قيصر لبنية ماتصيرلك ماطول هلردي يشم الهوا
حرامات تعب عمرك خوية يروح لهلطماع
خلها ربك يحلها على ساعة هذا حرام الفلس بي
صاحو علينا من برا
همستلة مالك غرض انة موافق اشوف خط الطلاك مالها بعيني واحط لفلوس بيدك
غضنفر تقربلي ولك حرام بي فلس هلجحف
طززز لفلوس طززز غضنفر
انة بيوم ورطتها واخذت هلناقص من وراي تورطت بهلزواج لأكشر
خل تخلص منة حتة لو ماتصيرلي
خل اكفر عن ذنبي بحقها ولو مرة
هذهو خوية براحتك
نمشي هسة تطلكها انة بعد مااكدر اجي
ولفلوس
انطيهن ولك انة زلمة من احجيها مااثنيييي
شمالك رجفت عليهن انعل ابو الفلوس الترجف زلمة
اي لعد شلون حقي هذا الإزلمة لذكي يعرف شلون يطلع حقة ويحافظ علي
يا حق ولك يا حق
راح غضنفر كللهم توكلو واحنة نلحككم
ضل صميدع ويانا عبن لسيارات ماتكفي
عمامي جايبين فلوس وانة هم جايب محسبين حساب لفصل ليطلبو
تاري عمة انتقم منة طلب فصل قليل وبساع نزل منة
خلة زياد يفور
اخذتهن كلهن مابيهن ١٠
ركبنة ومشينة ورا نزل يم مكتب نزلنة ورا
غضنفر وصميدع شهود
طلكهة بعد ماخليت الفلوس بيدة
طلعنة
نريد نركب غضنفر كال اوكف لحكة
وين رايح
دقيقة
اعاينلة
اشرلة ستوقفة رفع دشداشتة لفها على خصرة وشمر شماغة يمنة ويسرة
جانت فوك ال٢ شارع فارغ
ماشوف غير غضنفر طاح لزياد ضرب
مامستوعب تقربت الة
اعاينلة يضرب بي بكل قوتة ونايم فوكا
اشوف صميدع نزع نعالة كف دشداشتة وصاح
افزع لأبن العم تحتاج ايامة
ونجخ ذب روحة فوكهم ويضرب وية غضنفر
اعاينلهم واضحك
تقربتلهم
ولكم عوفو كافي لاتتكاثرون علي زحمة
غضنفر:- خاب هذا لو اجيب الدببة الطيبون واكعدهم فوكا واخليهم يفطسو هم مايبرد كلبي بي
ماكامو من عندة الة من شافو زلمة من بعيد اجة يركض على صياح زياد
ركضنة للسيارة وغضنفر يكلي
خاب تعلم لنذل صير انذل منة ولكاولي صير اكول منة وطلع حكَك وانعل ابو العيب لابو لزحمة بوية يم لحكَ تسقط كل المسميات
مشيت اضحك على سوالفهم واحد يكل للثاني حرامات ماطكَينا زين
ردينة للبيت تعبانين صارت ردتنا بليل
تعشينة ونمنة
فزيت صبحية جان عندي دوام الي فترة كاضيها اجازات
عدت ايام انة انتظر منها اتصال
حتة رقم امها خارج نطاق التغطية
صميدع كال فد اسبوعين هيج اخذ بسعاد واروح نعرف اخبارهم ونشوف صدك راحت يم خوالها لو يجذب هذا
بليل واجاني غضنفر للغرفة يذكرني بوعدي الة
جريت التلفون واتصلت بصديقي بيتر لساعدني بسالفة هيفاء وهوة وخالي كشفو حقيقتها وانتقمولي منها
كلفتة بسالفة مرة غضنفر ونطيتة لعنوان وطلبت منة يروح ويعرفلي اخبارهم
كلي راس لشهر اخذ اجازة واروح
هوة بولاية وهمة بولاية
بقة غضنفر ينتظر اخبار من صاحبي
ورة مدة راحو بسعاد وصميدع
اتصلو بينا واتضح فعلا خوالها ماخذيهن يمهم
بقيت مخنوك على بلقيس
بس من رجعو طمنوني كالو بيتهن وحدهن مو وياهم بس بلفرع لوراهم مكعديهن
بقيت اتمنة تتصل بية
اسمع صوتها بس تطمني تكلي اني بخير
ماكو
ورة فترة اتصل بيتر وبلغني رايح الهم
بس مالاكيهم بهلعنوان سائل لناس الي بنفس العمارة كايلية مانندل مكانهم
غضنفر رجع تكدر
رجع ماينام اليل بطولة
لحد مايطلع لفجر يناملة ساعتين تلاثة وبل٧ يطلع لشغلة
نفسها شغلتة مابدلها وخال عمي اسماعيل وية علحسابات
عدت لأيام ومشت
اتجرأت مرة اتصلت بيها حجيت وياها
ت افتح طاري سالفتنة
قبل مااحجي كالتلي سالفتنة اني وياك ماتت قيصر
موهسة من زمان
ولضاهر الله مارايدلنة ننجمع
لوصار شي هسة بيننا راح اثبت انو فعلا اني عندي شي وياك وفعلا شاردة وياك ذيج المرة من زياد واثبت كل كلمة نكالت عني وكل باطل رماني بي زياد
واني الموت اهونلي ولا يطلع زياد براسي ادمي واني لخاينة الي تدك دروب من ورا وهوة الشريف المضطهد
انهت الاتصال بدموع وهية تدعيلي بلموفقية وتنصحني اشوف حياتي
همستلها ششوف من حياتي وهية يمج بلقيس
سديتة بحسرة اكبر من عمري وسنيني
وعدت لايام صعبة علية وعلى غضنفر
اشوفة يطلع من لصبح لليل وبسواد اليل يكضيها جكاير وصفنات
يطلع صورة منة يشوفها الي
من يحجي عنها كل حسرة يذبها تهد حيلي
صدفة جنة طالعين للسوك وتلاكينة وية صديق جدي الله يرحمة
جان رائد انسان خير وطيب والة وكفات حلوة وعلاقة طيبة تربطة بجدي
بقينة نسولف ويسال على احوالنا ويترحم على جدي
جابها سوالف على شغلة وافتهمنا شاغل منصب
كالها بعفوية
ماترشحون بلقائمة مالتي
عبالنة يتشاقة بقة مصر ويشرح النا تفاصيل
انة كتلة ابعدني عن السياسة مالي واهس بيها
غضنفر جان مهتهم للموضوع بقة يسولف ويا ويستفسر
ايام وفاجئنة برغبتة بلترشيح
سوينالة اني وصميدع وستار حملة اعلانية انتخابية
ووادمنا كلها توصي انتخبو هذا حفيد فلان
الى ان صارت صدك
ونصدمنة بفوزة بمقعد بمجلس المحافظة
جانت فرحة كلش جبيرة
ومن زمان مافارحين هيج فرحة
صميدع وستار تعينو بلحماية مالتة غيرنا مكاننا
وغضنفر لايكلة المنصب والقاط
المحل مارضة يسدة خلة بي عمال وبقة عمي يديرة ويجبر حمزة يطلع وياهم يتعلم المهنة
جنة كاعدين عصرية بلحديقة
وندكت لباب
راحت زوري تفتحها
وية مافتحتها صوت طفل يصرخ باباااااا
لتفتنة كل احنة
.
.
.
.
.
.
وكفت كبالة وهمست اي مااريدك
عاينيلي ليش متعاينيلي شني لهلدرحة لعبانة روحج مني
مااعاينلك غضنفر روح منا ولتراويني وجهك بعد
اني ماريدك
لبينا مات بموتتها
موتتها الي ماضنيت بيوم تكون انت لسبب بيها
انعام عاينيلي وكولي ماريدك وانة اعوفج ولخلق محمد
مااكدر ماكددددددددر
انت شنو كلي
ولك اني بخيالي مااكدر اعاينلك
اني من اشوفك اتذكر شرفي الراح
عوفني عوفنييييي احلفك بروحها الطاهرة
مااكدر اشوفك ولا اكدر اعيش وياك بعد لصار
بلع ريكة وهمس
انتي طالق انعام ......يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!