رواية خطأ طبي «عقاب الاماني» الفصل الرابع وأربعون 44 - بقلم نورمـين

#خطأ_طبي «عقاب الاماني»

بقلــم : نورمين 🖤🦋

...

رجعت دكيت مرة لخ، فتح خط.

بس جنه فتح باب من بيبان النعيم ع كليبي المتلوع لمن سمعت صوته الرجولي وهو يكول..

عقاب: الوو دكتورة

سكتت شوية وحجيت بعتب..

اماني: انت وينك عنّي؟

عقاب: ورقة طلاكج باجر توصلج

ضيفت عيوني بعدم تصديق وتمتمت..

اماني: ش..شنوو؟ ل..لييش؟؟

عقاب: انتِ طالق ..

كال هيج وسده، بكل برود حجة ولا انطى اعتبار لمشاعري ولا لشنو ممكن احس ..

ظليت ساكتة وعيوني جاحظة بتفاجؤ..

خليت ايدي ع گلبي، دا احس بوخـز بي وكأن اكو شي دينغزني.

نزلت التلفون من ايدي، ووياه نزلت دمعتي..

شصار وهيج تخلى عني؟

ليش بأكثر وقت محتاجته بي دار ظهره الي وراح؟

شغيّره؟!

رجعت ظهري لورا انتچيت، دموعي تجمدت بعيوني..

كلبي يرجف وبداخلي علامات تعجب هواي ..

ضحكت مستخفة وغمضت عيوني..

اماني: هذا كابوس، هسة اكعد منه الكة عقاب يمي ..

شوية وفتحت عيوني وكلي امل بأن الي ببالي صح..

باوعت بارجاء المكان.. نفس الشي نفس الوقت نفس المكان..

وحدي والتلفون بايدي، جعدت ملامحي باكية بخيبة امل..

بكلبي اكو حسرة بألف ليش، وبروحي خيبة بألف يا حسافة..

...

عقاب

لمن دك تلفون قسورة وجان المتصل ريما.

اني رئسن عرفت هاي اماني!

لان تلفوني مغلق، وبهيج وقت اكيد تكون استعادت وعيها، وما لكتني يمها وعرفت بالصار..

طلعه ديجاوب، حجيت بهدوء.

عقاب: لترد

قسورة: ليش؟

عقاب: هاي الدكتورة

قسورة: منو كال وشمدريك اصلا؟

باوعت لكدام وكلت ..

عقاب: كلبي يدري.

ظل يباوعلي ومعنده رد مناسب..

سكت التلفون.

قسورة: ريّح كلبها ع الاقل واحجيلها السبب، حرام عليك تعوفها هيج كلشي متدري

عقاب: لا.. اذا احجيلها السبب متعوفني ادري بيها عنودية وراسها يابس متاخذ كلام

قسورة: لعد احسن تظل هيج، احسن تعوفها متأذية؟

عقاب: لفترة تتاذى احسن مما افقدها، قسورة مدامها بخير بعيد عني اني راضي

قسورة: بس هذا مو عدل!

عقاب: هي هاي الدنيا، ما بيوم ترجيت منها تصير عادلة وياي اني بالذات.. عشت وشفت كلشي منها لدرجة صرت ما اتفاجئ،  كله صار عادي، والي جاي مو اصعب من الي راح..

رجع دك التلفون مرة ثانية..

شاله وحجة بنفاذ صبر.

قسورة: سوي شي عقاب!!!

عقاب: صار..

اخذته منه، فتحت خط وحبست مشاعري بكلبي.

وحجيت بكل برود، لدرجة قسورة واكف كدامي مصدوم بتصرفي وكلامي الكلته..

سديته ومديت ايدي انطيتهيا..

اخذه وهو يتمتم بعدم تصديق..

قسورة: انت شسويت!!!

عقاب: مثلما سمعت، طلكتها.

قسورة: وهسة ارتاحيت؟

عقاب: خياي تسألني الي هالسؤال؟

قسورة: لعد المن اسال فهمني؟ اكلك سوي شي انقذ علاقتكم تروح تطلكها انت شبييييككك؟؟ تريدها تكرهك لو شنو فلمك مدا افهمك!!!

هزيت راسي بهدوء، واني مدنك وبرجلي العب بالتراب الي بالكاع ..

جرني شلت راسي باتجاهه..

قسورة: توقعتك تغيرت!! بس الظاهر انت مثلما انت!

عقاب: مراح تفهمني بعمرك ..

قسورة: لا بالعكس، فاهمك وداعتك .. اصلا تدري انت اكبر جبان شفته بحياتي!

ضحكت مستهزء رغم حجيه خلى النار الي بكلبي تزيد ..

قسورة: جبان لدرجة تستسلم وتترك البنية الي حبتك ووثقت بيك وضحت بكلشي علمودك واولها بنفسها، وتالي متكلف نفسك حتى ان تلكة حل، تنسحب بسهولة وتختار ابسط الطرق!

احتدت ملامحي وحجيت ..

عقاب: الحُب مو دائما يتكلل بالنجاح، العلاقة الي متخليك سعيد ومرتاح اتركها، الانسان الي يأذيك اتركه وان كنت تحبه، الحب وحده ميكفي، الحُب مو كلشي صاحبي!

قسورة: الحُب مو كلشي، بس كلشي حُب.. وانت فاشل بالحُب عقاب! فاشل بالتعبير عن حبك، فاشل بحماية حُبك والاهم منها، انت فاشل بجعل حبيبتك سعيدة رغم انك تكدر!

عقاب: ولأني فاشل، احسن الها تتركني وتبتعد عني، لان اني ما افيدها خلص وصلنا لنهاية الطريق

قسورة: ماكو فايدة وياك، الحجي كله ضايع بيك، شنو هالعنودية ليش هيج متطرف بقرارك وبرأيك؟؟؟ ومتخلي مجال لاحد يوضحلك الصح شنو وعبالك بس انت صح والدنيا كلها على غلط!!؟؟؟

ضحكت بخيبة وباوعتله..
عقاب: هي هم جانت تكول هيج، لتتطرف برأيك ولتتأمر عقاب!! تدري جانت تصيحلي الدكتاتور ..

باوعلي بتك عين ممستوعب التناقض الي اني بي..

قسورة: شخطت مو؟

عقاب: من زمان، صدكني اني مو متطرف ولا شايف نفسي صح والدنيا كلها غلط، ببساطة اني شايف الموضوع من جهتي وانت دتشوف الموضوع من جهتك، كلمن اله راي وكلمن بنظره رايه هو الصح..

مستنكر اردف..

قسورة: وبعين نفسك، انت ابو الراي الصحيح؟

هزيت راسي بملامح ثابتة..

قسورة: يابة دطيررر!!

دار وجهه وراح ..

صحت وراه..

عقاب: تدري ليش طلكتها؟

التفتلي نص التفاتة..

عقاب: تدري ليش ما اريدها تعرف بأي شي واريدها تفكر انو اني تركتها متعمد وانو اني مو سند وانو ما وفيت بوعدي الها؟

قسورة: ليش يا فهيم؟

عقاب: حتى تكرهني..

نظراته شرحت ردة فعله الي ما عرف يصوغها بجملة..
فكملت.

عقاب: الموضوع حيكون اسهل عليها اذا كرهتني، اذا بقت تحبني فكلش تتأذى ويصعب عليها تنساني..

قسورة: بس كسرت احلامها انت!!

عقاب: تحلم غيرهن ويه شخص ثاني، روحها نقية تلكة الي يشبهها ويستاهلها وساعتها الله يوفقها

سكت شوية، وسألني..

قسورة: وانت؟

صفنت ورفعت تك خد مبتسم بحيرة مخلوطة بالحسرة..

عقاب: اني مثلما اني ابقى، شبيه؟

قسورة: عادي عندك تكرهك وتحب غيرك وتكمل حياتها وانت باقي تحبها وروحك بيها؟

بلعت ريكي بثقل.. الحجي صعب شلون لو صارت صدك، الله يعينك يـ كلبي..

عقاب: هو اكيد مو عادي، بس شسوي؟ هذا الي لازم يصير حتى تبقى بخير

قسورة: هي تحبك واختارت نار حُبك، بأي حق تقرر تحركها بنار فراكك؟ ليش متخليها هي تقرر شتريد مو احسن؟

هزيت راسي بلا..

عقاب: ما اخيّرها واني ادري بيها رح تختارني الي ع حساب نفسها وهي مغمضة.

قسورة: لهالدرجة تحبها؟

عقاب: تتذكر من سألتك نفس هالسؤال على ريما؟ شجاوبتني بوكتها ..

صفن شوية ورد جاوب، بس هالمرة ملامحه تغيرت للتفهم وكأنه بلش يفهم اني شلون دا افكر..

قسورة: كتلك كلشي منها يحلالي حتى الجرح والاذية..

حجيت مأيده..

عقاب: بالضبط، وللمعلومة هذا هو الحب الحقيقي.

باوعلي بعدم فهم، تقدمت بخطواتي وصلت يمه.

خليت ايدي ع جتفه ووضحتله..

عقاب: الحُب الحقيقي هو العطاء بدون مقابل، بدون متنتظر شي من الشخص الي تحبه، تقدم لمجرد انك تحبه، وشوفته بخير وسعيد حتلو كان بعيد هاي بحد ذاتها فرحة جبيرة مبعدها فرحة.

انطاني نظرة متفهمة ..

وحضنني وربت ع ظهري ..

قسورة: تهون خيـاي..

زفرت بضيق..

عقاب: بحيـل الله.

ودعنـي قسورة بعدما وصلته لبيته ورحت لبيتي.

ذبيت السويچ وتمددت بغرفتي، خليت ايدي ع عيوني..

وبلشت اتنفس بعمق، صدري يعلو ويهبط بحركات سريعة.
احاول اطلع هاي الخنكة الي نايمة ع صدري بس لا حياة لمن تنادي..

شوية وتهادى لمسامعي صوتها وهي تكول..

اماني: عقاب..

وخرت ايدي وكمت متفاجئ..

واكفة يم المراية وتباوعلي، مبتسمة ذيج الابتسامة الي سحرت كلبي..

غمضت عيوني حيل ورجعت فتحتها، ماهية!

استغفر الله، فركت وجهي بحيرة ..

عقاب: من هسة بديت اتخيلها؟ شحال بعدين لعد؟ وين انطي وجهي وشلون بيه؟!

رجعت تمددت وعيوني عالسكف..

عقاب: تهون.. ماكو شي يظل على حاله دام اكو رب رحيم ..

.....

اماني

خلص الليل واني على نفس الحال..

لا نوم زار عيوني ولا عرف كلبي يرتاح ..

اهلي لاحظوا التحول الغريب الي صارلي بس رفضت اشرحلهم شي واكتفيت بالصمت..

ريما الوحيدة الي فاهمة الموضوع بي عقاب..

ثاني يوم خرجوني من المستشفى.

وبغرفتنا..

سما: مرتاحة هيج ماما؟

اماني: اي هذا هو حبيبتي

رياض: حتلو اجة رجلج او خابر مترجعين وياه سامعتني؟

رديت بحدة ..
اماني: ليش؟؟ شكو بينكم شصاير واني مادرييييي؟؟

ريما: ع كيفج، بابا مو وكتها!!

كمشته امي..
سما: بعدين نحجي رياض مو هسة، خليها ترتاح هالفترة

سكت وماما اخذته وطلعت..

سما: رح اسويلج شوربة دافية، احسن من اكل المستشفى الما بي طعم

راحت وريما كبل سألت جنها ع نار كاعدة.

ريما: هسة تحجيلي شبيج وشحجيتي ويه عقاب!!

حجيتلها ظلت مصدومة مثلي واكثر!

ريما: هو هيج كلج متاكدة؟

اماني: اي.. وج بلسانه طلكني طلكنييييي!!!!

ريما: اهدي اهدي يمعوده، انتِ بيا حال واجة هذا تچمالة!!

اماني: ريما اني دا اموت!!!

هزت راسها بلا ومسحت دموعي..

ريما: اسم الله عليج حبيبتي شهالحجي هذا !

اماني: اريد اشوفه!

ريما: اصحي اماني شبيج! شتشوفيه لج عافج عافففج!

اماني: مجبور اني متاكدة!

ريما: وشنو الفرق؟ بالحالتين دار وجهه لتظلين تركضين وراه لو يريدج جان سوة المستحيل وما عافج!

اماني: لا انتِ متعرفين عقاب، ميسوي هيج شي الا علمود سلامتي اني متاكدة اكو شي غريب جبره يطلكني، هو مستحيل يعوفني مستحيييييللل!!!!!

ريما: بس عافج!!

اماني: ريما اني مناقصة، وخري عني ترا روحي بخشمي!!

ريما: انتِ مو اختي الاعرفها، شبيج شنو لغيرج وصرتي بلا كرامة لهالدرجة!! كاتلة روحج ع عقاب وج بيش حگة انتِ؟ اخذ ليريده منج وبابا بحزبهم، ومن خلص شغله طكلج سفن!

دفعتها وشمرت المزهرية عليها، م اجت بيها بس وكعت بالكاع تفلشت وهي ظلت متفاجئة من تصرفي..

بس اني وين، شياطين الدنيا كلها متربعة براسي!

اماني: انتِ شون هيج تحجييين!! شمعرفج بي بيا حق تفتين من راسج شدخلج اصلاااا؟؟؟؟!!!

ريما: دخلي ان انتِ اختي!

اماني: مالج حق تدخلين بخصوصياتي وهسة يلا براا!!!

ريما: لا بلا؟؟ عصبيتج هاي لان تدرين بكلامي صحيح

اماني: طلعي برا قبلما احجي حجي ميعجبج، وديربالج تشوفيني وجهج!!!!

ريما: ياريت لو يستاهل كل الي دتسويه، ياريت يا اختي!!

حجت بعتب، خزرتها ورديت بعصبية..

اماني: كتلج اطلعيييي!!!!!!

طلعت واني غطيت وجهي بأيدية وكمت ابجي بقهر..

واهمس لروحي مخاطبة عقابي الي مادري وين صفت بيه الدنيا ..

اماني: يرضيك الي ديصيرلي؟ يستضعفوني لان احبك.. يرضيك حبنا صار مسخرة للرايح والجاي ينطي رايه علساس يفتهم؟ ليش هيج تسمحلهم يفوتون بيناتنا.. ليش رخصت عشرتنا وبعتها بوقت اني بأشد الحاجة الك.. ليش عفتني عقاب ليييشششش!!!!!

وليش وليش وليش، وماكو رد ع تساؤلاتي..
ولا اكو صوت ينسمع غير صوت شهكاتي المتألمة ..

لليل، كاعدة بالغرفة وصافنة.

نظراتي فارغة مثل حال حياتي بعد اخر حدث مؤسف صارلي..

سما: كملي الشوربة حبيبتي

اماني: ماريد ماما شبعت

سما: شنو شبعتي هن خاشوكتين حطيتيهن بحلكج!

اماني: اي هذا هو واني اصلا ما اشتهي

سما: اماني انتِ مو صغيرة والح عليج، اكلي انتِ بحاجة للتغذية

ريما جانت واكفة يم الباب ومكتفة ايديها..

ريما: عوفيها خلي الي تاركة الاكل علموده يفيدها

خزرتها..

اماني: انتِ شبيج متفهميني؟

ريما: تعرفين شبيه كلش زين، اكره اشوفج الحلقة الاضعف!

اماني: منو مهتم لكرهج او حبج، احتفظي بارائج السخيفة لنفسج لا تتحفيني بيها

رفعت حاجبها بتعجب وابتسمت بسخرية، رادت تحجي بس ماما سبقتها

سما: شبيجن وحدة تبسمر اللخ؟

اماني: سأليها منو دايس ع طرفها وهيج متحملة على عقاب!!

سما: يعني هاي كله علمود عقاب؟

ريما: لعد شعبالج، هي عليمن تستقتل هيج غير علموده!!

اماني: وانتِ شبيج ضايجة؟

ريما: لان دا اشوفج غبية!

اماني: هاي منو ليحجي؟ اذكرج لو ناسية شلون تصير الغباوة على اصولها؟

خزرتني بنظرة لتحجين، ماما عاطت بينا

سما: لو تحجن حجي مال اوادم لو تسكتن، لتظلن هيج تحجن بالالغااز!!!

اماني: سكتيها لعد ترا هسة اعوف البيت واهج

سما: وين تولين ام حلك!! بسلا لذاك الدار ظهره وعافج وحدج بالمستشفى!

اماني: ماما لتحجين علي هيج!

سما: هااا، لعد شلون تريديني احجي؟ اكول رحم الله والديه خوش ولد ضيع بنتي بعداواته ودمر حياته، مشكور ما قصر، هيج مو؟

رديت بغضب..

اماني: ادور انتِ!!! شبيكم وياه ليش هيج تكرهوه شمسويلكم هو؟!!!

ريما تقدمت وكفت يم ماما ..

ريما: اكثر من السواه الج شيريد يسويلنا بعد؟

سما: ما اعرف ليش مسترخصة روحج وراكضة وراه، ماما هالرجال مو زين، ونهايتج وياه متبشر بخير واعتقد انتِ اكثر وحدة تعرفين معنى هالحجي شنو لان عشتي وشفتي المصايب الي تجي منه شكبرهاا.

اماني: ماما رجاءا ما اريد احد يحجي عن حياتي وينطي رايه، خاصة اني ما مهتمة اسمع راي احد

سما: حتى اني امج؟

هزيت راسي..

اماني: لتزعلين مني ماما، بس انتو محد بيكم يعرف عقاب مثلما اني اعرفه، ولا عشتوا الي عشناه فتشوفون الموضوع من زاوية مختلفة تمامًا عن زاويتنا احنه

سما: الله .. ومن يا زاوية تشوفين سالفة سجنج؟ لو سالفة اصابتج؟ نوريني يجوز اني ما افتهم

اماني: حشاج ماما مو هذا قصدي، ورجاءًا ماريد نحجي اكثر لان حيصير زعل ولا انتِ تفهميني ولا اني اعرف افهمج

سما: مادري شحجي وياج، حرت يا يمه ..

اماني: اسفـة حبيبتي ..

حجيت بعيون دامعة واني العب باصابعي بتوتر..

بروحي ما خلصانة، مو ادور يجون يحجون عليه براسي.

اطك وانفجر ما اتحمل احد يحجي عنه حجاية مو حلوة!

دك ريان الباب، صاحت ريما.

ريما: تفضل

طب بس جان مو طبيعي..

ريما: صاير مؤدب وتدك الباب شكو خو ما مريض؟

ريان: مو وكتج انتِ

ريما: لعد شوكت يجي وكتي، انطيني موعد الله عليك استاذ ريان!

جانت تحجي باستهزاء، بس هو عبرها بلامبالاة ووكف كدامي.

جانت بأيده اوراق، مدلي ياهم.

اماني: شنو هاي؟

ريان: اخذيهم واقري حتى تعرفين

باوعت لماما ولريما نفس حالتي مفاهمات شكو.

اخذتهن منه، اول ما وكعت عيني ع العنوان مالتهن نزلت دمعتي بخيبة امل..

رفعت راسي وسئلته..

اماني: منو دزهن ذني؟

ريان: خابرني عقاب طلعتله للباب، اخذتهن منه

اماني: وراح؟

هز راسه بأسف، عيوني تلمع بالدموع وكلبي ينزف بنبضاته..

ريما: وهسة شنو، بعدج مصرة تتمسكين بي وهو العافج؟

سما: اشش سكتي معليج

بعز قهري، وجعني كلامها..

باوعتلها وحجيت باحباط.

اماني: توقعت منج مجرد تعاطف ع الاقل، مو تتشمتين بيه يا اختي!!

تغيرت تظراتها وحجت موضحة.

ريما: بس مو هذا قصدي، اني جنت اريد ..

رفعت ايدي السليمة بمعنى كافي ماريد اسمع شي، سكتت هي.

اماني: ممكن تطلعون، اريد ابقى وحدي

سما: بس اماني..

قاطعتها وكلت باصرار.

اماني: ماما رجاءا بلا نقاش

كامت دتطلع وريما سبقتها، ريان هم راد يطلع بس وكفته لما حجيت.

اماني: ريان انت ابقى

ماما وريما التفتوا باتجاهي، غلست وهن طلعن.

ظل ريان واكف ميدري شيسوي..

اماني: اكعد شبيك واكف

كعد بصفي ع جربايتي وحجة باهتمام..

ريان: ليش هيج صرتوا؟

اماني: صدكني ما ادري

ريان: شلون متدرين، لعد ليش رح تطلكون؟

اماني: ما اعرف ريان، حالي حالك كلشي ما ادري، متشوفني مصدومة ومادري شسوي!! شو اني تصوبت منا عقاب راح منا!

ريان: خاف امير اله ايد بالسالفة؟

اماني: شمعرفك بي؟

ريان: شلون شمعرفني، مو سجنج وهدد عقاب بيج؟

اماني: منو كلك ع هاي السالفة؟

ريان: منو برايج؟ عقاب حجالي كلشي بوقت جنتِ محبوسة

اماني: يعني انت هم مثلي، مدا تلوم عقاب مثل امنا وابونا واختنا، مو؟

ريان: اكيد لا، شعليه هو اذا حظه دوم يوكعه وية ناس تعبانة

ابتسمت بفرح رغم دموعي تلالي بعيوني..

اخيرا اكو شخص فاهمني، حضنته وهو ربت ع شعري بحنية.

اماني: انت احلى اخ بالدنيا ريان

ريان: عليمن شسويت قابل يمعوده

اماني: هسة حتسوي

ريان: شنو؟!

اماني: تدبرلي طريقة اشوف بيها عقاب

ريان: لا مستحيل

رد باندفاع، فسببلي رد فعله تساؤلات.

اماني: وليش مستحيل؟ بعدين شبيك هيج كبيت؟

ريان: لا كبيت ولا شي، كعدي وسكتي انتِ هستوج طلعتي من المستشفى وينج وين هالسوالف

اماني: عليه هالحركات ريان؟

اردف بتوتر واضح. .

ريان: عليج وعلى عشرة مثلج هم ويلا اني طالع

اماني: بس اوكف!!

ريان: ماكو، انسي اماني

اماني: زين لييييش!!!

باوعلي بضعف، وسد الباب وطلع.

وكالعادة ظليت وحدي، اصارع تساؤلاتي وهمومي..

...

عقاب

اني من قبل اتصلت عالمحامي صديق العقيد زيد.

وجهزلي اوراق الطلاق، رحت اخذتهن منه.

عقاب: مشكور حبيبي

-لا ولو واجبي.. بس ممكن سؤال؟

عقاب: تفضل

-ليش رح تطلكون؟

فاجئني سؤاله، عكدت حواجبي بحدة فهو رئسن حجة.

-اني اسف اذا تدخلت بخصوصياتك، لتجاوب اذا متحب، ما اريد ازعجك، بس كلت حرامات وانت واضح عليك شكد تحبها وجنت متأذي عليها من انسجنت

عقاب: ظروف هي السبب، لو عليه ما اطلكها ولا اتركها بعمري

-متكدر تسوي شي وتحل هالظروف؟

عقاب: حاليا لا، خاصة ان سلامة حياتها متوقفة على هذا الشي

-تحتاج تدخل امني؟ كولي حتى نرفع دعوة ونسوي اللازم

عقاب: لا شكرا ماكو داعي

-ع راحتك، واسف مرة ثانية ع تدخلي

عقاب: لا يابة انت هم اخيي..

-والنعم منك ومن خوتّك..

عقاب: يلا في امان الله

-الله وياك

طلعت من يمه، باوعت ع الاوراق..

تنهدت متحسر..

عقاب: وصلنا لخط النهاية ..

صعدت سيارتي، ذبيتهن ع الكشن الي بصفي وخابرت لريان.

عقاب: الو هلا يابة شلونك

ريان: الحمدلله انت شلونك شو ما بينت؟

عرفت قصده ع اماني.

عقاب: ميحتاج، انتو تكفون وتوفون

ريان: شلون حجي هذا، لعد وانت مو زوجها؟ عقاب اذا تحسب حساب حجي اهلي ازعل منك ترا، انت هم اعذرهم گلوب اهل ويخافون ع بنتهم، وبلحظة عصبية تطلع كلمات ممقصودة

عقاب: اعرف اعرف وحقهم اصلا، المهم اني مو هذا موضوعي

ريان: شنو لعد؟

عقاب: انت وين هسة؟

ريان: بالبيت، هستونة خرجنه اماني من المستشفى واجينا.

كلبي رجف عليها..
عقاب: وهي هسة شلونها؟

ريان: زينه بس ذبلانة بسببك

شكد اذتني حجايته.. لو بيدي انطيها من حيلي وطاقتي بس شلون؟!

عقاب: ريان عوف هالحجي هسة، اني جاي لبيتكم

ريان: يعني اكول لاماني خطية خلي تفرح

عقاب: لا لا، لتكوللها ولا ابد، جاي انطيك شغلة توصلها الها وهذا هو

ريان: ليش متنطيهيا بنفسك؟

عقاب: ما اكدر ..

ريان: ليش متكدر عقاب شصايرلك شو مو طبيعي احسك؟

عقاب: دروح هسة، شوية وتلكاني بباب بيتكم من ارمشلك اطلعلي

ريان: هذا هو

سديته وسقت لبيتهم ..

اول موصلت، حاصرتني الذكريات وتذكرت يوم الاجينة لهنا اول مرة وشفتها..

ويوم التزوجتها غصب واجينة لاهلها وية الحجي..

ويوم الجبتها لهنا وظلينا عالعشا وتونسنا ويه اهلها..

كل جية جانت مختلفة عن القبلها.. حتى هاي!

اليوم جاي اسلمها اوراق طلاكنا.. اوراق نهايتنا ..!

رمشت لريان، شوية واجة.

طلعت من السيارة واخذت الاوراق وياي.

تسالمنا وانطيته الاوراق.

ريان: يا هلا بأبو الشباب

عقاب: بالمهلي حبيب

ريان: تعال فوت جوة

عقاب: لا شكرا مستعجل، هاك ذني انطيهن لاماني

ريان: شنو ذني

اخذ الاوراق قرة العنوان ..

باوعلي متفاجئ..

ريان: شنو هاي عقاب!!

عقاب: اني واختك انتهت مغامرتنا لهنا، دير بالك عليها واذا بچت صيرلها الايد التمسح دموعها ولا تخليها مقهورة بسببي، وصيت ريما وارجع هم اوصيك الك، خلوها تكرهني

ريان: انت تحجي صدك!! ليش تطلكها بسلا امير اله ايد بالسالفة؟

عقاب: اي اله ايد، بس بداعة اغلى ناس ع كلبك لتكللها

ريان: وليش ما اكللها؟ تعرف اماني شكد متاذية ببعدك وذبلانة؟ليش متبرد كلبها حتلو بهالحجاية!!

عقاب: متعرف اختك انت؟ مراح تتركني اذا درت ورح تذب نفسها بالنار، ريان اني ممستعد اخسرها يكفي كل القلق والخوف العشته عليها ، صار وكت تعيش بطمأنينة

ريان: لهالدرجة الوضع متأزم؟

عقاب: اي للاسف..

رجعت للبيت، حتى حيل ما ظل عندي.

فتحت الكنتور اريد ابدل.

صارن كدامي ملابسها..
مديت ايدي اخذت بلوز من ملابسها اشتميتـه ترست ريتي بعطرها..

سديت الكنتور ورجعت تمددت عالجرباية وحاط بلوزها بأيدي..

أي هسة بدت الفركة من صدك..
خ نشوف شكد اكدر اتحمـل!

.....

قسـورة

مرت 3 ايام وعقاب اهدئ من الهدوء نفسه.

وضعيته متسر الخاطر وواضح غياب الدكتورة شكد محزنه.

طول الوقت بالمكتب لو يشتغل لو يدخن وصافن.

قسورة: ها خيـاي شلونك؟

عقاب: هذا لوني

قسورة: ليش متجي يمي اليوم بالليل؟ تغير جو شوية احسن من كعدة البيت وحدك

عقاب: علساس انت شلون ونس

قسورة: يابة وهاي كدام الولد

صحتلهم اجو كلهم، ضرغام وشاهين وليث وسجاد الي بدة يشتغل ويانه.

ليث: خير

شاهين: شكو شبيك تصيح

قسورة: دوكفوا عدل خ احجي

ضرغام: ناخذ مسافات بعد؟ شنو اصطفاف هو خو ما اصطفاف

صفكت بأيدي وضحكت..

قسورة: قوية هاي حبيب ممتوقعها منك

جنة دنضحك بس عقاب ولا يمنا، وجهه يبجي دمرني!!

قسورة: المهم، صحتلكم حتى تشهدون ع الشي الراح اكوله، عقاب انتبهلي بربك

باوعلي ونفخ دخان جكارته بترقُب.

سجاد: غير يفضها يلغي

ليث: صار ساعة خ احجي و خ احجي وهسة تطلع سالفة تعبانة، ويخليني اكوم امسح بسترته الجديدة كاع المكتب

قسورة: تنجبون لو لا؟

اومئوا بالقبول، حجيت بمرح.

قسورة: اذا عقاب قبل يجي اليوم لبيتي، اعزمكم ع عشا واونسكم اخر ونسة

عقاب: هي هاي؟

ضرغام: اندري خبصنا و خ احجي و خ احجي تالي هاي كل قوتك عشا؟ دكول ملهى بيها باب وجواب

شاهين: و جنات؟ يا غافل الك الله

ضرغام: لا حبيب بس القصد سالفته تافهة مثله

ليث: اني اتفق وياك

سجاد: هسة لو يكول اركصلكم جان كلنا تسوة الفخفخة

نطيت من مكاني ..

قسورة: اركص وعلي!!! بس خلوا عقاب يجي، اقنعوه ومعليكم السهرة يمي

ليث: وانت تعرف تركص؟

قسورة: شعبالك لعد

سجاد: اريد رقص شرقي مو هذا التكمز

قسورة: تدلل حتى شسمه عدنه

هو اني كلت هيج وعقاب اخيرا ضحك!!!

صار ساعة مرغلت روحي تمرغل بس علمود اضحكه واغيرله جو!!

قسورة: واخييييييرا زغرطي يا انشراااح

حطيت ايدي ع حلكي وانطيت ايعاز لـشاهين وليث، سوو مثلي وبصوت واحد هلهلنا.

قسورة & ليث & شاهين: كلللللللللللللوش

ضرغام وسجاد فرطوا ضحك، وعقاب مبتسم ويباوع صفح.

عقاب: ولكم عيب منا الحجي شيكول

قسورة: ميكول معليك، بس يدري حضرة جنابك ضحكت يجي هو يهلهل ويانا اصلا

ليث: صح الصححح

سجاد: هسة تركصلنا لو لا؟

قسورة: خاب دروووح، صدك الادبسز غير جنت اريد اضحك الاستاذ بومة

عقاب: يا ****

شمرني بقلم، طفرت و فتحت رجليه طب من جواهن.

قسورة: تصدي رهيب!!

ليث: يعني ماكو عشااا؟؟؟؟ ماكو اكللللللل؟؟؟

هزيت راسي بلا.

ليث: يا حقييييير ياااا ما تستحي شطولك شكبرك تجذب!!!! مو كلت اكو عشا ليش تغير حجايتك؟

قسورة: بكيفي، شعليك انت؟

ليث: شنو شعليه لعد منو نقذك من حازم؟ لو ما اني جان الدود هسة مسويتك وجبة عشا دسمة

هزيت راسي بعدم تصديق..

اشرت لعقاب كمنا حطينا ليث وشبعنا دك.

ليث: فوكما نقذتكم هيج تسوون بيه، يا يابه يا بويةةةةةةةةةةة

عقاب: سودة بوجهي اي ولله، دهااااك

ليث: هاي ليش!! اخخخ الله... فوكاهااااا ولكمممممم اااااخخخخخ، الك الله يالفقييييييرررررر

قسورة: ولله من دنعل ابوك لابو الفقير كفرتنييييييييييي بهالسالفةةةة

ليث: مكيولة هي، سوي زين وذب بالشط، ولك ااااخخخخخ ********* راح ابو الجهااااااال ولج يمة رح اصير عقيييييم

قسورة: احسن خ اكطع نسلك!!!

ليث: لك لااااااااا كلشي ولا ابو الخبززززة، اااااااخخخخخخخ

الولد يباوعون ويضحكون ع ليث الي طاح حظه.

وهيج خلص الوقت، كلما تسمح الفرصة احشش واحاول اغير جو لعقاب الحزين.

لليل وصلت الحجي للبيت بعدما اخذته لعشاء عمل وية كم نائب، ادور طلعت لبيتي.

اول ما وصلت خابرتني ريما.

ريما: الله يساعدك

قسورة: شكرًا

ريما: بس شكرا؟ شنو بسلا بعدك زعلان مني!!

قسورة: لعد شعبالج من تتماوعين تنسيني؟

ريما: قسورة رجاءا سالفة اختي بيني وبينها مالك حق تدخل وتزعل مني بسببها!!

قسورة: لا بلا؟ وحجيج لعقاب؟ هم لازم ما ادخل مو وانتِ صولي وجولي بلسانج الفالت هذا

ريما: شبيك هو اني شحجيت، بس كتله انت سبب دمار اختي عوفها

قسورة: بس هيج؟ لا لا حرامات لو حاطته ورافسة ببطنه جان ارتاحيتي اكثر

ريما: لو ترهم ماكول لا، بس ما ترهم

قسورة: ريمااااا !!!!

ريما: هااا

قسورة: لزمي لسانج!

ريما: حاولت بس شسوي هو يفلت من دون ما ادري

قسورة: ادور تدرين لعد!

ريما: ديلا وهسة شسوي حتى تقبل تصالحني؟

قسورة: ممتزاعلين حتى نتصالح اساسًا!

ريما: ايا ملعووون وهالوقت كله مثكل عليه وشالع كلبي ليييش!!!

قسورة: حتى تتأدبين وتبدين تعرفين شنو تاثير كلماتج عالمقابل

ريما: هاا هيج صارت؟

قسورة: ايي هيج ونص..

ماكو رد، صوتها ابتعد وادور سمعت صوت ابوها يكللها اماني وين وهي تكوله ما ادري

قسورة: ريما حبيبي وينج شديصير يمج؟

ريما: اماني ماهية بالبيت قسورة!!

غمضت عيوني وتنهدت مجاوبها..

قسورة: اكيد راحت لعقاب!

.....

انتهى

لا تنسوا التصويت والتعليق 🖤🦋

#الكاتبة نورمين