رواية خطأ طبي «عقاب الاماني» الفصل الخامس وأربعون 45 - بقلم نورمـين

#خطأ_طبي «عقاب الاماني»

بقلــم : نورمين 🖤🦋

...

ريما

صارت هوسة، اخذت التلفون ورحت للمطبخ.

ريما: شتسوي رايحتلله بعد؟؟!!

قسورة: شنو شتسوي رايحه ريري انتِ شصايرلج فهميني؟!!

ريما: صديقك مصدر اذى لاختي واني ماريدلها الاذى، شنو الي مدتفهمه!!!!

قسورة: استغفر الله يا ربي..

ريما: دخابره شوفه وينه يجوز صدك راحتله!

قسورة: اول شي،خابريها وشوفي وينها

ريما: عايفة تلفونها هنا

قسورة: شلون سالفة تعبانه! دروحي روحي اني اشوف عقاب

ريما: انتظر منك خبر فدوة لتنساني

قسورة: صار حبيبي.

سديت التلفون ورجعت طلعت يم اهلي.

بابا صاير اعصاب وماما بالها مشغول وقلقة وريان يهدي بيهم.

رياض: اكص ايدي اذا متطلع رايحة لعقاب!

سما: شلون بيها هالبنية شلوون، مترتاح الا توكف كلبي، مو ولله روحي راحت ما كفاها الصار!

ريان: ترا اماني مو صغيرة، جبيرة وواعية وتعرف مصلحتها وين، اكيد من طلعت راحت بارادتها وهي بخير هسة عليمن ناصبين هالمناحة؟!

رياض: انت تفتهم شدنحجي لو لا؟

سما: وين يفتهم هذا هم مدري شبي شخط مثل اخته

ريان: لا شخطت ولا شي، خلونا نحجي بمنطق ليش نلف وندور

رياض: اي تفضل ابو المنطق سولف

ريان: بابا ولله انت دتظلم عقاب، يعني الولد فوك ما يحبها ويخاف عليها ودوم كلبه عليها اجة وطلكها حتى بلكي يعوفوها عاد ويخلص من اذيتهم الها، بس اذا اماني مقبلت وراحتله واصرت تبقى وياه شتريده يسوي يعني؟

رياض: هو يعرف شيسوي، اني ليهمني بنتي تبتعد عنه ما مستعد اضيعها من ايدي علموده!!

سما: ماما ريان دك على عقاب شوفه وياها؟

تنهد ورد بهدوء.

ريان: هسة اشوف..

دك على عقاب، رد عليه..

....

عقاب

جنت بالبيت دا اشتغل لان قربت الانتخابات مظل عليها شهر.

حاط كوب الكهوة يمي، وملهي روحي حتى ما افكر بالدكتورة والصار..

ودك عليه قسورة.

كمت جبت التلفون من الغرفة ورجعت كعدت ورديت.

عقاب: ها خيرك

قسورة: الدكتورة مو بالبيت، اجتك؟

وسعت نظراتي بتفاجؤ واردفت بسرعة..

عقاب: لا م اجت!!!

قسورة: خررب

عقاب: يرررررب!!! هاي من شوكت طلعت؟ هي مو بعدها دتتعافى شلون يخلوها تطلع شلووون؟؟!!

قسورة: ميدرون بيها من طلعت

عقاب: وشمدريك انت؟

قسورة: ريما خابرتني وكلتلي، وتوقعت تكون يمك اصلا شعجب ما اجتي؟

تنفست بعصبية، يربي وين راحت اذا ما اجتني!!

عقاب: مادري مادري، خ اكوم اشوفها لتروح تتورط بسالفه لخ بهالليل

قسورة: تمام بس اهدئ و على كيفك وياها مو تحجي حجاياتك السم ذنيج

نترت بي..
عقاب: متوصيني بيها لك!!

قسورة: ديلا لعد

سديته منه وكمت اخذت جاكيتي دا اطلع ودك عليه ريان.

ريان: اكلك عقاب هم شفت اماني، اجت يمك؟ ما موجودة بالبيت ومندري بيها وين راحت !

عقاب: ماشفتها، لك ريان وين راحت شلون تخلوها تطلع وين جنتو عنهااا!!!!!

ريان: مندري بيها مغافلتنا وشاردة مثل الحرامية

سمعت صوت ابوه يحجي وياه يكله خلي يكوللنا بس تجي لياخذها يمه.

تنهدت، هسة هذا شتحجي وياه؟
يعني لو اني اريدها اخلي ياخذها؟
غير اني مختار البعد بارادتي والا لو تنطبك السما عالكاع ما اتركها!

قبل ليحجي ريان، جاوبته.

عقاب: كول للدكتور ليقلق، بنته ترجعله بخير متروح لاي مكان

ريان: تسلم منتظر منك اتصال

عقاب: واجبي

سديته وطلعت.

دكيت عليها جهازها يدك ومترد عليه.

عقاب: مترد .. متريد تريح گلبي! شلون تكدر تخلي عقاب مطمن، لا دومها شالعة گلبي وراها!!!  خرب بعنادها رح تخبلني هالبنية!!

ضربت الستيرة بسخط و رجعت دكيت مرة لخ.

انغلق، تخبلت عقل مظل براسي، كمت اتخيل امير خاطفها شو شمسويلها و كلبي طك ..

وين اروح والمن اسال وهي معندها احد ولا عدها صديقة مقربة!

لا يم اهلها ولا يمي، وين تريد تروح يعني!!

ظليت افتر الشوارع القريبة ع بيتي واتلفت منا ومنا.

قسورة هم خابرني، وطلع يدور وياي بمحيط شغلها وهالانحاء.

عقاب: ماهيه لك ماهيه!!! رح اتخبل وين راحت بهالليللل!!!!!!؟؟؟؟

قسورة: ع كيفك نلكاها قابل وين تروح، زين انت هم رجعت للبيت؟ خاف راحتله وراك

عقاب: جان اجت من الاول لو تريد!

قسورة: درجع اتاكد بلكي تكون هناك

عقاب: امري لالله..

سديته وفريت السيارة رجعت للبيت.

ماكو ماهية هناك، ضربت الكاع برجلي وزفرت بضيق..

طلعتلي جكارة ورثتها وهمست.

عقاب: وين وليتـي ولج كلبي راح .. اوووف دخلي الزمج الا اطلع كل هالخوف من عيونج!

صعدت السيارة وطلعت عالشارع، كلت ماكو حل غير افر كل الاماكن الي جنة نروحلها سوة.

لعل وعسى الكاها بواحد منهن.

واني دا اباوع عالمحلات، لمحتها!!

صوبت نظراتي باتجاهها وكلبي نبض برعونية.

وكفت السيارة ونزلتلها.

جانت كاعدة بالحديقة، الي يم المطعم الشفتها بي وية ايمن زميلها ببداية زواجنا.

تنفست براحة لما شفتها بخير..
ايدها المتصوبة مصبوبة ومشيولة لجتفها بحمالة الايد.

جانت دايرة وجهها للطرف الثاني وصافنة فما شافتني من اجيت.

قبل لا اوصل يمها، جانت اكو مسافة المتر ونص تفصل بيني وبينها..

صحت عليها بصوت عالي حتى الفت انتباهها..

عقاب: دكتوووورة!!!!

دارت وجهها وملامح وجهها شعّ منها الفرح.

اجت باتجاهي بلهفة واضحة وكالت ..

اماني: عقاااب!

رديت بصوت حاد مغلفه الخوف..

عقاب: وين جنتِ وليش غالقة تلفونج؟؟ المن مخلينه اذا تغلقييي؟؟ انتِ متفكرين متكولين عندي ناس وراية تخاف علييه؟؟؟ شوكت تبطلين تتصرفين بطفولية؟؟؟؟؟

ارتبكت من كلامي وردت بشك..

اماني: وانت خايف عليه يعني؟

اردفت مستنكر.

عقاب: ما مبين يعنيييي؟؟؟؟

اماني: اس..سفة.. بس

عقاب: بدون بس!! انتِ مو مريضة شطلعج بهالليل؟؟

اماني: اجيت اشوفك واحجي وياك

عقاب: هاا، تردين تشوفيني تجين لهنا؟ ليش مو للبيت؟؟ مواعدج هنا مثلا ومادري بروحي؟

اماني: بس اني رحت للبيت وحضرة جنابك مجنت موجود!!! وين جنت طالع ممكن افتهم؟

عقاب: شوكت هاي؟

اماني: من نص ساعة تقريبا

بلعت ريكي بتوتر.. هاي من طلعت ادور عليها اجت!

اماني: شو سكتت؟ احجي وين جنت!!!

عقاب: اني وين وانتِ وين!! وحدة مريضة وايدها معلكة بركبتها ومصارلها 4 ايام من طلعت من المستشفى وجاية وحدها بتوالي الليل وكاعدة بحديقة متعرف يجيها حرامي سرسري!!! لج انتِ متفكرين متخافين على نفسج؟

اماني: حاسب حتى كم يوم صار من طلعت من المستشفى!

ارتبكت، هاي شلون تصيد بالمي العكر وتچلب بنقاط ثانوية!

عقاب: لا تغيرين الموضوع، البيننا انتهى اتقبلي الصار وخلينا نعيش بسلام كافي تتصرفين بغباء!!!

اماني: ممكن تنصي صوتك وتهدئ!

عقاب: ابد مو ممكن!! وهسة يلا امشي

كمشت ايدها ومشيت، جرتها مني وحجت.

اماني: عوفني!!!

رفعت حاجبي وتنهدت، يا ربي الصبر!

عقاب: اهلج يدورون عليج وخايفين، خلي اوصلج وارجع لبيتي لتأخريني!

حجت ساخرة، بس بنبرة صوتها جان واضح الحزن.

اماني: ليش انت وين جنت؟

عقاب: شيخصج؟

اماني: هم صح.. شيخصني.. مو طلكتني شبيه مهتمة بعد..

تقدمت باتجاهي وخلت المسافة بيننا أنشات معدودة.

اماني: عقاب ليش هيج سويت بينا؟

عقاب: هذا هو الي لازم يصير، خلص احنه انتهينا ونقطة راس سطر!

اماني: امير هددك مو؟ هو السبب وهو الي دز جماعة يصوبوني؟؟ هو سبب الي ديصيرلنا مو احجي!!!!!

هزيت راسي بلا..
كوة مكابر وضام وجعي، لو بيدي اخذها واشرد من هالدنيا كلها بس وييييين اكدر؟؟

عقاب: امير ماله علاقة، اني الي اخذت هالقرار

اماني: لييش ممكن اعرف!

عقاب: لمصلحة الطرفين، وهذا احسن شي نسوي لبعض صدكيني

اماني: منو كال احسن؟ واصلا منو سمحلك تاخذ قرار بالنيابة عني؟؟ موضوع الطلاك مو شي هيّن ووحدك تقرر، اني هم طرف بهاي العلاقة ومن حقي انطي رايي!!!

عقاب: والي هو؟

اماني: اني رافضة الموضوع، ماريد اتطلك منك!

ضحكت بسخرية وكلت..

عقاب: لهالسبب تحديدًا ما كتلج ولا اخذت رايج، لان اعرف ردج كلش زين شنو!

اماني: بس انت متكدر تلغي رأيي بحجة مصلحتح!

عقاب: دكتورة لا تتعبيني وتتعبين نفسج، تقبلي الموضوع احسن الي والج ولا تخلين كلب اهلج مشلوع، خلي نخلص عاد ونرتاح!

همست بعتب..

اماني: نرتاح؟..

باوعتلها وعيوني تحجي كلشي بداخلي، حُمر متألمات مثل حال كلبي..

اماني: ترتاح مني عقاب؟.. ليش شسويتلك اني؟ .. بس حبيتك! حبيتك من كل كلبي واكثر من اي شي! ووكفت وياك ضد اهلي، وضحيت بنفسي وبشغلي وبحياتي واجيت عشت وياك رغم جنت مهددة بالقتل!! ورغم كلشي صار قبلت افتح وياك صفحة جديدة وذبيت كلشي ورا ظهري وصرتلك كلشي انحرمت منه، حنية ودفو الام .. عطف واحتواء الاخت.. حُب واهتمام الزوجة، وتالي هذا جزائي على تضحياتي وحُبي، هذا ردك الي عقاب...؟!

لچمت گلبي بكلامها ودموعها.. علساس اني شلون ناقص وجع!!

عقاب: اسف.. بس احنه وصلنا لطريق مسدود ومن الاول جان لازم منخطي هيج خطوة، لو ماشين عالاتفاق هواي احسن،  وبعدين متفاركين و كلمن يروح بحال سبيله، جان مصار كل الي صار ..!!

اماني: شنو معناته كلامك هذا،  هااااا شنووو؟؟

عقاب: حُبنا جان غلطة دكتورة!

باوعتلي بفراغ، كأن ممصدكة الي دتسمعه..

عقاب: علاقتنا وزواجنا وحبنا غلط.. لج حتى سبب تعارفنا ع بعض بسبب غلط طبي! كلشي عشناه لليوم عبارة عن غلط بغلط!!! وصار الوكت الي لازم نصحح بي هالغلط!!

هزت راسها بلا وبجت..

مدت ايدها تكمش ايدي وحجت بنبرة ليّنة..

اماني: اجي وياك.. ولو جان حبنا غلطة، خلينا غلطانين مدام اني احبك وانت تحبني شكو بيها؟ خلينا سوة ولتفرقنا بهالحجج الفارغة فدوة، انت مو كتلي ما اعوفج ابد؟ مو كتلي امنيتي ديربالج تتركيني بعد كل هالحُب، شصار هسة ليش متتذكر حجيك ليش متنفذه؟؟

عقاب: الظروف تغيرت ووجهة نظري كذلك.

اماني: لا، اكو شي غيرك اني متاكدة، عيونك هاي حافظة نظراتها، انت لسانك يحجي شي وعيونك تحجي شي مختلف تمامًا!!

عقاب: كافي رحمة لكل عزيز عندج!!

اماني: مو كافي مو كافيي مو كافييييي!!!!!!

دفعتني وكامت تصيح بصوت عالي، لاحظتها تتالم من حركاتها وايدها المصابة توجعها، بس من حالتها المزرية متدير بال ومستمرة تبجي وتدفع بيه..

حضنتها لصدري وهي بعدها تضرب ع كتفي بقوة ضعيفة وتبجي..

حسيت كلبي ديتشاهد ع روحه ورح يسلم امانته للرب عن قريب..

روحي راحت واني اشوفها تبجي ومتأذية وعاجز اهديها بحجاية!

اووف يا كبـر وجعنا.. عساها بحظك وببختك امير الكلب!!!

تمتمت من بين شهقاتها..

اماني: مو تكلي انتِ ضوة روحي؟ شلون تقبل تعوف ضواك؟ شلون ترجع تعيش بالظلمة؟؟؟

وخرت من حضني ورفعت راسها، باوعت بعيوني وكملت..

اماني: عندك استعداد تعوف ضوة روحك وعروگ گلبك؟؟ شلون تعيش بدونهم، شلون تكدر هاا؟!

غصة حقيرة تشكلت ببلعومي وكامت تچويني ..

عيوني حُمر ودموعي بالفعل تمردت عليه ونزلت لتستقر على خدودي..

بس جانت كل دمعة توكع جنها جمرة وتحرگ خدي..

لا بيه احجي لبكلبي ولا بيه اسكت واحس روحي دتحترك من جوة ومالي سيطرة ع ايقاف الي ديصير....

سحبت نفس، قويت روحي ورديت بصوت جاهدت ليطلع ثابت.

عقاب: مثلما عشت قبلچ، اكدر اعيش بعدچ، محد يموت ورة احد، ورب العالمين موجود فلا تديرين بال..

رمشت بصدمة متأثرة بكلامي وعافت ايدي..

عقاب: خلي فراكنا حلو مثل ذكرياتنا.. رجاءًا كافي تصعبيها لان ماريد اجرحچ بكلامي..

اماني: اكثر من هالحجي الجارح شتحجي بعد؟؟

عقاب: دكتورة رجاءًا!!

اماني: وامنيتك وين؟

زفرت ورديت بحرگة..

عقاب: صعبة تتحقق وتكون الي، تنازلت عنها..

عضت على شفايفها ونظراتها الحارِقة توضح مدى عمق جروحها..

استنشقت ماء خشمها وحجت بصعوبة، نظرًا لموجة البكاء الصامت الي دتمر بي..

اماني: تريد نتطلك؟ عادي وعلى كولتك محد يموت ورة احد، بس.. لازم تجاوبني ع سؤالي..

عقاب: وهو؟

اماني: شنو السبب المقنع الي خلاك تطلكني؟؟ اريد اعرف

عقاب: جوابي نفسه ما تغير.

اماني: يعني مُصر؟

هزيت راسي ..

سكتت شوية ممقتنعة، وردت انفجرت.

اماني: ما مصدكة ولله.. انت دتجذب دتجذب ليش متكلي الحقيقةةةة!!!!؟؟؟؟؟؟؟

عقاب: واذا عرفتي شيصيرررر؟؟ اذا كتلج شتسوينن؟؟؟ شتكدرين تغيرييييننن انتِ؟؟؟

اماني: يعني اكو شي فعلا!!

تنهدت.. شلون بلوة هاي تخليني اجفص كوة!

عقاب: استغفر الله يا ربي

اماني: يعني توقعي بمحله، امير هو السبب مو؟؟!!

عقاب: لوين تريدين توصلين؟؟

اماني: للحقيقة!

عقاب: اتركيها، تضرچ متنفعچ، سمعي مني لمرة وحدة بحياتج!

اماني: انت الي اسمع مني!! مرة وحدة بس خلي غرورك ع جهة و خليني اني اعلمك الصح، خليني اني اكمش ايدك واخذك للطريق الصحيح!!

عقاب: شتسوين بلا؟

اماني: خلي نسافر ونعوف العراق، منو يكدر يوصللنا ويأذينا بعد؟

عقاب: انتِ كل عقلج تحجين؟

اماني: اكيد، فدوة وافق، خلي نسافر ونعوف كلشي ورة ظهرنا ونبدي حياتنا من جديد بعيد عن المشاكل والاحزاب والسياسة والعداوات!

عقاب: مستحيل!!

اماني: ليش مستحيل، متتخلى عن شغلك علمودي؟

عقاب: مو هيج بس اني ما اكدر اغربچ بعيد عن اهلج، مستحيل ما اقبل تعيشين بغربة بسببي

اماني: بس اني قابلة!

عقاب: ادري بيج قابلة متشوفيني ما اخذ بحجيج!

اماني: انت شبيك شبيييكك!!! شنو هالعناد هذا؟!!!

عقاب: اني لو انتِ؟ لج بابا كافي تحجين كافي كتلج خلص انتهينا!

اماني: مو هي بكيفك، عود من تزوجلك حايط ليحل ولا يربط ذيج الساعة قرر عنه وسوي هالحركات!!

عقاب: الصبر الهي...

دك تلفوني، طلعته جان اخوها ريان المتصل.

رفضته ورجعته بجيبي، باوعتلها وكلت بحزم.

عقاب: اخوج ديتصل واهلج بالهم مشغول عليج، خلي اوصلج للبيت فضيني!!

اماني: ماروح لمكان! باقية هنا ما اتحرك

نترت بيها بغضب..

عقاب: ليش تجبريني اخذج غصب؟

اماني: مو جديدة عليك واصلا ما استغرب اذا سويتها، مشهودتلك هواي!

عقاب: لعد احترمي روحج وامشي وياي بالحسنى

اماني: عجييب شعليييك؟؟ مو متريدني؟ مو طلكتني؟ شعليك ابقى لو اروح شحارك دمك انت وليش هيج مهتم؟؟!!!

عقاب: احجي عدل لا تتسودنين من تالي!!

اماني: اتسودن انجلط انصرع اموت شعليييييييكككككك؟؟

عقاب: صوتچ لججج!!!!

خزرتها لان صوتها علّى حيل، صح الحديقة فارغة بس مو معناتها تتصايح.

عقاب: يلا يا عينـي امشي

اماني: ماروح منا غير لبيتنا اني وياك!

اطلقت تنهيدة تعبانة من اعماق روحي ..

و مديت ايدي الها مستسلم لرغبتها، ابتسمتلي بسعادة..

كمشتها ومشت وياي فرحانة..

...

اماني

صعدت بسيارته والفرح غمر كلبي وكل جزء بجسمي!

ممصدكة اخيرًا رضخلي وغيّر رأيه!

همزين ما وقعت اوراق الطلاك من قبل.

ظلت عيوني عليه طول الطريق، ممصدكة اللحظة هاي اريد اظل اباوعله واتاكد ان الديصير حقيقي!

بس هو جان جامد، ماكو اي رد فعل منه تجاهي..

بس يسوق وباله مو يمي اصلا..

شوية وبديت احس ع الطريق مو طريق بيتنا!!

حجيت بشك..

اماني: عقاب انت مراح تسوي الي ببالي مو؟

باوعلي بنظرة جامدة ورجع باوع للطريق بدون مينطق بحرف.

وكأنه ديأكدلي صدق احساسي!!

بظرف لحظات انكلبت فرحتي لتعاسـة، بس هالمرة تعاستي تضاعفت مليون مرة لان ضحك عليه!

حجيت بتحذير.

اماني: ولله يا عقاب اذا طلعت موديني لاهلي بعمري ما اسامحك ولا اباوع بوجهك بعد!

عقاب: الله كريم عود..

رد ببرود بدون ميباوعلي، رجعت انتچيت ومترقبة القادم.

اتمنى من رب العالمين ميطلع توقعي صح، لان ماريد انفذ كلمتي واعوفه!!!

كلبي ما ينطيني..

شوية وبلشت الصورة تتوضحلي اكثر، دخلنا بفرع بيت اهلي..

هنا حبست انفاسي ودموعي انهمرت ع خدي بكـرم..

انداريت عليه اباوعله بنظرات مؤنبة، بس هو اصلا ما باوعلي!

ما يخلي عينه بعيني، ميكدر اني اعرفه!

طلع تلفونه، اتصل ع شخص.

عقاب: ريان اطلع اخذ اختك

بلعت غصتي بألف يا علي..

نزل من السيارة وكال..

عقاب: يلا نزلي

نزلت وصفكت الباب بكل قوتي.

رحت عليه وحجيت بعصبية..

اماني: ليش جذبت لييييش ضحكت عليه ليييشششش؟؟

عقاب: رح يجي اليوم الي تشكريني بي على هالشي

دفعته بقهر وحجيت من بين دموعي..

اماني: ليش أملتني بيك اذا جنت رح تعوفني؟ ليش خليتني اثق بيك وخذلتني؟؟ لك لييييش بس جاوبني لييييش!!!! 

جان مستقبل ردة فعلي بكل رحابة صدر، ساكت واني ادفع بي واعيط وهو ما نطق حرف ..

سكوته دمرني اكثر من سوايته!

اماني: احجي جاوبنييييي لتظل ساااااكتتتت!!!!! احجيييييي

اجة ريان كمشني وخرني عنه.

اماني: الله ياخذ اليوم الحبيتك بي، انت دمرتنيييي!!!!!

ملامحه جانت مال شخص حاس بالذنب..

عقاب: في امان الله، اشوفكم بخير

ريان: الله وياك

راح يصعد سيارته، قاومت ريان وخر ايديه عني..

ظليت واكفة اباوعله، اتوسله بنظراتي ينطينا فرصة وميعوفني!!

بس.. دار وجهه وراح.

ساق سيارته واني ركضت وراه..

اماني: لاااا عقاااب ارجععععع لتعوفنييي ارجعععع، يا الللللله....

ابتعد وظليت امشي ببطئ واتمتم بأسمه..

ادور كعدت بالكاع وكمت ابجي من كل كلبي.

الدموع احسها طالعة من روحي هلكد ما توجعني ..

اجة ريان، كومني وهو يواسيني..

ريان: دكومي حبيبتي لتسوين هيج بروحج

اماني: راح رياااان رررراااااااح!!!

ريان: افففف دكومي كومي

طبينا جوة وماما وبابا وريما وجوههم محتلتها الصدمة بسبب وضعي..

ما حجوا بكلمة واتوقع ريان أشرلهم بالسكوت.

صعدت لغرفتي وسديت الباب عليه.

ظليت افكر هواي بكلامه وبحالتنا وبكلشي صار ويانه من اول ما تعرفنا ع بعض ولليوم..

مسحت دموعي وشلت راسي، صارت كدامي اوراق الطلاك.

تذكرت من كتله اذا وصلتني لبيت اهلي ما اباوع بوجهك بعد، وشلون ظل مصر ع قراره رغم توسلاتي ودموعي الي علساس تهزه!

مسحت دموعي، احتدت نظراتي.

مو بس هو الي يدوس مشاعري ويمشي ببساطة..

ماريد اتوسله واترجاه اكثر بعد، يكفي السويته علموده لحد هسة!

صار لازم استجمع نفسي والم هالباقي من كبريائي الي طشره بالايام الراحت..

تنفست بعمق واتخذت قراري..!

كيف لا يكون حُبنا خطيئة، ان كان الخطأ الطبي سبب اساسي للقائنا ببعضنا البعض؟!
-بقلمي : نورمين

انتهى.

لا تنسوا التصويت والتعليق 🖤🦋

#الكاتبة نورمين