رواية خطأ طبي «عقاب الاماني» الفصل الرابع 4 - بقلم نورمـين

#خطأ_طبي «عقاب الاماني»

بقلــم : نورمين 🦋🖤

...

عافتني وراحت، رجعت لغرفتي حاولت اتمدد واريح اعصابي بس ماكو، لا حياة لمن تنادي، داخلي يفور وحتى النومة متزور جفوني..

من بعد محاولات استمرت قريب الساعة، قررت استسلم للحقيقة وكمت، اخذتلي شرب وطلعت للمطبخ اخذت كلاص، شفت الدكتورة ع نفس الكعدة والرهبة هي هي بملامحها، ما نقصت.

رغم حرصي الشديد ومراعاتي للنساء، هاي كلبي مدا يلين تجاهها ابد، يعني منين ما اجيها، ما اشوف غير انو حرمتني من اختي!

عبرتها وكعدت بالطرف، اشرب واباوعلها بحدة، كلبي موجر منها للستار!

اماني: اريد انام لو سمحت

ضحكت بصوت عالي ورجعت باوعتلها وكلت.

عقاب: اي شكو بيها

اماني: شنو اي اريد غرفة انام بيها

عقاب: تعاي ورايه

كمت وهي تمشي ع كيف ورايه، البيت ما بي غير غرفة بيري وغرفتي، ومستحيل اخليها تنام بغرفة اختي!
فكرت انيمها بالصالة بس ماعرف ليش كلبي ما انطاني..!
او استصعبتها لسبب اني نفسه اجهله، اخذتها لغرفتي.

اماني: هاي غرفتك؟
بعدما اخذت نظرة ع غراضي المرتبة بالغرفة، حجت بصدمة

عقاب: اي ليش اكو مانع عندج؟

اماني: تتشاقة مو؟ ما انام وياك بغرفة وحدة!

عقاب: لا عفية نامي وياي
حجيتها بسخرية ورجعت خزرتها وحجيت.

عقاب: تريدين تنامين هنا او بالصالة انتِ حرة، وافكارج المريضة شيليها من راسج، مستحيل بيوم من الايام انظرلج كـمرة او يصير شي بيننا، انتِ كدامي عبارة عن شيطان وبس!

ارتبكت وكلامي اثر بيها، اخذت نفس وحجت بصوت مهزوز.

اماني: بس اني مو هيج قصدي، مجنت متعمدة.. ولله الصار مو بايدي...

قاطعتها لمن ركعت الكلاص بالحايط وصحت بعصبية.

عقاب: ودييييين محمد اذا سمعتج مرة ثانية تحجين وتبررين فعلتج، اذبحج وما يرفلي جفن، حسج ما اريد اسمعه، فتهمتي لو لاااا؟!!!!

من الخوف لفت ايديها ع نفسها بحركة اشبه بالحضن، وهزت راسها كم مرة بعشوائية، عفتها وطلعت.

كعدت بالصالة وراسي احسه رح ينفجر من التفكير والغضب!
طلعت باكيت الجكاير وكمت ادخن وانافخ بقهر، اتخبل من اسمعها تبرر سوايتها!! روح هاي مو شقة وتكول ممتعمدة! ناري مدا تخمد الهي..

..

اماني

بعدما طلع من الغرفة، كعدت بالطرف ولميت رجلية لحضني، ونزلت راسي وبديت ابجي، بجيت ع البنية و ع نفسي و ع اهلي وحياتي ومستقبلي.
الي صار دمرني حرفيًا، خلاني عاجزة ارفع راسي وانطق كلمة، لان ماكو رد اكوله ممكن يشفعلي ..
باقية بس ابجي وادعي واندب حظي وكلبي الطيب الي طاوعني افوت هيج فوتة مصخمة.

كمت وباوعت لنفسي بالمراية، هاي مو اماني..!
لو اجة شخص قبل اسبوع وكلي حيتغير حالج ضمن هالاسبوع مجان صدكته!
اني الي تنكلب عيشتي بأسبوع لجحيم؟!!

اني الي اعيش هيج واظل ليل نهار ابجي وروحي بخشمي؟!!

اني الي جنت احب الحياة والفرح والطلعات والونسة واتمنى الخير للكل، هيج اتجازى؟!
ليش يربي؟
بشنو غلطت اني وهيج عاقبتني؟!
شنو هالامتحان الصعب؟!

كعدت عالجرباية لزمت راسي ومرت تفاصيل اليوم كلها براسي مرة ثانية.. فوك ضيمي تزوجت اكثر شخص يكرهني بهالدنيا!!!

اهلي شنو وضعهم؟ تذكرت بابا وشلون جان خايف عليه ويكولي اني اخلصج منهم بس كولي جبروني!!
جنت اتمنى اكوله اي بابا هددوني بيكم بس مكدرت..
خفت عليهم وقررت اكلها وحدي لان اني سبب كلشي صار!

شلت راسي واني ادور عيوني بارجاء الغرفة، الاثاث عبارة عن لون رصاصي غامق وفاتح، الحيطان كذلك وكلشي كلشي موجود بهاللون!

حسيت الخنكة وصلت لبلعومي وكتمت ع نفسي اكثر مما اني مخنوكة وطالعة روحي..
لون الغرفة والهالة الي تحيط بالمكان كُلش كئيبة وحادة، مثله بالضبط!

سمعت الحجي يصيحله عقاب من جنة بالمكتب..
عقاب.. اربع حروف سهلة وبسيطة بس الطريقة الي اندمجن بيها طلعن اسم يبعث عالخوف والرهبة!

تذكرت من كلي اني عقابج دكتورة، دموعي نزلت ع خدودي مرة لخ وعبالك جمر ديچويني، اووف الهي كون وياي دخيلك انت وحدك تعرف اني شنو نيتي!

...

عقاب

بعد وقت طويل، رجعت اريد انام ولكيتها نايمة عالجرباية وواضح اثار دموعها المالحة ع خدودها.

لسبب ما، مديت ايدي وبأطراف اصابعي تلمست خدها واثار الدموع الناشفة، فزت وارتدت لورا وشهكت.
اماني: شدتسويي!!؟

جريت نفس وحاولت ابين عادي، رغم من كعدت حسيت بارتباك بسيط وبلشت اسأل نفسي، اني ليش هيج سويت؟!

عقاب: انتِ الي شدتسوين ع جربايتي دكتورة؟

باوعت داير مدايرها وكالت.
اماني: اس..سفة بس نمت بلا ما احس ع نفسي

عقاب: زين، نزلي نامي بالكاع

ظلت صافنة بوجهي ممصدكة.

اماني: شنو؟!

عقاب: مثلما سمعتي

نفذت بهدوء، اني جبت فرشة جديدة للجرباية وشمرتلها الي جانت نايمة عليها، ماريد شي يخصها او يتعلق بيها موجود قريب عليه، هيج احس براحة اكثر، اي نعم هي قريبة يمي بالبيت بس البُعد الي بيني وبينها مثل فرق السما عن الارض!

مكدرت انام وظليت اتصارع وية افكاري ومؤرقاتي للصبح.

خابرت قسورة وكمت سويت كهوتي، والدكتورة متيبسة بمكانها بالكاع، ادري باردة عليها بس ميخالف تستاهل.

قسورة: صباح العسل يا عريس

عقاب: اكل تبن واسمعني

قسورة: من بعدك صاحبي

عقاب: لتخليني اطلع حركة كلبي كلها بيك هسة

قسورة: هههه اشاقة يمعود، احجي اسمعك

عقاب: متاكد ابوها مراح يكعد ويسكت، ومسئلة وصوله لبيتي هم مراح تاخذ منه وقت

قسورة: اي اعتيادي خاصة انتو عاقدين بس سيد

عقاب: صح، فأريدك توصي الجماعة بالمحكمة يمشولي المعاملة بسرعة
كلتها وشربت شوية من كهوتي.

قسورة: ليش انت مو تعرفهم لبركات ومؤيد؟

عقاب: مو قبل فترة تعاركت وياهم وحطيتهم وكتلتهم

قسورة: خررب ليش ولك؟

عقاب: جنت اني وبيري كاعدين بمطعم نتعشة وشفتهم هناك بالصدفة، شو ذوله كاموا يذبون حجي ع ابو عاش ذوقك وحليوة ومدري شنو واني كبت عندي

قسورة: جان كتلهم اختي وفضيتها

عقاب: علساس هم انطوني مجال، كبل داسوا ببطني فأكلوا المقسوم

قسورة: ههههههه لعد الف عافية

عقاب: هسة اني وين جنت وانت وين جبتني
حجيتها بقهر، لان تذكرت بيري.

قسورة: ااا اسف اسف، يلا سده معليك خليها يمي الشغلة

عقاب: تمام
داشرب ودرت وجهي، لكيت الدكتورة ورايه، الظاهر جانت تسمع، ما اهتميت تسمع او لا يطبها مرض.

اماني: صباح الخير

مدرت بال ولا رديت، التهيت بكهوتي ولابسها كأنو مموجودة.

كملت ورحت سبحت وبدلت، بلوز رصاصي غامق ابو الرگبة وبنطرون قماش اسود وقبوط اسود للورك، رشيت عطر وشسورت شعري علمود الجو لان باردة وطلعت.

جانت دتشرب حليب وكاعدة ع صفحة.
عقاب: كومي بدلي بساع

اماني: وين

عقاب: ميحتاج تعرفين، نفذي بسرعة

اماني: شنو ميحتاج شو انت مصدك روحك زايد؟

نطن اعصابي، خزرتها وكلت بنفاذ صبر

عقاب: اخر مرة اطول بال وياج، فضيني لا ارتكب بيج جريمة!

اماني: وينها طولة البال بلا شوفنيّاها؟
اجت باتجاهي تمشي وتحجي بحدة.

بحقد كلتلها: مجرد وجودج هنا وانتِ دتاخذين نفس اكبر طولة بال مسويها بحياتي

اماني: انت ليش هيج؟

تنهدت وكمشت ايدها قوي وحجيت واني صاك ع اسناني بغضب مكبوت.

عقاب: تمشين لو اسحلج سحل؟

جابت جاكيتها واجت، عفية بشر متجي الا بالعين الحمرة والتهديد!

...

بالسيارة، جنت اسوق وبالي مقبط بالافكار.. بيري حتزعل اذا تزوجت بعد موتها بهالسرعة؟!
لا مستحيل، اصلا اني ما معتبره زواج، هذا كله مجرد خطة واني دا انفذ حتى بالنهاية اكدر اخذ حقها وترتاح بكبرها..!

اماني: انطيني تلفوني

عقاب: كسرته وشمرته

اماني: صدكككك؟؟!!!!!

عقاب: مثل مسمعتي

اماني: منو سمحلك تتصرف بهالشكل؟ تلفوني شي خاص بيه منو انطاك الحق تشمره؟

عقاب: ما مضطر اخذ السماح من احد، اني اسوي الي براسي وبس وغصبن عاليرضى قبل الميرضى، بعد؟

اماني: انت واحد مريض!

دست بريك قوي بحيث ارتدت من مكانها ونضربت و صاحت بفزع.

بعصبية باوعتلها وكمشت حنجها بكل قوتي لدرجة كامت تبجي واني ولا يمها!

عقاب: دير بالج تعيدين هالكلمة، وكلامج ثمني قبل متحجي، والا مرة ثانية ما اخلي اعتبار لاحد وادفنج بكاعج

هزت راسها كم مرة ودموعها تتجارى على خدودها، عفتها ورجعت اسوق.

وصلنا للمحكمة، اخذت نفس وفتحت الباب اريد انزل، اجاني صوتها المتسائل.

اماني: شنسوي هنا؟

عقاب: نوثق زواجنا بالقانون دكتورة

اماني: انت اكيد تخبلت مستحيل اقبل

عقاب: اللهم طولج يا روح

اماني: ماريد اتزوجك افهم!!! اكرهكك

عقاب: علساس اني الميت عليج، نزلي فضيني بلا لغوة

اماني: عقاب لا فدوة، الله عليك، ماريد اتزوجك فدوة افهمني واعتقني!

لفظها لاسمي حرك شي غريب بداخلي، جانت تتوسلني بنظراتها وتطلب مني العفو، حسيت روحي المتوجعة تحركت بلطف، شنو هاي..شهالحجي عقاب لتسمح لشي يأثر عليك!

دفعت مشاعري وافكاري، لبست قناع القوة والحدة وكلت بجدية.
عقاب: لو تنزلين لو اكتل اختج وانتِ بكيفج

هزت راسها بلا ودموعها تنزل بخفة، درت وجهي عنها واخذت نفس، الهي شهالتناقض الي دا احسه ..!

نزلت واجت وياي، رحنه كملنا المعاملة ع اصولها بعدما اجو الشهود، ما اخذت منا وقت بسبب الواسطات الجانت موجودة، مؤيد وبركات راجعين ادميين، الظاهر اخر كتلة سوت شغل.

بالمحكمة جنت لازم ايدها كاجراء شكلي، تركتها اول مطلعنا وصعدت سيارتي، ماعرف شبيه احس روحي دتطلع!

صعدت وسدت الباب بهدوء، مشيت بالسيارة راجع للبيت وهي بلشت تبجي، ضمت ايديها لوجهها وتنحب بألم، حسيت شهكاتها دتطلع من كلبها ع كد قوتها، نكرت تعاطفي وياها ومثلت عدم الاهتمام، وصلت للبيت نزلتها.

ابتعدت خطوتين ووكعت بالكاع، شلتها طببتها جوة عالجرباية، مشفتها حطت شي بحلكها من البارحة واليوم، وهاي البواجي فوكاها شلون متفقد الوعي!

اففف الله يعينني ع هالبلاء!

شممتها عطر صحت، بس جانت نظراتها ذابلة وتعبانة.

عقاب: اني طالع، ميحتاج اكولج شيصير اذا خالفتي قواعد لعبتنا مو؟

دارت وجهها ومحجت، عفتها وطلعت للمكتب، وبلشت اشتغل وعقلي مو وياي، اني ليش خفت من وكعت قبل شوية؟!

ااا اي اكيد علمود الاتفاق، لازم تظل بأمان حتى اضمن تحقيق مبتغانا.

قسورة: كملت شغلتكم؟

عقاب: اي عاشت ايدك ما طولنا

قسورة: زين

كالها وظل يباوعلي منتظرني احجي، سألته.
عقاب: مضيع شي بوجهي؟

قسورة: شنو مصير الدكتورة؟

عقاب: مأجل التفكير بهذا الموضوع حاليًا، ع ما تمر هالاربع شهور وتفض سالفة الانتخابات.

قسورة: زين انت مرتاح هيج؟

ذبيت حسرة خانكتني وكلت.

عقاب: اني نسيت طعم الراحة من جنت ابن ال 17 سنة

قسورة: الله يساعدك خويي، بس صدكني كلمن همه شكل ومحد مرتاح بهالدنيا

عقاب: اي بس محد متلوع بعيشته بكدي.

قسورة: كول الحمدلله، غيرك ممكن يكون عايش بسوء اكبر من العشته انت

رفعت راسي وكلت: الف الحمدلله ع كلشي، لا اعتراض ع حكمتك الهي..

قسورة: هههه بشكلك هذا عوزك سبحة وعمامة وتصير حجي عقاب

باوعتله بملل
عقاب: كهكهكهكهكه

قسورة: تضحك بس انت صاير نفسية

عقاب: كوم من وجهي
حجيت واشرتله بحواجبي عالباب

قسورة: وربي اكبر نفسية وميتحاجة هو انت
حجاها وفلت

عقاب: اذا انت زلمة اوكف
وكفت بجدية

قسورة: يمك اني ارجع جنين صغيروني لتعصب حبيبي

عقاب: حبتك حية ابو لسان

قسورة:  هههههاي احبك وعلي

ابتسمت ع نبرة صوته وحماسه من كالها، وكعدت اركز بشغلي.
كلمات الحُب والغزل ماعرف اجاوبها، اكتفي بأبتسامة ممتنة فقط لان ما اعرف اعبر عن مشاعري بصورة صحيحة.

....

اماني

بعدما تركني عقاب وراح، ظليت افكر بكلامه الكاله، واتصارع ويه عقلي واني ادور ع مفر من هالسجن.. ولو اني وقعت ع ورقة اعدامي لحظة قبلت اتزوجه!

هسة اذا اطلع منا يكدر بكل سهولة يوصلي، ومو بس هيج، يأذي اهلي وبالاخص اختي ريما الي بكل مرة يهددني بيها!

ورة كم ساعة متعبة خلصتها اتلاطم داخل عقلي، نفضت افكاري وكمت، اخخخخ عظامي كلها توجعني من نومة الكاع، غسلت وجهي بمي بارد لان حسيته ديطلع منه نار وصخنت، اففف مناقصة اتمرض يربي، ويم منو؟ عقاب!

فتحت الثلاجة ادور ع شي اكله، احس معدتي كامت تهضم نفسها من كثر الجوع، من البارحة مماكلة شي.

شفت طبخات مجمدة، مرك وتشريبات جامدات، طلعتلي وحدة منهن واني مستغربة، منو بعده يسوي هيج بهالوكت؟!

فتحت بيبان الكاونتر كلها ادور ع كدر احمي بي الاكل، لكيت وفعلا اخذت الاكل حطيته بي وحطيته عالنار، جبت خس وكعدت اثرم وية اللهانة، شو اشتهيت زلاطة مدري ليش.

كملت الزلاطة حطيتها بالثلاجة، اندكت الباب بقوة لدرجة انخرعت!

رحت يمها بس مفتحتها، سمعت صوت بابا يسولف وية زلمه، رئسن فتحتها وركضت حضنته.

فرحت بشوفته بخير وهم لان كدر يلكاني، حضنني بقوة ويمسح ع شعري.

فصل الحضن واني جنت كوة لازمة دموعي.
رياض: لكيتج يروح ابوج انتِ، يلا بنيتي امشي نروح

جرني واني نفضت ايده بتوتر وكتله.

اماني: وين ماخذني بابا، اني ما اروح وياك لمكان، هذا بيت زوجي وهو مكاني الصحيح

صاح بيه: يا زوج هذا؟!!! شدتحجين ولج باباتي اصحي اصحيييي!

لزمت دموعي وكمت اجر بردانات بلوزي بتوتر، تناقض رهيب دا اعيشه، اريد ارجع وما اريد، اريد احط ايدي بايد بابا وانطي ظهري لكلشي، بس ما اكدر اكون انانية لهالدرجة واسبب الاذى لاهلي..!

اماني: ما اكدر بابا افهمني فدوة، روح ولتقلق عليه، اني بخير

عفته وطبيت لجوة، لحكني وهو يتوسل بيه اجي وابطل عناد.

رياض: اماني فضيني امشي لتشلعين كلبي باباتي ما عدنه وقت 

اماني: لا اشلع كلبك ولا تشلع كلبي، فدوة بابا روح وبعد لتجي

رياض: ولج شلوووووون!!!! خلي ببالج ما اطلع منا الا وانتِ وياي

اماني: بابا ليش تصعبها اكثر مما هي صعبة؟!

رياض: ولج شصعبها، بنتي عايشة وية شخص حاقد عليها وممكن بأي لحظة يأذيها!! حبيبتي كلبي نار عليج والبارحه كله ما غمضلي جفن واني افكر وادور عليج

دنكت راسي ونزلت دمعتي بقهر، اوووف بابا لو تدري شصار بالمدللة مالتك..

اجة صوت عقاب يرعد، جان واكف بالباب خلاني ارفع راسي بأتجاه الصوت مفزوعة.

عقاب: ولك انت بيا لغة احاجيك بعد و تفتهممممممممم؟!!

رياض: انجب لك هاي بنتييي!!! وما اتحرك منا الا اخذها واريد اشوف شلون تمنعني؟

ابتسم عقاب بأستهزاء ووكف بيني وبين ابوية، وحجة بتحدي.

عقاب: وهاي اني كدامك، واريد اشوف السبع الي يطلعها منا!

بابا ضيق عيونه بغضب، وعقاب حطني ورة ظهره، شعوري لحظتها ماعرف شكول عنه، لان الي دا احسه تخطى مرحلة الخوف، حتى كلبي من كد ما يدك سريع عبالك عندي خفقان.

رفع بابا سلاحه، وهاي اول مرة بحياتي اشوف ابويه كامش سلاح!
شهكت بفزع، استر يا رب.

عقاب ما اهتز ثباته للحظة، واني وراه اطكطك من الخوف وادعي الله ميصير شي لابوية.

  رياض: انطيني بنتي لا ادفنك هنا!

عقاب: انت لو واحد ببطنك؟

عكد بابا حواجبه ونتر بي.
رياض: كلبببببب!!

ثواني وطبوا زلم ورفعوا سلاحهم ع بابا، عقاب مبتسم بشماتة وبابا مرتبك من الموقف، لعد زلمه الي بالباب وين شو مالهم حس؟

قسورة بمرح: ذب سلاحك عمو النزيه لتتلوث

عقاب سانده وحجة بنفس نبرته : اي عمي العزيز هاي اساليبنا القذرة متليق بيك يفضل تتركها لأهلها

ذب بابا سلاحه واخذوه وطلعوا، واني كوة واكفة ع طولي، ع ساعة اوكع بس صامدة بالويل من خوفي ع بابا.

اماني: لتأذوه الله يخليكم، عقاب كوللهم ليسووله شي، احجي عقاب!!!!!
صحت بي وحسيت قوتي خارت، فجأة دخت وافترت بيه الدنيا وما حسيت ع شي بعد.

عقاب

بنص الوضع المتأزم ومحاولة الشباب ليطلعون الدكتور، وكعت الدكتورة وحرت بيها.

همزين ابوها طلعوه الولد والا شيفضج يطلابة.
هم شلتها ووديتها عالجرباية، وطلعت اشوف قسورة وضرغام وليث وشاهين شديسوون.

رياض: ولكم انتو ليش ما عدكم احساس؟ اني اب اب! ما عدكم اباء انتوا؟! متعرفون شكد حرام الي دتسوو؟!

جان واكف يحاجيهم واني بطلعتي سمعت هالحجي، عكدت حواجبي وبيدي جكارتي وتقدمت تجاهه.

عقاب: يؤسفني اكلك احنه كلنه الي كدامك معدنه اباء

انصدم واني ضحكت واخذت نفس من جكارتي ورجعت حجيت.
عقاب: بعدين وين الحرام الخابصنة بي؟ شو اني وبنتك متزوجين شرعًا وقانونًا وبكامل رضانا وموافقتنا، ونريد نكمل عمرنا سوة ليش تسوي هالمشاكل وتوكف بطريق حُبنا، هاا؟
حجيت اخر كلمة وضحكت، اخخخ شكد تضحك هالسالفة.

رياض: انت مريض نفسي، مستحيل تكون انسان صاحي!

هو كال هيج واني شياطين الدنيا كلها تربعت براسي، ضربته كلة وكع بالكاع وكعدت فوكاه بوكسات ووين يوجعه، الا قسورة والولد فكوني منه.

طبيت للبيت ورة نص ساعة تقريبًا، غسلت وجهي وشفت اكو كدر عالطباخ، رحت طفيته وتذكرت الدكتورة مغمى عليها!

تنهدت بضجر ورحت رشيت عطر يمها، استنشقته وكعدت ترفرف بأهدابها ع كيف، شوية وصحت.

سئلتني بقلق: بابا وينه شسويتوله؟؟!!

درت وجهي وكمت.
عقاب: مسويناله شي، لتخافين

سمعت صوت تنفسها المرتاح، فتحت كنتوري اخذت منشفة وسديته، نزعت القبوط والبلوز  ورحت اسبح.

..

اماني

شو هذا بايع المستحة فد مرة، شلون ينزع ملابسه بوجودي!
درت وجهي عنه، لحد ما راح توجهت للمطبخ كوة اسحل بروحي، تذكرت الاكل كلت راح احترك!

رحت شفته مطفية النار جواه وما بي شي ممحروك!
اكيد عقاب مطفيها!

ابتسمت ورحت جبت مواعين صبيت وطلعت الزلاطة، كعدت اكل عالطاولة، اوووف شكد جنت جوعانة ومادري بروحي!

طلع من الحمام وهو لاف المنشفة ع خصره، شعره كله شامبو بعده!
اجة يمي وفات من كدامي راح للكاونتر، اخذله علبة مدري شنو مناك وراح، بس الي يصفنني شلون يكدر يكون بكل هالهدوء وميلتفت لاحد!! كمت احس روحي شبح ع كد ما متجاهلني.

شوية وطلع، هم بالمنشفة اهووو شلون شغلة هاي، درت وجهي واجة كعد كبالي.

رفعت راسي باتجاهه ببطء، هو ولا كأن ممنطي اي اهمية الي او لشنو ممكن افكر عنه!

عقاب: صبيلي اكل

بلعت ريكي بتعجب، هذا شبي؟!

عقاب: الووو تسمعيني؟

اماني: ه.. هااا اي اي كايمة

كمت اصبله واني مستغربة، هو مو ميريد اتقرب لشي يخصه او بالاصح ميريد شي مني يلمس غراضه!؟

...

-انتهى!

-زيدوا تفاعلكم حبيباتي ولا تنسون التصويت 🖤.

-الي مضايفتني انستا، خ تضيفني 🌚🖤 noormin13

-الى اللقاء قريبًا..

#الكاتبة نورمين 🖤