رواية خطأ طبي «عقاب الاماني» الفصل الثالث 3 - بقلم نورمـين

#خطأ_طبي «عقاب الاماني»

بقلــم : نورمين 🦋🖤

...

الحجي: سلم ع نسيبك الجديد اغاتي

تخبل رياض وكام يصيح ويهدد ويتوعد، اني ادري بالحجي ميخطي خطوة بدون حساب، فأكيد هالشغلة بيها صالح.

رياض: تحللللم! عبالك تلوي ذراعي بهاي السالفة! لا عيني.. لا عاش ولا كان اليلوي ذراعي او يمس بنتي، فاهم لو لا؟

عقاب بحدة: احجي بأدب دكتورنا

رياض: مو انت لتعلمني شلون احجي!

عقاب: صح لان اسلوبك اسفل من انو واحد يعلمك ع احسن منه

رياض: كوموا طلعوا برا بيتييييي!!!!!! يلااااا

الحجي بكل هدوء، كام وحجة: انجب لتصيح، اني اصلا ميشرفني اتواجد ببيت شخص رذيل مثلك

مشينا كم خطوة، التفت الحجي ع رياض لكاه واكف ويطكطك من الخوف بس يكابر ويحاول يبين العكس.

الحجي: تتذكر من كتلك يجي يوم اندمك ع كل تصرفاتك؟ ولله واجة هاليوم!

ضحك و دار وجهه ومشى، طلعنا وصلنا للسيارة، اجة صاح علينا.

رياض: ارجعوا.. خلي نتفاهم.

الحجي: تحلم، كتلك اندمك

رياض: فدوة لعينك لا حجي، بنتي مو حمل هيج مشاكل

الحجي: جان فكرت بيها من ظليت تهوبز ع روسنا

رياض: حجي فدوة لعينك حط نفسك بمكاني وحاول تتفهمني

الحجي: احط نفسي بمكانك؟ كش وبرة

دار وجهه وصعدنا بالسيارة، رياض ظل يدك عالجامة ويتوسل والحجي كال لقسورة اطلع معليك بي.

التفتت ع الحجي وسألت.
عقاب: شنو الوشة؟

الحجي: خليها عليه ويجيك الصافي ليمك

عقاب: خوش لعد

قسورة: زين يابه ليش تريد تزوجها لعقاب؟ بارود ونار شلون تجمعهن سوة؟

الحجي:  حتى تكب

ضحكت، فهمت شيريد يسوي الحجي، يضرب عصفورين بحجر، هم يضمن ابوها بحزبنا وهم يخليها يمي اخذ حيفي منها!

قسورة: مو خوش خاف يورث صاحبنا؟
حجاها وضحك، خزرته دار وجهه.

الحجي: لتخاف ميورث لانه منتهي جدحة ما بي

عقاب: يابة هاي مدح ذم؟

الحجي: مدح بوية هههه
ضحك وقسورة لازم روحه كوة، باوعت عالشارع وصفنت، هو اني صدك منتهي وما بيه جدحة، غادي رماد..

...

اماني

كاعدة بغرفتي ويمي اختي ريما، نباوع فلم عالتلفزيون، مجان بواهسي صافنة عالشاشة بس بالي مو يمه ابد.

طب اخويه ريان ع كيف وخرعنا لان محسينا عليه، شمرته بالمخدة وهو يضحك ع ردة فعلنا المفزوعة.

ريما: ثول وبصفه كبر شبيك انت شبيك؟!!

كعد عالجربايه وشمرها بمخدة.

ريان: انجبي دبسز اخوج الجبير اني

ريما: دروح هن بيناتنا 4 دقايق (لان همه توأم متماثل)

ريان: اي ان شاء الله مو بعينج؟!

رجعت شمرت عليه المخدة
ريما: كوم اطلع منا شعندك جاي يمنه

ريان: وانتِ منو جاي يمج ام حلك، اني جاي لاختي مون

ريما: ماكو فرق لان هاي غرفتي ترا مثلما غرفتها

اماني: ريري كافي فدوة

سكتت واني باوعت لريان، سئلته بأرهاق.
اماني: شعندك تريدني؟

عدل كعدته وكال: بابا يريدج وبيني وبينج حسيته كلش متضايق، سئلته شكو شبيك ميحجي بس كال صيح مون

ريما: قبل شوية جان يسولف ويضحك وياي، شصار ع غفلة؟

رفع اكتافه بمادري، واني حجيت بملل.

اماني: اكيد علمود سالفتي، ياريت لو الله ماخذني وميتة قبلا اسوي هالسوايه

كمشتني ريما من جتفي.

ريما: انتِ ممتعمدة افهمي هشي، بعدين انتِ انجبرتي تسويلها العملية وتصرفتي بدافع انساني لتظلين تلومين بروحج عالرايحة والجاية

ريان: اول مرة تحجين حجي بي حظ ريري

ريما: انت نجب

اماني: انتوا مدا تفهموني..  اني ليش رح اتخبل لعد؟ لان ممتعمدة ولان انجبرت ولان تصرفت بأنسانية! مجان لازم اتصرف هيج كله بسببي راحت بنية مثل الوردة من هالدنيا

ريان: مون حبيبتي كم مرة حتعيدين هالحجي؟ مو كلنا هذا قدر وصار، شبيدج قابل؟ لو الندم والبجي يفيد جان كلها بجت بس ميفيد، لتظلين عايشة بهاي الحادثة، ركزي شلون تسويها دافع الج حتى تتقدمين وتصيرين احسن من قبل

اماني: واهسي انكسر للاسف ..

ريان: مو مشكلة نلزكه

ريما: هي هاي حقيقتك، واني اكول شعجب حجة حجايتين براسهن حظ ثاري رح يجفص وراهن

عفتهم يتمالخون ونزلت اشوف بابا شعنده، جان وجهه ميتفسر حسيته كلش محتار وضايع.

كعدت وسئلته.

اماني: ردتني بابا ؟

رياض: اي بنيتي، بصراحة يعني ..

خوفني تقطعه بالكلام وتوتره الواضح، فحجيت بقلق
اماني:  شكو بابا شصاير؟

رياض: مادري منين ابدي وشنو احجي ..

اماني: علمود الخطأ الطبي مو؟

هز راسه واني تنهدت، شكو بعد يربي، ما كافي الصار..

اماني: شصار بعد؟

رياض: قبل شوية اجه حجي حمزه

اماني: شعنده هذا؟

رياض: جايج بالحجي

اماني: تمام كمل

حجالي كلشي صار واني ظليت مصفصفة من الصدمة، شكد صغيرة هالدنيا!! من بين كل البنات بالكون، صارت الحادثة ببنية تخصه للحجي!
ومو بس هيج، يزوجني اخو البنية! لا هذا اكيد ناوي عليه بالموزين..!

لحظة... تذكرت وين شفته لاخوها! جان ويه الحجي بيوم اجوا لبيتنا.

بس شلون اتزوجه؟ واصلا شله بهالسالفة كلها من الاساس!!!
اني فكرة موت البنية وحدها معذبتني ومعيشتني بكابوس، لعد لو اظل عالطالعة والنازلة اشوفه شراح يصير بيه؟!

لا مو هذا السؤال الصحيح، بالاصح هو شراح يصير بي من يشوفني افتر كباله؟
واصلا ليش يريد يتزوجني!!!
هي وحدة من الاثنين لو عاجبه يذلني ويعذبني لو مشتهي حركة الكلب وميدري شون يحصلها.

اماني: وشنو الحل بابا؟

رياض: ما ادري .. بس مستحيل اسمحلهم ينفذون الي براسهم، اعرض عليهم فلوس مناصب اي شي بس يتركون هالسالفه

اماني: زين.. واذا مقبلوا شصار؟
حجيتها بقهر، ماريد اتخيل شراح يصير اذا مقبلوا ..

رياض: يقبلون معليج، هو جان كاتل نفسه حتى ادخل بحزبه، علمود تصعد حظوظهم بالفوز بالانتخابات ويحصلون مقاعد اكثر

اماني: ياريت ..
زفرت بضيق، شجابني ع هالسوالف اني؟! اووف يربي شوكت تخلص هالسالفة مو حتى كرهت الطب.

رياض: خلي عندج ثقة بأبوج حبيبتي

اماني: واثقة بيك باباتي، بس معندي ثقة بالناس ولا بالدنيا..

رياض: لعد خلي ثقتج بالله جبيرة، هو اعرف بوضعج واكيد مراح يسمح تتأذين.

اماني: ونعم بالله..

ثاني يوم داومت بالمستشفى الجديد الي انقلت الها، اول يوم واحس بغُربة فضيعة بس يلا اهون من العرّف مال قبل.

المستشفى هاي انظف وارتب وحتى كادرها الطف من ذيج، ليش مجابني حظي لهنا من الاول؟

خلصت الوقت افرفر بين ردهة وردهة لحد ما خلصت دوامي، طبيت لغرفة الدكتورات اخذت غراضي ونزعت صدريتي وطلعت، فتحت تلفوني الي جان صامت وشامرته بالجنطة، جان اكو كم مكالمة فائتة من ريما وريان وبابا متصلين قبل كم دقيقة، كلبي لعب هاي شكو كلهم مخابريني؟

اتمشى طلعت من المستشفى واتصلت ع ريما.

اماني: الوو ها ريري شبيكم؟ قلقتوني باتصالاتكم خو ماكو شي؟

ريما: انتِ ليش متجاوبين ع تلفونج؟

اماني: جنت بالطوارئ وتركته بالغرفة، ليش شكو؟

ريما:  ابقي بالمستشفى لتطلعين ترا بابا جايج بالطريق

تحجي واني عيوني متوسعة والصدمة محتلة كل جزء بيه، وكف كدامي رجال طويل كلش ملتحف بالسواد من فوك ليجوة، ملامح وجهه تختزل كل الحدية الي بالكون.. ركزت اكثر، هذا نفسه اخو البنية! 

ريما: اماني تسمعيني، وينج وين رحتي؟ يا الله شلعت كلبي هالبنية

جر التلفون من ايدي، سد الخط واني بعدني مرعوبة، ومتصنمة بمكاني، لا حجاية تطلع مني ولا رجليه تعينني اشرد، احس الموت تجسد كبالي وبعد مالي مهرب منه!

عقاب: امشي وياي بأدبج ولتخليني استخدم غير طرق وياج
وخر جاكيته للجانب وبرز سلاحه، بلعت ريكي بخوف، صوته من كد الحدة البي عبالك فحيح حية مو صوت بشر!

نفذت واني ساكتة، مشيت وياه ودكات كلبي ترعد بداخل صدري، شيريد مني وليش اجاني لهنا؟ يريد يخطفني اكيد مبيها مجال للشك، ومو بعيدة يهددون ابوية بيه، اي وليش لا يسووها.

باوعت يمنه يسرة، شارع حيوي وبي كومة عالم، اذا اشرد منه هسة شيريد يسويلي قابل؟
اخذت نفس، غافلته وركضت بعيد عنه بين السيارات، اجيت اندعم بس ميخالف الروح ماكو اعز منها بهيج حالات، التفت الكاه ورايه، يبوو عليج اماني شون بيج هسة، عبرت الشارع كله ركض وكلبي يريد يوكع كدامي من الخوف.

عثرت بشارع ترابي ووكعت، شلت راسي لكيته كدامي، هالمرة اكو ابتسامة شريرة مرسومة ع وجهه.

عقاب: الظاهر انتِ مثل السيد الوالد، متجين بالعيني والاغاتي

صحت بي:  احترم نفسك!

ضحك وكال بسخرية.
عقاب: زين طلع عدج لسان، عبالي نخرستي من الهبطة

اماني: انت شتريد مني؟ عوفني فدوة

عقاب بـغل جبير: اريد حق اختي من عيونج دكتورة 

اماني: اسفة، ما جنت قاصدة، ما جنت اعرف هيج حيصير، ندمانة وكلش حزينة ع الصارلها ولله

عقاب: بشنو يفيدني ندمج واسفج هذا؟ اختي ماتت بسببج!!! بسبب جهلج وغبائج فقدت اختي واعز بشر ع كلبي!

بجيت بقهر: اسفة ولله اسفة ...

جرني من ايدي حسيتها انخلعت، كومني.

عقاب: كلش جاي ع بالي احسسج بنفس احساسي، بس يا ترى اكتل ابوج الهيبة لو اخوج المايع شرايج بلا منو اختار؟! او لا لا اكتل اختج الحلوة حتى نتعادل، وارجع اكلج اسف وندمان، شنو حيكون رد فعلج ساعتها؟

طول ما هو يحجي دموعي تنزل بحرارة ع خدودي، مجرد كلام وهيج اذاني شحال لو صدك، الله يعينه ما الومه لو ملخني، بس خلي يخلص حسابه وياي، اهلي مالهم ذنب بغلطي.

اماني: لا فدوة كلشي ولا اهلي، اكتلني الي حسابك ويايه اني، معليك بيهم لخاطر الله لتأذيهم

عقاب: هذا اختيارج النهائي؟ فكري زين ترا ماكو رجعة من هالدرب بعد

هزيت راسي بالموافقة وكل جسمي يرجف بخوف.

عقاب: عفية، لعد نفذي الراح اكولج عليه مثل الشاطرة، ها وخلي ببالج اي حركة منا منا اختج تروح بالرجلين، فصيري حبابه احسلج

اماني: انفذ ولله بس عوف اهلي

مدلي تلفوني الي اخذه مني قبل شوية، اخذته.

عقاب: اتصلي ع ابوج، كليله خلي يجي لمكتب الحجي فورا

اماني: شنسوي هناك؟

عقاب: حتى نعقد اني وانتِ دكتورة

صفنت بوجهه وتجمعت دموعي بعيوني، اتزوجه؟!

عقاب: لا تتصفنين هواي، وفري دموعج بعدنا ما كلنا يا الله تحتاجيهن بعدين

اماني: ليش تريد تتزوجني؟ اكتلني وريح نفسك وريحني!

تقرب يمي، ضحك بسخرية وكال.

عقاب: لا، عاجبني اعذبج واذلج ع البطيئ، واخليج تشتهين الموت ومتحصليه، الموت السريع هذا احسن هدية ممكن تحصليها، فلا تحلمين تخلصين مني بسهولة ابد!

سكتت واني اتخيل كمية العذاب المنتظرني، كون وياي يا رب..

...

عقاب

بمكتب الحجي كاعد وبصفي الدكتورة، والحجي والحرس جوة واكفين بس يوصلون يخابروني.

من بعد التهديد، رضخت بسبب حبها لأهلها طبعًا وحتى ليتأذون، الحجي انطاني هالاوامر طبعا حتى يخلي رياض يتوسل ويرجع لورا.

بركان الغضب الي بداخلي فار وحممه البُركانية نزلت و غركت المكان، بس شفت الدكتورة كبالي!
سبب موت اختي يمشي كدامي! هي عايشة حياتها ولا كأن سوت شي، واختي نايمة جوة التراب، ليش؟ ومنو يرضى بالصار؟!!

بعيدًا عن سوايتها، اني مجنت راضي ع سالفة التهديد بس الحجي كلي مجرد تخويف حتى يرضخون النا، نفذته وللأمانة منظرها المرعوب مديروح من مخيلتي...

دموعها وخوفها وقلقها، شغلات اكره اشوف اي مرة تعاني منهن، حتى هي!

ورة وقت، اجة ابوها اتصل عليه ضرغام  -من الحرس- بلغني.

عقاب: وصل الطرد يابة

الحجي بضحك: يا هلا بي
الدكتورة محجت شي، بس خوفها وتوترها مفضوح من تصرفاتها وشكلها.

طب علينا ابوها مثل الاعصار.

الحجي: يا هلا بدكتورنا الغالي

اجة كمشهة جرهة عليه وحجة بعصبية.

رياض: شنو هالتصرفات حجي؟!! شغلك وياي اترك بنتي كتلك، وشتريد يجرالك

الحجي واكف مسيطر، جريت ايدها بقوة من ابوها واخذتها بصفي، خزرني وصاح.
رياض: شيل ايدك عنها كلببب!!!!

الحجي: وانت شكو؟ رجال ومرته بيناتهم!

ضحكت لما شفت تعابير الصدمة احتلت وجهه، شديت ع لزمتي لكتف الدكتورة وحضنتها لكتفي وكلت.

عقاب: عمي العزيز، ماكو مبروك؟

انكلب لونه وكام ميعرف شيحجي، عيونه ع بنته ويدور بوجهها رد يرضي بس للاسف! نزلت راسها حتى تتفادى نظراته المؤنبة الها.

قبل نص ساعة ~

وصلت للمكتب، جان الحجي جايب الشيخ، ومنتظرينا.

اماني: لا ما اريد، خ يجي بابا بالاول

عقاب: كعدي يلا

اماني: ابوية وين؟!!!
كعدت وهي ظلت واكفة، اجة الحجي جان يخابر.

فتح المكبر وكال: دكتور رياض يمك مو؟

رد عليه قسورة: اي يابه يمي لتهتم

وسعت الدكتورة عيونها وحجت بخوف.
اماني: لا كلشي ولا بابا فدوة لتأذوه ابوس ايدكم

عقاب: كعدي وفضينا لعد

اماني: بس ..

قاطعها الحجي: كلما خلصتوا عقد اسرع كلما تكونين تلاحكتي ابوج وضمنتي سلامته وبكيفج بعد

محجت شي، دموعها نزلت وبلشنا باجراءات العقد الشرعي، طلع الشيخ بعدما ودع الحجي.

الحجي: بوس عروستك وليدي

زفرت بغضب، ع اعصابي كاعد وياها لخاطر خطة الحجي.
جريتها بست راسها من ورة خشمي وكعدت، وهي دموعها ما نشفن ابد.

رياض: شنو معناها هاي؟ شنو هي بكيفك وتتزوجها؟ اني ما راضي طلكها احسلك

عجبني ثقته، رديت بتحدي: منو الطالب رضاك اصلا؟ هذا قرار راجع الي والها، تقبل الواقع احسن الك

هجم عليه بس الحجي وكف بيننا، بنته ظلت تبجي وتنحب، صحت بيها بنفاذ صبر لان اتخبل من دموع النسوان!

عقاب: بسچ !

الحجي: عقاب بمثابة ابني ترا، وبنتك صارت چنتي، سواء رضيت او ما رضيت هاي هي الحقيقة

رياض بعصبية: لك انت شنو من بشر!!!

رفع الحجي جتافه بمادري وراسم وجه بريئ.

رياض: احجيلي بابا اماني شسوولج؟ ليش تزوجتي اني وياج مو اتفقنه نحلها بغير طريقة، ها حبيبتي ليش هيج سويتي بيه!!؟

يحجي وهي تبجي بلا متجاوبه، احس كلبي صار حجارة لا حس ولا عاطفة ولا اي شي يأثر بيه بعد.

حجيت بنفاذ صبر: دكافي عاد، هي قابلة بعد شكو هالعزا؟ ترا تزوجت ما وقعت ورقة اعدامها؟!

رياض: اكيد جبرتوها، احجي بشنو هددتها؟ بيه لو باخوتها؟!! اساليبكم القذرة اعرفها كلش زين

الحجي بغضب: سكتتلك هواي، تنجب لو شلوووووووننننن؟؟!!!

رياض: باباتي احجي شي ليش هيج سويتي؟

انداريت عليها خزرتها واشرتلها بعيوني جاوبي، باوعتلي بخضوع وحجت.

اماني: محد جبرني، اني تزوجت بكامل ارادتي

رياض: ولج لييييش تجذبين؟ احجيييي تدرين ما اعوفج لو ع كص ركبتي!!! ولله اخذج منهم وفنة الي يجي يمج!

رمشت بملل، شوكت تخلص هالمسرحية التراجيدية!

عقاب: خاب هي كوة لو شنو؟ كلتلك بارادتي تزوجت كافي تلح!

رياض: انت محد موجهلك كلام، دا احاجي بنتي

عقاب: افااا عليك عمي، بس يلا تمون،  استمر بلا خ نشوف تاليها شنو
كلت باستهزاء، اكول يمكن لان ما لحكت اعيش شعور الخوف بعيون ابوية علينه هيج مستخف بمشاعرهم!

اماني: بابا اني بارادتي تزوجت، محد جبرني ومحد اثر عليه، رجاءًا لتدخل بحياتي واتركني اقرر شنو اريد

صدمتني من حدية كلامها للامانة!
واضعاف صدمتي جان وضع ابوها، استخطيته للحظة بعدين رجعت دست ع نفسي واخذتها وطلعت.

وكفني ابوها ميقبل اخذها.
رياض: ولله متاخذها لمكان، عوفها!

عقاب: وخر منا يمعود لتخليني امدك مثل الزولية

دفعته ومشيت، لزموه الولد ثبتوه والحجي ظل يحجي وياه.

جانت تبجي واني اجر بيها وهي تصيح عوفني اريد احاجي ابوية،  بس ظليت مغلس لان ما بيه حمل مشاهد درامية بعد.

رفعت ايدي لقسورة بحركة عنوانها الوداع وجريتها لسيارتي، صعدتها ورجعت صعدت، رئسن حجت.

اماني: ارتاحيت هيج هسة انت والحجي مالتك؟

عقاب: لا لسة، هذي مقبلات خفيفة وداعتج لسة منتظرتج الاطباق الرئيسية، فد شي تلوك لهالحلك! 

اماني: حقير!

عكدت حواجبي بغضب ومديت ايدي لزمت حنجها وكلت بغضب.
عقاب: انتِ سبب وجود هالحقارة هاي كلها، هذا الوحش الي كدامج من صنع ايديج، كلما تشوفيني تذكري غلطج، وتذكري اختي الي ماتت بعمر الوردة بسببج! واصلا اني اوعدج بالايام الجاية مراح تكدرين تنسين!

محجت شي، ظلت تباوع بعيوني ودموعها تجري بخوف ممزوج بالحزن، عفتها وسقت للبيت، الطريق كله اسمع صوت بجيها وشهكاتها، دمرتني!

وصلت للبيت، نزلت وهي ظلت بمكانها ما تحركت، رحت يمها فتحت الباب.

عقاب: متنزلين شمتانية خاتون؟ خاف تريدين افتحلج الباب؟

نزلت بسكوت، مشت كدامي بارتباك واني وراها، عصرني كلبي لمجرد تذكرت انو اني جبت قاتلة اختي ع البيت!
بس هاي اوامر الحجي بعد، مجبور التزم بيها لفترة.

فتحت الباب دخلت وهي ورايه، كعدت ع القنفة ورجعت راسي لورا، اخذت نفس عميق وزفرته.

هي ع نفس وكفتها ووجهها لسة يبجي.

عقاب: جيبيلي مي

ظلت واكفة تباوعلي بفراغ، نترت بيها

عقاب: ثولة متسمعين؟ جيبيلي سم!

خزرتني و راحت، بعدين تذكرت هاي متندل المطبخ وين اساسًا!
كمت وراها، لكيتها واكفة ع المغسل تبجي وتغسل وجهها، تقدمت يمها بلامبالاة وحجيت حتى تنتبه.

عقاب: ضيفي للثولة عمية هم

اندارت عليه، تجاهلتها وجبت كلاص واخذت الدولكة صبيت منها مي.

عقاب: كدامج الدولكة والكلاصات ترا

اماني: شنو غايتك؟

شربت مي، ادور سويت اححح، بعدين كلتلها واني اصك ع اسناني واعدد.

عقاب: تعاستج، عذابج، اذيتج، وهيج شي يعني!

اماني: هذا البيت المن؟

عقاب: الي

اماني: ما اريد ابقى هنا، رجعني لبيت اهلي رجاءًا

عقاب: لا بلا؟ خاف عبالج دنلعب احنه؟

اماني: ليش مبقيني هنا شتريد انت!!

عقاب: زيدي ع الثولة والعمية، غبية! شلون صرتي دكتورة مادري! ما ادليني ع الكلية الاخذتي منها شهادتج؟ اريد اروح واتفل بنص كصته للي انطاها الج

اماني: احترم نفسك عاد!!!

عقاب: هه لا بلا صدك؟
تقدمت عليها وهي ظلت واكفة مكانها، فاجئتني!

اماني: اسلوبك رخيص

عقاب: يناسب الرخاص، امثالج..

خزرتني ورادت تعبر وتطلع، لزمت ايدها بقوة وكلت.

عقاب: من اسمحلج تروحين، ساعتها بس تولين، غيرها؟ تتندمين صدكيني 

اماني: عوفني، اترك ايدي دتأذيني!!

ضحكت باستهزاء وشديت ع لزمة ايدها بقوة اكبر.

عقاب: انتِ اجيتي لهنا برجليج، اني ما جبرتج ع شي، كلشي صار جان اختيارج، وهاي هي نتيجة افعالج.. العقاب! واني رح اكون عقابــج القاسي دكتورة!

عيوني جانت شوية و تطلع شرار من الغضب، ناري زادت بوجودها ببيتي بدال اختي! جان المفروض تكون بيري هنا!

فتى بأحلام بريئة ..
حاربتهُ المآسي من جميع النواحي والاتجاهات الممكنة..
لوثـتهُ الحياة بقذارتها ومخلفاتها البشعة..
ليصبــح مرادفًا لها بالقسوة واللارحمـة..

وها قد حان وقت بدأ العقـــاب..

حيثُ لن يكون هنالك متسع للرحمـة او الشفقـة ..
لا مجـال للعودة او التوقف حتى ..

الدموع، الخيبات، الانكسارات، الاحزان، امورٌ سـتتجدد بأستمرار..

ستتحطم القلوب وتتدمر النفوس وتدهس المشاعر..

لتكون جميع الاماني مطلبها عقابٌ رؤوفٌ..!

...

-انتهى!

-شنو توقعاتكم؟ شنو حيسوي عقاب؟
تعالوا لحسابي الانستا نسولف هناك وننزل تغشوشات وتصاميم حلوة noormin13

- لتنسون التصويت.🖤!

-الى اللقاء قريبًا..

#الكاتبة نورمين 🖤🖤